ᠪᠣᠭᠣᠨᠢ ᠰᠢᠪᠠᠭᠤᠨ ᠲᠠᠷᠢᠶᠠ Богино шувуун тариа
366
ᠪᠣᠭᠣᠨᠢ ᠰᠢᠪᠠᠭᠤᠨ ᠲᠠᠷᠢᠶᠠ
ᠦᠶᠡᠲᠦ ᠤᠷᠭᠤᠮᠠᠯ ᠤ᠋ᠨ ᠢᠵᠠᠭᠤᠷ
ᠨᠢᠭᠡ ᠨᠠᠰᠤᠲᠤ ᠡᠪᠡᠰᠦᠯᠢᠭ ᠤᠷᠭᠤᠮᠠᠯ᠂ ᠢᠭᠴᠤ ᠨᠠᠷᠢᠨ ᠰᠠᠬᠠᠯ ᠦᠨᠳᠦᠰᠦ ᠲᠡᠢ᠃ ᠰᠦᠷᠡᠯ ᠨᠢ 15—90cm ᠥᠨᠳᠥᠷ ᠰᠢᠯᠤᠭᠤᠨ ᠪᠤᠶᠤ ᠣᠵᠣᠭᠣᠷ ᠲᠠᠭᠠᠨ ᠮᠤᠷᠤᠢᠵᠤ ᠤᠷᠭᠤᠨᠠ᠂ ᠪᠠᠰᠠ ᠪᠣᠳᠠᠯᠠᠨᠠ᠃ ᠨᠠᠪᠴᠢᠨ ᠤ᠋ ᠲᠣᠭᠳᠣᠢ ᠨᠢ ᠬᠠᠪᠲᠠᠭᠠᠢ᠂ ᠢᠷᠮᠡᠭ ᠲᠡᠢ᠂ ᠦᠰᠦ ᠦᠭᠡᠢ ᠪᠤᠶᠤ ᠲᠠᠷᠠᠮᠠᠭ ᠦᠰᠦ ᠲᠡᠢ᠃ ᠠᠮᠠᠰᠠᠷ ᠨᠢ ᠵᠠᠷᠢᠮ ᠳ᠋ᠠᠭᠠᠨ ᠦᠰᠦ ᠲᠡᠢ ; ᠨᠠᠪᠴᠢᠨ ᠤ᠋ ᠬᠡᠯᠡ ᠨᠢ 1mm ᠤᠷᠲᠤ ; ᠨᠠᠪᠴᠢ ᠨᠢ ᠲᠡᠭᠰᠢᠬᠡᠨ ᠬᠠᠪᠲᠠᠭᠠᠢ ᠪᠤᠶᠤ ᠬᠤᠮᠢᠷᠠᠨᠠ᠂ 15cm ᠤᠷᠲᠤ᠂ 3—5mm ᠥᠷᠭᠡᠨ᠂ ᠦᠰᠦ ᠦᠭᠡᠢ ᠪᠤᠶᠤ ᠳᠡᠭᠡᠳᠦ ᠲᠠᠯᠠ ᠳ᠋ᠤᠨᠢ ᠦᠰᠦ ᠲᠡᠢ᠃ ᠲᠦᠷᠦᠭᠦᠦ ᠬᠡᠯᠪᠡᠷᠢᠲᠦ ᠪᠠᠭ ᠴᠡᠴᠡᠭ ᠨᠢ3—10cm ᠤᠷᠲᠤ᠂ 3—5mm ᠥᠷᠭᠡᠨ᠂ ᠶᠡᠷᠦ ᠳ᠋ᠡᠭᠡᠨ ᠡᠰᠢᠨ ᠦ᠌ ᠣᠷᠣᠢ ᠳ᠋ᠤ᠌ ᠬᠣᠶᠠᠷ ᠠ᠋ᠴᠠ ᠳᠡᠭᠡᠭᠰᠢ ᠨᠡᠯᠢᠶᠡᠳ ᠬᠡᠳᠦ ᠪᠡᠷ ᠬᠤᠷᠤᠭᠤ ᠮᠡᠲᠦ ᠪᠣᠯᠵᠤ ᠪᠠᠢᠷᠢᠯᠠᠨᠠ᠂ ᠳᠣᠲᠣᠭᠰᠢ ᠮᠤᠷᠤᠢᠵᠤ ᠲᠠᠬᠢᠶᠠᠨ ᠤ᠋ ᠰᠠᠪᠠᠷ ᠰᠢᠭ᠋ ᠪᠣᠯᠬᠤ ᠦᠭᠡᠢ ; ᠵᠢᠵᠢᠭ ᠲᠦᠷᠦᠭᠦᠦ ᠨᠢ 4—7mm ᠤᠷᠲᠤ᠂ 2—3mm ᠥᠷᠭᠡᠨ᠂ 3—6 ᠴᠡᠴᠡᠭ ᠲᠡᠢ ; ᠬᠠᠯᠢᠰᠤ ᠨᠢ ᠬᠠᠪᠲᠠᠭᠠᠢ ᠲᠡᠪᠡᠨᠡ ᠬᠡᠯᠪᠡᠷᠢ ᠲᠡᠢ᠂ ᠰᠢᠷᠦᠭᠦᠨ ᠨᠢᠷᠤᠭᠤ ᠲᠠᠢ᠂ ᠨᠢᠭᠡᠳᠦᠭᠡᠷ ᠬᠠᠯᠢᠰᠤ ᠨᠢ 1.5—2mm ᠤᠷᠲᠤ ; ᠬᠣᠶᠠᠳᠤᠭᠠᠷ ᠬᠠᠯᠢᠰᠤ ᠨᠢ 2—3 mm ᠤᠷᠲᠤ ; ᠨᠢᠭᠡᠳᠦᠭᠡᠷ ᠭᠠᠳᠠᠷ ᠬᠡᠪᠡᠭ ᠨᠢ 3—3.5mm ᠤᠷᠲᠤ᠂ ᠢᠪᠴᠤᠬᠠᠨ ᠳᠠᠯᠠᠪᠴᠢ ᠪᠦᠬᠦᠢ ᠨᠢᠷᠤᠭᠤ ᠲᠠᠢ ; ᠳᠣᠲᠣᠷ ᠬᠡᠪᠡᠭ ᠨᠢ ᠭᠠᠳᠠᠷ ᠬᠡᠪᠡᠭ ᠡᠴᠡ ᠣᠬᠣᠷ᠂ ᠠᠷᠤ ᠶ᠋ᠢᠨ ᠭᠣᠣᠯ ᠰᠤᠳᠠᠯ ᠳ᠋ᠤᠨᠢ ᠵᠢᠵᠢᠭ ᠦᠰᠦ ᠲᠡᠢ ; ᠡᠷᠡ ᠲᠣᠭᠣᠷᠴᠣᠭ ᠨᠢ ᠭᠤᠷᠪᠠ᠂ ᠦᠷᠡ ᠨᠢ ᠬᠠᠷᠠᠪᠲᠤᠷ ᠬᠦᠷᠡᠩ᠂ 1.5mm ᠣᠷᠴᠢᠮ ᠤᠷᠲᠤ᠂ ᠥᠨᠳᠡᠭᠡᠯᠵᠢᠨ᠂ ᠭᠠᠳᠠᠷᠭᠤ ᠳ᠋ᠤᠨᠢ ᠳᠣᠯᠭᠢᠶᠠᠯᠠᠭᠰᠠᠨ ᠮᠡᠲᠦ ᠢᠯᠡ ᠠᠲᠤᠷᠢᠶᠠ ᠲᠠᠢ᠃
ᠶᠡᠷᠦ ᠳ᠋ᠡᠭᠡᠨ᠂ ᠲᠡᠭᠰᠢ ᠲᠠᠯᠠ ᠶ᠋ᠢᠨ ᠠᠲᠠᠷ ᠭᠠᠵᠠᠷ ᠣᠯᠠᠨ ᠤᠷᠭᠤᠨᠠ᠃
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠡᠯᠡ ᠮᠣᠵᠢ ᠣᠷᠣᠨ ᠳ᠋ᠤ᠌ ᠪᠦᠷ ᠤᠷᠭᠤᠳᠠᠭ᠃
ᠡᠰᠢ ᠪᠡᠷ ᠨᠢ ᠳᠡᠭᠡᠰᠦ ᠲᠠᠮᠤᠵᠤ᠂ ᠡᠪᠡᠰᠦᠨ ᠱᠠᠬᠠᠢ ᠬᠦᠷᠦᠵᠦ᠂ ᠮᠠᠳᠠᠢ ᠨᠡᠬᠡᠵᠦ ᠪᠣᠯᠬᠤ ᠠ᠋ᠴᠠ ᠭᠠᠳᠠᠨᠠ ᠴᠠᠭᠠᠰᠤ ᠪᠠᠰᠠ ᠬᠢᠵᠦ ᠪᠣᠯᠤᠨᠠ᠃ ᠦᠷᠡ ᠪᠡᠷ ᠨᠢ ᠴᠢᠰᠤ ᠭᠠᠷᠬᠤ ᠶ᠋ᠢ ᠵᠣᠭᠰᠣᠭᠠᠬᠤ ᠡᠮ ᠬᠢᠳᠡᠭ᠃ ᠮᠥᠨ ᠰᠠᠢᠨ ᠴᠢᠨᠠᠷ ᠤ᠋ᠨ ᠪᠣᠷᠳᠣᠭᠠ ᠡᠪᠡᠰᠦ ᠪᠢᠯᠡ᠃ ᠪᠠᠰᠠ ᠲᠠᠷᠢᠶᠠᠨ ᠤ᠋ ᠨᠣᠭᠣᠭᠠᠨ ᠪᠣᠷᠳᠣᠭᠤᠷ ᠬᠢᠵᠦ ᠪᠣᠯᠳᠠᠭ᠃
ᠬᠢᠲᠠᠳ ᠨᠡᠷᠡ᠄ 牛筋草
ᠠᠩᠭ᠌ᠯᠢ ᠨᠡᠷᠡ᠄ Eleusine indica (L.) Gaertn.
ᠦᠰᠦᠭ ᠠᠮᠢᠯᠠᠭᠤᠯᠤᠭᠠᠴᠢ᠄ ᠳ· ᠡᠷᠬᠢᠮᠪᠠᠭᠠᠲᠤᠷ
ᠬᠢᠨᠠᠭᠴᠢ᠄ ᠫᠣ· ᠴᠠᠭᠠᠨ