ᠰᠣᠶᠣᠯ ᠢ᠋ᠶ᠋ᠠᠨ ᠬᠠᠢᠷᠠᠯᠠᠬᠤ ᠳ᠋ᠤ᠌- ᠭ· ᠴᠢᠩᠪᠠᠭᠠᠲᠤᠷСоёлоо хайрлахад-Г·Чинбаатар
689 ᠭ· ᠴᠢᠩᠪᠠᠭᠠᠲᠤᠷ
ᠮᠣᠩᠭᠣᠯ ᠨᠤᠲᠤᠭ ᠠ᠋ᠴᠠ ᠣᠯᠳᠠᠵᠤ ᠪᠣᠢ ᠡᠳ᠋ ᠦᠯᠦᠭ ᠦ᠋ᠨ ᠵᠦᠢᠯ᠂ ᠪᠢᠴᠢᠭ ᠪᠠᠷᠢᠮᠲᠠ ᠶ᠋ᠢᠨ ᠵᠦᠢᠯ ᠠᠯᠢ ᠦᠶᠡ ᠳ᠋ᠦ᠍ ᠶᠠᠮᠠᠷ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠬᠡᠳᠦᠢ ᠬᠡᠮᠵᠢᠶᠡ ᠪᠡᠷ ᠠᠯᠳᠠᠭᠳᠠᠭᠰᠠᠨ ᠭᠡᠳᠡᠭ ᠢ᠋ ᠬᠡᠨ ᠴᠦ᠍ ᠡᠰᠡ ᠮᠡᠳᠡᠨᠡ᠃ ᠣᠩᠭᠣᠨ ᠪᠤᠯᠠᠰᠢ᠂ ᠬᠣᠷᠢᠭ ᠴᠡᠭᠡᠷ ᠲᠡᠢ ᠭᠠᠵᠠᠷ ᠢ᠋ ᠬᠥᠨᠳᠡᠬᠦ ᠡᠴᠡ ᠴᠡᠭᠡᠷᠯᠡᠳᠡᠭ ᠮᠣᠩᠭᠣᠯᠴᠤᠳ ᠡᠬᠡ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠠᠯᠲᠠᠨ ᠬᠥᠷᠥᠰᠥᠨ ᠳᠣᠣᠷᠠ ᠡᠪᠦᠭᠡ ᠳᠡᠭᠡᠳᠦ ᠶ᠋ᠢᠨ ᠢ᠋ᠶ᠋ᠡᠨ ᠪᠦᠲᠦᠭᠡᠭᠰᠡᠨ ᠰᠣᠶᠣᠯ ᠤ᠋ᠨ ᠠᠭᠤᠤ ᠥᠪ ᠨᠦ᠍ᠭᠦᠳ ᠢ᠋ ᠬᠢᠮᠠᠭᠠᠳᠠᠨ ᠬᠠᠳᠠᠭᠠᠯᠠᠭᠰᠠᠭᠠᠷ ᠣᠯᠠᠨ ᠵᠠᠭᠤᠨ ᠵᠢᠯ ᠢ᠋ ᠤᠭᠲᠤᠵᠤ ᠦᠳᠡᠵᠡᠢ᠃ ᠮᠣᠩᠭᠣᠯᠴᠤᠳ ᠥᠪᠡᠷ ᠦ᠋ᠨ ᠲᠡᠦᠬᠡ ᠰᠣᠶᠣᠯ ᠢ᠋ᠶ᠋ᠠᠨ ᠰᠤᠳᠤᠯᠬᠤ ᠠᠵᠢᠯ ᠠᠷᠠᠢ ᠬᠣᠵᠢᠭᠤ ᠡᠬᠢᠯᠡᠭᠰᠡᠨ ᠪᠥᠭᠡᠳ ᠤᠳᠠᠭᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠰᠤᠷᠪᠤᠯᠵᠢ ᠪᠢᠴᠢᠭ ᠡᠴᠡ ᠪᠠᠷᠢᠮᠲᠠ ᠠᠪᠴᠤ ᠰᠤᠳᠤᠯᠬᠤ ᠪᠠᠷ ᠯᠠ ᠭᠣᠣᠯᠳᠠᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠬᠠᠭᠤᠴᠢ ᠰᠤᠳᠤᠯᠤᠯ᠂ ᠡᠳ᠋ ᠥᠯᠥᠭ ᠦ᠋ᠨ ᠴᠤᠭᠯᠠᠭᠤᠯᠭᠠ᠂ ᠬᠥᠮᠦᠨ ᠵᠦᠢ ᠶ᠋ᠢᠨ ᠰᠤᠳᠤᠯᠤᠯ ᠤ᠋ᠨ ᠥᠪᠡᠷᠮᠢᠴᠡ ᠮᠥᠷᠲᠡᠭᠡᠨ ᠦᠷᠡ ᠳ᠋ᠦᠩ ᠰᠠᠢᠲᠠᠢ ᠠᠷᠭᠠ ᠨᠡᠩ ᠬᠣᠵᠢᠭᠤ ᠡᠬᠢᠯᠡᠭᠰᠡᠨ ᠶᠦᠮ᠃ ᠬᠠᠭᠤᠴᠢ ᠰᠤᠳᠤᠯᠤᠯ ᠣᠳᠣ ᠪᠣᠯᠲᠠᠯᠠ ᠲᠡᠳᠦᠢ ᠯᠡ ᠬᠥᠭᠵᠢᠵᠦ ᠴᠢᠳᠠᠭᠠ ᠦᠭᠡᠢ ᠪᠣᠯᠬᠣᠷ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠡᠳ᠋ ᠦᠯᠦᠭ᠂ ᠣᠩᠭᠣᠨ ᠪᠤᠯᠠᠰᠢ᠂ ᠬᠣᠲᠠ ᠪᠠᠭᠤᠷᠢᠨ᠂ ᠬᠥᠰᠢᠶᠡ ᠳᠤᠷᠠᠰᠬᠠᠯ ᠤ᠋ᠨ ᠲᠤᠬᠠᠢ ᠨᠤᠬᠤᠴᠢᠲᠠᠢ ᠰᠤᠳᠤᠯᠭᠠᠨ ᠪᠠᠷᠤᠭ ᠯᠠ ᠬᠢᠭᠳᠡᠭᠡ ᠦᠭᠡᠢ ᠪᠠᠢᠭᠰᠠᠭᠠᠷ᠃ ᠮᠠᠰᠢ ᠣᠯᠠᠨ ᠣᠩᠭᠣᠨ ᠪᠤᠯᠠᠰᠢ ᠠᠭᠤᠳᠠᠯᠤᠭᠳᠠᠨ ᠪᠠᠯᠠᠷᠠᠵᠤ᠂ ᠦᠯᠡᠮᠵᠢ ᠲᠣᠭᠠᠨ ᠤ᠋ ᠬᠠᠳᠠᠨ ᠵᠢᠷᠤᠭ᠂ ᠬᠥᠰᠢᠶᠡ ᠳᠤᠷᠠᠰᠬᠠᠯ ᠰᠦᠢᠳᠬᠡᠭᠳᠡᠵᠦ᠂ ᠠᠰᠤᠷᠤ ᠣᠯᠠᠨ ᠡᠳ᠋ ᠦᠯᠦᠭ ᠰᠠᠷᠢᠭᠠᠴᠢᠳ ᠤ᠋ᠨ ᠭᠠᠷ ᠳᠠᠮᠵᠢᠨ ᠠᠯᠠᠭᠠ ᠪᠣᠯᠵᠤ᠁ ᠪᠢᠳᠡᠨ ᠲᠡᠦᠬᠡ ᠰᠣᠶᠣᠯ ᠢ᠋ᠶ᠋ᠠᠨ ᠪᠠᠷᠢᠮᠲᠠ ᠳ᠋ᠤ᠌ ᠲᠤᠯᠭᠠᠭᠤᠷᠢᠯᠠᠨ ᠰᠤᠳᠤᠯᠵᠤ ᠣᠢᠯᠠᠭᠠᠬᠤ ᠪᠣᠯᠤᠮᠵᠢ ᠡᠢᠨ ᠬᠦ᠌ ᠠᠯᠳᠠᠭᠳᠠᠭᠰᠠᠭᠠᠷ ᠯᠠ ᠪᠠᠢᠭᠠ ᠶ᠋ᠢ ᠶᠠᠭᠠᠬᠢᠨ ᠤᠪᠠᠢᠯᠠᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠᠮ! ᠮᠣᠩᠭᠣᠯ ᠨᠤᠲᠤᠭ ᠠ᠋ᠴᠠ ᠣᠯᠳᠠᠭᠰᠠᠨ ᠬᠠᠭᠤᠴᠢ ᠳᠤᠷᠠᠰᠬᠠᠯᠲᠤ ᠵᠦᠢᠯ ᠪᠤᠰᠤᠳ ᠤ᠋ᠨ ᠰᠤᠳᠤᠯᠭᠠᠨ ᠤ᠋ ᠳ᠋ᠦᠩ ᠳ᠋ᠦ᠍ ᠱᠠᠯ ᠥᠭᠡᠷᠡ ᠦᠷᠡ ᠳ᠋ᠦᠩ ᠲᠡᠢ ᠪᠣᠯᠵᠤ᠂ ᠮᠣᠩᠭᠣᠯ ᠲᠡᠦᠬᠡ ᠰᠣᠶᠣᠯ ᠲᠠᠢ ᠬᠠᠮᠢᠶᠠ ᠴᠤ ᠦᠭᠡᠢ ᠡᠳ᠋ ᠭᠡᠭᠳᠡᠨ᠂ ᠡᠭᠦᠨ ᠦ᠌ ᠤᠴᠢᠷ ᠢ᠋ᠶ᠋ᠠᠷ ᠪᠢᠳᠡ ᠪᠠᠷᠢᠮᠲᠠ ᠮᠡᠬᠦᠰᠳᠡᠨ ᠲᠡᠦᠬᠡ ᠰᠣᠶᠣᠯ ᠦᠭᠡᠢᠳᠡᠵᠦ ᠪᠠᠢᠨᠠ᠃ ᠨᠢᠭᠡᠨᠲᠡ ᠣᠯᠳᠠᠭᠰᠠᠨ ᠡᠳ᠋ ᠥᠯᠥᠭ ᠢ᠋ᠶ᠋ᠡᠨ ᠪᠢᠳᠡ ᠠᠯᠢ ᠵᠡᠷᠭᠡ ᠰᠤᠳᠤᠯᠪᠠ? ᠠᠢᠯ ᠠᠢᠯ ᠳ᠋ᠤ᠌ ᠪᠠᠢᠭᠠ ᠬᠠᠭᠤᠴᠢᠨ ᠤ᠋ ᠡᠳ᠋ ᠦᠯᠦᠭ ᠢ᠋ᠶ᠋ᠡᠨ ᠪᠢᠳᠡ ᠶᠠᠭᠠᠬᠢᠵᠤ ᠬᠠᠳᠠᠭᠠᠯᠠᠬᠤ ᠪᠣᠢ?
ᠮᠣᠩᠭᠣᠯ ᠰᠣᠶᠣᠯ ᠳ᠋ᠠᠭᠠᠨ ᠲᠤᠰᠠᠲᠠᠢ ᠠᠵᠢᠯ ᠬᠢᠶᠡ ᠭᠡᠪᠡᠰᠦ ᠥᠪᠡᠷ ᠡᠴᠡ ᠪᠡᠨ ᠡᠬᠢᠯᠡᠭᠲᠦᠨ! ᠭᠠᠷ ᠲᠠᠭᠠᠨ ᠪᠠᠢᠭᠠ ᠶᠠᠭᠤᠮᠠ ᠪᠠᠨ ᠨᠠᠨᠳᠢᠩᠨᠠᠭᠲᠤᠨ! ᠭᠧᠷᠮᠠᠨ ᠤ᠋ ᠠᠯᠳᠠᠷᠲᠤ ᠡᠷᠳᠡᠮᠲᠡᠨ ᠸᠡᠯᠲ᠋ᠸᠷ ᠾᠠᠢᠰᠰᠢᠭ᠌《ᠮᠣᠩᠭᠣᠯ ᠤ᠋ᠨ ᠲᠡᠦᠬᠡ ᠪᠠ ᠰᠣᠶᠣᠯ》 ᠬᠡᠮᠡᠬᠦ ᠭᠣᠶᠣ ᠨᠣᠮ ᠳ᠋ᠠᠭᠠᠨ《ᠮᠣᠩᠭᠣᠯ ᠲᠡᠦᠬᠡ ᠰᠣᠶᠣᠯ ᠢ᠋ ᠰᠤᠳᠤᠯᠬᠤ ᠳ᠋ᠤ᠌ ᠬᠤᠯᠤᠭᠠᠨᠠ ᠶ᠋ᠢᠨ ᠨᠦᠬᠡᠨ ᠳ᠋ᠦ᠍ ᠪᠠᠢᠭᠠ ᠲᠠᠰᠤᠷᠬᠠᠢ ᠬᠠᠭᠤᠳᠠᠰᠤ ᠶ᠋ᠢ ᠬᠦᠷᠲᠡᠯᠡ ᠪᠢᠲᠡᠭᠡᠢ ᠣᠮᠲᠣᠭᠠᠢᠯᠠᠭᠲᠤᠨ》 ᠭᠡᠰᠡᠨ ᠪᠢᠯᠡ᠃ ᠪᠢᠳᠡᠨ ᠦ᠌ ᠠᠢᠯ ᠭᠡᠷ ᠲᠦ᠍ ᠪᠠᠢᠭᠠ ᠠᠶᠠᠭᠠ ᠲᠠᠭᠱᠠ᠂ ᠬᠥᠬᠦᠦᠷ ᠲᠡᠯᠢᠩ᠂ ᠡᠮᠡᠭᠡᠯ ᠬᠠᠵᠠᠭᠠᠷ᠂ ᠪᠢᠴᠢᠭ ᠰᠤᠳᠤᠷ᠂ ᠡᠭᠡᠮᠦᠭ ᠰᠦᠢᠬᠡ᠁ ᠶᠡᠷᠦ ᠨᠢ ᠠᠯᠢ ᠨᠢ ᠮᠣᠩᠭᠣᠯ ᠰᠣᠶᠣᠯ ᠮᠠᠨᠢ ᠪᠢᠰᠢ ᠪᠢᠯᠡ? ᠲᠡᠭᠦᠨ ᠢ᠋ ᠬᠠᠢᠷᠠᠯᠠᠬᠤ ᠤᠬᠠᠭᠠ ᠰᠡᠭᠡᠭᠡ ᠲᠡᠢ ᠪᠣᠯᠵᠤ ᠬᠡᠮᠡᠨᠡ ᠮᠣᠩᠭᠣᠯ ᠰᠣᠶᠣᠯ ᠢ᠋ᠶ᠋ᠠᠨ ᠶᠠᠭᠠᠬᠢᠵᠤ ᠬᠠᠢᠷᠠᠯᠠᠬᠤ ᠶ᠋ᠢ ᠮᠡᠳᠡᠬᠦ ᠪᠣᠯᠤᠨᠠ᠃ ᠮᠣᠩᠭᠣᠯ ᠰᠣᠶᠣᠯ ᠭᠡᠳᠡᠭ ᠮᠠᠨᠢ ᠳᠠᠭᠤᠤ ᠬᠤᠭᠤᠷ᠂ ᠰᠢᠯᠦᠭ ᠵᠣᠬᠢᠶᠠᠯ᠂ ᠢᠷᠦᠭᠡᠯ ᠮᠠᠭᠲᠠᠭᠠᠯ᠂ ᠴᠢᠩᠭᠢᠰ ᠬᠠᠭᠠᠨ ᠯᠠ ᠪᠢᠰᠢ ᠰᠢᠦ ᠳᠡ! ᠪᠢᠳᠡᠨ ᠳ᠋ᠦ᠍ ᠮᠠᠰᠢ ᠡᠯᠪᠡᠭ᠂ ᠮᠠᠰᠢ ᠨᠠᠨᠳᠢᠨ ᠶᠠᠭᠤᠮᠠ ᠣᠯᠠᠨ ᠪᠣᠢ᠂ ᠲᠡᠷᠡ ᠮᠥᠷᠲᠡᠭᠡᠨ ᠬᠠᠵᠠᠭᠤᠬᠠᠨ ᠳ᠋ᠤ᠌ ᠮᠢᠨᠢ ᠪᠣᠢ! ᠲᠡᠭᠦᠨ ᠡᠴᠡ ᠯᠡ ᠡᠬᠢᠯᠡᠭᠲᠦᠨ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠢᠳᠰᠢᠩᠬᠣᠷᠯᠣ᠂ ᠨᠠᠷᠠᠨᠲᠤᠶᠠᠭᠠ
ᠬᠢᠨᠠᠭᠴᠢ ᠪᠠᠭᠰᠢ᠄ ᠰᠡᠬᠡᠭᠡᠷᠡᠯ᠂ ᠤᠳᠬᠠᠨᠰᠣᠠ