ᠲᠦᠦᠷᠢᠮᠡ ᠦᠭᠡᠢ ᠬᠣᠷᠸᠠ - ᠭ· ᠴᠢᠩᠪᠠᠭᠠᠲᠤᠷ-Түүрамгүй хорвоо-Г·Чинбаатар
617ᠲᠦᠦᠷᠢᠮᠡ ᠦᠭᠡᠢ ᠬᠣᠷᠸᠠ①
ᠭ· ᠴᠢᠩᠪᠠᠭᠠᠲᠤᠷ
ᠳᠦᠦᠷᠢᠮᠡ ᠭᠡᠳᠡᠭ ᠰᠠᠢᠨ ᠴᠤ ᠬᠡᠦᠬᠡᠨ᠂ ᠰᠠᠢᠬᠠᠨ ᠴᠤ ᠬᠡᠦᠬᠡᠨ ᠦ᠌ ᠲᠤᠬᠠᠢ ᠳᠠᠭᠤᠤ ᠬᠡᠵᠢᠶᠡ ᠡᠴᠡ ᠴᠦ᠍ ᠶᠦᠮ ᠪᠣᠢ ᠮᠣᠩᠭᠣᠯᠴᠤᠳ ᠤ᠋ᠨ ᠳᠤᠮᠳᠠ ᠳᠠᠭᠤᠯᠠᠭᠳᠠᠭᠰᠠᠭᠠᠷ ᠥᠨᠥ ᠳ᠋ᠦ᠍ ᠬᠦᠷᠴᠡᠢ᠃ ᠮᠣᠩᠭᠣᠯᠴᠤᠳ ᠰᠠᠢᠬᠠᠨ ᠬᠡᠦᠬᠡᠨ᠂ ᠭᠣᠶᠣ ᠬᠡᠦᠬᠡᠨ ᠡᠴᠡ ᠢᠯᠡᠭᠦᠦ ᠲᠡᠢ ᠪᠡᠷ ᠰᠠᠢᠨ ᠬᠡᠦᠬᠡᠨ᠂ ᠤᠬᠠᠭᠠᠨ ᠲᠠᠢ ᠬᠡᠦᠬᠡᠨ ᠭᠡᠵᠦ ᠶᠠᠷᠢᠳᠠᠭ ᠨᠢ ᠠᠭᠠᠯᠢ ᠵᠠᠩ᠂ ᠠᠵᠢᠯ ᠶᠠᠪᠤᠳᠠᠯ᠂ ᠤᠬᠠᠭᠠᠨ ᠰᠡᠭᠡᠭᠡ ᠶ᠋ᠢ ᠨᠢ ᠥᠩᠭᠡ ᠵᠢᠰᠦᠨ ᠡᠴᠡ ᠨᠢ ᠴᠢᠬᠤᠯᠠ ᠳ᠋ᠤ᠌ ᠦᠵᠡᠳᠡᠭ ᠦ᠋ᠨ ᠬᠢ ᠶᠦᠮ᠃ ᠲᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ《ᠵᠢᠰᠦᠨ ᠦ᠌ ᠰᠠᠢᠬᠠᠨ ᠠ᠋ᠴᠠ᠂ ᠵᠢᠷᠦᠬᠡᠨ ᠦ᠌ ᠰᠠᠢᠬᠠᠨ》 ᠭᠡᠰᠡᠨ ᠵᠦᠢᠲᠡᠢ ᠦᠭᠡ ᠭᠠᠷᠤᠭᠰᠠᠨ ᠠᠵᠢ!
ᠦᠨᠡᠬᠡᠷ ᠴᠦ᠍ ᠳᠦᠦᠷᠢᠮᠡ ᠰᠢᠭ ᠬᠡᠦᠬᠡᠨ ᠣᠳᠣ ᠪᠠᠢᠭᠠ ᠪᠣᠯ ᠤᠤ? ᠬᠣᠷᠸᠠ ᠶ᠋ᠢᠨ ᠪᠦᠬᠦ ᠡᠷᠡᠴᠦᠦᠯ ᠰᠠᠢᠬᠠᠨ ᠥᠩᠭᠡᠨ ᠳ᠋ᠦ᠍ ᠳᠤᠷᠠᠲᠠᠢ ᠨᠢ ᠦᠨᠡᠨ᠃ ᠭᠡᠲᠡᠯᠡ ᠨᠠᠰᠤᠨ ᠤ᠋ ᠬᠠᠨᠢ ᠶ᠋ᠢᠨ ᠵᠠᠶᠠᠭᠠ ᠬᠣᠯᠪᠣᠬᠤ ᠭᠡᠳᠡᠭ ᠳᠤᠷᠠ ᠰᠢᠷᠠ ᠪᠠᠷ ᠪᠣᠯᠬᠤ ᠤᠴᠢᠷ ᠪᠢᠰᠢ ᠪᠣᠯᠬᠣᠷ ᠳᠤᠯᠠᠢᠭᠰᠠᠨ ᠰᠠᠢᠬᠠᠨ ᠴᠢᠷᠠᠢ ᠲᠠᠢ ᠪᠠᠢᠯᠠ ᠭᠡᠳ ᠳᠤᠨᠳᠠᠭᠤᠷᠬᠠᠨ ᠤᠬᠠᠭᠠᠨ ᠲᠠᠢ᠂ ᠲᠠᠪᠲᠤᠷ ᠦᠭᠡᠢ ᠠᠭᠠᠰᠢ ᠲᠠᠢ᠂ ᠠᠵᠢᠯ ᠦᠭᠡᠢ ᠫᠠᠳ᠂ ᠠᠭᠠᠯᠢ ᠦᠭᠡᠢ ᠶᠠᠭ ᠬᠡᠦᠬᠡᠨ ᠢ᠋ ᠭᠣᠯᠣᠬᠤ ᠦᠭᠡᠢ ᠭᠡᠵᠦ ᠦᠭᠡᠢ ᠰᠢᠦ ᠳᠡ! ᠴᠠᠭ ᠤ᠋ᠨ ᠥᠩᠭᠡ ᠶ᠋ᠢ ᠳᠠᠭᠠᠭᠰᠠᠨ ᠦᠨᠡ ᠪᠡᠨᠡ ᠲᠡᠢ ᠬᠤᠪᠴᠠᠰᠤ ᠵᠠᠰᠠᠯ ᠲᠠᠢ᠂ ᠭᠠᠵᠠᠷ ᠤ᠋ᠨ ᠵᠠᠢ ᠠ᠋ᠴᠠ ᠦᠨᠦᠷᠲᠦᠮᠡ ᠰᠦᠷᠴᠢᠭ ᠬᠠᠩᠬᠤᠯᠤᠭᠤᠯᠤᠭᠰᠠᠨ ᠳᠠᠭᠢᠨᠢ ᠰᠢᠭ᠋ ᠭᠣᠶᠣᠬᠠᠨ ᠬᠡᠦᠬᠡᠨᠴᠦᠳ ᠳᠡᠷᠭᠡᠳᠡᠭᠦᠷ ᠳᠠᠩᠬᠢᠯᠵᠠᠵᠤ ᠥᠩᠭᠡᠷᠡᠬᠦ ᠳ᠋ᠦ᠍ ᠡᠷᠡᠴᠦᠦᠯ ᠪᠦᠷ ᠡᠷᠭᠢᠵᠦ ᠬᠠᠷᠠᠴᠢᠬᠠᠭᠠᠳ᠂《ᠥ ᠦᠭᠡᠢ ᠬᠥᠭᠡᠷᠦᠬᠦᠨ ᠲᠥᠷᠥᠭᠰᠡᠨ ᠪᠦᠰᠡᠭᠦᠢ᠁》 ᠭᠡᠵᠦ ᠨᠢᠳᠦ ᠪᠡᠨ ᠤᠨᠠᠭᠠᠴᠢᠬᠠᠮᠠ ᠪᠣᠯᠳᠠᠭ᠃ ᠳᠦᠦᠷᠢᠮᠡ ᠴᠤ ᠶᠤᠮ ᠤᠤ? ᠭᠡᠬᠦ ᠡᠴᠡ ᠰᠡᠳᠬᠢᠯ ᠬᠥᠪᠬᠢᠵᠦ ᠠᠪᠤᠨᠠ᠃
ᠠᠯᠤᠰ ᠬᠣᠯᠠ ᠶ᠋ᠢᠨ ᠭᠠᠵᠠᠷ ᠲᠤ
ᠠᠮᠠᠷᠠᠭ ᠬᠡᠦᠬᠡᠨ ᠪᠠᠢᠳᠠᠭ
ᠠᠯᠳᠠᠷ ᠨᠡᠷᠡ ᠨᠢ ᠳᠦᠣᠷᠢᠮᠡ
ᠠᠢ ᠳᠦᠣᠷᠢᠮᠡ ᠰᠠᠢᠬᠠᠨ ᠳᠦᠣᠷᠢᠮᠡ ᠭᠡᠵᠦ ᠮᠣᠩᠭᠣᠯ ᠵᠠᠯᠠᠭᠤᠴᠤᠳ ᠲᠠᠢᠸᠠᠨ ᠤ᠋ ᠢᠨᠠᠭ ᠤ᠋ᠨ ᠳᠠᠭᠤᠤ ᠶ᠋ᠢ ᠮᠣᠩᠭᠣᠯᠴᠢᠯᠠᠨ ᠳᠠᠭᠤᠯᠠᠵᠠᠭᠠᠨᠠ᠃
ᠭᠡᠪᠡᠴᠦ ᠡᠨᠡ ᠬᠣᠷᠸᠠ ᠴᠢᠨᠢ ᠳᠦᠣᠷᠢᠮᠡ ᠦᠭᠡᠢ ᠬᠣᠷᠸᠠ ᠭᠡᠳᠡᠭ ᠢ᠋ ᠡᠷᠡᠴᠦᠦᠯ ᠶᠡᠬᠡ ᠬᠣᠵᠢᠭᠤ ᠤᠬᠠᠭᠠᠷᠠᠳᠠᠭ᠃《ᠠᠮᠵᠢᠯᠲᠠ ᠣᠯᠤᠭᠰᠠᠨ ᠡᠷᠡᠭᠲᠡᠢ ᠳ᠋ᠦ᠍ ᠤᠬᠠᠭᠠᠯᠢᠭ ᠪᠣᠯᠤᠭᠰᠠᠨ ᠪᠦᠰᠡᠭᠦᠢ ᠲᠦᠰᠢᠭ ᠪᠣᠯᠳᠠᠭ》ᠭᠡᠵᠦ ᠰᠣᠬᠣᠷ ᠢ᠋ᠶ᠋ᠠᠷ ᠢᠲᠡᠭᠡᠳᠡᠭ ᠨᠢ ᠪᠤᠷᠤᠭᠤ᠃ ᠵᠣᠷᠢᠭ ᠲᠡᠮᠡᠦᠯᠦᠭᠰᠡᠨ ᠵᠦᠢᠯ ᠳ᠋ᠡᠭᠡᠨ ᠰᠢᠭᠤᠳᠴᠤ ᠰᠢᠭᠢᠳᠷᠡᠬᠦ ᠳ᠋ᠦ᠍《ᠴᠢ ᠯᠡ ᠬᠢᠬᠦ ᠦᠭᠡᠢ ᠪᠣᠯ ᠠᠵᠢᠯ ᠪᠦᠷ ᠪᠦᠲᠦᠬᠦ ᠪᠡᠨ ᠪᠠᠢᠴᠢᠬᠠᠨᠠ ᠤᠤ? ᠫᠥᠬᠥ ᠭᠡᠵᠦ ᠬᠡᠯᠡ! ᠥᠭᠡᠷᠡ ᠬᠥᠮᠦᠨ ᠰᠡᠯᠡᠭᠦᠦ ᠰᠠᠭᠤᠭᠠᠳ ᠴᠤ ᠴᠢᠨᠦ ᠣᠯᠳᠠᠭ ᠢ᠋ ᠣᠯᠵᠤ ᠯᠠ ᠪᠠᠢᠨᠠ᠁》 ᠭᠡᠵᠦ ᠶᠠᠩᠰᠢᠵᠤ ᠡᠬᠢᠯᠡᠳᠡᠭ᠃ ᠴᠠᠭᠠᠰᠢᠯᠠᠪᠠᠯ ᠠᠭᠤᠷᠯᠠᠬᠤ ᠶ᠋ᠢᠨ ᠢᠳᠡᠨ ᠳ᠋ᠡᠭᠡᠨ ᠬᠣᠭᠣᠯᠠ ᠴᠠᠢ ᠴᠦ᠍ ᠦᠭᠡᠢ᠂ ᠬᠣᠶᠠᠷ ᠭᠤᠷᠪᠠᠨ ᠡᠳᠦᠷ ᠢ᠋ᠶ᠋ᠡᠷ ᠬᠦᠢᠲᠡᠨ ᠴᠢᠷᠠᠢᠯᠠᠨᠠ᠃ ᠡᠨᠡ ᠪᠦᠬᠦᠨ ᠢ᠋ ᠨᠢ ᠲᠡᠰᠴᠦ᠂ ᠳᠤᠭᠤᠢ ᠳᠣᠮᠪᠣᠢᠵᠤ᠂ ᠰᠠᠨᠠᠭᠰᠠᠨ ᠵᠣᠷᠢᠭᠰᠠᠨ ᠢ᠋ᠶ᠋ᠠᠨ ᠬᠢᠵᠦ ᠶᠠᠪᠤᠬᠤ ᠡᠷᠡ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠬᠡᠴᠢᠨᠡᠨ ᠴᠦ᠍ ᠠᠯᠭᠠᠰᠠᠭᠤ᠂ ᠳᠠᠩ ᠲᠤᠩ ᠲᠠᠢ ᠪᠠᠢᠳᠠᠭ ᠢ᠋ ᠲᠡᠳᠡ ᠮᠡᠳᠡᠳᠡᠭ ᠦᠭᠡᠢ᠂ ᠮᠡᠳᠡᠭᠰᠡᠨ ᠴᠦ᠍ ᠡᠢᠨ ᠬᠦ᠌ ᠵᠠᠯᠬᠠᠭᠠᠭᠰᠠᠨ ᠳ᠋ᠠᠭᠠᠨ ᠨᠢᠷᠤᠭᠤ ᠭᠡᠳᠡᠭᠡᠷ ᠶᠠᠪᠤᠨᠠ᠃ ᠪᠣᠯᠵᠣᠭᠠᠨ ᠠ᠋ᠴᠠ ᠪᠠᠨ ᠪᠠᠭᠠ ᠯᠠ ᠬᠣᠵᠢᠭᠳᠠᠬᠤ ᠳ᠋ᠤ᠌《ᠣᠷᠣᠢᠲᠠᠴᠢᠬᠠᠯᠠ᠂ ᠬᠦᠯᠢᠶᠡᠯᠭᠡᠴᠢᠬᠡᠯᠡ》ᠭᠡᠳ ᠦᠭᠡᠯᠡᠨᠡ᠃ ᠱᠣᠭ ᠭᠠᠷᠭᠠᠵᠤ ᠠᠷᠭᠠᠳᠠᠬᠤ ᠳ᠋ᠤ᠌ ᠪᠦᠷ ᠠᠯᠲᠠᠨ ᠪᠥᠮᠪᠥᠭᠡ ᠪᠥᠮᠪᠥᠷᠢᠭᠦᠯᠵᠦ《ᠪᠠᠰᠠ ᠨᠠᠭᠠᠳᠤᠮ ᠬᠢᠬᠦ ᠰᠡᠳᠬᠢᠯ ᠲᠡᠢ᠁》 ᠭᠡᠵᠦ ᠭᠣᠮᠣᠳᠠᠯ ᠮᠡᠳᠡᠭᠦᠯᠦᠨᠡ᠃ ᠪᠤᠰᠤᠳ ᠠᠪᠠᠭᠠᠢ ᠬᠡᠦᠬᠡᠨᠴᠦᠳ ᠦ᠋ᠨ ᠲᠤᠬᠠᠢ ᠵᠦᠭᠡᠷ ᠨᠢᠭᠡ ᠮᠠᠭᠲᠠᠵᠤ ᠶᠠᠷᠢᠬᠤ ᠳ᠋ᠤ᠌ ᠯᠠ ᠪᠢᠲᠡᠭᠦᠦ ᠤᠴᠠᠭᠠᠷᠯᠠᠵᠤ ᠴᠢᠷᠠᠢ ᠨᠢ ᠴᠡᠨᠳᠡᠢᠭᠡᠳ ᠢᠷᠡᠨᠡ᠃ ᠬᠡᠨ ᠳ᠋ᠦ᠍ ᠭᠡᠰᠡᠨ ᠵᠣᠷᠢᠭᠤᠯᠤᠯᠲᠠ ᠦᠭᠡᠢ ᠢᠨᠠᠭ ᠤ᠋ᠨ ᠵᠣᠬᠢᠶᠠᠯ ᠪᠢᠴᠢᠴᠢᠬᠡᠪᠡᠯ 《ᠬᠡᠨ ᠳ᠋ᠦ᠍ ᠪᠢᠴᠢᠪᠡ? ᠨᠠᠳᠠ ᠶᠠᠭᠠᠬᠢᠭᠠᠳ ᠪᠢᠴᠢᠳᠡᠭ ᠦᠭᠡᠢ ᠶᠦᠮ ᠪᠣᠢ?》ᠭᠡᠵᠦ ᠬᠡᠯᠡ ᠠᠮᠠ ᠰᠤᠭᠤᠯᠴᠢᠬᠠᠮᠠ ᠰᠢᠷᠭᠠᠭᠠᠵᠤ ᠭᠠᠷᠤᠨᠠ᠃ ᠲᠠᠨᠢᠯ ᠪᠦᠰᠡᠭᠦᠢᠴᠦᠳ ᠲᠡᠭᠡᠨ ᠵᠠᠬᠢᠳᠠᠯ ᠪᠢᠴᠢᠬᠦ᠂ ᠤᠲᠠᠰᠤ ᠪᠠᠷ ᠶᠠᠷᠢᠬᠤ ᠳ᠋ᠤ᠌ ᠬᠢᠳᠡᠯ ᠢ᠋ᠶ᠋ᠡᠨ ᠮᠠᠷᠲᠠᠭᠠᠳ ᠴᠢᠩᠨᠠᠬᠤ᠂ ᠦᠭᠡᠢ ᠪᠣᠯ ᠦᠵᠡᠬᠦ ᠶᠦᠮ ᠭᠡᠳ ᠰᠦᠢᠳ ᠪᠣᠯᠤᠨᠠ᠃ ᠪᠦᠰᠡᠭᠦᠢ ᠬᠥᠮᠦᠨ ᠴᠡᠪᠡᠷ ᠢᠴᠢᠮᠡᠲᠡᠭᠡᠢ᠂ ᠨᠠᠮᠤᠭᠤ ᠳᠠᠷᠤᠤ ᠭᠡᠳᠡᠭ ᠨᠢ ᠴᠦ᠍ ᠬᠤᠳᠠᠯ ᠪᠠᠢᠵᠤ᠂ ᠠᠯᠪᠠᠨ ᠭᠡᠷ᠂ ᠨᠡᠢᠲᠡ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠬᠣᠪ ᠵᠢᠪ ᠭᠡᠳᠡᠭ ᠢ᠋ ᠴᠢᠨᠢ ᠳᠡᠯ ᠲᠡᠢ ᠰᠡᠭᠦᠯ ᠲᠡᠢ ᠨᠢ ᠶᠠᠷᠢᠵᠤ᠂ ᠳᠠᠭᠤ ᠨᠢ ᠥᠨᠳᠥᠷᠵᠢᠨ ᠮᠥᠷᠥ ᠳᠠᠯᠤ ᠪᠠᠨ ᠠᠯᠠᠭᠠᠳᠠᠯᠴᠠᠠ ᠬᠥᠭᠡᠷᠴᠦ ᠭᠠᠷᠤᠨᠠ᠃《ᠡᠷᠡᠭᠲᠡᠢ ᠡᠮᠡᠭᠲᠡᠢ ᠡᠷᠬᠡ ᠲᠡᠭᠰᠢ》ᠭᠡᠳᠡᠭ ᠢ᠋ᠶ᠋ᠡᠷ ᠲᠦᠷᠢᠭᠡ ᠪᠠᠷᠢᠵᠤ ᠠᠷᠢᠬᠢ ᠤᠤᠭᠤᠨᠠ᠂ ᠰᠣᠭᠲᠣᠨᠠ᠂ ᠲᠠᠮᠠᠬᠢ ᠲᠠᠲᠠᠨᠠ᠂
ᠱᠠᠯᠢᠭ ᠮᠠᠷᠵᠠᠩ ᠦᠭᠡ ᠴᠤ ᠠᠢᠯᠠᠳᠤᠨᠠ᠃ ᠶᠠᠭᠤᠲᠠᠢ ᠴᠤ ᠰᠠᠢᠬᠠᠨ ᠡᠷᠬᠡ ᠴᠢᠯᠥᠭᠡ ᠭᠡᠭᠴᠢ ᠨᠢ ᠪᠣᠢ᠂ ᠪᠦᠰᠡᠭᠦᠢᠴᠦᠳ ᠮᠢᠨᠢ! ᠡᠢᠮᠦ ᠯᠡ ᠪᠣᠯᠬᠣᠷ ᠨᠥᠬᠥᠷ ᠨᠢ ᠤᠢᠳᠴᠤ ᠬᠠᠢᠷᠠ ᠨᠢ ᠬᠥᠷᠥᠬᠦ ᠪᠡᠷ《ᠮᠠᠭᠤ ᠰᠠᠢᠨ ᠡᠷᠡᠴᠦᠦᠯ ᠳ᠋ᠦ᠍ ᠣᠯᠢᠭᠲᠠᠢ ᠶᠠᠭᠤᠮᠠ ᠦᠭᠡᠢ᠁》ᠭᠡᠮᠡᠨ ᠢᠷᠪᠠᠢᠢᠯᠴᠠᠨᠠ᠃ ᠥᠪᠡᠷ ᠲᠦ᠍ ᠨᠢ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠳᠤᠷᠠᠯᠠᠵᠤ ᠲᠡᠮᠡᠦᠯᠦᠭᠰᠡᠨ ᠡᠷᠡ ᠬᠥᠮᠦᠨ ᠢ᠋ ᠦᠬᠡᠨᠴᠡ ᠠᠮᠢᠲᠠᠨ》ᠭᠡᠵᠦ ᠳᠡᠭᠡᠭᠦᠷ ᠬᠠᠷᠠᠨ ᠰᠢᠷᠪᠢ ᠲᠠᠲᠠᠳᠠᠭ ᠬᠢᠷᠢ ᠨᠢ ᠪᠦᠲᠦᠯ ᠦᠭᠡᠢ ᠰᠠᠪᠰᠠᠭᠠᠨᠠᠭᠰᠠᠨ ᠨᠢᠭᠡ ᠶ᠋ᠢ ᠨᠢ ᠪᠣᠯ ᠳᠤᠷᠠᠲᠠᠢ ᠳᠠᠭᠠᠭᠠᠳ ᠳᠡᠷᠪᠡᠨᠡ᠃ ᠦᠶᠡᠷᠬᠡᠵᠦ ᠪᠠᠢᠬᠤ ᠳ᠋ᠠᠭᠠᠨ《ᠬᠠᠢᠷᠠᠲᠠᠢ᠂ ᠳᠤᠷᠠᠲᠠᠢ》ᠭᠡᠵᠦ ᠡᠷᠡᠦ ᠪᠡᠨ ᠰᠠᠯᠲᠠᠯᠠ ᠪᠠᠨ ᠠᠮᠠᠯᠠᠵᠤ ᠶᠠᠪᠤᠭᠰᠠᠨ ᠪᠠᠢᠲᠠᠯᠠ ᠪᠠᠨ ᠬᠤᠷᠢᠮ ᠬᠢᠬᠦ ᠦᠶᠡ ᠳ᠋ᠡᠭᠡᠨ ᠠᠯᠲᠠᠨ ᠵᠠᠰᠠᠯ᠂ ᠠᠰᠠᠷ ᠪᠠᠢᠰᠢᠩ ᠭᠡᠵᠦ ᠬᠠᠳᠠᠮ ᠤ᠋ᠨ ᠢ᠋ᠶ᠋ᠠᠨ ᠲᠣᠯᠣᠭᠠᠢ ᠶ᠋ᠢ ᠡᠪᠡᠳᠬᠡᠬᠦ ᠦᠭᠡᠢ ᠪᠣᠯ ᠵᠠᠷᠢᠮ ᠳ᠋ᠠᠭᠠᠨ ᠬᠠᠳᠠᠮ ᠠᠪᠤ ᠡᠵᠢ ᠳ᠋ᠡᠭᠡᠨ ᠨᠢᠳᠦ ᠦᠵᠦᠭᠦᠷᠯᠡᠵᠦ ᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠵᠢᠷᠦᠬᠡᠨ ᠳ᠋ᠦ᠍ ᠰᠢᠷᠠ ᠤᠰᠤ ᠳᠤᠰᠤᠭᠠᠨᠠ᠃ ᠬᠠᠶᠠ ᠨᠢᠭᠡ ᠦ ᠳᠤᠲᠠᠭᠳᠠᠯ ᠢ᠋ ᠨᠢ ᠰᠠᠨᠠᠭᠤᠯᠤᠭᠠᠳ ᠠᠪᠬᠤ ᠳ᠋ᠤ᠌᠂ ᠲᠡᠭᠡᠪᠡᠯ ᠴᠢ ᠲᠡᠢᠮᠦ ᠬᠥᠮᠦᠨ ᠲᠡᠢ ᠪᠡᠨ ᠠᠮᠢᠳᠤᠷᠠᠨᠠ ᠪᠢᠵᠡ! ᠶᠠᠭᠤ ᠭᠡᠵᠦ ᠨᠠᠮᠠᠶ᠋ᠢ ᠨᠣᠬᠠᠢ ᠰᠢᠭ᠋ ᠰᠡᠭᠦᠯᠳᠡᠭᠡᠳ ᠪᠠᠢᠭᠰᠠᠨ ᠪᠣᠢ?》 ᠭᠡᠵᠦ ᠠᠭᠰᠤᠷᠤᠨᠠ᠃ ᠪᠤᠬᠢᠨᠢᠳᠤᠵᠤ ᠪᠤᠳᠤᠯᠢᠵᠤ ᠰᠠᠭᠤᠬᠤ ᠳ᠋ᠤ᠌ ᠪᠤᠢ ᠊ᠶᠠ ᠭᠡᠮᠡᠨ ᠭᠣᠷᠢᠳᠠᠬᠤ ᠳ᠋ᠤ᠌ ᠬᠠᠷᠢᠨ《ᠤᠷᠤᠭᠤ ᠴᠢᠷᠠᠢᠯᠠᠭᠠᠳ ᠥᠭᠡᠳᠡ ᠦᠭᠡᠢ ᠭᠡᠳᠡᠭ ᠨᠢ᠂ ᠡᠷᠡ ᠬᠥᠮᠦᠨ ᠦ᠌ ᠰᠢᠨᠵᠢ ᠦᠭᠡᠢ᠁》ᠭᠡᠵᠦ ᠡᠭᠡᠭᠡ ᠡᠷᠡ ᠬᠥᠮᠦᠨ ᠭᠡᠳᠡᠭ ᠨᠢ ᠵᠣᠪᠠᠵᠤ ᠰᠢᠨᠠᠯᠬᠤ ᠶ᠋ᠢ ᠮᠡᠳᠡᠳᠡᠭ ᠦᠭᠡᠢ ᠴᠢᠯᠠᠭᠤᠨ ᠵᠢᠷᠦᠬᠡ᠂ ᠬᠠᠳᠠᠨ ᠪᠡᠶᠡ ᠲᠡᠢ ᠰᠢᠭ ᠰᠠᠨᠠᠨᠠ᠃ ᠲᠥᠷᠥᠭᠰᠡᠨ ᠡᠳᠦᠷ᠂ ᠬᠠᠢᠷᠠ ᠶ᠋ᠢᠨ ᠪᠠᠶᠠᠷ᠂ ᠬᠤᠷᠢᠮ ᠤ᠋ᠨ ᠳᠤᠷᠠᠰᠬᠠᠯ ᠢ᠋ᠶ᠋ᠠᠨ ᠮᠠᠷᠲᠠᠪᠠᠯ ᠪᠥᠭᠡᠮ ᠭᠣᠮᠣᠳᠠᠯ ᠪᠣᠯᠵᠤ ᠨᠠᠮᠠᠶ᠋ᠢ ᠬᠡᠷᠡᠭ ᠡᠴᠡ ᠭᠠᠷᠭᠠᠯᠠ ᠭᠡᠵᠦ ᠲᠣᠨᠢᠷᠬᠠᠨᠠ᠃ ᠤᠷᠮᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠨᠢ ᠬᠠᠯᠠᠮᠵᠢᠯᠠᠵᠤ ᠠᠰᠠᠭᠤᠪᠠᠯ《ᠶᠠᠭᠠᠬᠢᠭᠠ ᠴᠤ ᠦᠭᠡᠢ᠂ ᠴᠢᠮᠠᠲᠤ ᠳᠠᠯᠵᠢ ᠦᠭᠡᠢ》ᠭᠡᠵᠦ ᠬᠥᠬᠡ ᠴᠢᠷᠠᠢᠯᠠᠨᠠ᠃ ᠲᠠᠨᠢᠯ ᠠᠬᠠ ᠳᠡᠭᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠵᠤ ᠪᠠᠭᠠ ᠣᠷᠣᠢᠲᠠᠬᠤ ᠳ᠋ᠤ᠌᠂《ᠴᠢ ᠪᠠᠰᠠ ᠭᠡᠷ ᠲᠡᠭᠡᠨ ᠢᠷᠡᠬᠦ ᠶᠦᠮ ᠤᠤ? ᠨᠠᠢᠷᠯᠠᠭᠠᠳ ᠶᠠᠪᠤᠨᠠ ᠪᠢᠵᠡ!》ᠭᠡᠵᠦ ᠶᠠᠷᠳᠠᠭᠯᠠᠨᠠ᠃ ᠡᠨᠡ ᠪᠦᠬᠦ ᠤᠴᠢᠷ ᠨᠠᠴᠢᠷ ᠨᠢ ᠣᠯᠳᠠᠬᠤ ᠦᠭᠡᠢ ᠤᠴᠠᠭᠠᠷ ᠤᠨᠲᠤᠭᠤ᠂ ᠦᠭᠡᠯᠡᠯ ᠶᠠᠩᠰᠢᠶᠠ ᠶ᠋ᠢ ᠨᠢ ᠲᠡᠰᠴᠦ ᠡᠷᠡ ᠬᠥᠮᠦᠨ ᠵᠦᠳᠡᠷᠡᠨᠡ᠃ ᠠᠵᠢᠯ ᠦᠢᠯᠡᠰ᠂ ᠬᠦᠰᠡᠯ ᠵᠣᠷᠢᠯ᠂ ᠨᠠᠢᠵᠠ ᠨᠥᠬᠥᠳ᠁ ᠬᠣᠢᠰᠢ ᠲᠠᠯᠪᠢᠭᠳᠠᠨᠠ᠃ ᠳᠦᠣᠷᠢᠮᠡ ᠡᠢᠮᠦ ᠭᠡᠵᠢ ᠤᠤ? ᠯᠠᠪ ᠡᠢᠮᠦ ᠪᠢᠰᠢ᠂ ᠬᠥᠮᠦᠨ ᠦ᠌ ᠰᠠᠢᠬᠠᠨ ᠬᠠᠨᠢ ᠪᠠᠢᠬᠤ ᠶᠣᠰᠣᠲᠠᠢ! ᠡᠷᠡᠴᠦᠦᠯ ᠢᠩᠭᠢᠵᠦ ᠲᠥᠰᠦᠭᠡᠯᠡᠬᠦ ᠲᠣᠰᠤᠮ ᠢ᠋ᠶ᠋ᠠᠨ ᠳᠦᠣᠷᠢᠮᠡ ᠶ᠋ᠢ ᠦᠭᠡᠢᠯᠡᠨᠡ᠄
ᠠᠯᠤᠰ ᠬᠣᠯᠠ ᠶ᠋ᠢᠨ ᠭᠠᠵᠠᠷ ᠲᠤ
ᠠᠮᠠᠷᠠᠭ ᠬᠡᠦᠬᠡᠨ ᠪᠠᠢᠳᠠᠭ
ᠠᠯᠳᠠᠷ ᠨᠡᠷᠡ ᠨᠢ ᠳᠦᠦᠷᠢᠮᠡ
ᠠᠢ ᠳᠦᠦᠷᠢᠮᠡ ᠰᠠᠢᠬᠠᠨ ᠳᠦᠦᠷᠢᠮᠡ᠁
ᠮᠣᠩᠭᠣᠯ ᠡᠮᠡᠭᠲᠡᠢᠴᠦᠳ ᠦ᠋ᠨ ᠠᠵᠢᠯᠴᠢ ᠬᠥᠳᠡᠯᠮᠦᠷᠢᠴᠢ᠂ ᠠᠷᠪᠢᠴᠢ ᠭᠠᠮᠴᠢ᠂ ᠨᠣᠮᠣᠬᠠᠨ ᠳᠥᠯᠭᠡᠨ᠂ ᠠᠭᠤᠵᠢᠭᠤ ᠪᠠᠭᠲᠠᠭᠠᠮᠵᠢ᠂ ᠤᠬᠠᠭᠠᠨ ᠰᠠᠮᠪᠠᠭᠠ᠂ ᠤᠷᠠᠨ ᠴᠡᠴᠡᠨ᠂ ᠦᠨᠡᠨᠴᠢ ᠴᠢᠬᠡᠴᠢ ᠶ᠋ᠢ ᠭᠠᠢᠬᠠᠨ ᠪᠢᠴᠢᠭᠰᠡᠨ ᠲᠡᠮᠳᠡᠭᠯᠡᠯ ᠣᠯᠠᠨ ᠪᠣᠢ᠃ ᠠᠯᠤᠨ ᠭᠤᠸᠠ ᠡᠵᠢ᠂ ᠥᠭᠡᠯᠦᠨ ᠡᠵᠢ᠂ ᠮᠠᠨᠳᠤᠬᠠᠢ ᠭᠡᠵᠦ ᠲᠡᠦᠬᠡᠨ ᠳᠡᠭᠡᠷᠡᠬᠢ ᠰᠤᠤᠲᠤ ᠡᠬᠡᠴᠦᠦᠯ ᠢ᠋ ᠳᠤᠷᠠᠳᠬᠤ ᠦᠭᠡᠢ ᠴᠦ᠍ ᠭᠡᠰᠡᠨ ᠠᠢᠯ ᠭᠡᠷ ᠢ᠋ᠶ᠋ᠡᠨ ᠥᠭᠡᠳᠡ ᠨᠢ ᠲᠠᠲᠠᠵᠤ᠂ ᠬᠡᠦᠬᠡᠳ ᠠᠴᠢᠷ ᠢ᠋ᠶ᠋ᠠᠨ ᠤᠬᠠᠭᠠᠯᠢᠭ ᠥᠰᠬᠡᠵᠦ᠂ ᠬᠠᠨᠢ ᠨᠥᠬᠥᠷ ᠲᠡᠭᠡᠨ ᠬᠠᠢᠷᠠ ᠶ᠋ᠢᠨ ᠳᠤᠯᠠᠭᠠᠨ ᠲᠦᠰᠢᠭ ᠪᠣᠯᠵᠤ᠂ ᠠᠬᠠᠮᠠᠳ ᠨᠠᠰᠤᠲᠠᠳ ᠢ᠋ᠶ᠋ᠠᠨ ᠬᠦᠨᠳᠦᠯᠡᠨ ᠠᠰᠠᠷᠠᠵᠤ ᠶᠠᠪᠤᠳᠠᠭ ᠢ᠋ ᠪᠢᠳᠡᠨ ᠦ᠌ ᠡᠵᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠪᠦᠰᠡᠭᠦᠢᠴᠦᠦᠯ ᠴᠦ᠍ ᠬᠠᠷᠠᠭᠤᠯᠵᠤ ᠪᠠᠢᠭᠠ ᠪᠢᠰᠢ ᠤᠤ? ᠭᠡᠪᠡᠴᠦ ᠡᠨᠡ ᠪᠦᠬᠦ ᠤᠯᠠᠮᠵᠢᠯᠠᠯ ᠢ᠋ ᠥᠨᠥ ᠶ᠋ᠢᠨ ᠮᠣᠩᠭᠣᠯ ᠪᠦᠰᠡᠭᠦᠢᠴᠦᠳ ᠦ᠋ᠨ ᠪᠡᠶᠡ ᠡᠴᠡ ᠣᠯᠵᠤ ᠬᠠᠷᠠᠵᠤ ᠴᠢᠳᠠᠨᠠ ᠤᠤ? ᠪᠢᠳᠡᠨ ᠦ᠌ ᠰᠡᠳᠬᠢᠯ ᠳ᠋ᠡᠬᠢ ᠳᠦᠦᠷᠢᠮᠡ ᠰᠢᠭ᠌ ᠬᠡᠦᠬᠡᠨ ᠬᠠᠮᠢᠭᠠ ᠪᠠᠢᠨᠠ? ᠡᠵᠢ ᠨᠢ ᠡᠷᠲᠡ ᠪᠣᠰᠴᠢᠬᠠᠭᠠᠳ ᠬᠣᠨᠢ ᠮᠠᠯ᠂ ᠴᠠᠢ ᠴᠦᠢ ᠭᠡᠵᠦ ᠶᠠᠭᠠᠷᠠᠵᠤ ᠪᠠᠢᠬᠤ ᠳ᠋ᠤ᠌《ᠳᠠᠭᠢᠨᠢᠰ》 ᠮᠠᠨᠢ ᠬᠠᠯᠠᠭᠤᠨ ᠬᠥᠨᠵᠢᠯᠡ ᠳ᠋ᠡᠭᠡᠨ ᠬᠤᠷᠬᠢᠷᠠᠵᠤ ᠪᠠᠢᠳᠠᠭ᠃ ᠰᠢᠩᠭᠡᠭ ᠲᠡᠢ ᠭᠡᠳ ᠬᠣᠨᠢ ᠮᠠᠯ ᠤ᠋ᠨ ᠬᠠᠰᠢᠶᠠ ᠰᠠᠷᠠᠪᠴᠢ ᠠ᠋ᠴᠠ ᠵᠢᠭᠤᠲᠠᠬᠤ ᠨᠢ ᠬᠣᠯᠠ ᠦᠭᠡᠢ ᠴᠠᠷᠪᠠᠨᠠ᠂ ᠮᠠᠭᠤᠬᠠᠢ ᠭᠡᠳ ᠮᠣᠩᠭᠣᠯ ᠵᠠᠰᠠᠯ ᠢ᠋ᠶ᠋ᠠᠨ ᠭᠣᠯᠣᠨᠠ᠃ ᠲᠡᠭᠡᠭᠰᠡᠨ ᠬᠢᠷᠢ ᠨᠢ ᠮᠠᠷᠢᠶᠠ ᠰᠢᠭᠤᠷᠠᠭᠤᠯᠬᠤ᠂ ᠭᠡᠳᠡᠰᠦ ᠪᠡᠨ ᠨᠠᠷᠢᠰᠬᠠᠬᠤ᠂ ᠥᠭᠡᠵᠡᠭ ᠢ᠋ᠶ᠋ᠡᠨ ᠪᠠᠭᠠᠰᠬᠠᠬᠤ᠂ ᠴᠡᠭᠡᠵᠢ ᠪᠡᠨ ᠭᠦᠳᠦᠢᠯᠭᠡᠬᠦ᠂ ᠴᠢᠷᠠᠢ ᠪᠠᠨ ᠴᠠᠭᠠᠷᠠᠭᠤᠯᠬᠤ᠂ ᠠᠲᠤᠷᠢᠶᠠ ᠪᠠᠨ ᠲᠡᠨᠢᠢᠯᠭᠡᠬᠦ᠂ ᠲᠣᠯᠢᠨ ᠤ᠋ ᠡᠮᠦᠨᠡ ᠬᠠᠭᠠᠰ ᠡᠳᠦᠷ ᠨᠠᠮᠪᠠᠭᠠᠯᠠᠨ ᠵᠣᠭᠰᠣᠬᠤ᠂ ᠡᠳᠦᠷ ᠠᠯᠭᠠᠰᠠᠯ ᠦᠭᠡᠢ ᠪᠥᠵᠢᠭ ᠲᠠᠨᠼ ᠲᠤ᠌ ᠭᠦᠶᠦᠬᠦ᠁ ᠭᠡᠬᠦᠴᠢᠯᠡᠨ ᠪᠣᠷᠪᠢ ᠪᠣᠬᠢᠰᠬᠢᠯ ᠦᠭᠡᠢ ᠴᠠᠭᠠᠷᠠᠵᠤ ᠪᠠᠢᠳᠠᠭ ᠢ᠋ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ! ᠡᠨᠡ ᠨᠢ ᠲᠡᠭᠡᠭᠡᠳ ᠪᠠᠰᠠ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠶᠦᠮ ᠭᠡᠨᠡ᠃ ᠠᠢ ᠳᠠ᠂ ᠲᠠ ᠨᠠᠷ ᠮᠢᠨᠢ ᠪᠡᠶᠡ ᠪᠡᠨ ᠵᠠᠰᠠᠬᠤ ᠪᠠᠷ᠂ ᠤᠬᠠᠭᠠᠨ ᠢ᠋ᠶ᠋ᠠᠨ ᠵᠠᠰᠠᠭᠠᠴᠢ ᠳᠠ! ᠭᠡᠷ ᠲᠤᠨᠢ ᠠᠢᠯᠴᠢᠨ ᠭᠡᠢᠴᠢᠨ ᠢᠷᠡᠬᠦ ᠳ᠋ᠦ᠍ ᠰᠠᠢᠨ ᠤᠤ᠂ ᠮᠡᠨᠳᠦ ᠤᠤ ᠴᠦ᠍ ᠦᠭᠡᠢ ᠳᠡᠯᠢᠭᠦᠨ ᠴᠢᠷᠠᠢ ᠲᠠᠢ ᠵᠦᠯᠴᠡᠢᠨᠡ᠃ ᠠᠬᠠᠮᠠᠳ ᠨᠠᠰᠤᠲᠠᠢ ᠬᠥᠮᠦᠨ ᠢ᠋ ᠴᠦ᠍《ᠴᠢ》 ᠭᠡᠴᠢᠬᠡᠭᠰᠡᠨ ᠂ ᠡᠰᠡᠬᠦᠯᠡ ᠣᠷᠣᠨ ᠳᠡᠭᠡᠷᠡ ᠪᠡᠨ ᠠᠯᠴᠠᠢᠭᠠᠳ ᠬᠡᠪᠲᠡᠴᠢᠬᠡᠭᠰᠡᠨ ᠴᠣᠬᠣᠮ ᠴᠤ᠌《ᠪᠢ ᠭᠡᠷ ᠲᠡᠭᠡᠨ ᠪᠠᠢᠨᠠ》 ᠰᠢᠦᠬᠡᠨ ᠲᠠᠲᠠᠪ ᠴᠤ ᠦᠭᠡᠢ ᠪᠠᠢᠬᠤ ᠶᠤᠮ!
ᠠᠷᠠᠳ ᠤᠨ ᠦᠭᠡᠨ ᠳ᠋ᠦ᠍《ᠡᠬᠡᠨᠡᠷ ᠦ᠋ᠨ ᠮᠠᠭᠤ ᠪᠠᠷ ᠳᠣᠷᠣᠢᠲᠠᠵᠤ᠂ ᠡᠮᠴᠢ ᠶ᠋ᠢᠨ ᠮᠠᠭᠤ ᠪᠠᠷ ᠦᠬᠦᠨᠡ》 ᠭᠡᠳᠡᠭ᠃ ᠦᠨᠡᠬᠡᠷ ᠴᠦ᠍ ᠭᠡᠷ ᠲᠡᠷᠭᠡ ᠪᠡᠨ ᠴᠡᠪᠡᠷᠯᠡᠬᠦ ᠦᠭᠡᠢ᠂ ᠬᠡᠦᠬᠡᠳ ᠰᠢᠤᠬᠠᠳ ᠢ᠋ᠶ᠋ᠠᠨ ᠳᠣᠳᠣᠮᠳᠠᠬᠤ ᠦᠭᠡᠢ᠂ ᠬᠠᠭᠵᠠᠷᠬᠠᠢ ᠤᠳᠠᠷᠬᠠᠢ ᠪᠠᠨ ᠣᠶᠣᠵᠤ ᠲᠣᠪᠬᠢᠬᠤ ᠦᠭᠡᠢ᠂ ᠨᠣᠮ ᠪᠢᠴᠢᠭ ᠴᠦ᠍ ᠤᠩᠰᠢᠬᠤ ᠦᠭᠡᠢ ᠮᠥᠷᠳᠡᠯᠡ ᠪᠡᠨ ᠭᠤᠶᠤᠵᠤ ᠭᠣᠣᠳᠠᠬᠤ ᠳ᠋ᠤ᠌ ᠠᠯᠢᠪᠠ ᠪᠠᠨ ᠵᠣᠷᠢᠭᠤᠯᠤᠭᠰᠠᠨ ᠪᠦᠰᠡᠭᠦᠢᠴᠦᠳ ᠲᠦ᠍ ᠶᠠᠮᠠᠷ ᠬᠥᠮᠦᠨ ᠡᠭᠡᠯᠢ ᠲᠡᠢ ᠪᠠᠢᠵᠤ ᠴᠢᠳᠠᠳᠠᠭ ᠶᠤᠮ ᠪᠣᠢ? ᠳᠤᠯᠠᠢᠲᠠᠯᠠ ᠵᠠᠰᠠᠴᠢᠬᠠᠭᠠᠳ ᠭᠢᠯᠠᠢᠲᠠᠯᠠ ᠡᠮᠦᠰᠴᠢᠬᠡᠭᠡᠳ ᠶᠠᠪᠤᠵᠤ ᠪᠣᠢ ᠪᠦᠰᠡᠭᠦᠢᠴᠦᠳ ᠢ᠋ ᠶᠠᠷᠢᠶᠠᠨ ᠦᠭᠡᠢ ᠡᠷᠡᠴᠦᠦᠯ ᠢᠯᠡᠭᠦᠦ ᠬᠡᠳᠦ ᠬᠠᠷᠠᠳᠠᠭ᠃ ᠬᠠᠷᠢᠨ ᠢᠩᠭᠢᠬᠦ ᠳ᠋ᠦ᠍ᠨᠢ《ᠬᠥᠮᠦᠨ ᠨᠠᠮᠠᠶ᠋ᠢ ᠪᠠᠬᠠᠷᠬᠠᠵᠤ ᠪᠠᠢᠨᠠ》 ᠭᠡᠵᠦ ᠪᠢᠲᠡᠭᠡᠢ ᠯᠡ ᠪᠠᠶᠠᠷᠯᠠᠭᠠᠷᠠᠢ! ᠡᠷᠡᠴᠦᠦᠯ ᠶᠠᠩᠬᠠᠨ ᠢ᠋ ᠴᠤ ᠲᠡᠭᠡᠵᠦ ᠬᠠᠷᠠᠳᠠᠭ ᠰᠢᠦ ᠳᠡ᠃ ᠬᠠᠷᠢᠨ ᠴᠢᠩ ᠰᠡᠳᠬᠢᠯ ᠦ᠋ᠨ ᠪᠠᠬᠠᠷᠬᠠᠯ᠂ ᠦᠨᠡᠨᠴᠢ ᠲᠡᠮᠡᠦᠯᠦᠯ ᠪᠢᠰᠢ ᠶᠦᠮ᠃《ᠰᠠᠢᠬᠠᠨ ᠲᠥᠷᠥᠭᠰᠡᠨ ᠢ᠋ ᠨᠢ ᠢᠯᠡᠭᠦᠦ ᠬᠡᠳᠦ ᠬᠠᠷᠠᠳᠠᠭ ᠪᠣᠯᠪᠠᠴᠤ ᠬᠡᠲᠦᠷᠬᠡᠢ ᠮᠠᠭᠤᠬᠠᠢ ᠶ᠋ᠢ ᠨᠢ ᠨᠡᠩ ᠢᠯᠡᠭᠦᠦ ᠬᠠᠷᠠᠳᠠᠭ》 ᠭᠡᠰᠡᠨ ᠦᠭᠡ ᠪᠠᠢᠳᠠᠭ ᠢ᠋ ᠰᠠᠨᠠᠭᠠᠷᠠᠢ!
ᠪᠦᠰᠡᠭᠦᠢᠴᠦᠳ ᠭᠡᠷ ᠲᠡᠭᠡᠨ ᠪᠠᠢᠬᠤ ᠳ᠋ᠠᠭᠠᠨ ᠵᠠᠰᠠᠵᠤ ᠭᠣᠣᠳᠠᠬᠤ ᠦᠭᠡᠢ᠂ ᠦᠰᠦ ᠭᠡᠵᠢᠭᠡ ᠪᠡᠨ ᠳᠣᠳᠣᠮᠳᠠᠬᠤ ᠦᠭᠡᠢ᠂ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠶᠠᠩᠵᠤᠯᠠᠬᠤ ᠦᠭᠡᠢ ᠬᠢᠷᠢ ᠨᠢ ᠡᠭᠦᠳᠡ ᠭᠠᠷᠬᠤ ᠪᠣᠯᠤᠭᠰᠠᠭᠠᠷ ᠯᠠ ᠪᠣᠳᠣᠵᠤ ᠵᠢᠷᠤᠵᠤ ᠡᠬᠢᠯᠡᠳᠡᠭ ᠨᠢ ᠥᠭᠡᠷᠡ ᠡᠷᠡᠴᠦᠦᠯ ᠳ᠋ᠦ᠍ ᠬᠠᠷᠠᠭᠤᠯᠬᠤ ᠯᠠ ᠵᠣᠷᠢᠭᠤᠯᠤᠯᠲᠠ ᠲᠠᠢ ᠶᠤᠮ᠃ ᠲᠡᠭᠡᠵᠦ ᠬᠡᠳᠦᠨ ᠰᠠᠢᠬᠠᠨ ᠮᠠᠭᠲᠠᠭᠠᠯ ᠰᠣᠨᠣᠰᠴᠢᠬᠠᠪᠠᠯ ᠰᠢᠬᠢᠷ ᠡᠮᠬᠦᠭᠰᠡᠨ ᠬᠡᠦᠬᠡᠳ ᠰᠢᠭ ᠪᠠᠶᠠᠷᠯᠠᠴᠢᠬᠠᠳᠠᠭ ᠨᠢ ᠬᠥᠭᠡᠷᠦᠬᠦᠢ ᠮᠥᠷᠲᠡᠭᠡᠨ ᠲᠡᠨᠡᠭ ᠦ᠋ᠨ ᠬᠢ᠃ ᠦᠨᠡᠬᠡᠷ ᠨᠥᠬᠥᠷ ᠲᠡᠭᠡᠨ ᠬᠠᠢᠷᠠᠲᠠᠢ᠂ ᠨᠥᠬᠥᠷ ᠢ᠋ᠶ᠋ᠡᠨ ᠪᠠᠶᠠᠷᠯᠠᠭᠤᠯᠵᠤ᠂ ᠬᠠᠢᠷᠠ ᠶ᠋ᠢ ᠨᠢ ᠠᠰᠠᠭᠠᠵᠤ ᠶᠠᠪᠤᠶᠠ ᠭᠡᠪᠡᠯ ᠭᠡᠷ ᠲᠡᠭᠡᠨ ᠪᠠᠢᠬᠤ ᠳ᠋ᠠᠭᠠᠨ ᠴᠤ᠌ ᠴᠡᠮᠴᠡᠭᠡᠷ ᠪᠠᠢᠵᠤ ᠰᠤᠷᠤᠭᠠᠴᠢ! ᠬᠠᠷᠢᠨ ᠡᠨᠡ ᠪᠦᠬᠦᠨ ᠢ᠋ ᠣᠮᠲᠣᠭᠠᠢᠯᠠᠳᠠᠭ ᠠ᠋ᠴᠠ ᠴᠢᠨᠢ ᠪᠣᠯᠤᠭᠠᠳ ᠨᠥᠬᠥᠷ ᠦ᠋ᠨ ᠲᠠᠨᠢ ᠬᠠᠢᠷᠠ ᠨᠢ ᠬᠥᠷᠥᠳᠡᠭ᠂ ᠳᠤᠷᠠ ᠨᠢ ᠬᠠᠷᠢᠳᠠᠭ᠂ ᠥᠷᠥᠭᠡᠯ ᠦ᠋ᠨ ᠪᠦᠰᠡᠭᠦᠢ ᠰᠠᠢᠬᠠᠨ ᠬᠠᠷᠠᠭᠳᠠᠬᠤ ᠪᠣᠯᠳᠠᠭ᠃
ᠴᠡᠪᠡᠷ ᠴᠢᠬᠢᠮᠠᠢ᠂ ᠨᠠᠮᠬᠠᠨ ᠳᠥᠯᠭᠡᠨ᠂ ᠪᠣᠯᠪᠠᠰᠤᠨ ᠤᠬᠠᠭᠠᠯᠢᠭ ᠪᠦᠰᠡᠭᠦᠢ ᠶ᠋ᠢᠨ ᠲᠤᠬᠠᠢ ᠬᠥᠮᠦᠰ ᠮᠠᠭᠤᠬᠠᠢ ᠪᠠᠷ ᠪᠣᠳᠣᠬᠤ ᠪᠠᠨ ᠬᠦᠷᠲᠡᠯᠡ ᠬᠢᠴᠢᠶᠡᠳᠡᠭ ᠠᠲᠠᠯᠠ ᠪᠠᠨ ᠠᠶᠤᠵᠤ ᠢᠴᠢᠬᠦ ᠪᠡᠨ ᠠᠷᠤ ᠳ᠋ᠠᠭᠠᠨ ᠬᠠᠶᠠᠴᠢᠬᠠᠭᠰᠠᠨ ᠪᠦᠳᠦᠭᠦᠯᠢᠭ ᠪᠦᠰᠡᠭᠦᠢᠴᠦᠳ ᠢ᠋ ᠪᠣᠯ《ᠵᠠ ᠨᠠᠭᠠᠳᠤᠬᠢ ᠴᠢᠨᠢ ᠪᠣᠯ ᠬᠣᠭ ᠤ᠋ᠨ ᠶᠠᠭᠤᠮᠠ ᠪᠠᠢᠬᠤ ᠨᠢ!》 ᠭᠡᠵᠦ ᠴᠠᠭᠠᠰᠢᠯᠠᠭᠤᠯᠵᠤ ᠪᠣᠳᠣᠳᠠᠭ ᠰᠢᠦ ᠳᠡ᠃ ᠵᠢᠷᠤᠮᠠᠯ ᠬᠥᠮᠦᠨ ᠰᠢᠭ ᠭᠣᠣᠳᠠᠴᠢᠬᠠᠭᠰᠠᠨ᠂ ᠡᠩᠭᠡᠷ ᠡᠪᠴᠢᠭᠦᠦ᠂ ᠭᠤᠶᠠ ᠬᠠᠰᠠ ᠪᠠᠨ ᠵᠠᠳᠠᠭᠠᠢ ᠭᠠᠢᠬᠠᠭᠤᠯᠤᠭᠰᠠᠨ ᠮᠠᠷᠵᠠᠩ ᠪᠦᠳᠦᠭᠦᠯᠢᠭ ᠪᠦᠰᠡᠭᠦᠢᠴᠦᠳ ᠡᠷᠡᠴᠦᠦᠯ ᠦ᠋ᠨ ᠶᠣᠰᠣ ᠪᠤᠰᠤᠴᠢᠯᠠᠯ ᠳ᠋ᠤ᠌ ᠥᠷᠲᠥᠭᠡᠳ《ᠯᠤᠢᠪᠠᠷᠴᠢᠨ》 ᠭᠡᠵᠦ ᠬᠠᠷᠢᠶᠠᠬᠤ ᠳ᠋ᠠᠭᠠᠨ ᠳᠠᠩᠴᠤ ᠵᠠᠳᠠᠭᠠᠢ ᠬᠠᠷᠠᠭᠳᠠᠭᠰᠠᠨ ᠥᠪᠡᠷ ᠢ᠋ ᠪᠡᠨ ᠤᠷᠢᠳ ᠢ᠋ᠶ᠋ᠠᠷ ᠥᠭᠡᠯᠡᠭᠡᠴᠢ ᠭᠡᠵᠦ ᠬᠡᠯᠡᠮᠡᠷ ᠪᠠᠢᠨᠠ᠃
ᠶᠠᠭᠤᠲᠠᠢ ᠴᠤ ᠭᠡᠰᠡᠨ ᠲᠩᠷᠢ ᠶ᠋ᠢᠨ ᠳᠣᠣᠷᠠ ᠳᠦᠦᠷᠢᠮᠡ ᠰᠢᠭ᠌ ᠰᠠᠢᠨ ᠬᠡᠦᠬᠡᠨ᠂ ᠰᠠᠢᠬᠠᠨ ᠴᠤ ᠬᠡᠦᠬᠡᠨ ᠠᠯᠠᠭᠠ ᠯᠠ ᠶᠤᠮ ᠳᠠ᠂ ᠠᠯᠢ ᠡᠰᠡᠬᠦᠯᠡ ᠵᠥᠪᠬᠡᠨ ᠳᠠᠭᠤᠤ ᠳ᠋ᠤ᠌ ᠯᠠ ᠠᠮᠢᠯᠠᠭᠰᠠᠨ ᠳᠦᠷᠢ ᠤᠤ? ᠶᠡᠷᠦ ᠡᠴᠡ ᠪᠠᠢᠬᠤ ᠦᠭᠡᠢ ᠪᠣᠯᠬᠣᠷ ᠨᠢ ᠪᠠᠢᠭᠠᠰᠠᠢ ᠭᠡᠵᠦ ᠵᠣᠬᠢᠶᠠᠭᠰᠠᠨ ᠳᠠᠭᠤᠤ ᠪᠣᠯᠪᠠ ᠤᠤ? ᠪᠦᠦ ᠮᠡᠳᠡ!
ᠠᠯᠤᠰ ᠬᠣᠯᠠ ᠶ᠋ᠢᠨ ᠭᠠᠵᠠᠷ ᠲᠤ
ᠠᠮᠠᠷᠠᠭ ᠬᠡᠦᠬᠡᠨ ᠪᠠᠢᠳᠠᠭ
ᠠᠯᠳᠠᠷ ᠨᠡᠷᠡ ᠨᠢ ᠳᠦᠦᠷᠢᠮᠡ
ᠠᠢ ᠳᠦᠦᠷᠢᠮᠡ ᠰᠠᠢᠬᠠᠨ ᠳᠦᠦᠷᠢᠮᠡ᠁
[ ᠰᠦᠯᠵᠢᠶᠡᠨ ᠳ᠋ᠦ᠍ ᠨᠡᠢᠲᠡᠯᠡᠬᠦ ᠳ᠋ᠡᠭᠡᠨ ᠪᠢᠴᠢᠭᠰᠡᠨ ᠵᠣᠬᠢᠶᠠᠭᠴᠢ ᠶ᠋ᠢᠨ ᠥᠪᠡᠷ ᠦ᠋ᠨ ᠬᠢᠨᠢ ᠴᠣᠬᠣᠯᠠᠪᠤᠷᠢ] ᠲᠤᠰ ᠵᠣᠬᠢᠶᠠᠯ《ᠤᠷᠤᠭ ᠭᠡᠷ ᠪᠦᠯᠢ ᠨᠡᠢᠭᠡᠮ》 ᠰᠡᠳᠬᠦᠯ ᠦ᠋ᠨ 2001 ᠣᠨ ᠤ᠋ 2 ᠳ᠋ᠤᠭᠠᠷ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠨᠡᠢᠲᠡᠯᠡᠭᠳᠡᠭᠰᠡᠨ ᠦ᠌ ᠳᠠᠷᠠᠭᠠ ᠵᠠᠷᠢᠮ ᠤᠩᠰᠢᠭᠴᠢ ᠰᠢᠭᠦᠮᠵᠢᠯᠡᠭᠰᠡᠨ ᠪᠣᠯᠪᠠᠴᠤ ᠪᠢ ᠬᠠᠷᠢᠭᠤ ᠥᠭᠭᠦᠭᠡ ᠦᠭᠡᠢ᠃ ᠬᠠᠷᠢᠨ ᠤᠩᠰᠢᠵᠤ ᠪᠣᠯᠭᠣᠭᠠᠭᠰᠠᠨ ᠳ᠋ᠤᠨᠢ ᠪᠠᠶᠠᠷᠯᠠᠵᠤ᠂ ᠶᠠᠮᠠᠷ ᠴᠤ ᠭᠡᠰᠡᠨ《ᠬᠠᠷᠢᠭᠤ ᠲᠤᠰᠬᠠᠯ》 ᠲᠠᠢ ᠪᠠᠢᠬᠤ ᠳ᠋ᠤᠨᠢ ᠤᠭ ᠵᠣᠬᠢᠶᠠᠯ ᠢ᠋ᠶ᠋ᠠᠨ ᠬᠡᠷᠡᠭ ᠲᠦ᠍ ᠬᠦᠷᠴᠡᠢ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃ ᠳᠦᠦᠷᠢᠮᠡ ᠰᠢᠭ᠌ ᠪᠠᠢᠶᠠ ᠭᠡᠳᠡᠭ ᠨᠢ ᠮᠣᠩᠭᠣᠯ ᠪᠦᠰᠡᠭᠦᠢᠴᠦᠳ ᠦ᠋ᠨ ᠨᠡᠢᠲᠡ ᠶ᠋ᠢᠨ ᠬᠦᠰᠡᠯᠡᠩ ᠲᠡᠳᠦᠢ ᠦᠭᠡᠢ᠂ ᠳᠦᠦᠷᠢᠮᠡ ᠰᠢᠭ᠌ ᠪᠠᠢᠭᠠᠰᠠᠢ ᠭᠡᠳᠡᠭ ᠨᠢ ᠴᠦ᠍ ᠮᠣᠩᠭᠣᠯ ᠡᠷᠡᠴᠦᠦᠯ ᠦ᠋ᠨ ᠬᠠᠮᠲᠤ ᠶ᠋ᠢᠨ ᠮᠥᠷᠥᠭᠡᠳᠦᠯ ᠶᠦᠮ᠃ ᠶᠠᠭ ᠯᠠ ᠪᠦᠰᠡᠭᠦᠢᠴᠦᠳ ᠡᠷᠡᠴᠦᠦᠯ ᠢ᠋ ᠴᠠᠬᠢᠭᠤᠷ ᠲᠡᠮᠦᠷ ᠰᠢᠭ᠌ ᠪᠠᠢᠭᠠᠰᠠᠢ ᠭᠡᠵᠦ ᠬᠦᠰᠡᠳᠡᠭ ᠰᠢᠭ᠌ ᠡᠷᠡᠴᠦᠳ ᠪᠠᠰᠠ ᠪᠦᠰᠡᠭᠦᠢᠴᠦᠳ ᠢ ᠳᠦᠦᠷᠢᠮᠡ ᠰᠢᠭ᠌ ᠪᠠᠢᠭᠠᠰᠠᠢ ᠭᠡᠵᠦ ᠪᠢᠲᠡᠭᠦᠦ ᠮᠥᠷᠥᠭᠡᠳᠳᠡᠭ᠃ ᠭᠡᠪᠡᠴᠦ ᠰᠠᠨᠠᠭᠠ ᠵᠠᠶᠠᠭᠠ ᠨᠡᠢᠯᠡᠬᠦ ᠦᠭᠡᠢ ᠬᠣᠷᠸᠠ ᠳ᠋ᠤ᠌ ᠮᠥᠷᠥᠭᠡᠳᠦᠯ ᠲᠠᠩᠳᠠ ᠵᠡᠭᠦᠳᠦ ᠪᠣᠯᠤᠭᠠᠳ ᠪᠠᠢᠳᠠᠭ ᠨᠢ ᠯᠡ ᠭᠣᠮᠣᠳᠠᠮᠠᠷ᠁ ᠬᠠᠷᠢᠨ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠢᠷᠡᠭᠡᠳᠦᠢ ᠳᠦᠦᠷᠢᠮᠡ ᠪᠣᠯᠬᠤ ᠰᠠᠨ ᠭᠡᠵᠦ ᠴᠢᠷᠮᠠᠢᠳᠠᠭ ᠪᠦᠰᠡᠭᠦᠢᠴᠦᠳ ᠪᠣᠯᠤᠨ ᠴᠠᠬᠢᠭᠤᠷ ᠲᠡᠮᠦᠷ ᠪᠣᠯᠬᠤ ᠰᠠᠨ ᠭᠡᠵᠦ ᠮᠥᠷᠥᠭᠡᠳᠳᠡᠭ ᠡᠷᠡᠴᠦᠦᠯ ᠦ᠋ᠨ ᠮᠥᠷᠦᠨ ᠳᠡᠭᠡᠷᠡ ᠪᠣᠢ ᠶᠤᠮ᠃ ᠮᠥᠷᠥᠭᠡᠳᠦᠯ ᠮᠢᠨᠢ ᠪᠡᠶᠡᠯᠡᠬᠦ ᠪᠠᠢᠬᠠ ᠭᠡᠳᠡᠭ ᠲᠦ᠍ ᠬᠡᠵᠢᠶᠡ ᠴᠦ᠍ ᠡᠷᠡᠭᠡᠯᠵᠡᠬᠦ ᠦᠭᠡᠢ᠁
—————
① ᠡᠨᠡ ᠵᠣᠬᠢᠶᠠᠯ《ᠤᠷᠤᠭ ᠭᠡᠷ ᠪᠦᠯᠢ ᠨᠡᠢᠭᠡᠮ》 ᠰᠡᠳᠬᠦᠯ ᠦ᠋ᠨ2001 ᠣᠨ ᠤ᠋2 ᠳ᠋ᠤᠭᠠᠷ ᠬᠤᠭᠤᠴᠠᠭᠠ ᠳ᠋ᠤ᠌ ᠨᠡᠢᠲᠡᠯᠡᠭᠳᠡᠭᠰᠡᠨ ᠪᠠᠢᠵᠠᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠡᠷᠡᠯ᠂ ᠨᠡᠭᠦᠳᠡᠯ᠂ ᠪᠠᠶᠠᠨᠴᠡᠴᠡᠭ᠂ ᠰᠤᠳᠤᠯᠲᠤ᠂ ᠡᠷᠳᠡᠨᠢᠭᠣᠤᠠ
ᠬᠢᠨᠠᠭᠴᠢ ᠪᠠᠭᠰᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ