ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠨᠢᠭᠡᠳᠦᠭᠡᠷ ᠪᠦᠯᠦᠭ᠂ᠠᠩᠬᠠᠨ ᠤ ᠠᠶᠠᠯᠠᠯ (ᠵᠢᠷᠭᠤᠭᠠ) Сэрүүхэн тал нутаг – <свис> Вальтер Босгард ( Walter Bosshard)- Нэгдүгээр бүлэг・Анхны аялал (6)
521ᠵᠢᠷᠭᠤᠭᠠ ᠂ ᠰᠥᠨᠢᠳ ᠸᠠᠩ ᠤ᠋ᠨ ᠣᠷᠳᠣᠨ ᠳ᠋ᠤ᠌
ᠸᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠪᠦᠷᠢ ᠨᠢ ᠤᠳᠠᠭᠠᠨ ᠪᠢᠳᠠᠭᠤᠯᠢᠭ ᠪᠠᠢᠵᠤ᠂ ᠴᠠᠢ ᠶ᠋ᠢᠨ ᠠᠶᠠᠭᠠ ᠪᠠᠨ ᠳᠡᠭᠡᠭᠰᠢ ᠪᠡᠨ ᠡᠷᠭᠦᠵᠦ ᠠᠮᠠᠨ ᠳ᠋ᠠᠭᠠᠨ ᠲᠤᠯᠭᠠᠭᠠᠳ᠂ ᠵᠤᠵᠠᠭᠠᠨ ᠳᠣᠣᠷᠠᠲᠤ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠥᠳᠡᠯᠭᠡᠬᠦ ᠮᠡᠲᠦ ᠶ᠋ᠢᠨ ᠬᠥᠳᠡᠯᠦᠯ ᠪᠠᠷᠢᠯ ᠠ᠋ᠴᠠ ᠨᠢ ᠬᠠᠷᠠᠪᠠᠯ ᠶᠠᠭ ᠯᠠ ᠥᠨᠳᠥᠷ ᠨᠠᠰᠤᠲᠠᠨ ᠴᠢᠬᠤᠯᠠ ᠶᠡᠬᠡ ᠪᠠᠶᠠᠷ ᠨᠠᠢᠷ ᠳᠡᠭᠡᠷᠡ ᠪᠠᠢᠭᠠ ᠰᠢᠭ᠋ ᠯᠡ ᠪᠠᠢᠪᠠ᠃ ᠲᠣᠷᠭᠠᠨ ᠵᠠᠭᠠᠮᠠ ᠶ᠋ᠢ ᠨᠢ ᠳᠦᠭᠦᠷᠭᠡᠭᠰᠡᠨ ᠳᠠᠪᠬᠤᠷ ᠡᠷᠡᠦ ᠶ᠋ᠢ ᠨᠢ ᠦᠳᠡ ᠶ᠋ᠢᠨ ᠬᠣᠢᠨᠠ ᠶ᠋ᠢᠨ ᠨᠠᠷᠠᠨ ᠤ᠋ ᠭᠡᠭᠡ ᠲᠣᠳᠣᠬᠠᠨ ᠳᠣᠪᠣᠢᠯᠭᠠᠵᠠᠢ᠃ ᠬᠥᠮᠦᠨ ᠦ᠌ ᠠᠩᠬᠠᠷᠤᠯ ᠢ᠋ ᠬᠠᠮᠤᠭ ᠠ᠋ᠴᠠ ᠲᠠᠲᠠᠬᠤ ᠨᠢ ᠬᠠᠰᠢ ᠯᠠ ᠲᠡᠭᠦᠨ ᠦ᠌ ᠪᠣᠷᠣ ᠬᠦᠷᠡᠩ ᠥᠩᠭᠡ ᠲᠡᠢ ᠬᠤᠷᠴᠠ ᠬᠣᠶᠠᠷ ᠨᠢᠳᠦ ᠨᠢ ᠪᠠᠢᠵᠤ᠂ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠨᠡᠪᠲᠡᠷᠡᠲᠡᠯᠡ ᠲᠣᠳᠣᠷᠬᠠᠢ ᠬᠠᠷᠠᠵᠤ ᠳᠡᠢᠯᠬᠦ ᠮᠡᠲᠦ ᠠᠵᠢ᠃ ᠨᠢᠷᠤᠭᠤ ᠪᠠᠨ ᠳᠠᠭᠠᠭᠤᠯᠤᠨ ᠨᠢᠭᠲᠠ ᠬᠦᠷᠦᠭᠰᠡᠨ ᠤᠷᠲᠤ ᠭᠡᠵᠢᠭᠡ ᠪᠡᠨ ᠤᠨᠵᠢᠢᠯᠭᠠᠵᠤ᠂ ᠬᠠᠷᠠ ᠥᠩᠭᠡᠲᠡᠢ ᠣᠷᠣᠢᠪᠴᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠵᠠᠢ᠃
ᠵᠢᠷᠤᠭ 19 ᠰᠥᠨᠢᠳ ᠸᠠᠩ ᠮᠡᠳᠡᠭᠡ ᠬᠦᠷᠭᠡᠭᠴᠢ ᠲᠣᠮᠢᠯᠠᠵᠤ ᠪᠠᠢᠭᠠ ᠨᠢ
ᠸᠠᠩ᠂ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠶᠠᠪᠤᠭᠤᠯᠤᠭᠰᠠᠨ ( ᠵᠢᠷᠤᠭ 19 ) ᠤ ᠳᠠᠷᠠᠭᠠ ᠪᠢᠳᠡᠨ ᠲᠡᠢ ᠮᠡᠨᠳᠦᠴᠢᠯᠡᠪᠡ᠃ ᠪᠢᠳᠡᠨ ᠦ᠌ ᠣᠷᠴᠢᠭᠤᠯᠤᠭᠴᠢ ᠶ᠋ᠢ ᠮᠡᠨᠳᠦᠴᠢᠯᠡᠯ ᠦ᠋ᠨ ᠶᠠᠷᠢᠶᠠ ᠪᠠᠨ ᠶᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠲᠡᠷᠡ ᠲᠣᠯᠣᠭᠠᠢ ᠪᠠᠨ ᠬᠠᠶᠠ ᠬᠠᠶᠠ ᠳᠣᠬᠢᠭᠰᠠᠭᠠᠷ ᠪᠠᠢᠪᠠ᠃ ᠤᠳᠠᠯ ᠦᠭᠡᠢ ᠢᠷᠡᠭᠡᠳᠦᠢ ᠶ᠋ᠢᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠪᠠᠢᠳᠠᠯ ᠤ᠋ᠨ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠸᠠᠩ ᠤ᠋ᠨ ᠴᠣᠭ ᠵᠣᠯᠢ ᠨᠢ ᠰᠡᠷᠭᠦᠵᠦ᠂ ᠥᠪᠡᠷ ᠦ᠋ᠨ ᠦᠵᠡᠯᠲᠡ ᠪᠡᠨ ᠶᠠᠷᠢᠵᠤ ᠡᠬᠢᠯᠡᠯᠡ᠃
— ᠬᠡᠳᠦᠨ ᠡᠳᠦᠷ ᠦ᠋ᠨ ᠡᠮᠦᠨᠡᠬᠡᠨ ᠰᠢᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠴᠢᠭᠤᠯᠭᠠᠨ ᠤ᠋ ᠵᠡᠭᠦᠨ ᠬᠡᠰᠡᠭ ᠦ᠋ᠨ ᠸᠠᠩ ᠬᠦᠩ ᠦ᠋ᠳ ᠮᠠᠨᠵᠤ ᠤᠯᠤᠰ ᠤ᠋ᠨ ᠬᠢᠵᠠᠭᠠᠷ ᠲᠤ᠌ ᠪᠠᠢᠭᠠ ᠦᠵᠦᠮᠦᠴᠢᠨ ᠨᠤᠲᠤᠭ ᠲᠤ᠌ ᠠᠭᠤᠯᠵᠠᠯᠳᠤᠭᠰᠠᠨ ᠶᠤᠮ᠃ ᠲᠡᠨᠳᠡ ᠪᠢᠳᠡ ᠮᠣᠩᠭᠣᠯ ᠤ᠋ᠨ ᠢᠷᠡᠭᠡᠳᠦᠢ ᠶ᠋ᠢᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠪᠠᠢᠳᠠᠯ ᠤ᠋ᠨ ᠲᠤᠬᠠᠢ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠬᠥᠭᠵᠢᠯᠲᠡ ᠵᠢᠴᠢ ᠶᠠᠫᠣᠨᠴᠤᠳ ᠪᠢᠳᠡᠨ ᠢ᠋ ᠰᠢᠨᠡ ᠪᠠᠢᠭᠤᠯᠤᠭᠰᠠᠨ ᠮᠠᠨᠵᠤ ᠤᠯᠤᠰ ᠲᠠᠭᠠᠨ ᠣᠷᠣᠭᠤᠯᠬᠤ ᠭᠡᠰᠡᠨ ᠤᠷᠢᠯᠭᠠ ᠶ᠋ᠢᠨ ᠪᠢᠴᠢᠭ ᠦ᠋ᠨ ᠲᠤᠬᠠᠢ ᠶᠠᠷᠢᠯᠴᠠᠭᠰᠠᠨ ᠶᠤᠮ᠃ ᠶᠠᠫᠣᠨᠴᠤᠳ ᠪᠢᠳᠡᠨ ᠦ᠌ ᠥᠷᠨᠢᠭᠦᠯᠵᠦ ᠪᠠᠢᠭᠠ ᠮᠣᠩᠭᠣᠯ ᠤ᠋ᠨ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠤ᠋ᠨ ᠬᠥᠳᠡᠯᠭᠡᠭᠡᠨ ᠢ᠋ ᠤᠳᠬᠠ ᠠᠭᠤᠯᠭᠠ ᠦᠭᠡᠢ ᠭᠡᠵᠦ ᠬᠡᠯᠡᠭᠰᠡᠨ ᠶᠦᠮ᠃ ᠭᠡᠬᠦ ᠳ᠋ᠦ᠍ ᠪᠢᠳᠡ ᠬᠠᠷᠢᠨ ᠬᠢᠲᠠᠳ ᠠ᠋ᠴᠠ ᠲᠤᠰᠠᠭᠠᠷᠯᠠᠬᠤ ᠡᠨᠡ ᠴᠢᠬᠤᠯᠠ ᠠᠰᠠᠭᠤᠳᠠᠯ ᠢ᠋ ᠰᠢᠢᠳᠪᠦᠷᠢᠯᠡᠬᠦ ᠴᠠᠭ ᠨᠢ ᠬᠦᠷᠴᠦ ᠢᠷᠡᠭᠡ ᠦᠭᠡᠢ ᠭᠡᠮᠡᠨ ᠦᠵᠡᠵᠦ ᠪᠠᠢᠨᠠ ᠭᠡᠰᠡᠨ ᠢ᠋ᠶ᠋ᠡᠨ ᠲᠡᠮᠴᠦᠭᠳᠦᠩᠷᠣᠪ ᠨᠣᠶᠠᠨ ᠪᠢᠳᠡᠨ ᠦ᠌ ᠣᠷᠴᠢᠭᠤᠯᠤᠭᠴᠢ ᠶ᠋ᠢᠨ ᠣᠷᠴᠢᠭᠤᠯᠵᠤ ᠪᠠᠷᠠᠬᠤ ᠶ᠋ᠢ ᠬᠦᠯᠢᠶᠡᠵᠦ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠶᠠᠷᠢᠶᠠ ᠪᠠᠨ ᠵᠠᠯᠭᠠᠵᠤ:
— ᠮᠣᠩᠭᠣᠯ ᠤ᠋ᠨ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠤ᠋ᠨ ᠬᠥᠳᠡᠯᠭᠡᠭᠡᠨ ᠨᠢᠭᠡᠨᠲᠡ ᠪᠦᠬᠦ ᠮᠣᠩᠭᠣᠯ ᠤ᠋ᠨ ᠬᠡᠪᠴᠢᠶᠡᠨ ᠳ᠋ᠦ᠍ ᠥᠷᠨᠢᠩᠭᠦᠢ ᠬᠥᠭᠵᠢᠨ ᠳᠡᠯᠭᠡᠷᠡᠭᠰᠡᠨ ᠶᠦᠮ᠃ ᠭᠡᠪᠡᠴᠦ ᠵᠡᠪᠰᠡᠭ ᠦ᠋ᠨ ᠬᠦᠴᠦᠨ ᠯᠡ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠢ᠋ ᠮᠡᠬᠦᠢᠯᠭᠡᠵᠦ ᠪᠠᠢᠨᠠ᠂ ᠡᠨᠡ ᠪᠣᠯ ᠪᠢᠳᠡᠨ ᠦ᠌ ᠪᠠᠭᠤᠷᠠᠢ ᠲᠠᠯᠠ᠃ ᠪᠢᠳᠡ ᠵᠠᠷ ᠵᠡᠪᠰᠡᠭ ᠮᠠᠭᠤᠲᠠᠢ ᠮᠥᠷᠲᠡᠭᠡᠨ ᠰᠢᠨᠡ ᠵᠡᠪᠰᠡᠭ᠂ ᠰᠢᠨᠡ ᠲᠡᠢᠨ ᠦ᠌ ᠲᠤᠬᠠᠢ ᠣᠢᠯᠠᠭᠠᠯᠲᠠ ᠳᠤᠲᠠᠮᠠᠭ ᠪᠠᠢᠭᠰᠠᠭᠠᠷ ᠃ ᠬᠢᠲᠠᠳ ᠤᠯᠤᠰ ᠰᠡᠭᠦᠯᠴᠢ ᠶ᠋ᠢᠨ ᠵᠠᠭᠤᠨ ᠵᠢᠯ ᠳ᠋ᠦ᠍ ᠪᠢᠳᠡᠨ ᠳ᠋ᠦ᠍ ᠶᠣᠰᠣᠲᠠᠢ ᠬᠣᠢᠲᠤ ᠡᠬᠡ ᠰᠢᠭ ᠬᠠᠨᠳᠤᠭᠰᠠᠨ ᠶᠤᠮ᠃ ᠭᠡᠬᠦ ᠳ᠋ᠦ᠍ ᠬᠡᠷᠪᠡ ᠬᠢᠲᠠᠳ ᠤ᠋ᠨ ᠵᠠᠰᠠᠭ ᠪᠢᠳᠡᠨ ᠦ᠌ ᠵᠣᠷᠢᠯᠲᠠ — ᠣᠨᠴᠠᠭᠠᠢᠯᠠᠨ ᠬᠢᠲᠠᠳ ᠤ᠋ᠨ ᠨᠡᠭᠦᠳᠡᠯᠯᠡᠨ ᠢᠷᠡᠬᠦ ᠶ᠋ᠢ ᠬᠣᠷᠢᠭᠯᠠᠨ ᠵᠣᠭᠰᠣᠭᠠᠵᠤ᠂ ᠮᠣᠩᠭᠣᠯ ᠸᠠᠩ ᠬᠦᠩ ᠨᠠᠷ ᠤ᠋ᠨ ᠪᠠᠢᠭᠤᠯᠤᠭᠰᠠᠨ ᠵᠠᠰᠠᠭ ᠤ᠋ᠨ ᠪᠠᠢᠭᠤᠯᠤᠮᠵᠢ ᠶ᠋ᠢ ᠮᠡᠳᠡᠷᠡᠬᠦ ᠵᠢᠴᠢ ᠣᠳᠣ ᠪᠣᠯᠲᠠᠯᠠ ᠳᠠᠷᠤᠩᠭᠤᠢᠯᠠᠨ ᠵᠠᠬᠢᠷᠴᠤ ᠪᠠᠢᠭᠠ ᠬᠢᠲᠠᠳ 《ᠵᠥᠪᠯᠡᠭᠴᠢ 》ᠨᠠᠷ ᠢ᠋ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠮᠣᠩᠭᠣᠯ ᠵᠠᠰᠠᠭ ᠤ᠋ᠨ ᠳᠣᠣᠷᠠ ᠬᠠᠮᠢᠶᠠᠷᠤᠭᠤᠯᠬᠤ ᠳ᠋ᠤ᠌ ᠯᠠ ᠬᠦᠷᠪᠡᠯ ᠪᠢᠳᠡᠨ ᠬᠢᠲᠠᠳ ᠤᠯᠤᠰ ᠲᠤ᠌ ᠦᠨᠡᠨᠴᠢ ᠪᠡᠷ ᠬᠠᠨᠳᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠨᠠ᠃ ᠲᠡᠳᠡ ᠪᠣᠯ ᠵᠥᠪᠯᠡᠭᠴᠢ ᠯᠡ ᠪᠠᠢᠬᠤ ᠶᠣᠰᠣᠲᠠᠢ᠂ ᠬᠠᠷᠢᠨ ᠠᠳᠠᠭᠢ ᠨᠣᠶᠠᠷᠬᠠᠭᠴᠢ ᠪᠢᠰᠢ᠃ ᠲᠡᠳᠡᠨ ᠦ᠌ ᠰᠢᠢᠳᠪᠦᠷᠢ ᠨᠢ ᠴᠦ᠍ ᠮᠣᠩᠭᠣᠯ ᠲᠦᠮᠡᠨ ᠳ᠋ᠦ᠍ ᠬᠣᠣᠷᠯᠠᠯ ᠬᠥᠨᠥᠭᠡᠯ ᠤᠴᠠᠷᠠᠭᠤᠯᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ᠃ ᠪᠢᠳᠡᠨ ᠢ᠋ ᠬᠥᠯ ᠳᠣᠣᠷᠠ ᠪᠠᠨ ᠳᠡᠪᠰᠡᠵᠦ ᠪᠠᠢᠭᠰᠠᠨ ᠴᠠᠭ ᠨᠢᠭᠡᠨᠲᠡ ᠥᠩᠭᠡᠷᠡᠭᠰᠡᠨ ᠭᠡᠯᠡ᠃ ᠦᠳᠡ ᠥᠩᠭᠡᠷᠡᠵᠦ᠂ ᠠᠯᠲᠠᠨ ᠰᠢᠷᠭᠠᠯ ᠨᠠᠷᠠ ᠪᠠᠷᠠᠭᠤᠨ ᠬᠣᠢᠰᠢ ᠪᠠᠨ ᠬᠠᠵᠠᠢᠯᠠ᠃ ᠪᠢᠳᠡᠨ ᠥᠷᠥᠭᠡᠨ ᠡᠴᠡ ᠭᠠᠷᠬᠤ ᠳ᠋ᠤ᠌ ᠸᠠᠩ ᠤ᠋ᠨ ᠣᠷᠳᠣᠨ ᠤ᠋ ᠪᠠᠭᠠᠬᠠᠨ ᠬᠦᠷᠢᠶᠡᠨ ᠳ᠋ᠦ᠍ ᠬᠥᠬᠡ ᠰᠠᠭᠠᠷᠠᠯ ᠥᠩᠭᠡ ᠶ᠋ᠢᠨ ᠴᠡᠷᠢᠭ ᠬᠤᠪᠴᠠᠰᠤ ᠲᠠᠢ ᠰᠥᠨᠢ ᠶ᠋ᠢᠨ ᠡᠭᠡᠯᠵᠢ ᠶ᠋ᠢᠨ ᠠᠷᠪᠠᠨ ᠬᠣᠶᠠᠷ ᠰᠢᠳᠠᠷ ᠴᠡᠷᠢᠭ ᠭᠠᠷ ᠳᠠᠬᠢ ᠫᠤᠤ ᠪᠠᠨ ᠠᠳᠬᠤᠨ ᠵᠣᠭᠰᠣᠵᠤ᠂ ᠸᠠᠩ ᠨᠣᠶᠠᠨ ᠤ᠋ ᠭᠠᠷᠴᠤ ᠣᠷᠣᠬᠤ ᠳ᠋ᠤ᠌ ᠫᠤᠤ ᠪᠠᠨ ᠡᠷᠭᠦᠨ ᠶᠣᠰᠣᠯᠠᠵᠤ ᠪᠠᠢᠪᠠ ( ᠵᠢᠷᠤᠭ 30 ) ᠃ ᠴᠡᠷᠢᠭ ᠦ᠋ᠨ ᠵᠡᠪᠰᠡᠭ ᠬᠠᠮᠢᠶᠠᠷᠤᠭᠴᠢ ᠨᠢ ᠭᠣᠵᠣᠭᠣᠷ ᠣᠷᠣᠢ ᠲᠠᠢ ᠮᠠᠯᠠᠭᠠᠢ ᠡᠮᠦᠰᠴᠦ᠂ ᠬᠣᠶᠠᠷ ᠵᠠᠭᠤ ᠭᠠᠷᠤᠢ ᠬᠥᠮᠦᠨ ᠢ᠋ ᠵᠡᠪᠰᠡᠭᠯᠡᠵᠦ ᠳᠡᠢᠯᠬᠦ ᠵᠠᠷ ᠵᠡᠪᠰᠡᠭ ᠢ᠋ ᠬᠤᠷᠢᠶᠠᠭᠰᠠᠨ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠤ᠋ ᠡᠭᠦᠳᠡᠨ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠢᠯᠠ᠃ ᠡᠨᠡ ᠨᠢ ᠦᠨᠡᠨᠳᠡᠭᠡᠨ ᠳᠡᠭᠡᠷᠡ ᠵᠠᠭᠤᠨ ᠤ᠋ ᠵᠠᠷ ᠵᠡᠪᠰᠡᠭ ᠦ᠋ᠨ ᠮᠦᠽᠧᠢ ᠰᠢᠭ ᠶᠦᠮ᠃ ᠬᠠᠮᠤᠭ ᠤ᠋ᠨ ᠰᠢᠨᠡ ᠭᠡᠭᠳᠡᠭᠰᠡᠨ ᠨᠢ ᠬᠣᠶᠠᠷ ᠮᠠᠰᠢᠨ ᠫᠤᠤ ( ᠵᠢᠷᠤᠭ 27 ) ᠪᠠᠢᠵᠤ᠂ ᠲᠡᠭᠦᠨ ᠢ᠋ ᠬᠡᠷᠡᠭᠯᠡᠳᠡᠭ ᠳᠥᠷᠪᠡᠨ ᠮᠣᠩᠭᠣᠯ ᠨᠢ ᠬᠢᠲᠠᠳ ᠲᠤ᠌ ᠬᠦᠷᠴᠦ ᠰᠤᠷᠤᠭᠠᠳ ᠢᠷᠡᠭᠰᠡᠨ ᠭᠡᠨᠡ᠃ ᠲᠡᠮᠴᠦᠭ᠌ᠳᠣᠩᠷᠤᠪ ᠨᠣᠶᠠᠨ ᠲᠡᠭᠦᠨ ᠦ᠌ ᠲᠣᠭᠯᠠᠵᠤ ᠥᠰᠦᠭᠰᠡᠨ ᠳᠣᠪᠣᠴᠠᠭ ᠤ᠋ᠨ ᠴᠠᠭᠠᠨᠠ ᠵᠢᠭᠰᠠᠭᠠᠭᠰᠠᠨ ᠮᠣᠷᠢᠲᠤ ᠴᠡᠷᠢᠭ ( ᠵᠢᠷᠤᠭ 29 ) ᠪᠡᠨ ᠵᠣᠷᠢᠭᠵᠢᠭᠤᠯᠬᠤ ᠶ᠋ᠢᠨ ᠬᠠᠮᠲᠤ ᠪᠢᠳᠡᠨ ᠳ᠋ᠦ᠍ ᠮᠣᠩᠭᠣᠯ ᠮᠣᠷᠢᠲᠠᠨ ᠤ᠋ ᠤᠷᠠᠨ ᠡᠷᠳᠡᠮ ᠢ᠋ ᠦᠵᠡᠭᠦᠯᠬᠦ ᠪᠡᠷ ᠠᠵᠢᠨᠠᠢ ᠬᠦᠯᠦᠭ ᠲᠡᠭᠡᠨ ᠮᠣᠷᠳᠠᠨ ᠳᠠᠪᠬᠢᠭᠤᠯᠬᠤ ( ᠵᠢᠷᠤᠭ 26 ) ᠳ᠋ᠤ᠌ ᠪᠢᠳᠡ ᠴᠦ᠍ ᠮᠠᠰᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠭᠠᠵᠤ ᠳᠣᠪᠲᠣᠯᠭᠠᠪᠠ᠃ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠮᠣᠷᠢᠨ ᠳ᠋ᠠᠭᠠᠨ ᠬᠥᠩᠭᠡᠨ ᠱᠠᠯᠠᠮᠠᠭᠠᠢ ᠮᠣᠷᠳᠠᠵᠤ᠂ ᠪᠢᠳᠡᠨ ᠦ᠌ ᠬᠠᠵᠠᠭᠤ ᠪᠠᠷ ᠳᠣᠪᠲᠣᠯᠤᠨ ᠥᠩᠭᠡᠷᠡᠬᠦ ᠳ᠋ᠦ᠍ ᠭᠠᠵᠠᠷ ᠳᠡᠯᠡᠬᠡᠢ ᠴᠡᠴᠡᠷᠡᠵᠦ ᠪᠠᠢᠪᠠ᠃ 《ᠴᠢᠩᠭᠢᠰ ᠬᠠᠭᠠᠨ ᠤ᠋ ᠴᠡᠷᠢᠭ ᠠᠩᠭᠢ ᠭᠡᠵᠦ ᠡᠢᠮᠦ ᠪᠠᠢᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ ! 》ᠭᠡᠵᠦ ᠮᠠᠨ ᠤ᠋ ᠬᠢᠨ ᠦ᠌ ᠨᠢᠭᠡ ᠨᠢ ᠶᠠᠷᠢᠪᠠ᠃ ᠬᠠᠮᠤᠭ ᠤ᠋ᠨ ᠡᠮᠦᠨᠡ ᠨᠢ ᠳᠠᠯᠪᠠᠭᠠ ᠪᠠᠷᠢᠭᠰᠠᠨ ᠮᠣᠷᠢᠲᠠᠨ ᠳᠠᠪᠬᠢᠭᠤᠯᠵᠤ ( ᠵᠢᠷᠤᠭ 28 ) ᠂ ᠬᠠᠷᠠ ᠥᠩᠭᠡ ᠶ᠋ᠢᠨ ᠮᠣᠩᠭᠣᠯ ᠬᠢᠲᠠᠳ ᠬᠠᠳᠬᠤᠮᠠᠯ ᠪᠢᠴᠢᠭ ᠲᠡᠢ ᠰᠢᠷᠠ ᠳᠠᠯᠪᠠᠭᠠ ᠨᠢ ᠰᠠᠯᠬᠢᠨ ᠳ᠋ᠤ᠌ ᠳᠠᠷᠪᠠᠯᠵᠠᠨᠠ᠃ ᠲᠡᠷᠡ ᠣᠮᠣᠭ ᠲᠡᠭᠦᠯᠳᠡᠷ ᠢ᠋ᠶ᠋ᠡᠷ ᠸᠠᠩ ᠨᠣᠶᠠᠨ ᠳ᠋ᠠᠭᠠᠨ ᠮᠡᠨᠳᠦᠴᠢᠯᠡᠬᠦ ᠳ᠋ᠦ᠍ ᠣᠯᠠᠨ ᠴᠡᠷᠢᠭ ᠨᠢ ᠴᠦ᠍ ᠳᠠᠭᠠᠯᠳᠤᠨ ᠠᠯᠢ ᠡᠷᠲᠡ ᠧᠦ᠋ᠷᠣᠫᠠ ᠶ᠋ᠢ ᠳᠣᠩᠰᠣᠯᠭᠠᠵᠤ ᠪᠠᠢᠭᠰᠠᠨ ᠳᠠᠭᠤᠨ ᠢ᠋ᠶ᠋ᠠᠷ ᠮᠡᠨᠳᠦᠯᠡᠵᠦ ᠭᠠᠷᠤᠯᠠ᠃
ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠡᠩᠨᠡᠭᠡ ᠪᠠᠷᠠᠭᠤᠨ ᠬᠣᠢᠰᠢ ᠳᠠᠪᠬᠢᠭᠤᠯᠤᠭᠰᠠᠭᠠᠷ ᠰᠢᠩᠭᠡᠬᠦ ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠳ᠋ᠤ᠌ ᠳᠡᠯᠲᠠᠷᠠᠨ ᠣᠷᠣᠪᠠ᠃ ᠡᠨᠡ ᠨᠢ ᠨᠠᠳᠠ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠰᠤᠪᠢᠨ ᠲᠡᠮᠳᠡᠭ ᠢ᠋ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠮᠡᠲᠦ ᠪᠣᠯᠪᠠ᠃ ᠶᠠᠭ ᠯᠠ ᠰᠢᠩᠭᠡᠬᠦ ᠨᠠᠷᠠᠨ ᠤ᠋ ᠰᠢᠷᠭᠠᠯ ᠲᠤᠶᠠᠭᠠ ᠨᠢ ᠲᠠᠯᠠ ᠨᠤᠲᠤᠭ ᠢ᠋ ᠭᠡᠢᠭᠦᠯᠬᠦ ᠳ᠋ᠡᠭᠡᠨ ᠲᠡᠭᠦᠨ ᠦ᠌ ᠬᠠᠭᠤᠴᠢᠨ ᠴᠠᠭ ᠤ᠋ᠨ ᠭᠡᠷᠡᠯ ᠭᠢᠯᠪᠠᠭᠠ ᠪᠠᠨ ᠠᠬᠢᠨ ᠨᠢᠭᠡ ᠤᠳᠠᠭᠠ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ ᠪᠠᠢᠭᠠ ᠮᠡᠲᠦ᠃ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠪᠢᠴᠢᠭ ᠨᠢᠭᠡᠨᠲᠡ ᠪᠠᠭᠤᠴᠢᠬᠠᠭᠰᠠᠨ ᠪᠢᠰᠢ ᠤᠤ ? ᠮᠣᠩᠭᠣᠯᠴᠤᠳ ᠤ᠋ᠨ ᠬᠦᠷᠰᠢ ᠨᠢ ᠡᠮᠦᠨᠡ ᠪᠣᠯᠤᠨ ᠵᠡᠭᠦᠨ ᠵᠦᠭ ᠡᠴᠡ ᠬᠡᠳᠦᠢᠨ ᠲᠠᠷᠢᠶᠠᠯᠠᠵᠤ ᠪᠣᠯᠤᠮᠠᠷ ᠮᠣᠩᠭᠣᠯ ᠭᠠᠵᠠᠷ ᠢ᠋ ᠪᠦᠷ ᠰᠡᠨᠳᠡᠯᠵᠦ ᠬᠠᠶᠠᠭᠰᠠᠨ ᠪᠠᠢᠬᠤ ᠳ᠋ᠤ᠌ ᠲᠡᠳᠡ ᠪᠠᠰᠠ ᠡᠳᠡᠭᠡᠷ ᠨᠤᠲᠤᠭ ᠢ᠋ᠶ᠋ᠠᠨ ᠪᠤᠴᠠᠭᠠᠨ ᠣᠯᠬᠤ ᠶᠣᠰᠣ ᠪᠠᠢᠨᠠ ᠭᠡᠵᠢ ᠤᠤ ? ᠲᠡᠳᠡ ᠡᠨᠡ ᠣᠯᠠᠨ ᠲᠣᠭᠠᠯᠠᠰᠢ ᠦᠭᠡᠢ ᠬᠥᠮᠦᠨ ᠢ ᠬᠠᠮᠢᠭᠠᠰᠢ ᠪᠠᠨ ᠨᠡᠭᠦᠯᠭᠡᠨ ᠰᠠᠭᠤᠯᠭᠠᠳᠠᠭ ᠪᠢᠯᠡ ?
ᠢᠩᠭᠢᠵᠦ ᠪᠣᠳᠣᠭᠰᠠᠭᠠᠷ ᠪᠢ ᠮᠠᠰᠢᠨ ᠤ᠋ ᠪᠠᠨ ᠵᠦᠭ ᠪᠤᠴᠠᠨ ᠠᠯᠬᠤᠯᠠᠪᠠ᠃ ᠲᠡᠮᠴᠦᠭ᠌ᠲᠣᠩᠷᠣᠪ ᠨᠣᠶᠠᠨ ᠴᠤ᠌ ᠠᠳᠠ ᠢᠷᠡᠭᠡᠳ ᠭᠣᠶᠣ ᠰᠠᠢᠬᠠᠨ ᠪᠣᠢᠺ ᠮᠠᠰᠢᠨ ᠢ ᠠᠵᠢᠭᠯᠠᠵᠤ ᠪᠠᠢᠪᠠ᠃ ᠲᠡᠷᠡ ᠶᠠᠭ ᠯᠠ ᠵᠢᠷᠣᠭᠠ ᠮᠣᠷᠢ ᠰᠣᠨᠢᠷᠬᠠᠵᠤ ᠪᠠᠢᠭᠠ ᠰᠢᠭ᠋ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠠᠵᠢᠭᠯᠠᠨ ᠰᠢᠨᠵᠢᠵᠦ ᠪᠠᠢᠯᠠ᠃ ᠠᠬᠢᠭᠠᠳ ᠵᠢᠯᠣᠭᠣᠴᠢ ᠶ᠋ᠢᠨ ᠰᠠᠭᠤᠳᠠᠯ ᠳᠡᠭᠡᠷᠡ ᠨᠢ ᠭᠠᠷᠴᠤ ᠰᠠᠭᠤᠭᠠᠳ᠂ ᠮᠣᠲ᠋ᠣᠷ ᠢ᠋ ᠨᠢ ᠠᠰᠠᠭᠠᠨ ᠬᠦᠷᠴᠢᠭᠢᠨᠡᠭᠦᠯᠵᠦ ᠦᠵᠡᠭᠡᠳ ᠦᠨᠡ ᠶ᠋ᠢ ᠨᠢ ᠰᠤᠷᠠᠪᠠ᠃
ᠶᠠᠷᠢᠯᠴᠠᠭᠰᠠᠭᠠᠷ ᠪᠠᠢᠭᠠᠳ ᠪᠢᠳᠡᠨ ᠦ᠌ ᠶᠠᠷᠢᠶᠠ ᠡᠪᠡᠳᠴᠢᠲᠡᠢ ᠠᠪᠠᠬᠠᠢ ᠶ᠋ᠢᠨ ᠳᠡᠭᠡᠷᠡ ᠰᠢᠯᠵᠢᠪᠡ᠃ ᠡᠸᠷᠢᠺᠰᠦᠨ ᠲᠡᠭᠦᠨ ᠢ᠋ ᠦᠵᠡᠬᠦ ᠪᠡᠷ ᠬᠦᠷᠦᠶᠡ ᠭᠡᠵᠦ ᠰᠠᠨᠠᠭᠤᠯᠭᠠ ᠭᠠᠷᠭᠠᠭᠰᠠᠨ ᠳ᠋ᠤ᠌ ᠳᠡᠮᠴᠦᠭᠳᠣᠩᠷᠤᠪ ᠨᠣᠶᠠᠨ ᠴᠤ᠌ ᠪᠢᠳᠡᠨ ᠲᠡᠢ ᠴᠣᠭ ᠮᠠᠰᠢᠨ ᠳ᠋ᠤ᠌ ᠰᠠᠭᠤᠵᠤ᠂ ᠸᠠᠩ ᠤ᠋ᠨ ᠣᠷᠳᠣᠨ ᠳ᠋ᠤ᠌ ᠪᠤᠴᠠᠬᠤ ᠪᠠᠷ ᠲᠠᠯᠠ ᠳᠡᠭᠡᠭᠦᠷ ᠳᠠᠪᠬᠢᠭᠤᠯᠪᠠ᠃ ᠠᠪᠠᠬᠠᠢ ᠶ᠋ᠢᠨ ᠲᠡᠨᠳᠡ ᠬᠦᠷᠬᠦ ᠳ᠋ᠦ᠍ ᠱᠢᠷᠦᠨ ᠰᠢᠭᠢᠳᠬᠡᠭᠡ ᠲᠡᠢ ᠮᠥᠩᠭᠥᠨ ᠳᠠᠷᠤᠭᠤᠯᠭᠠ ᠵᠡᠭᠦᠭᠰᠡᠨ (ᠵᠢᠷᠤᠭ 32) ᠨᠡᠯᠢᠶᠡᠳ ᠪᠦᠰᠡᠭᠦᠢᠴᠦᠦᠯ ᠰᠠᠭᠤᠵᠤ ᠪᠠᠢᠪᠠ (ᠵᠢᠷᠤᠭ 33) ᠃ ᠲᠡᠳᠡ ᠨᠠᠷ ᠪᠣᠯ ᠳᠡᠮᠴᠦᠭᠳᠣᠩᠷᠤᠪ ᠨᠣᠶᠠᠨ ᠤ᠋ ᠨᠠᠰᠤᠲᠠᠢ ᠡᠵᠢ ᠶ᠋ᠢᠨ ᠳ᠋ᠦ᠍ ᠠᠢᠯᠴᠢᠯᠠᠵᠤ ᠢᠷᠡᠭᠰᠡᠨ ᠰᠠᠳᠤᠨ ᠲᠥᠷᠥᠯ ᠦ᠋ᠨ ᠬᠢᠨ ᠪᠠᠢᠵᠠᠢ᠃
ᠡᠨᠡ ᠬᠦ᠌ ᠨᠠᠰᠤᠲᠠᠢ ᠡᠵᠢ ᠸᠠᠩ ᠤ᠋ᠨ ᠣᠷᠳᠣᠨ ᠳ᠋ᠤ᠌ ᠰᠠᠭᠤᠳᠠᠭ ᠦᠭᠡᠢ ᠶᠦᠮ᠃ ᠲᠡᠷᠡ ᠬᠠᠷᠠᠴᠤ ᠢᠵᠠᠭᠤᠷ ᠲᠠᠢ ᠪᠥᠭᠡᠳ ᠲᠣᠭᠣᠰᠬᠠᠨ ᠪᠠᠢᠰᠢᠩ ᠳ᠋ᠤ᠌ ᠰᠠᠭᠤᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠸᠠᠩ ᠤ᠋ᠨ ᠣᠷᠳᠣᠨ ᠠ᠋ᠴᠠ ᠣᠢᠷᠠᠬᠠᠨ ᠮᠣᠩᠭᠣᠯ ᠭᠡᠷ ᠲᠡᠭᠡᠨ ᠯᠡ ᠠᠮᠢᠳᠤᠷᠠᠳᠠᠭ᠃ ᠲᠡᠷᠡ ᠳᠠᠷᠤᠤ ᠬᠢᠴᠢᠶᠡᠩᠭᠦᠢ ᠪᠥᠭᠡᠳ ᠳᠥᠬᠥᠮᠬᠡᠨ ᠠᠮᠢᠳᠤᠷᠠᠯ ᠲᠠᠢ᠂ ᠦᠬᠡᠷ ᠬᠣᠨᠢᠨ ᠤ᠋ ᠬᠢᠨᠢ ᠰᠦᠷᠦᠭ ᠡᠴᠡ ᠨᠢ ᠬᠠᠷᠠᠬᠤ ᠳ᠋ᠤ᠌ ᠥᠭᠡᠷᠡ ᠪᠠᠶᠠᠨ ᠠᠢᠯ ᠤ᠋ᠨ ᠪᠦᠰᠡᠭᠦᠢᠴᠦᠦᠯ ᠲᠡᠢ ᠠᠳᠠᠯᠢᠬᠠᠨ ᠪᠠᠢᠵᠤ᠂ ᠭᠣᠣᠯ ᠴᠠᠭᠠᠨ ᠢᠳᠡᠭᠡ ᠬᠢᠬᠦ ᠶ᠋ᠢ ᠬᠠᠮᠢᠶᠠᠷᠳᠠᠭ ᠠᠵᠤᠭᠤ᠃
ᠲᠡᠭᠦᠨ ᠲᠡᠢ ᠡᠰᠡᠷᠭᠦ ᠪᠡᠷ ᠵᠠᠯᠠᠭᠤ ᠦᠶᠡ ᠶ᠋ᠢᠨ ᠬᠢᠨ ᠪᠣᠯ ᠬᠠᠷᠢᠨ ᠣᠳᠣᠬᠢᠴᠢᠯᠠᠭᠰᠠᠨ ᠦᠵᠡᠯ ᠪᠣᠳᠣᠯ ᠲᠠᠢ (ᠵᠢᠷᠤᠭ 31)᠃ ᠠᠪᠠᠬᠠᠢ ᠮᠠᠰᠢᠨ ᠤ᠋ ᠵᠠᠯᠠᠭᠤᠷ᠂ ᠲᠣᠷᠣᠮᠰᠤᠯᠠᠭᠤᠷ᠂ ᠲᠣᠰᠣᠨ ᠤ᠋ ᠨᠡᠭᠡᠯᠡᠬᠡᠢ ᠵᠡᠷᠭᠡ ᠶ᠋ᠢ ᠮᠡᠳᠡᠳᠡᠭ᠃ ᠪᠠᠰᠠ ᠨᠢᠭᠡ ᠦᠶᠡᠷᠬᠡᠳᠡᠭ ᠬᠡᠦᠬᠡᠨ ᠨᠢ ᠮᠠᠰᠢᠨ ᠳ᠋ᠤ᠌ ᠣᠷᠣᠵᠤ ᠰᠠᠭᠤᠭᠠᠳ᠂ ᠮᠣᠲ᠋ᠣᠷ ᠤ᠋ᠨ ᠬᠢᠨᠢ ᠨᠠᠮᠤᠭᠤᠬᠠᠨ ᠳᠠᠭᠤ ᠶ᠋ᠢ ᠴᠢᠩᠨᠠᠨ ᠵᠥᠭᠡᠯᠡᠨ ᠰᠠᠭᠤᠳᠠᠯ ᠢ᠋ ᠨᠢ ᠭᠠᠢᠬᠠᠵᠤ ᠪᠠᠢᠪᠠ᠃ ᠸᠠᠩ ᠨᠣᠶᠠᠨ ᠢ᠋ ᠥᠪᠡᠷ ᠦ᠋ᠨ ᠭᠡᠷ ᠦ᠋ᠨ ᠡᠮᠴᠢ ᠲᠡᠢ ᠴᠣᠭ ᠠᠷᠤ ᠳ᠋ᠠᠬᠢ ᠪᠦᠰᠡᠭᠦᠢᠴᠦᠦᠯ ᠦ᠋ᠨ ᠪᠠᠢᠰᠢᠩ ᠤᠷᠤᠭᠤ ᠣᠳᠬᠤ ᠳ᠋ᠤ᠌ ᠮᠠᠷᠺᠤᠸᠨ᠋ᠲ ᠪᠢᠳᠡ ᠬᠣᠶᠠᠷ ᠴᠤ᠌ ᠪᠠᠭᠠᠬᠠᠨ ᠬᠦᠷᠢᠶᠡ ᠪᠡᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠰᠠᠭᠤᠬᠤ ᠭᠠᠵᠠᠷ ᠤᠷᠤᠭᠤ ᠪᠠᠨ ᠪᠤᠴᠠᠪᠠ᠃
ᠪᠠᠢᠰᠢᠩ ᠤ᠋ᠨ ᠴᠣᠩᠬᠣ ᠪᠠᠷ ᠪᠢᠳᠡ ᠸᠠᠩ ᠤ᠋ᠨ ᠣᠷᠳᠣᠨ ᠤ᠋ ᠬᠥᠯ ᠬᠥᠭᠡᠷᠴᠦᠭ ᠲᠡᠢ ᠠᠮᠢᠳᠤᠷᠠᠯ ᠤ᠋ᠨ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠤ ᠰᠠᠭᠤᠪᠠ᠃ ᠲᠣᠭᠣᠰ ᠤ᠋ᠨ ᠤᠲᠤᠭᠠ ᠲᠠᠢ ᠮᠠᠯᠠᠭᠠᠢ ᠡᠮᠦᠰᠦᠭᠰᠡᠨ ᠡᠷᠡᠴᠦᠦᠯ ( ᠵᠢᠷᠤᠭ 24 ) ᠬᠦᠨᠳᠦ ᠠᠯᠬᠤᠳᠠᠯ ᠲᠠᠢ ᠪᠠᠷ ᠵᠣᠴᠢᠨ ᠤ᠋ ᠥᠷᠥᠭᠡᠨ ᠳ᠋ᠦ᠍ ᠨᠠᠷᠢᠨ ᠪᠢᠴᠢᠭᠡᠴᠢ ᠲᠡᠢ ᠠᠭᠤᠯᠵᠠᠬᠤ ᠪᠠᠷ ᠣᠷᠣᠵᠤ ᠪᠠᠢᠪᠠ᠃ ᠴᠠᠭᠳᠠᠭᠴᠢ ᠴᠡᠷᠢᠭ ᠨᠠᠭᠠᠰᠢ ᠴᠠᠭᠠᠰᠢ ᠴᠠᠭᠳᠠᠨ ᠶᠠᠪᠤᠬᠤ ᠪᠥᠭᠡᠳ ᠲᠡᠳᠡ ᠬᠦᠷᠡᠩ᠂ ᠤᠯᠠᠭᠠᠨ᠂ ᠬᠥᠬᠡ ᠵᠢᠩᠰᠡ ᠲᠡᠢ ᠮᠠᠯᠠᠭᠠᠢ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠲᠡᠢ ᠬᠠᠷᠭᠤᠬᠤ ᠪᠣᠯᠭᠠᠨ ᠮᠡᠨᠳᠦᠴᠢᠯᠡᠵᠦ ᠪᠠᠢᠪᠠ ( ᠵᠢᠷᠤᠭ 36 ) ᠃ ᠡᠳᠡᠨᠥᠰ ᠪᠣᠯ ᠲᠦᠰᠢᠮᠡᠳ ᠶᠦᠮ᠂ ᠵᠢᠩᠰᠡᠨ ᠦ᠌ ᠬᠢᠨᠢ ᠥᠩᠭᠡ ᠪᠡᠷ ᠲᠦᠰᠢᠮᠡᠯ ᠦ᠋ᠨ ᠵᠡᠷᠭᠡ ᠳᠡᠰ ᠢ᠋ ᠨᠢ ᠲᠠᠨᠢᠳᠠᠭ ᠭᠡᠵᠦ ᠡᠪᠡᠳᠴᠢᠲᠡᠨ ᠢ᠋ᠶ᠋ᠡᠨ ᠦᠵᠡᠭᠡᠳ ᠪᠤᠴᠠᠵᠤ ᠢᠷᠡᠭᠰᠡᠨ ᠡᠸᠷᠢᠺᠰᠦᠨ ᠪᠢᠳᠡᠨ ᠳ᠋ᠦ᠍ ᠲᠠᠢᠯᠪᠤᠷᠢᠯᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠣᠶᠠᠷ ᠮᠣᠩᠭᠣᠯ ᠡᠷᠡ ᠣᠷᠣᠵᠤ ᠢᠷᠡᠭᠡᠳ ᠪᠢᠳᠡᠨ ᠢ᠋ ᠠᠳᠠ ᠪᠠᠢᠬᠤ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠦᠢᠯᠡᠴᠢᠯᠡᠬᠦ ᠪᠣᠯᠤᠨᠠ ᠭᠡᠵᠦ ᠮᠡᠳᠡᠭᠦᠯᠦᠨ ᠵᠣᠯᠭᠠᠪᠠ᠃
— ᠸᠠᠩ ᠨᠣᠶᠠᠨ ᠳ᠋ᠤ᠌ ᠲᠡᠢᠮᠦ ᠢᠯᠡᠭᠦᠦ ᠳ᠋ᠡᠭᠡᠨ ᠭᠠᠷᠤᠭᠰᠠᠨ ᠣᠯᠠᠨ ᠠᠵᠢᠯᠲᠠᠨ ᠭᠡᠵᠦ ᠪᠠᠢᠳᠠᠭ ᠦᠭᠡᠢ᠃ ᠬᠤᠰᠢᠭᠤᠨ ᠤ᠋ ᠠᠷᠠᠳ ᠨᠢ ᠰᠠᠷᠠ ᠶ᠋ᠢᠨ ᠬᠤᠭᠤᠴᠠᠭᠠ ᠲᠠᠢ ᠪᠠᠷ ᠸᠠᠩ ᠤ᠋ᠨ ᠣᠷᠳᠣᠨ ᠳ᠋ᠤ᠌ ᠢᠷᠡᠵᠦ ᠡᠭᠡᠯᠵᠢᠯᠡᠨ ᠦᠢᠯᠡᠴᠢᠯᠡᠳᠡᠭ᠃ ᠡᠭᠦᠨ ᠢ᠋ᠶ᠋ᠡᠷ ᠳᠠᠮᠵᠢᠨ ᠸᠠᠩ ᠨᠣᠶᠠᠨ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ ᠪᠣᠯᠭᠠᠨ ᠢ᠋ ᠲᠠᠨᠢᠳᠠᠭ᠂ ᠬᠠᠷᠢᠶᠠᠲᠤ ᠨᠠᠷ ᠨᠢ ᠴᠦ᠍ ᠡᠵᠡᠨ ᠲᠡᠢ ᠪᠡᠨ ᠲᠠᠰᠤᠷᠠᠯᠲᠠ ᠦᠭᠡᠢ ᠬᠠᠷᠢᠯᠴᠠᠵᠤ᠂ ᠵᠣᠪᠠᠯ ᠵᠢᠷᠭᠠᠯ ᠢ᠋ᠶ᠋ᠠᠨ ᠬᠠᠮᠲᠤᠳᠬᠠᠳᠠᠭ ᠪᠠᠢᠨᠠ ᠭᠡᠵᠦ ᠱᠠᠰᠢᠨ ᠳᠡᠯᠭᠡᠷᠡᠭᠦᠯᠦᠭᠴᠢ ᠡᠸᠷᠢᠭᠰᠦᠨ ᠲᠠᠢᠯᠪᠤᠷᠢᠯᠠᠨ ᠬᠡᠯᠡᠪᠡ᠃
ᠪᠢᠳᠡᠨ ᠦ᠌ ᠰᠢᠳᠠᠷ ᠦᠢᠯᠡᠴᠢᠯᠡᠭᠴᠢ ᠬᠣᠶᠠᠷ ᠮᠣᠩᠭᠣᠯ ᠪᠣᠯ ᠨᠠᠷᠭᠢᠶᠠᠨᠲᠠᠢ ᠵᠠᠯᠠᠭᠤᠴᠤᠳ ᠪᠠᠢᠯᠠ ᠃ ᠲᠡᠳᠡᠨ ᠳ᠋ᠦ᠍ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠡᠢᠮᠦ ᠨᠢᠭᠡᠨ ᠦᠢᠯᠡᠴᠢᠯᠡᠬᠦ ᠠᠵᠢᠯ ᠲᠣᠬᠢᠷᠠᠭᠤᠯᠤᠭᠰᠠᠨ ᠳ᠋ᠤ᠌ ᠶᠡᠬᠡ ᠪᠠᠶᠠᠷᠲᠠᠢ ᠪᠠᠢᠵᠤ ᠂ ᠬᠥᠰᠡᠷ ᠳᠡᠭᠡᠷᠡ ᠰᠠᠭᠤᠭᠠᠳ ᠴᠣᠩᠬᠣ ᠪᠠᠷ ᠬᠠᠷᠠᠭᠳᠠᠬᠤ ᠬᠥᠮᠦᠰ ᠢ᠋ ᠨᠢᠭᠡ ᠨᠢᠭᠡ ᠪᠡᠷ ᠨᠡᠷᠡ ᠪᠣᠯᠤᠨ ᠵᠡᠷᠭᠡ ᠳᠡᠰ ᠢ᠋ ᠨᠢ ᠲᠠᠨᠢᠯᠴᠠᠭᠤᠯᠵᠤ ᠪᠠᠢᠪᠠ᠃
— ᠵᠠ᠂ ᠣᠳᠣ ᠲᠣᠭᠣᠭᠠᠨ ᠭᠡᠷ ᠦ᠋ᠨ ᠠᠬᠠᠯᠠᠭᠴᠢ ᠢᠷᠡᠯᠡ ᠭᠡᠵᠦ ᠲᠡᠳᠡ ᠪᠠᠶᠠᠷᠯᠠᠨ ᠶᠠᠷᠢᠭᠠᠳ ᠬᠠᠭᠠᠯᠭᠠ ᠶ᠋ᠢ ᠣᠩᠭᠣᠢᠯᠭᠠᠬᠤ ᠳ᠋ᠤ᠌ ᠭᠣᠵᠣᠭᠣᠷ ᠥᠨᠳᠥᠷ ᠮᠠᠯᠠᠭᠠᠢ ᠲᠠᠢ ᠨᠢᠭᠡ ᠡᠷᠡ ᠣᠷᠣᠵᠤ ᠢᠷᠡᠯᠡ᠃ ᠪᠢᠳᠡᠨ ᠢ᠋ ᠬᠦᠨᠳᠦᠳᠬᠡᠬᠦ ᠡᠭᠦᠳᠡᠨ ᠡᠴᠡ ᠨᠢᠭᠡ ᠬᠣᠨᠢ ᠭᠠᠷᠭᠠᠵᠤ ᠂ ᠬᠦᠷᠡᠯ ᠵᠠᠭᠠᠮᠠᠯ ᠳᠡᠭᠡᠷᠡ ᠰᠢᠷᠠᠭᠰᠠᠨ ᠪᠦᠬᠦᠯᠢ ᠶ᠋ᠢ ᠳᠠᠮᠵᠢᠯᠠᠨ ᠠᠪᠴᠢᠷᠠᠯᠠ᠃
— ᠵᠠ ᠂ ᠲᠠᠪᠠᠲᠠᠢ ᠰᠠᠢᠬᠠᠨ ᠵᠣᠭᠣᠭᠯᠠᠭᠠᠷᠠᠢ! ᠲᠠ ᠨᠠᠷ ᠲᠤ᠌ ᠠᠮᠤᠭᠤᠯᠠᠩ ᠰᠠᠢᠬᠠᠨ ᠢ᠋ ᠢᠷᠥᠭᠡᠶᠡ ! ᠭᠡᠳ ᠲᠣᠭᠣᠭᠠᠴᠢ ᠠᠪᠤᠭᠠᠢ ᠮᠡᠬᠦᠢᠨ ᠶᠣᠰᠣᠯᠠᠪᠠ᠃ ᠪᠠᠭᠠ ᠤᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠣᠯᠠᠨ ᠵᠢᠵᠢᠭ ᠲᠠᠪᠠᠭ ᠲᠠᠢ ᠬᠢᠲᠠᠳ ᠨᠣᠭᠣᠭᠠ ᠠᠪᠴᠢᠷᠠᠭᠤᠯᠪᠠ᠃ ᠡᠨᠡ ᠨᠢ ᠲᠡᠮᠴᠦᠭᠳᠦᠩᠷᠣᠪ ᠨᠣᠶᠠᠨ ᠪᠢᠳᠡᠨ ᠢ᠋ ᠬᠣᠨᠢᠨ ᠤ᠋ ᠮᠢᠬᠠ ᠢᠳᠡᠵᠦ ᠳᠠᠰᠬᠤ ᠦᠭᠡᠢ ᠡᠴᠡ ᠬᠢᠴᠢᠶᠡᠵᠦ ᠣᠨᠴᠠᠭᠠᠢᠯᠠᠨ ᠬᠢᠯᠭᠡᠭᠰᠡᠨ ᠶᠦᠮ ᠪᠠᠢᠨᠠ᠃ ᠡᠢᠮᠦ ᠮᠠᠶᠢᠭ ᠢ᠋ᠶ᠋ᠠᠷ ᠬᠡᠳᠦ ᠳᠠᠬᠢᠨ ᠵᠥᠭᠡᠭᠡᠨ ᠠᠪᠴᠢᠷᠠᠭᠰᠠᠨ ᠪᠥᠭᠡᠳ ᠰᠡᠭᠦᠯ ᠳ᠋ᠦ᠍ᠨᠢ ᠪᠢᠳᠡᠨ ᠲᠠᠪᠠᠭ ᠪᠦᠷᠢ ᠡᠴᠡ ᠨᠢ ᠵᠥᠪᠬᠡᠨ ᠠᠮᠰᠠᠬᠤ ᠲᠡᠳᠦᠢ ᠯᠡ ᠪᠠᠢᠯᠠ᠃
— ᠦᠯᠡᠳᠡᠭᠰᠡᠨ ᠬᠣᠭᠣᠯᠠ ᠨᠢ ᠦᠢᠯᠡᠴᠢᠯᠡᠭᠰᠡᠨ ᠬᠥᠮᠦᠨ ᠦ᠌ ᠬᠢ ᠪᠣᠯᠳᠠᠭ᠃ ᠡᠨᠡ ᠨᠢ ᠲᠡᠳᠡᠨ ᠦ᠌ ᠠᠵᠢᠯ ᠤ᠋ᠨ ᠬᠠᠷᠠᠮᠵᠢ ᠮᠥᠨ ᠭᠡᠵᠦ ᠰᠸᠸᠳ᠋ᠸᠨ ᠦ᠌ ᠡᠸᠷᠢᠭᠰᠦᠨ ᠶᠠᠷᠢᠪᠠ ᠃ ᠪᠢᠳᠡᠨ ᠢ᠋ ᠢᠳᠡᠵᠦ ᠳᠠᠭᠤᠰᠤᠮᠠᠭᠴᠠ ᠲᠡᠷᠡ ᠬᠣᠶᠠᠷ ᠮᠣᠩᠭᠣᠯ ᠪᠦᠬᠦᠨ ᠢ᠋ ᠠᠪᠴᠤ ᠭᠠᠷᠤᠭᠠᠳ ᠬᠠᠵᠠᠭᠤ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠰᠥᠨᠢ ᠶ᠋ᠢᠨ ᠭᠦᠨ ᠪᠣᠯᠲᠠᠯᠠ ᠢᠳᠡᠵᠦ ᠤᠤᠭᠤᠭᠰᠠᠨ ᠪᠢᠯᠡ᠃
ᠥᠷᠯᠥᠭᠡ ᠡᠷᠲᠡ ᠶ᠋ᠢᠨ ᠨᠦᠰᠡᠷ ᠪᠦᠷᠢᠶᠡᠨ ᠦ᠌ ᠤᠷᠲᠤᠯᠠᠭᠰᠠᠨ ᠳᠠᠭᠤᠨ ᠨᠠᠮᠠᠶ᠋ᠢ ᠨᠣᠢᠷ ᠠ᠋ᠴᠠ ᠰᠡᠷᠡᠭᠡᠯᠡ᠃ ᠣᠢᠷᠠᠬᠠᠨ ᠪᠠᠢᠭᠠ ᠰᠦᠮᠡ ᠶ᠋ᠢᠨ ᠯᠠᠮᠠ ᠨᠠᠷ ᠤ᠋ᠨ ᠡᠷᠲᠡ ᠶ᠋ᠢᠨ ᠤᠩᠰᠢᠯᠭᠠ ᠡᠬᠢᠯᠡᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ᠃ ᠣᠷᠳᠣᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠴᠤ᠌ ᠭᠡᠰᠡᠨ ᠨᠢᠭᠡ ᠰᠢᠨᠡᠬᠡᠨ ᠪᠠᠷᠢᠭᠰᠠᠨ ᠲᠣᠮᠣ ᠰᠢᠭ᠋ ᠰᠦᠮᠡ ᠪᠠᠢᠵᠤ᠂ ᠪᠠᠨᠴᠢᠨ ᠪᠣᠭᠳᠠ ᠶ᠋ᠢᠨ ᠠᠢᠯᠴᠢᠯᠠᠨ ᠢᠷᠡᠬᠦ ᠳ᠋ᠦ᠍ ᠲᠤᠰᠬᠠᠢᠯᠠᠨ ᠪᠠᠷᠢᠭᠤᠯᠤᠭᠰᠠᠨ ᠶᠤᠮ ᠭᠡᠨᠡ᠃ ᠪᠠᠨᠴᠢᠨ ᠪᠣᠭᠳᠠ ᠠᠳᠠ ᠨᠡᠯᠢᠶᠡᠳ ᠤᠷᠲᠤ ᠬᠤᠭᠤᠴᠠᠭᠠ ᠪᠠᠢᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠰᠥᠨᠢᠳ ᠸᠠᠩ ᠤ᠋ᠨ ᠳᠠᠭᠠᠭᠠᠵᠤ ᠳᠡᠢᠯᠬᠦ ᠬᠡᠮᠵᠢᠶᠡᠨ ᠡᠴᠡ ᠬᠡᠲᠦᠷᠡᠭᠰᠡᠨ ᠵᠠᠷᠤᠳᠠᠯ ᠢ᠋ ᠨᠢ ᠰᠥᠨᠢᠳ ᠸᠠᠩ ᠳᠠᠭᠠᠭᠠᠵᠤ ᠪᠠᠢᠭᠰᠠᠨ ᠪᠢᠯᠡ᠃
ᠴᠠᠭ ᠤ᠋ᠨ ᠳᠠᠷᠠᠭᠠ ᠬᠦᠷᠡᠯ ᠳᠡᠪᠦᠷᠡ ᠲᠡᠢ ᠴᠠᠢ ᠰᠦᠮᠡ ᠳ᠋ᠦ᠍ ᠠᠪᠴᠢᠷᠠᠯᠠ ( ᠵᠢᠷᠤᠭ 35 ) ᠃ ᠨᠠᠰᠤ ᠪᠠᠷ ᠬᠠᠮᠤᠭ ᠤ᠋ᠨ ᠠᠬᠠᠮᠠᠳ ᠯᠠᠮᠠ ᠣᠷᠣᠨ ᠡᠴᠡ ᠪᠡᠨ ᠪᠣᠰᠴᠤ ᠰᠦᠮᠡ ᠶ᠋ᠢᠨ ᠳᠣᠲᠣᠭᠤᠷ ᠠᠯᠬᠤᠭᠰᠠᠭᠠᠷ ᠡᠭᠦᠳᠡ ᠪᠡᠷ ᠭᠠᠷᠤᠭᠠᠳ ᠭᠠᠳᠠᠨᠠ ᠲᠠᠯᠪᠢᠭᠰᠠᠨ ᠰᠢᠷᠠ ᠣᠯᠪᠣᠭ ᠳᠡᠭᠡᠷᠡ ᠰᠠᠭᠤᠪᠠ᠃ ᠲᠡᠭᠦᠨ ᠳ᠋ᠦ᠍ ᠨᠢᠭᠡ ᠠᠶᠠᠭᠠ ᠴᠠᠢ ᠠᠶᠠᠭᠠᠯᠠᠨ ᠥᠭᠬᠦ ᠳ᠋ᠦ᠍ ᠲᠡᠷᠡ ᠬᠠᠷᠠ ᠬᠦᠷᠡᠩ ᠥᠩᠭᠡ ᠲᠡᠢ ᠴᠠᠢ ᠶ᠋ᠢ ᠤᠳᠠᠭᠠᠨ ᠭᠡᠭᠴᠢ ᠰᠢᠨᠤᠯᠲᠠᠢᠬᠠᠨ ᠠᠮᠲᠠᠯᠠᠵᠤ ᠦᠵᠡᠭᠡᠳ ᠂ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠨ ᠱᠠᠭᠰᠢᠵᠤ ᠭᠠᠷᠪᠠ᠃ ᠲᠦᠳᠡᠬᠡᠨ ᠵᠠᠭᠤᠷᠠ ᠪᠤᠰᠤᠳ ᠯᠠᠮᠠ ᠨᠠᠷ ᠪᠣᠯᠤᠨ ᠴᠠᠢ ᠶ᠋ᠢᠨ ᠳᠡᠪᠦᠷᠡ ᠨᠦ᠍ᠭᠦᠳ ᠰᠦᠮᠡ ᠶ᠋ᠢᠨ ᠪᠦᠷᠦᠩᠬᠦᠢ ᠳ᠋ᠦ᠍ ᠠᠯᠠᠭᠠ ᠪᠣᠯᠤᠭᠠᠳ᠂ ᠪᠤᠷᠬᠠᠳ ᠤ᠋ᠨ ᠬᠥᠷᠥᠭ ᠦ᠋ᠨ ᠳᠣᠣᠷᠠ ᠪᠦᠭᠦᠳᠡᠭᠡᠷ ᠥᠷᠯᠥᠭᠡ ᠶ᠋ᠢᠨ ᠴᠠᠢ ᠪᠠᠨ ᠤᠤᠭᠤᠵᠠᠭᠠᠯᠠ᠃
ᠨᠠᠮᠠᠶ᠋ᠢ ᠡᠨᠡ ᠶᠣᠰᠣᠯᠠᠯ ᠢ᠋ ᠰᠣᠨᠢᠷᠬᠠᠵᠤ ᠪᠠᠢᠬᠤ ᠬᠣᠭᠣᠷᠣᠨᠳᠣ ᠮᠠᠨ ᠤ᠋ ᠬᠢᠨ ᠮᠠᠨᠢ ᠨᠠᠮᠠᠶ᠋ᠢ ᠣᠢᠷᠠ ᠣᠷᠴᠢᠮ ᠢ᠋ᠶ᠋ᠠᠷ ᠪᠠᠷᠠᠲᠠᠯᠠ ᠡᠷᠢᠵᠡᠭᠡᠭᠰᠡᠨ ᠪᠢᠯᠡ᠃ ᠲᠡᠳᠡᠨ ᠭᠠᠳᠠᠭᠰᠢ ᠪᠠᠨ ᠵᠢᠭᠤᠯᠴᠢᠯᠠᠬᠤ ᠪᠠᠷ ᠪᠠᠢᠭᠰᠠᠨ ᠪᠥᠭᠡᠳ ᠠᠵᠠ ᠲᠠᠭᠠᠷᠠᠵᠤ ᠴᠢᠨᠣᠠ ᠬᠠᠷᠭᠤᠬᠤ ᠳ᠋ᠤ᠌ ᠬᠦᠷᠪᠡᠯ ᠮᠠᠰᠢᠨ ᠢ᠋ᠶ᠋ᠠᠷ ᠬᠥᠭᠡᠭᠡᠨ ᠠᠩᠨᠠᠬᠤ ᠰᠠᠨᠠᠭᠠᠲᠠᠢ ᠠᠵᠢ᠃ ᠭᠡᠬᠦ ᠳ᠋ᠦ᠍ ᠡᠨᠡ ᠡᠳᠦᠷ ᠲᠠᠯᠠ ᠨᠤᠲᠤᠭ ᠤ᠋ᠨ ᠡᠨᠡ ᠣᠯᠠᠨ ᠠᠷᠢᠶᠠᠲᠠᠨ ᠨᠦᠬᠡᠨ ᠡᠴᠡ ᠪᠡᠨ ᠭᠠᠷᠤᠭᠰᠠᠨ ᠦᠭᠡᠢ ᠪᠣᠯᠤᠯᠲᠠᠢ᠂ ᠬᠠᠷᠢᠨ ᠵᠠᠮ ᠳᠠᠭᠠᠤ ᠰᠦᠷᠦᠭ ᠵᠡᠭᠡᠷᠡ ᠶ᠋ᠢᠨ ᠴᠠᠬᠢᠯᠠᠨ ᠭᠦᠶᠦᠬᠦ ᠶ᠋ᠢ ᠬᠠᠷᠠᠯᠠ᠃ ᠲᠡᠳᠡᠭᠡᠷ ᠠᠮᠢᠲᠠᠳ ᠬᠥᠮᠦᠨ ᠢ᠋ ᠳᠤᠷᠠᠯᠠᠭᠤᠯᠤᠮᠠᠷ ᠲᠡᠢᠮᠦ ᠦᠵᠡᠰᠬᠦᠯᠡᠩᠲᠡᠢ ᠰᠠᠢᠬᠠᠨ ᠪᠠᠢᠪᠠ᠃ ᠮᠠᠰᠢᠨ ᠤ᠋ ᠯᠠᠪᠠᠷ ᠤ᠋ᠨ ᠳᠠᠭᠤᠨ ᠳ᠋ᠤ᠌ ᠦᠷᠭᠦᠭᠰᠡᠨ ᠵᠡᠭᠡᠷᠡ ᠨᠦ᠍ᠭᠦᠳ ᠲᠠᠯᠠ ᠶ᠋ᠢ ᠵᠦᠰᠦᠨ ᠳᠡᠭᠵᠢᠨ ᠴᠣᠪᠣᠭᠣᠯᠢᠭ ᠰᠤᠮᠤᠳᠠᠨ ᠣᠳᠤᠯᠠ᠃
ᠬᠢᠵᠠᠭᠠᠷ ᠦᠭᠡᠢ ᠦᠷᠭᠦᠯᠵᠢᠯᠡᠭᠰᠡᠨ ᠲᠠᠯᠠ ᠨᠤᠲᠤᠭ ᠲᠤ᠌ ᠥᠨᠥᠳᠥᠷ ᠶᠣᠰᠣᠲᠠᠢ ᠰᠠᠢᠬᠠᠨ ᠰᠡᠳᠬᠢᠯ ᠲᠡᠨᠢᠭᠦᠨ ᠡᠳᠦᠷ ᠪᠣᠯᠤᠯᠠ᠃ ᠪᠢᠳᠡᠨ ᠣᠷᠣᠢᠬᠠᠨ ᠰᠢᠭ᠋ ᠰᠥᠨᠢᠳ ᠸᠠᠩ ᠤ᠋ᠨ ᠣᠷᠳᠣᠨ ᠳ᠋ᠤ᠌ ᠪᠤᠴᠠᠭᠰᠠᠨ ᠪᠣᠯᠪᠠᠴᠤ ᠬᠠᠷᠠᠩᠭᠤᠢ ᠪᠣᠯᠬᠤ ᠠ᠋ᠴᠠ ᠡᠮᠦᠨᠡ ᠴᠠᠭᠠᠨ ᠬᠦᠷᠢᠶᠡᠨ ᠦ᠌ ᠰᠦᠮᠡ ᠳ᠋ᠡᠭᠡᠨ ᠠᠮᠵᠢᠨ ᠬᠠᠷᠢᠬᠤ ᠶ᠋ᠢ ᠰᠠᠨᠠᠵᠤ ᠪᠠᠢᠪᠠ᠃ ᠸᠠᠩ ᠨᠣᠶᠠᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠮᠠᠰᠢᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠬᠦᠷᠭᠡᠨ ᠭᠠᠷᠴᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠨᠢᠳᠦ ᠨᠢ ᠭᠡᠨᠡᠳᠲᠡ ᠠᠯᠤᠰ ᠲᠡᠷᠲᠡᠭᠡᠬᠢ ᠲᠠᠯᠠ ᠶ᠋ᠢᠨ ᠭᠦᠨ ᠳ᠋ᠡᠬᠢ ᠨᠢᠭᠡᠨ ᠵᠢᠵᠢᠭᠬᠡᠨ ᠲᠣᠯᠪᠣ ᠳᠡᠭᠡᠷᠡ ᠲᠣᠭᠲᠠᠯᠠ᠃
ᠨᠢᠭᠡᠨ ᠮᠣᠷᠢᠲᠠᠨ ᠲᠠᠯᠠ ᠳᠡᠭᠡᠭᠦᠷ ᠳᠠᠪᠬᠢᠭᠤᠯᠤᠭᠰᠠᠭᠠᠷ ᠬᠦᠷᠴᠦ ᠢᠷᠡᠪᠡ᠃ ᠮᠣᠷᠢᠨ ᠠ᠋ᠴᠠ ᠨᠢ ᠠᠭᠤᠷ ᠪᠠᠭᠠᠭᠢᠵᠤ᠂ ᠲᠡᠷᠡ ᠡᠷᠡ ᠴᠦ᠍ ᠪᠤᠷᠵᠢᠢᠲᠠᠯᠠ ᠬᠥᠯᠥᠷᠡᠭᠰᠡᠨ ᠪᠠᠢᠪᠠ᠃ ᠬᠥᠷᠰᠢ ᠬᠤᠰᠢᠭᠤᠨ ᠳ᠋ᠤ᠌ ᠬᠢᠲᠠᠳ ᠳᠡᠭᠡᠷᠡᠮᠴᠢᠳ ᠳᠠᠭᠠᠷᠢᠨ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠡᠯᠡᠬᠦ ᠵᠢᠴᠢ ᠲᠤᠰᠠᠯᠠᠮᠵᠢ ᠭᠤᠶᠤᠬᠤ ᠪᠠᠷ ᠥᠷᠯᠥᠭᠡ ᠡᠴᠡ ᠣᠳᠣ ᠬᠦᠷᠲᠡᠯᠡ ᠳᠠᠪᠬᠢᠵᠤ ᠪᠠᠢᠭᠠ ᠠᠵᠢ᠃ ᠮᠡᠳᠡᠭᠡ ᠴᠦ᠍ ᠬᠠᠭᠤᠴᠢᠷᠠᠭᠰᠠᠨ ᠮᠡᠳᠡᠭᠡ ᠪᠠᠢᠨᠠ ᠳᠠ ! ᠡᠮᠦᠨᠡ ᠡᠳᠦᠷ ᠦ᠋ᠨ ᠳᠡᠭᠡᠷᠡᠮᠴᠢᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠨᠢ ᠣᠳᠣ ᠪᠣᠯᠬᠤ ᠳ᠋ᠤ᠌ ᠳᠣᠲᠣᠭᠰᠢ ᠪᠠᠨ ᠭᠦᠨ ᠣᠷᠣᠭᠰᠠᠨ ᠪᠠᠢᠵᠤ ᠪᠣᠯᠬᠤ ᠪᠠᠷ ᠦᠯᠦ ᠪᠠᠷᠠᠮ ᠲᠤᠩ ᠶᠡᠬᠡ ᠬᠣᠬᠢᠷᠠᠯ ᠲᠠᠷᠢᠭᠰᠠᠨ ᠪᠠᠢᠵᠤ ᠴᠤ᠌ ᠮᠡᠳᠡᠬᠦ ᠶᠦᠮ᠃ ᠵᠠᠮ ᠴᠠᠭᠠᠬᠠᠨ ᠲᠤᠯᠠ ᠮᠠᠰᠢᠨ ᠢ᠋ᠶ᠋ᠠᠷ ᠪᠣᠯ ᠡᠨᠡ ᠬᠡᠰᠡᠭ ᠢ᠋ ᠦᠨᠡᠨ ᠳ᠋ᠡᠭᠡᠨ ᠬᠣᠶᠠᠷ ᠭᠤᠷᠪᠠᠬᠠᠨ ᠴᠠᠭ ᠲᠤ᠌ ᠬᠦᠷᠴᠦ ᠳᠡᠢᠯᠬᠦ ᠶᠦᠮ᠃
ᠳᠡᠮᠴᠦᠭᠳᠦᠩᠷᠦᠪ ᠨᠣᠶᠠᠨ ᠪᠢᠳᠡᠨ ᠳ᠋ᠦ᠍ ᠬᠠᠷᠢᠭᠤ ᠶ᠋ᠢ ᠨᠢ ᠬᠦᠷᠭᠡᠬᠦ ᠪᠣᠯᠪᠠ ᠤᠤ ᠭᠡᠮᠡᠨ ᠬᠦᠰᠡᠪᠡ᠃ ᠲᠡᠷᠡ ᠷᠠᠰᠢ ( ᠵᠢᠷᠤᠭ 54 ) ᠬᠡᠮᠡᠬᠦ ᠨᠡᠷᠡ ᠲᠡᠢ ᠬᠦᠷᠡᠩ ᠣᠷᠬᠢᠮᠵᠢ ᠲᠠᠢ ᠯᠠᠮᠠ ᠶ᠋ᠢ ᠵᠠᠮᠴᠢ ᠪᠠᠷ ᠲᠣᠮᠢᠯᠠᠪᠠ ᠃ ᠪᠢᠳᠡ ᠮᠠᠰᠢᠨ ᠳ᠋ᠠᠭᠠᠨ ᠭᠠᠷᠤᠭᠠᠳ ᠵᠠᠮ ᠲᠤᠷᠰᠢ ᠵᠡᠭᠡᠷᠡ᠂ ᠬᠣᠨᠢᠨ ᠰᠦᠷᠦᠭ ᠪᠠ ᠨᠣᠢᠷ ᠲᠠᠭᠠᠨ ᠣᠷᠣᠭᠰᠠᠨ ᠨᠤᠭᠤᠰᠤ ᠭᠠᠯᠠᠭᠤ ᠶ᠋ᠢ ᠦᠷᠭᠦᠭᠡᠨ ᠰᠣᠴᠢᠭᠠᠭᠰᠠᠭᠠᠷ ᠳᠠᠪᠬᠢᠵᠤ ᠶᠠᠪᠤᠪᠠ᠃ ᠭᠡᠬᠦ ᠳ᠋ᠦ᠍ ᠪᠢᠳᠡᠨ ᠳ᠋ᠦ᠍ ᠡᠨᠡ ᠪᠦᠬᠦᠨ ᠢ᠋ ᠠᠩᠵᠠᠭᠠᠷᠠᠬᠤ ᠵᠠᠪ ᠭᠡᠵᠦ ᠠᠯᠠᠭᠠ ! ᠪᠢᠳᠡ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠰᠢᠭᠤᠳ ᠤᠭᠰᠠᠭᠠᠨ ᠤ᠋ ᠨᠢᠭᠡ ᠵᠠᠯᠭᠠᠮᠵᠢᠯᠠᠭᠴᠢ ᠶ᠋ᠢᠨ ᠳ᠋ᠦ᠍ ᠬᠦᠷᠬᠦ ᠪᠡᠷ ᠶᠠᠪᠤᠭᠠ᠂ ᠤᠴᠢᠷ ᠨᠢ ᠲᠡᠭᠦᠨ ᠦ᠌ ᠡᠳ᠋ ᠪᠠᠶᠠᠯᠢᠭ ᠨᠢ ᠠᠮᠠᠭᠠᠢ ᠵᠢᠯᠣᠭᠣ ᠦᠭᠡᠢ ᠪᠣᠯᠤᠭᠰᠠᠨ ᠬᠢᠲᠠᠳ ᠳᠡᠭᠡᠷᠡᠮᠴᠢ ᠴᠡᠷᠢᠭ ᠦ᠋ᠨ ᠨᠢᠳᠦ ᠶ᠋ᠢ ᠤᠯᠠᠢᠯᠭᠠᠭᠰᠠᠨ ᠠᠵᠢ᠃
