ᠮᠡᠰᠡ ᠵᠠᠰᠠᠯ ᠤ᠋ᠨ ᠲᠠᠰᠤᠭ- ᠳ· ᠨᠠᠴᠤᠭᠳᠣᠷᠵᠢМэс заслын тасаг-Д.Нацагдорж
276 ᠳ· ᠨᠠᠴᠤᠭᠳᠣᠷᠵᠢ
ᠥᠷᠭᠡᠨ ᠴᠡᠯᠡᠭᠡᠷ ᠭᠡᠭᠡᠪᠴᠢᠨ ᠦ᠌ ᠰᠢᠯ ᠳ᠋ᠦ᠍ ᠦᠵᠡᠰᠬᠦᠯᠡᠩᠲᠦ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠲᠤᠰᠤᠭᠰᠠᠨ ᠨᠢ ᠠᠯᠲᠠᠨ ᠤᠲᠠᠰᠤ ᠲᠠᠲᠠᠵᠤ ᠶᠣᠰᠣᠯᠠᠯ ᠢ᠋ ᠭᠦᠢᠴᠡᠳᠬᠡᠭᠰᠡᠨ ᠠᠳᠠᠯᠢ ᠪᠥᠭᠡᠳ ᠰᠢᠯ ᠬᠠᠯᠬᠠᠪᠴᠢ ᠲᠠᠢ ᠮᠡᠰᠡ ᠵᠠᠰᠠᠯ ᠤ᠋ᠨ ᠨᠠᠷᠢᠨ ᠬᠡᠷᠡᠭᠰᠡᠯ ᠦ᠋ᠳ ᠲᠦ᠍ ᠲᠤᠰᠤᠭᠰᠠᠨ ᠭᠡᠷᠡᠯ ᠦ᠋ᠨ ᠨᠠᠭᠠᠳᠤᠬᠢ ᠨᠢ ᠭᠢᠯᠪᠠᠰ ᠭᠢᠯᠪᠠᠰ ᠬᠢᠵᠦ ᠨᠢᠳᠦᠨ ᠳ᠋ᠦ᠍ ᠲᠠᠭᠠᠯᠠᠮᠵᠢᠲᠠᠢ᠃ ᠡᠭᠦᠨ ᠢ᠋ ᠦᠵᠡᠭᠰᠡᠨ ᠬᠥᠮᠦᠨ ᠡᠷᠬᠡᠪᠰᠢ ᠨᠢᠭᠡ ᠪᠣᠳᠣᠯᠭᠠ ᠲᠥᠷᠥᠬᠦ ᠪᠥᠭᠡᠳ ᠮᠢᠨᠦ ᠪᠣᠳᠣᠯᠭᠠ ᠳ᠋ᠤ᠌ ᠬᠢᠲᠤᠭᠠ ᠰᠡᠯᠡᠮᠡ ᠬᠤᠷᠴᠠ ᠮᠡᠰᠡ ᠭᠡᠭᠴᠢ ᠬᠥᠮᠦᠨ ᠦ᠌ ᠠᠮᠢ ᠶ᠋ᠢ ᠲᠠᠰᠤᠯᠬᠤ ᠪᠠᠭᠠᠵᠢ ᠭᠡᠵᠦ ᠰᠠᠨᠠᠭᠳᠠᠪᠠ᠃ ᠭᠡᠲᠡᠯᠡ ᠬᠥᠮᠦᠨ ᠦ᠌ ᠠᠮᠢ ᠶ᠋ᠢ ᠠᠪᠤᠭᠴᠢ ᠠᠶᠤᠯᠲᠤ ᠡᠪᠡᠳᠴᠢᠨ ᠢ᠋ ᠠᠨᠠᠭᠠᠬᠤ ᠠᠷᠢᠭᠤᠨ ᠠᠷᠭᠠ ᠬᠡᠷᠡᠭᠯᠡᠭᠦᠷ ᠡᠨᠡ ᠪᠠᠢᠵᠠᠢ᠃ ᠲᠡᠭᠡᠵᠦ ᠡᠷᠭᠢᠨ ᠲᠣᠭᠣᠷᠢᠨ ᠦᠵᠡᠪᠡᠯ ᠲᠠᠰᠤᠯᠭᠠᠨ ᠳᠣᠲᠣᠷᠠ ᠭᠢᠯᠪᠠᠬᠤ ᠨᠢ ᠲᠦᠮᠡᠨ ᠵᠦᠢᠯ ᠰᠣᠯᠣᠩᠭᠠ ᠲᠠᠲᠠᠨᠠ᠃ ᠡᠢᠮᠦ ᠨᠢᠭᠡ ᠴᠡᠪᠡᠷ ᠭᠣᠶᠣᠮᠰᠣᠭ ᠭᠠᠵᠠᠷ᠂ ᠰᠢᠷᠦᠭᠦᠨ ᠠᠮᠢᠰᠬᠤᠯᠯᠠᠬᠤ ᠪᠠ ᠨᠡᠰᠢ ᠴᠠᠰᠢ ᠶᠠᠪᠤᠬᠤ ᠭᠡᠭᠴᠢ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠪᠣᠯᠬᠤ ᠦᠭᠡᠢ ᠦᠨᠡᠬᠡᠷ ᠭᠠᠢᠬᠠᠮᠰᠢᠭ ᠲᠠᠢ᠃
ᠡᠨᠡ ᠰᠠᠢᠬᠠᠨ ᠲᠡᠷᠡ ᠰᠣᠨᠢᠨ ᠢ᠋ ᠦᠵᠡᠭᠰᠡᠭᠡᠷ ᠪᠠᠢᠲᠠᠯᠠ ᠳ᠋ᠣᠺᠲ᠋ᠣᠷ ᠡᠮᠴᠢ ᠨᠠᠷ ᠬᠥᠮᠦᠨ ᠦ᠌ ᠭᠡᠳᠡᠰᠦ ᠶ᠋ᠢ ᠣᠭᠲᠣᠯᠬᠤ ᠬᠠᠭᠠᠯᠬᠤ᠂ ᠮᠡᠰᠡ ᠵᠠᠰᠠᠯ ᠢ᠋ ᠦᠢᠯᠡᠳᠦᠨᠡ ᠭᠡᠵᠦ ᠶᠠᠷᠢᠯᠴᠠᠬᠤ ᠳ᠋ᠤ᠌ ᠴᠣᠬᠣᠮ ᠶᠠᠭᠤ ᠪᠣᠯᠳᠠᠭ ᠢ᠋ ᠦᠵᠡᠬᠦ ᠪᠡᠷ ᠰᠢᠢᠳᠴᠦ ᠬᠦᠯᠢᠶᠡᠨ ᠪᠠᠢᠲᠠᠯᠠ᠂ ᠮᠢᠩᠭᠠᠨ ᠵᠦᠢᠯ ᠦᠯᠦ ᠲᠠᠨᠢᠭᠳᠠᠬᠤ ᠶᠠᠭᠤᠮᠠᠰ ᠢ᠋ ᠪᠡᠯᠡᠳᠬᠡᠨ᠂ ᠲᠦᠮᠡᠨ ᠵᠦᠢᠯ ᠦᠯᠦ ᠤᠬᠠᠭᠳᠠᠬᠤ ᠦᠭᠡᠰ ᠢ᠋ ᠬᠡᠯᠡᠯᠴᠡᠭᠰᠡᠭᠡᠷ ᠪᠠᠢᠭᠠᠳ᠂ ᠯᠠᠮᠠ ᠰᠠᠩᠵᠠᠢ ᠭᠡᠳᠡᠭ ᠳᠥᠴᠢᠭᠡᠳ ᠨᠠᠰᠤᠨ ᠤ᠋ ᠬᠢᠷᠢ᠂ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠯᠢᠶᠡᠳ ᠵᠦᠳᠡᠷᠡᠭᠰᠡᠨ ᠴᠠᠭᠠᠨ ᠰᠢᠷᠭᠠᠯ ᠴᠢᠷᠠᠢ ᠲᠠᠢ᠂ ᠶᠠᠰᠤᠯᠢᠭ ᠰᠢᠨᠠ ᠲᠠᠢ ᠨᠢᠭᠡ ᠬᠥᠮᠦᠨ ᠢ᠋ ᠣᠷᠣᠭᠤᠯᠤᠨ ᠢᠷᠡᠭᠡᠳ ᠨᠢᠭᠡ ᠥᠨᠳᠥᠷᠯᠢᠭ᠂ ᠣᠷᠣ ᠠᠳᠠᠯᠢ ᠭᠠᠢᠬᠠᠮᠰᠢᠭᠲᠤ ᠪᠦᠲᠡᠭᠡᠯᠭᠡ ᠲᠡᠢ ᠶᠠᠭᠤᠮᠠᠨ ᠳᠡᠭᠡᠷᠡ ᠬᠡᠪᠲᠡᠭᠦᠯᠪᠡ᠃ ᠲᠡᠢᠮᠦ ᠵᠦᠢᠯ ᠢ᠋ ᠤᠷᠢᠳ ᠬᠣᠵᠢᠳ ᠦᠵᠡᠭᠡ ᠦᠭᠡᠢ ᠲᠤᠯᠠ ᠬᠡᠵᠢᠶᠡ ᠬᠠᠭᠠᠯᠬᠤ ᠣᠭᠲᠣᠯᠬᠤ ᠪᠣᠯ ᠭᠡᠬᠦ ᠳ᠋ᠦ᠍ ᠪᠦᠬᠦᠢ ᠪᠡᠶᠡ ᠪᠡᠷ ᠬᠦᠢᠲᠡᠨ ᠬᠥᠯᠥᠰᠥ ᠠᠰᠬᠠᠷᠠᠬᠤ ᠳ᠋ᠤ᠌ ᠠᠷᠭᠠᠴᠠᠨ ᠬᠠᠷᠠᠵᠤ ᠪᠠᠢᠪᠠᠯ᠂ ᠥᠨᠥᠬᠢ ᠡᠪᠡᠳᠴᠢᠲᠡᠢ ᠬᠥᠮᠦᠨ ᠦ᠌ ᠰᠢᠷᠭᠠᠯ ᠴᠠᠭᠠᠨ ᠨᠢᠭᠤᠷ ᠨᠢ ᠲᠤᠩ ᠴᠠᠭᠠᠨ ᠪᠣᠯᠵᠤ ᠦᠭᠡ ᠬᠡᠯᠡᠬᠦ ᠶ᠋ᠢᠨ ᠰᠡᠭᠡᠭᠡ ᠦᠭᠡᠢ ᠳᠡᠮᠡᠢ ᠯᠡ ᠬᠣᠶᠠᠷ ᠨᠢᠳᠦ ᠪᠡᠨ ᠡᠷᠭᠢᠯᠳᠦᠭᠦᠯᠦᠨ ᠡᠨᠡ ᠲᠡᠷᠡ ᠶ᠋ᠢ ᠰᠢᠷᠳᠡᠨᠡ᠃
ᠤᠳᠠᠭᠰᠠᠨ ᠦᠭᠡᠢ ᠨᠢᠳᠦ ᠪᠡᠨ ᠠᠨᠢᠨ ᠤᠬᠠᠭᠠᠨ ᠦᠭᠡᠢ ᠬᠡᠪᠲᠡᠬᠦ ᠶ᠋ᠢ ᠦᠵᠡᠪᠡᠯ ᠬᠡᠳᠦᠢᠨ ᠨᠠᠰᠤ ᠪᠠᠷᠠᠭᠰᠠᠨ ᠮᠡᠲᠦ ᠪᠥᠭᠡᠳ ᠬᠡᠳᠦᠨ ᠳ᠋ᠣᠺᠲ᠋ᠣᠷ ᠵᠡᠷᠭᠡ ᠵᠡᠷᠭᠡ ᠪᠡᠷ ᠴᠠᠭ ᠬᠠᠷᠠᠵᠤ ᠠᠵᠢᠭᠯᠠᠭᠰᠠᠭᠠᠷ ᠬᠡᠮᠵᠢᠶᠡ ᠲᠡᠢ ᠴᠠᠭ ᠲᠠᠭᠠᠨ ᠳᠠᠬᠢᠨ ᠰᠡᠬᠡᠭᠡᠵᠦ ᠠᠮᠢᠳᠤ ᠬᠥᠮᠦᠨ ᠪᠣᠯᠭᠠᠬᠤ ᠶ᠋ᠢ ᠠᠵᠢᠭᠯᠠᠪᠠᠯ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠡᠮᠨᠡᠯᠭᠡ ᠭᠡᠭᠴᠢ ᠦᠨᠡᠬᠡᠷ ᠭᠠᠢᠬᠠᠮᠰᠢᠭᠲᠠᠶᠠ ᠭᠡᠵᠦ ᠳᠣᠲᠣᠷᠠ ᠪᠣᠳᠣᠭᠳᠠᠨᠠ᠃ ᠭᠡᠲᠡᠯᠡ ᠲᠡᠷᠡ᠂ ᠳ᠋ᠣᠺᠲ᠋ᠣᠷ ᠠ᠋ᠴᠠ ᠡᠨᠡ ᠬᠥᠮᠦᠨ ᠢ᠋ ᠳᠣᠯᠣᠭᠠ ᠬᠣᠨᠣᠭ ᠪᠣᠯᠤᠭᠠᠳ ᠶᠠᠪᠤᠵᠤ ᠪᠣᠯᠤᠨᠠ ᠭᠡᠵᠦ ᠤᠷᠢᠳᠠ ᠮᠡᠳᠡᠵᠦ ᠦᠨᠡᠨ ᠢ᠋ ᠢᠯᠡᠳᠬᠡᠬᠦ ᠨᠢ ᠦᠨᠡᠬᠡᠷ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠣᠣᠰ ᠦᠭᠡᠢ ᠪᠠᠶᠠᠰᠬᠤᠯᠠᠩ ᠮᠡᠲᠦ ᠰᠠᠨᠠᠭᠳᠠᠪᠠ᠃
1935 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ