ᠬᠤᠪᠢᠰᠬᠠᠯ ᠤᠨ ᠦᠷᠡ- ᠳ· ᠨᠠᠴᠤᠭᠳᠣᠷᠵᠢХувьсгалын үр-Д.Нацагдорж
321 ᠳ· ᠨᠠᠴᠤᠭᠳᠣᠷᠵᠢ
ᠬᠠᠪᠤᠷ ᠤ᠋ᠨ ᠨᠠᠢᠷᠲᠠᠢ ᠤᠯᠠᠷᠢᠯ ᠢᠷᠡᠬᠦ ᠳ᠋ᠦ᠍ ᠪᠤᠷᠭᠠᠰᠤᠨ ᠤ᠋ ᠵᠤᠯᠵᠠᠭᠠ ᠴᠣᠮᠣᠷᠯᠢᠭ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠪᠤᠯᠲᠠᠢᠨ ᠴᠡᠴᠡᠭᠯᠡᠵᠦ ᠵᠤᠭᠠᠴᠠᠬᠤ ᠪᠠᠷ ᠣᠳᠣᠭᠴᠢᠳ ᠤ᠋ᠨ ᠰᠡᠳᠬᠢᠯ ᠢ᠋ ᠮᠠᠭᠠᠵᠢᠯᠠᠨᠠ᠃ ᠬᠠᠷᠭᠢᠰ ᠤ᠋ᠨ ᠰᠤᠷᠲᠠᠯ ᠠ᠋ᠴᠠ ᠮᠤᠯᠲᠤᠷᠠᠭᠰᠠᠨ ᠡᠬᠡ ᠪᠢᠴᠢᠬᠠᠨ ᠬᠡᠦᠬᠡᠳ ᠢ᠋ ᠥᠯᠥᠭᠡᠢ ᠡᠴᠡ ᠭᠠᠷᠤᠮᠠᠭᠴᠠ ᠴᠡᠴᠡᠷᠯᠢᠭ ᠦ᠋ᠨ ᠳᠣᠲᠣᠷᠠ ᠠᠪᠠᠴᠢᠵᠤ᠂ ᠲᠡᠭᠦᠨ ᠦ᠌ ᠨᠠᠭᠠᠳᠬᠤ ᠶ᠋ᠢ ᠦᠵᠡᠭᠡᠳ ᠪᠡᠶᠡᠰᠦᠨᠡ᠃ ᠬᠤᠪᠢᠰᠬᠠᠯ ᠤ᠋ᠨ ᠦᠶᠡ ᠳ᠋ᠦ᠍ ᠲᠥᠷᠥᠭᠰᠡᠨ ᠬᠡᠦᠬᠡᠳ ᠦ᠋ᠳ ᠬᠡᠦᠬᠡᠳ ᠦ᠋ᠨ ᠴᠡᠴᠡᠷᠯᠢᠭ ᠲᠦ᠍ ᠬᠥᠮᠦᠵᠢᠵᠦ᠂ ᠬᠥᠭᠡᠷᠦᠬᠦᠨ ᠲᠥᠭᠥᠷᠢᠭ ᠴᠢᠷᠠᠢ ᠨᠢ ᠬᠥᠷᠥᠰᠥᠵᠢᠭᠡᠳ ᠬᠣᠶᠠᠷ ᠬᠠᠷᠠ ᠨᠢᠳᠦ ᠨᠢ ᠲᠣᠷᠮᠣᠯᠵᠠᠨᠠ᠃ ᠬᠣᠯᠠ ᠣᠢᠷᠠ ᠠ᠋ᠴᠠ ᠢᠷᠡᠭᠰᠡᠨ ᠬᠥᠭᠰᠢᠨ ᠵᠠᠯᠠᠭᠤ ᠬᠥᠮᠦᠰ ᠲᠡᠳᠡᠨ ᠦ᠌ ᠪᠤᠵᠢᠭᠢᠨᠠᠯᠳᠤᠬᠤ ᠶ᠋ᠢ ᠦᠵᠡᠭᠡᠳ᠂ ᠬᠥᠮᠦᠨ ᠪᠦᠭᠦᠳᠡ ᠬᠦᠷᠲᠡᠨ ᠢᠨᠢᠶᠡᠮᠰᠦᠭᠯᠡᠵᠦ ᠡᠨᠡ ᠬᠡᠦᠬᠡᠳ ᠢ᠋ ᠮᠠᠭᠲᠠᠨ ᠲᠡᠷᠡ ᠬᠡᠦᠬᠡᠳ ᠢ᠋ ᠭᠠᠢᠬᠠᠨᠠ᠃ ᠲᠩᠷᠢ ᠶ᠋ᠢᠨ ᠬᠢᠵᠠᠭᠠᠷ ᠴᠠᠪ ᠴᠡᠯᠡᠢᠨ ᠭᠡᠭᠡᠨ ᠨᠠᠷᠠ ᠣᠢᠷᠠᠲᠤᠨ ᠲᠤᠰᠬᠤ ᠶ᠋ᠢᠨ ᠲᠠᠭᠠᠯᠠᠮᠵᠢᠲᠠᠢ ᠳ᠋ᠤ᠌ ᠲᠡᠳᠡᠭᠡᠷ ᠬᠡᠦᠬᠡᠳ ᠴᠡᠴᠡᠷᠯᠢᠭ ᠦ᠋ᠨ ᠳᠣᠲᠣᠷᠠ ᠴᠤᠭᠯᠠᠷᠠᠨ ᠨᠠᠭᠠᠳᠴᠤ ᠠᠷᠢᠭᠤᠨ ᠠᠭᠠᠷ ᠲᠤ ᠡᠷᠡᠭᠦᠯ ᠡᠩᠬᠡ ᠪᠡᠷ ᠬᠥᠮᠦᠵᠢᠨᠡ᠃ ᠳᠡᠷᠭᠡᠳᠡᠬᠢ ᠡᠭᠡᠴᠢ ᠨᠠᠷ ᠢ᠋ ᠳᠠᠭᠤᠷᠢᠶᠠᠨ ᠬᠤᠪᠢᠰᠬᠠᠯ ᠤ᠋ᠨ ᠳᠠᠭᠤᠤ ᠶ᠋ᠢ ᠳᠡᠭᠡᠷᠡ ᠳᠣᠣᠷᠠ᠂ ᠨᠠᠷᠢᠨ ᠪᠦᠳᠦᠭᠦᠨ ᠢ᠋ᠶ᠋ᠡᠷ ᠠᠶᠠᠯᠬᠤ ᠪᠥᠭᠡᠳ ᠪᠢᠴᠢᠬᠠᠨ ᠤᠯᠠᠭᠠᠨ ᠲᠤᠭ ᠢ᠋ ᠪᠠᠷᠢᠵᠠᠭᠠᠵᠤ᠂ ᠪᠦᠨᠲᠦᠨ ᠪᠦᠨᠲᠦᠨ ᠠᠯᠬᠤᠬᠤ ᠨᠢ ᠭᠥᠷᠳᠡᠯᠲᠡᠢ᠃ ᠬᠠᠷᠢᠶᠠᠴᠠᠢ ᠪᠣᠯᠵᠣᠮᠣᠷ ᠬᠥᠭᠵᠢᠮ ᠮᠡᠲᠦ ᠡᠭᠡᠰᠢᠭᠯᠡᠨ ᠡᠭᠦᠪᠡᠷ ᠲᠡᠭᠦᠪᠡᠷ ᠰᠦᠯᠵᠢᠨ ᠨᠢᠰᠬᠦ ᠳ᠋ᠦ᠍ ᠬᠡᠦᠬᠡᠳ ᠲᠡᠳᠡ ᠲᠡᠭᠦᠨ ᠢ᠋ ᠰᠣᠨᠢᠷᠬᠠᠨ ᠴᠢᠩᠨᠠᠵᠤ᠂ ᠨᠢᠭᠡ ᠨᠢ ᠨᠥᠭᠦᠭᠡ ᠳ᠋ᠡᠭᠡᠨ ᠵᠢᠭᠠᠵᠤ᠂ ᠨᠥᠭᠦᠭᠡ ᠨᠢ ᠨᠢᠭᠡᠨ ᠳ᠋ᠡᠭᠡᠨ ᠬᠡᠯᠡᠨᠡ᠃ ᠪᠠᠯᠴᠢᠷ ᠠᠲᠠᠯᠠ ᠴᠢᠳᠠᠪᠤᠷᠢ ᠲᠠᠢ᠂ ᠪᠣᠯᠪᠠᠰᠤᠷᠠᠩᠭᠤᠢ ᠪᠠᠷ ᠨᠠᠭᠠᠳᠬᠤ ᠨᠢ ᠪᠠᠬᠠᠷᠬᠠᠯᠲᠠᠢ᠃ ᠪᠠᠭᠠ ᠠᠲᠠᠯᠠ ᠬᠡᠪᠯᠡᠭᠦᠦ᠂ ᠪᠠᠰᠠ ᠣᠷᠣᠰ ᠮᠣᠩᠭᠣᠯ ᠠᠯᠢᠨ ᠢ᠋ᠶ᠋ᠠᠷ ᠴᠤ᠌ ᠶᠠᠷᠢᠬᠤ ᠨᠢ ᠰᠠᠢᠰᠢᠶᠠᠯᠲᠠᠢ᠃ ᠵᠤᠨ ᠤ᠋ ᠲᠤᠩᠭᠠᠯᠠᠭ ᠨᠠᠷᠠᠨ ᠳ᠋ᠤ᠌ ᠲᠤᠤᠯᠠ ᠶ᠋ᠢᠨ ᠭᠣᠣᠯ ᠤ᠋ᠨ ᠵᠦᠯᠭᠡᠨ ᠳᠡᠭᠡᠷᠡ ᠴᠤᠭᠯᠠᠷᠠᠵᠤ ᠭᠠᠯᠠᠭᠤ ᠠᠩᠭᠢᠷ ᠤ᠋ᠨ ᠳᠡᠭᠳᠡᠭᠡᠬᠡᠢ ᠮᠡᠲᠦ ᠭᠠᠩᠭᠠᠷ ᠭᠤᠩᠭᠠᠷ ᠬᠢᠯᠴᠡᠨ ᠨᠠᠭᠠᠳᠬᠤ ᠨᠢ ᠶᠠᠭᠤᠲᠠᠢ ᠬᠥᠭᠡᠷᠦᠬᠦᠨ᠃ ᠡᠯᠳᠡᠪ ᠦ᠋ᠨ ᠥᠩᠭᠡ ᠲᠡᠢ ᠡᠷᠪᠡᠬᠡᠢ ᠬᠣᠭᠣᠰᠣᠨ ᠠᠭᠠᠷ ᠲᠤ ᠡᠰᠢ ᠳᠠᠰᠢ ᠨᠢᠰᠬᠦ ᠳ᠋ᠦ᠍ ᠬᠣᠶᠠᠷ ᠭᠤᠷᠪᠠ ᠪᠠᠷ ᠢ᠋ᠶ᠋ᠠᠨ ᠵᠡᠷᠭᠡᠯᠡᠨ ᠬᠣᠢᠨᠠ ᠠ᠋ᠴᠠ ᠨᠢ ᠭᠦᠶᠦᠯᠳᠦᠬᠦ ᠨᠢ ᠴᠣᠭ ᠲᠠᠢ ᠪᠥᠭᠡᠳ ᠡᠷᠡᠮᠡᠬᠡᠢ᠃ ᠬᠤᠪᠢᠰᠬᠠᠯ ᠤ᠋ᠨ ᠪᠠᠢᠳᠠᠯ ᠤ᠋ᠨ ᠬᠥᠮᠦᠵᠢᠯ ᠳ᠋ᠦ᠍ ᠳᠡᠷᠪᠡᠯᠴᠡᠵᠦ ᠪᠠᠢᠭᠠ ᠬᠣᠭᠣᠰᠣᠨ ᠶᠠᠳᠠᠭᠤ ᠠᠷᠠᠳ ᠤ᠋ᠨ ᠬᠡᠦᠬᠡᠳ ᠲᠡᠳᠡᠨ ᠢ᠋ ᠡᠴᠢᠭᠡ ᠡᠬᠡ᠂ ᠡᠭᠡᠴᠢ ᠠᠬᠠ ᠨᠠᠷ ᠨᠢ ᠦᠵᠡᠭᠡᠳ ᠪᠠᠬᠠᠷᠬᠠᠵᠤ᠂ ᠬᠡᠦᠬᠡᠳ ᠲᠥᠷᠥᠪᠡᠯ ᠳᠠᠷᠤᠢ ᠬᠦᠷᠭᠡᠨ ᠠᠪᠴᠢᠷᠠᠨᠠ᠃ ᠬᠣᠢᠴᠢ ᠶ᠋ᠢ ᠵᠠᠯᠭᠠᠮᠵᠢᠯᠠᠬᠤ ᠫᠢᠥᠨ᠋ᠸᠷ ᠦ᠋ᠨ ᠳᠡᠭᠦᠦ ᠨᠠᠷ ᠪᠣᠯᠬᠤ ᠬᠣᠷᠢᠳᠤᠭᠠᠷ ᠵᠠᠭᠤᠨ ᠤ᠋ ᠬᠥᠮᠦᠵᠢᠯ ᠲᠡᠢ ᠲᠡᠳᠡᠨ ᠢ᠋ ᠦᠵᠡᠬᠦ ᠪᠦᠷᠢ ᠬᠦᠷᠲᠡᠵᠦ᠂ ᠬᠠᠷᠠᠬᠤ ᠪᠦᠷᠢ ᠪᠠᠬᠠᠷᠬᠠᠨ᠂ ᠪᠣᠳᠣᠬᠤ ᠪᠦᠷᠢ ᠰᠠᠢᠰᠢᠶᠠᠨᠠ ᠪᠢ᠃
1932 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠤᠳᠤᠯᠲᠤ
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ