ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠬᠣᠶᠠᠳᠤᠭᠠᠷ ᠪᠦᠯᠦᠭ᠂ ᠬᠣᠶᠠᠳᠡᠬᠢ ᠠᠶᠠᠯᠠᠯ (ᠨᠢᠭᠡ) Сэрүүхэн тал нутаг – <свис> Вальтер Босгард ( Walter Bosshard)- Хоёрдугаар бөлөг・Хоёрдэх аялал 1
571ᠬᠣᠶᠠᠳᠤᠭᠠᠷ ᠪᠦᠯᠦᠭ᠂ ᠬᠣᠶᠠᠳᠡᠬᠢ ᠠᠶᠠᠯᠠᠯ
ᠨᠢᠭᠡ ᠂ 《ᠭᠣᠪᠢ ᠬᠥᠩᠭᠡᠨ ᠮᠠᠰᠢᠨ 》 ᠢ᠋ᠶ᠋ᠠᠷ ᠠᠶᠠᠯᠠᠭᠰᠠᠨ
ᠪᠢ ᠪᠡᠭᠡᠵᠢᠩ ᠳ᠋ᠡᠬᠢ ᠳᠥᠷᠪᠡᠨ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠬᠦᠷᠢᠶᠡ ᠲᠡᠢ ᠪᠠᠢᠰᠢᠩ ᠳ᠋ᠠᠭᠠᠨ ᠰᠠᠭᠤᠵᠤ᠂ ᠡᠷᠬᠡ ᠴᠢᠯᠥᠭᠡ ᠲᠡᠢ᠂ ᠥᠴᠦᠬᠡᠨ ᠴᠦ᠍ ᠳᠠᠷᠤᠭᠠᠰᠤ ᠦᠭᠡᠢ ᠠᠮᠢᠳᠤᠷᠠᠯ ᠲᠠᠢ ᠨᠠᠯᠠᠭᠠᠷ ᠶᠡᠬᠡ ᠬᠥᠳᠡᠭᠡ ᠪᠡᠨ ᠪᠣᠳᠣᠯ ᠳ᠋ᠠᠭᠠᠨ ᠡᠷᠢᠨᠡ᠃ ᠪᠦᠭᠴᠢᠮ ᠬᠠᠯᠠᠭᠤᠨ ᠵᠤᠨ ᠤ᠋ ᠦᠳᠡᠰᠢ ᠪᠢ ᠣᠷᠣ ᠪᠠᠨ ᠬᠦᠷᠢᠶᠡᠨ ᠳ᠋ᠦ᠍ ᠭᠠᠷᠭᠠᠭᠠᠳ ᠤᠨᠲᠠᠳᠠᠭ ᠶᠤᠮᠰᠠᠨ᠃ ᠡᠨᠡ ᠬᠦ᠌ ᠬᠠᠭᠤᠴᠢᠨ ᠬᠠᠭᠠᠨ ᠤ᠋ ᠬᠣᠲᠠ ᠶ᠋ᠢᠨ ᠤᠲᠤᠭᠠ ᠮᠠᠨᠠᠨ ᠢ᠋ ᠨᠡᠪᠲᠡᠯᠦᠨ ᠪᠦᠷᠦᠯᠵᠡᠬᠦ ᠣᠳᠣᠳ ᠢ᠋ ᠬᠠᠷᠠᠬᠤ ᠪᠠᠷ ᠲᠠᠯᠠ ᠨᠤᠲᠤᠭ ᠤ᠋ᠨ ᠣᠳᠣᠳ ᠴᠣᠬᠣᠮ ᠬᠡᠷᠢ ᠵᠡᠷᠭᠡ ᠭᠣᠶᠣ ᠭᠢᠯᠠᠯᠵᠠᠵᠤ ᠪᠠᠢᠭᠠ ᠪᠣᠯ ᠭᠡᠵᠦ ᠪᠣᠳᠣᠭᠳᠠᠨᠠ᠃
ᠬᠠᠷᠢᠨ 1934 ᠣᠨ ᠤ᠋ ᠶᠢᠰᠦᠳᠦᠭᠡᠷ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠡᠳᠦᠷ ᠮᠢᠨᠦ ᠬᠠᠭᠤᠴᠢᠨ ᠲᠠᠨᠢᠯ ᠫᠡᠸᠦ᠋ᠯ ᠺᠸᠯᠯᠸᠷ ᠰᠠᠨᠠᠮᠰᠠᠷ ᠦᠭᠡᠢ ᠨᠠᠳᠠ ᠳᠡᠭᠡᠷᠡ ᠢᠷᠡᠪᠡ᠃ ᠲᠡᠷᠡ ᠶᠠᠫᠣᠨ ᠳ᠋ᠤ᠌ ᠰᠤᠷᠤᠯᠴᠠᠬᠤ ᠪᠠᠷ ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠭᠤᠷ ᠬᠢᠲᠠᠳ ᠤ᠋ᠨ ᠡᠷᠲᠡᠨ ᠦ᠌ ᠨᠡᠢᠰᠯᠡᠯ ᠬᠣᠲᠠ ᠪᠡᠭᠡᠵᠢᠩ ᠳ᠋ᠦ᠍ ᠰᠣᠨᠢᠷᠬᠠᠯ ᠨᠢ ᠲᠠᠲᠠᠭᠳᠠᠨ ᠬᠦᠷᠴᠦ ᠢᠷᠡᠭᠰᠡᠨ ᠠᠵᠢ᠃
— ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠭᠡᠬᠦ ᠪᠡᠷ ᠮᠢᠨᠦ ᠠᠭᠤᠷᠲᠤ ᠣᠩᠭᠣᠴᠠ ᠲᠢᠶᠠᠨᠵᠢᠨ ᠠ᠋ᠴᠠ ᠺᠦᠪᠸ ᠤᠷᠤᠭᠤ ᠬᠥᠳᠡᠯᠦᠨᠡ᠂ ᠲᠡᠷᠡ ᠪᠣᠯᠲᠠᠯᠠ ᠪᠢ ᠪᠡᠭᠡᠵᠢᠩ ᠢ᠋ ᠲᠣᠭᠣᠷᠢᠨ ᠦᠵᠡᠬᠦ ᠴᠠᠭ ᠲᠠᠢ᠃
— ᠣᠳᠣ ᠴᠢ ᠠᠽᠢᠶᠠ ᠳ᠋ᠤ᠌ ᠪᠠᠢᠭᠠ ᠰᠢᠦ ! ᠲᠡᠭᠡᠬᠦ ᠳ᠋ᠡᠭᠡᠨ ᠧᠦ᠋ᠷᠣᠫᠠ ᠶ᠋ᠢᠨ ᠶᠠᠭᠠᠷᠠᠤ ᠴᠠᠭᠴᠢ ᠵᠠᠩ ᠢ᠋ᠶ᠋ᠠᠨ ᠮᠠᠷᠲᠠᠵᠤ᠂ ᠫᠠᠪᠯᠤ᠋ ᠰᠢᠭ᠋ ᠬᠣᠶᠠᠷ ᠭᠠᠷᠠᠭ ᠢ᠋ᠶ᠋ᠠᠷ ᠲᠥᠯᠥᠪᠯᠡᠨ ᠢᠷᠡᠭᠡᠳ ᠵᠢᠷᠭᠤᠭᠠᠨ ᠰᠠᠷᠠ ᠪᠣᠯᠵᠤ ᠪᠠᠢᠭᠠ ᠵᠠᠩ ᠢ᠋ ᠰᠤᠷᠬᠤ ᠬᠡᠷᠡᠭᠲᠡᠢ ᠳᠡ! ᠭᠡᠵᠦ ᠨᠠᠮᠠᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠫᠠᠪᠯᠤ᠋ ᠺᠤᠬᠨᠠᠺ ᠠᠪᠴᠤ ᠥᠳᠬᠡᠨ ᠺᠣᠹᠧ ᠳ᠋ᠡᠭᠡᠨ ᠬᠢᠭᠡᠳ᠂ ᠮᠢᠨᠦ ᠶᠠᠷᠢᠶᠠ ᠶ᠋ᠢ ᠵᠥᠪᠰᠢᠶᠡᠷᠡᠨ᠄
— ᠠᠮᠢ ᠨᠠᠰᠤ ᠭᠡᠵᠦ ᠨᠢᠭᠡ ᠲᠠᠯᠠ ᠠ᠋ᠴᠠ ᠶᠠᠷᠢᠬᠤ ᠳ᠋ᠤ᠌ ᠡᠢᠮᠦ ᠯᠡ ᠣᠬᠣᠷᠬᠠᠨ᠂ ᠲᠡᠭᠡᠭᠡᠳ ᠶᠠᠭᠤᠨ ᠳ᠋ᠤ᠌ ᠪᠢᠳᠡ ᠠᠵᠠ ᠵᠠᠪᠰᠢᠶᠠᠨ ᠪᠠᠢᠵᠤ ᠪᠠᠢᠭᠠᠳ ᠵᠢᠷᠭᠠᠬᠤ ᠦᠭᠡᠢ ᠪᠣᠢ ? ᠭᠡᠵᠦ ᠭᠦᠨ ᠤᠬᠠᠭᠠᠯᠢᠭ ᠶᠠᠷᠢᠪᠠ᠃
ᠫᠠᠪᠯᠤ᠋ ᠮᠠᠨᠢ ᠪᠡᠭᠡᠵᠢᠩ ᠳ᠋ᠡᠬᠢ ᠵᠢᠷᠭᠠᠯᠲᠤ ᠠᠮᠢᠳᠤᠷᠠᠯ ᠢ᠋ ᠬᠠᠨᠲᠠᠯᠠ ᠪᠠᠨ ᠡᠳ᠋ᠯᠡᠨ ᠰᠣᠭᠲᠣᠭᠤᠷᠠᠵᠤ᠂ ᠰᠠᠷᠠ ᠭᠠᠷᠤᠢ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠲᠥᠷᠥᠯ ᠰᠠᠳᠤᠨ ᠳ᠋ᠠᠭᠠᠨ ᠴᠢᠮᠡᠭᠡ ᠥᠭᠬᠦ ᠪᠡᠨ ᠬᠦᠷᠲᠡᠯᠡ ᠪᠦᠷ ᠮᠠᠷᠲᠠᠴᠢᠬᠠᠭᠰᠠᠨ ᠪᠢᠯᠡ᠃ ᠢᠩᠭᠢᠭᠡᠳ ᠲᠡᠭᠦᠨ ᠢ᠋ ᠪᠡᠭᠡᠵᠢᠩ ᠳ᠋ᠡᠬᠢ ᠪᠠᠭᠤᠳᠠᠯ ᠤ᠋ᠨ ᠢ᠋ᠶ᠋ᠠᠨ ᠣᠷᠣᠢ ᠳᠡᠭᠡᠷᠡ ᠡᠴᠡ ᠪᠣᠷᠣ ᠬᠣᠲᠠ ᠶ᠋ᠢᠨ ᠬᠠᠷᠠᠭᠠ ᠪᠤᠯᠢᠶᠠᠮᠠ ᠦᠵᠡᠮᠵᠢ ᠶ᠋ᠢ ᠰᠣᠨᠢᠷᠬᠠᠵᠤ ᠪᠠᠢᠬᠤ ᠪᠤᠶᠤ ᠰᠦᠮᠡ ᠬᠡᠢᠳ᠂ ᠣᠷᠳᠣᠨ ᠬᠠᠷᠰᠢ ᠪᠠᠷ ᠴᠠᠭ ᠢ᠋ᠶ᠋ᠠᠨ ᠮᠠᠷᠲᠠᠨ ᠲᠣᠭᠣᠷᠢᠵᠤ᠂ ᠭᠣᠶᠣ ᠦᠵᠡᠮᠵᠢᠨ ᠳ᠋ᠦ᠍ᠨᠢ ᠰᠣᠭᠲᠣᠭᠤᠷᠠᠨ ᠪᠠᠶᠠᠷᠯᠠᠵᠤ ᠪᠠᠢᠬᠤ ᠳ᠋ᠤ᠌ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠰ ᠨᠢ ᠲᠡᠭᠦᠨ ᠢ᠋ ᠠᠯᠠᠭᠠ ᠪᠣᠯᠴᠢᠬᠠᠯᠠ ᠭᠡᠮᠡᠨ ᠠᠯᠤᠰ ᠳᠣᠷᠣᠨᠠᠲᠤ ᠶ᠋ᠢᠨ ᠡᠯᠴᠢᠨ ᠰᠠᠢᠳ ᠤ᠋ᠨ ᠭᠠᠵᠠᠷ ᠤ᠋ᠳ ᠲᠠᠢ ᠬᠠᠷᠢᠯᠴᠠᠨ ᠬᠡᠳᠦ ᠬᠡᠳᠦᠨ ᠭᠠᠷᠠᠭ ᠢ᠋ᠶ᠋ᠠᠷ ᠡᠷᠢᠯ ᠪᠣᠯᠵᠤ ᠰᠦᠢᠳ ᠪᠤᠯᠵᠠᠭᠠᠭᠰᠠᠨ ᠠᠵᠢ᠃
— ᠲᠡᠭᠡᠪᠡᠯ ᠪᠢ ᠵᠥᠪᠬᠡᠨ ᠬᠠᠮᠤᠭ ᠤ᠋ᠨ ᠭᠣᠶᠣ ᠶ᠋ᠢ ᠨᠢ ᠯᠡ ᠦᠵᠡᠨᠡ ᠭᠡᠵᠦ ᠨᠠᠢᠵᠠ ᠺᠸᠯᠯᠸᠷ ᠮᠢᠨᠢ ᠶᠠᠷᠢᠬᠤ ᠳ᠋ᠤ᠌ ᠪᠢ :
— ᠲᠡᠭᠡᠪᠡᠯ ᠲᠡᠷᠡ ᠴᠢᠨᠢ ᠠᠳᠠ ᠠ᠋ᠴᠠ ᠶᠣᠰᠣᠲᠠᠢ ᠬᠣᠯᠠ ᠰᠢᠦ ᠭᠡᠵᠦ ᠬᠠᠷᠢᠭᠤᠯᠤᠭᠠᠳ᠂ ᠮᠣᠩᠭᠣᠯ ᠳ᠋ᠤ᠌ ᠰᠡᠭᠦᠳᠡᠷᠯᠡᠭᠰᠡᠨ ᠰᠡᠭᠦᠳᠡᠷ ᠦ᠋ᠳ ᠢ᠋ᠶ᠋ᠡᠨ ᠭᠠᠷᠭᠠᠯᠠ᠃ ᠫᠠᠪᠯᠤ᠋ ᠡᠳᠡᠭᠡᠷ ᠢ᠋ ᠨᠢᠭᠡᠨᠲᠡ ᠦᠵᠡᠭᠰᠡᠨ ᠪᠥᠭᠡᠳ ᠠᠯᠢ ᠬᠡᠵᠢᠶᠡᠨ ᠡᠴᠡ ᠮᠣᠩᠭᠣᠯ ᠨᠤᠲᠤᠭ ᠮᠢᠨᠦ ᠳᠤᠷᠠ ᠶ᠋ᠢ ᠬᠢᠷᠢ ᠵᠡᠷᠭᠡ ᠲᠠᠲᠠᠵᠤ ᠪᠠᠢᠳᠠᠭ ᠢ᠋ ᠲᠠᠭᠠᠮᠠᠭᠯᠠᠨ ᠣᠯᠤᠭᠰᠠᠨ ᠪᠠᠢᠵᠠᠢ᠃ ᠫᠠᠪᠯᠤ᠋ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠮᠠᠩᠨᠠᠢ ᠳ᠋ᠠᠭᠠᠨ ᠲᠤᠯᠭᠠᠵᠤ ᠤᠳᠠᠰᠬᠢᠭᠰᠡᠨ ᠢ᠋ᠶ᠋ᠡᠨ:
— ᠨᠠᠳᠠ ᠨᠢᠭᠡ ᠪᠣᠳᠣᠯ ᠪᠠᠢᠨᠠ᠂ ᠪᠢᠳᠡ ᠭᠤᠷᠪᠠᠭᠤᠯᠠ ᠬᠠᠮᠲᠤ ᠪᠠᠷ ᠮᠣᠩᠭᠣᠯ ᠢ᠋ᠶ᠋ᠠᠷ ᠨᠢᠭᠡ ᠤᠳᠠᠭᠠ ᠠᠶᠠᠯᠠᠰᠤᠭᠠᠢ ! ᠭᠡᠵᠦ ᠶᠠᠷᠢᠯᠠ᠃
— ᠶᠣᠰᠣᠲᠠᠢ ᠭᠣᠶᠣ ! ᠫᠠᠪᠯᠤ᠋ ᠭᠡᠵᠦ ᠪᠢ ᠬᠠᠰᠬᠢᠷᠤᠭᠠᠳ᠂ ᠡᠨᠡ ᠭᠠᠷᠠᠭ ᠤ᠋ᠨ ᠲᠤᠷᠰᠢᠬᠢ ᠴᠢᠨᠦ ᠬᠠᠮᠤᠭ ᠤ᠋ᠨ ᠵᠥᠪ ᠪᠣᠳᠣᠯ ᠴᠢᠨᠢ ᠡᠨᠡ! ᠭᠡᠯᠡ᠃ ᠫᠡᠸᠦ᠋ᠯ ᠺᠸᠯᠯᠸᠷ ᠳᠣᠣᠷᠠ ᠪᠠᠨ ᠡᠰᠡᠷᠭᠦ ᠰᠠᠨᠠᠯ ᠭᠠᠷᠭᠠᠨ ᠬᠡᠷᠬᠢᠪᠡᠴᠦ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠶᠠᠫᠣᠨ ᠵᠦᠭ ᠠᠶᠠᠯᠠᠬᠤ ᠶᠣᠰᠣᠲᠠᠢ ᠭᠡᠪᠡ᠃ ᠭᠡᠪᠡᠴᠦ ᠮᠢᠨᠦ ᠮᠣᠩᠭᠣᠯ ᠳ᠋ᠠᠬᠢ ᠭᠡᠷᠡᠯ ᠵᠢᠷᠤᠭ ᠤ᠋ᠳ ᠢ᠋ ᠦᠵᠡᠬᠦ ᠳᠣᠳᠣᠮ ᠲᠡᠭᠦᠨ ᠦ᠌ ᠡᠰᠡᠷᠭᠦᠴᠡᠯ ᠨᠢ ᠤᠯᠠᠮ ᠰᠤᠯᠠᠷᠠᠭᠰᠠᠭᠠᠷ᠂ ᠴᠠᠭ ᠤ᠋ᠨ ᠳᠠᠷᠠᠭᠠ ᠪᠣᠯᠬᠤ ᠳ᠋ᠤ᠌ ᠪᠢᠳᠡᠨ ᠦ᠌ ᠰᠠᠨᠠᠬᠠ ᠨᠢᠭᠡᠨᠲᠡ ᠨᠢᠭᠡᠳᠦᠭᠡᠳ᠂ ᠭᠠᠵᠠᠷ ᠤ᠋ᠨ ᠵᠢᠷᠤᠭ ᠢ᠋ ᠲᠣᠭᠣᠷᠢᠨ ᠰᠠᠭᠤᠵᠠᠭᠠᠵᠤ᠂ ᠠᠶᠠᠯᠠᠯ ᠤ᠋ᠨ ᠲᠥᠰᠥᠪ ᠢ᠋ᠶ᠋ᠡᠨ ᠬᠡᠯᠡᠯᠴᠡᠨ ᠡᠬᠢᠯᠡᠪᠡ᠃ ᠮᠢᠨᠦ ᠪᠣᠳᠣᠯ ᠢ᠋ᠶ᠋ᠠᠷ ᠪᠣᠯ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠪᠠᠷ ᠳᠠᠭᠠᠷᠢᠨ ᠬᠤᠪᠢᠯᠠᠢ ᠬᠠᠭᠠᠨ ᠤ᠋ ᠮᠡᠷᠭᠦ ᠫᠣᠯᠣ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠠᠭᠤᠯᠵᠠᠭᠰᠠᠨ ᠡᠷᠲᠡᠨ ᠦ᠌ ᠮᠣᠩᠭᠣᠯ ᠤ᠋ᠨ ᠵᠤᠰᠠᠯᠠᠩ ᠲᠤᠯᠤᠨ ᠨᠠᠭᠤᠷ ᠬᠦᠷᠴᠦ ᠳᠠᠬᠢᠨ ᠲᠡᠨᠳᠡ ᠡᠴᠡ ᠶᠠᠪᠤᠨᠴᠤᠳ ᠤ᠋ᠨ ᠰᠢᠨᠡ ᠵᠠᠰᠠᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠠᠭᠤᠯᠠ ᠨᠢᠷᠤᠭᠤᠳ ᠢ᠋ ᠳᠠᠪᠠᠨ ᡁᠢᠯᠢ ᠣᠷᠣᠨᠠ᠃ ᠮᠢᠨᠦ ᠶᠠᠷᠢᠭᠰᠠᠨ ᠲᠥᠰᠥᠪ ᠢ᠋ ᠭᠠᠵᠠᠷ ᠤ᠋ᠨ ᠵᠢᠷᠤᠭ ᠠ᠋ᠴᠠ ᠬᠠᠷᠠᠬᠤ ᠳ᠋ᠤ᠌ ᠶᠣᠰᠣᠲᠠᠢ ᠵᠥᠪ ᠪᠠᠢᠯᠠ᠃ ᠮᠥᠨ ᠣᠷᠣᠢ ᠳ᠋ᠠᠭᠠᠨ ᠪᠢ ᠲᠦᠷᠦᠭᠦᠴᠢ ᠶ᠋ᠢᠨ ᠥᠷᠲᠡᠭᠡ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠤᠲᠠᠰᠤᠳᠠᠭᠰᠠᠨ ᠪᠢᠯᠡ᠃
ᠡᠨᠡ ᠤᠳᠠᠭᠠ ᠪᠢᠳᠡ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠣᠷᠣᠰ ᠤ᠋ᠨ ᠬᠢᠵᠢᠶᠡᠯ ᠨᠠᠰᠤᠨ ᠤ᠋ ᠠᠬᠠᠯᠠᠭᠴᠢ ᠳ᠋ᠢᠮᠢᠲᠷᠸᠸ ᠦ᠋ᠨ ᠳ᠋ᠦ᠍ ᠬᠣᠨᠣᠭᠯᠠᠯᠠ᠃ ᠡᠨᠡ ᠣᠷᠣᠰ ᠪᠣᠯ ᠬᠢᠲᠠᠳ ᠤ᠋ᠨ ᠢ ᠾᠧ ᠲᠤᠸᠠᠨ ᠤ᠋ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠥᠷᠲᠥᠨ ᠳᠠᠭᠠᠷᠢᠭᠳᠠᠵᠤ ᠥᠩᠭᠡᠷᠡᠭᠰᠡᠨ ᠪᠥᠭᠡᠳ ᠣᠷᠣᠰ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠳᠠᠷᠠᠭᠠ ᠮᠣᠩᠭᠣᠯ ᠤ᠋ᠨ ᠵᠠᠬᠠ ᠳ᠋ᠠᠬᠢ ᠡᠨᠡ ᠪᠠᠭᠤᠳᠠᠯ ᠢ᠋ ᠡᠵᠡᠩᠨᠡᠨ ᠦᠯᠡᠳᠡᠭᠰᠡᠨ ᠶᠦᠮ᠃ ᠬᠡᠷᠪᠡ ᠲᠡᠭᠦᠨ ᠢ᠋ ᠲᠦᠷᠦᠭᠦᠨ ᠦ᠌ ᠲᠡᠮᠡᠭᠡᠨ ᠵᠢᠩᠴᠢᠳ ᠳᠦᠭᠦᠷᠲᠡᠯᠡ ᠪᠠᠭᠤᠳᠠᠯᠯᠠᠭᠰᠠᠨ ᠪᠠᠭᠤᠳᠠᠯ ᠤ᠋ᠨ ᠡᠵᠡᠨ ᠪᠠᠢᠭᠰᠠᠨ ᠲᠠᠢ ᠠᠳᠠᠯᠢᠳᠬᠠᠪᠠᠯ ᠶᠣᠰᠣᠲᠠᠢ ᠯᠠ ᠬᠢᠳᠡᠯ ᠢ᠋ᠶ᠋ᠡᠨ ᠪᠠᠷᠠᠭᠰᠠᠨ ᠣᠷᠣᠰ ᠤ᠋ᠨ ᠲᠣᠮᠣ ᠢᠵᠠᠭᠤᠷᠲᠠᠨ ᠪᠣᠯᠵᠠᠢ᠃ ᠲᠡᠭᠦᠨ ᠦ᠌ ᠰᠠᠢᠬᠠᠨ ᠴᠠᠭ ᠨᠢ ᠨᠢᠭᠡᠨᠲᠡ ᠥᠩᠭᠡᠷᠡᠨ ᠣᠳᠴᠤ᠂ ᠪᠦᠬᠦ ᠥᠷᠥᠭᠡ ᠨᠥᠬᠥᠳ ᠨᠢ ᠬᠣᠭᠣᠰᠣᠨ ᠪᠣᠯᠵᠠᠢ᠃ ᠧᠦ᠋ᠷᠣᠫᠠ ᠠᠮᠧᠷᠢᠺᠠ ᠶ᠋ᠢᠨ ᠠᠷᠠᠰᠤ ᠨᠣᠣᠰᠣᠨ ᠤ᠋ ᠬᠤᠳᠠᠯᠳᠤᠭᠠᠴᠢᠳ ᠲᠤ᠌ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠪᠠᠶᠠᠷ ᠨᠠᠢᠷ ᠤ᠋ᠨ ᠲᠢᠩᠬᠢᠮ ᠦ᠋ᠨ ᠠᠳᠠᠭᠠᠷ ᠤ᠋ᠨ ᠴᠣᠬᠣᠢ ᠨᠢ ᠬᠠᠭᠤᠷᠠᠵᠤ᠂ ᠬᠡᠷᠡᠮ ᠦ᠋ᠨ ᠴᠠᠭᠠᠰᠤ ᠨᠢ ᠤᠷᠠᠭᠳᠠᠨ ᠠᠳᠠ ᠲᠡᠨᠳᠡ ᠤᠨᠵᠢᠢᠵᠤ᠂ ᠥᠩᠭᠡ ᠵᠢᠪᠠᠷ ᠢ᠋ᠶ᠋ᠠᠨ ᠠᠯᠳᠠᠭᠰᠠᠨ ᠲᠡᠭᠦᠯᠳᠡᠷ ᠬᠤᠭᠤᠷ ᠨᠢ ᠲᠢᠩᠬᠢᠮ ᠦ᠋ᠨ ᠪᠤᠯᠤᠩ ᠳ᠋ᠤ᠌ ᠲᠣᠭᠣᠰᠤᠨᠠ ᠳᠠᠷᠤᠭᠳᠠᠨ ᠬᠣᠷᠣᠬᠠᠢᠲᠤᠵᠠᠢ᠃
ᠮᠢᠨᠦ ᠨᠠᠢᠵᠠ ᠫᠦᠷᠫᠢᠰᠰ ᠪᠥᠭᠡᠷᠡᠨ ᠦ᠌ ᠬᠦᠨᠳᠦ ᠦᠷᠪᠢᠰᠦᠯ ᠳ᠋ᠦ᠍ ᠨᠡᠷᠪᠡᠭᠳᠡᠵᠦ᠂ ᠬᠡᠪᠲᠡᠷᠢ ᠳ᠋ᠡᠭᠡᠨ ᠪᠠᠢᠭᠰᠠᠨ ᠪᠥᠭᠡᠳ ᠪᠢᠳᠡᠨ ᠦ᠌ ᠬᠦᠷᠦᠭᠰᠡᠨ ᠦ᠌ ᠮᠠᠷᠭᠠᠰᠢ ᠨᠢ ᠪᠡᠭᠡᠵᠢᠩ ᠳ᠋ᠡᠬᠢ ᠭᠧᠷᠮᠠᠨ ᠡᠮᠨᠡᠯᠭᠡ ᠳ᠋ᠦ᠍ ᠬᠦᠷᠭᠡᠬᠦ ᠪᠡᠷ ᠪᠠᠢᠯᠠ᠃
— ᠡᠨᠡ ᠤᠳᠠᠭᠠ ᠪᠢ ᠵᠥᠪᠬᠡᠨ 《ᠭᠣᠪᠢ ᠬᠥᠩᠭᠡᠨ ᠮᠠᠰᠢᠨ 》 ᠢ᠋ ᠯᠡ ᠲᠠᠨ ᠳ᠋ᠤ᠌ ᠥᠭᠴᠦ ᠳᠡᠢᠯᠦᠨᠡ᠃ ᠪᠤᠢᠺ ᠮᠠᠰᠢᠨ ᠢ᠋ ᠳᠡᠮᠴᠦᠭ᠌ᠳᠣᠩᠷᠤᠪ ᠨᠣᠶᠠᠨ ᠳ᠋ᠤ᠌ ᠪᠡᠯᠡᠭᠯᠡᠨ ᠥᠭᠭᠦᠭᠰᠡᠨ᠂ ᠰᠢᠨᠡ ᠫᠠᠺᠠᠷᠳ᠋ ᠮᠠᠰᠢᠨ ᠨᠢᠭᠡ ᠭᠠᠷᠠᠭ ᠤ᠋ᠨ ᠳᠠᠷᠠᠭᠠ ᠰᠠᠶᠢ ᠱᠠᠩᠬᠠᠢ ᠠ᠋ᠴᠠ ᠪᠤᠴᠠᠵᠤ ᠢᠷᠡᠬᠦ ᠪᠥᠭᠡᠳ ᠮᠥᠨ ᠱᠢᠯᠦᠹ ᠮᠠᠰᠢᠨ ᠴᠤ᠌ ᠶᠡᠬᠡ ᠬᠦᠷᠢᠶᠡ ᠣᠷᠣᠬᠤ ᠵᠠᠮ ᠳ᠋ᠠᠭᠠᠨ ᠪᠠᠢᠨᠠ ᠭᠡᠵᠦ ᠲᠡᠷᠡ ᠡᠪᠡᠳᠴᠢᠲᠡᠨ ᠦ᠌ ᠵᠢᠵᠢᠭ ᠥᠷᠥᠭᠡᠨ ᠳ᠋ᠡᠭᠡᠨ ᠬᠠᠯᠠᠭᠤᠷᠠᠵᠤ ᠬᠡᠪᠲᠡᠬᠦ ᠳ᠋ᠡᠭᠡᠨ ᠨᠠᠳᠠ ᠶᠠᠷᠢᠪᠠ᠃
ᠪᠢᠳᠡ《ᠭᠣᠪᠢ ᠬᠥᠩᠭᠡᠨ ᠮᠠᠰᠢᠨ 》 ᠢ᠋ ᠬᠠᠷᠠᠯᠠ᠃ ᠶᠣᠰᠣᠲᠠᠢ ᠯᠠ ᠠᠶᠠᠯᠠᠬᠤ ᠳ᠋ᠤ᠌ ᠲᠣᠬᠢᠷᠠᠭᠰᠠᠨ ᠬᠥᠩᠭᠡᠨ ᠮᠠᠰᠢᠨ ᠪᠠᠢᠯᠠ᠃ ᠫᠦᠷᠫᠠᠰᠰ ᠮᠠᠰᠢᠨ ᠢ᠋ ᠪᠢᠳᠡᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠲᠣᠬᠢᠷᠠᠬᠤ ᠪᠠᠷ ᠵᠠᠰᠠᠭᠤᠯᠵᠤ᠂ ᠠᠴᠢᠶᠠᠨ ᠤ᠋ ᠮᠠᠰᠢᠨ ᠠ᠋ᠴᠠ ᠭᠤᠷᠪᠠ ᠳᠥᠷᠪᠡᠨ ᠬᠥᠮᠦᠨ ᠰᠠᠭᠤᠳᠠᠭ ᠣᠯᠪᠣᠭ ᠠᠪᠴᠢᠷᠠᠭᠤᠯᠤᠯᠠ᠃ ᠪᠦᠲᠡᠭᠡᠯᠭᠡ ᠲᠡᠢ ᠮᠠᠰᠢᠨ ᠤ᠋ ᠠᠷᠤ ᠶ᠋ᠢᠨ ᠬᠠᠢᠷᠴᠠᠭ ᠲᠤ᠌ ᠪᠢᠳᠡᠨ ᠦ᠌ ᠪᠦᠬᠦ ᠠᠴᠢᠶᠠ ᠪᠣᠯᠤᠨ ᠴᠢᠯᠠᠭᠤᠨ ᠲᠣᠰᠣ ᠪᠠᠨ ᠠᠴᠢᠶᠠᠯᠠᠵᠤ ᠪᠠᠭᠲᠠᠬᠤ ᠪᠥᠭᠡᠳ ᠰᠥᠨᠢ ᠳ᠋ᠡᠭᠡᠨ ᠴᠢᠬᠤᠯᠠ ᠲᠠᠢ ᠪᠣᠯ ᠲᠦᠰᠢᠯᠭᠡ ᠪᠡᠨ ᠪᠠᠭᠤᠯᠭᠠᠵᠤ᠂ ᠵᠢᠯᠣᠭᠣᠴᠢ ᠪᠠ ᠬᠠᠪᠰᠤᠷᠤᠭᠴᠢ ᠶ᠋ᠢᠨ ᠤᠨᠲᠠᠬᠤ ᠲᠠᠭᠠᠲᠠᠢᠬᠠᠨ ᠥᠷᠥᠭᠡ ᠪᠣᠯᠭᠠᠵᠤ᠂ ᠬᠦᠢᠲᠡᠨ ᠳ᠋ᠦ᠍ ᠪᠠᠰᠠ ᠠᠰᠠᠭᠠᠭᠰᠠᠨ ᠮᠣᠲ᠋ᠣᠷ ᠢ᠋ᠶ᠋ᠠᠷ ᠨᠢ ᠳᠤᠯᠠᠭᠠᠴᠠᠵᠤ ᠪᠣᠯᠤᠨᠠ᠃
ᠪᠢᠳᠡᠨ ᠳ᠋ᠦ᠍ ᠵᠢᠯᠣᠭᠣᠴᠢ ᠹᠡᠷᠡᠹᠦᠨᠲ᠋ᠦᠹ ᠠᠯᠢ ᠣᠯᠠᠨ ᠤᠷᠠ ᠳᠠᠮ ᠢ᠋ᠶ᠋ᠠᠨ ᠭᠠᠢᠬᠠᠭᠤᠯᠵᠤ ᠪᠠᠢᠬᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠪᠢ :
— ᠨᠡᠷᠡ ᠶ᠋ᠢ ᠨᠢ ᠪᠢᠴᠢᠵᠦ ᠳᠡᠭᠡᠷᠡ ᠨᠢ ᠡᠯᠭᠦᠪᠡᠯ ᠨᠡᠩ ᠰᠠᠢᠨ ᠳᠠ ᠭᠡᠵᠦ ᠶᠠᠷᠢᠪᠠᠯ ᠢᠰᠲ᠋ᠸᠯ ᠬᠡᠮᠡᠬᠦ ᠨᠡᠷᠡ ᠲᠡᠢ ᠠᠳᠠᠯᠢ ᠦᠵᠡᠯᠲᠡ ᠪᠦᠬᠦᠢ ᠵᠠᠯᠠᠭᠤ ᠠᠵᠢᠯᠲᠠᠨ ᠠᠯᠪᠠᠨ ᠭᠡᠷ ᠲᠡᠭᠡᠨ ᠣᠷᠣᠵᠤ᠂ ᠴᠠᠭ ᠤ᠋ᠨ ᠳᠠᠷᠠᠭᠠ 《ᠭᠣᠪᠢ ᠬᠥᠩᠭᠡᠨ ᠮᠠᠰᠢᠨ 》 ᠭᠡᠵᠦ ᠳᠡᠭᠡᠷᠡ ᠨᠢ ᠲᠣᠮᠣ ᠪᠠᠷ ᠪᠢᠴᠢᠭᠰᠡᠨ ᠤᠷᠲᠤ ᠪᠥᠰ ᠠᠪᠴᠢᠷᠠᠪᠠ ( ᠵᠢᠷᠤᠭ 46 ) ᠃
ᠤᠳᠠᠯ ᠦᠭᠡᠢ ᠪᠢᠳᠡ ᠬᠢᠲᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠠᠵᠢᠯᠲᠠᠳ ᠤ᠋ᠨ ᠲᠡᠨᠳᠡ ᠬᠦᠴᠢᠷᠳᠡᠯ ᠳ᠋ᠦ᠍ ᠲᠤᠯᠭᠠᠷᠠᠪᠠ᠃ ᠪᠢᠳᠡ ᠲᠤᠯᠤᠨ ᠨᠠᠭᠤᠷ ᠬᠦᠷᠬᠦ ᠱᠠᠭᠠᠷᠳᠠᠯᠭᠠ ᠲᠠᠢ ᠪᠣᠯᠪᠠᠴᠤ ᠲᠡᠨᠳᠡ ᠬᠦᠷᠬᠦ ᠵᠠᠮ ᠲᠠᠢᠪᠤᠩ ᠪᠤᠰᠤ ᠤᠴᠢᠷ ᠰᠠᠢᠨ ᠪᠣᠳᠣᠯᠬᠢᠯᠠᠬᠤ ᠴᠢᠬᠤᠯᠠᠲᠠᠢ ᠪᠣᠯᠤᠯᠠ᠃ ᠦᠨᠡᠨ ᠰᠢᠯᠲᠠᠭᠠᠨ ᠢ᠋ ᠨᠢ ᠲᠠᠭᠠᠮᠠᠭᠯᠠᠬᠤ ᠳ᠋ᠤ᠌ ᠲᠡᠢᠮᠦ ᠬᠦᠴᠢᠷ ᠪᠢᠰᠢ᠂ ᠬᠡᠳᠦᠨ ᠭᠠᠷᠠᠭ ᠤ᠋ᠨ ᠡᠮᠦᠨᠡ ᠡᠨᠡ ᠬᠦ᠌ ᠬᠠᠭᠤᠴᠢᠨ ᠠᠷᠠᠯᠵᠢᠶᠠᠨ ᠤ᠋ ᠬᠣᠲᠠ ᠪᠣᠯᠬᠤ ᠲᠤᠯᠤᠨ ᠨᠠᠭᠤᠷ ᠢ᠋ ᠶᠠᠫᠣᠨᠴᠤᠳ ᠰᠡᠮᠡᠬᠡᠷ ᠡᠵᠡᠯᠡᠴᠢᠬᠡᠭᠰᠡᠨ ᠪᠠᠢᠪᠠ᠃ ᠬᠢᠲᠠᠳ ᠤ᠋ᠳ ᠨᠢᠭᠡ ᠲᠠᠯᠠ ᠪᠠᠷ ᠡᠨᠡ ᠬᠦ᠌ ᠰᠢᠨᠡᠬᠡᠨ ᠠᠯᠳᠠᠭᠰᠠᠨ ᠭᠠᠵᠠᠷ ᠤ᠋ᠨ ᠮᠡᠳᠡᠭᠡ ᠪᠡᠨ ᠨᠢᠭᠤᠴᠠᠭᠠᠢᠯᠠᠬᠤ ᠰᠠᠨᠠᠭᠠᠲᠠᠢ ᠪᠥᠭᠡᠳ ᠨᠥᠭᠦᠭᠡ ᠲᠠᠯᠠ ᠪᠠᠷ ᠬᠢᠵᠠᠭᠠᠷ ᠣᠷᠣᠨ ᠳ᠋ᠠᠬᠢ ᠬᠠᠷᠢ ᠶ᠋ᠢᠨ ᠬᠥᠮᠦᠰ ᠢ᠋ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠠᠭᠠᠰᠢᠯᠠᠬᠤ ᠵᠡᠷᠯᠢᠭ ᠴᠡᠷᠢᠭ ᠦ᠋ᠳ ᠡᠴᠡ ᠬᠠᠮᠠᠭᠠᠯᠠᠬᠤ ᠭᠡᠰᠡᠨ ᠰᠠᠨᠵᠠᠢ᠃
ᠪᠢ ᠰᠢᠨᠡ ᠵᠠᠮ ᠢ᠋ ᠡᠷᠢᠯᠬᠢᠯᠡᠵᠦ᠂ ᠲᠡᠳᠡᠨ ᠳ᠋ᠦ᠍ ᠤᠷᠢᠳ ᠢ᠋ᠶ᠋ᠠᠷ ᠯᠠᠷᠰᠤᠨ ᠬᠦᠩ ᠦ᠋ᠨ ᠬᠢ ᠪᠡᠷ ᠳᠠᠭᠠᠷᠢᠨ ᠭᠠᠷᠬᠤ ᠰᠠᠨᠠᠭᠤᠯᠭᠠ ᠶ᠋ᠢ ᠭᠠᠷᠭᠠᠭᠰᠠᠨ ᠳ᠋ᠤ᠌ ᠲᠡᠳᠡ ᠳᠣᠣᠷᠠ ᠪᠠᠨ ᠵᠥᠪᠰᠢᠶᠡᠷᠡᠪᠡ᠃ ᠪᠢᠳᠡ ᠬᠡᠷᠪᠡ ᠸᠠᠨ ᠴᠤᠸᠠᠨ ᠳᠠᠪᠠᠭᠠ ᠶ᠋ᠢ ᠳᠠᠪᠠᠴᠢᠬᠠᠪᠠᠯ᠂ ᠳᠠᠷᠠᠭᠠ ᠨᠢ ᠲᠤᠯᠤᠨ ᠨᠠᠭᠤᠷ ᠬᠦᠷᠲᠡᠯᠡᠬᠢ ᠵᠠᠮ ᠭᠦᠢᠴᠡᠳ ᠨᠡᠭᠡᠭᠡᠭᠳᠡᠬᠦ ᠪᠣᠯᠤᠨᠠ᠃ ᠤᠴᠢᠷ ᠨᠢ ᠲᠠᠯᠠ ᠨᠤᠲᠤᠭ ᠲᠤ᠌ ᠵᠣᠯ ᠢ᠋ᠶ᠋ᠠᠷ ᠫᠠᠰᠫᠣᠷᠲ ᠰᠢᠯᠭᠠᠯᠲᠠ ᠪᠣᠯᠤᠨ ᠵᠠᠮ ᠬᠠᠷᠢᠯᠴᠠᠭᠠᠨ ᠤ᠋ ᠴᠠᠭᠳᠠᠭᠠ ᠭᠡᠵᠦ ᠶᠡᠷᠦ ᠡᠴᠡ ᠪᠡᠨ ᠪᠠᠢᠳᠠᠭ ᠦᠭᠡᠢ ᠪᠢᠯᠡ᠃
ᠪᠢᠳᠡᠨ ᠦ᠌ ᠠᠶᠠᠯᠠᠯ ᠮᠢᠨᠦ ᠪᠣᠳᠣᠭᠰᠠᠨ ᠠ᠋ᠴᠠ ᠬᠤᠷᠳᠤᠨ ᠪᠦᠲᠦᠮᠵᠢᠲᠡᠢ ᠪᠣᠯᠵᠤ᠂ ᠬᠠᠭᠤᠷᠠᠢ ᠭᠣᠣᠯ ᠢ᠋ ᠳᠠᠭᠠᠭᠰᠠᠨ ᠰᠢᠨᠡᠬᠡᠨ ᠵᠠᠰᠠᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠳᠣᠪᠲᠣᠯᠵᠤ ᠠᠭᠤᠯᠠ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠣᠷᠣᠪᠠ᠃
— ᠡᠨᠡ ᠵᠠᠮ ᠴᠦ᠍ ᠭᠡᠵᠢ ᠳᠡ ! ᠵᠡᠪᠰᠡᠭ ᠲᠡᠢ ᠶᠠᠫᠣᠨᠴᠤᠳ ᠢ᠋ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠶᠣᠰᠣᠲᠠᠢ ᠳᠥᠭᠥᠮ ᠪᠣᠯᠭᠠᠵᠠᠢ ᠭᠡᠵᠦ ᠵᠢᠯᠣᠭᠣᠴᠢ ᠮᠠᠨᠢ ᠥᠭᠦᠯᠡᠨᠡ᠃
ᠳᠠᠪᠠᠭᠠᠨ ᠤ᠋ ᠣᠷᠣᠢ ᠳᠡᠭᠡᠷᠡᠬᠢ ᠨᠢ ᠣᠳᠣᠬᠠᠨ ᠨᠢᠭᠡᠨᠲᠡ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠪᠣᠯᠤᠨ ᠬᠤᠪᠢᠷᠠᠵᠤ᠂ ᠵᠠᠭᠤᠭᠠᠳ ᠴᠡᠷᠢᠭ ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠭᠠᠳᠠᠨᠠ ᠱᠤᠭᠤᠮ ᠰᠢᠭ᠋ ᠠᠰᠬᠠᠨ ᠪᠡᠬᠢᠯᠡᠯᠲᠡ ᠶ᠋ᠢᠨ ᠰᠤᠪᠠᠭ ᠮᠠᠯᠲᠠᠵᠠᠭᠠᠨᠠ᠃
— ᠶᠣᠰᠣᠲᠠᠢ ᠬᠡᠷᠡᠭ ᠦᠭᠡᠢ ᠶᠠᠭᠤᠮᠠ! ᠲᠡᠨᠳᠡᠬᠢ ᠣᠷᠣᠢ ᠠ᠋ᠴᠠ ᠭᠠᠭᠴᠠ ᠮᠠᠰᠢᠨ ᠫᠤᠤ ᠪᠠᠷ ᠪᠦᠭᠦᠳᠡ ᠶ᠋ᠢ ᠯᠡ ᠰᠦᠷᠴᠢᠵᠦ ᠣᠷᠬᠢᠨᠠ ᠰᠢᠦ ᠭᠡᠵᠦ ᠺᠸᠯᠯᠸᠷ ᠴᠡᠷᠢᠭ ᠬᠥᠮᠦᠨ ᠦ᠌ ᠬᠠᠷᠠᠴᠠ ᠪᠠᠷ ᠵᠠᠳᠠᠯᠤᠨ ᠶᠠᠷᠢᠯᠠ᠃
ᠪᠢᠳᠡ ᠡᠨᠡ ᠬᠦ᠌ ᠪᠠᠢᠯᠳᠤᠬᠤ ᠪᠣᠳᠣᠯᠭᠠ ᠶ᠋ᠢᠨ ᠴᠢᠨᠠᠷᠲᠠᠢ ᠠᠰᠠᠭᠤᠳᠠᠯ ᠢ᠋ ᠶᠠᠷᠢᠯᠴᠠᠬᠤ ᠪᠠᠨ ᠲᠦᠷ ᠵᠣᠭᠰᠣᠵᠤ᠂ ᠪᠠᠷᠠᠭᠤᠨ ᠬᠣᠢᠰᠢ ᠪᠠᠨ ᠨᠢᠭᠡᠨᠲᠡ ᠬᠡᠯᠪᠡᠢᠭᠰᠡᠨ ᠨᠠᠷᠠᠨ ᠢ᠋ᠶ᠋ᠠᠷ ᠦᠷᠭᠦᠯᠵᠢᠯᠡᠨ ᠠᠶᠠᠯᠠᠪᠠ᠃ ᠵᠠᠮ ᠲᠤᠷᠰᠢ ᠤᠮᠠᠷᠠᠰᠢ ᠪᠠᠨ ᠵᠠᠩᠪᠧᠢ ᠰᠢᠶᠠᠨ ᠢ᠋ ᠴᠢᠭᠯᠡᠵᠦ ᠶᠠᠪᠤᠭᠠ ᠴᠡᠷᠢᠭ ᠠᠷᠮᠢ ᠲᠠᠭᠠᠷᠠᠯᠳᠤᠨ᠂ ᠶᠠᠭ ᠯᠠ ᠰᠢᠷᠭᠤᠯᠵᠢ ᠮᠡᠲᠦ ᠵᠠᠩᠪᠸᠢ ᠰᠢᠶᠠᠨ ᠵᠦᠭ ᠴᠤᠭᠯᠠᠷᠠᠬᠤ ᠠᠵᠢ᠃ ᠲᠡᠨᠳᠡ ᠡᠴᠡ ᠴᠠᠭᠠᠰᠢ ᠬᠠᠶᠠ ᠨᠢᠭᠡ ᠮᠣᠷᠢᠲᠠᠨ ᠲᠠᠭᠠᠷᠠᠯᠳᠤᠭᠰᠠᠨ ᠢ᠋ ᠭᠠᠷᠭᠠᠪᠠᠯ ᠥᠭᠡᠷᠡ ᠶᠠᠭᠤᠮᠠ ᠭᠡᠵᠦ ᠠᠯᠠᠭᠠ᠃
ᠵᠠᠪᠰᠠᠷ ᠲᠤ᠌ ᠪᠢᠳᠡ ᠬᠣᠪ ᠬᠣᠭᠣᠰᠣᠨ ᠪᠣᠯᠤᠭᠰᠠᠨ ᠪᠠᠭᠤᠳᠠᠯ ᠳ᠋ᠤ᠌ ᠬᠣᠨᠣᠭᠯᠠᠪᠠ᠃ ᠠᠳᠠᠬᠢ ᠰᠠᠭᠤᠭᠠᠯᠢ ᠠᠷᠠᠳ ᠪᠢᠳᠡᠨ ᠢ᠋ ᠢᠲᠡᠭᠡᠵᠦ ᠶᠠᠳᠠᠭᠰᠠᠨ ᠴᠢᠨᠠᠭᠰᠢᠯᠠᠪᠠᠯ ᠠᠶᠤᠭᠰᠠᠨ ᠴᠢᠷᠠᠢ ᠪᠠᠷ ᠤᠭᠲᠤᠨ ᠠᠪᠤᠭᠰᠠᠨ ᠨᠢ ᠪᠢᠳᠡᠨ ᠳ᠋ᠦ᠍ ᠠᠪᠴᠤ ᠬᠡᠯᠡᠪᠡᠯ ᠶᠡᠬᠡ ᠰᠣᠨᠢᠷᠬᠠᠯᠲᠠᠢ ᠰᠠᠨᠠᠭᠳᠠᠭᠰᠠᠨ ᠪᠢᠯᠡ᠃ ᠪᠢ ᠳᠥᠬᠥᠮᠬᠡᠨ ᠣᠷᠣᠢ ᠶ᠋ᠢᠨ ᠬᠠᠭᠤᠯᠠ ᠬᠢᠵᠦ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠵᠣᠭᠣᠭᠯᠠᠭᠠᠳ᠂ ᠤᠳᠠᠯ ᠦᠭᠡᠢ ᠳᠡᠷᠡ ᠲᠣᠯᠣᠭᠠᠢ ᠨᠡᠢᠯᠡᠭᠦᠯᠪᠡ᠃ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠪᠡᠷ ᠫᠠᠪᠯᠤ ᠪᠢᠳᠡᠨ ᠢ᠋ ᠦᠢᠮᠡᠭᠦᠯᠦᠨ ᠰᠡᠷᠡᠭᠡᠪᠡ᠃ ᠲᠡᠷᠡ ᠪᠡᠷ ᠬᠠᠷᠢ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠴᠢᠰᠤ ᠰᠤᠷᠤᠭᠴᠢ ᠰᠢᠮᠠᠭᠤᠯ ᠤ᠋ᠳ ᠢ᠋ ᠤᠰᠠᠳᠬᠠᠵᠤ ᠪᠠᠢᠭᠠ ᠠᠵᠢ᠃
ᠮᠠᠷᠭᠠᠰᠢ ᠶ᠋ᠢᠨ ᠬᠢᠨᠢ ᠬᠠᠷᠠ ᠥᠷᠯᠥᠭᠡ ᠪᠡᠷ ᠪᠢᠳᠡ ᠬᠥᠳᠡᠯᠦᠭᠰᠡᠨ ᠪᠥᠭᠡᠳ ᠳᠡᠮᠡᠢ ᠴᠦ᠍ ᠤᠳᠠᠯ ᠦᠭᠡᠢ ᠴᠠᠭᠠᠨ ᠬᠦᠷᠢᠶᠡᠨ ᠦ᠌ ᠰᠦᠮᠡ ᠶ᠋ᠢᠨ ᠴᠠᠭᠠᠨ ᠬᠦᠷᠢᠶᠡ ᠶ᠋ᠢ ᠣᠯᠵᠤ ᠬᠠᠷᠠᠪᠠ᠃ ᠪᠢᠳᠡᠨ ᠢ᠋ ᠯᠠᠷᠰᠣᠨ ᠯᠤᠭᠠ ᠴᠠᠢ ᠶ᠋ᠢᠨ ᠰᠢᠷᠡᠭᠡᠨᠡ ᠬᠠᠭᠤᠴᠢᠯᠠᠬᠤ ᠵᠠᠭᠤᠷᠠ ᠨᠢᠭᠡ ᠮᠣᠩᠭᠣᠯ ᠥᠷᠥᠭᠡᠨᠡ ᠮᠡᠨᠳᠦᠴᠢᠯᠡᠨ ᠣᠷᠣᠵᠤ ᠢᠷᠡᠯᠡ᠃ ᠲᠡᠷᠡ ᠯᠠᠷᠰᠣᠨ ᠯᠤᠭᠠ ᠨᠡᠯᠢᠶᠡᠳ ᠶᠠᠷᠢᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠯᠡᠷᠰᠣᠨ ᠪᠢᠳᠡᠨ ᠳ᠋ᠦ᠍ ᠬᠠᠨᠳᠤᠵᠤ :
— ᠲᠠᠨᠤᠰ ᠵᠠᠪᠰᠠᠷ ᠲᠤ᠌ ᠬᠣᠨᠣᠭᠰᠠᠨ ᠶᠤᠮ ᠤᠤ ? ᠭᠡᠵᠦ ᠠᠰᠠᠭᠤᠯᠠ᠃
— ᠲᠡᠢᠮᠦ ᠠ᠋᠂ ᠳᠠᠬᠢᠵᠤ ᠲᠡᠨᠳᠡ ᠯᠠ ᠬᠣᠨᠣᠭᠯᠠᠬᠤ ᠦᠭᠡᠢ ᠭᠡᠵᠦ ᠫᠠᠪᠯᠥ᠌ ᠬᠠᠷᠢᠭᠤᠯᠪᠠ᠃
— ᠲᠡᠨᠳᠡ ᠴᠡᠷᠢᠭ ᠪᠠᠢᠭᠠ ᠦᠭᠡᠢ ᠤᠤ ? ᠭᠡᠵᠦ ᠯᠠᠷᠰᠤᠨ ᠢ᠋ ᠳᠠᠬᠢᠨ ᠠᠰᠠᠭᠤᠬᠤ ᠳ᠋ᠤ᠌ ᠪᠢ᠄
— ᠪᠠᠢᠬᠤ ᠦᠭᠡᠢ᠂ ᠵᠥᠪᠬᠡᠨ ᠬᠡᠳᠦᠨ ᠬᠥᠭᠰᠢᠨ ᠬᠢᠲᠠᠳ ᠯᠠ ᠪᠠᠢᠭᠰᠠᠨ ᠭᠡᠯᠡ᠃
ᠯᠠᠷᠰᠣᠨ ᠳᠠᠬᠢᠭᠠᠳ ᠯᠠ ᠲᠡᠷᠡ ᠮᠣᠩᠭᠣᠯ ᠲᠠᠢ ᠶᠠᠷᠢᠯᠴᠠᠵᠤ ᠭᠠᠷᠪᠠ᠃ ᠲᠡᠷᠡ ᠮᠣᠩᠭᠣᠯ ᠢ᠋ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠯᠠᠷᠰᠣᠨ:
— ᠲᠠ ᠨᠠᠷ ᠴᠤ᠌ ᠦᠨᠡᠬᠡᠷ ᠠᠵᠠ ᠪᠤᠶᠠᠨ ᠲᠠᠢ ᠬᠥᠮᠦᠰ ᠪᠠᠢᠨᠠ ᠳᠠ ! ᠲᠠ ᠨᠠᠷ ᠢ᠋ ᠬᠦᠷᠬᠦ ᠡᠴᠡ ᠡᠮᠦᠨᠡᠬᠡᠨ ᠵᠠᠪᠰᠠᠷ ᠳᠡᠭᠡᠷᠡᠮᠴᠢᠳ ᠦ᠋ᠨ ᠭᠠᠷ ᠲᠤ᠌ ᠦᠭᠳᠡᠵᠦ ᠳᠡᠭᠡᠷᠡᠮᠳᠡᠭᠳᠡᠵᠡᠢ᠃ ᠰᠠᠶᠢᠬᠠᠨ ᠭᠠᠷᠤᠭᠰᠠᠨ ᠮᠠᠨ ᠤ᠋ ᠵᠠᠯᠠᠭᠤ ᠠᠮᠵᠢᠵᠤ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠰᠠᠨ ᠢ᠋ᠶ᠋ᠠᠷ ᠳᠤᠲᠠᠭᠠᠵᠤ ᠭᠠᠷᠴᠤ ᠢᠷᠡᠭᠰᠡᠨ ᠶᠦᠮ ᠪᠠᠢᠨᠠ ᠭᠡᠯᠡ᠃
ᠪᠢᠳᠡ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤᠨ ᠦᠭᠡᠢ ᠨᠢᠭᠡ ᠨᠢᠭᠡᠨ ᠢ᠋ᠶ᠋ᠡᠨ ᠬᠠᠷᠠᠵᠤ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠠᠫᠯᠥ᠌᠄
— ᠲᠡᠳᠡ ᠪᠦᠬᠦᠨ ᠢ᠋ ᠯᠠᠪ ᠠᠪᠴᠤ ᠶᠠᠪᠤᠬᠤ ᠦᠭᠡᠢ ᠯᠡ ᠳᠡ᠂ ᠤᠨᠠᠭᠠ ᠰᠠᠷᠪᠠ ᠦᠯᠡᠳᠡᠭᠡᠨᠡ ᠪᠢᠵᠡ ᠭᠡᠵᠦ ᠳᠦᠳᠦᠨᠡᠪᠡ᠃
ᠯᠠᠷᠰᠣᠨ ᠤ᠋ ᠬᠡᠯᠡᠬᠦ ᠪᠡᠷ ᠦᠳᠡᠰᠢ ᠪᠣᠯᠬᠤ ᠠ᠋ᠴᠠ ᠡᠮᠦᠨᠡ ᠭᠡᠨᠡᠳᠲᠡ ᠨᠢᠭᠡ ᠪᠦᠯᠦᠭ ᠵᠡᠪᠰᠡᠭᠲᠦ ᠮᠣᠷᠢᠲᠠᠨ ᠳᠠᠭᠠᠷᠢᠨ ᠢᠷᠡᠵᠡᠢ᠃
— ᠮᠥᠨ ᠤᠤᠯ ᠶᠣᠰᠣᠭᠠᠷ ᠰᠠᠶᠢᠬᠢ ᠴᠡᠷᠢᠭ ᠦ᠋ᠳ ᠨᠢ ᠬᠠᠮᠤᠭ ᠤ᠋ᠨ ᠤᠷᠢᠳ ᠵᠢᠭᠤᠲᠠᠨ᠂ ᠳᠠᠷᠠᠭᠠ ᠨᠢ ᠪᠠᠭᠠ ᠰᠠᠬᠠ ᠦᠨᠡ ᠪᠡᠨᠡ ᠲᠡᠢ ᠶᠠᠭᠤᠮᠠ ᠪᠠᠨ ᠠᠪᠤᠭᠰᠠᠨ ᠬᠢᠲᠠᠳ ᠤ᠋ᠳ ᠬᠥᠳᠡᠭᠡ ᠤᠷᠤᠭᠤ ᠳᠤᠲᠠᠭᠠᠵᠤ᠂ ᠳᠡᠭᠡᠷᠡᠮᠴᠢᠳ ᠢ᠋ ᠶᠠᠪᠤᠨ ᠶᠠᠪᠤᠲᠠᠯᠠ ᠲᠡᠨᠳᠡ ᠪᠡᠨ ᠬᠦᠯᠢᠶᠡᠳᠡᠭ ᠶᠦᠮ ᠭᠡᠯᠡ᠃
— ᠦᠨᠡᠬᠡᠷ ᠰᠠᠢᠨ ᠡᠬᠢᠯᠡᠯᠲᠡ ᠪᠣᠯᠤᠯᠠ᠂ ᠳᠠᠷᠠᠭᠠᠴᠢ ᠪᠠᠷ ᠴᠦ᠍ ᠡᠨᠡ ᠮᠡᠲᠦ ᠠᠶᠤᠯ ᠦᠭᠡᠢ ᠲᠤᠭᠤᠯᠬᠤ ᠪᠣᠯᠲᠤᠭᠠᠢ ! ᠭᠡᠵᠦ ᠺᠸᠯᠯᠸᠷ ᠢ᠋ ᠶᠠᠷᠢᠭᠰᠠᠨ ᠤ᠋ ᠳᠠᠷᠠᠭᠠ ᠪᠢᠳᠡ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠡᠬᠢ ᠲᠠᠢᠰᠠᠨ ᠳᠡᠭᠡᠷᠡ ᠨᠠᠷᠠᠨ ᠳ᠋ᠤ᠌ ᠡᠭᠡᠭᠡᠭᠳᠡᠨ ᠤᠳᠠᠲᠠᠯᠠ ᠰᠠᠭᠤᠪᠠ ( ᠵᠢᠷᠤᠭ 16 ) ᠃ ᠬᠠᠷᠠᠭᠠ ᠲᠠᠯᠪᠢᠨ ᠰᠢᠷᠳᠡᠬᠦ ᠳ᠋ᠦ᠍ ᠵᠤᠨ ᠤ᠋ ᠪᠣᠷᠣᠭᠠᠨ ᠠ᠋ᠴᠠ ᠪᠣᠯᠵᠤ ᠲᠠᠯᠠ ᠨᠤᠲᠤᠭ ᠨᠣᠮᠢᠨ ᠨᠣᠭᠣᠭᠠᠨ ᠥᠩᠭᠡ ᠪᠡᠷ ᠪᠦᠲᠡᠭᠡᠭᠳᠡᠨ᠂ ᠦᠬᠡᠷ ᠬᠣᠨᠢᠳ ᠪᠥᠭᠡᠷᠡᠩᠬᠡᠢ ᠪᠣᠯᠲᠠᠯᠠ ᠲᠠᠷᠭᠤᠯᠠᠵᠠᠢ᠃ ᠲᠡᠮᠡᠭᠡᠨ ᠤ ᠪᠦᠬᠦ ᠨᠢ ᠬᠠᠪᠤᠷ ᠴᠠᠭ ᠤ᠋ᠨ ᠬᠢ ᠰᠢᠭ ᠨᠢᠷᠤᠭᠤᠨ ᠤ᠋ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠳᠡᠭᠦᠵᠢᠯᠡᠭᠳᠡᠬᠦ ᠪᠠᠨ ᠪᠣᠯᠢᠵᠤ᠂ ᠪᠦᠷ ᠪᠣᠰᠤᠭᠠ ᠪᠣᠯᠵᠠᠢ᠃ ᠬᠣᠨᠢᠳ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠨ ᠠ᠋ᠴᠠ ᠦᠷᠭᠦᠬᠦ ᠪᠦᠷᠢ ᠵᠦᠯᠭᠡᠨ ᠳᠡᠭᠡᠭᠦᠷ ᠭᠦᠶᠦᠯᠳᠦᠬᠦ ᠪᠥᠭᠡᠳ ᠰᠡᠭᠦᠯ ᠨᠢ ᠦᠵᠡᠮᠵᠢ ᠮᠠᠭᠤᠲᠠᠢ ᠤᠨᠵᠢᠭᠢᠨᠠᠬᠤ ᠠᠵᠢ᠃
ᠬᠦᠷᠡᠩ ᠤᠯᠠᠭᠠᠨ ᠥᠩᠭᠡ ᠲᠡᠢ ᠥᠷᠭᠡᠨ ᠰᠠᠨᠳᠠᠯᠢ ᠳᠡᠭᠡᠷᠡ ᠰᠠᠭᠠᠲᠠᠭᠰᠠᠨ ᠯᠠᠷᠰᠣᠨ ᠳᠤᠷᠠᠨ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠣᠢᠷᠠ ᠣᠷᠴᠢᠮ ᠢ᠋ ᠬᠠᠷᠠᠭᠤᠯᠳᠠᠭᠠᠳ:
— ᠬᠣᠶᠠᠷ ᠦᠬᠡᠷ ᠲᠡᠷᠭᠡ ᠵᠡᠭᠦᠨᠰᠢᠯᠡᠵᠦ ᠪᠠᠢᠨᠠ᠂ ᠳᠣᠪᠣᠴᠠᠭ ᠤ᠋ᠨ ᠴᠠᠭᠠᠨᠠ ᠤᠷᠭᠠ ᠲᠠᠢ ᠠᠳᠤᠭᠤᠴᠢᠨ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠲᠠ ᠨᠠᠷ ᠲᠡᠷᠡ ᠡᠭᠦᠯᠡᠨ ᠰᠡᠭᠦᠳᠡᠷ ᠦ᠋ᠨ ᠴᠠᠭᠠᠳᠤᠬᠢ ᠠᠳᠤᠭᠤᠨ ᠰᠦᠷᠦᠭ ᠢ᠋ ᠬᠠᠷᠠᠵᠤ ᠪᠠᠢᠬᠠ ᠤᠤ ? ᠭᠡᠯᠡ᠃ ᠲᠡᠭᠦᠨ ᠦ᠌ ᠵᠢᠷᠠᠨ ᠵᠢᠯ ᠦ᠋ᠨ ᠬᠤᠷᠴᠠ ᠬᠠᠷᠠᠭᠠᠨ ᠠ᠋ᠴᠠ ᠮᠤᠯᠲᠤᠷᠠᠬᠤ ᠵᠦᠢᠯ ᠭᠡᠵᠦ ᠠᠯᠠᠭᠠ ᠠᠵᠤᠭᠤ᠃
ᠪᠢᠳᠡ ᠦᠷᠭᠦᠯᠵᠢᠯᠡᠨ ᠠᠶᠠᠯᠠᠬᠤ ᠲᠤᠬᠠᠢ ᠶᠠᠷᠢᠯᠴᠠᠯᠠ᠃ ᠯᠠᠷᠰᠣᠨ ᠠᠶᠤᠯ ᠦᠭᠡᠢ ᠶ᠋ᠢᠨ ᠲᠠᠯᠠ ᠪᠠᠷ ᠥᠴᠦᠬᠡᠨ ᠴᠦ᠍ ᠰᠠᠨᠠᠭᠠᠰᠢᠷᠠᠭᠰᠠᠨ ᠶᠠᠩᠵᠤ ᠦᠭᠡᠢ᠂ ᠬᠠᠷᠢᠨ ᠡᠰᠡᠷᠭᠦ ᠪᠡᠷ ᠪᠢᠳᠡᠨ ᠢ᠋ ᠠᠶᠠᠯᠠᠯ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠭᠦᠯᠬᠦ ᠶ᠋ᠢ ᠵᠣᠷᠢᠭᠵᠢᠭᠤᠯᠵᠤ ᠪᠠᠢᠪᠠ᠃
— ᠲᠤᠯᠤᠨ ᠨᠠᠭᠤᠷ ᠲᠤ᠌ ᠶᠠᠮᠠᠷ ᠪᠠᠢᠭᠠ ᠶ᠋ᠢ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ᠂ ᠬᠥᠮᠦᠰ ᠦ᠋ᠨ ᠶᠠᠷᠢᠬᠤ ᠶ᠋ᠢ ᠰᠣᠨᠣᠰᠬᠤ ᠳ᠋ᠤ᠌ ᠶᠠᠫᠣᠨᠴᠤᠳ ᠲᠡᠨᠳᠡ ᠬᠦᠷᠦᠭᠰᠡᠨ ᠪᠠᠢᠮᠠᠷ ᠶᠤᠮ ᠭᠡᠵᠦ ᠯᠠᠷᠰᠣᠨ ᠶᠠᠷᠢᠯᠠ᠃
ᠭᠡᠬᠦ ᠳ᠋ᠦ᠍ ᠪᠢᠳᠡ ᠵᠠᠮᠴᠢᠯᠠᠭᠴᠢ ᠦᠭᠡᠢ ᠪᠡᠷ ᠡᠨᠡ ᠠᠶᠠᠯᠠᠯ ᠢ᠋ ᠬᠢᠬᠦ ᠳ᠋ᠦ᠍ ᠬᠡᠴᠡᠭᠦᠦ ᠯᠡ ᠪᠠᠢᠪᠠ᠃
— ᠨᠠᠢ᠍ᠮᠠ ᠶ᠋ᠢᠨ ᠠᠭᠤᠯᠠ ᠬᠦᠷᠲᠡᠯᠡ ᠵᠠᠮ ᠨᠢ ᠠᠮᠠᠷᠬᠠᠨ ᠣᠯᠳᠠᠨᠠ᠂ ᠲᠡᠭᠦᠨ ᠡᠴᠡ ᠴᠠᠭᠠᠰᠢ ᠠᠭᠤᠯᠠᠨ ᠳ᠋ᠤ᠌ ᠬᠠᠷᠢᠨ ᠲᠥᠭᠡᠷᠢᠵᠦ ᠮᠡᠳᠡᠨᠡ ᠰᠢᠦ ᠭᠡᠳ ᠯᠠᠷᠰᠤᠨ ᠨᠡᠯᠢᠶᠡᠳ ᠪᠣᠳᠣᠯᠬᠢᠯᠠᠭᠰᠠᠨ ᠢ᠋ᠶ᠋ᠠᠨ᠄
— ᠷᠠᠰᠢ ᠯᠠ ᠲᠠ ᠨᠠᠷ ᠲᠠᠢ ᠴᠣᠭ ᠶᠠᠪᠤᠬᠤ ᠪᠣᠯᠤᠯᠲᠠᠢ᠂ ᠲᠡᠷᠡ ᠴᠦ᠍ ᠵᠠᠮ ᠢ᠋ ᠶᠣᠰᠣᠲᠠᠢ ᠰᠠᠢᠨ ᠮᠡᠳᠡᠨᠡ ᠳᠠ ᠭᠡᠯᠡ᠃
— ᠷᠠᠰᠢ ? ᠳᠡᠭᠡᠷᠡ ᠤᠳᠠᠭᠠ ᠪᠢᠳᠡᠨ ᠢ᠋ ᠳᠠᠸᠠ ᠬᠦᠩ ᠦ᠋ᠨ ᠳ᠋ᠦ᠍ ᠬᠦᠷᠬᠦ ᠳ᠋ᠦ᠍ ᠵᠠᠮᠴᠢᠯᠠᠳᠠᠭ ᠰᠥᠨᠢᠳ ᠦ᠋ᠨ ᠯᠠᠮᠠ ᠤᠤ ?
— ᠶᠠᠭ ᠮᠥᠨ᠂ ᠭᠡᠰᠡᠨ ᠴᠦ᠍ ᠲᠡᠷᠡ ᠰᠥᠨᠢᠳ ᠬᠥᠮᠦᠨ ᠪᠢᠰᠢ᠂ ᠠᠷᠤ ᠮᠣᠩᠭᠣᠯ ᠠ᠋ᠴᠠ ᠢᠷᠡᠭᠰᠡᠨ᠃ ᠲᠡᠭᠦᠨ ᠦ᠌ ᠠᠳᠤᠭᠤ ᠬᠣᠨᠢᠳ ᠨᠢ ᠪᠠᠷᠠᠭᠤᠨ ᠵᠦᠭ ᠲᠦ᠍ ᠪᠠᠢᠭᠠ ᠪᠠᠳᠤᠬᠠᠭᠠᠯᠭᠠ ᠣᠷᠴᠢᠮ ᠪᠠᠢᠭᠠ ᠶᠤᠮ᠃ ᠲᠡᠷᠡ ᠴᠦ᠍ ᠰᠢᠨᠡ ᠪᠡᠯᠴᠢᠭᠡᠷ ᠡᠷᠢᠵᠦ ᠶᠡᠬᠡ ᠤᠳᠠᠭᠰᠠᠨ ᠰᠢᠦ ᠳᠡ !
ᠪᠢᠳᠡᠨ ᠦ᠌ ᠵᠥᠪᠳᠡᠯᠴᠡᠭᠡᠨ ᠦ᠌ ᠦᠶᠡ ᠳ᠋ᠦ᠍ ᠵᠣᠶᠸᠯ ᠡᠸᠷᠢᠭᠰᠣᠨ ᠬᠦᠷᠴᠦ ᠢᠷᠡᠯᠡ᠃ ᠲᠡᠷᠡ ᠡᠷᠬᠡᠪᠰᠢ ᠲᠣᠢᠨ ᠭᠦᠰᠢ ᠰᠦᠮᠡ ᠶ᠋ᠢᠨ ᠣᠢᠷᠠᠯᠴᠠᠭᠠ ᠪᠠᠢᠭᠠ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠡᠪᠡᠳᠴᠢᠲᠡᠢ ᠱᠠᠰᠢᠨᠲᠠᠨ ᠢ᠋ ᠡᠷᠭᠢᠵᠦ ᠦᠵᠡᠬᠦ ᠬᠡᠷᠡᠭᠲᠡᠢ ᠲᠤᠯᠠ ᠪᠢᠳᠡᠨ ᠢ᠋ ᠬᠠᠮᠲᠤ ᠶᠠᠪᠤᠬᠤ ᠶ᠋ᠢ ᠤᠷᠢᠯᠠ᠃ ᠵᠠᠮ ᠵᠠᠭᠤᠷᠠ ᠲᠡᠷᠡ ᠨᠢᠭᠡ ᠶᠠᠳᠠᠭᠤᠬᠠᠨ ᠠᠢᠯ ᠤ᠋ᠨ ᠡᠮᠦᠨᠡ ᠮᠠᠰᠢᠨ ᠢ᠋ ᠵᠣᠭᠰᠣᠭᠠᠪᠠ᠃ ᠭᠡᠷ ᠦ᠋ᠨ ᠡᠵᠡᠨ ᠪᠣᠯᠤᠯᠲᠠᠢ ᠨᠢᠭᠡᠨ ᠡᠪᠦᠭᠡᠨ ᠪᠢᠳᠡᠨ ᠢ᠋ ᠭᠡᠷ ᠲᠡᠭᠡᠨ ᠤᠷᠢᠯᠠ᠃ ᠲᠡᠭᠦᠨ ᠦ᠌ ᠡᠮᠡᠭᠡᠨ ᠭᠬᠢᠷᠲᠦᠭᠰᠡᠨ ᠨᠠᠪᠲᠠᠷᠬᠠᠢ ᠲᠡᠷᠯᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠪᠠᠷ ᠭᠤᠷᠪᠠᠨ ᠮᠣᠳᠣᠨ ᠠᠶᠠᠭᠠ ᠶ᠋ᠢ ᠠᠷᠴᠢᠭᠠᠳ ᠰᠦ ᠲᠡᠢ ᠬᠠᠯᠠᠭᠤᠨ ᠴᠠᠢ ᠠᠶᠠᠭᠠᠯᠠᠪᠠ᠃ ᠫᠠᠪᠯᠤ ᠭᠠᠭᠴᠠᠬᠠᠨ ᠪᠠᠯᠭᠤᠭᠠᠳ ᠪᠠᠷᠠᠭᠠᠵᠤ᠂ ᠳᠣᠣᠷᠠ ᠪᠠᠨ ᠶᠠᠭ ᠯᠠ ᠭᠠᠰᠢᠭᠤᠨ ᠠᠯᠢᠮᠠ ᠬᠠᠵᠠᠭᠰᠠᠨ ᠮᠡᠲᠦ ᠴᠢᠷᠠᠢ ᠭᠠᠷᠭᠠᠨ ᠦᠷᠴᠢᠯᠵᠡᠪᠡ᠃
— ᠡᠨᠡ ᠱᠥᠯᠥ ᠰᠢᠭ ᠤᠮᠳᠠᠭᠠ ᠶ᠋ᠢ ᠠᠶᠠᠭᠠ ᠲᠠᠢ ᠨᠢ ᠤᠤᠭᠤᠬᠤ ᠦᠭᠡᠢ ᠦᠯᠡᠳᠡᠭᠡᠵᠦ ᠪᠣᠯᠳᠠᠭ ᠤᠤ ? ᠭᠡᠵᠦ ᠫᠡᠸᠦ᠋ᠯ ᠬᠢᠯᠮᠧᠷ ᠢ᠋ ᠦᠯᠦ ᠢᠲᠡᠭᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠠᠩᠭ᠌ᠯᠢ ᠪᠠᠷ ᠠᠰᠠᠭᠤᠬᠤ ᠪᠠᠷ ᠪᠢ ᠳᠣᠣᠷᠠ ᠨᠢ :
— ᠪᠣᠯᠬᠤ ᠦᠭᠡᠢ ᠰᠢᠦ! ᠮᠣᠩᠭᠣᠯ ᠶᠣᠰᠣ ᠪᠠᠷ ᠪᠣᠯ ᠪᠢᠳᠡᠨ ᠴᠠᠢ ᠪᠠᠨ ᠤᠤᠭᠤᠵᠤ ᠪᠠᠷᠠᠭᠠᠬᠤ ᠶᠣᠰᠣᠲᠠᠢ ᠭᠡᠯᠡ᠃
ᠡᠨᠡ ᠬᠣᠭᠣᠷᠣᠠᠨᠳᠤ ᠡᠸᠷᠢᠺᠰᠣᠨ ᠲᠡᠷᠡ ᠡᠮᠡᠭᠡᠨ ᠲᠡᠢ ᠡᠪᠡᠳᠴᠢᠨ ᠦ᠌ ᠬᠢᠨᠢ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠪᠠᠷᠠᠭᠠᠳ᠂ ᠪᠠᠭᠠ ᠤᠳᠠᠰᠬᠢᠭᠰᠡᠨ ᠢ᠋ᠶ᠋ᠡᠨ ᠡᠮ ᠦ᠋ᠨ ᠪᠣᠭᠴᠣ ᠡᠴᠡ ᠪᠡᠨ ᠵᠢᠵᠢᠭ ᠰᠢᠯ ᠯᠣᠩᠬᠣ ᠲᠠᠢ ᠡᠮ ᠭᠠᠷᠭᠠᠭᠠᠳ ᠬᠦᠵᠦᠭᠦᠦ ᠪᠡᠷ ᠨᠢ ᠬᠠᠭᠠᠯᠤᠭᠠᠳ ᠲᠠᠷᠢᠯᠭᠠ ᠶ᠋ᠢᠨ ᠵᠡᠭᠦᠦ ᠳ᠋ᠡᠭᠡᠨ ᠰᠣᠷᠣᠭᠤᠯᠤᠯᠠ᠃ ᠡᠮᠡᠭᠡᠨ ᠭᠠᠵᠠᠷ ᠳᠡᠭᠡᠷᠡᠬᠢ ᠦᠬᠡᠷ ᠦ᠋ᠨ ᠠᠳᠠᠰᠬᠠᠨ ᠳᠡᠭᠡᠷᠡ ᠬᠡᠪᠲᠡᠵᠦ᠂ ᠡᠪᠦᠭᠡᠨ ᠨᠢ ᠲᠡᠷᠯᠢᠭ ᠢ᠋ ᠨᠢ ᠤᠯᠠᠢᠮᠠ ᠴᠡᠢᠮᠡ ᠢᠷᠡᠵᠦ ᠥᠭᠪᠡ᠃
— ᠪᠢᠳᠡ ᠭᠠᠷᠬᠤ ᠯᠠ ᠬᠡᠷᠡᠭᠲᠡᠢ ᠪᠣᠯᠵᠠᠢ ᠭᠡᠵᠦ ᠺᠢᠯᠮᠧᠷ ᠥᠨᠳᠡᠭᠡᠨᠡᠬᠦ ᠪᠡᠷ ᠨᠢ ᠪᠢ :
— ᠣᠷᠣᠨ ᠳ᠋ᠠᠭᠠᠨ ᠪᠠᠢ ! ᠭᠡᠵᠦ ᠬᠡᠯᠡᠪᠡ᠃ ᠡᠨᠡᠬᠡᠨ ᠬᠣᠭᠣᠷᠣᠨᠳᠣ ᠵᠡᠭᠦᠦ ᠲᠠᠷᠢᠭᠠᠳ ᠳᠠᠭᠤᠰᠠᠭᠴᠢᠬᠠᠭᠰᠠᠨ ᠪᠠᠢᠪᠠ᠃
— ᠶᠠᠮᠠᠷ ᠡᠪᠡᠳᠴᠢᠨ ᠪᠣᠯᠪᠠ ᠳᠠ ? ᠭᠡᠵᠦ ᠺᠢᠯᠮᠧᠷ ᠠᠰᠠᠭᠤᠬᠤ ᠳ᠋ᠤ᠌ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠮᠠᠨᠢ :
— ᠣᠣ ! ᠮᠢᠨᠦ ᠦᠵᠡᠬᠦ ᠪᠡᠷ ᠥᠩᠭᠡᠨ ᠡᠪᠡᠳᠴᠢᠨ ᠬᠦᠷᠦᠭᠰᠡᠨ ᠰᠢᠭ ᠯᠡ ᠪᠠᠢᠨᠠ ᠭᠡᠵᠦ ᠠᠯᠭᠤᠷᠬᠠᠨ ᠶᠠᠷᠢᠬᠤ ᠳ᠋ᠤ᠌ :
— ᠶᠠᠭᠤ ? ᠭᠡᠵᠦ ᠠᠭᠤᠷᠲᠠᠢ ᠬᠠᠰᠬᠢᠷᠤᠭᠰᠠᠨ ᠺᠸᠯᠯᠸᠷ :
— ᠡᠨᠡ ᠬᠥᠭᠰᠢᠨ ᠴᠢᠨᠢ ᠲᠡᠷᠡ ᠪᠤᠵᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠶᠠᠭᠠ ᠶ᠋ᠢ ᠮᠢᠨᠢ ᠠᠷᠴᠢᠭᠰᠠᠨ ᠰᠢᠦ! ᠭᠡᠳ ᠳᠣᠣᠷᠠ ᠪᠠᠨ ᠭᠠᠷ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠭᠠᠷᠭᠠᠨ ᠠᠮᠠ ᠭᠠᠷ ᠢ᠋ᠶ᠋ᠠᠨ ᠠᠷᠴᠢᠵᠤ ᠭᠠᠷᠪᠠ᠃ ᠡᠭᠦᠨ ᠢ᠋ ᠬᠠᠷᠠᠭᠰᠠᠨ ᠡᠸᠷᠢᠺᠰᠤᠨ ᠲᠡᠭᠦᠨ ᠢ᠋ ᠲᠠᠢᠪᠤᠰᠢᠷᠠᠭᠤᠯᠵᠤ :
— ᠡᠨᠡ ᠴᠢᠨᠢ ᠲᠡᠢᠮᠦ ᠠᠶᠤᠮᠰᠢᠭᠲᠠᠢ ᠶᠠᠭᠤᠮᠠ ᠪᠢᠰᠢ ᠰᠢᠦ ! ᠪᠢ ᠮᠥᠨ ᠬᠣᠷᠢᠨ ᠲᠠᠪᠤᠨ ᠵᠢᠯ ᠦ᠋ᠨ ᠲᠤᠷᠰᠢ ᠡᠳᠦᠷ ᠪᠣᠯᠭᠠᠨ ᠢᠩᠭᠢᠵᠦ ᠡᠮᠴᠢᠯᠡᠭᠡᠳ ᠪᠠᠰᠠ ᠡᠷᠡᠭᠦᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠭᠰᠠᠭᠠᠷ ᠭᠡᠯᠡ᠃
ᠮᠣᠩᠭᠣᠯ ᠤ᠋ᠨ ᠵᠣᠴᠢᠭ᠍ᠰᠠᠭ ᠵᠠᠩ ᠠᠭᠠᠯᠢ ᠶ᠋ᠢᠨ ᠲᠤᠬᠠᠢ ᠰᠣᠨᠢᠷᠬᠠᠯ ᠠᠳᠠ ᠬᠦᠷᠦᠭᠡᠳ ᠨᠠᠮᠳᠠᠵᠤ ᠢᠷᠡᠯᠡ᠃ ᠪᠢᠳᠡᠨ ᠢ᠋ ᠰᠦᠮᠡ ᠳ᠋ᠡᠬᠢ ᠡᠪᠡᠳᠴᠢᠲᠡᠨ ᠳᠡᠭᠡᠷᠡ ᠢᠷᠡᠭᠡᠳ᠂ ᠰᠦᠮᠡ ᠳᠤᠭᠠᠩ᠂ ᠬᠦᠷᠢᠶᠡ ᠬᠠᠰᠢᠶᠠ ᠶ᠋ᠢ ᠲᠣᠭᠣᠷᠢᠨ ᠦᠵᠡᠭᠰᠡᠨ ᠦ᠌ ᠳᠠᠷᠠᠭᠠ ᠭᠡᠷ ᠲᠦ᠍ ᠣᠷᠣᠬᠤ ᠳ᠋ᠤ᠌ ᠺᠸᠯᠯᠸᠷ ᠦ᠋ᠨ ᠡᠮᠦᠨᠡ ᠪᠠᠰᠠ ᠨᠢᠭᠡ ᠠᠶᠠᠬᠠ ᠰᠦ ᠲᠡᠢ ᠴᠠᠢ ᠲᠠᠯᠪᠢᠭᠳᠠᠯᠠ᠃ ᠲᠡᠷᠡ ᠨᠠᠮᠤᠭᠤᠬᠠᠨ ᠢ᠋ᠶ᠋ᠠᠷ ᠲᠡᠭᠦᠨ ᠢ᠋ ᠬᠦᠯᠢᠶᠡᠨ ᠠᠪᠴᠤ :
— ᠮᠢᠨᠦ ᠰᠦ ᠲᠡᠢ ᠴᠠᠢ ᠶ᠋ᠢᠨ ᠲᠤᠬᠠᠢ ᠮᠢᠨᠦ ᠠᠩᠬᠠᠨ ᠤ᠋ ᠣᠢᠯᠠᠭᠠᠯᠲᠠ ᠡᠨᠡ ᠪᠣᠯᠤᠯᠠ᠃ ᠮᠥᠨ ᠴᠦ᠍ ᠮᠢᠨᠦ ᠦᠯᠡᠳᠡᠭᠰᠡᠨ ᠨᠠᠰᠤᠨ ᠳ᠋ᠤ᠌ ᠬᠡᠷᠡᠭᠯᠡᠵᠦ ᠭᠦᠢᠴᠡᠬᠦ ᠲᠤᠷᠰᠢᠯᠭᠠ ᠮᠥᠨ᠃ ᠲᠦᠷᠦᠭᠦᠨ ᠦ᠌ ᠡᠮᠴᠢᠯᠡᠭᠡ ᠴᠦ᠍ ᠭᠡᠰᠡᠨ ᠡᠨᠡ ᠬᠦ᠌ ᠬᠣᠯᠢᠭᠰᠠᠨ ᠤᠮᠳᠠᠭᠠ ᠲᠠᠢ ᠠᠳᠠᠯᠢᠬᠠᠨ ᠵᠡᠭᠦᠳᠦᠨ ᠳ᠋ᠦ᠍ ᠴᠦ᠍ ᠣᠷᠣᠮᠠᠷ ᠦᠭᠡᠢ ᠤᠴᠢᠷ ᠰᠢᠦ ᠳᠡ! ᠮᠠᠨ ᠤ᠋ ᠬᠢᠨ ᠲᠡᠨᠳᠡ ᠡᠭᠦᠨ ᠢ᠋ ᠶᠠᠷᠢᠬᠤ ᠶᠤᠮ ᠪᠣᠯ ᠬᠡᠨ ᠴᠦ᠍ ᠪᠢᠳᠡᠨ ᠢ᠋ ᠢᠲᠡᠭᠡᠬᠦ ᠦᠭᠡᠢ᠃ ᠦᠭᠡᠢ ᠶᠡᠷᠦ ᠨᠢ ᠲᠡᠷᠡ ᠡᠪᠦᠭᠡᠨ ᠶᠡᠬᠡ ᠤᠳᠠᠭᠠᠨ ᠲᠠᠨ ᠳ᠋ᠤ᠌ ᠶᠠᠷᠢᠭᠠᠳ ᠪᠠᠢᠭᠰᠠᠨ ᠨᠢ ᠴᠣᠬᠣᠮ ᠶᠠᠭᠤ ᠠᠪᠤᠨᠠ ᠭᠡᠳ ᠪᠠᠢᠭᠠ ᠪᠣᠯ ? ᠭᠡᠵᠦ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠠ᠋ᠴᠠ ᠠᠰᠠᠭᠤᠪᠠ᠃
— ᠲᠡᠷᠡ ᠪᠠᠰᠠ ᠨᠢᠭᠡ ᠲᠠᠷᠢᠶᠠ ᠬᠢᠯᠭᠡᠭᠡᠳ ᠬᠥᠭᠰᠢᠨ ᠢ᠋ᠶ᠋ᠡᠨ ᠬᠤᠷᠳᠤᠨ ᠡᠳᠡᠭᠡᠷᠡᠭᠦᠯᠦᠨᠡ ᠭᠡᠨᠡ᠃ ᠲᠡᠭᠦᠨ ᠦ᠌ ᠡᠨᠡ ᠬᠦ᠌ ᠭᠤᠶᠤᠯᠲᠠ ᠶ᠋ᠢ ᠵᠥᠪᠰᠢᠶᠡᠷᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠬᠥᠭᠰᠢᠨ ᠨᠢ ᠴᠦ᠍ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠮᠣᠷᠳᠠᠴᠢᠬᠠᠨᠠ ᠰᠢᠦ ᠳᠡ ᠭᠡᠵᠦ ᠡᠸᠷᠢᠺᠰᠤᠨ ᠢᠨᠢᠶᠡᠭᠰᠡᠭᠡᠷ ᠶᠠᠷᠢᠪᠠ᠃
— ᠪᠦᠬᠦ ᠡᠮᠴᠢᠯᠡᠭᠡ ᠪᠡᠨ ᠲᠠ ᠦᠨᠡ ᠲᠥᠯᠥᠪᠦᠷᠢ ᠦᠭᠡᠢ ᠬᠢᠳᠡᠭ ᠶᠦᠮ ᠤᠤ ? ᠭᠡᠵᠦ ᠫᠠᠪᠠᠯᠥ᠌ ᠠᠰᠠᠭᠤᠬᠤ ᠳ᠋ᠤ᠌:
— ᠡᠢᠮᠦ ᠶᠠᠳᠠᠭᠤ ᠬᠥᠮᠦᠰ ᠡᠮᠴᠢᠯᠡᠭᠡ ᠶ᠋ᠢᠨ ᠵᠠᠷᠤᠳᠠᠯ ᠢ᠋ᠶ᠋ᠠᠨ ᠥᠭᠴᠦ ᠳᠡᠢᠯᠬᠦ ᠦᠭᠡᠢ ᠶᠦᠮ ᠰᠢᠦ ᠳᠡ !ᠲᠡᠳᠡᠨ ᠳ᠋ᠦ᠍ ᠲᠤᠰᠠᠯᠠᠬᠤ ᠪᠣᠯ ᠮᠢᠨᠦ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠪᠣᠯᠣᠠᠭᠰᠠᠨ ᠤ᠋ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠮᠥᠨ ᠭᠡᠵᠦ ᠬᠠᠷᠢᠭᠤᠯᠪᠠ᠃