ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠲᠥᠯᠦᠭᠡᠬᠢ ᠰᠡᠳᠬᠢᠯ ᠦ᠋ᠨ ᠲᠦᠭᠰᠢᠭᠦᠷᠢ- ᠭ· ᠴᠢᠩᠪᠠᠭᠠᠲᠤᠷУран зохилын төлөөх сэтгэлийн түгшүүр-Г·Чинбаатар
330 ᠭ· ᠴᠢᠩᠪᠠᠭᠠᠲᠤᠷ
(1)— ᠨᠡᠷᠡ ᠠᠯᠳᠠᠷ ᠤᠷᠤᠭᠤ ᠰᠢᠭᠤᠷᠠᠭᠰᠠᠨ ᠰᠢᠭᠤᠷᠭᠠ
ᠤᠷᠠᠨ ᠵᠣᠬᠢᠶᠠᠯ ᠠᠯᠳᠠᠷ ᠨᠡᠷᠡ᠂ ᠵᠡᠷᠭᠡ ᠬᠡᠷᠬᠡᠮ᠂ ᠱᠠᠩᠨᠠᠯ ᠮᠠᠭᠲᠠᠭᠠᠯ ᠤ᠋ᠨ ᠨᠢᠯᠤᠭᠤᠷᠠᠬᠤ ᠪᠣᠯᠤᠭᠰᠠᠨ ᠥᠨᠥ ᠴᠠᠭ ᠲᠤ᠌ ᠮᠣᠩᠭᠣᠯ ᠢᠷᠠᠭᠤ ᠨᠠᠢᠷᠠᠭ ᠤ᠋ᠨ ᠨᠢᠭᠡᠨ ᠭᠤᠨᠢᠭᠲᠤ ᠲᠡᠦᠬᠡ ᠪᠢᠴᠢᠭᠳᠡᠵᠦ ᠪᠣᠢ᠃ ᠪᠢᠳᠡ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠲᠥᠯᠥᠭᠡ ᠰᠡᠳᠬᠢᠯ ᠵᠢᠷᠦᠬᠡ᠂ ᠠᠮᠢᠳᠤᠷᠠᠯ ᠬᠠᠢᠷᠠ ᠪᠠᠨ ᠪᠢᠰᠢ᠂ ᠬᠠᠷᠢᠨ ᠤᠷᠠᠨ ᠵᠣᠬᠢᠶᠠᠯ ᠢ᠋ ᠥᠴᠦᠬᠡᠨ ᠠᠰᠢᠭ ᠬᠣᠨᠵᠢᠶᠠᠨ ᠤ᠋ ᠪᠠᠨ ᠲᠥᠯᠥᠭᠡ ᠳᠡᠩᠳᠡᠭᠦᠦ ᠬᠢᠮᠳᠠᠬᠠᠨ ᠵᠣᠯᠢᠶᠠᠰᠤᠯᠠᠵᠤ ᠪᠠᠢᠨᠠ᠃ ᠡᠭᠦᠨ ᠦ᠌ ᠦᠢᠯᠡ ᠦᠷᠡ ᠪᠣᠯᠪᠠᠰᠤᠷᠠᠬᠤ ᠴᠠᠭ ᠲᠠᠭᠠᠨ ᠮᠣᠩᠭᠣᠯ ᠤᠷᠠᠨ ᠵᠣᠬᠢᠶᠠᠯ᠂ ᠮᠣᠩᠭᠣᠯ ᠰᠣᠶᠣᠯ ᠳ᠋ᠤ᠌ ᠶᠡᠬᠡᠬᠡᠨ ᠵᠠᠯᠬᠠᠭᠠᠯ ᠢᠷᠡᠬᠦ ᠪᠣᠢ ᠊ᠶᠠ ᠭᠡᠬᠦ ᠡᠴᠡ ᠵᠢᠷᠦᠬᠡ ᠲᠦᠭᠰᠢᠨᠡ᠃ ᠰᠠᠢᠨ ᠤᠷᠠᠨ ᠪᠦᠲᠦᠭᠡᠯ ᠤᠷᠠᠨ ᠪᠦᠲᠦᠭᠡᠯᠴᠢ ᠶ᠋ᠢᠨ ᠨᠢᠭᠤᠷ ᠲᠤ᠌ ᠠᠯᠳᠠᠷ ᠤ᠋ᠨ ᠠᠯᠲᠠ ᠲᠦᠷᠬᠢᠬᠦ ᠪᠣᠯᠪᠠᠴᠤ ᠠᠯᠳᠠᠷᠰᠢᠬᠤ ᠶ᠋ᠢᠨ ᠲᠥᠯᠥᠭᠡ ᠤᠷᠠᠨ ᠵᠣᠬᠢᠶᠠᠯ ᠳ᠋ᠤ᠌ ᠭᠬᠢᠷ ᠲᠡᠢ ᠭᠠᠷ ᠢ᠋ᠶ᠋ᠠᠨ ᠲᠥᠷᠥᠪᠡᠰᠦ ᠵᠠᠶᠠᠭᠠ ᠲᠠᠨᠢ ᠬᠠᠵᠠᠢᠨᠠ᠃
《ᠤᠷᠠᠨ ᠵᠣᠬᠢᠶᠠᠯ ᠢ᠋ᠶ᠋ᠠᠷ ᠪᠠᠶᠠᠵᠢᠵᠤ᠂ ᠨᠣᠶᠠᠨ ᠰᠠᠭᠤᠵᠤ ᠳᠡᠢᠯᠬᠦ ᠶᠦᠮ ᠤᠤ?》 ᠭᠡᠵᠦ ᠬᠡᠰᠡᠭ ᠬᠥᠮᠦᠰ ᠢᠷᠪᠠᠢᠳᠠᠭ᠃ ᠭᠡᠪᠡᠴᠦ ᠮᠠᠨ ᠤ᠋ ᠬᠢᠨ ᠳ᠋ᠦ᠍ ᠤᠷᠠᠨ ᠵᠣᠬᠢᠶᠠᠯ ᠢ᠋ᠶ᠋ᠠᠷ ᠭᠡᠳᠡᠰᠦ ᠪᠡᠨ ᠪᠣᠷᠳᠣᠭᠰᠠᠨ ᠮᠤᠩ ᠦᠭᠡᠢ᠃ ᠤᠷᠠᠨ ᠵᠣᠬᠢᠶᠠᠯ ᠢ᠋ᠶ᠋ᠠᠷ ᠠᠯᠳᠠᠷᠰᠢᠵᠤ᠂ ᠵᠡᠷᠭᠡ ᠬᠡᠷᠬᠡᠮ ᠣᠯᠵᠤ᠂ ᠢᠷᠠᠭᠤ ᠨᠠᠢᠷᠠᠭᠴᠢᠳ ᠳᠡᠪᠡᠷᠡᠭᠦᠨ᠂ ᠠᠭᠠᠭᠯᠠᠭᠠᠳ᠂ ᠲᠠᠩᠬᠠᠢ ᠪᠠᠢᠳᠠᠭ ᠶᠤᠮ ᠭᠡᠵᠦ ᠫᠤᠱᠺᠢᠨ᠂ ᠴᠣᠶ᠋ᠢᠨᠣᠮ᠁ ᠢ᠋ᠶ᠋ᠠᠷ ᠡᠰᠢ ᠲᠠᠲᠠᠵᠤ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠥᠴᠦᠬᠡᠨ ᠪᠤᠯᠢᠬᠠᠢ ᠠᠵᠢᠯᠯᠠᠭᠠ ᠪᠠᠨ ᠵᠥᠪᠲᠥᠭᠡᠨᠡ᠃ ᠭᠡᠪᠡᠴᠦ ᠲᠡᠳᠡ ᠬᠥᠮᠦᠨ ᠠᠷᠠᠳ ᠲᠠᠭᠠᠨ᠂ ᠰᠣᠶᠣᠯ ᠤᠷᠠᠯᠢᠭ ᠲᠠᠭᠠᠨ ᠲᠡᠳᠡᠨ ᠰᠢᠭ ᠵᠢᠳᠬᠦᠯ ᠭᠠᠷᠭᠠᠵᠤ ᠴᠢᠳᠠᠭᠠ ᠦᠭᠡᠢ ᠪᠡᠨ ᠪᠠᠢᠩᠭᠤ ᠮᠠᠷᠲᠠᠴᠢᠬᠠᠭᠠᠳ ᠪᠠᠢᠳᠠᠭ᠃ ᠬᠢᠭᠰᠡᠨ ᠪᠦᠲᠦᠭᠡᠭᠰᠡᠨ ᠶᠠᠭᠤᠮᠠ ᠨᠢ ᠶᠠᠯᠢᠬᠤ ᠦᠭᠡᠢ ᠥᠴᠦᠬᠡᠨ ᠮᠥᠷᠲᠡᠭᠡᠨ ᠭᠠᠷᠭᠠᠭᠰᠠᠨ ᠠᠯᠳᠠᠭᠠ ᠂ᠦᠢᠯᠡᠳᠦᠭᠰᠡᠨ ᠭᠤᠲᠤᠮᠰᠢᠭ ᠨᠢ ᠠᠭᠤᠯᠠ ᠮᠡᠲᠦ ᠪᠢᠳᠡᠨ ᠳ᠋ᠦ᠍ ᠪᠤᠷᠬᠠᠨ ᠲᠡᠭᠷᠢ ᠶᠠᠮᠠᠷ ᠭᠡᠰᠬᠡᠯ ᠣᠨᠣᠭᠠᠳᠠᠭ ᠪᠣᠯ?
(2)— ᠳᠠᠭᠤᠷᠢᠶᠠᠬᠤ ᠶ᠋ᠢᠨ ᠲᠤᠩ ᠱᠦᠭᠯᠡᠭᠰᠡᠨ ᠬᠥᠮᠦᠰ
ᠶᠠᠮᠠᠷᠪᠠ ᠤᠷᠠᠯᠢᠭ ᠪᠦᠷ ᠳᠠᠭᠤᠷᠢᠶᠠᠬᠤ ᠠ᠋ᠴᠠ ᠢᠷᠡᠳᠡᠭ ᠭᠡᠰᠡᠨ ᠦᠭᠡ ᠪᠠᠢᠳᠠᠭ ᠃ ᠭᠡᠪᠡᠴᠦ ᠡᠨᠡ ᠨᠢ ᠤᠷᠠᠯᠢᠭ ᠤ᠋ᠨ ᠠᠩᠬᠠᠨ ᠤ᠋ ᠡᠭᠦᠰᠦᠯ ᠦ᠋ᠨ ᠲᠤᠬᠠᠢ ᠬᠡᠯᠡᠭᠰᠡᠨ ᠦᠭᠡ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠳᠠᠭᠤᠷᠢᠶᠠᠵᠤ ᠯᠠ ᠪᠠᠢᠪᠠᠯ ᠤᠷᠠᠨ ᠪᠦᠲᠦᠭᠡᠯ ᠣᠨᠳᠣᠷᠣᠨᠠ ᠭᠡᠰᠡᠨ ᠦᠭᠡ ᠪᠢᠰᠢ ᠯᠡ ᠳᠡ! ᠭᠡᠪᠡᠴᠦ ᠮᠠᠨ ᠤ᠋ ᠬᠢᠳ ᠳᠠᠭᠤᠷᠢᠶᠠᠬᠤ ᠶ᠋ᠢᠨ ᠲᠤᠩ ᠱᠦᠭᠯᠡᠭᠰᠡᠨ ᠰᠢᠭ ᠣᠯᠳᠠᠭᠰᠠᠨ ᠪᠦᠭᠦᠳᠡ ᠶ᠋ᠢᠨ ᠪᠦᠲᠦᠭᠡᠯ ᠢ᠋《ᠬᠢᠮᠤᠰᠤᠯᠠᠬᠤ》 ᠪᠣᠯᠤᠭᠰᠠᠨ ᠨᠢ ᠢᠷᠠᠭᠤ ᠨᠠᠢᠷᠠᠭ ᠪᠤᠶᠤ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠡᠷᠡᠮᠡᠯᠵᠡᠯᠡᠯ ᠳ᠋ᠦ᠍ ᠬᠦᠨᠳᠦᠬᠡᠨ ᠲᠦᠭᠰᠢᠭᠦᠷᠢ ᠶ᠋ᠢ ᠠᠪᠴᠢᠷᠠᠵᠤ ᠪᠣᠢ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠢᠷᠠᠭᠤ ᠨᠠᠢᠷᠠᠭᠴᠢᠳ ᠤ᠋ᠨ ᠪᠦᠲᠦᠭᠡᠯ ᠮᠠᠨ ᠤ᠋ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠦ᠋ᠨ ᠳᠠᠭᠤᠷᠢᠶᠠᠬᠤ ᠳᠠᠭᠤᠷᠢᠶᠠᠯ ᠪᠣᠯᠵᠠᠢ ᠃ᠳᠠᠭᠤᠷᠢᠶᠠᠬᠤ ᠳ᠋ᠤ᠌ ᠬᠣᠶᠠᠷ ᠵᠦᠢᠯ ᠪᠣᠢ᠃ ᠨᠢᠭᠡ ᠨᠢ ᠪᠤᠰᠤᠳ ᠤ᠋ᠨ ᠤᠷᠠᠨ ᠪᠦᠲᠦᠭᠡᠯ ᠦ᠋ᠨ ᠮᠥᠷ ᠪᠠᠳᠠᠭ᠂ ᠦᠭᠡ ᠥᠭᠦᠯᠡᠪᠦᠷᠢ ᠶ᠋ᠢ《ᠱᠠᠮᠰᠢᠨ ᠬᠡᠷᠡᠭᠯᠡᠬᠦ》᠂ ᠨᠥᠭᠦᠭᠡ ᠨᠢ ᠤᠷᠠᠯᠠᠬᠤ ᠡᠷᠳᠡᠮ ᠢ᠋ ᠨᠢ ᠳᠠᠭᠤᠷᠢᠶᠠᠬᠤ᠃ ᠡᠭᠦᠨ ᠳ᠋ᠦ᠍ ᠡᠮᠦᠨᠡᠬᠢ ᠨᠢ ᠠᠪᠯᠢᠭᠠᠴᠢ ᠨᠣᠶᠠᠳ ᠤ᠋ᠨ ᠠᠪᠲᠠᠯ᠂ ᠬᠣᠢᠨᠠᠬᠢ ᠨᠢ ᠭᠠᠷᠤᠭᠠ ᠪᠠᠨ ᠠᠪᠴᠤ ᠪᠣᠢ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠦ᠋ᠨ ᠵᠠᠮ ᠢ᠋ᠶ᠋ᠠᠨ ᠡᠷᠢᠵᠦ ᠪᠣᠢ ᠡᠷᠢᠯᠬᠢᠯᠡᠯ ᠭᠡᠵᠦ ᠦᠵᠡᠵᠦ ᠪᠣᠯᠤᠨᠠ᠃ ᠠᠷᠢᠰᠲ᠋ᠤᠲ᠋ᠸᠯ ᠢ᠋ᠶ᠋ᠠᠷ《ᠬᠠᠮᠤᠭ ᠤ᠋ᠨ ᠠᠩᠬᠠ ᠬᠡᠦᠬᠡᠨ ᠢ᠋ ᠴᠡᠴᠡᠭ ᠲᠡᠢ ᠵᠦᠢᠷᠯᠡᠭᠴᠢ ᠪᠣᠯ ᠠᠭᠤᠤ ᠶᠡᠬᠡ ᠠᠪᠢᠶᠠᠰᠲᠠᠨ᠂ ᠠᠬᠢᠨ ᠳᠠᠬᠢᠨ ᠴᠡᠴᠡᠭ ᠲᠡᠢ ᠵᠦᠢᠷᠯᠡᠭᠴᠢ ᠪᠣᠯ ᠠᠳᠠᠭ ᠠᠪᠢᠶᠠᠰᠲᠠᠨ》 ᠭᠡᠵᠦ ᠶᠠᠷᠢᠭᠰᠠᠨ ᠢ᠋ ᠪᠣᠯᠭᠣᠭᠠᠭᠠᠴᠢ! ᠳᠠᠭᠤᠷᠢᠶᠠᠬᠤ ᠪᠠᠷ ᠵᠠᠮ ᠢ᠋ᠶ᠋ᠠᠨ ᠣᠯᠳᠠᠭ ᠴᠤ᠌ ᠳᠠᠭᠤᠷᠢᠶᠠᠭᠠᠳ ᠪᠠᠢᠬᠤ ᠪᠠᠷ
ᠥᠪᠡᠷ ᠢ᠋ ᠪᠡᠨ ᠠᠯᠳᠠᠳᠠᠭ᠃
(3) — ᠲᠦᠭᠦᠬᠡᠢ ᠲᠠᠷᠢᠬᠢ ᠲᠠᠢ ᠰᠢᠭᠦᠷᠭᠡᠢ ᠪᠦᠲᠦᠭᠡᠯᠴᠢᠳ
ᠮᠠᠨ ᠤ᠋ ᠬᠢᠨ ᠦ᠌ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠮᠡᠳᠡᠯᠭᠡ ᠶ᠋ᠢᠨ ᠪᠣᠯᠪᠠᠰᠤᠷᠠᠯ ᠮᠠᠭᠤᠲᠠᠢ ᠠ᠋ᠴᠠ ᠪᠣᠯᠵᠤ ᠳᠠᠪᠤᠰᠤ ᠦᠭᠡᠢ ᠦᠭᠡ ᠪᠡᠷ ᠴᠠᠭᠠᠰᠤ ᠳᠦᠭᠦᠷᠭᠡᠳᠡᠭ ᠪᠠᠯᠠᠢ ᠵᠠᠩ ᠲᠠᠢ᠃ ᠲᠡᠷᠡ ᠮᠥᠷᠲᠡᠭᠡᠨ ᠮᠠᠰᠢ ᠨᠢᠯᠬᠠᠰᠠᠭ ᠰᠡᠳᠬᠢᠵᠦ᠂ ᠳᠣᠷᠭᠣᠨ ᠪᠣᠳᠣᠳᠠᠭ᠃
(4) — ᠵᠣᠷᠢᠭ ᠦᠭᠡᠢ《ᠪᠠᠭᠠᠲᠤᠳ》 ᠤ᠋ᠨ ᠢᠷ ᠦᠭᠡᠢ ᠰᠡᠯᠡᠮᠡ
ᠰᠡᠳᠬᠢᠯ ᠦ᠋ᠨ ᠲᠠᠮᠢᠷ ᠦᠭᠡᠢ ᠢᠷᠠᠭᠤ ᠨᠠᠢᠷᠠᠭᠴᠢ ᠶ᠋ᠢ ᠶᠠᠮᠠᠷ ᠢᠷᠠᠭᠤ ᠨᠠᠢᠷᠠᠭᠴᠢ ᠭᠡᠬᠦ ᠪᠣᠢ?《ᠢᠷᠠᠭᠤ ᠨᠠᠢᠷᠠᠭᠴᠢ ᠬᠥᠮᠦᠨ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠤᠷᠭᠠ ᠶ᠋ᠢᠨ ᠮᠣᠷᠢ᠂ ᠲᠣᠷᠭᠠᠨ ᠢᠷ ᠨᠢ ᠪᠠᠢᠬᠤ ᠶᠣᠰᠣᠲᠠᠢ》 ᠪᠢᠰᠢ ᠪᠢᠯᠡ ᠤᠤ? ᠴᠠᠪᠴᠢᠬᠤ ᠢᠯᠳᠦᠨ ᠦ᠌ ᠬᠢᠨᠢ ᠢᠷ᠂ ᠴᠠᠷᠬᠢ ᠳᠤᠭᠤᠯᠠᠭᠠ ᠶ᠋ᠢᠨ ᠬᠢᠨᠢ ᠳᠠᠯᠤ ᠪᠠᠢᠬᠤ ᠶᠣᠰᠣᠲᠠᠢ ᠪᠢᠰᠢ ᠤᠤ? ᠲᠡᠢᠮᠦ ᠪᠢᠰᠢ ᠪᠣᠯ ᠶᠠᠮᠠᠷ ᠢᠷᠠᠭᠤ ᠨᠠᠢᠷᠠᠭᠴᠢ ᠶᠤᠮ ᠪᠣᠢ?
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠴᠡᠴᠡᠭ ᠂ᠨᠠᠷᠠᠨᠲᠤᠶᠠᠭᠠ᠂ ᠢᠳᠰᠢᠩᠬᠣᠷᠯᠣ
ᠬᠢᠨᠠᠭᠴᠢ ᠪᠠᠭᠰᠢ᠄ ᠣᠳᠬᠠᠨᠰᠣᠠ᠂ ᠰᠡᠬᠡᠭᠡᠷᠡᠯ