ᠬᠠᠪᠤᠷ ᠤ᠋ᠨ ᠰᠠᠢᠬᠠᠨ ᠡᠳᠦᠷ- ᠳ· ᠨᠠᠴᠤᠭᠳᠣᠷᠵᠢХаврын сайхан өдөр-Д.Нацагдорж
280 ᠳ· ᠨᠠᠴᠤᠭᠳᠣᠷᠵᠢ
ᠬᠠᠪᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠶᠢᠰᠦᠨ᠂ ᠨᠢᠮᠠ ᠭᠠᠷᠠᠭ᠂ ᠲᠦᠮᠡᠨ ᠪᠣᠳᠠᠰ ᠤ᠋ᠨ ᠳᠡᠯᠭᠡᠷᠡᠬᠦ ᠶ᠋ᠢᠨ ᠦᠶᠡᠰ ᠦᠨᠡᠬᠡᠷ ᠨᠢᠭᠡ ᠰᠠᠢᠬᠠᠨ ᠴᠡᠯᠮᠡᠭ ᠪᠥᠭᠡᠳ ᠬᠥᠮᠦᠨ ᠪᠦᠬᠦᠨ ᠦ᠌ ᠵᠢᠷᠦᠬᠡ ᠰᠡᠳᠬᠢᠯ ᠢ᠋ ᠬᠥᠳᠡᠯᠭᠡᠭᠰᠡᠨ ᠰᠠᠢᠬᠠᠨ ᠥᠷᠯᠥᠭᠡ ᠪᠠᠢᠪᠠ᠃
ᠵᠦᠷᠮᠡᠳ ᠡᠷᠲᠡᠯᠡᠨ ᠪᠣᠰᠴᠤ ᠵᠡᠷᠭᠡᠯᠡᠳᠡᠭᠡ ᠠᠢᠯ ᠳ᠋ᠠᠬᠢ ᠥᠪᠡᠷ ᠦ᠋ᠨ ᠢᠨᠠᠭ ᠬᠥᠮᠦᠨ ᠳᠤᠮᠠ ᠲᠠᠢ ᠮᠣᠷᠢ ᠤᠨᠤᠵᠤ ᠵᠤᠭᠠᠯᠠᠨ ᠶᠠᠪᠤᠪᠠ᠃ ᠬᠠᠷᠠ ᠭᠡᠷ ᠦᠨ ᠬᠠᠶᠠᠭᠠᠨ ᠠ᠋ᠴᠠ ᠭᠠᠷᠴᠤ ᠮᠣᠷᠳᠠᠨ ᠶᠠᠪᠤᠬᠤ ᠳ᠋ᠤ᠌ ᠵᠦᠷᠮᠡᠳ ᠦ᠋ᠨ ᠪᠣᠷᠣ ᠮᠣᠷᠢ ᠳᠣᠮᠠ ᠶ᠋ᠢᠨ ᠰᠢᠷᠭᠠ ᠮᠣᠷᠢᠨ ᠤ᠋ ᠠᠯᠬᠤᠭᠠ ᠨᠡᠢᠯᠡᠵᠦ᠂ ᠲᠣᠯᠣᠭᠠᠢ ᠳᠠᠷᠤᠨ ᠶᠠᠪᠤᠬᠤ ᠨᠢ ᠲᠩᠷᠢ ᠲᠤᠩᠭᠠᠯᠠᠭ ᠠᠭᠠᠷ ᠠᠷᠢᠭᠤᠨ ᠡᠨᠡ ᠬᠦ᠌ ᠲᠠᠭᠠᠯᠠᠮᠵᠢᠲᠠᠢ ᠥᠷᠯᠥᠭᠡ᠂ ᠲᠡᠷᠡ ᠬᠣᠶᠠᠷ ᠴᠢᠷᠠᠢ ᠴᠢᠷᠠᠢ ᠶ᠋ᠢ ᠬᠠᠷᠠᠵᠤ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠤᠷᠮᠠ ᠲᠠᠢ ᠦᠭᠡᠰ ᠰᠣᠯᠢᠯᠴᠠᠨ ᠲᠡᠷᠲᠡᠭᠡ ᠠᠭᠤᠯᠠ ᠶ᠋ᠢᠨ ᠵᠦᠭ ᠶᠠᠪᠤᠨᠠ᠃
ᠡᠨᠡ ᠡᠳᠦᠷ ᠦ᠋ᠨ ᠠᠶᠠᠲᠠᠢᠬᠠᠨ ᠳ᠋ᠤ᠌ ᠬᠣᠲᠠ ᠶ᠋ᠢᠨ ᠬᠥᠭᠰᠢᠨ ᠵᠠᠯᠠᠭᠤ ᠬᠥᠮᠦᠰ ᠬᠡᠨ ᠴᠦ᠍ ᠭᠡᠰᠡᠨ ᠭᠠᠳᠠᠨᠠ ᠶᠠᠪᠤᠵᠤ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠵᠤᠭᠠᠯᠠᠬᠤ ᠶ᠋ᠢ ᠦᠯᠦ ᠬᠦᠰᠡᠬᠦ ᠨᠢ ᠦᠭᠡᠢ᠃ ᠵᠠᠮ ᠶᠠᠪᠤᠬᠤ ᠬᠥᠮᠦᠨ ᠮᠣᠷᠢ ᠲᠠᠢ᠂ ᠲᠡᠷᠭᠡ ᠲᠡᠢ᠂ ᠶᠠᠪᠠᠭᠠᠨ᠂ ᠳᠤᠭᠤᠢ ᠲᠠᠢ ᠮᠠᠰᠢ ᠣᠯᠠᠨ ᠬᠡᠰᠡᠭ᠂ ᠠᠭᠤᠷ ᠤ᠋ᠨ ᠲᠡᠷᠭᠡ ᠲᠡᠢ ᠬᠥᠮᠦᠰ ᠬᠠᠵᠠᠭᠤ ᠪᠠᠷ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠵᠥᠷᠢᠯᠴᠡᠨ ᠥᠩᠭᠡᠷᠡᠬᠦ ᠪᠣᠯᠪᠠᠴᠤ ᠵᠦᠷᠮᠡᠳ ᠳᠣᠮᠠ ᠬᠣᠶᠠᠷ ᠤ᠋ᠨ ᠮᠣᠷᠢ ᠶᠠᠪᠤᠬᠤ ᠰᠢᠭ᠋ ᠵᠣᠬᠢᠰᠲᠠᠢ ᠨᠢ ᠦᠭᠡᠢ᠃
ᠡᠭᠦᠨ ᠡᠴᠡ ᠬᠠᠵᠠᠭᠤ ᠶ᠋ᠢᠨ ᠮᠥᠷᠡᠨ ᠢ᠋ ᠲᠤᠭᠤᠯᠤᠨ ᠭᠠᠷᠴᠤ ᠡᠮᠦᠨᠡᠲᠦ ᠠᠭᠤᠯᠠ ᠶ᠋ᠢᠨ ᠪᠠᠯ ᠳ᠋ᠤ᠌ ᠬᠦᠷᠪᠡᠯ ᠵᠠᠯᠠᠭᠤ ᠨᠣᠭᠣᠭᠠ ᠰᠠᠶᠢ ᠭᠠᠷᠴᠤ ᠪᠦᠬᠦᠢ ᠯᠡ ᠠᠭᠤᠯᠠ ᠶ᠋ᠢᠨ ᠪᠡᠶᠡ ᠶ᠋ᠢ ᠬᠢᠯᠢᠩ ᠮᠡᠲᠦ ᠪᠦᠷᠬᠦᠭᠡᠳ ᠲᠡᠭᠦᠨ ᠦ᠌ ᠣᠷᠣᠢ ᠶ᠋ᠢ ᠨᠣᠭᠣᠭᠠᠨ ᠮᠣᠳᠣ ᠪᠠᠷ ᠬᠤᠴᠢᠭᠰᠠᠨ ᠨᠢ ᠥᠩᠭᠡ ᠪᠠᠢᠳᠠᠯ ᠨᠢᠳᠦᠨ ᠳ᠋ᠦ᠍ ᠦᠨᠡᠬᠡᠷ ᠦᠵᠡᠮᠵᠢᠲᠡᠢ ᠪᠣᠯᠤᠭᠠᠳ ᠦᠨᠦᠷ ᠨᠢ ᠲᠤᠢᠯ ᠤ᠋ᠨ ᠰᠠᠢᠬᠠᠨ᠃
ᠵᠦᠷᠮᠡᠳ ᠥᠪᠡᠷ ᠦ᠋ᠨ ᠢᠨᠠᠭ ᠬᠥᠮᠦᠨ ᠦ᠌ ᠬᠠᠮᠲᠤ ᠠᠭᠤᠯᠠ ᠥᠭᠡᠳᠡ ᠠᠪᠠᠷᠢᠵᠤ ᠮᠣᠳᠣᠨ ᠤ᠋ ᠵᠠᠬᠠ ᠳ᠋ᠤ᠌ ᠬᠦᠷᠦᠭᠡᠳ ᠬᠣᠶᠠᠷ ᠮᠣᠷᠢ ᠶ᠋ᠢ ᠬᠣᠯᠪᠣᠨ ᠢᠳᠡᠭᠦᠯᠵᠦ᠂ ᠬᠣᠶᠠᠭᠤᠯᠠ ᠨᠠᠢ᠍ᠮᠠᠨ ᠴᠢᠯᠠᠭᠤᠨ ᠤ᠋ ᠳᠡᠭᠡᠷᠡ ᠮᠥᠷᠥ ᠵᠡᠷᠭᠡᠴᠡᠨ ᠰᠠᠭᠤᠵᠤ᠂ ᠲᠡᠷᠲᠡᠭᠡ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠪᠠ ᠲᠠᠯᠠ ᠶ᠋ᠢᠨ ᠵᠡᠷᠭᠡᠯᠭᠡᠨ ᠢ᠋ ᠬᠠᠷᠠᠵᠤ᠂ ᠥᠪᠡᠷᠰᠡᠳ ᠦ᠋ᠨ ᠢᠨᠠᠭ ᠤ᠋ᠨ ᠦᠭᠡ ᠶ᠋ᠢ ᠬᠡᠯᠡᠯᠴᠡᠬᠦ ᠳ᠋ᠦ᠍ ᠡᠨᠡᠲᠡᠭᠡ ᠲᠡᠷᠲᠡᠭᠡ ᠴᠢᠪ ᠴᠢᠮᠡᠭᠡ ᠦᠭᠡᠢ ᠂ ᠰᠠᠯᠬᠢ ᠴᠤ ᠪᠣᠯᠪᠠ ᠲᠣᠪ ᠳᠤᠭᠤᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠭᠠᠭᠴᠠ ᠬᠦ᠌ ᠬᠠᠵᠠᠭᠤ ᠶ᠋ᠢᠨ ᠴᠡᠴᠡᠭ ᠤᠭᠲᠤᠵᠤ ᠲᠡᠷᠡ ᠬᠣᠶᠠᠷ ᠤ᠋ᠨ ᠵᠦᠭ ᠰᠡᠮᠬᠡᠨ ᠢᠨᠢᠶᠡᠮᠰᠦᠭᠯᠡᠨᠡ᠃
ᠬᠠᠷᠢᠯᠴᠠᠨ ᠵᠠᠯᠠᠭᠤ ᠰᠠᠢᠬᠠᠨ ᠢᠨᠠᠭ ᠤ᠋ᠨ ᠦᠭᠡ ᠶ᠋ᠢ ᠶᠠᠷᠢᠨ ᠶᠠᠷᠢᠭᠰᠠᠭᠠᠷ ᠪᠠᠢᠲᠠᠯᠠ ᠪᠠᠨ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠡᠮᠦᠨᠡᠲᠦ ᠨᠢᠭᠡ ᠠᠭᠤᠯᠠᠨ ᠳ᠋ᠤ᠌ ᠦᠳᠡᠰᠢ ᠶ᠋ᠢᠨ ᠪᠦᠷᠦᠭ ᠭᠡᠷᠡᠯ ᠲᠤᠨᠵᠤ᠂ ᠰᠡᠪ ᠰᠡᠮᠬᠡᠨ ᠪᠣᠯᠵᠠᠢ᠃ ᠪᠤᠰᠤᠳ ᠣᠯᠠᠨ ᠵᠣᠴᠢᠳ ᠴᠥᠮ ᠭᠡᠷ ᠲᠡᠭᠡᠨ ᠪᠤᠴᠠᠵᠠᠢ᠃ ᠴᠢᠪ ᠴᠢᠮᠡᠭᠡ ᠦᠭᠡᠢ ᠣᠢ ᠶ᠋ᠢᠨ ᠬᠠᠷᠠᠩᠭᠤᠢ ᠭᠦᠨ ᠳ᠋ᠦ᠍ ᠲᠡᠷᠡ ᠬᠣᠶᠠᠷ ᠦᠨᠡᠬᠡᠷ ᠲᠠᠢᠪᠤᠩ ᠢ᠋ᠶ᠋ᠠᠷ ᠴᠠᠭ ᠢ᠋ ᠥᠩᠭᠡᠷᠡᠭᠦᠯᠦᠨᠡ᠃
ᠡᠨᠡ ᠦᠶᠡ ᠭᠠᠭᠴᠠ ᠬᠦ᠌ ᠬᠠᠵᠠᠭᠤ ᠶ᠋ᠢᠨ ᠪᠤᠯᠠᠭ ᠤ᠋ᠨ ᠤᠰᠤ ᠬᠣᠷᠴᠢᠭᠢᠨᠠᠵᠤ᠂ ᠬᠡᠭᠡᠷᠡ ᠶ᠋ᠢᠨ ᠰᠢᠪᠠᠭᠤ ᠢᠷᠠᠭᠤᠬᠠᠨ ᠢ᠋ᠶ᠋ᠠᠷ ᠵᠢᠷᠭᠢᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠰᠤᠳᠤᠯᠲᠤ᠂ ᠡᠷᠳᠡᠨᠢᠭᠣᠤᠠ
ᠬᠢᠨᠠᠭᠴᠢ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ