ᠬᠥᠳᠡᠭᠡ ᠲᠠᠯᠠ ᠶ᠋ᠢᠨ ᠦᠵᠡᠰᠬᠦᠯᠡᠩ- ᠳ· ᠨᠠᠴᠤᠭᠳᠣᠷᠵᠢХөдөө талын үзэсгэлэн-Д.Нацагдорж
413 ᠳ· ᠨᠠᠴᠤᠭᠳᠣᠷᠵᠢ
ᠬᠥᠨᠳᠡᠢ ᠲᠠᠯᠠ ᠶ᠋ᠢᠨ ᠵᠡᠷᠭᠡᠯᠭᠡᠨ ᠮᠢᠷᠠᠯᠵᠠᠨ ᠵᠢᠷᠪᠢᠭᠢᠨᠡᠬᠦ ᠶ᠋ᠢᠨ ᠳᠤᠮᠳᠠ ᠬᠡᠳᠦᠨ ᠶᠠᠭᠤᠮᠠ ᠰᠦᠮᠡᠯᠵᠡᠨ ᠦᠵᠡᠭᠳᠡᠬᠦ ᠨᠢ ᠬᠠᠷᠢ ᠭᠠᠵᠠᠷ ᠤ᠋ᠨ ᠠᠶᠠᠨ ᠤ᠋ ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠶᠠᠭᠠᠬᠢᠨ ᠲᠠᠨᠢᠭᠳᠠᠨᠠ᠃ ᠬᠤᠷᠳᠤᠯᠠᠨ ᠳᠣᠪᠲᠣᠯᠬᠤ ᠠᠭᠤᠷ ᠤ᠋ᠨ ᠲᠡᠷᠭᠡᠨ ᠦ᠌ ᠡᠮᠦᠨᠡ ᠡᠴᠡ ᠨᠠᠮᠤᠷ ᠤ᠋ᠨ ᠰᠠᠯᠬᠢ ᠬᠦᠴᠦᠲᠡᠢ ᠦᠯᠢᠶᠡᠬᠦ ᠳ᠋ᠦ᠍ ᠬᠣᠶᠠᠷ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠭᠢᠯᠲᠦᠭᠡᠨᠡᠨ ᠬᠣᠯᠠ ᠶ᠋ᠢᠨ ᠪᠠᠷᠠ ᠶ᠋ᠢ ᠬᠠᠷᠠᠵᠤ ᠶᠠᠳᠠᠨᠠ᠃
ᠡᠪᠦᠭᠡᠨ ᠵᠢᠯᠤᠭᠠᠴᠢ ᠤᠬᠤᠰᠬᠢᠨ ᠬᠡᠢ ᠶ᠋ᠢ ᠨᠡᠮᠡᠬᠦ ᠳ᠋ᠦ᠍ ᠳᠥᠷᠪᠡᠨ ᠬᠦᠷᠳᠦ ᠴᠢᠯᠥᠭᠡ ᠵᠠᠪ ᠦᠭᠡᠢ ᠡᠷᠭᠢᠯᠳᠦᠨᠡ᠃ ᠪᠥᠷᠲᠥᠯᠵᠡᠨ ᠬᠠᠷᠠᠭᠳᠠᠵᠠᠢ ᠪᠠᠷᠠ ᠨᠢᠭᠡ ᠦᠶᠡ ᠳᠠᠯᠳᠠ ᠣᠷᠣᠵᠤ ᠨᠢᠭᠡ ᠦᠶᠡ ᠢᠯᠡ ᠭᠠᠷᠤᠨᠠ᠃ ᠤᠳᠠᠯ ᠦᠭᠡᠢ ᠠᠯᠲᠠᠨ ᠭᠠᠨᠵᠢᠷᠠ ᠨᠤᠭᠤᠳ ᠪᠥᠷᠲᠥᠯᠵᠡᠨ ᠴᠤᠬᠤᠢᠵᠤ ᠥᠷᠯᠥᠭᠡᠨ ᠦ᠌ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠦᠵᠡᠰᠬᠦᠯᠡᠩ ᠲᠡᠢ ᠭᠢᠯᠠᠯᠵᠠᠨᠠ᠃
ᠲᠡᠷᠡ ᠬᠦ᠌ ᠬᠡᠢᠳ ᠦ᠋ᠨ ᠰᠤᠪᠤᠷᠭᠠ ᠶ᠋ᠢᠨ ᠲᠡᠨᠳᠡ ᠭᠠᠢᠬᠠᠮᠰᠢᠭ ᠲᠠᠢ ᠮᠠᠨᠵᠢᠯᠭᠠ ᠴᠠᠮᠬᠠᠭ ᠲᠤ᠌ ᠡᠯᠭᠦᠭᠰᠡᠨ ᠬᠣᠩᠬᠠᠨ ᠤ᠋ ᠳᠠᠭᠤ ᠨᠢ ᠬᠠᠩᠭᠢᠨᠠᠨ ᠵᠢᠩᠭᠢᠨᠡᠨᠡ᠃ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠦ᠋ᠨ ᠳᠠᠭᠤ ᠦᠷᠭᠦᠯᠵᠢᠯᠡᠨ ᠳᠦᠩᠭᠢᠨᠡᠨᠡ᠃ ᠴᠠᠮ ᠵᠠᠬᠠᠷ ᠪᠥᠵᠢᠭᠯᠡᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ᠃ ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠰ ᠬᠡᠳᠦ ᠬᠡᠳᠦᠨ ᠵᠠᠭᠤ ᠪᠠᠷ ᠬᠤᠷᠠᠯᠳᠤᠭᠠᠳ ᠡᠷᠢᠶᠡᠨ ᠮᠡᠷᠢᠶᠡᠨ ᠢ᠋ ᠡᠮᠦᠰᠴᠦ ᠡᠰᠢ ᠲᠡᠰᠢ ᠵᠥᠷᠢᠯᠳᠦᠨᠡ᠃
ᠰᠦᠯᠵᠢᠯᠳᠦᠨ ᠳᠠᠪᠬᠢᠯᠳᠤᠬᠤ ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠴᠡᠩᠭᠡᠯ ᠨᠢ ᠮᠢᠨᠦ ᠰᠡᠳᠬᠢᠯ ᠢ᠋ ᠳᠠᠷᠤᠢ ᠪᠠᠬᠠᠳᠤᠭᠤᠯᠵᠤ᠂ ᠰᠠᠩ ᠪᠠᠢᠰᠠ ᠶ᠋ᠢᠨ ᠮᠣᠷᠢᠨ ᠤ᠋ ᠰᠠᠢᠬᠠᠨ ᠨᠢ ᠮᠢᠨᠦ ᠳᠤᠷᠠ ᠶ᠋ᠢ ᠬᠥᠪᠰᠥᠯᠵᠡᠭᠦᠯᠦᠨ ᠬᠥᠳᠡᠯᠭᠡᠨᠡ᠃ ᠮᠣᠩᠭᠣᠯ ᠭᠠᠵᠠᠷ ᠮᠢᠨᠢ ᠠᠭᠤᠵᠢᠮ ᠶᠤᠮ ᠠ᠋᠃ ᠮᠠᠰᠢ ᠰᠠᠢᠬᠠᠨ ᠮᠣᠷᠢ ᠲᠠᠢ ᠶᠤᠮ ᠠ᠋᠃ ᠮᠣᠷᠢ ᠪᠠᠨ ᠤᠨᠤᠭᠠᠳ ᠳᠠᠪᠬᠢᠬᠤ ᠳ᠋ᠤ᠌ ᠮᠠᠨ ᠤ᠋ ᠴᠣᠭ ᠵᠠᠯᠢ ᠰᠡᠷᠭᠦᠨᠡ᠃
ᠡᠰᠢ ᠪᠡᠨ ᠰᠢᠷᠲᠡᠵᠦ ᠲᠠᠢᠰᠢ ᠪᠠᠨ ᠭᠥᠯᠢᠷᠡᠨ᠂ ᠡᠭᠦᠨ ᠢ᠋ ᠭᠠᠢᠬᠠᠵᠤ ᠲᠡᠭᠦᠨ ᠢ᠋ ᠪᠣᠳᠣᠭᠰᠠᠭᠠᠷ ᠶᠠᠪᠤᠲᠠᠯᠠ᠂ ᠣᠯᠠᠨ ᠮᠣᠷᠢ ᠲᠠᠢ ᠬᠥᠮᠦᠰ ᠦ᠋ᠨ ᠳᠤᠮᠳᠠᠭᠤᠷ ᠨᠢᠭᠡᠨ ᠰᠠᠢᠬᠠᠨ ᠰᠠᠷᠠᠯ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ ᠲᠡᠮᠡᠦᠯᠦᠨ ᠠᠮᠠ ᠨᠢ ᠠᠩᠭᠠᠯᠵᠠᠵᠤ᠂ ᠬᠣᠶᠠᠷ ᠴᠢᠬᠢ ᠨᠢ ᠰᠣᠯᠪᠢᠯᠴᠠᠨ ᠦᠵᠡᠭᠳᠡᠬᠦ ᠳ᠋ᠦ᠍ ᠬᠡᠳᠦᠢᠨ ᠮᠢᠨᠦ ᠬᠣᠶᠠᠷ ᠨᠢᠳᠦᠨ ᠳ᠋ᠦ᠍ ᠭᠡᠷᠡᠯᠲᠦᠨ ᠲᠤᠰᠪᠠ᠃ ᠨᠢᠭᠡ ᠵᠠᠯᠠᠭᠤ ᠬᠡᠦᠬᠡᠨ ᠵᠢᠯᠣᠭᠣ ᠶ᠋ᠢ ᠳᠤᠭᠲᠤᠷᠤᠨ ᠵᠢᠳᠬᠦᠭᠦᠯᠦᠭᠰᠡᠭᠡᠷ ᠭᠠᠷᠴᠤ ᠢᠷᠡᠬᠦ ᠨᠢ ᠵᠡᠷᠯᠢᠭ ᠪᠤᠭᠤ ᠶ᠋ᠢᠨ ᠠᠳᠠᠯᠢ ᠥᠩᠭᠡ ᠲᠡᠢ ᠪᠠ ᠴᠣᠭ ᠵᠠᠯᠢ ᠭᠡᠷᠡᠯᠲᠡᠢ ᠵᠢᠪᠬᠤᠯᠠᠩ ᠲᠠᠢ ᠨᠢ ᠲᠦᠮᠡᠨ ᠪᠠᠭᠠᠲᠤᠷ ᠡᠷᠡᠰ ᠦ᠋ᠨ ᠪᠣᠯᠪᠠᠴᠤ ᠵᠢᠷᠦᠬᠡ ᠶ᠋ᠢ ᠴᠡᠴᠡᠷᠡᠭᠦᠯᠦᠨ ᠳᠣᠭᠳᠣᠯᠤᠭᠤᠯᠵᠤ᠂ ᠲᠥᠪ ᠡᠷᠳᠡᠮᠲᠡᠨ ᠣᠶᠤᠲᠠᠨ ᠤ᠋ ᠪᠣᠯᠪᠠᠴᠤ ᠬᠦᠰᠡᠯ ᠢ᠋ ᠨᠢ ᠬᠣᠯᠢᠪᠠᠯᠵᠠᠭᠤᠯᠤᠨ ᠲᠠᠲᠠᠨᠠ᠃
ᠴᠠᠭᠠᠨ ᠰᠠᠷᠠᠯ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠣᠭᠣᠭᠠᠨ ᠭᠥᠯᠢᠮ ᠲᠡᠢ ᠪᠣᠷᠵᠢᠭᠢᠨ ᠶᠠᠩᠵᠤ ᠶ᠋ᠢᠨ ᠡᠮᠡᠭᠡᠯ ᠢ᠋ ᠲᠣᠬᠣᠭᠰᠠᠨ ᠨᠢ ᠬᠣᠯᠠᠬᠢ ᠭᠠᠵᠠᠷ ᠤ᠋ᠨ ᠬᠦᠯᠦᠭ ᠦ᠋ᠨ ᠥᠩᠭᠡ ᠢᠯᠭᠠᠷᠠᠨ ᠦᠵᠡᠰᠬᠦᠯᠡᠩ ᠪᠦᠷᠢᠳᠦᠭᠡᠳ᠂ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠵᠠᠯᠠᠭᠤ ᠥᠬᠢᠨ ᠬᠣᠷᠮᠣᠢ ᠶ᠋ᠢ ᠴᠡᠮᠴᠡᠢᠲᠡᠯᠡ᠂ ᠭᠤᠶᠠ ᠶ᠋ᠢ ᠮᠥᠯᠴᠢᠢᠯᠭᠡᠨ ᠣᠷᠢᠶᠠᠭᠠᠳ ᠬᠥᠨᠳᠡᠯᠡᠨ ᠰᠠᠭᠤᠵᠠᠢ᠃ ᠦᠵᠡᠪᠡᠯ ᠨᠠᠰᠤ ᠠᠷᠪᠠᠨ ᠨᠠᠢ᠍ᠮᠠ᠂ ᠵᠢᠰᠦ ᠰᠢᠨᠡ ᠰᠠᠷᠠᠨ ᠤ᠋ ᠠᠳᠠᠯᠢ ᠬᠤᠷᠴᠠ ᠲᠤᠩᠭᠠᠯᠠᠭ ᠭᠡᠷᠡᠯᠲᠦᠨᠡ᠃ ᠤᠷᠲᠤ ᠬᠠᠷᠠ ᠭᠡᠵᠢᠭᠡ ᠶ᠋ᠢ ᠭᠤᠷᠪᠠ ᠪᠠᠷ ᠳᠠᠷᠤᠨ ᠤᠨᠵᠢᠭᠤᠯᠵᠤ᠂ ᠤᠯᠠᠪᠢᠷ ᠰᠢᠷᠠ ᠳᠤᠷᠳᠤᠩ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠪᠠᠨ ᠣᠷᠢᠶᠠᠨ᠂ ᠥᠷᠥᠭᠡᠰᠦᠨ ᠨᠢᠳᠦᠨ ᠦ᠌ ᠳᠡᠭᠡᠷᠡ ᠲᠠᠯᠠ ᠳᠡᠭᠡᠷᠡ ᠬᠡᠯᠲᠡᠭᠡᠢ ᠵᠠᠩᠭᠢᠯᠠᠨ ᠦᠵᠦᠭᠦᠷ ᠢ᠋ ᠤᠨᠵᠢᠭᠤᠯᠤᠭᠰᠠᠨ ᠨᠢ ᠵᠠᠯᠠᠭᠤ ᠪᠦᠰᠡᠭᠦᠢ ᠶ᠋ᠢᠨ ᠳᠡᠭᠵᠢᠨ ᠪᠠᠢᠳᠠᠯ ᠢ᠋ ᠦᠵᠡᠭᠦᠯᠵᠡᠢ᠃ ᠴᠠᠢᠪᠤᠷ ᠥᠩᠭᠡ ᠲᠡᠢ ᠵᠥᠭᠡᠯᠡᠨ ᠴᠢᠷᠠᠢ ᠨᠢ ᠵᠤᠨ ᠤ᠋ ᠨᠠᠷᠠᠨ ᠳ᠋ᠤ᠌ ᠪᠣᠷᠣᠯᠠᠭᠠᠳ ᠬᠣᠶᠠᠷ ᠬᠠᠴᠠᠷ ᠲᠤ᠌ ᠨᠢ ᠤᠯᠠᠭᠠᠨ ᠲᠤᠶᠠᠭᠠ ᠲᠤᠰᠴᠠᠢ᠃ ᠬᠠᠷᠠᠬᠤ ᠨᠢᠳᠦᠨ ᠦ᠌ ᠬᠠᠷᠠ ᠴᠠᠭᠠᠨ ᠨᠢ ᠬᠣᠣᠰᠯᠠᠭᠠᠳ᠂ ᠬᠣᠲᠠ ᠶ᠋ᠢᠨ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠳᠡᠭᠡᠷᠡ ᠡᠶᠡᠯᠳᠡᠭ ᠢ᠋ᠶ᠋ᠡᠷ ᠬᠥᠳᠡᠯᠬᠦ ᠳᠣᠳᠣᠮ ᠳ᠋ᠤ᠌ ᠮᠢᠨᠦ ᠨᠢᠳᠦ ᠡᠷᠬᠡ ᠦᠭᠡᠢ ᠳᠠᠭᠠᠯᠳᠤᠨ ᠳᠠᠪᠬᠢᠨᠠ᠃
ᠡᠩᠭᠡᠷ ᠨᠢᠳᠤᠷᠭᠠ ᠶ᠋ᠢ ᠬᠠᠷᠠ ᠲᠣᠷᠭᠠ ᠪᠠᠷ ᠡᠮᠵᠢᠵᠦ᠂ ᠨᠠᠷᠢᠬᠠᠨ ᠬᠣᠰᠢᠮᠠᠭ ᠲᠠᠯᠪᠢᠭᠰᠠᠨ ᠬᠦᠷᠡᠩ ᠶᠠᠭᠠᠨ ᠴᠢᠰᠴᠡᠦ ᠳᠡᠪᠡᠯ ᠢ᠋ ᠡᠮᠦᠰᠦᠭᠰᠡᠨ᠂ ᠵᠡᠭᠦᠨ ᠬᠠᠨᠴᠤ ᠳᠣᠲᠣᠷᠠ ᠠ᠋ᠴᠠ ᠨᠠᠷᠢᠬᠠᠨ ᠬᠤᠷᠤᠭᠤ ᠶ᠋ᠢ ᠴᠤᠬᠤᠢᠯᠭᠠᠨ ᠵᠢᠯᠣᠭᠣ ᠴᠤᠯᠪᠤᠭᠤᠷ ᠢ᠋ ᠬᠤᠭᠤᠰ ᠪᠠᠷᠢᠨ ᠠᠳᠬᠤᠭᠠᠳ᠂ ᠪᠠᠷᠠᠭᠤᠨ ᠬᠠᠨᠴᠤ ᠪᠠᠨ ᠰᠤᠯᠠ ᠲᠠᠯᠪᠢᠨ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠭᠠᠷ ᠢ᠋ᠶ᠋ᠠᠨ ᠨᠢᠭᠤᠨ ᠲᠠᠰᠢᠶᠠ ᠪᠠᠨ ᠲᠤᠯᠵᠤ᠂ ᠪᠠᠭᠤᠯᠭᠠᠭᠰᠠᠨ ᠲᠣᠮᠣ ᠨᠢᠳᠤᠷᠭᠠ ᠶ᠋ᠢ ᠳᠠᠯᠪᠠᠢᠯᠭᠠᠨ ᠪᠦᠷᠬᠦᠭᠦᠯᠦᠭᠰᠡᠨ ᠨᠢ ᠰᠢᠨᠡ ᠴᠠᠭ ᠤ᠋ᠨ ᠬᠡᠭᠡᠨᠴᠢᠷ ᠪᠠᠢᠳᠠᠯ ᠢ᠋ ᠭᠠᠢᠬᠠᠭᠤᠯᠵᠠᠢ᠃ ᠬᠣᠭᠣᠯᠠᠢ ᠶ᠋ᠢᠨ ᠲᠣᠪᠴᠢ ᠶ᠋ᠢ ᠵᠠᠳᠠᠭᠠᠢ ᠲᠠᠯᠪᠢᠭᠰᠠᠨ ᠤ᠋ ᠳᠣᠲᠣᠭᠤᠷ ᠬᠠᠷᠠ ᠳᠤᠷᠳᠤᠩ ᠢ᠋ᠶ᠋ᠠᠷ ᠪᠥᠭᠡᠷᠡᠩᠬᠡᠢᠯᠡᠨ ᠡᠮᠵᠢᠭᠰᠡᠨ ᠴᠠᠢᠪᠤᠷ ᠰᠢᠷᠠ ᠳᠤᠷᠳᠤᠩ ᠴᠠᠮᠴᠠᠨ ᠤ᠋ ᠵᠠᠬᠠ ᠴᠤᠬᠤᠢᠵᠤ᠂ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠨᠢᠮᠭᠡᠨ ᠴᠠᠭᠠᠨ ᠬᠥᠷᠥᠰᠥ ᠲᠡᠢ ᠭᠤᠸᠠ ᠬᠦᠵᠦᠭᠦᠦ ᠦᠵᠡᠭᠳᠡᠬᠦ᠁ ᠶᠦᠮ᠃
ᠰᠢᠷᠠ ᠪᠡᠵᠢᠭᠡᠷ ᠪᠦᠰᠡ ᠶ᠋ᠢ ᠱᠠᠪ ᠬᠢᠲᠡᠯᠡ ᠣᠷᠢᠶᠠᠭᠠᠳ᠂ ᠤᠭᠠᠯᠵᠠ ᠲᠠᠢ ᠱᠦᠩᠭᠦᠷ ᠭᠤᠲᠤᠯ ᠢ᠋ ᠳᠥᠷᠦᠭᠡᠨ ᠦ᠌ ᠳᠤᠮᠳᠠ ᠳᠡᠰ ᠬᠢᠲᠡᠯᠡ ᠵᠢᠭᠢᠭᠰᠡᠨ ᠨᠢ ᠲᠠᠯᠠ ᠶ᠋ᠢᠨ ᠢᠳᠡᠷ ᠮᠠᠬᠠᠪᠣᠳ ᠢ᠋ ᠪᠠᠬᠠᠷᠬᠠᠭᠤᠯᠵᠠᠢ᠃ ᠵᠠᠯᠠᠭᠤ ᠬᠥᠮᠦᠨ ᠲᠡᠭᠦᠨ ᠦ᠌ ᠵᠠᠮ ᠢ᠋ ᠬᠥᠨᠳᠡᠯᠡᠨ ᠰᠠᠭᠠᠳᠤᠭᠤᠯᠵᠤ ᠬᠡᠳᠦᠨ ᠦᠭᠡ ᠠᠰᠠᠭᠤᠨ ᠬᠡᠯᠡᠯᠴᠡᠬᠦ ᠳ᠋ᠦ᠍ ᠲᠠᠯᠠ ᠭᠠᠵᠠᠷ ᠤ᠋ᠨ ᠪᠠᠭᠠ ᠥᠬᠢᠨ ᠵᠢᠯᠣᠭᠣ ᠶ᠋ᠢ ᠲᠠᠲᠠᠵᠤ᠂ ᠳᠤᠷᠠ ᠲᠠᠢ ᠪᠠᠷ ᠲᠦᠳᠡᠭᠡᠯᠵᠡᠨ ᠬᠠᠷᠢᠭᠤᠯᠤᠨ ᠥᠴᠢᠵᠦ ᠡᠨᠡ ᠲᠡᠷᠡ ᠶ᠋ᠢ ᠯᠠᠪᠯᠠᠨ ᠰᠣᠨᠢᠷᠬᠠᠨᠠ᠃
ᠲᠡᠰᠢᠶᠡ ᠨᠢ ᠲᠡᠪᠬᠡᠢᠵᠦ᠂ ᠬᠠᠪᠢᠷᠭᠠᠨ ᠤ᠋ ᠶᠠᠰᠤ ᠨᠢ ᠵᠤᠷᠠᠢᠭᠰᠠᠨ ᠢᠯᠭᠤᠨ ᠰᠠᠷᠠᠯ ᠮᠣᠷᠢ ᠨᠢ ᠲᠣᠭᠲᠠᠵᠤ ᠶᠠᠳᠠᠨ᠂ ᠭᠤᠸᠠ ᠰᠠᠢᠬᠠᠨ ᠳᠥᠷᠪᠡᠨ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠭᠡᠯᠵᠢᠯᠡᠨ ᠭᠠᠵᠠᠷ ᠴᠠᠪᠴᠢᠵᠤ᠂ ᠤᠷᠠᠨ ᠰᠠᠢᠬᠠᠨ ᠲᠣᠯᠣᠭᠠᠢ ᠪᠠᠨ ᠡᠰᠢ ᠳᠠᠰᠢ ᠰᠡᠵᠢᠬᠦ ᠨᠢ ᠠᠭᠠᠷ ᠲᠤ᠌ ᠳᠡᠭᠳᠡᠵᠦ᠂ ᠡᠭᠦᠯᠡᠨ ᠳ᠋ᠦ᠍ ᠤᠮᠪᠠᠨ ᠠᠯᠳᠠᠬᠤ ᠪᠣᠯᠪᠠᠴᠤ ᠳᠡᠭᠡᠷᠡ ᠨᠢ ᠤᠨᠤᠭᠰᠠᠨ ᠦᠵᠡᠰᠬᠦᠯᠡᠩᠲᠦ ᠥᠬᠢᠨ ᠠᠵᠢᠭ ᠦᠭᠡᠢ ᠰᠠᠭᠤᠵᠤ ᠦᠭᠦᠯᠡᠯᠳᠦᠬᠦ ᠪᠥᠭᠡᠳ ᠦᠭᠡ ᠬᠡᠯᠡᠯᠴᠡᠨ ᠬᠢᠴᠢᠶᠡᠩᠭᠦᠢᠯᠡᠨ ᠠᠭᠠᠰᠢᠯᠠᠬᠤ ᠨᠢ ᠪᠠᠭᠠ ᠬᠡᠦᠬᠡᠳ ᠮᠡᠲᠦ ᠬᠥᠩᠭᠡᠮᠰᠦᠭ ᠡᠶᠡᠪᠡᠷᠭᠦ᠂ ᠬᠠᠰ ᠤ᠋ᠨ ᠥᠩᠭᠡ ᠲᠡᠢ ᠳᠥᠷᠪᠡᠯᠵᠢᠨ ᠴᠠᠭᠠᠨ ᠰᠢᠲᠦ ᠪᠡᠨ ᠢᠷᠠᠯᠵᠠᠭᠤᠯᠤᠨ ᠦᠶᠡ ᠦᠶᠡ ᠢᠨᠢᠶᠡᠮᠰᠦᠭᠯᠡᠨ ᠮᠦᠰᠢᠶᠡᠨᠡ᠃
ᠬᠡᠭᠡᠷᠡ ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠬᠥᠨᠳᠡᠯᠡᠨ ᠭᠤᠯᠳᠤ ᠳᠠᠪᠬᠢᠵᠤ᠂ ᠬᠥᠳᠡᠭᠡ ᠶ᠋ᠢᠨ ᠰᠠᠷᠠᠭᠤᠯ ᠳ᠋ᠤ᠌ ᠪᠡᠶᠡ ᠪᠡᠨ ᠭᠠᠢᠬᠠᠭᠤᠯᠤᠭᠰᠠᠨ ᠡᠢᠮᠦ ᠨᠢᠭᠡ ᠦᠵᠡᠰᠬᠦᠯᠡᠩᠲᠦ ᠥᠬᠢᠨ ᠲᠡᠢ ᠤᠴᠠᠷᠠᠭᠠᠳ ᠬᠡᠷᠬᠢᠨ ᠰᠡᠳᠬᠢᠯ ᠬᠥᠳᠡᠯᠬᠦ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠠᠵᠢ᠃ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠬᠢᠴᠢᠶᠡᠩᠭᠦᠢᠯᠡᠨ ᠬᠡᠯᠡᠯᠴᠡᠵᠦ ᠰᠣᠨᠢᠷᠬᠠᠯ ᠢ᠋ ᠲᠠᠯᠪᠢᠨᠠ᠃ ᠥᠨᠳᠥᠷ ᠬᠠᠨ ᠤ᠋ ᠥᠪᠥᠷ ᠢ᠋ᠶ᠋ᠡᠷ ᠨᠤᠲᠤᠭᠯᠠᠳᠠᠭ ᠭᠡᠨᠡ᠃ ᠥᠨᠥᠳᠥᠷ ᠲᠡᠨᠳᠡ ᠪᠠᠭᠤᠭᠰᠠᠨ ᠭᠡᠵᠦ ᠡᠮᠦᠨᠡ ᠬᠥᠨᠳᠡᠢ ᠪᠡᠷ
ᠤᠭᠠᠯᠵᠠᠯᠠᠭᠰᠠᠨ ᠡᠷᠢᠶᠡᠨ ᠮᠠᠢᠬᠠᠨ ᠪᠦᠷᠦᠭ ᠪᠠᠷᠤᠭ ᠦᠵᠡᠭᠳᠡᠬᠦ ᠶ᠋ᠢ ᠵᠢᠭᠠᠭᠠᠳ ᠳᠠᠷᠤᠢ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠬᠠᠷᠠᠢᠯᠭᠠᠵᠤ ᠢᠰᠬᠡᠷᠦᠨ᠃ ᠬᠠᠲᠠᠷᠢᠭᠤᠯᠤᠭᠰᠠᠭᠠᠷ ᠣᠳᠪᠠ᠃ ᠬᠡᠷᠪᠡ ᠪᠢ ᠮᠣᠷᠢ ᠲᠠᠢ ᠪᠣᠯᠤᠭᠠᠳ ᠵᠠᠪ ᠲᠠᠢ ᠶᠠᠪᠤᠭᠰᠠᠨ ᠪᠣᠯ ᠳᠠ ᠁
1931 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠢᠳᠰᠢᠩᠬᠣᠷᠯᠣ᠂ ᠭᠦᠨᠳᠦᠰᠠᠩᠪᠤᠤ ᠨᠠᠷᠠᠨᠲᠤᠶᠠᠭᠠ
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠴᠠᠬᠠᠷ ᠪᠠᠲᠤ᠂ ᠣᠳᠬᠠᠨᠰᠣᠠ