ᠰᠢᠲᠠᠷᠠᠴᠢᠨ ᠬᠦᠦ- ᠬᠥᠲᠥᠯᠦᠭᠴᠢ ᠫ ∙ ᠠᠨᠤᠵᠢᠨ ᠪᠦᠪᠡᠢ 2D UnitelШатарчин хүү- Хөтлөгч П.Анужин _ Бүүвэй
813ᠰᠢᠲᠠᠷᠠᠴᠢᠨ ᠬᠦᠦ- ᠬᠥᠲᠥᠯᠦᠭᠴᠢ ᠫ ∙ ᠠᠨᠤᠵᠢᠨ ᠪᠦᠪᠡᠢ 2D
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ ᠭᠠᠭᠴᠠ ᠬᠦᠦ ᠲᠡᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠠᠮᠢᠳᠤᠷᠠᠨ ᠰᠠᠭᠤᠳᠠᠭ ᠪᠠᠢᠵᠠᠢ᠃
ᠭᠡᠲᠡᠯᠡ ᠬᠦᠦ ᠨᠢ ᠨᠢᠭᠡ ᠡᠳᠦᠷ ᠭᠡᠨᠡᠳᠲᠡ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠴᠢᠬᠠᠵᠠᠢ ᠭᠡᠨᠡ᠃
ᠡᠴᠢᠭᠡ ᠡᠬᠡ ᠨᠢ ᠭᠠᠭᠴᠠ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠰᠠᠨᠠᠭᠠ ᠪᠠᠷ ᠤᠨᠠᠵᠤ᠃ ᠦᠷᠭᠦᠯᠵᠢ ᠠᠰᠠᠭᠤᠵᠤ ᠰᠤᠷᠠᠭᠯᠠᠭᠰᠠᠭᠠᠷ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠣᠭᠲᠣ ᠰᠤᠷᠠᠭ ᠭᠠᠷᠤᠭᠰᠠᠨ ᠦᠭᠡᠢ ᠭᠡᠨᠡ᠃
ᠭᠡᠲᠡᠯᠡ ᠭᠤᠷᠪᠠᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠬᠦᠦ ᠨᠢ ᠭᠡᠨᠡᠳᠲᠡ ᠣᠷᠣᠭᠠᠳ ᠢᠷᠡᠵᠡᠢ ᠭᠡᠨᠡ᠃ ᠡᠴᠢᠭᠡ ᠡᠬᠡ ᠬᠣᠶᠠᠷ ᠨᠢ ᠪᠥᠭᠡᠮ ᠪᠠᠶᠠᠷ ᠪᠣᠯᠵᠠᠢ᠃
ᠲᠡᠭᠡᠭᠡᠳ ᠠᠪᠤ ᠨᠢ ᠬᠦᠦ ᠡᠴᠡ ᠪᠡᠨ᠄《ᠮᠢᠨᠦ ᠬᠦᠦ ᠭᠤᠷᠪᠠᠨ ᠵᠢᠯ ᠬᠠᠮᠢᠭᠠᠭᠤᠷ ᠶᠠᠭᠤ ᠶᠠᠭᠤ ᠦᠵᠡᠵᠦ ᠰᠤᠷᠴᠤ ᠢᠷᠡᠪᠡ?》 ᠭᠡᠵᠦ ᠠᠰᠠᠭᠤᠵᠠᠢ᠃
ᠬᠦᠦ ᠨᠢ᠄《ᠪᠢ ᠭᠤᠷᠪᠠᠨ ᠵᠢᠯ ᠣᠯᠠᠨ ᠭᠠᠵᠠᠷ ᠢ᠋ᠶ᠋ᠠᠷ ᠶᠠᠪᠤᠯᠠ᠃ ᠭᠤᠷᠪᠠᠨ ᠵᠦᠢᠯ ᠢ᠋ ᠰᠤᠷᠤᠯᠠ᠃
ᠡᠬᠢᠨ ᠦ᠌ ᠵᠢᠯ ᠳ᠋ᠦ᠍ ᠨᠢ ᠪᠢᠴᠢᠭ ᠦᠰᠦᠭ ᠰᠤᠷᠤᠯᠠ᠃ ᠬᠣᠶᠠᠳᠠᠬᠢ ᠵᠢᠯ ᠳ᠋ᠦ᠍ ᠳᠠᠭᠤᠤ ᠳᠠᠭᠤᠯᠠᠵᠤ᠂ ᠬᠥᠭᠵᠢᠮ ᠳᠠᠷᠤᠵᠤ ᠰᠤᠷᠤᠯᠠ᠃ ᠭᠤᠷᠪᠠᠳᠠᠬᠢ ᠵᠢᠯ ᠳ᠋ᠦ᠍ ᠨᠢ ᠰᠢᠳᠡᠷᠡ ᠲᠣᠭᠯᠠᠵᠤ ᠰᠤᠷᠤᠯᠠ》 ᠭᠡᠵᠦ ᠬᠡᠯᠡᠵᠡᠢ᠃
ᠢᠩᠭᠢᠭᠡᠳ ᠭᠤᠷᠪᠠᠭᠤᠯᠠ ᠪᠠᠨ ᠬᠠᠭᠤᠴᠢᠨ ᠶᠣᠰᠣᠭᠠᠷ ᠠᠮᠢᠳᠤᠷᠠᠨ ᠰᠠᠭᠤᠬᠤ ᠪᠣᠯᠵᠠᠢ ᠭᠡᠨᠡ᠃
ᠨᠢᠭᠡᠨ ᠡᠳᠦᠷ ᠬᠡᠰᠡᠭ ᠠᠶᠠᠨᠴᠢᠨ ᠶᠠᠪᠤᠵᠤ ᠪᠠᠢᠭᠠᠳ ᠲᠡᠷᠡ ᠠᠢᠯ ᠤ᠋ᠨ ᠣᠢᠷᠠ ᠢᠷᠡᠭᠡᠳ ᠪᠠᠭᠤᠵᠤ ᠦᠳᠡᠯᠡᠪᠡ᠃
ᠨᠥᠭᠦᠭᠡ ᠬᠦᠦ ᠠᠶᠠᠨᠴᠢᠳ ᠳᠡᠭᠡᠷᠡ ᠣᠴᠢᠵᠤ ᠦᠵᠡᠪᠡᠯ ᠨᠢᠭᠡ ᠲᠣᠮᠣ ᠨᠣᠶᠠᠨ ᠶᠠᠪᠤᠵᠤ ᠪᠠᠢᠨᠠ ᠭᠡᠨᠡ᠃
ᠬᠦᠦ ᠨᠣᠶᠠᠨ ᠤ᠋ ᠠᠮᠤᠷ ᠮᠡᠨᠳᠦ ᠶ᠋ᠢ ᠮᠡᠳᠡᠭᠡᠳ᠄《ᠨᠣᠶᠠᠨ ᠲᠠ ᠬᠠᠮᠢᠭᠠ ᠬᠦᠷᠬᠦ ᠪᠡᠷ ᠮᠣᠷᠢᠯᠠᠵᠤ ᠶᠠᠪᠤᠨᠠ?》 ᠭᠡᠵᠦ ᠠᠰᠠᠭᠤᠵᠠᠢ᠃
《ᠪᠢ ᠠᠯᠤᠰ ᠬᠣᠯᠠ ᠶ᠋ᠢᠨ ᠨᠢᠭᠡ ᠭᠦᠷᠦᠨ ᠦ᠌ ᠡᠵᠡᠨ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠨᠠ᠃ ᠴᠢ ᠡᠨᠳᠡ ᠶᠠᠭᠤ ᠭᠡᠵᠦ ᠢᠷᠡᠪᠡ?》 ᠭᠡᠵᠦ ᠬᠦᠦ ᠡᠴᠡ ᠠᠰᠠᠭᠤᠵᠠᠢ ᠭᠡᠨᠡ᠃
《ᠪᠢ ᠬᠤᠳᠠᠯᠳᠤᠭᠠ ᠬᠢᠬᠦ ᠪᠡᠷ ᠶᠠᠪᠤᠵᠤ ᠪᠠᠢᠨᠠ》 ᠭᠡᠵᠦ ᠬᠦᠦ ᠬᠠᠷᠢᠭᠤᠯᠵᠠᠢ᠃
《ᠴᠢ ᠶᠠᠭᠤᠨ ᠤ᠋ ᠬᠤᠳᠠᠯᠳᠤᠭᠠ ᠬᠢᠬᠦ ᠶᠦᠮ?》 ᠭᠡᠵᠦ ᠨᠣᠶᠠᠨ ᠠᠰᠠᠭᠤᠪᠠ᠃
《ᠪᠢ ᠥᠪᠡᠷ ᠢ᠋ ᠪᠡᠨ ᠬᠤᠳᠠᠯᠳᠤᠨᠠ》 ᠭᠡᠵᠦ ᠬᠦᠦ ᠬᠠᠷᠢᠭᠤᠯᠵᠠᠢ ᠭᠡᠨᠡ᠃
《ᠲᠡᠭᠡᠪᠡᠯ ᠴᠢᠨᠦ ᠪᠡᠶᠡ ᠶᠠᠮᠠᠷ ᠦᠨᠡ ᠲᠡᠢ ᠶᠦᠮ ᠪᠣᠢ?》
《ᠮᠢᠨᠦ ᠪᠡᠶᠡ ᠨᠢᠭᠡ ᠲᠤᠯᠤᠮ ᠠᠯᠲᠠᠨ ᠤ᠋ ᠦᠨᠡ ᠲᠡᠢ》 ᠭᠡᠵᠦ ᠬᠦᠦ ᠬᠠᠷᠢᠭᠤᠯᠪᠠ᠃
ᠨᠣᠶᠠᠨ᠄《ᠡᠨᠡ ᠮᠠᠭᠤ ᠨᠠᠮᠠ ᠶ᠋ᠢ ᠠᠯᠲᠠ ᠮᠥᠩᠭᠥ ᠦᠭᠡᠢ ᠭᠡᠵᠦ ᠪᠠᠰᠤᠮᠵᠢᠯᠠᠵᠤ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠰᠡᠭᠦᠯ ᠳ᠋ᠦ᠍ ᠬᠠᠷᠢᠭᠤ ᠪᠠᠨ ᠠᠪᠤᠨᠠ》 ᠭᠡᠳ ᠨᠢᠭᠡ ᠲᠤᠯᠤᠮ ᠠᠯᠲᠠ ᠠᠪᠤ ᠡᠵᠢ ᠳ᠋ᠦ᠍ ᠨᠢ ᠥᠭᠭᠦᠭᠡᠳ᠄
ᠨᠥᠭᠦᠭᠡ ᠬᠦᠦ ᠶ᠋ᠢ ᠲᠤᠯᠤᠮ ᠳ᠋ᠤ᠌ ᠬᠢᠵᠦ ᠨᠢᠭᠡ ᠪᠢᠴᠢᠭ ᠪᠢᠴᠢᠵᠦ ᠲᠣᠯᠣᠭᠠᠢ ᠶ᠋ᠢᠨ ᠬᠢᠨᠢ ᠦᠰᠦᠨ ᠳ᠋ᠦ᠍ ᠤᠶᠠᠭᠠᠳ ᠲᠤᠯᠤᠮ ᠤ᠋ᠨ ᠢ᠋ᠶ᠋ᠠᠨ ᠠᠮᠠ ᠶ᠋ᠢ ᠦᠳᠡᠭᠡᠳ᠄
《ᠮᠠᠨ ᠤ᠋ ᠳ᠋ᠤ᠌ ᠠᠪᠠᠴᠢᠵᠤ ᠲᠤᠰᠢᠶᠠ!》 ᠭᠡᠳ ᠬᠣᠶᠠᠷ ᠵᠠᠷᠤᠯᠠᠭ ᠢ᠋ᠶ᠋ᠠᠷ ᠶᠠᠪᠤᠭᠤᠯᠵᠠᠢ᠃
ᠲᠡᠭᠡᠭᠡᠳ ᠬᠣᠶᠠᠷ ᠵᠠᠷᠤᠯᠠᠭ ᠬᠦᠦ ᠶ᠋ᠢ ᠠᠪᠤᠭᠠᠳ ᠪᠤᠴᠠᠭᠠᠳ ᠶᠠᠪᠤᠵᠠᠢ᠃ ᠬᠦᠦ ᠵᠠᠮ ᠳ᠋ᠤ᠌ ᠪᠠᠨ ᠲᠤᠯᠤᠮ ᠳᠣᠲᠣᠷᠠ ᠬᠠᠴᠢᠨ ᠰᠠᠢᠬᠠᠨ ᠳᠠᠭᠤᠤ ᠳᠠᠭᠤᠯᠠᠵᠤ ᠶᠠᠪᠤᠵᠠᠢ ᠭᠡᠨᠡ᠃ ᠬᠣᠶᠠᠷ ᠵᠠᠷᠤᠯᠠᠭ ᠤ᠋ᠨ ᠰᠡᠳᠬᠢᠯ ᠤᠶᠠᠷᠠᠵᠤ ᠥᠷᠦᠪᠳᠦᠭᠡᠳ ᠲᠤᠯᠤᠮ ᠠ᠋ᠴᠠ ᠨᠢ ᠭᠠᠷᠭᠠᠭᠠᠳ ᠢᠯᠡ ᠠᠪᠴᠤ ᠶᠠᠪᠤᠬᠤ ᠪᠣᠯᠵᠠᠢ᠃
ᠭᠤᠷᠪᠠᠭᠤᠯᠠ ᠶᠠᠪᠤᠭᠰᠠᠭᠠᠷ ᠨᠢᠭᠡ ᠶᠡᠬᠡ ᠵᠡᠭᠡᠰᠦᠲᠡᠢ ᠭᠣᠣᠯ ᠤ᠋ᠨ ᠳᠡᠷᠭᠡᠳᠡ ᠠᠮᠠᠷᠠᠬᠤ ᠪᠠᠷ ᠪᠠᠭᠤᠳᠠᠯᠯᠠᠵᠠᠢ ᠭᠡᠨᠡ᠃
ᠬᠦᠦ ᠲᠡᠷᠡ ᠵᠡᠭᠡᠰᠦᠨ ᠡᠴᠡ ᠨᠢᠭᠡ ᠶ᠋ᠢ ᠠᠪᠴᠢᠷᠠᠵᠤ ᠯᠢᠮᠪᠦ ᠬᠢᠭᠡᠳ ᠭᠠᠢᠬᠠᠮᠰᠢᠭᠲᠠᠢ ᠰᠠᠢᠬᠠᠨ ᠯᠢᠮᠪᠦᠳᠡᠵᠡᠢ ᠭᠡᠨᠡ᠃
ᠬᠣᠶᠠᠷ ᠵᠠᠷᠤᠯᠠᠭ ᠴᠢᠩᠨᠠᠭᠰᠠᠭᠠᠷ ᠪᠠᠢᠭᠠᠳ ᠤᠨᠲᠠᠵᠤ ᠣᠷᠬᠢᠵᠠᠢ᠃
ᠡᠨᠡ ᠵᠠᠪᠰᠠᠷ ᠬᠦᠦ ᠦᠰᠦᠨ ᠳ᠋ᠦ᠍ ᠪᠡᠨ ᠪᠠᠢᠭᠠ ᠪᠢᠴᠢᠭ ᠢ᠋ ᠠᠪᠴᠤ ᠦᠵᠡᠪᠡᠯ᠄《ᠡᠭᠦᠨ ᠢ᠋ ᠱᠣᠷᠣᠩ ᠳ᠋ᠤ᠌ ᠬᠢᠭᠡᠳ ᠨᠠᠮᠠ ᠶ᠋ᠢ ᠣᠴᠢᠲᠠᠯᠠ ᠰᠠᠢᠨ ᠴᠠᠭᠳᠠᠵᠤ ᠪᠠᠢᠭᠠᠷᠠᠢ!》 ᠭᠡᠰᠡᠨ ᠪᠠᠢᠪᠠ᠃
ᠬᠦᠦ ᠲᠡᠷᠡ ᠪᠢᠴᠢᠭ ᠦ᠋ᠨ ᠬᠢᠨᠢ ᠣᠷᠣᠨ ᠳ᠋ᠤ᠌᠄《ᠡᠭᠦᠨ ᠢ᠋ ᠮᠠᠨ ᠤ᠋ ᠭᠡᠷ ᠲᠦ᠍ ᠰᠠᠭᠤᠯᠭᠠᠵᠤ ᠰᠠᠢᠬᠠᠨ ᠬᠣᠭᠣᠯᠠ ᠥᠭᠴᠦ᠂ ᠳᠤᠷᠠ ᠪᠠᠷ ᠨᠢ ᠪᠠᠢᠯᠭᠠᠵᠤ ᠰᠠᠢᠨ ᠠᠰᠠᠷᠠᠵᠤ ᠪᠠᠢ!》 ᠭᠡᠵᠦ ᠪᠢᠴᠢᠭᠡᠳ ᠦᠰᠦᠨ ᠳ᠋ᠦ᠍ ᠪᠡᠨ ᠤᠶᠠᠴᠢᠬᠠᠵᠠᠢ᠃
ᠲᠡᠭᠡᠭᠡᠳ ᠥᠨᠥᠬᠢ ᠬᠣᠶᠠᠷ ᠵᠠᠷᠤᠯᠠᠭ ᠰᠡᠷᠡᠭᠡᠳ ᠬᠦᠦ ᠶ᠋ᠢ ᠲᠤᠯᠤᠮ ᠳ᠋ᠤ᠌ ᠨᠢ ᠬᠢᠵᠦ ᠦᠳᠡᠭᠡᠳ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠨᠢ ᠲᠤᠰᠢᠶᠠᠵᠠᠢ᠃ ᠵᠠᠬᠢᠷᠤᠭᠴᠢ ᠨᠢ ᠲᠤᠯᠤᠮ ᠢ᠋ ᠬᠠᠨᠵᠠᠯᠠᠵᠤ ᠦᠵᠡᠪᠡᠯ ᠵᠠᠯᠠᠭᠤ ᠬᠦᠦ ᠭᠠᠷᠴᠤ ᠢᠷᠡᠪᠡ᠃
ᠲᠡᠭᠦᠨ ᠦ᠌ ᠦᠰᠦᠨ ᠳ᠋ᠦ᠍ ᠪᠠᠢᠭᠠ ᠪᠢᠴᠢᠭ ᠢ᠋ ᠦᠵᠡᠪᠡᠯ᠄《ᠡᠭᠦᠨ ᠢ᠋ ᠮᠠᠨ ᠤ᠋ ᠭᠡᠷ ᠲᠦ᠍ ᠰᠠᠭᠤᠯᠭᠠᠵᠤ ᠰᠠᠢᠬᠠᠨ ᠬᠣᠭᠣᠯᠠ ᠥᠭᠴᠦ᠂ ᠳᠤᠷᠠ ᠪᠠᠷ ᠨᠢ ᠪᠠᠢᠯᠭᠠᠵᠤ ᠰᠠᠢᠨ ᠠᠰᠠᠷᠠᠵᠤ ᠪᠠᠢ!》 ᠭᠡᠰᠡᠨ ᠪᠠᠢᠵᠠᠢ᠃
《ᠲᠡᠭᠡᠭᠡᠳ ᠲᠤᠯᠤᠮ ᠳ᠋ᠤ᠌ ᠬᠢᠵᠦ ᠶᠠᠪᠤᠭᠤᠯᠳᠠᠭ ᠨᠢ ᠶᠠᠭᠠᠬᠢᠵᠤ ᠪᠠᠢᠭᠠ ᠶᠤᠮ ᠪᠣᠯ? ᠬᠥᠮᠦᠨ ᠳ᠋ᠦ᠍ ᠦᠵᠡᠭᠦᠯᠬᠦ ᠦᠭᠡᠢ ᠴᠢᠬᠤᠯᠠ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ ᠪᠣᠯᠪᠠ ᠤᠤ? ᠭᠡᠵᠦ ᠡᠯᠳᠡᠪ ᠢ᠋ ᠪᠣᠳᠣᠭᠰᠠᠭᠠᠷ ᠨᠣᠶᠠᠨ ᠤ᠋ ᠬᠠᠲᠤᠨ ᠳ᠋ᠤ᠌ ᠥᠨᠥᠬᠢ ᠪᠢᠴᠢᠭ ᠢ᠋ ᠨᠢ ᠠᠪᠠᠴᠢᠵᠤ ᠦᠵᠡᠭᠦᠯᠦᠭᠡᠳ ᠬᠦᠦ ᠶ᠋ᠢ ᠨᠣᠶᠠᠨ ᠤ᠋ ᠳ᠋ᠤ᠌ ᠰᠠᠭᠤᠯᠭᠠᠪᠠ᠃
ᠬᠦᠦ ᠨᠣᠶᠠᠨ ᠤ᠋ ᠭᠡᠷ ᠲᠦ᠍ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠰᠠᠢᠬᠠᠨ ᠠᠮᠲᠠᠲᠠᠢ ᠬᠣᠭᠣᠯᠠ ᠬᠢᠯᠭᠡᠵᠦ ᠢᠳᠡᠭᠡᠳ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠰᠠᠭᠤᠬᠤ ᠪᠣᠯᠵᠠᠢ ᠭᠡᠨᠡ᠃
ᠭᠡᠷ ᠲᠦ᠍ ᠨᠢ ᠪᠠᠢᠬᠤ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠠᠵᠢᠭᠯᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠪᠠᠷᠠᠭᠤᠨ ᠠᠭᠤᠯᠠ ᠶ᠋ᠢᠨ ᠬᠠᠮᠠᠷ ᠳᠡᠭᠡᠷᠡ ᠶᠡᠷᠦ ᠬᠥᠮᠦᠨ ᠭᠠᠷᠬᠤ ᠦᠭᠡᠢ ᠪᠣᠯᠤᠯᠲᠠᠢ ᠶᠤᠮ ᠭᠡᠨᠡ᠃
ᠨᠢᠭᠡᠨ ᠡᠳᠦᠷ ᠬᠦᠦ ᠨᠢᠭᠡ ᠬᠥᠮᠦᠨ ᠡᠴᠡ᠄《ᠡᠨᠡ ᠪᠠᠷᠠᠭᠤᠨ ᠬᠠᠮᠠᠷ ᠳᠡᠭᠡᠷᠡ ᠶᠠᠭᠠᠬᠢᠭᠠᠳ ᠬᠥᠮᠦᠨ ᠭᠠᠷᠳᠠᠭ ᠦᠭᠡᠢ ᠶᠦᠮ ᠪᠣᠢ?》 ᠭᠡᠵᠦ ᠠᠰᠠᠭᠤᠵᠠᠢ᠃
《ᠡᠨᠡ ᠪᠠᠷᠠᠭᠤᠨ ᠬᠠᠮᠠᠷ ᠤ᠋ᠨ ᠴᠠᠭᠠᠳᠤ ᠲᠠᠯᠠ ᠳ᠋ᠤ᠌ ᠨᠢᠭᠡ ᠶᠡᠬᠡ ᠰᠢᠲᠠᠷᠠᠴᠢᠨ ᠠᠢᠬᠤᠪᠲᠤᠷ ᠬᠠᠭᠠᠨ ᠤ᠋ ᠬᠢ ᠪᠠᠢᠳᠠᠭ ᠶᠤᠮ᠃ ᠲᠡᠷᠡ ᠬᠠᠭᠠᠨ ᠥᠪᠡᠷ ᠲᠡᠢ ᠪᠡᠨ ᠰᠢᠲᠠᠷᠠ ᠲᠣᠭᠯᠠᠭᠠᠳ ᠬᠣᠵᠢᠬᠳᠠᠰᠠᠨ ᠬᠥᠮᠦᠨ ᠢ᠋ ᠲᠣᠯᠣᠭᠠᠢ ᠠᠪᠳᠠᠭ ᠶᠤᠮ》 ᠭᠡᠵᠦ ᠨᠥᠭᠦᠭᠡ ᠬᠥᠮᠦᠨ ᠬᠡᠯᠡᠵᠡᠢ᠃
ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠬᠦᠦ᠄《ᠪᠢ ᠨᠢᠭᠡ ᠵᠢᠯ ᠰᠢᠲᠠᠷᠠ ᠶ᠋ᠢᠨ ᠡᠷᠳᠡᠮ ᠳ᠋ᠦ᠍ ᠰᠢᠮᠳᠠᠵᠤ ᠰᠢᠲᠠᠷᠠ ᠰᠤᠷᠤᠭᠰᠠᠨ ᠤ᠋ ᠬᠡᠷᠡᠭ ᠶᠠᠭᠤ ᠪᠢᠯᠡ᠃ ᠡᠨᠡ ᠬᠠᠭᠠᠨ ᠲᠠᠢ ᠨᠢᠭᠡ ᠨᠡᠭᠦᠭᠡᠳ ᠦᠵᠡᠶᠡ᠃ ᠶᠡᠷᠦ ᠨᠢ ᠡᠨᠳᠡ ᠤᠳᠠᠭᠠᠨ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠪᠠᠢᠬᠠ》 ᠭᠡᠵᠦ ᠪᠣᠳᠣᠭᠠᠳ ᠨᠢᠭᠡ ᠡᠳᠦᠷ ᠪᠠᠷᠠᠭᠤᠨ ᠬᠠᠮᠠᠷ ᠳᠡᠭᠡᠷᠡ ᠭᠠᠷᠴᠠᠢ ᠭᠡᠨᠡ᠃
ᠭᠡᠲᠡᠯᠡ ᠲᠡᠷᠡ ᠬᠠᠭᠠᠨ ᠤ᠋ ᠮᠠᠨᠠᠭᠠᠴᠢ ᠨᠠᠷ ᠨᠢ ᠪᠠᠷᠢᠵᠤ ᠠᠪᠠᠴᠢᠭᠠᠳ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠭᠤᠯᠵᠠᠢ ᠭᠡᠨᠡ᠃
《ᠴᠢ ᠶᠠᠭᠤ ᠭᠡᠵᠦ ᠡᠨᠡ ᠬᠠᠮᠠᠷ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠪᠡ?》 ᠭᠡᠵᠦ ᠬᠠᠭᠠᠨ ᠠᠰᠠᠭᠤᠵᠠᠢ᠃
《ᠪᠢ ᠡᠨᠳᠡ ᠬᠢ ᠶ᠋ᠢᠨ ᠬᠥᠮᠦᠨ ᠪᠢᠰᠢ ᠤᠴᠢᠷ ᠠ᠋ᠴᠠ ᠭᠠᠷᠳᠠᠭ᠂ ᠭᠠᠷᠳᠠᠭ ᠦᠭᠡᠢ ᠶ᠋ᠢ ᠮᠡᠳᠡᠭᠰᠡᠨ ᠦᠭᠡᠢ᠃ ᠵᠦᠭᠡᠷ ᠬᠡᠰᠦᠵᠦ ᠶᠠᠪᠤᠲᠠᠯᠠ ᠲᠠᠨ ᠤ᠋ ᠬᠢᠨ ᠪᠠᠷᠢᠵᠤ ᠠᠪᠴᠢᠷᠠᠯᠠ》 ᠭᠡᠵᠦ ᠬᠦᠦ ᠬᠡᠯᠡᠪᠡ᠃
《ᠵᠠ᠂ ᠲᠡᠭᠡᠪᠡᠯ ᠬᠣᠶᠠᠭᠤᠯᠠ ᠪᠠᠨ ᠰᠢᠳᠡᠷᠡ ᠲᠠᠯᠪᠢᠨᠠ ᠳᠠ᠃ ᠬᠣᠵᠢᠭᠳᠠᠪᠠᠯ ᠲᠣᠯᠣᠭᠠᠢ ᠦᠭᠡᠢ ᠭᠡᠵᠦ ᠮᠡᠳᠡᠭᠡᠷᠡᠢ!》 ᠭᠡᠵᠦ ᠬᠠᠭᠠᠨ ᠬᠡᠯᠡᠪᠡ᠃
《ᠵᠠ᠂ ᠪᠢ ᠴᠦ᠍ ᠰᠢᠲᠠᠷᠠ ᠮᠡᠳᠡᠳᠡᠭ ᠦᠭᠡᠢ ᠳᠡ!》 ᠭᠡᠵᠦ ᠬᠦᠦ ᠬᠡᠯᠡᠵᠡᠢ᠃
《ᠮᠡᠳᠡᠬᠦ᠂ ᠮᠡᠳᠡᠬᠦ ᠦᠭᠡᠢ ᠬᠠᠮᠢᠶᠠ ᠦᠭᠡᠢ》 ᠭᠡᠵᠦ ᠬᠠᠭᠠᠨ ᠬᠡᠯᠡᠭᠡᠳ ᠰᠢᠲᠠᠷᠠ ᠪᠠᠨ ᠠᠪᠤᠭᠠᠳ ᠢᠷᠡᠵᠡᠢ ᠭᠡᠨᠡ᠃
《ᠲᠣᠭᠯᠠᠵᠤ ᠪᠠᠢᠭᠠ ᠶᠤᠮ ᠪᠣᠯᠬᠣᠷ ᠬᠡᠨ ᠬᠡᠨ ᠨᠢ ᠠᠳᠠᠯᠢᠬᠠᠨ ᠰᠢᠢᠳᠬᠡᠯ ᠲᠡᠢ ᠪᠠᠢᠨᠠ ᠪᠢᠵᠡ ᠳᠡ?》 ᠭᠡᠵᠦ ᠬᠦᠦ ᠠᠰᠠᠭᠤᠵᠠᠢ᠃
ᠬᠠᠭᠠᠨ᠄《ᠴᠢ ᠬᠣᠵᠢᠬᠤ ᠵᠠᠶᠠᠭᠠ ᠲᠠᠢ ᠲᠥᠷᠥᠭᠰᠡᠨ ᠪᠣᠯ ᠲᠡᠷᠡ ᠬᠣᠵᠢᠭᠰᠠᠨ ᠦᠶᠡ ᠳ᠋ᠦ᠍ ᠴᠢᠨᠢ ᠪᠣᠯᠤᠶᠠ!》 ᠭᠡᠵᠡᠢ ᠭᠡᠨᠡ᠃
《ᠦᠭᠡᠢ ᠠ᠋᠂ ᠲᠡᠷᠡ ᠲᠤᠰᠠ ᠦᠭᠡᠢ᠃ ᠲᠣᠭᠯᠠᠭᠠᠮ ᠪᠣᠯᠬᠣᠷ ᠤᠷᠢᠳ ᠠ᠋ᠴᠠ ᠰᠠᠢᠨ ᠪᠣᠯᠵᠣᠵᠤ ᠲᠣᠭᠯᠠᠪᠠᠯ ᠳᠡᠭᠡᠷᠡ!》 ᠭᠡᠵᠦ ᠬᠦᠦ ᠬᠡᠯᠡᠵᠡᠢ ᠭᠡᠨᠡ᠃
《ᠴᠢ ᠲᠡᠭᠡᠭᠡᠳ ᠶᠠᠭᠠᠬᠢᠬᠤ ᠭᠡᠳ ᠪᠠᠢᠭᠠ ᠶᠤᠮ ᠪᠣᠢ?》 ᠭᠡᠵᠦ ᠬᠠᠭᠠᠨ ᠠᠭᠤᠷᠯᠠᠪᠠ ᠭᠡᠨᠡ᠃
《ᠲᠠ ᠨᠠᠮᠠ ᠶ᠋ᠢ ᠬᠣᠨᠵᠢᠭᠳᠠᠪᠠᠯ ᠲᠣᠯᠣᠭᠠᠢ ᠦᠭᠡᠢ ᠭᠡᠰᠡᠨ ᠰᠢᠦ ᠳᠡ᠃ ᠲᠠ ᠬᠣᠨᠵᠢᠭᠳᠠᠪᠠᠯ ᠪᠠᠰᠠ ᠯᠠ ᠲᠣᠯᠣᠭᠠᠢ ᠦᠭᠡᠢ ᠪᠣᠯᠬᠤ ᠶᠣᠰᠣᠲᠠᠢ᠃ ᠡᠨᠡ ᠪᠣᠯ ᠲᠣᠭᠯᠠᠮ ᠤ᠋ᠨ ᠮᠥᠷᠥᠢ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠬᠠᠭᠠᠨ ᠲᠥᠷᠥ ᠶ᠋ᠢᠨ ᠬᠠᠤᠯᠢ ᠪᠢᠰᠢ ᠳᠡ᠃ ᠬᠡᠷᠪᠡ ᠢᠩᠭᠢᠵᠦ ᠲᠣᠭᠲᠠᠪᠠᠯ ᠴᠠᠭᠠᠰᠤᠨ ᠳᠡᠭᠡᠷᠡ ᠪᠢᠴᠢᠴᠢᠬᠡᠳ ᠳᠡᠷᠭᠡᠳᠡ ᠪᠡᠨ ᠬᠣᠶᠠᠷ ᠰᠡᠯᠡᠮᠡ ᠲᠠᠯᠪᠢᠭᠠᠳ ᠲᠣᠭᠯᠠᠶᠠ!》 ᠭᠡᠵᠡᠢ ᠭᠡᠨᠡ᠃
ᠬᠠᠭᠠᠨ᠄《ᠡᠨᠡ ᠮᠠᠭᠤ ᠬᠦᠦ ᠪᠠᠢᠲᠤᠭᠠᠢ ᠨᠡᠷᠡᠲᠡᠢ ᠰᠠᠢᠨ ᠰᠢᠲᠠᠷᠠᠴᠢᠨ ᠨᠠᠮᠠ ᠶ᠋ᠢ ᠬᠣᠵᠢᠳᠠᠭ ᠦᠭᠡᠢ ᠶᠦᠮ ᠴᠢᠨᠢ᠃ ᠡᠨᠡ ᠨᠠᠮᠠ ᠶ᠋ᠢ ᠶᠠᠭᠠᠬᠢᠵᠤ ᠬᠣᠵᠢᠬᠤ ᠪᠣᠢ ᠳᠠ᠃ ᠨᠢᠭᠡᠨᠲᠡ ᠬᠣᠵᠢᠬᠤ ᠦᠭᠡᠢ ᠶᠦᠮ ᠢ᠋ ᠶᠠᠭᠤ ᠴᠤ᠌ ᠭᠡᠰᠡᠨ ᠶᠠᠭᠠᠬᠢᠬᠤ ᠪᠣᠢ》 ᠭᠡᠵᠦ ᠪᠣᠳᠣᠭᠠᠳ᠄《ᠵᠠ᠂ ᠶᠠᠭᠠᠬᠢᠬᠤ ᠪᠣᠢ᠂ ᠴᠢᠨᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠪᠣᠯᠤᠶᠠ!》 ᠭᠡᠵᠦ ᠬᠡᠯᠡᠭᠡᠳ᠂
ᠪᠢᠴᠢᠭᠡᠴᠢ ᠪᠡᠨ ᠳᠠᠭᠤᠳᠠᠵᠤ᠄《ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠡᠨ ᠬᠣᠵᠢᠭᠰᠠᠨ ᠨᠢ ᠬᠣᠵᠢᠭᠳᠠᠭᠰᠠᠨ ᠤ᠋ ᠪᠠᠨ ᠲᠣᠯᠣᠭᠠᠢ ᠶ᠋ᠢ ᠠᠪᠤᠨᠠ》 ᠭᠡᠵᠦ ᠪᠢᠴᠢᠭᠦᠯᠦᠭᠡᠳ ᠳᠡᠷᠭᠡᠳᠡ ᠪᠡᠨ ᠬᠣᠶᠠᠷ ᠰᠡᠯᠡᠮᠡ ᠲᠠᠯᠪᠢᠭᠠᠳ ᠲᠣᠭᠯᠠᠵᠠᠢ ᠭᠡᠨᠡ᠃
ᠡᠬᠢᠯᠡᠭᠡᠳ ᠨᠢᠭᠡ ᠲᠣᠭᠯᠠᠭᠰᠠᠨ ᠳ᠋ᠤ᠌ ᠬᠡᠨ ᠨᠢ ᠴᠦ᠍ ᠬᠣᠵᠢᠭᠰᠠᠨ ᠦᠭᠡᠢ ᠲᠡᠩᠴᠡᠵᠡᠢ᠃ ᠭᠡᠲᠡᠯᠡ ᠬᠠᠭᠠᠨ ᠤ᠋ ᠴᠢᠷᠠᠢ ᠬᠠᠴᠢᠨ ᠪᠣᠯᠵᠤ ᠶᠡᠬᠡ ᠯᠡ ᠲᠡᠪᠡᠳᠡᠵᠦ ᠠᠶᠤᠬᠤ ᠰᠢᠭ᠋ ᠪᠣᠯᠵᠠᠢ ᠭᠡᠨᠡ᠃
ᠳᠠᠷᠠᠭᠠ ᠨᠢ ᠨᠢᠭᠡ ᠲᠣᠭᠯᠠᠭᠠᠳ ᠬᠦᠦ ᠬᠣᠵᠢᠭᠠᠳ ᠬᠡᠯᠡᠯᠴᠡᠭᠡᠷ ᠶᠣᠰᠣᠭᠠᠷ ᠬᠠᠭᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠲᠠᠰᠤ ᠴᠠᠪᠴᠢᠪᠠ᠃
ᠬᠠᠭᠠᠨ ᠤ᠋ ᠲᠦᠰᠢᠮᠡᠳ ᠡᠴᠡ ᠡᠬᠢᠯᠡᠭᠡᠳ ᠬᠠᠪᠢ ᠣᠢᠷᠠ ᠶ᠋ᠢᠨ ᠠᠮᠢᠲᠠᠨ ᠲᠡᠷᠡ ᠬᠦᠦ ᠳ᠋ᠦ᠍ ᠶᠡᠬᠡ ᠪᠠᠶᠠᠷᠯᠠᠵᠠᠢ ᠭᠡᠨᠡ᠃
ᠤᠴᠢᠷ ᠨᠢ ᠲᠡᠷᠡ ᠬᠠᠭᠠᠨ ᠡᠳᠦᠷ ᠪᠦᠷᠢ ᠨᠢᠭᠡ ᠬᠥᠮᠦᠨ ᠲᠡᠢ ᠵᠠᠪᠠᠯ ᠰᠢᠳᠡᠷᠡ ᠲᠣᠭᠯᠠᠵᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠠᠪᠳᠠᠭ ᠪᠠᠢᠭᠰᠠᠨ ᠤᠴᠢᠷ ᠠ᠋ᠴᠠ ᠣᠢᠷᠠ ᠬᠠᠪᠢ ᠶ᠋ᠢᠨ ᠪᠦᠬᠦ ᠬᠥᠮᠦᠨ ᠮᠠᠰᠢ ᠶᠡᠬᠡ ᠳᠤᠷᠠ ᠦᠭᠡᠢᠴᠡᠬᠦ ᠪᠣᠯᠤᠭᠰᠠᠨ ᠶᠤᠮ ᠰᠠᠨᠵᠠᠢ᠃
ᠡᠨᠡ ᠦᠶᠡ ᠳ᠋ᠦ᠍ ᠨᠥᠭᠦᠭᠡ ᠠᠯᠤᠰ ᠬᠣᠯᠠ ᠶᠠᠪᠤᠭᠰᠠᠨ ᠨᠣᠶᠠᠨ ᠨᠢ ᠡᠷᠭᠢᠨ ᠢᠷᠡᠵᠡᠢ ᠭᠡᠨᠡ᠃
ᠦᠨᠡᠨ ᠳ᠋ᠦ᠍ ᠪᠡᠨ ᠲᠡᠷᠡ ᠨᠣᠶᠠᠨ ᠡᠨᠡ ᠠᠶᠤᠯᠲᠤ ᠬᠠᠭᠠᠨ ᠠ᠋ᠴᠠ ᠵᠢᠭᠤᠲᠠᠵᠤ ᠶᠠᠪᠤᠭᠰᠠᠨ ᠪᠠᠢᠵᠠᠢ᠃
ᠡᠢᠮᠦ ᠤᠴᠢᠷ ᠠ᠋ᠴᠠ ᠲᠡᠷᠡ ᠨᠣᠶᠠᠨ ᠬᠦᠦ ᠶ᠋ᠢ ᠰᠢᠢᠳᠬᠡᠬᠦ ᠪᠠᠢᠲᠤᠭᠠᠢ ᠠᠳᠤᠭᠤ ᠮᠠᠯ᠂ ᠡᠳ᠋ ᠬᠥᠷᠥᠩᠭᠡ ᠲᠡᠷᠢᠭᠦᠲᠡᠨ ᠶᠡᠬᠡ ᠵᠦᠢᠯ ᠢ᠋ᠶ᠋ᠡᠷ ᠱᠠᠩᠨᠠᠵᠠᠢ᠃
ᠢᠩᠭᠢᠭᠡᠳ ᠬᠦᠦ ᠭᠡᠷ ᠲᠦ᠍ ᠪᠡᠨ ᠪᠤᠴᠠᠵᠤ ᠢᠷᠡᠭᠡᠳ ᠠᠪᠤ ᠡᠵᠢ ᠲᠡᠢ ᠪᠡᠨ ᠠᠭᠤᠯᠵᠠᠨ ᠤᠴᠢᠷ ᠪᠠᠢᠳᠠᠯ ᠢ᠋ᠶ᠋ᠠᠨ ᠬᠡᠯᠡᠯᠴᠡᠨ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠵᠠᠢ ᠭᠡᠨᠡ᠃
※ ᠲᠠᠨ ᠳ᠋ᠤ᠌ ᠶᠠᠭ ᠣᠳᠣ ᠶᠦᠨᠢᠲ᠋ᠸᠯ ᠺᠯᠦ᠋ᠪ ᠦ᠋ᠨ ᠪᠦᠪᠡᠢ ᠬᠥᠲᠥᠯᠪᠦᠷᠢ ᠶ᠋ᠢᠨ ᠰᠣᠨᠣᠰᠳᠠᠭ ᠦᠯᠢᠭᠡᠷ ᠦ᠋ᠨ ᠲᠡᠭᠦᠪᠦᠷᠢ ᠬᠦᠷᠴᠦ ᠪᠠᠢᠨᠠ᠃
ᠪᠢᠴᠢᠬᠠᠨ ᠦᠷᠡᠰ ᠦ᠋ᠨ ᠢ᠋ᠶ᠋ᠡᠨ ᠲᠥᠰᠦᠭᠡᠯᠡᠯ ᠦ᠋ᠨ ᠶᠢᠷᠲᠢᠨᠴᠦ ᠶ᠋ᠢ ᠬᠥᠭᠵᠢᠭᠦᠯᠵᠦ ᠂ ᠮᠣᠩᠭᠣᠯ ᠠᠬᠤᠢ ᠂ ᠰᠡᠳᠬᠢᠯᠭᠡᠨ ᠦ᠌ ᠰᠣᠶᠣᠯ ᠢ᠋ ᠲᠦᠭᠡᠭᠡᠬᠦ ᠵᠣᠷᠢᠯᠭᠠ ᠲᠠᠢ ᠶᠦᠨᠢᠲ᠋ᠸᠯ ᠺᠯᠦ᠋ᠪ ᠦ᠋ᠨ ᠪᠦᠪᠡᠢ ᠬᠥᠲᠥᠯᠪᠦᠷᠢ ᠶ᠋ᠢᠨ ᠦᠯᠢᠭᠡᠷ ᠢ᠋ ᠰᠣᠨᠣᠰᠤᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠯᠠ!
ᠶᠦᠨᠢᠲ᠋ᠸᠯ ᠲᠦᠷᠦᠭᠦᠯᠡᠵᠦ ᠠᠯᠬᠤᠨᠠ᠃
ᠮᠣᠩᠭᠣᠯ ᠦᠰᠦᠭ ᠠᠮᠢᠯᠠᠭᠤᠯᠤᠨ ᠬᠠᠳᠠᠭᠴᠢ᠄ ᠵᠡᠷᠮᠦᠳ ᠸ· ᠥᠯᠵᠡᠢ
ᠬᠢᠨᠠᠭᠴᠢ᠄ ᠳᠠᠪᠰᠢᠯᠲᠤ