ᠳᠣᠯᠣᠭᠠᠨ ᠪᠤᠷᠬᠠᠨ - ᠳ ∙ ᠮᠡᠨᠳᠦ-ᠠᠮᠤᠷ ᠪᠦᠪᠡᠢ 2D UnitelДолоон бурхан - Камертон хамтлагийн гишүүн Д.Мэнд-Амар _ Бүүвэй
1211ᠳᠣᠯᠣᠭᠠᠨ ᠪᠤᠷᠬᠠᠨ
ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ ᠠᠬᠠ ᠳᠡᠭᠦᠦ ᠬᠣᠶᠠᠷ ᠠᠩ ᠬᠦᠷᠦᠭᠡ ᠬᠢᠵᠦ ᠶᠠᠪᠤᠲᠠᠯᠠ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠨᠤᠮᠤ ᠰᠤᠮᠤ ᠪᠠᠷᠢᠭᠰᠠᠨ ᠨᠢᠭᠡᠨ ᠬᠥᠮᠦᠨ ᠪᠠᠢᠬᠤ ᠶᠤᠮ ᠭᠡᠨᠡ᠃
ᠠᠬᠠ ᠳᠡᠭᠦᠦ ᠬᠣᠶᠠᠷ ᠳᠡᠷᠭᠡᠳᠡ ᠨᠢ ᠣᠴᠢᠭᠠᠳ᠄《ᠲᠠ ᠶᠠᠭᠤᠨ ᠬᠥᠮᠦᠨ ᠪᠣᠢ? ᠡᠨᠳᠡ ᠶᠠᠭᠤ ᠬᠢᠵᠦ ᠪᠠᠢᠨᠠ?》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠬᠥᠮᠦᠨ᠄《ᠲᠩᠷᠢ ᠶ᠋ᠢᠨ ᠨᠠᠭᠠᠳᠤ ᠲᠠᠢ᠂ ᠣᠭᠲᠠᠷᠭᠤᠢ ᠶ᠋ᠢᠨ ᠴᠠᠭᠠᠳᠤ ᠲᠠᠢ ᠨᠢᠭᠡᠨ ᠰᠢᠪᠠᠭᠤ ᠨᠢᠰᠴᠦ ᠪᠠᠢᠬᠤ ᠪᠠᠷ ᠨᠢ ᠬᠠᠷᠪᠤᠵᠤ ᠣᠷᠬᠢᠲᠠᠯᠠ ᠣᠳᠣ ᠬᠢᠷᠢ ᠨᠢ ᠪᠠᠭᠤᠵᠤ ᠢᠷᠡᠭᠡ ᠦᠭᠡᠢ᠃ ᠪᠢ ᠲᠡᠭᠦᠨ ᠢ᠋ ᠬᠦᠯᠢᠶᠡᠭᠡᠳ ᠪᠠᠢᠨᠠ 》 ᠭᠡᠬᠦ ᠨᠢ ᠲᠡᠷᠡ᠃
ᠨᠡᠯᠢᠶᠡᠳ ᠤᠳᠠᠵᠤ ᠦᠳᠡ ᠬᠡᠪᠡᠢᠬᠦ ᠠᠯᠲᠠ ᠳ᠋ᠤ᠌ ᠰᠤᠮᠤᠨ ᠳ᠋ᠤ᠌ ᠬᠠᠷᠪᠤᠭᠤᠯᠤᠭᠰᠠᠨ ᠰᠢᠪᠠᠭᠤ ᠲᠩᠷᠢ ᠡᠴᠡ ᠤᠨᠠᠵᠤ ᠢᠷᠡᠵᠡᠢ ᠭᠡᠨᠡ᠃
ᠲᠡᠭᠦᠨ ᠢ᠋ ᠦᠵᠡᠭᠡᠳ ᠠᠬᠠ ᠳᠡᠭᠦᠦ ᠬᠣᠶᠠᠷ ᠪᠢᠳᠡᠨ ᠢ᠋ ᠰᠠᠢᠨ ᠬᠠᠷᠪᠤᠭᠠᠴᠢ ᠭᠡᠳᠡᠭ᠃ ᠡᠨᠡ ᠬᠥᠮᠦᠨ ᠪᠢᠳᠡᠨ ᠡᠴᠡ ᠢᠯᠡᠭᠦᠦ ᠴᠢᠳᠠᠯᠲᠠᠢ ᠶᠤᠮ᠂ ᠲᠡᠭᠦᠨ ᠲᠡᠢ ᠠᠬᠠ ᠳᠡᠭᠦᠦᠰ ᠪᠣᠯᠤᠯᠴᠠᠶᠠ! 》 ᠭᠡᠵᠦ ᠬᠡᠯᠡᠯᠴᠡᠭᠡᠳ᠄《ᠲᠠ ᠪᠢᠳᠡᠨ ᠲᠡᠢ ᠠᠬᠠ ᠳᠡᠭᠦᠦ ᠪᠣᠯᠤᠨᠠ ᠤᠤ? 》 ᠭᠡᠬᠦ ᠳ᠋ᠦ᠍ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ᠄《ᠪᠣᠯᠤᠨᠠ!》 ᠭᠡᠵᠡᠢ ᠭᠡᠨᠡ᠃
ᠴᠠᠭᠠᠰᠢ ᠭᠤᠷᠪᠠᠭᠤᠯᠠ ᠪᠣᠯᠤᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠲᠠᠯᠠ ᠪᠡᠶᠡ ᠪᠡᠨ ᠪᠤᠯᠠᠴᠢᠬᠠᠭᠰᠠᠨ᠂ ᠲᠠᠯᠠ ᠪᠡᠶᠡ ᠨᠢ ᠭᠠᠵᠠᠷ ᠳᠡᠭᠡᠷᠡ ᠢᠯᠡ ᠦᠵᠡᠭᠳᠡᠬᠦ ᠨᠢᠭᠡᠨ ᠬᠥᠮᠦᠨ ᠲᠠᠭᠠᠷᠠᠵᠠᠢ ᠭᠡᠨᠡ᠃
《ᠲᠠ ᠡᠨᠳᠡ ᠶᠠᠭᠤ ᠬᠢᠵᠦ ᠪᠠᠢᠨᠠ ᠪᠣᠢ?》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠄《ᠪᠢ ᠲᠩᠷᠢ ᠭᠠᠵᠠᠷ ᠢ᠋ ᠴᠢᠩᠨᠠᠳᠠᠭ ᠬᠥᠮᠦᠨ ᠪᠠᠢᠨᠠ》 ᠭᠡᠵᠡᠢ ᠭᠡᠨᠡ᠃《ᠲᠠ ᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠶᠠᠭᠤ ᠮᠡᠳᠡᠳᠡᠭ ᠪᠣᠢ?》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠄《ᠪᠢ ᠭᠤᠷᠪᠠᠨ ᠶᠢᠷᠲᠢᠨᠴᠦ ᠶ᠋ᠢᠨ ᠠᠮᠢᠲᠠᠨ ᠶᠠᠭᠤ ᠶᠠᠷᠢᠵᠤ᠂ ᠶᠠᠭᠤ ᠬᠡᠯᠡᠯᠴᠡᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠳᠡᠭ ᠬᠥᠮᠦᠨ ᠪᠠᠢᠨᠠ》 ᠭᠡᠵᠡᠢ ᠭᠡᠨᠡ᠃
ᠠᠬᠠ ᠳᠡᠭᠦᠦ ᠭᠤᠷᠪᠠᠭᠤᠯᠠ᠄《ᠲᠠ ᠪᠢᠳᠡᠨ ᠲᠡᠢ ᠠᠬᠠ ᠳᠡᠭᠦᠦ ᠪᠣᠯᠤᠨᠠ ᠤᠤ?》 ᠭᠡᠬᠦ ᠳ᠋ᠦ᠍ ᠮᠥᠨᠥᠬᠢ ᠬᠥᠮᠦᠨ᠄《ᠲᠡᠭᠡᠶᠡ᠂ ᠲᠡᠭᠡᠶᠡ》 ᠭᠡᠵᠡᠢ ᠭᠡᠨᠡ᠃
ᠲᠡᠳᠡ ᠴᠠᠭᠠᠰᠢ ᠶᠠᠪᠤᠵᠤ ᠪᠠᠢᠲᠠᠯᠠ ᠪᠠᠷᠠᠭᠤᠨ ᠵᠡᠭᠦᠨ ᠠᠭᠤᠯᠠᠨ ᠤ᠋ ᠪᠠᠢᠷᠢ ᠶ᠋ᠢ ᠰᠣᠯᠢᠵᠤ ᠲᠠᠯᠪᠢᠨ ᠰᠠᠭᠤᠭᠠ ᠪᠠᠰᠠ ᠨᠢᠭᠡᠨ ᠬᠥᠮᠦᠨ ᠲᠡᠢ ᠲᠠᠭᠠᠷᠠᠯᠠ ᠭᠡᠨᠡ᠃
ᠠᠬᠠ ᠳᠡᠭᠦᠦ ᠳᠥᠷᠪᠡ᠄《ᠲᠠ ᠶᠠᠭᠤ ᠬᠢᠵᠦ ᠪᠠᠢᠭᠠ ᠬᠥᠮᠦᠨ ᠪᠣᠢ?》 ᠭᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠬᠥᠮᠦᠨ᠄《ᠪᠢ ᠭᠠᠵᠠᠷ ᠤ᠋ᠨ ᠬᠤᠶᠠᠩ ᠭᠠᠷᠭᠠᠵᠤ ᠪᠠᠢᠨᠠ》᠃
《ᠲᠠ ᠶᠠᠮᠠᠷ ᠭᠡᠭᠴᠢ ᠶᠡᠬᠡ ᠬᠦᠴᠦᠲᠡᠢ ᠬᠥᠮᠦᠨ ᠪᠣᠢ᠂ ᠪᠢᠳᠡᠨ ᠦ᠌ ᠠᠬᠠ ᠳᠡᠭᠦᠦ ᠪᠣᠯᠤᠭᠠᠴᠢ!》 ᠭᠡᠬᠦ ᠳ᠋ᠦ᠍ ᠵᠥᠪᠰᠢᠶᠡᠷᠡᠵᠦ ᠲᠠᠪᠤᠭᠤᠯᠠ ᠪᠣᠯᠤᠭᠠᠳ ᠴᠠᠭᠠᠰᠢ ᠶᠠᠪᠤᠵᠠᠢ ᠭᠡᠨᠡ᠃
ᠬᠡᠰᠡᠭ ᠶᠠᠪᠤᠵᠤ ᠪᠠᠢᠲᠠᠯᠠ ᠨᠢᠭᠡ ᠬᠥᠮᠦᠨ ᠰᠦᠷᠦᠭ ᠵᠡᠭᠡᠷᠡ ᠡᠴᠡ ᠨᠢᠭᠡ ᠶ᠋ᠢ ᠭᠦᠢᠴᠡᠵᠦ ᠪᠠᠷᠢᠭᠠᠳ ᠲᠠᠯᠪᠢᠵᠤ᠂ ᠳᠠᠬᠢᠨ ᠨᠢᠭᠡ ᠶ᠋ᠢ ᠭᠦᠢᠴᠡᠵᠦ ᠪᠠᠷᠢᠵᠤ ᠪᠠᠢᠬᠤ ᠶᠤᠮ ᠭᠡᠨᠡ᠃
《ᠲᠠ ᠶᠠᠭᠤ ᠬᠢᠵᠦ ᠪᠠᠢᠭᠠ ᠬᠥᠮᠦᠨ ᠪᠣᠢ?》 ᠭᠡᠬᠦ ᠳ᠋ᠦ᠍᠄《ᠪᠢ ᠵᠡᠭᠡᠷᠡ ᠪᠡᠷ ᠲᠣᠭᠯᠠᠭᠠᠮ ᠬᠢᠵᠦ ᠰᠠᠭᠤᠨᠠ》 ᠭᠡᠯᠡ᠃
《ᠶᠠᠮᠠᠷ ᠬᠤᠷᠳᠤᠨ ᠬᠥᠮᠦᠨ ᠪᠣᠢ? ᠪᠢᠳᠡᠨ ᠲᠡᠢ ᠠᠬᠠ ᠳᠡᠭᠦᠦᠰ ᠪᠣᠯᠤᠭᠠᠴᠢ!》 ᠭᠡᠬᠦ ᠳ᠋ᠦ᠍᠄《ᠲᠡᠭᠡᠶᠡ!》 ᠭᠡᠵᠡᠢ ᠭᠡᠨᠡ᠃
ᠢᠩᠭᠢᠭᠡᠳ ᠲᠡᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠶᠠᠭᠤ ᠬᠢᠵᠦ ᠠᠮᠢᠳᠤᠷᠠᠪᠠᠯ ᠰᠠᠢᠨ ᠪᠣᠢ ᠭᠡᠵᠦ ᠬᠡᠯᠡᠯᠴᠡᠭᠡᠳ ᠭᠠᠵᠠᠷ ᠴᠢᠩᠨᠠᠳᠠᠭ ᠬᠥᠮᠦᠨ ᠢ᠋ᠶ᠋ᠡᠷ ᠶᠢᠷᠲᠢᠨᠴᠦ ᠶ᠋ᠢ ᠴᠢᠩᠨᠠᠭᠤᠯᠪᠠᠯ᠄《ᠵᠡᠭᠦᠨ ᠬᠣᠢᠲᠤ ᠵᠦᠭ ᠲᠦ᠍ ᠭᠠᠳᠠᠭᠠᠳᠤ ᠳᠠᠯᠠᠢ ᠶ᠋ᠢᠨ ᠴᠠᠭᠠᠳᠤ ᠲᠠᠢ ᠱᠠᠭᠠᠵᠠᠭᠠᠢ ᠬᠠᠭᠠᠨ ᠭᠡᠭᠴᠢ ᠮᠠᠨ ᠤ᠋ ᠭᠦᠷᠦᠨ ᠢ᠋ ᠡᠵᠡᠯᠡᠬᠦ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠨᠠ᠃ ᠬᠡᠳᠦᠭᠦᠯᠡ ᠪᠡᠨ ᠣᠴᠢᠵᠤ ᠲᠡᠷᠡ ᠬᠠᠭᠠᠨ ᠢ᠋ ᠳᠠᠷᠤᠵᠠᠭᠠᠶᠠ 》 ᠭᠡᠵᠡᠢ ᠭᠡᠨᠡ᠃
ᠠᠬᠠ ᠳᠡᠭᠦᠦᠰ ᠶᠠᠪᠤᠭᠰᠠᠭᠠᠷ ᠳᠠᠯᠠᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠨᠢᠭᠡ ᠬᠥᠮᠦᠨ ᠰᠠᠭᠤᠵᠤ ᠪᠠᠢᠬᠤ ᠶᠤᠮ ᠭᠡᠨᠡ᠃
ᠲᠡᠷᠡ ᠬᠥᠮᠦᠨ᠄《ᠲᠠ ᠪᠦᠬᠦᠨ ᠶᠠᠭᠤᠨ ᠤᠯᠤᠰ ᠪᠢᠯᠡ?》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠄《ᠪᠢᠳᠡ ᠡᠨᠡ ᠳᠠᠯᠠᠢ ᠶ᠋ᠢᠨ ᠴᠠᠭᠠᠳᠤ ᠲᠠᠢ ᠪᠠᠢᠳᠠᠭ ᠱᠠᠭᠠᠵᠠᠭᠠᠢ ᠬᠠᠭᠠᠨ ᠤ᠋ ᠪᠠᠭᠠᠲᠤᠷ ᠤ᠋ᠳ ᠲᠠᠢ ᠬᠦᠴᠦ ᠪᠡᠨ ᠦᠵᠡᠶᠡ ᠭᠡᠲᠡᠯᠡ ᠡᠨᠡ ᠶᠡᠬᠡ ᠤᠰᠤ ᠶ᠋ᠢ ᠬᠡᠷᠬᠢᠨ ᠭᠠᠲᠤᠯᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ?》 ᠭᠡᠵᠦ ᠬᠡᠯᠡᠵᠡᠢ ᠭᠡᠨᠡ᠃
《ᠪᠢ ᠲᠠ ᠨᠠᠷ ᠲᠤ ᠲᠤᠰᠠ ᠪᠣᠯᠤᠶᠠ》 ᠭᠡᠳ ᠳᠠᠯᠠᠢ ᠶ᠋ᠢ ᠭᠠᠭᠴᠠ ᠪᠠᠯᠭᠤᠭᠠᠳ ᠰᠢᠷᠭᠢᠭᠡᠵᠡᠢ᠃《ᠲᠠ ᠪᠢᠳᠡᠨ ᠦ᠌ ᠠᠬᠠ ᠪᠣᠯᠤᠭᠠᠴᠢ》 ᠭᠡᠬᠦ ᠳ᠋ᠦ᠍ ᠲᠠᠯᠠᠷᠬᠠᠨ ᠵᠥᠪᠰᠢᠶᠡᠷᠡᠵᠡᠢ ᠭᠡᠨᠡ᠃
ᠠᠬᠠ ᠳᠡᠭᠦᠦ ᠳᠣᠯᠣᠭᠤᠯᠠ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠵᠠᠯᠠᠭᠤ ᠲᠠᠢ ᠲᠠᠭᠠᠷᠠᠵᠤ᠄《ᠱᠠᠭᠠᠵᠠᠭᠠᠢ ᠬᠠᠭᠠᠨ ᠤ᠋ ᠬᠢ ᠬᠠᠮᠢᠭᠠ ᠪᠣᠢ?》 ᠭᠡᠬᠦ ᠳ᠋ᠦ᠍᠄
《ᠲᠡᠷᠡ ᠪᠣᠯ ᠮᠠᠨ ᠤ᠋ ᠠᠪᠤ ᠪᠢᠯᠡ᠃ ᠬᠡᠷᠡᠭ ᠵᠣᠷᠢᠭ ᠶᠠᠭᠤ ᠪᠣᠢ?》 ᠭᠡᠵᠡᠢ ᠭᠡᠨᠡ᠃
《ᠪᠢᠳᠡ ᠱᠠᠭᠠᠵᠠᠭᠠᠢ ᠬᠠᠭᠠᠨ ᠳ᠋ᠤ᠌ ᠬᠦᠴᠦ ᠪᠡᠨ ᠥᠭᠭᠦᠶᠡ ᠭᠡᠵᠦ ᠢᠷᠡᠯᠡ》 ᠭᠡᠬᠦ ᠳ᠋ᠦ᠍ ᠣᠷᠳᠣᠨ ᠭᠡᠷ ᠲᠦ᠍ ᠪᠡᠨ ᠳᠠᠭᠠᠭᠤᠯᠤᠨ ᠢᠷᠡᠯᠡ ᠰᠢᠦ᠃
ᠬᠠᠭᠠᠨ ᠬᠦᠦ ᠲᠡᠳᠡᠨ ᠳ᠋ᠦ᠍᠄《ᠲᠠ ᠪᠦᠬᠦᠨ ᠠᠮᠠᠷᠠᠵᠤ ᠲᠤᠬᠠᠯᠠ᠃ ᠪᠢ ᠬᠠᠭᠠᠨ ᠠᠪᠤ ᠳ᠋ᠤ᠌ ᠠᠢᠯᠠᠳᠬᠠᠭᠠᠳ ᠮᠠᠷᠭᠠᠰᠢ ᠥᠷᠯᠥᠭᠡ ᠮᠠᠨᠳᠤᠬᠤ ᠨᠠᠷᠠᠨ ᠢ᠋ᠶ᠋ᠠᠷ ᠬᠠᠷᠢᠭᠤ ᠬᠡᠯᠡᠶᠡ!》 ᠭᠡᠵᠦ ᠬᠡᠯᠡᠵᠡᠢ ᠭᠡᠨᠡ᠃
ᠲᠡᠭᠡᠭᠡᠳ ᠠᠪᠤ ᠳ᠋ᠤ᠌ ᠪᠠᠨ᠄《ᠪᠢ ᠥᠨᠥᠳᠥᠷ ᠬᠡᠭᠡᠷᠡ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠳᠣᠯᠣᠭᠠᠨ ᠰᠠᠢᠬᠠᠨ ᠵᠠᠯᠠᠭᠤ ᠡᠷᠡ ᠲᠡᠢ ᠲᠠᠭᠠᠷᠠᠯᠠ᠃ ᠲᠠᠨ ᠳ᠋ᠤ᠌ ᠬᠦᠴᠦ ᠪᠡᠨ ᠥᠭᠭᠦᠨᠡ ᠭᠡᠬᠦ ᠪᠡᠷ ᠨᠢ ᠳᠠᠭᠠᠭᠤᠯᠤᠭᠠᠳ ᠢᠷᠡᠯᠡ!》 ᠭᠡᠵᠦ ᠬᠡᠯᠡᠵᠡᠢ ᠭᠡᠨᠡ᠃
《ᠨᠠᠳᠠ ᠳ᠋ᠤ᠌ ᠬᠦᠴᠦ ᠪᠡᠨ ᠥᠭᠬᠦ ᠶᠠᠮᠠᠷ ᠡᠷᠳᠡᠮ ᠴᠢᠳᠠᠯ ᠲᠠᠢ ᠪᠣᠯᠬᠤ ᠶ᠋ᠢ ᠨᠢ ᠰᠣᠷᠢᠵᠤ ᠦᠵᠡᠶᠡ!》 ᠭᠡᠵᠦ ᠱᠠᠭᠠᠵᠠᠭᠠᠢ ᠬᠠᠭᠠᠨ ᠬᠡᠯᠡᠵᠡᠢ ᠭᠡᠨᠡ᠃
ᠠᠬᠠ ᠲᠡᠭᠦᠦᠰ᠄《ᠬᠠᠭᠠᠨ ᠶᠠᠭᠤ ᠭᠡᠵᠦ ᠪᠠᠢᠨᠠ?》 ᠭᠡᠬᠦ ᠳ᠋ᠦ᠍ ᠭᠠᠵᠠᠷ ᠴᠢᠩᠨᠠᠭᠴᠢ᠄
《ᠮᠠᠷᠭᠠᠰᠢ ᠪᠢᠳᠡᠨ ᠲᠡᠢ ᠮᠥᠷᠥᠢ ᠲᠠᠯᠪᠢᠵᠤ ᠠᠭᠤᠯᠠᠨ ᠤ᠋ ᠣᠷᠣᠢ ᠬᠠᠷᠪᠤᠨᠠ》 ᠭᠡᠵᠦ ᠪᠠᠢᠨᠠ ᠰᠢᠦ᠃
《ᠣᠭᠲᠠᠷᠭᠤᠢ ᠬᠠᠷᠪᠤᠭᠴᠢ ᠳᠡᠭᠦᠦ ᠮᠢᠨᠢ ᠴᠢ ᠮᠠᠷᠭᠠᠰᠢ ᠬᠠᠷᠪᠤ!》 ᠭᠡᠵᠦ ᠬᠡᠯᠡᠵᠡᠢ ᠭᠡᠨᠡ᠃
ᠥᠷᠯᠥᠭᠡ ᠨᠢ ᠬᠠᠭᠠᠨ ᠬᠠᠮᠤᠭ ᠰᠠᠢᠨ ᠪᠠᠭᠠᠲᠤᠷ ᠤ᠋ᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠭᠰᠠᠭᠠᠷ ᠮᠣᠷᠢᠯᠠᠨ ᠢᠷᠡᠵᠦ᠄《ᠵᠠ᠂ ᠬᠣᠯᠠ ᠠ᠋ᠴᠠ ᠢᠷᠡᠭᠰᠡᠨ ᠲᠠᠨ ᠤ᠋ ᠬᠢ ᠤᠷᠢᠲᠠᠵᠤ ᠬᠠᠷᠪᠤᠬᠤ ᠤᠤ?》 ᠭᠡᠬᠦ ᠳ᠋ᠦ᠍᠄《ᠨᠤᠲᠤᠭ ᠤ᠋ᠨ ᠡᠵᠡᠨ ᠲᠠ ᠪᠦᠬᠦᠨ ᠲᠦᠷᠦᠭᠦᠯᠡᠵᠦ ᠬᠠᠷᠪᠤᠵᠤ ᠪᠣᠯᠭᠣᠭᠠ!》 ᠭᠡᠵᠦ ᠠᠬᠠ ᠳᠡᠭᠦᠦ ᠳᠣᠯᠣᠭᠠ ᠬᠡᠯᠡᠪᠡ᠃
ᠬᠠᠭᠠᠨ ᠤ᠋ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠰᠤᠮᠤ ᠪᠠᠨ ᠲᠠᠯᠪᠢᠲᠠᠯᠠ ᠨᠢᠭᠡ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠶ᠋ᠢ ᠰᠢᠪᠲᠤᠯᠤᠭᠠᠳ ᠬᠣᠶᠠᠳᠠᠬᠢ ᠠᠭᠤᠯᠠᠨ ᠳ᠋ᠤ᠌ ᠰᠤᠮᠤ ᠨᠢ ᠲᠣᠭᠲᠠᠪᠠ᠃ ᠣᠭᠲᠠᠷᠭᠤᠢ ᠬᠠᠷᠪᠤᠭᠠᠴᠢ ᠰᠤᠮᠤ ᠪᠠᠨ ᠲᠠᠯᠪᠢᠬᠤ ᠳ᠋ᠤ᠌ ᠲᠠᠪᠤᠨ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠶ᠋ᠢ ᠰᠢᠪᠲᠤᠯᠵᠤ ᠵᠢᠷᠭᠤᠳᠠᠬᠢ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠰᠤᠮᠤ ᠨᠢ ᠲᠣᠭᠲᠠᠵᠠᠢ᠃
ᠮᠠᠷᠭᠠᠰᠢ ᠪᠥᠬᠡ ᠪᠠᠷᠢᠯᠳᠤᠨᠠ ᠭᠡᠵᠦ ᠬᠡᠯᠡᠯᠴᠡᠭᠡᠳ ᠬᠠᠭᠠᠨ ᠤ᠋ ᠪᠥᠬᠡ ᠬᠠᠷᠠᠬᠤ ᠭᠠᠵᠠᠷ ᠢ᠋ᠶ᠋ᠠᠨ ᠲᠠᠷᠢᠮᠠᠯ ᠮᠣᠳᠣ ᠰᠠᠭᠤᠯᠭᠠᠳ ᠠᠬᠠ ᠳᠡᠭᠦᠦᠰ ᠦ᠋ᠨ ᠪᠥᠬᠡ ᠶ᠋ᠢ ᠣᠯᠠᠨ ᠤᠷᠭᠤᠭᠠ ᠮᠣᠳᠣ ᠲᠠᠢ ᠭᠠᠵᠠᠷ ᠠ᠋ᠴᠠ ᠭᠠᠷᠭᠠᠬᠤ ᠪᠠᠷ ᠰᠣᠩᠭᠣᠵᠠᠢ᠃ ᠡᠭᠦᠨ ᠢ᠋ ᠭᠠᠵᠠᠷ ᠴᠢᠩᠨᠠᠭᠴᠢ ᠰᠣᠨᠣᠰᠴᠤ ᠮᠡᠳᠡᠭᠡᠳ᠄《ᠠᠭᠤᠯᠠ ᠡᠷᠭᠦᠭᠴᠢ ᠳᠡᠭᠦᠦ ᠪᠡᠨ ᠪᠠᠷᠢᠯᠳᠤ》 ᠭᠡᠪᠡ᠃
ᠲᠣᠪᠯᠠᠭᠰᠠᠨ ᠴᠠᠭ ᠪᠣᠯᠵᠤ ᠬᠠᠭᠠᠨ ᠤ᠋ ᠪᠥᠬᠡ ᠲᠠᠷᠢᠮᠠᠯ ᠮᠣᠳᠣ ᠶ᠋ᠢ ᠰᠤᠭᠤ ᠲᠡᠳᠡᠨ ᠪᠠᠷᠠᠭᠤᠨ ᠵᠡᠭᠦᠨ ᠲᠡᠢᠰᠢ ᠰᠢᠳᠡᠨ ᠢᠷᠡᠵᠡᠢ ᠭᠡᠨᠡ᠃
ᠭᠡᠲᠡᠯᠡ ᠠᠭᠤᠯᠠ ᠡᠷᠭᠦᠭᠴᠢ ᠤᠷᠭᠤᠭᠠ ᠮᠣᠳᠣ ᠶ᠋ᠢ ᠦᠨᠳᠦᠰᠦ ᠪᠡᠷ ᠨᠢ ᠪᠤᠯᠭᠤ ᠲᠡᠳᠡᠨ ᠬᠠᠶᠠᠯᠠᠭᠰᠠᠭᠠᠷ ᠢᠷᠡᠵᠦ ᠬᠠᠭᠠᠨ ᠤ᠋ ᠬᠠᠭᠠᠨ ᠤ᠋ ᠪᠥᠬᠡ ᠶ᠋ᠢ ᠨᠢᠭᠡ ᠳᠠᠷᠤᠭᠠᠳ ᠭᠠᠵᠠᠷ ᠲᠤ ᠰᠢᠭᠢᠳᠦᠭᠦᠯᠵᠦ ᠣᠷᠬᠢᠪᠠ᠃
ᠡᠭᠦᠨ ᠢ᠋ ᠬᠠᠭᠠᠨ ᠦᠵᠡᠭᠡᠳ᠄《ᠳᠠᠬᠢᠨ ᠨᠢᠭᠡ ᠮᠥᠷᠥᠢ ᠠᠯᠳᠠᠪᠠ》 ᠭᠡᠵᠦ ᠬᠡᠯᠡᠭᠡᠳ ᠶᠠᠪᠤᠪᠠ᠃
ᠮᠠᠷᠭᠠᠰᠢ ᠬᠥᠮᠦᠨ ᠭᠦᠶᠦᠯᠭᠡᠵᠦ ᠤᠷᠤᠯᠳᠤᠭᠤᠯᠬᠤ ᠪᠠᠷ ᠬᠡᠯᠡᠯᠴᠡᠵᠦ ᠪᠠᠢᠭᠠ ᠶ᠋ᠢ ᠴᠢᠩᠨᠠᠭᠴᠢ ᠰᠣᠨᠣᠰᠴᠤ ᠮᠡᠳᠡᠭᠡᠳ ᠵᠡᠭᠡᠷᠡ ᠭᠦᠢᠴᠡᠭᠴᠢ ᠳᠡᠭᠦᠦ ᠪᠡᠨ ᠤᠷᠤᠯᠳᠤ ᠭᠡᠯᠡ᠃
ᠲᠡᠷᠡ ᠬᠠᠭᠠᠨ ᠤ᠋ ᠳ᠋ᠤ᠌ ᠰᠠᠢᠨ ᠭᠦᠶᠦᠳᠡᠭ ᠳᠡᠷᠳᠡᠭᠡᠷ ᠴᠠᠭᠠᠨ ᠰᠠᠮᠠᠭᠠᠨ ᠪᠠᠢᠳᠠᠭ ᠶᠤᠮ ᠰᠠᠨᠵᠠᠢ᠃
ᠮᠠᠷᠭᠠᠰᠢ ᠨᠢ ᠮᠠᠨᠳᠤᠬᠤ ᠤᠯᠠᠭᠠᠨ ᠨᠠᠷᠠᠨ ᠢ᠋ᠶ᠋ᠠᠷ ᠬᠤᠷᠳᠤᠨ ᠭᠦᠶᠦᠳᠡᠭ ᠬᠣᠶᠠᠷ ᠣᠷᠣᠯᠳᠣᠵᠠᠢ ᠭᠡᠨᠡ᠃ ᠬᠣᠶᠠᠭᠤᠯᠠ ᠭᠦᠶᠦᠵᠦ ᠪᠠᠢᠲᠠᠯᠠ ᠡᠮᠡᠭᠡᠨ ᠪᠠᠬᠠᠷᠳᠠᠵᠤ ᠤᠨᠠᠭᠠᠳ ᠦᠯᠡᠳᠡᠵᠡᠢ᠃
ᠵᠡᠭᠡᠷᠡ ᠭᠦᠢᠴᠡᠭᠴᠢ ᠭᠦᠶᠦᠵᠦ ᠢᠷᠡᠬᠦ ᠳ᠋ᠦ᠍ ᠬᠠᠭᠠᠨ᠄《ᠮᠠᠨ ᠤ᠋ ᠭᠦᠶᠦᠳᠡᠭ ᠡᠮᠡᠭᠡᠨ ᠶᠠᠭᠠᠬᠢᠪᠠ?》 ᠭᠡᠬᠦ ᠳ᠋ᠦ᠍ ᠲᠡᠷᠡ ᠤᠷᠲᠤ ᠠᠭᠤᠯᠠ ᠶ᠋ᠢᠨ ᠴᠠᠭᠠᠨᠠ ᠠᠭᠠᠬᠢᠯᠠᠵᠤ ᠪᠠᠭᠲᠠᠷᠠᠭᠠᠳ ᠦᠯᠡᠳᠡᠭᠰᠡᠨ ᠭᠡᠵᠦ ᠬᠡᠯᠡᠵᠡᠢ ᠭᠡᠨᠡ᠃
ᠬᠠᠭᠠᠨ᠄《ᠡᠮᠡᠭᠡᠨ ᠢ᠋ ᠠᠰᠠᠷᠠᠵᠤ ᠠᠪᠴᠢᠷᠠ!》 ᠬᠡᠮᠡᠭᠡᠳ ᠬᠥᠮᠦᠨ ᠶᠠᠪᠤᠭᠤᠯᠤᠭᠠᠳ ᠠᠬᠠ ᠳᠡᠭᠦᠦ ᠳᠣᠯᠣᠭᠠ ᠳ᠋ᠤ᠌ ᠠᠭᠤᠷ ᠨᠢ ᠬᠦᠷᠴᠦ ᠮᠠᠭᠤ ᠰᠠᠨᠠᠭᠠ ᠲᠥᠷᠥᠭᠡᠳ ᠣᠯᠠᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠳᠠᠭᠤᠳᠠᠨ᠄《ᠡᠨᠡ ᠤᠷᠲᠤ ᠲᠢᠪ ᠡᠴᠡ ᠢᠷᠡᠭᠰᠡᠨ ᠳᠣᠯᠣᠭᠠᠨ ᠬᠥᠮᠦᠨ ᠢ᠋ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠬᠦ ᠳ᠋ᠦ᠍》 ᠨᠢᠭᠡᠨ ᠲᠦᠰᠢᠮᠡᠯ᠄
《ᠪᠢᠳᠡ ᠲᠡᠳᠡᠨ ᠢ᠋ ᠬᠦᠴᠦ ᠪᠡᠷ ᠳᠡᠢᠯᠬᠦ ᠦᠭᠡᠢ ᠨᠢ᠃ ᠠᠷᠭᠠ ᠤᠬᠠᠭᠠᠨ ᠢ᠋ᠶ᠋ᠠᠷ ᠳᠠᠷᠤᠬᠤ ᠨᠢ ᠵᠥᠪ》 ᠭᠡᠳ᠄《ᠮᠠᠨ ᠤ᠋ ᠬᠠᠭᠠᠨ ᠤ᠋ ᠰᠠᠩ ᠳ᠋ᠤ᠌ ᠰᠢᠷᠡᠮᠦᠨ ᠭᠡᠷ ᠪᠠᠢᠳᠠᠭ ᠪᠤᠰᠤ ᠤᠤ? ᠲᠡᠳᠡᠨ ᠢ᠋ ᠬᠤᠷᠢᠮ ᠨᠠᠢᠷ ᠬᠢᠶᠡ ᠭᠡᠵᠦ ᠬᠠᠭᠤᠷᠴᠤ ᠣᠷᠣᠭᠤᠯᠤᠭᠠᠳ ᠭᠠᠳᠠᠨᠠ ᠠ᠋ᠴᠠ ᠨᠢ ᠭᠠᠯᠳᠠᠵᠤ ᠬᠥᠨᠥᠭᠡᠶᠡ》 ᠭᠡᠵᠡᠢ ᠭᠡᠨᠡ᠃
ᠴᠢᠩᠨᠠᠭᠴᠢ ᠡᠨᠡ ᠶᠠᠷᠢᠶᠠ ᠶ᠋ᠢ ᠣᠯᠵᠤ ᠰᠣᠨᠣᠰᠤᠭᠠᠳ ᠳᠡᠭᠦᠦ ᠨᠠᠷ ᠲᠤ ᠪᠠᠨ ᠬᠡᠯᠡᠯᠡ᠃ ᠳᠠᠯᠠᠢ ᠪᠠᠯᠭᠤᠭᠴᠢ᠄《ᠭᠡᠮ ᠦᠭᠡᠢ ᠳᠡ᠂ ᠪᠢ ᠠᠷᠭᠠᠯᠠᠨᠠ》 ᠬᠡᠮᠡᠭᠡᠳ ᠶᠠᠪᠤᠵᠤ ᠶᠡᠬᠡ ᠤᠰᠤ ᠪᠠᠯᠭᠤᠭᠠᠳ ᠢᠷᠡᠵᠡᠢ ᠭᠡᠨᠡ᠃
ᠲᠦᠳᠡ ᠤᠳᠠᠯ ᠦᠭᠡᠢ ᠬᠠᠭᠠᠨ ᠤ᠋ ᠲᠦᠰᠢᠮᠡᠯ ᠢᠷᠡᠵᠦ᠄《ᠲᠠ ᠪᠦᠬᠦᠨ ᠢ᠋ ᠬᠠᠭᠠᠨᠲᠠᠨ ᠶᠡᠬᠡ ᠬᠤᠷᠢᠮ ᠨᠠᠢᠷ ᠲᠤ ᠤᠷᠢᠵᠤ ᠪᠠᠢᠨᠠ》 ᠭᠡᠵᠦ ᠬᠡᠯᠡᠵᠡᠢ ᠭᠡᠨᠡ᠃
ᠠᠬᠠ ᠳᠡᠭᠦᠦ ᠳᠣᠯᠣᠭᠤᠯᠠ ᠪᠠᠨ ᠶᠠᠪᠤᠭᠠᠳ ᠣᠴᠢᠲᠠᠯᠠ ᠠᠯᠲᠠᠨ ᠡᠭᠦᠳᠡ ᠲᠡᠢ ᠰᠢᠷᠡᠮᠦᠨ ᠭᠡᠷ ᠲᠦ᠍ ᠨᠠᠢᠷ ᠬᠤᠷᠢᠮ ᠬᠢᠬᠦ ᠪᠡᠷ ᠵᠡᠬᠡᠭᠰᠡᠨ ᠪᠠᠢᠨᠠ ᠭᠡᠨᠡ᠃
ᠲᠡᠭᠡᠭᠡᠳ ᠬᠡᠳᠦᠭᠦᠯᠡ ᠪᠡᠨ ᠰᠠᠭᠤᠵᠤ ᠪᠠᠢᠲᠠᠯᠠ ᠭᠡᠷ ᠨᠢ ᠬᠠᠶᠠᠭᠠ ᠬᠠᠨᠠ ᠠ᠋ᠴᠠ ᠪᠠᠨ ᠬᠠᠯᠠᠵᠤ ᠲᠡᠰᠴᠦ ᠰᠠᠭᠤᠬᠤ ᠠᠷᠭᠠ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠪᠠᠯᠭᠤᠵᠤ ᠠᠪᠴᠢᠷᠠᠭᠰᠠᠨ ᠳᠠᠯᠠᠢ ᠪᠠᠨ ᠲᠠᠯᠪᠢᠬᠤ ᠳ᠋ᠤ᠌ ᠬᠠᠭᠠᠨ ᠤ᠋ ᠬᠢᠨ ᠴᠥᠮ ᠦᠭᠡᠢ ᠪᠣᠯᠵᠠᠢ ᠭᠡᠨᠡ᠃
ᠳᠣᠯᠣᠭᠠᠨ ᠠᠬᠠ ᠳᠡᠭᠦᠦᠰ᠄《ᠵᠠ᠂ ᠪᠢᠳᠡ ᠱᠠᠭᠠᠵᠠᠭᠠᠢ ᠬᠠᠭᠠᠨ ᠢ᠋ ᠳᠠᠷᠤᠵᠤ ᠦᠭᠡᠢ ᠬᠢᠯᠡ᠂ ᠣᠳᠣ ᠨᠤᠲᠤᠭ ᠣᠷᠣᠨ ᠳ᠋ᠤ᠌ ᠪᠠᠨ ᠪᠤᠴᠠᠶᠠ!》 ᠬᠡᠮᠡᠭᠡᠳ ᠭᠠᠳᠠᠭᠠᠳᠤ ᠳᠠᠯᠠᠢ ᠶ᠋ᠢᠨ ᠤᠷᠲᠤ ᠲᠢᠪ ᠲᠦ᠍ ᠢᠷᠡᠭᠡᠳ ᠬᠤᠷᠮᠤᠰᠲᠠ ᠲᠩᠷᠢ ᠳ᠋ᠦ᠍ ᠭᠠᠷᠴᠤ ᠳᠣᠯᠣᠭᠠᠨ ᠪᠤᠷᠬᠠᠨ ᠣᠳᠣ ᠪᠣᠯᠤᠨ ᠬᠤᠪᠢᠷᠠᠭᠠᠳ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠵᠠᠢ ᠭᠡᠨᠡ ᠠ᠋᠃
※ᠪᠦᠪᠡᠢ ᠬᠥᠲᠥᠯᠪᠦᠷᠢ ᠶ᠋ᠢᠨ ᠰᠣᠨᠣᠰᠳᠠᠭ ᠦᠯᠢᠭᠡᠷ ᠦ᠋ᠨ ᠲᠡᠭᠦᠪᠦᠷᠢ᠃
ᠪᠢᠴᠢᠬᠠᠨ ᠦᠷᠡᠰ ᠦ᠋ᠨ ᠢ᠋ᠶ᠋ᠡᠨ ᠲᠥᠰᠦᠭᠡᠯᠡᠯ ᠦ᠋ᠨ ᠶᠢᠷᠲᠢᠨᠴᠦ ᠶ᠋ᠢ ᠬᠥᠭᠵᠢᠭᠦᠯᠵᠦ ᠂ ᠮᠣᠩᠭᠣᠯ ᠠᠬᠤᠢ ᠂ ᠰᠡᠳᠬᠢᠯᠭᠡᠨ ᠦ᠌ ᠰᠣᠶᠣᠯ ᠢ᠋ ᠲᠦᠭᠡᠭᠡᠬᠦ ᠵᠣᠷᠢᠯᠭᠠ ᠲᠠᠢ ᠶᠦᠨᠢᠲ᠋ᠸᠯ ᠺᠯᠦ᠋ᠪ ᠦ᠋ᠨ ᠪᠦᠪᠡᠢ ᠬᠥᠲᠥᠯᠪᠦᠷᠢ ᠶ᠋ᠢᠨ ᠦᠯᠢᠭᠡᠷ ᠢ᠋ ᠰᠣᠨᠣᠰᠤᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠯᠠ!
ᠶᠦᠨᠢᠲ᠋ᠸᠯ ᠲᠦᠷᠦᠭᠦᠯᠡᠵᠦ ᠠᠯᠬᠤᠨᠠ᠃
ᠮᠣᠩᠭᠣᠯ ᠦᠰᠦᠭ ᠠᠮᠢᠯᠠᠭᠤᠯᠤᠨ ᠬᠠᠳᠠᠭᠴᠢ᠄ ᠵᠡᠷᠮᠦᠳ ᠸ· ᠥᠯᠵᠡᠢ
ᠬᠢᠨᠠᠭᠴᠢ᠄ ᠭᠠᠷᠮᠠ