ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠨᠢᠭᠡᠳᠦᠭᠡᠷ ᠪᠦᠯᠦᠭ᠂ᠠᠩᠬᠠᠨ ᠤ ᠠᠶᠠᠯᠠᠯ (ᠳᠣᠯᠣᠭᠠ) Сэрүүхэн тал нутаг – <свис> Вальтер Босгард ( Walter Bosshard)- Нэгдүгээр бүлэг・Анхны аялал (7)
484ᠳᠣᠯᠣᠭᠠ ᠂ ᠲᠠᠯᠠ ᠨᠤᠲᠤᠭ ᠲᠠᠬᠢ ᠰᠥᠨᠢ ᠶ᠋ᠢᠨ ᠦᠢᠮᠡᠭᠡᠨ
ᠪᠢᠳᠡ ᠬᠦᠨᠳᠦ ᠢᠰᠡᠭᠡᠢ ᠡᠭᠦᠳᠡ ᠶ᠋ᠢ ᠰᠡᠬᠦᠨ ᠪᠥᠬᠥᠢᠭᠰᠡᠭᠡᠷ ᠭᠡᠷ ᠲᠦ᠍ ᠣᠷᠣᠪᠠ᠃ ᠵᠢᠷᠠᠭᠠᠳ ᠨᠠᠰᠤᠨ ᠤ᠋ ᠬᠥᠷᠥᠰᠥᠯᠢᠭ ᠬᠦᠷᠡᠩ ᠴᠢᠷᠠᠢ ᠲᠠᠢ ᠳᠠᠸᠠ ᠬᠦᠩ ( ᠵᠢᠷᠤᠭ 37 ) ᠬᠠᠭᠤᠴᠢᠨ ᠬᠡᠪᠢᠰ ᠳᠡᠭᠡᠷᠡ ᠰᠠᠭᠤᠵᠤ ᠪᠠᠢᠯᠠ᠃ ᠴᠠᠭᠠᠨ ᠰᠠᠬᠠᠯ᠂ ᠨᠡᠩ ᠴᠦ᠍ ᠡᠷᠡᠦ ᠳᠡᠭᠡᠷᠡᠬᠢ ᠰᠣᠶᠣᠭᠠ ᠰᠠᠬᠠᠯ ᠨᠢ ᠲᠡᠭᠦᠨ ᠦ᠌ ᠶᠡᠷᠦ ᠪᠤᠰᠤ ᠶ᠋ᠢᠨ ᠴᠢᠷᠠᠢ ᠲᠠᠢ ᠨᠢ ᠨᠡᠢᠯᠡᠭᠡᠳ ᠠᠶᠤᠮᠰᠢᠭᠲᠠᠢ ᠲᠥᠷᠥᠭᠳᠡᠯ ᠥᠭᠬᠦ ᠮᠡᠲᠦ ᠪᠠᠢᠪᠠ᠃ ᠠᠷᠠᠰᠤ ᠪᠠᠷ ᠬᠥᠪᠡᠭᠡᠯᠡᠭᠰᠡᠨ ᠣᠷᠣᠢᠪᠴᠢ ᠨᠢ ᠮᠠᠩᠨᠠᠢ ᠶ᠋ᠢ ᠨᠢ ᠳᠠᠷᠤᠵᠠᠢ᠃ ᠳᠡᠭᠡᠷᠡᠬᠢ ᠤᠯᠠᠭᠠᠨ ᠱ᠌ᠢᠷᠦ ᠨᠢ ᠲᠡᠭᠦᠨ ᠦ᠌ ᠵᠡᠷᠭᠡ ᠳᠡᠰ ᠢ᠋ ᠬᠠᠷᠠᠭᠤᠯᠬᠤ ᠠᠵᠢ᠃ ᠳᠠᠸᠠ ᠬᠦᠩ ᠢ᠋ ᠠᠢᠯ ᠬᠣᠲᠠ ᠪᠠᠨ ᠬᠠᠮᠠᠭᠠᠯᠠᠬᠤ ᠪᠠᠷ ᠳᠣᠣᠷᠠᠬᠢ ᠬᠥᠮᠦᠰ ᠲᠡᠢ ᠪᠡᠨ ᠶᠠᠷᠢᠯᠴᠠᠵᠤ ᠪᠠᠢᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠲᠤᠰᠠᠯᠠᠭᠴᠢ ᠠᠬᠠᠯᠠᠬᠤ ᠲᠦᠰᠢᠮᠡᠯ ᠨᠢ ᠪᠢᠳᠡᠨ ᠦ᠌ ᠡᠮᠦᠨᠡ ᠰᠠᠭᠤᠵᠤ ᠪᠠᠢᠯᠠ᠃ ᠤᠷᠢᠳ ᠢ᠋ᠶ᠋ᠠᠷ ᠰᠤᠮᠤᠯᠠᠳᠠᠭ ᠬᠠᠭᠤᠴᠢᠨ ᠴᠠᠭ ᠤ᠋ᠨ ᠫᠤᠤ ᠲᠠᠢ ᠭᠤᠷᠪᠠ ᠳᠥᠷᠪᠡᠨ ᠡᠷᠡ ᠳᠠᠸᠠ ᠬᠦᠩ ᠢ ᠲᠣᠭᠣᠷᠢᠨ ᠵᠣᠭᠰᠣᠵᠤ ᠪᠠᠢᠪᠠ᠃ ᠶᠡᠬᠡ ᠤᠳᠠᠭᠠᠨ ᠪᠣᠳᠣᠯᠬᠢᠯᠠᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠲᠡᠳᠡᠨ ᠦ᠌ ᠳᠣᠲᠣᠷᠠᠬᠢ ᠨᠢᠭᠡ ᠡᠷᠡ ᠨᠢ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ ᠶᠠᠭᠠᠷᠠᠵᠤ ᠰᠠᠨᠳᠤᠷᠤᠯ ᠦᠭᠡᠢ ᠶᠠᠭᠤᠮᠠ ᠶᠠᠷᠢᠬᠤ ᠳ᠋ᠤ᠌ ᠪᠤᠰᠤᠳ ᠨᠢ ᠵᠥᠪᠰᠢᠶᠡᠷᠡᠨ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠵᠠᠭᠠᠵᠤ ᠪᠠᠢᠪᠠ᠃ ᠪᠢᠳᠡ ᠪᠡᠯᠡᠳᠦᠭᠰᠡᠨ ᠬᠡᠪᠢᠰ ᠳᠡᠭᠡᠷᠡ ᠨᠢ ᠮᠣᠩᠭᠣᠯᠴᠤᠳ ᠤ᠋ᠨ ᠬᠠᠮᠤᠭ ᠤ᠋ᠨ ᠳᠤᠷᠠᠲᠠᠢ ᠤᠮᠳᠠᠭᠠ ᠪᠣᠯᠬᠤ ᠴᠠᠢ ᠶ᠋ᠢ ᠨᠢ ᠤᠤᠭᠤᠵᠤ ᠰᠠᠭᠤᠪᠠ᠃ ᠡᠨᠡ ᠴᠠᠢ ᠠᠢᠯ ᠪᠣᠯᠭᠠᠨ ᠤ᠋ ᠲᠤᠯᠭᠠᠨ ᠳᠡᠭᠡᠷᠡ ᠲᠠᠯᠪᠢᠭᠠᠰᠤᠲᠠᠢ ᠪᠠᠢᠳᠠᠭ ᠪᠥᠭᠡᠳ ᠬᠡᠨ ᠬᠡᠷᠪᠡ ᠠᠩᠬᠠ ᠤᠳᠠᠭᠠ ᠡᠨᠡ ᠬᠡᠪ ᠦ᠋ᠨ ᠴᠠᠢ᠂ ᠰᠢᠷᠠ ᠲᠣᠰᠣ᠂ ᠠᠭᠠᠷᠤᠤᠯ᠂ ᠳᠠᠪᠤᠰᠤ ᠲᠠᠢ ᠬᠦᠷᠡᠩ ᠬᠠᠷᠠ ᠥᠩᠭᠡ ᠶ᠋ᠢᠨ ᠬᠣᠯᠢᠮᠠᠭ ᠤᠮᠳᠠᠭᠠ ᠶ᠋ᠢ ᠤᠤᠭᠤᠬᠤ ᠳ᠋ᠤ᠌ ᠬᠦᠷᠪᠡᠯ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠭᠠᠷᠳᠠᠭ ᠪᠢᠯᠡ᠃ ᠬᠡᠷᠪᠡ ᠡᠨᠡ ᠤᠮᠳᠠᠭᠠ ᠳ᠋ᠤᠨᠢ ᠳᠠᠰᠬᠤ ᠳ᠋ᠤ᠌ ᠬᠦᠷᠪᠡᠯ ᠴᠣᠭ ᠵᠣᠯᠢ ᠶ᠋ᠢ ᠰᠡᠷᠭᠦᠭᠡᠨ᠂ ᠥᠯ ᠬᠣᠭᠣᠯᠠ ᠴᠤ᠌ ᠪᠣᠯᠳᠠᠭ ᠶᠤᠮ᠃ ᠨᠢᠭᠡ ᠵᠠᠷᠤᠴᠠ ᠥᠬᠢᠨ ᠰᠢᠷᠭᠤᠭᠤᠯ ᠨᠡᠭᠡᠭᠡᠵᠦ᠂ ᠵᠢᠵᠢᠭᠬᠡᠨ ᠬᠠᠢᠷᠴᠠᠭ ᠲᠠᠢ ᠲᠣᠭᠣᠰᠣ ᠳᠠᠷᠤᠭᠰᠠᠨ ᠪᠤᠶᠤ ᠣᠯᠠᠨ ᠤᠳᠠᠭᠠ ᠪᠠᠷᠢᠭᠠᠳ ᠲᠠᠯᠪᠢᠭᠰᠠᠨ ᠮᠡᠲᠦ ᠬᠠᠷᠠᠭᠳᠠᠬᠤ ᠰᠢᠬᠢᠷ ᠠᠪᠴᠢᠷᠠᠵᠤ ᠲᠠᠯᠪᠢᠯᠠ᠃ ᠬᠡᠨ ᠴᠦ᠍ ᠡᠨᠡ ᠰᠢᠬᠢᠷ ᠲᠦ᠍ ᠭᠠᠷ ᠬᠦᠷᠦᠭᠰᠡᠨ ᠦᠭᠡᠢ᠂ ᠪᠣᠳᠣᠬᠤ ᠳ᠋ᠤ᠌ ᠲᠡᠷᠡ ᠨᠢ ᠵᠥᠪᠬᠡᠨ ᠦᠵᠡᠮᠦᠷᠢ ᠳ᠋ᠦ᠍ ᠦᠷᠦᠭᠰᠡᠨ ᠪᠥᠭᠡᠳ ᠵᠣᠴᠢᠳ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠳᠠᠬᠢᠨ ᠬᠤᠷᠢᠶᠠᠵᠤ ᠲᠠᠯᠪᠢᠳᠠᠭ ᠪᠣᠯᠤᠯᠲᠠᠢ᠃
ᠲᠤᠯᠭᠠᠨ ᠤ᠋ ᠭᠠᠯ ᠤᠲᠤᠭᠠᠨ ᠳ᠋ᠤ᠌ ᠪᠣᠷᠣᠯᠠᠭᠰᠠᠨ ᠭᠡᠷ ᠢ᠋ ᠭᠡᠷᠡᠯᠲᠦᠭᠦᠯᠵᠦ᠂ ᠬᠠᠨᠠ ᠪᠠᠨ ᠳᠠᠭᠠᠭᠤᠯᠤᠨ ᠲᠠᠯᠪᠢᠭᠰᠠᠨ ᠠᠪᠳᠠᠷᠠ ᠱᠦᠭᠦᠢ ᠳᠡᠭᠡᠷᠡ ᠨᠢ ᠠᠩ ᠠᠩᠨᠠᠯ᠂ ᠮᠣᠷᠢ ᠳᠠᠪᠬᠢᠭᠤᠯᠤᠭᠰᠠᠨ᠂ ᠨᠤᠮᠤ ᠰᠤᠮᠤ ᠬᠠᠷᠪᠤᠵᠤ ᠪᠠᠢᠬᠤ ᠵᠢᠷᠤᠭ ᠢ᠋ ᠣᠯᠠᠨ ᠥᠩᠭᠡ ᠪᠡᠷ ᠵᠢᠷᠤᠭᠯᠠᠭᠰᠠᠨ ᠪᠠᠢᠪᠠ᠃ ᠡᠳᠡᠭᠡᠷ ᠠᠪᠳᠠᠷᠠ ᠬᠣᠷᠭᠣ ᠬᠡᠴᠢᠨᠡᠭᠡᠨ ᠣᠯᠠᠨ ᠤᠳᠠᠭᠠ ᠲᠡᠮᠡᠭᠡᠨ ᠳᠡᠭᠡᠷᠡ ᠠᠴᠢᠭᠳᠠᠨ᠂ ᠲᠠᠯᠠ ᠨᠤᠲᠤᠭ ᠢ᠋ ᠲᠤᠭᠤᠯᠤᠨ ᠨᠡᠭᠦᠭᠰᠡᠨ ᠢ᠋ ᠬᠡᠨ ᠮᠡᠳᠡᠨᠡ ᠪᠢᠯᠡ ! ᠬᠥᠮᠦᠰ ᠵᠥᠪᠬᠡᠨ ᠲᠡᠭᠦᠨ ᠦ᠌ ᠣᠨ ᠤᠳᠠᠭᠰᠠᠨ ᠵᠢᠴᠢ ᠪᠠᠶᠠᠨ ᠠᠢᠯ ᠠ᠋ᠴᠠ ᠢᠷᠡᠯᠲᠡᠢ ᠭᠡᠳᠡᠭ ᠢ᠋ ᠣᠯᠵᠤ ᠬᠠᠷᠠᠨᠠ᠃ ᠳᠠᠸᠠ ᠬᠦᠩ ᠦ᠋ᠨ ᠪᠠᠷᠠᠭᠤᠨ ᠭᠠᠷ ᠲᠠᠯᠠ ᠳ᠋ᠤ᠌ ᠨᠢᠭᠡ ᠬᠦᠷᠡᠯ ᠬᠣᠷᠯᠣ ᠪᠠᠢᠵᠤ᠂ ᠪᠠᠰᠠ ᠨᠢᠭᠡ ᠮᠥᠩᠭᠥ ᠪᠡᠷ ᠬᠢᠭᠰᠡᠨ ᠬᠣᠷᠯᠣ ᠶ᠋ᠢ ᠨᠢ ᠪᠢᠷ ᠪᠡᠬᠡ ᠲᠡᠢ ᠬᠠᠮᠲᠤ ᠵᠢᠵᠢᠭᠬᠡᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠦᠵᠡᠮᠵᠢ ᠪᠣᠯᠭᠠᠨ ᠲᠠᠯᠪᠢᠵᠠᠢ᠃ ᠭᠡᠷ ᠦ᠋ᠨ ᠳᠤᠮᠳᠠᠬᠢ ᠲᠤᠯᠭᠠᠨ ᠠ᠋ᠴᠠ ᠲᠠᠭᠠᠲᠠᠢᠬᠠᠨ ᠢᠯᠴᠢ ᠪᠠᠳᠠᠷᠠᠵᠤ᠂ ᠴᠣᠷ ᠤ᠋ᠨ ᠭᠠᠭᠴᠠ ᠣᠳᠣᠬᠢᠴᠢᠯᠠᠭᠰᠠᠨ ᠡᠳ᠋ — ᠲᠡᠮᠦᠷ ᠬᠣᠭᠣᠯᠠᠢ᠂ ᠠᠷᠭᠠᠯ ᠤ᠋ᠨ ᠳᠦᠷᠡᠯᠵᠡᠭᠰᠡᠨ ᠭᠠᠯ ᠤ᠋ᠨ ᠤᠲᠤᠭᠠ ᠶ᠋ᠢ ᠲᠣᠭᠣᠨᠣ ᠪᠠᠷ ᠭᠠᠳᠠᠭᠰᠢ ᠪᠠᠨ ᠭᠠᠷᠭᠠᠵᠤ ᠪᠠᠢᠯᠠ᠃ ᠡᠭᠦᠳᠡᠨ ᠦ᠌ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠰᠠᠢᠬᠠᠨ ᠶᠠᠩᠵᠤ ᠲᠠᠢ ᠭᠠᠤᠯᠢᠨ ᠳᠡᠪᠦᠷᠡ ᠨᠦ᠍ᠭᠦᠳ ᠭᠢᠯᠲᠠᠭᠠᠨᠠᠭᠤᠯᠤᠨ ᠵᠡᠷᠭᠡᠴᠡᠭᠦᠯᠵᠦ ᠲᠠᠯᠪᠢᠭᠠᠳ᠂ ᠮᠥᠩᠭᠥ ᠪᠡᠷ ᠡᠮᠵᠢᠶᠡᠷᠢᠯᠡᠨ ᠴᠢᠮᠡᠭᠰᠡᠨ ᠬᠤᠰᠤ ᠮᠣᠳᠣᠨ ᠤ᠋ ᠠᠶᠠᠭᠠ ᠲᠠᠪᠠᠭ ᠢ᠋ ᠬᠠᠵᠠᠭᠤ ᠳ᠋ᠤᠨᠢ ᠥᠷᠥᠵᠡᠢ᠃ ᠦᠶᠡ ᠤᠯᠠᠷᠢᠨ ᠬᠡᠷᠡᠭᠯᠡᠭᠰᠡᠭᠡᠷ ᠢᠷᠡᠭᠰᠡᠨ ᠮᠡᠲᠦ ᠬᠠᠷᠠᠭᠳᠠᠬᠤ ᠲᠣᠭᠣᠭᠠᠨ ᠭᠡᠷ ᠦ᠋ᠨ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠦ᠋ᠳ ᠨᠢ ᠮᠣᠩᠭᠣᠯ ᠭᠠᠷ ᠦᠢᠯᠡᠳᠪᠦᠷᠢᠴᠢᠳ ᠦ᠋ᠨ ᠤᠷᠠ ᠴᠢᠳᠠᠪᠤᠷᠢ ᠶ᠋ᠢ ᠭᠦᠢᠴᠡᠳ ᠬᠠᠷᠠᠭᠤᠯᠵᠠᠢ᠃ ᠲᠡᠭᠦᠨ ᠦ᠌ ᠠᠷᠤ ᠳ᠋ᠠᠬᠢ ᠳᠥᠷᠪᠡᠯᠵᠢᠨ ᠬᠠᠢᠷᠴᠠᠭ ᠲᠤ᠌ ᠨᠢᠯᠬᠠ ᠬᠤᠷᠠᠭᠠ ᠨᠤᠭᠤᠳ ᠪᠠᠢᠵᠤ᠂ ᠰᠥᠨᠢ ᠶ᠋ᠢᠨ ᠠᠶᠠᠯᠠᠯ ᠢ᠋ ᠳᠠᠭᠠᠭᠠᠬᠤ ᠦᠭᠡᠢ ᠲᠤᠯᠠ ᠪᠦᠰᠡᠭᠦᠢᠴᠦᠳ ᠤᠨᠤᠭᠠᠨ ᠳᠡᠭᠡᠷᠡ ᠪᠡᠨ ᠠᠪᠴᠤ ᠶᠠᠪᠤᠬᠤ ᠪᠠᠷ ᠪᠡᠯᠡᠳᠴᠡᠢ᠃ ᠳᠠᠸᠠ ᠬᠦᠩ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠬᠥᠮᠦᠨ ᠢ᠋ᠶ᠋ᠡᠨ ᠶᠠᠪᠤᠭᠤᠯᠵᠤ ᠳᠠᠭᠤᠰᠤᠭᠠᠳ᠂ ᠪᠢᠳᠡᠨ ᠳ᠋ᠦ᠍ ᠳᠡᠭᠡᠷᠡᠮᠴᠢᠳ ᠦ᠋ᠨ ᠤᠷᠤᠭᠰᠢᠯᠠᠵᠤ ᠪᠠᠢᠭᠠ ᠪᠠᠢᠳᠠᠯ ᠤ᠋ᠨ ᠲᠤᠬᠠᠢ ᠶᠠᠷᠢᠪᠠ᠃ ᠳᠡᠭᠡᠷᠡᠮᠴᠢᠳ ᠡᠳᠦᠷ ᠡᠴᠡ ᠡᠳᠦᠷ ᠲᠡᠳᠡᠨ ᠦ᠌ ᠬᠢ ᠤᠷᠤᠭᠤ ᠣᠢᠷᠠᠳᠴᠤ ᠪᠠᠢᠭᠠ ᠪᠥᠭᠡᠳ ᠵᠡᠷᠭᠡᠯᠡᠳᠡᠭᠡ ᠣᠷᠣᠰᠢᠬᠤ ᠳᠥᠷᠪᠡᠳ ᠬᠤᠰᠢᠭᠤᠨ ᠤ᠋ ᠨᠢᠭᠡ ᠲᠠᠢᠵᠢ ᠶ᠋ᠢᠨ ᠬᠢ ᠶ᠋ᠢ ᠪᠦᠰᠡᠯᠡᠨ ᠠᠪᠴᠤ᠂ ᠣᠳᠣ ᠠᠳᠠ ᠠ᠋ᠴᠠ ᠳᠥᠴᠢᠨ ᠭᠠᠵᠠᠷ ᠬᠦᠷᠬᠦ ᠦᠭᠡᠢ ᠵᠠᠢ ᠲᠠᠢ ᠪᠠᠢᠭᠠ᠃ ᠬᠡᠷᠪᠡ ᠰᠥᠨᠢᠳ ᠸᠠᠩ ᠤ᠋ᠨ ᠳᠡᠮᠵᠢᠯᠭᠡ ᠶ᠋ᠢ ᠣᠯᠬᠤ ᠦᠭᠡᠢ ᠪᠣᠯ ᠡᠨᠡ ᠠᠢᠯ ᠤ᠋ᠳ ᠴᠤ᠌ ᠳᠡᠭᠡᠷᠡᠮᠴᠢᠳ ᠦ᠋ᠨ ᠭᠠᠷ ᠲᠤ᠌ ᠳᠦᠭᠦᠷᠦᠯᠡ ᠭᠡᠰᠡᠨ ᠦᠭᠡ ᠭᠡᠵᠦ ᠬᠡᠯᠡᠪᠡ᠃
ᠨᠢᠭᠡ ᠪᠦᠰᠡᠭᠦᠢ ᠣᠷᠣᠵᠤ ᠢᠷᠡᠭᠡᠳ ᠲᠤᠯᠭᠠᠨ ᠤ᠋ ᠭᠠᠯ ᠢ᠋ᠶ᠋ᠠᠨ ᠰᠢᠯᠡᠭᠡᠨ ᠬᠥᠭᠵᠢᠭᠡᠪᠡ᠃ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢᠨ ᠵᠠᠰᠠᠯ ᠨᠢ ᠭᠡᠵᠦ ᠴᠣᠯ ᠠᠯᠲᠠ ᠪᠠᠢᠭᠰᠠᠨ ᠪᠥᠭᠡᠳ ᠳᠣᠷᠣᠭᠰᠢ ᠬᠦᠵᠦᠭᠦᠦ ᠤᠷᠤᠭᠤ ᠨᠢ ᠤᠨᠵᠢᠢᠵᠤ ᠪᠠᠢᠭᠠ ᠱ᠌ᠢᠷᠦ ᠶ᠋ᠢᠨ ᠬᠡᠯᠬᠢᠶᠡ ᠳ᠋ᠦ᠍ᠨᠢ ᠲᠥᠭᠥᠷᠢᠭ ᠮᠠᠨᠤᠬᠤ ᠪᠤᠶᠤ ᠬᠠᠪᠲᠠᠭᠠᠢ ᠣᠭ᠌ᠶᠤ ᠠᠳᠠ ᠲᠡᠨᠳᠡ ᠦᠭᠡᠢ ᠬᠠᠷᠠᠭᠳᠠᠨᠠ᠃ ( ᠵᠢᠷᠤᠭ 38 ) ᠳᠠᠸᠠ ᠬᠦᠩ ᠦ᠋ᠨ ᠶᠡᠬᠡ ᠬᠠᠲᠤᠨ ᠪᠣᠭᠣᠨᠢᠬᠠᠨ ᠬᠦᠳᠡᠷ ᠴᠢᠬᠢᠷᠡᠭ ᠪᠡᠶᠡ ᠲᠡᠢ᠂ ᠥᠷᠭᠡᠪᠲᠦᠷ ᠤᠯᠠᠭᠠᠨ ᠬᠦᠷᠡᠩ ᠴᠢᠷᠠᠢ ᠲᠠᠢ ᠬᠥᠮᠦᠨ ᠪᠠᠢᠪᠠ᠃
ᠪᠢᠳᠡ ᠠᠶᠠᠭᠠᠨ ᠳ᠋ᠠᠬᠢ ᠴᠠᠢ ᠪᠠᠨ ᠬᠥᠨᠲᠥᠷᠴᠦ᠂ ᠰᠥᠨᠢᠳ ᠬᠣᠰᠢᠭᠤ ᠤᠷᠤᠭᠤ ᠪᠤᠴᠠᠬᠤ ᠪᠠᠷ ᠬᠥᠳᠡᠯᠦᠯᠡ᠃ ᠳᠠᠸᠠ ᠬᠦᠩ ᠪᠢᠳᠡᠨ ᠳ᠋ᠦ᠍ ᠬᠡᠳᠦᠨ ᠮᠥᠷ ᠪᠢᠴᠢᠭ ᠪᠢᠴᠢᠭᠡᠳ ᠳᠡᠮᠴᠦᠭᠳᠦᠩᠷᠦᠪ ᠨᠣᠶᠠᠨ ᠳ᠋ᠤ᠌ ᠳᠠᠮᠵᠢᠭᠤᠯᠬᠤ ᠶ᠋ᠢ ᠬᠦᠰᠡᠪᠡ᠃ ᠪᠢᠳᠡᠨ ᠢ᠋ ᠮᠠᠰᠢᠨ ᠳ᠋ᠠᠭᠠᠨ ᠰᠠᠭᠤᠨ ᠭᠡᠷᠡᠯ ᠢ᠋ᠶ᠋ᠡᠨ ᠠᠰᠠᠭᠠᠬᠤ ᠳ᠋ᠤ᠌ ᠳᠠᠸᠠ ᠬᠦᠩ ᠦ᠋ᠨ ᠭᠡᠷ ᠮᠠᠯ ᠵᠢᠴᠢ ᠬᠦᠨᠳᠦᠲᠦ ᠬᠠᠲᠤᠨ ᠨᠢ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠵᠠᠯᠭᠢᠭᠳᠠᠪᠠ᠃
ᠨᠣᠬᠠᠳ ᠨᠢᠭᠡᠨ ᠵᠡᠷᠭᠡ ᠬᠤᠴᠠᠯᠳᠤᠨ᠂ ᠮᠠᠰᠢᠨ ᠤ᠋ ᠠᠷᠤ ᠠ᠋ᠴᠠ ᠬᠡᠰᠡᠭ ᠳᠠᠭᠠᠭᠰᠠᠨ ᠢ᠋ᠶ᠋ᠠᠨ ᠪᠣᠯᠢᠵᠤ᠂ ᠪᠢᠳᠡ ᠪᠠᠰᠠ ᠯᠠ ᠲᠠᠯᠠ ᠨᠤᠲᠤᠭ ᠤ᠋ᠨ ᠨᠠᠮᠵᠢᠭᠤᠬᠠᠨ ᠣᠷᠴᠢᠨ ᠳ᠋ᠠᠭᠠᠨ ᠣᠷᠣᠵᠤ ᠢᠷᠡᠯᠡ᠃ ᠡᠢᠮᠦᠷᠬᠦᠦ ᠬᠠᠮᠢᠭᠠᠰᠢ ᠪᠠᠨ ᠬᠠᠷᠠᠬᠤ ᠳ᠋ᠤ᠌ ᠴᠤ᠌ ᠠᠳᠠᠯᠢᠬᠠᠨ ᠲᠠᠯᠠ ᠨᠤᠲᠤᠭ ᠲᠤ᠌ ᠰᠥᠨᠢ ᠪᠡᠷ ᠠᠶᠠᠯᠠᠬᠤ ᠳ᠋ᠤ᠌ ᠰᠠᠢᠨ ᠵᠠᠮᠴᠢ ᠪᠠᠢᠬᠤ ᠦᠭᠡᠢ ᠪᠣᠯ ᠵᠦᠭ ᠴᠢᠭ ᠢ᠋ᠶ᠋ᠡᠨ ᠢᠯᠭᠠᠨᠠ ᠭᠡᠵᠦ ᠦᠨᠡᠬᠡᠷ ᠬᠡᠴᠡᠭᠦᠦ ᠳᠡ᠃
ᠡᠯᠡᠰᠦᠨ ᠴᠦᠯ ᠤᠤ᠂ ᠡᠰᠡᠬᠦᠯᠡ ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠥᠨᠳᠥᠷᠯᠢᠭ ᠴᠦ᠍ ᠪᠠᠢᠵᠤ ᠮᠡᠳᠡᠨᠡ᠃ ᠡᠭᠦᠨ ᠦ᠌ ᠳᠣᠲᠣᠷᠠ ᠨᠢᠭᠡ ᠰᠠᠢᠬᠠᠨ ᠨᠣᠭᠣᠭᠠᠨ ᠪᠦᠷᠢᠳᠦ ᠪᠠᠢᠵᠤ᠂ ᠮᠣᠳᠣ ᠣᠷᠢᠶᠠᠩᠭᠤ᠂ ᠪᠤᠲᠠᠯᠢᠭ ᠤᠷᠭᠤᠮᠠᠯ ᠤᠷᠭᠤᠭᠰᠠᠨ ᠬᠠᠯᠠᠭᠤᠨ ᠪᠥᠰᠡᠨ ᠦ᠌ ᠣᠢ ᠪᠢᠳᠡᠨ ᠦ᠌ ᠡᠮᠦᠨᠡ ᠳᠠᠢᠰᠤᠩᠨᠠᠭᠰᠠᠨ ᠮᠡᠲᠦ ᠢᠯᠡᠷᠡᠪᠡ᠃ ᠭᠡᠨᠡᠳᠲᠡ ᠪᠦᠬᠦ ᠶᠠᠭᠤᠮᠠ ᠮᠠᠨᠠᠨ ᠮᠡᠲᠦ ᠰᠠᠷᠨᠢᠨ ᠠᠷᠢᠯᠤᠭᠠᠳ ᠂ ᠪᠢᠳᠡᠨ ᠦ᠌ ᠮᠠᠰᠢᠨ ᠴᠤ᠌ ᠡᠭᠦᠯᠡ ᠮᠠᠨᠠᠨ ᠤ᠋ ᠳᠤᠮᠳᠠᠭᠤᠷ ᠨᠢᠰᠦᠨ ᠳᠠᠪᠬᠢᠭᠰᠠᠭᠠᠷ ᠣᠨᠳᠣᠣ ᠭᠠᠷᠠᠭ ᠲᠠᠢ ᠬᠠᠷᠭᠤᠬᠤ ᠪᠣᠯᠤᠯᠠ ᠁
ᠮᠣᠲ᠋ᠣᠷ ᠤ᠋ᠨ ᠬᠦᠩᠭᠢᠨᠡᠭᠰᠡᠨ ᠳᠠᠭᠤᠨ ᠵᠢᠴᠢ ᠮᠠᠰᠢᠨ ᠤ᠋ ᠰᠠᠵᠢᠯᠠᠭᠠᠨ ᠳ᠋ᠤ᠌ ᠪᠦᠪᠡᠢᠯᠡᠭᠳᠡᠨ ᠪᠢ ᠬᠠᠷᠢᠨ ᠵᠡᠭᠦᠷᠮᠡᠭᠯᠡᠭᠰᠡᠨ ᠠᠵᠢ᠃ ᠨᠠᠳᠠᠳᠤ ᠶᠡᠬᠡ ᠤᠳᠠᠭᠠᠨ ᠪᠣᠯᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠵᠤ ᠪᠠᠢᠭᠠ ᠡᠨᠡᠬᠡᠨ ᠳᠤᠭᠭᠢᠭᠰᠠᠨ ᠨᠣᠢᠷ ᠠ᠋ᠴᠠ ᠪᠠᠨ ᠰᠡᠷᠡᠬᠦ ᠳ᠋ᠦ᠍ ᠬᠠᠷᠠᠭᠠᠨ ᠳ᠋ᠤ᠌ ᠮᠢᠨᠢ ᠳᠦᠭᠦᠷᠡᠩ ᠮᠣᠷᠢᠲᠠᠳ ᠤ᠋ᠨ ᠡᠩᠨᠡᠭᠡ ᠬᠥᠳᠡᠭᠡ ᠲᠠᠯᠠ ᠳ᠋ᠤ᠌ ᠳᠠᠭᠤ ᠴᠢᠮᠡᠭᠡ ᠦᠭᠡᠢ ᠠᠶᠠᠯᠠᠬᠤ ᠨᠢ ᠰᠦᠮᠡᠯᠵᠡᠨ ᠬᠠᠷᠠᠭᠳᠠᠪᠠ᠃ ᠲᠠᠯᠠ ᠨᠤᠲᠤᠭ ᠤ᠋ᠨ ᠲᠡᠭᠰᠢ ᠪᠤᠰᠤ ᠪᠠᠢᠭᠠ ᠭᠠᠳᠠᠷᠭᠤ ᠨᠢ ᠰᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠢᠩᠭᠢᠵᠦ ᠬᠠᠷᠠᠭᠳᠠᠵᠤ ᠪᠠᠢᠨᠠ ᠤᠤ ? ᠦᠭᠡᠢ ᠶᠡᠷᠦ ᠨᠢ ᠵᠡᠭᠦᠳᠦ ᠵᠡᠷᠭᠡᠯᠭᠡᠨ ᠤᠤ? ᠡᠰᠡᠬᠦᠯᠡ ᠮᠡᠳᠡᠷᠡᠮᠵᠢ ᠳ᠋ᠦ᠍ ᠪᠤᠷᠤᠭᠤ ᠣᠢᠯᠠᠭᠠᠯᠲᠠ ᠭᠠᠷᠤᠭᠠᠳ ᠪᠠᠢᠨᠠ ᠤᠤ?
— ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠰᠦᠨᠡᠰᠦ ᠨᠦ᠍ᠭᠦᠳ ᠪᠤᠴᠠᠵᠤ ᠶᠠᠪᠤᠭᠠ ᠪᠠᠢᠨᠠ᠂ ᠴᠢ ᠠᠯᠭᠤᠷ ᠶᠠᠪᠤᠭᠤᠯᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠪᠢᠳᠡᠨ ᠦ᠌ ᠵᠠᠮᠴᠢ ᠷᠠᠰᠢ ᠵᠢᠯᠣᠭᠣᠴᠢ ᠳ᠋ᠤ᠌ ᠶᠠᠷᠢᠭᠠᠳ ᠵᠠᠯᠭᠠᠵᠤ᠂ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠲᠡᠢᠨ ᠬᠢᠵᠦ ᠶᠠᠪᠤᠭᠠᠳ ᠨᠦᠭᠴᠢᠭᠰᠡᠳ ᠦ᠋ᠨ ᠰᠦᠨᠡᠰᠦ ᠨᠤᠲᠤᠭ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠠᠶᠠᠯᠠᠯ ᠢ᠋ ᠨᠢ ᠬᠠᠷᠰᠢᠯᠠᠵᠤ ᠪᠣᠯᠳᠠᠭ ᠦᠭᠡᠢ ᠶᠦᠮ ᠭᠡᠵᠦ ᠰᠢᠪᠡᠨᠡᠨ ᠬᠡᠯᠡᠯᠡ᠃
ᠰᠥᠨᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠪᠢᠳᠡ ᠴᠠᠭᠠᠨ ᠬᠦᠷᠢᠶᠡᠨ ᠦ᠌ ᠰᠦᠮᠡ ᠳ᠋ᠦ᠍ ᠢᠷᠡᠯᠡ᠃ ᠬᠡᠲᠦᠷᠬᠡᠢ ᠶᠠᠳᠠᠷᠠᠭᠰᠠᠨ ᠠ᠋ᠴᠠ ᠪᠣᠯᠵᠤ ᠨᠣᠢᠷ ᠬᠤᠯᠵᠢᠵᠠᠢ᠃ ᠴᠣᠩᠬᠣ ᠪᠠᠷ ᠲᠠᠯᠠ ᠶ᠋ᠢ ᠬᠠᠷᠠᠭᠰᠠᠭᠠᠷ ᠰᠠᠶᠢ ᠶ᠋ᠢᠨ ᠵᠡᠭᠦᠳᠦ ᠪᠣᠯᠤᠨ ᠨᠤᠲᠤᠭ ᠪᠤᠴᠠᠵᠤ ᠶᠠᠪᠤᠭᠠ ᠳᠠᠢᠴᠢᠳ ᠤ᠋ᠨ ᠰᠦᠨᠡᠰᠦᠨ ᠦ᠌ ᠲᠤᠬᠠᠢ ᠪᠣᠳᠣᠪᠠ᠃ ᠬᠠᠴᠢᠨ ᠰᠦᠷᠡᠬᠡᠢ ᠲᠣᠭᠲᠠᠪᠤᠷᠢ ᠠᠯᠳᠠᠬᠤ ᠪᠠᠷ ᠨᠢ ᠬᠣᠨᠣᠭᠯᠠᠵᠤ ᠪᠠᠢᠭᠠ ᠪᠠᠢᠷᠢ ᠶ᠋ᠢᠨ ᠡᠮᠦᠨᠡᠬᠢ ᠲᠠᠢᠰᠠᠨ ᠳᠡᠭᠡᠷᠡ ᠣᠴᠢᠵᠤ ᠵᠣᠭᠰᠣᠮᠠᠷ ᠰᠠᠨᠠᠭᠳᠠᠪᠠ ᠃ ᠪᠢ ᠰᠥᠨᠢ ᠶ᠋ᠢᠨ ᠰᠡᠯᠡᠭᠦᠬᠡᠨ ᠳ᠋ᠦ᠍ ᠭᠠᠳᠠᠭᠰᠢ ᠭᠠᠷᠤᠯᠠ᠃ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠭᠰᠠᠨ ᠴᠤ᠌ ᠶᠠᠭᠤ ᠴᠤ᠌ ᠰᠣᠨᠣᠰᠳᠠᠬᠤ ᠦᠭᠡᠢ᠃ ᠬᠢᠵᠠᠭᠠᠷ ᠦᠭᠡᠢ ᠣᠭᠲᠠᠷᠭᠤᠢ ᠳ᠋ᠠᠬᠢ ᠣᠳᠣᠳ ᠯᠠ ᠥᠪᠡᠷ ᠦ᠋ᠨ ᠵᠢᠮᠡ ᠪᠡᠷ ᠢ᠋ᠶ᠋ᠡᠨ ᠴᠢᠮᠡᠭᠡ ᠦᠭᠡᠢ ᠢᠷᠪᠢᠭᠢᠨᠡᠭᠰᠡᠭᠡᠷ ᠪᠠᠢᠯᠠ᠃ ᠪᠢ ᠣᠢᠷᠠ ᠣᠷᠴᠢᠮ ᠤ᠋ᠨ ᠳᠣᠪᠣᠴᠠᠭ ᠳᠡᠭᠡᠷᠡ ᠭᠠᠷᠤᠶᠠ ᠭᠡᠮᠡᠨ ᠪᠣᠳᠣᠭᠠᠳ ᠠᠯᠬᠤᠲᠠᠯᠠ ᠷᠠᠰᠢ ᠠᠷᠠᠰᠤᠨ ᠲᠡᠷᠯᠢᠭ ᠢ᠋ᠶ᠋ᠡᠨ ᠨᠥᠮᠥᠷᠦᠭᠡᠳ ᠬᠣᠢᠨᠠ ᠠ᠋ᠴᠠ ᠬᠦᠷᠴᠦ ᠢᠷᠡᠪᠡ᠃
— ᠬᠠᠮᠢᠭᠠ ᠣᠴᠢᠨᠠ ᠭᠡᠵᠦ ᠪᠠᠢᠨᠠ? ᠭᠡᠵᠦ ᠲᠡᠷᠡ ᠠᠰᠠᠭᠤᠪᠠ᠃
— ᠲᠣᠭᠣᠷᠢᠬᠤ ᠪᠠᠷ ! ᠰᠥᠨᠢ ᠶ᠋ᠢᠨ ᠮᠣᠷᠢᠲᠤ ᠠᠩᠭᠢ ᠶ᠋ᠢ ᠪᠠᠰᠠ ᠨᠢᠭᠡ ᠬᠠᠷᠠᠶᠠ ᠭᠡᠮᠡᠨ ᠰᠠᠨᠠᠵᠤ ᠪᠠᠢᠨᠠ᠃
— ᠢᠩᠭᠢᠬᠦ ᠨᠢ ᠭᠠᠢ ᠵᠣᠪᠠᠯᠠᠩ ᠠᠪᠴᠢᠷᠠᠳᠠᠭ᠃ ᠨᠦᠭᠴᠢᠭᠰᠡᠳ ᠦ᠋ᠨ ᠰᠦᠨᠡᠰᠦ ᠪᠤᠴᠠᠵᠤ ᠬᠠᠷᠢᠬᠤ ᠶ᠋ᠢ ᠬᠥᠮᠦᠨ ᠵᠣᠷᠢᠯᠭᠠ ᠲᠠᠢ ᠬᠠᠷᠰᠢᠯᠠᠵᠤ ᠪᠣᠯᠳᠠᠭ ᠦᠭᠡᠢ ᠶᠦᠮ᠃ ᠪᠢᠳᠡᠨ ᠦ᠌ ᠥᠨᠥᠳᠥᠷ ᠦ᠋ᠨ ᠬᠠᠷᠠᠭᠰᠠᠨ ᠨᠢ ᠶᠡᠬᠡ ᠣᠯᠠᠨ ᠤᠳᠬᠠ ᠠᠭᠤᠯᠭᠠ ᠲᠠᠢ ᠶᠤᠮ ᠭᠡᠵᠦ ᠰᠢᠪᠡᠨᠡᠨ ᠬᠡᠯᠡᠪᠡ᠃
— ᠵᠠᠯᠭᠠᠭᠠᠳ ᠶᠠᠷᠢᠭᠠᠴᠢ! ᠭᠡᠬᠦ ᠪᠡᠷ ᠷᠠᠰᠢ ᠨᠡᠯᠢᠶᠡᠳ ᠤᠳᠠᠭᠠᠨ ᠳᠠᠭᠤ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ :
— ᠴᠢ ᠣᠨᠳᠣᠣ ᠶᠢᠷᠲᠢᠨᠴᠦ ᠡᠴᠡ ᠢᠷᠡᠭᠰᠡᠨ ᠪᠣᠯᠬᠣᠷ ᠮᠢᠨᠦ ᠶᠠᠷᠢᠶᠠ ᠶ᠋ᠢ ᠱᠣᠭᠯᠠᠨ ᠢᠨᠢᠶᠡᠵᠦ ᠮᠡᠳᠡᠨᠡ᠃ ᠭᠡᠬᠦ ᠳ᠋ᠦ᠍ ᠪᠢᠳᠡᠨ ᠦ᠌ ᠬᠠᠭᠤᠴᠢᠨ ᠶᠠᠷᠢᠶᠠ᠂ ᠤᠯᠠᠮᠵᠢᠯᠠᠯ ᠪᠣᠯ ᠪᠦᠷ ᠦᠨᠡᠨ! ᠵᠥᠩᠨᠡᠨ ᠶᠠᠷᠢᠭᠰᠠᠨ ᠪᠦᠭᠦᠳᠡ ᠨᠢ ᠪᠡᠶᠡᠯᠡᠭᠳᠡᠳᠡᠭ ᠶᠦᠮ ᠰᠢᠦ ᠭᠡᠪᠡ᠃
— ᠵᠥᠩᠨᠡᠯ ᠶᠠᠷᠢᠶᠠᠨ ᠳ᠋ᠤ᠌ ᠶᠠᠭᠤ ᠭᠡᠵᠦ ᠶᠠᠷᠢᠪᠠ? ᠭᠡᠵᠦ ᠤᠬᠤᠴᠢᠯᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠮᠠᠨᠢ ᠲᠡᠷᠡ ᠬᠠᠭᠤᠴᠢᠨ ᠰᠦᠮᠡ ᠶ᠋ᠢᠨ ᠡᠭᠦᠳᠡ ᠵᠦᠭ ᠠᠯᠬᠤᠬᠤ ᠳ᠋ᠠᠭᠠᠨ᠄
— ᠡᠭᠦᠨ ᠦ᠌ ᠲᠤᠬᠠᠢ ᠪᠢ ᠬᠠᠷᠢᠨ ᠬᠥᠳᠡᠭᠡ ᠭᠠᠳᠠᠭᠠ ᠶᠠᠷᠢᠬᠤ ᠦᠭᠡᠢ ᠰᠢᠦ ᠭᠡᠯᠡ᠃ ᠲᠡᠷᠡ ᠪᠠᠢᠰᠢᠩ ᠤ᠋ᠨ ᠡᠮᠦᠨᠡᠬᠢ ᠪᠣᠭᠣᠨᠢᠬᠠᠨ ᠰᠠᠨᠳᠠᠯᠢ ᠳᠡᠭᠡᠷᠡ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠮᠠᠯᠠᠭᠠᠢ ᠪᠠᠨ ᠲᠡᠭᠰᠢᠯᠡᠨ ᠵᠠᠰᠠᠵᠤ ᠠᠷᠠᠰᠤᠨ ᠳᠡᠪᠡᠯ ᠢ᠋ᠶ᠋ᠡᠨ ᠵᠠᠰᠠᠨ ᠨᠥᠮᠥᠷᠦᠭᠡᠳ:
— ᠲᠠᠯᠠ ᠨᠤᠲᠤᠭ ᠢ᠋ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠳᠠᠭᠠᠷᠢᠨ ᠳᠣᠪᠲᠣᠯᠬᠤ ᠪᠤᠶᠤ ᠮᠠᠨ ᠤ᠋ ᠤᠭᠰᠠᠭᠠᠲᠠᠨ ᠭᠠᠷᠬᠤ ᠵᠠᠮ ᠦᠭᠡᠢ ᠭᠠᠴᠢᠭᠳᠠᠯ ᠳ᠋ᠤ᠌ ᠲᠤᠯᠭᠠᠷᠠᠬᠤ ᠦᠶᠡᠰ ᠦᠯᠦ ᠦᠵᠡᠭᠳᠡᠬᠦ ᠴᠡᠷᠢᠭ ᠠᠩᠭᠢ ᠢᠷᠡᠵᠦ ᠲᠤᠰᠠᠯᠠᠳᠠᠭ᠃ ᠰᠠᠷᠠᠨ ᠤ᠋ ᠭᠡᠷᠡᠯ ᠳᠣᠣᠷᠠ ᠲᠡᠳᠡᠨ ᠦ᠌ ᠳᠣᠪᠲᠣᠯᠵᠤ ᠪᠠᠢᠬᠤ ᠨᠢ ᠬᠠᠷᠠᠭᠳᠠᠳᠠᠭ᠃ ᠬᠡᠨ ᠬᠡᠷᠪᠡ ᠲᠡᠳᠡᠨ ᠲᠡᠢ ᠡᠰᠡᠷᠭᠦᠴᠡᠯᠳᠦᠬᠦ ᠪᠤᠶᠤ ᠮᠣᠷᠢᠳ ᠢ᠋ ᠨᠢ ᠦᠷᠭᠦᠭᠡᠨ ᠬᠥᠭᠡᠭᠡᠪᠡᠯ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠲᠠᠯᠠ ᠳᠡᠭᠡᠷᠡ ᠦᠬᠦᠭᠰᠡᠨ ᠪᠠᠢᠳᠠᠭ ᠪᠥᠭᠡᠳ ᠪᠠᠶᠠᠨ ᠳᠡᠭᠡᠷᠡ ᠨᠢ ᠲᠣᠭᠠᠯᠠᠰᠢ ᠦᠭᠡᠢ ᠲᠤᠭᠤᠷᠠᠢ ᠶ᠋ᠢᠨ ᠰᠣᠷᠪᠢ ᠪᠠᠢᠳᠠᠭ᠃ ᠬᠥᠮᠦᠰ ᠶᠠᠭᠠᠬᠢᠭᠠᠳ ᠡᠢᠮᠦ ᠰᠥᠨᠢ ᠪᠡᠷ ᠬᠥᠳᠡᠭᠡ ᠲᠠᠯᠠ ᠤᠷᠤᠭᠤ ᠭᠠᠷᠳᠠᠭ ᠦᠭᠡᠢ ᠶ᠋ᠢ ᠣᠳᠣ ᠴᠢ ᠮᠡᠳᠡᠭᠰᠡᠨ ᠪᠢᠵᠡ! ᠶᠡᠬᠡ ᠬᠡᠷᠡᠭ ᠭᠠᠷᠬᠤ ᠭᠡᠵᠦ ᠪᠠᠢᠨᠠ ᠭᠡᠯᠡ᠃
ᠪᠠᠢᠷᠢ ᠳ᠋ᠠᠭᠠᠨ ᠣᠷᠣᠭᠰᠠᠨ ᠤ᠋ ᠰᠡᠭᠦᠯᠡᠷ ᠲᠡᠷᠡ ᠡᠭᠦᠳᠡᠨ ᠳᠡᠭᠡᠷᠡ ᠬᠦᠷᠴᠦ ᠡᠷᠢᠭᠡ ᠪᠡᠨ ᠲᠠᠯᠪᠢᠭᠠᠳ᠂ ᠬᠠᠭᠠᠯᠭᠠᠨ ᠤ᠋ ᠲᠦᠯᠬᠢᠭᠦᠷ ᠢ᠋ ᠡᠷᠭᠢᠭᠦᠯᠦᠨ ᠣᠨᠢᠰᠤᠯᠠᠭᠠᠳ᠂ ᠲᠦᠯᠬᠢᠭᠦᠷ ᠢ᠋ ᠨᠢ ᠠᠪᠴᠤ ᠬᠠᠷᠮᠠᠯᠠᠯᠠ᠃
— ᠣᠳᠣ ᠤᠨᠲᠠᠬᠤ ᠴᠠᠭ ᠪᠣᠯᠵᠠᠢ ! ᠤᠳᠠᠯ ᠦᠭᠡᠢ ᠯᠠᠷᠰᠤᠨ ᠬᠦᠩ ᠴᠦ᠍ ᠪᠣᠰᠬᠤ ᠪᠣᠯᠤᠨᠠ ᠳᠠ ᠭᠡᠵᠦ ᠷᠠᠰᠢ ᠬᠡᠯᠡᠯᠡ᠃
— ᠶᠡᠬᠡ ᠬᠡᠷᠡᠭ ᠭᠠᠷᠬᠤ ᠨᠢ ᠠ᠋ ᠭᠡᠵᠦ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠪᠢ ᠯᠠᠷᠰᠤᠨ ᠬᠦᠩ ᠳ᠋ᠦ᠍ ᠶᠠᠷᠢᠯᠠ᠃
— ᠡᠭᠦᠨ ᠦ᠌ ᠲᠤᠬᠠᠢ ᠮᠣᠩᠭᠣᠯᠴᠤᠳ ᠶᠡᠬᠡ ᠤᠳᠠᠭᠠᠨ ᠶᠠᠷᠢᠭᠰᠠᠨ ᠶᠤᠮ ! ᠭᠡᠬᠦ ᠳ᠋ᠦ᠍ ᠬᠡᠷᠪᠡ ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ ᠨᠢᠭᠡᠳᠬᠦ ᠦᠭᠡᠢ ᠶᠦᠮ ᠪᠣᠯ ᠣᠯᠠᠨ ᠲᠠᠯᠠ ᠠ᠋ᠴᠠ ᠢᠷᠡᠵᠦ ᠪᠠᠢᠭᠠ ᠠᠶᠤᠯ ᠲᠦᠭᠰᠢᠭᠦᠷᠢ ᠶ᠋ᠢ ᠬᠣᠷᠢᠭᠯᠠᠨ ᠵᠣᠭᠰᠣᠭᠠᠬᠤ ᠳ᠋ᠤ᠌ ᠬᠡᠴᠡᠭᠦᠦ ᠯᠡ ᠪᠠᠢᠨᠠ ᠭᠡᠵᠦ ᠯᠠᠷᠰᠤᠨ ᠬᠢᠨᠠᠮᠠᠭᠠᠢ ᠶᠠᠷᠢᠪᠠ᠃
ᠪᠢᠳᠡ ᠮᠣᠷᠳᠠᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠣᠯᠤᠭᠰᠠᠨ ᠡᠭᠦᠳᠡᠨ ᠡᠮᠦᠨᠡᠬᠢ ᠮᠠᠰᠢᠨ ᠵᠦᠭ ᠢ᠋ᠶ᠋ᠡᠨ ᠠᠯᠬᠤᠯᠠᠪᠠ᠃ ᠮᠠᠰᠢᠨ ᠳ᠋ᠠᠬᠢ ᠠᠴᠢᠶᠠ ᠨᠢ ᠲᠣᠭᠣᠰᠣᠨ ᠳ᠋ᠤ᠌ ᠳᠠᠷᠤᠭᠳᠠᠵᠤ᠂ ᠱᠢᠯᠦᠹ ᠬᠣᠶᠠᠷ ᠰᠠᠪᠠ ᠲᠠᠢ ᠴᠢᠯᠠᠭᠤᠨ ᠲᠣᠰᠣ ᠶ᠋ᠢ ᠭᠢᠰᠬᠢᠭᠦᠷ ᠬᠠᠪᠲᠠᠰᠤᠨ ᠳᠡᠭᠡᠷᠡ ᠬᠦᠯᠢᠵᠦ ᠪᠠᠢᠪᠠ᠃ ᠷᠠᠰᠢ ᠵᠢᠴᠢ ᠪᠤᠰᠤᠳ ᠮᠣᠩᠭᠣᠯᠴᠤᠳ ᠭᠢᠯᠲᠠᠭᠠᠨᠠᠭᠰᠠᠨ ᠮᠠᠰᠢᠨ ᠢ᠋ ᠬᠦᠷᠢᠶᠡᠯᠡᠨ ᠢᠢᠨᠢᠶᠡᠮᠰᠦᠭᠯᠡᠨ ᠵᠣᠭᠰᠣᠵᠤ᠂ ᠪᠢᠳᠡᠨ ᠦ᠌ ᠡᠮᠦᠨᠡᠰᠢ ᠪᠡᠨ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠵᠠᠮ ᠢ᠋ ᠡᠯᠭᠦᠨ ᠠᠪᠬᠤ ᠠᠶᠠᠯᠠᠯ ᠳ᠋ᠤ᠌ ᠭᠠᠷᠲᠠᠯᠠ ᠲᠡᠨᠳᠡ ᠪᠡᠨ ᠪᠠᠢᠵᠤ ᠯᠠ ᠪᠠᠢᠪᠠ᠃
ᠪᠣᠳᠣᠯ ᠳ᠋ᠤ᠌ ᠮᠢᠨᠢ ᠬᠦᠷᠴᠦ ᠥᠩᠭᠡᠷᠡᠭᠰᠡᠨ ᠭᠡᠷ ᠦ᠋ᠳ ᠵᠢᠴᠢ ᠬᠥᠮᠦᠰ ᠡᠷᠭᠢᠯᠳᠦᠭᠰᠡᠭᠡᠷ ᠪᠠᠢᠯᠠ᠃ ᠮᠠᠷᠺᠣ ᠫᠣᠯᠣ ᠶ᠋ᠢᠨ ᠲᠡᠷᠡ ᠦᠶᠡ ᠳ᠋ᠦ᠍ ᠪᠢᠴᠢᠭᠯᠡᠵᠦ ᠦᠯᠡᠳᠡᠭᠡᠭᠰᠡᠨ ᠪᠦᠬᠦᠨ ᠢ᠋ ᠣᠳᠣ ᠳ᠋ᠤ᠌ ᠬᠦᠷᠲᠡᠯᠡ ᠮᠣᠩᠭᠣᠯᠴᠤᠳ ᠬᠡᠳᠦᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠤᠷᠰᠢ ᠬᠠᠳᠠᠭᠠᠯᠠᠭᠰᠠᠭᠠᠷ ᠢᠷᠡᠵᠡᠢ᠃ ᠬᠠᠷᠠᠭᠠ ᠪᠤᠯᠢᠶᠠᠮᠠ ᠦᠵᠡᠰᠬᠦᠯᠡᠩ ᠰᠠᠢᠬᠠᠨ ᠦᠵᠡᠮᠵᠢ ( ᠵᠢᠷᠤᠭ 41 ᠪᠠ 42 ) ᠂ ᠲᠠᠯᠠ ᠨᠤᠲᠤᠭ ᠤ᠋ᠨ ᠷᠣᠮᠠᠨᠲ᠋ᠢᠭ ᠠᠮᠢᠳᠤᠷᠠᠯ ᠵᠢᠴᠢ ᠲᠡᠷᠡ ᠰᠠᠢᠬᠠᠨ ᠨᠠᠮᠵᠢᠭᠤᠨ ᠰᠡᠯᠡᠭᠦᠨ ᠪᠠᠢᠳᠠᠯ ᠭᠡᠬᠦ ᠮᠡᠲᠦ᠃ ᠪᠢᠳᠡ ᠴᠦ᠍ ᠤᠤᠯ ᠳ᠋ᠠᠭᠠᠨ ᠲᠡᠢᠮᠦ ᠰᠠᠢᠬᠠᠨ ᠨᠠᠮᠵᠢᠭᠤᠨ ᠪᠠᠢᠵᠤ ᠯᠠ ᠪᠠᠢᠭᠰᠠᠨ᠂ ᠭᠡᠬᠦ ᠳ᠋ᠦ᠍ ᠣᠳᠣᠬᠢᠴᠢᠯᠠᠭᠰᠠᠨ ᠮᠡᠷᠭᠡᠵᠢᠯ᠂ ᠮᠠᠰᠢᠨ ᠲᠡᠷᠭᠡ᠂ ᠷᠠᠳᠢᠣ᠋ ᠪᠠ ᠬᠠᠷᠴᠢᠭᠢᠨᠠᠭᠰᠠᠨ ᠲᠡᠮᠦᠷ ᠵᠠᠮ ᠤ᠋ᠳ ᠯᠠ ᠪᠢᠳᠡᠨ ᠡᠴᠡ ᠲᠡᠭᠦᠨ ᠢ᠋ ᠪᠤᠯᠢᠶᠠᠭᠰᠠᠨ᠃ ᠮᠥᠨ ᠲᠡᠷᠡ ᠲᠠᠯᠠ ᠨᠤᠲᠤᠭ ᠲᠤ᠌ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠬᠥᠮᠦᠰ ! ᠬᠡᠷᠪᠡ ᠥᠭᠡᠷᠡ ᠬᠥᠮᠦᠰ ᠲᠡᠳᠡᠨ ᠦ᠌ ᠬᠦᠰᠡᠯ ᠱᠠᠭᠠᠷᠳᠠᠯᠭᠠ ᠨᠢ ᠬᠡᠳᠦᠢ ᠴᠢᠬᠤᠯᠠ ᠪᠢᠰᠢ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠣᠯ ᠲᠡᠳᠡᠨ ᠦ᠌ ᠬᠦᠰᠡᠯ ᠱᠠᠭᠠᠷᠳᠠᠯᠬᠠ ᠦᠭᠡᠢ ᠠᠮᠢᠳᠤᠷᠠᠯ ᠳ᠋ᠤᠨᠢ ᠠᠲᠠᠭᠠᠷᠬᠠᠮᠠᠷ ᠠᠵᠢ᠃ ᠡᠨᠡ ᠬᠦ᠌ ᠣᠬᠣᠷᠬᠠᠨ ᠠᠶᠠᠯᠠᠯ ᠨᠢ ᠨᠠᠳᠠ ᠳ᠋ᠤ᠌ ᠶᠠᠭ ᠯᠠ ᠬᠠᠭᠤᠴᠢᠨ ᠲᠡᠦᠬᠡ ᠶ᠋ᠢᠨ ᠨᠣᠮ ᠳ᠋ᠤ᠌ ᠣᠷᠣᠵᠤ ᠤᠨᠲᠠᠭᠰᠠᠨ ᠰᠢᠭ᠋᠂ ᠡᠨᠡ ᠪᠦᠬᠦᠨ ᠮᠢᠨᠢ ᠪᠦᠷ ᠯᠡ ᠵᠡᠭᠦᠳᠦ ᠪᠠᠢᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠵᠢ ᠪᠢᠯᠡ ( ᠵᠢᠷᠤᠭ 43 ᠪᠠ 44 ) ᠃
ᠪᠣᠳᠣᠯ ᠠ᠋ᠴᠠ ᠪᠠᠨ ᠠᠯᠭᠤᠷ ᠰᠠᠯᠬᠤ ᠦᠶᠡ ᠳ᠋ᠦ᠍ ᠪᠢᠳᠡ ᠠᠮᠠᠷᠠᠵᠤ ᠪᠠᠢᠭᠠ ᠲᠡᠮᠡᠭᠡᠨ ᠵᠢᠩ ᠳᠡᠭᠡᠷᠡ ᠬᠦᠷᠴᠢᠬᠡᠭᠡᠳ ᠪᠠᠢᠯᠠ᠃ ᠲᠡᠳᠡ《WOSTWAG》 ᠤᠨ ᠪᠠᠷᠠᠭᠠ ᠶ᠋ᠢ ᠠᠷᠤ ᠮᠣᠩᠭᠣᠯ ᠠ᠋ᠴᠠ ᠠᠪᠴᠢᠷᠠᠵᠤ ᠪᠠᠢᠭᠠ ᠨᠢ ᠡᠨᠡ ᠠᠵᠢ ᠃ ᠵᠢᠵᠢᠭᠬᠡᠨ ᠮᠠᠢᠬᠠᠨ ᠤ᠋ ᠡᠮᠦᠨᠡ ᠬᠥᠮᠦᠰ ᠲᠣᠮᠣᠬᠠᠨ ᠭᠠᠯ ᠢ᠋ ᠲᠣᠭᠣᠷᠢᠨ ᠰᠠᠭᠤᠵᠠᠭᠠᠵᠤ ᠪᠠᠢᠪᠠ᠃ ᠮᠣᠩᠭᠣᠯ ᠮᠠᠶᠢᠭ ᠤ᠋ᠨ ᠬᠣᠭᠣᠯᠠᠨ ᠤ᠋ ᠦᠨᠦᠷ ᠨᠢ ᠬᠥᠬᠡ ᠤᠲᠤᠭᠠ ᠲᠠᠢ ᠨᠢ ᠬᠣᠯᠢᠯᠳᠤᠨ ᠦᠨᠦᠷᠲᠦᠬᠦ ᠠᠵᠢ᠃ ᠬᠤᠴᠠᠨ ᠬᠣᠷᠭᠣᠭᠣᠬᠤ ᠵᠢᠩ ᠦ᠋ᠨ ᠨᠣᠬᠠᠳ ᠪᠢᠳᠡᠨ ᠢ᠋ ᠤᠭᠲᠤᠨ ᠢᠷᠡᠬᠦ ᠳ᠋ᠦ᠍ ᠢᠷᠵᠠᠢᠭᠰᠠᠨ ᠰᠢᠳᠦ ᠨᠢ ᠬᠦᠷᠲᠡᠯᠡ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃
ᠵᠢᠷᠤᠭ 41 ᠵᠣᠨ ᠤ ᠪᠡᠯᠴᠢᠭᠡᠷ ᠲᠦ ᠪᠠᠢᠭᠠ ᠲᠡᠮᠡᠭᠡᠳ
ᠪᠠᠷᠠᠭᠠᠨ ᠤ᠋ ᠪᠣᠭᠣᠳᠠᠯ ᠬᠠᠢᠷᠴᠠᠭ ᠤ᠋ᠳ ᠢ᠋ ᠠᠳᠠ ᠲᠡᠨᠳᠡ ᠣᠪᠣᠭᠠᠯᠠᠨ ᠲᠠᠯᠪᠢᠵᠠᠢ᠃ ᠲᠣᠮᠣ ᠪᠣᠭᠣᠳᠠᠯ ᠤ᠋ᠳ ᠠ᠋ᠴᠠ ᠨᠢ ᠨᠣᠣᠰᠣᠨ ᠤ᠋ ᠦᠨᠦᠷ ᠭᠠᠷᠴᠤ᠂ ᠲᠣᠮᠣ ᠬᠠᠢᠷᠴᠠᠭ ᠤ᠋ᠳ ᠠ᠋ᠴᠠ ᠨᠢ ᠬᠦᠳᠡᠷᠢ ᠶ᠋ᠢᠨ ᠵᠢᠭᠠᠷ ᠤ᠋ᠨ ᠦᠨᠦᠷ ᠠᠩᠬᠢᠯᠵᠤ ᠪᠠᠢᠪᠠ᠃ ᠠᠷᠠᠰᠤ ᠨᠣᠣᠰᠣ᠂ ᠬᠥᠮᠦᠨ ᠠᠮᠢᠲᠠᠨ ᠵᠢᠴᠢ ᠲᠠᠯᠠ ᠨᠤᠲᠤᠭ ᠲᠠᠢ ᠪᠠᠨ ᠨᠡᠢᠯᠡᠭᠡᠳ ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠬᠠᠮᠠᠷ ᠴᠣᠷᠭᠢᠮᠠ ᠦᠨᠦᠷ ᠭᠠᠷᠬᠤ ᠠᠵᠢ᠃ ᠥᠩᠭᠡ ᠢᠯᠭᠠᠷᠠᠭᠰᠠᠨ ᠬᠤᠪᠴᠠᠰᠤ ᠲᠠᠢ ᠮᠣᠩᠭᠣᠯᠴᠤᠳ ᠪᠥᠰᠡᠨ ᠳ᠋ᠡᠭᠡᠨ ᠮᠥᠩᠭᠥᠨ ᠬᠤᠢ ᠲᠠᠢ ᠬᠢᠲᠤᠭᠠ ᠤᠨᠵᠢᠭᠤᠯᠤᠨ᠂ ᠲᠡᠮᠡᠭᠡᠳ ᠵᠢᠴᠢ ᠠᠴᠢᠶᠠᠳ ᠤ᠋ᠨ ᠳᠤᠮᠳᠠ ᠨᠠᠭᠠᠰᠢ ᠴᠠᠭᠠᠰᠢ ᠠᠯᠬᠤᠯᠠᠨᠠ᠃ ᠬᠡᠪᠢᠵᠦ ᠪᠠᠢᠭᠠ ᠲᠡᠮᠡᠭᠡᠳ ᠢ᠋ᠶ᠋ᠡᠨ ᠲᠡᠳᠡ ᠵᠡᠷᠭᠡᠴᠡᠭᠦᠯᠦᠨ ᠬᠡᠪᠲᠡᠭᠦᠯᠵᠡᠢ (ᠵᠢᠷᠤᠭ 40) ᠃
ᠪᠠᠰᠠ ᠬᠡᠳᠦᠢ ᠤᠳᠠᠭᠠᠨ ᠡᠨᠡ ᠬᠦ᠌ ᠪᠢᠳᠠᠭᠤ ᠲᠣᠮᠣ ᠠᠮᠢᠲᠠᠨ ᠬᠥᠮᠦᠰ ᠲᠦ᠍ ᠦᠢᠯᠡᠴᠢᠯᠡᠳᠡᠭ ᠪᠣᠯ (ᠵᠢᠷᠤᠭ 39) ? ᠲᠡᠳᠡᠨ ᠳ᠋ᠦ᠍ ᠦᠨᠡᠨ ᠳ᠋ᠡᠭᠡᠨ ᠳᠡᠮᠡᠢ ᠤᠳᠠᠭᠠᠨ ᠴᠠᠭ ᠭᠡᠵᠦ ᠠᠯᠠᠭᠠ ᠪᠥᠭᠡᠳ ᠡᠴᠦᠰ ᠦ᠋ᠨ ᠡᠴᠦᠰ ᠲᠦ᠍ ᠠᠴᠢᠶᠠᠨ ᠤ᠋ ᠮᠠᠰᠢᠨ ᠢ᠋ᠶ᠋ᠠᠷ ᠣᠷᠣᠯᠠᠭᠳᠠᠬᠤ ᠪᠣᠯᠤᠨᠠ ᠃ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠠᠬᠢ ᠲᠡᠮᠡᠭᠡᠳ ᠦ᠋ᠨ ᠪᠡᠯᠴᠢᠭᠡᠷ ᠦ᠋ᠨ ᠣᠷᠣᠨ ᠳ᠋ᠤ᠌ ᠣᠳᠣᠬᠠᠨ ᠪᠠᠰᠠ ᠬᠠᠶᠠ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠴᠢᠯᠠᠭᠤᠨ ᠲᠣᠰᠣ ᠨᠡᠮᠡᠬᠦ ᠥᠷᠲᠡᠭᠡ ᠮᠡᠲᠦ ᠶ᠋ᠢᠨ ᠰᠢᠨᠡ ᠠᠶᠠᠨ ᠵᠥᠭᠡᠭᠡᠪᠦᠷᠢ ᠶ᠋ᠢᠨ ᠪᠠᠭᠠᠵᠢ ᠳ᠋ᠤ᠌ ᠦᠢᠯᠡᠴᠢᠯᠡᠬᠦ ᠵᠦᠢᠯ ᠦ᠋ᠳ ᠢᠯᠡᠷᠡᠬᠦ ᠪᠣᠯᠤᠨᠠ᠃
ᠵᠤᠨ ᠮᠠᠷᠺᠦᠸᠨ᠋ᠲ ᠨᠠᠮᠠᠶ᠋ᠢ ᠶᠣᠪᠣᠷᠴᠤ ᠪᠣᠳᠣᠯᠭᠠᠰᠢᠷᠠᠯ ᠠ᠋ᠴᠠ ᠮᠢᠨᠢ ᠰᠠᠯᠭᠠᠬᠤ ᠦᠶᠡ ᠳ᠋ᠦ᠍ ᠪᠢᠳᠡᠨ ᠦ᠌ ᠡᠮᠦᠨᠡ ᠨᠢᠭᠡᠨᠲᠡ ᠵᠠᠩᠪᠧᠢ ᠰᠢᠶᠠᠨ ᠤ᠋ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃
— ᠪᠢᠳᠡ ᠠᠳᠠ ᠪᠠᠭᠠ ᠠᠮᠠᠷᠠᠯᠲᠠ ᠬᠢᠵᠦ ᠪᠣᠯᠤᠨᠠ ᠭᠡᠵᠦ ᠵᠢᠯᠣᠭᠣᠴᠢ ᠱᠢᠯᠤᠹ ᠶᠠᠷᠢᠬᠤ ᠳ᠋ᠤ᠌ ᠪᠢᠳᠡ ᠵᠥᠪᠰᠢᠶᠡᠷᠡᠵᠦ᠂ ᠮᠠᠰᠢᠨ ᠮᠠᠨᠢ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠨᠢᠭᠡ ᠲᠣᠮᠣ ᠬᠦᠷᠢᠶᠡᠨ ᠳ᠋ᠦ᠍ ᠬᠦᠷᠴᠦ ᠵᠣᠭᠰᠣᠪᠠ᠃ ᠪᠢᠳᠡᠨ ᠢ᠋ ᠮᠠᠰᠢᠨ ᠠ᠋ᠴᠠ ᠪᠠᠭᠤᠵᠤ ᠠᠮᠵᠢᠬᠤ ᠠ᠋ᠴᠠ ᠤᠷᠢᠳ ᠪᠢᠴᠢᠭ ᠪᠠᠷᠢᠮᠲᠠ ᠵᠢᠴᠢ ᠠᠴᠢᠶᠠ ᠶ᠋ᠢ ᠰᠢᠯᠭᠠᠬᠤ ᠪᠠᠷ ᠢᠷᠡᠭᠰᠡᠨ ᠴᠡᠷᠢᠭ ᠪᠠ ᠠᠯᠪᠠᠲᠠᠳ ᠢᠷᠡᠵᠦ ᠲᠣᠭᠣᠷᠢᠨ ᠵᠣᠭᠰᠣᠪᠠ᠃ ᠢᠷᠡᠭᠰᠡᠨ ᠬᠥᠮᠦᠰ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠲᠡᠢᠮᠦ ᠠᠶᠤᠯ ᠲᠠᠢ ᠰᠠᠨᠠᠭᠳᠠᠬᠤ ᠦᠭᠡᠢ᠃ ᠪᠢ ᠨᠢᠭᠡ ᠠᠳᠬᠤ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠪᠠᠨ ᠭᠠᠷᠭᠠᠨ ᠲᠠᠷᠬᠠᠭᠠᠨ ᠥᠭᠬᠦ ᠳ᠋ᠦ᠍ ᠲᠡᠳᠡ ᠳᠣᠣᠷᠠ ᠪᠠᠨ ᠪᠠᠶᠠᠷᠯᠠᠨ ᠢᠨᠢᠶᠡᠵᠡᠭᠡᠪᠡ᠃
— ᠪᠠᠰᠠ ᠴᠤ᠌ ᠨᠢᠭᠡ ᠬᠠᠴᠢᠨ ᠤᠯᠤᠰ ᠰᠢᠦ ! ᠡᠢᠮᠦ ᠠᠮᠠᠷᠬᠠᠨ ᠰᠢᠢᠳᠪᠦᠷᠢᠯᠡᠭᠡᠳ ᠶᠠᠪᠤᠭᠤᠯᠴᠢᠬᠠᠳᠠᠭ ᠴᠡᠷᠢᠭ ᠭᠡᠵᠦ ᠮᠣᠩᠭᠣᠯ ᠢ᠋ ᠡᠵᠡᠯᠡᠨ ᠠᠪᠤᠶᠠ ᠭᠡᠵᠦ ᠶᠠᠭ ᠪᠣᠳᠣᠬᠤ ᠦᠭᠡᠢ ᠪᠠᠢᠬᠠ ᠳᠠ ᠭᠡᠵᠦ ᠬᠠᠮᠲᠤ ᠠᠶᠠᠯᠠᠭᠴᠢ ᠶ᠋ᠢᠨ ᠨᠢᠭᠡ ᠮᠠᠨᠢ ᠶᠠᠷᠢᠬᠤ ᠳ᠋ᠤ᠌ ᠰᠢᠯᠤᠹ ᠡᠯᠭᠦᠨ ᠠᠪᠴᠤ :
— ᠡᠳᠡ ᠲᠡᠢᠮᠦ ᠶᠠᠭᠤᠮᠠ ᠪᠣᠳᠣᠬᠤ ᠬᠥᠮᠦᠰ ᠪᠢᠰᠢ ᠠ᠋᠃ ᠬᠢᠳᠡᠯ ᠦᠭᠡᠢᠳᠡᠬᠦ ᠳ᠋ᠡᠭᠡᠨ ᠬᠠᠶᠠ ᠨᠢᠭᠡ 《ᠲᠣᠭᠯᠠᠭᠠᠮ 》ᠣᠯᠵᠤ᠂ ᠵᠤᠭᠠ ᠴᠡᠩᠭᠡᠯ ᠢ᠋ᠶ᠋ᠡᠨ ᠬᠠᠩᠭᠠᠵᠤ ᠪᠠᠢᠭᠠ ᠲᠡᠳᠦᠢ᠃ ᠵᠠᠷᠢᠮ ᠳ᠋ᠠᠭᠠᠨ ᠡᠨᠡ 《ᠲᠣᠭᠯᠠᠭᠠᠮ 》ᠨᠢ ᠲᠡᠳᠡᠨ ᠳ᠋ᠦ᠍ ᠶᠠᠷᠰᠢᠭᠲᠠᠢ ᠭᠡᠵᠦ ᠰᠠᠨᠠᠭᠳᠠᠭᠰᠠᠨ ᠬᠥᠮᠦᠨ ᠪᠤᠶᠤ ᠠᠳᠤᠭᠤᠰᠤ ᠴᠤ᠌ ᠪᠠᠢᠵᠤ ᠪᠣᠯᠳᠠᠭ᠃ ᠵᠠᠷᠢᠮ ᠤᠨᠤᠬᠠ ᠶ᠋ᠢ ᠪᠠᠷᠢᠵᠤ ᠤᠨᠤᠭᠠᠳ ᠮᠣᠩᠭᠣᠯ ᠠᠳᠤᠭᠤᠨ ᠤ᠋《ᠠᠩ 》 ᠳ᠋ᠤ᠌ ᠴᠤ᠌ ᠭᠠᠷᠳᠠᠭ᠃ ᠶᠠᠭ ᠦᠨᠡᠨᠳᠡᠭᠡᠨ ᠡᠳᠡᠭᠡᠷ ᠴᠡᠷᠢᠭ ᠴᠢᠨᠢ ᠶᠠᠭ ᠯᠠ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠰᠣᠨᠢᠭᠤᠴᠢᠯᠠᠭᠰᠠᠨ ᠬᠡᠦᠬᠡᠳ ᠭᠡᠵᠦ ᠮᠡᠳᠡ ! ᠭᠡᠯᠡ᠃
ᠭᠡᠬᠦ ᠳ᠋ᠦ᠍ ᠪᠠᠰᠠ ᠨᠢᠭᠡ ᠪᠠᠭᠠ ᠤᠴᠢᠷ ᠲᠠᠭᠠᠷᠠᠯᠳᠤᠭᠰᠠᠨ ᠶᠤᠮ᠃ ᠡᠭᠦᠨ ᠢ᠋ ᠪᠢᠳᠡᠨ ᠦ᠌ ᠵᠢᠯᠣᠭᠣᠴᠢ ᠳ᠋ᠤ᠌ ᠲᠠᠯᠠᠷᠬᠠᠬᠤ ᠶᠣᠰᠣᠲᠠᠢ᠃ ᠪᠢᠳᠡᠨ ᠢ᠋ ᠬᠥᠳᠡᠯᠦᠭᠡᠳ ᠬᠣᠲᠠ ᠶ᠋ᠢᠨ ᠡᠮᠦᠨᠡ ᠡᠭᠦᠳᠡ ᠪᠡᠷ ᠭᠠᠷᠬᠤ ᠦᠶᠡ ᠳ᠋ᠦ᠍ ᠰᠠᠬᠢᠭᠴᠢ ᠪᠢᠳᠡᠨ ᠢ᠋ ᠵᠣᠭᠰᠣᠭᠠᠭᠰᠠᠨ ᠪᠥᠭᠡᠳ ᠪᠢᠴᠢᠭ ᠪᠠᠷᠢᠮᠲᠠ ᠦᠵᠡᠨᠡ ᠭᠡᠬᠦᠯᠡᠷ ᠨᠢ ᠪᠢ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠪᠠᠨ ᠭᠠᠷᠳᠠᠭᠤᠯᠪᠠ᠃ ᠲᠡᠷᠡ ᠴᠡᠷᠢᠭ ᠢ᠋ ᠵᠢᠵᠢᠭᠦᠷ ᠦ᠋ᠨ ᠪᠠᠢᠰᠢᠩ ᠤᠷᠤᠭᠤ ᠠᠯᠬᠤᠵᠤ ᠪᠠᠢᠬᠤ ᠬᠣᠭᠣᠷᠣᠨᠳᠣ᠂ ᠳᠠᠬᠢᠨ ᠵᠣᠭᠰᠣᠭᠠᠭᠰᠠᠨ ᠳ᠋ᠤ᠌ ᠳᠤᠷᠠ ᠦᠭᠡᠢᠴᠡᠵᠦ ᠪᠠᠢᠭᠰᠠᠨ ᠪᠢ ᠵᠢᠯᠣᠭᠣᠴᠢ ᠤᠷᠤᠭᠤ 《ᠲᠣᠰᠣ ᠪᠠᠨ ᠨᠡᠮᠡ ! 》ᠭᠡᠵᠦ ᠬᠡᠯᠡᠪᠡ᠃ ᠮᠠᠰᠢᠨ ᠳᠣᠣᠷᠠ ᠪᠠᠨ ᠬᠠᠭᠠᠯᠭᠠ ᠪᠠᠷ ᠰᠤᠮᠤᠳᠠᠨ ᠭᠠᠷᠴᠤ ᠥᠷᠭᠡᠨ ᠵᠠᠮ ᠳ᠋ᠤ᠌ ᠣᠷᠣᠪᠠ ᠃ ᠠᠷᠤ ᠶ᠋ᠢᠨ ᠰᠢᠯ ᠢ᠋ᠶ᠋ᠡᠷ ᠠᠵᠢᠭᠯᠠᠬᠤ ᠳ᠋ᠤ᠌ ᠠᠷᠪᠠᠭᠠᠳ ᠴᠡᠷᠢᠭ ᠫᠤᠤ ᠪᠠᠨ ᠡᠷᠭᠦᠭᠡᠳ ᠪᠢᠳᠡᠨ ᠦ᠌ ᠤᠷᠤᠭᠤ ᠣᠨᠢᠯᠠᠵᠤ ᠪᠠᠢᠪᠠ᠃
— ᠲᠡᠳᠡ ᠫᠤᠤᠳᠠᠯᠠ ᠰᠢᠦ! ᠭᠡᠵᠦ ᠮᠠᠷᠺᠦᠸᠨ᠋ᠲ ᠬᠠᠰᠬᠢᠷᠤᠭᠠᠳ ᠲᠦᠰᠢᠯᠭᠡ ᠡᠴᠡ ᠪᠡᠨ ᠳᠣᠷᠣᠭᠰᠢ ᠪᠥᠬᠥᠢᠨ ᠬᠡᠪᠲᠡᠪᠡ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠵᠢᠯᠣᠭᠣᠴᠢ ᠮᠠᠨᠢ ᠵᠠᠮ ᠤ᠋ᠨ ᠭᠣᠣᠯ ᠠ᠋ᠴᠠ ᠭᠠᠷᠴᠤ :《ᠵᠤᠨ ᠤ᠋ ᠵᠠᠮ 》ᠬᠡᠮᠡᠭᠳᠡᠭᠰᠡᠨ ᠬᠠᠮᠤᠭ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠵᠠᠮ ᠢ᠋ᠶ᠋ᠠᠷ ᠲᠣᠰᠣ ᠪᠠᠨ ᠭᠦᠢᠴᠡᠳ ᠥᠭᠭᠦᠨ ᠳᠠᠪᠬᠢᠭᠤᠯᠬᠤ ᠳ᠋ᠤ᠌ ᠪᠢᠳᠡᠨ ᠦ᠌ ᠠᠷᠤ ᠳ᠋ᠤ᠌ ᠰᠢᠷᠣᠢ ᠲᠣᠭᠣᠰᠣ ᠭᠦᠢᠴᠡᠳ ᠳᠡᠭᠳᠡᠨ ᠪᠣᠰᠪᠠ᠃ ᠠᠷᠪᠠᠭᠠᠳ ᠮᠢᠨᠦ᠋ᠲ ᠦ᠋ᠨ ᠳᠠᠷᠠᠭᠠ ᠵᠢᠯᠣᠭᠣᠴᠢ ᠮᠠᠨᠢ ᠮᠠᠰᠢᠨ ᠢ᠋ᠶ᠋ᠠᠨ ᠵᠣᠭᠰᠣᠭᠠᠭᠠᠳ᠂ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠭᠯᠠᠭᠰᠠᠨ ᠢ᠋ᠶ᠋ᠠᠨ :
— ᠵᠥᠪᠬᠡᠨ ᠠᠶᠤᠯᠭᠠᠭᠰᠠᠨ ᠲᠡᠳᠦᠢ᠃ ᠬᠢᠲᠠᠳ ᠴᠡᠷᠢᠭ ᠦ᠋ᠳ ᠢ᠋ ᠲᠡᠭᠡᠵᠦ ᠶᠡᠬᠡ ᠦᠨᠡᠮᠰᠢᠭᠰᠡᠨ ᠦ᠌ ᠬᠡᠷᠡᠭ ᠠᠯᠠᠭᠠ᠃ ᠲᠡᠳᠡ ᠨᠠᠷ ᠤ᠋ᠨ ᠬᠠᠭᠤᠴᠢᠨ ᠫᠤᠤ ᠪᠡᠷ ᠴᠦ᠍ ᠶᠠᠭᠤᠮᠠ ᠣᠨᠣᠭᠠᠳᠠᠭ ᠦᠭᠡᠢ ᠪᠣᠯᠤᠯᠲᠠᠢ ᠭᠡᠮᠡᠨ ᠢᠨᠢᠶᠡᠨ ᠬᠡᠯᠡᠪᠡ᠃
ᠮᠠᠷᠺᠦᠸᠨ᠋ᠲ ᠣᠳᠣ ᠳ᠋ᠤ᠌ ᠬᠦᠷᠲᠡᠯᠡ ᠰᠡᠳᠬᠢᠯ ᠨᠢ ᠲᠠᠢᠪᠤᠰᠢᠷᠠᠭᠠ ᠦᠭᠡᠢ ᠪᠠᠢᠵᠤ᠂ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠡᠷ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠬᠦᠷᠦᠭᠡᠳ ᠰᠠᠶᠢ ᠵᠦᠭᠡᠷ ᠪᠣᠯᠵᠤ᠂ ᠲᠡᠷᠡ ᠬᠦ᠌ ᠠᠶᠤᠮᠰᠢᠭᠲᠠᠢ ᠬᠥᠩᠭᠡᠨ ᠬᠠᠭᠤᠮᠠᠭᠠᠢ ᠠᠵᠢᠯᠯᠠᠭᠠ ᠪᠣᠯᠤᠨ ᠫᠤᠤ ᠰᠤᠮᠤ ᠶ᠋ᠢᠨ ᠠᠶᠤᠯ ᠤ᠋ᠨ ᠲᠤᠬᠠᠢ ᠶᠠᠷᠢᠵᠤ ᠭᠠᠷᠪᠠ᠃ ᠪᠢᠳᠡᠨ ᠢ᠋ ᠬᠠᠭᠠᠯᠭᠠ ᠺᠠᠯᠦᠹ ᠲᠦ᠍ ᠨᠡᠯᠢᠶᠡᠳ ᠸᠤᠳᠡᠺ ᠪᠠ ᠡᠯᠪᠡᠭ ᠰᠠᠢᠬᠠᠨ ᠬᠣᠭᠣᠯᠠ ᠵᠣᠭᠣᠭᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠮᠠᠷᠺᠦᠸᠨ᠋ᠲ ᠦ᠋ᠨ ᠳᠠᠭᠤᠨ ᠤ᠋ ᠥᠩᠭᠡ ᠨᠢ ᠢᠯᠡᠷᠬᠡᠢ ᠰᠠᠢᠵᠢᠷᠠᠵᠤ ᠮᠡᠳᠡᠭᠳᠡᠪᠡ᠃
— ᠶᠣᠰᠣ ᠲᠠᠢ ᠭᠣᠶᠣ ᠠᠶᠠᠯᠠᠯ ! ᠬᠣᠶᠠᠳᠠᠬᠢ ᠤᠳᠠᠭᠠ ᠳᠠᠬᠢᠨ ᠠᠶᠠᠯᠠᠶᠠ ᠭᠡᠵᠦ ᠰᠠᠨᠠᠬᠤ ᠦᠭᠡᠢ ᠠᠶᠠᠯᠠᠯ ᠪᠠᠢᠨᠠ ᠭᠡᠵᠦ ᠮᠠᠷᠺᠦᠸᠨ᠋ᠲ ᠶᠠᠷᠢᠪᠠ᠃
— ᠲᠡᠭᠡᠪᠡᠯ ᠲᠠ? ᠭᠡᠳ ᠫᠦᠷᠫᠢᠰᠰ ᠨᠠᠳᠠ ᠤᠷᠤᠭᠤ ᠬᠠᠨᠳᠤᠪᠠ᠃
— ᠨᠠᠮᠠᠶ᠋ᠢ ᠲᠠ ᠳᠡᠮᠡᠢ ᠤᠳᠠᠯ ᠦᠭᠡᠢ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠳᠡᠭᠡᠷᠡ ᠡᠴᠡ ᠣᠯᠵᠤ ᠬᠠᠷᠠᠬᠤ ᠪᠣᠯᠤᠨᠠ ᠭᠡᠵᠦ ᠪᠢ ᠬᠠᠷᠢᠭᠤᠯᠪᠠ᠃
— ᠮᠠᠰᠢᠨ ᠮᠢᠨᠢ ᠶᠠᠮᠠᠷ ᠴᠠᠭ ᠲᠤ᠌ ᠴᠤ᠌ ᠪᠣᠯᠤᠭ᠂ ᠲᠠᠨ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠵᠤ ᠴᠢᠳᠠᠨᠠ ᠭᠡᠵᠦ ᠲᠡᠷᠡ ᠶᠠᠷᠢᠭᠠᠳ ᠮᠢᠨᠦ ᠳᠠᠷᠠᠭᠠᠴᠢ ᠶ᠋ᠢᠨ ᠮᠣᠩᠭᠣᠯ ᠤ᠋ᠨ ᠠᠶᠠᠯᠠᠯ ᠤ᠋ᠨ ᠲᠥᠯᠥᠭᠡ ᠬᠤᠨᠳᠠᠭᠠ ᠡᠷᠭᠦᠪᠡ᠃