ᠰᠣᠶᠣᠯ ᠢ ᠭᠠᠢᠬᠠᠪᠠ-ᠳ ᠨᠠᠴᠤᠭᠳᠣᠷᠵᠢСоёлыг гайхав-Д.Нацагдорж ᠨᠠᠢᠷᠠᠭᠤᠯᠤᠯ ᠥᠭᠦᠯᠡᠯᠭᠡ

   ᠬᠠᠪᠤᠷ ᠤᠨ ᠬᠤᠷᠴᠠ ᠨᠠᠷᠠᠨ ᠳᠤ ᠡᠪᠦᠯ ᠦᠨ ᠬᠤᠩᠭᠠᠷᠯᠠᠭᠰᠠᠨ ᠴᠠᠰᠤ ᠬᠠᠢᠯᠵᠤ ᠭᠠᠵᠠᠷ ᠤᠨ ᠬᠥᠷᠦᠰᠦ ᠶᠢ ᠴᠢᠭᠢᠭᠲᠦᠭᠦᠯᠦᠨ᠂ ᠦᠰᠬᠦ ᠲᠥᠯᠵᠢᠬᠦ ᠨᠣᠭᠣᠭᠠᠨ ᠳᠤ ᠰᠢᠮ᠎ᠡ ᠶᠢ  ᠥᠭᠬᠦ ᠨᠢ ᠰᠠᠢᠰᠢᠶᠠᠯᠲᠠᠢ ᠪᠣᠯᠪᠠᠴᠤ᠂ ᠲᠡᠷᠭᠡᠴᠢ ᠯᠤᠪᠰᠠᠩ ᠤᠨ ᠵᠤᠨ ᠤ ᠬᠠᠯᠠᠭᠤᠨ ᠳᠤ ᠬᠥᠯᠥᠰᠦ᠎ ᠪᠡᠨ ᠤᠷᠤᠰᠬᠠᠵᠤ᠂ ᠡᠪᠦᠯ ᠦᠨ ᠬᠦᠢᠲᠡᠨ ᠳᠤ ᠬᠤᠷᠤᠭᠤ ᠪᠠᠨ ᠬᠥᠯᠳᠡᠭᠡᠵᠦ ᠣᠯᠤᠭᠰᠠᠨ ᠮᠠᠭᠤ ᠭᠤᠲᠤᠯ ᠢ  ᠰᠠᠪᠠᠭᠲᠤᠨ ᠳᠦᠭᠦᠷᠭᠡᠬᠦ ᠨᠢ ᠬᠠᠢᠷᠠᠯᠠᠯᠲᠠᠢ᠃

   ᠬᠠᠰᠠᠭ ᠲᠡᠷᠭᠡᠨ ᠦ ᠬᠢᠬᠤᠨᠠᠬᠤ ᠲᠤᠲᠤᠮ ᠯᠤᠪᠰᠠᠩ ᠤᠨ ᠰᠡᠳᠬᠢᠯ ᠤᠢᠳᠬᠠᠷᠯᠠᠵᠤ ᠬᠦᠷᠡᠩ ᠱᠠᠷ   ᠬᠠᠱᠠᠩᠨᠠᠬᠤ ᠪᠦᠷᠢ ᠲᠡᠭᠦᠨ ᠦ ᠠᠭᠤᠷ ᠬᠥᠷᠥᠨ᠎ᠡ᠃ ᠯᠤᠪᠰᠠᠩ ᠬᠡᠳᠦᠢᠪᠡᠷ ᠥᠰᠬᠦ ᠨᠠᠰᠤᠨ ᠠᠴᠠ ᠦᠬᠡᠷ ᠲᠡᠷᠭᠡ ᠪᠡᠷ ᠨᠥᠬᠥᠷ ᠬᠢᠵᠦ᠂ ᠡᠵᠡᠭᠦᠢ ᠲᠠᠯ᠎ᠠ ᠪᠠᠷ ᠭᠡᠷ ᠪᠣᠯᠭᠠᠵᠤ ᠳᠠᠳᠤᠭᠰᠠᠨ ᠪᠣᠯᠪᠠᠴᠤ ᠬᠥᠭᠡᠷᠦᠬᠦᠢ ᠵᠠᠢᠯᠠᠭᠤᠯ᠂ ᠬᠦᠮᠦᠨ ᠦ ᠦᠷ᠎ᠡ ᠲᠤᠯᠠ ᠠᠮᠠᠷᠠᠬᠤ ᠴᠠᠳᠬᠤ ᠴᠠᠭ ᠢ ᠶᠠᠭᠤᠨ ᠳᠤ ᠦᠯᠦ ᠬᠦᠰᠡᠨ᠎ᠡ᠃

ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠨ ᠠᠴᠠ ᠲᠠᠪᠢᠨ ᠵᠢᠷᠭᠤᠭᠠᠨ ᠨᠠᠰᠤ ᠶᠢ ᠬᠦᠷᠲᠡᠯ᠎ᠡ ᠰᠢᠷ᠎ᠠ ᠶᠢᠨ ᠭᠣᠣᠯ᠂ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠶᠠᠷ ᠤᠨ ᠬᠣᠭᠣᠷᠣᠨᠳᠣ ᠳ᠋ᠠᠭᠪᠠ ᠶᠢᠨ ᠡᠪᠡᠰᠦ ᠶᠢ ᠵᠥᠭᠡᠭᠡᠵᠦ ᠂  ᠪᠠᠯᠳᠠᠨ᠎ᠤ ᠲᠦᠯᠡᠭᠡ ᠶᠢ ᠲᠡᠭᠡᠭᠡᠭᠰᠡᠭᠡᠷ ᠡᠳᠦᠢ ᠬᠦᠷᠦᠭᠰᠡᠨ ᠲᠤᠯᠠ ᠵᠠᠮ ᠳ᠋ᠠᠬᠢ ᠠᠭᠤᠯᠠ᠂ ᠳᠠᠪᠠᠭ᠎ᠠ ᠶᠢ ᠴᠤ᠌  ᠠᠨᠳᠠᠬᠤ ᠦᠭᠡᠢ ᠡᠩᠬᠦᠯ ᠳᠣᠩᠬᠣᠯ ᠢ ᠴᠤ᠌ ᠡᠨᠳᠡᠬᠦ ᠦᠭᠡᠢ᠂ ᠨᠦᠬᠡᠨ ᠡᠴᠡ ᠭᠠᠷᠴᠤ ᠬᠣᠰᠭᠢᠷᠬᠤ ᠲᠠᠷᠪᠠᠭ᠎ᠠ ᠶᠢ ᠴᠤ᠌ ᠪᠠᠷᠤᠭ ᠲᠠᠨᠢᠬᠤ ᠪᠥᠭᠡᠳ ᠨᠢᠰᠦᠨ ᠥᠩᠭᠡᠷᠡᠵᠦ ᠣᠳᠬᠤ ᠰᠢᠪᠠᠭᠤ ᠶᠢ ᠴᠤ᠌ ᠲᠥᠯᠥᠪ ᠮᠡᠳᠡᠨ᠎ᠡ᠃ ᠬᠠᠭᠤᠴᠢᠨ ᠬᠦᠮᠦᠨ ᠦ  ᠶᠠᠷᠢᠶ᠎ᠠ ᠶᠢ ᠶᠡᠬᠡᠳᠡ ᠰᠣᠨᠣᠰᠴᠤ᠂ ᠬᠡᠳᠦᠨ ᠠᠷᠪᠠᠨ ᠵᠢᠯ ᠨᠡᠯᠢᠶᠡᠳ ᠶᠠᠭᠤᠮ᠎ᠠ ᠶᠢ ᠥᠩᠭᠡᠷᠡᠭᠦᠯᠦᠭᠰᠡᠨ ᠲᠤᠯᠠ ᠬᠥᠭᠰᠢᠨ ᠲᠣᠯᠣᠭᠠᠢ ᠰᠦᠷᠡᠬᠡᠢ ᠬᠠᠰᠢᠷᠵᠢᠵᠠᠢ᠃

ᠬᠠᠷᠠᠭ᠎ᠠ ᠶᠢᠨ ᠭᠣᠣᠯ ᠳᠤ ᠬᠣᠨᠣᠭᠠᠳ᠂ ᠪᠣᠷᠣᠭ᠎ᠠ ᠶᠢᠨ ᠭᠣᠣᠯ ᠳᠤ  ᠦᠳᠡᠯᠡᠬᠦ ᠪᠡᠷ ᠶᠠᠪᠤᠬᠤ ᠳᠤ ᠪᠠᠭ᠎ᠠ ᠦᠳᠡ ᠶᠢᠨ ᠦᠶ᠎ᠡ ᠪᠠᠢᠪᠠ᠃ ᠯᠤᠪᠰᠠᠩ ᠡᠷᠲᠡ ᠪᠣᠰᠤᠭᠰᠠᠨ ᠳᠤ ᠪᠠᠨ ᠭᠠᠩᠰᠠᠷᠠᠲᠠᠯ᠎ᠠ ᠡᠪᠰᠢᠶᠡᠨ᠂ ᠤᠷᠲᠤ ᠵᠠᠮ ᠳᠤ ᠮᠠᠴᠤᠯᠬᠢᠯᠡᠨ ᠠᠯᠬᠤᠬᠤ ᠨᠢ ᠬᠡᠳᠦᠢᠪᠡᠷ ᠵᠦᠳᠡᠭᠦᠷᠢ ᠲᠡᠢ ᠪᠣᠯᠪᠠᠴᠤ᠂ ᠤᠷᠢᠬᠠᠨ ᠰᠠᠯᠬᠢ ᠡᠮᠦᠨ᠎ᠡ ᠡᠴᠡ ᠨᠢ ᠵᠥᠭᠡᠯᠡᠨ ᠢᠶᠡᠷ ᠦᠯᠢᠶᠡᠵᠦ᠂ ᠦᠳᠡ ᠶᠢᠨ ᠨᠠᠷᠠ ᠤᠭᠤᠴᠠ ᠤᠷᠤᠭᠤ ᠲᠥᠭᠡᠨᠡᠬᠦ ᠳᠤ ᠪᠠᠰᠠ ᠴᠤ᠌ ᠨᠢᠭᠡ ᠵᠢᠷᠭᠠᠯ ᠰᠢᠭ᠋ ᠰᠠᠨᠠᠭᠳᠠᠨ᠎ᠠ᠃

ᠬᠡᠳᠦᠨ ᠦᠬᠡᠷ ᠢᠶᠡᠨ ᠭᠠᠷ ᠢᠶᠠᠷ ᠨᠢᠭᠡᠨᠲᠡ ᠭᠤᠶᠠᠳᠠᠵᠤ ᠂ ᠠᠮᠠ ᠪᠠᠷ ᠬᠡᠳᠦᠨᠲᠡ ᠭᠣᠭᠣᠭᠯᠠᠭᠰᠠᠭᠠᠷ ᠰᠠᠨᠠᠮᠰᠠᠷ ᠦᠭᠡᠢ ᠶᠠᠪᠤᠲᠠᠯ᠎ᠠ᠂ ᠠᠷᠤ ᠲᠠᠯ᠎ᠠ ᠳᠤ ᠱᠤᠤᠭᠢᠬᠤ ᠴᠢᠮᠡᠭᠡ ᠭᠠᠷᠤᠨ᠎ᠠ᠃ ᠴᠣᠴᠢᠨ ᠭᠡᠳᠡᠷᠭᠦ ᠠᠵᠢᠭᠯᠠᠪᠠᠯ᠂ ᠬᠥᠲᠥᠯᠦᠭᠰᠡᠨ ᠬᠡᠳᠦᠨ ᠦᠬᠡᠷ ᠬᠡᠪ ᠬᠡᠪ ᠢᠶᠡᠷ᠂ ᠳᠤᠪ ᠳᠠᠭᠤ ᠦᠭᠡᠢ ᠴᠤᠪᠤᠷᠠᠯᠳᠤᠨ ᠶᠠᠪᠤᠬᠤ ᠲᠤᠯᠠ᠂ ᠰᠡᠳᠬᠢᠯ ᠨᠢ ᠲᠠᠢᠳᠬᠤᠷᠠᠵᠤ᠂  ᠴᠢᠨᠠᠭ᠍ᠰᠢ ᠠᠯᠬᠤᠯᠠᠪᠠ᠃ ᠭᠡᠲᠡᠯ᠎ᠡ ᠱᠤᠤᠭᠢᠬᠤ ᠴᠢᠮᠡᠭᠡ ᠨᠢ ᠤᠯᠠᠮ ᠢᠶᠠᠷ ᠶᠡᠬᠡᠳᠴᠦ᠂ ᠬᠣᠭᠣᠰᠣᠨ ᠣᠭᠲᠠᠷᠭᠤᠢ ᠳᠤ ᠬᠦᠷᠴᠢᠭᠢᠨᠡᠨ ᠬᠣᠷᠴᠢᠭᠢᠨᠠᠬᠤ ᠳᠤ ᠯᠤᠪᠰᠠᠩ ᠤᠨ ᠰᠡᠳᠬᠢᠯ ᠨᠢ ᠰᠡᠷ ᠬᠢᠵᠦ᠂ ᠨᠢᠳᠦ ᠪᠡᠨ ᠰᠣᠷᠲᠣᠢᠨ᠂ ᠴᠢᠬᠢ ᠪᠡᠨ ᠰᠡᠷᠪᠡᠢᠨ᠂ ᠡᠯᠳᠡᠪ ᠶᠠᠭᠤᠮ᠎ᠠ ᠪᠣᠳᠣᠭᠳᠠᠨ᠂ 《ᠬᠠᠪᠤᠷ ᠤᠨ ᠡᠬᠢᠨ ᠰᠠᠷ᠎ᠠ ᠳᠤ ᠲᠩᠷᠢ ᠳᠤᠤᠭᠠᠷᠳᠠᠭ ᠦᠭᠡᠢ ᠶᠤᠮᠰᠠᠨ᠃ ᠭᠠᠯᠪᠠ ᠶᠡᠭᠦᠷᠡᠨ᠎ᠡ ᠭᠡᠭᠴᠢ ᠨᠢ ᠠᠷᠠᠢ ᠪᠣᠯᠤᠭ᠎ᠠ ᠦᠭᠡᠢ ᠶᠤᠮᠰᠠᠨ» ᠬᠡᠮᠡᠨ ᠰᠠᠨᠠᠵᠤ ᠵᠢᠷᠦᠬᠡ ᠳᠣᠭᠳᠣᠯᠤᠨ᠂ ᠳᠥᠷᠪᠡᠨ ᠵᠦᠭ᠂ ᠨᠠᠢᠮᠠᠨ ᠵᠣᠪᠬᠢᠰ ᠲᠤ ᠠᠵᠢᠭᠯᠠᠪᠠᠯ᠂ ᠡᠭᠦᠯᠡ ᠴᠤ᠌ ᠦᠭᠡᠢ᠂ ᠬᠦᠮᠦᠨ ᠠᠮᠢᠲᠠᠨ ᠴᠤ᠌ ᠦᠭᠡᠢ ᠰᠢᠷᠣᠢ ᠴᠤ᠌ ᠦᠭᠡᠢ᠂ ᠲᠣᠭᠣᠰᠣ ᠴᠤ᠌ ᠦᠭᠡᠢ ᠠᠯᠢᠪᠠ ᠪᠠᠢᠳᠠᠯ ᠨᠠᠮ ᠭᠦᠮ᠂ ᠬᠠᠮᠤᠭ ᠶᠠᠭᠤᠮ᠎ᠠ ᠬᠡᠪ ᠬᠡᠪ ᠢᠶᠡᠷ ᠪᠠᠢᠲᠠᠯ᠎ᠠ᠂ ᠰᠣᠨᠣᠰᠬᠤ ᠲᠤᠲᠤᠮ ᠥᠨᠥᠬᠢ ᠳᠠᠭᠤᠤ ᠨᠢ ᠤᠯᠠᠮ ᠣᠢᠷᠠᠳᠤᠨ᠂ ᠳᠡᠭᠡᠭᠦᠷ ᠨᠢ ᠬᠦᠷᠴᠢᠭᠢᠨᠡᠬᠦ ᠳᠤ ᠳᠡᠭᠡᠭᠰᠢ ᠬᠠᠷᠠᠪᠠᠯ᠂ ᠬᠠᠷᠢᠨ ᠨᠢᠭᠡ ᠲᠣᠮᠣ ᠰᠢᠪᠠᠭᠤ ᠮᠡᠲᠦ ᠶᠠᠭᠤᠮ᠎ᠠ ᠨᠢᠰᠦᠨ ᠶᠠᠪᠤᠨ᠎ᠠ᠃ ᠲᠡᠷᠭᠡᠴᠢ ᠯᠤᠪᠰᠠᠩ ᠲᠠᠪᠢᠨ ᠬᠡᠳᠦᠨ ᠨᠠᠰᠤ ᠬᠦᠷᠲᠡᠯ᠎ᠡ ᠲᠡᠢᠮᠦ ᠲᠣᠮᠣ ᠰᠢᠪᠠᠭᠤ ᠦᠵᠡᠭᠰᠡᠨ ᠦᠭᠡᠢ᠂ ᠬᠡᠳᠦᠢᠪᠡᠷ ᠬᠠᠨ ᠭᠠᠷᠤᠳᠢ ᠭᠡᠳᠡᠭ ᠨᠢᠭᠡ ᠲᠣᠮᠣ ᠰᠢᠪᠠᠭᠤ ᠪᠠᠢᠳᠠᠭ ᠶᠤᠮ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠪᠣᠯᠪᠠᠴᠤ᠂ ᠪᠠᠰᠠ ᠡᠨᠡ ᠲᠢᠪ ᠲᠦ ᠪᠠᠢᠳᠠᠭ ᠦᠭᠡᠢ ᠭᠡᠵᠦ ᠶᠠᠷᠢᠳᠠᠭ ᠲᠤᠯᠠ᠂ ᠠᠳᠠᠯᠢᠳᠬᠠᠰᠢ ᠦᠭᠡᠢ᠂ ᠳᠡᠮᠡᠢ ᠯᠠ ᠭᠠᠢᠬᠠᠨ ᠳᠠᠬᠢᠨ ᠰᠠᠢᠨ ᠢᠶᠠᠷ ᠠᠵᠢᠭᠯᠠᠶ᠎ᠠ ᠭᠡᠲᠡᠯ᠎ᠡ᠂ ᠡᠨᠡᠬᠦ ᠨᠢᠭᠡ ᠭᠱᠠᠨ ᠳᠤ ᠲᠡᠷᠲᠡᠭᠡ ᠠᠭᠤᠯᠠ ᠶᠢᠨ ᠴᠠᠭᠠᠨ᠎ᠠ ᠳᠠᠯᠳᠠ ᠣᠷᠣᠵᠠᠢ᠃

ᠡᠨᠡᠬᠡᠨ ᠵᠠᠭᠤᠷ᠎ᠠ ᠯᠤᠪᠰᠠᠩ ᠨᠢᠭᠡ ᠦᠶ᠎ᠡ ᠵᠢᠭᠲᠡᠢ ᠪᠣᠯᠤᠭᠠᠳ ᠵᠡᠭᠦᠳᠦᠯᠡᠭᠰᠡᠨ ᠪᠠ ᠦᠵᠡᠭᠰᠡᠨ ᠬᠣᠶᠠᠷ ᠤᠨ ᠠᠯᠢᠨ ᠪᠢᠯᠡ ᠭᠡᠵᠦ ᠡᠷᠭᠢᠴᠡᠭᠦᠯᠦᠨ᠂  ᠴᠢᠳᠬᠦᠷ ᠶᠤᠮ ᠦᠦ᠂ ᠬᠤᠪᠢᠯᠭᠠᠨ ᠶᠤᠮ ᠤᠤ ᠭᠡᠵᠦ ᠮᠤᠬᠤᠷ ᠰᠦᠰᠦᠭ ᠦᠨ ᠡᠭᠦᠳᠡᠨ ᠡᠴᠡ ᠭᠠᠢᠬᠠᠭᠰᠠᠭᠠᠷ ᠶᠠᠭᠤ ᠴᠤ᠌ ᠪᠣᠯᠪᠠ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠᠨ ᠳᠤ ᠣᠴᠢᠭᠰᠠᠨ ᠤ ᠬᠣᠢᠨ᠎ᠠ ᠴᠢᠪᠠᠭᠠᠨᠴᠠ ᠨᠠᠷ ᠲᠤ ᠶᠠᠷᠢᠵᠤ᠂ ᠴᠠᠢ ᠶ᠋ᠢ ᠨᠢ ᠤᠤᠭᠤᠬᠤ ᠰᠣᠨᠢᠨ ᠲᠠᠢ ᠪᠣᠯᠪᠠ ᠭᠡᠵᠦ ᠪᠣᠳᠣᠭᠠᠳ᠂ ᠦᠬᠡᠷ ᠲᠡᠷᠭᠡ ᠪᠡᠨ ᠭᠣᠭᠤᠭᠯᠠᠨ ᠤᠷᠤᠭᠰᠢ ᠶᠠᠪᠤᠪᠠ᠃

ᠤᠳᠠᠯ ᠦᠭᠡᠢ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠᠨ ᠳᠤ ᠢᠷᠡᠪᠡ᠃ ᠤᠷᠵᠢᠳᠤᠷ ᠤᠨ ᠦᠵᠡᠭᠰᠡᠨ ᠢᠶᠡᠨ ᠠᠪᠠᠭᠠᠢ ᠬᠡᠦᠬᠡᠳ ᠲᠦ ᠶᠠᠷᠢᠶ᠎ᠠ ᠭᠡᠲᠡᠯ᠎ᠡ ᠬᠠᠷᠢᠨ ᠤᠷᠢᠳᠠ ᠠᠴᠠ ᠨᠢ ᠤᠭᠲᠤᠵᠤ ᠠᠪᠤᠭᠠᠳ《ᠮᠠᠨ ᠤ ᠬᠦᠷᠢᠶᠡᠨ ᠳᠤ ᠨᠢᠰᠳᠡᠭ ᠲᠡᠷᠭᠡ ᠭᠡᠭᠴᠢ ᠨᠢᠭᠡ ᠰᠣᠨᠢᠨ ᠲᠡᠷᠭᠡ ᠢᠷᠡᠭᠰᠡᠨ ᠪᠢᠰᠢ ᠦᠦ» ᠭᠡᠵᠦ ᠬᠡᠦᠬᠡᠳ ᠦᠳ ᠨᠢ ᠬᠥᠷ ᠬᠥᠷ ᠭᠡᠵᠦ ᠳᠠᠭᠤᠷᠢᠶᠠᠨ ᠪᠠᠷᠬᠢᠷᠠᠯᠳᠤᠵᠤ᠂ ᠬᠥᠭ᠍ᠰᠢᠳ ᠨᠢ 《ᠰᠦᠷᠡᠬᠡᠢ ᠶᠤᠮ᠂ ᠬᠠᠴᠢᠨ ᠶᠤᠮ» ᠭᠡᠵᠦ ᠵᠠᠯᠪᠠᠷᠢᠯᠳᠤᠨ ᠪᠠᠢᠬᠤ ᠳᠤ ᠯᠤᠪᠰᠠᠩ ᠬᠡᠳᠦᠢᠨᠡᠢ ᠳᠣᠭᠢ ᠬᠦᠮᠦᠨ ᠲᠤᠯᠠ ᠳᠡᠮᠡᠢ ᠴᠠᠯᠴᠢᠬᠤ ᠪᠠᠨ ᠪᠠᠢᠵᠤ᠂ ᠳᠠᠷᠤᠢ ᠨᠢᠭᠡ ᠲᠠᠨᠢᠬᠤ ᠵᠠᠯᠠᠭᠤ ᠠᠯᠪᠠᠨ ᠤ ᠬᠦᠮᠦᠨ ᠲᠡᠢ ᠪᠡᠨ ᠠᠭᠤᠯᠵᠠᠨ ᠠᠰᠠᠭᠤᠵᠤ᠂ ᠡᠨᠡᠬᠦ ᠨᠢᠰᠳᠡᠭ ᠲᠡᠷᠭᠡ ᠨᠢ ᠬᠦᠮᠦᠨ ᠦ ᠠᠷᠭ᠎ᠠ ᠤᠬᠠᠭᠠᠨ᠂ ᠡᠷᠳᠡᠮ ᠰᠣᠶᠣᠯ ᠤᠨ ᠡᠭᠦᠳᠡᠨ ᠡᠴᠡ ᠪᠦᠲᠦᠭᠰᠡᠨ ᠪᠣᠯᠬᠤ ᠪᠦᠬᠦᠢᠯᠡ ᠤᠴᠢᠷ ᠢ ᠣᠯᠵᠤ ᠰᠣᠨᠣᠰᠤᠭᠠᠳ᠂ ᠶᠡᠬᠡᠳᠡ ᠭᠠᠢᠬᠠᠵᠤ᠂ ᠬᠥᠳᠡᠭᠡ ᠶᠢᠨ ᠪᠠᠢᠳᠠᠯ ᠳᠤ ᠮᠤᠩᠬᠠᠷᠠᠨ ᠰᠠᠭᠤᠵᠤ᠂ ᠬᠥᠳᠡᠭᠡᠬᠢ ᠵᠠᠩᠰᠢᠯ ᠢᠶᠠᠷ ᠨᠢᠭᠡ ᠨᠠᠰᠤ ᠶᠢ ᠪᠠᠷᠠᠬᠤ ᠦᠭᠡᠢ᠂ ᠬᠥᠯ ᠬᠦᠷᠬᠦ ᠭᠠᠵᠠᠷ ᠶᠠᠪᠤᠵᠤ᠂ ᠤᠬᠠᠭᠠᠨ ᠬᠦᠷᠬᠦ ᠶᠠᠭᠤᠮ᠎ᠠ ᠶᠢ ᠦᠵᠡᠪᠡᠯ ᠡᠷᠳᠡᠮ ᠰᠣᠶᠣᠯ ᠭᠡᠭᠴᠢ ᠶᠡᠬᠡ ᠰᠠᠢᠬᠠᠨ ᠶᠠᠭᠤᠮ᠎ᠠ ᠪᠠᠢᠨ᠎ᠠ ᠭᠡᠵᠦ ᠮᠡᠳᠡᠪᠡᠴᠦ᠂ ᠡᠨᠡ ᠪᠡᠶ᠎ᠡ ᠬᠥᠭᠰᠢᠷᠡᠭᠰᠡᠨ ᠲᠤᠯᠠ ᠢᠷᠡᠬᠦ ᠵᠢᠯ ᠡᠴᠡ ᠠᠵᠢᠯ ᠳᠤ ᠤᠷᠤᠬᠤ ᠭᠡᠵᠦ ᠪᠠᠢᠭᠰᠠᠨ ᠠᠷᠪᠠᠨ ᠬᠣᠶᠠᠷ ᠨᠠᠰᠤᠲᠠᠢ ᠬᠦᠦ ᠪᠡᠨ ᠠᠷᠠᠳ ᠤᠨ ᠰᠤᠷᠭᠠᠭᠤᠯᠢ ᠳᠤ ᠬᠥᠭᠡᠭᠡᠨ ᠶᠠᠪᠤᠭᠤᠯᠵᠠᠢ᠃

ᠳ ∙ ᠨᠠᠴᠤᠭᠳᠣᠷᠵᠢ᠂ 1930 ᠣᠨ