ᠡᠮ-ᠯᠦ᠍ ᠰᠢᠶᠦ᠋ᠨЭм -Лү ШүньEm
1013ᠡᠮ
ᠯᠦ᠍ ᠰᠢᠶᠦ᠋ᠨ
ᠨᠢᠭᠡ
ᠨᠠᠮᠤᠷ ᠤ᠋ᠨ ᠨᠢᠭᠡᠨ ᠰᠥᠨᠢ ᠪᠢᠯᠡ᠃ ᠰᠥᠨᠢ ᠳᠦᠯᠢ ᠥᠩᠭᠡᠷᠡᠵᠦ᠂ ᠰᠠᠷᠠ ᠰᠢᠩᠭᠡᠭᠡᠳ ᠨᠠᠷᠠᠨ ᠪᠠᠰᠠ ᠭᠠᠷᠤᠭᠠᠳᠤᠢ ᠲᠤᠯᠠ ᠪᠠᠷᠠᠭᠠᠨ ᠬᠥᠬᠡ ᠣᠭᠲᠠᠷᠭᠤᠢ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢ ᠪᠦᠷᠬᠦᠵᠦ᠂ ᠰᠥᠨᠢ ᠲᠣᠭᠣᠷᠢᠳᠠᠭ ᠠᠮᠢᠲᠠᠳ ᠠ᠋ᠴᠠ ᠪᠤᠰᠤᠳ ᠨᠢ ᠴᠥᠮ ᠤᠨᠲᠠᠵᠤ ᠪᠠᠢᠯᠠ᠃ ᠬᠤᠸᠠ ᠯᠤᠤ ᠱᠤᠸᠠᠨ᠂ ᠭᠡᠨᠡᠳᠲᠡ ᠥᠨᠳᠡᠢᠵᠦ ᠴᠤ᠌ᠢᠳᠡᠩ ᠵᠤᠷᠠᠵᠤ᠂ ᠲᠣᠰᠣ ᠵᠤᠩᠭᠠᠭ ᠢ᠋ᠶ᠋ᠠᠷ ᠪᠢᠯᠳᠠᠭᠳᠠᠭᠰᠠᠨ ᠳ᠋ᠧᠩ ᠢ᠋ᠶ᠋ᠡᠨ ᠠᠰᠠᠭᠠᠮᠠᠭᠴᠠ ᠴᠠᠢ ᠶ᠋ᠢᠨ ᠮᠤᠬᠤᠯᠠᠭ ᠤ᠋ᠨ ᠬᠣᠶᠠᠷ ᠲᠠᠰᠤᠯᠭᠠ ᠭᠡᠷ ᠲᠦ᠍ ᠪᠤᠳᠤᠩᠭᠤᠢ ᠴᠠᠭᠠᠨ ᠭᠡᠷᠡᠯ ᠰᠦᠮᠡᠯᠵᠡᠪᠡ᠃
《ᠰᠢᠶᠣᠤ ᠱᠤᠸᠠᠨ ᠤ᠋ ᠠᠪᠤ ᠨᠢ ᠶᠠᠪᠤᠬᠤ ᠭᠡᠵᠦ ᠪᠠᠢᠬᠤ ᠶᠤᠮ ᠤᠤ?》 ᠭᠡᠬᠦ ᠬᠥᠭᠰᠢᠨ ᠪᠦᠰᠡᠭᠦᠢ ᠶ᠋ᠢᠨ ᠳᠠᠭᠤᠨ ᠰᠣᠨᠣᠰᠲᠠᠯᠠ᠃ ᠳᠣᠲᠣᠷᠠ ᠲᠠᠰᠤᠯᠭᠠ ᠠ᠋ᠴᠠ ᠨᠢ ᠪᠠᠰᠠ ᠬᠠᠨᠢᠶᠠᠯᠭᠠᠬᠤ ᠳᠠᠭᠤ ᠭᠠᠷᠤᠨᠠ᠃
ᠯᠤᠤ ᠱᠤᠸᠠᠨ : 《ᠠ!》 ᠭᠡᠵᠦ ᠬᠠᠷᠢᠭᠤᠯᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠳᠡᠪᠡᠯ ᠢ᠋ᠶ᠋ᠡᠨ ᠲᠣᠪᠴᠢᠯᠠᠵᠤ᠂ 《ᠠᠯᠢ》 ᠭᠡᠵᠦ ᠭᠠᠷ ᠢ᠋ᠶ᠋ᠠᠨ ᠰᠠᠷᠪᠠᠢᠪᠠ᠃
ᠬᠤᠸᠠ ᠳᠠ ᠮᠠ ᠡᠵᠢ ᠳᠡᠷᠡ ᠳᠣᠣᠭᠤᠷ ᠢ᠋ᠶ᠋ᠠᠨ ᠰᠣᠢᠯᠠᠵᠤ ᠲᠡᠮᠲᠡᠷᠢᠭᠡᠳ ᠨᠢᠭᠡ ᠪᠣᠭᠣᠳᠠᠯ ᠲᠠᠢ ᠮᠥᠩᠭᠥ ᠠᠪᠴᠤ ᠯᠤᠤ ᠱᠤᠸᠠᠨ ᠳ᠋ᠤ᠌ ᠥᠭᠭᠦᠨᠡ᠃ ᠯᠤᠤ ᠱᠤᠸᠠᠨ ᠰᠠᠯᠭᠠᠨᠠᠨ ᠴᠡᠴᠡᠷᠡᠭᠰᠡᠨ ᠭᠠᠷ ᠢ᠋ᠶ᠋ᠠᠷ ᠲᠣᠰᠣᠨ ᠠᠪᠴᠤ ᠡᠪᠦᠷᠯᠡᠭᠡᠳ ᠭᠠᠳᠠᠨᠠ ᠠ᠋ᠴᠠ ᠨᠢ ᠪᠠᠰᠠ ᠬᠡᠳᠦ ᠳᠠᠷᠤᠯᠬᠢᠯᠠᠵᠤ ᠳ᠋ᠧᠩᠯᠦ ᠠᠰᠠᠭᠠᠵᠤ ᠳ᠋ᠧᠩ ᠢ᠋ᠶ᠋ᠡᠨ ᠦᠯᠢᠶᠡᠭᠡᠳ ᠳᠣᠲᠣᠷᠠ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠪᠠ᠃ ᠲᠡᠷᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠱᠤᠤᠬᠢᠲᠤᠨᠠᠨ ᠱᠠᠭᠠᠬᠢᠲᠤᠨᠠᠵᠤ ᠪᠠᠢᠭᠰᠠᠨ ᠴᠢᠮᠡᠭᠡ᠂ ᠤᠳᠠᠯ ᠦᠭᠡᠢ ᠬᠠᠨᠢᠶᠠᠳᠤ ᠪᠣᠯᠤᠯᠠ᠃ ᠯᠤᠤ ᠱᠤᠸᠠᠨ ᠲᠡᠭᠦᠨ ᠦ᠌ ᠨᠠᠮᠳᠠᠬᠤ ᠶ᠋ᠢ ᠬᠦᠯᠢᠶᠡᠨ ᠪᠠᠢᠵᠤ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ 《ᠰᠢᠶᠣᠤ ᠱᠤᠸᠠᠨ ᠁ ᠴᠢ ᠪᠣᠰᠬᠤ ᠬᠡᠷᠡᠭ ᠦᠭᠡᠢ᠃ ᠁ ᠮᠤᠬᠤᠯᠠᠭ ᠤ᠋ᠨ ᠶᠠᠪᠤᠳᠠᠯ ᠢ᠋ ᠮᠥᠮᠥ ᠴᠢᠨᠢ ᠡᠪᠯᠡᠭᠦᠯᠬᠦ ᠶᠦᠮ》 ᠭᠡᠪᠡ᠃
ᠬᠦᠦ ᠨᠢ ᠦᠭᠡ ᠳᠤᠤᠭᠠᠷᠤᠯ ᠦᠭᠡᠢ ᠰᠠᠢᠬᠠᠨ ᠤᠨᠲᠠᠭᠰᠠᠨ ᠬᠣᠢᠨᠠ ᠯᠤᠤ ᠱᠤᠸᠠᠨ ᠬᠦᠷᠢᠶᠡᠨ ᠦ᠌ ᠡᠭᠦᠳᠡ ᠪᠡᠷ ᠭᠤᠳᠤᠮᠵᠢᠨ ᠳ᠋ᠤ᠌ ᠭᠠᠷᠤᠯᠠ᠃ ᠭᠤᠳᠤᠮᠵᠢᠨ ᠳ᠋ᠤ᠌ ᠵᠠᠮ ᠴᠠᠢᠷᠠᠨ ᠮᠡᠳᠡᠭᠳᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠴᠤ᠌ ᠦᠭᠡᠢ᠂ ᠫᠠᠳ ᠬᠠᠷᠠᠩᠭᠤᠢ ᠪᠠᠢᠪᠠ᠃ ᠳ᠋ᠧᠩᠯᠦ ᠶ᠋ᠢᠨ ᠭᠡᠷᠡᠯ ᠳ᠋ᠦ᠍ ᠡᠭᠡᠯᠵᠢᠯᠡᠨ ᠠᠯᠬᠤᠬᠤ ᠬᠣᠶᠠᠷ ᠬᠥᠯ ᠨᠢ ᠦᠵᠡᠭᠳᠡᠵᠦ ᠪᠠᠢᠯᠠ᠃ ᠨᠣᠬᠠᠢ ᠬᠠᠶᠠ ᠲᠠᠭᠠᠷᠠᠯᠳᠤᠭᠰᠠᠨ ᠪᠣᠯᠪᠠᠴᠤ ᠶᠡᠷᠦ ᠬᠤᠴᠠᠭᠰᠠᠨ ᠦᠭᠡᠢ᠃ ᠣᠷᠣᠢ ᠶ᠋ᠢᠨ ᠵᠢᠪᠠᠷ ᠨᠡᠯᠢᠶᠡᠳ ᠬᠦᠢᠲᠡᠨ ᠪᠣᠯᠪᠠᠴᠤ ᠯᠤᠤ ᠱᠤᠸᠠᠨ ᠤ᠋ ᠳᠣᠲᠣᠷᠠ ᠶᠡᠬᠡ ᠣᠩᠭᠣᠢᠵᠤ᠂ ᠭᠡᠨᠡᠳᠲᠡ ᠵᠠᠯᠠᠭᠤᠵᠢᠭᠠᠳ ᠬᠥᠮᠦᠨ ᠦ᠌ ᠠᠮᠢ ᠶ᠋ᠢ ᠠᠪᠤᠷᠠᠬᠤ ᠷᠢᠳᠢ ᠰᠢᠳᠢ ᠣᠯᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠵᠤ᠂ ᠬᠥᠯ ᠨᠢ ᠶᠡᠬᠡ ᠬᠥᠩᠭᠡᠷᠡᠭᠰᠡᠨ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ ᠵᠠᠮ ᠴᠤ᠌ ᠤᠯᠠᠮ ᠢ᠋ᠶ᠋ᠠᠷ ᠲᠣᠳᠣᠷᠠᠵᠤ᠂ ᠲᠡᠭᠷᠢ ᠴᠤ᠌ ᠤᠯᠠᠮ ᠬᠡᠬᠡᠷᠡᠯᠡ᠃
ᠯᠤᠤ ᠱᠤᠸᠠᠨ ᠢᠩᠭᠢᠵᠦ ᠠᠵᠢᠭ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠭᠡᠨᠡᠳᠲᠡ ᠡᠮᠦᠨᠡ ᠨᠢ ᠨᠡᠯᠢᠶᠡᠳ ᠬᠣᠯᠠ ᠭᠠᠵᠠᠷ ᠨᠢᠭᠡ ᠴᠢᠭᠲᠠᠨ ᠭᠤᠳᠤᠮᠵᠢ ᠲᠣᠪ ᠲᠣᠳᠣᠷᠬᠠᠢ ᠬᠥᠨᠳᠡᠯᠢᠳᠦᠨ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠶᠡᠬᠡ ᠰᠣᠴᠢᠪᠠ᠃ ᠢᠩᠭᠢᠭᠡᠳ ᠲᠡᠷᠡ ᠬᠡᠳᠦᠨ ᠠᠯᠬᠤᠮ ᠤᠬᠤᠷᠢᠵᠤ ᠬᠠᠭᠠᠯᠭᠠ ᠨᠢ ᠲᠦᠭᠵᠢᠭᠡᠲᠡᠢ ᠨᠢᠭᠡ ᠫᠦᠰᠡᠨ ᠦ᠌ ᠰᠠᠷᠠᠪᠴᠢᠨ ᠳᠣᠣᠷᠠ ᠰᠢᠷᠭᠤᠵᠤ ᠣᠷᠣᠭᠠᠳ ᠬᠠᠭᠠᠯᠭᠠ ᠶ᠋ᠢ ᠲᠦᠰᠢᠨ ᠵᠣᠭᠰᠣᠪᠠ᠃ ᠨᠡᠯᠢᠶᠡᠳ ᠤᠳᠠᠲᠠᠯᠠ ᠵᠣᠭᠰᠣᠭᠠᠳ᠂ ᠪᠡᠶᠡ ᠨᠢ ᠵᠢᠩᠭᠢᠨᠡᠬᠦ ᠰᠢᠭ ᠰᠠᠨᠠᠭᠳᠠᠯᠠ᠃
《ᠮᠠᠭᠤ ᠵᠥᠨᠥᠭ!》
《ᠬᠠᠷᠢᠨ ᠬᠡᠴᠡᠭᠦᠦ ᠪᠠᠶᠠᠷᠲᠠᠢ ᠪᠠᠢᠬᠤ ᠨᠢ ᠠ᠋ ᠁》 ᠭᠡᠬᠦ ᠳᠠᠭᠤᠨ ᠰᠣᠨᠣᠰᠲᠠᠯᠠ᠃
ᠯᠤᠤ ᠱᠤᠸᠠᠨ ᠪᠠᠰᠠ ᠶᠡᠬᠡ ᠰᠣᠴᠢᠨ ᠬᠠᠷᠠᠵᠤ ᠦᠵᠡᠬᠦᠯᠡ ᠡᠮᠦᠨᠡᠭᠦᠷ ᠨᠢ ᠬᠡᠳᠦᠨ ᠬᠥᠮᠦᠨ ᠭᠠᠷᠪᠠ᠃ ᠡᠷᠭᠢᠵᠦ ᠬᠠᠷᠠᠭᠰᠠᠨ ᠨᠢᠭᠡᠨ ᠦ᠌ ᠬᠢᠨᠢ ᠴᠢᠷᠠᠢ ᠳᠡᠮᠡᠢ ᠲᠣᠳᠣ ᠦᠵᠡᠭᠳᠡᠭᠰᠡᠨ ᠦᠭᠡᠢ ᠪᠣᠯᠪᠠᠴᠤ ᠨᠢᠳᠦᠨ ᠳ᠋ᠦ᠍ᠨᠢ ᠥᠭᠶᠥᠭᠡ ᠣᠯᠵᠤ ᠦᠵᠡᠭᠰᠡᠨ ᠥᠯᠥᠨ ᠠᠮᠢᠲᠠᠨ ᠮᠡᠲᠦ ᠬᠣᠪᠳᠣᠭ ᠰᠢᠨᠤᠬᠠᠢ ᠭᠡᠷᠡᠯ ᠭᠢᠯᠠᠯᠵᠠᠨᠠ᠃ ᠯᠤᠤ ᠱᠤᠸᠠᠨ ᠤ᠋ ᠳ᠋ᠧᠩᠯᠦ ᠨᠢᠭᠡᠨᠲᠡ ᠤᠨᠲᠠᠷᠠᠵᠠᠢ᠃ ᠡᠪᠦᠷ ᠢ᠋ᠶ᠋ᠡᠨ ᠳᠠᠷᠤᠵᠤ ᠦᠵᠡᠬᠦ ᠳ᠋ᠦ᠍ ᠬᠡᠪ ᠢ᠋ᠶ᠋ᠡᠷ ᠬᠠᠪ ᠬᠠᠲᠠᠭᠤ ᠪᠤᠮᠪᠠᠢᠵᠤ ᠪᠠᠢᠨᠠ᠃ ᠬᠣᠶᠠᠷ ᠳᠠᠰᠢ ᠠᠵᠢᠭᠯᠠᠪᠠᠯ ᠨᠡᠯᠢᠶᠡᠳ ᠣᠯᠠᠨ ᠬᠠᠴᠢᠨ ᠵᠢᠭᠲᠡᠢ ᠬᠥᠮᠦᠰ ᠬᠣᠶᠠᠷ ᠭᠤᠷᠪᠠ ᠪᠠᠷ ᠢ᠋ᠶ᠋ᠠᠨ ᠲᠡᠷᠡ ᠬᠠᠪᠢ ᠪᠠᠷ ᠴᠢᠳᠬᠥᠷ ᠮᠡᠲᠦ ᠲᠥᠪᠥᠭᠡᠨᠡᠵᠦ ᠪᠠᠢᠨᠠ᠃ ᠯᠠᠪᠯᠠᠨ ᠠᠵᠢᠭᠯᠠᠬᠤ ᠳ᠋ᠤ᠌ ᠪᠠᠰᠠ ᠳᠡᠮᠡᠢ ᠶᠡᠬᠡ ᠰᠣᠨᠢᠨ ᠶᠠᠭᠤᠮᠠ ᠭᠡᠵᠦ ᠦᠵᠡᠭᠳᠡᠬᠦ ᠦᠭᠡᠢ᠃
ᠤᠳᠠᠯ ᠦᠭᠡᠢ᠂ ᠪᠠᠰᠠ ᠬᠡᠳᠦᠨ ᠴᠡᠷᠢᠭ ᠠᠯᠬᠤᠵᠤ ᠪᠠᠢᠬᠤ ᠦᠵᠡᠭᠳᠡᠪᠡ᠃ ᠬᠠᠨᠵᠢᠶᠠᠷ ᠤ᠋ᠨ ᠬᠢᠨᠢ ᠠᠷᠤ ᠥᠪᠥᠷ ᠲᠡᠬᠢ ᠲᠥᠭᠥᠷᠢᠭ ᠴᠠᠭᠠᠨ ᠲᠣᠯᠪᠣ ᠬᠣᠯᠠ ᠠ᠋ᠴᠠ ᠲᠣᠪ ᠲᠣᠳᠣᠷᠬᠠᠢ ᠦᠵᠡᠭᠳᠡᠯᠡ᠃ ᠲᠦᠷᠦᠭᠦᠨ ᠳ᠋ᠦ᠍ᠨᠢ ᠶᠠᠪᠤᠭᠠ ᠶ᠋ᠢᠨ ᠬᠢᠨᠢ ᠬᠠᠨᠵᠢᠶᠠᠷ ᠤ᠋ᠨ ᠬᠦᠷᠡᠩ ᠤᠯᠠᠭᠠᠨ ᠡᠮᠵᠢᠶᠡᠷᠢ ᠨᠢ ᠬᠦᠷᠲᠡᠯᠡ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠬᠥᠯ ᠦ᠋ᠨ ᠴᠢᠮᠡᠭᠡ ᠨᠢᠭᠡ ᠵᠡᠷᠭᠡ ᠰᠣᠨᠣᠰᠳᠠᠭᠠᠳ᠂ ᠨᠢᠭᠡ ᠪᠥᠭᠡᠮ ᠬᠥᠮᠦᠰ ᠨᠢᠳᠦ ᠴᠠᠪᠴᠢᠬᠤ ᠶ᠋ᠢᠨ ᠵᠠᠭᠤᠷᠠ ᠥᠩᠭᠡᠷᠡᠨ ᠭᠠᠷᠤᠯᠠ᠃ ᠥᠨᠥ ᠬᠣᠶᠠᠷ ᠭᠤᠷᠪᠠ ᠪᠠᠷ ᠶᠠᠪᠤᠵᠤ ᠪᠠᠢᠭᠰᠠᠨ ᠬᠥᠮᠦᠰ ᠭᠡᠨᠡᠳᠲᠡ ᠪᠥᠭᠡᠮᠨᠡᠷᠡᠨ ᠬᠤᠷᠠᠵᠤ᠂ ᠮᠥᠷᠡᠨ ᠦ᠌ ᠳᠣᠯᠭᠢᠶᠠᠨ ᠮᠡᠲᠦ ᠤᠷᠤᠭᠰᠢᠯᠠᠭᠰᠠᠭᠠᠷ ᠴᠢᠭᠲᠠᠨ ᠭᠤᠳᠤᠮᠵᠢ ᠶ᠋ᠢᠨ ᠠᠮᠠᠰᠠᠷ ᠲᠤ᠌ ᠬᠦᠷᠦᠮᠡᠭᠴᠡ ᠵᠣᠭᠰᠣᠵᠤ᠂ ᠲᠠᠯᠠ ᠲᠣᠭᠣᠷᠢᠭ ᠪᠣᠯᠤᠨ ᠵᠢᠭᠰᠠᠪᠠ᠃
ᠯᠤᠤ ᠱᠤᠸᠠᠨ ᠳ᠋ᠤ᠌ ᠲᠡᠳᠡᠨ ᠦ᠌ ᠠᠷᠤ ᠯᠠ ᠬᠠᠷᠠᠭᠳᠠᠬᠤ ᠪᠥᠭᠡᠳ ᠬᠦᠵᠦᠭᠦᠦ ᠨᠢ ᠶᠠᠭ ᠦᠯᠦ ᠦᠵᠡᠭᠳᠡᠬᠦ ᠭᠠᠷ ᠢ᠋ᠶ᠋ᠠᠷ ᠪᠠᠵᠠᠭᠤᠯᠤᠭᠰᠠᠨ ᠣᠯᠠᠨ ᠨᠤᠭᠤᠰᠤ ᠮᠡᠲᠦ ᠳᠡᠭᠡᠭᠰᠢ ᠰᠤᠨᠤᠭᠰᠠᠨ ᠪᠠᠢᠪᠠ᠃ ᠲᠦᠷ ᠨᠠᠮ ᠪᠠᠢᠵᠤ ᠠᠪᠤᠭᠠᠳ ᠪᠠᠬᠠᠨ ᠴᠢᠮᠡᠭᠡ ᠭᠠᠷᠴᠤ ᠬᠥᠳᠡᠯᠵᠡᠭᠡᠨ ᠭᠡᠨᠡᠳᠲᠡ 《ᠲᠦᠩ!》 ᠭᠡᠵᠦ ᠴᠢᠮᠡᠭᠡ ᠭᠠᠷᠤᠮᠠᠭᠴᠠ ᠪᠦᠷ ᠬᠣᠢᠰᠢ ᠤᠬᠤᠷᠢᠵᠠᠭᠠᠵᠤ᠂ ᠯᠤᠤ ᠱᠤᠸᠠᠨ ᠤ᠋ ᠵᠣᠭᠰᠣᠵᠤ ᠪᠠᠢᠭᠠ ᠣᠷᠣᠨ ᠳ᠋ᠤ᠌ ᠰᠢᠬᠠᠯᠴᠠᠨ ᠣᠷᠣᠵᠤ ᠢᠷᠡᠭᠡᠳ ᠪᠠᠷᠤᠭ ᠲᠡᠭᠦᠨ ᠢ᠋ ᠲᠦᠯᠬᠢᠵᠦ ᠣᠢᠴᠢᠭᠤᠯᠬᠤ ᠳ᠋ᠤ᠌ ᠬᠦᠷᠦᠯᠡ᠃
《ᠬᠦᠢ! ᠮᠥᠩᠭᠥ ᠪᠡᠨ ᠠᠪᠴᠢᠷᠠ᠂ ᠪᠠᠷᠠᠭᠤᠨ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠰᠣᠯᠢᠨᠠ!》 ᠭᠡᠵᠦ ᠨᠢᠭᠡ ᠬᠠᠪ ᠬᠠᠷᠠ ᠬᠥᠮᠦᠨ ᠯᠤᠤ ᠱᠤᠸᠠᠨ ᠤ᠋ ᠡᠮᠦᠨᠡ ᠵᠣᠭᠰᠣᠵᠤ ᠬᠤᠷᠴᠠ ᠮᠡᠰᠡ ᠮᠡᠲᠦ ᠭᠢᠯᠠᠯᠵᠠᠭᠰᠠᠨ ᠨᠢᠳᠦ ᠪᠡᠷ ᠬᠠᠷᠠᠬᠤ ᠳ᠋ᠤ᠌ ᠯᠤᠤ ᠱᠤᠸᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠦᠷᠳᠡᠭᠳᠡᠨ ᠳᠣᠲᠣᠷᠠ ᠨᠢ ᠰᠢᠷ ᠬᠢᠵᠦ ᠠᠪᠤᠭᠠᠳ ᠲᠡᠭᠦᠨ ᠤᠷᠤᠭᠤ ᠣᠴᠢᠪᠠ᠃ ᠲᠡᠷᠡ ᠬᠥᠮᠦᠨ ᠨᠢᠭᠡ ᠭᠠᠷ ᠢ᠋ᠶ᠋ᠠᠨ ᠲᠡᠭᠦᠨ ᠦ᠌ ᠵᠦᠭ ᠰᠠᠷᠪᠠᠢᠵᠤ᠂ ᠨᠢᠭᠡ ᠭᠠᠷ ᠲᠠᠭᠠᠨ ᠤᠯᠠᠭᠠᠨ ᠳᠤᠰᠤᠯᠠᠭᠰᠠᠨ ᠴᠢᠰ ᠤᠯᠠᠭᠠᠨ ᠮᠠᠨᠲᠠᠤ ᠠᠳᠬᠤᠵᠠᠢ᠃
ᠯᠤᠤ ᠱᠤᠸᠠᠨ᠂ ᠰᠡᠩᠳᠡ ᠮᠡᠩᠳᠡ ᠮᠥᠩᠭᠥ ᠪᠡᠨ ᠭᠠᠷᠭᠠᠵᠤ᠂ ᠰᠠᠯᠭᠠᠨᠠᠨ ᠴᠡᠴᠡᠷᠡᠭᠰᠡᠭᠡᠷ ᠲᠡᠭᠦᠨ ᠳ᠋ᠦ᠍ ᠥᠭᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠶᠠᠭᠤᠮᠠ ᠶ᠋ᠢ ᠲᠣᠰᠴᠤ ᠠᠪᠬᠤ ᠵᠣᠷᠢᠭ ᠬᠦᠷᠦᠭᠰᠡᠨ ᠦᠭᠡᠢ᠃ ᠡᠭᠦᠨ ᠳ᠋ᠦ᠍ ᠲᠡᠷᠡ ᠬᠥᠮᠦᠨ ᠶᠡᠬᠡ ᠤᠴᠠᠭᠠᠷᠯᠠᠵᠤ: 《ᠶᠠᠭᠤᠨ ᠠ᠋ᠴᠠ ᠨᠢ ᠠᠶᠤᠭᠰᠠᠨ ᠶᠤᠮ ᠪᠣᠢ? ᠶᠠᠭᠤᠨ ᠳ᠋ᠤ᠌ ᠠᠪᠬᠤ ᠦᠭᠡᠢ ᠪᠣᠢ?》 ᠭᠡᠵᠦ ᠪᠠᠷᠬᠢᠷᠠᠯᠠ᠃ ᠯᠤᠤ ᠱᠤᠸᠠᠨ ᠮᠥᠨ ᠬᠦ᠌ ᠲᠠᠲᠠᠭᠠᠯᠵᠠᠵᠤ ᠪᠠᠢᠲᠠᠯᠠ᠂ ᠬᠠᠷᠠ ᠬᠥᠮᠦᠨ ᠬᠡᠳᠦᠢᠨ ᠳ᠋ᠧᠩᠯᠦ ᠶ᠋ᠢ ᠨᠢ ᠪᠤᠯᠢᠶᠠᠨ ᠠᠪᠤᠭᠠᠳ ᠪᠦᠷᠬᠦᠭᠦᠯ ᠦ᠋ᠨ ᠴᠠᠭᠠᠰᠤ ᠶ᠋ᠢ ᠤᠷᠠᠵᠤ ᠮᠠᠨᠲᠠᠤ ᠪᠠᠨ ᠪᠣᠭᠣᠵᠤ ᠯᠤᠤ ᠱᠤᠸᠠᠨ ᠳ᠋ᠤ᠌ ᠥᠭᠭᠦᠭᠡᠳ᠂ ᠮᠥᠩᠭᠥ ᠶ᠋ᠢ ᠨᠢ ᠠᠪᠴᠤ ᠪᠠᠷᠢᠯᠬᠢᠯᠠᠨ ᠦᠵᠡᠭᠡᠳ ᠴᠢᠨᠠᠭᠰᠢ ᠡᠷᠭᠢᠵᠦ 《ᠡᠨᠡ ᠦᠬᠦᠭᠰᠡᠨ ᠵᠥᠨᠥᠭ ᠁》 ᠭᠡᠵᠦ ᠳᠦᠳᠦᠨᠡᠭᠰᠡᠭᠡᠷ ᠶᠠᠪᠤᠪᠠ᠃
《ᠡᠭᠦᠪᠡᠷ ᠬᠡᠨ ᠢ᠋ ᠡᠮᠨᠡᠭᠦᠯᠬᠦ ᠶᠦᠮ ᠪᠣᠢ?》 ᠭᠡᠬᠦ ᠠᠰᠠᠭᠤᠯᠲᠠ᠂ ᠯᠤᠤ ᠱᠤᠸᠠᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠰᠣᠨᠣᠰᠳᠠᠬᠤ ᠮᠡᠲᠦ ᠰᠠᠨᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠶᠡᠷᠦ ᠬᠠᠷᠢᠭᠤᠯᠲᠠ ᠣᠯᠤᠭᠰᠠᠨ ᠦᠭᠡᠢ᠃ ᠠᠷᠪᠠᠨ ᠦᠶᠡ ᠭᠠᠭᠴᠠ ᠦᠷᠡ ᠪᠡᠷ ᠰᠤᠷᠪᠤᠯᠵᠢ ᠵᠠᠯᠭᠠᠵᠤ ᠢᠷᠡᠭᠰᠡᠨ ᠤᠳᠤᠮᠲᠤ ᠠᠯᠠᠭ ᠦᠷᠡ ᠪᠡᠨ ᠲᠡᠪᠡᠷᠢᠵᠦ ᠶᠠᠪᠤᠭᠠ ᠮᠡᠲᠦ ᠪᠦᠬᠦ ᠠᠩᠬᠠᠷᠤᠯ ᠨᠢ ᠡᠨᠡ ᠪᠣᠭᠣᠳᠠᠯ ᠳᠡᠭᠡᠷᠡ ᠲᠥᠪᠯᠡᠷᠡᠵᠦ ᠥᠭᠡᠷᠡ ᠬᠡᠷᠡᠭ ᠦ᠋ᠳ ᠢ᠋ ᠪᠦᠷ ᠲᠠᠭ ᠮᠠᠷᠲᠠᠵᠠᠢ᠃ ᠯᠤᠤ ᠱᠤᠸᠠᠨ ᠣᠳᠣ ᠡᠨᠡ ᠪᠣᠭᠣᠳᠠᠯ ᠳᠣᠲᠣᠷᠠᠬᠢ ᠰᠢᠨᠡ ᠠᠮᠢ ᠶ᠋ᠢ ᠭᠡᠷ ᠲᠡᠭᠡᠨ ᠠᠪᠠᠴᠢᠵᠤ ᠴᠠᠭᠯᠠᠰᠢ ᠦᠭᠡᠢ ᠶᠡᠬᠡ ᠵᠣᠯ ᠵᠢᠷᠭᠠᠯ ᠡᠳ᠋ᠯᠡᠬᠦ ᠭᠡᠵᠦ ᠰᠠᠨᠠᠵᠤ ᠪᠠᠢᠨᠠ᠃ ᠨᠠᠷᠠᠨ ᠮᠠᠨᠳᠤᠯᠠ᠃ ᠲᠡᠭᠦᠨ ᠦ᠌ ᠡᠮᠦᠨᠡ᠂ ᠭᠡᠷ ᠲᠦ᠋ᠨᠢ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠭᠰᠡᠨ ᠳᠠᠷᠳᠠᠩ ᠴᠠᠭᠠᠨ ᠵᠠᠮ ᠳᠤᠷᠠᠢᠵᠤ ᠦᠵᠡᠭᠳᠡᠪᠡ᠃ ᠥᠨᠥ ᠴᠢᠭᠲᠠᠨ ᠭᠤᠳᠤᠮᠵᠢ ᠶ᠋ᠢᠨ ᠠᠰᠠᠷ ᠤ᠋ᠨ ᠦᠵᠢᠷᠡᠭᠰᠡᠨ ᠫᠠᠢᠰᠠ ᠳᠡᠭᠡᠷᠡᠬᠢ 《ᠬᠦ ᠲᠢᠩ ᠺᠧᠦ 》 ᠭᠡᠰᠡᠨ ᠵᠢᠪᠡᠷᠡᠵᠦ ᠬᠤᠪᠠᠬᠠᠢᠷᠠᠭᠰᠠᠨ ᠳᠥᠷᠪᠡᠨ ᠠᠯᠲᠠᠨ ᠦᠰᠦᠭ ᠠᠷᠤ ᠳ᠋ᠤᠨᠢ ᠬᠠᠷᠠᠭᠳᠠᠭᠰᠠᠭᠠᠷ ᠪᠠᠢᠪᠠ᠃
ᠬᠣᠶᠠᠷ
ᠯᠤᠤ ᠱᠤᠸᠠᠨ ᠢ᠋ ᠬᠠᠷᠢᠵᠤ ᠢᠷᠡᠬᠦ ᠳ᠋ᠦ᠍ᠨᠢ ᠮᠤᠬᠤᠯᠠᠭ ᠤ᠋ᠨ ᠲᠠᠰᠤᠯᠭᠠ ᠨᠤᠭᠤᠳ ᠢ᠋ ᠬᠡᠵᠢᠶᠡᠨᠡᠢ ᠪᠦᠷ ᠭᠢᠯᠠᠢᠲᠠᠯᠠ ᠱᠦᠭᠦᠷᠳᠡᠵᠦ ᠴᠡᠪᠡᠷᠯᠡᠭᠡᠳ ᠮᠥᠷᠯᠡᠭᠦᠯᠦᠨ ᠲᠠᠯᠪᠢᠭᠰᠠᠨ ᠴᠠᠢ ᠶ᠋ᠢᠨ ᠰᠢᠷᠡᠭᠡ ᠨᠦ᠍ᠭᠦᠳ ᠢ᠋ ᠭᠦᠯᠳᠡᠭᠡᠨᠡᠲᠡᠯᠡ ᠵᠦᠯᠭᠦᠭᠰᠡᠨ ᠪᠠᠢᠵᠠᠢ᠃ ᠭᠡᠪᠡᠴᠦ ᠵᠣᠴᠢᠨ ᠭᠡᠵᠦ ᠨᠢᠭᠡ ᠴᠤ᠌ ᠦᠭᠡᠢ᠃ ᠰᠢᠶᠣᠤ ᠱᠤᠸᠠᠨ ᠭᠠᠭᠴᠠᠭᠠᠷ ᠳᠣᠲᠣᠭᠠᠳᠤ ᠮᠥᠷ ᠦ᠋ᠨ ᠰᠢᠷᠡᠭᠡᠨ ᠦ᠌ ᠡᠮᠦᠨᠡ ᠰᠠᠭᠤᠵᠤ ᠬᠣᠭᠣᠯᠠ ᠢᠳᠡᠬᠦ ᠪᠥᠭᠡᠳ ᠬᠥᠯᠥᠰᠥᠨ ᠦ᠌ ᠲᠣᠮᠣ ᠳᠤᠰᠤᠯ ᠤ᠋ᠳ ᠮᠠᠩᠨᠠᠢ ᠳᠡᠭᠡᠭᠦᠷ ᠨᠢ ᠪᠥᠮᠪᠥᠷᠢᠵᠦ᠂ ᠲᠡᠷᠯᠢᠭ ᠨᠢ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠢ ᠨᠠᠭᠠᠯᠳᠤᠭᠠᠳ ᠬᠣᠶᠠᠷ ᠲᠣᠮᠣ ᠳᠠᠯᠤ ᠨᠢ ᠥᠨᠳᠥᠷ ᠭᠡᠭᠴᠢ ᠭᠣᠵᠣᠢᠵᠤ ᠵᠠᠯᠪᠠᠷᠢᠭᠰᠠᠨ ᠭᠠᠷ ᠮᠡᠲᠦ ᠳᠤᠷᠠᠢᠵᠤ ᠪᠠᠢᠪᠠ᠃ ᠡᠭᠦᠨ ᠢ᠋ ᠦᠵᠡᠭᠰᠡᠨ ᠯᠤᠤ ᠱᠤᠸᠠᠨ ᠤ᠋ ᠲᠡᠨᠢᠢᠭᠰᠡᠨ ᠮᠠᠩᠨᠠᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠦᠷᠴᠢᠰᠬᠢᠪᠡ᠃ ᠡᠬᠡᠨᠡᠷ ᠨᠢ ᠭᠠᠯ ᠲᠣᠭᠣᠭᠠᠨ ᠤ᠋ ᠲᠠᠰᠤᠯᠭᠠ ᠠ᠋ᠴᠠ ᠪᠠᠨ ᠲᠦᠷᠭᠡᠬᠡᠨ ᠭᠠᠷᠴᠤ ᠢᠷᠡᠭᠡᠳ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠵᠦ ᠤᠷᠤᠭᠤᠯ ᠢ᠋ᠶ᠋ᠠᠨ ᠴᠡᠴᠡᠷᠡᠭᠦᠯᠦᠭᠰᠡᠭᠡᠷ:
《ᠣᠯᠤᠭᠰᠠᠨ ᠤᠤ?》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤᠨᠢ᠂
《ᠣᠯᠤᠯᠠ》 ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠭᠠᠷ ᠬᠣᠶᠠᠭᠤᠯᠠ ᠭᠠᠯ ᠲᠣᠭᠣᠭᠠᠨ ᠤ᠋ ᠪᠠᠨ ᠲᠠᠰᠤᠯᠭᠠ ᠳ᠋ᠤ᠌ ᠣᠷᠣᠵᠤ ᠶᠠᠷᠢᠯᠴᠠᠭᠠᠳ᠂ ᠬᠤᠸᠠ ᠳᠠ ᠮᠠ ᠡᠵᠢ ᠭᠠᠷᠴᠤ ᠤᠳᠠᠯ ᠦᠭᠡᠢ ᠨᠢᠭᠡ ᠬᠡᠰᠡᠭ ᠯᠢᠩᠬᠤᠠ ᠶ᠋ᠢᠨ ᠨᠠᠪᠴᠢ ᠠᠪᠴᠢᠷᠠᠵᠤ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠪᠠ᠃ ᠯᠤᠤ ᠱᠤᠸᠠᠨ ᠳ᠋ᠧᠩᠯᠦ ᠶ᠋ᠢᠨ ᠪᠦᠷᠬᠦᠭᠦᠯ ᠢ᠋ ᠳᠡᠯᠭᠡᠵᠦ ᠥᠨᠥ ᠤᠯᠠᠭᠠᠨ ᠮᠠᠨᠲᠠᠤ ᠪᠠᠨ ᠯᠢᠩᠬᠤᠠ ᠶ᠋ᠢᠨ ᠨᠠᠪᠴᠢ ᠪᠠᠷ ᠳᠠᠬᠢᠨ ᠪᠣᠭᠣᠪᠠ᠃ ᠰᠢᠶᠣᠤ ᠱᠤᠸᠠᠨ ᠴᠤ᠌ ᠬᠣᠭᠣᠯᠠ ᠪᠠᠨ ᠢᠳᠡᠵᠦ ᠳᠠᠭᠤᠰᠤᠭᠰᠠᠨ ᠲᠤᠯᠠ ᠡᠵᠢ ᠨᠢ:
《ᠰᠢᠶᠣᠤ ᠱᠤᠸᠠᠨ! ᠲᠡᠨᠳᠡ ᠪᠡᠨ ᠰᠠᠭᠤᠵᠤ ᠪᠠᠢ᠂ ᠡᠨᠳᠡ ᠪᠢᠲᠡᠭᠡᠢ ᠢᠷᠡ》 ᠭᠡᠵᠦ ᠰᠡᠩᠳᠡ ᠮᠡᠩᠳᠡ ᠬᠡᠯᠡᠭᠡᠳ ᠭᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠷᠤᠯᠳᠤᠵᠤ ᠪᠠᠢᠲᠠᠯᠠ ᠯᠤᠤ ᠱᠤᠸᠠᠨ ᠨᠣᠪ ᠨᠣᠭᠣᠭᠠᠨ ᠪᠣᠭᠣᠳᠠᠯ ᠢ᠋ ᠤᠯᠠᠭᠠᠨ ᠴᠠᠭᠠᠨ ᠬᠤᠸᠠᠷᠲᠠᠢ ᠳ᠋ᠧᠩᠯᠦ ᠲᠡᠢ ᠴᠤ᠌ᠭ ᠵᠤᠤᠬᠠᠨ ᠳ᠋ᠠᠭᠠᠨ ᠴᠢᠬᠢᠵᠦ ᠣᠷᠣᠭᠤᠯᠤᠮᠠᠭᠴᠠ ᠨᠢᠭᠡᠨ ᠵᠤᠷᠪᠤᠰ ᠬᠦᠷᠡᠩ ᠤᠯᠠᠭᠠᠨ ᠭᠠᠯ ᠳᠦᠷᠡᠯᠵᠡᠵᠦ ᠮᠤᠬᠤᠯᠠᠭ ᠤ᠋ᠨ ᠪᠦᠬᠦ ᠲᠠᠰᠤᠯᠭᠠ ᠳ᠋ᠤ᠌ ᠬᠠᠴᠢᠨ ᠦᠨᠦᠷ ᠬᠠᠩᠬᠤᠯᠤᠨᠠ᠃
《ᠬᠠ! ᠶᠠᠮᠠᠷ ᠰᠠᠢᠬᠠᠨ ᠦᠨᠦᠷ ᠭᠡᠭᠴᠢ ᠪᠣᠢ! ᠲᠠ ᠨᠠᠷ ᠶᠠᠮᠠᠷ ᠪᠣᠭᠣᠷᠰᠣᠭ ᠢᠳᠡᠵᠦ ᠪᠠᠢᠭᠠ ᠶᠤᠮ ᠪᠣᠢ?》 ᠭᠡᠬᠦ ᠳᠠᠭᠤ ᠰᠣᠨᠣᠰᠳᠠᠬᠤ ᠨᠢ᠂ ᠦᠵᠡᠰᠡ ᠪᠥᠭᠲᠥᠷ ᠡᠦ ᠱᠣᠣ ᠶᠧ ᠢᠷᠡᠭᠰᠡᠨ ᠠᠵᠢ᠃ ᠡᠨᠡ ᠬᠥᠮᠦᠨ ᠪᠣᠯ ᠴᠠᠢ ᠶ᠋ᠢᠨ ᠮᠤᠬᠤᠯᠠᠭ ᠲᠤ᠌ ᠡᠳᠦᠷ ᠥᠩᠭᠡᠷᠡᠭᠡᠵᠦ᠂ ᠬᠠᠮᠤᠭ ᠤ᠋ᠨ ᠡᠷᠲᠡ ᠢᠷᠡᠭᠡᠳ ᠬᠠᠮᠤᠭ ᠤ᠋ᠨ ᠣᠷᠣᠢ ᠬᠠᠷᠢᠳᠠᠭ ᠬᠥᠮᠦᠨ ᠶᠦᠮ᠃ ᠡᠳᠦᠭᠡ ᠡᠨᠡ ᠬᠥᠮᠦᠨ ᠪᠠᠰᠠ ᠯᠠ ᠪᠥᠭᠴᠥᠭᠡᠨᠡᠨ ᠢᠷᠡᠵᠦ ᠭᠤᠳᠤᠮᠵᠢᠨ ᠤ᠋ ᠲᠠᠯᠠ ᠶ᠋ᠢᠨ ᠪᠤᠯᠤᠩ ᠤ᠋ᠨ ᠰᠠᠨᠳᠠᠯᠢ ᠳᠡᠭᠡᠷᠡ ᠰᠠᠭᠤᠮᠠᠭᠴᠠ ᠠᠰᠠᠭᠤᠯᠲᠠ ᠲᠠᠯᠪᠢᠬᠤ ᠨᠢ ᠡᠨᠡ᠃ ᠭᠡᠪᠡᠴᠦ ᠬᠠᠷᠢᠭᠤᠯᠲᠠ ᠭᠡᠵᠦ ᠠᠯᠠᠭᠠ᠃ 《ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠᠨ ᠤ᠋ ᠰᠥᠮᠥᠰᠦ ᠶᠦᠮ ᠪᠣᠯᠪᠠ ᠤᠤ?》 ᠭᠡᠰᠡᠨ ᠠᠰᠠᠭᠤᠯᠲᠠ ᠨᠢ ᠮᠥᠨ ᠬᠠᠷᠢᠭᠤᠯᠲᠠ ᠦᠭᠡᠢ ᠬᠠᠶᠠᠭᠳᠠᠪᠠ᠃ ᠯᠤᠤ ᠱᠤᠸᠠᠨ ᠶᠠᠭᠠᠷᠠᠨ ᠭᠠᠷᠴᠤ ᠢᠷᠡᠭᠡᠳ ᠴᠠᠢ ᠪᠦᠷᠢᠵᠦ ᠥᠭᠪᠡ᠃
《ᠰᠢᠶᠣᠤ ᠱᠤᠸᠠᠨ ᠣᠷᠣᠭᠠᠳ ᠢᠷᠡ!》 ᠭᠡᠵᠦ ᠬᠤᠸᠠ ᠳᠠ ᠮᠠ ᠡᠵᠢ ᠰᠢᠶᠣᠤ ᠱᠤᠸᠠᠨ ᠢ᠋ᠶ᠋ᠠᠨ ᠳᠣᠲᠣᠷᠠ ᠲᠠᠰᠤᠯᠭᠠᠨ ᠳ᠋ᠠᠭᠠᠨ ᠠᠪᠠᠴᠢᠵᠤ᠂ ᠭᠠᠵᠠᠷ ᠳᠤᠮᠳᠠᠬᠢ ᠰᠠᠨᠳᠠᠯᠢ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠭᠠᠭᠠᠳ ᠪᠢᠴᠢᠬᠠᠨ ᠲᠠᠪᠠᠭ ᠲᠤ᠌ ᠫᠠᠳ ᠬᠠᠷᠠ ᠪᠥᠭᠡᠷᠡᠩᠬᠡᠢ ᠶᠠᠭᠤᠮᠠ ᠬᠢᠵᠦ ᠠᠪᠴᠢᠷᠠᠭᠠᠳ:
《ᠢᠳᠡᠴᠢᠬᠡ᠂ - ᠡᠪᠡᠳᠴᠢᠨ ᠴᠢᠨᠢ ᠡᠳᠡᠭᠡᠬᠦ ᠶᠦᠮ》 ᠭᠡᠵᠦ ᠠᠶᠠᠷᠬᠠᠨ ᠬᠡᠯᠡᠪᠡ᠃
ᠰᠢᠶᠣᠤ ᠱᠤᠸᠠᠨ ᠲᠡᠷᠡ ᠬᠠᠷᠠ ᠶᠠᠭᠤᠮᠠ ᠶ᠋ᠢ ᠠᠪᠴᠤ ᠪᠠᠬᠠᠨ ᠰᠢᠨᠵᠢᠭᠡᠳ ᠠᠮᠢ ᠪᠠᠨ ᠭᠠᠷ ᠲᠠᠭᠠᠨ ᠠᠳᠬᠤᠭᠰᠠᠨ ᠮᠡᠲᠦ ᠠᠢᠬᠤᠪᠲᠤᠷ ᠶᠡᠬᠡ ᠭᠠᠢᠬᠠᠪᠠ᠃ ᠢᠩᠭᠢᠭᠡᠳ ᠮᠠᠰᠢ ᠪᠣᠯᠭᠣᠮᠵᠢᠲᠠᠢ ᠪᠠᠷ ᠳᠤᠮᠳᠠᠭᠤᠷ ᠨᠢ ᠬᠠᠭᠠᠯᠤᠮᠠᠭᠴᠠ ᠰᠢᠲᠠᠩᠬᠠᠢ ᠬᠠᠯᠢᠰᠤᠨ ᠳᠣᠲᠣᠷᠠ ᠠ᠋ᠴᠠ ᠨᠢ ᠨᠢᠭᠡᠨ ᠵᠤᠷᠪᠤᠰ ᠴᠠᠭᠠᠨ ᠠᠭᠤᠷ ᠪᠤᠷᠭᠢᠵᠤ ᠭᠠᠷᠤᠭᠠᠳ ᠤᠳᠠᠯ ᠦᠭᠡᠢ ᠵᠠᠮᠬᠠᠷᠠᠯᠠ᠃ ᠦᠵᠡᠰᠡ᠂ ᠴᠠᠭᠠᠨ ᠭᠤᠯᠢᠷ ᠤ᠋ᠨ ᠮᠠᠨᠲᠠᠤ ᠶ᠋ᠢᠨ ᠬᠣᠶᠠᠷ ᠲᠠᠯᠠ ᠪᠠᠢᠯᠠ᠃ ᠭᠱᠠᠨ ᠵᠠᠭᠤᠷᠠ ᠲᠡᠷᠡ ᠨᠢ ᠪᠦᠷ ᠭᠡᠳᠡᠰᠦᠨ ᠳ᠋ᠦ᠍ ᠣᠷᠣᠵᠤ ᠠᠮᠲᠠ ᠶ᠋ᠢ ᠨᠢ ᠴᠤ᠌ ᠪᠦᠷ ᠮᠠᠷᠲᠠᠭᠠᠳ ᠬᠣᠭᠣᠰᠣᠨ ᠲᠠᠪᠠᠭ ᠡᠮᠦᠨᠡ ᠨᠢ ᠬᠡᠪᠲᠡᠨᠡ᠃ ᠠᠪᠤ ᠨᠢ ᠨᠢᠭᠡ ᠲᠠᠯᠠ ᠳ᠋ᠤᠨᠢ ᠵᠣᠭᠰᠣᠵᠤ᠂ ᠡᠵᠢ ᠨᠢ ᠪᠠᠰᠠ ᠨᠢᠭᠡ ᠲᠠᠯᠠ ᠳ᠋ᠤᠨᠢ ᠵᠣᠭᠰᠣᠭᠠᠳ᠂ ᠲᠡᠭᠦᠨ ᠦ᠌ ᠪᠡᠶᠡ ᠳ᠋ᠦ᠍ᠨᠢ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠶ᠋ᠢ ᠰᠢᠩᠭᠡᠬᠡᠨ ᠣᠷᠣᠭᠤᠯᠵᠤ ᠪᠠᠰᠠ ᠶᠠᠮᠠᠷ ᠨᠢᠭᠡᠨ ᠵᠦᠢᠯ ᠢ᠋ ᠲᠡᠳᠡᠨ ᠭᠠᠷᠭᠠᠬᠤ ᠮᠡᠲᠦ ᠬᠠᠷᠠᠵᠤ ᠪᠠᠢᠪᠠ᠃ ᠢᠩᠭᠢᠵᠦ ᠪᠠᠢᠲᠠᠯᠠ ᠰᠢᠶᠣᠤ ᠱᠤᠸᠠᠨ ᠤ᠋ ᠵᠢᠷᠦᠬᠡ ᠨᠢ ᠲᠦᠭᠰᠢᠵᠦ᠂ ᠥᠷᠥᠴᠡ ᠪᠡᠨ ᠳᠠᠷᠤᠭᠠᠳ ᠪᠠᠰᠠ ᠨᠢᠭᠡ ᠪᠦᠯᠦᠭ ᠬᠠᠨᠢᠶᠠᠯᠭᠠᠪᠠ᠃
《ᠲᠦᠷ ᠳᠤᠭᠬᠢᠭᠡᠳ ᠠᠪ᠂ - ᠤᠳᠠᠬᠤ ᠦᠭᠡᠢ ᠡᠳᠡᠭᠡᠬᠦ ᠶᠦᠮ》
ᠰᠢᠶᠣᠤ ᠱᠤᠸᠠᠨ᠂ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠪᠡᠷ ᠬᠠᠨᠢᠶᠠᠯᠭᠠᠭᠰᠠᠭᠠᠷ ᠬᠡᠪᠲᠡᠯᠡ᠃ ᠬᠤᠸᠠ ᠳᠠ ᠮᠠ ᠡᠵᠢ ᠠᠮᠢᠰᠬᠤᠭᠠ ᠨᠢ ᠠᠭᠤᠵᠢᠷᠠᠬᠤ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠭᠠᠳ ᠳᠠᠯᠠᠨ ᠨᠥᠬᠥᠭᠡᠰᠦ ᠲᠡᠢ ᠳᠠᠪᠬᠤᠷ ᠬᠥᠨᠵᠢᠯᠡ ᠨᠥᠮᠥᠷᠭᠡᠪᠡ᠃
ᠭᠤᠷᠪᠠ
ᠮᠤᠬᠤᠯᠠᠭ ᠤ᠋ᠨ ᠥᠷᠥᠭᠡᠨ ᠳ᠋ᠦ᠍ ᠮᠠᠰᠢ ᠣᠯᠠᠨ ᠬᠥᠮᠦᠨ ᠰᠠᠭᠤᠵᠤ᠂ ᠯᠤᠤ ᠱᠤᠸᠠᠨ ᠪᠠᠰᠠ ᠶᠡᠬᠡᠯᠡ ᠶᠠᠭᠠᠷᠠᠵᠤ ᠴᠦᠯᠬᠦᠭᠡᠷ ᠲᠣᠮᠣ ᠭᠠᠤᠯᠢᠨ ᠳᠡᠪᠦᠷᠡ ᠪᠠᠷᠢᠵᠤ ᠵᠣᠴᠢᠳ ᠲᠤ᠌ ᠨᠢᠭᠡ ᠨᠢᠭᠡ ᠪᠡᠷ ᠤᠰᠤ ᠨᠡᠮᠡᠵᠦ ᠥᠭᠬᠦ ᠪᠥᠭᠡᠳ ᠬᠣᠶᠠᠷ ᠨᠢᠳᠦᠨ ᠦ᠌ ᠬᠢᠨᠢ ᠤᠬᠤᠷᠬᠠᠢ ᠬᠠᠷᠠ ᠵᠢᠷᠤᠭᠠᠰᠤ ᠪᠠᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠪᠠᠢᠯᠠ᠃
《ᠯᠤᠤ ᠱᠤᠸᠠᠨ᠂ ᠪᠡᠶᠡ ᠴᠢᠨᠢ ᠠᠶᠠᠭᠦᠢ ᠪᠠᠢᠨᠠ ᠤᠤ?ᠴᠢ ᠡᠪᠡᠳᠴᠢᠯᠡᠭᠰᠡᠨ ᠤᠤ?》 ᠭᠡᠵᠦ ᠪᠤᠭᠤᠷᠤᠯ ᠰᠠᠬᠠᠯ ᠲᠠᠢ ᠨᠢᠭᠡ ᠬᠥᠮᠦᠨ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠯᠤᠤ ᠱᠤᠸᠠᠨ : 《ᠵᠦᠭᠡᠷ ᠵᠦᠭᠡᠷ》 ᠭᠡᠵᠦ ᠬᠠᠷᠢᠭᠤᠯᠤᠯᠠ᠃
《ᠵᠦᠭᠡᠷ ᠠ᠋? ᠬᠥᠭᠵᠢᠯᠲᠡᠢ ᠴᠤ᠌ᠪᠣᠭᠣ ᠯᠠ ᠪᠠᠢᠭᠠ ᠬᠥᠮᠦᠨ ᠶᠦᠮᠰᠡᠨ᠂ ᠶᠡᠷᠦ ᠨᠢ ᠡᠢᠮᠦ ᠁》 ᠭᠡᠵᠦ ᠪᠤᠭᠤᠷᠤᠯ ᠰᠠᠬᠠᠯᠲᠤ ᠴᠢᠨᠠᠭᠰᠢ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠪᠠ᠃
《ᠯᠤᠤ ᠱᠤᠸᠠᠨ ᠵᠠᠪ ᠦᠭᠡᠢ ᠪᠠᠢᠬᠤ ᠶᠤᠮ᠂ ᠬᠡᠷᠪᠡ ᠬᠦᠦ ᠨᠢ ᠁》 ᠭᠡᠵᠦ ᠪᠥᠭᠲᠥᠷ ᠡᠦ ᠱᠣᠣ ᠶᠧ ᠶ᠋ᠢ ᠶᠠᠷᠢᠵᠤ ᠳᠠᠭᠤᠰᠬᠤ ᠶ᠋ᠢᠨ ᠤᠷᠢᠳ᠂ ᠬᠠᠷᠠ ᠴᠠᠮᠴᠠ ᠶ᠋ᠢᠨ ᠡᠩᠭᠡᠷ ᠦ᠋ᠨ ᠲᠣᠪᠴᠢ ᠶ᠋ᠢ ᠲᠠᠯᠪᠢᠭᠰᠠᠨ᠂ ᠳᠠᠪᠤᠰᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠷᠭᠡᠨ ᠬᠠᠷᠠ ᠪᠦᠰᠡ ᠬᠠᠮᠢᠶᠠ ᠦᠭᠡᠢ ᠣᠷᠢᠶᠠᠭᠰᠠᠨ ᠬᠥᠨᠳᠡᠯᠡᠨ ᠮᠢᠬᠠᠨ ᠰᠢᠷᠬᠡᠭ ᠲᠡᠢ ᠬᠥᠮᠦᠨ ᠬᠠᠲᠠᠪᠴᠢ ᠠᠯᠬᠤᠨ ᠣᠷᠣᠵᠤ ᠢᠷᠡᠮᠡᠭᠴᠡ ᠯᠤᠤ ᠱᠤᠸᠠᠨ ᠤ᠋ ᠵᠦᠭ:
《ᠢᠳᠡᠭᠦᠯᠪᠡ ᠤᠤ? ᠭᠠᠢᠭᠤᠢ ᠤᠤ? ᠯᠤᠤ ᠱᠤᠸᠠᠨ ᠴᠢ ᠬᠤᠪᠢ ᠲᠠᠢ ᠬᠥᠮᠦᠨ! ᠨᠠᠳᠠ ᠰᠢᠭ᠋ ᠰᠤᠷᠠᠭ ᠴᠢᠮᠡᠭᠡ ᠰᠠᠢᠨ ᠰᠣᠨᠣᠰᠳᠠᠭ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ ᠪᠣᠯ ᠁》 ᠭᠡᠵᠦ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠡᠯᠡᠬᠦ ᠳ᠋ᠦ᠍ ᠯᠤᠤ ᠱᠤᠸᠠᠨ ᠨᠢᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠡᠪᠦᠷᠡ ᠪᠡᠨ ᠠᠳᠬᠤᠵᠤ᠂ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠨ ᠳᠣᠷᠣᠭᠰᠢ ᠰᠣᠭᠣᠢᠲᠠᠯᠠ ᠲᠠᠯᠪᠢᠵᠤ ᠢᠨᠢᠶᠡᠮᠰᠦᠭᠯᠡᠨ ᠰᠣᠨᠣᠰᠤᠨᠠ᠃ ᠭᠡᠷ ᠳᠦᠭᠦᠷᠡᠩ ᠬᠥᠮᠦᠰ ᠴᠤ᠌ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠪᠦᠷ ᠰᠣᠨᠣᠰᠤᠨᠠ᠃ ᠬᠤᠸᠠ ᠳᠠ ᠮᠠ ᠡᠵᠢ ᠪᠠᠰᠠ ᠤᠬᠤᠷᠬᠠᠢ ᠨᠢ ᠰᠢᠷᠭᠢᠭᠰᠡᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠢᠨᠢᠶᠡᠮᠰᠦᠭᠯᠡᠵᠦ᠂ ᠴᠠᠢ ᠴᠤ᠌ᠮᠣ ᠭᠠᠷᠭᠠᠵᠤ ᠨᠢᠭᠡ ᠮᠥᠬᠥᠯᠢᠭ ᠨᠠᠩᠭᠢᠶᠠᠳ ᠠᠷᠤᠷᠠ ᠬᠢᠭᠰᠡᠨ ᠳ᠋ᠦ᠍ ᠯᠤᠤ ᠱᠤᠸᠠᠨ ᠤᠰᠤ ᠬᠢᠵᠦ ᠥᠭᠪᠡ᠃
《ᠯᠠᠪ ᠡᠳᠡᠭᠡᠬᠦ ᠶᠦᠮ! ᠡᠨᠡ ᠭᠡᠭᠴᠢ ᠥᠭᠡᠷᠡ ᠶᠠᠭᠤᠮᠠ ᠲᠠᠢ ᠲᠠᠭᠠᠷᠠᠬᠤ ᠦᠭᠡᠢ᠂ ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠨᠢ ᠠᠪᠴᠢᠷᠠᠵᠤ ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠨᠢ ᠢᠳᠡᠭᠦᠯᠦᠭᠰᠡᠨ ᠰᠢᠦ ᠳᠡ 》 ᠭᠡᠵᠦ ᠬᠥᠨᠳᠡᠯᠡᠨ ᠮᠢᠬᠠᠨ ᠰᠢᠷᠬᠡᠭᠲᠦ ᠬᠥᠮᠦᠨ ᠶᠡᠬᠡ ᠳᠠᠭᠤ ᠪᠠᠷ ᠶᠠᠷᠢᠭᠰᠠᠭᠠᠷ ᠯᠠ ᠪᠠᠢᠪᠠ᠃
《ᠦᠨᠡᠬᠡᠷ ᠲᠡᠢᠮᠦ ᠰᠢᠦ᠂ ᠬᠡᠷᠪᠡ ᠺᠠᠩ ᠠᠪᠠᠭᠠ ᠨᠢ ᠬᠠᠢᠷᠠ ᠬᠠᠯᠠᠮᠵᠢ ᠦᠵᠡᠭᠦᠯᠦᠭᠰᠡᠨ ᠦᠭᠡᠢ ᠪᠣᠯ ᠶᠠᠭᠠᠬᠢᠵᠤ ᠢᠩᠭᠢᠵᠦ ᠴᠢᠳᠠᠬᠤ ᠁》 ᠭᠡᠵᠦ ᠬᠤᠸᠠ ᠳᠠ ᠮᠠ ᠡᠵᠢ ᠲᠡᠭᠦᠨ ᠳ᠋ᠦ᠍ ᠰᠡᠳᠬᠢᠯ ᠬᠥᠳᠡᠯᠦᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠲᠠᠯᠠᠷᠬᠠᠵᠤ ᠪᠠᠢᠯᠠ᠃
《ᠡᠳᠡᠭᠡᠬᠦ ᠶᠦᠮ᠂ ᠡᠳᠡᠭᠡᠬᠦ ᠶᠦᠮ᠂ ᠢᠩᠭᠢᠵᠦ ᠬᠠᠯᠠᠭᠤᠨ ᠳᠡᠭᠡᠷᠡ ᠨᠢ ᠢᠳᠡᠭᠦᠯᠦᠭᠰᠡᠨ ᠶᠦᠮ ᠴᠢᠨᠢ᠂ ᠬᠥᠮᠦᠨ ᠦ᠌ ᠴᠢᠰᠤᠲᠠᠢ ᠮᠠᠨᠲᠠᠤ ᠶᠠᠮᠠᠷ ᠵᠡᠷᠭᠡ ᠶ᠋ᠢᠨ ᠠᠭᠤᠰᠬᠢᠨ ᠤ᠋ ᠰᠦᠷᠢᠶᠡ ᠶ᠋ᠢ ᠪᠦᠷ ᠡᠳᠡᠭᠡᠭᠡᠬᠦ ᠶᠦᠮ!》 ᠭᠡᠪᠡ᠃
ᠬᠤᠸᠠ ᠳᠠ ᠮᠠ ᠡᠵᠢ 《ᠠᠭᠤᠰᠬᠢᠨ ᠰᠦᠷᠢᠶᠡ》 ᠭᠡᠰᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠴᠢᠷᠠᠢ ᠨᠢ ᠪᠠᠬᠠᠨ ᠪᠠᠷᠤᠢᠵᠤ ᠤᠷᠮᠠ ᠦᠭᠡᠢ ᠮᠡᠲᠦ ᠪᠣᠯᠪᠠ᠃ ᠭᠡᠪᠡᠴᠦ ᠳᠣᠣᠷᠠ ᠪᠠᠨ ᠢᠨᠢᠶᠡᠮᠰᠦᠭᠯᠡᠬᠦ ᠴᠢᠷᠠᠢ ᠭᠠᠷᠭᠠᠵᠤ ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠣᠯᠤᠭᠠᠳ ᠭᠠᠷᠪᠠ᠃ ᠭᠡᠲᠡᠯᠡ ᠺᠠᠩ ᠠᠪᠠᠭᠠ ᠲᠡᠭᠦᠨ ᠢ᠋ ᠳᠡᠮᠡᠢ ᠬᠠᠢᠬᠤᠷᠤᠭᠰᠠᠨ ᠴᠤ᠌ ᠦᠭᠡᠢ᠂ ᠮᠥᠨ ᠬᠦ᠌ ᠬᠣᠭᠣᠯᠠᠢ ᠪᠠᠨ ᠰᠢᠬᠠᠵᠤ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠶᠠᠷᠢᠭᠰᠠᠭᠠᠷ ᠪᠠᠢᠭᠠᠳ ᠤᠨᠲᠠᠵᠤ ᠪᠠᠢᠭᠰᠠᠨ ᠰᠢᠶᠣᠤ ᠱᠤᠸᠠᠨ ᠢ᠋ ᠪᠠᠰᠠ ᠰᠡᠷᠢᠭᠡᠭᠡᠳ ᠬᠠᠨᠢᠶᠠᠳᠤ ᠶ᠋ᠢ ᠨᠢ ᠬᠥᠳᠡᠯᠭᠡᠪᠡ᠃
《ᠦᠵᠡᠰᠡ᠂ ᠲᠠᠨ ᠤ᠋ ᠰᠢᠶᠣᠤ ᠱᠤᠸᠠᠨ ᠴᠢᠨᠢ ᠡᠢᠮᠦ ᠶᠡᠬᠡ ᠬᠤᠪᠢ ᠲᠠᠢ ᠠᠵᠢ᠃ ᠡᠨᠡ ᠡᠪᠡᠳᠴᠢᠨ ᠵᠠᠪᠠᠯ ᠬᠣᠭ ᠦᠭᠡᠢ ᠡᠳᠡᠭᠡᠬᠦ ᠶᠦᠮ᠃ ᠯᠤᠤ ᠱᠤᠸᠠᠨ ᠡᠳᠦᠷ ᠲᠤᠷᠰᠢ ᠪᠠᠶᠠᠷᠲᠠᠢ ᠪᠠᠢᠭᠠ ᠶ᠋ᠢ ᠨᠢ ᠦᠵᠡᠬᠦ ᠦᠭᠡᠢ ᠤᠤ》 ᠭᠡᠵᠦ ᠪᠤᠭᠤᠷᠤᠯ ᠰᠠᠬᠠᠯᠲᠤ ᠶᠠᠷᠢᠭᠰᠠᠭᠠᠷ ᠺᠠᠩ ᠠᠪᠠᠭᠠ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠵᠤ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ: 《ᠺᠠᠩ ᠠᠪᠠᠭᠠ ᠠ᠋ - ᠰᠣᠨᠣᠰᠬᠤᠯᠠ ᠥᠨᠥᠳᠥᠷ ᠦ᠋ᠨ ᠰᠢᠢᠳᠬᠡᠭᠰᠡᠨ ᠲᠡᠷᠡ ᠶᠠᠯᠠᠲᠠᠨ ᠴᠢᠨᠢ ᠰᠢᠶᠠ ᠣᠪᠣᠭᠲᠤ ᠶ᠋ᠢᠨ ᠬᠡᠦᠬᠡᠳ ᠶᠦᠮ ᠭᠡᠨᠡ᠃ ᠲᠡᠷᠡ ᠴᠢᠨᠢ ᠬᠡᠨ ᠦ᠌ ᠬᠢᠨᠢ ᠬᠦᠦ ᠪᠣᠢ? ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂
《ᠬᠡᠨ? ᠰᠢᠶᠠ ᠰᠧ ᠨᠠᠢ ᠨᠠᠢ ᠶ᠋ᠢᠨ ᠬᠦᠦ ᠪᠢᠰᠢ ᠤᠤ᠂ ᠲᠡᠷᠡ ᠮᠠᠭᠤ ᠴᠢᠰᠤ!》 ᠭᠡᠵᠦ ᠺᠠᠩ ᠠᠪᠠᠭᠠ᠂ ᠬᠥᠮᠦᠰ ᠪᠦᠷ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠰᠣᠨᠢᠷᠬᠠᠯᠲᠠᠢ ᠰᠣᠨᠣᠰᠴᠤ ᠪᠠᠢᠭᠠ ᠶ᠋ᠢ ᠦᠵᠡᠭᠡᠳ ᠨᠡᠩ ᠪᠠᠶᠠᠷᠯᠠᠵᠤ᠂ ᠮᠢᠬᠠᠨ ᠰᠢᠷᠬᠡᠭ ᠨᠢ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠲᠠᠰᠤᠷᠬᠠᠢᠳᠠᠵᠤ ᠤᠯᠠᠮ ᠶᠡᠬᠡ ᠳᠠᠭᠤ ᠪᠠᠷ: 《ᠡᠨᠡ ᠮᠠᠭᠤ ᠴᠢᠰᠤ ᠦᠨᠡᠬᠡᠷ ᠠᠮᠢᠳᠤ ᠶᠠᠪᠤᠬᠤ ᠳᠤᠷᠠ ᠦᠭᠡᠢ ᠪᠠᠢᠨᠠ᠃ ᠪᠢ ᠡᠨᠡ ᠤᠳᠠᠭᠠ ᠬᠠᠷᠢᠨ ᠶᠠᠭᠤ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ᠂ ᠬᠠᠭᠤᠯᠵᠤ ᠠᠪᠤᠭᠰᠠᠨ ᠬᠤᠪᠴᠠᠰᠤ ᠶ᠋ᠢ ᠨᠢ ᠴᠥᠮ ᠱᠣᠷᠣᠩ ᠮᠠᠨᠠᠭᠴᠢ ᠤᠯᠠᠭᠠᠨ ᠨᠢᠳᠦᠨ ᠠ ᠶ᠋ᠢ ᠠᠪᠴᠢᠬᠠᠯᠠ᠃ - ᠲᠡᠷᠢᠭᠦᠨ ᠳ᠋ᠦ᠍ᠨᠢ ᠮᠠᠨ ᠤ᠋ ᠱᠤᠸᠠᠨ ᠠᠪᠠᠭᠠ ᠬᠤᠪᠢ ᠲᠠᠭᠠᠷᠠᠵᠠᠢ᠃ ᠬᠣᠶᠠᠳᠤᠭᠠᠷ ᠲᠤᠨᠢ ᠰᠢᠶᠠ ᠰᠠᠨ ᠶᠧ ᠬᠣᠷᠢᠨ ᠲᠠᠪᠤᠨ ᠯᠠᠩ ᠴᠠᠰᠤ ᠴᠠᠭᠠᠨ ᠮᠥᠩᠭᠥ ᠪᠡᠷ ᠱᠠᠩᠨᠠᠭᠳᠠᠪᠠ᠃ ᠲᠡᠷᠡ ᠨᠢ ᠰᠣᠬᠣᠷ ᠵᠣᠭᠣᠰ ᠤ᠋ᠨ ᠬᠣᠷᠣᠭᠳᠠᠯ ᠴᠤ᠌ ᠦᠭᠡᠢ ᠪᠡᠷ ᠴᠥᠮ ᠲᠡᠭᠦᠨ ᠦ᠌ ᠡᠪᠦᠷ ᠲᠦ᠍ ᠣᠷᠣᠯᠠ》 ᠭᠡᠪᠡ᠃
ᠰᠢᠶᠣᠤ ᠱᠤᠸᠠᠨ ᠪᠢᠴᠢᠬᠠᠨ ᠲᠠᠰᠤᠯᠭᠠᠨ ᠠ᠋ᠴᠠ ᠪᠠᠨ ᠭᠡᠯᠳᠦᠷᠢᠬᠢᠯᠡᠨ ᠭᠠᠷᠴᠤ ᠢᠷᠡᠭᠡᠳ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠷᠥᠴᠡ ᠪᠡᠨ ᠳᠠᠷᠤᠵᠤ ᠪᠦᠭᠰᠢᠨ ᠬᠠᠨᠢᠶᠠᠭᠰᠠᠭᠠᠷ᠂ ᠲᠣᠭᠣᠭᠠᠨ ᠠ᠋ᠴᠠ ᠪᠠᠨ ᠨᠢᠭᠡ ᠠᠶᠠᠭᠠ ᠬᠦᠢᠲᠡᠨ ᠪᠤᠳᠠᠭᠠ ᠠᠶᠠᠭᠠᠯᠠᠵᠤ ᠳᠡᠭᠡᠷᠡ ᠨᠢ ᠪᠤᠴᠠᠯᠤᠭᠰᠠᠨ ᠤᠰᠤ ᠬᠢᠭᠡᠳ ᠢᠳᠡᠯᠡ᠃ ᠬᠤᠸᠠ ᠳᠠ ᠮᠠ ᠡᠵᠢ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠢᠷᠡᠭᠡᠳ ᠨᠠᠮ ᠳᠠᠭᠤ ᠪᠠᠷ: 《ᠰᠢᠶᠣᠤ ᠱᠤᠸᠠᠨ᠂ ᠪᠠᠬᠠᠨ ᠭᠠᠢᠭᠤᠢ ᠪᠠᠢᠨᠠ ᠤᠤ? ᠮᠥᠨ ᠯᠡ ᠥᠯᠥᠰᠴᠦ ᠪᠠᠢᠨᠠ ᠤᠤ?》 ᠭᠡᠵᠦ ᠠᠰᠠᠭᠤᠯᠠ᠃
《ᠡᠳᠡᠭᠡᠬᠦ ᠶᠦᠮ᠂ ᠯᠠᠪ ᠡᠳᠡᠭᠡᠬᠦ ᠶᠦᠮ!》 ᠭᠡᠵᠦ ᠺᠠᠩ ᠠᠪᠠᠭᠠ ᠰᠢᠶᠣᠤ ᠱᠤᠸᠠᠨ ᠢ᠋ ᠬᠠᠷᠠᠵᠤ ᠠᠪᠤᠭᠠᠳ ᠮᠥᠨ ᠬᠦ᠌ ᠣᠯᠠᠨ ᠤ᠋ ᠵᠦᠭ ᠬᠠᠨᠳᠤᠵᠤ: 《ᠰᠢᠶᠠ ᠰᠠᠨ ᠶᠧ ᠦᠨᠡᠬᠡᠷ ᠰᠣᠷᠭᠣᠭ ᠬᠥᠮᠦᠨ᠂ ᠬᠡᠷᠪᠡ ᠲᠡᠷᠡ ᠵᠠᠪᠳᠤᠵᠤ ᠵᠠᠭᠠᠯᠳᠤᠭᠰᠠᠨ ᠦᠭᠡᠢ ᠪᠣᠯ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠦᠢᠰᠦ ᠲᠡᠮᠲᠡᠷᠢᠭᠳᠡᠬᠦ ᠪᠣᠯᠤᠨᠠ᠃ ᠣᠳᠣ ᠶᠠᠮᠠᠷ ᠪᠠᠢᠨᠠ ᠪᠣᠢ? ᠮᠥᠩᠭᠥ! - ᠡᠨᠡ ᠵᠢᠭᠠᠯ ᠦᠨᠡᠬᠡᠷ ᠬᠥᠮᠦᠨ ᠦ᠌ ᠵᠤᠯᠵᠠᠭᠠ ᠪᠢᠰᠢ᠂ ᠱᠣᠷᠣᠩ ᠳ᠋ᠤ᠌ ᠬᠣᠷᠢᠭᠳᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠪᠠᠰᠠ ᠱᠣᠷᠣᠩ ᠤ᠋ᠨ ᠲᠦᠷᠦᠭᠦᠦ ᠳ᠋ᠦ᠍ ᠤᠷᠪᠠᠬᠤ ᠶ᠋ᠢ ᠵᠢᠭᠠᠳᠠᠭ ᠭᠡᠨᠡ᠃ 》
《ᠬᠦᠢ! ᠴᠢᠩᠭᠢᠵᠦ ᠶᠠᠭᠠᠬᠢᠵᠤ ᠪᠣᠯᠳᠠᠭ ᠶᠤᠮ?》 ᠭᠡᠵᠦ ᠳᠣᠲᠣᠭᠠᠳᠤ ᠮᠥᠷ ᠲᠦ᠍ ᠰᠠᠭᠤᠭᠠ ᠬᠣᠷᠢ ᠭᠠᠷᠤᠢ ᠨᠠᠰᠤᠨ ᠤ᠋ ᠨᠢᠭᠡ ᠬᠥᠮᠦᠨ ᠬᠢᠯᠢᠩᠨᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠶᠠᠷᠢᠵᠤ ᠰᠠᠭᠤᠨᠠ᠃
《ᠤᠯᠠᠭᠠᠨ ᠨᠢᠳᠦᠨ ᠠ ᠶ᠋ᠢ ᠲᠡᠭᠦᠨ ᠦ᠌ ᠴᠤ᠌ᠬᠣᠮ ᠪᠠᠢᠳᠠᠯ ᠢ᠋ ᠨᠢ ᠮᠡᠳᠡᠬᠦ ᠪᠡᠷ ᠣᠴᠢᠭᠰᠠᠨ ᠳ᠋ᠤ᠌ ᠬᠠᠷᠢᠨ ᠲᠡᠭᠦᠨ ᠢ᠋ ᠪᠡᠶᠡ ᠳ᠋ᠡᠭᠡᠨ ᠲᠠᠲᠠᠬᠤ ᠭᠡᠵᠦ: 〈ᠳᠠᠢᠴᠢᠩ ᠤᠯᠤᠰ ᠤ᠋ᠨ ᠲᠥᠷᠥ ᠪᠣᠯ ᠮᠠᠨ ᠤ᠋ ᠣᠯᠠᠨ ᠨᠡᠢᠲᠡ ᠶ᠋ᠢᠨ ᠶᠦᠮ 〉 ᠭᠡᠵᠦ ᠭᠡᠨᠡ᠂ ᠡᠨᠡ ᠴᠢᠨᠢ ᠦᠭᠡ ᠤᠤ? ᠤᠯᠠᠭᠠᠨ ᠨᠢᠳᠦᠨ ᠠ ᠶ᠋ᠢ ᠤᠭ ᠠ᠋ᠴᠠ ᠲᠡᠭᠦᠨ ᠦ᠌ ᠭᠡᠷ ᠲᠦ᠍ ᠭᠠᠭᠴᠠ ᠡᠵᠢ ᠪᠠᠢᠬᠤ ᠶ᠋ᠢ ᠮᠡᠳᠡᠳᠡᠭ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ ᠬᠠᠷᠢᠨ ᠲᠡᠢᠮᠦ ᠤᠯᠠᠭᠠᠨ ᠨᠢᠴᠦᠭᠦᠨ ᠶᠠᠳᠠᠭᠤ ᠭᠡᠳᠡᠭ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ᠂ ᠴᠢᠩᠭᠢᠭᠡᠳ ᠣᠳᠣ ᠳᠤᠰᠤᠯ ᠲᠣᠰᠣ ᠴᠤ᠌ ᠰᠢᠬᠠᠵᠤ ᠣᠯᠤᠭᠰᠠᠨ ᠦᠭᠡᠢ ᠳ᠋ᠡᠭᠡᠨ ᠴᠡᠭᠡᠵᠢ ᠪᠡᠨ ᠳᠡᠯᠪᠡᠷᠡᠲᠡᠯᠡ ᠠᠭᠤᠷᠯᠠᠵᠠᠢ᠃ ᠲᠡᠷᠡ ᠬᠠᠷᠢᠨ ᠪᠠᠷᠰ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠮᠠᠭᠠᠵᠢᠵᠤ ᠥᠭᠬᠦ ᠭᠡᠵᠦ ᠪᠠᠢᠭᠠᠳ ᠬᠣᠶᠠᠷ ᠠᠯᠠᠭᠠᠳᠠᠭᠤᠯᠵᠤ ᠭᠡᠨᠡ!》
《ᠠ ᠶ᠋ᠢ ᠠᠬᠠ ᠪᠣᠯ ᠨᠢᠳᠤᠷᠭᠠᠨ ᠤ᠋ ᠡᠷᠳᠡᠮ ᠲᠡᠢ ᠶᠦᠮ ᠴᠢᠨᠢ᠂ ᠬᠣᠶᠠᠷ ᠠᠯᠠᠭᠠ ᠨᠢ ᠲᠡᠭᠦᠨ ᠳ᠋ᠡᠭᠡᠨ ᠵᠥᠪ ᠪᠠᠢᠯᠭᠦᠢ ᠳᠡ 》 ᠭᠡᠵᠦ ᠪᠤᠯᠤᠩ ᠳ᠋ᠤ᠌ ᠰᠠᠭᠤᠭᠠ ᠪᠥᠭᠲᠥᠷ ᠭᠡᠨᠡᠳᠲᠡ ᠪᠠᠶᠠᠷᠲᠠᠢ ᠶᠠᠷᠢᠯᠠ᠃
《ᠡᠨᠡ ᠮᠣᠨᠳᠢ ᠵᠣᠳᠣᠭᠳᠠᠬᠤ ᠠ᠋ᠴᠠ ᠠᠶᠤᠬᠤ ᠦᠭᠡᠢ᠂ ᠬᠠᠷᠢᠨ ᠬᠥᠭᠡᠷᠦᠬᠦᠢ ᠳᠡ ᠭᠡᠵᠦ ᠪᠠᠢᠯᠠ ᠭᠡᠨᠡ᠃ 》
ᠪᠤᠭᠤᠷᠤᠯ ᠰᠠᠬᠠᠯᠲᠤ: 《ᠡᠨᠡ ᠠᠳᠤᠭᠤᠰᠤ ᠶ᠋ᠢ ᠵᠣᠳᠣᠬᠤ ᠳ᠋ᠤ᠌ ᠬᠥᠭᠡᠷᠦᠬᠦᠢᠯᠡᠬᠦ ᠶᠠᠭᠤ ᠪᠠᠢᠬᠤ ᠪᠣᠢ!》 ᠭᠡᠬᠦ ᠳ᠋ᠦ᠍᠂
ᠺᠠᠩ ᠠᠪᠠᠭᠠ ᠲᠡᠭᠦᠨ ᠢ᠋ ᠲᠣᠭᠣᠮᠰᠠᠷᠯᠠᠬᠤ ᠦᠭᠡᠢ ᠪᠠᠢᠳᠠᠯ ᠲᠠᠢ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠨ: 《ᠴᠢ ᠮᠢᠨᠦ ᠦᠭᠡ ᠶ᠋ᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ ᠰᠢᠪ ᠳᠡ᠂ ᠲᠡᠷᠡ ᠴᠢᠨᠢ ᠰᠠᠨᠠᠭᠠᠨ ᠳ᠋ᠠᠭᠠᠨ ᠠ ᠶ᠋ᠢ ᠶ᠋ᠢ ᠬᠥᠭᠡᠷᠦᠬᠦᠢ ᠭᠡᠵᠦ ᠰᠢᠦ》 ᠭᠡᠪᠡ᠃
ᠰᠣᠨᠣᠰᠴᠤ ᠪᠠᠢᠭᠰᠠᠨ ᠬᠥᠮᠦᠰ ᠦ᠋ᠨ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠭᠡᠨᠡᠳᠲᠡ ᠭᠥᠯᠢᠷᠡᠬᠦ ᠲᠥᠯᠥᠪᠲᠡᠢ ᠪᠣᠯᠵᠤ᠂ ᠦᠭᠡ ᠪᠡᠨ ᠪᠠᠰᠠ ᠵᠣᠭᠰᠣᠪᠠ᠃ ᠰᠢᠶᠣᠤ ᠱᠤᠸᠠᠨ ᠬᠣᠭᠣᠯᠠ ᠪᠠᠨ ᠢᠳᠡᠵᠦ ᠳᠠᠭᠤᠰᠪᠠ᠃ ᠪᠦᠬᠦ ᠪᠡᠶᠡ ᠡᠴᠡ ᠨᠢ ᠬᠥᠯᠥᠰᠥ ᠠᠰᠬᠠᠷᠠᠵᠤ ᠲᠣᠯᠣᠭᠠᠢ ᠠ᠋ᠴᠠ ᠨᠢ ᠠᠭᠤᠷ ᠪᠠᠭᠠᠭᠢᠵᠤ ᠪᠠᠢᠯᠠ᠃
《ᠠ ᠶ᠋ᠢ ᠬᠥᠭᠡᠷᠦᠬᠦᠢ ᠭᠡᠨᠡ - ᠰᠣᠯᠢᠶᠠᠷᠠᠵᠤ ᠪᠠᠢᠨᠠ᠂ ᠶᠠᠭ ᠰᠣᠯᠢᠶᠠᠷᠠᠵᠤ ᠪᠠᠢᠨᠠ》 ᠭᠡᠵᠦ ᠪᠤᠭᠤᠷᠤᠯ ᠰᠠᠬᠠᠯᠲᠤ ᠭᠡᠨᠡᠳᠲᠡ ᠤᠬᠠᠭᠠ ᠣᠷᠣᠭᠰᠠᠨ ᠮᠡᠲᠦ ᠬᠡᠯᠡᠪᠡ᠃
《ᠰᠣᠯᠢᠶᠠᠷᠠᠵᠤ ᠪᠠᠢᠨᠠ》 ᠭᠡᠵᠦ ᠬᠣᠷᠢ ᠭᠠᠷᠤᠢ ᠨᠠᠰᠤᠨ ᠤ᠋ ᠬᠥᠮᠦᠨ ᠴᠤ᠌ ᠭᠡᠨᠡᠳᠲᠡ ᠤᠬᠠᠭᠠ ᠣᠷᠣᠭᠰᠠᠨ ᠮᠡᠲᠦ ᠬᠡᠯᠡᠪᠡ᠃
ᠮᠤᠬᠤᠯᠠᠭ ᠲᠤ᠌ ᠰᠠᠭᠤᠵᠤ ᠪᠠᠢᠭᠰᠠᠨ ᠵᠣᠴᠢᠳ ᠳᠠᠬᠢᠨ ᠨᠡᠮᠡᠷᠢ ᠣᠷᠣᠭᠰᠠᠨ ᠮᠡᠲᠦ ᠢᠨᠢᠶᠡᠯᠴᠡᠵᠦ ᠶᠠᠷᠢᠯᠴᠠᠵᠤ ᠡᠬᠢᠯᠡᠪᠡ᠃ ᠰᠢᠶᠣᠤ ᠱᠤᠸᠠᠨ ᠪᠠᠰᠠ ᠡᠨᠡ ᠦᠢᠮᠡᠭᠡᠨ ᠲᠡᠢ ᠳᠠᠭᠤ ᠨᠡᠢᠯᠡᠭᠦᠯᠵᠦ ᠪᠦᠭᠰᠢᠨ ᠬᠠᠨᠢᠶᠠᠯᠭᠠᠵᠤ ᠪᠠᠢᠯᠠ᠃ ᠺᠠᠩ ᠠᠪᠠᠭᠠ ᠳᠡᠷᠭᠡᠳᠡ ᠨᠢ ᠣᠴᠢᠵᠤ ᠮᠥᠷᠥ ᠶ᠋ᠢ ᠨᠢ ᠠᠯᠠᠭᠠᠳᠠᠵᠤ:
《ᠰᠢᠶᠣᠤ ᠱᠤᠸᠠᠨ᠂ ᠡᠳᠡᠭᠡᠬᠦ ᠶᠦᠮ - ᠪᠤᠤ ᠢᠩᠭᠢᠵᠦ ᠬᠠᠨᠢᠶᠠ᠂ ᠡᠳᠡᠭᠡᠬᠦ ᠶᠦᠮ -》 ᠭᠡᠪᠡ᠃
ᠪᠥᠭᠲᠥᠷ ᠡᠦ ᠱᠣᠣ ᠶᠧ : 《ᠰᠣᠯᠢᠶᠠᠷᠠᠵᠤ ᠪᠠᠢᠨᠠ》 ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠯᠵᠠᠭᠰᠠᠭᠠᠷ ᠬᠡᠯᠡᠪᠡ᠃
ᠳᠥᠷᠪᠡ
ᠪᠠᠷᠠᠭᠤᠨ ᠲᠡᠭᠦᠷᠭᠡ ᠶ᠋ᠢᠨ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠢ᠋ ᠨᠠᠭᠠᠯᠳᠤᠵᠤ ᠪᠠᠢᠭᠠ ᠬᠡᠰᠡᠭ ᠭᠠᠵᠠᠷ ᠪᠣᠯ ᠠᠯᠪᠠᠨ ᠤ᠋ ᠭᠠᠵᠠᠷ ᠶᠤᠮ᠃ ᠳᠤᠮᠳᠠᠭᠤᠷ ᠨᠢ ᠭᠠᠷᠤᠭᠰᠠᠨ ᠮᠤᠷᠤᠢ ᠰᠠᠷᠤᠢ ᠴᠤᠪᠤᠭᠠ ᠨᠢ ᠲᠦᠳᠡ ᠵᠠᠮ ᠢ᠋ ᠡᠷᠢᠭᠰᠡᠨ ᠤᠯᠤᠰ ᠤ᠋ᠨ ᠭᠤᠲᠤᠯ ᠤ᠋ᠨ ᠤᠯᠠ ᠪᠠᠷ ᠪᠣᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠡᠨᠡ ᠨᠢ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠬᠠᠷᠢᠨ ᠨᠢᠭᠡ ᠠᠶᠠᠨᠳᠠᠭᠠᠨ ᠪᠦᠲᠦᠭᠰᠡᠨ ᠵᠠᠭᠠᠭ ᠪᠣᠯᠵᠠᠢ᠃ ᠵᠠᠮ ᠤ᠋ᠨ ᠵᠡᠭᠦᠨ ᠭᠠᠷ ᠲᠠᠯᠠ ᠳ᠋ᠤᠨᠢ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠭᠳᠠᠭᠰᠠᠳ ᠪᠠ ᠭᠢᠨᠳᠠᠨ ᠳ᠋ᠤ᠌ ᠦᠬᠦᠭᠰᠡᠳ ᠦ᠋ᠨ ᠪᠤᠯᠠᠰᠢ ᠶ᠋ᠢ᠂ ᠪᠠᠷᠠᠭᠤᠨ ᠭᠠᠷ ᠲᠠᠯᠠ ᠳ᠋ᠤᠨᠢ ᠦᠭᠡᠢᠭᠦᠴᠦᠳ ᠦ᠋ᠨ ᠪᠤᠯᠠᠰᠢ ᠶ᠋ᠢ ᠪᠠᠶᠠᠴᠤᠳ ᠤ᠋ᠨ ᠨᠠᠰᠤᠨ ᠤ᠋ ᠪᠠᠶᠠᠷ ᠲᠤ᠌ ᠪᠡᠯᠡᠳᠬᠡᠳᠡᠭ ᠮᠠᠨᠲᠠᠤ ᠶ᠋ᠢᠨ ᠣᠪᠣᠭᠠ ᠰᠢᠭ᠋ ᠶᠠᠭᠰᠢᠷᠠᠲᠠᠯᠠ ᠣᠪᠣᠭᠠᠯᠠᠵᠠᠢ᠃
ᠡᠨᠡ ᠵᠢᠯ ᠦ᠋ᠨ ᠬᠠᠩᠰᠢ ᠶ᠋ᠢᠨ ᠦᠶᠡ ᠪᠡᠷ ᠣᠨᠴᠣᠭᠣᠢ ᠵᠢᠬᠡᠭᠦᠨ᠂ ᠤᠳᠠ ᠤᠯᠢᠶᠠᠰᠤ ᠳᠥᠩᠭᠡᠵᠢ ᠲᠠᠯᠠ ᠪᠣᠷᠣᠭᠠᠨ ᠤ᠋ ᠴᠢᠨᠡᠭᠡᠬᠡᠨ ᠨᠠᠬᠢᠶᠠᠯᠠᠭᠰᠠᠨ ᠪᠠᠢᠯᠠ᠃ ᠦᠷ ᠴᠠᠢᠮᠠᠭᠴᠠ᠂ ᠬᠤᠸᠠ ᠳᠠ ᠮᠠ ᠡᠵᠢ ᠪᠠᠷᠠᠭᠤᠨ ᠭᠠᠷ ᠲᠠᠯᠠ ᠶ᠋ᠢᠨ ᠰᠢᠨᠡᠬᠡᠨ ᠪᠤᠯᠠᠰᠢᠨ ᠤ᠋ ᠡᠮᠦᠨᠡ ᠳᠥᠷᠪᠡᠨ ᠲᠠᠪᠠᠭ ᠵᠠᠭᠤᠰᠢ ᠨᠢᠭᠡ ᠠᠶᠠᠭᠠ ᠪᠤᠳᠠᠭᠠ ᠦᠷᠦᠭᠡᠳ᠂ ᠨᠢᠭᠡ ᠵᠡᠷᠭᠡ ᠤᠬᠢᠯᠠᠪᠠ᠃ ᠴᠠᠭᠠᠰᠤ ᠰᠢᠲᠠᠭᠠᠵᠤ ᠳᠠᠭᠤᠰᠤᠭᠠᠳ ᠲᠣᠪ ᠳᠤᠭᠤᠢ ᠪᠠᠬᠠᠨ ᠰᠠᠭᠤᠵᠤ ᠶᠠᠮᠠᠷ ᠨᠢᠭᠡᠨ ᠵᠦᠢᠯ ᠢ᠋ ᠬᠦᠯᠢᠶᠡᠬᠦ ᠮᠡᠲᠦ ᠪᠣᠯᠪᠠᠴᠤ ᠥᠪᠡᠷ ᠢ᠋ᠶ᠋ᠡᠨ ᠪᠠᠰᠠ ᠦᠯᠦ ᠮᠡᠳᠡᠨᠡ᠃ ᠵᠥᠭᠡᠯᠡᠨ ᠰᠠᠯᠬᠢᠨ ᠳ᠋ᠤ᠌ ᠰᠡᠷᠪᠡᠯᠵᠡᠨ ᠬᠡᠢᠰᠦᠭᠰᠡᠨ ᠰᠠᠨᠴᠢᠭ ᠤ᠋ᠨ ᠦᠰᠦ ᠨᠢ ᠨᠢᠳᠤᠨᠤᠨ ᠠ᠋ᠴᠠ ᠬᠣᠯᠠ ᠢᠯᠡᠭᠦᠦ ᠴᠠᠢᠵᠠᠢ᠃
ᠴᠤᠪᠤᠭᠠ ᠵᠠᠮ ᠢ᠋ᠶ᠋ᠠᠷ ᠪᠠᠰᠠ ᠬᠠᠭᠠᠰ ᠪᠤᠭᠤᠷᠤᠯᠲᠤᠭᠰᠠᠨ ᠲᠣᠯᠣᠭᠠᠢ ᠲᠠᠢ᠂ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠲᠠᠢ ᠨᠢᠭᠡᠨ ᠪᠦᠰᠡᠭᠦᠢ᠂ ᠬᠠᠭᠤᠴᠢᠨ ᠤᠯᠠᠭᠠᠨ ᠲᠣᠭᠣᠷᠢᠭ ᠰᠠᠭᠰᠤ ᠲᠣᠬᠣᠢᠯᠠᠵᠤ᠂ ᠭᠤᠷᠪᠠ ᠠᠯᠬᠤᠨ ᠨᠢᠭᠡ ᠠᠮᠠᠷᠠᠭᠰᠠᠭᠠᠷ ᠠᠢᠰᠤᠢ᠃ ᠲᠡᠷᠡ ᠪᠦᠰᠡᠭᠦᠢ ᠬᠤᠸᠠ ᠳᠠ ᠮᠠ ᠡᠵᠢ ᠶ᠋ᠢᠨ ᠭᠠᠵᠠᠷ ᠰᠠᠭᠤᠭᠠᠳ ᠲᠡᠭᠦᠨ ᠢ᠋ ᠬᠠᠷᠠᠵᠤ ᠪᠠᠢᠬᠤ ᠶ᠋ᠢ ᠭᠡᠨᠡᠳᠲᠡ ᠦᠵᠡᠭᠡᠳ ᠪᠠᠬᠠᠨ ᠲᠦᠳᠡᠭᠡᠯᠵᠡᠵᠦ᠂ ᠵᠢᠪᠡᠬᠡᠢ ᠴᠠᠭᠠᠨ ᠴᠢᠷᠠᠢ ᠳᠡᠭᠡᠷᠡ ᠨᠢ ᠢᠴᠢᠵᠦ ᠰᠢᠷᠪᠡᠭᠡᠲᠦᠬᠦ ᠪᠠᠢᠳᠠᠯ ᠢᠯᠡᠷᠡᠭᠰᠡᠨ ᠪᠣᠯᠪᠠᠴᠤ ᠠᠷᠭᠠ ᠪᠤᠶᠤ ᠨᠢᠭᠤᠷ ᠢ᠋ᠶ᠋ᠠᠨ ᠰᠢᠷᠢᠯᠡᠨ ᠵᠡᠭᠦᠨ ᠭᠠᠷ ᠲᠠᠯᠠ ᠶ᠋ᠢᠨ ᠨᠢᠭᠡᠨ ᠰᠢᠨᠡᠬᠡᠨ ᠪᠤᠯᠠᠰᠢᠨ ᠤ᠋ ᠳᠡᠷᠭᠡᠳᠡ ᠠᠯᠬᠤᠵᠤ ᠣᠴᠢᠭᠠᠳ ᠰᠠᠭᠰᠤ ᠪᠠᠨ ᠲᠠᠯᠪᠢᠪᠠ᠃
ᠲᠡᠷᠡ ᠪᠤᠯᠠᠰᠢ᠂ ᠰᠢᠶᠣᠤ ᠱᠤᠸᠠᠨ ᠤ᠋ ᠪᠤᠯᠠᠰᠢ ᠲᠠᠢ ᠨᠢᠭᠡᠨ ᠱᠤᠭᠤᠮ ᠳᠡᠭᠡᠷᠡ ᠵᠡᠷᠭᠡᠴᠡᠵᠦ᠂ ᠵᠥᠪᠬᠡᠨ ᠨᠢᠭᠡ ᠴᠤᠪᠤᠭᠠ ᠵᠠᠮ ᠢ᠋ ᠬᠠᠪᠴᠢᠵᠤ ᠪᠠᠢᠨᠠ᠃ ᠬᠤᠸᠠ ᠳᠠ ᠮᠠ ᠡᠵᠢ ᠲᠡᠭᠦᠨ ᠢ᠋ ᠳᠥᠷᠪᠡᠨ ᠲᠠᠪᠠᠭ ᠵᠠᠭᠤᠰᠢ᠂ ᠨᠢᠭᠡ ᠠᠶᠠᠭᠠ ᠪᠤᠳᠠᠭᠠ ᠪᠠᠨ ᠥᠷᠥᠭᠡᠳ ᠨᠢᠭᠡ ᠪᠦᠯᠦᠭ ᠤᠬᠢᠯᠠᠵᠤ ᠴᠠᠭᠠᠰᠤᠨ ᠵᠣᠭᠣᠰ ᠢ᠋ᠶ᠋ᠠᠨ ᠰᠢᠲᠠᠭᠠᠬᠤ ᠶ᠋ᠢ ᠦᠵᠡᠭᠡᠳ 《ᠡᠨᠡ ᠪᠤᠯᠠᠰᠢᠨ ᠳᠣᠲᠣᠷᠠ ᠪᠠᠰᠠ ᠬᠦᠦ ᠨᠢ ᠪᠠᠢᠨᠠ》 ᠭᠡᠵᠦ ᠰᠡᠮᠡᠬᠡᠷ ᠪᠣᠳᠣᠨᠠ᠃ ᠲᠡᠷᠡ ᠪᠦᠰᠡᠭᠦᠢ ᠡᠰᠢ ᠲᠡᠰᠢ ᠪᠠᠬᠠᠨ ᠠᠵᠢᠭᠯᠠᠭᠠᠳ᠂ ᠬᠥᠯ ᠭᠠᠷ ᠨᠢ ᠭᠡᠨᠡᠳᠲᠡ ᠴᠡᠴᠡᠷᠡᠵᠦ ᠬᠠᠢᠪᠠᠩ ᠳᠠᠢᠪᠠᠩ ᠬᠢᠵᠦ ᠬᠡᠳᠦᠨ ᠠᠯᠬᠤᠮ ᠤᠬᠤᠷᠢᠭᠠᠳ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠵᠦ ᠪᠠᠬᠠᠨ ᠠᠶᠤᠭᠰᠠᠨ ᠪᠠᠢᠳᠠᠯ ᠭᠠᠷᠭᠠᠨᠠ᠃
ᠬᠤᠸᠠ ᠳᠠ ᠮᠠ ᠡᠵᠢ᠂ ᠡᠨᠡ ᠪᠠᠢᠳᠠᠯ ᠢ᠋ ᠦᠵᠡᠭᠡᠳ ᠲᠡᠭᠦᠨ ᠢ᠋ ᠬᠡᠲᠦᠷᠬᠡᠢ ᠵᠣᠪᠠᠵᠤ ᠰᠣᠯᠢᠶᠠᠷᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠨ ᠲᠡᠰᠬᠡᠯ ᠦᠭᠡᠢ ᠪᠣᠰᠴᠤ ᠵᠣᠭᠰᠣᠭᠠᠳ ᠴᠤᠪᠤᠭᠠ ᠵᠠᠮ ᠢ᠋ ᠣᠭᠲᠣᠯᠵᠤ ᠳᠡᠷᠭᠡᠳᠡ ᠨᠢ ᠣᠴᠢᠭᠠᠳ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ: 《ᠨᠠᠰᠤᠲᠠᠢ ᠡᠵᠢ ᠲᠠ ᠪᠤᠤ ᠶᠡᠬᠡ ᠵᠣᠪᠠ᠂ ᠬᠠᠷᠢᠵᠠᠭᠠᠶᠠ ᠣᠳᠣ》 ᠭᠡᠪᠡ᠃
ᠲᠡᠷᠡ ᠬᠥᠮᠦᠨ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠭᠰᠠᠨ ᠪᠣᠯᠪᠠᠴᠤ ᠨᠢᠳᠦ ᠪᠡᠨ ᠮᠥᠨ ᠪᠦᠯᠲᠡᠢᠯᠭᠡᠵᠦ ᠳᠣᠣᠷᠠ ᠳᠠᠭᠤ ᠪᠠᠷ ᠡᠭᠡᠷᠡᠵᠦ ᠲᠡᠬᠡᠳᠡᠭᠰᠡᠭᠡᠷ: 《ᠴᠢ ᠦᠵᠡ - ᠡᠨᠡ ᠴᠢᠨᠢ ᠶᠠᠭᠤ ᠭᠡᠭᠴᠢ ᠪᠣᠢ?》 ᠭᠡᠪᠡ᠃
ᠬᠤᠸᠠ ᠳᠠ ᠮᠠ ᠡᠵᠢ ᠲᠡᠭᠦᠨ ᠦ᠌ ᠬᠤᠷᠤᠭᠤ ᠪᠠᠷ ᠵᠢᠭᠠᠭᠰᠠᠨ ᠴᠢᠭ ᠲᠦ᠍ ᠬᠠᠷᠠᠬᠤᠯᠠ ᠬᠠᠷᠠᠴᠠ ᠨᠢ ᠡᠮᠦᠨᠡᠬᠢ ᠲᠡᠷᠡ ᠪᠤᠯᠠᠰᠢᠨ ᠳᠡᠭᠡᠷᠡ ᠲᠣᠰᠤᠯᠠ᠃ ᠡᠨᠡ ᠪᠤᠯᠠᠰᠢᠨ ᠤ᠋ ᠳᠡᠭᠡᠷᠡᠬᠢ ᠡᠪᠡᠰᠦᠨ ᠦ᠌ ᠦᠨᠳᠦᠰᠦ ᠨᠢ ᠭᠦᠢᠴᠡᠳ ᠡᠳᠡᠭᠡᠷᠡᠭᠡᠳᠦᠢ ᠲᠤᠯᠠ ᠬᠡᠰᠡᠭ ᠬᠡᠰᠡᠭ ᠰᠢᠷᠠ ᠰᠢᠷᠣᠢ ᠨᠤᠭᠤᠳ ᠠᠷᠵᠠᠢᠵᠤ ᠮᠠᠰᠢ ᠦᠵᠡᠮᠵᠢ ᠦᠭᠡᠢ ᠪᠠᠢᠪᠠ᠃ ᠭᠡᠲᠡᠯᠡ ᠳᠠᠬᠢᠨ ᠯᠠᠪᠳᠠᠭᠤᠯᠠᠨ ᠦᠵᠡᠭᠡᠳ ᠶᠡᠬᠡ ᠯᠡ ᠰᠣᠴᠢᠪᠠ᠃ ᠤᠴᠢᠷ ᠨᠢ᠂ ᠤᠯᠠᠭᠠᠨ ᠴᠠᠭᠠᠨ ᠨᠢ ᠢᠯᠭᠠᠷᠠᠭᠰᠠᠨ ᠰᠠᠢᠬᠠᠨ ᠴᠡᠴᠡᠭ ᠦ᠋ᠨ ᠴᠠᠭᠠᠷᠢᠭ ᠲᠡᠷᠡ ᠪᠤᠯᠠᠰᠢᠨ ᠤ᠋ ᠱᠣᠪᠣᠭᠣᠷ ᠣᠷᠣᠢ ᠶ᠋ᠢ ᠪᠦᠰᠡᠯᠡᠭᠰᠡᠨ ᠪᠠᠢᠪᠠ᠃
ᠲᠡᠳᠡᠨ ᠦ᠌ ᠨᠢᠳᠦᠨ ᠦ᠌ ᠭᠠᠯ ᠮᠠᠭᠤᠳᠠᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠤᠯᠠᠭᠠᠨ ᠴᠠᠭᠠᠨ ᠴᠡᠴᠡᠭ ᠦ᠋ᠳ ᠨᠢᠳᠦᠨ ᠳ᠋ᠦ᠍ᠨᠢ ᠲᠣᠳᠣ ᠬᠠᠷᠠᠭᠳᠠᠨᠠ᠂ ᠴᠡᠴᠡᠭ ᠨᠢ ᠲᠡᠳᠦᠢ ᠠᠷᠪᠢᠨ ᠪᠢᠰᠢ ᠪᠥᠭᠡᠳ ᠴᠤ᠌ᠭ ᠰᠦᠯᠳᠡ ᠮᠠᠭᠤᠲᠠᠢ ᠪᠣᠯᠪᠠᠴᠤ ᠲᠥᠪ ᠲᠥᠭᠥᠷᠢᠭ ᠴᠠᠭᠠᠷᠢᠭ ᠪᠣᠯᠵᠤ ᠮᠠᠰᠢ ᠵᠢᠭᠳᠡ ᠴᠡᠪᠡᠷᠬᠡᠨ ᠪᠠᠢᠯᠠ᠃ ᠬᠤᠸᠠ ᠳᠠ ᠮᠠ ᠡᠵᠢ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠪᠠ ᠪᠤᠰᠤᠳ ᠤ᠋ᠨ ᠪᠤᠯᠠᠰᠢ ᠶ᠋ᠢ ᠶᠠᠭᠠᠷᠠᠨ ᠠᠵᠢᠭᠯᠠᠪᠠᠯ ᠬᠠᠷᠢᠨ ᠬᠥᠬᠡᠪᠲᠦᠷ ᠴᠠᠭᠠᠨ ᠥᠩᠭᠡᠲᠡᠢ ᠬᠡᠳᠦᠨ ᠪᠢᠴᠢᠬᠠᠨ ᠥᠯᠴᠢᠷ ᠴᠡᠴᠡᠭ ᠦ᠋ᠳ ᠡᠨᠳᠡ ᠲᠡᠨᠳᠡ ᠳᠡᠯᠭᠡᠷᠡᠭᠰᠡᠨ ᠬᠠᠷᠠᠭᠳᠠᠨᠠ᠃ ᠡᠭᠦᠨ ᠢ᠋ ᠦᠵᠡᠭᠡᠳ ᠳᠣᠲᠣᠷᠠ ᠨᠢ ᠡᠪ ᠦᠭᠡᠢ ᠣᠷᠬᠢᠵᠤ ᠨᠠᠷᠢᠪᠴᠢᠯᠠᠨ ᠠᠵᠢᠭᠯᠠᠬᠤ ᠳᠤᠷᠠ ᠦᠭᠡᠢ ᠪᠣᠯᠪᠠ᠃ ᠲᠡᠷᠡ ᠪᠦᠰᠡᠭᠦᠢ ᠪᠠᠰᠠ ᠣᠷᠣᠭᠰᠢ ᠪᠠᠨ ᠬᠡᠳᠦ ᠠᠯᠬᠤᠨ ᠣᠴᠢᠵᠤ ᠠᠵᠢᠭᠯᠠᠭᠠᠳ: 《ᠡᠨᠡ ᠴᠡᠴᠡᠭ ᠦ᠋ᠳ ᠦᠨᠳᠦᠰᠦ ᠦᠭᠡᠢ᠂ ᠥᠪᠡᠷ ᠢ᠋ᠶ᠋ᠡᠨ ᠳᠡᠯᠭᠡᠷᠡᠭᠰᠡᠨ ᠶᠠᠩᠵᠤ ᠦᠭᠡᠢ᠃ - ᠡᠨᠳᠡ ᠬᠡᠨ ᠢᠷᠡᠬᠦ ᠪᠣᠢ? ᠬᠡᠦᠬᠡᠳ ᠢᠷᠡᠵᠦ ᠨᠠᠭᠠᠳᠬᠤ ᠦᠭᠡᠢ᠃ - ᠲᠥᠷᠥᠯ ᠰᠠᠳᠤᠨ ᠴᠤ᠌ ᠬᠡᠳᠦᠢᠨ ᠢᠷᠡᠬᠦ ᠪᠡᠨ ᠪᠣᠯᠢᠭᠰᠠᠨ᠃ - ᠴᠤ᠌ᠬᠣᠮ ᠶᠠᠭᠤ ᠭᠡᠭᠴᠢ ᠨᠢ ᠡᠨᠡ ᠪᠣᠢ?》 ᠭᠡᠵᠦ ᠪᠣᠳᠣᠵᠤ ᠪᠠᠢᠭᠠᠳ ᠭᠡᠨᠡᠳᠲᠡ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ:
《ᠢᠦᠢ ᠡᠯ ᠮᠢᠨᠢ ᠠ᠋᠂ ᠲᠡᠳᠡ ᠴᠢᠮᠠᠶ᠋ᠢ ᠬᠢᠯᠢᠰ ᠮᠤᠰᠬᠢᠵᠡᠢ᠃ ᠴᠢ ᠲᠡᠭᠦᠨ ᠢ᠋ ᠮᠠᠷᠲᠠᠬᠤ ᠦᠭᠡᠢ ᠭᠤᠨᠢᠭᠯᠠᠵᠤ ᠲᠡᠰᠬᠦ ᠦᠭᠡᠢ ᠳ᠋ᠡᠭᠡᠨ ᠡᠨᠡ ᠡᠳᠦᠷ ᠣᠨᠴᠣᠭᠣᠢᠯᠠᠨ ᠨᠠᠳᠠ ᠨᠢᠭᠡ ᠲᠡᠮᠳᠡᠭ ᠮᠡᠳᠡᠭᠳᠡᠪᠡ ᠤᠤ?》 ᠭᠡᠪᠡ᠃ ᠴᠢᠩᠭᠢᠭᠡᠳ ᠳᠥᠷᠪᠡᠨ ᠲᠡᠰᠢ ᠠᠵᠢᠭᠯᠠᠵᠤ ᠭᠠᠭᠴᠠᠬᠠᠨ ᠬᠠᠷᠠ ᠬᠡᠷᠢᠶᠡ ᠬᠤᠪᠠᠬᠠᠢ ᠮᠣᠳᠣᠨ ᠳᠡᠭᠡᠷᠡ ᠰᠠᠭᠤᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ 《ᠪᠢ ᠮᠡᠳᠡᠯᠡ᠃ - ᠢᠦᠢ ᠡᠯ ᠮᠢᠨᠢ ᠠ᠋᠂ ᠬᠥᠭᠡᠷᠦᠬᠦᠢ ᠴᠢᠮᠠᠶ᠋ᠢ ᠲᠡᠳᠡ ᠦᠭᠡᠢ ᠬᠢᠯᠡ ᠰᠢᠦ᠃ ᠬᠣᠵᠢᠮ ᠲᠡᠳᠡ ᠡᠨᠡ ᠨᠢᠭᠦᠯ ᠢ᠋ᠶ᠋ᠡᠨ ᠶᠠᠭᠠᠬᠢᠪᠠᠴᠤ ᠠᠮᠰᠠᠬᠤ ᠶᠤᠮ ᠠ᠋᠃ ᠲᠡᠭᠷᠢ ᠮᠡᠳᠡᠭ᠃ ᠴᠢ ᠨᠢᠭᠡᠨᠲᠡ ᠨᠢᠳᠦ ᠠᠨᠢᠵᠠᠢ᠃ - ᠴᠢ ᠦᠨᠡᠬᠡᠷ ᠡᠨᠳᠡ ᠪᠠᠢᠵᠤ ᠮᠢᠨᠦ ᠳᠠᠭᠤ ᠶ᠋ᠢ ᠰᠣᠨᠣᠰᠴᠤ ᠪᠠᠢᠪᠠᠯ - ᠲᠡᠷᠡ ᠬᠡᠷᠢᠶᠡ ᠶ᠋ᠢ ᠪᠤᠯᠠᠰᠢᠨ ᠳᠡᠭᠡᠷᠡ ᠪᠡᠨ ᠢᠷᠡᠭᠦᠯᠵᠦ ᠨᠠᠳᠠ ᠦᠵᠡᠭᠦᠯ》 ᠭᠡᠪᠡ᠃
ᠵᠢᠪᠠᠷ ᠨᠠᠮᠳᠠᠭᠠᠳ ᠬᠤᠪᠠᠬᠠᠢ ᠡᠪᠡᠰᠦ ᠨᠦ᠍ᠭᠦᠳ ᠵᠡᠰ ᠤᠲᠠᠰᠤ ᠮᠡᠲᠦ ᠭᠣᠵᠤᠢᠯᠴᠠᠨᠠ᠃ ᠨᠢᠭᠡ ᠵᠤᠷᠪᠤᠰ ᠴᠡᠴᠡᠷᠬᠢᠯᠡᠭᠰᠡᠨ ᠠᠪᠢᠶᠠ᠂ ᠬᠥᠨᠳᠡᠢ ᠣᠭᠲᠠᠷᠭᠤᠢ ᠳ᠋ᠤ᠌ ᠵᠢᠩᠭᠢᠨᠡᠭᠰᠡᠭᠡᠷ ᠤᠯᠠᠮ ᠢ᠋ᠶ᠋ᠠᠷ ᠨᠠᠷᠢᠰᠴᠤ ᠠᠯᠠᠭᠠ ᠪᠣᠯᠤᠯᠠ᠃ ᠡᠷᠭᠢᠨ ᠲᠣᠭᠣᠷᠢᠨ ᠦᠬᠦᠭᠰᠡᠨ ᠮᠡᠲᠦ ᠴᠢᠮᠡᠭᠡ ᠠᠨᠢᠷ ᠦᠭᠡᠢ ᠪᠣᠯᠪᠠ᠃ ᠬᠤᠪᠠᠬᠠᠢ ᠡᠪᠡᠰᠦᠨ ᠳᠣᠲᠣᠷᠠ ᠬᠣᠶᠠᠷ ᠡᠮᠡᠭᠡᠨ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠡᠷᠭᠦᠵᠦ ᠬᠡᠷᠢᠶᠡ ᠶ᠋ᠢ ᠠᠵᠢᠭᠯᠠᠨ ᠵᠣᠭᠰᠣᠬᠤ ᠳ᠋ᠤ᠌ ᠲᠡᠷᠡ ᠬᠡᠷᠢᠶᠡ ᠮᠥᠨ ᠬᠦ᠌ ᠮᠣᠳᠣᠨ ᠤ᠋ ᠬᠤᠪᠠᠬᠠᠢ ᠰᠠᠯᠠᠭᠠ ᠨᠤᠭᠤᠳ ᠤ᠋ᠨ ᠳᠤᠮᠳᠠ ᠰᠢᠷᠠᠮᠤ ᠪᠠᠷ ᠴᠢᠳᠬᠤᠭᠰᠠᠨ ᠮᠡᠲᠦ ᠬᠦᠵᠦᠭᠦᠦ ᠪᠡᠨ ᠠᠲᠤᠷᠢᠭᠤᠯᠵᠤ ᠬᠥᠳᠡᠯᠦᠯ ᠦᠭᠡᠢ ᠰᠠᠭᠤᠨᠠ᠃
ᠪᠠᠬᠠᠨ ᠤᠳᠠᠬᠤ ᠳ᠋ᠤ᠌᠂ ᠪᠤᠯᠠᠰᠢᠨ ᠳᠡᠭᠡᠷᠡ ᠢᠷᠡᠬᠦ ᠬᠥᠮᠦᠰ ᠤᠯᠠᠮ ᠢ᠋ᠶ᠋ᠠᠷ ᠣᠯᠠᠰᠢᠷᠠᠵᠤ᠂ ᠡᠪᠦᠭᠡᠳ ᠬᠡᠦᠬᠡᠳ ᠪᠤᠯᠠᠰᠢ ᠨᠤᠭᠤᠳ ᠤ᠋ᠨ ᠳᠤᠮᠳᠠᠭᠤᠷ ᠦᠵᠡᠭᠳᠡᠭᠰᠡᠭᠡᠷ ᠪᠠᠢᠯᠠ᠃ ᠬᠤᠸᠠ ᠳᠠ ᠮᠠ ᠡᠵᠢ ᠬᠡᠷᠬᠢᠭᠰᠡᠨ ᠢ᠋ ᠪᠤᠤ ᠮᠡᠳᠡ᠂ ᠶᠠᠭ ᠬᠦᠨᠳᠦ ᠠᠴᠢᠶᠠ ᠪᠠᠨ ᠪᠠᠭᠤᠯᠭᠠᠭᠰᠠᠨ ᠮᠡᠲᠦ ᠬᠥᠩᠭᠡᠷᠡᠨ 《ᠣᠳᠣ ᠬᠠᠷᠢᠵᠠᠭᠠᠶᠠ》 ᠭᠡᠵᠦ ᠢᠳᠬᠠᠵᠤ ᠪᠠᠢᠯᠠ᠃
ᠲᠡᠷᠡ ᠪᠦᠰᠡᠭᠦᠢ ᠰᠠᠨᠠᠭᠠ ᠠᠯᠳᠠᠵᠤ᠂ ᠨᠣᠭᠣᠭᠠ ᠪᠤᠳᠠᠭᠠ ᠪᠠᠨ ᠤᠷᠮᠠ ᠦᠭᠡᠢ ᠬᠣᠷᠢᠶᠠᠨ ᠠᠪᠴᠤ᠂ ᠪᠠᠬᠠᠨ ᠲᠦᠳᠡᠭᠡᠯᠵᠡᠰᠬᠢᠭᠡᠳ ᠠᠮᠠᠨ ᠳ᠋ᠠᠭᠠᠨ ᠪᠠᠰᠠ: 《ᠴᠣᠬᠣᠮ ᠶᠠᠭᠤ ᠭᠡᠭᠴᠢ ᠨᠢ ᠡᠨᠡ ᠪᠣᠢ? ᠁》 ᠭᠡᠵᠦ ᠳᠦᠳᠦᠨᠡᠭᠰᠡᠭᠡᠷ ᠭᠤᠨᠢᠷᠠᠨ ᠪᠤᠴᠠᠯᠠ᠃
ᠲᠡᠳᠡ ᠬᠣᠶᠠᠷ ᠢ᠋ ᠬᠣᠷᠢ ᠭᠤᠴᠢᠨ ᠠᠯᠬᠤᠮ ᠶᠠᠪᠤᠭᠠᠳᠤᠢ ᠪᠠᠢᠬᠤ ᠳ᠋ᠤ᠌ ᠭᠡᠨᠡᠳᠲᠡ ᠠᠷᠤ ᠳ᠋ᠤᠨᠢ 《ᠭᠤᠸᠠᠳ》 ᠭᠡᠬᠦ ᠳᠠᠭᠤ ᠭᠠᠷᠤᠯᠠ᠃ ᠡᠷᠭᠢᠵᠦ ᠬᠠᠷᠠᠬᠤᠯᠠ ᠥᠨᠥ ᠬᠡᠷᠢᠶᠡ ᠵᠢᠭᠦᠷ ᠢ᠋ᠶ᠋ᠡᠨ ᠳᠡᠯᠭᠡᠨ᠂ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠬᠣᠢᠰᠢ ᠲᠡᠢᠷᠦᠮᠡᠭᠴᠡ ᠠᠯᠤᠰ ᠤ᠋ᠨ ᠣᠭᠲᠠᠷᠭᠤᠢ ᠶ᠋ᠢ ᠴᠢᠭᠯᠡᠨ ᠬᠠᠷᠪᠤᠭᠰᠠᠨ ᠰᠤᠮᠤ ᠮᠡᠲᠦ ᠨᠢᠰᠦᠨ ᠣᠳᠤᠯᠠ᠃
1919 ᠣᠨ ᠤ᠋ ᠳᠥᠷᠪᠡᠳᠦᠭᠡᠷ ᠰᠠᠷᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠤᠮᠤᠴᠢᠨ ᠪᠢᠯᠢᠭ
ᠬᠢᠨᠠᠭᠴᠢ᠄ ᠨᠡᠭᠦᠳᠡᠯ᠂ ᠭᠡᠷᠡᠯ ᠂ ᠣᠳᠬᠠᠨᠰᠣᠠ