ᠰᠢᠯᠦᠭ ᠦ᠋ᠨ ᠵᠣᠭᠣᠭ- ᠭ· ᠴᠢᠩᠪᠠᠭᠠᠲᠤᠷШүлгийн зоог-Г·Чинбаатар
445ᠰᠢᠯᠦᠭ ᠦ᠋ᠨ ᠵᠣᠭᠣᠭ ①
ᠭ· ᠴᠢᠩᠪᠠᠭᠠᠲᠤᠷ
ᠰᠠᠢᠬᠠᠨ ᠮᠣᠩᠭᠣᠯ ᠰᠢᠯᠦᠭ ᠤᠩᠰᠢᠭᠠ ᠦᠭᠡᠢ ᠤᠳᠠᠴᠢᠬᠠᠯᠠ᠃ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠲᠤᠰᠬᠠᠢ ᠬᠢᠴᠢᠶᠡᠯ ᠨᠡᠭᠡᠭᠡᠵᠦ᠂ ᠣᠨᠣᠯ ᠮᠡᠷᠭᠡᠵᠢᠯ ᠢ᠋ᠶ᠋ᠡᠷ ᠬᠢᠴᠢᠶᠡᠯᠯᠡᠵᠦ ᠪᠠᠢᠭᠠ ᠪᠥᠭᠡᠳ ᠡᠢᠮᠦ ᠠᠷᠪᠢᠨ ᠰᠢᠯᠦᠭᠴᠢᠳ ᠬᠥᠳᠡᠯᠮᠦᠷᠢ ᠶ᠋ᠢᠨ ᠬᠠᠲᠠᠭᠤ ᠠ᠋ᠴᠠ ᠤᠬᠤᠷᠢᠯ ᠦᠭᠡᠢ ᠪᠢᠴᠢᠵᠡᠭᠡᠵᠦ ᠪᠠᠢᠭᠠ ᠠᠲᠠᠯᠠ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠪᠢᠯᠡ? ᠭᠡᠪᠡᠴᠦ ᠡᠨᠳᠡ ᠶᠠᠷᠢᠭᠠᠳ ᠪᠠᠢᠭᠠ ᠮᠠᠨᠢ《ᠮᠣᠩᠭᠣᠯ ᠬᠡᠯᠡ ᠪᠡᠷ ᠪᠢᠴᠢᠭᠰᠡᠨ》 ᠰᠢᠯᠦᠭ ᠪᠢᠰᠢ᠂ ᠬᠠᠷᠢᠨ ᠮᠣᠩᠭᠣᠯ ᠢ᠋ᠶ᠋ᠠᠷ ᠰᠡᠳᠬᠢᠵᠦ ᠪᠢᠴᠢᠭᠰᠡᠨ ᠰᠢᠯᠦᠭ ᠢ᠋ ᠶᠠᠷᠢᠵᠤ ᠪᠣᠢ ᠭᠡᠳᠡᠭ ᠢ᠋ ᠣᠢᠯᠠᠭᠠᠭᠠᠷᠠᠢ᠃
ᠮᠠᠨ ᠤ᠋ ᠬᠢᠨ ᠳ᠋ᠦ᠍ ᠰᠢᠯᠦᠭ ᠦᠭᠡᠢ ᠪᠢᠰᠢ ᠪᠠᠢᠨᠠ᠃ ᠭᠡᠪᠡᠴᠦ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠰᠡᠳᠬᠢᠯᠭᠡᠨ ᠦ᠌ ᠬᠠᠷᠠᠭᠠᠰᠤ ᠪᠠᠷ ᠰᠣᠨᠵᠢᠨ ᠦᠵᠡᠪᠡᠯ《ᠮᠣᠩᠭᠣᠯ ᠰᠢᠯᠦᠭ》 ᠡᠴᠡ ᠠᠷᠠᠢ ᠵᠠᠢᠳᠠᠭᠤ᠂ ᠡᠰᠡᠬᠦᠯᠡ ᠪᠦᠷ ᠱᠠᠯ ᠡᠰᠡᠷᠭᠦ ᠪᠡᠷ ᠬᠥᠭᠵᠢᠵᠦ ᠪᠣᠢ᠃ ᠠᠷᠭᠠ ᠪᠠᠷᠢᠯ ᠳ᠋ᠤ᠌ ᠳᠣᠯᠳᠣᠢᠳᠠᠨ ᠬᠡᠯᠡᠨ ᠦ᠌ ᠡᠭᠡᠵᠢᠭ ᠢ᠋ᠶ᠋ᠡᠨ ᠥᠩᠭᠡᠯᠡᠬᠦ᠂ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠰᠡᠳᠬᠢᠬᠦᠢ ᠶ᠋ᠢᠨ ᠯᠣᠭᠢᠭ ᠠ᠋ᠴᠠ ᠭᠠᠵᠢᠵᠤ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠣᠯᠪᠣᠵᠤ ᠪᠣᠳᠣᠬᠤ ᠪᠤᠶᠤ ᠳᠦᠷᠰᠦᠯᠡᠯ ᠵᠣᠬᠢᠶᠠᠬᠤ᠂ ᠨᠡᠢᠲᠡ ᠮᠣᠩᠭᠣᠯᠴᠤᠳ ᠤ᠋ᠨ ᠵᠠᠩ ᠦᠢᠯᠡ ᠶ᠋ᠢᠨ ᠬᠡᠪᠰᠢᠯ ᠡᠴᠡ ᠵᠥᠷᠢᠴᠡᠬᠦ ᠪᠤᠶᠤ ᠭᠤᠸᠠ ᠰᠠᠢᠬᠠᠨ ᠤ᠋ ᠣᠢᠯᠠᠭᠠᠯᠲᠠ ᠠ᠋ᠴᠠ ᠲᠡᠷᠰᠯᠡᠬᠦ ᠭᠡᠬᠦᠴᠢᠯᠡᠨ ᠵᠦᠢᠯ ᠦ᠋ᠳ ᠳᠡᠩᠳᠡᠭᠦᠦ ᠭᠠᠵᠠᠷ ᠠᠪᠴᠤ ᠣᠷᠣ ᠳᠦᠭᠦᠷᠭᠡᠵᠡᠢ᠃ ᠡᠨᠡ ᠪᠦᠬᠦ ᠵᠦᠢᠯ ᠮᠠᠨ ᠤ᠋ ᠢᠷᠠᠭᠤ ᠨᠠᠢᠷᠠᠭᠴᠢ᠂ ᠵᠣᠬᠢᠶᠠᠯᠴᠢᠳ ᠠᠮᠢᠳᠤᠷᠠᠯ ᠠ᠋ᠴᠠ ᠬᠢᠷᠢ ᠵᠠᠢᠳᠠᠭᠤ— ᠳᠠᠷᠤᠢ ᠥᠪᠡᠷ ᠦ᠋ᠨ ᠰᠣᠶᠣᠯ ᠠ᠋ᠴᠠ ᠪᠠᠨ ᠠᠯᠢ ᠵᠡᠷᠭᠡ ᠬᠥᠨᠳᠡᠢ ᠭᠡᠳᠡᠭ ᠦ᠋ᠨ ᠬᠢᠨᠢ ᠲᠤᠰᠬᠠᠯ ᠪᠥᠭᠡᠳ ᠰᠠᠢᠬᠠᠨ ᠮᠣᠩᠭᠣᠯ ᠰᠢᠯᠦᠭ ᠬᠣᠮᠰᠠᠬᠠᠨ ᠲᠥᠷᠥᠳᠡᠭ ᠦ᠋ᠨ ᠤᠯᠪᠠᠭᠠ ᠪᠣᠯᠵᠠᠢ᠃
ᠪᠢᠳᠡᠨ ᠦ᠌ ᠶᠠᠷᠢᠳᠠᠭ ᠠᠮᠢᠳᠤᠷᠠᠯ ᠳ᠋ᠤ᠌ ᠭᠦᠨᠵᠡᠭᠡᠢᠷᠡᠨᠡ ᠭᠡᠳᠡᠭ ᠨᠢ ᠵᠤᠭᠠᠴᠠᠯ᠃ ᠣᠴᠢᠭᠰᠠᠨ ᠶᠠᠪᠤᠭᠰᠠᠨ ᠭᠠᠵᠠᠷ ᠤ᠋ᠨ ᠢ᠋ᠶ᠋ᠠᠨ ᠠᠭᠤᠯᠠ ᠤᠰᠤᠨ ᠤ᠋ ᠨᠡᠷᠡ ᠳᠣᠮᠣᠭ᠂ ᠠᠷᠠᠳ ᠣᠯᠠᠨ ᠤ᠋ ᠠᠮᠢᠳᠤᠷᠠᠯ ᠤ᠋ᠨ ᠪᠠᠢᠳᠠᠯ᠂ ᠵᠠᠩ ᠵᠠᠩᠰᠢᠯ ᠤ᠋ᠨ ᠢᠯᠡᠷᠬᠡᠢ ᠬᠤᠪᠢᠷᠠᠯ᠂ ᠮᠠᠯᠵᠢᠯ ᠰᠣᠶᠣᠯ ᠤ᠋ᠨ ᠣᠨᠳᠣᠣᠰᠢᠯ᠂ ᠦᠵᠡᠯ ᠤᠬᠠᠮᠰᠠᠷ ᠤ᠋ᠨ ᠬᠤᠪᠢᠷᠠᠯᠲᠠ᠂ ᠡᠳᠦᠭᠡ ᠲᠡᠦᠬᠡ ᠡᠴᠡ ᠥᠭᠰᠥᠭᠦᠯᠦᠭᠡᠳ ᠪᠠᠢᠭᠠᠯᠢ ᠶ᠋ᠢᠨ ᠴᠥᠯᠡᠷᠬᠡᠭᠵᠢᠯ᠂ ᠠᠵᠤ ᠠᠬᠤᠢ ᠶ᠋ᠢᠨ ᠪᠠᠢᠳᠠᠯ ᠵᠡᠷᠭᠡ ᠶ᠋ᠢ ᠣᠭᠲᠣᠬᠠᠨ ᠴᠤ ᠠᠩᠬᠠᠷᠤᠯ ᠳ᠋ᠠᠭᠠᠨ ᠠᠪᠤᠯ ᠦᠭᠡᠢ᠂ ᠵᠥᠪᠬᠡᠨ ᠬᠠᠮᠢᠭᠠ ᠣᠴᠢᠵᠤ᠂ ᠬᠡᠨ ᠲᠡᠢ ᠠᠭᠤᠯᠵᠠᠵᠤ᠂ ᠶᠠᠭᠠᠬᠢᠵᠤ ᠨᠠᠷᠭᠢᠭᠰᠠᠨ ᠠ᠋ᠴᠠ ᠯᠠ ᠪᠢᠴᠢᠭᠰᠡᠨ ᠰᠢᠭᠦᠷᠭᠡᠢ ᠪᠦᠲᠦᠭᠡᠯ ᠠᠷᠪᠢᠳᠴᠠᠢ᠃ ᠡᠨᠡ ᠪᠦᠬᠦ ᠨᠠᠷᠢᠨ ᠰᠢᠷᠢᠨ ᠵᠦᠢᠯᠡᠰ ᠲᠦ᠍ ᠮᠠᠨ ᠤ᠋ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠲᠡᠭᠡᠵᠦ ᠬᠠᠢᠩᠭᠤ ᠴᠠᠯᠠᠭᠠᠢ ᠬᠠᠨᠳᠤᠭᠠᠳ ᠪᠠᠢᠭᠠ ᠶ᠋ᠢ ᠬᠠᠴᠢᠷᠬᠠᠮᠠᠷ᠃ ᠭᠠᠩ ᠵᠤᠳ ᠢ᠋ ᠪᠢᠴᠢᠬᠦ ᠳ᠋ᠦ᠍᠂ ᠵᠦᠭᠡᠷ ᠯᠡ ᠥᠩᠭᠡᠨ ᠲᠠᠯᠠ ᠳ᠋ᠤ᠌ ᠬᠥᠪᠬᠦ ᠡᠴᠡ ᠪᠢᠰᠢ᠂ ᠭᠠᠩ ᠵᠤᠳ ᠳᠠᠬᠢ ᠮᠠᠯᠴᠢᠳ ᠤ᠋ᠨ ᠰᠡᠳᠬᠢᠯᠭᠡ᠂ ᠠᠮᠢ ᠠᠬᠤᠢ ᠶ᠋ᠢᠨ ᠬᠤᠪᠢᠷᠠᠯ ᠠ᠋ᠴᠠ ᠪᠣᠯᠤᠭᠰᠠᠨ ᠰᠣᠶᠣᠯ ᠤ᠋ᠨ ᠣᠨᠳᠣᠣᠰᠢᠯ᠂ ᠰᠡᠳᠬᠢᠬᠦᠢ ᠶ᠋ᠢᠨ ᠴᠠᠷᠠ ᠬᠦᠷᠢᠶᠡᠨ ᠦ᠌ ᠢᠪᠴᠤᠤᠷᠡᠯ ᠵᠡᠮᠳᠡᠭᠳᠡᠯ᠁ ᠭᠡᠬᠦᠴᠢᠯᠡᠨ ᠭᠦᠨᠵᠡᠭᠡᠢᠷᠡᠵᠦ ᠪᠢᠴᠢᠭᠰᠡᠨ ᠵᠣᠬᠢᠶᠠᠯ ᠳᠠᠩᠴᠤ ᠬᠣᠪᠣᠷ᠃ ᠪᠢᠴᠢᠬᠦ ᠶ᠋ᠢᠨ ᠯᠡ ᠲᠥᠯᠥᠭᠡ᠂ ᠨᠡᠢᠲᠡᠯᠡᠭᠦᠯᠬᠦ ᠶ᠋ᠢᠨ ᠯᠡ ᠲᠥᠯᠥᠭᠡ ᠠᠷᠭᠠ ᠪᠠᠷᠢᠯ᠂ ᠤᠷᠠᠨ ᠳᠦᠷᠰᠦᠯᠡᠯ ᠳ᠋ᠦ᠍ ᠳᠣᠯᠳᠣᠢᠳᠠᠭᠰᠠᠨ ᠰᠢᠯᠦᠭ ᠦ᠋ᠳ ᠬᠠᠭᠤᠳᠠᠰᠤ ᠳᠦᠭᠦᠷᠭᠡᠬᠦ ᠨᠢ ᠠᠷᠪᠢᠳᠤᠭᠰᠠᠨ ᠢ᠋ᠶ᠋ᠠᠷ ᠢᠷᠠᠭᠤ ᠨᠠᠢᠷᠠᠭ ᠤ᠋ᠨ ᠲᠡᠩᠬᠡᠭᠡ ᠨᠣᠴᠢᠲᠠᠢ ᠰᠤᠯᠠᠳᠠᠭᠰᠠᠨ ᠪᠠᠢᠭᠠ ᠶᠤᠮ᠃ ᠡᠭᠦᠨ ᠦ᠌ ᠴᠠᠭᠠᠳᠤ ᠰᠢᠯᠲᠠᠭᠠᠨ ᠶᠠᠭᠤ ᠪᠣᠢ? ᠬᠡᠮᠡᠪᠡᠰᠦ᠂ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠮᠠᠨᠢ ᠰᠣᠶᠣᠯ ᠢ᠋ᠶ᠋ᠠᠨ ᠣᠢᠯᠠᠭᠠᠬᠤ ᠦᠭᠡᠢ᠂ ᠰᠡᠳᠬᠢᠬᠦᠢ ᠨᠢ ᠵᠡᠮᠳᠡᠭᠷᠡᠭᠰᠡᠨ ᠲᠡᠢ ᠬᠣᠯᠪᠣᠭᠠ ᠲᠠᠢ ᠭᠡᠵᠦ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠦᠵᠡᠯᠲᠡ ᠪᠡᠨ ᠶᠠᠷᠢᠬᠤ ᠶ᠋ᠢ ᠵᠣᠷᠢᠯᠠ᠃
《ᠬᠠᠯᠬᠠᠴᠤᠳ ᠠ᠋ᠴᠠ ᠬᠡᠯᠡ ᠰᠤᠷᠤᠨᠠ》 ᠭᠡᠳᠡᠭ ᠨᠢ ᠳᠠᠶᠠᠭᠠᠷ ᠤ᠋ᠨ ᠳᠠᠭᠤ ᠨᠢᠭᠡᠲᠡᠢ ᠤᠤᠬᠠᠢᠯᠠᠯ᠃ ᠬᠡᠯᠡ ᠨᠢ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠰᠡᠳᠬᠢᠬᠦᠢ ᠶ᠋ᠢᠨ ᠬᠠᠮᠤᠭ ᠲᠥᠪᠯᠡᠷᠡᠩᠭᠦᠢ ᠢᠯᠡᠷᠡᠯ ᠪᠣᠯᠤᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠥᠪᠡᠷᠰᠡᠳ ᠦ᠋ᠨ ᠶᠠᠳᠠᠭᠤ ᠵᠡᠮᠳᠡᠭ ᠬᠡᠯᠡ ᠪᠡᠨ ᠵᠦᠭᠰᠢᠷᠡᠭᠦᠯᠬᠦ ᠨᠢ ᠭᠠᠷᠴᠠᠭᠠ ᠦᠭᠡᠢ ᠵᠥᠪ ᠴᠤ ᠭᠡᠰᠡᠨ᠂ ᠰᠣᠶᠣᠯ ᠤᠯᠠᠮᠵᠢᠯᠠᠯ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ᠂ ᠡᠨᠡ ᠰᠣᠶᠣᠯ ᠤ᠋ᠨ ᠠᠴᠢᠶᠠᠯᠠᠭᠴᠢ ᠪᠣᠯᠤᠭᠰᠠᠨ ᠠᠷᠠᠳ ᠣᠯᠠᠨ ᠤ᠋ ᠪᠠᠨ ᠰᠡᠳᠬᠢᠬᠦᠢ ᠶ᠋ᠢᠨ ᠴᠠᠷᠠ ᠬᠠᠷᠠᠭᠠᠰᠤ ᠪᠠᠷ ᠰᠡᠳᠬᠢᠵᠦ ᠢᠯᠡᠳᠬᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠢᠳᠡᠨ ᠳ᠋ᠦ᠍ ᠠᠪᠴᠤ ᠬᠡᠯᠡᠪᠡᠯ᠂ ᠬᠠᠯᠬᠠᠴᠤᠳ ᠠ᠋ᠴᠠ ᠬᠡᠯᠡ ᠰᠤᠷᠤᠨᠠ ᠭᠡᠳᠡᠭ ᠨᠢ ᠲᠡᠳᠡᠨ ᠢ᠋ ᠳᠠᠭᠤᠷᠢᠶᠠᠨᠠ ᠭᠡᠰᠡᠨ ᠲᠡᠢ ᠡᠭᠡᠭᠡ ᠢᠵᠢᠯ ᠤᠴᠢᠷ ᠶᠤᠮ᠃ ᠬᠠᠪᠤᠯᠢᠭ ᠣᠨᠣᠪᠴᠢᠲᠠᠢ ᠬᠡᠯᠡᠭᠰᠡᠨ ᠭᠠᠭᠴᠠ ᠦᠭᠡ ᠶ᠋ᠢ ᠨᠢ ᠵᠣᠬᠢᠶᠠᠯ ᠳ᠋ᠠᠭᠠᠨ ᠨᠡᠮᠡᠷᠢᠯᠡᠴᠢᠬᠡᠬᠦ ᠪᠡᠷ《ᠦ᠂ ᠡᠨᠡ ᠴᠢᠨᠢ ᠨᠥᠭᠦᠭᠡ ᠬᠡᠨ ᠦ᠌ ᠯᠡ ᠠᠯᠳᠠᠭᠤᠯ ᠮᠣᠷᠢ ᠪᠠᠢᠬᠤ ᠨᠢ ᠰᠢᠪ ᠳᠡ!》 ᠭᠡᠵᠦ ᠤᠩᠰᠢᠭᠴᠢᠳ ᠮᠡᠳᠡᠴᠢᠬᠡᠳᠡᠭ ᠃ ᠳ· ᠨᠠᠮᠰᠠᠷᠠᠢ ᠶ᠋ᠢᠨ ᠵᠣᠬᠢᠶᠠᠯ ᠢ᠋ ᠤᠩᠰᠢᠬᠤ ᠳ᠋ᠤ᠌ ᠮᠠᠰᠢ ᠣᠢᠯᠠᠭᠠᠮᠵᠢᠲᠠᠢ ᠤᠷᠤᠰᠤᠮᠠ᠂ ᠪᠢᠳᠡᠨ ᠦ᠌ ᠮᠡᠳᠡᠬᠦ ᠦᠭᠡᠢ᠂ ᠣᠢᠯᠠᠭᠠᠬᠤ ᠦᠭᠡᠢ ᠦᠭᠡ᠂ ᠳᠦᠷᠰᠦᠯᠡᠯ ᠭᠠᠭᠴᠠ ᠴᠤ ᠦᠭᠡᠢ ᠪᠠᠢᠲᠠᠯᠠ ᠪᠢᠳᠡ ᠪᠢᠴᠢᠬᠦ ᠪᠡᠷ ᠶᠠᠭᠠᠬᠢᠭᠠᠳ ᠲᠡᠢᠮᠦ ᠨᠠᠢᠷᠠᠮᠵᠢᠲᠠᠢ ᠪᠣᠯᠳᠠᠭ ᠦᠭᠡᠢ ᠶᠦᠮ ᠪᠣᠢ? ᠰᠣᠶᠣᠯ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ ᠶ᠋ᠢᠨ ᠬᠢ᠂ ᠣᠨᠣᠪᠴᠢᠲᠠᠢ ᠬᠡᠯᠡᠪᠡᠯ᠂ ᠥᠪᠡᠷ ᠦ᠋ᠨ ᠰᠣᠶᠣᠯ ᠢ᠋ᠶ᠋ᠠᠨ ᠰᠡᠳᠬᠢᠵᠦ ᠢᠯᠡᠳᠬᠡᠵᠦ ᠴᠢᠳᠠᠬᠤ ᠦᠭᠡᠢ ᠶ᠋ᠢᠨ ᠬᠢ᠃ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠭᠤᠸᠠ ᠰᠠᠢᠬᠠᠨ ᠤ᠋ ᠦᠨᠡᠯᠡᠮᠵᠢ᠂ ᠶᠠᠭᠤᠮᠠ ᠦᠵᠡᠭᠳᠡᠯ ᠢ᠋ ᠣᠢᠯᠠᠭᠠᠬᠤ ᠬᠠᠷᠠᠭᠠᠰᠤ ᠵᠣᠭᠰᠣᠴᠠ᠂ ᠠᠰᠠᠭᠤᠳᠠᠯ ᠢ᠋ ᠪᠣᠳᠣᠯᠬᠢᠯᠠᠬᠤ ᠰᠡᠳᠬᠢᠴᠡ᠂ ᠶᠢᠷᠲᠢᠨᠴᠦ ᠶ᠋ᠢᠨ ᠲᠤᠬᠠᠢ ᠲᠠᠨᠢᠯᠲᠠ ᠵᠢᠴᠢ ᠠᠶᠠᠭ ᠠᠭᠠᠯᠢ᠂ ᠵᠠᠩ ᠦᠢᠯᠡ᠂ ᠥᠷᠲᠡᠭ ᠦ᠋ᠨ ᠦᠵᠡᠯᠲᠡ ᠬᠤᠪᠢ ᠶ᠋ᠢᠨ ᠣᠨᠴᠠᠯᠢᠭ ᠲᠠᠢ ᠪᠠᠢᠳᠠᠭ ᠰᠢᠦ ᠳᠡ᠃ ᠰᠠᠯᠬᠢᠨ ᠢ᠋ ᠳᠦᠷᠰᠦᠯᠡᠬᠦ ᠳ᠋ᠦ᠍《ᠬᠡᠳᠦᠨ ᠳᠡᠰ ᠦ᠋ᠨ ᠰᠠᠯᠬᠢᠨ᠂ ᠠᠶᠤᠮᠠᠷ ᠬᠦᠴᠦᠲᠡᠢ ᠰᠠᠯᠬᠢᠨ》ᠭᠡᠪᠡᠯ ᠣᠷᠴᠢᠭᠤᠯᠭᠠ ᠶ᠋ᠢᠨ ᠪᠤᠶᠤ ᠦᠬᠦᠮᠡᠯ ᠬᠡᠯᠡᠯᠭᠡ᠃《ᠰᠠᠭᠠᠳᠠᠭ ᠰᠡᠵᠢᠯᠡᠮᠡ ᠰᠠᠯᠬᠢᠨ᠂ ᠳᠡᠭᠡᠪᠦᠷ ᠳᠡᠪᠢᠬᠦ ᠰᠠᠯᠬᠢᠨ》ᠭᠡᠪᠡᠯ ᠠᠮᠢᠳᠤ ᠬᠡᠯᠡᠯᠭᠡ᠃ ᠰᠠᠭᠠᠳᠠᠭ ᠭᠡᠵᠦ ᠶᠠᠭᠤ᠂ ᠰᠠᠭᠠᠳᠠᠭ ᠰᠠᠵᠢᠯᠠᠮᠠ ᠰᠠᠯᠬᠢᠨ ᠨᠢ ᠬᠢᠷᠢ ᠵᠡᠷᠭᠡ ᠰᠠᠯᠬᠢᠨ ᠭᠡᠬᠦᠴᠢᠯᠡᠨ ᠪᠣᠳᠣᠬᠤ ᠳ᠋ᠤ᠌ ᠡᠨᠡ ᠦᠭᠡᠨ ᠳ᠋ᠦ᠍ ᠶᠠᠮᠠᠷ ᠶᠡᠬᠡ ᠠᠭᠤᠯᠤᠮᠵᠢ ᠲᠠᠢ ᠪᠠᠢᠭᠠ ᠨᠢ ᠲᠣᠳᠣᠷᠬᠠᠢ᠃《ᠣᠯᠣᠢᠷᠲᠤ ᠴᠡᠩᠬᠡᠷ ᠲᠩᠷᠢ》ᠭᠡᠬᠦ ᠪᠡᠷ ᠣᠯᠣᠢᠷ ᠭᠡᠵᠦ ᠮᠣᠷᠢᠨ ᠤ᠋ ᠭᠡᠳᠡᠰᠦᠨ ᠳ᠋ᠦ᠍ ᠵᠢᠷᠤᠭᠠᠰᠣᠯᠠᠨ ᠤᠷᠭᠤᠭᠰᠠᠨ ᠴᠠᠭᠠᠨ ᠦᠰᠦ᠂ ᠶᠠᠭᠠᠬᠢᠪᠠᠯ ᠮᠣᠷᠢᠨ ᠳ᠋ᠤ᠌ ᠣᠯᠣᠢᠷ ᠰᠠᠭᠤᠳᠠᠭ᠃ ᠲᠡᠷᠡ ᠨᠢ ᠲᠩᠷᠢ ᠶ᠋ᠢᠨ ᠣᠶᠣᠳᠠᠯ ᠳᠠᠢ ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠬᠣᠯᠪᠣᠵᠤ ᠰᠡᠳᠬᠢᠬᠦ ᠪᠣᠯᠤᠮᠵᠢ ᠲᠠᠢ ᠪᠣᠢ? ᠭᠡᠬᠦᠴᠢᠯᠡᠨ ᠰᠣᠶᠣᠯ ᠤ᠋ᠨ ᠮᠠᠰᠢ ᠭᠦᠨ ᠨᠠᠷᠢᠨ ᠠᠭᠤᠯᠬᠤᠨ ᠲᠠᠢ ᠪᠠᠢᠭᠠ ᠶᠤᠮ᠃ ᠠᠮᠢᠳᠤᠷᠠᠯ ᠳ᠋ᠤ᠌ ᠭᠢᠷᠠᠬᠠᠢ ᠰᠢᠨᠵᠢᠭᠡᠴᠢ ᠪᠠᠢᠬᠤ᠂ ᠰᠣᠶᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠡᠳᠬᠢᠵᠦ ᠴᠢᠳᠠᠵᠤ ᠪᠠᠢᠬᠤ ᠨᠢ ᠭᠠᠭᠴᠠ ᠦᠭᠡ᠂ ᠭᠠᠭᠴᠠ ᠳᠦᠷᠰᠦᠯᠡᠯ ᠡᠴᠡ ᠢᠯᠭᠤᠮ ᠬᠠᠷᠠᠭᠳᠠᠨᠠ᠃ ᠢᠩᠭᠢᠬᠦ ᠪᠡᠷ ᠬᠡᠯᠡ ᠰᠤᠷᠤᠨᠠ ᠭᠡᠳᠡᠭ ᠣᠨᠣᠪᠴᠢᠲᠠᠢ ᠮᠣᠩᠭᠣᠯᠵᠢᠭᠤ ᠬᠡᠯᠡᠯᠭᠡ ᠶ᠋ᠢ ᠬᠠᠷᠠ ᠠᠯᠪᠠ ᠪᠠᠷ ᠨᠤᠬᠤᠵᠤ᠂ ᠵᠢᠭᠢᠷᠢᠭᠯᠡᠵᠦ ᠬᠡᠯᠬᠢᠬᠦ ᠶ᠋ᠢ ᠬᠡᠯᠡᠬᠦ ᠪᠢᠰᠢ᠂ ᠬᠠᠷᠢᠨ ᠤᠷᠢᠳ ᠢ᠋ᠶ᠋ᠠᠷ ᠰᠣᠶᠣᠯ ᠢ᠋ᠶ᠋ᠠᠨ ᠣᠢᠯᠠᠭᠠᠵᠤ᠂ ᠠᠷᠠᠳ ᠣᠯᠠᠨ ᠤ᠋ ᠪᠠᠨ ᠰᠡᠳᠬᠢᠬᠦᠢ ᠶ᠋ᠢᠨ ᠴᠠᠷᠠ ᠬᠠᠷᠠᠭᠠᠰᠤ ᠶ᠋ᠢ ᠤᠬᠠᠬᠤ᠂ ᠮᠥᠨ ᠡᠨᠡᠴᠢᠯᠡᠨ ᠰᠡᠳᠬᠢᠵᠦ ᠢᠯᠡᠳᠬᠡᠵᠦ ᠴᠢᠳᠠᠬᠤ ᠶ᠋ᠢ ᠬᠡᠯᠡᠨᠡ᠃ ᠶᠠᠮᠠᠷ ᠨᠢᠭᠡᠨ ᠤᠳᠬᠠ ᠠ᠋ᠴᠠ ᠬᠡᠯᠡᠬᠦ ᠳ᠋ᠦ᠍᠂ ᠬᠡᠯᠡ ᠪᠡᠨ ᠮᠡᠳᠡᠨᠡ ᠭᠡᠳᠡᠭ ᠰᠣᠶᠣᠯ ᠢ᠋ᠶ᠋ᠠᠨ ᠮᠡᠳᠡᠨᠡ ᠭᠡᠰᠡᠨ ᠦᠭᠡ᠃ ᠲᠡᠭᠡᠬᠦ ᠪᠡᠷ ᠰᠣᠶᠣᠯ ᠢ᠋ᠶ᠋ᠠᠨ ᠮᠡᠳᠡᠨᠡ ᠭᠡᠳᠡᠭ ᠲᠡᠷᠡ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠴᠢᠯᠥᠭᠡᠲᠡᠢ ᠰᠡᠳᠬᠢᠵᠦ᠂ ᠣᠨᠣᠪᠴᠢᠲᠠᠢ ᠢᠯᠡᠳᠬᠡᠬᠦ ᠪᠦᠬᠦ ᠪᠣᠯᠤᠮᠵᠢ ᠪᠦᠷᠢᠳᠦᠯᠡ ᠭᠡᠰᠡᠨ ᠦᠭᠡ ᠶᠦᠮ᠃
ᠭᠡᠬᠦ ᠳ᠋ᠡᠭᠡᠨ ᠮᠠᠨ ᠤ ᠬᠢᠨ ᠳ᠋ᠤ᠌ ᠮᠣᠩᠭᠣᠯ ᠢ᠋ᠶ᠋ᠠᠷ ᠰᠡᠳᠬᠢᠵᠦ ᠪᠢᠴᠢᠳᠡᠭ ᠰᠢᠯᠦᠭᠴᠢ ᠶᠠᠭ ᠦᠭᠡᠢ ᠪᠢᠰᠢ᠃ ᠭᠠᠭᠴᠠ ᠵᠢᠱ᠌ᠢᠶᠡ ᠳᠤᠷᠠᠳᠬᠤ ᠳ᠋ᠤ᠌ ᠷᠠ᠊· ᠰᠡᠴᠡᠨᠴᠣᠭᠲᠤ᠃ ᠲᠡᠭᠦᠨ ᠦ᠌ ᠰᠢᠯᠦᠭ ᠦ᠋ᠨ ᠴᠢᠨᠰᠠᠭᠠ᠂ ᠳᠣᠲᠣᠷᠠ ᠲᠠᠮᠢᠷ᠂ ᠠᠷᠭᠠ ᠪᠠᠷᠢᠯ ᠶᠠᠮᠠᠷ ᠢ᠋ ᠬᠡᠯᠡᠯᠴᠡᠬᠦ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠲᠤᠰ ᠬᠥᠮᠦᠨ ᠦ᠌ ᠰᠡᠳᠬᠢᠮᠵᠢ᠂ ᠬᠣᠯᠪᠣᠨ ᠪᠣᠳᠣᠯᠲᠠ᠂ ᠨᠠᠷᠢᠨ ᠮᠡᠳᠡᠷᠡᠮᠵᠢ ᠨᠢ ᠠᠷᠭᠠ ᠦᠭᠡᠢ ᠯᠡ ᠮᠣᠩᠭᠣᠯ ᠠᠮᠢᠰᠬᠤᠭᠠ ᠲᠠᠢ ᠪᠠᠢᠳᠠᠭ᠃《ᠢᠰᠡᠭᠡᠢ ᠪᠠᠢᠭᠰᠠᠨ》 ᠰᠢᠯᠦᠭ ᠨᠢ ᠲᠡᠭᠦᠨ ᠦ᠌ ᠰᠡᠭᠦᠯ ᠦ᠋ᠨ ᠦᠶᠡ ᠶ᠋ᠢᠨ ᠪᠦᠲᠦᠭᠡᠯ ᠦ᠋ᠨ ᠨᠢᠭᠡᠨ᠃ ᠵᠣᠬᠢᠶᠠᠯ ᠪᠠᠷᠢᠮᠵᠢᠶᠠᠯᠠᠳᠠᠭ ᠮᠠᠨ ᠤ᠋ ᠬᠢᠨ ᠦ᠌《ᠲᠣᠭᠣᠰᠬᠠᠨ ᠬᠡᠪ》 ᠲᠦ᠍ ᠡᠨᠡ ᠬᠤᠷᠤᠳ ᠢ᠋ ᠴᠣᠬᠢᠵᠤ ᠠᠷᠭᠠ ᠪᠠᠷᠢᠯ᠂ ᠴᠢᠨᠠᠷ ᠴᠢᠨᠰᠠᠭᠠ ᠶ᠋ᠢ ᠨᠢ ᠦᠨᠡᠯᠡᠪᠡᠯ ᠣᠨᠴᠠ ᠰᠠᠢᠨ ᠪᠢᠰᠢ ᠪᠠᠢᠵᠤ ᠮᠡᠳᠡᠨᠡ᠃ ᠭᠡᠬᠦ ᠳ᠋ᠡᠭᠡᠨ ᠲᠩᠷᠢ ᠭᠠᠵᠠᠷ ᠬᠣᠶᠠᠷ ᠢ᠋ᠶ᠋ᠠᠨ᠂ ᠠᠭᠤᠯᠠ ᠲᠠᠯᠠ ᠪᠠᠨ᠂ ᠨᠤᠲᠤᠭ ᠤ᠋ᠨ ᠴᠢᠯᠠᠭᠤ ᠪᠠᠨ ᠢᠰᠡᠭᠡᠢ ᠲᠡᠢ ᠬᠣᠯᠪᠣᠵᠤ᠂ ᠰᠡᠳᠬᠢᠬᠦ ᠰᠡᠳᠬᠢᠮᠵᠢ ᠲᠠᠷᠢᠶᠠᠯᠠᠩ ᠤ᠋ᠨ ᠪᠤᠶᠤ ᠬᠣᠲᠠ ᠶ᠋ᠢᠨ ᠰᠣᠶᠣᠯ ᠳ᠋ᠤ᠌ ᠬᠥᠮᠦᠵᠢᠭᠰᠡᠨ ᠬᠥᠮᠦᠨ ᠦ᠌ ᠣᠢ ᠲᠣᠢᠨ ᠠ᠋ᠴᠠ ᠬᠡᠵᠢᠶᠡ ᠴᠦ᠍ ᠤᠷᠭᠤᠬᠤ ᠦᠭᠡᠢ ᠵᠦᠢᠯ ᠶᠦᠮ᠃ ᠢᠰᠡᠭᠡᠢ ᠭᠡᠭᠴᠢ ᠶᠠᠭᠤ᠂ ᠢᠰᠡᠭᠡᠢ ᠶ᠋ᠢ ᠶᠠᠭᠠᠬᠢᠵᠤ ᠬᠢᠳᠡᠭ᠂ ᠶᠠᠮᠠᠷ ᠬᠡᠷᠡᠭᠴᠡᠭᠡ ᠲᠡᠢ᠂ ᠮᠣᠩᠭᠣᠯᠴᠤᠳ ᠢᠰᠡᠭᠡᠢ ᠶ᠋ᠢ ᠶᠠᠭᠠᠬᠢᠵᠤ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠵᠡᠷᠭᠡ ᠶ᠋ᠢ ᠮᠡᠳᠡᠳᠡᠭ ᠯᠡ ᠬᠥᠮᠦᠨ ᠰᠠᠶᠢ ᠢᠩᠭᠢᠵᠦ ᠰᠡᠳᠬᠢᠨᠡ᠂ ᠬᠣᠯᠪᠣᠨ ᠪᠣᠳᠣᠬᠤ ᠪᠣᠯᠤᠮᠵᠢ ᠲᠠᠢ ᠪᠣᠯᠤᠨᠠ᠃ ᠬᠠᠷᠢᠨ ᠵᠠᠷᠢᠮ ᠬᠥᠮᠦᠰ ᠦ᠋ᠨ ᠬᠡᠯᠡᠳᠡᠭ ᠢ᠋ᠶ᠋ᠡᠷ《ᠢᠰᠡᠭᠡᠢ ᠪᠠᠢᠭᠰᠠᠨ ᠭᠡᠵᠦ ᠪᠢᠴᠢᠬᠦ ᠶᠦᠮ ᠪᠣᠯ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠬᠣᠯᠪᠣᠨ ᠪᠢᠴᠢᠵᠦ ᠪᠣᠯᠬᠤ ᠯᠠ ᠳᠠ》ᠭᠡᠰᠡᠨ ᠰᠢᠭ ᠪᠢᠰᠢ ᠶᠦᠮ᠃ ᠠᠷᠭᠠ ᠪᠠᠷᠢᠯ ᠢ᠋ᠶ᠋ᠠᠷ ᠰᠡᠳᠬᠢᠮᠵᠢᠯᠡᠬᠦ ᠪᠣᠯᠤᠨ ᠰᠣᠶᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠡᠳᠬᠢᠬᠦ ᠠᠳᠠᠯᠢ ᠦᠭᠡᠢ ᠶᠦᠮ᠃ ᠮᠣᠩᠭᠣᠯᠴᠤᠳ ᠢᠰᠡᠭᠡᠢ ᠭᠡᠷ ᠲᠦ᠍ ᠰᠠᠭᠤᠳᠠᠭ ᠪᠠᠢᠭᠰᠠᠨ ᠪᠣᠯᠬᠣᠷ ᠳᠡᠭᠡᠪᠦᠷᠯᠡᠵᠦ ᠬᠥᠮᠥᠷᠢᠭᠰᠡᠨ ᠲᠩᠷᠢ ᠪᠡᠨ᠂ ᠳᠡᠭᠡᠷᠡ ᠪᠡᠨ ᠡᠷᠭᠦᠭᠰᠡᠨ ᠳᠡᠯᠡᠬᠡᠢ ᠪᠡᠨ ᠭᠡᠷ ᠦ᠋ᠨ ᠳᠡᠭᠡᠪᠦᠷ ᠂ ᠬᠣᠮ ᠰᠢᠷᠢᠳᠡᠭ ᠲᠡᠢ ᠬᠣᠯᠪᠣᠨ ᠰᠡᠳᠬᠢᠬᠦ ᠪᠣᠯᠤᠮᠵᠢ ᠲᠦᠳᠡ ᠪᠠᠢᠭᠠ ᠪᠥᠭᠡᠳ ᠡᠨᠡ ᠨᠢ ᠲᠡᠳᠡᠨ ᠦ᠌ ᠰᠡᠳᠬᠢᠯ ᠳ᠋ᠡᠬᠢ ᠬᠠᠮᠤᠭ ᠤ᠋ᠨ ᠣᠢᠷᠠᠬᠠᠨ ᠬᠣᠯᠪᠣᠨ ᠪᠣᠳᠣᠯᠲᠠ ᠪᠠᠢᠬᠤ ᠶᠣᠰᠣᠲᠠᠢ᠃ ᠰᠢᠪᠡᠷ ᠪᠠᠢᠰᠢᠩ᠂ ᠲᠣᠭᠣᠰᠬᠠᠨ ᠪᠠᠢᠰᠢᠩ ᠳ᠋ᠤ᠌ ᠳᠡᠭᠡᠪᠦᠷ ᠳᠡᠯᠡᠳᠬᠦ ᠪᠣᠷᠣᠭᠠᠨ ᠤ᠋ ᠴᠢᠮᠡᠭᠡ ᠶ᠋ᠢ ᠣᠯᠵᠤ ᠰᠣᠨᠣᠰᠬᠤ ᠦᠭᠡᠢ᠂ ᠮᠣᠩᠭᠣᠯ ᠭᠡᠷ ᠲᠦ᠍ ᠪᠣᠯ ᠰᠣᠨᠣᠰᠳᠠᠨᠠ᠃ ᠭᠠᠵᠠᠷ ᠬᠥᠳᠡᠯᠬᠦ ᠳ᠋ᠦ᠍ ᠢᠰᠡᠭᠡᠢ ᠭᠡᠷ ᠠᠵᠢᠷᠠᠳᠠᠭ ᠦᠭᠡᠢ ᠠᠲᠠᠯᠠ ᠠᠰᠠᠷ ᠪᠠᠷᠢᠯᠭᠠ ᠨᠤᠷᠠᠵᠤ ᠪᠣᠯᠤᠨᠠ᠃ ᠲᠣᠭᠣᠭᠠᠨ ᠤ᠋ ᠪᠠᠷᠢᠭᠤᠯ ᠮᠡᠲᠦᠰ ᠨᠢ ᠡᠩ ᠦ᠋ᠨ ᠪᠣᠷᠣ ᠠᠮᠢᠳᠤᠷᠠᠯ ᠠ᠋ᠴᠠ ᠢᠷᠡᠭᠰᠡᠨ ᠵᠦᠢᠯ ᠪᠠᠢᠵᠤ᠂ ᠰᠢᠯᠦᠭ ᠦ᠋ᠨ ᠠᠮᠢᠰᠬᠤᠭᠠ ᠶ᠋ᠢ ᠥᠳᠬᠡᠷᠡᠭᠦᠯᠵᠦ ᠥᠭᠭᠦᠭᠰᠡᠨ ᠶᠦᠮ᠃ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠪᠢᠳᠡ ᠥᠷᠥᠭᠡᠯ ᠦ᠋ᠨ ᠨᠢᠳᠦ ᠪᠡᠷ ᠰᠣᠨᠵᠢᠳᠠᠭ ᠭᠡᠮ ᠲᠡᠢ ᠪᠣᠯᠵᠠᠢ᠃ ᠡᠢᠨ ᠬᠦ᠌ ᠮᠣᠩᠭᠣᠯ ᠰᠢᠯᠦᠭ ᠢ᠋ᠶ᠋ᠡᠨ ᠴᠦ᠍ ᠬᠠᠷᠢ ᠭᠠᠳᠠᠭᠠᠳᠤ ᠶ᠋ᠢᠨ ᠣᠨᠣᠯ ᠢ᠋ᠶ᠋ᠠᠷ ᠪᠠᠷᠢᠮᠵᠢᠶᠠᠯᠠᠵᠤ᠂ ᠠᠷᠭᠠ ᠪᠠᠷᠢᠯ ᠢ᠋ᠶ᠋ᠠᠨ ᠦᠨᠡᠯᠡᠵᠦ᠂ ᠪᠤᠰᠤᠳ ᠤ᠋ᠨ ᠰᠡᠳᠬᠢᠬᠦᠢ ᠪᠡᠷ ᠥᠪᠡᠷ ᠦ᠋ᠨ ᠶᠠᠭᠤᠮᠠ ᠪᠠᠨ ᠬᠠᠵᠠᠭᠠᠢ ᠬᠠᠷᠠᠳᠠᠭ ᠵᠢᠱ᠌ᠢᠶᠡ ᠮᠤᠩ ᠦᠭᠡᠢ᠃
ᠢᠩᠭᠢᠬᠦ ᠳ᠋ᠦ᠍ ᠥᠨᠥᠳᠥᠷ᠂ ᠮᠠᠯᠵᠢᠯ ᠰᠣᠶᠣᠯ ᠮᠠᠨᠢ᠂ ᠶᠠᠮᠠᠷ ᠨᠢᠭᠡᠨ ᠬᠡᠮᠵᠢᠶᠡ ᠪᠡᠷ ᠬᠢᠮᠤᠷᠠᠯ ᠳ᠋ᠤ᠌ ᠤᠴᠠᠷᠠᠵᠤ᠂ ᠰᠣᠶᠣᠯ ᠰᠡᠳᠬᠢᠬᠦᠢ ᠮᠠᠨᠢ ᠤᠰᠤ ᠬᠣᠯᠢᠭᠰᠠᠨ ᠰᠦ ᠰᠢᠭ ᠰᠢᠩᠭᠡᠷᠡᠨ ᠴᠡᠯᠮᠡᠭᠳᠡᠵᠤ ᠪᠠᠢᠭᠠ ᠪᠣᠯᠬᠣᠷ ᠮᠣᠩᠭᠣᠯ ᠰᠡᠳᠬᠢᠮᠵᠢ ᠨᠢ ᠴᠦ᠍ ᠶᠠᠭᠠᠬᠢᠮᠤᠢ! ᠶᠠᠭᠠᠬᠢᠵᠤ ᠰᠡᠳᠬᠢᠪᠡᠯ ᠲᠡᠭᠡᠵᠦ ᠪᠢᠴᠢᠳᠡᠭ ᠬᠡᠷᠡᠭ ᠭᠡᠵᠦ ᠣᠯᠠᠨ ᠬᠥᠮᠦᠨ ᠰᠠᠨᠠᠳᠠᠭ ᠨᠢ ᠲᠣᠮᠣ ᠡᠨᠳᠡᠭᠦᠷᠡᠯ ᠪᠠᠢᠭᠠ ᠶᠤᠮ᠃ ᠬᠣᠲᠠ ᠶ᠋ᠢᠨ ᠢᠪᠴᠤᠤ ᠪᠣᠬᠢᠷ ᠣᠷᠴᠢᠨ ᠳ᠋ᠤ᠌ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠳᠡᠭᠡᠰᠢᠭᠰᠡᠨ ᠠᠮᠢ ᠪᠠᠨ ᠪᠣᠷᠳᠣᠵᠤ ᠳᠣᠪᠣ ᠪᠠᠨ ᠰᠢᠷᠠᠯᠠᠭᠤᠯᠬᠤ ᠤᠬᠠᠮᠰᠠᠷ ᠲᠤ ᠪᠣᠭᠣᠭᠳᠠᠭᠰᠠᠨ ᠡᠷᠡᠮᠳᠡᠭ ᠰᠡᠳᠬᠢᠬᠦᠢ ᠪᠡᠷ ᠴᠢᠳᠠᠨ ᠶᠠᠳᠠᠨ ᠰᠡᠳᠬᠢᠮᠵᠢᠯᠡᠵᠦ᠂ ᠪᠤᠰᠤᠳ ᠤ᠋ᠨ ᠣᠨᠣᠯ ᠠᠷᠭᠠ ᠪᠠᠷᠢᠯ ᠢ᠋ ᠶᠠᠮᠠᠷ ᠴᠤ ᠲᠤᠩᠭᠠᠯᠲᠠ ᠦᠭᠡᠢ ᠪᠡᠷ ᠨᠡᠭᠦᠯᠭᠡᠨ ᠵᠠᠷᠤᠭᠰᠠᠨ ᠰᠢᠯᠦᠭ ᠢ᠋ ᠮᠠᠨᠢ ᠬᠡᠨ ᠦᠵᠡᠭᠰᠡᠨ ᠴᠦ᠍ ᠣᠷᠴᠢᠭᠤᠯᠭᠠ ᠶ᠋ᠢᠨ ᠪᠦᠲᠦᠭᠡᠯ ᠭᠡᠵᠦ ᠬᠡᠯᠡᠨᠡ ᠳᠡ! ᠪᠣᠯᠬᠢ ᠣᠷᠴᠢᠭᠤᠯᠭᠠ ᠴᠤ ᠭᠡᠵᠦ ᠣᠢᠯᠠᠭᠠᠵᠤ ᠮᠡᠳᠡᠨᠡ᠃ ᠡᠢᠮᠦᠷᠬᠦᠦ ᠰᠢᠯᠦᠭ ᠪᠤᠰᠤᠳ ᠬᠡᠯᠡᠨᠡ ᠬᠥᠷᠪᠡᠭᠦᠯᠬᠦ ᠳ᠋ᠦ᠍ ᠯᠡ ᠲᠦᠳᠡ ᠪᠠᠢᠬᠤ ᠠ᠋ᠴᠠ ᠪᠢᠰᠢ᠂ ᠮᠣᠩᠭᠣᠯ ᠤᠩᠰᠢᠭᠴᠢᠳ ᠮᠠᠨᠢ ᠤᠩᠰᠢᠪᠠᠯ ᠲᠥᠬᠥᠭᠡᠷᠡᠬᠦ ᠦᠭᠡᠢ ᠲᠥᠭᠡᠷᠢᠭᠳᠡᠬᠦ ᠦᠵᠡᠭᠳᠡᠯ ᠭᠠᠷᠬᠤ ᠯᠠ᠃ ᠮᠣᠩᠭᠣᠯ ᠰᠡᠳᠬᠢᠬᠦᠢ ᠶ᠋ᠢᠨ ᠨᠠᠷᠢᠨ ᠮᠡᠳᠡᠷᠡᠮᠵᠢ ᠲᠡᠢ ᠬᠡᠯᠡ ᠬᠡᠯᠡᠯᠭᠡ᠂ ᠳᠦᠷᠰᠦᠯᠡᠯ ᠵᠦᠢᠷᠯᠡᠯ ᠵᠢᠴᠢ ᠮᠣᠩᠭᠣᠯ ᠵᠠᠩ ᠦᠢᠯᠡ᠂ ᠠᠶᠠᠭ ᠠᠭᠠᠯᠢ ᠲᠠᠢ ᠬᠣᠯᠪᠣᠭᠳᠠᠭᠰᠠᠨ ᠮᠠᠰᠢ ᠭᠦᠨᠴᠡ ᠲᠡᠢ ᠬᠡᠮᠵᠢᠶᠡᠨ ᠳ᠋ᠦ᠍ ᠪᠢᠴᠢᠭᠳᠡᠭᠰᠡᠨ ᠰᠢᠯᠦᠭ ᠢ᠋ ᠣᠷᠴᠢᠭᠤᠯᠤᠨᠠ ᠭᠡᠬᠦ ᠳ᠋ᠦ᠍ ᠲᠡᠪᠡᠳᠡᠬᠦ ᠪᠠᠢᠬᠠ᠃ ᠰᠢᠯᠦᠭ ᠲᠦ᠍ ᠨᠢᠭᠡ ᠦᠨᠳᠦᠰᠦᠲᠡᠨ ᠦ᠌ ᠰᠡᠳᠬᠢᠬᠦᠢ ᠶ᠋ᠢᠨ ᠬᠡᠯᠪᠡᠷᠢ᠂ ᠶᠢᠷᠲᠢᠨᠴᠦ ᠶ᠋ᠢᠨ ᠲᠠᠨᠢᠯᠲᠠ᠂ ᠭᠤᠸᠠ ᠰᠠᠢᠬᠠᠨ ᠤ᠋ ᠣᠢᠯᠠᠭᠠᠯᠲᠠ᠂ ᠲᠡᠦᠬᠡ ᠰᠣᠶᠣᠯ ᠤ᠋ᠨ ᠬᠢᠨᠢ ᠢᠮ ᠲᠠᠮᠠᠭᠠ ᠮᠠᠰᠢ ᠥᠳᠬᠡᠨ ᠪᠠᠢᠳᠠᠭ ᠢ᠋ᠶ᠋ᠠᠷ ᠣᠷᠴᠢᠭᠤᠯᠪᠠᠰᠤ ᠠᠯᠢ ᠪᠠᠢᠭᠰᠠᠨ ᠠᠮᠲᠠ ᠰᠢᠮᠲᠡ ᠨᠢ ᠪᠠᠭᠤᠷᠠᠳᠠᠭ᠃ ᠰᠢᠯᠦᠭ ᠨᠢ ᠥᠪᠡᠷ ᠦ᠋ᠨ ᠬᠡᠯᠡ ᠳᠡᠭᠡᠷᠡ ᠪᠡᠨ ᠪᠠᠢᠬᠤ ᠯᠠ ᠬᠠᠮᠤᠭ ᠤ᠋ᠨ ᠢᠷᠠᠭᠤ ᠲᠠᠩᠰᠤᠭ ᠭᠡᠭᠳᠡᠳᠡᠭ ᠦᠨ ᠤᠴᠢᠷ ᠴᠤ ᠡᠨᠳᠡ ᠪᠠᠢᠭᠠ ᠰᠠᠨ᠃ ᠳᠠᠩ ᠭᠠᠭᠴᠠ ᠥᠪᠡᠷ ᠦ᠋ᠨ ᠪᠦᠲᠦᠭᠡᠯ ᠢ᠋ᠶ᠋ᠡᠨ ᠨᠡᠩ ᠣᠯᠠᠨ ᠬᠥᠮᠦᠨ ᠳ᠋ᠦ᠍ ᠤᠩᠰᠢᠭᠤᠯᠵᠤ᠂ ᠨᠡᠷᠡ ᠭᠠᠷᠬᠤ ᠭᠡᠰᠡᠨ ᠵᠣᠷᠢᠭᠤᠯᠤᠯᠲᠠ ᠪᠠᠷ ᠵᠣᠬᠢᠶᠠᠨ ᠪᠢᠴᠢᠬᠦ ᠪᠣᠯᠤᠨ ᠥᠪᠡᠷ ᠦ᠋ᠨ ᠰᠣᠶᠣᠯ ᠢᠷᠭᠡᠨᠰᠢᠯ ᠦ᠋ᠨ ᠢ᠋ᠶ᠋ᠡᠨ ᠬᠥᠭᠵᠢᠯ ᠦ᠋ᠨ ᠠᠰᠠᠭᠤᠳᠠᠯ ᠳ᠋ᠤ᠌ ᠬᠠᠷᠢᠭᠤᠴᠠᠬᠤ ᠤᠬᠠᠮᠰᠠᠷ ᠠ᠋ᠴᠠ ᠵᠣᠬᠢᠶᠠᠨ ᠪᠢᠴᠢᠬᠦ ᠶ᠋ᠢᠨ ᠦᠷᠡ ᠳ᠋ᠦᠩ ᠣᠨᠳᠣᠣ ᠶᠤᠮ᠃ ᠨᠢᠭᠡ ᠬᠥᠮᠦᠨ ᠦ᠌ ᠨᠡᠷᠡ ᠭᠠᠷᠬᠤ᠂ ᠨᠢᠭᠡ ᠤᠷᠠᠨ ᠪᠦᠲᠦᠭᠡᠯ ᠱᠠᠩᠨᠠᠯ ᠬᠦᠷᠲᠡᠬᠦ ᠨᠢ ᠮᠣᠩᠭᠣᠯ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠬᠥᠭᠵᠢᠯ ᠢ᠋ ᠢᠯᠡᠷᠬᠡᠢᠯᠡᠬᠦ ᠪᠢᠰᠢ᠂ ᠬᠠᠷᠢᠨ ᠪᠢᠴᠢᠭᠰᠡᠨ ᠰᠢᠯᠦᠭ ᠲᠡᠭᠡᠨ ᠶᠠᠭᠤ ᠬᠡᠯᠡᠪᠡ? ᠰᠣᠶᠣᠯ ᠤ᠋ᠨ ᠠᠭᠤᠯᠬᠤᠨ ᠨᠢ ᠶᠠᠭᠤ ᠪᠠᠢᠨᠠ? ᠵᠢᠩᠬᠢᠨᠢ ᠮᠣᠩᠭᠣᠯ ᠤᠷᠠᠨ ᠵᠣᠬᠢᠶᠠᠯ ᠳ᠋ᠤ᠌ ᠶᠠᠮᠠᠷ ᠰᠢᠨᠡ ᠵᠦᠢᠯ ᠨᠡᠮᠡᠷᠢᠯᠡᠪᠡ? ᠭᠡᠳᠡᠭ ᠨᠢ ᠰᠠᠶᠢ ᠡᠨᠡ ᠤᠷᠠᠨ ᠪᠦᠲᠦᠭᠡᠯᠴᠢ ᠶ᠋ᠢᠨ ᠬᠢᠭᠰᠡᠨ ᠪᠦᠲᠦᠭᠡᠭᠰᠡᠨ ᠵᠢᠳᠬᠦᠯ ᠪᠠᠢᠮᠠᠷ᠃ ᠨᠢᠭᠡ ᠦᠨᠳᠦᠰᠦᠲᠡᠨ ᠦ᠌ ᠰᠡᠭᠡᠭᠡᠲᠡᠳ ᠥᠪᠡᠷ ᠦ᠋ᠨ ᠰᠣᠶᠣᠯ ᠰᠡᠳᠬᠢᠬᠦᠢ ᠲᠡᠢ ᠪᠡᠨ ᠪᠠᠢᠨᠠ ᠭᠡᠳᠡᠭ ᠡᠨᠡ ᠦᠨᠳᠦᠰᠦᠲᠡᠨ ᠦ᠌ ᠢᠷᠡᠭᠡᠳᠦᠢ ᠠᠭᠤᠵᠠᠮ ᠰᠠᠷᠠᠭᠤᠯ ᠭᠡᠰᠡᠨ ᠢ᠋ ᠬᠠᠷᠠᠭᠤᠯᠤᠨᠠ᠃ ᠮᠠᠨ ᠤ᠋ ᠰᠢᠯᠦᠭ ᠤᠩᠰᠢᠭᠴᠢ ᠦᠭᠡᠢ ᠪᠣᠯᠤᠭᠰᠠᠨ ᠨᠢ ᠪᠢᠳᠡ ᠪᠤᠰᠤᠳ ᠤ᠋ᠨ ᠣᠨᠣᠯ ᠢ᠋ ᠰᠤᠷᠤᠯᠴᠠᠭᠰᠠᠨ ᠦᠭᠡᠢ᠂ ᠠᠷᠭᠠ ᠪᠠᠷᠢᠯ ᠬᠠᠭᠤᠴᠢᠨ ᠳ᠋ᠤ᠌ ᠪᠠᠢᠭᠠ ᠪᠢᠰᠢ᠃ ᠬᠠᠷᠢᠨ ᠪᠢᠳᠡ ᠤᠩᠰᠢᠭᠴᠢᠳ ᠤ᠋ᠨ ᠢ᠋ᠶ᠋ᠠᠨ ᠰᠣᠶᠣᠯ ᠰᠡᠳᠬᠢᠬᠦᠢ ᠡᠴᠡ ᠬᠣᠯᠠ ᠵᠠᠢᠲᠠᠢ ᠪᠠᠢᠭᠠ ᠠ᠋ᠴᠠ ᠪᠣᠯᠤᠭᠰᠠᠨ ᠶᠤᠮ᠃
ᠲᠣᠮᠣ ᠰᠡᠳᠦᠪ ᠪᠢᠴᠢᠬᠦ ᠬᠡᠷᠡᠭᠲᠡᠢ ᠭᠡᠳᠡᠭ᠃ ᠨᠢᠭᠡ ᠲᠠᠢᠪᠤᠩ᠂ ᠲᠡᠢᠨ ᠳᠠᠵᠢᠨ᠂ ᠠᠮᠢ ᠠᠬᠤᠢ ᠨᠢ ᠪᠦᠷ ᠡᠭᠦᠨ ᠳ᠋ᠦ᠍ ᠪᠠᠭᠲᠠᠨᠠ᠃ ᠭᠡᠪᠡᠴᠦ ᠮᠠᠨ ᠤ᠋ ᠬᠤᠪᠢ ᠳ᠋ᠦ᠍ ᠲᠣᠮᠣ ᠰᠡᠳᠦᠪ ᠭᠡᠳᠡᠭ ᠨᠢ ᠰᠣᠶᠣᠯ ᠤ᠋ᠨ ᠬᠢᠮᠤᠷᠠᠯ᠃ ᠡᠭᠦᠨ ᠦ᠌ ᠲᠥᠯᠥᠭᠡ ᠰᠠᠨᠠᠭᠠᠰᠢᠷᠠᠵᠤ ᠶᠠᠭᠤᠮᠠ ᠪᠢᠴᠢᠨᠡ ᠭᠡᠳᠡᠭ ᠠᠭᠤᠤ ᠰᠡᠳᠦᠪ ᠰᠢᠦ ᠳᠡ! ᠬᠥᠭᠵᠢᠯ ᠭᠡᠵᠦ ᠥᠪᠡᠷ ᠦ᠋ᠨ ᠶᠠᠭᠤᠮᠠ ᠪᠠᠨ ᠮᠠᠷᠲᠠᠬᠤ ᠶ᠋ᠢ ᠬᠡᠯᠡᠳᠡᠭ ᠪᠢᠰᠢ᠂ ᠥᠭᠡᠳᠡᠯᠡᠬᠦ ᠶ᠋ᠢ ᠬᠡᠯᠡᠳᠡᠭ ᠶᠦᠮ᠃ ᠳᠡᠯᠡᠬᠡᠢ ᠶ᠋ᠢᠨ ᠬᠥᠭᠵᠢᠯ ᠲᠡᠢ ᠵᠤᠤᠵᠠᠢ ᠬᠣᠯᠪᠣᠨᠠ ᠭᠡᠭᠰᠡᠭᠡᠷ ᠪᠠᠢᠵᠤ ᠰᠣᠶᠣᠯ ᠤ᠋ᠨ ᠣᠨᠴᠠᠯᠢᠭ ᠢ᠋ᠶ᠋ᠠᠨ ᠠᠯᠲᠠᠨ ᠲᠠᠮᠢᠷᠳᠠᠭᠰᠠᠨ ᠦᠨᠳᠦᠰᠦᠲᠡᠨ ᠢ᠋ ᠶᠠᠮᠠᠷ ᠬᠥᠭᠵᠢᠯ ᠳ᠋ᠦ᠍ ᠲᠣᠭᠠᠴᠠᠬᠤ ᠪᠣᠢ? ᠤᠷᠠᠨ ᠵᠣᠬᠢᠶᠠᠯ ᠨᠢ ᠵᠠᠪᠠᠯ ᠥᠪᠡᠷ ᠦ᠋ᠨ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠢᠷᠭᠡᠨᠰᠢᠯ ᠦ᠋ᠨ ᠢᠯᠡ ᠲᠣᠳᠣᠷᠬᠠᠢ ᠣᠨᠴᠠᠯᠢᠭ ᠢ᠋ ᠬᠠᠳᠠᠭᠠᠯᠠᠵᠤ ᠴᠢᠳᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠯᠠ ᠳᠡᠯᠡᠬᠡᠢ ᠶ᠋ᠢᠨ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠨᠡᠯᠦᠭᠡᠷ ᠳᠠᠯᠠᠢ ᠳ᠋ᠤ᠌ ᠥᠩᠭᠡ ᠨᠡᠮᠡᠷᠢᠯᠡᠬᠦ ᠤᠴᠢᠷᠲᠠᠢ᠃ ᠠᠷᠭᠠᠯ ᠢ᠋ ᠲᠠᠷᠢᠶᠠᠯᠠᠩ ᠤ᠋ᠨ ᠪᠤᠶᠤ ᠬᠣᠲᠠ ᠶ᠋ᠢᠨ ᠬᠥᠮᠦᠰ ᠪᠠᠭᠠᠰᠤ ᠭᠡᠳᠡᠭ ᠪᠠᠢᠬᠤ ᠳ᠋ᠤ᠌ ᠮᠣᠩᠭᠣᠯᠴᠤᠳ ᠲᠡᠭᠡᠵᠦ ᠦᠵᠡᠳᠡᠭ ᠦᠭᠡᠢ᠃ ᠡᠨᠡ ᠪᠣᠯ ᠰᠣᠶᠣᠯ ᠣᠢᠯᠠᠭᠠᠯᠲᠠ ᠶ᠋ᠢᠨ ᠵᠥᠷᠢᠶᠡ ᠶᠦᠮ᠃ ᠮᠠᠨ ᠤ᠋ ᠢᠷᠠᠭᠤ ᠨᠠᠢᠷᠠᠭ ᠴᠤ ᠪᠤᠰᠤᠳ ᠠ᠋ᠴᠠ ᠡᠢᠮᠦ ᠯᠡ ᠢᠯᠭᠠᠭᠠ ᠲᠠᠢ ᠪᠠᠢᠬᠤ ᠴᠢᠬᠤᠯᠠ᠃
ᠪᠤᠰᠤᠳ ᠤ᠋ᠨ ᠳᠠᠪᠰᠢᠩᠭᠤᠢ ᠵᠦᠢᠯ ᠢ᠋ ᠣᠢᠯᠠᠭᠠᠭᠰᠠᠨ ᠰᠠᠭᠤᠷᠢᠨ ᠳᠡᠭᠡᠷᠡ ᠥᠪᠡᠷ ᠦ᠋ᠨ ᠰᠣᠶᠣᠯ ᠳ᠋ᠠᠭᠠᠨ ᠭᠦᠨ ᠤᠬᠠᠮᠵᠢ ᠲᠠᠢ ᠪᠣᠯᠤᠨ ᠪᠤᠴᠠᠵᠤ ᠢᠷᠡᠬᠦ ᠪᠢᠰᠢ᠂ ᠬᠠᠷᠢᠨ ᠥᠪᠡᠷ ᠦ᠋ᠨ ᠰᠣᠶᠣᠯ ᠳ᠋ᠠᠭᠠᠨ ᠭᠦᠨ ᠤᠬᠠᠮᠵᠢ ᠲᠠᠢ ᠪᠣᠯᠵᠤ ᠴᠢᠳᠠᠮᠠᠨᠵᠢᠨ ᠰᠠᠶᠢ ᠪᠤᠰᠤᠳ ᠤ᠋ᠨ ᠶᠠᠭᠤᠮᠠ ᠶ᠋ᠢ ᠥᠪᠡᠷ ᠲᠡᠭᠡᠨ ᠦᠢᠯᠡᠴᠢᠯᠡᠭᠦᠯᠵᠦ ᠴᠢᠳᠠᠨᠠ᠃ ᠡᠢᠨ ᠬᠦ᠌ ᠪᠢᠳᠡᠨ ᠦ᠌ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠪᠠᠷᠢᠮᠵᠢᠶᠠ ᠨᠢ ᠥᠷᠥᠭᠡᠯ ᠦ᠋ᠨ ᠣᠨᠣᠯ ᠪᠢᠰᠢ᠂ ᠥᠪᠡᠷ ᠦ᠋ᠨ ᠰᠣᠶᠣᠯ ᠪᠠᠢᠬᠤ ᠤᠴᠢᠷᠲᠠᠢ᠃ ᠤᠳᠬᠠ ᠵᠣᠬᠢᠶᠠᠯ ᠤ᠋ᠨ ᠣᠨᠣᠯ ᠤ᠋ᠨ ᠬᠥᠭᠵᠢᠯᠲᠡ ᠪᠤᠶᠤ ᠪᠣᠯᠪᠠᠰᠤᠷᠠᠯ ᠲᠡᠭᠦᠯᠳᠡᠷᠵᠢᠯ ᠨᠢ ᠴᠦ᠍ ᠥᠪᠡᠷ ᠦ᠋ᠨ ᠰᠣᠶᠣᠯ ᠢᠷᠭᠡᠨᠰᠢᠯ ᠡᠴᠡ ᠪᠡᠨ ᠦᠨᠳᠦᠰᠦ ᠤᠯᠪᠠᠭᠠ ᠪᠠᠨ ᠠᠪᠴᠤ᠂ ᠡᠨᠡ ᠰᠠᠭᠤᠷᠢᠨ ᠳᠡᠭᠡᠷᠡ ᠬᠥᠭᠵᠢᠯᠲᠡ ᠪᠡᠨ ᠣᠯᠬᠤ ᠨᠢ ᠵᠦᠢᠲᠡᠢ᠃ ᠡᠰᠡ ᠲᠡᠢᠮᠦ ᠪᠣᠯ ᠰᠤᠨᠲᠤᠭᠠᠢ ᠬᠥᠭᠵᠢᠯᠲᠡ ᠪᠣᠯᠤᠨᠠ᠃
ᠡᠷᠢᠶᠡᠪᠦᠷ ᠬᠤᠷᠢᠶᠠᠪᠤᠷ ᠶᠠᠷᠢᠭᠰᠠᠨ ᠤ᠋ ᠪᠠᠨ ᠡᠴᠦᠰ ᠲᠦ᠍ ᠵᠠᠷᠢᠮ ᠵᠦᠢᠯ ᠢ᠋ ᠪᠠᠭᠠ ᠨᠥᠬᠥᠪᠥᠷᠢᠯᠡᠮᠡᠷ ᠰᠠᠨᠠᠭᠳᠠᠯᠠ᠃《ᠡᠷᠡᠭᠲᠡᠢ ᠬᠥᠮᠦᠨ ᠭᠡᠷ ᠲᠦ᠍ ᠤᠩᠭᠤᠨᠠ᠂ ᠡᠮᠡᠭᠲᠡᠢ ᠬᠥᠮᠦᠨ ᠵᠣᠷᠯᠣᠩ ᠳ᠋ᠤ᠌ ᠣᠩᠭᠣᠨᠠ᠂ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠬᠤᠷᠠᠯ ᠳᠡᠭᠡᠷᠡ ᠤᠩᠭᠤᠨᠠ》 ᠭᠡᠰᠡᠨ ᠠᠩᠭᠢᠲᠤ ᠶ᠋ᠢᠨ ᠰᠢᠯᠦᠭ ᠢ᠋ ᠣᠯᠠᠨ ᠬᠥᠮᠦᠨ ᠰᠢᠭᠦᠮᠵᠢᠯᠡᠵᠦ ᠪᠠᠢᠭᠠ ᠨᠢ ᠢᠯᠡᠷᠬᠡᠢ᠃ ᠳᠡᠩᠳᠡᠭᠦᠦ ᠢᠯᠡ ᠵᠠᠳᠠᠭᠠᠢ᠂ ᠨᠢᠭᠤᠯ ᠦᠭᠡᠢ ᠰᠢᠭᠤᠳ ᠪᠣᠯᠬᠣᠷ ᠲᠡᠷᠡ ᠴᠦ᠍ ᠶᠦᠮ ᠤᠤ? ᠡᠰᠡᠬᠦᠯᠡ ᠮᠠᠨ ᠤ᠋ ᠶᠠᠷᠢᠳᠠᠭ ᠭᠤᠸᠠ ᠲᠠᠭᠠᠰᠢᠶᠠᠯ᠂ ᠠᠷᠭᠠ ᠪᠠᠷᠢᠯ ᠳ᠋ᠤᠨᠢ ᠨᠡᠢᠴᠡᠬᠦ ᠦᠭᠡᠢ ᠪᠣᠯᠤᠭᠠᠳ ᠴᠤ ᠲᠡᠷᠡ ᠶᠦᠮ ᠤᠤ? ᠭᠡᠪᠡᠴᠦ ᠬᠡᠨ ᠳ᠋ᠦ᠍ ᠴᠦ᠍ ᠰᠠᠢᠨ ᠰᠠᠢᠬᠠᠨ ᠤ᠋ ᠣᠢᠯᠠᠭᠠᠯᠲᠠ ᠥᠭᠬᠦ ᠦᠭᠡᠢ᠂ ᠠᠮᠢᠳᠤᠷᠠᠯ ᠤ᠋ᠨ ᠭᠠᠵᠢ ᠪᠤᠷᠤᠭᠤ᠂ ᠮᠠᠭᠤ ᠮᠠᠭᠤᠬᠠᠢ ᠵᠦᠢᠯᠡᠰ ᠢ᠋ ᠪᠢᠴᠢᠬᠦ ᠳ᠋ᠡᠭᠡᠨ ᠪᠠᠰᠠ ᠯᠠ ᠥᠩᠭᠡᠯᠡᠨ ᠴᠢᠮᠡᠵᠦ᠂ ᠤᠷᠠᠯᠢᠭᠵᠢᠭᠤᠯᠤᠨ ᠵᠠᠰᠠᠪᠤᠷᠢᠯᠠᠬᠤ ᠴᠢᠬᠤᠯᠠ ᠠᠯᠢ ᠵᠡᠷᠭᠡ ᠪᠣᠢ? ᠬᠡᠷᠡᠭ ᠦᠭᠡᠢ ᠦᠭᠡ ᠴᠠᠯᠴᠢᠬᠤ ᠶ᠋ᠢ《ᠣᠩᠭᠣᠰᠤ ᠪᠢᠲᠡᠭᠡᠢ ᠠᠯᠲᠠ》 ᠭᠡᠵᠦ ᠨᠢᠴᠤᠭᠠᠳᠠᠭ ᠪᠢᠵᠡ ᠳᠡ! ᠮᠠᠨ ᠤ᠋ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠴᠦ᠍ ᠰᠤᠯᠠ ᠦᠭᠡ᠂ ᠬᠡᠢᠰᠪᠦᠷᠢ ᠶᠠᠷᠢᠶᠠ ᠪᠠᠷ ᠬᠠᠭᠤᠳᠠᠰᠤ ᠳᠦᠭᠦᠷᠭᠡᠳᠡᠭ ᠢ᠋ ᠡᠭᠦᠨ ᠯᠦ᠍ᠭᠡ ᠬᠣᠯᠪᠣᠭᠳᠠᠭᠤᠯᠤᠨ ᠪᠣᠳᠣᠬᠤ ᠳ᠋ᠤ᠌ ᠪᠣᠯᠬᠤ ᠯᠠ ᠳᠠ! ᠰᠢᠯᠦᠭ ᠲᠦ᠍ ᠬᠡᠷᠡᠭᠯᠡᠳᠡᠭ ᠦᠭᠡᠢ ᠦᠭᠡ ᠭᠡᠵᠦ ᠪᠠᠢᠳᠠᠭ ᠢ᠋ ᠪᠢ ᠰᠣᠨᠣᠰᠤᠭᠠᠳ ᠭᠠᠢᠬᠠᠯᠠ᠃ ᠬᠡᠷᠡᠭᠯᠡᠵᠦ ᠴᠢᠳᠠᠪᠠᠯ ᠶᠠᠮᠠᠷ ᠦᠭᠡ ᠶ᠋ᠢ ᠬᠡᠷᠡᠭᠯᠡᠵᠦ ᠡᠰᠡ ᠪᠣᠯᠬᠤ ᠪᠣᠢ?
ᠶᠠᠭᠤᠲᠠᠢ ᠴᠤ ᠥᠨᠥᠳᠥᠷ ᠦ᠋ᠨ ᠮᠠᠨ ᠤ᠋ ᠢᠷᠠᠭᠤ ᠨᠠᠢᠷᠠᠭ ᠤᠶᠠᠩᠭᠠ ᠦᠭᠡᠢ ᠦᠯᠪᠡᠢᠵᠦ ᠪᠠᠢᠬᠤ ᠶ᠋ᠢᠨ ᠪᠦᠬᠦ ᠰᠢᠯᠲᠠᠭᠠᠨ ᠪᠤᠰᠤᠳ ᠤ᠋ᠨ ᠣᠨᠣᠯ ᠢ᠋ ᠰᠤᠷᠤᠯᠴᠠᠯᠭᠠ ᠦᠭᠡᠢ ᠳ᠋ᠦ᠍ ᠪᠠᠢᠬᠤ ᠪᠢᠰᠢ᠃ ᠬᠠᠷᠢᠨ ᠥᠪᠡᠷ ᠦ᠋ᠨ ᠰᠣᠶᠣᠯ ᠢ᠋ᠶ᠋ᠠᠨ ᠮᠠᠷᠲᠠᠵᠤ᠂ ᠰᠡᠳᠬᠢᠬᠦᠢ ᠮᠠᠨᠢ ᠵᠡᠮᠳᠡᠭᠷᠡᠵᠦ᠂ ᠥᠩᠭᠡᠷᠡᠭᠰᠡᠨ ᠲᠡᠦᠬᠡᠨ ᠴᠠᠭ ᠠ᠋ᠴᠠ ᠵᠣᠷᠢᠭ ᠰᠠᠨᠠᠭᠠ ᠶ᠋ᠢ ᠨᠢ ᠥᠪᠯᠡᠵᠦ᠂ ᠥᠨᠥᠳᠥᠷ ᠦ᠋ᠨ ᠬᠢᠮᠤᠷᠠᠯ ᠢ᠋ ᠠᠩᠬᠠᠷᠤᠯ ᠳ᠋ᠠᠭᠠᠨ ᠠᠪᠴᠤ ᠪᠢᠴᠢᠵᠦ ᠴᠢᠳᠠᠬᠤ ᠦᠭᠡᠢ ᠳ᠋ᠦ᠍ ᠪᠣᠢ᠃ ᠥᠪ ᠰᠣᠶᠣᠯ ᠢ᠋ᠶ᠋ᠠᠨ ᠭᠡᠰᠡᠨ ᠨᠠᠭᠠᠳᠤ ᠵᠠᠬᠠ ᠶ᠋ᠢᠨ ᠬᠠᠷᠢᠭᠤᠴᠠᠯᠭᠠ ᠦᠭᠡᠢ ᠶᠦᠮ ᠪᠣᠯ ᠶᠠᠭᠠᠬᠢᠵᠤ ᠴᠢᠨᠠᠷᠵᠢᠭᠤᠨ ᠰᠢᠯᠦᠭ ᠪᠢᠴᠢᠬᠦ ᠪᠣᠢ? ᠣᠳᠣᠬᠠᠨᠠ ᠪᠢᠳᠡ ᠥᠪᠡᠷ ᠦ᠋ᠨ ᠰᠣᠶᠣᠯ ᠢ᠋ᠶ᠋ᠠᠨ ᠥᠷᠥᠭᠡᠯ ᠦ᠋ᠨ ᠶᠠᠭᠤᠮᠠ ᠰᠢᠭ᠋ ᠰᠤᠷᠤᠯᠴᠠᠨ ᠣᠢᠯᠠᠭᠠᠬᠤ ᠴᠢᠬᠤᠯᠠᠴᠢᠯᠠᠭᠠ ᠲᠠᠢ ᠪᠣᠯᠤᠭᠠᠳ ᠪᠣᠢ᠃
ᠡᠢᠨ ᠪᠣᠳᠣᠬᠤ ᠳ᠋ᠤ᠌᠂ ᠶᠠᠭᠤ ᠶ᠋ᠢ ᠪᠢᠴᠢᠬᠦ᠂ ᠶᠠᠭᠠᠬᠢᠵᠤ ᠪᠢᠴᠢᠬᠦ ᠭᠡᠳᠡᠭ ᠬᠣᠶᠠᠷ ᠠᠰᠠᠭᠤᠳᠠᠯ ᠮᠠᠨ ᠤ᠋ ᠢᠷᠠᠭᠤ ᠨᠠᠢᠷᠠᠭ ᠤ᠋ᠨ ᠬᠥᠭᠵᠢᠯᠲᠡ ᠳ᠋ᠦ᠍ ᠲᠠᠯᠪᠢᠭᠳᠠᠵᠤ ᠪᠠᠢᠭᠠ ᠮᠠᠰᠢ ᠴᠢᠬᠤᠯᠠ ᠵᠦᠢᠯ ᠪᠠᠢᠭᠠ ᠶᠤᠮ᠃ ᠶᠠᠭᠠᠬᠢᠵᠤ ᠪᠢᠴᠢᠬᠦ ᠪᠣᠢ? ᠭᠡᠵᠦ ᠣᠨᠣᠯ ᠢ᠋ᠶ᠋ᠠᠷ ᠰᠡᠳᠬᠢᠵᠦ᠂ ᠠᠷᠭᠠ ᠪᠠᠷ ᠬᠡᠪᠯᠡᠳᠡᠭ ᠦᠬᠦᠮᠡᠯ ᠰᠡᠳᠬᠢᠬᠦᠢ ᠡᠴᠡ ᠴᠢᠯᠥᠭᠡᠯᠡᠵᠦ᠂ ᠶᠠᠭᠤ ᠶ᠋ᠢ ᠪᠢᠴᠢᠬᠦ ᠪᠣᠢ? ᠭᠡᠵᠦ ᠤᠬᠠᠮᠰᠠᠷ ᠬᠠᠷᠢᠭᠤᠴᠠᠯᠭᠠ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠪᠣᠳᠣᠯᠬᠢᠯᠠᠵᠤ᠂ ᠴᠠᠭᠠᠰᠢᠳᠠ ᠶᠠᠭᠤ ᠶ᠋ᠢ ᠶᠠᠭᠠᠬᠢᠵᠤ ᠪᠢᠴᠢᠬᠦ ᠪᠣᠢ? ᠭᠡᠮᠡᠨ ᠭᠦᠨᠵᠡᠭᠡᠢ ᠪᠡᠷ ᠪᠣᠳᠣᠯᠬᠢᠯᠠᠬᠤ ᠱᠠᠭᠠᠷᠳᠠᠯᠭᠠ ᠴᠤ ᠪᠢᠳᠡᠨ ᠦ᠌ ᠮᠥᠷᠦᠨ ᠳ᠋ᠦ᠍ ᠬᠥᠨᠳᠡᠭᠦᠷ ᠠᠪᠴᠢᠷᠠᠵᠤ ᠪᠠᠢᠭᠠ ᠶᠤᠮ᠃
① ᠡᠨᠡ ᠵᠣᠬᠢᠶᠠᠯ《ᠠᠯᠲᠠᠨ ᠲᠦᠯᠬᠢᠭᠦᠷ》 ᠰᠡᠳᠬᠢᠯ ᠦ᠋ᠨ2002 ᠣᠨ ᠤ᠋2 ᠳ᠋ᠤᠭᠠᠷ ᠬᠤᠭᠤᠴᠠᠭᠠ ᠠ᠋ᠴᠠ ᠨᠡᠢᠲᠡᠯᠡᠭᠳᠡᠭᠰᠡᠨ ᠪᠠᠢᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠡᠭᠦᠳᠡᠯ᠂ ᠣᠶᠤᠨᠪᠠᠲᠤ ᠂ ᠡᠷᠳᠡᠨᠢᠭᠣᠤᠠ ᠂ ᠭᠡᠷᠡᠯ ᠂ ᠡᠷᠳᠡᠨᠢᠭᠣᠤᠠ ᠂ ᠂ ᠂
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠰᠡᠬᠡᠭᠡᠷᠡᠯ