ᠨᠡᠭᠦᠳᠡᠯ ᠡᠴᠡ ᠨᠡᠭᠦᠳᠡᠯ ᠤᠷᠤᠭᠤ- ᠭ· ᠴᠢᠩᠪᠠᠭᠠᠲᠤᠷНүүдлээс нүүдэл руу-Г· чанбаатар
405 ᠭ· ᠴᠢᠩᠪᠠᠭᠠᠲᠤᠷ
ᠪᠢᠳᠡ ᠪᠣᠯ ᠨᠡᠭᠦᠳᠡᠯᠴᠢᠳ ᠦ᠋ᠨ ᠬᠣᠢᠴᠢ ᠭᠡᠵᠦ ᠮᠠᠨ ᠤ᠋ ᠬᠢᠳ ᠣᠮᠣᠭᠲᠠᠢ ᠶᠠᠷᠢᠵᠤ᠂ ᠳᠣᠮᠣᠭᠲᠠᠢ ᠪᠢᠴᠢᠵᠡᠭᠡᠳᠡᠭ᠃ ᠬᠥᠭᠡᠷᠦᠬᠦᠢ! ᠣᠳᠣ ᠴᠣᠬᠣᠮ ᠴᠤ ᠨᠡᠭᠦᠳᠡᠯᠴᠢᠳ ᠢ᠋ᠶ᠋ᠡᠨ ᠪᠣᠯᠵᠠᠢ᠃ ᠨᠡᠭᠦᠳᠡᠯ ᠮᠠᠯᠵᠢᠯ ᠠ᠋ᠴᠠ ᠪᠠᠨ ᠰᠠᠭᠤᠷᠢᠰᠢᠯ ᠮᠠᠯᠵᠢᠯ ᠤᠷᠤᠭᠤ᠂ ᠪᠡᠯᠴᠢᠭᠡᠷ ᠦ᠋ᠨ ᠮᠠᠯᠵᠢᠯ ᠠ᠋ᠴᠠ ᠪᠠᠨ ᠬᠠᠰᠢᠶᠠᠨ ᠤ᠋ ᠲᠡᠵᠢᠭᠡᠪᠦᠷᠢ ᠤᠷᠤᠭᠤ᠂ ᠬᠥᠳᠡᠭᠡ ᠡᠴᠡ ᠪᠡᠨ ᠬᠣᠲᠠ ᠤᠷᠤᠭᠤ ᠨᠡᠭᠦᠭᠰᠡᠭᠡᠷ᠂ ᠨᠡᠭᠦᠭᠰᠡᠭᠡᠷ᠁ ᠮᠣᠩᠭᠣᠯᠴᠤᠳ ᠤ᠋ᠨ ᠲᠡᠦᠬᠡ ᠨᠡᠭᠦᠳᠡᠯ ᠦ᠋ᠨ ᠰᠢᠷᠭᠠᠯ ᠲᠣᠭᠣᠰᠣᠨ ᠳᠤᠮᠳᠠ ᠪᠢᠴᠢᠭᠳᠡᠭᠰᠡᠨ ᠭᠡᠳᠡᠭ᠃ ᠡᠨᠡ ᠠᠤᠭᠠ ᠲᠡᠦᠬᠡ ᠶ᠋ᠢᠨ ᠦᠷᠭᠦᠯᠵᠢᠯᠡᠯ ᠴᠦ᠍ ᠥᠭᠡᠷᠡ ᠨᠢᠭᠡ ᠨᠡᠭᠦᠳᠡᠯ ᠦ᠋ᠨ ᠬᠠᠷᠠᠮᠰᠠᠯᠲᠤ ᠶᠠᠪᠤᠴᠠ ᠳᠤᠮᠳᠠ ᠪᠢᠴᠢᠭᠳᠡᠬᠦ ᠨᠢ ᠠ᠋᠁
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠢ᠋ ᠭᠠᠷᠰᠢᠭᠤᠯᠤᠭᠰᠠᠨ ᠲᠡᠦᠬᠡ ᠪᠠᠷᠤᠭ ᠲᠦᠮᠡᠨ ᠵᠢᠯ ᠦ᠋ᠨ ᠲᠡᠷᠲᠡᠭᠡᠬᠢ ᠲᠡᠢ ᠬᠣᠯᠪᠣᠭᠳᠠᠨᠠ ᠭᠡᠳᠡᠭ᠃ ᠵᠡᠷᠯᠢᠭ ᠠᠮᠢᠲᠠᠨ ᠢ᠋ ᠬᠠᠰᠢᠶᠠᠨ ᠳ᠋ᠤ᠌ ᠳᠠᠰᠬᠠᠵᠤ ᠲᠡᠵᠢᠭᠡᠨ ᠨᠣᠮᠣᠬᠠᠷᠠᠭᠤᠯᠵᠤ ᠪᠠᠢᠭᠰᠠᠨ ᠡᠷᠲᠡᠨ ᠦ᠌ ᠰᠠᠭᠤᠭᠠᠯᠢᠴᠢᠳ ᠠᠭᠠᠵᠢᠮ ᠢ᠋ᠶ᠋ᠠᠷ ᠨᠢᠭᠡᠨᠲᠡ ᠭᠡᠷᠰᠢᠨ ᠳᠠᠰᠤᠭᠰᠠᠨ ᠮᠠᠯ ᠢ᠋ᠶ᠋ᠠᠨ ᠪᠡᠯᠴᠢᠭᠡᠷᠯᠡᠭᠦᠯᠵᠦ᠂ ᠡᠷᠦᠬᠡᠨ ᠭᠡᠷ ᠢ᠋ᠶ᠋ᠡᠨ ᠴᠦ᠍ ᠢᠰᠡᠭᠡᠢ ᠭᠡᠷ ᠪᠣᠯᠭᠠᠨ ᠥᠭᠡᠷᠡᠴᠢᠯᠡᠵᠦ᠂ ᠪᠠᠢᠭᠠᠯᠢ ᠶ᠋ᠢᠨ ᠵᠢᠮᠡ ᠳ᠋ᠦ᠍ ᠦᠨᠳᠦᠰᠦᠯᠡᠨ ᠨᠡᠭᠦᠳᠡᠯ ᠮᠠᠯᠵᠢᠯ ᠠᠮᠢᠳᠤᠷᠠᠯ ᠬᠢᠬᠦ ᠪᠣᠯᠵᠠᠢ᠃ ᠨᠡᠭᠦᠳᠡᠯ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠡᠭᠦᠰᠦᠭᠰᠡᠨ ᠪᠢᠰᠢ᠂ ᠬᠠᠷᠢᠨ《ᠵᠢᠮᠡ ᠶᠣᠰᠣ》 ᠭᠡᠭᠴᠢ ᠡᠷᠬᠡᠪᠰᠢ ᠵᠢᠷᠤᠮᠯᠠᠬᠤ ᠪᠠᠢᠭᠠᠯᠢ ᠶ᠋ᠢᠨ ᠵᠠᠬᠢᠷᠭᠠ ᠪᠠᠢᠭᠰᠠᠨ ᠠ᠋ᠴᠠ ᠶᠤᠮ᠃《ᠪᠠᠢᠭᠠᠯᠢ ᠣᠷᠴᠢᠨ᠂ ᠪᠡᠯᠴᠢᠭᠡᠷ ᠤᠰᠤ᠂ ᠮᠠᠯ ᠰᠦᠷᠦᠭ (ᠲᠠᠪᠤᠨ ᠬᠣᠰᠢᠭᠤ ᠮᠠᠯ)᠂ ᠬᠥᠮᠦᠨ(ᠨᠡᠭᠦᠳᠡᠯᠴᠢ ᠮᠠᠯᠴᠢᠨ) ᠭᠡᠰᠡᠨ ᠠᠮᠢᠳᠤ ᠪᠠᠢᠭᠠᠯᠢ ᠶ᠋ᠢᠨ ᠪᠢᠲᠡᠭᠦᠦ ᠬᠡᠯᠬᠢᠶᠡ ᠡᠭᠦᠰᠬᠡᠭᠰᠡᠨ ᠨᠢ ᠦᠨᠡᠯᠡᠵᠦ ᠪᠠᠷᠠᠰᠢ ᠦᠭᠡᠢ ᠡᠷᠬᠢᠮ ᠳᠡᠭᠡᠳᠦ ᠪᠦᠲᠦᠭᠡᠯ ᠶᠦᠮ᠃ ᠮᠥᠨ ᠡᠨᠡ ᠰᠠᠭᠤᠷᠢᠨ ᠳᠡᠭᠡᠷᠡ ᠨᠡᠭᠦᠳᠡᠯ ᠢᠷᠭᠡᠨᠰᠢᠯ(ᠰᠣᠶᠣᠯ) ᠪᠣᠢ ᠪᠣᠯᠤᠭᠰᠠᠨ ᠪᠢᠯᠡ》 ᠭᠡᠵᠦ《ᠮᠣᠩᠭᠣᠯ ᠤ᠋ᠨ ᠨᠡᠭᠦᠳᠡᠯᠴᠢᠨ》 ᠨᠣᠮ ᠳ᠋ᠤ᠌ ᠪᠢᠴᠢᠭᠰᠡᠨ ᠢ᠋ ᠪᠣᠯᠭᠣᠭᠠᠨ ᠤᠩᠰᠢᠨᠠ ᠤᠤ? ᠤᠭ ᠨᠣᠮ ᠳ᠋ᠤ᠌᠄
《ᠪᠠᠢᠭᠠᠯᠢ ᠣᠷᠴᠢᠨ ᠨᠥᠭᠡᠴᠡ ᠶ᠋ᠢ ᠵᠥᠪ ᠵᠣᠬᠢᠰ ᠲᠠᠢ᠂ ᠪᠦᠷᠢᠨ ᠠᠰᠢᠭᠯᠠᠵᠤ᠂ ᠬᠥᠮᠦᠨ ᠮᠠᠯ ᠤ᠋ᠨ ᠬᠡᠷᠡᠭᠴᠡᠭᠡ ᠱᠠᠭᠠᠷᠳᠠᠯᠭᠠ ᠶ᠋ᠢ ᠬᠠᠩᠭᠠᠬᠤ᠂ ᠪᠠᠢᠭᠠᠯᠢ ᠶ᠋ᠢᠨ ᠡᠺᠣᠯᠣᠭᠢ ᠶ᠋ᠢᠨ ᠲᠡᠩᠴᠡᠭᠦᠷᠢ ᠶ᠋ᠢ ᠬᠠᠳᠠᠭᠠᠯᠠᠬᠤ᠂ ᠨᠡᠭᠦᠳᠡᠯ ᠦ᠋ᠨ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠦᠢᠯᠡᠳᠪᠦᠷᠢᠯᠡᠯ ᠦ᠋ᠨ ᠦᠷᠡ ᠠᠰᠢᠭ ᠢ᠋ ᠬᠡᠪ ᠦ᠋ᠨ ᠪᠠᠢᠯᠭᠠᠬᠤ ᠵᠣᠷᠢᠯᠭᠠ ᠪᠠᠷ ᠡᠺᠣᠯᠣᠭᠢ ᠶ᠋ᠢᠨ ᠨᠢᠭᠡ ᠲᠣᠳᠣᠷᠬᠠᠢ ᠨᠥᠬᠥᠴᠡᠯ ᠡᠴᠡ ᠲᠣᠳᠣᠷᠬᠠᠢ ᠨᠥᠬᠥᠴᠡᠯ ᠳ᠋ᠦ᠍ ᠡᠷᠦᠬᠡ᠂ ᠬᠣᠲᠠ ᠠᠢᠯ ᠤ᠋ᠨ ᠠᠵᠤ ᠠᠬᠤᠢ ᠣᠷᠣᠨ ᠵᠠᠢ ᠶ᠋ᠢᠨ ᠰᠢᠯᠵᠢᠯᠲᠡ ᠬᠢᠬᠦ ᠠᠷᠭᠠ ᠠᠵᠢᠯᠯᠠᠭᠠ ᠶ᠋ᠢ ᠨᠡᠭᠦᠳᠡᠯ》 ᠭᠡᠵᠦ ᠲᠣᠳᠣᠷᠬᠠᠢᠯᠠᠵᠤ ᠪᠣᠢ᠃ ᠭᠡᠪᠡᠴᠦ ᠴᠠᠭ ᠤ᠋ᠨ ᠰᠠᠯᠬᠢ ᠳᠠᠭᠠᠬᠤ ᠳᠤᠷᠠᠲᠠᠢ《ᠬᠥᠩᠭᠡᠨ ᠲᠣᠯᠤᠭᠠᠢᠲᠠᠳ》 ᠮᠠᠨᠢ《ᠨᠡᠭᠦᠳᠡᠯ ᠮᠠᠯᠵᠢᠯ ᠪᠣᠯ ᠪᠠᠯᠠᠷ ᠬᠣᠴᠣᠷᠤᠩᠭᠤᠢ᠂ ᠪᠦᠳᠦᠭᠦᠯᠢᠭ ᠡᠵᠡᠩᠨᠡᠯᠲᠡ ᠶ᠋ᠢᠨ ᠬᠡᠯᠪᠡᠷᠢ᠂ ᠲᠡᠭᠦᠨ ᠢ᠋ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠮᠠᠯᠵᠢᠯ ᠤ᠋ᠨ ᠠᠷᠭᠠ ᠪᠠᠷ ᠰᠣᠯᠢᠬᠤ ᠬᠡᠷᠡᠭᠲᠡᠢ᠁》 ᠭᠡᠮᠡᠨ ᠱᠠᠭᠠᠷᠳᠠᠵᠤ᠂ ᠬᠡᠴᠢᠨᠡᠨ ᠮᠢᠩᠭᠠᠨ ᠵᠢᠯ ᠦ᠋ᠨ ᠰᠢᠯᠢᠯᠲᠡ ᠪᠡᠷ ᠲᠣᠭᠲᠠᠭᠰᠠᠨ ᠮᠠᠯᠵᠢᠯ ᠤ᠋ᠨ ᠠᠷᠭᠠ ᠶ᠋ᠢ ᠲᠦᠭᠦᠬᠡᠢ ᠳᠤᠨᠳᠠᠭᠤᠷ ᠤᠬᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠭᠦᠮᠵᠢᠯᠡᠬᠦ ᠪᠣᠯᠤᠯᠠ᠃
《ᠬᠣᠴᠤᠷᠠᠩᠭᠤᠢ》ᠭᠡᠵᠦ ᠪᠤᠷᠤᠭᠤ ᠣᠨᠣᠰᠢ ᠲᠠᠯᠪᠢᠭᠤᠯᠤᠭᠰᠠᠨ ᠨᠡᠭᠦᠳᠡᠯ ᠮᠠᠯᠵᠢᠯ ᠡᠢᠨ ᠬᠦ᠌ ᠰᠠᠭᠤᠷᠢᠰᠢᠯ ᠮᠠᠯᠵᠢᠯ ᠤᠷᠤᠭᠤ ᠰᠢᠯᠵᠢᠵᠦ᠂ ᠬᠠᠪᠤᠷᠵᠢᠶᠠ᠂ ᠵᠤᠰᠠᠯᠠᠩ᠂ ᠨᠠᠮᠤᠷᠵᠢᠶᠠ᠂ ᠡᠪᠦᠯᠵᠢᠶᠡ ᠬᠤᠪᠢᠶᠠᠨ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠠᠰᠢᠭᠯᠠᠳᠠᠭ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠠᠷᠭᠠ᠂ ᠰᠠᠭᠤᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠮᠡᠷᠡᠵᠦ ᠠᠷᠭᠠᠴᠠᠭᠠᠬᠤ ᠪᠤᠷᠤᠭᠤ ᠭᠤᠯᠳᠤᠷᠢᠯ ᠳ᠋ᠤ᠌ ᠣᠷᠣᠵᠠᠢ᠃ ᠡᠭᠦᠨ ᠦ᠌ ᠤᠯᠠᠮ ᠢ᠋ᠶ᠋ᠠᠷ ᠪᠡᠯᠴᠢᠭᠡᠷ ᠢ᠋ ᠪᠦᠷᠢᠨ ᠥᠭᠭᠦᠭᠡᠵᠢ ᠪᠡᠷ ᠨᠢ ᠠᠰᠢᠭᠯᠠᠳᠠᠭ ᠪᠠᠢᠭᠰᠠᠨ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠲᠣᠭᠲᠠᠯᠴᠠᠭᠠ ᠡᠪᠳᠡᠭᠳᠡᠨ᠂ ᠲᠡᠮᠡᠭᠡ᠂ ᠠᠳᠤᠭᠤ ᠴᠥᠭᠡᠷᠡᠭᠰᠡᠨ ᠢ᠋ᠶ᠋ᠡᠷ ᠬᠣᠯᠠ ᠶ᠋ᠢᠨ ᠪᠡᠯᠴᠢᠭᠡᠷ ᠦ᠋ᠨ ᠠᠰᠢᠭᠯᠠᠮᠵᠢ ᠪᠠ ᠪᠡᠯᠴᠢᠭᠡᠷ ᠦ᠋ᠨ ᠲᠥᠷᠥᠯ ᠦ᠋ᠨ ᠲᠡᠩᠴᠡᠭᠦᠷᠢ ᠠᠯᠳᠠᠭᠳᠠᠵᠤ ᠡᠬᠢᠯᠡᠭᠰᠡᠨ ᠶᠦᠮ᠃ ᠪᠦᠷ ᠰᠡᠭᠦᠯ ᠳ᠋ᠦ᠍ᠨᠢ ᠠᠮᠢ ᠠᠬᠤᠢ ᠡᠪᠳᠡᠭᠰᠡᠨ ᠬᠠᠮᠤᠭ ᠶᠠᠯᠠ《ᠦᠰᠦᠲᠡᠢ ᠪᠤᠷᠬᠠᠳ》 ᠲᠤ᠌ ᠮᠢᠨᠢ ᠣᠨᠣᠭᠳᠠᠵᠤ᠂ ᠡᠨᠡ ᠴᠥᠯᠡᠯᠭᠡᠨ ᠳ᠋ᠦ᠍ ᠢᠮᠠᠭᠠ᠂ ᠠᠳᠤᠭᠤ ᠬᠣᠶᠠᠷ ᠪᠠᠷᠤᠭ ᠯᠠ ᠬᠣᠭ ᠦᠭᠡᠢ ᠴᠠᠭᠠᠵᠠᠯᠠᠭᠤᠯᠬᠤ ᠰᠢᠬᠠᠭᠰᠠᠨ ᠢ᠋ ᠰᠠᠨᠠᠬᠤ ᠳ᠋ᠤ᠌ ᠰᠡᠳᠬᠢᠯ ᠡᠮᠲᠡᠷᠡᠨᠡ᠃ ᠰᠠᠭᠤᠷᠢᠰᠢᠯ ᠳ᠋ᠤ᠌ ᠣᠷᠣᠭᠰᠠᠨ ᠬᠣᠢᠨᠠ ᠪᠠᠨ ᠬᠠᠳᠤᠯᠠᠩ ᠤ᠋ᠨ ᠬᠦᠷᠢᠶᠡ ᠭᠡᠵᠦ ᠲᠡᠮᠦᠷ ᠲᠣᠣᠷ ᠲᠠᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠠᠭᠤᠤ ᠪᠦᠲᠦᠭᠡᠯ ᠮᠡᠲᠦ ᠰᠠᠨᠠᠵᠤ᠂ ᠬᠥᠮᠦᠨ ᠦᠵᠡᠪᠡᠯ ᠶᠠᠷᠢᠵᠤ᠂ ᠮᠣᠳᠣ ᠦᠵᠡᠪᠡᠯ ᠪᠢᠴᠢᠵᠦ᠂ ᠪᠠᠷᠤᠭ ᠯᠠ ᠪᠠᠢᠭᠠᠯᠢ ᠶ᠋ᠢᠨ ᠵᠤᠳ ᠭᠠᠮᠰᠢᠭ ᠲᠤ᠌ ᠳᠠᠬᠢᠵᠤ ᠥᠷᠲᠥᠬᠦ ᠦᠭᠡᠢ ᠶᠤᠮ ᠰᠢᠭ᠋ ᠰᠦᠷᠵᠢᠩᠳᠡᠵᠦ ᠪᠠᠢᠭᠰᠠᠨ ᠰᠠᠨ᠃ ᠭᠡᠪᠡᠴᠦ ᠦᠷᠡ ᠳ᠋ᠦᠩ ᠨᠢ ᠪᠢᠳᠡᠨ ᠦ᠌《ᠵᠡᠭᠦᠳᠦᠯᠡᠭᠰᠡᠨ》 ᠡᠴᠡ ᠱᠠᠯ ᠥᠭᠡᠷᠡ ᠪᠠᠢᠭᠰᠠᠨ ᠢ᠋ ᠳᠡᠮᠡᠢ ᠤᠳᠠᠯ ᠦᠭᠡᠢ ᠮᠡᠳᠡᠵᠡᠭᠡᠭᠰᠡᠨ ᠪᠢᠯᠡ᠃ ᠨᠡᠭᠦᠳᠡᠯ ᠡᠴᠡ ᠰᠠᠭᠤᠷᠢᠰᠢᠯ ᠳ᠋ᠤ᠌ ᠰᠢᠯᠵᠢᠭᠰᠡᠨ ᠦ᠌ ᠳᠠᠷᠠᠭᠠ ᠪᠠᠷ ᠪᠡᠯᠴᠢᠭᠡᠷ ᠦ᠋ᠨ ᠤᠷᠭᠤᠴᠠ ᠢᠯᠡᠷᠬᠡᠢ ᠮᠠᠭᠤᠳᠠᠬᠤ ᠶ᠋ᠢᠨ ᠳᠠᠭᠠᠤ ᠪᠠᠢᠭᠠᠯᠢ ᠶ᠋ᠢᠨ ᠰᠢᠯᠭᠠᠯᠲᠠ ᠪᠠᠷ ᠴᠢᠮᠪᠠᠢᠵᠢᠨ ᠳᠡᠪᠡᠭᠡᠷᠡᠭᠵᠢᠳᠡᠭ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠮᠠᠯ ᠤ᠋ᠨ ᠡᠭᠦᠯᠳᠡᠷ ᠴᠦ᠍ ᠪᠤᠴᠠᠬᠤ ᠱᠠᠲᠤᠨ ᠳ᠋ᠠᠭᠠᠨ ᠣᠷᠣᠭᠰᠠᠨ ᠶᠤᠮ᠃ ᠠᠩᠭ᠌ᠯᠢ ᠶ᠋ᠢᠨ ᠺᠠᠮᠪᠷᠢᠵ ᠶᠡᠬᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠮᠣᠩᠭᠣᠯ ᠪᠠ ᠳᠣᠲᠣᠭᠠᠳᠤ ᠠᠽᠢᠶᠠ ᠶ᠋ᠢᠨ ᠰᠤᠳᠤᠯᠭᠠᠨ ᠤ᠋ ᠲᠥᠪ ᠦ᠋ᠨ ᠡᠷᠬᠢᠯᠡᠭᠴᠢ ᠺᠠᠷᠤᠯᠢᠨ ᠬᠠᠮᠹᠷᠢ ᠶ᠋ᠢᠨ ᠤᠳᠤᠷᠢᠳᠤᠭᠰᠠᠨ ᠣᠯᠠᠨ ᠤᠯᠤᠰ ᠤ᠋ᠨ ᠬᠠᠮᠲᠤᠷᠠᠭᠰᠠᠨ ᠰᠤᠳᠤᠯᠭᠠᠨ ᠤ᠋ ᠪᠦᠲᠦᠭᠡᠯ《ᠳᠣᠲᠣᠭᠠᠳᠤ ᠠᠽᠢᠶᠠ ᠶ᠋ᠢᠨ ᠰᠣᠶᠣᠯ ᠬᠢᠭᠡᠳ ᠣᠷᠴᠢᠨ ᠠᠬᠤᠢ 》
ᠨᠣᠮ ᠳ᠋ᠤ᠌᠄ 《ᠴᠠᠭ ᠰᠤᠳᠤᠯᠭᠠᠨ ᠠ᠋ᠴᠠ ᠦᠵᠡᠪᠡᠯ᠂ ᠪᠡᠯᠴᠢᠭᠡᠷ ᠦ᠋ᠨ ᠮᠠᠭᠤᠳᠠᠯ ᠨᠢ ᠮᠠᠯᠵᠢᠯ ᠤ᠋ᠨ ᠰᠢᠰᠲ᠋ᠧᠮ ᠳ᠋ᠡᠬᠢ ᠨᠡᠭᠦᠳᠡᠯ ᠦ᠋ᠨ ᠰᠢᠨᠵᠢ ᠶ᠋ᠢᠨ ᠭᠡᠭᠡᠭᠳᠡᠯ ᠲᠡᠢ ᠬᠣᠯᠪᠣᠭᠠ ᠲᠠᠢ᠃ ᠡᠳᠡᠭᠡᠷ ᠨᠢ᠂ ᠳᠣᠲᠣᠭᠠᠳᠤ ᠠᠽᠢᠶᠠ ᠶ᠋ᠢᠨ ᠲᠠᠯᠠ ᠨᠤᠲᠤᠭ ᠲᠤ ᠨᠡᠭᠦᠳᠡᠯ ᠦ᠋ᠨ ᠰᠢᠨᠵᠢ ᠶ᠋ᠢ ᠬᠠᠳᠠᠭᠠᠯᠠᠬᠤ ᠦᠭᠡᠢ ᠪᠡᠷ ᠮᠠᠯ ᠠᠵᠤ ᠠᠬᠤᠢ ᠦᠷᠭᠦᠯᠵᠢᠯᠡᠨ ᠣᠷᠣᠰᠢᠵᠤ ᠴᠢᠳᠠᠨᠠ ᠭᠡᠰᠡᠨ ᠦᠵᠡᠯᠲᠡ ᠶ᠋ᠢ ᠨᠢᠴᠤᠭᠠᠨᠠ᠃ ᠳᠣᠲᠣᠭᠠᠳᠤ ᠠᠽᠢᠶᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠦᠷᠭᠦᠯᠵᠢ ᠶ᠋ᠢᠨ ᠴᠢᠨᠠᠷᠲᠠᠢ ᠨᠡᠭᠦᠬᠦ ᠠᠷᠭᠠ ᠪᠠᠷ ᠮᠠᠯᠴᠢᠳ ᠡᠪᠡᠰᠦ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠬᠠᠮᠤᠭ ᠤ᠋ᠨ ᠰᠠᠢᠨ ᠠᠰᠢᠭᠯᠠᠵᠤ ᠴᠢᠳᠠᠵᠤ ᠪᠠᠢᠨᠠ》ᠭᠡᠵᠦ ᠣᠯᠠᠨ ᠵᠢᠯ ᠦ᠋ᠨ ᠬᠡᠭᠡᠷᠡ ᠶ᠋ᠢᠨ ᠰᠢᠨᠵᠢᠯᠡᠭᠡᠨ ᠳ᠋ᠦ᠍ ᠦᠨᠳᠦᠰᠦᠯᠡᠨ ᠳ᠋ᠦᠩᠨᠡᠭᠰᠡᠨ ᠪᠢᠯᠡ᠃
《ᠲᠠᠷᠠᠬᠠᠢ ᠪᠤᠲᠠᠷᠬᠠᠢ ᠨᠡᠭᠦᠳᠡᠯ ᠮᠠᠯᠵᠢᠯ ᠤ᠋ᠨ ᠠᠮᠢᠳᠤᠷᠠᠯ ᠨᠢ ᠲᠥᠪᠯᠡᠷᠡᠭᠰᠡᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠬᠦᠷᠲᠡᠭᠡᠬᠦ᠂ ᠭᠠᠮᠰᠢᠭ ᠤ᠋ᠨ ᠪᠠᠴᠢᠮ ᠲᠤᠰᠠᠯᠠᠮᠵᠢ ᠣᠯᠭᠣᠬᠤ᠂ ᠮᠡᠳᠡᠭᠡᠯᠡᠯ ᠰᠤᠷᠠᠭ ᠳᠠᠮᠵᠢᠭᠤᠯᠬᠤ ᠳ᠋ᠤ᠌ ᠠᠰᠢᠭ ᠦᠭᠡᠢ》ᠭᠡᠳᠡᠭ ᠨᠢ ᠰᠠᠭᠤᠷᠢᠰᠢᠯ ᠤᠷᠤᠭᠤ ᠵᠠᠯᠠᠭᠰᠠᠨ ᠤ᠋ ᠪᠠᠰᠠ ᠨᠢᠭᠡᠨ ᠲᠣᠮᠣ ᠰᠢᠯᠲᠠᠭᠠᠨ᠃ ᠥᠨᠥᠳᠥᠷ ᠴᠤ ᠭᠡᠳ ᠡᠨᠡ ᠰᠢᠯᠲᠠᠭᠠᠨ ᠮᠣᠩᠭᠣᠯᠴᠤᠳ ᠢ᠋ ᠬᠣᠲᠠ ᠰᠠᠭᠤᠷᠢᠰᠢᠯ ᠨᠡᠭᠦᠯᠭᠡᠬᠦ ᠶ᠋ᠢᠨ ᠴᠢᠬᠤᠯᠠ ᠨᠥᠬᠥᠴᠡᠯ ᠪᠣᠯᠵᠤ ᠪᠣᠢ᠃ ᠭᠡᠪᠡᠴᠦ ᠲᠧᠭᠨᠢᠭ ᠦ᠋ᠨ ᠬᠥᠭᠵᠢᠯᠲᠡ ᠨᠢ ᠶᠠᠮᠠᠷᠪᠠ ᠣᠷᠴᠢᠨ ᠳ᠋ᠤ᠌ ᠴᠤ᠌ ᠦᠢᠯᠡᠴᠢᠯᠡᠯᠭᠡ ᠬᠠᠩᠭᠠᠬᠤ ᠪᠣᠯᠤᠮᠵᠢ ᠲᠠᠢ ᠪᠣᠯᠵᠤ ᠪᠠᠢᠨᠠ᠃ ᠰᠠᠯᠬᠢ ᠪᠤᠶᠤ ᠨᠠᠷᠠᠨ ᠤ᠋ ᠡᠨᠧᠷᠭᠢ ᠪᠡᠷ ᠴᠠᠬᠢᠯᠭᠠᠨ ᠬᠠᠩᠭᠠᠬᠤ᠂ ᠰᠦᠯᠵᠢᠶᠡ ᠪᠡᠷ ᠰᠤᠷᠭᠠᠨ ᠬᠥᠮᠦᠵᠢᠯ ᠬᠦᠷᠲᠡᠬᠦ᠂ ᠣᠳᠣᠨ ᠲᠧᠯᠸᠢᠰ ᠪᠤᠶᠤ ᠷᠠᠳᠢᠣ᠋ ᠡᠰᠡᠬᠦᠯᠡ ᠰᠦᠯᠵᠢᠶᠡ ᠪᠡᠷ ᠮᠡᠳᠡᠭᠡᠯᠡᠯ ᠬᠦᠷᠲᠡᠬᠦ᠂ ᠭᠠᠷ ᠤᠲᠠᠰᠤ ᠪᠠᠷ ᠬᠣᠯᠪᠣᠭᠠ ᠪᠠᠷᠢᠬᠤ᠂ ᠨᠢᠰᠬᠡᠯ ᠢ᠋ᠶ᠋ᠡᠷ ᠲᠤᠰᠠᠯᠠᠮᠵᠢ ᠥᠭᠬᠦ᠁ ᠵᠡᠷᠭᠡ ᠠᠯᠢᠪᠠ ᠬᠡᠷᠡᠭᠴᠡᠭᠡ ᠶ᠋ᠢ ᠬᠠᠩᠭᠠᠬᠤ ᠨᠥᠬᠥᠴᠡᠯ ᠨᠢᠭᠡᠨᠲᠡ ᠪᠦᠷᠢᠳᠦᠭᠡᠳ ᠪᠣᠢ ᠨᠢ ᠨᠡᠭᠦᠳᠡᠯ ᠮᠠᠯᠵᠢᠯ ᠴᠠᠭ ᠤ᠋ᠨ ᠬᠥᠭᠵᠢᠯ ᠡᠴᠡ ᠣᠭᠲᠣᠬᠠᠨ ᠴᠤ ᠬᠣᠴᠣᠷᠤᠭᠠ ᠦᠭᠡᠢ ᠭᠡᠳᠡᠭ ᠢ᠋ ᠪᠦᠷᠢᠨ ᠭᠡᠷᠡᠴᠢᠯᠡᠨᠡ᠃ ᠬᠠᠷᠢᠨ ᠨᠡᠭᠦᠳᠡᠯ ᠦ᠋ᠨ ᠠᠮᠢᠳᠤᠷᠠᠯ ᠤ᠋ᠨ ᠵᠠᠷᠢᠮ ᠱᠠᠭᠠᠷᠳᠠᠯᠭᠠ ᠶ᠋ᠢ ᠲᠧᠭᠨᠢᠭ ᠦ᠋ᠨ ᠬᠥᠭᠵᠢᠯ ᠬᠠᠩᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠶᠤᠮ᠃ ᠶᠡᠷᠦ ᠨᠢ ᠠᠮᠢᠳᠤᠷᠠᠯ ᠤ᠋ᠨ ᠬᠡᠷᠡᠭᠴᠡᠭᠡᠨ ᠳ᠋ᠡᠭᠡᠨ ᠵᠣᠷᠢᠭᠤᠯᠵᠤ᠂ ᠲᠧᠭᠨᠢᠭ ᠦ᠋ᠨ ᠰᠢᠨᠡ ᠱᠠᠭᠠᠷᠳᠠᠯᠭᠠ ᠪᠣᠢ ᠪᠣᠯᠵᠤ᠂ ᠡᠭᠦᠨ ᠡᠴᠡ ᠰᠢᠯᠲᠠᠭᠠᠯᠠᠨ ᠰᠢᠨᠡ ᠡᠭᠦᠳᠦᠨ ᠪᠦᠲᠦᠭᠡᠯᠲᠡ ᠭᠠᠷᠳᠠᠭ ᠠ᠋ᠴᠠ ᠪᠤᠰᠤ ᠨᠢᠭᠡᠨ ᠴᠠᠭ ᠦᠶᠡ ᠶ᠋ᠢᠨ ᠲᠧᠭᠨᠢᠭ ᠦ᠋ᠨ ᠥᠴᠦᠬᠡᠨ ᠬᠥᠭᠵᠢᠯᠲᠡ ᠳ᠋ᠦ᠍ ᠵᠣᠬᠢᠴᠠᠭᠤᠯᠤᠨ ᠠᠮᠢᠳᠤᠷᠠᠯ ᠦᠢᠯᠡᠳᠪᠦᠷᠢᠯᠡᠯ ᠦ᠋ᠨ ᠬᠡᠯᠪᠡᠷᠢ ᠪᠡᠨ ᠬᠤᠪᠢᠷᠠᠭᠤᠯᠬᠤ ᠨᠢ ᠪᠤᠷᠤᠭᠤ ᠬᠢᠳᠡᠯ ᠪᠠᠢᠭᠠ ᠶᠤᠮ᠃ ᠲᠧᠭᠨᠢᠭ ᠦ᠋ᠨ ᠬᠥᠭᠵᠢᠯ ᠨᠢ ᠰᠣᠶᠣᠯ ᠤ᠋ᠨ ᠬᠥᠭᠵᠢᠯᠲᠡ ᠳ᠋ᠦ᠍ ᠦᠢᠯᠡᠴᠢᠯᠡᠬᠦ ᠡᠴᠡ ᠪᠢᠰᠢ᠂ ᠰᠣᠶᠣᠯ ᠢ᠋ᠶ᠋ᠠᠨ ᠣᠨᠳᠣᠣᠰᠢᠭᠤᠯᠵᠤ ᠲᠧᠭᠨᠢᠭ ᠦ᠋ᠨ ᠬᠥᠭᠵᠢᠯᠲᠡ ᠳ᠋ᠦ᠍ ᠵᠣᠬᠢᠴᠠᠭᠤᠯᠤᠨᠠ ᠭᠡᠳᠡᠭ ᠪᠣᠯ ᠬᠡᠨ ᠦᠵᠡᠭᠰᠡᠨ ᠴᠦ᠍ ᠲᠡᠨᠡᠭ ᠯᠡ ᠬᠢᠳᠡᠯ ᠪᠠᠢᠬᠤ ᠦᠭᠡᠢ ᠤᠤ!
ᠮᠣᠩᠭᠣᠯᠴᠤᠳ ᠥᠨᠳᠥᠷᠯᠢᠭ ᠡᠴᠡ ᠪᠡᠨ ᠳᠡᠯᠡᠬᠡᠢ ᠤᠷᠤᠭᠤ ᠨᠡᠭᠦᠳᠡᠯᠯᠡᠳᠡᠭ ᠦᠨᠳᠦᠰᠦᠲᠡᠨ ᠪᠠᠢᠯᠠ᠃ ᠰᠡᠭᠦᠯ ᠳ᠋ᠦ᠍ᠨᠢ ᠳᠡᠯᠡᠬᠡᠢ ᠡᠴᠡ ᠮᠣᠩᠭᠣᠯ ᠤ᠋ᠨ ᠥᠨᠳᠥᠷᠯᠢᠭ ᠤᠷᠤᠭᠤ ᠪᠠᠨ ᠨᠡᠭᠦᠳᠡᠯᠯᠡᠳᠡᠭ ᠪᠣᠯᠤᠭᠰᠠᠨ᠃ ᠪᠦᠷ ᠰᠡᠭᠦᠯ ᠳ᠋ᠦ᠍ᠨᠢ ᠰᠦᠮᠡ ᠤᠷᠤᠭᠤ ᠨᠡᠭᠦᠵᠡᠭᠡᠵᠦ᠂ ᠣᠳᠣ ᠬᠣᠲᠠ ᠤᠷᠤᠭᠤ᠂ ᠨᠡᠭᠦᠳᠡᠯ ᠠᠷᠠᠳ ᠤ᠋ᠨ ᠲᠣᠭᠣᠷᠢᠭ ᠤᠷᠤᠭᠤ ᠨᠡᠭᠦᠬᠦ ᠪᠣᠯᠤᠯᠠ᠃ ᠨᠡᠭᠦᠳᠡᠯ ᠦ᠋ᠨ ᠡᠢᠮᠦ ᠬᠤᠪᠢᠷᠠᠯᠲᠠ ᠮᠣᠩᠭᠣᠯᠴᠤᠳ ᠤ᠋ᠨ ᠤᠯᠠᠮᠵᠢᠯᠠᠯᠲᠤ ᠰᠣᠶᠣᠯ ᠤ᠋ᠨ ᠲᠣᠭᠲᠠᠯᠴᠠᠭᠠ ᠶ᠋ᠢ ᠨᠣᠴᠢᠲᠠᠢ ᠠᠯᠳᠠᠭᠳᠠᠭᠤᠯᠤᠨ ᠶᠠᠭᠠᠬᠢᠵᠤ ᠠᠮᠢᠳᠤᠷᠠᠬᠤ ᠪᠣᠢ᠂ ᠰᠣᠶᠣᠯ ᠤᠯᠠᠮᠵᠢᠯᠠᠯ ᠢ᠋ᠶ᠋ᠠᠨ ᠶᠠᠭᠠᠬᠢᠬᠤ ᠪᠣᠢ᠂ ᠠᠮᠢ ᠠᠬᠤᠢ᠂ ᠪᠡᠯᠴᠢᠭᠡᠷ ᠨᠤᠲᠤᠭ ᠢ᠋ᠶ᠋ᠠᠨ ᠶᠠᠭᠠᠬᠢᠬᠤ ᠪᠣᠢ᠁ ᠭᠡᠬᠦᠴᠢᠯᠡᠨ ᠰᠢᠨᠠᠯᠭᠠᠯ ᠶᠡᠬᠡᠲᠡᠢ ᠠᠰᠠᠭᠤᠳᠠᠯ ᠣᠯᠠᠨ ᠲᠠᠯᠪᠢᠭᠳᠠᠬᠤ ᠪᠣᠯᠤᠯᠠ᠃《ᠶᠠᠮᠠᠷ ᠨᠢᠭᠡᠨ ᠣᠷᠣᠨ ᠪᠦᠰᠡ ᠨᠤᠲᠤᠭ ᠤ᠋ᠨ ᠰᠣᠶᠣᠯ ᠤ᠋ᠨ ᠲᠣᠭᠲᠠᠯᠴᠠᠭᠠ ᠡᠪᠳᠡᠭᠳᠡᠪᠡᠯ ᠠᠮᠢ ᠠᠬᠤᠢ ᠶ᠋ᠢᠨ ᠲᠣᠭᠲᠠᠯᠴᠠᠭᠠ ᠴᠤ ᠡᠪᠳᠡᠭᠳᠡᠨᠡ᠃ ᠠᠮᠢ ᠠᠬᠤᠢ ᠶ᠋ᠢᠨ ᠡᠪᠳᠡᠭᠳᠡᠯ ᠦ᠋ᠨ ᠭᠣᠣᠯ ᠨᠢᠭᠡᠨ ᠰᠢᠯᠲᠠᠭᠠᠨ ᠪᠣᠯ ᠲᠤᠬᠠᠢ ᠶ᠋ᠢᠨ ᠣᠷᠣᠨ ᠪᠦᠰᠡ ᠨᠤᠲᠤᠭ ᠤ᠋ᠨ ᠰᠣᠶᠣᠯ ᠤ᠋ᠨ ᠲᠣᠭᠲᠠᠯᠴᠠᠭᠠ ᠡᠪᠳᠡᠭᠳᠡᠭᠰᠡᠨ ᠳ᠋ᠦ᠍ ᠪᠣᠢ》 ᠭᠡᠳᠡᠭ ᠲᠦ᠍ ᠰᠣᠳᠣᠯᠤᠭᠠᠴᠢᠳ ᠰᠠᠨᠠᠯ ᠨᠢᠭᠡᠳᠴᠦ ᠪᠣᠢ᠃ ᠨᠡᠭᠦᠳᠡᠯ ᠮᠠᠯᠵᠢᠯ ᠢᠶᠠᠷ ᠯᠡ ᠤᠷᠲᠤᠮᠵᠢ ᠶ᠋ᠢᠨ ᠬᠡᠷᠡᠭᠯᠡᠭᠡ ᠲᠡᠢ ᠪᠠᠢᠯᠭᠠᠬᠤ ᠪᠣᠯᠤᠮᠵᠢ ᠲᠠᠢ ᠲᠥᠪ ᠠᠽᠢᠶᠠ ᠶ᠋ᠢᠨ ᠥᠨᠳᠥᠷᠯᠢᠭ ᠦ᠋ᠨ ᠣᠷᠴᠢᠨ ᠳ᠋ᠤ᠌ ᠨᠡᠭᠦᠳᠡᠯ ᠰᠣᠶᠣᠯ ᠯᠠ ᠥᠪᠡᠷ ᠦ᠋ᠨ ᠵᠦᠢ ᠲᠣᠭᠲᠠᠯᠴᠠᠭᠠ ᠪᠠᠨ ᠣᠯᠵᠤ ᠦᠨᠳᠦᠰᠦᠯᠡᠵᠦ ᠴᠢᠳᠠᠭᠰᠠᠨ ᠶᠤᠮ᠃ ᠭᠡᠪᠡᠴᠦ ᠣᠳᠣ ᠡᠨᠡ ᠲᠣᠭᠲᠠᠯᠴᠠᠭᠠ ᠡᠪᠳᠡᠭᠳᠡᠭᠰᠡᠨ ᠪᠣᠯᠬᠣᠷ ᠠᠮᠢ ᠠᠬᠤᠢ ᠶ᠋ᠢᠨ ᠡᠪᠳᠡᠭᠳᠡᠯ ᠢ᠋ ᠪᠠᠭᠲᠠᠭᠠᠭᠰᠠᠨ ᠠᠯᠢ ᠣᠯᠠᠨ ᠠᠰᠠᠭᠤᠳᠠᠯ ᠭᠠᠷᠤᠭᠰᠠᠨ ᠪᠢᠯᠡ!《ᠭᠠᠩᠳᠠᠯᠠ᠃ ᠵᠤᠳᠯᠠᠯᠠ᠃ ᠮᠠᠯ ᠦᠬᠦᠵᠦ ᠬᠣᠬᠢᠷᠠᠵᠤ ᠪᠠᠢᠨᠠ᠂ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠵᠦ ᠭᠠᠷ ᠢ᠋ᠶ᠋ᠠᠨ ᠨᠤᠬᠤᠯᠠᠨ ᠭᠠᠴᠢᠭᠳᠠᠵᠤ ᠪᠠᠢᠭᠠ ᠪᠠᠢᠳᠠᠯ ᠢ᠋ ᠬᠠᠷᠠᠬᠤ ᠪᠦᠷᠢ《ᠬᠡᠷᠪᠡ ᠨᠡᠭᠦᠳᠡᠯ ᠮᠠᠯᠵᠢᠯ ᠢ᠋ᠶ᠋ᠠᠨ ᠬᠠᠳᠠᠭᠠᠯᠠᠵᠤ ᠪᠠᠢᠭᠰᠠᠨ ᠪᠣᠯ ᠣᠲᠣᠷ ᠬᠠᠢᠳᠠᠭ ᠶᠠᠪᠤᠬᠤ᠂ ᠠᠯᠤᠰ ᠨᠤᠲᠤᠭ ᠲᠤ ᠪᠡᠯᠴᠢᠭᠡᠷ ᠰᠡᠯᠭᠦᠬᠦ ᠵᠡᠷᠭᠡ ᠪᠡᠷ ᠡᠢᠮᠦᠷᠬᠦᠦ ᠭᠠᠴᠢᠭᠳᠠᠯᠲᠤ ᠪᠠᠢᠳᠠᠯ ᠢ᠋ ᠳᠠᠪᠠᠨ ᠲᠤᠭᠤᠯᠬᠤ ᠶᠣᠰᠣᠲᠠᠢ᠃ ᠭᠡᠪᠡᠴᠦ ᠣᠳᠣ ᠰᠠᠭᠠᠬᠠᠯᠲᠠ ᠶ᠋ᠢᠨ ᠢ᠋ᠶ᠋ᠡᠨ ᠪᠡᠯᠴᠢᠭᠡᠷ ᠲᠦ᠍ ᠬᠦᠷᠲᠡᠯᠡ ᠥᠨᠥᠴᠢᠨ ᠢᠰᠢᠭᠡᠨ ᠦ᠌ ᠰᠢᠭᠢᠷᠡ ᠭᠠᠷᠭᠠᠵᠤ ᠪᠣᠯᠬᠤ ᠪᠠᠨ ᠪᠠᠢᠭᠰᠠᠨ ᠠ᠋ᠴᠠ ᠭᠠᠩᠳᠠᠵᠤ᠂ ᠵᠤᠳᠯᠠᠬᠤ ᠳ᠋ᠤ᠌ ᠶᠠᠮᠠᠷ ᠠᠷᠭᠠ ᠪᠠᠢᠬᠤ ᠪᠣᠢ!》 ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠳᠡᠭᠡᠷᠡ ᠵᠠᠭᠤᠨ ᠤ᠋ ᠨᠠᠶᠠᠨ ᠬᠡᠳᠦᠨ ᠣᠨ ᠳ᠋ᠤ᠌ ᠮᠣᠩᠭᠣᠯ ᠤᠯᠤᠰ ᠪᠣᠯᠤᠨ ᠥᠪᠥᠷ ᠮᠣᠩᠭᠣᠯ ᠳ᠋ᠤ᠌ ᠢᠷᠡᠵᠦ ᠬᠡᠭᠡᠷᠡ ᠶ᠋ᠢᠨ ᠰᠢᠨᠵᠢᠯᠡᠭᠡ ᠬᠢᠵᠦ ᠪᠠᠢᠭᠰᠠᠨ ᠶᠠᠫᠣᠨ ᠡᠷᠳᠡᠮᠲᠡᠨ ᠺᠣᠨᠠᠭᠠᠶᠠ ᠶᠦᠬᠢ《ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠠᠮᠢᠳᠤᠷᠠᠯ ᠬᠣᠷᠸᠠ》 ᠨᠣᠮ ᠳ᠋ᠠᠭᠠᠨ᠄《ᠭᠠᠩ ᠬᠠᠭᠤᠷᠠᠢ ᠭᠠᠵᠠᠷ ᠲᠤ ᠪᠣᠯ ᠡᠪᠦᠯᠵᠢᠶᠡ ᠡᠴᠡ ᠵᠤᠰᠠᠯᠠᠩ ᠬᠦᠷᠲᠡᠯᠡᠬᠢ ᠵᠠᠢ ᠪᠠᠷᠤᠭ ᠵᠠᠭᠤᠨ ᠺᠢᠯᠣᠮᠧᠲ᠋ᠷ ᠡᠴᠡ ᠳᠡᠭᠡᠭᠰᠢ ᠪᠠᠢᠳᠠᠭ᠃ ᠵᠤᠳ ᠪᠤᠶᠤ ᠭᠠᠩ ᠤ᠋ᠨ ᠦᠶᠡ ᠳ᠋ᠦ᠍ ᠪᠣᠯ ᠣᠲᠣᠷ ᠢ᠋ᠶ᠋ᠠᠷ ᠳᠠᠬᠢᠨ ᠳᠠᠪᠲᠠᠨ ᠠᠰᠢᠭᠯᠠᠨᠠ》 ᠭᠡᠵᠦ ᠮᠣᠩᠭᠣᠯᠴᠤᠳ ᠤ᠋ᠨ ᠨᠡᠭᠦᠳᠡᠯ ᠢ᠋ᠶ᠋ᠡᠷ ᠪᠡᠯᠴᠢᠭᠡᠷ ᠠᠰᠢᠭᠯᠠᠳᠠᠭ ᠠᠷᠭᠠ ᠶ᠋ᠢ ᠲᠡᠮᠳᠡᠭᠯᠡᠭᠰᠡᠨ ᠪᠠᠢᠳᠠᠭ᠃ ᠭᠡᠪᠡᠴᠦ ᠨᠡᠭᠦᠳᠡᠯ ᠦ᠋ᠨ ᠪᠣᠯᠤᠮᠵᠢ ᠠᠯᠳᠠᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠡᠪᠳᠡᠭᠳᠡᠨ ᠡᠬᠢᠯᠡᠭᠰᠡᠨ ᠪᠡᠯᠴᠢᠭᠡᠷ ᠢ᠋ ᠬᠠᠮᠠᠭᠠᠯᠠᠬᠤ ᠭᠡᠵᠦ ᠮᠠᠯ ᠤ᠋ᠨ ᠬᠥᠯ ᠢ᠋ ᠬᠣᠷᠢᠭᠰᠠᠨ ᠨᠢ ᠵᠥᠪ ᠠᠷᠭᠠ ᠪᠢᠰᠢ ᠶᠦᠮ᠃ ᠵᠢᠱ᠌ᠢᠶᠡᠯᠡᠪᠡᠯ᠂ ᠲᠡᠮᠡᠭᠡ ᠮᠠᠯ ᠢᠳᠡᠵᠦ ᠯᠡ ᠪᠠᠢᠵᠤ ᠰᠠᠢᠨ ᠤᠷᠭᠤᠳᠠᠭ ᠵᠠᠭ ᠵᠡᠷᠭᠡ ᠤᠷᠭᠤᠮᠠᠯ ᠢ᠋ ᠬᠠᠮᠠᠭᠠᠯᠠᠬᠤ ᠭᠡᠵᠦ ᠬᠦᠷᠢᠶᠡᠯᠡᠭᠰᠡᠨ ᠦ᠌ ᠳ᠋ᠦᠩ ᠳ᠋ᠦ᠍ ᠵᠠᠭ ᠤ᠋ᠨ ᠤᠷᠭᠤᠴᠠ ᠮᠠᠭᠤᠳᠴᠤ᠂ ᠬᠤᠯᠤᠭᠠᠨᠠ ᠶ᠋ᠢᠨ ᠭᠠᠮᠰᠢᠭ ᠬᠡᠴᠡᠭᠦᠳᠡᠭᠰᠡᠨ ᠭᠡᠵᠦ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠣᠳᠣᠨ ᠲᠧᠯᠸᠢᠰ ᠦ᠋ᠨ《ᠴᠢᠯᠥᠭᠡᠲᠦ12》 ᠳᠡᠯᠭᠡᠴᠡ ᠪᠡᠷ ᠮᠠᠯᠴᠢᠳ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ ᠬᠠᠷᠠᠭᠰᠠᠨ ᠯᠠ ᠪᠠᠢᠬᠠ᠃ ᠲᠣᠭᠲᠠᠯᠴᠠᠭᠠ ᠶ᠋ᠢ ᠨᠢ ᠡᠪᠳᠡᠭᠰᠡᠨ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠵᠤ ᠪᠠᠢᠨᠠ ᠭᠡᠵᠦ ᠣᠢᠯᠠᠭᠠᠳᠠᠭ ᠪᠤᠷᠤᠭᠤ ᠢᠰᠦᠭᠰᠡᠨ ᠲᠠᠷᠢᠬᠢ ᠨᠤᠭᠤᠳ ᠶᠤᠮ ᠳᠠ᠃ ᠨᠡᠭᠡᠷᠡᠨ ᠴᠦ᠍《ᠪᠤᠷᠤᠭᠤ ᠵᠠᠮ ᠢ᠋ᠶ᠋ᠠᠷ ᠪᠤᠳᠠᠭᠠ ᠲᠡᠭᠡᠭᠡᠪᠡᠯ᠂ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠰᠢᠷᠣᠢ ᠲᠡᠭᠡᠭᠡᠨᠡ》 ᠭᠡᠳᠡᠭ ᠢ᠋ ᠦᠵᠡᠭᠦᠯᠬᠦ ᠨᠢ ᠠ᠋! ᠲᠡᠭᠡᠭᠡᠳ ᠪᠠᠰᠠ ᠪᠡᠯᠴᠢᠭᠡᠷ ᠦ᠋ᠨ ᠮᠠᠯ ᠢ᠋ ᠪᠡᠯᠴᠢᠭᠡᠷ ᠡᠴᠡ ᠨᠢ ᠰᠠᠯᠭᠠᠴᠢᠬᠠᠭᠠᠳ《ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢᠯᠠᠬᠤ》 ᠶᠤᠮ ᠭᠡᠨᠡ᠂《ᠡᠭᠦᠯᠳᠡᠷ ᠤᠭᠰᠠᠭᠠ ᠶ᠋ᠢ ᠨᠢ ᠰᠠᠢᠵᠢᠷᠠᠭᠤᠯᠬᠤ》 ᠶᠤᠮ ᠭᠡᠨᠡ᠂ ᠨᠡᠭᠦᠳᠡᠯ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠪᠠᠯᠭᠠᠰᠤᠵᠢᠭᠤᠯᠤᠭᠠᠳ᠂ ᠰᠠᠭᠤᠷᠢᠰᠢᠵᠢᠭᠤᠯᠤᠭᠠᠳ《ᠨᠡᠭᠦᠳᠡᠯ ᠰᠣᠶᠣᠯ ᠢ᠋ᠶ᠋ᠠᠨ ᠬᠥᠭᠵᠢᠭᠦᠯᠦᠶᠡ᠂ ᠬᠠᠮᠠᠭᠠᠯᠠᠶᠠ᠂ ᠤᠯᠠᠮᠵᠢᠯᠠᠶᠠ》 ᠭᠡᠨᠡ᠃ ᠦᠨᠡᠬᠡᠷ ᠦ᠋ᠨ ᠭᠠᠢᠬᠠᠮᠰᠢᠭᠲᠠᠢ ᠠᠵᠢᠯ ᠤ᠋ᠳ 21 ᠳ᠋ᠦ᠍ᠭᠡᠷ ᠵᠠᠭᠤᠨ ᠳ᠋ᠤ᠌ ᠬᠢᠭᠳᠡᠬᠦ ᠨᠢ ᠠ᠋᠂ ᠯᠠᠮᠠ ᠭᠤᠷᠪᠠᠨ ᠡᠷᠳᠡᠨᠢ ᠮᠢᠨᠢ!
ᠳᠡᠯᠡᠬᠡᠢ ᠶ᠋ᠢᠨ ᠠᠭᠤᠳᠠᠮ ᠲᠡᠢᠰᠢ ᠨᠡᠭᠦᠳᠡᠯᠯᠡᠳᠡᠭ ᠪᠠᠢᠭᠰᠠᠨ ᠨᠡᠭᠦᠳᠡᠯ ᠦ᠋ᠨ ᠴᠢᠭᠯᠡᠯ ᠵᠠᠭᠤ ᠨᠠᠶᠠᠨ ᠭᠷᠠᠳᠦ᠋ᠰ ᠢ᠋ᠶ᠋ᠡᠷ ᠡᠷᠭᠢᠵᠦ᠂ ᠠᠭᠤᠳᠠᠮ ᠠ᠋ᠴᠠ ᠢᠪᠴᠤᠤ ᠤᠷᠤᠭᠤ ᠬᠣᠮᠣᠷᠣᠯᠳᠤᠨ ᠨᠡᠭᠦᠳᠡᠯᠯᠡᠬᠦ ᠪᠣᠯᠤᠯᠠ᠃ ᠡᠨᠡ ᠨᠡᠭᠦᠳᠡᠯ ᠦ᠋ᠨ ᠳᠤᠮᠳᠠ ᠮᠠᠯᠴᠢᠳ ᠮᠢᠨᠢ ᠬᠣᠲᠠ ᠲᠣᠭᠣᠷᠢᠭ ᠤᠷᠤᠭᠤ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠮᠢᠨᠢ ᠲᠩᠷᠢ ᠤᠷᠤᠭᠤ᠂ ᠪᠡᠯᠴᠢᠭᠡᠷ ᠮᠢᠨᠢ ᠲᠣᠣᠷ ᠬᠦᠷᠢᠶᠡ ᠤᠷᠤᠭᠤ᠂ ᠰᠣᠶᠣᠯ ᠮᠢᠨᠢ ᠮᠦᠽᠧᠢ ᠤᠷᠤᠭᠤ᠁ ᠨᠡᠭᠦᠬᠦ ᠨᠢ ᠠ᠋! ᠠᠢ ᠳᠠ᠂ ᠨᠡᠭᠦᠳᠡᠯᠴᠢᠨ ᠮᠣᠩᠭᠣᠯᠴᠤᠳ ᠤ᠋ᠨ ᠲᠡᠦᠬᠡ ᠰᠠᠢᠨ ᠲᠠᠢ ᠴᠤ᠂ ᠮᠠᠭᠤ ᠲᠠᠢ ᠴᠤ ᠨᠡᠭᠦᠳᠡᠯ ᠦ᠋ᠨ ᠳᠤᠮᠳᠠ ᠪᠢᠴᠢᠭᠳᠡᠬᠦ ᠯᠡ ᠲᠠᠪᠢᠯᠠᠩ ᠲᠠᠢ ᠶᠤᠮ ᠤᠤ ᠳᠠ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠢᠳᠰᠢᠩᠬᠣᠷᠯᠣ ᠂ ᠪᠠᠶᠠᠨᠴᠡᠴᠡᠭ᠂ ᠨᠡᠭᠦᠳᠡᠯ᠂ ᠰᠤᠳᠤᠯᠲᠤ᠂ ᠪᠠᠯ ᠂
ᠬᠢᠨᠠᠭᠴᠢ ᠪᠠᠭᠰᠢ᠄ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ