ᠪᠢ ᠤᠰᠤ ᠯᠠ ᠪᠠᠢᠬᠤ ᠳᠤᠷᠠᠲᠠᠢ – ᠶᠣᠨᠳᠣᠨ ᠤ ᠪᠢᠯᠢᠭ᠌ - ᠪᠠᠭᠠᠲᠤᠷ Би ус л байх дуртай – Ёндоны Билиг - Баатар
409ᠪᠢ ᠤᠰᠤ ᠯᠠ ᠪᠠᠢᠬᠤ ᠳᠤᠷᠠᠲᠠᠢ
ᠮᠡᠳᠡᠷᠡᠬᠦᠢ ᠰᠡᠳᠬᠢᠬᠦᠢ ᠶ᠋ᠢᠨ
ᠮᠠᠭᠠᠳ ᠨᠣᠮᠣᠬᠠᠨ ᠡᠶᠡᠰᠡᠯ
ᠬᠠᠷᠠ ᠴᠠᠭᠠᠨ ᠰᠥᠨᠢ ᠡᠳᠦᠷ ᠰᠢᠭ ᠢ᠋ᠶ᠋ᠡᠷ
ᠬᠠᠢᠷᠠ ᠬᠣᠷᠣᠰᠤᠯ ᠨᠢᠭᠡᠨ ᠬᠠᠮ ᠪᠢᠰᠢ ᠳᠧ
ᠬᠠᠢᠷᠠ ᠶ᠋ᠢᠨ ᠲᠥᠯᠥᠭᠡ ᠠᠮᠢᠳᠤᠷᠠᠬᠤ ᠠ᠋ᠴᠠ
ᠬᠣᠷᠣᠰᠤᠯ ᠤ᠋ᠨ ᠲᠤᠯᠠᠳᠠ ᠦᠬᠦᠬᠦ ᠦᠭᠡᠢ!
ᠬᠣᠷᠸᠠ ᠭᠡᠳᠡᠭ ᠬᠣᠶᠠᠷᠬᠠᠨ ᠡᠷᠴᠢᠰ ᠲᠡᠢ
ᠰᠣᠷᠢᠨᠵᠢᠨ ᠤ᠋ ᠡᠶᠡᠷᠭᠦ ᠰᠥᠭᠡᠷᠭᠦ ᠠᠢᠰ ᠲᠠᠢ
ᠰᠦᠷᠢᠵᠦ ᠵᠥᠷᠢᠴᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌
ᠵᠦᠢᠵᠦ ᠬᠦᠪᠦᠷᠢᠳᠦᠵᠦ ᠯᠡ ᠠᠮᠢᠳᠤᠷᠠᠬᠤ
᠁
ᠰᠥᠨᠥᠵᠦ ᠦᠭᠡᠢᠷᠡᠵᠦ ᠰᠦᠢᠳᠬᠦ ᠪᠡᠷ ᠢ᠋ᠶ᠋ᠡᠨ
ᠰᠦᠯᠡᠵᠦ ᠮᠢᠯᠢᠶᠠᠵᠤ ᠢᠷᠥᠭᠡᠬᠦ ᠰᠠᠢᠬᠠᠨ ᠠ᠋
ᠪᠢ ᠴᠢᠨᠢ ᠤᠭ ᠨᠢ ᠤᠰᠤ ᠯᠠ ᠪᠠᠢᠭᠰᠠᠨ
ᠪᠢᠯᠢᠭ ᠠᠷᠭᠠ ᠶ᠋ᠢᠨ ᠴᠡᠪᠡᠷ ᠤᠰᠤ ᠪᠠᠢᠭᠰᠠᠨ
ᠲᠡᠭᠷᠢ ᠶ᠋ᠢᠨ ᠬᠤᠨ ᠰᠢᠭ᠋ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ
ᠲᠤᠩᠭᠠᠯᠠᠭ ᠬᠡᠪᠡᠯᠢ ᠳᠠᠯᠠᠢ ᠶ᠋ᠢᠨ ᠤᠰᠤᠨ ᠳ᠋ᠤ᠌
ᠰᠠᠨᠰᠠᠷ ᠠ᠋ᠴᠠ ᠪᠠᠭᠤᠭᠰᠠᠨ ᠠᠯᠲᠠᠨ ᠦᠷᠡ
ᠰᠦᠨᠡᠰᠦ ᠠᠴᠢᠶᠠᠯᠠᠭᠰᠠᠨ ᠮᠥᠩᠭᠥᠨ ᠳᠤᠰᠤᠯ
ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠡᠭᠡᠨ ᠬᠠᠷᠢᠨ ᠪᠦᠷ
ᠰᠥᠬᠥᠷᠡᠵᠦ ᠠᠴᠢᠯᠠᠭᠰᠠᠨ ᠨᠢᠭᠦᠯᠡᠰᠦᠩᠭᠦᠢ ᠵᠦᠢ
᠁ ᠁
ᠡᠪᠦᠭᠡᠨ ᠯᠣᠣᠽᠢ ᠤᠰᠤ ᠪᠠᠢᠭᠰᠠᠨ ᠭᠡᠳᠡᠭ
ᠥᠨᠥ ᠨᠢᠽᠢ ᠤᠷᠤᠰᠬᠠᠯ ᠪᠠᠢᠭᠰᠠᠨ ᠭᠡᠳᠡᠭ
ᠡᠳᠦᠭᠡ ᠪᠢ ᠤᠰᠤ ᠯᠠ ᠪᠠᠢᠬᠤ ᠳᠤᠷᠠᠲᠠᠢ
ᠡᠪᠦᠭᠡ ᠤᠰᠤᠨ ᠤᠷᠤᠰᠴᠤ ᠯᠠ ᠪᠠᠢᠨᠠᠮ
ᠭᠦᠨ ᠤᠬᠠᠭᠠᠨ ᠪᠣᠯ ᠤᠰᠤᠨ ᠤ᠋ ᠯᠠ ᠦᠢᠯᠡ
ᠤᠰᠤᠨ ᠤ᠋ ᠤᠬᠠᠭᠠᠨ ᠪᠣᠯ ᠮᠢᠨᠦ ᠯᠡ ᠤᠳᠬᠠ
ᠳᠠᠯᠠᠢ ᠶ᠋ᠢ ᠪᠢ ᠮᠥᠷᠦᠭᠡᠳᠦᠳᠡᠭ ᠴᠤ᠌ ᠭᠡᠰᠡᠨ
ᠳᠠᠷᠤᠤᠬᠠᠨ ᠭᠣᠷᠣᠬᠠ ᠰᠢᠭ᠋ ᠤᠷᠤᠰᠳᠠᠭ ᠠ᠋
ᠳᠠᠯᠠᠢ ᠬᠠᠷᠢᠨ ᠲᠠᠩᠳᠠ ᠪᠠᠨ ᠯᠠ
ᠳᠣᠣᠷᠠᠬᠠᠨ ᠲᠡᠷᠲᠡᠭᠡ ᠳ᠋ᠦ᠍ ᠣᠷᠣᠰᠢᠳᠠᠭ ᠠ᠋
᠁ ᠁
ᠤᠰᠤ ᠰᠠᠯᠬᠢ ᠦᠨᠦᠰᠦᠯᠴᠡᠬᠦ ᠭᠱᠠᠨ ᠳ᠋ᠤ᠌
ᠥᠪᠡᠷ ᠢ᠋ᠶ᠋ᠡᠨ ᠪᠢ ᠤᠷᠤᠭᠤᠯ ᠨᠢ ᠪᠠᠢᠭᠰᠠᠨ
ᠤᠯᠠᠭᠠᠨ ᠶᠠᠭᠠᠨ ᠵᠥᠭᠡᠯᠡᠨ ᠤᠷᠤᠭᠤᠯ ᠠ᠋ᠴᠠ
ᠥᠪᠡᠷ ᠢ᠋ᠶ᠋ᠡᠨ ᠪᠢ ᠲᠦᠮᠡᠨᠲᠡ ᠲᠥᠷᠥᠭᠰᠡᠨ
ᠦᠨᠢᠶᠡᠨ ᠵᠠᠯᠠᠨ ᠳ᠋ᠤ᠌
ᠰᠦᠨ ᠰᠠᠳᠠᠭᠠᠨᠠᠬᠤ ᠬᠣᠷᠣᠮᠬᠠᠨ ᠳ᠋ᠤ᠌
ᠡᠪᠡᠰᠦᠨ ᠨᠠᠢᠭᠤᠭᠠᠨ ᠳ᠋ᠤ᠌
ᠦᠦᠷ ᠢ᠋ᠶ᠋ᠡᠷ ᠪᠢ ᠵᠠᠯᠭᠢᠯᠠᠳᠠᠭ ᠪᠠᠢᠭᠰᠠᠨ
ᠥᠳᠬᠡᠨ ᠦᠨᠦᠷ ᠲᠦ᠍
ᠮᠠᠩᠰᠢᠭᠤᠷᠠᠲᠠᠯᠠ ᠰᠣᠭᠲᠣᠳᠠᠭ ᠪᠠᠢᠭᠰᠠᠨ ᠠ᠋
ᠰᠠᠭᠤᠯᠠᠭᠠ ᠳᠦᠭᠦᠷᠡᠩ ᠰᠦᠨ ᠳᠣᠲᠣᠷᠠ
ᠰᠠᠷᠠ ᠨᠠᠷᠠ ᠬᠣᠶᠠᠭᠤᠯᠠ ᠪᠠᠨ ᠴᠠᠯᠭᠢᠯᠠᠭᠰᠠᠨ
ᠰᠠᠯᠬᠢ ᠪᠢᠳᠡ ᠬᠣᠶᠠᠭᠤᠯᠠ ᠪᠠᠨ ᠴᠢᠩᠨᠠᠭᠰᠠᠨ
ᠰᠠᠨᠠᠭᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠰᠠᠨᠰᠠᠷ ᠪᠠᠢᠭᠰᠠᠨ
ᠪᠢ ᠤᠰᠤ ᠯᠠ ᠪᠠᠢᠬᠤ ᠳᠤᠷᠠᠲᠠᠢ ᠶᠤᠮ ᠴᠢᠨᠢ
ᠪᠢ ᠤᠰᠤ ᠯᠠ ᠪᠠᠢᠬᠤ ᠶᠣᠰᠣᠲᠠᠢ ᠪᠢᠵᠡ ᠳᠧ
ᠪᠤᠮᠠᠨ ᠵᠢᠸᠠ ᠵᠢᠯ ᠦ᠋ᠨ ᠳᠤᠰᠤᠯ ᠤᠰᠤᠨ ᠪᠢ
ᠪᠤᠷᠵᠠᠩ ᠬᠠᠲᠠᠭᠤ ᠴᠢᠯᠠᠭᠤᠳ ᠢ᠋ ᠴᠣᠭᠣᠯᠤᠭᠰᠠᠨ
ᠪᠤᠷᠬᠠᠨ ᠲᠠᠢ ᠬᠣᠶᠠᠭᠤᠯᠠ ᠬᠠᠮᠲᠤ ᠪᠢᠰᠢᠯᠭᠠᠭᠰᠠᠨ
ᠪᠣᠷᠣᠭᠠᠨ ᠲᠠᠢ ᠬᠤᠶᠠᠭ ᠭᠠᠨᠵᠤᠭᠠ ᠨᠡᠢᠯᠡᠭᠰᠡᠨ
ᠪᠢ ᠢᠷᠭᠤᠢ ᠶ᠋ᠢᠨ ᠳᠡᠯᠪᠡᠭᠡ ᠰᠢᠭ ᠵᠥᠭᠡᠯᠡᠨ
ᠪᠢ ᠬᠡᠦᠬᠡᠳ ᠦ᠋ᠨ ᠨᠢᠳᠦᠨ ᠮᠡᠲᠦ ᠳᠤᠯᠠᠭᠠᠨ
ᠪᠢ ᠡᠭᠡᠭᠡ ᠬᠠᠢᠯ ᠤ᠋ᠨ ᠤᠰᠤᠨ ᠰᠢᠭ᠋ ᠤᠶᠠᠨ
ᠪᠢ ᠶᠠᠭ ᠡᠬᠡ ᠶ᠋ᠢᠨ ᠬᠠᠢᠷᠠ ᠰᠢᠭ᠋ ᠨᠢᠩᠵᠢᠨ
ᠠᠮᠢᠲᠠᠨ ᠵᠢᠷᠭᠤᠭᠠᠨ ᠵᠦᠢᠯ ᠳ᠋ᠦ᠍ ᠪᠢ
ᠠᠮᠢᠨ ᠠ᠋ᠴᠠ ᠪᠠᠨ ᠴᠤ᠌ ᠢᠯᠡᠭᠦᠦ ᠬᠠᠢᠷᠠᠲᠠᠢ
ᠠᠯᠢᠪᠠ ᠲᠦᠮᠡᠨ ᠪᠣᠳᠠᠰ ᠲᠤ ᠪᠢ
ᠠᠭᠠᠷ ᠭᠡᠷᠡᠯ ᠰᠢᠷᠣᠢ ᠨᠢ ᠪᠣᠯᠬᠤ ᠱᠠᠯ ᠳᠤᠷᠠᠲᠠᠢ
ᠬᠠᠢᠷᠠᠲᠠᠢ ᠳᠤᠷᠠᠲᠠᠢ ᠶᠣᠰᠣᠲᠠᠢ ᠶᠤᠮ ᠴᠢᠨᠢ
ᠬᠠᠮᠢᠭᠠᠭᠤᠷ ᠤᠷᠤᠰᠤᠭᠰᠠᠨ ᠴᠤ᠌ ᠪᠢ ᠵᠠᠮ ᠲᠠᠢ
ᠪᠢ ᠤᠰᠤ ᠯᠠ ᠪᠠᠢᠬᠤ ᠳᠤᠷᠠᠲᠠᠢ
ᠪᠢ ᠤᠰᠤ ᠯᠠ ᠪᠠᠢᠬᠤ ᠶᠣᠰᠣᠲᠠᠢ
ᠪᠢ ᠤᠰᠤ ᠯᠠ ᠪᠠᠢᠬᠤ ᠠᠯᠪᠠ ᠲᠠᠢ
ᠪᠢ ᠤᠰᠤ ᠯᠠ ᠪᠠᠢᠬᠤ ᠲᠠᠩᠭᠠᠷᠢᠭ ᠲᠠᠢ
2024᠂ 3᠂ 18᠃ ᠦᠳᠡ ᠭᠣᠣᠯ᠃
ᠬᠥᠬᠡᠬᠣᠲᠠᠨᠠ ᠪᠢᠰᠢᠯᠭᠠᠨ ᠪᠦᠲᠦᠭᠡᠪᠡᠢ᠃