ᠬᠥᠭᠵᠢᠮ ᠦ᠋ᠨ ᠡᠬᠡᠰᠢᠭ- ᠳ· ᠨᠠᠴᠤᠭᠳᠣᠷᠵᠢХөгжмийн эгшиг-Д.Нацагдорж
327 ᠳ· ᠨᠠᠴᠤᠭᠳᠣᠷᠵᠢ
ᠬᠡᠵᠢᠶᠡᠨ ᠡᠴᠡ ᠨᠡᠭᠦᠳᠡᠯᠴᠢᠨ ᠮᠣᠩᠭᠣᠯ ᠤ᠋ᠨ ᠣᠷᠣᠨ ᠳ᠋ᠤ᠌ ᠰᠢᠨᠡ ᠪᠦᠲᠦᠵᠦ ᠪᠠᠢᠭᠠ ᠭᠠᠴᠠᠭᠠ ᠲᠣᠰᠬᠣᠨ ᠪᠠᠢᠨᠠ᠃ ᠰᠠᠨᠠᠮᠰᠠᠷ ᠦᠭᠡᠢ ᠪᠠᠢᠲᠠᠯᠠ᠂ ᠮᠣᠳᠣᠨ ᠪᠠᠢᠰᠢᠩ ᠤ᠋ᠨ ᠴᠣᠩᠬᠣᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠨᠢᠭᠡ ᠬᠥᠭᠵᠢᠮ ᠦ᠋ᠨ ᠡᠬᠡᠰᠢᠭ ᠰᠢᠷᠭᠤᠯᠠᠨ ᠣᠷᠣᠵᠤ ᠢᠷᠡᠭᠡᠳ᠂ ᠴᠢᠯᠠᠭᠤᠨ ᠤ᠋ ᠵᠢᠷᠦᠬᠡ ᠶ᠋ᠢ ᠮᠠᠭᠠᠵᠢᠯᠠᠨ ᠳᠣᠭᠳᠣᠯᠤᠭᠤᠯᠬᠤ ᠳ᠋ᠤ᠌᠂ ᠳᠠᠷᠤᠢ ᠰᠡᠳᠬᠢᠯ ᠨᠢ ᠲᠣᠭᠲᠠᠵᠤ ᠶᠠᠳᠠᠨ᠂ ᠲᠡᠭᠦᠨ ᠢ᠋ ᠳᠠᠭᠠᠭᠤᠯᠤᠨ ᠭᠠᠳᠠᠭᠠ ᠭᠠᠷᠪᠠ᠃
ᠭᠠᠭᠴᠠᠬᠠᠨ ᠵᠠᠯᠠᠭᠤ ᠡᠷᠡ᠂ ᠬᠣᠯᠠᠬᠢ ᠠᠭᠤᠯᠠ ᠶ᠋ᠢᠨ ᠠᠮᠠᠨ ᠤ᠋ ᠠᠮᠠᠰᠠᠷ ᠲᠤ᠌ ᠪᠠᠢᠭᠴᠢ ᠨᠢᠭᠡ ᠳ᠋ᠦᠩᠵᠡᠨ ᠮᠣᠳᠣ ᠶ᠋ᠢ
ᠨᠥᠬᠥᠷ ᠪᠣᠯᠭᠠᠵᠤ᠂ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠰᠠᠨᠳᠠᠢᠯᠠᠨ ᠰᠡᠮᠡᠬᠡᠷ ᠰᠠᠭᠤᠪᠠᠯ᠂ ᠴᠠᠭᠠᠨ ᠭᠡᠭᠡ ᠲᠡᠷᠲᠡᠭᠡ ᠠᠭᠤᠯᠠ ᠶ᠋ᠢᠨ ᠴᠢᠨᠠᠳᠤ ᠤᠷᠤᠭᠤ ᠵᠠᠮᠬᠠᠷᠠᠨ ᠣᠷᠣᠵᠤ᠂ ᠨᠢᠭᠡᠨ ᠡᠷᠭᠢᠨ ᠲᠣᠭᠣᠷᠢᠨ ᠪᠦᠷᠦᠢ ᠪᠠᠷᠤᠢ ᠪᠣᠯᠤᠭᠠᠳ᠂ ᠪᠠᠰᠠ ᠯᠠ ᠴᠢᠪ ᠴᠢᠮᠡᠭᠡ ᠦᠭᠡᠢ ᠭᠠᠭᠴᠠ ᠬᠦ᠌ ᠡᠰᠡᠷᠭᠦ ᠡᠲᠡᠭᠡᠳ ᠲᠦ᠍ ᠭᠠᠴᠠᠭᠠᠨ ᠤ᠋ ᠠᠢᠯ ᠤ᠋ᠨ ᠭᠡᠷ ᠲᠦ᠍ ᠥᠴᠦᠬᠡᠨ ᠭᠠᠯ ᠰᠦᠮᠡᠯᠵᠡᠬᠦ ᠨᠢ ᠭᠢᠯᠲᠦᠭᠡᠨᠡᠨ ᠦᠵᠡᠭᠳᠡᠵᠦ᠂ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠪᠡᠯᠴᠢᠭᠡᠷ ᠲᠡᠭᠡᠨ ᠬᠣᠴᠣᠷᠤᠭᠰᠠᠨ ᠬᠡᠳᠦᠨ ᠢᠮᠠᠭᠠ ᠬᠠᠳᠠᠨ ᠤ᠋ ᠢᠷᠣᠭᠠᠷ ᠲᠠᠬᠢ ᠪᠤᠲᠠ ᠶ᠋ᠢ ᠬᠡᠮᠡᠯᠢᠨᠡ᠃
ᠵᠡᠭᠦᠨ ᠬᠣᠢᠲᠤ ᠵᠦᠭ ᠲᠦ᠍ ᠲᠠᠷᠢᠶᠠᠴᠢᠨ ᠡᠷᠡ ᠬᠤᠭᠤᠷ ᠳᠡᠯᠡᠳᠴᠦ ᠪᠠᠢᠭᠠ ᠶ᠋ᠢᠨ ᠠᠶᠠᠯᠭᠤ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠰᠠᠢᠬᠠᠨ ᠦᠨᠦᠷ ᠲᠡᠢ ᠵᠥᠭᠡᠯᠡᠨ ᠰᠠᠯᠬᠢ ᠲᠠᠢ ᠨᠠᠭᠠᠳᠤᠯᠳᠤᠨ ᠢᠷᠡᠵᠦ᠂ ᠴᠢᠯᠠᠭᠤᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠥᠷᠲᠡᠭᠡᠯᠡᠨ᠂ ᠰᠡᠳᠬᠢᠯ ᠦ᠋ᠨ ᠬᠢᠨᠢ ᠳᠣᠲᠣᠷᠠ ᠤᠢᠳᠬᠠᠷ ᠪᠠᠶᠠᠷ ᠢ᠋ ᠬᠣᠣᠰᠯᠠᠭᠤᠯᠤᠨ ᠤᠨᠳᠤᠷᠤᠭᠤᠯᠵᠤ᠂ ᠬᠥᠭᠡᠷᠦᠬᠦᠢ ᠥᠴᠦᠬᠡᠨ ᠵᠢᠷᠦᠬᠡ ᠶ᠋ᠢ ᠤᠶᠠᠷᠠᠭᠤᠯᠤᠭᠠᠳ ᠲᠡᠭᠦᠨ ᠡᠴᠡ ᠬᠠᠵᠠᠭᠤ ᠶ᠋ᠢᠨ ᠪᠤᠯᠠᠭ ᠴᠤ᠌ ᠣᠷᠣᠵᠤ᠂ ᠲᠡᠭᠦᠨ ᠦ᠌ ᠢᠷᠠᠭᠤ ᠤᠷᠤᠰᠬᠠᠯ ᠲᠠᠢ ᠪᠥᠵᠢᠭᠯᠡᠯᠳᠦᠨ ᠣᠳᠤᠨᠠ᠃
ᠨᠢᠭᠡ ᠪᠦᠯᠦᠭ ᠰᠤᠪᠤᠳ ᠤ᠋ᠨ ᠠᠶᠠᠯᠭᠤ ᠶ᠋ᠢ ᠠᠷᠠᠢᠬᠠᠨ ᠵᠣᠴᠢᠯᠠᠵᠤ ᠥᠩᠭᠡᠷᠡᠭᠦᠯᠪᠡᠴᠦ᠂ ᠳᠠᠷᠠᠭᠠ ᠪᠠᠷ ᠪᠠᠰᠠ ᠨᠢᠭᠡ ᠰᠦᠷᠦᠭ ᠴᠡᠴᠡᠭ ᠦ᠋ᠨ ᠬᠥᠭ ᠠᠢᠯᠴᠢᠯᠠᠨ ᠢᠷᠡᠬᠦ ᠲᠤᠯᠠ ᠬᠡᠳᠦᠢᠨ ᠴᠢᠯᠠᠭᠤᠨ ᠤ᠋ ᠬᠦᠰᠡᠯ ᠮᠥᠷᠥᠭᠡᠳᠦᠯ᠂ ᠬᠤᠷᠢᠮ ᠳ᠋ᠤ᠌ ᠪᠡᠯᠡᠳᠬᠡᠭᠰᠡᠨ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠶ᠋ᠢᠨ ᠠᠳᠠᠯᠢ ᠵᠡᠷᠭᠡᠯᠡᠵᠦ ᠭᠱᠠᠨ ᠵᠠᠭᠤᠷᠠ ᠥᠩᠭᠡᠷᠡᠭᠰᠡᠨ ᠢᠷᠡᠭᠡᠳᠦᠢ ᠶ᠋ᠢᠨ ᠬᠡᠷᠡᠭ ᠮᠢᠩᠭᠠᠨ ᠡᠬᠢ ᠲᠡᠢ ᠶᠠᠪᠤᠳᠠᠯ ᠦᠷᠭᠦᠯᠵᠢᠯᠡᠨ ᠰᠠᠨᠠᠭᠳᠠᠵᠤ᠂ ᠰᠡᠳᠬᠢᠯ ᠰᠦᠨᠡᠰᠦ ᠨᠢ ᠥᠷᠯᠥᠭᠡᠨ ᠦ᠌ ᠪᠠ ᠦᠳᠡᠰᠢ ᠶ᠋ᠢᠨ ᠰᠠᠢᠬᠠᠨ ᠣᠷᠣᠨ ᠤ᠋ ᠬᠣᠭᠣᠷᠣᠨᠳᠣ ᠰᠦᠯᠵᠢᠵᠦ᠂ ᠲᠩᠷᠢ ᠪᠠ ᠲᠠᠮᠤ ᠶ᠋ᠢᠨ ᠭᠠᠢᠬᠠᠮᠰᠢᠭᠲᠤ ᠣᠷᠣᠨ ᠨᠤᠭᠤᠳ ᠢ᠋ᠶ᠋ᠠᠷ ᠠᠢᠯᠴᠢᠯᠠᠨ᠂ ᠲᠡᠭᠦᠪᠡᠷ ᠬᠥᠨᠳᠡᠯᠡᠨ ᠭᠤᠯᠳᠤ ᠵᠤᠭᠠᠴᠠᠬᠤ ᠶ᠋ᠢ ᠬᠦᠰᠡᠨᠡ᠃ ᠵᠢᠷᠦᠬᠡᠨ ᠦ᠌ ᠴᠢᠳᠬᠥᠷ ᠪᠠ ᠳᠠᠭᠢᠨᠢ ᠵᠡᠷᠭᠡ ᠶ᠋ᠢᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠢᠨᠠᠭᠯᠠᠯ ᠤ᠋ᠨ ᠬᠠᠲᠤᠨ ᠬᠠᠭᠠᠳ ᠤ᠋ᠨ ᠤᠷᠤᠭᠤᠯ ᠳᠡᠭᠡᠷᠡ ᠪᠥᠮᠪᠥᠷᠢᠨ ᠠᠯᠢ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠵᠠᠯᠭᠢᠭᠴᠢ ᠶ᠋ᠢᠨ ᠬᠠᠰ ᠤ᠋ᠨ ᠠᠮᠠᠨ ᠳ᠋ᠤ᠌ ᠳᠤᠷᠠ ᠪᠠᠷ ᠨᠠᠭᠠᠳᠬᠤ ᠶ᠋ᠢ ᠡᠷᠡᠮᠡᠯᠵᠡᠨᠡ᠃
ᠡᠢᠮᠦ ᠪᠠᠢᠳᠠᠯ ᠢ᠋ ᠬᠠᠪᠤᠷ ᠴᠠᠭ ᠤ᠋ᠨ ᠰᠡᠢᠮᠡᠬᠡᠢ ᠰᠠᠷᠠ ᠰᠢᠨᠡᠳᠬᠡᠯ ᠦ᠋ᠨ ᠵᠢᠷᠦᠬᠡᠨ ᠦ᠌ ᠳᠣᠲᠣᠷᠠ ᠬᠡᠵᠢᠶᠡ ᠵᠤᠯᠠ ᠪᠠᠷᠢᠬᠤ ᠶ᠋ᠢ ᠬᠡᠯᠡᠵᠦ ᠥᠭᠬᠦ ᠪᠠᠰᠠ ᠪᠣᠯᠤᠭᠠ ᠦᠭᠡᠢ ᠭᠡᠨᠡ᠃ ᠠᠶᠠ ᠣᠷᠴᠢᠯᠠᠩ ᠴᠢ ᠶᠠᠭᠤ ᠪᠣᠳᠣᠵᠤ ᠪᠠᠢᠨᠠ?
ᠢᠩᠭᠢᠵᠦ ᠲᠡᠭᠡᠵᠦ ᠮᠠᠩᠬᠤᠷᠠᠭᠰᠠᠭᠠᠷ ᠭᠡᠨᠡᠳᠲᠡ ᠦᠵᠡᠬᠦ ᠳ᠋ᠦ᠍ ᠬᠥᠭᠵᠢᠮ ᠦ᠋ᠨ ᠳᠠᠭᠤ ᠴᠤ᠌ ᠵᠠᠮᠬᠠᠷᠠᠵᠠᠢ᠃ ᠰᠠᠯᠬᠢᠨ ᠤ᠋ ᠠᠮᠢᠰᠬᠤᠯ ᠴᠤ᠌ ᠰᠢᠷᠦᠭᠦᠳᠴᠡᠢ᠃ ᠰᠥᠨᠢ ᠶ᠋ᠢᠨ ᠬᠦᠷᠳᠦ ᠶᠠᠭᠠᠷᠠᠨ ᠳᠣᠪᠲᠣᠯᠪᠠ᠃ ᠵᠠᠯᠠᠭᠤ ᠡᠷᠡ ᠨᠢᠭᠡᠨᠲᠡ ᠤᠷᠲᠤ ᠰᠡᠭᠦᠷᠡᠰᠦ ᠠᠯᠳᠠᠭᠠᠳ᠂ ᠡᠨᠡ ᠬᠦ᠌ ᠠᠷᠪᠠᠨ ᠲᠠᠪᠤᠨ ᠮᠢᠨᠦ᠋ᠲ ᠦ᠋ᠨ ᠵᠠᠭᠤᠷᠠ ᠰᠡᠳᠬᠢᠯ ᠢ᠋ ᠪᠥᠮᠪᠥᠷᠢᠭᠦᠯᠦᠭᠰᠡᠨ ᠪᠠᠢᠳᠠᠯ ᠤ᠋ᠨ ᠬᠠᠷᠢᠭᠤ ᠶ᠋ᠢ ᠬᠡᠵᠢᠶᠡ ᠪᠠ ᠬᠠᠮᠢᠭᠠ ᠰᠣᠨᠣᠰᠤᠨᠠ ᠭᠡᠵᠦ ᠭᠤᠨᠢᠭᠯᠠᠭᠰᠠᠭᠠᠷ ᠭᠡᠷ ᠲᠦ᠍ ᠣᠷᠣᠵᠤ ᠲᠡᠮᠳᠡᠭᠯᠡᠪᠡ᠃
1031 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠤᠳᠤᠯᠲᠤ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ