《ᠬᠥᠬᠡ ᠰᠤᠳᠤᠷ》 ᠤᠨ ᠨᠥᠬᠥᠪᠦᠷᠢ ᠲᠡᠪᠲᠡᠷ - ᠢᠨᠵᠠᠨᠨᠠᠰᠢ <ᠲᠠᠪᠢᠨ ᠲᠠᠪᠤᠳᠤᠭᠠᠷ ᠪᠦᠯᠦᠭ> "Хөх судар" он нөхвөр дэвтэр - Инжинаш <Тавин тавдугаар бүлэг>
311 ᠲᠠᠪᠢᠨ ᠲᠠᠪᠤᠳᠤᠭᠠᠷ ᠪᠦᠯᠦᠭ
ᠥᠨᠳᠥᠷ ᠢ᠋ ᠥᠷᠥᠵᠦ ᠦᠯᠡᠮᠵᠢ ᠶ᠋ᠢ ᠰᠠᠴᠠᠭᠤᠳᠬᠠᠬᠤᠶᠠ ᠦᠨᠡᠨ ᠪᠣᠭᠳᠠ ᠥᠪᠡᠷᠦᠨ ᠦᠷᠡ ᠶᠦ᠍ᠭᠡᠨ ᠶᠠᠯᠠᠯᠠᠪᠠᠢ
ᠭᠡᠷ ᠢ᠋ ᠲᠡᠭᠰᠢᠳᠬᠡᠨ ᠤᠯᠤᠰ ᠢ᠋ ᠵᠠᠰᠠᠬᠤᠶᠠ ᠭᠡᠷᠡᠯᠲᠦ ᠬᠤᠸᠠᠩᠬᠡᠦ ᠭᠡᠭᠡᠬᠡᠨ ᠭᠣᠣᠯᠲᠤ ᠡᠬᠡᠨᠡᠷ ᠢ᠋ ᠢᠯᠡᠳᠬᠡᠪᠡᠢ
ᠭᠡᠭᠡᠬᠡᠨ ᠭᠣᠣᠯᠲᠤ ᠡᠬᠡᠨᠡᠷ ᠬᠡᠮᠡᠭᠴᠢ ᠲᠦᠮᠡᠨ ᠦ᠌ ᠳᠣᠲᠣᠷᠠ ᠨᠢᠭᠡᠬᠡᠨ
ᠭᠡᠮ ᠥᠪᠡᠷᠴᠢᠯᠡᠯ ᠬᠠᠷᠠᠮ ᠬᠠᠷᠭᠢᠰ ᠠᠨᠤ ᠭᠡᠷ ᠪᠦᠷᠢ ᠳ᠋ᠦ᠍ᠷ ᠳᠦᠭᠦᠷᠡᠩ᠃
ᠬᠡᠢᠪᠡᠩ ᠵᠢᠷᠦᠭᠡᠳᠡᠨᠡ ᠡᠰᠡ ᠠᠭᠤᠯᠵᠠᠭᠰᠠᠳ ᠨᠢᠭᠡᠨ ᠨᠠᠰᠤᠨ ᠳ᠋ᠠᠭᠠᠨ ᠬᠠᠷᠠᠩᠭᠤᠢ
ᠭᠡᠭᠡᠬᠡᠨ ᠬᠡᠭᠦᠳᠡᠭᠲᠡᠨ ᠢ᠋ ᠪᠡᠶᠡ ᠬᠡᠲᠦᠷᠡᠭᠦᠯᠦᠭᠰᠡᠨ ᠪᠢᠴᠢᠭᠡᠴᠢ ᠪᠢ ᠪᠣᠢ ᠭᠡᠮᠡᠨ ᠢᠲᠡᠭᠡᠮᠵᠢᠯᠡᠮᠦᠢ᠃
ᠲᠡᠨᠳᠡᠴᠡ ᠵᠠᠭᠤᠨ ᠲᠦᠰᠢᠮᠡᠳ ᠬᠠᠷᠠᠬᠠᠨ ᠬᠤᠸᠠᠩᠬᠡᠦ ᠶ᠋ᠢᠨ ᠵᠠᠷᠯᠢᠭ ᠤ᠋ᠨ ᠬᠠᠳᠠᠨ ᠴᠢᠩᠭᠠ ᠳ᠋ᠤᠷ ᠬᠠᠪᠴᠢᠭᠳᠠᠨ ᠨᠢᠭᠡᠨ ᠨᠢᠭᠡᠨ ᠢ᠋ᠶ᠋ᠡᠨ ᠬᠠᠷᠢᠯᠴᠠᠨ ᠰᠢᠷᠲᠡᠯᠴᠡᠬᠦᠶᠡ᠂ ᠭᠡᠨᠡᠳᠲᠡ ᠲᠠᠢᠬᠡᠦ ᠶ᠋ᠢᠨ ᠣᠷᠳᠤᠨᠠ ᠵᠦᠩ ᠬᠡᠩᠭᠡᠷᠭᠡ ᠶ᠋ᠢᠨ ᠳᠣᠬᠢᠶᠠ ᠲᠠᠯᠪᠢᠨ᠂ ᠣᠯᠠᠨ ᠸᠠᠩ ᠰᠠᠢᠳ ᠶᠡᠬᠡᠰ ᠨᠣᠶᠠᠳ ᠢ᠋ ᠬᠠᠷᠰᠢ ᠳ᠋ᠤᠷ ᠵᠠᠯᠠᠨ ᠭᠠᠷᠭᠠᠵᠤ᠂ ᠲᠠᠪᠤᠨ ᠲᠠᠢᠰᠢ᠂ ᠳᠥᠷᠪᠡᠨ ᠥᠲᠡᠭᠦᠰ ᠢ᠋ ᠤᠷᠤᠭᠰᠢ ᠳᠡᠪᠰᠢᠭᠦᠯᠦᠨ ᠵᠠᠭᠤᠨ ᠲᠦᠰᠢᠮᠡᠳ ᠮᠥᠷᠭᠥᠵᠦ ᠪᠠᠷᠠᠭᠰᠠᠨ ᠬᠣᠢᠨᠠ᠂ ᠣᠯᠠᠨ ᠢ ᠵᠡᠷᠭᠡᠯᠡᠭᠦᠯᠦᠨ ᠰᠥᠭᠥᠳᠬᠡᠵᠦ ᠦᠯᠡᠭᠦᠦ ᠢᠷᠦᠭᠡᠯᠲᠦ ᠲᠡᠢ ᠴᠢᠩ ᠲᠠᠢᠬᠡᠦ᠂ ᠥᠵᠢᠨ ᠡᠮᠡᠭᠡ ᠵᠠᠷᠯᠢᠭ ᠪᠠᠭᠤᠯᠭᠠᠷᠤᠨ :
《ᠡᠷᠲᠡᠨ ᠡᠴᠡ ᠡᠳᠦᠭᠡ ᠳ᠋ᠦ᠍ᠷ ᠬᠦᠷᠲᠡᠯᠡ ᠠᠯᠢᠪᠠ ᠪᠠᠢᠭᠤᠯᠬᠤ ᠪᠠ ᠪᠠᠷᠠᠭᠳᠠᠬᠤ ᠤᠯᠤᠰ ᠲᠥᠷᠥ ᠳ᠋ᠦ᠍ᠷ ᠴᠥᠮ ᠢ᠋ᠶ᠋ᠡᠷ ᠲᠡᠢᠨ ᠳᠠᠢᠰᠤᠨ ᠤ᠋ ᠪᠠᠢᠯᠳᠤᠬᠤ ᠪᠠ ᠳᠠᠢᠯᠠᠬᠤ ᠴᠡᠷᠢᠭ ᠦ᠋ᠨ ᠬᠡᠷᠡᠭ ᠪᠠᠢᠭᠰᠠᠭᠠᠷ ᠢᠷᠡᠵᠦᠬᠦᠢ᠃ ᠨᠢᠭᠡᠨᠲᠡ ᠬᠣᠶᠠᠷ ᠡᠲᠡᠭᠡᠳ ᠬᠠᠷᠢᠯᠴᠠᠨ ᠲᠡᠢᠨ ᠳᠡᠭᠳᠡᠭᠡᠵᠦ ᠴᠡᠷᠢᠭᠯᠡᠪᠡᠰᠦ ᠬᠠᠷᠢᠯᠴᠠᠨ ᠳᠡᠢᠯᠬᠦ ᠪᠠ ᠳᠡᠢᠯᠦᠭᠳᠡᠬᠦ ᠢᠨᠤ ᠴᠡᠷᠢᠭ ᠪᠦᠷᠢ ᠶ᠋ᠢᠨ ᠤᠷᠲᠤᠳᠠ ᠪᠠᠢᠬᠤ ᠡᠩ ᠦ᠋ᠨ ᠬᠡᠷᠡᠭ᠃ ᠡᠳᠦᠭᠡ ᠨᠠᠢ᠍ᠮᠠᠨ ᠤ᠋ ᠦᠷᠦᠮᠴᠢ ᠡᠴᠡ ᠮᠢᠨᠦ ᠠᠮᠤᠭᠤᠯᠠᠩ ᠠᠢᠯᠠᠳᠬᠠᠬᠤ ᠬᠣᠶᠠᠷ ᠲᠠᠢᠪᠤᠤ ᠪᠤᠭᠤᠷᠵᠢ᠂ ᠴᠢᠯᠠᠭᠤᠨ ᠬᠣᠶᠠᠭᠤᠯᠠ ᠠ᠋ᠴᠠ ᠰᠣᠨᠣᠰᠬᠤᠯᠠ᠂ ᠶᠡᠬᠡ ᠠᠴᠢ ᠲᠠᠢᠽᠢ ᠵᠣᠴᠢ᠂ ᠴᠡᠷᠢᠭ ᠦ᠋ᠨ ᠡᠵᠡᠨ ᠵᠢᠨᠦᠩ ᠯᠤᠭᠠ ᠮᠦᠷᠦᠢᠰᠡᠴᠦ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠᠨ ᠤ᠋ ᠮᠠᠯᠵᠢᠶᠠ ᠪᠢᠴᠢᠭ ᠪᠠᠢᠭᠤᠯᠵᠤ᠂ ᠮᠡᠯᠵᠢᠶᠡᠯᠡᠭᠰᠡᠨ ᠦᠭᠡᠨ ᠳ᠋ᠡᠭᠡᠨ ᠠᠷᠠᠢ ᠬᠦᠷᠦᠭᠰᠡᠨ ᠦᠭᠡᠢ ᠶ᠋ᠢᠨ ᠶᠠᠯᠠ ᠳ᠋ᠤᠷ ᠤᠯᠤᠰ ᠤ᠋ᠨ ᠬᠣᠢᠲᠤ ᠬᠢᠵᠠᠭᠠᠷ ᠤ᠋ᠨ ᠭᠠᠳᠠᠨᠠ ᠭᠤᠷᠪᠠᠨ ᠵᠢᠯ ᠢ᠋ᠶ᠋ᠡᠷ ᠴᠦᠯᠡᠪᠡ ᠬᠡᠮᠡᠮᠦᠢ᠃ ᠵᠡᠷᠭᠡ ᠲᠤᠰᠢᠶᠠᠯ ᠰᠠᠭᠤᠷᠢᠨ ᠬᠡᠷᠬᠡᠮ ᠴᠦ᠍ ᠲᠠᠢᠽᠢ ᠵᠣᠴᠢ ᠥᠪᠡᠷ ᠢ᠋ᠶ᠋ᠡᠨ ᠥᠴᠢᠪᠡ ᠬᠡᠮᠡᠲᠦᠭᠡᠢ᠂ ᠴᠦᠯᠡᠬᠦ ᠶᠠᠯᠠ ᠶ᠋ᠢ ᠤᠭ ᠠ᠋ᠴᠠ ᠥᠴᠢᠭᠰᠡᠨ ᠦᠭᠡᠢ᠂ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠᠨ ᠤ᠋ ᠪᠠᠢᠭᠤᠯᠤᠭᠰᠠᠨ ᠪᠢᠴᠢᠭ ᠲᠣᠷ ᠮᠥᠨ ᠦᠭᠡᠢ᠃ ᠦᠨᠡᠬᠡᠷ ᠵᠢᠨᠦᠩ ᠯᠤᠭᠠ ᠮᠠᠯᠵᠢᠶᠠ ᠪᠢᠴᠢᠭ ᠪᠠᠢᠭᠤᠯᠪᠠ ᠬᠡᠮᠡᠪᠡᠴᠦ ᠡᠴᠦᠰ ᠲᠦ᠍ᠷ ᠮᠥᠨ ᠬᠦ᠌ ᠤᠯᠤᠰ ᠲᠥᠷᠥ ᠶ᠋ᠢᠨ ᠡᠮᠦᠨᠡ ᠵᠢᠳᠬᠦᠨ ᠴᠢᠷᠮᠠᠢᠬᠤᠢ ᠶ᠋ᠢᠨ ᠤᠴᠢᠷ᠃ ᠬᠡᠳᠦᠢᠪᠡᠷ ᠴᠡᠷᠢᠭ ᠦ᠋ᠨ ᠶᠠᠪᠤᠳᠠᠯ ᠮᠠᠯᠵᠢᠶᠠ ᠦᠭᠡᠰ ᠲᠣᠷ ᠡᠰᠡ ᠨᠡᠢᠴᠡᠪᠡ ᠬᠡᠮᠡᠪᠡᠴᠦ᠂ ᠳᠠᠢᠰᠤᠨ ᠤ᠋ ᠡᠲᠡᠭᠡᠳ ᠦ᠋ᠨ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠤ᠋ ᠣᠯᠠᠨ ᠢ᠋ ᠪᠦᠬᠦᠯᠢ ᠪᠡᠷ ᠬᠤᠷᠢᠶᠠᠮᠵᠢᠯᠠᠨ ᠣᠯᠵᠤ᠂ ᠭᠠᠭᠴᠠ ᠳᠠᠢᠰᠤᠨ ᠤ᠋ ᠲᠤᠰ ᠡᠵᠡᠨ ᠢ᠋ ᠢᠨᠤ ᠲᠠᠢᠽᠢ ᠶ᠋ᠢᠨ ᠭᠠᠷ ᠢ᠋ᠶ᠋ᠠᠷ ᠣᠯᠵᠤ ᠪᠠᠷᠢᠭᠰᠠᠨ ᠦᠭᠡᠢ ᠤᠭ ᠮᠡᠯᠵᠢᠶᠡᠯᠡᠭᠰᠡᠨ ᠦᠭᠡᠰ ᠲᠣᠷ ᠢ᠋ᠶ᠋ᠠᠨ ᠡᠰᠡ ᠬᠦᠷᠪᠡ ᠬᠡᠮᠡᠪᠡᠴᠦ᠂ ᠡᠴᠦᠰ ᠲᠦ᠍ᠷ ᠤᠯᠤᠰ ᠤ᠋ᠨ ᠨᠠᠭᠠᠴᠤ ᠠᠵᠢᠨᠠᠢ ᠮᠡᠷᠭᠡᠨ᠂ ᠳᠠᠢᠰᠤᠨ ᠤ᠋ ᠡᠵᠡᠨ ᠢ᠋ ᠮᠥᠨ ᠲᠠᠢᠯᠤᠨ ᠮᠥᠬᠥᠭᠡᠵᠦ ᠰᠥᠨᠥᠭᠡᠪᠡ᠂ ᠡᠨᠡ ᠴᠡᠷᠢᠭ ᠢ᠋ ᠳᠡᠢᠯᠦᠭᠰᠡᠨ ᠶᠣᠰᠣᠭᠠᠷ ᠰᠢᠢᠳᠬᠡᠪᠡᠰᠦ ᠵᠣᠬᠢᠬᠤ ᠠᠲᠠᠯᠠ᠂ ᠭᠠᠭᠴᠠ ᠬᠦ᠌᠂ ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠯᠤᠭᠠ ᠮᠥᠷᠦᠢᠰᠡᠭᠰᠡᠨ ᠶᠠᠯᠠ ᠳ᠋ᠤᠷ ᠡᠢᠨ ᠬᠦ᠌ ᠬᠦᠨᠳᠦ ᠪᠡᠷ ᠠᠪᠠᠴᠢᠵᠤᠬᠤᠢ᠃ ᠬᠥᠭᠰᠢᠨ ᠥᠵᠢᠨ ᠪᠢ ᠴᠦ᠍ ᠮᠥᠨ ᠳᠡᠭᠡᠳᠦ ᠡᠵᠡᠨ ᠯᠢᠶᠧ ᠽᠦ᠍ ᠬᠠᠯᠢᠵᠤ᠂ ᠲᠠᠨ ᠤ᠋ ᠡᠨᠡ ᠴᠢᠩᠭᠢᠰ ᠡᠵᠡᠨ ᠴᠢᠨᠦ ᠪᠠᠭᠠ ᠪᠥᠬᠥᠶᠡ᠂ ᠮᠢᠨᠦ ᠪᠡᠶᠡ ᠪᠡᠷ ᠮᠥᠨ ᠠᠷᠪᠠᠨ ᠭᠤᠷᠪᠠᠨ ᠪᠦᠯᠦᠭ ᠦ᠋ᠨ ᠨᠢᠭᠡᠨ ᠲᠦᠮᠡᠨ ᠭᠤᠷᠪᠠᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ ᠠᠪᠴᠤ᠂ ᠠᠷᠪᠠᠭᠠᠳ ᠣᠨ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠲᠤᠯᠭᠤᠷ ᠲᠥᠷᠥ ᠪᠡᠨ ᠬᠠᠮᠠᠭᠠᠯᠠᠨ ᠰᠠᠬᠢᠵᠤ ᠶᠠᠪᠤᠬᠤᠶᠠ᠂ ᠠᠯᠠᠬᠤ ᠬᠣᠷᠣᠭᠠᠬᠤ ᠵᠠᠰᠠᠭ ᠴᠠᠭᠠᠵᠠ ᠶ᠋ᠢ ᠪᠠᠰᠠᠴᠤ ᠵᠠᠷᠯᠠᠨ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠪᠠᠷ ᠠᠷᠠᠢ ᠡᠨᠡ ᠮᠡᠲᠦ ᠡᠰᠡ ᠬᠦᠨᠳᠦ ᠪᠣᠯᠭᠠᠪᠠ᠃ ᠴᠡᠷᠢᠭ ᠪᠠ ᠵᠠᠰᠠᠭ ᠤ᠋ᠨ ᠦᠢᠯᠡ ᠳ᠋ᠦ᠍ᠷ ᠴᠢᠬᠤᠯᠠ ᠪᠠ ᠶᠡᠷᠦᠩᠬᠡᠢ ᠶ᠋ᠢᠨ ᠢᠯᠭᠠᠯ ᠪᠣᠢ᠃ ᠴᠠᠭᠠᠵᠠ ᠪᠠ ᠶᠠᠯᠠᠯᠠᠯ ᠤ᠋ᠨ ᠰᠢᠳᠬᠡᠯ ᠳ᠋ᠦ᠍ᠷ ᠬᠥᠩᠭᠡᠯᠡᠬᠦ ᠬᠦᠨᠳᠦᠳᠬᠡᠬᠦ ᠤᠴᠢᠷ ᠪᠣᠢ᠃ ᠬᠡᠳᠦᠢᠪᠡᠷ ᠮᠡᠯᠵᠢᠶᠡ ᠦᠭᠡᠰ ᠲᠣᠷ ᠡᠰᠡ ᠬᠤᠰᠤᠪᠠᠴᠤ ᠪᠠᠷ ᠮᠡᠷᠭᠦ ᠳᠠᠢᠰᠤᠨ ᠢ᠋ ᠪᠠᠷᠠᠲᠠᠯᠠ ᠬᠢᠳᠤᠨ ᠠᠷᠢᠯᠭᠠᠪᠠ᠃ ᠡᠨᠡ ᠭᠠᠪᠢᠶᠠ ᠳ᠋ᠤᠷ ᠬᠦᠨᠳᠦ ᠶᠠᠯᠠ ᠶ᠋ᠢ ᠪᠣᠯᠪᠠᠴᠤ ᠬᠥᠩᠭᠡᠳᠬᠡᠪᠡᠰᠦ ᠵᠣᠬᠢᠬᠤ ᠠᠲᠠᠯᠠ᠂ ᠬᠥᠭᠵᠢᠨ ᠥᠭᠦᠯᠡᠭᠰᠡᠨ ᠮᠠᠯᠵᠢᠶᠠ ᠦᠭᠡᠰ ᠦ᠋ᠨ ᠬᠥᠩᠭᠡᠬᠡᠨ ᠶᠠᠯᠠ ᠳ᠋ᠤᠷ ᠡᠢᠨ ᠬᠦ᠌ ᠬᠦᠨᠳᠦᠷᠡᠭᠦᠯᠦᠨ ᠠᠪᠠᠴᠢᠬᠤ ᠠᠨᠤ ᠳᠡᠮᠡᠢ ᠵᠣᠬᠢᠰ ᠦᠭᠡᠢ᠃ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠠᠤᠯᠢ ᠴᠠᠭᠠᠵᠠ ᠶ᠋ᠢ ᠴᠢᠩᠭᠠᠳᠬᠠᠨ ᠬᠥᠭᠵᠢᠭᠦᠯᠬᠦᠢ ᠳ᠋ᠦ᠍ᠷ ᠬᠡᠳᠦᠢᠪᠡᠷ ᠥᠪᠡᠷᠦᠨ ᠲᠥᠷᠥᠭᠰᠡᠨ ᠦᠷᠡ ᠬᠥᠪᠡᠭᠦᠳ ᠡᠴᠡ ᠡᠬᠢᠯᠡᠵᠦ᠂ ᠦᠯᠡᠮᠵᠢ ᠳ᠋ᠠᠬᠢᠨ ᠢ᠋ ᠰᠦᠷᠲᠡᠭᠡᠨ ᠵᠠᠰᠠᠭᠯᠠᠬᠤ ᠠᠨᠤ ᠵᠦᠢ ᠪᠣᠯᠪᠠᠴᠤ ᠪᠠᠷ ᠭᠡᠮᠡᠨ ᠠᠷᠠᠢᠬᠠᠨ ᠬᠡᠲᠦᠷᠬᠡᠢ ᠬᠦᠨᠳᠦ ᠪᠡᠷ ᠰᠢᠳᠬᠡᠨ ᠠᠪᠠᠴᠢᠬᠤ ᠠᠨᠤ ᠡᠭᠡᠨᠡᠭᠲᠡ ᠲᠦᠷᠢᠮᠡᠬᠡᠢ ᠶᠣᠰᠣ ᠪᠣᠯᠵᠤᠬᠤᠢ᠃ ᠦᠵᠢᠨ ᠮᠢᠨᠦ ᠨᠠᠰᠤ ᠥᠨᠳᠥᠷ ᠪᠣᠯᠬᠤ ᠰᠢᠬᠠᠪᠠ᠃ ᠠᠴᠢ ᠬᠥᠪᠡᠭᠦᠳ ᠢ᠋ ᠬᠣᠯᠠᠳᠠ ᠴᠦᠯᠡᠵᠦ ᠢᠯᠡᠭᠡᠬᠦᠢ ᠳ᠋ᠦ᠍ᠷ ᠮᠢᠨᠦ ᠳᠣᠲᠣᠷᠠ ᠲᠦᠪᠳᠡᠬᠦ ᠦᠭᠡᠢ ᠲᠠᠲᠠᠭᠳᠠᠮᠤᠢ᠃ ᠦᠨᠡᠬᠡᠷ ᠤᠯᠤᠰ ᠤ᠋ᠨ ᠵᠠᠰᠠᠭ ᠬᠠᠤᠯᠢ ᠶ᠋ᠢ ᠵᠠᠷᠯᠠᠬᠤᠢ ᠶ᠋ᠢᠨ ᠤᠴᠢᠷ ᠡᠷᠬᠡᠪᠰᠢ ᠪᠠᠬᠠᠨ ᠦᠵᠡᠭᠦᠯᠰᠦᠭᠡᠢ ᠬᠡᠮᠡᠪᠡᠰᠦ᠂ ᠲᠡᠷᠢᠭᠦᠨ ᠳ᠋ᠦ᠍ᠷ ᠲᠠᠢᠽᠢ ᠶ᠋ᠢᠨ ᠬᠠᠲᠤᠳ ᠹᠧᠢ ᠪᠠ ᠬᠡᠦᠬᠡᠨ ᠨᠤᠭᠤᠨ ᠯᠤᠭᠠ ᠲᠠᠢᠽᠢ ᠶ᠋ᠢᠨ ᠬᠤᠪᠢᠶᠠᠷᠢ ᠠ᠋ᠴᠠ ᠬᠠᠭᠠᠴᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ᠃ ᠬᠣᠶᠠᠷ ᠲᠤᠷ ᠬᠣᠶᠠᠷ ᠭᠤᠷᠪᠠᠨ ᠵᠢᠯ ᠢ᠋ᠶ᠋ᠡᠷ ᠴᠦᠯᠡᠭᠰᠡᠨ ᠭᠠᠵᠠᠷᠠ ᠰᠠᠭᠤᠯᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠭᠤᠷᠪᠠᠨ ᠳ᠋ᠤᠷ ᠦᠵᠢᠨ ᠮᠢᠨᠦ ᠲᠡᠭᠡᠵᠢᠨ ᠦ᠌ ᠹᠦᠩᠯᠦ ᠡᠴᠡ ᠲᠠᠢᠽᠢ ᠳ᠋ᠤᠷ ᠬᠠᠭᠠᠰ ᠣᠨ ᠤ᠋ ᠮᠥᠩᠭᠥ ᠲᠣᠷᠭᠠ ᠲᠤᠲᠤᠷᠭᠠ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠮᠠᠯ ᠤ᠋ᠨ ᠬᠡᠷᠡᠭᠯᠡᠯ ᠢ᠋ ᠬᠤᠪᠢᠶᠠᠨ ᠣᠯᠭᠣᠵᠤ ᠰᠠᠶᠢ ᠴᠥᠯᠡᠭᠲᠦᠨ᠃ ᠬᠥᠭᠰᠢᠨ ᠦᠵᠢᠨ ᠮᠢᠨᠦ ᠡᠨᠡ ᠲᠠᠰᠤᠷᠬᠠᠢ ᠵᠠᠷᠯᠢᠭ ᠢ ᠤᠯᠤᠰ ᠤ᠋ᠨ ᠨᠠᠭᠠᠴᠤ ᠳ᠋ᠠᠢ ᠰᠡᠴᠡᠨ ᠵᠡᠷᠭᠡ ᠭᠤᠷᠪᠠᠨ ᠶᠡᠬᠡᠰ ᠰᠠᠢᠳ ᠲᠠᠨ ᠢ᠋ ᠵᠡᠷᠭᠡᠯᠡᠭᠦᠯᠦᠨ ᠲᠤᠰᠢᠶᠠᠪᠠ᠃ ᠲᠠᠨ ᠤ᠋ ᠭᠤᠷᠪᠠᠨ ᠰᠠᠢᠳ ᠮᠢᠨᠦ ᠵᠠᠷᠯᠢᠭ ᠤ᠋ᠨ ᠦᠭᠡᠰ ᠢ ᠦᠰᠦᠭ ᠪᠠᠳᠠᠭ ᠳᠤᠲᠠᠭᠤᠯᠤᠯ ᠦᠭᠡᠢ ᠲᠣᠷᠭᠠᠨᠠ ᠰᠡᠢᠷᠡᠭᠦᠯᠦᠨ ᠪᠢᠴᠢᠵᠦ᠂ ᠰᠠᠯᠬᠢᠨ ᠪᠣᠷᠤᠭᠠᠨᠠ ᠰᠠᠭᠠᠲᠠᠰᠢ ᠦᠭᠡᠢ ᠴᠠᠭ ᠮᠥᠴᠡ ᠴᠠᠯᠠᠭᠠᠢᠷᠠᠰᠢ ᠦᠭᠡᠢ ᠨᠢᠰᠬᠦ ᠳᠣᠪᠲᠣᠯᠭᠠ ᠪᠠᠷ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠳ ᠢ᠋ ᠠᠪᠴᠤ ᠬᠦᠷᠭᠡᠭᠲᠦᠨ᠂ ᠪᠠᠬᠠᠨ ᠲᠡᠳᠦᠢ ᠣᠰᠣᠯᠳᠠᠵᠤ ᠥᠴᠦᠬᠡᠨ ᠲᠡᠳᠦᠢ ᠦᠲᠡᠭᠡᠷᠴᠦ ᠬᠥᠭᠰᠢᠨ ᠦᠵᠢᠨ ᠮᠢᠨᠦ ᠵᠠᠯᠠᠭᠤ ᠶ᠋ᠢᠨ ᠬᠢᠯᠢᠩ ᠢ᠋ ᠬᠥᠳᠡᠯᠭᠡᠬᠦᠢ ᠳ᠋ᠦ᠍ᠷ ᠪᠢᠲᠡᠭᠡᠢ ᠬᠦᠷᠦᠭᠦᠯᠦᠭᠲᠦᠨ 》ᠬᠡᠮᠡᠪᠡ᠃ ᠭᠤᠷᠪᠠᠨ ᠰᠠᠢᠳ ᠵᠡᠷᠭᠡ ᠪᠡᠷ ᠮᠥᠷᠭᠥᠵᠦ ᠬᠠᠷᠰᠢ ᠠ᠋ᠴᠠ ᠤᠬᠤᠷᠢᠨ ᠪᠠᠭᠤᠵᠤ ᠢᠷᠡᠭᠡᠳ᠂ ᠭᠤᠷᠪᠠᠨ ᠡᠳᠦᠷ ᠬᠦᠯᠢᠶᠡᠨ᠂ ᠵᠠᠷᠯᠢᠭ ᠪᠢᠴᠢᠭ ᠪᠠᠭᠤᠵᠤ ᠢᠷᠡᠬᠦᠢ ᠶ᠋ᠢᠨ ᠵᠠᠪᠰᠠᠷᠠ ᠭᠤᠸᠠᠩ ᠰᠢᠶᠠᠨ ᠬᠤᠸᠠᠩᠬᠡᠦ᠂ ᠭᠡᠷᠡᠯᠲᠦ ᠶᠡᠬᠡᠮᠰᠦᠭ ᠤᠯᠤᠰ ᠤ᠋ᠨ ᠡᠬᠡ ᠶ᠋ᠢᠨ ᠣᠷᠲᠣᠨᠠ ᠢᠷᠡᠵᠦ᠂ ᠳᠡᠭᠡᠳᠦ ᠲᠡᠢ ᠴᠢᠩ ᠲᠠᠢᠬᠡᠦ ᠶ᠋ᠢᠨ ᠵᠠᠷᠯᠢᠭ ᠢ᠋ ᠤᠯᠠᠮᠵᠢᠯᠠᠨ ᠰᠣᠨᠣᠰᠬᠠᠨ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠬᠤᠸᠠᠩᠬᠡᠦ ᠶ᠋ᠢᠨ ᠬᠠᠷᠢᠭᠤ ᠵᠠᠷᠯᠢᠭ᠄
《ᠴᠣᠬᠣᠮ ᠳ᠋ᠤᠷ ᠬᠠᠲᠤᠨ ᠪᠢ ᠬᠠᠭᠠᠨ ᠡᠵᠡᠨᠡ ᠪᠢᠴᠢᠭ ᠠᠢᠯᠠᠳᠬᠠᠨ᠂ ᠴᠦᠯᠢᠰ ᠬᠥᠪᠡᠭᠦᠨ ᠲᠠᠢᠽᠢ ᠵᠣᠴᠢ ᠶ᠋ᠢ ᠬᠤᠪᠢ ᠨᠡᠮᠡᠵᠦ᠂ ᠳᠠᠪᠬᠤᠷᠯᠠᠨ ᠶᠠᠯᠠᠯᠠᠵᠤ ᠤᠯᠤᠰ ᠤ᠋ᠨ ᠵᠠᠰᠠᠭ ᠢ᠋ ᠴᠢᠬᠡ ᠪᠣᠯᠭᠠᠬᠤᠢ ᠶ᠋ᠢ ᠭᠤᠶᠤᠬᠤ ᠨᠤᠭᠤᠯᠪᠤᠷᠢ ᠪᠢᠴᠢᠭᠰᠡᠨ ᠪᠥᠯᠥᠭᠡ᠃ ᠰᠠᠨᠠᠮᠰᠠᠷ ᠦᠭᠡᠢ ᠬᠠᠳᠠᠮ ᠡᠬᠡ ᠲᠠᠢᠬᠡᠦ ᠥᠵᠢᠨ ᠦ᠌ ᠬᠠᠭᠠᠨ ᠡᠵᠡᠨᠡ ᠪᠠᠭᠤᠯᠭᠠᠭᠰᠠᠨ ᠵᠠᠷᠯᠢᠭ ᠪᠣᠢ ᠲᠤᠯᠠ ᠬᠠᠨ ᠡᠬᠡ ᠳ᠋ᠦ᠍ᠷ ᠪᠡᠷᠢ ᠪᠣᠯᠤᠭᠰᠠᠨ ᠬᠠᠲᠤᠨ ᠪᠢ ᠠᠶᠤᠮᠰᠢᠭ ᠦᠭᠡᠢ ᠲᠠᠢᠬᠡᠦ ᠥᠵᠢᠨ ᠯᠦ᠍ᠭᠡ ᠮᠦᠷᠦᠢᠰᠡᠴᠦ ᠪᠤᠰᠤ ᠵᠦᠢᠯ ᠦ᠋ᠨ ᠨᠤᠭᠤᠯᠪᠤᠷᠢ ᠠᠢᠯᠠᠳᠬᠠᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠵᠤᠬᠤᠢ᠃ ᠬᠡᠳᠦᠢ ᠲᠡᠢᠮᠦ ᠪᠣᠯᠪᠠᠴᠤ ᠬᠠᠭᠠᠨ ᠡᠵᠡᠨ ᠦ᠌ ᠬᠠᠮᠤᠭ ᠢ᠋ ᠴᠢᠩᠭᠠᠳᠬᠠᠨ ᠵᠠᠰᠠᠭᠯᠠᠬᠤᠶᠠ᠂ ᠬᠠᠯᠠᠭᠤᠨ ᠠᠮᠠᠷᠠᠭ ᠲᠥᠷᠥᠭᠰᠡᠨ ᠦᠷᠡ ᠬᠥᠪᠡᠭᠦᠨ ᠡᠴᠡᠭᠡᠨ ᠡᠬᠢᠯᠡᠬᠦ ᠡᠨᠡ ᠵᠠᠰᠠᠭ ᠴᠠᠭᠠᠵᠠ ᠶ᠋ᠢᠨ ᠭᠡᠭᠡᠬᠡᠨ ᠬᠤᠷᠴᠠ ᠳ᠋ᠤᠷ ᠬᠠᠲᠤᠨ ᠪᠥᠷᠲᠡᠭᠡᠯᠵᠢᠨ ᠬᠠᠵᠠᠭᠤ ᠠ᠋ᠴᠠ ᠲᠡᠰᠬᠡᠯ ᠦᠭᠡᠢ ᠪᠡᠶᠡᠰᠦᠨ ᠪᠢᠰᠢᠷᠡᠵᠦ᠂ ᠴᠢᠩ ᠦᠨᠡᠨ ᠢ᠋ᠶ᠋ᠡᠷ ᠰᠦᠰᠦᠭᠯᠡᠨ ᠮᠥᠷᠭᠥᠬᠦ ᠶ᠋ᠢ ᠡᠷᠬᠢᠯᠡᠭᠰᠡᠨ ᠭᠤᠷᠪᠠᠨ ᠰᠠᠢᠳ ᠲᠣᠳᠣᠷᠬᠠᠢᠯᠠᠨ ᠦᠵᠡᠭᠦᠯ 》ᠭᠡᠮᠡᠨ ᠣᠷᠳᠣᠨ ᠥᠷᠭᠥᠭᠡ ᠶ᠋ᠢᠨ ᠡᠮᠦᠨᠡ ᠬᠦᠵᠢᠰ ᠦ᠋ᠨ ᠰᠢᠷᠡᠭᠡ ᠪᠡᠯᠡᠳᠬᠡᠨ ᠣᠷᠳᠣᠨ ᠥᠷᠭᠥᠭᠡ ᠶ᠋ᠢᠨ ᠳᠣᠲᠣᠷᠠ ᠰᠢᠷᠠ ᠯᠤᠤ ᠶ᠋ᠢᠨ ᠣᠯᠪᠣᠭ ᠳᠡᠪᠢᠰᠦᠨ᠂ ᠬᠠᠭᠠᠨ ᠡᠵᠡᠨ ᠢ᠋ ᠵᠥᠭᠴᠢᠯᠡᠨ ᠭᠤᠷᠪᠠᠨ ᠵᠡᠷᠭᠡ ᠰᠥᠭᠥᠳᠴᠦ ᠶᠢᠰᠦᠨ ᠵᠡᠷᠭᠡ ᠪᠠᠶᠠᠷ ᠲᠤᠷ ᠮᠥᠷᠭᠥᠵᠦ ᠪᠣᠰᠤᠭᠠᠳ ᠵᠢᠴᠢ ᠪᠠᠰᠠ ᠵᠣᠭᠰᠣᠭᠠ ᠪᠠᠷ ᠰᠥᠭᠥᠳᠴᠦ ᠪᠦᠬᠦᠢ ᠭᠤᠷᠪᠠᠨ ᠰᠠᠢᠳ ᠲᠤᠷ ᠵᠠᠷᠯᠢᠭ ᠪᠣᠯᠤᠷᠤᠨ᠄
《ᠳᠡᠭᠡᠳᠦ ᠶ᠋ᠢᠨ ᠵᠠᠷᠯᠢᠭ ᠪᠠᠰᠠ ᠨᠢᠭᠡᠨ ᠵᠦᠢᠯ ᠪᠠᠢᠬᠤ ᠠᠨᠤ᠂ ᠬᠠᠭᠤᠴᠢᠨ ᠨᠠᠢ᠍ᠮᠠᠨ ᠢ᠋ ᠲᠦᠪᠰᠢᠳᠬᠡᠬᠦᠶᠡ ᠰᠢᠨᠡ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠲᠡᠳᠡᠨ ᠦ᠌ ᠭᠡᠷ ᠦ᠋ᠨ ᠣᠢᠷᠠ ᠤᠷᠤᠭ ᠪᠣᠯᠬᠤ ᠡᠬᠡᠨᠡᠷ ᠵᠠᠩᠵᠤᠨ ᠤ᠋ ᠴᠡᠷᠢᠭ ᠲᠦ᠍ᠷ ᠵᠢᠳᠬᠦᠭᠰᠡᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠳ᠋ᠦ᠍ᠷ ᠢᠨᠦ ᠬᠥᠬᠢᠭᠦᠯᠦᠨ ᠱᠠᠩᠨᠠᠬᠤᠢ ᠳ᠋ᠤᠷ ᠪᠠᠰᠠ ᠭᠡᠷᠦᠨ ᠳᠣᠲᠣᠷᠠᠬᠢ ᠤᠷᠤᠭ ᠪᠤᠯᠬᠤᠢ ᠶ᠋ᠢ ᠵᠠᠷᠯᠢᠭ ᠢ᠋ᠶ᠋ᠠᠷ ᠵᠢᠭᠠᠨ ᠱᠠᠩᠨᠠᠬᠤᠢ ᠶ᠋ᠢᠨ ᠤᠴᠢᠷ ᠲᠠᠢ ᠲᠤᠰᠢᠶᠠᠨ ᠢᠷᠡᠭᠰᠡᠨ ᠵᠠᠷᠯᠢᠭ ᠪᠣᠢ ᠶ᠋ᠢᠨ ᠲᠤᠯᠠ ᠵᠠᠷᠯᠢᠭ ᠢ ᠬᠢᠴᠢᠶᠡᠨ ᠳᠠᠭᠠᠵᠤ᠂ ᠡᠯᠡ ᠵᠦᠢᠯ ᠢ᠋ ᠦᠨᠡᠨ ᠮᠠᠭᠠᠳ ᠲᠤᠷ ᠭᠥᠷᠥᠭᠦᠯᠦᠨ ᠱᠠᠩᠨᠠᠨ ᠵᠢᠭᠠᠵᠤ ᠲᠣᠭᠲᠠᠭᠠᠭᠠᠳ᠂ ᠲᠣᠭᠲᠠᠭᠰᠠᠨ ᠤᠴᠢᠷ ᠢ᠋ ᠢᠯᠡᠷᠬᠡᠢᠯᠡᠨ ᠠᠢᠯᠠᠳᠬᠠᠵᠤ ᠵᠠᠷᠯᠢᠭ ᠢ᠋ ᠡᠭᠡᠭᠦᠯᠬᠦ ᠡᠨᠡ ᠨᠤᠭᠤᠯᠪᠤᠷᠢ ᠶ᠋ᠢ ᠮᠥᠨ ᠬᠦ᠌ ᠲᠠᠨ ᠤ᠋ ᠡᠷᠬᠢᠯᠡᠭᠰᠡᠨ ᠴᠢᠩ ᠦ᠋ᠳ ᠲᠣᠷ ᠲᠤᠰᠢᠶᠠᠨ ᠠᠢᠯᠠᠳᠬᠠᠭᠤᠯᠪᠠ 》ᠭᠡᠮᠡᠨ ᠪᠠᠰᠠ ᠨᠢᠭᠡᠨ ᠨᠤᠭᠤᠯᠪᠤᠷᠢ ᠳ᠋ᠤᠷ ᠮᠥᠷᠭᠥᠵᠦ ᠲᠤᠰᠢᠶᠠᠨ ᠡᠭᠦᠷᠦᠭᠦᠯᠪᠡ᠃
ᠲᠡᠨᠳᠡᠴᠡ ᠡᠵᠡᠨ ᠳ᠋ᠦ᠍ᠷ ᠠᠢᠯᠠᠳᠬᠠᠬᠤ ᠨᠤᠭᠤᠯᠪᠤᠷᠢ ᠡᠭᠦᠷᠦᠭᠰᠡᠨ ᠡᠷᠬᠢᠯᠡᠭᠰᠡᠨ ᠰᠠᠢᠳ ᠳ᠋ᠠᠢ ᠰᠡᠴᠡᠨ ᠮᠥᠷᠭᠥᠵᠦ ᠪᠣᠯᠬᠤ ᠦᠭᠡᠢ ᠲᠤᠯᠠ ᠨᠥᠭᠦᠭᠡ ᠬᠣᠶᠠᠷ ᠰᠠᠢᠳ ᠶᠠᠭᠠᠷᠠᠨ ᠬᠤᠸᠠᠩᠬᠡᠦ ᠳ᠋ᠦ᠍ᠷ ᠮᠥᠷᠭᠥᠨ ᠠᠶᠠᠷᠯᠠᠵᠤ ᠂ ᠬᠠᠷᠰᠢ ᠥᠷᠭᠥᠭᠡ ᠶ᠋ᠢᠨ ᠮᠠᠨᠳᠠᠯ ᠠ᠋ᠴᠠ ᠪᠠᠭᠤᠵᠤ ᠢᠷᠡᠭᠡᠳ᠂ ᠲᠠᠢᠬᠡᠦ ᠶ᠋ᠢᠨ ᠬᠠᠲᠠᠭᠤ ᠵᠠᠷᠯᠢᠭ ᠪᠣᠢ ᠶ᠋ᠢᠨ ᠲᠤᠯᠠᠳᠠ ᠠᠶᠤᠮᠰᠢᠭ ᠦᠭᠡᠢ ᠤᠳᠠᠬᠤ ᠦᠭᠡᠢ᠂ ᠵᠠᠷᠯᠢᠭ ᠪᠢᠴᠢᠭ ᠪᠠᠭᠤᠵᠤ ᠢᠷᠡᠮᠡᠭᠴᠡ ᠮᠥᠨ ᠴᠠᠭ ᠮᠥᠴᠡ ᠳ᠋ᠦ᠍ᠷ ᠳᠠᠷᠤᠢ ᠰᠢᠳᠠᠷ ᠠᠷᠠᠳ ᠭᠤᠴᠢᠨ ᠢᠯᠡᠭᠦᠦ ᠮᠣᠷᠢᠲᠠᠨ ᠢ᠋ ᠠᠪᠴᠤ᠂ ᠮᠣᠷᠳᠠᠨ ᠬᠥᠳᠡᠯᠵᠦ ᠰᠢᠨᠡ ᠨᠠᠢ᠍ᠮᠠᠨ ᠤ᠋ ᠬᠠᠭᠠᠨ ᠤ᠋ ᠬᠡᠰᠢᠭ ᠥᠷᠯᠥᠭᠡ ᠶ᠋ᠢᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠳ᠋ᠤᠷ ᠬᠦᠷᠲᠡᠭᠰᠡᠨ ᠡᠷᠡ ᠡᠮᠡ ᠭᠡᠷᠭᠡᠢ ᠪᠠ ᠵᠠᠩᠵᠤᠨ ᠴᠡᠷᠢᠭ ᠦ᠋ᠳ ᠯᠦ᠍ᠬᠡ ᠨᠡᠢᠯᠡᠵᠦ ᠵᠠᠷᠯᠢᠭ ᠢ᠋ ᠡᠭᠡᠭᠦᠯᠦᠷᠡ ᠬᠥᠳᠡᠯᠵᠦ ᠮᠣᠷᠳᠠᠪᠠ᠃ ᠡᠨᠡ ᠬᠦ᠌ ᠰᠢᠨᠡ ᠨᠠᠢ᠍ᠮᠠᠨ ᠤ᠋ ᠡᠬᠡᠨᠡᠷ ᠵᠠᠩᠵᠤᠨ ᠨᠠᠷ ᠤ᠋ᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠳ᠋ᠦ᠍ᠷ ᠱᠠᠩᠨᠠᠨ ᠡᠷᠭᠦᠮᠵᠢᠯᠡᠵᠦ᠂ ᠪᠠᠰᠠ ᠭᠤᠶᠤᠨ ᠠᠢᠯᠠᠳᠬᠠᠭᠰᠠᠨ ᠤᠷᠤᠭ ᠤ᠋ᠨ ᠶᠠᠪᠤᠳᠠᠯ ᠢ᠋ ᠶᠠᠭᠠᠬᠢᠨ ᠶᠠᠭᠠᠬᠢᠨ ᠱᠠᠩᠨᠠᠨ ᠵᠢᠭᠠᠵᠤ᠂ ᠬᠣᠣᠰᠯᠠᠬᠤ ᠬᠣᠯᠪᠣᠬᠤ ᠶ᠋ᠢ ᠬᠡᠷᠬᠢᠨ ᠬᠡᠷᠬᠢᠨ ᠶᠠᠪᠤᠭᠤᠯᠤᠭᠰᠠᠨ ᠢ᠋ ᠦᠭᠡ ᠶ᠋ᠢ ᠪᠠᠰᠠ ᠳᠠᠬᠢᠨ ᠡᠭᠡᠭᠦᠯᠵᠦ᠂ ᠡᠨᠡ ᠤᠴᠢᠷ ᠤ᠋ᠨ ᠡᠬᠢᠨ ᠡᠴᠡ ᠡᠬᠢᠯᠡᠵᠦ᠂ ᠶᠡᠬᠡ ᠲᠥᠯᠥᠪ ᠢ ᠲᠣᠪᠴᠢᠶᠠᠯᠠᠨ ᠢᠯᠡᠷᠬᠡᠢᠯᠡᠨ ᠥᠭᠦᠯᠡᠬᠦ ᠢᠨᠦ :
ᠤᠭ ᠠ᠋ᠴᠠ ᠶᠡᠬᠡ ᠵᠠᠩᠵᠤᠨ ᠲᠠᠢᠪᠤᠤ ᠪᠤᠭᠤᠷᠵᠢ᠂ ᠴᠡᠷᠢᠭ ᠦ᠋ᠨ ᠬᠠᠭᠠᠰ ᠢ᠋ ᠠᠪᠴᠤ᠂ ᠪᠠᠰᠠ ᠰᠢᠨᠡ ᠨᠠᠢ᠍ᠮᠠᠨ ᠤ᠋ ᠠᠯᠲᠠᠨᠱᠠᠭᠠ ᠶ᠋ᠢᠨ ᠭᠡᠷ ᠦ᠋ᠨ ᠬᠣᠲᠠᠯᠠᠭᠠᠷ ᠤ᠋ᠨ ᠶᠡᠬᠡ ᠴᠡᠷᠢᠭ ᠯᠦ᠍ᠭᠡ ᠤᠯᠤᠰ ᠲᠤᠷ ᠡᠭᠡᠬᠦᠶᠡ᠂ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠢ᠋ ᠨᠠᠢ᠍ᠮᠠᠨ ᠳ᠋ᠤᠷ ᠠᠨᠤ ᠦᠯᠡᠳᠡᠭᠡᠵᠦ᠂ ᠭᠠᠭᠴᠠ ᠠᠯᠲᠠᠨᠱᠠᠭᠠ ᠭᠡᠷ ᠦ᠋ᠨ ᠠᠮᠠᠨ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠮᠣᠷᠢ ᠲᠠᠢ ᠪᠠᠨ ᠵᠢᠪᠬᠤᠯᠠᠩ ᠪᠠᠯᠭᠠᠰᠤᠨᠠ ᠬᠦᠷᠴᠦ᠂ ᠲᠠᠢᠬᠡᠦ ᠶ᠋ᠢᠨ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠵᠤ᠂ ᠵᠢᠴᠢ ᠨᠠᠢ᠍ᠮᠠᠨ ᠤ᠋ ᠨᠢᠭᠡᠨ ᠭᠡᠷ ᠦ᠋ᠨ ᠬᠥᠬᠢᠭᠦᠯᠬᠦ ᠱᠠᠩᠨᠠᠬᠤ ᠵᠠᠷᠯᠢᠭ ᠪᠢᠴᠢᠭ ᠲᠡᠢ ᠡᠷᠭᠦᠨ ᠲᠤᠰᠢᠶᠠᠭᠰᠠᠨ ᠳ᠋ᠤᠷ ᠬᠤᠸᠠᠩᠬᠡᠦ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠢ᠋ ᠬᠦᠵᠢᠰ ᠦ᠋ᠨ ᠰᠢᠷᠡᠭᠡ ᠪᠡᠯᠡᠳᠬᠡᠨ ᠮᠥᠷᠭᠥᠵᠦ ᠬᠦᠯᠢᠶᠡᠨ ᠠᠪᠴᠤ ᠤᠴᠢᠷ ᠢ᠋ ᠤᠬᠠᠭᠠᠳ᠂ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠤᠷᠢᠳᠠ ᠰᠡᠷᠭᠦᠯᠡᠩ ᠭᠦᠩᠵᠦ ᠰᠣᠯᠣᠩᠭᠣᠣᠠ ᠶ᠋ᠢ ᠳᠠᠭᠤᠳᠠᠨ ᠪᠠᠷᠠᠭᠠᠳᠠᠭᠤᠯᠵᠤ ᠳᠡᠭᠦᠨᠦ ᠤᠭ ᠰᠠᠨᠠᠭᠠᠨ ᠤ᠋ ᠥᠪᠡᠷ ᠦ᠋ᠨ ᠨᠥᠬᠥᠷ ᠡᠷᠡ ᠶ᠋ᠢᠨ ᠪᠠᠲᠤ ᠵᠢᠷᠤᠮ ᠢ᠋ᠶ᠋ᠠᠷ ᠬᠡᠳᠦᠢᠴᠢᠨᠡᠭᠡᠨ ᠵᠢᠯ ᠰᠠᠬᠢᠨ ᠬᠦᠯᠢᠶᠡᠭᠰᠡᠨ ᠨᠠᠢᠷᠲᠤ ᠠᠴᠢ ᠳ᠋ᠤᠷ ᠬᠠᠷᠢᠭᠤᠯᠠᠬᠤ ᠦᠨᠡᠨ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠪᠦᠷᠢᠳᠲᠡᠯᠡ ᠮᠥᠷᠭᠥᠵᠦ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠬᠤᠸᠠᠩᠬᠡᠦ ᠨᠠᠷᠢᠪᠴᠢᠯᠠᠨ ᠠᠢᠯᠠᠳᠤᠨ ᠰᠣᠨᠣᠰᠴᠤ᠂ ᠲᠡᠷᠢᠭᠦᠨ ᠳᠣᠬᠢᠨ ᠮᠦᠰᠢᠶᠡᠵᠦ ᠵᠠᠷᠯᠢᠭ ᠦᠭᠡᠢ ᠳ᠋ᠦ᠍ᠷ ᠰᠣᠯᠤᠩᠭᠤᠸᠠ ᠳᠠᠬᠢᠨ ᠮᠥᠷᠭᠥᠵᠦ ᠳᠡᠭᠡᠳᠦ ᠥᠵᠢᠨ ᠲᠠᠢᠬᠡᠦ ᠡᠮᠡᠭᠡ ᠳ᠋ᠦ᠍ᠷ ᠪᠠᠷᠠᠭᠠᠯᠠᠨ ᠮᠥᠷᠭᠥᠬᠦ ᠶ᠋ᠢ ᠭᠤᠶᠤᠨ ᠠᠢᠯᠠᠳᠬᠠᠵᠤ ᠪᠠᠷᠠᠭᠠᠯᠠᠭᠠᠳ ᠮᠥᠷᠭᠥᠵᠦ ᠪᠠᠷᠠᠭᠰᠠᠨ ᠬᠣᠢᠨᠠ ᠳᠠᠬᠢᠨ ᠰᠥᠭᠥᠳᠴᠦ᠂ ᠬᠤᠸᠠᠩᠬᠡᠦ ᠳ᠋ᠦ᠍ᠷ ᠠᠢᠯᠠᠳᠬᠠᠭᠰᠠᠨ ᠶᠣᠰᠣᠭᠠᠷ ᠪᠦᠷᠢᠳᠬᠡᠨ ᠮᠥᠷᠭᠥᠵᠦ ᠠᠢᠯᠠᠳᠬᠠᠭᠰᠠᠨᠠ ᠲᠠᠢᠬᠡᠦ ᠶ᠋ᠢᠨ ᠳᠣᠲᠣᠷᠠ ᠰᠣᠨᠢᠷᠬᠠᠨ ᠪᠡᠶᠡᠰᠴᠦ᠂ ᠬᠤᠸᠠᠩᠬᠡᠦ ᠶ᠋ᠢᠨ ᠠᠮᠤᠭᠤᠯᠠᠩ ᠠᠢᠯᠠᠳᠬᠠᠷᠠ ᠢᠷᠡᠭᠰᠡᠨ ᠳ᠋ᠦ᠍ᠷ ᠲᠠᠢᠬᠡᠦ ᠵᠠᠷᠯᠢᠭ ᠪᠣᠯᠤᠷᠤᠨ :
《ᠨᠠᠢ᠍ᠮᠠᠨ ᠤ᠋ ᠡᠬᠡᠨᠡᠷ ᠡᠷᠬᠢᠯᠡᠭᠰᠡᠨ ᠰᠠᠢᠳ᠂ ᠰᠡᠷᠭᠦᠯᠡᠩ ᠭᠦᠩᠵᠦ ᠰᠣᠯᠣᠩᠭᠤᠤᠠ ᠶ᠋ᠢᠨ ᠡᠬᠡᠨᠡᠷ ᠦ᠋ᠨ ᠳᠣᠲᠣᠷᠠᠬᠢ ᠮᠡᠷᠭᠡᠨ ᠭᠡᠭᠡᠬᠡᠨ ᠶᠠᠪᠤᠳᠠᠯ ᠤ᠋ᠨ ᠤᠳᠤᠷᠢᠳᠬᠠᠯ ᠪᠥᠭᠡᠳ ᠤᠯᠤᠰ ᠲᠥᠷᠥ ᠪᠠ ᠳᠣᠲᠣᠭᠠᠳᠤ ᠣᠷᠳᠣᠨ ᠬᠦᠷᠢᠶᠡᠯᠡᠩ ᠦ᠋ᠨ ᠭᠡᠷᠡᠯ ᠬᠢᠯᠪᠠᠰᠣᠯᠲᠤ ᠰᠠᠢᠬᠠᠨ ᠰᠤᠷᠲᠠᠯ ᠳᠠᠭᠤᠷᠢᠶᠠᠯᠲᠠ ᠪᠥᠭᠡᠳ ᠡᠬᠡᠨᠡᠷ ᠬᠥᠮᠦᠨ ᠤ ᠳᠣᠲᠣᠷᠠᠬᠢ ᠣᠬᠢ ᠮᠠᠩᠯᠠᠢ ᠶ᠋ᠢᠨ ᠰᠣᠶᠣᠯ ᠰᠤᠷᠲᠠᠯ ᠪᠤᠯᠬᠤᠢ ᠶ᠋ᠢᠨ ᠲᠤᠯᠠᠳᠠ᠂ ᠳᠡᠭᠦᠨᠦ ᠠᠢᠯᠠᠳᠬᠠᠯ ᠢ᠋ ᠵᠣᠬᠢᠰ ᠢ᠋ ᠦᠵᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠥᠭᠭᠦᠭᠲᠦᠨ 》ᠬᠡᠮᠡᠵᠦᠬᠦᠢ᠃
ᠲᠡᠭᠦᠨᠴᠡ ᠬᠤᠸᠠᠩᠬᠡᠦ ᠳᠡᠭᠡᠳᠦ ᠶ᠋ᠢᠨ ᠵᠠᠷᠯᠢᠭ ᠢ᠋ ᠬᠢᠴᠢᠶᠡᠩᠭᠦᠢᠯᠡᠨ ᠳᠠᠭᠠᠵᠤ᠂ ᠭᠡᠭᠡᠬᠡᠨ ᠪᠤᠯᠠᠭ ᠤ᠋ᠨ ᠡᠬᠢᠨ ᠦ᠌ ᠰᠠᠬᠤᠯᠢᠭ ᠰᠢᠭᠤᠢ ᠶ᠋ᠢᠨ ᠬᠡᠢᠪᠠᠩ ᠤᠷᠤᠰᠬᠠᠯ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡ ᠳ᠋ᠡᠬᠢ ᠣᠷᠳᠣᠨ ᠥᠷᠭᠥᠭᠡ ᠶ᠋ᠢᠨ ᠭᠡᠭᠡᠪᠴᠢ ᠴᠠᠴᠠᠷ ᠲᠠᠭᠲᠤ ᠶ᠋ᠢᠨ ᠵᠤᠰᠠᠯ ᠤ᠋ᠨ ᠬᠤᠷᠢᠮ ᠰᠡᠷᠭᠦᠭᠡᠯ ᠳ᠋ᠦ᠍ᠷ ᠰᠠᠷᠯᠢᠭ ᠤᠯᠤᠰ ᠤ᠋ᠨ ᠨᠠᠷᠠᠨ ᠬᠠᠨ ᠤ᠋ ᠪᠦᠸᠸᠵᠣ ᠰᠠᠢᠬᠠᠨ ᠭᠦᠦᠷ ᠢ᠋ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ ᠪᠠᠷᠠᠭᠠᠳᠠᠨ ᠮᠥᠷᠭᠥᠭᠦᠯᠵᠦ ᠂ ᠬᠤᠸᠠᠩᠬᠡᠦ ᠲᠡᠷᠡ ᠬᠡᠦᠬᠡᠨ ᠢ᠋ ᠨᠢᠳᠦ ᠣᠷᠬᠢᠨ ᠨᠠᠷᠢᠪᠴᠢᠯᠠᠨ ᠠᠢᠯᠠᠳᠤᠨ ᠦᠵᠡᠪᠡᠰᠦ ᠂ ᠪᠢᠴᠢᠬᠠᠨ ᠲᠣᠭᠣᠷᠢᠭ ᠳᠦᠭᠦᠷᠡᠩ ᠪᠥᠮᠪᠥᠭᠡᠷ ᠪᠤᠯᠪᠠᠷᠠᠢ ᠴᠠᠭᠠᠨ ᠶᠠᠭᠠᠨ ᠲᠣᠭᠣᠷ ᠤ᠋ᠨ ᠴᠡᠴᠡᠭ ᠦ᠋ᠨ ᠰᠠᠢᠬᠠᠨ ᠵᠢᠰᠦ ᠂ ᠲᠤᠩᠭᠠᠯᠠᠭ ᠭᠡᠭᠡᠬᠡᠨ ᠬᠤᠷᠴᠠ ᠰᠡᠷᠭᠦᠯᠡᠩ ᠨᠢᠭᠡᠨ ᠲᠡᠭᠦᠰ ᠮᠡᠷᠭᠡᠨ ᠭᠡᠷᠡᠯᠲᠦ ᠦᠵᠡᠰᠬᠦᠯᠡᠩ ᠨᠢᠳᠦ ᠂ ᠬᠣᠶᠠᠷ ᠮᠤᠷᠤᠢ ᠬᠠᠪᠤᠷ ᠤ᠋ᠨ ᠤᠳᠠ ᠶ᠋ᠢᠨ ᠨᠠᠢᠯᠵᠠᠭᠤᠷ ᠮᠤᠷᠤᠢ ᠵᠢᠷᠤᠮᠠᠯ ᠬᠡᠭᠡᠨᠴᠢᠷ ᠬᠥᠮᠥᠰᠬᠡ ᠂ ᠬᠠᠷᠠ ᠦᠰᠦᠨ ᠦ᠌ ᠥᠩᠭᠡ ᠳ᠋ᠦ᠍ᠷ ᠬᠥᠮᠦᠨ ᠦ᠌ ᠵᠢᠰᠦ ᠦᠵᠡᠭᠳᠡᠮᠡᠷ ᠂ ᠲᠠᠪᠤᠨ ᠲᠡᠭᠰᠢ ᠥᠨᠳᠥᠷ ᠱᠣᠪᠣᠢᠩᠭᠣ ᠰᠠᠢᠬᠠᠨ ᠬᠡᠪ ᠦ᠋ᠨ ᠪᠡᠶᠡ ᠃ ᠱᠤᠪᠲᠤᠩ ᠳᠦᠭᠦᠷᠡᠩ ᠬᠠᠰ ᠶᠠᠰᠤ ᠬᠠᠢᠳᠠᠨ ᠴᠡᠴᠡᠭ ᠦ᠋ᠨ ᠮᠥᠷᠥ᠃ ᠦᠨᠡᠬᠡᠷ ᠦᠭᠦᠯᠡᠯᠳᠦᠬᠦᠢ ᠶ᠋ᠢᠨ ᠤᠷᠢᠳ ᠦᠵᠡᠰᠬᠦᠯᠡᠩ ᠵᠢᠷᠦᠬᠡ ᠲᠠᠨᠢᠭᠳᠠᠭᠠᠳ᠂ ᠦᠵᠡᠬᠦᠢ ᠶ᠋ᠢᠨ ᠵᠡᠪᠰᠡᠷᠡ ᠰᠢᠳᠢᠲᠡᠨ ᠥᠬᠢᠨ ᠦ᠌ ᠲᠥᠯᠥᠪ ᠢᠯᠡᠷᠡᠵᠦ᠂ ᠮᠠᠩᠨᠤᠭ ᠤᠭᠠᠯᠵᠠᠲᠤ ᠪᠤᠯᠢᠭᠠᠷᠢ ᠲᠦᠷᠦᠢᠳᠣ ᠭᠤᠲᠤᠯ ᠡᠮᠦᠰᠦᠭᠰᠡᠨ ᠶᠡᠬᠡ ᠬᠥᠯ ᠪᠥᠭᠡᠲᠡᠯᠡ ᠨᠢᠭᠡᠨ ᠰᠥᠭᠡᠮ ᠦ᠋ᠨ ᠲᠡᠳᠦᠢ᠂ ᠠᠷᠪᠠᠭᠠᠳ ᠨᠠᠰᠤᠨ ᠤ᠋ ᠬᠡᠦᠬᠡᠳ ᠦ᠋ᠨ ᠲᠡᠳᠦᠢ ᠬᠣᠶᠠᠷ ᠬᠥᠯ ᠴᠡᠭᠡᠷ ᠴᠡᠪᠡᠷ ᠬᠡᠲᠦᠢᠳᠦᠭᠡᠳ᠂ ᠠᠷᠢᠯᠭᠠᠭᠰᠠᠨ ᠰᠣᠩᠭᠢᠨᠠ ᠶ᠋ᠢᠨ ᠠᠷᠪᠠᠨ ᠬᠤᠷᠤᠭᠤ ᠣ ᠪᠠᠷ ᠪᠦᠲᠦᠭᠡᠭᠰᠡᠨ ᠮᠡᠲᠦ᠃ ᠪᠡᠶᠡ ᠳᠦᠭᠦᠷᠡᠩ ᠪᠠᠷᠠᠭᠤᠨ ᠬᠣᠲᠤᠩᠭᠤᠳ ᠤ᠋ᠨ ᠲᠡᠭᠷᠢ ᠶ᠋ᠢᠨ ᠬᠤᠪᠴᠠᠳ ᠴᠢᠮᠡᠭ ᠢ᠋ᠶ᠋ᠡᠷ ᠴᠢᠮᠡᠭᠯᠡᠵᠦ ᠂ ᠮᠥᠷᠭᠥᠵᠦ ᠰᠥᠭᠥᠳᠬᠦ᠂ ᠪᠣᠰᠬᠤ ᠵᠣᠭᠰᠣᠬᠤ ᠶ᠋ᠢᠨ ᠵᠠᠪᠰᠠᠷᠠ ᠨᠢᠰᠬᠦ ᠪᠦᠴᠡ᠂ ᠬᠡᠢᠰᠬᠦ ᠴᠢᠮᠡᠭ ᠰᠣᠯᠣᠩᠭᠠ ᠣᠷᠢᠶᠠᠯᠳᠤᠨ᠂ ᠲᠣᠭᠣᠰ ᠮᠠᠭᠰᠢᠬᠤ ᠮᠡᠲᠦ᠂ ᠦᠨᠡᠬᠡᠷ ᠭᠡᠷᠡᠯ ᠰᠠᠴᠤᠷᠠᠨ ᠬᠢᠯᠪᠠᠰᠤᠮᠤᠢ᠃ ᠡᠴᠢᠬᠦ ᠢᠷᠡᠬᠦ ᠬᠥᠳᠡᠯᠬᠦ ᠵᠣᠷᠴᠢᠬᠤᠢ ᠶ᠋ᠢᠨ ᠬᠡᠢ ᠰᠠᠯᠬᠢᠨᠠ ᠺᠠᠪᠢᠷᠠ ᠶ᠋ᠢᠨ ᠲᠣᠰᠣ᠂ ᠯᠤᠤ ᠶ᠋ᠢᠨ ᠵᠠᠭᠠᠷ ᠤ᠋ᠨ ᠰᠡᠷᠢᠭᠦᠨ ᠲᠤᠩᠭᠠᠯᠠᠭ ᠨᠣᠢᠲᠠᠨ ᠠᠩᠬᠢᠯᠤᠮᠠᠯ ᠰᠠᠢᠬᠠᠨ ᠦᠨᠦᠷ ᠰᠦᠷᠴᠢᠭᠢᠨᠡᠨ ᠰᠠᠩᠬᠣᠯᠠᠵᠣ᠂ ᠬᠢᠴᠢᠶᠡᠩᠭᠦᠢᠯᠡᠨ ᠪᠣᠯᠭᠣᠮᠵᠢᠯᠠᠨ ᠶᠢᠰᠦᠨᠲᠡ ᠮᠥᠷᠭᠥᠬᠦᠶᠡ᠂ ᠰᠠᠷᠠᠨ ᠣᠷᠳᠣᠨ ᠤ᠋ ᠵᠢᠷᠤᠭ ᠤ᠋ᠨ ᠷᠠᠭᠢᠨᠢᠰ ᠠ᠋ᠴᠠ ᠴᠤ᠌ ᠲᠠᠭᠠᠯᠠᠮᠵᠢᠲᠠᠢ ᠰᠠᠢᠬᠠᠨ ᠳ᠋ᠤᠷ ᠬᠤᠸᠠᠩᠬᠡᠦ ᠨᠢᠭᠡᠨᠲᠡ ᠦᠵᠡᠮᠡᠭᠴᠡ ᠪᠠᠬᠠᠷᠬᠠᠨ ᠪᠡᠶᠡᠰᠴᠦ᠂ ᠰᠠᠨᠠᠮᠰᠠᠷ ᠦᠭᠡᠢ ᠺᠠᠷᠣᠳᠢ ᠶ᠋ᠢᠨ ᠨᠢᠭᠤᠷ ᠲᠤᠷ ᠪᠠᠶᠠᠷ ᠤ᠋ᠨ ᠥᠩᠭᠡ ᠢᠯᠡᠷᠡᠵᠦ᠂ ᠠᠯᠲᠠᠨ ᠡᠬᠡ ᠶ᠋ᠢᠨ ᠠᠰᠠᠷᠠᠯᠲᠤ ᠵᠢᠰᠦ ᠳ᠋ᠦ᠍ᠷ ᠮᠦᠰᠢᠶᠡᠮᠰᠦᠭ ᠪᠠᠢᠳᠠᠯ ᠨᠡᠮᠡᠭᠳᠡᠨ᠂ ᠠᠷᠭᠠᠳᠠᠯ ᠦᠭᠡᠢ ᠠᠮᠠᠨ ᠤ᠋ ᠵᠠᠷᠯᠢᠭ ᠠᠯᠳᠠᠵᠤ ᠵᠠᠷᠯᠢᠭ ᠪᠣᠯᠤᠷᠤᠨ᠄
《ᠶᠠᠭᠤᠲᠠᠢ ᠰᠠᠢᠬᠠᠨ ᠠᠷᠢᠭᠤᠨ ᠴᠡᠪᠡᠷᠬᠡᠨ᠂ ᠴᠡᠴᠡᠭ ᠰᠠᠷᠠᠨ ᠠᠳᠠᠯᠢ ᠬᠡᠦᠬᠡᠨ ᠪᠣᠢ ? 》ᠭᠡᠮᠡᠨ ᠮᠠᠭᠲᠠᠨ ᠰᠠᠢᠰᠢᠶᠠᠵᠤ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠰᠢᠳᠠᠷ ᠳᠡᠷᠭᠡᠳᠡ ᠬᠡᠳᠦᠨ ᠡᠳᠦᠷ ᠪᠠᠢᠯᠴᠠᠵᠤ ᠂ ᠬᠤᠷᠢᠮ ᠰᠡᠷᠭᠦᠭᠡᠯ ᠳ᠋ᠦ᠍ᠷ ᠵᠠᠷᠤᠴᠠᠯᠠᠭᠲᠤᠨ ᠭᠡᠮᠡᠨ ᠦᠯᠡᠳᠡᠭᠡᠵᠦ᠂ ᠬᠡᠳᠦᠨ ᠡᠳᠦᠷ ᠰᠢᠳᠠᠷ ᠰᠤᠪᠢᠯᠠᠨ ᠡᠩᠰᠡᠭᠯᠡᠬᠥᠢ ᠶ᠋ᠢᠨ ᠵᠠᠪᠰᠠᠷᠡ᠂ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠤ᠋ ᠲᠡᠷᠭᠡᠯ ᠰᠥᠨᠢ ᠶ᠋ᠢᠨ ᠲᠤᠨᠤᠯᠤᠮᠠ ᠰᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ᠷ ᠬᠡᠢᠪᠡᠩ ᠨᠠᠭᠤᠷ ᠤ᠋ᠨ ᠴᠡᠴᠡᠭᠯᠢᠭ ᠦ᠋ᠨ ᠬᠢᠵᠠᠭᠠᠷᠠ ᠰᠥᠨᠢ ᠶ᠋ᠢᠨ ᠰᠡᠷᠢᠭᠦᠴᠡᠯ ᠰᠡᠷᠭᠦᠭᠡᠯ ᠦ᠋ᠨ ᠬᠤᠷᠢᠮ ᠳ᠋ᠤᠷ ᠵᠠᠷᠤᠴᠠᠯᠠᠨ᠂ ᠳᠡᠭᠦᠨᠦ ᠲᠡᠭᠷᠢ ᠠᠭᠤᠯᠠᠨ ᠤ᠋ ᠳᠣᠲᠣᠷᠠ ᠭᠤᠷᠪᠠ ᠳᠥᠷᠪᠡᠨ ᠵᠢᠯ ᠰᠠᠭᠤᠵᠤ᠂ ᠴᠢᠦ ᠰᠢᠶᠠᠨ ᠬᠦ ᠶ᠋ᠢᠨ ᠰᠤᠷᠭᠠᠯ ᠦᠭᠡᠰ ᠪᠠ ᠬᠢᠴᠢᠶᠡᠯ ᠳᠠᠳᠬᠠᠯ ᠤ᠋ᠨ ᠵᠠᠩ ᠠᠪᠤᠴᠠ᠂ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠪᠡᠯᠡᠳᠬᠡᠯ ᠦᠢᠯᠡᠳᠪᠦᠷᠢ ᠶ᠋ᠢᠨ ᠤᠴᠢᠷ ᠶᠠᠪᠤᠳᠠᠯ ᠢ ᠤᠬᠤᠴᠢᠯᠠᠨ ᠠᠢᠯᠠᠳᠤᠨ ᠠᠰᠠᠭᠤᠬᠤᠶᠠ᠂ ᠬᠠᠷᠢᠭᠤ ᠰᠥᠭᠥᠳᠴᠦ ᠠᠢᠯᠠᠳᠬᠠᠨ ᠮᠡᠳᠡᠭᠦᠯᠬᠦ ᠢᠨᠣ᠂ ᠤᠰᠤ ᠴᠢᠳᠬᠤᠨ ᠪᠤᠯᠠᠭ ᠣᠷᠭᠢᠯᠬᠤ ᠮᠡᠲᠦ ᠳᠦᠷᠪᠡᠯ ᠦᠭᠡᠢ᠂ ᠦᠭᠡ ᠮᠡᠳᠡᠭᠦᠯᠦᠯ ᠭᠡᠭᠡᠬᠡᠨ ᠢᠯᠭᠤᠮ᠂ ᠥᠴᠢᠬᠦ ᠠᠢᠯᠠᠳᠬᠠᠬᠤ ᠲᠣᠳᠣᠷᠬᠠᠢ ᠢᠯᠭᠠᠪᠤᠷᠢᠲᠠᠢ ᠳ᠋ᠤᠷ ᠳᠠᠷᠤᠢ ᠲᠡᠭᠦᠨᠦ ᠪᠢᠴᠢᠭ ᠦᠰᠦᠭ ᠦ᠋ᠨ ᠰᠤᠷᠲᠠᠯᠲᠠᠢ ᠶ᠋ᠢ ᠦᠵᠡᠵᠦ ᠭᠠᠷᠤᠭᠠᠳ ᠨᠢᠭᠡᠨ ᠰᠠᠨᠠᠭᠠᠨ ᠣᠯᠵᠤ᠂ ᠡᠨᠡ ᠦᠶᠡ ᠳ᠋ᠦ᠍ᠷ ᠣᠷᠳᠣᠨ ᠤ᠋ ᠥᠬᠢᠳ ᠪᠠᠬᠠᠨ ᠰᠡᠯᠡᠭᠦᠷᠡᠵᠦ ᠨᠠᠮ ᠲᠤᠩᠭᠠᠯᠠᠭ᠂ ᠬᠤᠷᠠ ᠶ᠋ᠢᠨ ᠬᠣᠢᠨᠠᠬᠢ ᠠᠷᠢᠯᠤᠭᠰᠠᠨ ᠲᠡᠷᠭᠡᠯ ᠰᠠᠷᠠᠨ ᠪᠠᠭᠠ ᠦᠳᠡ ᠪᠣᠯᠵᠤ᠂ ᠡᠷᠳᠡᠮᠲᠦ ᠨᠠᠭᠤᠷ ᠤ᠋ᠨ ᠮᠡᠯᠮᠡᠯᠵᠡᠮᠡ ᠭᠢᠯᠪᠠᠯᠠᠬᠤ ᠬᠠᠷᠠᠩᠭᠤᠢ ᠨᠣᠭᠣᠭᠠᠨ ᠲᠡᠭᠰᠢᠷᠡᠭᠰᠡᠨ ᠭᠦᠨ ᠳᠥᠯᠭᠡᠨ ᠨᠠᠭᠤᠷ ᠤ᠋ᠨ ᠢᠷᠮᠡᠭ ᠲᠣᠷ ᠵᠣᠭᠰᠣᠭᠰᠠᠨ ᠲᠡᠭᠷᠢ ᠶ᠋ᠢᠨ ᠴᠢᠮᠡᠭᠲᠦ ᠰᠠᠢᠬᠠᠨ ᠭᠦᠦᠷ ᠬᠡᠦᠬᠡᠨ ᠦ᠌ ᠪᠡᠶᠡ ᠳᠦᠭᠦᠷᠡᠩ ᠲᠤᠨᠤᠯᠤᠨ ᠲᠣᠰᠴᠤ᠂ ᠪᠦᠬᠦᠯᠢ ᠪᠡᠶᠡ ᠴᠣᠭᠴᠠ ᠨᠢᠭᠤᠷ ᠵᠢᠰᠦ ᠲᠣᠯᠢ ᠮᠡᠲᠦ ᠲᠤᠨᠤᠮᠠᠯ ᠨᠠᠭᠤᠷ ᠤ᠋ᠨ ᠣᠰᠤᠨᠠ ᠲᠤᠶᠠᠭᠠᠯᠠᠨ ᠲᠣᠰᠤᠭᠠᠳ᠂ ᠨᠠᠭᠤᠷ ᠤ᠋ᠨ ᠳᠣᠲᠣᠷᠠ ᠪᠠᠰᠠ ᠨᠢᠭᠡᠨ ᠯᠤᠤᠰ ᠤ᠋ᠨ ᠥᠬᠢᠨ᠂ ᠲᠡᠭᠷᠢ ᠶ᠋ᠢᠨ ᠷᠠᠬᠢᠨᠢ ᠢᠯᠡᠷᠡᠨ ᠭᠠᠷᠤᠭᠰᠠᠨ ᠳ᠋ᠤᠷ᠂ ᠬᠤᠸᠠᠩᠬᠡᠦ ᠠᠯᠠᠰᠬᠢᠨ ᠪᠡᠶᠡᠰᠦᠨ ᠲᠠᠭᠠᠯᠠᠵᠤ᠂ ᠰᠠᠢᠬᠠᠨ ᠭᠦᠦᠷ ᠢ᠋ ᠬᠠᠷᠠᠵᠤ᠂ ᠨᠠᠭᠤᠷ ᠤ᠋ᠨ ᠣᠰᠤᠨᠠ ᠮᠣᠳᠣᠷ ᠢ᠋ᠶ᠋ᠠᠷ ᠵᠢᠭᠠᠵᠤ᠂ ᠡᠢᠨ ᠵᠠᠷᠯᠢᠭ ᠪᠣᠯᠤᠷᠤᠨ :
《ᠬᠠᠰ ᠤ᠋ᠨ ᠴᠠᠰᠤ ᠠᠷᠢᠭᠤᠨ ᠴᠡᠭᠡᠷ᠂ ᠬᠤᠪᠢᠯᠭᠠᠨ ᠥᠬᠢᠨ ᠦ᠌ ᠬᠥᠷᠥᠭ 》ᠬᠡᠮᠡᠭᠡᠳ ᠰᠠᠢᠬᠠᠨ ᠭᠦᠦᠷ ᠬᠡᠦᠬᠡᠨ ᠢ᠋ ᠬᠣᠣᠰᠯᠠᠨ ᠬᠣᠯᠪᠣᠵᠤ᠂ ᠥᠴᠢᠵᠦ ᠠᠢᠯᠠᠳᠬᠠ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠠᠢᠬᠠᠨ ᠭᠦᠦᠷ᠂ ᠤᠰᠤᠨ ᠤ᠋ ᠤᠷᠤᠭᠤ ᠥᠩᠭᠡᠢᠵᠦ᠂ ᠥᠪᠡᠷᠦᠨ ᠳᠦᠷᠰᠦ ᠪᠡᠨ ᠦᠵᠡᠭᠡᠳ᠂ ᠰᠠᠶᠢ ᠰᠡᠬᠡᠰᠬᠢᠵᠦ᠂ ᠳᠣᠣᠷᠠ ᠪᠠᠨ ᠰᠥᠭᠥᠳᠴᠦ ᠬᠣᠯᠪᠣᠨ ᠥᠴᠢᠵᠦ ᠠᠢᠯᠠᠳᠬᠠᠷᠤᠨ :
《ᠬᠠᠭᠤᠷᠮᠠᠭ ᠦᠨᠡᠨ ᠢ᠋ ᠠᠳᠠᠯᠢ ᠪᠠᠷ ᠠᠰᠠᠷᠠᠬᠤ ᠪᠣᠭᠳᠠ ᠡᠬᠡ ᠶ᠋ᠢᠨ ᠨᠢᠭᠦᠯᠡᠰᠬᠦᠢ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠤᠸᠠᠩᠬᠡᠦ ᠡᠬᠡ ᠬᠣᠣᠰ ᠦᠭᠡᠢ ᠶᠡᠬᠡ ᠰᠢᠨᠡᠷᠬᠡᠨ ᠪᠡᠶᠡᠰᠴᠦ ᠵᠠᠯᠭᠠᠵᠤ ᠵᠠᠷᠯᠢᠭ ᠪᠣᠯᠤᠷᠤᠨ :
《ᠬᠠᠢᠷᠠᠬᠠᠨ ᠰᠠᠢᠬᠠᠨ ᠬᠡᠦᠬᠡᠨ ᠪᠡᠶᠡ ᠶ᠋ᠢ ᠬᠠᠷᠢ ᠳ᠋ᠤᠷ ᠥᠭᠬᠦ ᠴᠠᠭ ᠪᠣᠯᠪᠠ 》 ᠬᠡᠮᠡᠭᠡᠳ ᠪᠠᠰᠠ ᠵᠠᠯᠭᠠᠵᠤ《ᠬᠣᠣᠰᠯᠠᠨ ᠬᠣᠯᠪᠣᠵᠤ ᠥᠴᠢ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠠᠢᠬᠠᠨ ᠭᠦᠦᠷ ᠮᠥᠷᠭᠥᠵᠦ ᠠᠢᠯᠠᠳᠬᠠᠷᠤᠨ :
《ᠬᠠᠭᠠᠨ ᠤ᠋ ᠬᠤᠸᠠᠩᠬᠡᠦ ᠶ᠋ᠢᠨ ᠪᠣᠱᠣᠭ ᠵᠠᠷᠯᠢᠭ᠂ ᠬᠠᠮᠢᠭᠠᠰᠢ ᠵᠢᠭᠠᠪᠠᠴᠤ ᠬᠡᠰᠢᠭ ᠪᠣᠯᠠᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠤᠸᠠᠩᠬᠡᠦ ᠬᠤᠪᠢ ᠶ᠋ᠢᠨ ᠭᠠᠳᠠᠨᠠ ᠰᠣᠴᠢᠨ ᠰᠠᠢᠰᠢᠶᠠᠵᠤ᠂ ᠭᠠᠢᠬᠠᠨ ᠮᠦᠰᠢᠶᠡᠭᠡᠳ ᠪᠠᠰᠠ ᠵᠠᠷᠯᠢᠭ ᠪᠣᠯᠤᠷᠤᠨ :
《ᠬᠠᠰ ᠬᠡᠮᠡᠭᠴᠢ ᠠᠯᠲᠠᠨ ᠤ᠋ ᠬᠣᠣᠰᠯᠠᠯ ᠢ᠋ ᠴᠢᠨᠦ ᠰᠠᠨᠠᠭᠠᠨ ᠳ᠋ᠤᠷ ᠶᠠᠮᠪᠠᠷ ! 》ᠬᠡᠮᠡᠭᠡᠳ ᠪᠠᠰᠠ ᠲᠦᠷᠬᠡᠨᠡ ᠬᠣᠣᠰᠯᠠᠵᠤ ᠬᠣᠯᠪᠣᠨ ᠥᠴᠢ ᠬᠡᠮᠡᠭᠰᠡᠨᠡ᠂ ᠰᠠᠢᠬᠠᠨ ᠭᠦᠦᠷ ᠣᠭᠲᠣ ᠶᠠᠭᠠᠷᠠᠬᠤ ᠦᠭᠡᠢ ᠪᠡᠷ ᠤᠰᠤᠨ ᠤ᠋ ᠳᠣᠲᠣᠷᠠ ᠳᠠᠬᠢᠨ ᠨᠢᠭᠡᠨᠲᠡ ᠦᠵᠡᠭᠡᠳ᠂ ᠮᠥᠷᠭᠥᠵᠦ ᠬᠣᠣᠰᠯᠠᠨ ᠠᠢᠯᠠᠳᠬᠠᠷᠤᠨ :
《ᠬᠠᠲᠤᠭᠲᠠᠢ ᠬᠡᠮᠡᠭᠴᠢ ᠨᠥᠬᠥᠷ ᠦ᠋ᠨ ᠡᠷᠭᠦᠮᠵᠢᠯᠡᠯ ᠢ᠋ ᠰᠠᠢᠳ ᠥᠬᠢᠨ ᠤᠬᠠᠮᠵᠢᠯᠠᠮᠤᠢ 》ᠬᠡᠮᠡᠭᠰᠡᠨᠡ ᠬᠠᠲᠤᠨ ᠬᠤᠸᠠᠩᠬᠡᠦ᠂ ᠬᠠᠪᠤᠲᠠᠢ ᠵᠣᠬᠢᠰᠲᠠᠢ ᠳ᠋ᠤᠷ ᠬᠠᠮᠢᠶᠠ ᠴᠤ᠌ ᠦᠭᠡᠢ ᠪᠠᠬᠠᠷᠬᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ :
《ᠬᠠᠮᠤᠭ ᠡᠬᠡᠨᠡᠷ ᠦ᠋ᠳ ᠪᠠᠭᠠ ᠪᠣᠯᠬᠤᠢ ᠳ᠋ᠤᠷ ᠳᠤᠷᠠᠯᠠᠳᠠᠭ ᠦᠭᠡᠢ ᠪᠠᠢᠳᠠᠭ ᠪᠢᠰᠢᠦ ? 》ᠬᠡᠮᠡᠭᠰᠡᠨᠡ ᠰᠠᠢᠬᠠᠨ ᠭᠦᠦᠷ ᠦ᠋ᠨ ᠲᠤᠩᠭᠠᠯᠠᠭ ᠨᠢᠳᠦᠨᠡ ᠤᠰᠤᠨ ᠭᠦᠶᠦᠵᠦ ᠴᠢᠷᠠᠢ ᠶ᠋ᠢᠨ ᠥᠩᠭᠡ ᠥᠴᠦᠬᠡᠨ ᠤᠯᠠᠰᠬᠢᠨ᠂ ᠮᠥᠨ ᠬᠦ᠌ ᠠᠯᠭᠤᠷ ᠠᠭᠠᠵᠢᠮ ᠮᠥᠷᠭᠥᠵᠦ ᠬᠣᠯᠪᠣᠨ ᠠᠢᠯᠠᠳᠬᠠᠷᠤᠨ :
《ᠬᠠᠮᠠᠭᠠᠯᠠᠯ ᠨᠢᠭᠦᠯᠡᠰᠬᠦᠢ ᠳ᠋ᠦ᠍ᠷ ᠬᠠᠮᠢᠶᠠᠲᠠᠢ ᠪᠣᠢ ᠢᠡ᠂ ᠬᠠᠷᠢᠨᠴᠤ ᠪᠠᠭᠠ ᠳ᠋ᠤᠷ ᠦᠭᠡᠢ 》ᠬᠡᠮᠡᠪᠡ᠃
ᠶᠡᠬᠡᠮᠰᠦᠭ ᠭᠡᠷᠡᠯᠲᠦ ᠬᠤᠸᠠᠩᠬᠡᠦ ᠶᠡᠬᠡᠳᠡ ᠪᠡᠶᠡᠰᠦᠨ᠂ ᠮᠠᠰᠢᠳᠠ ᠰᠠᠢᠰᠢᠶᠠᠨ ᠪᠠᠰᠠ ᠭᠠᠢᠬᠠᠵᠤ ᠳᠠᠭᠤᠨ ᠠᠯᠲᠠᠨ᠄
《 ᠦᠨᠡᠭᠡᠷᠡᠨ ᠰᠡᠴᠡᠨ ᠬᠤᠷᠴᠠ ᠬᠡᠦᠬᠡᠨ ᠪᠠᠢᠨᠠᠮ 》ᠭᠡᠮᠡᠨ ᠪᠠᠰᠠ ᠵᠠᠷᠯᠢᠭ ᠪᠣᠯᠤᠷᠤᠨ᠄
《ᠰᠠᠢᠬᠠᠨ ᠭᠦᠦᠷ ᠬᠡᠦᠬᠡᠨ ᠬᠣᠣᠰᠯᠠᠨ ᠬᠣᠯᠪᠣᠵᠤ ᠥᠴᠢᠵᠦ ᠠᠢᠯᠠᠳᠬᠠ᠃ ᠬᠠᠮᠤᠭ ᠥᠩᠭᠡ ᠰᠣᠯᠣᠩᠭᠠ ᠶ᠋ᠢᠨ ᠭᠡᠷᠡᠯ ᠡᠴᠡ ᠬᠡᠲᠦᠷᠡᠳᠡᠭ ᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠰᠠᠢᠬᠠᠨ ᠭᠦᠦᠷ ᠰᠠᠨᠠᠭᠠᠨ ᠢ᠋ ᠢᠯᠡᠳᠬᠡᠨ ᠮᠥᠷᠭᠥᠵᠦ ᠠᠪᠤᠨ ᠳᠠᠷᠤᠢ ᠠᠢᠯᠠᠳᠬᠠᠷᠤᠨ᠄
《ᠬᠠᠷᠠᠭᠰᠠᠭᠠᠷ ᠪᠠᠬᠠᠷᠬᠠᠭᠰᠠᠨ ᠰᠠᠢᠬᠠᠨ ᠭᠦᠦᠷ ᠦ᠋ᠨ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠵᠠᠶᠠᠭᠠᠨ ᠪᠣᠯᠠᠢ 》ᠬᠡᠮᠡᠪᠡᠢ᠃ ᠬᠤᠸᠠᠩᠬᠡᠦ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠬᠣᠣᠰ ᠦᠭᠡᠢ ᠲᠠᠭᠠᠯᠠᠨ ᠪᠡᠶᠡᠰᠴᠦ ᠮᠦᠰᠢᠶᠡᠨ 《ᠰᠠᠭᠠᠷ ᠦᠭᠡᠢ ᠰᠠᠨᠠᠭᠠᠲᠤ ᠰᠠᠴᠠᠭᠤ ᠦᠭᠡᠢ ᠰᠠᠢᠬᠠᠨ ᠬᠡᠦᠬᠡᠨ ᠮᠥᠨ᠃ ᠰᠡᠲᠡᠷᠡᠰᠢ ᠦᠭᠡᠢ ᠣᠶᠤᠨᠲᠤ ᠰᠠᠴᠤᠷᠠᠬᠤ ᠭᠡᠷᠡᠯᠲᠦ ᠰᠠᠢᠬᠠᠨ ᠭᠦᠦᠷ ᠪᠠᠢᠨᠠᠮ 》 ᠭᠡᠮᠡᠨ ᠰᠠᠢᠰᠢᠶᠠᠨ ᠮᠠᠭᠲᠠᠵᠤ᠂ ᠯᠤᠤ ᠶ᠋ᠢᠨ ᠰᠢᠷᠡᠭᠡᠨᠡ ᠲᠠᠯᠪᠢᠭᠰᠠᠨ ᠯᠦᠩ ᠰᠢᠶᠠᠨ ᠲᠠᠨ ᠬᠡᠮᠡᠬᠦ ᠵᠠᠭᠠᠷ ᠬᠦᠵᠢᠰ ᠠᠭᠠᠷᠤ ᠮᠣᠳᠣᠨ᠂ ᠰᠤᠪᠤᠳ ᠤ᠋ᠨ ᠡᠪᠦᠳᠦᠭᠲᠦ ᠡᠷᠢᠭᠡ ᠨᠢᠭᠡ᠂ ᠵᠠᠭᠤᠨ ᠯᠠᠩ ᠤ᠋ᠨ ᠰᠢᠵᠢᠷ ᠠᠯᠲᠠᠨ ᠤ᠋ ᠥᠯᠵᠡᠢᠲᠦ ᠭᠣᠬᠠ ᠬᠣᠶᠠᠷ᠂ ᠰᠢᠵᠢᠷ ᠠᠯᠲᠠᠨ ᠤ᠋ ᠨᠦᠬᠡᠲᠦ ᠵᠣᠭᠣᠰ ᠶᠢᠰᠦᠨ ᠲᠥᠭᠥᠷᠢᠭ ᠱᠠᠩᠨᠠᠵᠤ᠂ ᠭᠡᠭᠡᠬᠡᠨ ᠨᠠᠭᠤᠷᠠ ᠨᠠᠭᠠᠳᠤᠨ ᠴᠡᠩᠭᠡᠬᠦ ᠣᠯᠠᠨ ᠸᠠᠩ ᠤ᠋ᠳ ᠤ᠋ᠨ ᠭᠦᠩᠵᠦ ᠵᠢᠶᠦ᠋ᠨ ᠵᠣ᠌ ᠪᠥᠸᠸᠵᠥ ᠠᠪᠬᠠᠢ ᠨᠠᠷ ᠲᠤᠷ ᠬᠠᠮᠲᠤ ᠬᠤᠷᠢᠮ ᠬᠦᠷᠲᠡᠭᠡᠨ᠂ ᠭᠡᠭᠡᠬᠡᠨ ᠰᠠᠷᠠᠨ ᠤ᠋ ᠬᠡᠢᠪᠡᠩ ᠨᠠᠭᠤᠷᠠ ᠨᠠᠭᠠᠳᠤᠷᠠ ᠡᠴᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠠᠢᠬᠠᠨ ᠭᠦᠦᠷ ᠰᠠᠨᠠᠭᠠᠨ ᠳ᠋ᠤᠷ ᠦᠭᠡᠢ ᠪᠡᠷ ᠰᠠᠢᠰᠢᠶᠠᠯ ᠤ᠋ᠨ ᠬᠦᠨᠳᠦ ᠶᠡᠬᠡ ᠱᠠᠩ ᠬᠡᠰᠢᠭ ᠲᠣᠷ ᠬᠦᠷᠲᠡᠭᠡᠳ᠂ ᠰᠠᠢᠬᠠᠨ ᠵᠢᠰᠦ ᠳ᠋ᠦ᠍ᠷ ᠠᠷᠪᠠᠨ ᠬᠤᠪᠢ ᠶ᠋ᠢᠨ ᠬᠡᠦᠬᠡᠳ ᠦ᠋ᠨ ᠪᠠᠶᠠᠷ ᠤ᠋ᠨ ᠥᠩᠭᠡ ᠢᠯᠡᠷᠡᠵᠦ᠂ ᠢᠨᠢᠶᠡᠨ ᠪᠠᠶᠠᠷᠯᠠᠨ ᠶᠢᠰᠦᠨ ᠵᠡᠷᠭᠡ ᠮᠥᠷᠭᠥᠨ ᠭᠤᠷᠪᠠᠨ ᠤᠳᠠᠭᠠ ᠰᠥᠭᠥᠳᠴᠦ᠂ ᠡᠷᠢᠭᠡ ᠶᠦ᠍ᠭᠡᠨ ᠬᠦᠵᠦᠭᠦᠪᠴᠢᠯᠡᠨ ᠦᠯᠡᠮᠵᠢ ᠬᠡᠲᠦᠷᠬᠡᠶᠡ ᠬᠥᠭᠡᠷᠦᠨ ᠪᠠᠶᠠᠷᠯᠠᠭᠰᠠᠭᠠᠷ᠂ ᠬᠤᠷᠢᠮᠯᠠᠨ ᠨᠠᠭᠠᠳᠤᠷᠠ ᠡᠴᠢᠭᠰᠡᠨ ᠬᠣᠢᠨᠠ᠂ ᠰᠠᠶᠢ ᠬᠠᠳᠬᠤᠮᠠᠯ ᠮᠠᠩᠨᠤᠭ ᠤ᠋ᠨ ᠰᠢᠷᠠ ᠠᠯᠲᠠᠨ ᠯᠤᠤᠲᠤ ᠱᠠ ᠶ᠋ᠢᠨ ᠶᠡᠬᠡ ᠬᠠᠯᠬᠠᠪᠴᠢ ᠬᠥᠰᠢᠭᠡ ᠶ᠋ᠢᠨ ᠳᠠᠯᠳᠠ ᠠ᠋ᠴᠠ ᠰᠡᠷᠭᠦᠯᠡᠩ ᠭᠦᠩᠵᠦ ᠰᠤᠯᠤᠩᠭᠤᠤᠠ ᠶ᠋ᠢ ᠳᠠᠭᠤᠳᠠᠨ ᠢᠷᠡᠭᠦᠯᠦᠭᠡᠳ ᠂ ᠰᠣᠯᠣᠩᠭᠤᠸᠠ ᠬᠦᠨᠳᠦ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠪᠠᠷᠠᠭᠰᠠᠨ ᠬᠣᠢᠨᠠ ᠭᠡᠷᠡᠯᠲᠦ ᠶᠡᠬᠡᠮᠰᠦᠭ ᠬᠤᠸᠠᠩᠬᠡᠦ ᠮᠦᠰᠢᠶᠡᠵᠦ ᠵᠠᠷᠯᠢᠭ ᠪᠣᠯᠤᠨ ᠠᠰᠠᠭᠤᠷᠤᠨ᠄
《ᠬᠡᠦᠬᠡᠨ ᠭᠦᠩᠵᠦ ᠴᠢᠨᠦ ᠥᠪᠡᠷ ᠦ᠋ᠨ ᠪᠡᠶᠡ ᠡᠴᠡ ᠨᠢᠭᠡᠨᠲᠡ ᠦᠷᠡ ᠬᠥᠪᠡᠭᠦᠨ ᠬᠥᠮᠦᠵᠢᠨ ᠳᠡᠯᠭᠡᠷᠡᠭᠰᠡᠨ ᠪᠥᠭᠡᠲᠡᠯᠡ᠂ ᠪᠠᠰᠠ ᠪᠠᠭᠠ ᠭᠡᠷᠭᠡᠢ ᠪᠡᠷ ᠶᠠᠭᠤ ᠬᠢᠬᠦ ᠪᠣᠢ ? 》ᠬᠡᠮᠡᠭᠰᠡᠨᠡ᠂ ᠰᠣᠯᠣᠩᠭᠣᠣᠡ ᠶᠠᠭᠠᠷᠠᠨ ᠰᠣᠭᠰᠤᠯᠤᠨ ᠰᠥᠭᠥᠳᠴᠦ ᠮᠥᠷᠭᠥᠨ ᠠᠢᠯᠠᠳᠬᠠᠷᠤᠨ᠄ ᠰᠠᠢᠳ ᠡᠬᠡᠨᠡᠷ ᠰᠤᠯᠤᠩᠭᠤᠸᠠ ᠪᠢ᠂ ᠲᠤᠬᠠᠢᠯᠠᠨ ᠥᠪᠡᠷᠦᠨ ᠪᠡᠶᠡ ᠡᠴᠡ ᠦᠷᠡ ᠬᠥᠪᠡᠭᠦᠨ ᠳᠡᠯᠭᠡᠷᠡᠵᠦ᠂ ᠡᠮᠡᠭᠡᠳ ᠦ᠋ᠨ ᠰᠦᠷᠦᠭ ᠲᠣᠷ ᠣᠷᠣᠬᠤ ᠰᠢᠬᠠᠭᠰᠠᠨ ᠤ᠋ ᠲᠤᠯᠠᠳᠠ᠂ ᠨᠠᠰᠤᠨ ᠬᠡᠲᠦᠷᠡᠲᠡᠯᠡ ᠰᠠᠢᠳ ᠡᠬᠡᠨᠡᠷ ᠢ᠋ ᠬᠦᠯᠢᠶᠡᠭᠰᠡᠨ ᠪᠠᠲᠤ ᠨᠠᠢᠷ ᠵᠢᠷᠤᠮ ᠤ᠋ᠨ ᠬᠠᠷᠢᠭᠤ ᠳ᠋ᠤᠷ ᠡᠷᠬᠡᠪᠰᠢ ᠪᠡᠶᠡ ᠡᠴᠡ ᠬᠡᠳᠦᠨ ᠬᠤᠪᠢ ᠳᠡᠭᠡᠷᠡ ᠭᠤᠸᠠ ᠦᠵᠡᠰᠬᠦᠯᠡᠩ ᠪᠠᠭᠠ ᠵᠠᠯᠠᠭᠤ ᠰᠡᠴᠡᠨ ᠭᠡᠭᠡᠬᠡᠨ ᠨᠢᠭᠡᠨ ᠪᠠᠭᠠ ᠬᠠᠲᠤᠭᠲᠠᠢ ᠠᠪᠴᠤ ᠥᠭᠭᠦᠨ᠂ ᠰᠠᠢᠳ ᠡᠬᠡᠨᠡᠷ ᠦ᠋ᠨ ᠨᠥᠬᠥᠷ ᠡᠷᠡ ᠶ᠋ᠢᠨ ᠢᠳᠡᠷ ᠬᠤᠷᠳᠤᠴᠠ ᠬᠡᠭᠡᠨᠴᠢᠷ ᠲᠤᠩᠭᠠᠯᠠᠭ ᠦᠶᠡ ᠶ᠋ᠢ ᠢᠨᠣ ᠪᠢᠲᠡᠭᠡᠢ ᠬᠢᠯᠢᠰᠳᠡᠭᠦᠯᠦᠨ ᠲᠠᠯᠠᠭᠠᠷ ᠥᠩᠭᠡᠷᠡᠭᠡᠰᠦᠭᠡᠢ ᠬᠡᠮᠡᠭᠰᠡᠨ ᠢᠨᠣ ᠴᠢᠩ ᠦᠨᠡᠨ᠂ ᠰᠠᠢᠳ ᠡᠬᠡᠨᠡᠷ ᠴᠦ᠍ ᠰᠠᠢᠬᠠᠨ ᠭᠦᠦᠷ ᠬᠡᠦᠬᠡᠨ ᠳᠡᠭᠦᠦ ᠶ᠋ᠢ ᠬᠢᠯᠢᠰᠳᠡᠨ ᠭᠤᠲᠤᠬᠤ ᠪᠣᠯᠭᠤᠵᠠᠢ ᠭᠡᠮᠡᠨ᠂ ᠣᠯᠠᠨ ᠵᠦᠢᠯ ᠢ᠋ᠶ᠋ᠡᠷ ᠡᠷᠭᠢᠴᠡᠭᠦᠯᠦᠨ ᠲᠡᠩᠰᠡᠵᠦ ᠦᠨᠡᠨ ᠳᠤᠷᠠᠯᠠᠯ ᠢ᠋ ᠮᠡᠳᠡᠭᠰᠡᠨ ᠪᠥᠯᠥᠭᠡ᠃ ᠲᠡᠷᠡ ᠰᠠᠢᠬᠠᠨ ᠭᠦᠦᠷ ᠬᠡᠦᠬᠡᠨ ᠳᠡᠭᠦᠦ ᠴᠦ᠍᠂ ᠲᠡᠭᠥᠨᠣ ᠰᠢᠳᠢᠲᠡᠨ ᠪᠠᠭᠰᠢ ᠶ᠋ᠢᠨ ᠰᠣᠶᠣᠷᠬᠠᠯ ᠵᠠᠬᠢᠶᠠ ᠶ᠋ᠢ ᠪᠡᠶᠡᠰᠦᠨ ᠪᠢᠰᠢᠷᠡᠬᠦ ᠶ᠋ᠢᠨ ᠲᠤᠯᠠ ᠰᠠᠢᠳ ᠡᠬᠡᠨᠡᠷ ᠦ᠋ᠨ ᠨᠥᠬᠥᠷ ᠡᠷᠡ ᠶ᠋ᠢ ᠨᠠᠰᠤᠨ ᠠᠬᠠ ᠪᠠ ᠳᠡᠭᠡᠷᠡ ᠪᠠᠰᠠ ᠶᠡᠬᠡ ᠡᠬᠡᠨᠡᠷ ᠪᠣᠢ ᠭᠡᠮᠡᠨ ᠵᠢᠪᠡᠭᠦᠷᠡᠨ ᠬᠠᠯᠠᠰᠢᠷᠠᠬᠤ ᠦᠭᠡᠢ ᠦᠨᠡᠨ ᠢᠷᠣᠭᠠᠷ ᠢ᠋ ᠲᠤᠷᠰᠢᠵᠤ ᠣᠯᠤᠭᠠᠳ ᠰᠠᠶᠢ ᠰᠠᠢᠳ ᠡᠬᠡᠨᠡᠷ ᠦ᠋ᠨ ᠨᠥᠬᠥᠷ ᠡᠷᠡ ᠳ᠋ᠦ᠍ᠷ ᠠᠪᠴᠤ ᠥᠭᠰᠦᠭᠡᠢ ᠬᠡᠮᠡᠪᠡᠰᠦ᠂ ᠰᠠᠢᠳ ᠤ᠋ᠨ ᠨᠥᠬᠥᠷ ᠡᠷᠡ ᠠᠷᠪᠠᠨ ᠬᠤᠪᠢ ᠳᠡᠯᠠᠰᠢᠶᠠᠪᠡᠴᠦ᠂ ᠭᠠᠭᠴᠠ ᠪᠣᠭᠳᠠ ᠡᠵᠡᠨ ᠡᠴᠡ ᠲᠡᠭᠦᠨ ᠢ᠋ ᠥᠩᠭᠡ ᠬᠤᠷᠢᠴᠠᠯ ᠳ᠋ᠤᠷ ᠳᠤᠷᠠᠲᠠᠢ ᠭᠡᠮᠡᠨ ᠪᠤᠷᠤᠭᠤᠰᠢᠶᠠᠨ ᠵᠢᠮᠡᠯᠡᠬᠦ ᠡᠴᠡ ᠠᠶᠤᠬᠤᠢ ᠶ᠋ᠢᠨ ᠲᠤᠯᠠ ᠰᠠᠢᠳ ᠡᠬᠡᠨᠡᠷ ᠰᠠᠶᠢ ᠡᠳᠦᠢᠴᠢᠨᠡᠭᠡᠨ ᠠᠷᠭᠠ ᠤᠬᠠᠭᠠᠨ ᠭᠠᠷᠭᠠᠵᠤ᠂ ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠦ᠋ᠨ ᠵᠠᠬᠢᠶᠠ ᠪᠠᠷ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠬᠦᠴᠦᠨ ᠪᠠᠷᠢᠭᠤᠯᠤᠨ ᠵᠢᠳᠬᠦᠭᠦᠯᠵᠦ᠂ ᠭᠠᠪᠢᠶᠠ ᠪᠠᠢᠭᠤᠯᠤᠭᠤᠯᠤᠨ᠂ ᠪᠣᠭᠳᠠ ᠡᠵᠡᠨ ᠪᠠ ᠪᠣᠭᠳᠠ ᠡᠬᠡ ᠶ᠋ᠢᠨ ᠠᠯᠲᠠᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠱᠠᠩᠨᠠᠨ ᠵᠢᠭᠠᠬᠤ ᠶ᠋ᠢ ᠡᠷᠢᠭᠰᠡᠨ ᠪᠥᠯᠥᠭᠡ᠃ ᠡᠳᠦᠭᠡ ᠪᠣᠭᠳᠠ ᠡᠬᠡ᠂ ᠠᠯᠲᠠᠨ ᠬᠠᠰ ᠤ᠋ᠨ ᠬᠣᠣᠰ ᠬᠣᠯᠪᠣᠭᠠᠨ ᠤ᠋ ᠰᠢᠯᠦᠭ ᠢ᠋ᠶ᠋ᠡᠷ ᠲᠡᠩᠰᠡᠵᠦ ᠠᠢᠯᠠᠳᠤᠨ ᠠᠰᠠᠭᠤᠵᠤ ᠡᠴᠢᠭᠡ ᠡᠬᠡ ᠦᠭᠡᠢ ᠥᠨᠥᠴᠢᠨ ᠬᠡᠦᠬᠡᠨ ᠢ᠋ ᠬᠢᠯᠢᠰᠳᠡᠭᠦᠯᠦᠨ ᠮᠤᠰᠬᠢᠭᠳᠠᠭᠤᠯᠬᠤ ᠪᠣᠯᠭᠤᠵᠠᠢ ᠭᠡᠮᠡᠨ ᠡᠨᠡᠷᠢᠯ ᠨᠢᠭᠦᠯᠡᠰᠬᠦ ᠲᠤᠢᠯ ᠤ᠋ᠨ ᠥᠷᠥᠰᠢᠶᠡᠯ ᠢ᠋ ᠰᠠᠢᠳ ᠡᠬᠡᠨᠡᠷ ᠪᠢ ᠦᠨᠡᠨ ᠵᠢᠷᠦᠬᠡᠨ ᠡᠴᠡ ᠰᠦᠰᠦᠭᠯᠡᠨ ᠰᠢᠲᠦᠮᠦᠢ 》ᠭᠡᠮᠡᠨ ᠳᠣᠲᠣᠷᠠ ᠡᠨᠡᠷᠢᠨ ᠬᠠᠪᠠᠷ ᠪᠤᠷᠬᠢᠷᠠᠨ ᠪᠣᠭᠳᠠ ᠡᠬᠡ ᠶ᠋ᠢᠨ ᠭᠦᠨ ᠬᠣᠯᠠ ᠠᠰᠠᠷᠠᠬᠤᠢ ᠨᠢᠭᠦᠯᠡᠰᠬᠦ ᠬᠠᠢᠷᠠ ᠥᠷᠥᠰᠢᠶᠡᠯ ᠳ᠋ᠦ᠍ᠷ ᠨᠢᠳᠦᠨ ᠳ᠋ᠦ᠍ᠷ ᠤᠰᠤᠨ ᠭᠦᠶᠦᠲᠡᠯᠡ ᠢᠭᠲᠦᠯᠦᠨ ᠬᠥᠳᠡᠯᠵᠦ ᠮᠥᠷᠭᠥᠪᠡ᠃ ᠬᠤᠸᠠᠩᠬᠡᠦ ᠤᠷᠢᠳᠤ ᠡᠳᠦᠷ ᠰᠣᠯᠤᠩᠭᠤᠸᠠ ᠶ᠋ᠢᠨ ᠰᠤᠷᠲᠠᠯ ᠠᠰᠠᠭᠤᠯᠲᠠ ᠶ᠋ᠢᠨ ᠭᠦᠨ ᠬᠣᠯᠠ ᠶ᠋ᠢᠨ ᠲᠡᠳᠦᠢ ᠶ᠋ᠢ ᠪᠠᠬᠠᠷᠬᠠᠭᠰᠠᠨ ᠪᠥᠭᠡᠲᠡᠯᠡ᠂ ᠡᠳᠦᠭᠡ ᠡᠨᠡ ᠨᠢᠭᠡᠨ ᠵᠡᠷᠭᠡ ᠶ᠋ᠢᠨ ᠨᠠᠢᠷ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠲᠣᠭᠠᠴᠢᠭᠰᠠᠨᠠ᠂ ᠲᠡᠭᠦᠨᠦ ᠲᠡᠭᠷᠢ ᠶ᠋ᠢᠨ ᠲᠥᠷᠥᠯᠬᠢ ᠤᠬᠠᠭᠠᠨ ᠦᠭᠡᠢ᠂ ᠰᠢᠯ ᠦ᠋ᠨ ᠬᠡᠬᠦᠳᠡᠭ᠂ ᠪᠣᠯᠣᠷ ᠤ᠋ᠨ ᠵᠢᠷᠦᠬᠡᠲᠦ ᠲᠦᠭ ᠲᠦᠮᠡᠨ ᠡᠬᠡᠨᠡᠷ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡᠬᠡᠨ ᠬᠣᠶᠠᠷᠬᠠᠨ ᠴᠤ᠌ ᠰᠣᠩᠭᠣᠵᠤ᠂ ᠪᠣᠳᠢ ᠰᠤᠳᠠᠯᠲᠤ ᠡᠷᠡ ᠪᠠ ᠡᠬᠡᠨᠡᠷ ᠴᠥᠮ ᠪᠣᠢ ᠠᠮᠤᠢ᠃ ᠪᠣᠳᠢ ᠰᠤᠳᠠᠯᠲᠤ ᠡᠷᠡ ᠳ᠋ᠦ᠍ᠷ ᠬᠥᠪᠡᠭᠦᠨ ᠲᠥᠷᠥᠬᠦ ᠦᠭᠡᠢ᠂ ᠪᠣᠳᠢ ᠰᠤᠳᠠᠯᠲᠤ ᠡᠬᠡᠨᠡᠷ ᠡᠴᠡ ᠥᠬᠢᠨ ᠬᠥᠩᠭᠡᠵᠢᠬᠦ ᠦᠭᠡᠢ ᠭᠡᠮᠡᠨ ᠡᠮ ᠦ᠋ᠨ ᠰᠤᠳᠤᠷ ᠲᠤᠷ ᠢᠯᠡᠷᠬᠡᠢ ᠲᠣᠳᠣᠷᠬᠠᠢ ᠪᠣᠢ ᠠᠮᠤᠢ᠃ ᠡᠭᠦᠨ ᠢ᠋ ᠪᠤᠷᠬᠠᠨ ᠭᠡᠭᠡᠨ ᠳᠣᠯᠣᠭᠠᠨ ᠣᠲᠠᠴᠢ ᠨᠣᠮᠯᠠᠵᠤᠬᠤᠢ᠃ ᠦᠯᠦ ᠣᠯᠳᠠᠬᠤ ᠪᠣᠭᠳᠠᠰ ᠴᠢᠨᠠᠷ᠂ ᠪᠣᠳᠢ ᠰᠤᠳᠠᠯᠲᠤ ᠡᠬᠡᠨᠡᠷ ᠢ᠋ ᠰᠠᠶᠢ ᠤᠬᠠᠵᠤ ᠠᠢᠯᠠᠳᠤᠭᠠᠳ ᠲᠡᠰᠳᠡᠰᠢ ᠦᠭᠡᠢ ᠱᠠᠭᠰᠢᠨ ᠭᠠᠢᠬᠠᠵᠤ᠂ ᠮᠦᠰᠢᠶᠡᠨ ᠰᠠᠢᠰᠢᠶᠠᠵᠤ ᠵᠠᠷᠯᠢᠭ ᠪᠣᠯᠤᠷᠤᠨ :
《ᠰᠣᠯᠣᠩᠭᠣᠣᠠ ᠬᠡᠦᠬᠡᠨ ᠦ᠌ ᠰᠤᠷᠲᠠᠯ ᠤ᠋ᠨ ᠲᠡᠳᠦᠢᠯᠡ ᠢᠨᠦ ᠰᠣᠴᠢᠯᠲᠠᠢ ᠰᠠᠢᠰᠢᠶᠠᠯᠲᠠᠢ ᠪᠤᠰᠤ ᠠᠵᠤᠭᠤ᠃ ᠭᠤᠸᠠ ᠬᠡᠦᠬᠡᠨ ᠦ᠌ ᠭᠣᠣᠯ ᠵᠢᠷᠦᠬᠡ ᠶ᠋ᠢᠨ ᠪᠦᠬᠦᠢ ᠶ᠋ᠢᠨ ᠰᠤᠳᠠᠯ ᠴᠤ᠌ ᠪᠣᠯᠣᠷ ᠠᠳᠠᠯᠢ ᠠᠷᠢᠭᠤᠨ ᠭᠡᠭᠡᠨ ᠷᠠᠭᠢᠨᠢ ᠠᠵᠠᠢ》ᠬᠡᠮᠡᠪᠡ᠃
ᠲᠡᠳᠦᠢ ᠪᠣᠯᠣᠷ ᠡᠷᠳᠡᠨᠢ ᠶ᠋ᠢᠨ ᠬᠣᠭᠣᠯᠠᠪᠴᠢ ᠪᠠ ᠡᠷᠢᠭᠡ ᠬᠢᠭᠡᠳ ᠠᠷᠢᠭᠤᠨ ᠭᠡᠭᠡᠬᠡᠨ ᠠᠯᠮᠠᠰ ᠡᠷᠳᠡᠨᠢ ᠶ᠋ᠢᠨ ᠠᠭᠠᠭ ᠰᠤᠪᠤᠳ ᠢ᠋ᠶ᠋ᠠᠷ ᠬᠡᠯᠬᠢᠨ ᠬᠠᠳᠬᠤᠮᠠᠯᠯᠠᠭᠰᠠᠨ ᠭᠦᠩᠵᠦ ᠶ᠋ᠢᠨ ᠵᠡᠷᠭᠡ ᠶ᠋ᠢᠨ ᠪᠣᠰᠤᠭᠠ ᠵᠣᠭᠰᠣᠬᠤ ᠡᠰᠡᠷᠭᠦ ᠬᠠᠨᠳᠤᠬᠤ ᠪᠦᠬᠦᠯᠢ ᠯᠤᠤ ᠶ᠋ᠢᠨ ᠫᠦᠰᠸ ᠱᠠᠩᠨᠠᠨ ᠬᠠᠳᠠᠭᠤᠯᠵᠤ᠂ ᠪᠠᠰᠠ ᠴᠡᠷᠢᠭ ᠦ᠋ᠨ ᠲᠤᠭ ᠳᠠᠯᠪᠠᠭᠠ ᠪᠠ ᠰᠢᠬᠦᠷ ᠲᠠᠲᠠᠷ ᠤ᠋ᠨ ᠳᠡᠭᠡᠷᠡ ᠣᠷᠣᠢ᠂ ᠦᠷᠭᠦᠭᠡᠨ ᠦ᠌ ᠣᠷᠣᠢ ᠶ᠋ᠢ ᠴᠥᠮ ᠰᠢᠯ ᠪᠣᠯᠣᠷ ᠤ᠋ᠨ ᠣᠷᠣᠢ ᠨᠡᠮᠡᠵᠦ ᠬᠡᠷᠡᠭᠯᠡᠭᠦᠯᠦᠨ᠂ ᠲᠡᠭᠦᠨ ᠣ ᠭᠣᠣᠯ ᠵᠢᠷᠦᠬᠡ ᠶ᠋ᠢᠨ ᠬᠠᠷᠠᠮ ᠦᠭᠡᠢ ᠭᠡᠭᠡᠬᠡᠨ ᠠᠷᠢᠭᠤᠨ ᠲᠤᠩᠭᠠᠯᠠᠭ ᠢᠯᠭᠤᠮ ᠢ᠋ ᠠᠨᠤ ᠢᠯᠡᠷᠬᠡᠢᠯᠡᠪᠡᠢ᠃ ᠬᠤᠸᠠᠩᠬᠡᠦ ᠶ᠋ᠢᠨ ᠱᠠᠩᠨᠠᠭᠰᠠᠨ ᠨᠢᠭᠡᠨ ᠬᠣᠣᠰ ᠪᠣᠰᠤᠭᠠ ᠲᠠᠲᠠᠷ ᠬᠢᠭᠢᠷᠢ ᠳ᠋ᠦ᠍ᠷ ᠬᠠᠢᠷᠠᠯᠠᠭᠰᠠᠨ ᠵᠠᠷᠯᠢᠭ ᠤ᠋ᠨ ᠦᠰᠦᠭ᠄
ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠭᠡᠭᠡᠬᠡᠨ ᠭᠣᠣᠯᠲᠤ ᠬᠠᠲᠤᠨ ᠭᠦᠩᠵᠦ
ᠡᠬᠡᠨᠡᠷ ᠦ᠋ᠨ ᠰᠦᠷᠦᠭ ᠦ᠋ᠨ ᠡᠷᠳᠡᠨᠢ ᠵᠢᠷᠦᠬᠡᠲᠦ ᠠᠪᠠᠬᠠᠢ ᠦᠬᠢ᠃
ᠬᠡᠮᠡᠵᠦᠬᠦᠢ᠃ ᠪᠠᠰᠠ ᠤᠭ ᠪᠠᠢᠭᠰᠠᠨ ᠰᠡᠷᠭᠦᠯᠡᠩ ᠭᠦᠩᠵᠦ ᠬᠡᠮᠡᠭᠰᠡᠨ ᠴᠣᠯᠠ ᠶ᠋ᠢᠨ ᠳᠡᠭᠡᠷᠡ᠂ ᠭᠡᠭᠡᠬᠡᠨ ᠬᠡᠮᠡᠬᠦ ᠦᠭᠡᠰ ᠨᠡᠮᠡᠵᠦ᠂ ᠭᠡᠭᠡᠬᠡᠨ ᠰᠡᠷᠭᠦᠯᠡᠩ ᠭᠦᠩᠵᠦ ᠭᠡᠮᠡᠨ ᠡᠷᠭᠦᠮᠵᠢᠯᠡᠪᠡ᠃
ᠤᠭ ᠬᠠᠭᠤᠴᠢᠨ 《ᠬᠥᠬᠡ ᠰᠤᠳᠤᠷᠠ 》ᠡᠨᠡ ᠨᠢᠭᠡᠨ ᠴᠢᠭ ᠦ᠋ᠨ ᠬᠡᠰᠢᠭ ᠰᠢᠳᠬᠡᠯ ᠢ᠋ ᠲᠡᠮᠳᠡᠭᠯᠡᠭᠰᠡᠨ ᠢᠨᠦ:
《ᠪᠣᠭᠳᠠ ᠬᠤᠸᠠᠩᠬᠡᠦ ᠪᠥᠷᠲᠡᠭᠡᠯᠵᠢᠨ ᠰᠡᠴᠡᠨ ᠬᠠᠲᠤᠨ ᠢ᠋ᠶ᠋ᠠᠷ
ᠪᠣᠯᠣᠷ ᠣᠷᠣᠢ ᠪᠠᠷ ᠪᠤᠯᠲᠤ ᠡᠬᠡᠨᠡᠷ ᠢ᠋ ᠤᠬᠠᠭᠤᠯᠵᠤ
ᠪᠤᠵᠠᠷ ᠪᠤᠷᠲᠠᠭ ᠬᠠᠷᠠᠩᠭᠤᠢ ᠬᠠᠷᠠᠮ ᠢ᠋ ᠴᠡᠭᠡᠷᠯᠡᠭᠦᠯᠦᠨ
ᠪᠣᠷᠵᠢᠭᠢᠳ ᠤ᠋ᠨ ᠲᠥᠷᠥ ᠶ᠋ᠢᠨ ᠲᠦᠭ ᠲᠦᠮᠡᠨ ᠢ᠋ ᠵᠠᠰᠠᠭᠯᠠᠪᠠ ᠬᠡᠮᠡᠪᠡᠢ᠃
ᠲᠡᠭᠦᠨᠴᠡ ᠰᠠᠢᠬᠠᠨ ᠭᠦᠦᠷ ᠬᠡᠦᠬᠡᠨ᠂ ᠪᠡᠯᠭᠦᠳᠡᠢ ᠴᠢᠨ ᠸᠠᠩ ᠤ᠋ᠨ ᠴᠡᠷᠢᠭ ᠦ᠋ᠨ ᠡᠮᠦᠨᠡᠲᠦ ᠬᠦᠷᠢᠶᠡ ᠳ᠋ᠦ᠍ᠷ ᠵᠢᠳᠬᠦᠭᠰᠡᠨ ᠢ᠋ᠶ᠋ᠡᠷ ᠭᠠᠪᠢᠶᠠ ᠪᠠᠢᠭᠤᠯᠤᠭᠰᠠᠨ ᠤ᠋ ᠲᠤᠯᠠᠳᠠ ᠪᠡᠯᠭᠦᠳᠡᠢ ᠴᠢᠨ ᠸᠠᠩ ᠤ᠋ᠨ ᠹᠧᠢ ᠬᠠᠲᠤᠨ ᠳ᠋ᠤᠷ ᠵᠢᠷᠤᠮ ᠤ᠋ᠨ ᠬᠡᠦᠬᠡᠨ ᠪᠣᠯᠭᠠᠨ ᠰᠢᠷᠭᠤᠭᠤᠯᠤᠨ ᠮᠥᠷᠭᠥᠭᠦᠯᠵᠦ᠂ ᠥᠬᠢᠨ ᠦᠷᠡ ᠪᠣᠯᠭᠠᠨ ᠲᠡᠵᠢᠶᠡᠯᠭᠡᠭᠡᠳ᠂ ᠪᠠᠰᠠ ᠲᠡᠭᠦᠨᠦ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠵᠢᠳᠬᠦᠵᠦ᠂ ᠴᠢᠰᠤᠨ ᠪᠠᠢᠯᠳᠤᠭᠠᠨ ᠤ᠋ ᠡᠮᠦᠨᠡ ᠲᠣᠭᠰᠢᠨ ᠬᠣᠲᠣᠩ ᠤ᠋ᠳ ᠤ᠋ᠨ ᠳᠥᠷᠪᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠲᠤᠯᠤᠨ ᠡᠭᠡᠭᠦᠯᠦᠭᠰᠡᠨ ᠭᠠᠪᠢᠶᠠ ᠳ᠋ᠤᠷ ᠠᠨᠤ 《ᠴᠢᠭᠢᠷᠠᠭ ᠵᠢᠳᠬᠦᠯᠳᠦ ᠵᠢᠶᠤᠢ᠍ᠨ ᠵᠣ᠌ 》 ᠬᠡᠮᠡᠬᠦ ᠴᠣᠯᠠ ᠬᠠᠢᠷᠠᠯᠠᠨ ᠡᠷᠭᠦᠮᠵᠢᠯᠡᠵᠦ᠂ ᠳᠥᠷᠪᠡᠨ ᠬᠦᠷᠢᠶᠡ ᠰᠢᠷᠠ ᠣᠶᠣᠭ ᠲᠡᠳᠡᠮᠡᠯᠲᠦ ᠥᠷᠭᠥᠭᠡ ᠭᠡᠷ᠂ ᠸᠠᠩ ᠤ᠋ᠨ ᠬᠡᠦᠬᠡᠨ ᠦ᠌ ᠵᠡᠷᠭᠡ ᠬᠤᠪᠢᠶᠠᠷᠢ ᠶ᠋ᠢᠨ ᠲᠠᠲᠠᠷ ᠰᠢᠬᠦᠷ᠂ ᠢᠯᠳᠦ ᠰᠠᠭᠠᠲᠠᠭᠴᠢ ᠶ᠋ᠢᠨ ᠵᠢᠭᠰᠠᠭᠠᠯ ᠪᠠᠢᠷᠢᠯᠠᠯᠳᠤ ᠬᠣᠣᠰ ᠮᠣᠷᠢ ᠶ᠋ᠢᠨ ᠬᠣᠰᠢᠭᠤᠴᠢ ᠪᠠ ᠡᠷᠡ ᠡᠮᠡ ᠳᠥᠴᠢᠨ ᠠᠮᠠᠨ ᠭᠡᠷ ᠢᠨᠵᠢ ᠲᠡᠢ ᠪᠡᠷ ᠭᠡᠭᠡᠬᠡᠨ ᠰᠡᠷᠭᠦᠯᠡᠩ ᠰᠣᠯᠤᠩᠭᠤᠸᠠ ᠭᠦᠩᠵᠦ ᠳ᠋ᠦ᠍ᠷ ᠬᠡᠦᠬᠡᠨ ᠳᠡᠭᠦᠦ ᠪᠣᠯᠭᠠᠨ ᠪᠠᠭᠤᠯᠭᠠᠨ ᠥᠭᠴᠦ᠂ ᠲᠡᠭᠦᠨᠴᠡ ᠰᠠᠶᠢ ᠬᠦᠩ ᠠᠯᠲᠠᠨᠱᠠᠭᠠ ᠳᠠᠬᠢᠨ ᠶᠡᠬᠡᠰ ᠨᠣᠶᠠᠳ ᠢ᠋ ᠵᠠᠭᠤᠯᠴᠢ ᠣᠷᠣᠭᠤᠯᠤᠨ᠂ ᠭᠡᠭᠡᠬᠡᠨ ᠰᠡᠷᠭᠦᠯᠡᠩ ᠭᠥᠭᠵᠦ ᠰᠤᠯᠤᠩᠭᠤᠸᠠ ᠶ᠋ᠢᠨ ᠬᠡᠦᠬᠡᠨ ᠳᠡᠭᠦᠦ ᠶ᠋ᠢ ᠤᠷᠤᠭ ᠭᠣᠶᠣᠬᠤᠢ ᠶ᠋ᠢᠨ ᠶᠣᠰᠣᠭᠠᠷ ᠭᠤᠶᠤᠯᠭᠠᠵᠤ᠂ ᠮᠥᠨ ᠬᠦ᠌ ᠶᠢᠰᠦᠨ ᠶᠢᠰᠦᠨ ᠦ᠌ ᠪᠠᠯᠩ ᠬᠦᠷᠭᠡᠨ ᠪᠡᠯᠭᠦᠳᠡᠢ ᠴᠢᠨ ᠸᠠᠩ ᠤ᠋ᠨ ᠣᠷᠲᠣᠨᠠ ᠮᠥᠷᠭᠥᠵᠦ ᠶᠣᠰᠣᠯᠠᠯ ᠢ᠋ ᠪᠦᠷᠢᠳᠬᠡᠯᠭᠡᠨ᠂ ᠰᠠᠶᠢ ᠬᠤᠸᠠᠩᠬᠡᠦ ᠶ᠋ᠢᠨ ᠵᠠᠷᠯᠢᠭ ᠤ᠋ᠨ ᠡᠯᠴᠢ ᠮᠥᠨ ᠬᠦ᠌ ᠭᠡᠭᠡᠬᠡᠨ ᠭᠦᠩᠵᠦ ᠪᠡᠷ ᠬᠤᠳᠠᠭᠠᠢ ᠬᠠᠲᠤᠨ ᠪᠣᠯᠭᠠᠨ᠂ ᠬᠦᠷᠭᠡᠯᠭᠡᠨ ᠪᠠᠭᠤᠯᠭᠠᠨ ᠥᠭᠴᠦ᠂ ᠳᠠᠪᠬᠤᠷ ᠬᠤᠷᠢᠮ ᠬᠢᠯᠭᠡᠵᠦ᠂ ᠰᠠᠶᠢ ᠬᠣᠣᠰᠯᠠᠨ ᠬᠣᠯᠪᠣᠵᠤ ᠶᠡᠬᠡ ᠶᠣᠰᠣᠯᠠᠯ ᠢ᠋ ᠲᠡᠭᠦᠰᠬᠡᠯᠭᠡᠨ ᠭᠦᠢᠴᠡᠳᠭᠡᠯᠭᠡᠪᠡ᠃ ᠡᠨᠡ ᠢᠨᠤ ᠪᠤᠰᠤ ᠤᠴᠢᠷ ᠦᠭᠡᠢ᠃ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠳᠣᠣᠷᠠᠬᠢ ᠰᠠᠢᠳ ᠲᠦᠰᠢᠮᠡᠳ ᠪᠠ ᠠᠷᠠᠳ ᠠᠯᠪᠠᠲᠤ ᠠᠨᠤ ᠪᠠᠭᠠ ᠭᠡᠷᠭᠡᠢ ᠭᠡᠮᠡᠨ ᠳᠣᠷᠣᠮᠰᠢᠶᠠᠨ ᠦᠵᠡᠬᠦᠢ ᠶ᠋ᠢ ᠠᠷᠢᠯᠭᠠᠵᠤ᠂ ᠠᠯᠤᠰ ᠴᠠᠭᠠᠨᠠ ᠠᠨᠤ ᠪᠠᠰᠠ ᠰᠣᠯᠤᠩᠭᠤᠤᠠ ᠶ᠋ᠢᠨ ᠶᠡᠬᠡ ᠬᠠᠲᠤᠨ᠂ ᠪᠠᠭᠠ ᠭᠡᠷᠭᠡᠢ ᠶ᠋ᠢ ᠦᠵᠡᠬᠦ ᠶ᠋ᠢᠨ ᠳᠦᠷᠢᠮ ᠢ᠋ ᠤᠰᠠᠳᠬᠠᠵᠤ᠂ ᠲᠥᠷᠥᠭᠰᠡᠨ ᠡᠭᠡᠴᠢ ᠢᠨᠤ ᠬᠡᠦᠬᠡᠨ ᠳᠡᠭᠦᠦ ᠪᠡᠨ ᠬᠠᠮᠠᠭᠠᠯᠠᠨ ᠡᠨᠡᠷᠢᠬᠦᠢ ᠶ᠋ᠢᠨ ᠵᠦᠢᠴᠡᠯ ᠢ᠋ᠶ᠋ᠡᠷ ᠠᠪᠠᠴᠢᠵᠤ ᠰᠠᠢᠬᠠᠨ ᠭᠦᠦᠷ ᠢ᠋ ᠡᠷᠬᠡᠲᠡᠢᠬᠡᠨ ᠬᠦᠨᠳᠥᠲᠡᠢᠬᠡᠨ ᠪᠣᠯᠭᠠᠭᠰᠠᠨ ᠤ᠋ ᠬᠤᠸᠠᠩᠬᠡᠦ ᠥᠷᠥᠰᠢᠶᠡᠯ ᠮᠥᠨ᠃
ᠲᠡᠨᠳᠡᠴᠡ ᠰᠠᠷᠯᠢᠭ᠋ ᠤᠯᠤᠰ ᠤ᠋ᠨ ᠰᠠᠢᠬᠠᠨ ᠭᠦᠦᠷ ᠪᠦᠸᠸᠵᠦ ᠪᠡᠷ ᠴᠢᠬᠡᠴᠢ ᠮᠣᠩᠭᠣᠯ ᠤ᠋ᠨ ᠴᠢᠬᠢᠷᠡᠭ ᠵᠢᠳᠬᠦᠯᠳᠦ ᠵᠢᠶᠦ᠋ᠨ ᠵᠣ᠌ ᠪᠣᠯᠤᠨ ᠬᠤᠪᠢᠯᠤᠭᠠᠳ᠂ ᠴᠢᠨ ᠸᠠᠩ ᠤ᠋ᠨ ᠵᠢᠶᠦ᠋ᠨ ᠵᠣ᠌ ᠶ᠋ᠢᠨ ᠵᠡᠷᠭᠡ ᠬᠤᠪᠢ ᠪᠠᠷ ᠪᠠᠭᠤᠯᠭᠠᠨ᠂ ᠬᠦᠩ ᠦ᠋ᠨ ᠬᠠᠲᠤᠨ ᠤ ᠬᠥᠰᠢᠭᠡ ᠰᠠᠨᠳᠠᠯᠢ ᠶ᠋ᠢᠨ ᠬᠤᠷᠢᠮ ᠳ᠋ᠤᠷ ᠣᠷᠣᠵᠤ᠂ ᠬᠠᠭᠠᠨ ᠤ᠋ ᠬᠤᠸᠠᠩᠬᠡᠦ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠵᠢᠭᠠᠵᠤ ᠰᠣᠶᠣᠷᠬᠠᠭᠰᠠᠨ᠂ ᠬᠠᠰ ᠰᠠᠢᠬᠠᠨ ᠭᠦᠩᠵᠦ ᠬᠠᠲᠤᠨ ᠪᠦᠸᠸᠵᠦ ᠠᠪᠠᠬᠠᠢ ᠪᠠᠷ ᠠᠷᠠᠢ ᠰᠠᠶᠢ ᠠᠷᠪᠠᠨ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ᠂ ᠠᠯᠢᠶᠠᠷᠬᠠᠨ ᠨᠠᠭᠠᠳᠬᠤ ᠦᠶᠡ ᠪᠣᠯᠪᠠᠴᠤ᠂ ᠠᠪᠴᠤ ᠲᠥᠷᠥᠭᠰᠡᠨ ᠪᠡᠶᠡ ᠴᠣᠭᠴᠠ ᠠᠨᠤ ᠠᠳᠠᠪᠠᠰᠢ ᠰᠣᠭᠲᠣᠮᠠ ᠥᠨᠳᠥᠷ ᠦ᠋ᠨ ᠲᠤᠯᠠᠳᠠ᠂ ᠠᠯᠲᠠᠨ ᠬᠥᠪᠡᠭᠦᠨ ᠤ ᠠᠮᠠᠷᠠᠭᠯᠠᠨ ᠢᠨᠠᠭᠯᠠᠬᠤᠢ ᠶ᠋ᠢᠨ ᠠᠯᠢᠪᠠ ᠠᠭᠠᠰᠢ ᠶ᠋ᠢ ᠠᠶᠠᠳᠠᠨ ᠬᠦᠯᠢᠶᠡᠵᠦ ᠴᠢᠳᠠᠭᠠᠳ᠂ ᠠᠷᠢᠭᠤᠨ ᠴᠠᠭᠠᠨ ᠬᠠᠰ ᠴᠢᠯᠠᠭᠤᠨ ᠤ᠋ ᠭᠠᠷᠭᠠ ᠶ᠋ᠢ ᠠᠯᠲᠠᠨ ᠭᠠᠳᠠᠰᠤᠨ ᠡᠰᠢ ᠳ᠋ᠦ᠍ᠷ ᠡᠮᠦᠰᠬᠡᠭᠰᠡᠨ ᠮᠡᠲᠦ ᠠᠷᠤ ᠥᠪᠥᠷ ᠠᠳᠠᠯᠢ ᠪᠠᠷ ᠡᠷᠳᠡᠨᠢᠰ ᠠᠰᠤᠷᠤ ᠬᠡᠲᠦᠷᠬᠡᠢ ᠠᠮᠠᠷᠠᠭ ᠬᠠᠯᠠᠭᠤᠨ ᠵᠠᠭᠤᠷᠠᠯᠳᠤᠭᠠᠳ᠂ ᠠᠮᠠᠭᠠᠵᠢᠨ ᠠᠪᠤᠯᠴᠠᠭᠰᠠᠭᠠᠷ ᠠᠮᠠᠷᠠᠨ ᠲᠠᠭᠠᠯᠠᠵᠤ᠂ ᠠᠷᠠᠰᠤ ᠮᠢᠬᠠ ᠦᠶᠡᠰ ᠭᠡᠰᠢᠭᠦᠨ ᠨᠡᠢᠲᠡ ᠳ᠋ᠦ᠍ᠷ ᠨᠡᠪᠲᠡᠷᠡᠯᠴᠡᠪᠡᠢ᠃ ᠠᠪᠴᠤ ᠥᠭᠭᠦᠭᠰᠡᠨ ᠭᠦᠩᠵᠦ ᠰᠤᠯᠤᠩᠭᠤᠸᠠ᠂ ᠠᠳᠠᠪᠠᠰᠢ ᠪᠠᠶᠠᠷᠯᠠᠨ ᠠᠯᠲᠠᠨ ᠲᠥᠷᠥ ᠶ᠋ᠢᠨ ᠶᠣᠰᠣᠯᠠᠯ ᠢ᠋ ᠭᠦᠢᠴᠡᠳᠬᠡᠨ᠂ ᠠᠰᠠᠷᠠᠯᠲᠤ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠬᠡᠰᠢᠭ ᠲᠣᠷ ᠮᠥᠷᠭᠥᠷᠡ ᠤᠷᠢᠳᠠ ᠮᠣᠷᠳᠠᠨ ᠬᠥᠳᠡᠯᠦᠭᠡᠳ᠂ ᠠᠷᠠᠭᠠᠮᠵᠢᠯᠠᠨ ᠵᠠᠭᠤᠷᠠᠯᠳᠤᠬᠤ ᠰᠢᠨᠡ ᠨᠥᠬᠥᠷ ᠡᠮᠡ ᠠᠯᠢᠪᠠ ᠮᠥᠷᠭᠥᠯ ᠢ᠋ ᠭᠦᠢᠴᠡᠳᠬᠡᠨ ᠲᠣᠭᠣᠷᠢᠨ ᠮᠥᠷᠭᠥᠵᠦ᠂ ᠠᠰᠠᠷᠠᠬᠤᠢ ᠳᠡᠭᠡᠳᠦᠰ ᠨᠠᠷ ᠤ᠋ᠨ ᠳᠠᠪᠬᠤᠷ ᠱᠠᠩ ᠳ᠋ᠤᠷ ᠲᠣᠯᠣᠭᠠᠢ ᠲᠣᠭᠣᠷᠢᠨ ᠶᠡᠬᠡᠯᠡ ᠬᠦᠷᠲᠡᠯᠴᠡᠭᠡᠳ᠂ ᠠᠯᠭᠤᠷ ᠠᠭᠠᠵᠢᠮ ᠢ᠋ᠶ᠋ᠠᠷ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ᠂ ᠬᠠᠭᠤᠴᠢᠨ ᠨᠠᠢ᠍ᠮᠠᠨ ᠤ᠋ ᠵᠦᠭ ᠵᠦᠭᠯᠡᠵᠦ᠂ ᠠᠢᠯᠠᠳᠬᠠᠯ ᠪᠢᠴᠢᠭ ᠦ᠋ᠨ ᠪᠠᠭᠤᠵᠤ ᠢᠷᠡᠬᠦᠢ ᠶ᠋ᠢ ᠠᠩᠬᠠᠷᠤᠨ ᠬᠦᠯᠢᠶᠡᠷᠡ ᠠᠩᠭᠠᠷᠠᠭᠯᠠᠨ ᠢᠨᠢᠶᠡᠯᠴᠡᠭᠰᠡᠭᠡᠷ ᠮᠣᠷᠳᠠᠪᠠ᠃ ᠡᠨᠡ ᠨᠢᠭᠡᠨ ᠠᠩᠭᠢ ᠬᠡᠷᠡᠭ ᠬᠡᠮᠡᠭᠴᠢ ᠲᠠᠢᠪᠤᠤ ᠪᠤᠭᠤᠷᠵᠢ ᠨᠣᠶᠠᠨ ᠤ᠋ ᠡᠭᠦᠷᠴᠦ ᠢᠷᠡᠭᠰᠡᠨ ᠨᠠᠢ᠍ᠮᠠᠨ ᠤ᠋ ᠵᠠᠷᠯᠢᠭ ᠬᠦᠷᠴᠦ ᠢᠷᠡᠮᠡᠭᠴᠡ ᠳᠠᠷᠤᠢ ᠰᠢᠳᠬᠡᠨ ᠲᠣᠭᠲᠠᠭᠠᠭᠰᠠᠨ ᠬᠡᠷᠡᠭ ᠢ ᠡᠳᠦᠭᠡ ᠭᠤᠷᠪᠠᠨ ᠶᠡᠬᠡᠰ ᠰᠠᠢᠳ᠂ ᠲᠠᠢᠬᠡᠦ ᠶ᠋ᠢᠨ ᠬᠠᠭᠠᠨ ᠳ᠋ᠤᠷ ᠪᠠᠭᠤᠯᠭᠠᠭᠰᠠᠨ ᠵᠠᠷᠯᠢᠭ ᠢ᠋ ᠬᠥᠷᠭᠡᠬᠦᠷᠡ ᠬᠠᠮᠲᠤ ᠶᠠᠪᠤᠭᠤᠯᠤᠭᠰᠠᠨ ᠬᠡᠷᠡᠭ ᠢ ᠡᠳᠦᠭᠡ ᠰᠠᠶᠢ ᠨᠥᠬᠥᠵᠦ ᠲᠣᠭᠠᠴᠢᠭᠰᠠᠨ ᠠᠨᠤ ᠪᠤᠶᠤ᠃ ᠪᠢᠴᠢᠭ ᠠᠢᠯᠠᠳᠬᠤ ᠮᠡᠷᠭᠡᠳ ᠲᠣᠳᠣᠷᠬᠠᠢᠯᠠᠨ ᠮᠡᠳᠡᠭᠳᠡᠬᠦᠢ᠃
ᠲᠡᠨᠳᠡᠴᠡ ᠲᠠᠢᠬᠡᠦ ᠶ᠋ᠢᠨ ᠵᠠᠷᠯᠢᠭ ᠡᠭᠦᠷᠦᠭᠰᠡᠨ ᠭᠤᠷᠪᠠᠨ ᠰᠠᠢᠳ ᠪᠠᠰᠠ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠢᠳᠠᠨ ᠤ᠋ ᠡᠵᠡᠨ᠂ ᠠ ᠯᠦᠨ ᠦ᠌ ᠦᠬᠦᠳᠡᠯ ᠶᠠᠰᠤ ᠶ᠋ᠢ ᠬᠦᠷᠭᠡᠬᠦ ᠴᠡᠷᠢᠭ ᠦ᠋ᠨ ᠲᠦᠰᠢᠮᠡᠳ ᠪᠠᠰᠠ ᠬᠡᠰᠢᠭ ᠲᠣᠷ ᠮᠥᠷᠭᠥᠨ ᠵᠠᠷᠯᠢᠭ ᠰᠣᠨᠣᠰᠴᠤ᠂ ᠰᠤᠯᠤᠩᠭᠤᠸᠠ ᠪᠠᠰᠠ ᠲᠠᠭᠠᠯᠳᠤᠭᠠᠷ ᠮᠣᠷᠳᠠᠵᠤ᠂ ᠠᠯᠲᠠᠨᠱᠠᠭᠠ ᠰᠠᠢᠬᠠᠨ ᠭᠦᠦᠷ ᠰᠢᠨᠡ ᠨᠥᠬᠥᠷ ᠡᠮᠡ᠂ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠲᠣᠯᠣᠭᠠᠢ ᠰᠡᠭᠦᠯ ᠵᠠᠯᠭᠠᠯᠳᠤᠨ ᠬᠠᠭᠤᠴᠢᠨ ᠨᠠᠢ᠍ᠮᠠᠨ ᠤ᠋ ᠦᠷᠦᠮᠴᠢ ᠪᠠᠯᠭᠠᠳ ᠤ᠋ᠨ ᠵᠦᠭ ᠮᠣᠷᠳᠠᠯᠴᠠᠨ ᠬᠥᠳᠡᠯᠵᠦ᠂ ᠮᠢᠩᠭᠠᠨ ᠢᠯᠡᠭᠦᠦ ᠭᠠᠵᠠᠷ ᠤ᠋ᠨ ᠬᠣᠯᠠ᠂ ᠴᠡᠷᠢᠭ ᠮᠣᠷᠢᠨ ᠲᠡᠷᠭᠡ ᠵᠢᠭᠰᠠᠭᠠᠯ ᠵᠠᠯᠭᠠ ᠵᠠᠯᠭᠠ ᠶᠠᠪᠤᠵᠤ᠂ ᠠᠷᠤ ᠡᠯᠡᠰᠦᠨ ᠦ᠌ ᠠᠭᠤᠳᠠᠮ ᠲᠡᠨᠢᠭᠡᠷ ᠲᠠᠯᠠ ᠪᠡᠯᠴᠢᠭᠡᠷᠡ᠂ ᠠᠳᠠᠪᠠᠰᠢ ᠬᠠᠷᠢᠨ ᠬᠥᠷ ᠨᠠᠢᠷ ᠦᠢᠮᠡᠭᠡᠨ ᠬᠥᠭᠵᠢᠮ ᠲᠡᠢ ᠶ᠋ᠢ ᠨᠢᠭᠡᠨ ᠦᠭᠡᠰ ᠲᠣᠷ ᠲᠣᠪᠴᠢᠶᠠᠯᠠᠨ ᠪᠦᠷᠢᠳᠭᠡᠰᠢ ᠦᠭᠡᠢ᠃ ᠲᠡᠭᠦᠨᠴᠡ ᠤᠷᠢᠳᠠ ᠮᠣᠷᠳᠠᠭᠰᠠᠨ᠂ ᠲᠠᠢᠬᠡᠦ ᠶ᠋ᠢᠨ ᠵᠠᠷᠯᠢᠭ ᠤ᠋ᠨ ᠡᠯᠴᠢ ᠭᠤᠷᠪᠠᠨ ᠶᠡᠬᠡᠰ ᠨᠣᠶᠠᠳ ᠢ᠋ᠶ᠋ᠠᠷ ᠴᠠᠭ ᠮᠥᠴᠡ ᠲᠡᠢ ᠮᠣᠷᠳᠠᠨ ᠬᠥᠳᠡᠯᠵᠦ᠂ ᠪᠠᠭᠤᠳᠠᠯ ᠨᠡᠭᠦᠳᠡᠯ ᠢ ᠤᠷᠤᠭᠰᠢᠯᠠᠨ ᠪᠡᠯᠡᠳᠬᠡᠭᠦᠯᠵᠦ᠂ ᠰᠠᠭᠠᠲᠠᠯ ᠦᠭᠡᠢ ᠱᠠᠭᠠᠷᠳᠠᠨ ᠠᠷᠪᠠᠨ ᠢᠯᠡᠭᠦᠦ ᠡᠳᠦᠷ ᠶᠠᠪᠤᠵᠤ ᠰᠠᠶᠢ ᠬᠠᠭᠤᠴᠢᠨ ᠨᠠᠢ᠍ᠮᠠᠨ ᠤ᠋ ᠦᠷᠦᠮᠴᠢ ᠪᠠᠯᠭᠠᠳ ᠲᠤᠷ ᠬᠦᠷᠴᠦ᠂ ᠠᠶᠤᠮᠰᠢᠭ ᠦᠭᠡᠢ ᠠᠯᠭᠤᠷᠯᠠᠬᠤ ᠦᠭᠡᠢ᠂ ᠠᠶᠤᠮᠰᠢᠭᠲᠤ ᠴᠠᠭᠠᠵᠠᠲᠤ ᠵᠢᠨᠦᠩ ᠦ᠋ᠨ ᠠᠷᠰᠯᠠᠨᠲᠤ ᠲᠠᠭᠲᠤ ᠳ᠋ᠤᠷ ᠠᠪᠠᠷᠢᠵᠤ᠂ ᠠᠶᠠᠯᠠᠵᠤ ᠢᠷᠡᠭᠰᠡᠨ ᠠᠯᠢᠪᠠ ᠤᠴᠢᠷ ᠶᠠᠪᠤᠳᠠᠯ ᠤ᠋ᠨ ᠡᠬᠢ ᠰᠡᠭᠦᠯ ᠢ᠋ ᠨᠠᠷᠢᠪᠴᠢᠯᠠᠨ ᠪᠦᠷᠢᠳᠬᠡᠵᠦ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠠᠭᠤᠳᠠᠮ ᠪᠣᠳᠣᠯᠭᠠᠲᠤ ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠠᠳᠠᠪᠠᠰᠢ ᠪᠠᠶᠠᠰᠬᠤᠯᠠᠩ ᠤ᠋ᠨ ᠴᠢᠷᠠᠢ ᠪᠠᠷ᠄
《ᠠᠯᠲᠠᠨ ᠡᠮᠡᠭᠡ ᠬᠢᠭᠡᠳ ᠤᠯᠤᠰ ᠤ᠋ᠨ ᠡᠬᠡ ᠬᠣᠶᠠᠭᠤᠯᠠ᠂ ᠦᠨᠡᠬᠡᠷ ᠲᠡᠭᠷᠢ ᠶ᠋ᠢᠨ ᠲᠥᠷᠥᠯᠬᠢ ᠪᠣᠭᠳᠠ ᠬᠥᠮᠦᠨ ᠦ᠌ ᠡᠬᠡ᠃ ᠪᠣᠭᠳᠠ ᠬᠥᠮᠦᠨ ᠦ᠌ ᠬᠠᠲᠤᠨ ᠪᠣᠯᠠᠢ ! 》 ᠭᠡᠮᠡᠨ᠂ ᠠᠶᠤᠯ ᠦᠭᠡᠢ ᠦᠯᠦ ᠠᠯᠭᠤᠷᠯᠠᠨ᠂ ᠠᠮᠢᠰᠬᠤᠯ ᠠᠪᠤᠯ ᠦᠭᠡᠢ ᠪᠡᠷ ᠠᠯᠲᠠᠨ ᠵᠦᠩ᠂ ᠠᠷᠠᠰᠤᠨ ᠬᠡᠩᠭᠡᠷᠭᠡ ᠶ᠋ᠢᠨ ᠳᠣᠬᠢᠶᠠ ᠶ᠋ᠢ ᠲᠠᠯᠪᠢᠭᠤᠯᠤᠨ᠂ ᠠᠶᠠᠯᠠᠵᠤ ᠢᠷᠡᠭᠰᠡᠨ ᠭᠤᠷᠪᠠᠨ ᠶᠡᠬᠡ ᠰᠠᠢᠳ ᠢ᠋ ᠠᠪᠤᠨ᠂ ᠠᠯᠲᠠᠲᠤ ᠬᠠᠷᠰᠢ ᠥᠷᠭᠥᠭᠡ ᠤᠷᠲᠣᠨᠠ ᠠᠪᠠᠷᠢᠨ ᠭᠠᠷᠴᠤ ᠬᠠᠭᠠᠨ ᠢ᠋ᠶ᠋ᠠᠷ ᠲᠠᠢᠬᠡᠦ ᠶ᠋ᠢᠨ ᠵᠠᠷᠯᠢᠭ ᠢ᠋ ᠬᠦᠵᠢᠰ ᠦ᠋ᠨ ᠰᠢᠷᠡᠭᠡ ᠪᠡᠯᠡᠳᠬᠡᠯᠭᠡᠨ ᠣᠭᠲᠤᠭᠤᠯᠤᠨ ᠠᠪᠤᠭᠤᠯᠵᠤ᠂ ᠬᠠᠭᠠᠨ ᠲᠡᠷᠢᠭᠦᠯᠡᠨ ᠬᠠᠮᠤᠭ ᠪᠦᠭᠦᠳᠡᠭᠡᠷ ᠮᠥᠷᠭᠥᠵᠦ ᠪᠠᠷᠠᠭᠰᠠᠨ ᠬᠣᠢᠨᠠ ᠰᠠᠶᠢ ᠬᠤᠸᠠᠩᠬᠡᠦ ᠶ᠋ᠢᠨ ᠠᠢᠯᠠᠳᠬᠠᠯ ᠤ᠋ᠨ ᠪᠣᠳᠣᠷᠣᠣᠯ ᠪᠢᠴᠢᠭ ᠢ᠋ ᠠᠯᠭᠤᠷ ᠢ᠋ᠶ᠋ᠠᠷ ᠳᠡᠪᠰᠢᠭᠦᠯᠦᠨ ᠯᠤᠤ ᠶ᠋ᠢᠨ ᠰᠢᠷᠡᠭᠡᠨᠡ ᠡᠷᠭᠦᠵᠦ ᠂ ᠵᠠᠭᠤᠨ ᠰᠠᠢᠳ ᠬᠠᠭᠠᠨ ᠳ᠋ᠤᠷ ᠮᠥᠷᠭᠥᠵᠦ᠂ ᠰᠠᠶᠢ ᠬᠠᠲᠤᠨ ᠤ᠋ ᠵᠠᠷᠯᠢᠭ ᠲᠤᠷ ᠮᠥᠷᠭᠥᠭᠡᠳ ᠠᠮᠤᠭᠤᠯᠠᠩ ᠠᠢᠯᠠᠳᠬᠠᠭᠰᠠᠨ ᠤ᠋ ᠬᠣᠢᠨᠠ᠂ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢ ᠭᠠᠭᠴᠠᠭᠠᠷ ᠲᠥᠷᠥ ᠳ᠋ᠦ᠍ᠷ ᠦᠯᠡᠳᠡᠭᠡᠨ᠂ ᠪᠤᠰᠤ ᠵᠠᠭᠤᠨ ᠲᠦᠰᠢᠮᠡᠳ ᠢ᠋ ᠲᠥᠷᠥ ᠡᠴᠡ ᠪᠠᠭᠤᠯᠭᠠᠨ ᠲᠠᠷᠬᠠᠭᠠᠵᠤ᠂ ᠴᠡᠷᠢᠭ ᠲᠦ᠍ᠷ ᠪᠠᠢᠵᠤ᠂ ᠲᠥᠷᠥ ᠡᠴᠡ ᠢᠷᠡᠭᠰᠡᠨ ᠲᠡᠢ ᠬᠠᠷᠢᠯᠴᠠᠨ ᠵᠣᠯᠭᠠᠯᠳᠤᠵᠤ᠂ ᠴᠡᠷᠢᠭ ᠲᠠᠢᠯᠤᠨ ᠲᠡᠢᠨ ᠢ᠋ ᠳᠠᠷᠤᠭᠰᠠᠨ ᠶᠣᠰᠣᠭᠠᠷ ᠪᠠᠶᠠᠷ ᠬᠢᠯᠴᠡᠨ ᠶᠣᠰᠣᠯᠠᠯᠳᠤᠨ ᠵᠣᠯᠭᠠᠯᠳᠤᠵᠤ ᠬᠠᠭᠠᠨ ᠡᠵᠡᠨ ᠤ ᠬᠡᠰᠢᠭ ᠬᠤᠷᠢᠮ ᠢ᠋ ᠬᠦᠷᠲᠡᠮᠦᠢ᠃ ᠲᠡᠨᠳᠡᠴᠡ ᠬᠠᠭᠠᠨ ᠡᠵᠡᠨ ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠬᠣᠶᠠᠭᠤᠯᠠ᠂ ᠤᠷᠢᠳᠠ ᠶᠠᠭᠠᠷᠠᠨ᠂ ᠲᠠᠢᠬᠡᠦ ᠶ᠋ᠢᠨ ᠵᠠᠷᠯᠢᠭ ᠲᠤᠷ ᠮᠥᠷᠭᠥᠵᠦ ᠶᠣᠰᠣᠯᠠᠭᠠᠳ᠂ ᠳᠠᠷᠤᠢ ᠰᠢᠷᠠ ᠲᠣᠷᠭᠠᠨ ᠣᠷᠢᠶᠠᠳᠠᠰᠤ ᠶ᠋ᠢ ᠠᠯᠳᠠᠷᠭᠠᠨ᠂ ᠮᠣᠭᠠᠢ ᠶ᠋ᠢᠨ ᠵᠢᠷᠦᠬᠡᠨ ᠽᠠᠨᠳᠠᠨ ᠠᠭᠠᠷᠤ ᠮᠣᠳᠣᠨ ᠤ᠋ ᠳᠠᠭᠯᠡᠳᠠᠰᠣᠨ ᠲᠠᠢ ᠪᠢᠲᠡᠭᠦᠮᠵᠢ ᠶ᠋ᠢ ᠡᠪᠳᠡᠵᠦ᠂ ᠳᠣᠲᠣᠷᠠᠬᠢ ᠯᠤᠤ ᠪᠠᠷ ᠭᠦᠪᠡᠭᠡᠯᠡᠭᠰᠡᠨ ᠲᠠᠢᠬᠡᠦ ᠶ᠋ᠢᠨ ᠡᠷᠳᠡᠨᠢ ᠳᠠᠷᠤᠭᠰᠠᠨ ᠤᠷᠢᠶᠠᠳᠠᠰᠤᠲᠤ ᠵᠠᠷᠯᠢᠭ ᠪᠢᠴᠢᠭ ᠢ᠋ ᠨᠡᠭᠡᠭᠡᠵᠦ ᠦᠵᠡᠪᠡᠰᠦ᠂ ᠡᠬᠢᠯᠡᠮᠡᠭᠴᠡ ᠬᠠᠭᠠᠨ ᠤ᠋ ᠪᠡᠶᠡ ᠪᠡᠷ ᠴᠡᠷᠢᠭ ᠠᠪᠤᠨ ᠵᠦᠳᠡᠨ ᠵᠢᠳᠬᠦᠵᠦ᠂ ᠬᠠᠭᠤᠴᠢᠨ ᠬᠢᠵᠠᠭᠠᠷ ᠤ᠋ᠨ ᠳᠠᠢᠰᠤᠨ ᠨᠠᠢ᠍ᠮᠠᠨ ᠤ᠋ ᠤᠭ ᠦᠨᠳᠦᠰᠦᠨ ᠢ ᠲᠦᠪᠰᠢᠳᠬᠡᠨ ᠳᠠᠢᠯᠠᠵᠤ᠂ ᠬᠤᠷᠢᠶᠠᠮᠵᠢᠯᠠᠨ ᠨᠢᠭᠡᠳᠬᠡᠵᠦ ᠡᠷᠲᠡᠨ ᠦ᠌ ᠯᠢᠶᠧ ᠽᠦ᠍ ᠪᠠᠭᠠᠲᠤᠷ ᠡᠵᠡᠨ ᠦ᠌ ᠮᠤᠭᠣᠨ ᠢ᠋ ᠭᠡᠷᠡᠯᠲᠦᠭᠦᠯᠦᠨ᠂ ᠶᠡᠬᠡ ᠠᠴᠢᠯᠠᠯ ᠳ᠋ᠤᠷ ᠣᠷᠣᠭᠰᠠᠨ ᠢ᠋ ᠰᠠᠢᠰᠢᠶᠠᠨ ᠬᠥᠬᠢᠭᠦᠯᠦᠭᠡᠳ ᠳᠠᠭᠠᠯᠳᠤᠭᠠ ᠰᠠᠶᠢ ᠲᠠᠢᠬᠡᠦ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢᠨ ᠭᠡᠭᠡᠬᠡᠨ ᠦ᠌ ᠠᠮᠤᠭᠤᠯᠠᠩ ᠲᠤᠩᠭᠠᠯᠠᠭ ᠪᠠ ᠤᠯᠤᠰ ᠲᠥᠷᠥ ᠶ᠋ᠢᠨ ᠨᠡᠢᠲᠡ ᠪᠦᠭᠦᠳᠡᠭᠡᠷ ᠦ᠋ᠨ ᠥᠯᠵᠡᠢ ᠲᠡᠢ ᠰᠠᠢᠬᠠᠨ ᠢ᠋ ᠤᠬᠠᠭᠤᠯᠤᠨ᠂ ᠬᠠᠭᠠᠨ ᠤ᠋ ᠰᠡᠳᠬᠢᠯ ᠢ᠋ ᠰᠤᠯᠠᠳᠬᠠᠯᠭᠠᠵᠣ᠂ ᠰᠡᠭᠦᠯ ᠳ᠋ᠦ᠍ᠷ ᠰᠠᠶᠢ ᠠᠬᠠᠮᠠᠳ ᠠᠴᠢ ᠲᠠᠢᠽᠢ ᠵᠣᠴᠢ ᠶ᠋ᠢᠨ ᠵᠢᠨᠦᠩ ᠯᠤᠭᠠ ᠮᠦᠷᠦᠢᠰᠡᠴᠦ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠᠨ ᠤ᠋ ᠮᠠᠯᠵᠢᠶᠠ ᠪᠢᠴᠢᠭ ᠪᠠᠢᠭᠤᠯᠤᠭᠠ᠂ ᠬᠢᠳᠠᠨ ᠤ᠋ ᠴᠡᠷᠢᠭ ᠦ᠋ᠨ ᠡᠵᠡᠨ ᠢ ᠣᠯᠵᠤ ᠪᠠᠷᠢᠨ ᠴᠢᠳᠠᠭᠰᠠᠨ ᠦᠭᠡᠢ ᠮᠡᠯᠵᠢᠶᠡ ᠡᠴᠡ ᠵᠥᠷᠢᠴᠡᠭᠰᠡᠨ ᠶᠠᠯᠠ ᠳ᠋ᠤᠷ ᠭᠤᠷᠪᠠᠨ ᠵᠢᠯ ᠦ᠋ᠨ ᠴᠥᠯᠡᠯᠭᠡᠨ ᠦ᠌ ᠶᠠᠯᠠ ᠲᠣᠭᠲᠠᠭᠠᠭᠰᠠᠨ ᠢ᠋ ᠨᠢᠭᠡᠨ ᠵᠡᠷᠭᠡ ᠬᠥᠩᠭᠡᠳᠬᠡᠨ ᠢᠯᠭᠠᠯᠠᠵᠤ᠂ ᠣᠨ ᠵᠢᠯ ᠦ᠋ᠨ ᠲᠣᠭᠠ ᠶ᠋ᠢ ᠴᠥᠭᠡᠳᠬᠡᠨ ᠬᠤᠷᠢᠶᠠᠩᠭᠤᠢᠯᠠᠬᠤ ᠶ᠋ᠢ ᠭᠤᠷᠪᠠᠨ ᠵᠡᠷᠭᠡ ᠶ᠋ᠢᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠪᠦᠷᠢᠳᠬᠡᠨ ᠲᠣᠭᠠᠯᠠᠵᠤ᠂ ᠡᠷᠬᠡᠪᠰᠢ ᠳᠠᠬᠢᠨ ᠢᠯᠭᠠᠬᠤᠢ ᠶ᠋ᠢ ᠴᠢᠩᠳᠠᠯᠠᠨ ᠵᠠᠷᠯᠢᠭ ᠪᠠᠭᠤᠵᠤᠬᠤᠢ᠃ ᠦᠭᠡᠰ ᠦ᠋ᠨ ᠮᠠᠯᠵᠢᠶᠠ ᠡᠰᠡ ᠨᠡᠢᠴᠡᠪᠡᠴᠦ᠂ ᠦᠢᠯᠡᠰ ᠦ᠋ᠨ ᠲᠤᠬᠠᠢ ᠶ᠋ᠢ ᠠᠨᠤ ᠠᠯᠳᠠᠭᠰᠠᠨ ᠦᠭᠡᠢ ᠢᠨᠦ ᠦᠨᠡᠨ ᠪᠣᠯᠵᠤᠬᠤᠢ᠃ ᠡᠨᠡ ᠵᠠᠷᠯᠢᠭ ᠢ᠋ ᠨᠠᠢ᠍ᠮᠠᠨ ᠬᠤᠪᠢ ᠡᠰᠡ ᠳᠠᠭᠠᠭᠤᠯᠪᠠᠰᠤ ᠦᠯᠦ ᠪᠣᠯᠤᠮᠤᠢ ᠬᠡᠮᠡᠵᠦ᠂ ᠰᠠᠶᠢ ᠬᠤᠸᠠᠩᠬᠡᠦ ᠶ᠋ᠢᠨ ᠪᠣᠳᠣᠷᠣᠣᠯ ᠤ᠋ᠨ ᠨᠤᠭᠤᠯᠪᠤᠷᠢ ᠶ᠋ᠢ ᠦᠵᠡᠪᠡᠰᠦ᠂ ᠡᠵᠡᠨ ᠬᠠᠭᠠᠨ ᠤ᠋ ᠭᠡᠭᠡᠨ ᠴᠢᠯᠡᠵᠦ ᠴᠡᠷᠢᠭ ᠦ᠋ᠨ ᠲᠣᠭᠣᠰᠤᠨᠠ ᠵᠠᠯᠠᠷᠠᠵᠤ᠂ ᠭᠠᠪᠢᠶᠠ ᠪᠦᠲᠦᠭᠰᠡᠨ ᠪᠠᠶᠠᠷ ᠲᠤᠷ ᠮᠥᠷᠭᠥᠬᠦ ᠶ᠋ᠢ ᠡᠬᠢᠨ ᠳ᠋ᠦ᠍ᠷ ᠪᠢᠴᠢᠭᠡᠳ ᠳᠠᠭᠠᠯᠳᠤᠭᠠ ᠰᠠᠶᠢ ᠠᠮᠤᠭᠤᠯᠠᠩ ᠠᠢᠯᠠᠳᠬᠠᠵᠤ᠂ ᠪᠠᠰᠠ ᠲᠠᠢᠬᠡᠦ ᠡᠴᠡ ᠡᠬᠢᠯᠡᠨ ᠤᠯᠤᠰ ᠲᠥᠷᠥ ᠡᠩᠬᠡ ᠠᠮᠤᠭᠤᠯᠠᠩ ᠢ ᠰᠣᠨᠣᠷᠳᠠᠭᠤᠯᠤᠨ᠂ ᠪᠣᠭᠳᠠ ᠶ᠋ᠢᠨ ᠪᠣᠳᠣᠯᠭᠠ ᠶ᠋ᠢ ᠰᠡᠷᠭᠦᠭᠡᠨ᠂ ᠳᠠᠷᠠᠭᠠ ᠳ᠋ᠤᠷ ᠰᠠᠶᠢ ᠨᠠᠢ᠍ᠮᠠᠨ ᠤ᠋ ᠡᠷᠡ ᠡᠮᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠭᠠᠪᠢᠶᠠ ᠳ᠋ᠤᠷ ᠬᠥᠬᠢᠭᠦᠯᠦᠨ ᠱᠠᠩᠨᠠᠬᠤ ᠶ᠋ᠢ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠤᠰᠢᠶᠠᠭᠰᠠᠨ ᠠᠯᠪᠠᠨ ᠬᠡᠷᠡᠭ ᠢ᠋ ᠡᠪᠯᠡᠨ ᠵᠣᠬᠢᠴᠠᠭᠤᠯᠤᠭᠰᠠᠨ ᠪᠠ ᠬᠣᠣᠰᠯᠠᠨ ᠬᠣᠯᠪᠣᠵᠤ᠂ ᠰᠢᠳᠬᠡᠨ ᠲᠡᠭᠦᠰᠬᠡᠭᠰᠡᠨ ᠢ᠋ ᠨᠠᠷᠢᠪᠴᠢᠯᠠᠨ ᠪᠦᠷᠢᠳᠬᠡᠨ ᠠᠢᠯᠠᠳᠬᠠᠵᠤ᠂ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ᠷ ᠰᠠᠶᠢ᠂ ᠵᠣᠴᠢ ᠲᠠᠢᠽᠢ ᠶ᠋ᠢ ᠵᠢᠨᠦᠩ ᠯᠦ᠍ᠭᠡ ᠮᠡᠯᠵᠢᠯᠭᠡᠯᠡᠭᠡᠳ ᠦᠭᠡᠰ ᠲᠣᠷ ᠡᠰᠡ ᠬᠦᠷᠦᠭᠰᠡᠨ ᠳ᠋ᠦ᠍ᠷ ᠬᠦᠨᠳᠦᠳᠬᠡᠨ ᠶᠠᠯᠠᠯᠠᠵᠤ᠂ ᠵᠠᠭᠤᠨ ᠦᠶᠡ ᠶ᠋ᠢᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠳᠦᠷᠢᠮ ᠴᠡᠭᠡᠷᠯᠡᠯ ᠪᠣᠯᠭᠠᠬᠤ ᠶ᠋ᠢ ᠨᠤᠭᠤᠯᠪᠤᠷᠢ ᠪᠢᠴᠢᠵᠦ ᠪᠡᠯᠡᠳᠬᠡᠭᠡᠳ᠂ ᠵᠠᠰᠠᠭ ᠴᠠᠭᠠᠵᠠ ᠶ᠋ᠢ ᠴᠢᠩᠭᠠᠳᠬᠠᠬᠤ ᠶ᠋ᠢ ᠭᠤᠶᠤᠨ ᠠᠢᠯᠠᠳᠬᠠᠰᠤᠭᠠᠢ ᠬᠡᠮᠡᠵᠦ ᠪᠠᠢᠲᠠᠯᠠ᠂ ᠳᠡᠭᠡᠷᠡ ᠡᠴᠡ ᠲᠠᠢᠬᠡᠦ ᠶ᠋ᠢᠨ ᠲᠠᠢᠽᠢ ᠵᠣᠴᠢ ᠶ᠋ᠢᠨ ᠶᠠᠯᠠ ᠶ᠋ᠢ ᠬᠥᠩᠭᠡᠳᠬᠡᠨ ᠬᠡᠯᠡᠯᠴᠡᠭᠦᠯᠬᠦ ᠵᠠᠷᠯᠢᠭ ᠪᠠᠭᠤᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠠᠶᠤᠮᠰᠢᠭ ᠦᠭᠡᠢ᠂ ᠲᠠᠢᠬᠡᠦ ᠶ᠋ᠢᠨ ᠵᠠᠷᠯᠢᠭ ᠤ᠋ᠨ ᠡᠰᠡᠷᠭᠦ ᠪᠤᠰᠤ ᠥᠭᠡᠰᠲᠦ ᠠᠢᠯᠠᠳᠬᠠᠯ ᠠᠢᠯᠠᠳᠬᠠᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠤ᠋ ᠲᠤᠯᠠᠳᠠ᠂ ᠲᠠᠢᠬᠡᠦ ᠶ᠋ᠢᠨ ᠡᠯᠴᠢ ᠰᠠᠢᠳ ᠤ᠋ᠳ ᠲᠤᠷ ᠠᠮᠠᠨ ᠢ᠋ᠶ᠋ᠠᠷ ᠠᠢᠯᠠᠳᠬᠠᠯᠭᠠᠬᠤ ᠦᠭᠡᠰ ᠢ᠋ ᠲᠣᠳᠣᠷᠬᠠᠢᠯᠠᠨ ᠥᠴᠢᠭᠰᠡᠨ ᠢ ᠳᠤᠷᠠᠳᠤᠨ ᠲᠣᠭᠠᠴᠢᠵᠤᠬᠤᠢ᠃ ᠬᠠᠭᠠᠨ ᠬᠢᠭᠡᠳ ᠵᠢᠨᠦᠩ᠂ ᠡᠵᠡᠨ ᠰᠠᠢᠳ ᠬᠣᠶᠠᠭᠤᠯᠠ ᠨᠤᠭᠤᠯᠪᠤᠷᠢ ᠦᠵᠡᠭᠰᠡᠭᠡᠷ ᠡᠨᠳᠡ ᠬᠦᠷᠴᠦ᠂ ᠬᠣᠶᠠᠭᠤᠯᠠ ᠬᠠᠮᠲᠤᠪᠠᠷ ᠪᠡᠶᠡᠰᠦᠨ ᠢᠨᠢᠶᠡᠵᠦ᠂ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠮᠦᠰᠢᠶᠡᠭᠰᠡᠭᠡᠷ ᠮᠤᠬᠤᠯᠢ ᠶ᠋ᠢᠨ ᠵᠦᠭ ᠵᠠᠷᠯᠢᠭ ᠪᠣᠯᠤᠷᠤᠨ :
《ᠮᠡᠷᠭᠡᠨ ᠪᠠᠭᠠᠲᠤᠷ ᠵᠢᠨᠦᠩ ᠤᠯᠤᠰ ᠭᠦᠷᠦᠨ ᠦ᠌ ᠡᠷᠳᠡᠨᠢ᠂ ᠮᠠᠲᠠᠯ ᠤᠬᠠᠭᠠᠨᠲᠤ ᠬᠤᠸᠠᠩᠬᠡᠦ ᠲᠥᠷᠥ ᠶᠠᠮᠤᠨ ᠤ᠋ ᠡᠷᠳᠡᠨᠢ ᠬᠡᠮᠡᠭᠴᠢ ᠢᠨᠣ ᠦᠨᠡᠨ ᠪᠤᠶᠤ᠃ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠠᠭᠯᠠᠭ ᠪᠥᠭᠡᠲᠡᠯᠡ ᠮᠢᠨᠦ ᠰᠠᠨᠠᠭᠠᠨ ᠢ᠋ ᠤᠬᠠᠵᠤᠬᠤᠢ 》ᠬᠡᠮᠡᠪᠡ᠃
ᠲᠡᠳᠦᠢ ᠬᠠᠭᠠᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢ ᠰᠢᠳᠡᠷᠡ ᠦᠯᠡᠳᠡᠭᠡᠨ ᠡᠪᠦᠳᠦᠭ ᠦ᠋ᠨ ᠳᠣᠣᠷᠠ ᠪᠠᠨ ᠬᠤᠷᠢᠮ ᠬᠠᠢᠷᠠᠯᠠᠨ᠂ ᠬᠠᠭᠠᠨ ᠳᠡᠭᠡᠷᠡ ᠵᠣᠭᠣᠭ ᠵᠣᠭᠣᠭᠯᠠᠵᠤ᠂ ᠥᠪᠡᠷ ᠦ᠋ᠨ ᠮᠣᠳᠣᠷ ᠢ᠋ᠶ᠋ᠠᠷ ᠨᠢᠷᠠᠢ ᠬᠤᠷᠠᠭᠠᠨ ᠮᠢᠬᠠ ᠶ᠋ᠢ ᠬᠡᠰᠡᠭᠯᠡᠨ ᠱᠠᠩᠨᠠᠭᠰᠠᠨᠠ ᠵᠢᠨᠦᠩ ᠮᠤᠬᠤᠯᠢ᠂ ᠮᠡᠩᠳᠡᠨ ᠰᠡᠩᠳᠡᠨ ᠲᠣᠰᠴᠤ ᠠᠪᠤᠭᠠᠳ᠂ ᠠᠮᠠᠨ ᠳ᠋ᠤᠷ ᠡᠮᠬᠦᠨ ᠵᠠᠵᠢᠯᠵᠤ᠂ ᠵᠠᠯᠭᠢᠨ ᠪᠥᠭᠡᠳ ᠮᠠᠯᠠᠭᠠ ᠪᠠᠨ ᠠᠪᠴᠤ ᠮᠥᠷᠭᠥᠨ ᠪᠥᠭᠡᠳ ᠪᠠᠰᠠ ᠵᠠᠵᠢᠯᠤᠨ ᠵᠠᠯᠭᠢᠵᠤ ᠪᠠᠷᠠᠲᠠᠯᠠ ᠬᠦᠷᠲᠡᠪᠡ᠃ ᠡᠨᠡ ᠶᠣᠰᠣ ᠲᠠᠢᠴᠢᠩ ᠤᠯᠤᠰ ᠲᠤᠷ ᠮᠥᠨ ᠪᠠᠢᠭᠰᠠᠭᠠᠷ ᠠᠮᠤᠢ᠃
ᠲᠡᠳᠦᠢ ᠵᠢᠨᠦᠩ ᠦ᠋ᠨ ᠲᠠᠭᠲᠤ ᠳ᠋ᠤᠷ ᠴᠢᠨ ᠸᠠᠩ ᠴᠧᠩᠰᠢᠶᠠᠩ ᠪᠦᠬᠦ ᠪᠡᠯᠭᠦᠳᠡᠢ ᠶ᠋ᠢ ᠣᠷᠣᠯᠠᠨ ᠬᠣᠨᠣᠭᠤᠯᠵᠤ ᠲᠤᠰᠢᠶᠠᠯ ᠢ᠋ ᠰᠠᠬᠢᠭᠣᠯᠣᠨ᠂ ᠵᠢᠨᠦᠩ ᠢ ᠬᠠᠭᠠᠨ ᠳᠡᠷᠭᠡᠳᠡ ᠦᠯᠡᠳᠡᠭᠡᠨ ᠨᠢᠭᠡᠨ ᠰᠥᠨᠢ ᠬᠡᠯᠡᠯᠴᠡᠨ ᠬᠣᠨᠣᠵᠤ᠂ ᠳᠣᠲᠣᠭᠠᠳᠤ ᠭᠠᠳᠠᠭᠠᠳᠤ ᠬᠡᠳᠦᠢᠴᠢᠨᠡᠭᠡᠨ ᠲᠣᠪᠴᠢᠶᠠ ᠰᠢᠳᠬᠡᠯ ᠢ᠋ ᠡᠵᠡᠨ ᠰᠠᠢᠳ ᠬᠣᠶᠠᠭᠤᠯᠠ ᠨᠡᠪᠲᠡᠷᠡᠲᠡᠯᠡ ᠬᠡᠯᠡᠯᠴᠡᠨ ᠲᠣᠬᠢᠷᠠᠭᠠᠳ ᠵᠢᠴᠢ ᠥᠷᠯᠥᠭᠡ ᠲᠠᠢᠬᠡᠦ ᠶ᠋ᠢᠨ ᠵᠠᠷᠯᠢᠭ ᠪᠠᠭᠤᠭᠰᠠᠨ ᠬᠡᠷᠡᠭ ᠡᠴᠡ ᠡᠬᠢᠯᠡᠨ ᠡᠯᠡ ᠬᠡᠷᠡᠭ ᠦ᠋ᠳ ᠢ᠋ ᠵᠦᠢᠯ ᠳᠠᠷᠠᠭᠠᠯᠠᠨ ᠬᠠᠭᠤᠯᠤᠨ ᠰᠢᠳᠬᠡᠵᠦ ᠲᠠᠰᠤᠯᠤᠨ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠠᠨᠤ᠄
《ᠲᠠᠢᠬᠡᠦ ᠶ᠋ᠢᠨ ᠵᠠᠷᠯᠢᠭ ᠢ᠋ ᠬᠢᠴᠢᠶᠡᠩᠭᠦᠢᠯᠡᠨ ᠲᠠᠢᠽᠢ ᠵᠣᠴᠢ ᠶ᠋ᠢᠨ ᠮᠡᠯᠵᠢᠶᠡᠨ ᠦ᠌ ᠦᠭᠡᠰ ᠲᠡᠭᠡᠨ ᠡᠰᠡ ᠬᠤᠰᠤᠭᠰᠠᠨ ᠶᠠᠯᠠ ᠶ᠋ᠢ ᠬᠥᠩᠭᠡᠷᠡᠭᠦᠯᠬᠦᠢ ᠶ᠋ᠢᠨ ᠲᠤᠯᠠ᠂ ᠤᠷᠢᠳᠠ ᠤᠯᠤᠰ ᠤ᠋ᠨ ᠨᠠᠭᠠᠴᠤ᠂ ᠠᠵᠢᠨᠠᠢ ᠮᠡᠷᠭᠡᠨ ᠬᠦᠩ ᠦ᠋ᠨ ᠬᠢᠳᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠡᠵᠡᠨ ᠪᠠ ᠵᠠᠩᠵᠤᠨ ᠨᠠᠷ ᠨᠡᠢᠲᠡ ᠠᠷᠪᠠᠨ ᠬᠣᠶᠠᠷ ᠬᠥᠮᠦᠨ ᠢ᠋ ᠰᠠᠮᠠᠭᠤᠨ ᠵᠡᠪᠡ ᠶ᠋ᠢᠨ ᠬᠠᠪᠬᠠ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠴᠥᠮ ᠠᠯᠠᠭᠠᠳ ᠠᠪᠴᠤ ᠢᠷᠡᠭᠰᠡᠨ ᠦᠬᠦᠳᠡᠯ ᠶᠠᠰᠤ ᠪᠠ ᠪᠠᠰᠠ ᠭᠠᠭᠴᠠ ᠦᠰᠦᠲᠦ ᠨᠡᠷᠡ ᠶ᠋ᠢᠨ ᠰᠢᠪᠠᠭᠠ ᠲᠠᠢ᠂ ᠨᠡᠢᠲᠡ ᠠᠷᠪᠠᠨ ᠭᠤᠷᠪᠠᠨ ᠨᠡᠷᠡ ᠲᠡᠢ᠂ ᠬᠢᠳᠠᠨ ᠤ᠋ ᠤᠭ ᠴᠡᠷᠢᠭ ᠮᠣᠷᠳᠠᠬᠤ ᠶ᠋ᠢᠨ ᠨᠡᠢᠭᠡᠮ ᠨᠡᠷᠡ ᠶ᠋ᠢᠨ ᠳᠠᠩᠰᠠ ᠶ᠋ᠢᠨ ᠬᠥᠮᠦᠨ ᠦ᠌ ᠲᠣᠭᠠ ᠯᠤᠭᠠ ᠪᠠᠢᠴᠠᠭᠠᠨ ᠲᠠᠭᠠᠴᠠᠭᠤᠯᠵᠤ᠂ ᠤᠯᠤᠰ ᠤ᠋ᠨ ᠶᠡᠬᠡ ᠪᠠᠭᠠ᠂ ᠬᠣᠶᠠᠷ ᠨᠠᠭᠠᠴᠤ ᠨᠣᠶᠠᠨ᠂ ᠠᠵᠢᠨᠠᠢ ᠮᠡᠷᠭᠡᠨ᠂ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠬᠣᠶᠠᠭᠤᠯᠠ ᠶ᠋ᠢᠨ ᠭᠠᠪᠢᠶᠠ ᠳ᠋ᠤᠷ ᠲᠠᠭᠠᠴᠠᠭᠤᠯᠤᠨ ᠲᠣᠭᠠᠴᠢᠵᠤ᠂ ᠴᠡᠷᠢᠭ ᠦ᠋ᠨ ᠤᠭ ᠰᠠᠨᠠᠭᠠ ᠠᠬᠤᠭᠤᠯᠤᠨ᠂ ᠡᠨᠡ ᠨᠢᠭᠡᠨ ᠠᠩᠭᠢ ᠶ᠋ᠢᠨ ᠨᠢᠭᠤᠴᠠ ᠵᠠᠮ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠴᠥᠮ ᠢ᠋ᠶ᠋ᠡᠷ ᠲᠠᠢᠽᠢ ᠵᠣᠴᠢ ᠶ᠋ᠢᠨ ᠣᠢᠷᠠ ᠢᠨᠠᠭ ᠤᠷᠤᠭ ᠪᠠ ᠲᠥᠷᠥᠯ ᠢ᠋ ᠬᠠᠪᠰᠤᠷᠭᠠᠭᠰᠠᠨ ᠢ᠋ᠶ᠋ᠠᠷ ᠠᠪᠠᠴᠢᠵᠤ ᠬᠢᠳᠠᠨ ᠤ᠋ ᠴᠡᠷᠢᠭ ᠢ᠋ ᠪᠦᠷᠢᠨ ᠪᠦᠲᠦᠨ ᠢ᠋ᠶ᠋ᠡᠷ ᠶᠡᠬᠡᠳᠡ ᠳᠡᠢᠯᠦᠭᠰᠡᠨ ᠢ᠋ᠶ᠋ᠡᠷ ᠢᠯᠭᠠᠨ ᠲᠣᠭᠲᠠᠭᠠᠨ ᠡᠳᠡᠭᠡᠷ ᠦ᠋ᠨ ᠭᠠᠪᠢᠶᠠ ᠶ᠋ᠢ ᠨᠡᠢᠯᠡᠭᠦᠯᠵᠦ᠂ ᠲᠠᠢᠽᠢ ᠵᠣᠴᠢ ᠶ᠋ᠢᠨ ᠮᠡᠯᠵᠢᠯᠭᠡᠨ ᠦ᠌ ᠶᠠᠯᠠ ᠶ᠋ᠢ ᠭᠤᠷᠪᠠᠨ ᠵᠡᠷᠭᠡ ᠬᠥᠩᠭᠡᠯᠡᠨ ᠰᠢᠳᠬᠡᠵᠦ ᠠᠪᠠᠴᠢᠭᠰᠠᠨ ᠠᠨᠤ : ᠲᠡᠷᠢᠭᠦᠨ ᠳ᠋ᠦ᠍ᠷ ᠲᠠᠢᠬᠡᠦ ᠶ᠋ᠢᠨ ᠥᠷᠯᠥᠭ ᠵᠠᠷᠯᠢᠭ ᠢ᠋ ᠬᠢᠴᠢᠶᠡᠩᠭᠦᠢᠯᠡᠨ᠂ ᠲᠠᠢᠽᠢ ᠵᠣᠴᠢ ᠶ᠋ᠢᠨ ᠴᠢᠨ ᠸᠠᠩ ᠤ᠋ᠨ ᠬᠡᠷᠬᠡᠮ ᠢ ᠡᠪᠳᠡᠭᠰᠡᠨ ᠪᠣᠯᠪᠠᠴᠤ ᠲᠠᠢᠽᠢ ᠶ᠋ᠢᠨ ᠬᠤᠪᠢᠶᠠᠷᠢ ᠶ᠋ᠢᠨ ᠪᠠᠢᠷᠢᠯᠠᠯ ᠵᠢᠭᠰᠠᠭᠠᠯ ᠢ᠋ ᠦᠯᠡᠳᠡᠭᠡᠨ ᠥᠭᠴᠦ᠂ ᠪᠠᠰᠠ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠠᠢᠬᠡᠦ ᠶ᠋ᠢᠨ ᠱᠠᠩᠨᠠᠭᠰᠠᠨ ᠥᠪᠡᠷᠦᠨ ᠬᠠᠭᠠᠰ ᠬᠤᠪᠢ ᠶ᠋ᠢᠨ ᠹᠦᠩᠯᠦ ᠶ᠋ᠢᠨ ᠮᠠᠯ ᠬᠢᠭᠡᠳ ᠮᠥᠩᠭᠥ᠂ ᠠᠮᠤ ᠪᠠ ᠲᠣᠷᠭᠠ ᠶ᠋ᠢ ᠬᠠᠭᠠᠨ ᠤ᠋ ᠳᠣᠲᠣᠭᠠᠳᠤ ᠰᠠᠩ ᠠ᠋ᠴᠠ ᠲᠠᠢᠬᠡᠦ ᠶ᠋ᠢᠨ ᠲᠥᠯᠥᠭᠡ ᠭᠠᠷᠭᠠᠵᠤ ᠱᠠᠩᠨᠠᠭᠠᠳ᠂ ᠪᠠᠰᠠ ᠵᠢᠨᠦᠩ ᠦ᠋ᠨ ᠠᠢᠯᠠᠳᠬᠠᠯ ᠢ᠋ᠶ᠋ᠠᠷ ᠲᠠᠢᠽᠢ ᠳ᠋ᠤᠷ ᠲᠦᠷ ᠨᠢᠭᠡᠨ ᠵᠢᠰᠢᠶᠠᠨ ᠤ᠋ ᠴᠡᠷᠢᠭ ᠵᠠᠬᠢᠷᠤᠭᠤᠯᠤᠨ ᠵᠠᠬᠠ ᠬᠢᠵᠠᠭᠠᠷ ᠤ᠋ᠨ ᠭᠠᠵᠠᠷ ᠣᠷᠣᠨ ᠤ᠋ ᠵᠣᠬᠢᠰ ᠢ᠋ ᠦᠵᠡᠨ᠂ ᠲᠣᠬᠢᠶᠠᠯ ᠳ᠋ᠤᠷ ᠲᠡᠩᠴᠡᠭᠦᠯᠦᠨ ᠭᠠᠪᠢᠶᠠ ᠪᠠᠢᠭᠤᠯᠤᠭᠤᠯᠤᠨ᠂ ᠶᠠᠯᠠ ᠶ᠋ᠢ ᠵᠣᠯᠢᠭᠤᠯᠬᠤᠢ ᠶ᠋ᠢᠨ ᠲᠤᠯᠠᠳᠠ᠂ ᠡᠷᠬᠡᠪᠰᠢ ᠳᠣᠣᠷᠠᠬᠢ ᠵᠠᠩᠵᠤᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠳᠡᠪᠰᠢᠭᠦ ᠪᠠ ᠪᠠᠭᠤᠷᠠᠬᠤ ᠶ᠋ᠢᠨ ᠱᠠᠩ ᠬᠣᠣᠷ ᠢ᠋ ᠲᠡᠭᠰᠢᠳᠬᠡᠬᠦᠢ ᠳ᠋ᠦ᠍ᠷ ᠡᠷᠬᠡᠪᠰᠢ ᠠᠩᠭᠢᠳᠠ ᠨᠢᠭᠡᠨ ᠴᠡᠷᠢᠭ ᠦ᠋ᠨ ᠴᠣᠯᠠ ᠬᠡᠷᠬᠡᠮ ᠬᠡᠷᠡᠭᠲᠡᠢ ᠶ᠋ᠢᠨ ᠲᠤᠯᠠᠳᠠ᠂ ᠬᠢᠵᠠᠭᠠᠷ ᠢ᠋ ᠠᠮᠤᠭᠤᠯᠬᠤ ᠬᠦᠩ ᠦ᠋ᠨ ᠬᠡᠷᠬᠡᠮ ᠨᠡᠮᠡᠭᠦᠯᠵᠦ᠂ ᠵᠢᠨᠦᠩ ᠦ᠋ᠨ ᠲᠠᠭᠲᠤ ᠳ᠋ᠤᠷ ᠬᠠᠷᠢᠯᠴᠠᠨ ᠡᠴᠢᠵᠦ ᠢᠷᠡᠬᠦ᠂ ᠬᠦᠩ ᠦ᠋ᠨ ᠲᠠᠮᠠᠭᠠ ᠲᠡᠮᠳᠡᠭ ᠣᠯᠭᠣᠭᠤᠯᠵᠤ᠂ ᠪᠠᠰᠠ ᠲᠠᠢᠬᠡᠦ ᠶ᠋ᠢᠨ ᠵᠠᠷᠯᠢᠭᠴᠢᠯᠠᠨ ᠲᠠᠢᠽᠢ ᠬᠦᠩ ᠵᠣᠴᠢ ᠶ᠋ᠢᠨ ᠳᠣᠲᠣᠭᠠᠳᠤ ᠣᠷᠳᠣᠨ ᠤ᠋ ᠬᠠᠲᠤᠳ ᠹᠧᠢ ᠵᠢᠶᠦ᠋ᠨ ᠵᠣ᠌᠂ ᠲᠠᠢᠽᠢ ᠨᠠᠷ ᠬᠢᠭᠡᠳ ᠭᠡᠷᠦᠨ ᠬᠣᠪᠢᠨ ᠤ᠋ ᠠᠯᠪᠠᠨ ᠤ᠋ ᠡᠷᠡ ᠡᠮᠡ᠂ ᠭᠤᠷᠪᠠᠨ ᠵᠠᠭᠤᠨ ᠬᠥᠮᠦᠨ ᠦ᠌ ᠤᠨᠤᠭᠠ ᠲᠡᠷᠭᠡ᠂ ᠰᠦᠷᠦᠭ ᠵᠢᠭᠰᠠᠭᠠᠯ ᠢ᠋ ᠬᠦᠩ ᠦ᠋ᠨ ᠬᠡᠷᠬᠡᠮ ᠦ᠋ᠨ ᠶᠣᠰᠣᠭᠠᠷ ᠬᠡᠷᠡᠭᠯᠡᠭᠦᠯᠦᠨ᠂ ᠪᠠᠰᠠ ᠲᠠᠢ ᠴᠢᠩ ᠲᠠᠢᠬᠡᠦ ᠶ᠋ᠢᠨ ᠡᠮᠦᠨᠡ ᠡᠴᠡ ᠬᠠᠭᠠᠨ ᠤ᠋ ᠲᠠᠪᠤᠳᠤᠭᠠᠷ ᠳᠡᠭᠦᠦ ᠨᠣᠶᠠᠨ ᠵᠢᠶᠦ᠋ᠨ ᠸᠠᠩ ᠤᠷᠠᠨ ᠬᠠᠴᠤᠭ᠂ ᠸᠠᠩ ᠤ᠋ᠨ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠦᠶᠡ ᠬᠥᠪᠡᠭᠦᠳ ᠲᠠᠢᠽᠢ ᠵᠣᠴᠢ ᠬᠦᠩ ᠢ᠋ ᠴᠦᠯᠡᠭᠰᠡᠨ ᠭᠠᠵᠠᠷᠠ ᠬᠦᠷᠭᠡᠵᠦ᠂ ᠲᠡᠷᠡ ᠭᠠᠵᠠᠷ ᠣᠷᠣᠨ ᠤ᠋ ᠵᠠᠩ ᠠᠪᠤᠴᠠ᠂ ᠣᠨᠳᠣᠷᠣᠯ ᠠᠮᠢᠳᠤᠷᠠᠯ ᠤ᠋ᠨ ᠶᠠᠮᠪᠠᠷ ᠢ᠋ ᠦᠵᠡᠵᠦ ᠢᠷᠡᠨ᠂ ᠲᠠᠢᠬᠡᠦ ᠳ᠋ᠦ᠍ᠷ ᠬᠠᠷᠢᠭᠤ ᠠᠢᠯᠠᠳᠬᠠᠬᠤ ᠶ᠋ᠢ ᠵᠠᠷᠯᠢᠭ ᠤ᠋ᠨ ᠶᠣᠰᠣᠭᠠᠷ ᠪᠣᠯᠭᠠᠵᠤ᠂ ᠴᠥᠯᠡᠯᠭᠡᠨ ᠤ ᠲᠣᠭᠠ ᠬᠤᠭᠤᠴᠠᠭᠠ ᠶ᠋ᠢᠨ ᠭᠤᠷᠪᠠᠨ ᠵᠢᠯ ᠡᠴᠡ ᠨᠢᠭᠡᠨ ᠳᠤᠮᠳᠠᠭᠤᠷ ᠬᠠᠭᠠᠰ ᠢ᠋ ᠬᠠᠰᠤᠵᠤ ᠠᠪᠤᠭᠠᠳ᠂ ᠨᠢᠭᠡᠨ ᠵᠢᠯ ᠪᠥᠭᠡᠳ ᠵᠢᠷᠭᠤᠭᠠᠨ ᠰᠠᠷᠠ ᠪᠣᠯᠬᠤ ᠪᠠᠷ ᠪᠠᠭᠤᠷᠠᠭᠤᠯᠵᠤ᠂ ᠨᠡᠩ ᠪᠠᠰᠠ ᠡᠨᠡ ᠵᠡᠪᠰᠡᠷᠠ ᠬᠡᠷᠪᠡ ᠪᠤᠰᠤ ᠵᠦᠢᠯ ᠦ᠋ᠨ ᠲᠣᠬᠢᠶᠠᠯ ᠤᠴᠠᠷᠠᠯ ᠪᠣᠯᠵᠤ᠂ ᠵᠠᠬᠠ ᠬᠢᠵᠠᠭᠠᠷᠠ ᠥᠪᠡᠷᠡ ᠨᠢᠭᠡᠨ ᠵᠦᠢᠯ ᠦ᠋ᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠪᠠᠢᠭᠤᠯᠬᠤ ᠪᠥᠭᠡᠰᠦ᠂ ᠡᠨᠡ ᠨᠢᠭᠡᠨ ᠵᠢᠯ ᠬᠠᠭᠠᠰ ᠣᠨ ᠤ᠋ ᠴᠥᠯᠡᠯᠭᠡ ᠶ᠋ᠢᠨ ᠶᠠᠯᠠ ᠶ᠋ᠢ ᠪᠠᠰᠠ ᠪᠠᠭᠤᠷᠠᠭᠤᠯᠤᠨ ᠢᠯᠭᠠᠨ ᠬᠡᠯᠡᠯᠴᠡᠵᠦ ᠲᠥᠷᠥ ᠳ᠋ᠦ᠍ᠷ ᠡᠭᠡᠭᠦᠯᠦᠨ ᠢᠷᠡᠭᠦᠯᠬᠦ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠳᠠᠭᠤᠳᠠᠭᠤᠯᠤᠮᠤᠢ᠃ ᠦᠯᠡᠭᠦᠦ ᠢᠷᠦᠭᠡᠯᠲᠦ ᠥᠷᠥᠰᠢᠶᠡᠯᠲᠦ ᠲᠠᠢᠬᠡᠦ ᠦᠵᠢᠨ ᠦ᠌ ᠥᠷᠥᠰᠢᠶᠡᠩᠭᠦᠢ ᠵᠠᠷᠯᠢᠭ ᠪᠣᠢ ᠶ᠋ᠢᠨ ᠲᠤᠯᠠ᠂ ᠲᠠᠢᠽᠢ ᠵᠣᠴᠢ ᠬᠦᠩ ᠦ᠋ᠨ ᠬᠡᠷᠬᠡᠮ ᠢ᠋ᠶ᠋ᠡᠨ ᠵᠡᠭᠦᠵᠦ᠂ ᠬᠠᠭᠠᠨ ᠳ᠋ᠤᠷ ᠪᠠᠷᠠᠭᠠᠳᠠᠭᠤᠯᠤᠨ ᠮᠥᠷᠭᠥᠭᠦᠯᠵᠦ ᠡᠷᠬᠢᠯᠡᠭᠰᠡᠨ ᠭᠤᠷᠪᠠᠨ ᠰᠠᠢᠳ ᠲᠤᠷ ᠲᠤᠰᠢᠶᠠᠨ ᠥᠭᠴᠦ ᠲᠥᠷᠥ ᠳ᠋ᠦ᠍ᠷ ᠡᠭᠡᠭᠦᠯᠦᠨ᠂ ᠲᠠᠢᠬᠡᠦ ᠳ᠋ᠦ᠍ᠷ ᠮᠥᠷᠭᠥᠭᠦᠯᠦᠨ ᠲᠡᠭᠦᠨᠦ ᠭᠡᠷᠦᠨ ᠠᠮᠠᠨ ᠬᠠᠲᠤᠳ ᠬᠥᠪᠡᠭᠦᠳ ᠢ᠋ ᠠᠪᠤᠭᠤᠯᠵᠤ᠂ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ᠂ ᠣᠷᠣᠰ ᠤᠯᠤᠰ ᠤ᠋ᠨ ᠡᠮᠦᠨᠡ ᠬᠢᠵᠠᠭᠠᠷ ᠤ᠋ᠨ ᠢᠵᠢᠯ ᠭᠣᠣᠯ᠂ ᠲᠣᠢᠨ ᠭᠣᠣᠯ ᠤ᠋ᠨ ᠴᠥᠯᠡᠯᠭᠡᠨ ᠦ᠌ ᠭᠠᠵᠠᠷᠠ ᠮᠣᠷᠳᠠᠭᠤᠯᠵᠤ᠂ ᠤᠯᠤᠰ ᠪᠠ ᠭᠡᠷ᠂ ᠵᠠᠰᠠᠭ ᠬᠢᠭᠡᠳ ᠴᠠᠭᠠᠵᠠᠨ ᠤ᠋ ᠬᠠᠤᠯᠢ ᠳᠦᠷᠢᠮ ᠢ᠋ ᠬᠤᠷᠴᠠ ᠴᠢᠩᠭᠠ ᠪᠣᠯᠭᠠᠭᠲᠤᠨ 》ᠬᠡᠮᠡᠵᠦᠬᠦᠢ᠃
ᠵᠢᠴᠢ ᠣᠳᠣ ᠤᠯᠤᠰ ᠤ᠋ᠨ ᠡᠬᠡ ᠭᠤᠸᠠᠩ ᠰᠢᠶᠠᠨ ᠬᠤᠸᠠᠩᠬᠡᠦ ᠶ᠋ᠢᠨ ᠵᠠᠷᠯᠢᠭ ᠢ᠋ ᠳᠠᠭᠠᠵᠤ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠬᠥᠬᠢᠭᠦᠯᠬᠦ ᠬᠥᠮᠦᠵᠢᠭᠦᠯᠬᠦ ᠵᠠᠰᠠᠭ ᠤ᠋ᠨ ᠬᠡᠷᠡᠭ ᠢ ᠰᠢᠳᠬᠡᠨ ᠳᠠᠭᠤᠰᠤᠭᠠᠳ ᠠᠢᠯᠠᠳᠬᠠᠨ ᠢᠷᠡᠭᠰᠡᠨ ᠨᠤᠭᠤᠯᠪᠤᠷᠢ ᠶ᠋ᠢᠨ ᠰᠡᠭᠦᠯ ᠳ᠋ᠦ᠍ᠷ ᠲᠠᠢᠽᠦ ᠬᠠᠭᠠᠨ ᠴᠢᠩᠭᠢᠰ ᠪᠣᠭᠳᠠ ᠥᠪᠡᠷᠦᠨ ᠮᠣᠳᠣᠷ ᠢ᠋ᠶ᠋ᠠᠷ ᠦᠵᠦᠭ ᠪᠠᠷᠢᠨ ᠰᠠᠢᠰᠢᠶᠠᠨ ᠵᠥᠪᠰᠢᠶᠡᠷᠡᠵᠦ᠂ ᠪᠠᠰᠠ ᠲᠥᠷᠥ ᠳ᠋ᠦ᠍ᠷ ᠪᠠᠢᠬᠤ ᠭᠤᠷᠪᠠᠨ ᠸᠠᠩ᠂ ᠳᠥᠷᠪᠡᠨ ᠥᠲᠡᠭᠦᠰ᠂ ᠲᠠᠪᠤᠨ ᠲᠠᠢᠰᠢ᠂ ᠵᠢᠷᠭᠤᠭᠠᠨ ᠴᠢᠩ ᠳ᠋ᠦ᠍ᠷ ᠬᠠᠪᠰᠤᠷᠭᠠᠨ ᠬᠡᠯᠡᠯᠴᠡᠬᠦ᠂ ᠢᠯᠭᠠᠬᠤ ᠵᠦᠢᠯ ᠢ᠋ ᠲᠣᠳᠣᠷᠬᠠᠢᠯᠠᠨ ᠪᠢᠴᠢᠭᠡᠳ᠂ ᠮᠥᠨ ᠬᠦ᠌ ᠤᠭ ᠢᠷᠡᠭᠰᠡᠨ ᠡᠷᠬᠢᠯᠡᠭᠰᠡᠨ ᠪᠡᠢᠯᠡ ᠪᠥᠭᠡᠳ ᠲᠡᠢᠰᠢ ᠳ᠋ᠠᠢ ᠰᠡᠴᠡᠨ ᠳ᠋ᠦ᠍ᠷ ᠪᠠᠭᠤᠯᠭᠠᠨ ᠡᠭᠦᠷᠦᠭᠦᠯᠵᠦ ᠲᠠᠢᠬᠡᠦ ᠳ᠋ᠦ᠍ᠷ ᠠᠢᠯᠠᠳᠬᠠᠬᠤ ᠪᠢᠴᠢᠭ ᠪᠠ ᠵᠣᠴᠢ ᠲᠠᠢᠽᠢ ᠬᠦᠩ ᠯᠦ᠍ᠬᠡ ᠡᠭᠡᠭᠦᠯᠦᠨ ᠮᠣᠷᠳᠠᠭᠤᠯᠬᠤᠶᠠ ᠲᠠᠰᠢᠷᠠᠮ ᠳ᠋ᠤᠷ ᠪᠠᠰᠠ ᠬᠢᠳᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠡᠵᠡᠨ᠂ ᠠ ᠯᠦᠨ ᠸᠠᠩ ᠤ᠋ᠨ ᠦᠬᠦᠳᠡᠯ ᠶᠠᠰᠤ ᠶ᠋ᠢ ᠠᠷᠤ ᠭᠠᠵᠠᠷ ᠤ᠋ᠨ ᠸᠠᠩ ᠤ᠋ᠨ ᠬᠤᠪᠢᠶᠠᠷᠢ ᠶ᠋ᠢᠨ ᠠᠪᠰᠠ ᠬᠣᠷᠭᠣ ᠳ᠋ᠤᠷ ᠠᠪᠰᠠᠯᠠᠨ ᠬᠤᠷᠢᠶᠠᠯᠭᠠᠵᠤ᠂ ᠮᠥᠨ ᠬᠦ᠌ ᠬᠦᠢᠲᠡᠨ ᠭᠣᠣᠯ ᠤ᠋ᠨ ᠮᠥᠯᠰᠦᠲᠦ ᠵᠡᠪᠡ ᠳ᠋ᠦ᠍ᠷ ᠬᠥᠨᠳᠡᠢ ᠨᠦᠬᠡ ᠡᠷᠦᠭᠦᠯᠦᠨ ᠲᠠᠯᠪᠢᠭᠤᠯᠵᠤ᠂ ᠳᠠᠭᠠᠵᠤ ᠬᠠᠮᠲᠤ ᠦᠬᠦᠭᠰᠡᠨ ᠭᠤᠷᠪᠠᠨ ᠲᠡᠷᠢᠭᠦᠯᠡᠭᠴᠢ ᠵᠠᠩᠵᠤᠨ ᠪᠠ ᠨᠠᠢ᠍ᠮᠠᠨ ᠳᠡᠳ᠋ ᠵᠡᠷᠭᠡᠲᠡᠨ ᠲᠡᠢ ᠠᠷᠪᠠᠨ ᠨᠢᠭᠡᠨ ᠦᠬᠦᠳᠡᠯ ᠶᠠᠰᠤ ᠶ᠋ᠢ ᠮᠥᠨ ᠴᠥᠮ ᠮᠣᠷᠢᠨ ᠤ᠋ ᠲᠦᠭᠦᠬᠡᠢ ᠰᠢᠷᠢ ᠪᠡᠷ ᠰᠢᠷᠢᠯᠡᠭᠦᠯᠦᠨ᠂ ᠮᠥᠨ ᠨᠦᠬᠡ ᠶ᠋ᠢᠨ ᠬᠦᠢᠲᠡᠨ ᠡᠯᠡᠰᠦᠨ ᠢ᠋ᠶ᠋ᠡᠷ ᠭᠦᠨᠡ ᠬᠤᠴᠢᠭᠤᠯᠤᠨ ᠳᠠᠷᠤᠭᠤᠯᠬᠤᠶᠠ᠂ ᠮᠥᠨ ᠬᠦ᠌ ᠬᠢᠳᠠᠨ ᠤ᠋ ᠠᠮᠢᠳᠤ ᠳᠠᠭᠠᠭᠰᠠᠨ ᠵᠤᠣᠯ ᠪᠠᠭᠠᠲᠤᠷ᠂ ᠬᠦᠴᠦᠦᠯ ᠲᠣᠭᠰᠢᠨ ᠬᠡᠮᠡᠬᠦ ᠬᠣᠶᠠᠷ ᠴᠡᠷᠢᠭ ᠦ᠋ᠨ ᠲᠡᠷᠢᠭᠦᠯᠡᠭᠴᠢ ᠵᠠᠩᠵᠤᠨ ᠳ᠋ᠤᠷ ᠠᠨᠤ ᠦᠵᠡᠭᠦᠯᠦᠨ ᠤᠷᠤᠯᠳᠤᠭᠤᠯᠵᠤ ᠲᠡᠭᠦᠰᠬᠡᠯᠭᠡᠨ᠂ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠢᠨᠦᠩ᠂ ᠠᠵᠢᠨᠠᠢ ᠮᠡᠷᠭᠡᠨ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠢ᠋ ᠠᠪᠤᠨ ᠬᠠᠭᠠᠨ ᠤ᠋ ᠬᠡᠰᠢᠭ ᠦ᠋ᠨ ᠴᠠᠢ ᠰᠠᠷᠬᠤᠳ ᠢ᠋ ᠲᠤᠰᠤᠭᠠᠨ ᠰᠠᠴᠤᠵᠤ ᠳᠠᠬᠢᠭᠠᠳ᠂ ᠵᠤᠤᠯ ᠪᠠᠭᠠᠲᠤᠷ ᠲᠤᠷ ᠳᠡᠭᠦᠨᠦ ᠬᠠᠷᠢᠶᠠᠲᠤ ᠴᠡᠷᠢᠭ ᠡᠴᠡ ᠲᠠᠪᠢᠨ ᠮᠣᠷᠢᠲᠠᠨ ᠪᠠ ᠬᠦᠨᠡᠰᠦ ᠥᠭᠴᠦ᠂ ᠬᠢᠳᠠᠨ ᠤᠯᠤᠰ ᠲᠤᠷ ᠠᠨᠤ ᠡᠭᠡᠭᠦᠯᠦᠨ ᠢᠯᠡᠭᠡᠵᠦ ᠂ ᠠ ᠯᠦᠨ ᠸᠠᠩ ᠤ᠋ᠨ ᠬᠥᠪᠡᠭᠦᠳ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠰᠡᠴᠡᠨ ᠮᠡᠷᠭᠡᠨ ᠰᠠᠢᠨ ᠢ᠋ ᠠᠨᠤ ᠰᠣᠩᠭᠣᠵᠤ᠂ ᠴᠢ ᠸᠠᠩ ᠠ ᠯᠦᠨ ᠦ᠌ ᠣᠷᠣ ᠳ᠋ᠤᠷ ᠡᠵᠡᠨ ᠪᠠᠢᠭᠤᠯᠤᠭᠠᠳ ᠠᠪᠤᠨ ᠢᠷᠡᠵᠦ ᠲᠡᠭᠦᠨᠦ ᠡᠴᠢᠭᠡ ᠶ᠋ᠢᠨ ᠶᠠᠰᠤ ᠶ᠋ᠢ ᠠᠪᠠᠴᠢᠭᠤᠯᠵᠤ᠂ ᠭᠠᠰᠠᠯᠠᠩ ᠤ᠋ᠨ ᠬᠡᠷᠡᠭ ᠢ᠋ ᠲᠡᠭᠦᠰᠬᠡᠯᠭᠡᠨ᠂ ᠤᠯᠤᠰ ᠤ᠋ᠨ ᠵᠠᠰᠠᠭ ᠢ ᠲᠡᠭᠰᠢᠳᠬᠡᠨ ᠣᠯᠠᠨ ᠢ᠋ᠶ᠋ᠠᠷ ᠬᠡᠯᠡᠯᠴᠡᠵᠦ᠂ ᠮᠠᠨ ᠤ᠋ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠠᠤᠯᠢ ᠴᠠᠭᠠᠵᠠ ᠶ᠋ᠢ ᠳᠠᠭᠠᠵᠤ᠂ ᠵᠢᠯ ᠦ᠋ᠨ ᠠᠯᠪᠠ ᠪᠠᠨ ᠲᠣᠭᠲᠠᠭᠠᠨ ᠪᠠᠲᠤ ᠨᠤᠲᠠ ᠪᠣᠯᠣᠮᠠᠭᠴᠠ ᠡᠨᠳᠡ ᠪᠠᠷᠢᠭᠳᠠᠭᠰᠠᠨ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠢᠯᠡᠭᠦᠦ ᠵᠠᠩᠵᠤᠨ ᠪᠠᠭᠠᠲᠤᠳ᠂ ᠴᠡᠷᠢᠭ ᠬᠤᠶᠠᠭ᠂ ᠪᠥᠯᠴᠢᠨ ᠬᠥᠲᠥᠴᠢ ᠳ᠋ᠦ᠍ᠷ ᠬᠦᠷᠲᠡᠯᠡ᠂ ᠮᠥᠨ ᠬᠦ᠌ ᠵᠢᠷᠭᠤᠭᠠᠨ ᠵᠢᠰᠢᠶᠠ ᠪᠠᠷ ᠭᠡᠷ ᠨᠤᠲᠤᠭ ᠢ᠋ ᠡᠷᠭᠢᠭᠦᠯᠦᠨ ᠦᠵᠡᠭᠦᠯᠵᠦ ᠤᠳᠠᠭᠠᠨ ᠤᠷᠲᠤ᠂ ᠪᠠᠲᠤ ᠨᠤᠲᠠ ᠪᠣᠯᠭᠠᠨ᠂ ᠳᠠᠷᠠᠭᠠ ᠪᠠᠷ ᠡᠭᠦᠨᠴᠡ ᠪᠠᠲᠤ ᠭᠠᠵᠠᠷ ᠢ᠋ ᠦᠵᠡᠭᠦᠯᠦᠨ ᠴᠢᠳᠠᠪᠠᠰᠤ ᠳᠥᠷᠪᠡᠨ ᠵᠢᠰᠢᠶᠠ ᠪᠣᠯᠭᠠ᠂ ᠡᠭᠦᠨᠴᠡ ᠪᠠᠰᠠ ᠪᠢᠰᠢᠷᠡᠨ ᠳᠠᠭᠠᠭᠰᠠᠨ ᠭᠠᠵᠠᠷ ᠢᠯᠡᠷᠡᠪᠡᠰᠦ ᠬᠣᠶᠠᠷᠬᠠᠨ ᠵᠢᠰᠢᠶᠠ ᠪᠣᠯᠭᠠᠵᠤ᠂ ᠤᠯᠠᠮ ᠬᠣᠢᠨᠠ ᠣᠷᠣ ᠶ᠋ᠢᠨ ᠲᠡᠳᠦᠢ ᠨᠢᠭᠡᠬᠡᠨ ᠵᠢᠰᠢᠶᠠ ᠵᠠᠷᠯᠠᠯ ᠢ᠋ ᠳᠣᠪᠲᠣᠯᠤᠯᠴᠠᠨ ᠶᠠᠪᠤᠬᠤ ᠬᠡᠳᠦᠬᠡᠨ ᠵᠠᠭᠤᠨ ᠬᠥᠮᠦᠨ ᠦ᠌ ᠵᠢᠰᠢᠶᠠ ᠪᠠᠢᠪᠠᠰᠤ ᠳᠠᠷᠤᠢ ᠪᠣᠯᠬᠤ ᠪᠣᠯᠠᠢ ᠬᠡᠮᠡᠭᠰᠡᠨᠡ ᠨᠢᠭᠡᠮᠦᠰᠦᠨ ᠴᠢᠰᠤᠨ ᠭᠣᠣᠯ ᠳ᠋ᠤᠷ ᠴᠠᠴᠠᠵᠤ ᠦᠬᠦᠮᠦᠢ ᠭᠡᠮᠡᠨ ᠰᠢᠭᠤᠳᠴᠤ ᠪᠠᠢᠭᠰᠠᠨ᠂ ᠬᠢᠳᠠᠨ ᠤ᠋ ᠵᠠᠩᠵᠤᠨ ᠴᠡᠷᠢᠭ ᠦ᠋ᠳ ᠢᠨᠤ᠂ ᠴᠠᠬᠢᠯᠭᠠᠨ ᠠᠶᠤᠩᠭᠠ ᠶ᠋ᠢ ᠰᠣᠨᠣᠰᠤᠭᠰᠠᠨ ᠮᠡᠲᠦ ᠰᠣᠴᠢᠨ ᠪᠡᠶᠡᠰᠴᠦ᠂ ᠴᠥᠮ ᠢ᠋ᠶ᠋ᠡᠷ ᠨᠢᠭᠡᠨ ᠳᠠᠭᠤᠨ ᠢ᠋ᠶ᠋ᠠᠷ 《ᠲᠦᠮᠡᠨ ᠨᠠᠰᠤᠲᠤ᠂ ᠲᠥᠭᠡᠯ ᠪᠣᠭᠳᠠ! 》ᠭᠡᠮᠡᠨ ᠳᠠᠭᠤᠳᠠᠯᠴᠠᠨ᠂ ᠭᠠᠵᠠᠷ ᠤᠨᠠᠯᠴᠠᠨ ᠤᠬᠢᠯᠠᠯᠳᠤᠨ ᠮᠥᠷᠭᠦᠯᠬᠢᠯᠡᠨ᠂ ᠵᠤᠣᠯ ᠪᠠᠭᠠᠲᠤᠷ ᠵᠣᠭᠰᠣᠨ ᠲᠣᠭᠲᠠᠬᠤ ᠦᠭᠡᠢ᠂ ᠬᠥᠴᠦᠦᠯ ᠳᠣᠭᠰᠢᠨ ᠬᠥᠯ ᠢ᠋ᠶ᠋ᠡᠷ ᠬᠦᠰᠡᠷᠡ ᠮᠥᠯᠬᠥᠵᠦ᠂ ᠬᠠᠮᠲᠤ ᠴᠤᠭᠭᠠᠷ ᠪᠠᠷᠬᠢᠷᠠᠨ ᠤᠬᠢᠯᠠᠵᠤ ᠮᠥᠷᠭᠦᠯᠬᠢᠯᠡᠨ ᠠᠢᠯᠠᠳᠬᠠᠷᠤᠨ᠄
《ᠮᠠᠨ ᠤ᠋ ᠡᠵᠡᠨ ᠴᠢ ᠸᠠᠩ ᠠ ᠯᠦᠨ ᠦ᠌ ᠠᠪᠠᠯᠢ ᠶ᠋ᠢᠨ ᠬᠠᠲᠤᠨ ᠠᠪᠢᠶᠠ ᠡᠶᠡ ᠡᠴᠡ ᠭᠠᠭᠴᠠ ᠬᠥᠪᠡᠭᠦᠨ᠂ ᠨᠡᠷᠡ ᠨᠣᠮᠣᠬᠠᠨ᠂ ᠡᠨᠡ ᠵᠢᠯ ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ᠂ ᠬᠥᠮᠦᠨ ᠢᠨᠤ ᠭᠣᠣᠯᠴᠢ ᠲᠥᠪ᠂ ᠵᠢᠴᠢ ᠴᠢ ᠸᠠᠩ ᠳ᠋ᠤᠷ ᠪᠠᠰᠠ ᠬᠣᠶᠠᠷ ᠪᠠᠭᠠ ᠡᠮᠡ ᠲᠡᠢ᠂ ᠡᠮᠡ ᠪᠦᠷᠢ ᠡᠴᠡ ᠴᠥᠮ ᠨᠢᠭᠡᠨ ᠬᠥᠪᠡᠭᠦᠨ ᠲᠡᠢ᠂ ᠨᠢᠭᠡᠨ ᠦ᠌ ᠨᠡᠷᠡ ᠭᠠᠢᠬᠤᠯ᠂ ᠨᠢᠭᠡᠨ ᠦ᠌ ᠨᠡᠷᠡ ᠪᠠᠷᠰ᠂ ᠴᠥᠮ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠤᠲᠠᠢ᠂ ᠬᠥᠮᠦᠨ ᠢᠨᠤ ᠠᠯᠢᠶᠠ ᠠᠢᠳᠠᠩᠭᠤᠢ᠂ ᠮᠠᠨ ᠤ᠋ ᠡᠵᠡᠨ ᠥᠲᠡᠯᠦᠭᠰᠡᠨ ᠠᠪᠢᠶᠠ ᠬᠠᠲᠤᠨ ᠳ᠋ᠠᠭᠠᠨ ᠲᠠᠪᠠ ᠦᠭᠡᠢ᠂ ᠬᠣᠶᠠᠷ ᠵᠠᠯᠠᠭᠤ ᠡᠮᠡ ᠳ᠋ᠡᠭᠡᠨ ᠬᠡᠲᠦᠷᠬᠡᠶᠡ ᠠᠮᠠᠷᠠᠭ ᠲᠤᠯᠠ ᠲᠡᠷᠡ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠬᠡᠯᠪᠡᠷᠢᠨ ᠥᠷᠥᠰᠢᠶᠡᠵᠦ ᠸᠠᠩ ᠤ᠋ᠨ ᠰᠠᠭᠤᠷᠢ ᠶ᠋ᠢ ᠨᠢᠭᠡᠨ ᠢ᠋ᠶ᠋ᠡᠷ ᠡᠵᠡᠯᠡᠭᠦᠯᠬᠦ ᠦᠭᠡ ᠰᠠᠨᠠᠭᠠᠨ ᠬᠡᠳᠦᠢᠨ ᠢᠯᠡᠷᠡᠭᠰᠡᠨ ᠪᠥᠯᠥᠭᠡ᠃ ᠡᠳᠦᠭᠡ᠂ ᠪᠣᠭᠣᠯᠴᠤᠳ ᠪᠢᠳᠡ ᠤᠯᠤᠰ ᠲᠤᠷ ᠡᠭᠡᠵᠦ ᠡᠵᠡᠨ ᠪᠠᠢᠭᠤᠯᠬᠤᠢ ᠳ᠋ᠤᠷ ᠡᠨᠡ ᠬᠣᠶᠠᠷ ᠪᠠᠭᠠ ᠬᠠᠲᠤᠭᠲᠠᠢ ᠬᠢᠭᠡᠳ ᠬᠣᠶᠠᠷ ᠪᠠᠭᠠ ᠡᠵᠡᠳ ᠡᠷᠬᠡ ᠦᠭᠡᠢ ᠲᠡᠮᠡᠴᠡᠯᠳᠦᠭᠡᠨ ᠳᠡᠭᠳᠡᠭᠡᠮᠦᠢ᠃ ᠪᠣᠭᠣᠯᠴᠤᠳ ᠪᠢᠳᠡᠨ ᠦ᠌ ᠰᠠᠨᠠᠭᠠᠨ ᠤ᠋ ᠦᠨᠡᠨ ᠢ᠋ᠶ᠋ᠡᠨ ᠴᠢᠳᠬᠤᠨ ᠠᠢᠯᠠᠳᠬᠠᠵᠤ ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ ᠢ᠋ ᠲᠦᠮᠡᠨ ᠵᠡᠷᠭᠡ ᠮᠥᠷᠭᠥᠵᠦ ᠭᠤᠶᠤᠬᠤ ᠠᠨᠤ᠂ ᠪᠣᠭᠳᠠ ᠡᠵᠡᠨ ᠲᠠᠰᠤᠷᠠᠭᠰᠠᠨ ᠢ᠋ ᠵᠠᠯᠭᠠᠵᠤ᠂ ᠮᠥᠬᠥᠭᠰᠡᠳ ᠢ᠋ ᠠᠮᠢᠳᠤᠷᠠᠭᠤᠯᠤᠨ ᠥᠷᠥᠰᠢᠶᠡᠳᠡᠭ ᠦ᠋ᠨ ᠣᠴᠢᠷᠠ᠂ ᠬᠣᠶᠠᠷ ᠪᠠᠭᠠᠲᠤᠷ ᠵᠠᠩᠵᠤᠨ ᠳ᠋ᠤᠷ ᠬᠣᠶᠠᠷ ᠮᠢᠩᠭᠠᠨ ᠲᠡᠭᠷᠢ ᠶ᠋ᠢᠨ ᠴᠡᠷᠢᠭ ᠢ᠋ᠶ᠋ᠡᠨ ᠥᠭᠴᠦ᠂ ᠮᠢᠨᠦ ᠤᠯᠤᠰ ᠤ᠋ᠨ ᠡᠯᠳᠡᠪ ᠰᠠᠮᠠᠭᠤᠨ ᠳᠡᠭᠳᠡᠨ ᠵᠠᠪᠳᠤᠬᠤᠢ ᠶ᠋ᠢᠨ ᠤᠷᠢᠳᠠ᠂ ᠮᠠᠨ ᠤ᠋ ᠪᠠᠭᠠ ᠡᠵᠡᠳ ᠦ᠋ᠨ ᠠᠬᠠᠮᠠᠳ ᠨᠣᠮᠣᠬᠠᠨ ᠢ ᠵᠠᠷᠯᠢᠭ ᠢ᠋ᠶ᠋ᠠᠷ ᠡᠵᠡᠨ ᠪᠠᠢᠭᠤᠯᠵᠤ᠂ ᠣᠯᠠᠨ ᠢ᠋ ᠠᠯᠪᠠᠲᠠᠨ ᠮᠥᠷᠭᠥᠭᠦᠯᠦᠮᠡᠭᠴᠡ ᠬᠣᠶᠠᠷ ᠳᠡᠭᠦᠦ ᠶ᠋ᠢ ᠢᠨᠤ ᠪᠠᠷᠢᠵᠤ ᠠᠪᠴᠢᠷᠠᠭᠠᠳ ᠬᠠᠭᠤᠴᠢᠨ ᠡᠵᠡᠨ ᠦ᠌ ᠴᠢᠨᠳᠠᠷ ᠢ ᠲᠤᠰᠢᠶᠠᠨ ᠰᠢᠳᠬᠡᠭᠦᠯᠵᠦ ᠸᠠᠩ ᠤ᠋ᠨ ᠰᠠᠭᠤᠷᠢᠨ ᠲᠣᠭᠲᠠᠭᠰᠠᠨ ᠬᠣᠢᠨᠠ ᠮᠥᠨ ᠬᠦ᠌ ᠡᠨᠳᠡ ᠡᠴᠡ ᠵᠠᠷᠯᠢᠭ ᠤ᠋ᠨ ᠡᠯᠴᠢ ᠢᠯᠡᠭᠡᠵᠦ᠂ ᠬᠣᠶᠠᠷ ᠳᠡᠭᠦᠦ ᠶ᠋ᠢ ᠢᠨᠦ ᠬᠢᠷᠢ ᠳ᠋ᠦ᠍ᠷ ᠲᠡᠩᠴᠡᠭᠦᠯᠦᠨ᠂ ᠠᠮᠢᠳᠤᠷᠠᠯ ᠬᠥᠷᠥᠩᠭᠡ ᠪᠠ ᠵᠡᠷᠭᠡ ᠰᠠᠭᠤᠷᠢᠨ ᠢ ᠪᠠᠭᠠ ᠰᠠᠭᠠ ᠡᠷᠭᠦᠮᠵᠢᠯᠡᠨ ᠱᠠᠩᠨᠠᠵᠤ᠂ ᠠᠯᠤᠰ ᠬᠣᠯᠠᠬᠠᠨ ᠥᠪᠡᠷᠡ ᠰᠠᠭᠤᠯᠭᠠᠪᠠᠰᠤ᠂ ᠪᠣᠭᠳᠠ ᠲᠡᠭᠷᠢᠯᠢᠭ ᠦ᠋ᠨ ᠬᠡᠰᠢᠭ ᠳᠠᠢᠰᠤᠨ ᠤ᠋ ᠤᠯᠤᠰ ᠲᠤᠷ ᠬᠦᠷᠲᠡᠯᠡ ᠳᠠᠭᠤᠷᠢᠰᠤᠨ ᠪᠢᠯᠬᠠᠵᠤ ᠦᠯᠡᠳᠡᠭᠰᠡᠨ ᠪᠢᠳᠡᠨ ᠦ᠌ ᠬᠢᠳᠠᠨ ᠤᠯᠤᠰ ᠤ᠋ᠨ ᠨᠢᠭᠡᠨ ᠮᠣᠵᠢ ᠦᠶᠡ ᠤᠯᠠᠷᠢᠨ ᠪᠣᠭᠳᠠ ᠶ᠋ᠢᠨ ᠬᠡᠰᠢᠭ ᠢ᠋ ᠰᠢᠳᠦᠨ ᠢᠭᠲᠦᠯᠵᠦ᠂ ᠠᠯᠢᠪᠠ ᠵᠦᠭ ᠦ᠋ᠨ ᠲᠡᠢᠨ ᠳᠠᠢᠰᠤᠨᠠ ᠮᠣᠷᠢᠨ ᠤ᠋ ᠡᠮᠦᠨᠡ ᠵᠡᠪᠰᠡᠭ ᠦ᠋ᠨ ᠦᠵᠦᠭᠦᠷᠡ ᠦᠬᠦᠨ ᠵᠢᠳᠬᠦᠯᠴᠡᠵᠦ᠂ ᠮᠢᠩᠭᠠᠨ ᠦᠶᠡ ᠳ᠋ᠦ᠍ᠷ ᠠᠴᠢ ᠳ᠋ᠤᠷ ᠬᠠᠷᠢᠭᠤᠯᠠᠬᠤ ᠪᠣᠯᠠᠢ᠃ ᠵᠢᠴᠢ ᠮᠢᠨᠦ ᠬᠠᠭᠤᠴᠢᠨ ᠡᠵᠡᠨ᠂ ᠥᠴᠦᠬᠡᠨ ᠡᠳ᠋᠂ ᠵᠠᠯᠠᠭᠤ ᠥᠩᠭᠡ ᠪᠠ ᠴᠢᠦᠢ ᠴᠦ ᠯᠢᠦᠢ ᠶ᠋ᠢᠨ ᠤᠷᠠᠨ ᠦᠭᠡᠰ ᠲᠣᠷ ᠮᠡᠬᠡᠯᠡᠭᠳᠡᠵᠦ᠂ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠳ ᠢ᠋ ᠪᠠᠷᠠᠲᠠᠯᠠ ᠱᠦᠭᠦᠷᠳᠡᠨ ᠠᠪᠴᠤ ᠰᠦᠷ ᠪᠠᠢᠭᠤᠯᠤᠨ᠂ ᠬᠣᠭᠣᠰᠣᠭᠠᠷ ᠲᠠᠯᠠ ᠠᠪᠤᠷᠠ ᠢᠷᠡᠭᠡᠳ ᠡᠨᠡ ᠮᠡᠲᠦ ᠠᠮᠢᠨ ᠪᠤᠰᠠᠨᠢᠵᠤ᠂ ᠠᠯᠢᠪᠠ ᠪᠠᠨ ᠠᠪᠲᠠᠪᠠ᠃ ᠡᠳᠦᠭᠡ ᠡᠵᠡᠨ ᠪᠣᠭᠳᠠ ᠶ᠋ᠢᠨ ᠡᠮᠦᠨᠡ ᠡᠴᠡ ᠨᠢᠭᠡᠬᠡᠨ ᠮᠢᠩᠭᠠᠨ ᠴᠡᠷᠢᠭ ᠡᠴᠢᠪᠡᠴᠦ ᠤᠯᠤᠰ ᠲᠤᠷ ᠨᠢᠭᠡᠨ ᠬᠤᠶᠠᠭ ᠴᠤ᠌ ᠦᠭᠡᠢ ᠲᠤᠯᠠ᠂ ᠪᠢᠴᠢᠬᠠᠨ ᠴᠤ᠌ ᠥᠪᠡᠷᠡ ᠬᠤᠪᠢᠰᠤᠯ ᠲᠦᠭᠰᠢᠯ ᠦᠭᠡᠢ ᠪᠡᠷ ᠬᠡᠷᠡᠭ ᠪᠦᠲᠦᠮᠦᠢ᠃ ᠬᠡᠷᠪᠡᠷ ᠥᠪᠡᠷᠡ ᠬᠤᠳᠠᠯ ᠦᠭᠡ ᠪᠠ ᠮᠡᠬᠡᠯᠡᠬᠦ ᠵᠦᠢᠯ ᠪᠣᠢ ᠭᠡᠮᠡᠨ ᠰᠡᠵᠢᠭᠯᠡᠪᠡᠰᠦ ᠪᠣᠭᠳᠠ ᠡᠵᠡᠨ ᠬᠣᠶᠠᠷ ᠪᠣᠭᠣᠯ ᠢ᠋ ᠬᠣᠷᠢᠭᠤᠯ ᠰᠢᠩᠭᠡᠯᠢᠭ ᠲᠣᠷ ᠰᠢᠭᠠᠵᠤ᠂ ᠡᠴᠢᠬᠦ ᠡᠯᠴᠢ ᠵᠠᠩᠵᠤᠨ ᠰᠠᠢᠳ ᠲᠤᠷ ᠲᠤᠰᠢᠶᠠᠨ ᠥᠭᠴᠦ ᠢᠯᠡᠭᠡᠭᠲᠦᠨ᠃ ᠲᠡᠨᠳᠡ ᠬᠦᠷᠦᠭᠰᠡᠨ ᠬᠣᠢᠨᠠ ᠬᠡᠯᠡᠭᠰᠡᠨ ᠦᠭᠡᠰ ᠡᠴᠡ ᠦᠰᠦᠨ ᠦ᠌ ᠲᠡᠳᠦᠢ ᠵᠥᠷᠢᠴᠡᠮᠡᠭᠴᠡ ᠬᠣᠶᠠᠷ ᠪᠣᠭᠣᠯ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠤᠭᠲᠤᠨ 》ᠬᠡᠮᠡᠪᠡ᠃ ᠡᠨᠡ ᠠᠢᠯᠠᠳᠬᠠᠯ ᠤ᠋ᠨ ᠬᠠᠮᠢᠭᠠᠰᠢ ᠪᠣᠯᠬᠤ ᠶ᠋ᠢ ᠳᠣᠣᠷᠠᠲᠤ ᠪᠦᠯᠦᠭ ᠲᠣᠷ ᠮᠡᠳᠡᠭᠳᠡᠬᠦᠢ᠃