ᠤᠨᠠᠭᠠᠨ ᠪᠦᠷᠢᠳᠦ-ᠠ᠊᠂ ᠣᠳᠽᠠᠷУнаган бүрд-А,Одзар
419
ᠤᠨᠠᠭᠠᠨ ᠪᠦᠷᠢᠳᠦ
ᠤᠨᠠᠭᠠᠨ ᠪᠦᠷᠢᠳᠦ ①
ᠠ᠊᠂ ᠣᠳᠽᠠᠷ
ᠵᠤᠨ ᠤ᠋ ᠡᠬᠢᠨ ᠦ᠌ ᠲᠤᠩᠭᠠᠯᠠᠭ ᠡᠳᠦᠷ ᠪᠢ ᠲᠡᠮᠡᠭᠡ ᠤᠨᠤᠵᠤ ᠮᠠᠩᠬᠠᠨ ᠳᠠᠯᠠᠢ ᠶ᠋ᠢ ᠭᠡᠲᠦᠯᠵᠦ ᠤᠨᠠᠭᠠᠨ ᠪᠦᠷᠢᠳᠦ ᠶ᠋ᠢ ᠴᠢᠭᠯᠡᠪᠡ᠃ ᠮᠥᠯᠢᠭᠡᠷ ᠮᠥᠯᠢᠭᠡᠷ ᠴᠠᠭᠠᠨ ᠮᠠᠩᠬᠠ ᠬᠢᠵᠠᠭᠠᠷ ᠦᠭᠡᠢ ᠵᠠᠯᠭᠠᠯᠳᠤᠨ ᠭᠦᠨ ᠳᠠᠯᠠᠢ ᠶ᠋ᠢᠨ ᠲᠣᠭᠰᠢᠨ ᠳᠠᠪᠠᠯᠭᠠᠨ ᠮᠡᠲᠦ ᠴᠠᠯᠭᠢᠯᠠᠵᠤ ᠬᠤᠷᠴᠠ ᠨᠠᠷᠠᠨ ᠤ᠋ ᠭᠡᠷᠡᠯ ᠰᠠᠴᠤᠷᠠᠨᠠ᠃ ᠰᠢᠲᠠᠭᠠᠮᠠ ᠨᠠᠷᠠᠨ ᠳᠡᠭᠡᠷᠡ ᠡᠴᠡ ᠲᠥᠭᠡᠨᠡᠬᠦ ᠳ᠋ᠦ᠍ ᠬᠠᠯᠠᠭᠤᠨ ᠢᠯᠴᠢ ᠳᠣᠣᠷᠠ ᠠ᠋ᠴᠠ ᠨᠢᠯᠴᠢᠭᠢᠨᠡᠵᠦ ᠠᠮᠢᠰᠬᠤᠭᠠ ᠪᠥᠭᠯᠡᠷᠡᠬᠦ ᠪᠣᠯᠪᠠᠴᠤ ᠬᠠᠶᠠ ᠥᠨᠳᠥᠷ ᠮᠠᠩᠬᠠᠨ ᠤ᠋ ᠬᠥᠲᠥᠯ ᠢ᠋ ᠳᠠᠪᠠᠵᠤ᠂ ᠦᠶᠡ ᠦᠶᠡ ᠢᠯᠪᠢᠨ ᠢᠷᠡᠬᠦ ᠰᠡᠷᠢᠭᠦᠨ ᠰᠠᠯᠬᠢ ᠶ᠋ᠢ ᠰᠥᠷᠦᠨ ᠶᠠᠪᠤᠬᠤ ᠨᠢ ᠮᠥᠨ ᠴᠤ᠌ ᠨᠢᠭᠡ ᠴᠠᠭ ᠤ᠋ᠨ ᠵᠢᠷᠭᠠᠯ ᠪᠣᠯᠤᠨᠠ᠃
《ᠡᠯᠡᠰᠦᠨ ᠳᠠᠯᠠᠢ ᠶ᠋ᠢᠨ ᠣᠩᠭᠣᠴᠠ》 ᠭᠡᠵᠦ ᠡᠷᠲᠡ ᠡᠴᠡ ᠠᠯᠳᠠᠷᠰᠢᠭᠰᠠᠨ ᠣᠷᠳᠣᠰ ᠤ᠋ᠨ ᠲᠡᠮᠡᠭᠡ᠂ ᠮᠠᠩᠬᠠᠨ ᠳᠠᠪᠠᠭᠠ ᠨᠤᠭᠤᠳ ᠢ᠋ ᠠᠷᠤ ᠳ᠋ᠠᠭᠠᠨ ᠣᠷᠬᠢᠨ ᠤᠷᠤᠭᠰᠢᠯᠠᠵᠤ ᠶᠠᠪᠤᠲᠠᠯᠠ ᠬᠦᠳᠡᠩᠲᠦᠨ ᠴᠡᠩᠬᠡᠷᠯᠡᠬᠦ ᠮᠠᠨᠠᠨ ᠳᠤᠮᠳᠠ ᠨᠢᠭᠡ ᠶᠡᠬᠡ ᠲᠠᠭᠲᠤ ᠮᠡᠲᠦ ᠥᠨᠳᠥᠷ ᠬᠠᠢᠷᠬᠠᠨ ᠠᠯᠤᠰ ᠲᠤ᠌ ᠬᠥᠪᠬᠡᠯᠵᠡᠨ ᠬᠠᠷᠠᠭᠳᠠᠪᠠ᠃ ᠪᠢ ᠣᠯᠵᠤ ᠦᠵᠡᠮᠡᠭᠴᠡ ᠲᠡᠭᠦᠨ ᠢ᠋ ᠵᠡᠷᠭᠡᠯᠭᠡᠨ ᠳᠤᠮᠳᠠᠬᠢ ᠬᠣᠯᠠ ᠶ᠋ᠢᠨ ᠡᠭᠦᠯᠡ ᠭᠡᠵᠦ ᠰᠠᠨᠠᠪᠠ᠃ ᠭᠡᠲᠡᠯᠡ ᠡᠨᠡ ᠪᠣᠯ ᠣᠷᠳᠣᠰ ᠨᠤᠲᠤᠭ ᠤ᠋ᠨ ᠥᠷᠥᠴᠡ ᠪᠣᠯᠤᠭᠰᠠᠨ ᠡᠷᠬᠡᠲᠦ ᠬᠠᠢᠷᠬᠠᠨ ᠭᠡᠳᠡᠭ ᠠᠭᠤᠯᠠ ᠭᠡᠵᠦ ᠬᠠᠮᠲᠤ ᠠᠶᠠᠯᠠᠭᠰᠠᠨ ᠨᠥᠬᠥᠳ ᠨᠠᠳᠠ ᠬᠡᠯᠡᠵᠦ ᠥᠭᠪᠡ᠃ ᠡᠯᠡᠰᠦᠨ ᠳᠠᠯᠠᠢ ᠳᠣᠲᠣᠷᠠ ᠲᠤᠵᠢ ② ᠭᠤᠷᠪᠠᠨ ᠡᠳᠦᠷ ᠠᠶᠠᠯᠠᠭᠠᠳ ᠭᠡᠨᠡᠳᠲᠡ ᠠᠭᠤᠯᠠᠨ ᠤ᠋ ᠪᠠᠷᠠ ᠦᠵᠡᠬᠦ ᠳ᠋ᠦ᠍ ᠦᠨᠡᠬᠡᠷ ᠰᠠᠯᠵᠤ ᠤᠳᠠᠭᠰᠠᠨ ᠨᠠᠢᠵᠠ ᠲᠠᠢ ᠪᠠᠨ ᠤᠴᠠᠷᠠᠭᠰᠠᠨ ᠰᠢᠭ᠋ ᠬᠠᠯᠠᠭᠤᠨ ᠳᠣᠲᠣᠨᠣ ᠰᠠᠨᠠᠭᠳᠠᠵᠤ᠂ ᠶᠠᠭᠠᠬᠢᠯᠠ ᠴᠤ᠌ ᠭᠡᠰᠡᠨ ᠲᠦᠷᠭᠡᠬᠡᠨ ᠳᠡᠷᠭᠡᠳᠡ ᠨᠢ ᠣᠴᠢᠬᠤ ᠶ᠋ᠢ ᠬᠦᠰᠡᠯᠡ᠃ ᠡᠷᠬᠡᠲᠦ ᠬᠠᠢᠷᠬᠠᠨ ᠣᠢᠷᠠᠲᠤᠬᠤ ᠳᠣᠳᠣᠮ ᠮᠣᠳᠣ ᠰᠢᠭᠤᠢ ᠤᠯᠠᠮ ᠵᠤᠵᠠᠭᠠᠷᠠᠵᠤ᠂ ᠪᠡᠯᠴᠢᠭᠡᠷ ᠡᠪᠡᠰᠦ ᠨᠣᠭᠣᠭᠠᠷᠠᠭᠠᠳ᠂ ᠮᠠᠩᠭᠢᠷ ᠳᠠᠭᠠᠨᠠ ᠶ᠋ᠢᠨ ᠦᠨᠦᠷ ᠲᠠᠭᠠᠲᠠᠢ ᠰᠠᠢᠬᠠᠨ ᠬᠠᠩᠬᠤᠯᠤᠨᠠ᠃ ᠮᠠᠩᠬᠠᠨ ᠵᠠᠬᠠ ᠶ᠋ᠢᠨ ᠥᠨᠳᠥᠷ ᠣᠷᠣᠢ ᠶ᠋ᠢ ᠳᠠᠪᠠᠵᠤ ᠭᠠᠷᠤᠩᠭᠤᠲᠠ ᠲᠡᠭᠷᠢ ᠲᠤᠯᠤᠮᠠ ᠴᠡᠩᠬᠡᠷ ᠳᠣᠯᠭᠢᠶᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠨᠢᠭᠡ ᠰᠠᠢᠬᠠᠨ ᠲᠥᠭᠥᠷᠢᠭ ᠨᠠᠭᠤᠷ ᠦᠵᠡᠭᠳᠡᠪᠡ᠃ ᠬᠣᠯᠠ ᠠ᠋ᠴᠠ ᠬᠠᠷᠠᠬᠤ ᠳ᠋ᠤ᠌ ᠨᠠᠭᠤᠷ ᠶᠠᠭ ᠮᠥᠩᠭᠥᠨ ᠤᠰᠤ ᠮᠡᠲᠦ ᠮᠡᠯᠮᠡᠯᠵᠡᠨ ᠭᠢᠯᠲᠦᠭᠡᠨᠡᠭᠡᠳ᠂ ᠲᠡᠷᠭᠡᠯ ᠰᠠᠷᠠᠨ ᠭᠠᠵᠠᠷ ᠤᠨᠠᠭᠰᠠᠨ ᠰᠢᠭ᠋ ᠲᠥᠭᠥᠷᠢᠭ ᠪᠥᠭᠡᠳ ᠭᠡᠭᠡᠨ᠃ ᠡᠨᠡ ᠨᠢ ᠣᠷᠳᠣᠰ ᠤ᠋ᠨ ᠥᠨᠳᠥᠷᠯᠢᠭ ᠦ᠋ᠨ ᠴᠢᠮᠡᠭ ᠪᠣᠯᠤᠭᠰᠠᠨ ᠠᠯᠳᠠᠷᠲᠤ ᠰᠠᠢᠬᠠᠨ ᠤᠨᠠᠭᠠᠨ ᠪᠦᠷᠢᠳᠦ ᠮᠥᠨ ᠠᠵᠢ᠃ ᠶᠠᠪᠤᠵᠤ ᠪᠠᠢᠲᠠᠯᠠ ᠮᠠᠩᠬᠠᠨ ᠵᠠᠮ ᠪᠢᠳᠡᠨ ᠢ᠋ ᠬᠥᠲᠥᠯᠵᠦ ᠲᠡᠭᠷᠢ ᠶ᠋ᠢᠨ ᠨᠠᠷᠠ ᠦᠵᠡᠭᠳᠡᠬᠦ ᠦᠭᠡᠢ ᠪᠠᠯᠠᠷ ᠲᠦᠩ ③ ᠳ᠋ᠦ᠍ ᠣᠷᠣᠭᠤᠯᠪᠠ᠃ ᠡᠨᠡ ᠬᠢᠷᠢ ᠳ᠋ᠦ᠍ ᠮᠠᠩᠬᠠᠨ ᠳᠠᠯᠠᠢ ᠶ᠋ᠢᠨ ᠰᠢᠲᠠᠭᠠᠮᠠ ᠬᠠᠯᠠᠭᠤᠨ ᠬᠣᠯᠠ ᠬᠠᠶᠠᠭᠳᠠᠵᠤ᠂ ᠴᠢᠭᠢᠭ ᠦ᠋ᠨ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠳᠦᠭᠦᠷᠦᠭᠰᠡᠨ ᠰᠡᠷᠢᠭᠦᠨ ᠰᠠᠯᠬᠢ ᠡᠩᠭᠡᠯᠵᠡᠭᠦᠷ ᠥᠭᠡᠳᠡ ᠰᠡᠩᠭᠢᠨᠡᠵᠦ ᠨᠢᠭᠡ ᠯᠡ ᠴᠠᠭ ᠢ᠋ᠶ᠋ᠠᠷ ᠨᠠᠮᠤᠷ ᠪᠣᠯᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠭᠤᠯᠤᠨᠠ᠃ ᠡᠨᠳᠡ ᠶᠣᠰᠣᠲᠠᠢ ᠵᠦᠢᠯ ᠦ᠋ᠨ ᠰᠢᠪᠠᠭᠤᠳ ᠤ᠋ᠨ ᠴᠡᠩᠭᠡᠯᠲᠦ ᠣᠷᠣᠨ ᠪᠠᠢᠵᠠᠢ᠃ ᠬᠣᠯᠠ ᠠ᠋ᠴᠠ ᠬᠥᠬᠥᠭᠡ ᠰᠢᠪᠠᠭᠤ ᠳᠣᠩᠭᠣᠳᠤᠨ᠂ ᠬᠣᠢᠭᠤᠷ ᠡᠮᠦᠨᠡᠭᠦᠷ ᠬᠠᠷᠢᠶᠠᠴᠠᠢ ᠬᠠᠯᠢᠨ ᠨᠢᠰᠴᠦ᠂ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠪᠣᠯᠵᠣᠮᠣᠷ ᠴᠡᠭᠴᠡᠦᠬᠡᠢ ᠵᠢᠷᠭᠢᠨᠡ᠃
ᠡᠨᠳᠡ ᠬᠢᠩᠭᠠᠨ ᠠᠭᠤᠯᠠᠨ ᠤ᠋ ᠣᠢ ᠮᠡᠲᠦ ᠰᠦᠷᠯᠢᠭ ᠨᠠᠷᠠᠰᠤ ᠦᠵᠡᠭᠳᠡᠬᠦ ᠦᠭᠡᠢ᠂ ᠠᠪᠠ ᠶ᠋ᠢᠨ ᠠᠭᠤᠯᠠᠨ ᠤ᠋ ᠣᠢ ᠮᠡᠲᠦ ᠴᠡᠭᠡᠬᠡᠨ ᠬᠤᠰᠤ ᠬᠠᠷᠠᠭᠳᠠᠬᠤ ᠦᠭᠡᠢ᠂ ᠵᠥᠪᠬᠡᠨ ᠢᠭᠴᠤ ᠤᠷᠭᠤᠭᠰᠠᠨ ᠤᠳᠠ ᠤᠯᠢᠶᠠᠰᠤ ᠨᠢ ᠨᠠᠮᠠᠭᠠ ᠪᠠᠷ ᠢ᠋ᠶ᠋ᠠᠨ ᠨᠡᠢᠯᠡᠵᠦ᠂ ᠵᠠᠮ ᠤ᠋ᠨ ᠬᠣᠶᠠᠷ ᠲᠠᠯᠠ ᠪᠠᠷ ᠮᠣᠢᠯ᠂ ᠤᠬᠤᠨᠠᠢ᠂ ᠨᠣᠬᠠᠢ ᠶ᠋ᠢᠨ ᠬᠣᠰᠢᠭᠤ᠂ ᠦᠷᠢᠯ᠂ ᠬᠡᠭᠡᠷᠡ ᠶ᠋ᠢᠨ ᠠᠯᠢᠮᠠ ᠵᠡᠷᠭᠡ ᠶᠠᠭᠰᠢᠷᠠᠲᠠᠯᠠ ᠰᠠᠭᠤᠵᠤ᠂ ᠨᠥᠬᠥᠷᠰᠡᠭ ᠵᠣᠴᠢᠷᠬᠠᠭ ᠣᠷᠳᠣᠰ ᠤ᠋ᠨ ᠮᠠᠯᠴᠢᠳ ᠤ᠋ᠨ ᠲᠠᠪᠠᠭ ᠲᠠᠢ ᠴᠠᠭᠠᠨ ᠢᠳᠡᠭᠡ ᠮᠡᠲᠦ ᠬᠠᠮᠢᠭᠠᠰᠢ ᠪᠠᠨ ᠭᠠᠷ ᠰᠤᠩᠭᠠᠪᠠᠴᠤ ᠠᠪᠴᠤ ᠡᠮᠬᠦᠮᠡᠷ ᠪᠠᠢᠨᠠ ᠪᠢᠯᠡ᠃ ᠣᠢ ᠰᠢᠭᠤᠢ ᠶ᠋ᠢᠨ ᠵᠠᠬᠠ ᠠ᠋ᠴᠠ ᠭᠠᠷᠬᠤ ᠲᠠᠢ ᠵᠡᠷᠭᠡ ᠠᠳᠤᠭᠤ ᠮᠠᠯ ᠤ᠋ᠨ ᠰᠦᠷᠦᠭ ᠬᠠᠷᠠᠭᠳᠠᠵᠤ᠂ ᠬᠣᠨᠢᠴᠢᠨ ᠬᠡᠦᠬᠡᠨ ᠦ᠌ ᠬᠣᠩᠭᠣᠷ ᠳᠠᠭᠤᠨ ᠣᠢ ᠶ᠋ᠢᠨ ᠳᠣᠲᠣᠷᠠ ᠴᠤᠤᠷᠢᠶᠠᠲᠤᠨ ᠰᠣᠨᠣᠰᠳᠠᠨᠠ᠃
ᠤᠨᠠᠭᠠᠨ ᠪᠦᠷᠢᠳᠦ ᠶ᠋ᠢᠨ ᠭᠠᠳᠠᠭᠤᠷ ᠣᠭ᠌ᠶᠤᠨ ᠬᠡᠷᠡᠮ ᠪᠣᠯᠵᠤ ᠴᠠᠭᠠᠷᠢᠭᠯᠠᠭᠰᠠᠨ ᠪᠠᠯᠠᠷ ᠰᠢᠭᠤᠢ ᠶ᠋ᠢ ᠰᠢᠪᠲᠤᠯᠤᠨ ᠥᠩᠭᠡᠷᠡᠪᠡᠯ ᠴᠡᠴᠡᠭ ᠬᠤᠸᠠᠷ ᠢ᠋ᠶ᠋ᠠᠷ ᠴᠢᠮᠡᠭᠯᠡᠭᠰᠡᠨ ᠰᠣᠷᠭᠣᠭ ᠪᠡᠯᠴᠢᠭᠡᠷᠲᠦ ᠲᠠᠯᠠ ᠬᠠᠷᠠᠭᠳᠠᠨᠠ᠃ ᠤᠷᠠᠯᠠᠨ ᠨᠡᠬᠡᠭᠰᠡᠨ ᠬᠡᠪᠢᠰ ᠮᠡᠲᠦ ᠨᠠᠷᠢᠨ ᠵᠥᠭᠡᠯᠡᠨ ᠵᠦᠯᠭᠡᠨ ᠳᠡᠭᠡᠷᠡ ᠴᠠᠪᠠ ᠦᠭᠡᠢ ᠱᠠᠵᠠᠩ ᠰᠢᠭ᠋ ᠮᠠᠨᠤ ᠬᠤᠸᠠᠷ᠂ ᠴᠢᠰᠤᠨ ᠤᠯᠠᠭᠠᠨ ᠲᠤᠷᠤᠭ ᠰᠠᠷᠠᠨᠠ᠂ ᠠᠯᠲᠠᠨ ᠥᠩᠭᠡᠲᠡᠢ ᠰᠢᠷᠠ ᠬᠤᠸᠠᠷ᠂ ᠪᠢᠨᠳᠠᠷᠢᠶᠠᠨ ᠥᠩᠭᠡᠲᠡᠢ ᠪᠡᠷᠢᠴᠡᠴᠡᠭ ᠦ᠋ᠳ ᠥᠩᠭᠡ ᠢᠯᠭᠠᠷᠠᠨ ᠳᠡᠯᠭᠡᠷᠡᠭᠡᠳ ᠵᠢᠪᠠᠷ ᠤ᠋ᠨ ᠠᠶᠠᠰ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠲᠣᠬᠢᠯᠵᠠᠵᠤ ᠨᠠᠢᠭᠤᠨᠠ᠃ ᠴᠡᠴᠡᠭ ᠦ᠋ᠨ ᠳᠤᠮᠳᠠᠭᠤᠷ ᠥᠷᠥᠮᠡ ᠬᠤᠯᠠᠭᠠᠢᠴᠢ ᠰᠦᠯᠵᠢᠯᠳᠦᠵᠦ᠂ ᠥᠩᠭᠡ ᠪᠦᠷᠢ ᠶ᠋ᠢᠨ ᠡᠷᠪᠡᠬᠡᠢ ᠲᠡᠭᠦᠨ ᠦ᠌ ᠳᠡᠭᠡᠭᠦᠷ ᠨᠢᠰᠦᠨᠡ᠃ ᠴᠠᠰᠤ ᠴᠠᠭᠠᠨ ᠬᠣᠨᠢᠨ ᠰᠦᠷᠦᠭ᠂ ᠬᠠᠷᠠ ᠢᠮᠠᠭᠠ (ᠡᠨᠡ ᠪᠣᠯ ᠣᠷᠳᠣᠰ ᠤ᠋ᠨ ᠣᠨᠴᠠᠯᠢᠭ ᠤ᠋ᠨ ᠨᠢᠭᠡ ᠮᠥᠨ) ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠪᠡᠯᠴᠢᠨ ᠲᠣᠭᠲᠠᠬᠤ ᠠ᠋ᠴᠠ ᠭᠠᠳᠠᠨᠠ᠂ ᠮᠡᠯᠡᠢᠲᠡᠯᠡ ᠭᠤᠤᠵᠢᠭᠰᠠᠨ ᠮᠢᠬᠠᠯᠢᠭ ᠲᠠᠷᠭᠤᠨ ᠠᠳᠤᠭᠤᠨ ᠰᠦᠷᠦᠭ ᠨᠡᠩ ᠵᠤᠵᠠᠭᠠᠨ ᠬᠠᠷᠠᠭᠳᠠᠬᠤ ᠪᠥᠭᠡᠳ ᠦᠰᠦᠨ ᠦ᠌ ᠥᠩᠭᠡ ᠭᠢᠯᠲᠦᠭᠡᠨᠡᠵᠦ ᠲᠣᠰᠣ ᠲᠦᠷᠬᠢᠭᠰᠡᠨ ᠮᠡᠲᠦ ᠭᠡᠷᠡᠯᠲᠦᠨᠡ᠃ ᠬᠤᠷ ᠳᠡᠯ ④ ᠲᠡᠢ ᠠᠵᠢᠷᠭᠠ ᠨᠤᠭᠤᠳ ᠬᠦᠵᠦᠭᠦᠦ ᠳᠠᠷᠤᠨ ᠳᠡᠯ ᠰᠣᠭᠰᠣᠯᠵᠠᠭᠤᠯᠤᠨ ᠠᠳᠤᠭᠤᠨ ᠳᠤᠮᠳᠠᠭᠤᠷ ᠭᠦᠶᠦᠯᠴᠡᠨ ᠳᠠᠪᠬᠢᠯᠳᠤᠨᠠ᠃ ᠬᠠᠪᠤᠷ ᠤ᠋ᠨ ᠰᠡᠭᠦᠯ ᠵᠤᠨ ᠤ᠋ ᠡᠬᠢ ᠨᠢ ᠠᠳᠤᠭᠤᠨ ᠰᠦᠷᠦᠭ ᠦ᠋ᠨ 《ᠤᠷᠤᠭ ᠬᠤᠷᠢᠮ ᠤ᠋ᠨ ᠤᠯᠠᠷᠢᠯ》 ᠮᠥᠨ ᠪᠣᠯᠬᠣᠷ ᠵᠠᠷᠢᠮ ᠠᠵᠢᠷᠭᠠ ᠨᠢ ᠨᠠᠰᠤ ᠭᠦᠢᠴᠡᠭᠰᠡᠨ ᠪᠠᠢᠳᠠᠰᠤ ᠪᠠᠨ ᠰᠦᠷᠦᠭ ᠡᠴᠡ ᠪᠡᠨ ᠬᠠᠵᠠᠨ ᠭᠠᠷᠭᠠᠵᠤ 《ᠬᠠᠷᠢ ᠳ᠋ᠤ᠌ ᠥᠭᠭᠦᠨᠡ》᠃ ᠬᠠᠷᠢ ᠳ᠋ᠤ᠌ ᠥᠭᠭᠦᠭᠰᠡᠨ ᠪᠠᠢᠳᠠᠰᠤ ᠶ᠋ᠢ ᠨᠢ ᠨᠥᠭᠦᠭᠡ ᠠᠵᠢᠷᠭᠠ ᠨᠤᠭᠤᠳ 《ᠬᠦᠷᠭᠡᠯᠡᠨ》 ᠠᠪᠴᠤ ᠮᠠᠰᠢ ᠶᠠᠭᠠᠷᠠᠯᠲᠠᠢ ᠮᠥᠷᠲᠡᠭᠡᠨ ᠲᠡᠮᠡᠴᠡᠭᠡᠨ ᠲᠡᠢ ᠠᠵᠢ᠃ ᠰᠦᠷᠦᠭ ᠡᠴᠡ ᠬᠥᠭᠡᠭᠡᠭᠳᠡᠭᠰᠡᠨ ᠦᠷᠢᠶᠡ᠂ 《ᠬᠠᠷᠢ ᠳ᠋ᠤ᠌ ᠮᠣᠷᠳᠠᠭᠰᠠᠨ》 ᠪᠠᠢᠳᠠᠰᠤ ᠨᠤᠭᠤᠳ ᠮᠥᠨ ᠴᠤ᠌ ᠬᠣᠯᠠ ᠤᠷᠤᠭᠯᠠᠭᠰᠠᠨ ᠬᠡᠦᠬᠡᠨ ᠮᠡᠲᠦ ᠡᠴᠢᠭᠡ ᠡᠬᠡ ᠠᠬᠠ ᠳᠡᠭᠦᠦ ᠨᠠᠷ ᠠ᠋ᠴᠠ ᠪᠠᠨ ᠰᠠᠯᠤᠨ ᠶᠠᠳᠠᠵᠤ᠂ ᠳᠠᠬᠢᠨ ᠳᠠᠬᠢᠨ ᠤᠤᠯ ᠰᠦᠷᠦᠭ ᠤᠷᠤᠭᠤ ᠪᠠᠨ ᠬᠦᠷᠦᠯᠴᠡᠨ ᠢᠷᠡᠳᠡᠭ ᠪᠠᠢᠨᠠ᠃ ᠠᠳᠤᠭᠤᠨ ᠳᠤᠮᠳᠠᠭᠤᠷ ᠠᠯᠭᠤᠷᠬᠠᠨ ᠶᠠᠪᠤᠬᠤ ᠳ᠋ᠤ᠌:
ᠤᠨᠠᠭᠠᠨ ᠪᠦᠷᠢᠳᠦ ᠶ᠋ᠢᠨ ᠤᠰᠤ ᠨᠢ ᠠᠳᠤᠭᠤᠨ ᠰᠦᠷᠦᠭ ᠢ᠋ ᠲᠠᠲᠠᠨᠠ
ᠤᠬᠠᠭᠠᠨ ᠲᠠᠢ ᠭᠣᠶᠣᠬᠠᠨ ᠵᠠᠵᠠᠢ ⑤ ᠮᠢᠨᠦ ᠵᠢᠷᠦᠬᠡ ᠶ᠋ᠢ ᠲᠠᠲᠠᠨᠠ ᠭᠡᠰᠡᠨ ᠣᠷᠳᠣᠰ ᠠᠷᠠᠳ ᠤ᠋ᠨ ᠡᠷᠲᠡᠨ ᠦ᠌ ᠳᠠᠭᠤᠤ ᠰᠠᠨᠠᠭᠳᠠᠨᠠ᠃ ᠤᠨᠠᠭᠠᠨ ᠪᠦᠷᠢᠳᠦ ᠶ᠋ᠢᠨ ᠬᠥᠪᠡᠭᠡᠨ ᠳ᠋ᠦ᠍ ᠡᠷᠲᠡᠨ ᠡᠴᠡ ᠠᠪᠤᠭᠠᠳ ᠠᠳᠤᠭᠤ ᠶᠡᠬᠡ ᠦᠷᠡᠵᠢᠳᠡᠭ ᠪᠥᠭᠡᠳ ᠬᠤᠷᠳᠤᠨ ᠮᠣᠷᠢ ᠭᠠᠷᠳᠠᠭ ᠠᠯᠳᠠᠷ ᠲᠠᠢ᠃
ᠨᠠᠮᠤᠷ ᠬᠠᠪᠤᠷ ᠤ᠋ᠨ ᠤᠯᠠᠷᠢᠯ ᠤ᠋ᠨ ᠰᠠᠷᠠ ᠲᠠᠢ ᠰᠥᠨᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠨᠠᠭᠤᠷ ᠤ᠋ᠨ ᠤᠰᠤ ᠲᠡᠭᠷᠢ ᠲᠤᠯᠤᠮᠠ ᠣᠷᠭᠢᠯᠤᠨ ᠳᠣᠲᠣᠷᠠ ᠠ᠋ᠴᠠ ᠨᠢ ᠠᠯᠲᠠᠨ ᠤᠨᠠᠭᠠ ᠭᠠᠷᠴᠤ ᠢᠷᠡᠭᠡᠳ᠂ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡ ᠶ᠋ᠢᠨ ᠵᠥᠭᠡᠯᠡᠨ ᠵᠦᠯᠭᠡᠨ ᠳᠡᠭᠡᠷᠡ ᠲᠣᠭᠯᠠᠨ ᠭᠦᠶᠦᠵᠦ᠂ ᠬᠥᠷᠪᠡᠨ ᠨᠠᠭᠠᠳᠳᠠᠭ ᠭᠡᠰᠡᠨ ᠡᠷᠲᠡᠨ ᠦ᠌ ᠳᠣᠮᠣᠭ ᠪᠠᠢᠳᠠᠭ ᠠᠵᠢ᠃ ᠲᠡᠷᠡ ᠳᠣᠮᠣᠭ ᠲᠤ᠌: ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠨᠢᠭᠡᠨ ᠪᠠᠭᠠᠲᠤᠷ᠂ ᠳᠠᠢᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠠᠳ ᠳᠤᠲᠠᠭᠠᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠠᠯᠲᠠᠨ ᠰᠢᠷᠭᠠ ᠮᠣᠷᠢ ᠨᠢ ᠪᠡᠶᠡ ᠳ᠋ᠡᠭᠡᠨ ᠳᠣᠯᠣᠭᠠᠨ ᠵᠡᠪᠡ ᠶᠢᠰᠦᠨ ᠰᠢᠷᠬᠠ ᠲᠠᠢ ᠪᠠᠢᠲᠠᠯᠠ ᠲᠦᠮᠡᠨ ᠵᠡᠪᠡ ᠮᠢᠩᠭᠠᠨ ᠵᠢᠳᠠᠨ ᠤ᠋ ᠳᠤᠮᠳᠠᠭᠤᠷ ᠰᠢᠷᠭᠤᠨ ᠭᠠᠷᠴᠤ᠂ ᠡᠵᠡᠨ ᠢ᠋ᠶ᠋ᠡᠨ ᠠᠪᠤᠷᠠᠨ ᠭᠠᠷᠭᠠᠭᠠᠳ᠂ ᠡᠨᠡ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠢᠷᠡᠵᠦ ᠦᠬᠦᠭᠰᠡᠨ ᠶᠦᠮ ᠭᠡᠨᠡ᠃ ᠴᠢᠩᠭᠢᠭᠡᠳ ᠡᠵᠡᠨ ᠨᠢ ᠮᠣᠷᠢᠨ ᠤ᠋ ᠪᠠᠨ ᠬᠡᠭᠦᠷ ᠢ᠋ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠣᠷᠣᠰᠢᠭᠤᠯᠤᠭᠠᠳ᠂ ᠬᠠᠢᠷᠠᠲᠤ ᠬᠦᠯᠦᠭ ᠢ᠋ᠶ᠋ᠡᠨ ᠮᠥᠷᠥᠭᠡᠳᠴᠦ ᠰᠠᠨᠠᠬᠤ ᠳ᠋ᠠᠭᠠᠨ ᠽᠠᠨᠳᠠᠨ ᠮᠣᠳᠣᠨ ᠲᠣᠯᠣᠭᠠᠢ ᠲᠠᠢ ᠮᠣᠷᠢᠨ ᠬᠤᠭᠤᠷ ᠵᠣᠬᠢᠶᠠᠵᠤ᠂ ᠮᠣᠷᠢᠨ ᠤ᠋ ᠪᠠᠨ ᠳᠡᠯ ᠰᠡᠭᠦᠯ ᠢ᠋ᠶ᠋ᠡᠷ ᠨᠢ ᠴᠢᠪᠬᠠᠳᠠᠰᠤ ᠬᠢᠵᠦ᠂ ᠡᠭᠡᠰᠢᠭᠲᠦ ᠳᠠᠭᠤᠨ ᠵᠣᠬᠢᠶᠠᠵᠤ ᠮᠣᠷᠢ ᠪᠠᠨ ᠮᠠᠭᠲᠠᠨ ᠳᠠᠭᠤᠯᠠᠭᠰᠠᠨ ᠠᠵᠢ᠃ ᠡᠴᠦᠰ ᠲᠡᠭᠡᠨ ᠪᠠᠭᠠᠲᠤᠷ ᠰᠢᠷᠭᠠ ᠮᠣᠷᠢ ᠠᠯᠲᠠᠨ ᠤᠨᠠᠭᠠ ᠪᠣᠯᠵᠤ ᠨᠠᠭᠤᠷ ᠠ᠋ᠴᠠ ᠭᠠᠷᠴᠤ ᠢᠷᠡᠭᠡᠳ᠂ ᠡᠵᠡᠨ ᠦ᠌ ᠪᠡᠨ ᠵᠦᠭ ᠬᠠᠩᠭᠢᠨᠠᠲᠠᠯᠠ ᠦᠦᠷᠰᠡᠳᠡᠭ ᠪᠣᠯᠵᠠᠢ᠃ ᠠᠯᠲᠠᠨ ᠤᠨᠠᠭᠠ ᠶ᠋ᠢᠨ ᠳᠠᠭᠤᠨ ᠮᠢᠩᠭᠠᠨ ᠭᠠᠵᠠᠷ ᠴᠤᠤᠷᠢᠶᠠᠲᠤᠵᠤ᠂ ᠣᠷᠳᠣᠰ ᠤ᠋ᠨ ᠲᠦᠮᠡᠨ ᠠᠳᠤᠭᠤ ᠲᠡᠭᠦᠨ ᠦ᠌ ᠳᠠᠭᠤᠨ ᠵᠦᠭ ᠭᠦᠶᠦᠯᠴᠡᠳᠡᠭ ᠤᠴᠢᠷ ᠠ᠋ᠴᠠ ᠡᠨᠡ ᠨᠠᠭᠤᠷ ᠢ᠋ ᠤᠨᠠᠭᠠᠨ ᠪᠦᠷᠢᠳᠦ ᠭᠡᠵᠦ ᠨᠡᠷᠡᠢᠳᠦᠭᠰᠡᠨ ᠪᠥᠭᠡᠳ ᠡᠨᠳᠡ ᠠᠳᠤᠭᠤ ᠶᠡᠬᠡ ᠥᠰᠴᠦ ᠬᠤᠷᠳᠤᠨ ᠮᠣᠷᠢ ᠭᠠᠷᠳᠠᠭ ᠤᠯᠠᠮᠵᠢᠯᠠᠯ ᠲᠠᠢ ᠪᠣᠯᠤᠭᠰᠠᠨ ᠭᠡᠨᠡ᠃ ᠭᠠᠭᠴᠠ ᠮᠣᠷᠢ ᠪᠠᠨ ᠦᠬᠦᠭᠦᠯᠦᠭᠡᠳ ᠭᠣᠨᠢᠷᠬᠠᠯᠲᠤ ᠳᠠᠭᠤᠤ ᠳᠠᠭᠤᠯᠠᠵᠤ ᠰᠠᠭᠤᠭᠰᠠᠨ ᠲᠡᠷᠡ ᠪᠠᠭᠠᠲᠤᠷ ᠤ᠋ᠨ ᠦᠷᠡᠰ ᠣᠷᠳᠣᠰ ᠨᠤᠲᠤᠭ ᠤ᠋ᠨ ᠡᠵᠡᠨ ᠨᠢ ᠪᠣᠯᠤᠭᠠᠳ ᠲᠦᠮᠡᠨ ᠠᠳᠤᠭᠤ ᠮᠢᠩᠭᠠᠨ ᠠᠭᠲᠠ ᠪᠠᠷ ᠢ᠋ᠶ᠋ᠠᠨ ᠠᠭᠤᠯᠠ ᠲᠠᠯᠠ ᠶ᠋ᠢ ᠳᠦᠭᠦᠷᠭᠡᠵᠦ᠂ ᠲᠠᠷᠭᠤᠨ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠰᠦᠪᠡᠭᠡ ᠲᠤᠯᠤᠨ ᠰᠠᠭᠤᠭᠠᠳ ᠢᠨᠠᠭ ᠳᠤᠷᠠᠯᠠᠯ᠂ ᠵᠣᠯ ᠵᠢᠷᠭᠠᠯ ᠤ᠋ᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨᠠ᠃
ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠣᠢᠷᠠᠲᠤᠬᠤ ᠳᠣᠳᠣᠮ ᠲᠡᠭᠦᠨ ᠦ᠌ ᠥᠩᠭᠡ ᠤᠯᠠᠮ ᠬᠤᠪᠢᠷᠠᠵᠤ ᠴᠠᠭᠠᠨ ᠠ᠋ᠴᠠ ᠪᠠᠨ ᠴᠡᠩᠬᠡᠷ ᠪᠣᠯᠵᠤ᠂ ᠴᠡᠩᠬᠡᠷ ᠡᠴᠡ ᠪᠡᠨ ᠬᠥᠬᠡ᠂ ᠬᠥᠬᠡ ᠡᠴᠡ ᠪᠡᠨ ᠬᠠᠷᠠ ᠬᠥᠬᠡ ᠪᠣᠯᠵᠤ᠂ ᠠᠯᠲᠠᠨ ᠮᠥᠩᠭᠥᠨ ᠵᠢᠭᠠᠰᠤ ᠬᠥᠪᠴᠦ ᠪᠠᠢᠬᠤ ᠮᠡᠲᠦ ᠭᠢᠯᠲᠦᠭᠡᠨᠡᠨ ᠳᠠᠪᠠᠯᠭᠠᠯᠠᠨᠠ᠃
ᠨᠠᠷᠠᠨ ᠪᠠᠷᠠᠭᠤᠨᠠ ᠬᠡᠯᠪᠡᠢᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠰᠦᠷᠦᠭ ᠰᠦᠷᠦᠭ ᠬᠣᠨᠢ ᠢᠮᠠᠭᠠ ᠬᠣᠲᠠ ᠤᠷᠤᠭᠤ ᠪᠠᠨ ᠬᠠᠨᠳᠤᠭᠰᠠᠨ ᠪᠠᠢᠲᠠᠯᠠ ᠪᠠᠰᠠ ᠬᠡᠳᠦ ᠬᠡᠳᠦᠨ ᠰᠦᠷᠦᠭ ᠬᠣᠨᠢ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡ ᠳᠠᠭᠠᠵᠤ ᠰᠦᠷᠦᠭᠯᠡᠨ ᠶᠠᠪᠤᠭᠰᠠᠭᠠᠷ ᠤᠯᠠᠮ ᠤᠯᠠᠮ ᠴᠢᠨᠠᠭᠰᠢᠯᠠᠵᠤ ᠰᠡᠭᠦᠯ ᠳ᠋ᠡᠭᠡᠨ ᠪᠦᠷ ᠨᠠᠭᠤᠷ ᠤ᠋ᠨ ᠭᠣᠣᠯ ᠤᠷᠤᠭᠤ ᠣᠷᠣᠵᠤ ᠬᠥᠪᠦᠨ ᠣᠳᠬᠤ ᠳ᠋ᠤ᠌ ᠪᠢ ᠰᠠᠶᠢ ᠲᠡᠭᠦᠨ ᠢ᠋ ᠬᠤᠨ ᠭᠠᠯᠠᠭᠤ ᠶ᠋ᠢᠨ ᠰᠦᠷᠦᠭ ᠭᠡᠵᠦ ᠮᠡᠳᠡᠯᠡ᠃ ᠣᠷᠳᠣᠰ ᠤ᠋ᠨ ᠮᠠᠯᠴᠢᠳ ᠬᠤᠨ ᠭᠠᠯᠠᠭᠤ ᠶ᠋ᠢ ᠬᠠᠪᠤᠷ ᠢ᠋ ᠤᠷᠢᠭᠰᠠᠨ ᠵᠢᠷᠭᠠᠯᠲᠤ ᠰᠢᠪᠠᠭᠤ ᠭᠡᠵᠦ ᠬᠠᠢᠷᠠᠯᠠᠳᠠᠭ ᠪᠣᠯᠬᠣᠷ ᠬᠠᠷᠪᠤᠵᠤ ᠨᠠᠮᠨᠠᠵᠤ ᠠᠯᠠᠵᠤ ᠨᠢᠲᠤᠯᠬᠤ ᠦᠭᠡᠢ᠂ ᠬᠤᠨ ᠭᠠᠯᠠᠭᠤ ᠴᠤ᠌ ᠬᠥᠮᠦᠨ ᠪᠤᠶᠤ ᠮᠠᠯ ᠠ᠋ᠴᠠ ᠠᠶᠤᠳᠠᠭ ᠦᠭᠡᠢ ᠠᠵᠢ᠃
ᠨᠠᠭᠤᠷ ᠤ᠋ᠨ ᠤᠰᠤ ᠰᠢᠨᠡ ᠪᠡᠷᠢ ᠶ᠋ᠢᠨ ᠨᠢᠭᠤᠷ ᠤ᠋ᠨ ᠲᠣᠯᠢ ᠮᠡᠲᠦ ᠲᠤᠩᠭᠠᠯᠠᠭ᠂ ᠢᠷᠣᠭᠠᠷ ᠲᠤᠨᠢ ᠪᠠᠢᠬᠤ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠴᠥᠮ ᠢᠷᠠᠯᠵᠠᠨ ᠦᠵᠡᠭᠳᠡᠨᠡ᠃ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡ ᠪᠡᠷ ᠠᠯᠭᠤᠷᠬᠠᠨ ᠶᠠᠪᠤᠬᠤ ᠳ᠋ᠤ᠌ ᠰᠡᠳᠬᠢᠯ ᠳᠣᠲᠣᠷᠠ ᠲᠤᠢᠯ ᠤ᠋ᠨ ᠰᠠᠷᠠᠭᠤᠯ ᠲᠡᠨᠢᠭᠦᠬᠡᠨ ᠰᠠᠨᠠᠭᠳᠠᠵᠤ᠂ ᠬᠤᠨ ᠭᠠᠯᠠᠭᠤ ᠶ᠋ᠢᠨ ᠳᠠᠭᠤᠨ᠂ ᠬᠣᠯᠠᠳᠤᠨ ᠣᠳᠬᠤ ᠮᠠᠯᠴᠢᠨ ᠪᠦᠰᠡᠭᠦᠢ ᠶ᠋ᠢᠨ ᠳᠠᠭᠤᠨ ᠯᠤᠭᠠ ᠬᠣᠣᠰᠯᠠᠯᠳᠤᠨ ᠬᠥᠮᠦᠰ ᠲᠦ᠍ ᠤᠯᠠᠮ ᠨᠠᠮ ᠰᠡᠯᠡᠭᠦᠨ ᠠᠮᠤᠷ ᠲᠦᠪᠰᠢᠨ ᠰᠡᠳᠬᠢᠯᠭᠡ ᠲᠥᠷᠥᠭᠳᠡᠭᠦᠯᠦᠨᠡ᠃ ᠣᠷᠣᠢ ᠳ᠋ᠠᠭᠠᠨ ᠡᠭᠦᠯᠡ ᠭᠣᠭᠴᠣᠭᠠᠯᠠᠭᠰᠠᠨ ᠡᠷᠬᠡᠲᠦ ᠬᠠᠢᠷᠬᠠᠨ ᠤ᠋ ᠰᠡᠭᠦᠳᠡᠷ ᠨᠠᠭᠤᠷ ᠤ᠋ᠨ ᠤᠰᠤᠨ ᠳ᠋ᠤ᠌ ᠲᠣᠰᠴᠤ᠂ ᠮᠥᠩᠭᠥᠨ ᠳᠤᠭᠤᠯᠠᠭᠠ ᠡᠮᠦᠰᠦᠭᠰᠡᠨ ᠵᠠᠩᠵᠤᠨ ᠰᠦᠪᠡᠭᠡ ᠳᠠᠷᠤᠨ ᠵᠣᠭᠰᠣᠭᠰᠠᠨ ᠰᠢᠭ᠋ ᠰᠦᠷᠯᠢᠭ ᠬᠠᠷᠠᠭᠳᠠᠨᠠ᠃ ᠡᠨᠡ ᠬᠢᠷᠢ ᠳ᠋ᠦ᠍ ᠬᠡᠨ ᠴᠤ᠌ ᠪᠠᠷᠤᠭ ᠥᠯᠥᠰᠴᠦ ᠶᠠᠳᠠᠷᠠᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠨ ᠪᠠᠢᠭᠠᠯᠢ ᠶ᠋ᠢᠨ ᠭᠠᠢᠬᠠᠮᠰᠢᠭ ᠲᠤ᠌ ᠰᠢᠨᠤᠬᠠᠢᠷᠠᠨᠠ᠃ ᠭᠡᠪᠡᠴᠦ ᠬᠥᠯᠥᠷᠡᠭᠰᠡᠨ ᠲᠡᠮᠡᠭᠡ ᠬᠦᠵᠦᠭᠦᠦ ᠪᠡᠨ ᠰᠤᠩᠭᠠᠨ ᠵᠥᠭᠡᠯᠡᠨ ᠭᠠᠵᠠᠷ ᠢ᠋ ᠨᠡᠮᠡᠯᠵᠡᠲᠡᠯᠡ ᠭᠢᠰᠬᠢᠵᠦ ᠤᠯᠠᠮ ᠲᠦᠷᠭᠡᠯᠡᠪᠡ᠃
ᠠᠯᠲᠠᠨ ᠨᠠᠷᠠᠨ ᠠᠯᠤᠰ ᠤ᠋ᠨ ᠲᠣᠯᠣᠭᠠᠢ ᠳ᠋ᠤ᠌ ᠰᠢᠷᠭᠤᠬᠤ ᠦᠶᠡ ᠪᠡᠷ ᠪᠢᠳᠡ ᠡᠷᠬᠡᠲᠦ ᠶ᠋ᠢᠨ ᠬᠥᠲᠥᠯ ᠢ᠋ ᠳᠠᠪᠠᠪᠠ᠃ ᠴᠢᠨᠳᠠᠭᠠᠨ ᠴᠠᠭᠠᠨ ᠡᠭᠦᠯᠡᠰ ᠴᠢᠰ ᠤᠯᠠᠭᠠᠨ ᠪᠣᠯᠵᠤ ᠬᠥᠪᠡᠭᠡ ᠪᠡᠷ ᠨᠢ ᠠᠯᠲᠠ ᠪᠠᠷ ᠰᠢᠷᠳᠡᠭᠰᠡᠨ ᠮᠡᠲᠦ ᠰᠢᠷᠠᠯᠠᠨ ᠬᠡᠷᠡᠯᠳᠦᠵᠦ᠂ ᠨᠠᠭᠤᠷ ᠤ᠋ᠨ ᠤᠰᠤᠨ ᠳ᠋ᠤ᠌ ᠲᠤᠰᠴᠠᠢ᠃ ᠡᠨᠡ ᠵᠠᠭᠤᠷᠠ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠡᠴᠡ ᠡᠷᠭᠢᠨ ᠪᠠᠷᠠᠯᠠᠪᠠᠯ: ᠲᠡᠷᠭᠡᠯ ᠰᠠᠷᠠᠨ ᠮᠡᠲᠦ ᠲᠥᠭᠥᠷᠢᠭ ᠤᠨᠠᠭᠠᠨ ᠪᠦᠷᠢᠳᠦ ᠥᠪᠴᠢ ᠪᠡᠷ ᠢ᠋ᠶ᠋ᠡᠨ ᠭᠠᠯ ᠤᠯᠠᠢᠵᠤ ᠲᠡᠭᠦᠨ ᠢ᠋ ᠬᠦᠷᠢᠶᠡᠯᠡᠭᠰᠡᠨ ᠨᠣᠭᠣᠭᠠᠨ ᠲᠠᠯᠠ᠂ ᠲᠠᠯᠠ ᠶ᠋ᠢ ᠲᠣᠭᠣᠷᠢᠭᠰᠠᠨ ᠬᠥᠬᠡ ᠰᠢᠭᠤᠢ᠂ ᠰᠢᠭᠤᠢ ᠶ᠋ᠢᠨ ᠭᠠᠳᠠᠨᠠᠬᠢ ᠡᠯᠡᠰᠦᠨ ᠳᠠᠯᠠᠢ ᠲᠤᠰ ᠲᠤᠰ ᠢ᠋ᠶ᠋ᠠᠷ ᠥᠩᠭᠡ ᠢᠯᠭᠠᠷᠠᠨ᠂ ᠵᠠᠬᠠ ᠬᠢᠵᠠᠭᠠᠷ ᠦᠭᠡᠢ ᠶᠡᠬᠡ ᠵᠠᠰᠠᠷ⑥ ᠴᠠᠮᠪᠠᠨ⑦ ᠳᠡᠭᠡᠷᠡ ᠬᠥᠮᠥᠷᠢᠭᠰᠡᠨ ᠲᠣᠮᠣ ᠠᠯᠲᠠᠨ ᠲᠠᠪᠠᠭ ᠠ᠋ᠴᠠ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠭᠡᠷᠡᠯ ᠰᠠᠴᠤᠷᠠᠵᠤ ᠪᠠᠢᠬᠤ ᠮᠡᠲᠦ ᠬᠠᠷᠠᠭᠳᠠᠨᠠ᠃
ᠡᠨᠡ ᠰᠠᠢᠬᠠᠨ ᠪᠠᠢᠭᠠᠯᠢ ᠶ᠋ᠢᠨ ᠭᠠᠢᠬᠠᠮᠰᠢᠭ ᠢ᠋ ᠪᠠᠬᠠᠷᠬᠠᠨ ᠵᠣᠭᠰᠣᠬᠤ ᠳ᠋ᠤ᠌ ᠶᠠᠳᠠᠷᠠᠯ ᠵᠦᠳᠡᠷᠡᠯ ᠢ᠋ ᠴᠥᠮ ᠲᠠᠢᠳᠬᠤᠷᠠᠭᠤᠯᠵᠤ᠂ ᠴᠡᠭᠡᠵᠢ ᠰᠠᠷᠠᠭᠤᠯ ᠰᠡᠳᠬᠢᠯ ᠠᠭᠤᠳᠠᠮ ᠪᠣᠯᠬᠤ ᠠ᠋ᠴᠠ ᠭᠠᠳᠠᠨᠠ ᠡᠬᠡ ᠣᠷᠣᠨ ᠤ᠋ ᠬᠣᠲᠠᠯᠠ ᠲᠡᠭᠦᠯᠳᠡᠷ ᠤᠮᠠᠷᠠᠲᠤ ᠣᠷᠣᠨ ᠳ᠋ᠤ᠌ ᠬᠢᠵᠠᠭᠠᠷ ᠦᠭᠡᠢ ᠬᠠᠢᠷᠠ ᠪᠠᠬᠠ ᠲᠥᠷᠥᠭᠳᠡᠨᠡ!
ᠲᠠᠢᠯᠪᠤᠷᠢ
ᠲᠤᠰ ᠬᠢᠴᠢᠶᠡᠯ ᠢ 《ᠠᠯᠲᠠᠨ ᠬᠢᠯᠢ ᠶᠢᠨ ᠦᠵᠡᠰᠬᠦᠯᠡᠩ》(ᠥᠪᠥᠷ ᠮᠣᠩᠭᠣᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠦᠨ ᠬᠣᠷᠢᠶᠠ᠂ 1977ᠣᠨ ᠤ ᠬᠡᠪᠯᠡᠯ) ᠡᠴᠡ ᠰᠣᠩᠭᠣᠪᠠ᠃ ᠠ᠊᠂ ᠣᠳᠽᠠᠷ-ᠣᠷᠴᠢᠨ ᠦᠶᠡ ᠶᠢᠨ ᠠᠯᠳᠠᠷᠲᠤ ᠵᠣᠬᠢᠶᠠᠯᠴᠢ᠃
① ᠪᠦᠷᠢᠳᠦ [burd]- ᠤᠰᠤ ᠡᠪᠡᠰᠦ ᠲᠠᠢ ᠭᠠᠵᠠᠷ᠃
② ᠲᠤᠵᠢ [tᶷʤ]- ᠲᠤᠷᠰᠢ᠂ ᠲᠤᠭᠤᠰᠢ᠂ ᠦᠷᠭᠦᠯᠵᠢ᠃
③ ᠲᠦᠩ [tᶷᵑ]- ᠰᠢᠬᠢᠭᠦᠦ ᠪᠢᠲᠡᠭᠦᠦ ᠣᠢ᠃
④ ᠬᠤᠷ ᠳᠡᠯ -ᠠᠳᠤᠭᠤᠨ ᠤ ᠬᠠᠢᠴᠢᠯᠠᠵᠤ ᠵᠠᠰᠠᠭᠰᠠᠨ ᠦᠭᠡᠢ ᠳᠡᠯ᠃
⑤ ᠵᠠᠵᠠᠢ [ʤa:ʤai]] -ᠣᠷᠳᠣᠰ ᠨᠤᠲᠤᠭ ᠤᠨ ᠡᠭᠡᠴᠢ ᠪᠡᠨ ᠳᠠᠭᠤᠳᠠᠬᠤ ᠨᠡᠷᠡᠢᠳᠦᠯ᠃
⑥ ᠵᠠᠰᠠᠷ [ʤasar] -ᠠᠯᠲᠠᠨ ᠤᠲᠠᠰᠤ ᠪᠠᠷ ᠨᠡᠬᠡᠭᠰᠡᠨ ᠪᠠᠷᠠᠭᠠ᠃
⑦ ᠴᠠᠮᠪᠠ [ʧambə]-ᠲᠥᠪᠡᠳ ᠦᠨ ᠨᠣᠣᠰᠣᠨ ᠪᠠᠷᠠᠭᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠤᠮᠤᠴᠢᠨ ᠪᠢᠯᠢᠭ
ᠬᠢᠨᠠᠭᠴᠢ᠄ ᠭᠡᠷᠡᠯ᠂ ᠮᠥᠩᠭᠦᠨᠴᠡᠴᠡᠭ