ᠬᠠᠭᠠᠨ ᠪᠠᠳᠢᠷᠴᠢᠨ ᠬᠣᠶᠠᠷ-ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ Хаан бадарчин хоёр-Монгол ардын үлгэр
612ᠬᠠᠭᠠᠨ ᠪᠠᠳᠢᠷᠴᠢᠨ ᠬᠣᠶᠠᠷ-ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠨᠢᠭᠡᠨ ᠬᠠᠭᠠᠨ ᠪᠠᠢᠵᠤ ᠭᠡᠨᠡ᠃ ᠲᠡᠷᠡ ᠬᠠᠭᠠᠨ ᠰᠠᠭᠤᠭᠠ ᠬᠥᠮᠦᠨ ᠢ᠋ ᠪᠣᠰᠲᠠᠯᠠ᠂ ᠤᠨᠲᠠᠭᠠ ᠬᠥᠮᠦᠨ ᠢ᠋ ᠰᠡᠷᠡᠲᠡᠯᠡ ᠬᠤᠳᠠᠯ ᠬᠡᠯᠡᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠪᠢ ᠬᠠᠭᠠᠨ ᠰᠢᠷᠡᠭᠡ ᠪᠡᠨ ᠥᠭᠭᠦᠨᠡ ᠭᠡᠵᠦ ᠵᠠᠷ ᠲᠠᠷᠬᠠᠭᠠᠵᠠᠢ᠃ ᠭᠡᠲᠡᠯᠡ ᠬᠠᠭᠠᠨ ᠤ᠋ ᠳ᠋ᠤ᠌ ᠨᠢᠭᠡᠨ ᠦᠢᠯᠡᠴᠢᠨ ᠬᠦᠷᠴᠦ ᠢᠷᠡᠭᠡᠳ᠄ 《ᠬᠠᠭᠠᠨᠲᠠᠨ ᠮᠢᠨᠢ᠂ ᠪᠣᠯᠭᠣᠭᠠᠵᠤ ᠬᠠᠢᠷᠠᠯᠠ᠂ ᠤᠷᠵᠢᠳᠤᠷ ᠤ᠋ᠨ ᠰᠢᠷᠦᠭᠦᠨ ᠪᠣᠷᠣᠭᠠᠨ ᠢ᠋ᠶ᠋ᠠᠷ ᠪᠢ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠬᠠᠭᠠᠷᠠᠭᠰᠠᠨ ᠪᠠᠢᠭᠰᠠᠨ ᠢ᠋ ᠪᠥᠭᠡᠰᠦᠨ ᠦ᠌ ᠰᠢᠷᠮᠦᠰᠦ ᠪᠡᠷ ᠣᠶᠣᠭᠠᠳ ᠲᠣᠭᠲᠠᠭᠠᠴᠢᠬᠠᠯᠠ ᠰᠢᠦ ᠳᠡ! 》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠨᠢ ᠬᠠᠭᠠᠨ᠄ 《ᠫᠠᠢ᠂ ᠦᠢᠯᠡᠴᠢᠨ ᠮᠢᠨᠢ ᠴᠢ ᠶᠡᠬᠡ ᠮᠠᠭᠤ ᠣᠶᠣᠭᠰᠠᠨ ᠪᠠᠢᠨᠠ᠂ ᠥᠨᠥ ᠥᠷᠯᠥᠭᠡ ᠳᠠᠬᠢᠭᠠᠳ ᠪᠣᠷᠣᠭᠠ ᠣᠷᠣᠭᠰᠠᠨ ᠰᠢᠦ ᠳᠡ! 》 ᠭᠡᠬᠦ ᠳ᠋ᠦ᠍ ᠦᠢᠯᠡᠴᠢᠨ ᠦᠭᠡ ᠳᠠᠭᠤ ᠦᠭᠡᠢ ᠪᠣᠯᠤᠭᠠᠳ ᠭᠠᠷᠴᠤ ᠶᠠᠪᠤᠵᠠᠢ᠃ ᠦᠢᠯᠡᠴᠢᠨ ᠲᠡᠢ ᠵᠥᠷᠢᠭᠡᠳ ᠨᠢᠭᠡ ᠠᠳᠤᠭᠤᠴᠢᠨ ᠬᠠᠭᠠᠨ ᠤ᠋ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠡᠳ᠄ 《ᠵᠠ ᠬᠠᠭᠠᠨᠲᠠᠨ ᠮᠢᠨᠢ᠂ ᠲᠠᠯᠢᠢᠭᠠᠴᠢ ᠠᠪᠤ ᠳ᠋ᠤ᠌ ᠮᠢᠨᠢ ᠲᠩᠷᠢ ᠶ᠋ᠢᠨ ᠣᠳᠣ ᠶ᠋ᠢ ᠰᠤᠭᠤ ᠰᠤᠭᠤ ᠲᠠᠲᠠᠳᠠᠭ ᠰᠤᠷ ᠲᠠᠢ ᠰᠢᠯᠪᠢᠭᠦᠷ ᠪᠠᠢᠭᠰᠠᠨ ᠶᠤᠮ ᠰᠢᠦ ᠳᠡ 》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠠᠭᠠᠨ᠄ 《ᠬᠡᠢ᠂ ᠠᠳᠤᠭᠤᠴᠢᠨ ᠠ᠋! ᠦᠭᠡᠢ᠂ ᠲᠡᠷᠡ ᠰᠢᠯᠪᠢᠭᠦᠷ ᠴᠢᠨᠢ ᠶᠠᠭᠤ ᠴᠤ᠌ ᠪᠢᠰᠢ᠂ ᠮᠢᠨᠦ ᠲᠠᠯᠢᠢᠭᠠᠴᠢ ᠠᠪᠤ ᠳ᠋ᠤ᠌ ᠪᠦᠷ ᠨᠢᠭᠡ ᠭᠠᠩᠰᠠ ᠪᠠᠢᠭᠰᠠᠨ ᠶᠤᠮ᠂ ᠲᠡᠷᠡ ᠭᠠᠩᠰᠠ ᠪᠠᠷ ᠲᠠᠮᠠᠬᠢ ᠨᠡᠷᠡᠬᠦ ᠳ᠋ᠦ᠍ ᠤᠲᠤᠭᠠ ᠨᠢ ᠲᠩᠷᠢ ᠶ᠋ᠢᠨ ᠬᠠᠮᠤᠭ ᠣᠳᠣᠳ ᠢ᠋ ᠣᠭᠣᠰᠣᠷᠯᠠᠭᠠᠳ ᠢᠷᠡᠳᠡᠭ ᠪᠠᠢᠭᠰᠠᠨ ᠶᠤᠮ ᠰᠢᠦ ᠳᠡ! 》 ᠭᠡᠬᠦ ᠳ᠋ᠦ᠍ ᠠᠳᠤᠭᠤᠴᠢᠨ ᠡᠷᠡ ᠮᠥᠨ ᠯᠡ ᠦᠭᠡ ᠮᠤᠬᠤᠷᠳᠠᠭᠠᠳ ᠭᠠᠷᠴᠤ ᠣᠳᠴᠠᠢ᠃ ᠠᠳᠤᠭᠤᠴᠢᠨ ᠲᠠᠢ ᠵᠥᠷᠢᠭᠡᠳ ᠭᠠᠷ ᠲᠤ᠌ ᠪᠠᠨ ᠬᠤᠪᠢᠩ ᠪᠠᠷᠢᠭᠰᠠᠨ ᠨᠢᠭᠡ ᠪᠠᠳᠢᠷᠴᠢᠨ ᠣᠷᠣᠵᠤ ᠢᠷᠡᠯᠡ᠃
ᠬᠠᠭᠠᠨ ᠪᠠᠳᠢᠷᠴᠢᠨ ᠢ᠋ ᠬᠠᠷᠠᠭᠠᠳ᠄ 《ᠵᠠ ᠪᠠᠳᠢᠷᠴᠢᠨ ᠴᠢ ᠶᠠᠭᠤ ᠬᠢᠵᠦ ᠶᠠᠪᠤᠨᠠ?》 ᠭᠡᠰᠡᠨ ᠳ᠋ᠦ᠍ ᠄ 《ᠡᠩ᠂ ᠬᠠᠭᠠᠨᠲᠠᠨ ᠠ᠋! ᠦᠭᠡᠢ᠂ ᠲᠠ ᠨᠠᠮᠠ ᠶ᠋ᠢ ᠨᠢᠭᠡ ᠯᠡ ᠲᠠᠨᠢᠬᠤ ᠦᠭᠡᠢ ᠪᠠᠢᠨᠠ ᠳᠠ᠂ ᠶᠠᠭᠠᠬᠢᠪᠠ? ᠳᠡᠭᠡᠷᠡ ᠲᠠ ᠨᠠᠳᠠ ᠡᠴᠡ ᠨᠢᠭᠡ ᠬᠤᠪᠢᠩ ᠠᠯᠲᠠ ᠵᠢᠭᠡᠯᠡᠵᠦ ᠠᠪᠤᠭᠰᠠᠨ ᠰᠢᠦ ᠳᠡ! ᠦᠭᠡᠢ᠂ ᠲᠡᠭᠡᠭᠡᠳ ᠯᠡ ᠠᠯᠲᠠ ᠪᠠᠨ ᠠᠪᠬᠤ ᠪᠠᠷ ᠢᠷᠡᠯᠡ 》 ᠭᠡᠬᠦ ᠳ᠋ᠦ᠍ ᠬᠠᠭᠠᠨ ᠤᠴᠢᠷ ᠦᠭᠡᠢ ᠶᠡᠬᠡ ᠰᠠᠨᠳᠤᠷᠴᠤ ᠄ 《ᠦᠭᠡᠢ᠂ ᠪᠢ ᠴᠢᠮᠠ ᠡᠴᠡ ᠬᠡᠵᠢᠶᠡ ᠠᠯᠲᠠ ᠵᠢᠭᠡᠯᠡᠭᠰᠡᠨ ᠶᠤᠮ᠂ ᠪᠢᠲᠡᠭᠡᠢ ᠬᠤᠳᠠᠯ ᠶᠠᠷᠢᠭᠠᠳ ᠪᠠᠢ ᠴᠢ 》 ᠭᠡᠬᠦ ᠳ᠋ᠦ᠍ ᠡᠨᠡ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠤᠨᠲᠠᠵᠤ ᠪᠠᠢᠭᠰᠠᠨ ᠬᠠᠲᠤᠨ ᠰᠡᠷᠡᠵᠦ ᠢᠷᠡᠭᠡᠳ᠄ 《ᠦᠭᠡᠢ ᠶᠡᠷᠦ᠂ ᠣᠴᠢᠵᠤ ᠣᠴᠢᠵᠤ ᠬᠠᠭᠠᠨᠲᠠᠨ ᠳ᠋ᠤ᠌ ᠪᠠᠨ ᠬᠤᠳᠠᠯ ᠬᠡᠯᠡᠵᠦ᠂ ᠬᠠᠭᠠᠨ ᠠ᠋ᠴᠠ ᠪᠠᠨ ᠠᠯᠲᠠ ᠨᠡᠬᠡᠨᠡ ᠭᠡᠨᠡ᠂ ᠴᠢ ᠶᠠᠭᠠᠬᠢᠭᠰᠠᠨ ᠵᠠᠳᠠᠷᠠᠭᠰᠠᠨ ᠲᠠᠷᠢᠬᠢ ᠪᠣᠢ ᠵᠠᠨᠴᠢ᠂ ᠵᠣᠳᠣ ᠡᠭᠦᠨ ᠢ᠋ 》 ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤ᠌᠂ ᠪᠠᠳᠢᠷᠴᠢᠨ ᠄ 《ᠵᠠ᠂ ᠪᠢ ᠬᠤᠳᠠᠯ ᠬᠡᠯᠡᠭᠰᠡᠨ ᠪᠣᠯ ᠣᠳᠣ ᠬᠠᠭᠠᠨᠲᠠᠨ ᠲᠠ ᠨᠠᠳᠠ ᠳ᠋ᠤ᠌ ᠬᠠᠭᠠᠨ ᠰᠢᠷᠡᠭᠡ ᠪᠡᠨ ᠥᠭ! 》 ᠭᠡᠬᠦ ᠳ᠋ᠦ᠍ ᠬᠠᠭᠠᠨ ᠭᠡᠨᠡᠳᠲᠡᠬᠡᠨ ᠰᠠᠶᠢ ᠤᠬᠠᠭᠠᠨ ᠣᠷᠣᠵᠤ᠄ 《ᠠ᠂ ᠰᠠᠨᠠᠯᠠ᠂ ᠰᠠᠨᠠᠯᠠ᠂ ᠲᠡᠢᠮᠦ᠂ ᠲᠡᠢᠮᠦ ᠪᠢ ᠴᠢᠮᠠ ᠡᠴᠡ ᠨᠢᠭᠡ ᠬᠤᠪᠢᠩ ᠠᠯᠲᠠ ᠵᠢᠭᠡᠯᠡᠵᠦ ᠠᠪᠤᠭᠰᠠᠨ ᠶᠤᠮ ᠰᠢᠦ ᠳᠡ᠂ ᠣᠳᠣᠬᠠᠨ ᠲᠡᠭᠦᠨ ᠢ ᠪᠡᠨ ᠥᠭᠭᠦᠶᠡ! 》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠪᠠᠳᠢᠷᠴᠢᠨ᠄ 《ᠵᠠ᠂ ᠬᠠᠭᠠᠨᠲᠠᠨ ᠲᠠ ᠮᠢᠨᠦ ᠨᠢᠭᠡ ᠬᠤᠪᠢᠩ ᠠᠯᠲᠠ ᠶ᠋ᠢ ᠯᠡ ᠥᠭᠴᠢᠬᠡᠪᠡᠯ ᠪᠣᠯᠬᠤ ᠨᠢ ᠲᠡᠷᠡ 》 ᠭᠡᠵᠦ ᠬᠡᠯᠡᠵᠡᠢ᠃
ᠢᠩᠭᠢᠭᠡᠳ ᠪᠠᠳᠢᠷᠴᠢᠨ ᠰᠠᠭᠤᠭᠠ ᠬᠥᠮᠦᠨ ᠢ᠋ ᠪᠣᠰᠲᠠᠯᠠ᠂ ᠤᠨᠲᠠᠭᠠ ᠬᠥᠮᠦᠨ ᠢ᠋ ᠰᠡᠷᠡᠲᠡᠯᠡ ᠬᠤᠳᠠᠯ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠪᠣᠯᠬᠣᠷ ᠠᠷᠭᠠ ᠪᠤᠶᠤ ᠬᠠᠭᠠᠨ ᠲᠡᠭᠦᠨ ᠳ᠋ᠦ᠍ ᠬᠠᠭᠠᠨ ᠰᠢᠷᠡᠭᠡ ᠪᠡᠨ ᠥᠭᠭᠦᠭᠡ ᠦᠭᠡᠢ ᠨᠢᠭᠡ ᠬᠤᠪᠢᠩ ᠠᠯᠲᠠ ᠶ᠋ᠢ ᠨᠢ ᠥᠭᠭᠦᠭᠡᠳ ᠪᠠᠳᠢᠷᠴᠢᠨ ᠪᠣᠯᠴᠢᠮ ᠦᠭᠡᠢ ᠬᠠᠭᠠᠨ ᠢ᠋ ᠨᠢᠭᠡ ᠰᠠᠢᠨ ᠬᠠᠰᠢᠷᠠᠭᠠᠭᠰᠠᠨ ᠭᠡᠳᠡᠭ᠃
ᠠᠮᠢᠯᠠᠭᠤᠯᠤᠭᠴᠢ᠄ ᠬᠠᠰᠴᠢᠮᠡᠭ
ᠬᠢᠨᠠᠭᠴᠢ᠄ ᠳ ᠪᠥᠬᠡᠴᠢᠯᠠᠭᠤ᠂ ᠱᠤᠳᠤᠷᠭᠤ᠂ ᠪᠠᠶᠠᠷᠴᠡᠴᠡᠭ