ᠵᠠᠯᠬᠠᠭᠤ ᠥᠬᠢᠨ ᠠᠵᠢᠯᠰᠠᠭ ᠥᠬᠢᠨ ᠪᠣᠯᠤᠭᠰᠠᠨ ᠨᠢЗалхуу охин ажилсаг охин болсон нь Zalkhuu okhin ajilsag okhin bolson ni
883ᠵᠠᠯᠬᠠᠭᠤ ᠥᠬᠢᠨ ᠠᠵᠢᠯᠰᠠᠭ ᠥᠬᠢᠨ ᠪᠣᠯᠤᠭᠰᠠᠨ ᠨᠢ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠭᠡᠳᠡᠭᠡᠷᠮᠡ ᠬᠡᠮᠡᠬᠦ ᠨᠢᠭᠡᠨ ᠵᠠᠯᠬᠠᠭᠤ ᠥᠬᠢᠨ ᠠᠮᠢᠳᠤᠷᠠᠨ ᠰᠠᠭᠤᠳᠠᠭ ᠪᠠᠢᠵᠠᠢ᠃ ᠠᠪᠤ ᠡᠵᠢ ᠨᠢ ᠲᠡᠭᠦᠨ ᠳ᠋ᠦ᠍ ᠭᠡᠷᠡᠯᠡᠮᠡ ᠭᠡᠳᠡᠭ ᠰᠠᠢᠬᠠᠨ ᠨᠡᠷᠡ ᠬᠠᠢᠷᠠᠯᠠᠭᠰᠠᠨ ᠪᠣᠯᠪᠠᠴᠤ ᠬᠥᠮᠦᠰ ᠬᠣᠢᠷᠭᠣ ᠵᠠᠯᠬᠠᠭᠤ ᠪᠠᠷ ᠨᠢ ᠡᠯᠡᠭᠯᠡᠵᠦ᠂ ᠭᠡᠳᠡᠭᠡᠷᠮᠡ ᠭᠡᠵᠦ ᠳᠠᠭᠤᠳᠠᠳᠠᠭ ᠪᠣᠯᠵᠠᠢ᠃ ᠭᠡᠪᠡᠴᠦ ᠲᠡᠷᠡ ᠭᠡᠮᠰᠢᠨ ᠤᠬᠠᠭᠠᠷᠠᠭᠰᠠᠨ ᠦᠭᠡᠢ᠃ ᠠᠵᠢᠯ ᠬᠢ ᠭᠡᠬᠦ ᠪᠠᠷ ᠯᠠ ᠤᠷᠤᠭᠤᠯ ᠢ᠋ᠶ᠋ᠠᠨ ᠤᠨᠵᠠᠢᠯᠭᠠᠭᠠᠳ ᠰᠠᠭᠤᠴᠢᠬᠠᠨᠠ᠃ ᠤᠷᠤᠭᠤᠯ ᠢ᠋ᠶ᠋ᠠᠨ ᠴᠣᠷᠪᠣᠢᠯᠭᠠᠨ᠂ ᠬᠣᠭᠣᠯᠠ ᠤᠮᠳᠠ ᠪᠠᠨ ᠴᠤ᠌ ᠢᠳᠡᠬᠦ ᠡᠴᠡ ᠵᠠᠯᠬᠠᠭᠤᠷᠠᠨᠠ᠃ ᠬᠠᠮᠤᠭ ᠤ᠋ᠨ ᠭᠠᠢᠬᠠᠯᠲᠠᠢ ᠨᠢ ᠵᠠᠯᠬᠠᠭᠤᠷᠠᠬᠤ ᠲᠣᠰᠤᠮ ᠲᠡᠭᠦᠨ ᠦ᠌ ᠤᠷᠤᠭᠤᠯ ᠤᠯᠠᠮ ᠰᠤᠨᠤᠭᠠᠳ ᠪᠠᠢᠳᠠᠭ ᠪᠣᠯᠤᠯᠠ᠃ ᠭᠡᠳᠡᠭᠡᠷᠮᠡ ᠢᠳᠡᠬᠦ᠂ ᠰᠠᠭᠤᠬᠤ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠤ᠌ ᠬᠦᠰᠡᠬᠦ ᠦᠭᠡᠢ᠃ ᠥᠬᠢᠨ ᠦ᠌ ᠤᠷᠤᠭᠤᠯ ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠬᠣᠨᠣᠭ ᠲᠤ᠌ ᠲᠣᠬᠣᠢ ᠢᠯᠡᠭᠦᠦ ᠰᠤᠨᠵᠠᠢ᠃ ᠲᠡᠭᠡᠲᠡᠯᠡ ᠨᠢᠭᠡ ᠡᠳᠦᠷ ᠲᠡᠷᠡ ᠪᠢᠴᠢᠬᠠᠨ ᠰᠠᠭᠤᠷᠢᠨ ᠳ᠋ᠤ᠌ ᠮᠡᠷᠭᠡᠨ ᠤᠬᠠᠭᠠᠨᠲᠠᠨ ᠢᠷᠡᠵᠡᠢ ᠭᠡᠨᠡ᠃ ᠭᠡᠳᠡᠭᠡᠷᠮᠡ ᠶ᠋ᠢᠨ ᠡᠵᠢ ᠮᠡᠷᠭᠡᠨ ᠬᠥᠮᠦᠨ ᠢ᠋ ᠭᠡᠷ ᠲᠦ᠍ ᠪᠡᠨ ᠤᠷᠢᠵᠤ᠂ ᠤᠴᠢᠷ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠲᠣᠭᠠᠴᠢᠵᠠᠢ᠃ ᠮᠡᠷᠭᠡᠨ ᠬᠥᠮᠦᠨ ᠥᠬᠢᠨ ᠢ᠋ ᠶᠡᠬᠡᠳᠡ ᠥᠷᠦᠪᠳᠦᠵᠦ᠂ ᠰᠢᠳᠢᠲᠦ ᠲᠣᠯᠢ ᠪᠠᠨ ᠨᠢᠭᠤᠷ ᠴᠢᠷᠠᠢ ᠶ᠋ᠢ ᠨᠢ ᠬᠠᠷᠠᠭᠤᠯᠬᠤ ᠳ᠋ᠤ᠌ ᠭᠡᠳᠡᠭᠡᠷᠮᠡ ᠭᠤᠳᠤᠷᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠭᠤᠳᠤᠷᠴᠤ᠂ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠪᠠ ᠭᠡᠨᠡ᠃ ᠮᠡᠷᠭᠡᠨ ᠬᠥᠮᠦᠨ ᠡᠵᠢ ᠳ᠋ᠦ᠍ ᠨᠢ ᠬᠠᠨᠳᠤᠨ᠄《ᠬᠡᠷᠪᠡ ᠥᠬᠢᠨ ᠢ᠋ᠶ᠋ᠡᠨ ᠰᠠᠢᠨ ᠰᠠᠢᠬᠠᠨ ᠡᠷᠡᠭᠦᠯ ᠰᠠᠷᠠᠭᠤᠯ ᠪᠣᠯᠭᠠᠶᠠ ᠭᠡᠪᠡᠯ ᠨᠠᠳᠠ ᠲᠠᠢ ᠬᠠᠮᠲᠤ ᠶᠠᠪᠤᠭᠤᠯ!》 ᠭᠡᠯᠡ᠃ ᠲᠡᠳᠡᠨ ᠦ᠌ ᠬᠡᠨ ᠨᠢ ᠴᠦ᠍ ᠲᠠᠲᠠᠭᠠᠯᠵᠠᠭᠰᠠᠨ ᠦᠭᠡᠢ᠃
ᠮᠡᠷᠭᠡᠨ ᠬᠥᠮᠦᠨ ᠦ᠌ ᠭᠡᠷ ᠠᠭᠤᠯᠠᠰ ᠤ᠋ᠨ ᠳᠤᠮᠳᠠ᠂ ᠠᠭᠤᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠣᠷᠣᠰᠢᠳᠠᠭ ᠮᠥᠩᠭᠥᠨ ᠳᠡᠭᠡᠪᠦᠷᠲᠦ ᠣᠷᠳᠣᠨ ᠠᠵᠢ᠃ ᠣᠷᠳᠣᠨ ᠳ᠋ᠤ᠌ ᠣᠷᠣᠭᠠᠳ ᠬᠡᠰᠡᠭ ᠬᠤᠭᠤᠴᠠᠭᠠ ᠥᠩᠭᠡᠷᠡᠭᠰᠡᠨ ᠦ᠌ ᠬᠣᠢᠨᠠ ᠮᠣᠳᠣ ᠮᠡᠲᠦ ᠬᠠᠲᠠᠭᠤ᠂ ᠲᠡᠪᠡᠷᠢ ᠢᠯᠡᠭᠦᠦ ᠵᠠᠭᠤᠷᠠᠭᠰᠠᠨ ᠭᠤᠯᠢᠷ ᠢ᠋ ᠥᠬᠢᠨ ᠳ᠋ᠦ᠍ ᠠᠪᠴᠢᠷᠠᠵᠤ ᠥᠭᠭᠦᠭᠡᠳ᠄《ᠡᠨᠡ ᠭᠤᠯᠢᠷ ᠢ᠋ ᠮᠢᠨᠳᠠᠰᠤᠨ ᠮᠡᠲᠦ ᠵᠥᠭᠡᠯᠡᠨ ᠪᠣᠯᠲᠠᠯᠠ ᠨᠤᠬᠤ᠃ ᠨᠤᠬᠤᠯᠲᠠ ᠨᠢ ᠬᠠᠩᠬᠤ ᠪᠠᠷ ᠢ᠋ᠶ᠋ᠠᠨ ᠭᠤᠯᠢᠷ ᠥᠪᠡᠷ ᠢ᠋ᠶ᠋ᠡᠨ ᠠᠮᠢᠯᠠᠨ<ᠪᠢ ᠴᠢᠮᠠ ᠳ᠋ᠤ᠌ ᠲᠤᠰᠠ ᠪᠣᠯᠤᠶᠠ!> ᠭᠡᠵᠦ ᠭᠤᠷᠪᠠᠨᠲᠠ ᠪᠠᠨ ᠬᠡᠯᠡᠬᠦ ᠪᠣᠯᠤᠨᠠ》 ᠭᠡᠯᠡ᠃ ᠥᠬᠢᠨ ᠭᠤᠯᠢᠷ ᠢ᠋ ᠨᠤᠬᠤᠬᠤ ᠭᠡᠳ ᠪᠦᠬᠦ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠳᠠᠷᠤᠪᠠᠯ ᠪᠤᠯᠪᠠᠷᠠᠢ ᠴᠠᠭᠠᠨ ᠭᠠᠷ ᠨᠢ ᠦᠶᠡ ᠮᠥᠴᠢ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠶᠠᠩᠭᠢᠨᠠᠨ ᠡᠪᠡᠳᠴᠦ᠂ ᠳᠣᠲᠣᠷᠠ ᠨᠢ ᠬᠠᠷᠠᠩᠭᠤᠢᠯᠠᠬᠤ ᠰᠢᠭ᠋ ᠪᠣᠯᠵᠠᠢ᠃ ᠥᠬᠢᠨ᠄《ᠮᠡᠷᠭᠡᠨ ᠠᠬᠠ ᠮᠢᠨᠢ᠂ ᠨᠠᠮᠠ ᠶ᠋ᠢ ᠭᠡᠷ ᠲᠦ᠍ ᠮᠢᠨᠢ ᠬᠦᠷᠭᠡᠭᠡᠳ ᠥᠭᠴᠦ ᠦᠵᠡ᠃ ᠪᠢ ᠡᠨᠡ ᠭᠤᠯᠢᠷ ᠢ᠋ ᠶᠠᠭᠠᠬᠢᠭᠠᠳ ᠴᠤ᠌ ᠵᠥᠭᠡᠯᠡᠷᠡᠭᠦᠯᠵᠦ ᠳᠡᠢᠯᠬᠦ ᠦᠭᠡᠢ ᠶᠦᠮ ᠪᠠᠢᠨᠠ》 ᠭᠡᠪᠡ᠃ ᠮᠡᠷᠭᠡᠨ ᠬᠥᠮᠦᠨ ᠶᠠᠭᠤ ᠴᠤ᠌ ᠡᠰᠡ ᠬᠡᠯᠡᠭᠡᠳ ᠥᠨᠥᠬᠢ ᠬᠠᠲᠠᠭᠤ ᠭᠤᠯᠢᠷ ᠠ᠋ᠴᠠ ᠲᠠᠰᠤᠯᠤᠨ ᠠᠪᠴᠤ᠂ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠵᠥᠭᠡᠯᠡᠨ ᠪᠣᠯᠲᠠᠯᠠ ᠨᠤᠬᠤᠭᠠᠳ ᠥᠬᠢᠨ ᠦ᠌ ᠤᠷᠲᠤ ᠬᠣᠰᠢᠭᠤ ᠶ᠋ᠢ ᠶᠠᠭ ᠳᠠᠭᠤᠷᠢᠶᠠᠯᠭᠠᠨ ᠤᠷᠠᠯᠠᠯᠠ᠃ ᠲᠡᠭᠡᠭᠡᠳ ᠭᠤᠯᠢᠷ ᠬᠤᠰᠢᠭᠤᠨ ᠠ᠋ᠴᠠ ᠪᠠᠨ ᠡᠷᠡᠬᠡᠢ ᠳᠠᠷᠤᠮᠠ ᠶ᠋ᠢ ᠲᠠᠰᠤᠳᠠᠨ ᠬᠠᠶᠠᠪᠠ᠃ ᠲᠡᠭᠡᠲᠡᠯᠡ ᠶᠠᠭᠤ ᠪᠣᠯᠤᠭᠰᠠᠨ ᠭᠡᠵᠦ ᠰᠠᠨᠠᠨᠠ᠃ ᠶᠠᠭ ᠡᠨᠡ ᠮᠥᠴᠡ ᠳ᠋ᠦ᠍ ᠬᠡᠳᠡᠭᠡᠷᠮᠡ ᠥᠬᠢᠨ ᠦ᠌ ᠭᠠᠵᠠᠷ ᠰᠢᠭᠦᠷᠭᠡᠮᠡ ᠤᠷᠲᠤ ᠬᠤᠰᠢᠭᠤᠨ ᠠ᠋ᠴᠠ ᠡᠷᠡᠬᠡᠢ ᠶ᠋ᠢᠨ ᠴᠢᠨᠡᠭᠡ ᠨᠢ ᠪᠠᠰᠠ ᠲᠠᠰᠤᠷᠠᠨ᠂ ᠱᠠᠯᠠᠨ ᠳᠡᠭᠡᠷᠡ ᠫᠣᠳᠬᠢᠨ ᠤᠨᠠᠪᠠ᠃
ᠡᠨᠡ ᠮᠥᠴᠡ ᠡᠴᠡ ᠥᠬᠢᠨ ᠦ᠌ ᠬᠠᠷᠠᠴᠠᠨ ᠳ᠋ᠤ᠌ ᠢᠲᠡᠭᠡᠯ ᠨᠠᠢᠳᠠᠪᠤᠷᠢ᠂ ᠤᠷᠮᠠ ᠵᠣᠷᠢᠭ ᠤ᠋ᠨ ᠭᠠᠯ ᠪᠠᠳᠠᠷᠠᠨ ᠠᠰᠠᠵᠤ ᠡᠬᠢᠯᠡᠯᠡ᠃ ᠲᠤᠶᠠᠬᠠᠨ ᠪᠡᠶᠡ ᠪᠡᠨ ᠶᠠᠳᠠᠷᠠᠬᠤ ᠶ᠋ᠢ ᠤᠮᠠᠷᠲᠠᠵᠤ᠂ ᠲᠤᠷᠠᠬᠠᠨ ᠭᠠᠷ ᠢ᠋ᠶ᠋ᠠᠨ ᠡᠪᠡᠳᠬᠦ ᠶ᠋ᠢ ᠲᠡᠰᠪᠦᠷᠢᠯᠡᠵᠦ᠂ ᠬᠠᠳᠠ ᠴᠢᠯᠠᠭᠤ ᠮᠡᠲᠦ ᠬᠠᠲᠠᠭᠤ ᠭᠤᠯᠢᠷ ᠢ᠋ ᠨᠤᠬᠤᠭᠰᠠᠭᠠᠷ ᠭᠤᠷᠪᠠᠨ ᠡᠳᠦᠷ᠂ ᠭᠤᠷᠪᠠᠨ ᠰᠥᠨᠢ ᠥᠩᠭᠡᠷᠡᠪᠡ᠃ ᠲᠡᠭᠡᠲᠡᠯᠡ ᠳᠥᠷᠪᠡᠳᠡᠬᠢ ᠡᠳᠦᠷ ᠦ᠋ᠨ ᠦᠷ ᠢ᠋ᠶ᠋ᠡᠷ ᠮᠢᠨᠳᠠᠰᠤᠨ ᠮᠡᠲᠦ ᠵᠥᠭᠡᠯᠡᠨ ᠪᠣᠯᠤᠭᠰᠠᠨ ᠭᠤᠯᠢᠷ᠄《ᠥᠬᠢᠨ ᠮᠢᠨᠢ᠂ ᠪᠢ ᠴᠢᠮᠠ ᠳ᠋ᠤ᠌ ᠲᠤᠰᠠ ᠪᠣᠯᠤᠶᠠ!》 ᠭᠡᠵᠦ ᠳᠠᠭᠤ ᠠᠯᠳᠠᠬᠤ ᠨᠢ ᠲᠡᠷᠡ᠃ ᠮᠡᠷᠭᠡᠨ ᠬᠥᠮᠦᠨ ᠥᠬᠢᠨ ᠦ᠌ ᠨᠤᠬᠤᠭᠰᠠᠨ ᠭᠤᠯᠢᠷ ᠢ᠋ᠶ᠋ᠠᠷ ᠲᠡᠭᠦᠨ ᠦ᠌ ᠬᠣᠰᠢᠭᠤ ᠳᠠᠭᠤᠷᠢᠶᠠᠯᠭᠠᠨ᠂ ᠶᠡᠷᠡᠨ ᠶᠢᠰᠦᠨ ᠬᠣᠰᠢᠭᠤ ᠬᠢᠵᠦ ᠡᠩᠨᠡᠭᠦᠯᠦᠨ ᠲᠠᠯᠪᠢᠯᠠ᠃ ᠲᠡᠭᠡᠭᠡᠳ ᠶᠡᠷᠡᠨ ᠶᠢᠰᠦᠨ ᠬᠤᠰᠢᠭᠤᠨ ᠤ᠋ ᠦᠵᠦᠭᠦᠷ ᠡᠴᠡ ᠡᠷᠡᠬᠡᠢ ᠳᠠᠷᠤᠮᠠ ᠭᠤᠯᠢᠷ ᠢ᠋ ᠲᠠᠰᠤᠳᠠᠨ ᠬᠠᠶᠠᠩᠭᠤᠲᠠ ᠭᠡᠳᠡᠭᠡᠷᠮᠡ ᠶ᠋ᠢᠨ ᠤᠷᠲᠤ ᠬᠣᠰᠢᠭᠤ ᠥᠪᠡᠷ ᠢ᠋ᠶ᠋ᠡᠨ ᠠᠶᠠᠨᠳᠠᠭᠠᠨ ᠲᠠᠰᠤᠷᠠᠨ ᠤᠨᠠᠵᠠᠢ᠃ ᠪᠠᠶᠠᠷᠯᠠᠵᠤ ᠬᠥᠭᠡᠷᠦᠭᠰᠡᠨ ᠥᠬᠢᠨ᠄《ᠠᠬᠠ ᠠ᠋᠂ ᠲᠠ ᠯᠠ ᠨᠠᠮᠠ ᠶ᠋ᠢ ᠠᠵᠠ ᠵᠢᠷᠭᠠᠯ ᠲᠠᠢ ᠮᠢᠨᠢ ᠡᠷᠭᠢᠨ ᠤᠴᠠᠷᠠᠭᠤᠯᠤᠯᠠ 》 ᠭᠡᠬᠦ ᠳ᠋ᠦ᠍᠄《ᠥᠬᠢᠨ ᠮᠢᠨᠢ᠂ ᠴᠢ ᠥᠪᠡᠷ ᠦ᠋ᠨ ᠲᠡᠰᠪᠦᠷᠢ ᠬᠠᠲᠠᠭᠤᠵᠢᠯ ᠤ᠋ᠨ ᠬᠦᠴᠦ ᠪᠡᠷ ᠠᠮᠢᠲᠠᠨ ᠪᠣᠯᠵᠤ ᠬᠤᠪᠢᠷᠠᠬᠤ ᠠᠶᠤᠯ ᠠ᠋ᠴᠠ ᠮᠤᠯᠲᠤᠷᠠᠯᠠ᠃ ᠣᠳᠣ ᠭᠠᠷ ᠴᠢᠨᠢ ᠤᠶᠠᠨ ᠵᠥᠭᠡᠯᠡᠨ᠂ ᠠᠵᠢᠯᠰᠠᠭ᠂ ᠰᠡᠳᠬᠢᠯ ᠴᠢᠨᠢ ᠥᠭᠡᠳᠡᠷᠡᠭ ᠰᠠᠢᠬᠠᠨ ᠪᠣᠯᠤᠭᠰᠠᠨ ᠰᠢᠦ 》 ᠭᠡᠯᠡ᠃ ᠡᠨᠡ ᠴᠠᠭ ᠠ᠋ᠴᠠ ᠡᠬᠢᠯᠡᠨ ᠵᠠᠯᠬᠠᠭᠤ ᠭᠡᠳᠡᠭᠡᠷᠮᠡ ᠠᠵᠢᠯᠰᠠᠭ ᠭᠡᠷᠡᠯᠡᠮᠡ ᠪᠣᠯᠤᠨ ᠬᠤᠪᠢᠷᠠᠵᠤ ᠡᠵᠢ ᠠᠪᠤ ᠳ᠋ᠤ᠌ ᠪᠠᠨ ᠡᠭᠡᠨᠡᠭᠲᠡ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠪᠡᠯᠡᠭᠯᠡᠵᠡᠢ᠃
ᠦᠰᠦᠭ ᠬᠠᠲᠠᠭᠴᠢ᠄ ᠵᠡᠷᠮᠦᠳ ᠸ· ᠥᠯᠵᠡᠢ
ᠦᠰᠦᠭ ᠬᠢᠨᠠᠭᠴᠢ᠄ ᠮᠥᠴᠢᠷ