ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠨᠢᠭᠡᠳᠦᠭᠡᠷ ᠪᠦᠯᠦᠭ᠂ᠠᠩᠬᠠᠨ ᠤ ᠠᠶᠠᠯᠠᠯ (ᠭᠤᠷᠪᠠ) Сэрүүхэн тал нутаг – <свис> Вальтер Босгард ( Walter Bosshard)- Нэгдүгээр бүлэг・Анхны аялал (3)
426ᠨᠢᠭᠡᠳᠦᠭᠡᠷ ᠪᠦᠯᠦᠭ ᠂ ᠠᠩᠬᠠᠨ ᠤ ᠠᠶᠠᠯᠠᠯ
ᠭᠤᠷᠪᠠ ᠂ ᠬᠠᠭᠤᠴᠢᠨ ᠮᠠᠶᠢᠭ ᠤ᠋ᠨ ᠠᠷᠠᠯᠵᠢᠶᠠ ᠵᠢᠴᠢ ᠨᠢᠭᠡ ᠰᠢᠨᠡ ᠮᠠᠰᠢᠨ
— ᠶᠣᠰᠣᠲᠠᠢ ᠠᠮᠢᠲᠠᠨ ᠤ᠋ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠵᠤᠭᠠᠯᠠᠬᠤ ᠪᠠᠷ ᠣᠷᠣᠬᠤ ᠰᠢᠭ᠋ ᠯᠡ ᠪᠠᠢᠨᠠ᠃ ᠦᠨᠡ ᠪᠡᠨ ᠲᠥᠯᠥᠭᠡᠳ ᠡᠭᠦᠳᠡ ᠪᠡᠷ ᠨᠢ ᠣᠷᠣᠴᠢᠬᠠᠪᠠᠯ ᠪᠢᠳᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠲᠡᠳᠡᠭᠡᠷ ᠭᠠᠢᠬᠠᠮᠰᠢᠭᠲᠤ ᠬᠥᠮᠦᠰ ᠵᠢᠴᠢ ᠵᠡᠷᠯᠢᠭ ᠠᠮᠢᠲᠠᠨ ᠢ ᠠᠵᠢᠭᠯᠠᠵᠤ ᠪᠠᠢᠬᠤ ᠯᠠ ᠪᠣᠯᠤᠨᠠ ᠭᠡᠵᠦ ᠮᠠᠷᠺᠤᠸᠨ᠋ᠲ ᠢᠨᠢᠶᠡᠨ ᠬᠡᠯᠡᠪᠡ᠃
— ᠪᠢ ᠴᠣᠬᠣᠮ ᠬᠡᠴᠢᠨᠡᠭᠡᠨ ᠤᠳᠠᠭᠠᠨ ᠠᠮᠢᠲᠠᠨ ᠤ᠋ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠬᠦᠷᠴᠦ ᠲᠣᠭᠣᠷᠢᠭᠰᠠᠨ ᠦᠭᠡᠢ ᠪᠡᠨ ᠮᠠᠷᠲᠠᠴᠢᠬᠠᠵᠠᠢ᠃ ᠠᠯᠢ ᠡᠷᠲᠡ ᠯᠣᠨᠳᠣᠨ ᠳ᠋ᠤ᠌ ᠬᠠᠭᠠᠰ ᠰᠢᠯᠯᠢᠩ ᠬᠦᠷᠬᠦ ᠦᠭᠡᠢ ᠦᠨᠡ ᠪᠡᠷ ᠣᠷᠣᠵᠤ ᠪᠠᠢᠭᠰᠠᠨ ᠮᠠᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠢᠨᠠ ᠭᠡᠵᠦ ᠰᠤᠢᠳ᠋ᠧᠷᠪᠤᠮ ᠪᠣᠳᠣᠯᠭᠠᠰᠢᠷᠠᠨ ᠶᠠᠷᠢᠬᠤ ᠳ᠋ᠤ᠌ ᠪᠢ :
— ᠭᠡᠬᠦ ᠳ᠋ᠦ᠍ ᠠᠳᠠ ? ᠡᠨᠡ ᠮᠠᠰᠢᠨ ᠳ᠋ᠤ᠌ ᠪᠢᠳᠡ ᠲᠠᠪᠢᠨ ᠲᠥᠭᠥᠷᠢᠭ ᠦ᠋ᠨ ᠭᠠᠢᠯᠢ ᠲᠤᠰᠢᠶᠠᠭᠠᠳ᠂ ᠪᠠᠰᠠ ᠰᠠᠭᠤᠭᠰᠠᠨ ᠬᠥᠮᠦᠨ ᠪᠣᠯᠭᠠᠨ ᠲᠠᠪᠤᠨ ᠲᠥᠭᠥᠷᠢᠭ ᠨᠡᠮᠡᠵᠦ ᠲᠤᠰᠢᠶᠠᠨᠠ ᠭᠡᠵᠦ ᠳᠤᠷᠠ ᠦᠭᠡᠢᠴᠡᠨ ᠶᠠᠷᠢᠪᠠ᠃
— ᠮᠠᠰᠢᠨ ᠳ᠋ᠤ᠌ ᠲᠠᠪᠢᠨ ᠲᠥᠭᠥᠷᠢᠭ ᠳᠥᠯᠥᠯᠡ ᠭᠡᠨᠡ ? ᠭᠡᠵᠦ ᠬᠠᠰᠬᠢᠷᠤᠭᠰᠠᠨ ᠮᠠᠷᠺᠤᠸᠨ᠋ᠲ 《ᠶᠠᠭᠠᠬᠢᠭᠠᠳ ᠡᠢᠮᠦ ᠦᠨᠡᠲᠡᠢ ᠪᠣᠢ ?》 ᠭᠡᠵᠦ ᠰᠣᠴᠢᠭᠰᠠᠨ ᠪᠠᠢᠳᠠᠯ ᠲᠠᠢ ᠠᠰᠠᠭᠤᠪᠠ᠃
— ᠵᠠᠮ ᠢ᠋ᠶ᠋ᠠᠨ ᠰᠡᠯᠪᠢᠨ ᠬᠠᠮᠠᠭᠠᠯᠠᠬᠤ ᠶ᠋ᠢᠨ ᠯᠡ ᠲᠥᠯᠥᠭᠡ ᠭᠡᠵᠦ ᠰᠤᠢᠳ᠋ᠧᠷᠪᠤᠮ ᠰᠤᠷᠭᠠᠭᠰᠠᠨ ᠣᠪᠣᠷ ᠢ᠋ᠶ᠋ᠠᠷ ᠶᠠᠷᠢᠭᠠᠳ᠂ ᠵᠤᠨ ᠤ᠋ ᠶᠠᠭᠤᠮᠠ ᠪᠠᠨ ᠠᠪᠬᠤ ᠪᠠᠷ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠢᠷᠡᠭᠰᠡᠨ ᠰᠸᠸᠳ᠋ᠸᠡ ᠶ᠋ᠢᠨ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠮᠠᠷᠲ᠋ᠢᠨᠰᠤᠨ ᠨᠥᠬᠥᠷ ᠭᠡᠷᠭᠡᠢ ᠬᠣᠶᠠᠷ ᠤ᠋ᠨ ᠲᠡᠷᠭᠡᠨ ᠳᠡᠭᠡᠷᠡᠬᠢ ᠶ᠋ᠢ ᠵᠠᠢᠴᠢᠯᠠᠵᠤ᠂ ᠪᠢᠳᠡᠨ ᠳ᠋ᠦ᠍ ᠣᠷᠣ ᠭᠠᠷᠭᠠᠵᠤ ᠦᠭᠭᠥᠭᠡᠳ᠄
— ᠵᠠ ᠶᠠᠭᠠᠬᠢᠬᠤ ᠪᠣᠢ ! ᠪᠠᠬᠠᠨ ᠰᠢᠬᠠᠭᠤ ᠯᠠ ᠪᠣᠯᠬᠤ ᠮᠠᠶᠢᠭᠲᠠᠢ ᠪᠠᠢᠨᠠ᠃ ᠤᠴᠢᠷ ᠨᠢ ᠮᠠᠷᠲ᠋ᠢᠨᠰᠤᠨ ᠪᠠᠰᠠ ᠪᠤᠰᠤᠳ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠳ᠋ᠠᠭᠠᠨ ᠬᠡᠷᠡᠭ ᠲᠡᠢ ᠡᠳ᠋ᠯᠡᠯ ᠬᠡᠷᠡᠭᠯᠡᠯ ᠵᠢᠴᠢ ᠢᠳᠡᠵᠦ ᠤᠤᠭᠤᠬᠤ ᠶᠠᠭᠤᠮᠠ ᠶ᠋ᠢ ᠠᠪᠴᠤ ᠶᠠᠪᠤᠬᠤ ᠬᠡᠷᠡᠭᠲᠡᠢ᠃ ᠭᠡᠬᠦ ᠳ᠋ᠦ᠍ ᠡᠨᠡ ᠴᠢᠨᠢ ᠮᠢᠨᠦ ᠲᠠ ᠨᠠᠷ ᠲᠤ᠌ ᠣᠯᠵᠤ ᠳᠡᠢᠯᠬᠦ ᠬᠠᠮᠤᠭ ᠤ᠋ᠨ ᠰᠠᠢᠨ ᠮᠥᠷᠲᠡᠭᠡᠨ ᠬᠠᠮᠤᠭ ᠤ᠋ᠨ ᠬᠢᠮᠳᠠ ᠠᠶᠠᠯᠠᠯ ᠤ᠋ᠨ ᠤᠨᠤᠭᠠ ᠰᠢᠦ ᠳᠡ ᠭᠡᠯᠡ᠃
ᠮᠠᠷᠺᠣᠸᠨ᠋ᠲ ᠰᠠᠨᠠᠬᠠ ᠵᠣᠪᠠᠭᠰᠠᠨ ᠮᠠᠶᠢᠭᠲᠠᠢ ᠡᠨᠡ ᠬᠦ᠌ ᠬᠠᠭᠤᠴᠢᠨ ᠹᠦᠳ᠋ ᠮᠠᠰᠢᠨ ᠢ᠋ ᠠᠵᠢᠭᠯᠠᠭᠰᠠᠨ ᠢ᠋ᠶ᠋ᠠᠨ ᠮᠠᠰᠢᠨ ᠠᠶᠠᠯᠠᠭᠰᠠᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠲᠣᠭᠠ ᠶ᠋ᠢ ᠬᠠᠷᠠᠭᠠᠳ ᠰᠡᠵᠢᠭᠯᠡᠭᠰᠡᠨ ᠠᠶᠠᠰ ᠲᠠᠢ ᠪᠠᠷ᠄
— ᠳᠥᠷᠪᠡᠨ ᠲᠦᠮᠡ ᠬᠣᠶᠠᠷ ᠮᠢᠩᠭᠠᠨ ᠺᠢᠯᠣᠮᠧᠲ᠋ᠷ ᠭᠡᠵᠢ ᠤᠤ ? ᠭᠡᠵᠦ ᠠᠰᠠᠭᠤᠪᠠ᠃
— ᠡᠨᠡ ᠺᠢᠯᠣᠮᠧᠲ᠋ᠷ ᠦ᠋ᠨ ᠲᠣᠭᠠ ᠴᠢᠨᠢ ᠳᠠᠭᠤᠰᠲᠠᠯᠠ ᠪᠠᠨ ᠡᠷᠭᠢᠭᠡᠳ ᠣᠳᠣ ᠬᠣᠶᠠᠳᠠᠬᠢ ᠲᠣᠭᠠᠯᠠᠯᠭᠠ ᠳ᠋ᠠᠭᠠᠨ ᠪᠠᠢᠭᠠ ᠶᠤᠮ᠃ ᠲᠡᠷᠡ ᠴᠢᠨᠢ ᠲᠡᠭᠡᠭᠡᠳ ᠪᠠᠰᠠ ᠬᠡᠳᠦᠨ ᠰᠠᠷᠠ ᠬᠥᠳᠡᠯᠬᠦ ᠪᠡᠨ ᠪᠣᠯᠢᠭᠰᠠᠨ ᠶᠤᠮ ᠰᠢᠦ ᠳᠡ! ᠬᠡᠵᠢᠶᠡ ᠨᠢᠭᠡ ᠴᠠᠭ ᠭᠠᠷᠭᠠᠵᠤ ᠪᠠᠢᠴᠠᠭᠠᠵᠤ ᠦᠵᠡᠶᠡ ᠳᠡ ᠬᠦ ᠂ ᠶᠠᠭᠤ ᠨᠢ ᠳᠤᠲᠠᠭᠰᠠᠨ ᠢ᠋ ᠪᠦᠦ ᠮᠡᠳᠡ᠃ ᠭᠡᠬᠦ ᠳ᠋ᠦ᠍ ᠬᠡᠳᠦᠢ ᠶᠠᠪᠤᠭᠰᠠᠨ ᠭᠡᠳᠡᠭ ᠨᠢ ᠴᠢᠬᠤᠯᠠ ᠪᠢᠰᠢ ᠂ ᠬᠠᠷᠢᠨ ᠮᠣᠲ᠋ᠣᠷ ᠨᠢ ᠠᠵᠢᠯᠯᠠᠬᠤ ᠡᠰᠡᠬᠦ ᠨᠢ ᠯᠡ ᠴᠢᠬᠤᠯᠠ ᠪᠣᠯᠤᠨᠠ ᠭᠡᠵᠦ ᠮᠠᠷᠲ᠋ᠢᠨᠰᠤᠨ ᠲᠠᠢᠯᠪᠤᠷᠢᠯᠠᠯᠠ᠃
— ᠲᠡᠷᠡ ᠴᠦ᠍ ᠲᠡᠢᠮᠦ ! ᠮᠣᠲ᠋ᠣᠷ ᠨᠢ ᠂ ᠲᠡᠭᠡᠭᠡᠳ ᠭᠠᠢᠭᠤᠢ ᠪᠢᠵᠡ ᠳᠡ?
— ᠶᠣᠰᠣᠲᠠᠢ ᠰᠠᠢᠨ! ᠲᠠᠯᠠ ᠭᠠᠵᠠᠷ ᠬᠦᠷᠦᠯᠡ ᠯᠡ ᠭᠡᠪᠡᠯ ᠮᠠᠰᠢᠨ ᠮᠢᠨᠢ ᠲᠠᠤᠯᠠᠢ ᠭᠡᠵᠦ ᠮᠡᠳᠡ ᠭᠡᠵᠦ ᠮᠠᠷᠲ᠋ᠢᠨᠰᠤᠨ ᠢᠨᠢᠶᠡᠮᠰᠦᠭᠯᠡᠨ ᠣᠮᠣᠭᠲᠠᠢ ᠶᠠᠷᠢᠪᠠ᠃
— ᠲᠠᠯᠠ ᠳ᠋ᠤ᠌ ᠬᠦᠷᠬᠦ ᠡᠴᠡ ᠡᠮᠦᠨᠡ ᠨᠢ?
— ᠳᠠᠪᠠᠭᠠ ᠥᠭᠡᠳᠡᠯᠡᠬᠦ ᠦᠶᠡ ᠳ᠋ᠦ᠍ ᠲᠠ ᠨᠠᠷ ᠵᠢᠭᠠᠬᠠᠨ ᠬᠠᠪᠰᠤᠷᠬᠤ ᠬᠡᠷᠡᠭ ᠭᠠᠷᠴᠤ ᠮᠠᠭᠠᠳ ᠦᠭᠡᠢ᠃
— ᠲᠦᠯᠬᠢᠬᠦ ᠤᠤ?
— ᠲᠡᠷᠡ ᠴᠦ᠍ ᠪᠠᠭᠲᠠᠨᠠ᠃ ᠬᠡᠳᠦᠢ ᠬᠤᠷᠳᠤᠨ ᠳᠠᠪᠬᠢᠳᠠᠭ ᠢ᠋ ᠲᠠᠯᠠ ᠳ᠋ᠤ᠌ ᠬᠦᠷᠦᠭᠡᠳ ᠯᠡ ᠲᠠ ᠨᠠᠷ ᠶᠣᠰᠣᠲᠠᠢ ᠭᠠᠢᠬᠠᠬᠤ ᠶᠤᠮ ᠠ᠋ ! ᠭᠡᠳ ᠨᠠᠳᠠ ᠤᠷᠤᠭᠤ ᠬᠠᠨᠳᠤᠵᠤ ᠲᠠ ᠬᠡᠳᠦᠢ ᠠᠴᠢᠶᠠ ᠲᠠᠢ ᠪᠣᠢ? ᠭᠡᠯᠡ᠃
— ᠶᠣᠰᠣᠲᠠᠢ ᠪᠠᠭᠠ᠂ ᠬᠣᠶᠠᠷ ᠴᠦᠩᠬᠦ᠃
— ᠮᠠᠰᠢᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠯᠡ ᠤᠶᠠᠵᠤ ᠲᠣᠭᠲᠠᠭᠠᠨᠠ ᠳᠠ᠂ ᠥᠭᠡᠷᠡ ᠠᠷᠭᠠ ᠠᠯᠠᠭᠠ ᠭᠡᠵᠦ ᠮᠠᠷᠲ᠋ᠢᠨᠰᠤᠨ ᠶᠠᠷᠢᠬᠤ ᠳ᠋ᠤ᠌ ᠮᠠᠷᠺᠦᠸᠨᠲ ᠦ᠋ᠨ ᠴᠢᠷᠠᠢ ᠳ᠋ᠤ᠌ ᠴᠥᠬᠥᠷᠡᠭᠰᠡᠨ ᠪᠠᠢᠳᠠᠯ ᠢᠯᠡᠳᠲᠡ ᠬᠠᠷᠠᠭᠳᠠᠵᠤ᠂ ᠪᠢᠳᠡᠨ ᠦ᠌ ᠠᠶᠠᠯᠠᠯ ᠳ᠋ᠤ᠌ ᠤᠴᠠᠷᠠᠵᠤ ᠮᠡᠳᠡᠬᠦ ᠵᠣᠪᠠᠯᠠᠩ ᠤ᠋ᠨ ᠲᠤᠬᠠᠢ᠂ ᠵᠢᠱ᠌ᠢᠶᠡᠯᠡᠪᠡᠯ ᠪᠣᠢᠳᠠ ᠪᠥᠭᠯᠡᠭᠦᠦ ᠭᠠᠵᠠᠷ ᠮᠠᠰᠢᠨ ᠡᠪᠳᠡᠷᠡᠬᠦ᠂ ᠳᠡᠭᠡᠷᠡᠮᠴᠢᠳ ᠲᠡᠢ ᠤᠴᠠᠷᠠᠬᠤ᠂ ᠡᠳᠦᠷ ᠲᠤᠵᠢ ᠬᠥᠮᠦᠨ ᠦᠭᠡᠢ ᠲᠠᠯᠠ ᠪᠠᠷ ᠶᠠᠪᠠᠭᠠᠨ ᠠᠯᠬᠤᠬᠤ ᠭᠡᠬᠦ ᠮᠡᠲᠦ ᠪᠡᠷ ᠨᠠᠳᠠ ᠳ᠋ᠤ᠌ ᠲᠣᠭᠠᠯᠠᠵᠤ ᠭᠠᠷᠪᠠ᠃ ᠲᠡᠭᠦᠨ ᠦ᠌ ᠪᠣᠳᠣᠯ ᠢ᠋ ᠥᠭᠡᠷᠡ ᠵᠦᠭ ᠲᠦ᠍ ᠬᠥᠲᠥᠯᠬᠦ ᠶ᠋ᠢᠨ ᠲᠤᠰᠠᠳᠠ ᠪᠢ ᠠᠭᠤᠯᠵᠠᠬᠤ ᠭᠡᠵᠦ ᠪᠠᠢᠭᠰᠠᠨ ᠨᠠᠢᠵᠠ ᠤᠷᠤᠭᠤ ᠪᠠᠨ ᠳᠠᠭᠠᠭᠤᠯᠵᠤ ᠶᠠᠪᠤᠯᠠ᠃ ᠰᠤᠢᠳ᠋ᠧᠷᠪᠤᠮ ᠤ᠋ᠨ ᠭᠡᠷ ᠡᠴᠡ ᠬᠣᠯᠠ ᠪᠤᠰᠤ ᠭᠠᠵᠠᠷ ᠲᠤ᠌《WOSTWAG 》 ᠤ᠋ᠨ ᠪᠠᠢᠰᠢᠩ ᠤ᠋ᠳ ᠪᠠᠢᠷᠢᠯᠠᠨᠠ᠃《WOSTWAG 》ᠭᠡᠳᠡᠭ ᠨᠢ ᠪᠠᠷᠠᠭᠤᠨ ᠵᠡᠭᠦᠨ ᠡᠸᠦᠷᠦ᠋ᠫᠡ ᠶ᠋ᠢᠨ ᠪᠠᠷᠠᠭᠠ ᠠᠷᠠᠯᠵᠢᠶᠠᠨ ᠤ᠋ ᠺᠣᠮᠫᠠᠨᠢ ᠭᠡᠳᠡᠭ ᠦ᠋ᠨ ᠣᠬᠤᠷᠴᠢᠯᠠᠭᠰᠠᠨ ᠨᠡᠷᠡᠢᠳᠦᠯ᠃ ᠠᠳᠠ ᠮᠢᠨᠦ ᠬᠠᠭᠤᠴᠢᠨ ᠲᠠᠨᠢᠯ ᠪᠥᠭᠡᠳ ᠠᠳᠠᠬᠢ ᠬᠥᠮᠦᠰ ᠲᠦ᠍ 《ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠶ᠋ᠢᠨ ᠸᠠᠩ 》 ᠭᠡᠮᠡᠨ ᠳᠠᠭᠤᠳᠠᠭᠳᠠᠳᠠᠭ ᠫᠦᠷᠫᠢᠰᠰ ᠰᠠᠭᠤᠳᠠᠭ᠃ ᠲᠡᠷᠡ ᠪᠣᠯ ᠯᠠᠲ᠋ᠠᠸᠢᠶᠠ ᠶ᠋ᠢᠨ ᠬᠥᠮᠦᠨ᠂ ᠠᠵᠢᠯ ᠳ᠋ᠠᠭᠠᠨ ᠴᠣᠭ ᠰᠦᠯᠳᠡ ᠪᠠᠳᠠᠷᠠᠩᠭᠤᠢ᠂ ᠮᠠᠢᠮᠠᠢ ᠶ᠋ᠢᠨ ᠤᠬᠠᠭᠠᠨ ᠳ᠋ᠠᠭᠠᠨ ᠮᠡᠷᠭᠡᠰᠢᠭᠰᠡᠨ ᠪᠥᠭᠡᠳ ᠥᠭᠭᠢᠶᠡᠮᠦᠷᠴᠢ ᠵᠠᠩ ᠲᠠᠢ ᠪᠠᠢᠳᠠᠭ ᠣᠷᠣᠰ ᠤ᠋ᠨ ᠨᠢᠭᠡᠨ ᠬᠡᠷᠭᠡᠮᠲᠡᠨ ᠶᠦᠮ᠃ ᠲᠡᠭᠦᠨ ᠦ᠌ ᠺᠣᠮᠫᠠᠨᠢ ᠨᠢ ᠠᠷᠤ ᠮᠣᠩᠭᠣᠯ ᠤ᠋ᠨ ᠠᠷᠠᠯᠵᠢᠶᠠ ᠶ᠋ᠢ ᠭᠠᠭᠴᠠᠭᠠᠷ ᠡᠵᠡᠮᠰᠢᠳᠡᠭ᠃ ᠬᠥᠮᠦᠰ ᠬᠡᠷᠡᠮ ᠳᠠᠭᠠᠤ ᠲᠣᠭᠣᠰᠣ ᠲᠠᠢ ᠵᠡᠭᠡᠯᠢ ᠪᠡᠷ ᠢᠨᠠᠭᠰᠢ ᠴᠢᠨᠠᠭᠰᠢ ᠶᠠᠪᠤᠬᠤ ᠪᠤᠶᠤ ᠮᠣᠳᠣᠨ ᠬᠠᠭᠠᠯᠭᠠ ᠶ᠋ᠢᠨ ᠡᠮᠦᠨᠡ ᠵᠣᠭᠰᠣᠬᠤ ᠳ᠋ᠠᠭᠠᠨ ᠡᠨᠡ ᠬᠦ᠌ ᠬᠡᠷᠡᠮ ᠦ᠋ᠨ ᠴᠠᠭᠠᠨᠠ ᠬᠡᠳᠦᠢ ᠠᠷᠪᠢᠨ ᠡᠳ᠋ ᠡᠷᠳᠡᠨᠢᠰ ᠣᠪᠣᠭᠠᠯᠠᠵᠤ ᠪᠠᠢᠬᠤ ᠶ᠋ᠢ ᠬᠡᠷᠬᠢᠨ ᠣᠢᠯᠠᠭᠠᠬᠤ ᠪᠢᠯᠡ !
ᠫᠦᠷᠫᠢᠰᠰ ᠥᠪᠡᠷ ᠦ᠋ᠨ ᠪᠠᠭᠠᠬᠠᠨ ᠠᠯᠪᠠᠨ ᠭᠡᠷ ᠲᠡᠭᠡᠨ ᠵᠠᠬᠢᠳᠠᠯ ᠤ᠋ᠨ ᠣᠪᠣᠭᠠ᠂ ᠦᠯᠢᠭᠡᠷ ᠬᠡᠪ ᠪᠣᠯᠤᠨ ᠣᠯᠠᠨ ᠵᠠᠭᠪᠤᠷ ᠤ᠋ᠨ ᠳᠤᠮᠳᠠ ᠰᠠᠭᠤᠵᠤ ᠪᠠᠢᠯᠠ᠃ ᠬᠡᠷᠡᠮ ᠳᠡᠭᠡᠷᠡ ᠪᠡᠨ ᠬᠢᠲᠠᠳ ᠠᠷᠠᠯᠵᠢᠶᠠᠴᠢᠳ ᠤ᠋ᠨ ᠬᠦᠷᠭᠡᠭᠰᠡᠨ ᠬᠡᠳᠦᠨ ᠬᠠᠳᠬᠤᠮᠠᠯ ᠲᠠᠢ ᠬᠡᠮᠡᠷᠯᠢᠭ ᠲᠤᠭ ᠡᠯᠭᠦᠵᠡᠢ᠃
ᠠᠩᠬᠠ ᠡᠬᠢᠯᠡᠬᠦ ᠳ᠋ᠡᠭᠡᠨ ᠳᠡᠯᠭᠡᠭᠦᠷ ᠨᠢ ᠶᠠᠭ ᠯᠠ ᠬᠠᠭᠤᠴᠢᠨ ᠡᠳ᠋ᠯᠡᠯ ᠦ᠋ᠨ ᠳᠡᠯᠭᠡᠭᠦᠷ ᠰᠢᠭ ᠬᠠᠷᠠᠭᠳᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠤᠳᠠᠯ ᠦᠭᠡᠢ ᠪᠠᠷᠠᠭᠠᠨ ᠤ᠋ ᠭᠡᠷ ᠦ᠋ᠳ ᠦ᠋ᠨ ᠨᠡᠭᠡᠭᠡᠭᠳᠡᠬᠦ ᠶ᠋ᠢ ᠳᠠᠭᠠᠯᠳᠤᠨ ᠲᠡᠷᠡ ᠣᠯᠠᠨ ᠡᠳ᠋ ᠡᠷᠳᠡᠨᠢᠰ ᠨᠢᠳᠦᠨ ᠡᠮᠦᠨᠡ ᠢᠷᠠᠢᠨ ᠬᠠᠷᠠᠭᠳᠠᠯᠠ᠃ ᠮᠢᠩᠭᠠ ᠪᠠᠷ ᠲᠣᠭᠠᠯᠠᠭᠳᠠᠬᠤ ᠪᠤᠯᠠᠭᠠᠨ ᠤ᠋ ᠠᠷᠠᠰᠤ ᠪᠣᠯᠤᠨ ᠦᠨᠡᠭᠡᠨ ᠦ᠌ ᠠᠷᠠᠰᠤ ᠶ᠋ᠢ ᠣᠪᠣᠭᠠᠯᠠᠵᠠᠢ᠃ ᠭᠤᠷᠪᠠᠨ ᠠᠵᠢᠯᠲᠠᠨ ᠶᠠᠭ ᠭᠣᠶᠣ ᠰᠠᠢᠬᠠᠨ ᠰᠡᠭᠦᠯ ᠲᠡᠢ ᠴᠠᠭᠠᠨ ᠢᠷᠪᠢᠰ ᠦ᠋ᠨ ᠠᠷᠠᠰᠤ ᠶ᠋ᠢ ᠶᠡᠬᠡ ᠪᠠᠭᠠ᠂ ᠥᠩᠭᠡ ᠴᠢᠨᠠᠷ ᠢ᠋ᠶ᠋ᠠᠷ ᠨᠢ ᠪᠣᠯᠪᠠᠰᠤᠷᠠᠩᠭᠤᠢ ᠰᠢᠯᠢᠵᠦ ᠰᠢᠳᠡᠯᠡᠨᠡ᠃ ᠡᠨᠡᠬᠡᠨ ᠬᠣᠷᠣᠮ ᠳ᠋ᠤ᠌ ᠲᠡᠳᠡ ᠶᠠᠭ ᠯᠠ ᠡᠳᠡᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠨᠢᠭᠡ ᠬᠡᠰᠡᠭ ᠠᠷᠠᠰᠤ ᠨᠢ ᠲᠡᠳᠡᠨ ᠦ᠌ ᠰᠠᠷᠠ ᠶ᠋ᠢᠨ ᠣᠯᠬᠤ ᠮᠥᠩᠭᠥᠨ ᠡᠴᠡ ᠬᠣᠯᠠ ᠢᠯᠡᠭᠦᠦ ᠭᠡᠳᠡᠭ ᠢ᠋ᠶ᠋ᠡᠨ ᠮᠠᠷᠲᠠᠭᠰᠠᠨ ᠮᠡᠲᠦ᠃
ᠫᠦᠷᠫᠢᠰᠰ ᠪᠢᠳᠡᠨ ᠢ᠋ ᠦᠷᠭᠦᠯᠵᠢᠯᠡᠨ ᠳᠠᠭᠠᠭᠤᠯᠤᠭᠰᠠᠭᠠᠷ ᠡᠮ ᠦ᠋ᠨ ᠮᠠᠲᠧᠷᠢᠶᠠᠯ ᠤ᠋ᠨ ᠥᠷᠥᠬᠡᠨᠡ ᠣᠷᠣᠯᠠ᠃ ᠲᠡᠨᠳᠡ ᠪᠤᠭᠤ ᠶ᠋ᠢᠨ ᠡᠪᠡᠷ ᠢ ᠪᠠᠭᠯᠠᠨ ᠬᠤᠷᠢᠶᠠᠵᠠᠢ᠃ ᠬᠠᠢᠷᠴᠠᠭ ᠪᠣᠯᠭᠠᠨ ᠳ᠋ᠤ᠌ ᠠᠷᠪᠠ ᠪᠤᠶᠤ ᠠᠷᠪᠠᠨ ᠬᠣᠶᠠᠷ ᠢ᠋ᠶ᠋ᠠᠷ ᠰᠠᠪᠠᠯᠠᠨ᠂ ᠴᠢᠨᠠᠷᠯᠢᠭ ᠬᠠᠲᠠᠭᠠᠬᠤ ᠶ᠋ᠢᠨ ᠲᠤᠰᠠᠳᠠ ᠬᠠᠪᠤᠷ ᠤ᠋ᠨ ᠮᠣᠳᠣᠨ ᠤ᠋ ᠬᠥᠬᠡ ᠬᠦᠷᠡᠪᠲᠦᠷ ᠬᠠᠯᠢᠰᠤ ᠪᠠᠷ ᠬᠤᠴᠢᠵᠤ ᠥᠷᠥᠵᠡᠢ᠃
— ᠵᠠᠬᠢᠶᠠᠯᠠᠭᠠ ᠶᠡᠷᠦ ᠡᠴᠡ ᠪᠠᠭᠤᠷᠠᠬᠤ ᠦᠭᠡᠢ ᠶᠦᠮ ᠠ᠋ ! ᠬᠢᠮᠢ ᠶ᠋ᠢᠨ ᠦᠢᠯᠡᠳᠪᠦᠷᠢ ᠨᠦ᠍ᠭᠥᠳ ᠲᠡᠭᠦᠨ ᠢ᠋ ᠡᠮ ᠳ᠋ᠡᠭᠡᠨ ᠬᠡᠷᠡᠭᠯᠡᠬᠦ᠂ ᠬᠢᠲᠠᠳ ᠤ᠋ᠳ ᠪᠠᠰᠠ ᠤᠯᠠᠮᠵᠢᠯᠠᠯᠲᠤ ᠡᠮᠨᠡᠯᠭᠡ ᠳ᠋ᠡᠭᠡᠨ ᠬᠡᠷᠡᠭᠯᠡᠬᠦ ᠲᠤᠯᠠ ᠬᠠᠭᠠᠰ ᠲᠢᠪ ᠦ᠋ᠨ ᠴᠠᠭᠠᠨᠠᠬᠢ ᠬᠣᠯᠠ ᠠ᠋ᠴᠠ ᠵᠥᠭᠡᠭᠡᠪᠦᠷᠢᠯᠡᠨ ᠢᠷᠡᠬᠦ ᠦᠨᠡᠲᠡᠢ ᠵᠠᠷᠤᠳᠠᠯ ᠢ᠋ ᠭᠠᠷᠭᠠᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠯᠡ ᠪᠠᠢᠭᠠ ᠭᠡᠵᠦ ᠲᠡᠷᠡ ᠲᠠᠢᠯᠪᠤᠷᠢᠯᠠᠪᠠ᠃
ᠬᠦᠷᠢᠶᠡᠨ ᠦ᠌ ᠳᠤᠮᠳᠠ ᠮᠣᠳᠣᠨ ᠬᠠᠢᠷᠴᠠᠭ ᠤ᠋ᠳ ᠢ᠋ ᠬᠠᠳᠠᠨ ᠪᠢᠲᠡᠭᠦᠮᠵᠢᠯᠡᠵᠦ᠂ ᠳᠠᠬᠢᠨ ᠳᠡᠭᠡᠰᠦ ᠪᠡᠷ ᠪᠣᠭᠣᠵᠤ ᠪᠠᠢᠪᠠ᠃ ᠬᠠᠢᠷᠴᠠᠭ ᠤ᠋ᠨ ᠤᠷᠲᠤ ᠲᠠᠯᠠ ᠳ᠋ᠤᠨᠢ ᠬᠠᠷᠠ ᠪᠡᠬᠡ ᠪᠡᠷ ᠬᠦᠷᠬᠦ ᠭᠠᠵᠠᠷ ᠤ᠋ᠨ ᠨᠡᠷᠡ ᠶ᠋ᠢ ᠤᠯᠠᠭᠠᠨᠪᠠᠭᠠᠲᠤᠷ ᠭᠡᠵᠦ ᠪᠢᠴᠢᠭᠰᠡᠨ ᠪᠠᠢᠯᠠ ( ᠵᠢᠷᠤᠭ 8) ᠃ ᠡᠨᠡ ᠨᠢ ᠤᠤᠯ ᠤ᠋ᠨ ᠶᠡᠬᠡ ᠬᠦᠷᠢᠶᠡ ᠠᠵᠢ᠃ 《ᠴᠤᠸᠠᠨ 》 ᠦᠰᠦᠭᠲᠡᠢ᠂ ᠦᠬᠡᠷ ᠦ᠋ᠨ ᠴᠢᠰᠤ ᠪᠠ ᠴᠠᠢ ᠶ᠋ᠢᠨ ᠨᠠᠪᠴᠢ ᠪᠠᠷ ᠨᠡᠢᠯᠡᠭᠦᠯᠵᠦ ᠬᠢᠭᠰᠡᠨ ᠲᠣᠭᠣᠰᠬᠠ ᠮᠡᠲᠦ ᠳᠥᠷᠪᠡᠯᠵᠢᠨ ᠴᠠᠢ ᠤᠪᠣᠭᠠᠯᠳᠠᠲᠠᠢ᠃ ᠤᠳᠠᠯ ᠦᠭᠡᠢ ᠲᠡᠷᠡ ᠨᠢ ᠪᠦᠬᠦ ᠠᠽᠢᠶᠠ ᠶ᠋ᠢ ᠭᠡᠲᠦᠯᠦᠨ ᠣᠷᠣᠰ ᠪᠤᠶᠤ ᠲᠥᠪᠡᠳ ᠬᠦᠷᠴᠦ ᠮᠥᠩᠭᠥ ᠪᠡᠷ ᠰᠣᠯᠢᠭᠳᠠᠬᠤ ᠪᠣᠯᠤᠨᠠ ᠃ ᠨᠢᠭᠡ ᠠᠵᠢᠯᠴᠢᠨ ᠳᠦᠭᠦᠷᠡᠩ ᠮᠣᠩᠭᠣᠯ ᠭᠤᠲᠤᠯ ᠲᠠᠢ ᠲᠡᠷᠭᠡ ᠵᠢᠳᠬᠦᠭᠰᠡᠭᠡᠷ ᠭᠠᠷᠴᠤ ᠢᠷᠡᠯᠡ᠃
— ᠡᠨᠡ ᠪᠣᠯ ᠪᠢᠳᠡᠨ ᠦ᠌ ᠮᠣᠩᠭᠣᠯ ᠳ᠋ᠠᠬᠢ ᠬᠠᠮᠤᠭ ᠤ᠋ᠨ ᠰᠠᠢᠨ ᠭᠠᠷᠳᠠᠭ ᠪᠠᠷᠠᠭᠠ ᠰᠢᠦ ! ᠭᠡᠳ ᠫᠦᠷᠫᠢᠰᠰ ᠬᠡᠳᠦᠨ ᠬᠣᠣᠰ ᠭᠤᠲᠤᠯ ᠢ ᠲᠡᠷᠭᠡᠨ ᠡᠴᠡ ᠠᠪᠤᠯᠠ᠃ ᠡᠳᠡᠭᠡᠷ ᠭᠤᠲᠤᠯ ᠨᠢ ᠬᠠᠷᠠ ᠥᠩᠭᠡ ᠶ᠋ᠢᠨ ᠠᠷᠠᠰᠤ ᠪᠠᠷ ᠡᠩ ᠦ᠋ᠨ ᠮᠠᠶᠢᠭᠲᠠᠢ ᠬᠢᠵᠦ᠂ ᠤᠯᠠᠭᠠᠨ ᠨᠣᠭᠣᠭᠠᠨ ᠴᠠᠭᠠᠨ ᠰᠢᠷᠠ ᠥᠩᠭᠡ ᠪᠡᠷ ᠬᠠᠪᠴᠢᠶᠠᠷᠢᠯᠠᠵᠤ ᠡᠮᠵᠢᠵᠡᠢ᠃ ᠭᠤᠲᠤᠯ ᠤ᠋ᠨ ᠬᠣᠩᠰᠢᠶᠠᠷ ᠨᠢ ᠪᠦᠷ ᠡᠷᠲᠡᠭᠡᠷ ᠪᠠᠢᠵᠤ ᠂ ᠡᠨᠡ ᠨᠢ ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠠᠷᠠᠳ ᠣᠯᠠᠨ ᠤ᠋ ᠤᠨᠣᠬᠠ ᠤᠨᠤᠬᠤ ᠳ᠋ᠤ᠌ ᠵᠣᠬᠢᠴᠠᠭᠤᠯᠤᠭᠰᠠᠨ ᠠᠵᠢ᠃
《wostwAG ᠪᠠᠷᠤᠭ ᠯᠠ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠮᠠᠢᠮᠠᠢᠯᠠᠳᠠᠭ ᠪᠠᠢᠵᠠᠢ᠃ ᠬᠡᠪ ᠦ᠋ᠨ ᠴᠠᠢ᠂ ᠠᠷᠠᠰᠤ᠂ ᠲᠣᠷᠭᠠ ᠳᠤᠷᠳᠤᠩ᠂ ᠱᠠᠬᠠᠢ ᠭᠤᠲᠤᠯ᠂ ᠡᠮ ᠲᠣᠮ᠂ ᠤᠨᠣᠬᠠ ᠮᠠᠰᠢᠨ᠂ ᠴᠠᠢᠷ ᠤ᠋ᠨ ᠰᠠᠪᠠ ᠰᠠᠭᠤᠯᠠᠭᠠ᠂ ᠮᠣᠩᠭᠣᠯ ᠡᠮᠡᠭᠡᠯ ᠂ ᠮᠠᠢᠬᠠᠨ ᠭᠡᠷ ᠂ ᠳ᠋ᠧᠩ ᠂ ᠭᠠᠷ ᠴᠢᠳᠧᠩ ᠪᠣᠯᠤᠨ ᠡᠸᠦᠷᠦ᠋ᠫᠡ ᠠᠽᠢᠶᠠ ᠳ᠋ᠤ᠌ ᠳᠡᠯᠭᠡᠷᠡᠭᠰᠡᠨ ᠬᠢᠮᠳᠠ ᠦᠨᠡ ᠶ᠋ᠢᠨ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠦ᠋ᠳ ᠪᠣᠯᠤᠨᠠ᠃
— ᠢᠩᠭᠢᠵᠦ ᠯᠡ ᠪᠢ ᠴᠢᠮᠠ ᠳ᠋ᠤ᠌ ᠵᠡᠭᠦᠨ ᠡᠨᠡᠳᠬᠡᠭ ᠦ᠋ᠨ ᠬᠠᠭᠤᠴᠢᠨ ᠺᠣᠮᠫᠠᠨᠢ ᠶ᠋ᠢᠨ ᠨᠢᠭᠡ ᠳᠡᠯᠭᠡᠭᠦᠷ ᠢ᠋ ᠲᠠᠨᠢᠯᠴᠠᠭᠤᠯᠵᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠨᠠᠮᠠ ᠶ᠋ᠢ ᠮᠠᠷᠺᠦᠸᠨ᠋ᠲ ᠵᠦᠭ ᠵᠢᠭᠠᠬᠤ ᠳ᠋ᠤ᠌ ᠲᠡᠷᠡ
— ᠪᠦᠷ ᠪᠢᠰᠢ ᠰᠢᠦ ᠳᠡ! ᠲᠠ ᠲᠡᠷᠡ ᠪᠥᠬᠥᠭᠡᠭ ᠲᠦ᠍ ᠵᠣᠭᠰᠣᠬᠤ ᠪᠠᠢᠬᠤ ᠮᠠᠰᠢᠨ ᠢ᠋ ᠬᠠᠷᠠᠵᠤ ᠪᠠᠢᠨᠠ ᠤᠤ ? ᠭᠡᠯᠡ᠃ ᠨᠡᠯᠢᠶᠡᠳ ᠵᠠᠢᠲᠠᠢ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠫᠦᠷᠫᠢᠰᠰ ᠪᠢᠳᠡᠨ ᠦ᠌ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠶᠠᠷᠢᠶᠠ ᠶ᠋ᠢ ᠣᠯᠵᠤ ᠰᠣᠨᠣᠰᠤᠭᠠᠳ :
— ᠵᠠ ᠳᠠ᠂ ᠲᠠ ᠲᠡᠷᠡ ᠮᠠᠰᠢᠨ ᠢ ᠬᠡᠳᠦᠢ ᠤᠳᠠᠭᠠᠨ ᠬᠡᠷᠡᠭᠯᠡᠭᠰᠡᠨ ᠴᠦ᠍ ᠪᠣᠯᠤᠨᠠ ᠭᠡᠯᠡ᠃
ᠮᠠᠷᠺᠦᠸᠨ᠋ᠲ ᠨᠠᠳᠠ ᠤᠷᠤᠭᠤ ᠬᠦᠰᠡᠯ ᠳᠦᠭᠦᠷᠦᠭᠰᠡᠨ ᠬᠠᠷᠠᠴᠠ ᠪᠠᠷ ᠬᠠᠷᠠᠵᠤ ᠠᠪᠤᠯᠠ᠃ ᠡᠢᠮᠦ ᠰᠠᠢᠬᠠᠨ ᠶᠠᠪᠤᠳᠠᠯ ᠭᠡᠵᠦ ᠬᠠᠮᠢᠭᠠ ᠪᠠᠢᠬᠤ ᠪᠣᠢ ! ᠭᠡᠬᠦ ᠳ᠋ᠦ᠍ ᠦᠨᠡ ᠬᠠᠩᠰᠢ ᠶ᠋ᠢ ᠨᠢ ᠲᠥᠯᠥᠵᠦ ᠳᠡᠢᠯᠬᠦ ᠦᠭᠡᠢ ᠯᠡ ᠪᠠᠢᠬᠠ᠃ ᠪᠢ ᠳᠣᠣᠷᠠ ᠪᠠᠨ ᠦᠨᠡ ᠶ᠋ᠢ ᠨᠢ ᠠᠰᠠᠭᠤᠪᠠ᠃
— ᠡᠢᠮᠦ ᠶᠠᠭᠤᠮᠠ ᠪᠤᠤ ᠶᠠᠷᠢᠭᠠᠳ ᠪᠠᠢ ᠭᠡᠵᠦ ᠫᠦᠷᠫᠢᠰᠰ ᠭᠣᠮᠣᠳᠠᠬᠤ ᠶ᠋ᠢᠨ ᠨᠠᠭᠠᠭᠤᠷ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠵᠠᠯᠭᠠᠭᠠᠳ ᠡᠨᠡ ᠮᠠᠰᠢᠨ ᠮᠠᠷᠭᠠᠰᠢ ᠥᠷᠯᠥᠭᠡ ᠲᠠᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠪᠠᠢᠬᠤ ᠪᠣᠯᠤᠨᠠ᠂ ᠪᠢ ᠲᠠᠨ ᠳ᠋ᠤ᠌ ᠰᠢᠯᠣᠹ ᠭᠡᠳᠡᠭ ᠬᠠᠮᠤᠭ ᠤ᠋ᠨ ᠰᠠᠢᠨ ᠵᠢᠯᠣᠭᠣᠴᠢ ᠪᠠᠨ ᠶᠠᠪᠤᠭᠤᠯᠤᠶᠠ᠃ ᠲᠡᠷᠡ ᠮᠠᠨᠢ ᠠᠷᠪᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠮᠣᠩᠭᠣᠯ ᠣᠷᠣᠨ ᠢ᠋ᠶ᠋ᠠᠷ ᠨᠠᠭᠠᠰᠢ ᠴᠠᠭᠠᠰᠢ ᠳᠣᠪᠲᠣᠯᠭᠠᠭᠰᠠᠭᠠᠷ ᠢᠷᠡᠭᠰᠡᠨ ᠶᠦᠮ᠃ ᠲᠠᠯᠠ ᠨᠤᠲᠤᠭ ᠤ᠋ᠨ ᠪᠠᠢᠳᠠᠭ ᠵᠠᠮ ᠱᠤᠭᠤᠮ᠂ ᠳᠡᠭᠡᠷᠡᠮ ᠦ᠋ᠨ ᠲᠦᠷᠦᠭᠦᠴᠦᠳ᠂ ᠲᠣᠰᠣ ᠨᠡᠮᠡᠬᠦ ᠭᠠᠵᠠᠷ᠂ ᠢᠵᠠᠭᠤᠷᠲᠠᠳ ᠸᠠᠩ ᠬᠦᠩ ᠨᠠᠷ ᠢ ᠲᠠᠨᠢᠳᠠᠭ ᠪᠥᠭᠡᠳ ᠪᠠᠨᠴᠢᠨ ᠪᠣᠭᠳᠠ ᠶ᠋ᠢᠨ ᠮᠣᠩᠭᠣᠯ ᠳ᠋ᠤ᠌ ᠠᠢᠯᠴᠢᠯᠠᠬᠤ ᠠᠶᠠᠯᠠᠯ ᠳ᠋ᠤ᠌ ᠮᠠᠰᠢᠨ ᠢ ᠨᠢ ᠪᠠᠷᠢᠵᠤ ᠥᠭᠭᠦᠭᠰᠡᠨ ᠰᠢᠦ ᠳᠡ ! ᠭᠡᠯᠡ᠃
ᠭᠢᠯᠲᠦᠭᠡᠨᠡᠭᠰᠡᠨ ᠰᠠᠢᠬᠠᠨ ᠮᠠᠰᠢᠨ ᠡᠮᠦᠨᠡ ᠮᠢᠨᠢ ᠵᠣᠭᠰᠣᠵᠤ᠂ ᠳᠤᠷᠠ ᠶ᠋ᠢ ᠮᠢᠨᠢ ᠠᠷᠭᠠ ᠦᠭᠡᠢ ᠲᠠᠲᠠᠬᠤ ᠳ᠋ᠤ᠌ ᠡᠢᠮᠦ ᠭᠣᠶᠣ ᠰᠠᠨᠠᠭᠤᠯᠭᠠ ᠶ᠋ᠢ ᠡᠰᠡᠷᠭᠦᠴᠡᠬᠦ ᠵᠣᠷᠢᠭ ᠨᠠᠳᠠ ᠥᠴᠦᠬᠡᠨ ᠴᠦ᠍ ᠠᠯᠠᠭᠠ᠃
— ᠵᠠ᠂ ᠣᠳᠣ ᠪᠢ ᠶᠠᠭᠠᠬᠢᠵᠤ ᠡᠨᠡ ᠬᠦ᠌ ᠠᠶᠠᠯᠠᠯ ᠤ᠋ᠨ ᠬᠤᠪᠢᠷᠠᠯᠲᠠ ᠪᠠᠨ ᠰᠠᠢᠨ ᠰᠠᠨᠠᠭᠠ ᠲᠠᠢ ᠱᠠᠰᠢᠨ ᠳᠡᠯᠭᠡᠷᠡᠭᠦᠯᠦᠭᠴᠢ ᠰᠦᠢᠳ᠋ᠸᠷᠪᠤᠮ ᠳ᠋ᠤ᠌ ᠶᠠᠷᠢᠳᠠᠭ ᠪᠢᠯᠡ? ᠪᠠᠰᠠ ᠮᠠᠷᠲ᠋ᠢᠨᠰᠤᠨ ᠳ᠋ᠤ᠌ ᠥᠭᠭᠦᠨᠡ ᠭᠡᠵᠦ ᠠᠮᠠᠯᠠᠭᠰᠠᠨ ᠪᠸᠨᠽᠢᠨ ᠦ᠌ ᠮᠥᠩᠭᠥ ᠪᠡᠨ ᠶᠠᠭᠠᠬᠢᠳᠠᠭ ᠪᠢᠯᠡ? ᠭᠡᠵᠦ ᠪᠢ ᠪᠤᠴᠠᠭᠠᠨ ᠠᠰᠠᠭᠤᠪᠠ᠃
ᠫᠦᠷᠫᠢᠰᠰ ᠦ᠋ᠨ ᠥᠪᠡᠷ ᠦ᠋ᠨ ᠠᠵᠢᠯᠲᠠᠳ ᠲᠠᠭᠠᠨ ᠵᠣᠷᠢᠭᠤᠯᠤᠭᠰᠠᠨ 《ᠬᠠᠭᠠᠯᠭᠠ — ᠺᠯᠦ᠋ᠪ 》 ᠲᠦ᠍ ᠪᠢ ᠲᠦᠷᠭᠡᠬᠡᠨ ᠬᠡᠳᠦᠨ ᠮᠥᠷ ᠵᠠᠬᠢᠶᠠ ᠪᠢᠴᠢᠭᠡᠳ ᠰᠦᠢᠳ᠋ᠸᠷᠪᠤᠮ ᠳ᠋ᠤ᠌ ᠢᠯᠡᠭᠡᠪᠡ᠃
— ᠵᠠᠬᠢᠳᠠᠯ ᠭᠡᠳᠡᠭ ᠨᠢ ᠶᠡᠬᠡ ᠠᠮᠠᠷᠬᠠᠨ ᠶᠤᠮ ᠰᠢᠦ ᠂ ᠪᠢᠳᠡᠨ ᠦ᠌ ᠠᠩᠬᠠᠨ ᠤ᠋ ᠭᠠᠢᠬᠠᠮᠰᠢᠭᠲᠤ ᠤᠴᠠᠷᠠᠯ ᠢᠩᠭᠢᠵᠦ ᠰᠠᠢᠬᠠᠨ ᠰᠢᠢᠳᠪᠦᠷᠢᠯᠡᠭᠳᠡᠪᠡ᠃ ᠣᠷᠣᠢ ᠪᠢᠳᠡᠨ ᠢ ᠪᠤᠴᠠᠬᠤ ᠳ᠋ᠤ᠌ ᠵᠥᠪᠬᠡᠨ ᠨᠢᠭᠡᠨᠲᠡ ᠪᠡᠶᠡᠯᠡᠭᠳᠡᠭᠰᠡᠨ ᠬᠡᠷᠡᠭ ᠤᠴᠢᠷ ᠪᠣᠯᠭᠠᠵᠤ ᠯᠠ ᠶᠠᠷᠢᠯᠴᠠᠬᠤ ᠪᠣᠯᠤᠨᠠ ᠭᠡᠵᠦ ᠮᠠᠷᠺᠦᠸᠨ᠋ᠲ ᠶᠠᠷᠢᠯᠠ᠃
ᠡᠨᠡ ᠬᠣᠭᠣᠷᠣᠨᠳᠣ ᠫᠦᠷᠫᠢᠰᠰ ᠳᠣᠣᠷᠠᠬᠢ ᠬᠥᠮᠦᠨ ᠢ᠋ᠶ᠋ᠡᠨ ᠠᠯᠪᠠᠨ ᠤ᠋ ᠭᠠᠵᠠᠷ ᠤ᠋ᠳ ᠲᠤ᠌ ᠲᠣᠮᠢᠯᠠᠨ ᠮᠠᠰᠢᠨ ᠤ᠋ ᠠᠶᠠᠯᠠᠯ ᠤ᠋ᠨ ᠵᠥᠪᠰᠢᠶᠡᠷᠡᠯ ᠠᠪᠤᠭᠤᠯᠵᠤ᠂ ᠮᠠᠰᠢᠨ ᠳ᠋ᠠᠭᠠᠨ ᠲᠣᠰᠣ ᠨᠡᠮᠡᠭᠦᠯᠦᠭᠰᠡᠨ ᠮᠥᠷᠲᠡᠭᠡᠨ ᠪᠢᠳᠡᠨ ᠦ᠌ ᠨᠢᠭᠡ ᠭᠠᠷᠠᠭ ᠠᠶᠠᠯᠠᠵᠤ᠂ ᠭᠦᠢᠴᠡᠬᠦ ᠪᠸᠨ᠋ᠽᠢᠨ ᠢ ᠠᠴᠢᠶᠠᠯᠠᠵᠤ ᠥᠭᠪᠡ᠃ ᠳᠠᠷᠠᠭᠠ ᠨᠢ ᠪᠢᠳᠡᠨ ᠢ ᠬᠣᠭᠣᠯᠠᠨ ᠳ᠋ᠤ᠌ ᠤᠷᠢᠨ ᠵᠣᠴᠢᠯᠠᠪᠠ᠃ ᠰᠠᠺᠤᠰᠺ᠂ ᠸᠥᠳ᠋ᠺᠡ᠂ ᠦᠵᠦᠮ ᠦ᠋ᠨ ᠳᠠᠷᠠᠰᠤ᠂ ᠴᠢᠨᠠᠭᠰᠢᠯᠠᠪᠠᠯ ᠨᠢᠭᠡ ᠯᠣᠩᠬᠣ ᠰᠠᠢᠨ ᠰᠦ ᠲᠡᠢ ᠵᠢᠩᠬᠢᠨᠢ ᠣᠷᠣᠰ ᠬᠣᠭᠣᠯᠠ ᠪᠠᠢᠯᠠ᠃ ᠪᠢᠳᠡᠨ ᠢ ᠶᠡᠬᠡ ᠣᠷᠣᠢ ᠠᠷᠢᠬᠢᠨ ᠳ᠋ᠤ᠌ ᠳᠦᠢᠷᠡᠭᠰᠡᠨ ᠲᠣᠯᠣᠭᠠᠢ ᠪᠠ ᠬᠦᠨᠳᠦᠷᠡᠭᠰᠡᠨ ᠬᠥᠯ ᠲᠡᠢ ᠪᠡᠷ ᠱᠠᠰᠢᠨ ᠳᠡᠯᠭᠡᠷᠡᠭᠦᠯᠦᠭᠴᠢ ᠶ᠋ᠢᠨ ᠳ᠋ᠦ᠍ ᠪᠤᠴᠠᠨ ᠢᠷᠡᠬᠦ ᠳ᠋ᠦ᠍ ᠰᠦᠢᠳ᠋ᠸᠷᠪᠤᠮ ᠭᠤᠸᠠᠢ ᠮᠠᠨᠢ ᠬᠠᠭᠤᠴᠢᠨ ᠲᠦᠰᠢᠯᠭᠡ ᠲᠡᠢ ᠰᠠᠨᠳᠠᠯᠢ ᠳᠡᠭᠡᠷᠡ ᠰᠥᠭᠥᠳᠦᠨ ᠰᠠᠭᠤᠭᠠᠳ᠂ ᠪᠢᠪᠯᠢ ᠤᠩᠰᠢᠵᠤ ᠪᠠᠢᠬᠤ ᠲᠠᠢ ᠨᠢ ᠬᠠᠷᠭᠤᠯᠠ᠃
— ᠲᠠ ᠨᠠᠷ ᠤ᠋ᠨ ᠰᠢᠨᠡ ᠤᠨᠤᠭᠠ ᠲᠠᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠶᠣᠰᠣᠲᠠᠢ ᠪᠠᠶᠠᠷᠯᠠᠯᠠ᠂ ᠪᠢ ᠴᠢᠨᠢ! ᠭᠡᠵᠦ ᠪᠢᠳᠡᠨ ᠲᠡᠢ ᠮᠡᠨᠳᠦᠯᠡᠭᠰᠡᠨ ᠢ᠋ᠶ᠋ᠡᠨ ᠵᠠᠯᠭᠠᠭᠠᠳ᠂ ᠥᠴᠥᠭᠡᠳᠦᠷ ᠡᠴᠡ ᠡᠬᠢᠯᠡᠭᠡᠳ ᠪᠢ ᠲᠠᠨᠤᠰ ᠤ᠋ᠨ ᠲᠥᠯᠥᠭᠡ ᠰᠠᠨᠠᠭᠠ ᠪᠣᠯᠵᠤ ᠪᠠᠢᠭᠰᠠᠨ ᠶᠤᠮ᠃ ᠥᠨᠥ ᠦᠳᠡ ᠡᠴᠡ ᠬᠣᠢᠰᠢ ᠲᠠ ᠨᠠᠷ ᠤ᠋ᠨ ᠵᠠᠬᠢᠶᠠ ᠶ᠋ᠢ ᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠᠬᠠᠨ ᠮᠠᠷᠲ᠋ᠢᠨᠰᠤᠨ ᠬᠦᠷᠴᠦ ᠢᠷᠡᠭᠡᠳ ᠨᠠᠳᠠᠳᠤ ᠡᠢᠮᠦ ᠣᠯᠠᠨ ᠠᠴᠢᠶᠠ ᠴᠦᠩᠬᠦ ᠶ᠋ᠢ ᠬᠠᠮᠢᠭᠠ ᠨᠢ ᠠᠴᠢᠶᠠᠯᠠᠬᠤ ᠵᠠᠢ ᠣᠯᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠰᠡᠨ ᠶᠦᠮ ᠭᠡᠯᠡ᠃
— ᠠᠶᠠᠯᠠᠯ ᠮᠠᠨᠢ ᠰᠠᠢᠨ ᠣᠳᠣᠨ ᠳ᠋ᠤ᠌ ᠲᠣᠬᠢᠶᠠᠯᠠ᠃ ᠵᠢᠷᠭᠤᠭᠠᠨ ᠴᠠᠭ ᠲᠤ᠌ ᠫᠦᠷᠫᠢᠰᠰ ᠠᠪᠤᠭᠠᠢ ᠶ᠋ᠢᠨ ᠭᠠᠩᠭᠠᠩ ᠮᠠᠰᠢᠨ ᠬᠦᠷᠴᠦ ᠢᠷᠡᠨᠡ ᠳᠠ᠂ ᠲᠡᠷᠡ ᠪᠣᠯᠲᠠᠯᠠ ᠪᠢᠳᠡ ᠵᠠᠪᠠᠯ ᠡᠨᠡ ᠦᠵᠦᠮ ᠦ᠋ᠨ ᠳᠠᠷᠠᠰᠤ᠂ ᠸᠤᠳ᠋ᠺᠠ ᠵᠢᠴᠢ ᠣᠯᠠᠨ ᠵᠦᠢᠯ ᠦ᠋ᠨ ᠣᠷᠣᠰ ᠢᠳᠡᠭᠡᠨ ᠢ᠋ᠶ᠋ᠡᠨ ᠰᠢᠩᠭᠡᠭᠡᠬᠦ ᠬᠡᠷᠡᠭᠲᠡᠢ᠃ ᠪᠢ ᠦᠵᠡᠪᠡᠯ᠂ ᠣᠳᠣ ᠤᠨᠲᠠᠶᠠ ᠳᠠ ! ᠭᠡᠵᠦ ᠮᠠᠷᠺᠤᠸᠨ᠋ᠲ ᠶᠠᠷᠢᠪᠠ᠃
ᠰᠤᠢᠳ᠋ᠸᠷᠪᠤᠮ ᠪᠢᠳᠡᠨ ᠢ ᠥᠷᠥᠭᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠲᠡᠯᠡ ᠬᠦᠷᠭᠡᠭᠰᠡᠨ ᠪᠥᠭᠡᠳ ᠪᠢᠳᠡᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠬᠤᠪᠢᠷᠠᠯᠲᠠ ᠳ᠋ᠤ᠌ ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠡᠨ ᠪᠠᠶᠠᠷᠯᠠᠵᠤ ᠪᠠᠢᠯᠠ᠃
ᠵᠢᠷᠤᠭ 7᠂ 8᠂ 9
