ᠠᠤᠭᠠ ᠬᠦᠴᠦᠲᠡᠨ- ᠳ· ᠨᠠᠴᠤᠭᠳᠣᠷᠵᠢАугаа хүчтэн-Д.Нацагдорж
396 ᠳ· ᠨᠠᠴᠤᠭᠳᠣᠷᠵᠢ
ᠨᠢᠭᠡ ᠥᠷᠯᠥᠭᠡ ᠡᠮᠡᠭᠡᠨ ᠲᠤᠯᠭᠠᠷ ᠭᠡᠷ ᠦ᠋ᠨ ᠬᠣᠭ ᠢ᠋ ᠴᠡᠪᠡᠷᠯᠡᠭᠡᠳ ᠭᠠᠷᠴᠤ ᠣᠳᠪᠠ᠃ ᠭᠡᠷ ᠦ᠋ᠨ ᠳᠣᠲᠣᠷᠠ ᠲᠣᠭᠣᠰᠣ ᠪᠤᠵᠢᠭᠢᠨᠠᠬᠤ ᠨᠢ ᠵᠤᠵᠠᠭᠠᠨ ᠡᠭᠦᠯᠡ ᠮᠡᠲᠦ ᠦᠵᠡᠭᠳᠡᠨᠡ᠃ ᠡᠨᠡ ᠵᠠᠭᠤᠷᠠ ᠠᠭᠠᠷ ᠤ᠋ᠨ ᠬᠡᠢ ᠡᠴᠡ ᠨᠢᠳᠦᠨ ᠳ᠋ᠦ᠍ ᠦᠯᠦ ᠦᠵᠡᠭᠳᠡᠬᠦ ᠨᠢᠭᠡ ᠴᠤᠬᠠᠭ ᠨᠥᠬᠥᠷ ᠪᠠᠭᠤᠵᠤ᠂ ᠤᠯᠠᠭᠠᠨ ᠪᠣᠳᠣᠭ ᠲᠠᠢ ᠠᠪᠳᠠᠷᠠ ᠶ᠋ᠢᠨ ᠥᠨᠴᠥᠭ ᠳᠡᠭᠡᠷᠡ ᠲᠣᠯᠣᠭᠠᠢ ᠪᠠᠨ ᠲᠦᠰᠢᠵᠦ᠂ ᠰᠠᠨᠠᠭᠠ ᠠᠯᠲᠠᠨ ᠵᠣᠪᠠᠯᠠᠩᠲᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠭᠠᠰᠠᠯᠤᠨᠠ᠃
ᠡᠭᠦᠨ ᠦ᠌ ᠪᠡᠶᠡ ᠶ᠋ᠢᠨ ᠪᠠᠢᠳᠠᠯ ᠢ᠋ ᠡᠩ ᠦ᠋ᠨ ᠨᠢᠳᠦ ᠪᠡᠷ ᠦᠵᠡᠬᠦ ᠭᠡᠭᠴᠢ ᠮᠠᠰᠢ ᠪᠡᠷᠬᠡ ᠪᠥᠭᠡᠳ ᠭᠠᠭᠴᠠ ᠬᠦ᠌ ᠲᠣᠮᠣᠷᠠᠭᠤᠯᠳᠠᠭ ᠰᠢᠯ ᠢ᠋ᠶ᠋ᠡᠷ ᠦᠵᠡᠵᠦ ᠪᠣᠯᠤᠨᠠ᠃ ᠬᠡᠳᠦᠢ ᠪᠡᠷ ᠡᠢᠮᠦ ᠥᠴᠦᠬᠡᠨ ᠪᠠᠭᠠ ᠪᠣᠯᠪᠠᠴᠤ ᠬᠦᠴᠦ ᠮᠠᠰᠢ ᠦᠯᠡᠮᠵᠢ ᠲᠤᠯᠠ ᠳᠠᠷᠤᠢ ᠠᠤᠭᠠ ᠬᠦᠴᠦ ᠲᠡᠢ ᠭᠡᠵᠦ ᠨᠡᠷᠡᠯᠡᠵᠦ ᠪᠣᠯᠤᠨᠠ᠃ ᠲᠡᠳᠦᠢ ᠯᠡ ᠤᠳᠠᠯ ᠦᠭᠡᠢ ᠪᠠᠰᠠ ᠨᠢᠭᠡ ᠥᠭᠡᠷᠡ ᠮᠠᠶᠢᠭ ᠤ᠋ᠨ ᠨᠥᠬᠥᠷ ᠠᠭᠠᠷ ᠠ᠋ᠴᠠ ᠪᠠᠭᠤᠵᠤ ᠢᠷᠡᠭᠡᠳ᠂ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠰᠠᠭᠤᠵᠤ᠄
— ᠵᠠ ᠡᠷᠬᠢᠮ ᠬᠦᠨᠳᠦᠲᠦ ᠨᠥᠬᠥᠷ ᠶᠠᠷᠠ ᠶ᠋ᠢᠨ ᠬᠣᠷᠣᠬᠠᠢ ᠡᠨᠳᠡ ᠶᠠᠮᠠᠷ ᠤᠴᠢᠷ ᠠ᠋ᠴᠠ ᠢᠩᠭᠢᠵᠦ ᠤᠢᠳᠬᠠᠷᠯᠠᠨ ᠰᠠᠭᠤᠨᠠ ᠭᠡᠵᠦ ᠯᠠᠪᠯᠠᠵᠤ᠂ ᠮᠡᠨᠳᠦ ᠶ᠋ᠢ ᠮᠡᠨᠳᠦᠯᠴᠡᠭᠰᠡᠨ ᠦ᠌ ᠳᠠᠷᠠᠭᠠ ᠳ᠋ᠤ᠌᠂
— ᠡᠷᠬᠢᠮ ᠨᠥᠬᠥᠷ ᠬᠦᠢᠲᠡᠨ ᠦ᠌ ᠬᠣᠷᠣᠬᠠᠢ ᠲᠠᠨ ᠲᠠᠢ ᠤᠴᠠᠷᠠᠭᠰᠠᠨ ᠳ᠋ᠠᠭᠠᠨ ᠲᠦᠮᠡᠨᠲᠡ ᠪᠠᠶᠠᠷᠯᠠᠨᠠ᠃ ᠮᠢᠨᠦ ᠢᠩᠭᠢᠵᠦ ᠵᠣᠪᠠᠬᠤ ᠨᠢ ᠵᠥᠪᠬᠡᠨ ᠮᠢᠨᠦ ᠬᠤᠪᠢ ᠪᠡᠶᠡ ᠶ᠋ᠢᠨ ᠬᠡᠷᠡᠭ ᠪᠢᠰᠢ ᠪᠥᠭᠡᠳ ᠪᠦᠭᠦᠳᠡ ᠶ᠋ᠢᠨ ᠲᠥᠯᠥᠭᠡ ᠪᠢᠯᠡ᠂ ᠡᠭᠦᠨ ᠡᠴᠡ ᠤᠷᠢᠳᠤ ᠠᠷᠪᠠ ᠭᠠᠷᠤᠢ ᠵᠢᠯ ᠦ᠋ᠨ ᠡᠮᠦᠨᠡ ᠪᠢᠳᠡ ᠬᠡᠴᠢᠨᠡᠨ ᠵᠢᠷᠭᠠᠯ ᠲᠠᠢ ᠪᠠᠢᠭᠰᠠᠨ ᠪᠢᠯᠡ᠃ ᠲᠡᠭᠦᠨ ᠢ᠋ ᠡᠷᠬᠢᠮ ᠬᠦᠨᠳᠦᠲᠦ ᠨᠥᠬᠥᠷ ᠠᠷᠠᠢ ᠮᠠᠷᠲᠠᠭᠠ ᠦᠭᠡᠢ ᠪᠢᠵᠡ᠃ ᠪᠢ ᠪᠣᠯᠪᠠᠯ ᠶᠠᠮᠠᠷ ᠴᠤ ᠬᠥᠮᠦᠨ ᠦ᠌ ᠪᠡᠶᠡ ᠮᠠᠬᠠᠪᠣᠳ ᠢ᠋ ᠳᠣᠷᠣᠮᠵᠢᠯᠠᠨ ᠰᠦᠢᠳᠬᠡᠵᠦ᠂ ᠠᠳᠠᠭ ᠲᠤ ᠬᠠᠮᠠᠷ ᠴᠤ ᠦᠭᠡᠢ ᠪᠣᠯᠭᠠᠳᠠᠭ ᠴᠢᠳᠠᠯ ᠲᠠᠢ ᠪᠠᠢᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠡᠮᠨᠡᠯᠭᠡ ᠳᠡᠯᠭᠡᠷᠡᠵᠦ ᠬᠡᠴᠡᠭᠦᠦ ᠬᠥᠮᠦᠰ ᠪᠣᠢ ᠪᠣᠯᠵᠤ᠂ ᠪᠢᠳᠡᠨ ᠦ᠌ ᠲᠡᠷᠡ ᠬᠦ᠌ ᠲᠠᠩᠬᠠᠢ ᠪᠠᠢᠳᠠᠯ ᠢ᠋ ᠬᠠᠯᠠᠵᠤ᠂ ᠬᠠᠮᠠᠷ ᠨᠠᠷᠮᠠᠢ ᠳ᠋ᠤ᠌ ᠬᠦᠷᠬᠦ ᠪᠠᠢᠲᠤᠭᠠᠢ ᠬᠠᠷᠢᠨ ᠣᠷᠣᠬᠤ ᠭᠠᠵᠠᠷ ᠣᠯᠳᠠᠬᠤ ᠦᠭᠡᠢ ᠵᠣᠪᠠᠯᠠᠩ ᠤ᠋ᠨ ᠳᠠᠯᠠᠢ ᠳ᠋ᠤ᠌ ᠤᠨᠠᠭᠠᠵᠤ᠂ ᠡᠳᠦᠷ ᠢᠷᠡᠬᠦ ᠳᠣᠳᠣᠮ ᠲᠤᠷᠠᠵᠤ ᠵᠦᠳᠡᠷᠡᠨ ᠵᠣᠪᠠᠵᠤ ᠭᠤᠨᠢᠬᠠᠷᠠᠨ ᠰᠡᠳᠬᠢᠯ ᠳ᠋ᠦ᠍ ᠲᠠᠪᠠ ᠦᠭᠡᠢ ᠪᠣᠯᠵᠠᠢ᠃
ᠬᠦᠢᠲᠡᠨ ᠦ᠌ ᠬᠣᠷᠣᠬᠠᠢ ᠭᠡᠳᠡᠯᠵᠡᠵᠦ ᠭᠣᠳᠣᠯᠵᠠᠨ᠄
— ᠦᠨᠡᠬᠡᠷ ᠲᠡᠢᠮᠦ᠂ ᠲᠠᠨ ᠤ᠋ ᠬᠡᠯᠡᠳᠡᠭ ᠮᠠᠰᠢ ᠦᠨᠡᠨ ᠭᠡᠵᠦ ᠪᠠᠲᠤᠯᠠᠨᠠ᠃ ᠭᠡᠲᠡᠯᠡ ᠳᠠᠬᠢᠨ ᠭᠤᠷᠪᠠᠳᠤᠭᠠᠷ ᠨᠥᠬᠥᠷ ᠰᠠᠮ ᠬᠦᠷᠴᠦ ᠢᠷᠡᠭᠡᠳ ᠲᠡᠳᠡᠭᠡᠷ ᠦ᠋ᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠬᠤ ᠳ᠋ᠤ᠌᠂ ᠶᠠᠷᠠ ᠶ᠋ᠢᠨ ᠬᠣᠷᠣᠬᠠᠢ᠄
— ᠲᠠᠨ ᠤ᠋ ᠠᠯᠳᠠᠷ ᠨᠡᠷᠡ ᠬᠡᠨ ᠭᠡᠭᠴᠢ ᠪᠣᠢ? ᠬᠠᠮᠢᠭᠠ ᠠ᠋ᠴᠠ ᠢᠷᠡᠪᠡ? ᠭᠡᠬᠦ ᠳ᠋ᠦ᠍
— ᠮᠢᠨᠦ ᠰᠠᠬᠢᠯ ᠤ᠋ᠨ ᠰᠠᠢᠬᠠᠨ ᠠᠯᠳᠠᠷ ᠬᠠᠯᠠᠭᠤᠨ ᠬᠢᠵᠢᠭ ᠦ᠋ᠨ ᠬᠣᠷᠣᠬᠠᠢ ᠭᠡᠭᠴᠢ ᠪᠥᠭᠡᠳ ᠣᠯᠠᠨ ᠳ᠋ᠤ᠌ ᠬᠦᠨᠳᠦᠯᠡᠭᠳᠡᠭᠰᠡᠨ ᠣᠨᠴᠠ ᠭᠠᠪᠢᠶᠠ ᠨᠢ ᠵᠠᠨᠤᠯ ᠵᠦᠬᠡᠯ ᠪᠣᠯᠤᠨᠠ᠃ ᠲᠡᠢᠮᠦ ᠪᠣᠯᠪᠠᠴᠤ ᠣᠢᠷᠠ ᠶ᠋ᠢᠨ ᠬᠡᠳᠦᠨ ᠵᠢᠯ ᠳ᠋ᠦ᠍ ᠣᠯᠵᠠ ᠠᠰᠢᠭ ᠪᠠᠭᠠ ᠪᠣᠯᠵᠠᠢ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠮᠢᠨᠦ ᠳᠣᠲᠣᠷᠠ ᠦᠷᠭᠦᠯᠵᠢ ᠵᠣᠪᠠᠭᠤᠷᠢ ᠲᠠᠢ ᠪᠣᠯᠤᠭᠰᠠᠨ ᠪᠢᠯᠡ᠃ ᠤᠷᠢᠳᠤ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ᠂ ᠨᠠᠮᠠᠶ᠋ᠢ ᠬᠥᠮᠦᠨ ᠠᠮᠢᠲᠠᠨ ᠮᠡᠳᠡᠬᠦ ᠦᠭᠡᠢ ᠳ᠋ᠦ᠍ ᠡᠷᠬᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠡᠨᠡ ᠲᠡᠷᠡ ᠶ᠋ᠢ ᠰᠢᠯᠭᠠᠳᠠᠭ ᠪᠠᠢᠭᠰᠠᠨ ᠪᠥᠭᠡᠳ ᠣᠳᠣ ᠬᠠᠷᠢᠨ ᠰᠢᠨᠡ ᠰᠢᠨᠡ ᠡᠮᠨᠡᠯᠭᠡ ᠭᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠰᠢᠨᠵᠢᠯᠡᠳᠡᠭ ᠪᠠᠭᠠᠵᠢ ᠪᠠᠷ ᠮᠢᠨᠦ ᠠᠰᠤᠷᠤ ᠬᠦᠴᠦᠲᠦ ᠠᠯᠲᠠᠨ ᠠᠮᠢ ᠶ᠋ᠢ ᠣᠯᠵᠤ ᠰᠤᠳᠤᠯᠤᠭᠠᠳ ᠠᠶᠤᠯᠲᠤ ᠡᠮ ᠲᠠᠷᠢᠯᠭᠠ ᠶ᠋ᠢ ᠤᠷᠢᠳᠴᠢᠯᠠᠨ ᠬᠢᠭᠰᠡᠭᠡᠷ ᠣᠳᠣ ᠰᠠᠢᠨ ᠵᠠᠪᠰᠢᠶᠠᠨ ᠢ᠋ ᠮᠢᠨᠢ ᠨᠢᠭᠡᠮᠦᠰᠦᠨ ᠠᠯᠳᠠᠭᠳᠠᠭᠤᠯᠵᠠᠢ ᠭᠡᠬᠦ ᠳ᠋ᠦ᠍᠂
ᠶᠠᠷᠠ ᠶ᠋ᠢᠨ ᠬᠣᠷᠣᠬᠠᠢ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠴᠦ᠄
— ᠡᠨᠡ ᠶᠠᠪᠤᠳᠠᠯ ᠨᠢᠭᠡᠨᠲᠡ ᠡᠢᠮᠦ ᠪᠣᠯᠤᠭᠰᠠᠨ ᠲᠤᠯᠠ ᠠᠷᠭᠠ ᠶ᠋ᠢ ᠰᠦᠪᠡᠭᠴᠢᠯᠡᠵᠦ᠂ ᠠᠯᠢ ᠭᠠᠵᠠᠷ ᠶᠠᠮᠠᠷ ᠬᠥᠮᠦᠨ ᠲᠡᠷᠡ ᠬᠦ᠌ ᠲᠠᠷᠢᠯᠭᠠ ᠬᠢᠯᠭᠡᠭᠰᠡᠨ ᠦᠭᠡᠢ᠂ ᠲᠡᠭᠦᠨ ᠢ᠋ ᠣᠯᠵᠤ ᠤᠴᠠᠷᠠᠬᠤ ᠶ᠋ᠢ ᠰᠠᠨᠠᠭᠠᠴᠢᠯᠠᠪᠠᠯ᠂ ᠵᠦᠢᠲᠡᠢ ᠰᠠᠨᠠᠭᠳᠠᠨᠠ ᠭᠡᠵᠦ ᠨᠡᠯᠢᠶᠡᠳ ᠤᠴᠢᠷ ᠢ᠋ ᠮᠡᠳᠡᠭᠰᠡᠨ ᠮᠡᠲᠦ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍᠂ ᠬᠢᠵᠢᠭ ᠦ᠋ᠨ ᠬᠣᠷᠣᠬᠠᠢ᠄
— ᠬᠣᠶᠠᠷ ᠵᠢᠯ ᠦ᠋ᠨ ᠡᠮᠦᠨᠡ ᠪᠣᠯ ᠭᠣᠷᠢᠳᠠᠯ ᠲᠠᠢ ᠪᠠᠢᠭᠰᠠᠨ ᠪᠢᠯᠡ᠃ ᠣᠳᠣ ᠬᠥᠮᠦᠨ ᠪᠦᠷᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠳᠠᠷᠢᠭᠤᠯᠳᠠᠭ ᠪᠣᠯᠤᠭᠰᠠᠨ ᠲᠤᠯᠠ ᠶᠠᠭᠠᠬᠢᠬᠤ ᠴᠤ ᠠᠷᠭᠠ ᠦᠭᠡᠢ ᠪᠣᠯᠵᠠᠢ ᠭᠡᠳ ᠴᠠᠰᠢ ᠶᠠᠷᠢᠬᠤ ᠭᠡᠲᠡᠯᠡ᠂ ᠬᠦᠢᠲᠡᠨ ᠦ᠌ ᠬᠣᠷᠣᠬᠠᠢ ᠶᠠᠭᠠᠷᠠᠨ ᠥᠭᠦᠯᠡᠪᠡ᠄
— ᠵᠠ ᠨᠥᠬᠥᠳ ᠠ᠋! ᠪᠢ ᠡᠨᠳᠡ ᠤᠳᠠᠭᠠᠨ ᠲᠡᠰᠬᠦ ᠠᠷᠭᠠ ᠦᠭᠡᠢ ᠪᠣᠯᠪᠠ᠃ ᠨᠠᠳᠠ ᠳ᠋ᠤ᠌ ᠴᠢᠭᠢᠭ ᠨᠣᠢᠲᠠᠨ ᠬᠡᠷᠡᠭ ᠲᠡᠢ ᠲᠤᠯᠠ ᠡᠨᠳᠡ ᠦᠨᠡᠬᠡᠷ ᠬᠠᠭᠤᠷᠠᠢ᠂ ᠠᠮᠢ ᠠᠯᠳᠠᠬᠤ ᠪᠣᠯᠵᠣᠰᠢ ᠦᠭᠡᠢ ᠪᠥᠭᠡᠳ ᠡᠷᠲᠡᠬᠡᠨ ᠨᠢᠭᠡ ᠲᠡᠰᠢ ᠣᠳᠤᠶᠠ ᠭᠡᠬᠦ ᠳ᠋ᠦ᠍ ᠬᠡᠪ ᠭᠡᠨᠡᠳᠲᠡ ᠭᠡᠷ ᠦ᠋ᠨ ᠡᠭᠦᠳᠡ ᠨᠡᠭᠡᠭᠡᠭᠳᠡᠬᠦ ᠰᠠᠴᠠᠭᠤ ᠥᠴᠦᠬᠡᠨ ᠰᠠᠯᠬᠢ ᠦᠯᠢᠶᠡᠭᠡᠳ᠂ ᠮᠠᠨ ᠤ᠋ ᠠᠤᠭᠠ ᠬᠦᠴᠦᠲᠡᠨ ᠳ᠋ᠦ᠍ ᠬᠢᠵᠠᠭᠠᠷᠯᠠᠰᠢ ᠦᠭᠡᠢ ᠶᠡᠬᠡ ᠰᠠᠯᠬᠢ ᠰᠢᠭᠤᠷᠭᠠ ᠮᠡᠲᠦ ᠪᠣᠯᠵᠤ ᠬᠡᠳᠦᠢᠨ ᠦᠯᠢᠶᠡᠭᠳᠡᠨ ᠲᠣᠭᠣᠨᠣ ᠪᠠᠷ ᠬᠥᠭᠡᠭᠡᠭᠳᠡᠵᠡᠢ᠃
1935 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠠᠲᠤ
ᠬᠢᠨᠠᠭᠴᠢ᠄ ᠭᠠᠷᠮᠠ᠂ ᠣᠳᠬᠠᠨᠰᠣᠠ