ᠪᠡᠯᠴᠢᠭᠡᠷᠯᠡᠭᠦᠯᠦᠨ ᠮᠠᠯᠵᠢᠬᠤ ᠠ᠋ᠴᠠ ᠠᠷᠭᠠᠴᠠᠭᠠᠨ ᠮᠠᠯᠵᠢᠬᠤ ᠬᠦᠷᠲᠡᠯᠡ- ᠭ· ᠴᠢᠩᠪᠠᠭᠠᠲᠤᠷБэлчээрлүүлэн малжхаас аргацаан малжих хүртэл-Г·Чинбаатар
822ᠪᠡᠯᠴᠢᠭᠡᠷᠯᠡᠭᠦᠯᠦᠨ ᠮᠠᠯᠵᠢᠬᠤ ᠠ᠋ᠴᠠ ᠠᠷᠭᠠᠴᠠᠭᠠᠨ ᠮᠠᠯᠵᠢᠬᠤ ᠬᠦᠷᠲᠡᠯᠡ①
ᠭ· ᠴᠢᠩᠪᠠᠭᠠᠲᠤᠷ
ᠬᠡᠴᠢᠨᠡᠨ ᠵᠢᠯ ᠦ᠋ᠨ ᠲᠤᠷᠰᠢ ᠪᠢᠳᠡ《ᠲᠩᠷᠢ ᠶ᠋ᠢᠨ ᠴᠢᠷᠠᠢ ᠬᠠᠷᠠᠵᠤ ᠮᠠᠯᠵᠢᠳᠠᠭ ᠤᠯᠠᠮᠵᠢᠯᠠᠯᠲᠤ ᠬᠣᠴᠣᠷᠤᠩᠭᠤᠢ ᠮᠠᠯᠵᠢᠯ ᠤ᠋ᠨ ᠠᠷᠭᠠ ᠪᠠᠨ ᠲᠠᠶᠠᠭᠳᠠᠵᠤ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠴᠢ ᠪᠠᠷ ᠪᠦᠲᠦᠭᠡᠨ ᠪᠠᠢᠭᠤᠯᠵᠤ ᠮᠠᠯ ᠮᠠᠯᠵᠢᠬᠤ ᠬᠡᠷᠡᠭᠲᠡᠢ》 ᠭᠡᠵᠦ ᠶᠠᠷᠢᠭᠰᠠᠭᠠᠷ ᠢᠷᠡᠯᠡ᠃ ᠬᠠᠷᠢᠨ《ᠲᠩᠷᠢ ᠶ᠋ᠢᠨ ᠴᠢᠷᠠᠢ ᠬᠠᠷᠠᠵᠤ ᠮᠠᠯ ᠮᠠᠯᠵᠢᠬᠤ》 ᠭᠡᠳᠡᠭ ᠢ᠋ ᠵᠥᠪᠬᠡᠨ ᠴᠠᠰᠤ ᠵᠤᠳ᠂ ᠭᠠᠩ ᠬᠠᠭᠰᠠᠷᠠᠭᠠᠨ ᠲᠠᠢ ᠪᠣᠯ ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ ᠬᠣᠬᠢᠷᠠᠭᠤᠯᠵᠤ᠂ ᠥᠩ ᠲᠡᠢ ᠰᠠᠢᠬᠠᠨ ᠵᠢᠯ ᠮᠡᠨᠳᠦ ᠤᠨᠳᠤᠷᠤᠭᠤᠯᠳᠠᠭ ᠶᠤᠮ ᠰᠢᠭ᠋ ᠳᠠᠩᠴᠤ ᠥᠩᠭᠡᠪᠴᠢᠬᠡᠨ ᠣᠢᠯᠠᠭᠠᠬᠤ ᠨᠢ ᠵᠥᠪ ᠤᠤ? ᠪᠤᠷᠤᠭᠤ ᠤᠤ? ᠭᠡᠳᠡᠭ ᠢ᠋ᠶ᠋ᠡᠨ ᠨᠢᠭᠲᠠᠯᠠᠬᠤ ᠶᠣᠰᠣᠲᠠᠢ᠃ ᠨᠡᠭᠦᠳᠡᠯ ᠪᠠᠭᠤᠳᠠᠯ ᠬᠢᠬᠦ ᠪᠣᠯᠤᠮᠵᠢ ᠠᠯᠳᠠᠭᠳᠠᠵᠤ᠂ ᠨᠤᠲᠤᠭ ᠪᠡᠯᠴᠢᠭᠡᠷ ᠢᠪᠴᠤᠷᠠᠨ ᠡᠯᠡᠰᠦᠵᠢᠵᠦ᠂ ᠮᠠᠯ ᠪᠡᠯᠴᠢᠭᠡᠷ ᠦ᠋ᠨ ᠵᠥᠷᠢᠴᠡᠯ ᠰᠢᠷᠦᠭᠦᠰᠴᠦ ᠪᠠᠢᠭᠠ ᠥᠨᠥᠳᠥᠷ《ᠲᠩᠷᠢ ᠶ᠋ᠢᠨ ᠴᠢᠷᠠᠢ ᠬᠠᠷᠠᠵᠤ ᠮᠠᠯ ᠮᠠᠯᠵᠢᠳᠠᠭ》 ᠤ᠋ᠨ ᠴᠢᠨᠠᠳᠤ ᠤᠴᠢᠷ ᠤᠳᠬᠠ ᠶ᠋ᠢ ᠡᠪᠳᠡᠷᠬᠡᠢ ᠰᠡᠳᠬᠢᠬᠦᠢ ᠮᠠᠨᠢ ᠤᠨᠤᠵᠤ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠭᠠ ᠴᠤ ᠤᠤ? ᠶᠡᠷᠦ ᠨᠢ!
ᠲᠩᠷᠢ ᠭᠠᠵᠠᠷ᠂ ᠠᠭᠠᠷ ᠤᠰᠤ ᠠᠭᠤᠷ ᠠᠮᠢᠰᠬᠤᠯ᠂ ᠠᠮᠢᠲᠠᠨ ᠪᠠᠢᠭᠠᠯᠢ ᠶ᠋ᠢᠨ ᠰᠢᠲᠦᠯᠴᠡᠭᠡ ᠪᠣᠯ ᠤᠤᠯ ᠠ᠋ᠴᠠ ᠪᠠᠨ ᠵᠢᠮᠡ ᠶᠣᠰᠣᠴᠢ ᠲᠣᠭᠲᠠᠯᠴᠠᠭᠠ ᠲᠠᠢ ᠶᠤᠮ᠃ ᠡᠨᠡ ᠲᠣᠭᠲᠠᠯᠴᠠᠭᠠ ᠶ᠋ᠢ ᠡᠪᠳᠡᠪᠡᠯ ᠪᠠᠢᠭᠠᠯᠢ ᠶ᠋ᠢᠨ ᠵᠠᠯᠬᠠᠭᠠᠯ ᠢ᠋ ᠬᠦᠯᠢᠶᠡᠬᠦ ᠪᠣᠯᠤᠨᠠ ᠭᠡᠰᠡᠨ ᠬᠣᠯᠠᠴᠢ ᠤᠬᠠᠭᠠ ᠮᠣᠩᠭᠣᠯᠴᠤᠳ ᠲᠤ ᠪᠣᠢ ᠭᠡᠳᠡᠭ ᠢ᠋ ᠨᠤᠲᠠᠯᠠᠬᠤ ᠪᠠᠷᠢᠮᠲᠠ ᠴᠤᠬᠤᠮ ᠴᠤ《ᠲᠡᠷᠭᠡ ᠪᠡᠷ ᠲᠡᠭᠡᠭᠡᠵᠦ ᠲᠡᠮᠡᠭᠡ ᠪᠡᠷ ᠠᠴᠢᠪᠠᠴᠤ》 ᠪᠣᠢ ᠯᠠ ᠳᠠ! ᠮᠣᠩᠭᠣᠯᠴᠤᠳ ᠤ᠋ᠨ ᠲᠠᠬᠢᠯᠭᠠ ᠰᠢᠲᠦᠯᠭᠡ᠂ ᠴᠡᠭᠡᠷ ᠬᠣᠷᠢᠭ᠂ ᠮᠠᠯ ᠮᠠᠯᠵᠢᠯ ᠤ᠋ᠨ ᠠᠷᠭᠠ ᠴᠠᠷᠭᠠ᠂ ᠠᠮᠢᠳᠤᠷᠠᠯ ᠤ᠋ᠨ ᠵᠠᠩᠰᠢᠯ ᠳᠠᠳᠬᠠᠯ᠂ ᠴᠠᠭᠠᠰᠢᠯᠠᠨ ᠶᠡᠷᠦ ᠶ᠋ᠢᠨ ᠴᠠᠭ ᠤ᠋ᠨ ᠶᠠᠷᠢᠶᠠ ᠬᠡᠯᠡᠯᠭᠡ ᠳ᠋ᠦ᠍ᠨᠢ ᠬᠦᠷᠲᠡᠯᠡ ᠡᠨᠡ ᠤᠬᠠᠮᠰᠠᠷ ᠳᠣᠭᠣᠰᠢᠯᠠᠭᠳᠠᠵᠤ ᠪᠠᠢᠭᠠ ᠶᠤᠮ᠃ ᠬᠠᠷᠢᠨ ᠡᠨᠡ ᠪᠦᠬᠦᠨ ᠢ᠋ ᠪᠠᠯᠠᠷ ᠬᠠᠭᠤᠴᠢᠨ ᠶᠠᠭᠤᠮᠠ᠂ ᠮᠤᠬᠤᠷ ᠰᠦᠰᠦᠭ ᠪᠤᠶᠤ ᠱᠠᠰᠢᠨ ᠤ᠋ ᠭᠠᠵᠢ ᠣᠢᠯᠠᠭᠠᠯᠲᠠ ᠭᠡᠮᠡᠨ ᠴᠠᠯᠠᠭᠠᠢ ᠬᠠᠭᠤᠳᠠᠮ ᠢ᠋ᠶ᠋ᠠᠷ ᠳ᠋ᠦᠩ ᠥᠭᠬᠦ ᠳ᠋ᠦ᠍ ᠬᠦᠷᠪᠡᠰᠦ ᠠᠯᠤᠰ ᠴᠠᠭᠠᠨᠠ ᠨᠢ ᠰᠢᠮᠡᠵᠢᠨ ᠲᠣᠨᠣᠳᠠᠰᠤᠯᠠᠭᠰᠠᠨ ᠠᠯᠢ ᠣᠯᠠᠨ ᠦᠨᠡ ᠴᠠᠨᠠ ᠲᠠᠢ ᠵᠦᠢᠯᠡᠰ ᠢ᠋ ᠦᠷᠡᠭᠳᠡᠭᠦᠯᠦᠭᠰᠡᠨ ᠤᠴᠢᠷ ᠪᠣᠯᠤᠨᠠ᠃ ᠲᠩᠷᠢ ᠶ᠋ᠢ ᠲᠦᠰᠢᠵᠦ ᠮᠠᠯ ᠮᠠᠯᠵᠢᠨᠠ ᠭᠡᠳᠡᠭ ᠴᠣᠬᠣᠮ ᠳ᠋ᠠᠭᠠᠨ ᠪᠠᠢᠭᠠᠯᠢ ᠶ᠋ᠢᠨ ᠵᠢᠮᠡ ᠶᠣᠰᠣᠨ ᠠ᠋ᠴᠠ ᠲᠡᠷᠰᠯᠡᠬᠦ ᠦᠭᠡᠢ᠂ ᠲᠩᠷᠢ ᠭᠠᠵᠠᠷ ᠤ᠋ᠨ ᠠᠭᠠᠷ ᠠᠮᠢᠰᠬᠤᠯ ᠤ᠋ᠨ ᠨᠠᠷᠢᠨ ᠵᠣᠬᠢᠴᠠᠯᠳᠤᠭᠠ ᠶ᠋ᠢ ᠡᠪᠳᠡᠬᠦ ᠦᠭᠡᠢ᠂ ᠲᠥᠷᠥᠯᠬᠢ ᠪᠠᠢᠭᠠᠯᠢ ᠶ᠋ᠢᠨ ᠰᠢᠮᠡ ᠬᠦᠴᠦ ᠳ᠋ᠦ᠍ ᠲᠦᠰᠢᠭᠯᠡᠳᠡᠭ ᠠᠮᠢᠳᠤ ᠪᠣᠳᠠᠰ ᠤ᠋ᠨ ᠣᠨᠴᠠᠯᠢᠭ ᠢ᠋ ᠬᠠᠷᠠᠭᠠᠯᠵᠠᠨ᠂ ᠠᠮᠢᠨ ᠲᠡᠵᠢᠭᠡᠯ ᠪᠣᠯᠤᠭᠰᠠᠨ ᠭᠠᠵᠠᠷ ᠤᠰᠤ ᠪᠠᠨ ᠬᠠᠢᠷᠠᠯᠠᠨ ᠬᠢᠮᠠᠭᠠᠳᠠᠵᠤ᠂ ᠤᠷᠲᠤ ᠶ᠋ᠢᠨ ᠬᠡᠷᠡᠭᠯᠡᠭᠡ ᠲᠡᠢ ᠪᠣᠯᠭᠠᠬᠤ ᠶ᠋ᠢ ᠠᠩᠬᠠᠷᠤᠭᠰᠠᠨ ᠤᠷᠢᠳᠠᠯ ᠳᠣᠣᠷᠠ ᠮᠠᠯ ᠠᠵᠤ ᠠᠬᠤᠢ ᠪᠠᠨ ᠡᠷᠬᠢᠯᠡᠨ ᠶᠠᠪᠤᠭᠤᠯᠬᠤ ᠶ᠋ᠢ ᠵᠢᠭᠠᠭᠰᠠᠨ ᠪᠠᠢᠬᠤ ᠤᠴᠢᠷᠲᠠᠢ᠃ ᠥᠨᠥᠳᠥᠷ ᠪᠢᠳᠡ ᠡᠢᠮᠦ ᠬᠣᠯᠠᠴᠢ ᠭᠦᠨ ᠤᠬᠠᠮᠰᠠᠷ ᠳᠤᠲᠠᠭᠤ ᠶ᠋ᠢᠨ ᠬᠠᠷᠠᠭᠠ ᠪᠠᠷ ᠳᠠᠯᠳᠠ ᠶ᠋ᠢᠨ ᠶᠡᠬᠡ ᠤᠬᠠᠭᠠ ᠨᠢᠭᠤᠭᠰᠠᠨ ᠡᠨᠡ ᠪᠦᠬᠦᠨ ᠳ᠋ᠦ᠍ ᠳᠠᠩᠴᠤ ᠬᠠᠭᠤᠮᠠᠭᠠᠢ ᠬᠠᠨᠳᠤᠭᠠᠳ ᠪᠠᠢᠵᠤ ᠯᠠ ᠳᠠ!
ᠠᠮᠢᠲᠠᠨ ᠪᠣᠳᠠᠰ ᠤ᠋ᠨ ᠪᠡᠶᠡ ᠪᠠᠶᠠᠨ ᠳ᠋ᠠᠭᠠᠨ ᠲᠦᠰᠢᠭᠯᠡᠨ ᠣᠷᠣᠰᠢᠬᠤ ᠨᠢᠴᠤᠰᠢ ᠦᠭᠡᠢ ᠬᠠᠷᠢᠴᠠᠭᠠ ᠶ᠋ᠢ ᠠᠩᠬᠠᠷᠬᠤ᠂ ᠮᠠᠯ ᠤᠨᠤᠭᠠ ᠶ᠋ᠢ ᠪᠠᠢᠭᠠᠯᠢ ᠠ᠋ᠴᠠ ᠥᠭᠭᠦᠭᠳᠡᠭᠰᠡᠨ ᠨᠥᠬᠥᠴᠡᠯ ᠳ᠋ᠦ᠍ᠨᠢ ᠬᠠᠷᠠᠭᠠᠯᠵᠠᠭᠤᠯᠤᠨ ᠮᠠᠯᠵᠢᠬᠤ ᠪᠤᠶᠤ ᠴᠢᠨᠠᠷᠵᠢᠭᠤᠯᠬᠤ᠂ ᠪᠡᠯᠴᠢᠭᠡᠷ ᠢ᠋ ᠭᠦᠢᠴᠡᠳ ᠪᠦᠷᠢᠨ ᠠᠰᠢᠭᠯᠠᠮᠵᠢ ᠲᠠᠢ ᠪᠠᠢᠯᠭᠠᠬᠤ᠂ ᠴᠢᠭᠢᠭ ᠰᠢᠮᠡ ᠶ᠋ᠢᠨ ᠲᠣᠭᠲᠠᠯᠴᠠᠭᠠ ᠶ᠋ᠢ ᠠᠯᠳᠠᠭᠳᠠᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠬᠦ᠁ ᠵᠡᠷᠭᠡ ᠣᠯᠠᠨ ᠵᠣᠷᠢᠭᠤᠯᠤᠯᠲᠠ ᠠ᠋ᠴᠠ ᠡᠭᠦᠰᠴᠦ᠂ ᠰᠦᠷᠦᠭ ᠢ᠋ᠶ᠋ᠡᠷ ᠮᠠᠯᠵᠢᠬᠤ᠂ ᠪᠡᠯᠴᠢᠭᠡᠷᠯᠡᠭᠦᠯᠦᠨ ᠮᠠᠯᠵᠢᠬᠤ᠂ ᠨᠡᠭᠦᠳᠡᠯ ᠪᠠᠭᠤᠳᠠᠯ ᠶᠠᠪᠤᠬᠤ᠂ ᠲᠠᠪᠤᠨ ᠬᠣᠰᠢᠭᠤ ᠪᠠᠷ ᠮᠠᠯᠵᠢᠬᠤ᠂ ᠠᠭᠤᠷᠰᠢᠯᠲᠠ ᠲᠤᠨᠤᠳᠠᠰᠤ ᠶ᠋ᠢᠨ ᠵᠣᠬᠢᠴᠠᠯ ᠢ᠋ ᠪᠠᠲᠤᠯᠠᠬᠤ (ᠣᠢ ᠮᠣᠳᠣ ᠰᠠᠢᠲᠠᠢ ᠠᠭᠤᠯᠠ ᠬᠠᠢᠷᠬᠠᠨ ᠵᠢᠴᠢ ᠭᠣᠣᠯ ᠮᠥᠷᠡᠨ ᠨᠢ ᠨᠢᠭᠡᠨ ᠬᠡᠰᠡᠭ ᠭᠠᠵᠠᠷ ᠣᠷᠣᠨ ᠤ᠋ ᠴᠢᠭᠢᠭ ᠦ᠋ᠨ ᠬᠡᠮᠵᠢᠶᠡ᠂ ᠭᠠᠩᠳᠠᠯ ᠤᠰᠤᠲᠤᠯ ᠲᠠᠢ ᠬᠣᠯᠪᠣᠭᠳᠠᠳᠠᠭ ᠪᠣᠯᠬᠣᠷ ᠮᠣᠩᠭᠣᠯᠴᠤᠳ ᠤ᠋ᠨ ᠣᠪᠣᠭᠠ ᠳᠠᠭᠢᠬᠤ᠂ ᠣᠢ ᠮᠣᠳᠣ ᠣᠭᠲᠣᠯᠵᠤ ᠰᠦᠢᠳᠬᠡᠬᠦ ᠶ᠋ᠢ ᠴᠡᠭᠡᠷᠯᠡᠬᠦ ᠵᠡᠷᠭᠡ ᠨᠢ ᠮᠠᠰᠢ ᠤᠴᠢᠷ ᠬᠣᠯᠪᠣᠭᠳᠠᠯᠲᠠᠢ ᠠᠵᠢ) ᠭᠡᠬᠦᠴᠢᠯᠡᠨ ᠵᠦᠢ ᠵᠣᠬᠢᠰ ᠲᠠᠢ ᠶᠣᠰᠣ ᠭᠣᠷᠢᠮ ᠠᠮᠢᠳᠤᠷᠠᠯ ᠤ᠋ᠨ ᠬᠢᠨᠢ ᠶᠠᠪᠤᠴᠠ ᠪᠦᠬᠦᠨ ᠳ᠋ᠦ᠍ ᠬᠡᠪᠰᠢᠨ ᠲᠣᠭᠲᠠᠭᠰᠠᠨ ᠪᠠᠢᠳᠠᠭ ᠪᠢᠯᠡ᠃
ᠶᠠᠮᠠᠷ ᠴᠤ᠌ ᠶᠠᠭᠤᠮᠠ ᠭᠡᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠦᠨᠡ ᠥᠷᠲᠡᠭ ᠲᠡᠢ ᠪᠠᠢᠳᠠᠭ᠃《ᠶᠠᠭᠤᠮᠠ ᠶᠠᠭᠤᠮᠠ ᠪᠠᠷ ᠪᠠᠢᠬᠤ ᠰᠠᠢᠬᠠᠨ》 ᠭᠡᠵᠦ ᠮᠣᠩᠭᠣᠯᠴᠤᠳ ᠬᠡᠯᠡᠳᠡᠭ ᠦ᠋ᠨ ᠤᠴᠢᠷ ᠡᠨᠡ᠃ ᠭᠡᠬᠦ ᠳ᠋ᠦ᠍ ᠶᠠᠭᠤᠮᠠ ᠶ᠋ᠢ ᠶᠠᠭᠤᠮᠠ ᠪᠠᠷ ᠨᠢ ᠪᠠᠢᠯᠭᠠᠬᠤ ᠳ᠋ᠤ᠌ ᠮᠠᠰᠢ ᠶᠡᠬᠡ ᠤᠬᠠᠭᠠ ᠰᠡᠭᠡᠭᠡ᠂ ᠵᠣᠷᠢᠭ ᠲᠠᠮᠢᠷ᠂ ᠡᠪ ᠳᠠᠮ ᠬᠡᠷᠡᠭᠲᠡᠢ ᠪᠥᠭᠡᠳ ᠮᠣᠩᠭᠣᠯᠴᠤᠳ ᠡᠭᠦᠨ ᠢ᠋ ᠬᠥᠮᠦᠨ ᠪᠠᠢᠭᠠᠯᠢ ᠬᠣᠶᠠᠷ ᠤ᠋ᠨ ᠬᠠᠷᠢᠴᠠᠭᠠᠨ ᠳᠡᠭᠡᠷᠡ ᠭᠠᠷᠮᠠᠭᠠᠢ ᠰᠠᠢᠨ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠭᠰᠠᠨ ᠠᠵᠢ᠃
ᠲᠡᠢᠮᠦ ᠳ᠋ᠡᠭᠡᠨ ᠯᠡ ᠡᠭᠡᠭᠡ ᠰᠠᠶᠢᠬᠠᠨ ᠪᠣᠯᠲᠠᠯᠠ ᠲᠠᠯᠠ ᠨᠤᠲᠤᠭ ᠮᠠᠨᠢ《ᠠᠶᠠᠰ ᠤ᠋ᠨ ᠰᠠᠯᠬᠢᠨ ᠰᠡᠪᠢᠯᠵᠡᠬᠦᠶᠡ᠂ ᠠᠳᠤᠭᠤ ᠬᠣᠨᠢ ᠢᠷᠠᠢᠨ ᠦᠵᠡᠭᠳᠡᠮᠦᠢ》 ᠬᠡᠮᠡᠭᠳᠡᠭᠰᠡᠨ ᠥᠩᠰᠢᠭ ᠰᠠᠢᠬᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠵᠤ ᠴᠢᠳᠠᠭᠰᠠᠨ ᠶᠤᠮ᠃ ᠬᠠᠷᠢᠨ 20 ᠳ᠋ᠤᠭᠠᠷ ᠵᠠᠭᠤᠨ ᠠ᠋ᠴᠠ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠯᠲᠠ᠂ ᠲᠥᠰᠥᠪ ᠦᠭᠡᠢ ᠨᠡᠭᠡᠭᠡᠯᠲᠡ ᠶ᠋ᠢᠨ ᠡᠷᠴᠢᠮ ᠴᠢᠩᠭᠠᠷᠠᠵᠤ᠂ ᠪᠠᠢᠭᠠᠯᠢ ᠳ᠋ᠠᠭᠠᠨ ᠠᠴᠢ ᠬᠠᠷᠢᠭᠤᠯᠲᠠ ᠲᠠᠢ ᠪᠠᠷ ᠣᠷᠣᠩᠨᠠᠬᠤ ᠤᠬᠠᠮᠰᠠᠷ ᠰᠤᠯᠠᠷᠠᠭᠰᠠᠨ ᠢ᠋ᠶ᠋ᠠᠷ ᠣᠬᠣᠷᠬᠠᠨ ᠬᠣᠷᠢ ᠭᠤᠴᠢᠨ ᠵᠢᠯ ᠳ᠋ᠦ᠍ ᠭᠤᠷᠪᠠᠨ ᠶᠡᠬᠡ ᠲᠠᠯᠠ ᠨᠤᠲᠤᠭ ᠪᠥᠮᠪᠥᠷᠴᠡᠭ ᠡᠴᠡ ᠪᠦᠷᠢᠯᠦᠭᠰᠡᠨ ᠶᠦᠮ᠃ ᠲᠡᠭᠡᠭᠡᠳ ᠬᠡᠵᠢᠶᠡ ᠰᠡᠭᠦᠯ ᠳ᠋ᠦ᠍ ᠬᠢᠭᠰᠡᠨ ᠪᠦᠬᠦᠨ ᠦ᠌ ᠬᠢᠨᠢ ᠦᠷᠡ ᠳ᠋ᠦᠩ ᠥᠭᠡᠷᠡ ᠪᠡᠷ ᠡᠷᠭᠢᠬᠦ ᠦᠶᠡᠰ ᠤᠯᠠᠮᠵᠢᠯᠠᠯᠲᠤ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ《ᠬᠣᠴᠣᠷᠤᠩᠭᠤᠢ ᠪᠦᠳᠦᠭᠦᠯᠢᠭ》ᠲᠦ᠍ ᠰᠢᠯᠲᠠᠭ ᠢ᠋ᠶ᠋ᠠᠨ ᠲᠦᠯᠬᠢᠴᠢᠬᠡᠭᠰᠡᠨ ᠪᠢᠯᠡ᠃ ᠡᠢᠨ ᠬᠦ᠌《ᠪᠤᠷᠤᠭᠤ ᠵᠠᠮ ᠢ᠋ᠶ᠋ᠠᠷ ᠪᠤᠳᠠᠭᠠ ᠲᠡᠭᠡᠭᠡᠵᠦ᠂ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠰᠢᠷᠣᠢ ᠲᠡᠭᠡᠭᠡᠭᠰᠡᠨ》 ᠬᠣᠢᠨᠠ ᠪᠠᠨ ᠠᠮᠠ ᠪᠠᠨ ᠪᠠᠷᠢᠵᠤ ᠬᠠᠷᠠᠰᠠᠬᠤ ᠳ᠋ᠠᠭᠠᠨ ᠣᠢᠵᠢᠭᠤᠯᠤᠨᠠ᠃ ᠪᠦᠲᠦᠭᠡᠨ ᠪᠠᠢᠭᠤᠯᠤᠨᠠ᠂ ᠬᠠᠰᠢᠶᠠᠯᠠᠨᠠ ᠭᠡᠵᠦ ᠬᠥᠯ ᠪᠣᠯᠤᠭᠰᠠᠨ ᠴᠤ ᠨᠢᠭᠡᠨᠲᠡ ᠲᠡᠩᠴᠡᠭᠦᠷᠢ ᠲᠣᠭᠲᠠᠯᠴᠠᠭᠠᠨ ᠤ᠋ ᠪᠠᠨ ᠵᠢᠮᠡ ᠭᠣᠷᠢᠮ ᠢ᠋ᠶ᠋ᠠᠨ ᠠᠯᠳᠠᠭᠰᠠᠨ ᠪᠠᠢᠭᠠᠯᠢ ᠤᠰᠤ ᠮᠢᠨᠢ ᠵᠠᠰᠠᠪᠤᠷᠢ ᠠᠪᠬᠤ ᠨᠠᠭᠠᠳᠤ ᠵᠠᠬᠠ ᠶ᠋ᠢᠨ ᠪᠣᠯᠤᠮᠵᠢ ᠪᠠᠨ ᠬᠦᠷᠲᠡᠯᠡ ᠠᠯᠳᠠᠵᠤ《ᠠᠮᠢ ᠨᠠᠭᠠᠨᠠ᠂ ᠲᠠᠮᠤ ᠴᠠᠭᠠᠨᠠ》 ᠪᠣᠯᠵᠠᠢ᠃ ᠡᠢᠮᠦ ᠬᠦᠨᠳᠦᠷᠡᠯ ᠲᠡᠢ ᠪᠠᠢᠳᠠᠯ ᠳᠣᠣᠷᠠ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠪᠠᠷ ᠮᠠᠯ ᠮᠠᠯᠵᠢᠬᠤ᠂ ᠪᠦᠲᠦᠭᠡᠨ ᠪᠠᠢᠭᠤᠯᠵᠤ ᠮᠠᠯ ᠮᠠᠯᠵᠢᠬᠤ ᠰᠢᠨᠡ ᠭᠡᠭᠳᠡᠭᠰᠡᠨ ᠠᠷᠭᠠ ᠨᠤᠭᠤᠳ ᠰᠡᠲᠦᠭᠳᠡᠭᠰᠡᠨ ᠪᠠᠢᠭᠠ ᠶᠤᠮ ᠬᠣᠷᠢᠵᠤ ᠲᠡᠵᠢᠭᠡᠬᠦ᠂ ᠢᠮᠠᠭᠠ ᠶ᠋ᠢ ᠤᠰᠠᠳᠬᠠᠬᠤ᠂ ᠠᠳᠤᠭᠤ ᠪᠠᠨ ᠦᠭᠡᠢ ᠬᠢᠬᠦ᠂ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠬᠦᠷᠢᠶᠡᠯᠡᠬᠦ᠂ ᠮᠠᠯᠵᠢᠯ ᠲᠠᠷᠢᠶᠠᠯᠠᠩ ᠢ᠋ ᠤᠶᠠᠯᠳᠤᠭᠤᠯᠬᠤ᠂ ᠪᠣᠷᠳᠣᠨ ᠲᠠᠷᠭᠤᠯᠠᠭᠤᠯᠬᠤ᠂ ᠬᠠᠷᠢ ᠡᠭᠦᠯᠳᠡᠷ ᠦ᠋ᠨ ᠮᠠᠯ ᠮᠠᠯᠵᠢᠬᠤ᠁ ᠵᠡᠷᠭᠡ ᠨᠢ ᠪᠦᠷ ᠪᠠᠢᠭᠠᠯᠢ ᠪᠠᠨ ᠡᠪᠳᠡᠭᠰᠡᠨ ᠦ ᠳ᠋ᠦᠩ ᠳ᠋ᠦ᠍ ᠭᠠᠷᠭᠠᠭᠰᠠᠨ ᠠᠷᠭᠠ ᠪᠠᠢᠵᠤ᠂ ᠵᠠᠷᠢᠮ ᠨᠢ ᠨᠡᠭᠦᠳᠡᠯ ᠮᠠᠯᠵᠢᠯ ᠤ᠋ᠨ ᠰᠢᠯᠢᠳᠡᠭ ᠲᠤᠷᠰᠢᠯᠭᠠ ᠠ᠋ᠴᠠ ᠡᠮᠲᠡᠯᠦᠨ ᠠᠪᠤᠭᠰᠠᠨ ᠵᠦᠢᠯ ᠠᠵᠢ᠃
ᠪᠡᠯᠴᠢᠭᠡᠷᠯᠡᠭᠦᠯᠦᠨ ᠮᠠᠯᠵᠢᠭᠰᠠᠨ ᠮᠠᠯ ᠤ᠋ᠨ ᠮᠢᠬᠠ ᠰᠦ ᠠᠮᠲᠠ ᠰᠠᠢᠲᠠᠢ᠂ ᠰᠢᠮᠡ ᠲᠡᠭᠦᠯᠳᠡᠷ᠂ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠬᠡᠷᠡᠭᠰᠡᠬᠦ ᠢᠯᠴᠢ ᠡᠨᠧᠷᠭᠢ ᠬᠠᠩᠭᠠᠮᠵᠢᠲᠠᠢ᠂ ᠤᠭᠤᠷᠠᠭ ᠪᠤᠶᠤ ᠪᠤᠰᠤᠳ ᠡᠷᠦᠳᠡᠰᠦ ᠡᠯᠧᠮᠧᠨ᠋ᠲ ᠦ᠋ᠨ ᠠᠭᠤᠯᠤᠭᠳᠠᠴᠠ ᠥᠨᠳᠥᠷ (ᠣᠯᠠᠨ ᠲᠥᠷᠥᠯ ᠦ᠋ᠨ ᠡᠪᠡᠰᠦ ᠢᠳᠡᠬᠦ ᠪᠣᠯᠬᠣᠷ) ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠣᠷᠢᠵᠤ ᠬᠠᠰᠢᠶᠠᠯᠠᠨ᠂ ᠡᠷᠳᠡᠨᠢ ᠰᠢᠰᠢ ᠶ᠋ᠢᠨ ᠡᠰᠢ ᠰᠦᠷᠡᠯ ᠢ᠋ᠶ᠋ᠡᠷ ᠯᠡ ᠭᠣᠣᠯᠳᠠᠭᠤ ᠲᠡᠵᠢᠭᠡᠯ ᠠᠪᠤᠭᠰᠠᠨ ᠮᠠᠯ ᠠ᠋ᠴᠠ ᠡᠷᠡᠰ ᠣᠨᠴᠠᠯᠢᠬᠳᠠᠳᠠᠭ᠃ ᠲᠠᠷᠢᠶᠠᠴᠢᠳ ᠲᠤ ᠴᠤ ᠡᠢᠮᠦ ᠵᠢᠱ᠌ᠢᠶᠡ ᠪᠣᠢ᠃ ᠲᠠᠷᠢᠶᠠᠴᠢᠳ ᠥᠪᠡᠷ ᠦ᠋ᠨ ᠬᠦᠨᠡᠰᠦᠨ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠲᠠᠷᠢᠮᠠᠯ ᠳ᠋ᠠᠭᠠᠨ ᠬᠢᠮᠢ ᠶ᠋ᠢᠨ ᠪᠣᠷᠳᠣᠭᠤᠷ ᠡᠨᠡ ᠲᠡᠷᠡ ᠬᠢᠵᠦ᠂ ᠥᠰᠦᠯᠲᠡ ᠶ᠋ᠢ ᠬᠤᠷᠳᠤᠳᠬᠠᠳᠠᠭ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠥᠪᠡᠷ ᠢ᠋ᠶ᠋ᠡᠨ ᠢᠳᠡᠬᠦ ᠳ᠋ᠦ᠍ ᠠᠮᠲᠠᠲᠠᠢ᠂ ᠰᠢᠮᠡ ᠰᠠᠢᠲᠠᠢ ᠪᠠᠢᠬᠤ ᠶ᠋ᠢ ᠨᠢ ᠬᠠᠷᠠᠭᠠᠯᠵᠠᠳᠠᠭ ᠠᠲᠠᠯᠠ ᠪᠡᠨ ᠬᠤᠳᠠᠯᠳᠤᠬᠤ ᠳ᠋ᠠᠭᠠᠨ ᠥᠰᠦᠯᠲᠡ ᠰᠠᠢᠲᠠᠢ᠂ ᠮᠥᠬᠥᠯᠢᠭ ᠨᠢ ᠲᠣᠮᠣ᠂ ᠵᠢᠩ ᠳᠠᠭᠠᠭᠠᠬᠤ ᠪᠠᠷ ᠰᠠᠢᠨ ᠪᠠᠢᠬᠤ᠂ ᠨᠣᠭᠣᠭᠠ ᠴᠠᠭᠠ ᠶᠤᠮᠰᠠᠨ ᠪᠣᠯ ᠪᠣᠢᠵᠢᠯᠲᠠ ᠨᠢ ᠭᠦᠢᠴᠡᠳ ᠪᠠᠢᠬᠤ ᠵᠡᠷᠭᠡ ᠶ᠋ᠢ ᠪᠣᠳᠣᠯᠬᠢᠯᠠᠵᠤ ᠠᠰᠢᠭ ᠣᠷᠣᠯᠭᠠ ᠣᠯᠬᠤ ᠪᠠᠨ ᠯᠠ ᠬᠠᠷᠠᠭᠠᠯᠵᠠᠭᠰᠠᠨ ᠪᠠᠢᠳᠠᠭ ᠠᠵᠢ᠃ ᠢᠩᠭᠢᠬᠦᠯᠡᠷ ᠪᠢᠳᠡᠨ ᠦ᠌ ᠢᠳᠡᠳᠡᠭ《ᠰᠢᠯᠢᠳᠡᠭ ᠲᠠᠷᠢᠮᠠᠯ ᠤ᠋ᠨ ᠪᠦᠲᠦᠭᠡᠭᠳᠡᠬᠦᠨ》 ᠨᠦ᠍ᠭᠦᠳ ᠨᠢ ᠲᠠᠷᠢᠶᠠᠴᠢᠳ ᠲᠤ᠌ ᠪᠣᠯ ᠠᠮᠲᠠ ᠮᠠᠭᠤᠲᠠᠢ᠂ ᠰᠢᠮᠡ ᠪᠠᠭᠠᠲᠠᠢ᠂ ᠴᠠᠭᠠᠰᠢᠯᠠᠪᠠᠯ ᠬᠢᠮᠢ ᠶ᠋ᠢᠨ ᠪᠣᠬᠢᠷᠲᠤᠯ ᠲᠠᠢ ᠵᠦᠢᠯ ᠪᠠᠢᠭᠠ ᠨᠢ ᠮᠡᠳᠡᠭᠡᠵᠢ᠃ ᠮᠠᠯ ᠤ᠋ᠨ ᠮᠢᠬᠠ ᠰᠦ ᠴᠦ᠍ ᠡᠢᠮᠦ ᠪᠠᠢᠳᠠᠭ᠃ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠨᠢ ᠭᠠᠬᠠᠢ ᠪᠢᠰᠢ᠂ ᠬᠡᠭᠡᠷᠡ ᠶ᠋ᠢᠨ ᠡᠯᠳᠡᠩ ᠪᠡᠯᠴᠢᠭᠡᠷ ᠲᠦ᠍ ᠢᠳᠡᠭᠡᠰᠢᠵᠦ ᠲᠡᠵᠢᠭᠡᠯ ᠲᠠᠷᠭᠤ ᠠᠪᠴᠤ ᠴᠢᠮᠪᠠᠢᠵᠢᠳᠠᠭ ᠡᠪᠡᠰᠦᠨ ᠢᠳᠡᠰᠢᠲᠦ ᠠᠮᠢᠲᠠᠨ ᠪᠣᠯᠬᠣᠷ ᠬᠣᠷᠢᠵᠤ ᠲᠡᠵᠢᠭᠡᠬᠦ᠂ ᠪᠣᠷᠳᠣᠨ ᠲᠠᠷᠭᠤᠯᠠᠭᠤᠯᠬᠤ ᠨᠢ ᠦᠨᠡᠨ ᠳ᠋ᠡᠭᠡᠨ ᠨᠢᠳᠦᠨ ᠡᠮᠦᠨᠡᠬᠢ ᠠᠰᠢᠭ ᠢ᠋ᠶ᠋ᠠᠨ ᠯᠠ ᠬᠥᠭᠡᠭᠡᠴᠡᠯᠳᠦᠵᠦ᠂ ᠴᠢᠨᠠᠷ ᠢ᠋ ᠨᠢ ᠣᠮᠲᠣᠭᠠᠢᠯᠠᠭᠰᠠᠨ ᠤᠴᠢᠷ ᠶᠤᠮ᠃ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠨᠢ ᠠᠭᠤᠳᠠᠮ ᠪᠡᠯᠴᠢᠭᠡᠷ ᠡᠴᠡ ᠥᠪᠡᠷ ᠲᠡᠭᠡᠨ ᠲᠣᠬᠢᠷᠠᠭᠰᠠᠨ ᠡᠪᠡᠰᠦ ᠢᠳᠡᠵᠦ (ᠵᠢᠯ ᠦ᠋ᠨ ᠳᠥᠷᠪᠡᠨ ᠤᠯᠠᠷᠢᠯ ᠳ᠋ᠤ᠌ ᠲᠠᠷᠭᠤ ᠳᠡᠪᠡᠭᠡᠷᠡᠭ ᠠᠪᠤᠭᠤᠯᠬᠤ ᠳ᠋ᠤ᠌ ᠢᠳᠡᠰᠢᠯᠡᠭᠦᠯᠬᠦ ᠪᠡᠯᠴᠢᠭᠡᠷ ᠠᠳᠠᠯᠢ ᠦᠭᠡᠢ᠂ ᠮᠠᠯ ᠪᠣᠯᠭᠠᠨ ᠤ᠋ ᠢᠳᠡᠰᠢᠯᠡᠬᠦ ᠳᠤᠷᠠᠰᠢᠯ ᠠᠳᠠᠯᠢ ᠦᠭᠡᠢ᠂ᠡᠪᠡᠰᠦ ᠪᠣᠯᠭᠠᠨ ᠤ᠋ ᠨᠥᠬᠥᠪᠥᠷᠢᠯᠡᠬᠦ ᠲᠡᠵᠢᠭᠡᠯ ᠰᠢᠮᠡ ᠴᠦ᠍ ᠠᠳᠠᠯᠢ ᠦᠭᠡᠢ) ᠬᠥᠳᠡᠯᠭᠡᠭᠡᠨ ᠦ᠌ ᠳᠤᠮᠳᠠ ᠢᠯᠴᠢ ᠲᠡᠩᠬᠡᠭᠡ ᠬᠦᠷᠲᠡᠵᠦ ᠴᠢᠮᠪᠠᠢᠵᠢᠳᠠᠭ (ᠬᠥᠮᠦᠨ ᠢ᠋ᠶ᠋ᠡᠷ ᠦᠯᠢᠳᠬᠡᠪᠡᠯ᠂ ᠵᠦᠭᠡᠷ ᠰᠠᠭᠤᠭᠰᠠᠨ ᠬᠥᠮᠦᠨ ᠦ᠌ ᠪᠤᠯᠴᠢᠩ ᠰᠤᠯᠠᠷᠠᠨ᠂ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠳᠣᠷᠣᠢᠲᠠᠳᠠᠭ ᠰᠢᠦ ᠳᠡ᠂ ᠲᠡᠢᠮᠦ ᠤᠴᠢᠷ ᠠ᠋ᠴᠠ ᠠᠮᠢ ᠨᠠᠰᠤ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠪᠣᠢ ᠭᠡᠳᠡᠭ)᠃ ᠪᠠᠢᠭᠠᠯᠢ ᠶ᠋ᠢᠨ ᠰᠠᠯᠬᠢᠨ ᠪᠣᠷᠣᠭᠠᠨ᠂ ᠬᠦᠢᠲᠡᠨ ᠨᠣᠢᠲᠠᠨ ᠳ᠋ᠤ᠌ ᠥᠯᠴᠢᠷᠰᠢᠨ ᠪᠣᠷᠣᠭᠰᠢᠵᠤ (ᠠᠮᠢᠳᠤ ᠪᠣᠳᠠᠰ ᠪᠠᠢᠭᠠᠯᠢ ᠶ᠋ᠢᠨ ᠰᠢᠯᠭᠠᠷᠠᠯ ᠢ᠋ᠶ᠋ᠠᠷ ᠳᠠᠪᠲᠠᠭᠳᠠᠨ ᠰᠢᠯᠢᠳᠡᠭᠵᠢᠳᠡᠭ ᠨᠢ ᠨᠠᠭᠠᠳᠤ ᠵᠠᠬᠠ ᠶ᠋ᠢᠨ ᠮᠡᠳᠡᠯᠭᠡ ᠰᠠᠨ) ᠴᠢᠨᠰᠠᠭᠠᠵᠢᠳᠠᠭ ᠪᠢᠯᠡ᠃ ᠴᠣᠬᠣᠮ ᠳ᠋ᠠᠭᠠᠨ ᠲᠡᠵᠢᠭᠡᠯ ᠢ᠋ᠶ᠋ᠡᠷ ᠪᠣᠷᠳᠣᠵᠤ᠂ ᠬᠥᠭᠡᠩᠭᠢ ᠲᠠᠷᠭᠤ ᠠᠪᠤᠭᠤᠯᠤᠭᠰᠠᠨ ᠪᠤᠶᠤ ᠬᠣᠷᠢᠵᠤ ᠬᠠᠰᠢᠶᠠᠯᠠᠵᠤ ᠲᠡᠵᠢᠭᠡᠭᠰᠡᠨ ᠮᠠᠯ ᠤ᠋ᠨ ᠮᠢᠬᠠᠨ ᠤ᠋ ᠠᠮᠲᠠ ᠰᠢᠮᠲᠡ᠂ ᠴᠢᠨᠠᠷ ᠴᠢᠨᠰᠠᠭᠠ ᠨᠢ ᠪᠡᠯᠴᠢᠭᠡᠷ ᠦ᠋ᠨ ᠮᠠᠯ ᠤ᠋ᠨ ᠮᠢᠬᠠᠨ ᠠ᠋ᠴᠠ ᠬᠣᠯᠠ ᠠᠨᠠᠢ ᠪᠣᠯᠬᠣᠷ ᠵᠠᠬᠠ ᠳᠡᠯᠭᠡᠭᠦᠷ ᠦ᠋ᠨ ᠥᠷᠢᠰᠦᠯᠳᠦᠭᠡᠨ ᠳ᠋ᠦ᠍ ᠲᠣᠯᠢᠳᠠᠬᠤ ᠶᠣᠰᠣᠲᠠᠢ᠃ ᠭᠡᠪᠡᠴᠦ ᠪᠠᠷᠠᠭᠠᠨ ᠤ᠋ ᠴᠢᠨᠠᠷ ᠤ᠋ᠨ ᠵᠢᠩᠬᠢᠨᠢ ᠠᠭᠤᠯᠤᠭᠳᠠᠬᠤᠨ ᠭᠡᠭᠴᠢ ᠶ᠋ᠢ ᠣᠢᠯᠠᠭᠠᠭᠠ ᠦᠭᠡᠢ ᠦᠶᠡ ᠳ᠋ᠦ᠍ ᠵᠥᠪᠬᠡᠨ ᠭᠠᠷᠤᠯᠲᠠ ᠶ᠋ᠢᠨ ᠬᠡᠮᠵᠢᠶᠡ ᠯᠡ ᠠᠯᠢᠪᠠ ᠶ᠋ᠢ ᠰᠣᠬᠣᠷ ᠢ᠋ᠶ᠋ᠠᠷ ᠵᠢᠯᠣᠭᠣᠳᠳᠠᠭ ᠨᠢ ᠬᠡᠴᠡᠭᠦᠦ᠃ ᠰᠥᠨᠢᠳ ᠬᠣᠨᠢᠨ ᠤ᠋ ᠮᠢᠬᠠ ᠠᠮᠲᠠᠲᠠᠢ ᠭᠡᠵᠦ ᠬᠥᠮᠦᠰ ᠳᠠᠭᠤ ᠨᠢᠭᠡᠲᠡᠢ ᠦᠨᠡᠯᠡᠳᠡᠭ ᠨᠢ ᠴᠦ᠍ ᠪᠡᠯᠴᠢᠭᠡᠷ ᠦ᠋ᠨ ᠣᠯᠠᠨ ᠲᠥᠷᠥᠯ ᠦ᠋ᠨ ᠤᠷᠭᠤᠮᠠᠯ ᠢᠳᠡᠵᠦ ᠮᠢᠬᠠ ᠨᠢ ᠱᠥᠯᠥᠰᠢᠨ ᠰᠢᠮᠡᠵᠢᠭᠰᠡᠨ᠂ ᠬᠡᠭᠡᠷᠡ ᠬᠥᠳᠡᠭᠡ ᠶ᠋ᠢᠨ ᠴᠡᠪᠡᠷ ᠰᠠᠯᠬᠢ ᠨᠠᠷᠠᠨ ᠳ᠋ᠤ᠌ ᠥᠯᠴᠢᠷᠰᠢᠨ ᠪᠣᠷᠣᠭᠰᠢᠭᠰᠠᠨ ᠮᠠᠯ ᠤ᠋ᠨ ᠮᠢᠬᠠᠨ ᠤ᠋ ᠴᠢᠨᠰᠠᠭᠠ ᠶ᠋ᠢ ᠶᠠᠮᠠᠷ ᠨᠢᠭᠡᠨ ᠲᠠᠯᠠ ᠪᠠᠷ ᠬᠠᠷᠠᠭᠤᠯᠵᠤ ᠪᠠᠢᠭᠠ ᠶᠤᠮ᠃ ᠭᠡᠪᠡᠴᠦ ᠣᠳᠣᠬᠠᠨ ᠳ᠋ᠤ᠌ ᠬᠡᠷᠡᠭᠯᠡᠭᠴᠢᠳ ᠪᠤᠶᠤ ᠦᠢᠯᠡᠳᠪᠦᠷᠢᠯᠡᠭᠴᠢᠳ ᠰᠣᠬᠣᠷ ᠢ᠋ᠶ᠋ᠠᠷ ᠲᠠᠷᠭᠤ ᠠᠪᠤᠭᠤᠯᠬᠤ ᠶ᠋ᠢ ᠬᠥᠭᠡᠭᠡᠴᠡᠯᠳᠦᠳᠡᠭ ᠡᠴᠡ ᠮᠠᠯᠴᠢᠳ ᠤ᠋ᠨ ᠣᠷᠣᠯᠭᠠ ᠴᠤ᠌ ᠳᠣᠣᠷᠠ ᠪᠠᠢᠭᠰᠠᠭᠠᠷ᠃ ᠡᠭᠦᠨ ᠳ᠋ᠦ᠍ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠮᠡᠷᠭᠡᠵᠢᠯᠲᠡ᠂ ᠡᠷᠳᠡᠮᠲᠡᠨ ᠰᠤᠳᠤᠯᠭᠠᠲᠠᠨ ᠨᠠᠷ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠮᠢᠬᠠᠨ ᠤ᠋ ᠴᠢᠨᠠᠷ ᠴᠢᠨᠰᠠᠭᠠᠨ ᠤ᠋ ᠲᠠᠯᠠ ᠪᠠᠷ ᠦᠨᠡᠯᠡᠭᠡ ᠬᠢᠵᠦ᠂ ᠣᠨᠳᠣᠣ ᠡᠭᠦᠯᠳᠡᠷ ᠦ᠋ᠨ ᠮᠠᠯ ᠤ᠋ᠨ ᠮᠢᠬᠠᠨ ᠠ᠋ᠴᠠ ᠠᠮᠲᠠ ᠰᠢᠮᠳᠠ᠂ ᠰᠢᠮᠡ ᠲᠡᠵᠢᠭᠡᠯ᠂ ᠠᠭᠤᠯᠤᠭᠳᠠᠬᠤ ᠡᠯᠧᠮᠧᠨ᠋ᠲ᠂ ᠢᠯᠴᠢ ᠡᠨᠧᠷᠭᠢ ᠂ ᠴᠢᠨᠠᠷ ᠴᠢᠨᠰᠠᠭᠠ ᠵᠡᠷᠭᠡ ᠣᠯᠠᠨ ᠲᠠᠯᠠ ᠪᠠᠷ ᠶᠠᠮᠠᠷ ᠢᠯᠭᠠᠭᠠ ᠲᠠᠢ ᠪᠠᠢᠬᠤ ᠲᠤᠬᠠᠢ ᠨᠠᠷᠢᠨ ᠳ᠋ᠦᠩ ᠭᠠᠷᠭᠠᠬᠤ ᠶᠠᠪᠤᠳᠠᠯ ᠴᠢᠬᠤᠯᠠ ᠱᠠᠭᠠᠷᠳᠠᠭᠳᠠᠵᠤ ᠪᠣᠢ᠃ ᠨᠤᠲᠤᠭ ᠤ᠋ᠨ ᠦᠨᠢᠶᠡᠨ ᠦ᠌ ᠰᠦ ᠪᠡᠷ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠴᠠᠭᠠᠨ ᠢᠳᠡᠭᠡ ᠨᠢ ᠠᠯᠠᠭ ᠦᠨᠢᠶᠡᠨ ᠦ᠌ ᠰᠦ ᠪᠡᠷ ᠬᠢᠭᠰᠡᠨ ᠴᠠᠭᠠᠨ ᠢᠳᠡᠭᠡ ᠡᠴᠡ ᠠᠮᠲᠠᠲᠠᠢ᠂ ᠲᠣᠰᠣᠯᠢᠭ ᠪᠠᠢᠳᠠᠭ ᠲᠡᠳᠦᠢ ᠦᠭᠡᠢ᠂ ᠥᠳᠬᠡᠴᠡ᠂ ᠨᠢᠭᠲᠠᠴᠠ ᠨᠢ ᠴᠦ᠍ ᠵᠥᠷᠢᠶᠡᠲᠡᠢ ᠪᠠᠢᠳᠠᠭ ᠢ᠋ ᠴᠢᠨᠠᠭᠰᠢᠳᠠ ᠪᠣᠯᠭᠣᠭᠠᠬᠤ ᠶᠣᠰᠣᠲᠠᠢ᠃
ᠪᠡᠯᠴᠢᠭᠡᠷ ᠢ᠋ ᠵᠣᠬᠢᠰᠲᠠᠢ ᠠᠰᠢᠭᠯᠠᠮᠵᠢ ᠶ᠋ᠢᠨ ᠲᠠᠯᠠ ᠪᠠᠷ ᠬᠢ ᠮᠣᠩᠭᠣᠯᠴᠤᠳ ᠤ᠋ᠨ ᠬᠡᠴᠢᠨᠡᠨ ᠮᠢᠩᠭᠠᠨ ᠵᠢᠯ ᠦ᠋ᠨ ᠪᠦᠲᠦᠮᠵᠢᠲᠡᠢ ᠦᠢᠯᠡᠳᠦᠯᠭᠡ᠂ ᠮᠠᠯ ᠤ᠋ᠨ ᠡᠭᠦᠯᠳᠡᠷ ᠰᠠᠢᠵᠢᠷᠠᠭᠤᠯᠵᠤ᠂ ᠤᠭᠰᠠᠭᠠ ᠶ᠋ᠢ ᠰᠢᠨᠡᠴᠢᠯᠡᠬᠦ᠂ ᠴᠢᠰᠤ ᠰᠡᠯᠪᠢᠬᠦ ᠡᠷᠯᠢᠰᠡᠵᠢᠭᠦᠯᠭᠡ᠂ ᠬᠣᠯᠠ ᠨᠤᠲᠤᠭ ᠠ᠋ᠴᠠ ᠰᠢᠯᠢᠳᠡᠭ ᠴᠢᠨᠠᠷ ᠤ᠋ᠨ ᠡᠴᠢᠭᠡ ᠮᠠᠯ ᠠᠪᠴᠢᠷᠠᠬᠤ(ᠬᠠᠭᠤᠴᠢᠨ ᠳ᠋ᠤ᠌ ᠪᠠᠶᠠᠴᠤᠳ ᠰᠢᠯᠢ ᠶ᠋ᠢᠨ ᠰᠠᠢᠨ ᠡᠷᠡ ᠳ᠋ᠦ᠍ ᠨᠠᠢᠳᠠᠵᠤ ᠠᠢᠮᠠᠭ ᠬᠣᠰᠢᠭᠤ ᠠᠯᠤᠰ ᠠ᠋ᠴᠠ ᠰᠠᠢᠨ ᠡᠭᠦᠯᠳᠡᠷ ᠦ᠋ᠨ ᠠᠳᠤᠭᠤ ᠠᠪᠴᠢᠷᠠᠭᠤᠯᠳᠠᠭ ᠨᠢ ᠡᠨᠡ ᠵᠢᠱ᠌ᠢᠶᠡ ᠶᠦᠮ) ᠵᠡᠷᠭᠡ ᠰᠢᠯᠢᠳᠡᠭ ᠲᠤᠷᠰᠢᠯᠭᠠ ᠨᠢ ᠡᠭᠦᠯᠳᠡᠷ ᠰᠠᠢᠵᠢᠷᠠᠭᠤᠯᠤᠯᠲᠠ ᠶ᠋ᠢᠨ ᠭᠣᠣᠯ ᠵᠠᠩᠭᠢᠯᠠᠭᠠ ᠪᠣᠯᠪᠠᠴᠤ ᠬᠠᠷᠠᠮᠰᠠᠯᠲᠠᠢ ᠨᠢ ᠨᠢᠭᠡᠨᠲᠡ ᠭᠡᠭᠡᠭᠳᠡᠵᠡᠢ᠃ ᠲᠣᠭᠠ ᠶ᠋ᠢ ᠴᠥᠭᠡᠴᠢᠯᠡᠨ ᠴᠢᠨᠠᠷ ᠢ᠋ ᠠᠩᠬᠠᠷᠬᠤ ᠬᠡᠷᠡᠭᠲᠡᠢ ᠭᠡᠳᠡᠭ ᠨᠢ ᠣᠷᠣᠨ ᠨᠤᠲᠤᠭ ᠤ᠋ᠨ ᠡᠭᠦᠯᠳᠡᠷ ᠢ᠋ ᠥᠭᠡᠢᠬᠢᠵᠦ᠂ ᠣᠨᠳᠣᠣ ᠭᠠᠵᠠᠷ ᠤ᠋ᠨ ᠡᠭᠦᠯᠳᠡᠷ ᠢ᠋ ᠥᠨᠳᠥᠷ ᠦᠨᠡ ᠪᠡᠷ ᠬᠤᠳᠠᠯᠳᠤᠨ ᠠᠪᠴᠢᠷᠠᠵᠤ ᠮᠠᠯᠵᠢᠬᠤ ᠶ᠋ᠢ ᠬᠡᠯᠡᠳᠡᠭ ᠶᠦᠮ ᠰᠢᠬ ᠭᠠᠵᠢ ᠣᠢᠯᠠᠭᠠᠳᠠᠭ ᠪᠣᠯᠵᠠᠢ᠃ ᠡᠢᠨ ᠬᠦ᠌ ᠲᠡᠵᠢᠭᠡᠯ ᠪᠣᠷᠳᠣᠭᠠ᠂ ᠠᠭᠤᠷ ᠠᠮᠢᠰᠬᠤᠯ᠂ ᠫᠧᠩ ᠰᠠᠷᠠᠪᠴᠢ᠂ ᠠᠷᠠᠴᠢᠯᠠᠭᠠ ᠳᠣᠳᠣᠮᠳᠠᠯᠭᠠ ᠶ᠋ᠢᠨ ᠨᠥᠬᠥᠴᠡᠯ ᠨᠢ ᠡᠷᠡᠰ ᠥᠭᠡᠷᠡ ᠡᠭᠦᠯᠳᠡᠷ ᠦ᠋ᠨ ᠮᠠᠯ ᠮᠠᠨ ᠤ᠋ ᠣᠷᠣᠨ ᠤ᠋ ᠪᠠᠢᠳᠠᠯ ᠳ᠋ᠤ᠌ ᠵᠣᠬᠢᠴᠠᠯᠳᠤᠭᠠ ᠮᠠᠭᠤᠲᠠᠢ ᠠ᠋ᠴᠠ ᠥᠰᠦᠯᠲᠡ ᠦᠷᠡᠵᠢᠯᠲᠡ᠂ ᠭᠠᠷᠤᠯᠲᠠ ᠰᠢᠮᠡ ᠨᠢ ᠠᠨᠠᠢ ᠪᠣᠯᠳᠠᠭ ᠲᠡᠳᠦᠢ ᠦᠭᠡᠢ ᠮᠠᠯᠴᠢᠳ ᠴᠤ ᠥᠨᠳᠥᠷ ᠦᠨᠡ ᠶ᠋ᠢᠨ ᠲᠦᠭᠰᠢᠭᠦᠷᠢ ᠶ᠋ᠢ ᠡᠭᠦᠷᠭᠡᠯᠡᠳᠡᠭ᠃ ᠤᠳᠠᠭᠠᠨ ᠬᠤᠭᠤᠴᠠᠭᠠᠨ ᠤ᠋ ᠣᠷᠣᠨ ᠨᠤᠲᠤᠭ ᠤ᠋ᠨ ᠡᠭᠦᠯᠳᠡᠷ ᠢ᠋ ᠰᠣᠩᠭᠣᠨ ᠪᠣᠢᠵᠢᠭᠤᠯᠵᠤ ᠰᠢᠯᠢᠳᠡᠭᠵᠢᠭᠦᠯᠬᠦ ᠶ᠋ᠢ ᠳᠠᠩᠴᠤ ᠣᠮᠲᠣᠭᠠᠢᠯᠠᠭᠰᠠᠨ ᠠ᠋ᠴᠠ ᠪᠣᠯᠵᠤ ᠪᠡᠶᠡ ᠨᠢ ᠵᠢᠵᠢᠭᠷᠡᠨ᠂ ᠠᠰᠢᠭ ᠰᠢᠮᠡ ᠨᠢ ᠮᠠᠭᠤᠳᠴᠤ᠂ ᠨᠤᠲᠤᠭ ᠤ᠋ᠨ ᠡᠭᠦᠯᠲᠡᠢ ᠭᠡᠳᠡᠭ ᠡᠢᠮᠦ ᠮᠠᠭᠤ ᠴᠢᠨᠰᠠᠭᠠᠨ ᠤ᠋ ᠮᠠᠯ ᠭᠡᠰᠡᠨ ᠠᠨᠳᠠᠭᠤ ᠣᠢᠯᠠᠭᠠᠯᠲᠠ ᠶ᠋ᠢ ᠪᠢᠳᠡᠨ ᠳ᠋ᠦ᠍ ᠥᠭᠴᠡᠢ᠃ ᠨᠢᠭᠡᠨ ᠦᠶᠡ ᠴᠤᠤᠲᠠᠢ ᠪᠠᠢᠭᠰᠠᠨ ᠲᠠᠯᠠ ᠨᠤᠲᠤᠭ ᠤ᠋ᠨ ᠤᠯᠠᠭᠠᠨ ᠦᠬᠡᠷ ᠨᠢ ᠴᠦ᠍ ᠴᠠᠭᠠᠰᠢᠳᠠ ᠰᠢᠯᠢᠳᠡᠭᠵᠢᠭᠦᠯᠦᠨ ᠪᠣᠢᠵᠢᠭᠤᠯᠬᠤ ᠶ᠋ᠢ ᠴᠢᠬᠤᠯᠠᠴᠢᠯᠠᠭᠰᠠᠨ ᠦᠭᠡᠢ ᠡᠴᠡ ᠪᠣᠯᠵᠤ ᠣᠢᠷᠠ ᠴᠢᠰᠤᠨ ᠤ᠋ ᠬᠡᠭᠡᠯᠲᠦᠭᠦᠯᠭᠡ ᠪᠡᠷ ᠠᠷᠭᠠᠴᠠᠭᠠᠨ᠂ ᠴᠢᠰᠤ ᠰᠡᠯᠪᠢᠬᠦ ᠵᠡᠷᠭᠡ ᠴᠢᠨᠰᠠᠭᠠᠵᠢᠭᠤᠯᠬᠤ ᠠᠵᠢᠯ ᠬᠣᠢᠰᠢ ᠬᠠᠶᠠᠭᠳᠠᠭᠰᠠᠨ ᠢ᠋ᠶ᠋ᠠᠷ ᠠᠭᠠᠵᠢᠮ ᠳ᠋ᠠᠭᠠᠨ ᠭᠣᠯᠣᠭᠳᠠᠭᠰᠠᠨ ᠰᠤᠷᠭᠠᠮᠵᠢ ᠶ᠋ᠢ ᠡᠷᠭᠢᠵᠦ ᠰᠠᠨᠠᠯᠲᠠᠢ᠃ ᠦᠵᠦᠮᠦᠴᠢᠨ ᠬᠣᠨᠢ᠂ ᠠᠷᠪᠠᠰ ᠤ᠋ᠨ ᠢᠮᠠᠭᠠ᠂ ᠬᠢᠩᠭᠠ ᠶ᠋ᠢᠨ ᠢᠮᠠᠭᠠ᠂ ᠮᠣᠩᠭᠣᠯ ᠠᠳᠤᠭᠤ ᠶ᠋ᠢ ᠣᠳᠣ ᠶ᠋ᠢᠨ ᠬᠢ ᠰᠢᠭ ᠢᠩᠭᠢᠵᠦ ᠲᠡᠭᠡᠰᠬᠢᠵᠦ ᠯᠡ ᠪᠠᠢᠪᠠᠯ ᠡᠭᠦᠯᠳᠡᠷ ᠳᠣᠷᠣᠢᠲᠠᠨ ᠣᠨᠳᠣᠣ ᠡᠭᠦᠯᠳᠡᠷ ᠦ᠋ᠨ ᠮᠠᠯ ᠳ᠋ᠤ᠌ ᠣᠷᠣᠨ ᠢ᠋ᠶ᠋ᠠᠨ ᠶᠡᠭᠦᠯᠡᠬᠦ ᠯᠡ ᠬᠡᠷᠡᠭ᠃ ᠬᠠᠷᠢᠨ ᠡᠨᠡ ᠲᠠᠯᠠ ᠪᠠᠷ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠰᠤᠳᠤᠯᠭᠠᠲᠠᠳ ᠠᠩᠬᠠᠷᠤᠯ ᠳ᠋ᠠᠭᠠᠨ ᠠᠪᠤᠯ ᠦᠭᠡᠢ ᠵᠦᠭᠡᠷ ᠯᠡ ᠡᠨᠡ ᠡᠭᠦᠯᠳᠡᠷ ᠰᠠᠢᠨ᠂ ᠲᠡᠷᠡ ᠡᠭᠦᠯᠳᠡᠷ ᠵᠦᠭᠡᠷ᠂ ᠣᠷᠣᠨ ᠨᠤᠲᠤᠭ ᠤ᠋ᠨ ᠡᠭᠦᠯᠳᠡᠷ ᠠᠨᠠᠢ ᠭᠡᠰᠡᠨ ᠰᠣᠬᠣᠷ ᠳ᠋ᠦᠩ ᠲᠠᠯᠪᠢᠭᠠᠳ ᠪᠠᠢᠬᠤ ᠶᠤᠮ ᠳᠠ! ᠲᠠᠯᠠ ᠨᠤᠲᠤᠭ ᠤ᠋ᠨ ᠣᠨᠴᠠᠯᠢᠭᠲᠤ ᠮᠠᠯ ᠤ᠋ᠨ ᠠᠰᠢᠭ ᠰᠢᠮᠡ ᠨᠢ ᠵᠥᠪᠬᠡᠨ ᠥᠪᠡᠷ ᠦ᠋ᠨ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠪᠠᠭᠤᠯᠢᠭ ᠪᠣᠯᠭᠠᠭᠰᠠᠨ ᠤᠷᠢᠳᠠᠯ ᠳ᠋ᠤ᠌ ᠪᠤᠰᠤᠳ ᠲᠠᠢ ᠥᠷᠢᠰᠦᠯᠳᠦᠵᠦ ᠴᠢᠳᠠᠨᠠ᠃ ᠤᠯᠤᠰ ᠪᠤᠶᠤ ᠶᠠᠮᠠᠷ ᠨᠢᠭᠡᠨ ᠺᠣᠮᠫᠠᠨᠢ ᠠ᠋ᠴᠠ ᠪᠡᠯᠡ ᠣᠷᠣᠭᠤᠯᠵᠤ ᠲᠤᠷᠰᠢᠯᠲᠠ ᠶ᠋ᠢᠨ ᠴᠠᠭ ᠲᠤ᠌ ᠰᠤᠳᠤᠯᠭᠠᠲᠠᠳ ᠤ᠋ᠨ ᠪᠣᠢᠵᠢᠭᠤᠯᠤᠭᠰᠠᠨ ᠰᠠᠢᠨ ᠡᠭᠦᠯᠳᠡᠷ ᠦ᠋ᠨ ᠮᠠᠯ ᠢ᠋ ᠠᠰᠠᠷᠠᠮᠵᠢ ᠶ᠋ᠢᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠰᠤᠪᠢᠯᠠᠯᠲᠠ ᠬᠢᠯᠭᠡᠵᠦ ᠪᠠᠢᠭᠠ ᠰᠢᠭ᠋ ᠯᠡ ᠮᠠᠯᠵᠢᠳᠠᠭ ᠪᠠᠢᠬᠤ ᠳ᠋ᠤ᠌ ᠮᠠᠯᠴᠢᠳ ᠲᠤ᠌ ᠲᠡᠢᠮᠦ ᠪᠡᠯᠡ ᠮᠥᠩᠭᠥ᠂ ᠨᠥᠬᠥᠴᠡᠯ ᠪᠣᠯᠤᠮᠵᠢ᠂ ᠮᠡᠷᠭᠡᠵᠢᠯ ᠦᠭᠡᠢ ᠰᠢᠦ ᠳᠡ! ᠲᠤᠷᠰᠢᠯᠲᠠ ᠶ᠋ᠢᠨ ᠳ᠋ᠦᠩ ᠪᠦᠬᠦᠨ ᠦᠢᠯᠡᠳᠦᠯᠭᠡ ᠶ᠋ᠢᠨ ᠰᠢᠯᠭᠠᠷᠠᠯ ᠲᠠᠢ ᠨᠡᠢᠴᠡᠨᠡ ᠭᠡᠰᠡᠨ ᠪᠠᠲᠤᠶᠤᠰᠤ ᠦᠭᠡᠢ ᠪᠢᠵᠡ? ᠡᠰᠡᠷᠭᠦ ᠪᠡᠷ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠭᠡᠵᠦ ᠥᠭᠡᠷᠡ ᠬᠠᠮᠢᠭᠠ ᠴᠤ᠌ ᠦᠭᠡᠢ ᠡᠭᠦᠯᠳᠡᠷ᠃ ᠡᠨᠡ ᠪᠣᠯ ᠪᠢᠳᠡᠨ ᠦ᠌ ᠣᠨᠴᠠᠯᠢᠭ ᠤ᠋ᠨ ᠳᠠᠪᠠᠭᠤᠯᠢᠭ᠃ ᠭᠡᠬᠦ ᠳ᠋ᠡᠭᠡᠨ ᠲᠡᠷᠢᠭᠦᠨ ᠦ᠌ ᠮᠡᠷᠭᠡᠵᠢᠯ ᠢ᠋ ᠤᠳᠠᠭᠠᠨ ᠵᠢᠯ ᠦ᠋ᠨ ᠲᠤᠷᠰᠢᠯᠭᠠ ᠯᠤᠭᠠ ᠪᠠᠨ ᠤᠶᠠᠯᠳᠤᠭᠤᠯᠵᠤ᠂ ᠣᠷᠣᠨ ᠨᠤᠲᠤᠭ ᠤ᠋ᠨ ᠡᠭᠦᠯᠳᠡᠷ ᠢ᠋ ᠤᠯᠠᠮ ᠰᠢᠯᠢᠳᠡᠭᠵᠢᠭᠦᠯᠦᠨ ᠪᠣᠢᠵᠢᠭᠤᠯᠵᠤ ᠴᠢᠨᠰᠠᠭᠠᠵᠢᠭᠤᠯᠬᠤ ᠣᠷᠣᠯᠳᠣᠯᠭᠠ ᠶ᠋ᠢ ᠡᠷᠴᠢᠮᠲᠡᠢ ᠬᠢᠵᠦ᠂ ᠵᠠᠬᠠ ᠳᠡᠯᠭᠡᠭᠦᠷ ᠲᠦ᠍ ᠤᠬᠠᠭᠤᠯᠤᠨ᠂ ᠥᠪᠡᠷ ᠦ᠋ᠨ ᠣᠨᠴᠠᠯᠢᠭ ᠲᠠᠢ ᠳᠠᠪᠠᠭᠤᠯᠢᠭ ᠢ᠋ᠶ᠋ᠠᠨ ᠪᠤᠰᠤᠳ ᠲᠤ᠌ ᠣᠢᠯᠠᠭᠠᠭᠤᠯᠬᠤ ᠬᠡᠷᠡᠭᠲᠡᠢ᠃
ᠨᠡᠭᠦᠳᠡᠯ ᠬᠢᠬᠦ ᠨᠢ ᠰᠠᠢᠨ ᠪᠡᠯᠴᠢᠭᠡᠷ ᠡᠷᠢᠵᠦ ᠶᠠᠪᠤᠵᠤ ᠪᠠᠢᠭᠠ ᠪᠢᠰᠢ᠂ ᠬᠠᠷᠢᠨ ᠮᠠᠰᠢ ᠨᠠᠷᠢᠨ ᠵᠢᠮᠡ ᠶᠣᠰᠣ ᠲᠠᠢ ᠪᠠᠢᠳᠠᠭ᠃ ᠤᠯᠠᠷᠢᠯ ᠪᠣᠯᠭᠠᠨ ᠳ᠋ᠤ᠌ ᠮᠠᠯ ᠤ᠋ᠨ ᠢᠳᠡᠰᠢᠯᠡᠬᠦ ᠳᠤᠷᠠᠰᠢᠯ᠂ ᠲᠠᠷᠭᠤ ᠰᠠᠭᠤᠬᠤ ᠨᠥᠬᠥᠴᠡᠯ ᠠᠳᠠᠯᠢ ᠦᠭᠡᠢ᠃ ᠮᠥᠨ ᠪᠡᠯᠴᠢᠭᠡᠷ ᠢ᠋ ᠰᠡᠯᠭᠦᠨ ᠠᠮᠠᠷᠠᠭᠤᠯᠬᠤ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠪᠡᠯᠴᠢᠭᠡᠷᠯᠡᠭᠦᠯᠬᠦ ᠣᠨᠴᠠᠯᠢᠭ ᠲᠤ᠌ ᠨᠡᠢᠴᠡᠭᠦᠯᠬᠦ ᠵᠡᠷᠭᠡ ᠨᠢ ᠴᠦ᠍ ᠨᠡᠭᠦᠳᠡᠯ ᠬᠢᠬᠦ ᠶ᠋ᠢᠨ ᠱᠠᠭᠠᠷᠳᠠᠯᠭᠠ ᠠᠵᠢ᠃ ᠡᠢᠨ ᠬᠦ᠌ ᠮᠣᠩᠭᠣᠯᠴᠤᠳ ᠤ᠋ᠨ ᠳᠤᠮᠳᠠ ᠭᠠᠵᠠᠷ ᠨᠤᠲᠤᠭ ᠰᠢᠨᠵᠢᠬᠦ᠂ ᠪᠠᠢᠴᠠ᠂ ᠪᠠᠷᠲᠠᠭᠠ᠂ ᠨᠥᠮᠥᠷᠢ ᠨᠥᠭᠡᠯᠭᠡ ᠶ᠋ᠢ ᠰᠢᠨᠵᠢᠬᠦ ᠵᠡᠷᠭᠡ ᠨᠢ ᠠᠷᠭᠠ ᠦᠭᠡᠢ ᠯᠡ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠦᠢᠯᠡᠳᠦᠯᠭᠡ ᠠᠵᠢ᠃ ᠮᠠᠯ ᠤ᠋ᠨ ᠬᠥᠳᠡᠯᠭᠡᠭᠡᠨ᠂ ᠰᠠᠯᠬᠢᠨ ᠤ᠋ ᠴᠢᠭᠯᠡᠯ ᠬᠤᠷᠴᠠ᠂ ᠨᠠᠷᠠ ᠰᠠᠷᠠᠨ ᠤ᠋ ᠰᠢᠩᠭᠡᠬᠦ ᠮᠠᠨᠳᠤᠬᠤ ᠪᠠᠢᠳᠠᠯ᠂ ᠡᠭᠦᠯᠡᠨ ᠦ᠌ ᠥᠩᠭᠡ ᠬᠡᠯᠪᠡᠷᠢ ᠵᠡᠷᠭᠡ ᠣᠯᠠᠨ ᠲᠠᠯᠠ ᠳ᠋ᠤ᠌ ᠦᠨᠳᠦᠰᠦᠯᠡᠵᠦ᠂ ᠣᠢᠷᠠ ᠶ᠋ᠢᠨ ᠡᠳᠦᠷ ᠦ᠋ᠨ ᠪᠤᠶᠤ ᠨᠡᠩ ᠤᠷᠲᠤ ᠬᠤᠭᠤᠴᠠᠭᠠᠨ ᠤ᠋ ᠲᠩᠷᠢ ᠶ᠋ᠢᠨ ᠪᠠᠢᠳᠠᠯ ᠢ᠋ ᠴᠦ᠍ ᠰᠢᠨᠵᠢᠵᠦ ᠮᠡᠳᠡᠳᠡᠭ ᠭᠠᠢᠬᠠᠮᠰᠢᠭᠲᠤ ᠲᠤᠷᠰᠢᠯᠭᠠ ᠶ᠋ᠢ ᠮᠣᠩᠭᠣᠯᠴᠤᠳ ᠮᠠᠯ ᠮᠠᠯᠵᠢᠬᠤ ᠶᠠᠪᠤᠴᠠ ᠳ᠋ᠠᠭᠠᠨ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠪᠢᠯᠡ᠃ ᠮᠠᠯ ᠬᠠᠷᠢᠭᠤᠯᠤᠨᠠ ᠭᠡᠳᠡᠭ ᠮᠣᠲ᠋ᠣᠷ ᠢ᠋ᠶ᠋ᠠᠷ ᠪᠡᠯᠴᠢᠭᠡᠷ ᠳᠠᠬᠢ ᠮᠠᠯ ᠢ᠋ᠶ᠋ᠠᠨ ᠬᠠᠶᠠ ᠨᠢᠭᠡ ᠡᠷᠭᠢᠬᠦ᠂ ᠰᠦᠷᠦᠭ ᠦ᠋ᠨ ᠵᠠᠬᠠ ᠳ᠋ᠤ᠌ ᠨᠣᠮ ᠦᠵᠡᠨ ᠮᠠᠩᠰᠢᠭᠤᠷᠠᠬᠤ ᠤᠴᠢᠷ ᠪᠢᠰᠢ᠃ ᠤᠤᠯ ᠨᠢ ᠮᠠᠨ ᠤ᠋ ᠮᠠᠯᠴᠢᠳ ᠬᠣᠨᠢ ᠬᠠᠷᠢᠭᠤᠯᠬᠤ ᠳ᠋ᠠᠭᠠᠨ ᠬᠣᠨᠢ ᠶᠠᠮᠠᠷ ᠤᠷᠭᠤᠮᠠᠯ ᠳ᠋ᠤ᠌ ᠳᠤᠷᠠᠲᠠᠢ ᠪᠠᠢᠳᠠᠭ᠂ ᠡᠳᠦᠷ ᠲᠦ᠍ ᠬᠡᠳᠦᠢ ᠬᠡᠮᠵᠢᠶᠡ ᠪᠡᠷ ᠢᠳᠡᠰᠢᠯᠡᠳᠡᠭ᠂ ᠪᠡᠯᠴᠢᠭᠡᠷ ᠦ᠋ᠨ ᠢᠳᠡᠰᠢᠨ ᠦ᠌ ᠲᠥᠷᠥᠯ ᠬᠡᠳᠦᠢ ᠪᠠᠢᠭᠠ᠂ ᠠᠯᠢ ᠨᠢ ᠶᠠᠮᠠᠷ ᠰᠢᠮᠡ ᠲᠡᠢ᠂ ᠠᠯᠢ ᠤᠯᠠᠷᠢᠯ ᠳ᠋ᠤ᠌ ᠮᠠᠯ ᠢᠳᠡᠪᠡᠯ ᠲᠠᠷᠭᠤ ᠠᠪᠬᠤ ᠳ᠋ᠤ᠌ ᠰᠠᠢᠨ᠁ ᠵᠡᠷᠭᠡ ᠶ᠋ᠢ ᠨᠠᠷᠢᠨ ᠠᠵᠢᠭᠯᠠᠨ ᠲᠤᠷᠰᠢᠯᠭᠠᠵᠢᠭᠤᠯᠳᠠᠭ ᠠᠵᠢ᠃ ᠨᠢᠭᠡ ᠭᠠᠵᠠᠷ ᠨᠢᠭᠡ ᠯᠡ ᠲᠥᠷᠥᠯ ᠦ᠋ᠨ ᠮᠠᠯ ᠢ᠋ ᠤᠳᠠᠭᠠᠨ ᠮᠠᠯᠵᠢᠪᠠᠯ ᠤᠷᠭᠤᠮᠠᠯ ᠤ᠋ᠨ ᠲᠥᠷᠥᠯ ᠴᠥᠭᠡᠷᠡᠨ᠂ ᠪᠡᠯᠴᠢᠭᠡᠷ ᠦ᠋ᠨ ᠠᠰᠢᠭᠯᠠᠮᠵᠢ ᠮᠠᠭᠤᠳᠳᠠᠭ ᠠ᠋ᠴᠠ ᠬᠣᠣᠷᠲᠤ ᠡᠪᠡᠰᠦ ᠠᠷᠪᠢᠳᠤᠨ ᠤᠷᠲᠤᠮᠵᠢ ᠶ᠋ᠢᠨ ᠬᠡᠷᠡᠭᠯᠡᠭᠡ ᠪᠡᠨ ᠠᠯᠳᠠᠳᠠᠭ ᠭᠡᠰᠡᠨ ᠢ᠋ ᠴᠤ ᠮᠣᠩᠭᠣᠯᠴᠤᠳ ᠮᠡᠳᠡᠳᠡᠭ ᠪᠣᠯᠬᠣᠷ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠮᠠᠯᠵᠢᠭᠰᠠᠨ᠃ ᠪᠥᠭᠡᠮᠨᠡᠷᠡᠵᠦ ᠢᠳᠡᠰᠢᠯᠡᠳᠡᠭ ᠬᠣᠨᠢᠨ ᠰᠦᠷᠦᠭ ᠢ᠋ ᠲᠠᠷᠠᠭᠤ ᠵᠠᠢᠲᠠᠢ ᠢᠳᠡᠰᠢᠯᠡᠭᠦᠯᠦᠨ ᠪᠡᠯᠴᠢᠭᠡᠷ ᠦ᠋ᠨ ᠳᠠᠷᠤᠭᠠᠰᠤ ᠶ᠋ᠢ ᠬᠥᠩᠭᠡᠯᠡᠬᠦ᠂ ᠵᠤᠳ ᠰᠢᠭᠤᠷᠭᠠᠨ ᠳ᠋ᠤ᠌ ᠭᠡᠷ ᠥᠭᠡᠳᠡ ᠪᠡᠨ ᠪᠤᠴᠠᠬᠤ ᠵᠡᠷᠭᠡ ᠶ᠋ᠢ ᠬᠠᠷᠠᠭᠠᠯᠵᠠᠨ ᠢᠮᠠᠭᠠ ᠶ᠋ᠢ ᠬᠣᠨᠢ ᠲᠠᠢ ᠰᠦᠷᠦᠭᠯᠡᠭᠦᠯᠬᠦ ᠵᠡᠷᠭᠡ ᠨᠢ ᠴᠦ᠍ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠠᠷᠭᠠ ᠯᠠ ᠳᠠ! ᠪᠠᠢᠭᠠᠯᠢ ᠶ᠋ᠢᠨ ᠤᠤᠯ ᠤ᠋ᠨ ᠲᠣᠭᠲᠠᠯᠴᠠᠭᠠ ᠶ᠋ᠢ ᠡᠪᠳᠡᠯ ᠦᠭᠡᠢ ᠵᠢᠮᠡ ᠶᠣᠰᠣ ᠶ᠋ᠢ ᠨᠢ ᠲᠡᠷᠰᠯᠡᠯ ᠦᠭᠡᠢ᠂ ᠪᠠᠢᠭᠠᠯᠢ ᠶ᠋ᠢᠨ ᠰᠢᠯᠭᠠᠷᠠᠯ ᠢ᠋ᠶ᠋ᠠᠷ ᠰᠢᠯᠢᠳᠡᠭᠵᠢᠭᠦᠯᠳᠡᠭ ᠠᠮᠢᠳᠤ ᠪᠣᠳᠠᠰ ᠤ᠋ᠨ ᠲᠥᠷᠥᠯᠬᠢ ᠣᠨᠴᠠᠯᠢᠭ ᠢ᠋ ᠬᠠᠷᠠᠭᠠᠯᠵᠠᠨ ᠮᠣᠩᠭᠣᠯᠴᠤᠳ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠢ᠋ᠶ᠋ᠠᠨ ᠮᠠᠯᠵᠢᠨ ᠥᠨᠥᠳᠥᠷ ᠲᠦ᠍ ᠬᠦᠷᠦᠭᠰᠡᠨ ᠪᠢᠯᠡ᠃ ᠠᠮᠢ ᠠᠬᠤᠢ ᠶ᠋ᠢᠨ ᠡᠪᠳᠡᠭᠳᠡᠯ ᠳ᠋ᠦ᠍ ᠬᠠᠷᠢᠭᠤᠴᠠᠯᠭᠠ ᠡᠭᠦᠷᠭᠡᠯᠡᠬᠦ ᠤᠴᠢᠷ ᠮᠣᠩᠭᠣᠯᠴᠤᠳ ᠤ᠋ᠨ ᠠᠵᠤ ᠠᠬᠤᠢ᠂ ᠰᠣᠶᠣᠯ ᠤᠯᠠᠮᠵᠢᠯᠠᠯ᠂ ᠠᠮᠢᠳᠤᠷᠠᠯ ᠤ᠋ᠨ ᠳᠠᠳᠬᠠᠯ᠂ ᠦᠢᠯᠡᠳᠪᠦᠷᠢᠯᠡᠯ ᠦ᠋ᠨ ᠬᠡᠯᠪᠡᠷᠢ ᠳ᠋ᠦ᠍ ᠣᠭᠲᠣᠬᠠᠨ ᠴᠤ ᠦᠭᠡᠢ ᠭᠡᠵᠦ ᠪᠠᠷᠳᠠᠮ ᠬᠡᠯᠡᠬᠦ ᠪᠠᠷᠢᠮᠲᠠ ᠪᠣᠢ᠃ ᠭᠡᠬᠦ ᠳ᠋ᠦ᠍ ᠥᠨᠥᠳᠥᠷ ᠦ᠋ᠨ ᠨᠥᠬᠥᠴᠡᠯ ᠳ᠋ᠦ᠍ ᠤᠯᠠᠮᠵᠢᠯᠠᠯᠲᠤ ᠠᠵᠤ ᠠᠬᠤᠢ ᠨᠢ ᠡᠷᠡᠭᠦᠯ ᠬᠥᠭᠵᠢᠯᠲᠡ ᠶ᠋ᠢᠨ ᠪᠣᠯᠤᠮᠵᠢ ᠪᠠᠨ ᠠᠯᠳᠠᠭᠰᠠᠨ ᠪᠣᠯᠬᠣᠷ ᠬᠠᠰᠢᠶᠠᠯᠠᠵᠤ ᠮᠠᠯᠵᠢᠬᠤ᠂ ᠪᠣᠷᠳᠣᠨ ᠲᠠᠷᠭᠤᠯᠠᠭᠤᠯᠬᠤ᠂ ᠡᠭᠦᠯᠳᠡᠷ ᠰᠠᠢᠵᠢᠷᠠᠭᠤᠯᠬᠤ᠂ ᠪᠡᠯᠴᠢᠭᠡᠷᠯᠡᠭᠦᠯᠬᠦ ᠶ᠋ᠢ ᠴᠠᠭᠠᠵᠠᠯᠠᠬᠤ᠂ ᠭᠡᠬᠦᠴᠢᠯᠡᠨ ᠲᠦᠷ ᠴᠠᠭ ᠤ᠋ᠨ ᠠᠷᠭᠠᠴᠠᠭᠠᠭᠰᠠᠨ ᠠᠷᠭᠠ ᠨᠤᠭᠤᠳ ᠰᠡᠳᠦᠭᠳᠡᠭᠰᠡᠨ ᠪᠢᠯᠡ᠃ ᠡᠭᠦᠨ ᠢ᠋ ᠪᠢᠳᠡ ᠵᠥᠪᠬᠡᠨ ᠪᠠᠢᠭᠠᠯᠢ ᠶ᠋ᠢᠨ ᠰᠡᠷᠭᠦᠯᠲᠡ ᠳ᠋ᠦ᠍ ᠦᠢᠯᠡᠴᠢᠯᠡᠭᠰᠡᠨ ᠲᠦᠷ ᠴᠠᠭ ᠤ᠋ᠨ ᠠᠷᠭᠠ ᠭᠡᠵᠦ ᠣᠢᠯᠠᠭᠠᠬᠤ ᠠ᠋ᠴᠠ ᠪᠢᠰᠢ᠂ ᠪᠡᠯᠴᠢᠭᠡᠷ ᠦ᠋ᠨ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠬᠥᠭᠵᠢᠯᠲᠡ ᠶ᠋ᠢᠨ ᠬᠠᠨᠳᠤᠰᠢ᠂ ᠭᠠᠷᠬᠤ ᠵᠠᠮ᠂ ᠮᠠᠯᠴᠢᠳ ᠤ᠋ᠨ ᠴᠢᠨᠡᠭᠡᠯᠢᠭᠵᠢᠯ ᠦ᠋ᠨ ᠣᠬᠢ ᠠᠷᠭᠠ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠪᠠᠷ ᠪᠦᠲᠦᠭᠡᠨ ᠪᠠᠢᠭᠤᠯᠤᠨ ᠮᠠᠯᠵᠢᠵᠤ ᠪᠠᠢ ᠭᠠ ᠵᠦᠢᠯ ᠢ᠋ᠶ᠋ᠡᠷ ᠡᠨᠳᠡᠭᠦᠦ ᠣᠢᠯᠠᠭᠠᠵᠤ ᠪᠣᠯᠬᠤ ᠦᠭᠡᠢ ᠯᠡ ᠳᠡ! ᠪᠦᠲᠦᠭᠡᠨ ᠪᠠᠢᠭᠤᠯᠤᠨᠠ ᠭᠡᠳᠡᠭ ᠴᠦ᠍ ᠦᠨᠡᠨ ᠳ᠋ᠡᠭᠡᠨ ᠡᠪᠳᠡᠨ ᠪᠦᠷᠢᠯᠭᠡᠭᠰᠡᠨ ᠢ᠋ᠶ᠋ᠡᠨ ᠡᠪᠯᠡᠭᠦᠯᠵᠦ ᠠᠨᠠᠭᠠᠵᠤ ᠪᠠᠢᠭᠠ ᠶ᠋ᠢ ᠵᠢᠭᠠᠵᠤ ᠪᠣᠢ᠃ ᠶᠠᠭ ᠴᠣᠬᠣᠮ ᠳ᠋ᠠᠭᠠᠨ ᠮᠣᠩᠭᠣᠯᠴᠤᠳ ᠤ᠋ᠨ ᠤᠯᠠᠮᠵᠢᠯᠠᠯᠲᠤ ᠮᠠᠯᠵᠢᠯ ᠤ᠋ᠨ ᠠᠷᠭᠠ ᠴᠢᠷᠭᠠ ᠳ᠋ᠤ᠌ ᠰᠢᠨᠵᠢᠯᠡᠬᠦ ᠤᠬᠠᠭᠠᠴᠢ ᠵᠥᠪ ᠳ᠋ᠦᠩ ᠥᠭᠬᠦ ᠶᠣᠰᠣᠲᠠᠢ ᠪᠢᠯᠡ᠃
ᠮᠠᠯ ᠲᠡᠵᠢᠭᠡᠪᠦᠷᠢ ᠶ᠋ᠢ ᠠᠩᠬᠠ ᠭᠠᠷᠰᠢᠭᠤᠯᠤᠨ ᠲᠡᠵᠢᠭᠡᠬᠦ ᠳ᠋ᠡᠭᠡᠨ ᠮᠣᠩᠭᠣᠯᠴᠤᠳ ᠤ᠋ᠨ ᠳᠡᠭᠡᠳᠦᠰ ᠰᠠᠭᠤᠷᠢᠰᠢᠯ ᠠᠮᠢᠳᠤᠷᠠᠯ ᠲᠠᠢ ᠪᠠᠢᠭᠰᠠᠨ ᠴᠤ᠌ ᠪᠡᠯᠴᠢᠭᠡᠷ ᠦ᠋ᠨ ᠬᠣᠮᠰᠠᠳᠠᠯ᠂ ᠤᠷᠭᠤᠮᠠᠯ ᠤ᠋ᠨ ᠲᠠᠴᠢᠷᠳᠠᠯ ᠠ᠋ᠴᠠ ᠰᠢᠯᠲᠠᠭᠠᠯᠠᠨ ᠨᠡᠭᠦᠳᠡᠯ ᠰᠠᠭᠤᠳᠠᠯ ᠤ᠋ᠨ ᠬᠥᠳᠡᠯᠭᠡᠭᠡᠨᠲᠦ ᠠᠮᠢᠳᠤᠷᠠᠯ ᠳ᠋ᠤ᠌ ᠰᠢᠯᠵᠢᠭᠰᠡᠨ ᠭᠡᠳᠡᠭ ᠢ᠋ ᠰᠤᠳᠤᠯᠭᠠᠨ ᠭᠡᠷᠡᠴᠢᠯᠡᠪᠡ᠃《ᠤᠷᠤᠰᠬᠠᠯ ᠤᠰᠤ ᠦᠮᠡᠬᠡᠢᠷᠡᠬᠦ ᠦᠭᠡᠢ᠂ ᠤᠭᠯᠤᠷᠭᠠ ᠮᠣᠳᠣ ᠬᠣᠷᠣᠬᠠᠢᠲᠤᠬᠤ ᠦᠭᠡᠢ 》ᠭᠡᠳᠡᠭᠴᠢᠯᠡᠨ ᠶᠠᠮᠠᠷ ᠴᠤ᠌ ᠶᠠᠭᠤᠮᠠ ᠭᠡᠳ ᠬᠥᠳᠡᠯᠭᠡᠭᠡᠨ ᠦ᠌ ᠶᠠᠪᠤᠴᠠ ᠳ᠋ᠤ᠌ ᠬᠠᠭᠤᠴᠢᠷᠠᠨ ᠲᠣᠭᠣᠰᠣᠷᠠᠬᠤ ᠦᠭᠡᠢ ᠪᠠᠢᠵᠤ ᠴᠢᠳᠠᠳᠠᠭ ᠬᠠᠲᠠᠭᠤ ᠵᠢᠮᠡ ᠮᠣᠩᠭᠣᠯᠴᠤᠳ ᠤ᠋ᠨ ᠨᠡᠭᠦᠳᠡᠯ ᠳ᠋ᠦ᠍ ᠢᠯᠡᠷᠡᠯ ᠢ᠋ᠶ᠋ᠡᠨ ᠣᠯᠤᠭᠰᠠᠨ ᠢ᠋ ᠠᠩᠬᠠᠷᠬᠤ ᠶᠣᠰᠣᠲᠠᠢ᠃ ᠮᠠᠯ ᠤ᠋ᠨ ᠴᠡᠪᠡᠷ ᠥᠰᠦᠯᠲᠡ ᠪᠡᠷ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠬᠥᠭᠵᠢᠯ ᠢ᠋ ᠪᠠᠷᠢᠮᠵᠢᠶᠠᠯᠠᠳᠠᠭ ᠤᠳᠠᠭᠠᠨ ᠵᠢᠯ ᠦ᠋ᠨ ᠪᠤᠷᠤᠭᠤ ᠤᠷᠢᠶᠠᠯᠠᠭᠠ ᠮᠠᠯ ᠤ᠋ᠨ ᠲᠣᠭᠠ ᠣᠯᠠᠰᠢᠷᠠᠨ᠂ ᠴᠢᠨᠠᠷ ᠮᠠᠭᠤᠳᠠᠭᠰᠠᠨ ᠥᠨᠥᠳᠥᠷ ᠦ᠋ᠨ ᠰᠣᠯᠣᠭᠠᠢ ᠬᠠᠨᠳᠤᠰᠢ ᠶ᠋ᠢ ᠪᠣᠢ ᠪᠣᠯᠭᠠᠭᠰᠠᠨ ᠪᠢᠯᠡ᠃ ᠶᠠᠷᠢᠶᠠᠨ ᠦᠭᠡᠢ ᠡᠨᠡ ᠳᠤᠮᠳᠠ ᠲᠡᠦᠬᠡᠨ ᠰᠢᠯᠲᠠᠭᠠᠨ ᠴᠤ᠌ ᠳᠤᠷᠠᠳᠤᠭᠳᠠᠬᠤ ᠶᠣᠰᠣᠲᠠᠢ᠃
ᠡᠨᠡ ᠪᠦᠬᠦᠨ ᠡᠴᠡ ᠦᠵᠡᠬᠦᠶᠡ ᠲᠩᠷᠢ ᠶ᠋ᠢ ᠲᠦᠰᠢᠨᠡ ᠭᠡᠳᠡᠭ ᠪᠠᠢᠭᠠᠯᠢ ᠶ᠋ᠢᠨ ᠵᠢᠮ ᠶᠣᠰᠣ ᠶ᠋ᠢ ᠲᠦᠰᠢᠨᠡ ᠭᠡᠰᠡᠨ ᠦᠭᠡ᠃ ᠶᠠᠮᠠᠷ ᠴᠤ᠌ ᠬᠦᠴᠦᠨ ᠵᠦᠢᠯ ᠪᠠᠢᠭᠠᠯᠢ ᠶ᠋ᠢᠨ ᠵᠢᠮᠡ ᠶ᠋ᠢ ᠰᠥᠷᠬᠦ ᠴᠢᠳᠠᠯ ᠦᠭᠡᠢ ᠭᠡᠳᠡᠭ ᠢ᠋ ᠥᠨᠥᠳᠥᠷ ᠦ᠋ᠨ ᠠᠬᠤᠢ ᠪᠠᠢᠳᠠᠯ ᠲᠣᠳᠣᠬᠠᠨ ᠬᠠᠷᠠᠭᠤᠯᠵᠤ ᠪᠠᠢᠨᠠ᠃ ᠡᠨᠡ ᠨᠤᠲᠤᠭ ᠣᠷᠣᠨ ᠳ᠋ᠤ᠌ ᠶᠠᠮᠠᠷ ᠦᠢᠯᠡᠳᠪᠦᠷᠢᠯᠡᠯ ᠦ᠋ᠨ ᠬᠡᠯᠪᠡᠷᠢ ᠲᠣᠬᠢᠷᠠᠬᠤ ᠪᠣᠢ᠂ ᠶᠠᠭᠠᠬᠢᠵᠤ ᠠᠮᠢᠳᠤᠷᠠᠵᠤ ᠠᠵᠢᠯᠯᠠᠪᠠᠯ ᠵᠦᠢᠲᠡᠢ ᠪᠣᠢ᠂ ᠶᠠᠭᠠᠬᠢᠵᠤ ᠠᠰᠢᠭᠯᠠᠪᠠᠯ ᠨᠡᠩ ᠤᠷᠲᠤᠮᠵᠢ ᠶ᠋ᠢᠨ ᠬᠡᠷᠡᠭᠯᠡᠭᠡ ᠲᠡᠢ ᠪᠠᠢᠯᠭᠠᠵᠤ ᠴᠢᠳᠠᠬᠤ ᠪᠣᠢ ᠵᠡᠷᠭᠡ ᠶ᠋ᠢ ᠤᠬᠠᠮᠰᠠᠷᠠᠨ ᠲᠠᠨᠢᠵᠤ᠂ ᠲᠡᠷᠡ ᠵᠢᠮᠡ ᠪᠡᠷ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ ᠮᠣᠩᠭᠣᠯᠴᠤᠳ ᠤ᠋ᠨ ᠬᠣᠯᠠᠴᠢ ᠤᠬᠠᠭᠠᠨ ᠯᠠᠪᠲᠠᠢ ᠨᠢᠭᠡᠨ ᠴᠠᠭ ᠲᠤ᠌ ᠳᠡᠯᠡᠬᠡᠢ ᠨᠡᠢᠲᠡ ᠶ᠋ᠢᠨ ᠵᠥᠪ ᠦᠨᠡᠯᠡᠯᠲᠡ ᠶ᠋ᠢ ᠣᠯᠤᠨᠠ ᠭᠡᠳᠡᠭ ᠲᠦ᠍ ᠢᠲᠡᠭᠡᠵᠦ ᠪᠠᠢᠨᠠ᠃
———————
① ᠡᠨᠡ ᠵᠣᠬᠢᠶᠠᠯ《ᠤᠷᠤᠭ ᠭᠡᠷ ᠪᠦᠯᠢ ᠨᠡᠢᠭᠡᠮ》 ᠰᠡᠳᠬᠦᠯ ᠦ᠋ᠨ2002 ᠣᠨ ᠤ᠋4 ᠳ᠋ᠦ᠍ᠭᠡᠷ ᠬᠤᠭᠤᠴᠠᠭᠠ ᠳ᠋ᠤ᠌ ᠨᠡᠢᠲᠡᠯᠡᠭᠳᠡᠭᠰᠡᠨ ᠪᠠᠢᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠢᠳᠰᠢᠩᠬᠣᠷᠯᠣ᠂ ᠰᠤᠳᠤᠯᠲᠤ᠂ ᠡᠷᠳᠡᠨᠢᠭᠣᠤᠠ᠂ ᠨᠠᠷᠠᠨᠲᠤᠶᠠᠭᠠ᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂ ᠨᠡᠭᠦᠳᠡᠯ
ᠬᠢᠨᠠᠭᠴᠢ ᠪᠠᠭᠰᠢ᠄ ᠰᠡᠬᠡᠭᠡᠷᠡᠯ᠂ ᠭᠠᠷᠮᠠ᠂ ᠣᠳᠬᠠᠨᠰᠤᠠ