ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠨᠢᠭᠡᠳᠦᠭᠡᠷ ᠪᠦᠯᠦᠭ᠂ᠠᠩᠬᠠᠨ ᠤ ᠠᠶᠠᠯᠠᠯ (ᠨᠢᠭᠡ) Сэрүүхэн тал нутаг – <свис> Вальтер Босгард ( Walter Bosshard)- Нэгдүгээр бүлэг・Анхны аялал (1)
373ᠨᠢᠭᠡᠳᠦᠭᠡᠷ ᠪᠦᠯᠦᠭ ᠂ ᠠᠩᠬᠠᠨ ᠤ ᠠᠶᠠᠯᠠᠯ
ᠨᠢᠭᠡ ᠂ ᠴᠠᠭᠠᠨ ᠬᠡᠷᠡᠮ ᠦᠨ ᠴᠠᠭᠠᠳᠤ ᠲᠠᠯᠠ ᠳᠤ
— ᠡᠭᠦᠨ ᠦ᠌ ᠴᠠᠭᠠᠨᠠ ᠨᠢ ᠬᠠᠭᠤᠴᠢᠨ ᠵᠠᠰᠠᠭ ᠤ᠋ᠨ ᠣᠷᠳᠣᠨ ᠤ᠋ ᠠᠰᠠᠷ ᠪᠠᠢᠭᠠ ᠶᠤᠮ ᠭᠡᠵᠦ ᠰᠦᠢᠳ᠋ᠸᠷᠪᠣᠮ ᠲᠠᠢᠯᠪᠤᠷᠢᠯᠠᠨ ᠬᠡᠯᠡᠪᠡ᠃ ᠮᠢᠨᠦ ᠬᠤᠪᠢ ᠳ᠋ᠤ᠌ ᠠᠪᠴᠤ ᠬᠡᠯᠡᠪᠡᠯ ᠬᠥᠮᠦᠨ ᠦ᠌ ᠳᠠᠭᠤ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠪᠠ᠃ ᠬᠠᠵᠠᠭᠤ ᠬᠠᠪᠢ ᠪᠠᠷ ᠶᠠᠳᠠᠵᠤ ᠭᠠᠭᠴᠠ ᠴᠤ᠌ ᠭᠡᠷᠡᠯ ᠲᠡᠢ ᠴᠣᠩᠬᠣ ᠠᠯᠠᠭᠠ᠃ ᠴᠠᠭᠠᠨᠠ ᠨᠢ ᠬᠥᠮᠦᠨ ᠠᠮᠢᠳᠤᠷᠠᠵᠤ ᠪᠠᠢᠨᠠ ᠭᠡᠵᠦ ᠢᠲᠡᠭᠡᠮᠡᠷ ᠦᠭᠡᠢ ᠡᠴᠢᠨᠡ ᠳᠠᠯᠳᠠ ᠬᠠᠷᠠᠩᠭᠤᠢ ᠭᠤᠳᠤᠮᠵᠢ ᠪᠠᠷ ᠴᠢᠮᠡᠭᠡ ᠦᠭᠡᠢᠬᠡᠨ ᠠᠶᠠᠯᠠᠬᠤ ᠳ᠋ᠤ᠌ ᠳᠣᠲᠣᠷᠠ ᠨᠢᠭᠡ ᠯᠡ ᠡᠪ ᠦᠭᠡᠢ ᠠᠵᠢ᠃ ᠲᠡᠷᠭᠡ ᠥᠭᠡᠳᠡ ᠮᠠᠴᠤᠵᠤ ᠬᠢᠬᠤᠲᠤᠨᠠᠨ ᠳᠤᠤᠭᠠᠷᠤᠭᠰᠠᠭᠠᠷ ᠪᠠᠢᠪᠠ᠃
— ᠪᠢᠳᠡ ᠪᠠᠭᠤᠭᠠᠳ ᠠᠯᠬᠤᠪᠠᠯ ᠶᠠᠮᠠᠷ ᠪᠣᠢ? ᠭᠡᠵᠦ ᠵᠤᠨ ᠮᠠᠷᠺᠤᠧᠨ᠋ᠲ ᠶᠠᠷᠢᠪᠠ᠃
— ᠣᠳᠣᠬᠠᠨ ᠬᠦᠷᠦᠯᠡ ᠭᠡᠵᠦ ᠰᠦᠢᠳ᠋ᠸᠷᠪᠣᠮ ᠲᠡᠭᠦᠨ ᠳ᠋ᠦ᠍ ᠬᠠᠷᠢᠭᠤᠯᠬᠤ ᠶ᠋ᠢᠨ ᠵᠡᠷᠭᠡ ᠮᠣᠷᠢᠨ ᠲᠡᠷᠭᠡ ᠭᠡᠷᠡᠯ ᠠᠰᠠᠭᠠᠭᠰᠠᠨ ᠧᠦ᠋ᠷᠣᠫᠠ ᠮᠠᠶᠢᠭ ᠤ᠋ᠨ ᠪᠠᠢᠰᠢᠩ ᠤ᠋ᠨ ᠡᠮᠦᠨᠡ ᠬᠦᠷᠴᠦ ᠵᠣᠭᠰᠣᠪᠠ᠃ ᠡᠨᠡ ᠬᠦ᠌ ᠰᠥᠨᠢ ᠶ᠋ᠢᠨ ᠲᠠᠨᠢᠯ ᠪᠤᠰᠤ ᠨᠠᠪᠲᠠᠢᠭᠰᠠᠨ ᠪᠠᠢᠰᠢᠩ ᠤ᠋ᠳ ᠵᠢᠴᠢ ᠠᠶᠤᠮᠰᠢᠭᠲᠠᠢ ᠬᠡᠷᠡᠮ ᠨᠢ ᠠᠮᠧᠷᠢᠺᠠ ᠪᠦᠰᠡᠭᠦᠢ ᠶ᠋ᠢᠨ ᠬᠠᠯᠠᠭᠤᠮᠰᠤᠭ ᠤᠭᠲᠤᠯᠭᠠ ᠪᠠᠷ ᠭᠡᠷ ᠲᠦ᠋ᠨᠢ ᠣᠷᠣᠭᠠᠳ ᠪᠦᠷ ᠴᠦ᠍ ᠮᠠᠷᠲᠠᠭᠳᠠᠪᠠ᠃
ᠵᠤᠨ ᠮᠠᠷᠺᠤᠧᠨ᠋ᠲ ᠪᠣᠯ ᠠᠩᠬᠠ ᠤᠳᠠᠭᠠ ᠠᠽᠢᠶᠠ ᠳ᠋ᠤ᠌ ᠢᠷᠡᠵᠦ ᠪᠠᠢᠭᠠ ᠶᠤᠮ᠃ ᠠᠷᠪᠠᠭᠠᠳ ᠡᠳᠦᠷ ᠦ᠋ᠨ ᠡᠮᠦᠨᠡ ᠲᠡᠷᠡ ᠨᠢᠦ᠋ ᠶᠣᠷᠺ ᠳᠠᠬᠢ ᠨᠠᠢᠵᠠ ᠶ᠋ᠢᠨ ᠢ᠋ᠶ᠋ᠡᠨ ᠯᠠᠷᠰᠣᠨ ᠤ᠋ ᠲᠤᠬᠠᠢ ᠪᠢᠴᠢᠭᠰᠡᠨ ᠨᠣᠮ ᠢ᠋ ᠪᠠᠷᠢᠭᠰᠠᠭᠠᠷ ᠨᠠᠳᠠ ᠳᠡᠭᠡᠷᠡ ᠢᠷᠡᠭᠡᠳ :
— ᠪᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠲᠡᠷᠡ ᠮᠣᠩᠭᠣᠯ ᠤ᠋ᠨ ᠬᠦᠩ ᠳᠡᠭᠡᠷᠡ ᠬᠦᠷᠦᠨᠡ᠂ ᠵᠠᠪᠠᠯ ᠲᠡᠭᠦᠨ ᠲᠡᠢ ᠲᠠᠨᠢᠯᠴᠠᠨᠠ ᠭᠡᠪᠡ᠃
— ᠯᠠᠷᠰᠣᠨ ᠮᠣᠩᠭᠣᠯ ᠳ᠋ᠤ᠌ ᠪᠠᠢᠭᠠ ᠂ ᠪᠡᠭᠡᠵᠢᠩ ᠡᠴᠡ ᠪᠦᠷ ᠬᠡᠳᠦᠨ ᠡᠳᠦᠷ ᠦ᠋ᠨ ᠵᠠᠢ ᠲᠠᠢ ᠰᠢᠦ ᠳᠡ ᠭᠡᠵᠦ ᠬᠠᠷᠢᠭᠤᠯᠬᠤ ᠳ᠋ᠤ᠌ ᠮᠠᠨᠢ :
— ᠲᠡᠭᠷᠢ ᠶ᠋ᠢᠨ ᠬᠠᠶᠠᠭᠠᠨᠠ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠴᠤ᠌ ᠪᠢ ᠵᠠᠪᠠᠯ ᠬᠦᠷᠴᠦ ᠠᠭᠤᠯᠵᠠᠨᠠ ᠭᠡᠯᠡ᠃
— ᠲᠠ ᠲᠡᠭᠡᠭᠡᠳ ᠯᠠᠷᠰᠣᠨ ᠠ᠋ᠴᠠ ᠶᠠᠭᠤ ᠬᠦᠰᠡᠵᠦ ᠪᠠᠢᠭᠠ ᠪᠢᠯᠡ ?
— ᠶᠠᠭᠤ ᠴᠤ᠌ ᠬᠦᠰᠡᠬᠦ ᠦᠭᠡᠢ᠂ ᠬᠥᠮᠦᠨ ᠵᠠᠪᠠᠯ ᠥᠪᠡᠷ ᠦ᠋ᠨ ᠬᠠᠷᠠᠨᠠ ᠭᠡᠵᠦ ᠬᠦᠰᠡᠭᠰᠡᠨ ᠶᠠᠭᠤᠮᠠ ᠪᠠᠨ ᠡᠨᠡ ᠨᠠᠰᠤᠨ ᠳ᠋ᠠᠭᠠᠨ ᠪᠡᠶᠡᠯᠡᠭᠦᠯᠵᠦ ᠪᠠᠢᠬᠤ ᠯᠠ ᠬᠡᠷᠡᠭᠲᠡᠢ᠃
ᠲᠡᠷᠡ ᠦᠶᠡ ᠳ᠋ᠦ᠍ ᠵᠤᠨ ᠮᠠᠷᠺᠤᠧᠨ᠋ᠲ 《ᠭᠠᠷᠠᠭ ᠤ᠋ᠨ ᠵᠢᠷᠭᠤᠭᠠᠨ ᠤ᠋ ᠣᠷᠣᠢ ᠶ᠋ᠢᠨ ᠰᠡᠳᠬᠦᠯ 》 ᠳ᠋ᠦ᠍ ᠵᠣᠬᠢᠶᠠᠯ ᠪᠢᠴᠢᠵᠦ ᠪᠠᠢᠭᠰᠠᠨ ᠪᠣᠯᠬᠣᠷ ᠪᠢ ᠲᠡᠭᠦᠨ ᠳ᠋ᠦ᠍ ᠬᠠᠨᠳᠤᠨ :
— ᠲᠠ ᠰᠢᠨᠡ ᠷᠣᠮᠠᠨ ᠳ᠋ᠠᠭᠠᠨ ᠪᠣᠷᠣ ᠮᠠᠲ᠋ᠧᠷᠢᠶᠠᠯ ᠡᠷᠢᠵᠦ ᠪᠠᠢᠭᠠ ᠪᠢᠵᠡ ᠳᠡ ᠭᠡᠰᠡᠨ᠃
— ᠲᠡᠭᠡᠵᠦ ᠶᠠᠷᠢᠭᠰᠠᠨ ᠴᠤ᠌ ᠪᠣᠯᠤᠨᠠ ᠭᠡᠳ ᠴᠠᠭᠠᠳᠤᠬᠢ ᠮᠠᠨᠢ ᠪᠠᠭᠠ ᠵᠣᠭᠰᠣᠰᠬᠢᠭᠰᠡᠨ ᠢ᠋ᠶ᠋ᠡᠨ ᠳᠣᠭᠳᠣᠯᠤᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠳᠠᠷᠤᠵᠤ ᠶᠠᠳᠠᠨ :
— ᠪᠢ ᠵᠠᠪᠠᠯ ᠮᠣᠩᠭᠣᠯ ᠨᠤᠲᠤᠭ ᠢ᠋ ᠦᠵᠡᠬᠦ ᠶᠣᠰᠣᠲᠠᠢ᠃ ᠲᠡᠮᠡᠭᠡᠨ ᠵᠢᠩ᠂ ᠮᠣᠩᠭᠣᠯ ᠮᠣᠷᠢᠳ᠂ ᠲᠠᠯᠠ ᠨᠤᠲᠤᠭ᠂ ᠮᠢᠩᠭᠠ ᠪᠠᠷ ᠪᠡᠯᠴᠢᠬᠦ ᠬᠣᠨᠢᠳ ᠵᠢᠴᠢ ᠴᠢᠩᠭᠢᠰ ᠬᠠᠭᠠᠨ᠂ ᠬᠤᠪᠢᠯᠠᠢ ᠬᠠᠭᠠᠨ ᠤ᠋ ᠬᠣᠢᠴᠢᠰ! ᠪᠢ ᠡᠢᠮᠦ ᠣᠢᠷᠠᠬᠠᠨ ᠢᠷᠡᠴᠢᠬᠡᠭᠡᠳ ᠣᠴᠢᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃ ᠲᠠ ᠴᠦ᠍ ᠪᠣᠭᠴᠣ ᠴᠦᠩᠬᠦ ᠪᠡᠨ ᠲᠢᠭᠯᠡᠭᠡᠳ ᠨᠠᠳᠠ ᠲᠠᠢ ᠬᠠᠮᠲᠤ ᠠᠶᠠᠯᠠᠭᠠᠷᠠᠢ ! ᠭᠡᠪᠡ᠃
ᠡᠨᠡ ᠨᠢ ᠶᠣᠰᠣᠲᠠᠢ ᠯᠠ ᠮᠢᠨᠦ ᠰᠠᠨᠠᠭᠠᠨ ᠳ᠋ᠤ᠌ ᠨᠡᠢᠴᠡᠭᠰᠡᠨ ᠬᠡᠷᠡᠭ ᠪᠣᠯᠵᠠᠢ᠃ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠬᠦᠷᠬᠦ ᠴᠠᠭ ᠢ᠋ᠶ᠋ᠠᠨ ᠴᠠᠬᠢᠯᠭᠠᠨ ᠢ᠋ᠶ᠋ᠠᠷ ᠮᠡᠳᠡᠭᠳᠡᠭᠰᠡᠨ ᠦ᠌ ᠰᠡᠭᠦᠯᠡᠷ ᠦᠳᠡ ᠶ᠋ᠢᠨ ᠬᠣᠢᠨᠠ ᠶ᠋ᠢᠨ ᠰᠢᠷᠭᠠᠯ ᠨᠠᠷᠠᠨ ᠢ᠋ᠶ᠋ᠠᠷ ᠨᠠᠢᠵᠠ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠤᠴᠠᠷᠠᠵᠤ ᠮᠡᠳᠡᠬᠦ ᠠᠶᠤᠯ ᠲᠦᠭᠰᠢᠭᠦᠷᠢ ᠶ᠋ᠢᠨ ᠲᠤᠬᠠᠢ ᠰᠡᠷᠡᠮᠵᠢᠯᠡᠭᠦᠯᠬᠦ ᠶ᠋ᠢ ᠬᠠᠢᠬᠤᠷᠤᠯ ᠦᠭᠡᠢ ᠪᠡᠭᠡᠵᠢᠩ ᠡᠴᠡ ᠠᠶᠠᠷᠯᠠᠯᠠ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠴᠠᠭ ᠤ᠋ᠨ ᠪᠠᠢᠳᠠᠯ ᠤ᠋ᠨ ᠲᠤᠬᠠᠢ ᠵᠢᠷᠳᠠᠮ ᠴᠢᠮᠡᠭᠡ ᠴᠤᠤᠷᠬᠠᠯ ᠤ᠋ᠳ ᠡᠨᠡᠬᠦ ᠡᠷᠲᠡᠨ ᠦ᠌ ᠬᠣᠲᠠ ᠶ᠋ᠢ ᠳᠦᠭᠦᠷᠭᠡᠵᠦ ᠣᠷᠬᠢᠭᠰᠠᠨ ᠴᠠᠭ ᠪᠠᠢᠯᠠ᠃ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠬᠦᠷᠳᠡᠭ ᠭᠠᠯᠲᠤ ᠲᠡᠷᠭᠡ ᠭᠡᠵᠦ ᠶᠣᠰᠣᠲᠠᠢ ᠯᠠ ᠣᠨ ᠵᠢᠯ ᠢ᠋ ᠡᠯᠡᠭᠡᠨ ᠬᠠᠭᠤᠴᠢᠷᠠᠵᠤ ᠴᠠᠭ ᠦᠶᠡ ᠡᠴᠡ ᠬᠣᠴᠣᠷᠤᠭᠰᠠᠨ ᠸᠠᠭᠣᠨ ᠨᠤᠭᠤᠳ ᠪᠠᠢᠵᠤ᠂ ᠬᠥᠳᠡᠯᠬᠦ ᠪᠣᠯᠭᠠᠨ ᠶᠠᠷᠵᠢᠬᠢᠨᠠᠨ ᠳᠤᠤᠭᠠᠷᠴᠤ᠂ ᠶᠠᠭ ᠯᠠ ᠬᠡᠳᠦᠨ ᠲᠠᠢᠰᠢ ᠪᠠᠨ ᠰᠠᠯᠤᠨ ᠵᠠᠳᠠᠷᠠᠬᠤ ᠠ᠋ᠴᠠ ᠡᠮᠦᠨᠡ ᠡᠴᠦᠰ ᠦ᠋ᠨ ᠳᠣᠬᠢᠶᠠ ᠪᠠᠨ ᠥᠭᠴᠦ ᠪᠠᠢᠭᠠ ᠮᠡᠲᠦ ᠠᠵᠢ᠃ ᠭᠤᠷᠪᠠᠳᠤᠭᠠᠷ ᠳᠡᠰ ᠦ᠋ᠨ ᠸᠠᠭᠣᠨ ᠳ᠋ᠤ᠌ ᠮᠠᠢᠮᠠᠢᠴᠢᠳ᠂ ᠴᠡᠷᠢᠭ ᠡᠷᠡᠰ ᠂ ᠪᠦᠰᠡᠭᠦᠢ ᠬᠡᠦᠬᠡᠳ ᠢ᠋ᠶ᠋ᠡᠷ ᠳᠦᠭᠦᠷᠴᠦ ᠮᠠᠢᠮᠠᠢᠴᠢᠳ ᠤ᠋ᠨ ᠳᠦᠭᠦᠷᠡᠩ ᠴᠢᠬᠢᠭᠰᠡᠨ ᠪᠠᠭᠯᠠᠭᠠ ᠪᠣᠭᠣᠳᠠᠯ ᠤ᠋ᠨ ᠳᠤᠮᠳᠠ ᠪᠢᠳᠡ ᠮᠤᠩᠭᠠᠨᠢᠭᠰᠠᠭᠠᠷ ᠪᠠᠢᠵᠤ ᠥᠪᠡᠷ ᠦ᠋ᠨ ᠭᠡᠰᠡᠨ ᠲᠣᠬᠢᠲᠠᠢ ᠰᠢᠭ᠋ ᠪᠠᠢᠷᠢ ᠪᠠᠨ ᠣᠯᠵᠤ ᠠᠪᠤᠯᠠ᠃ ᠡᠳᠡᠭᠡᠷ ᠪᠠᠶᠠᠨ ᠮᠠᠢᠮᠠᠢᠴᠢᠳ ᠴᠠᠭ ᠲᠥᠷᠥ ᠶ᠋ᠢᠨ ᠰᠠᠮᠠᠭᠤᠨ ᠳ᠋ᠤ᠌ ᠳᠡᠭᠡᠷᠡᠮ ᠲᠡᠢ ᠤᠴᠠᠷᠠᠪᠠᠯ ᠪᠠᠭᠠ ᠮᠥᠩᠭᠥ ᠪᠡᠷ ᠠᠮᠠᠷᠬᠠᠨ ᠮᠤᠯᠲᠤᠷᠠᠬᠤ ᠶ᠋ᠢ ᠰᠠᠨᠠᠵᠤ᠂ ᠠᠷᠭᠠ ᠦᠭᠡᠢ ᠯᠡ ᠶᠠᠳᠠᠭᠤ ᠬᠥᠮᠦᠰ ᠰᠢᠭ ᠬᠤᠪᠴᠠᠯᠠᠵᠠᠭᠠᠵᠠᠢ᠃ ᠴᠠᠭ ᠠ᠋ᠴᠠ ᠪᠠᠨ ᠬᠡᠲᠦᠷᠡᠲᠡᠯᠡ ᠦᠢᠯᠡᠴᠢᠯᠡᠭᠰᠡᠨ ᠭᠠᠯᠲᠤ ᠲᠡᠷᠭᠡ ᠮᠠᠨᠢ ᠤᠭᠤᠬᠢᠯᠠᠭᠰᠠᠭᠠᠷ ᠬᠥᠳᠡᠯᠬᠦ ᠳ᠋ᠦ᠍ ᠵᠦᠭ ᠪᠣᠯᠭᠠᠨ ᠠ᠋ᠴᠠ ᠵᠢᠵᠢᠬᠢᠨᠡᠭᠰᠡᠨ ᠳᠠᠭᠤ ᠭᠠᠷᠴᠤ ᠶᠠᠭ ᠯᠠ《ᠪᠢ ᠴᠦ᠍ ᠡᠪᠦᠭᠡᠷᠡᠭᠰᠡᠨ ! ᠲᠠ ᠨᠠᠷ ᠤ᠋ᠨ ᠠᠮᠤᠷ ᠲᠦᠪᠰᠢᠨ ᠢ᠋ ᠪᠠᠲᠤᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠰᠢᠦ ! 》 ᠭᠡᠬᠦ ᠰᠢᠭ ᠪᠠᠢᠯᠠ᠃
ᠨᠠᠨᠺᠸᠦ ᠳ᠋ᠦ᠍ ᠪᠤᠬᠠ ᠲᠡᠷᠭᠡ ᠪᠡᠨ ᠰᠣᠯᠢᠭᠠᠳ᠂ ᠲᠡᠨᠳᠡ ᠡᠴᠡ ᠰᠢᠮᠡᠯᠢᠭ ᠬᠥᠷᠥᠰᠥ ᠲᠡᠢ ᠥᠭᠡᠳᠡᠷᠬᠡᠦ ᠳᠠᠪᠠᠭᠠ ᠶ᠋ᠢ ᠳᠠᠪᠠᠵᠤ ᠡᠬᠢᠯᠡᠯᠡ᠃ ᠡᠭᠦᠨ ᠦ᠌ ᠴᠠᠭᠠᠨᠠ ᠯᠠ ᠲᠡᠨᠢᠭᠡᠷ ᠠᠭᠤᠳᠠᠮ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠪᠠᠢᠬᠤ ᠶᠣᠰᠣᠲᠠᠢ᠃ ᠠᠮᠧᠷᠢᠺᠠ ᠶ᠋ᠢᠨ ᠬᠦᠨᠳᠦ ᠨᠦᠰᠡᠷ ᠪᠤᠬᠠ ᠲᠡᠷᠭᠡ ᠭᠠᠯᠲᠤ ᠲᠡᠷᠭᠡ ᠶ᠋ᠢᠨ ᠣᠯᠠᠨ ᠸᠠᠭᠣᠨ ᠢ᠋ ᠴᠢᠷᠦᠨ ᠤᠯᠠᠮ ᠨᠠᠷᠢᠰᠴᠤ ᠪᠠᠢᠭᠠ ᠬᠣᠲᠣᠭᠣᠷ ᠢ᠋ ᠳᠠᠭᠠᠨ ᠳᠣᠪᠲᠣᠯᠤᠨᠠ᠃ ᠵᠠᠮ ᠤ᠋ᠨ ᠬᠠᠵᠠᠭᠤᠳᠠᠬᠢ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠶ᠋ᠢᠨ ᠤᠰᠤ ᠨᠢ ᠰᠢᠷᠭᠢᠵᠦ᠂ ᠡᠷᠲᠡ ᠤᠵᠠᠭᠤᠷ ᠤ᠋ᠨ ᠵᠢᠩ ᠦ᠋ᠨ ᠴᠣᠪᠣᠭᠠᠨ ᠤ᠋ ᠵᠠᠮ ᠢ᠋ᠶ᠋ᠠᠷ ᠭᠠᠭᠴᠠ ᠨᠢᠭᠡ ᠮᠣᠷᠢᠲᠠᠢ ᠪᠤᠶᠤ ᠡᠯᠵᠢᠭᠡᠳᠡᠢ ᠠᠶᠠᠨᠴᠢᠨ ᠠᠶᠠᠯᠠᠨᠠ᠃ ᠳᠡᠮᠡᠭᠡᠲᠡᠢ ᠨᠢ ᠲᠡᠷᠡ ᠳᠣᠳᠣᠮ ᠢ᠋ᠶ᠋ᠠᠨ ᠶᠡᠬᠡ ᠴᠥᠭᠡᠨ᠃ ᠠᠭᠤᠯᠠ ᠶ᠋ᠢᠨ ᠪᠠᠯ ᠳ᠋ᠤ᠌ ᠰᠦᠷᠦᠭ ᠬᠣᠨᠢ ᠬᠠᠪᠤᠷ ᠤ᠋ᠨ ᠨᠣᠭᠣᠬᠠ ᠬᠥᠭᠡᠭᠡᠨ ᠪᠡᠯᠴᠢᠨᠡ ᠃ ᠤᠳᠠᠯ ᠦᠭᠡᠢ ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠳᠥᠷᠪᠡᠯᠵᠢᠨ ᠪᠡᠬᠢᠯᠡᠯᠲᠡ ᠨᠦ᠍ᠭᠥᠳ ᠬᠠᠷᠠᠭᠳᠠᠵᠤ ᠡᠬᠢᠯᠡᠯᠡ᠃ ᠡᠨᠡ ᠬᠦ᠌ 2000 ᠭᠠᠷᠤᠢ ᠵᠢᠯ ᠦ᠋ᠨ ᠲᠡᠦᠬᠡ ᠲᠡᠢ ᠶᠡᠬᠡ ᠪᠠᠷᠢᠯᠭᠠ ᠶᠠᠭ ᠯᠠ ᠨᠢᠭᠡ ᠮᠡᠩ ᠮᠣᠭᠠᠢ ᠮᠡᠲᠦ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠠ᠋ᠴᠠ ᠬᠣᠲᠣᠭᠣᠷ ᠬᠦᠷᠲᠡᠯᠡ ᠂ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠡᠴᠡ ᠲᠠᠯᠠ ᠳᠣᠪᠣᠴᠠᠭ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠵᠦ ᠂ ᠬᠠᠶᠠ ᠰᠠᠯᠪᠤᠷᠢᠯᠠᠨ ᠬᠠᠶᠠ ᠨᠡᠢᠯᠡᠨᠡ᠃ ( ᠵᠢᠷᠤᠭ 6) ᠃
( ᠵᠢᠷᠤᠭ 5) ( ᠵᠢᠷᠤᠭ 6)
ᠨᠠᠨᠺᠸᠦ ᠪᠣᠭᠣᠮᠲᠠ ᠳ᠋ᠤ᠌ ᠠᠩᠬᠠ ᠤᠳᠠᠭᠠ ᠨᠡᠯᠢᠶᠡᠳ ᠤᠳᠠᠭᠠᠨ ᠵᠣᠭᠰᠣᠯᠠ᠃ ᠮᠥᠨ ᠡᠨᠡ ᠬᠦ᠌ ᠨᠠᠷᠢᠬᠠᠨ ᠠᠭᠤᠯᠠᠨ ᠬᠠᠪᠴᠢᠯ ᠢ᠋ᠶ᠋ᠠᠷ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠮᠣᠩᠭᠣᠯ ᠤ᠋ᠨ ᠳᠠᠢᠴᠢᠳ ᠳᠠᠭᠠᠷᠢᠨ ᠣᠷᠣᠵᠤ᠂ ᠪᠡᠭᠡᠵᠢᠩ ᠦ᠋ᠨ ᠥᠩ ᠰᠢᠮᠡᠯᠢᠭ ᠨᠤᠲᠤᠭ ᠤᠰᠤ ᠶ᠋ᠢ ᠡᠵᠡᠯᠡᠨ ᠠᠪᠤᠭᠰᠠᠨ ᠪᠢᠯᠡ᠃ ᠡᠨᠡ ᠠᠭᠤᠯᠠᠨ ᠬᠠᠪᠴᠢᠯ ᠢ᠋ ᠬᠡᠨ ᠡᠵᠡᠮᠰᠢᠵᠦ ᠴᠢᠳᠠᠪᠠᠯ ᠪᠦᠬᠦ ᠬᠢᠲᠠᠳ ᠤ᠋ᠨ ᠤᠮᠠᠷᠠᠲᠤ ᠬᠡᠰᠡᠭ ᠢ᠋ ᠣᠯᠤᠯᠠ ᠭᠡᠰᠡᠨ ᠦᠭᠡ᠃ ᠬᠤᠪᠢᠯᠠᠢ ᠬᠠᠭᠠᠨ — ᠲᠠᠯᠠ ᠨᠤᠲᠤᠭ ᠤ᠋ᠨ ᠡᠨᠡ ᠬᠦ᠌ ᠨᠡᠷᠡᠲᠦ ᠬᠥᠪᠡᠭᠦᠨ ᠢ᠋ ᠡᠨᠳᠡᠬᠢ ᠥᠨᠢᠷ ᠪᠠᠶᠠᠯᠢᠭ ᠭᠠᠵᠠᠷ ᠲᠠᠷᠢᠶᠠ ᠳᠠᠭᠤᠳᠠᠨ ᠢᠷᠡᠭᠦᠯᠵᠦ᠂ ᠡᠨᠳᠡᠬᠢ ᠬᠣᠲᠠ ᠬᠥᠳᠡᠭᠡ ᠶ᠋ᠢ ᠬᠡᠳᠦ ᠬᠡᠳᠦᠨ ᠦᠶᠡ ᠪᠡᠷ ᠵᠠᠬᠢᠷᠤᠭᠤᠯᠤᠭᠠᠳ᠂ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ᠨᠢ ᠲᠡᠳᠡ ᠡᠨᠳᠡᠬᠢ ᠠᠮᠢᠳᠤᠷᠠᠯ ᠳ᠋ᠤ᠌ ᠳᠠᠰᠬᠤ ᠶ᠋ᠢ ᠳᠠᠭᠠᠯᠳᠤᠨ ᠲᠡᠮᠡᠴᠡᠯ ᠦ᠋ᠨ ᠵᠣᠷᠢᠭ ᠰᠦᠯᠳᠡ ᠨᠢ ᠴᠦ᠍ ᠪᠠᠭᠤᠷᠠᠵᠤ᠂ ᠲᠠᠯᠠ ᠨᠤᠲᠤᠭ ᠤ᠋ᠨ ᠰᠢᠨᠡ ᠲᠡᠮᠡᠴᠡᠯᠳᠦᠭᠡᠨ ᠳ᠋ᠡᠭᠡᠨ ᠣᠷᠣᠵᠠᠢ᠃ ᠬᠡᠨ ᠬᠡᠷᠪᠡ ᠤᠤᠭᠠᠯ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠪᠠᠯ ᠡᠨᠡ ᠬᠦ᠌ ᠠᠭᠤᠯᠠᠨ ᠬᠠᠪᠴᠢᠯ ᠢ᠋ᠶ᠋ᠠᠷ ᠮᠣᠩᠭᠣᠯ ᠤ᠋ᠨ ᠥᠨᠳᠥᠷᠯᠢᠭ ᠲᠡᠭᠡᠨ ᠪᠤᠴᠠᠳᠠᠭ ᠪᠢᠯᠡ᠃
ᠡᠨᠳᠡ ᠵᠠᠷᠢᠮ ᠬᠡᠰᠡᠭ ᠲᠡᠭᠡᠨ ᠴᠠᠭᠠᠨ ᠬᠡᠷᠡᠮ ᠳᠥᠷᠪᠡ ᠲᠠᠪᠤ ᠪᠤᠶᠤ ᠴᠢᠨᠠᠭᠰᠢᠯᠠᠪᠠᠯ ᠵᠢᠷᠭᠤᠭᠠ ᠳᠣᠯᠣᠭᠠᠨ ᠳᠠᠪᠬᠤᠷ ᠪᠠᠷᠢᠭᠳᠠᠵᠤ᠂ ᠡᠨᠡ ᠳᠣᠲᠣᠷᠠ ᠪᠠᠨ ᠬᠣᠯᠪᠣᠯᠳᠤᠭᠰᠠᠨ ᠵᠠᠮ᠂ ᠳᠥᠷᠪᠡᠯᠵᠢᠨ ᠪᠡᠬᠢᠯᠡᠯᠲᠡ ᠨᠥᠬᠥᠳ᠂ ᠳᠠᠢᠰᠤᠨ ᠢ᠋ ᠴᠢᠮᠡᠭᠡᠯᠡᠬᠦ ᠴᠠᠢᠵᠠ᠂ ᠳᠠᠪᠬᠤᠷ ᠳᠠᠪᠬᠤᠷ ᠡᠭᠦᠳᠡ ᠬᠠᠭᠠᠯᠭᠠ ᠨᠤᠭᠤᠳ ᠪᠠᠢᠵᠤ᠂ ᠰᠥᠨᠢ ᠳ᠋ᠡᠭᠡᠨ ᠪᠦᠬᠦ ᠬᠠᠭᠠᠯᠭᠠ ᠪᠠᠨ ᠳᠠᠷᠤᠳᠠᠭ ᠶᠤᠮ᠃
ᠲᠡᠮᠡᠭᠡᠨ ᠵᠢᠩ ᠡᠨᠡᠭᠦᠷ ᠠᠶᠠᠯᠠᠬᠤ ᠪᠠᠨ ᠪᠦᠷ ᠴᠦ᠍ ᠵᠣᠭᠰᠣᠵᠠᠢ᠃ ᠤᠴᠢᠷ ᠨᠢ ᠠᠶᠠᠨᠴᠢᠳ ᠠᠶᠠᠯᠠᠨ ᠵᠣᠷᠴᠢᠬᠤ ᠪᠤᠶᠤ ᠠᠷᠠᠯᠵᠢᠶᠠᠴᠢᠳ ᠲᠤ᠌ ᠪᠠᠷᠠᠭᠠ ᠪᠠᠨ ᠵᠥᠭᠡᠭᠡᠪᠦᠷᠢᠯᠡᠬᠦ ᠳ᠋ᠡᠭᠡᠨ ᠴᠥᠮ ᠨᠡᠩ ᠲᠦᠷᠭᠡᠨ ᠪᠥᠭᠡᠳ ᠨᠡᠩ ᠬᠢᠮᠳᠠ ᠭᠠᠯᠲᠤ ᠲᠡᠷᠭᠡ ᠶ᠋ᠢ ᠰᠣᠩᠭᠣᠬᠤ ᠪᠣᠯᠵᠠᠢ᠃
ᠴᠠᠭ ᠦᠶᠡ ᠶᠠᠭᠤᠲᠠᠢ ᠶᠡᠬᠡ ᠬᠤᠪᠢᠷᠠᠵᠤ ᠪᠠᠢᠭᠠ ᠠᠵᠢ! ᠴᠠᠭᠠᠨ ᠬᠡᠷᠡᠮ ᠢ᠋ ᠡᠭᠦᠳᠦᠨ ᠪᠠᠢᠭᠤᠯᠤᠭᠴᠢ᠂ ᠬᠣᠶᠠᠷ ᠮᠢᠩᠭᠠ ᠭᠠᠷᠤᠢ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠡᠨᠡ ᠬᠦ᠌ ᠭᠠᠢᠬᠠᠮᠰᠢᠭᠲᠤ ᠪᠠᠷᠢᠯᠭᠠ ᠶ᠋ᠢ ᠴᠣᠭᠴᠠᠯᠠᠭᠰᠠᠨ ᠴᠢᠨ ᠱᠢ ᠬᠤᠸᠠᠩ ᠳ᠋ᠤ᠌ ᠭᠠᠭᠴᠠ ᠬᠥᠰᠢᠶᠡ ᠥᠷᠥᠭᠡᠰᠦᠨ ᠬᠥᠷᠥᠭ ᠪᠣᠰᠬᠠᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠬᠢᠲᠠᠳ ᠤ᠋ᠳ ᠣᠳᠣ ᠬᠠᠷᠢᠨ ᠡᠷᠲᠡ ᠦᠶᠡ ᠶ᠋ᠢᠨ ᠬᠢᠯᠢ ᠪᠡᠨ ᠬᠠᠮᠠᠭᠠᠯᠠᠵᠤ ᠪᠠᠢᠭᠰᠠᠨ ᠲᠠᠢ ᠶᠠᠭ ᠡᠰᠡᠷᠭᠦ ᠪᠡᠷ ᠨᠢ ᠨᠠᠨᠺᠸᠤ ᠪᠠᠷ ᠳᠠᠭᠠᠷᠢᠭᠰᠠᠨ ᠲᠡᠮᠦᠷ ᠵᠠᠮ ᠢ᠋ ᠵᠠᠰᠠᠭᠰᠠᠨ ᠪᠥᠭᠡᠳ ᠡᠨᠡ ᠬᠦ᠌ ᠲᠡᠮᠦᠷ ᠵᠠᠮ ᠤ᠋ᠨ ᠶᠡᠷᠦᠩᠬᠡᠢ ᠲᠥᠰᠦᠪᠯᠡᠭᠴᠢ ᠶ᠋ᠢ ᠴᠢᠩ ᠯᠦᠩ ᠴᠢᠶᠣᠤ ᠥᠷᠲᠡᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠳᠡᠭᠵᠢᠨ ᠶᠣᠰᠣᠯᠠᠯ ᠤ᠋ᠨ ᠬᠦᠷᠮᠡ ᠲᠡᠢ ᠬᠦᠷᠡᠯ ᠴᠢᠳᠬᠤᠮᠠᠯ ᠢ᠋ᠶ᠋ᠠᠷ ᠪᠣᠰᠬᠠᠵᠤ ᠲᠠᠯᠪᠢᠵᠠᠢ᠃ ᠡᠨᠡ ᠬᠦ᠌ ᠰᠢᠨᠡ ᠴᠠᠭ ᠤ᠋ᠨ ᠬᠥᠰᠢᠶᠡ ᠶ᠋ᠢᠨ ᠠᠷᠤ ᠪᠠᠷ ᠬᠢ ᠠᠭᠤᠯᠠ ᠨᠢᠷᠤᠭᠤᠳ ᠤ᠋ᠨ ᠳᠡᠭᠡᠭᠦᠷ ᠲᠣᠮᠣ ᠮᠥᠷᠲᠡᠭᠡᠨ ᠰᠦᠷ ᠵᠢᠪᠬᠤᠯᠠᠩᠲᠠᠢ ᠤᠷᠲᠤ ᠴᠠᠭᠠᠨ ᠬᠡᠷᠡᠮ ᠦᠷᠭᠦᠯᠵᠢᠯᠡᠨᠡ᠃ ᠡᠨᠳᠡᠬᠢ ᠴᠠᠭᠠᠨ ᠬᠡᠷᠡᠮ ᠢ᠋ ᠵᠠᠰᠠᠵᠤ ᠰᠢᠨᠡᠳᠬᠡᠭᠰᠡᠨ ᠲᠤᠯᠠ ᠵᠢᠯ ᠪᠦᠷᠢ ᠳᠡᠯᠡᠬᠡᠢ ᠶ᠋ᠢᠨ ᠣᠯᠠᠨ ᠭᠠᠵᠠᠷ ᠠ᠋ᠴᠠ ᠵᠢᠭᠤᠯᠴᠢᠯᠠᠭᠴᠢᠳ ᠨᠠᠨᠺᠸᠤ ᠪᠣᠭᠣᠮᠲᠠ ᠳ᠋ᠤ᠌ ᠢᠷᠡᠵᠦ ᠭᠠᠯ ᠲᠡᠷᠭᠡᠨ ᠡᠴᠡ ᠪᠡᠨ ᠪᠠᠭᠤᠭᠠᠳ ᠭᠠᠢᠬᠠᠨ ᠰᠣᠨᠢᠷᠬᠠᠳᠠᠭ ᠠᠵᠤᠭᠤ᠃
ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠴᠠᠭᠠᠳᠤ ᠲᠠᠯᠠ ᠠ᠋ᠴᠠ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠡᠬᠢᠯᠡᠪᠡ᠃ ᠡᠨᠳᠡ ᠲᠡᠨᠳᠡ ᠬᠠ ᠶᠠ ᠦᠭᠡᠢ ᠵᠢᠵᠢᠭᠬᠡᠨ ᠬᠡᠰᠡᠭ ᠲᠡᠢ ᠲᠠᠷᠢᠶᠠ ᠬᠠᠷᠠᠭᠳᠠᠨᠠ᠃ ᠬᠡᠳᠦᠨ ᠠᠷᠪᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠡᠴᠡ ᠡᠬᠢᠯᠡᠭᠡᠳ ᠡᠨᠳᠡ ᠪᠠᠰᠠ ᠬᠢᠲᠠᠳ ᠤ᠋ᠨ ᠨᠡᠭᠦᠳᠡᠯᠴᠢᠨ ᠢᠷᠭᠡᠳ ᠨᠡᠭᠦᠳᠡᠯᠯᠡᠨ ᠢᠷᠡᠵᠦ ᠡᠵᠡᠯᠡᠭᠡᠳ ᠲᠠᠷᠢᠶᠠᠯᠠᠵᠤ ᠡᠬᠢᠯᠡᠭᠰᠡᠨ ᠪᠠᠢᠨᠠ᠃ ᠬᠣᠲᠠ ᠪᠠᠯᠭᠠᠳ᠂ ᠲᠣᠰᠬᠣᠳ ᠨᠢ ᠥᠨᠳᠥᠷ ᠬᠦᠷᠢᠶᠡᠨ ᠦ᠌ ᠳᠣᠲᠣᠷᠠ ᠪᠠᠢᠷᠢᠯᠠᠵᠤ᠂ ᠳᠠᠭᠠᠷᠢᠯᠲᠠ ᠠ᠋ᠴᠠ ᠰᠡᠷᠭᠡᠢᠯᠡᠵᠡᠢ᠃ ᠲᠠᠷᠢᠶᠠᠨ ᠤ᠋ ᠨᠢᠯᠬᠠ ᠴᠢᠬᠢ ᠨᠦ᠍ᠭᠦᠳ ᠨᠣᠭᠣᠭᠠᠷᠠᠵᠤ ᠬᠠᠷᠠᠭᠳᠠᠨᠠ᠃ ᠮᠣᠳᠣᠳ ᠤᠯᠠᠮ ᠠ᠋ᠴᠠ ᠤᠯᠠᠮ ᠴᠥᠭᠡᠷᠡᠵᠦ᠂ ᠠᠯᠤᠰ ᠤ᠋ᠨ ᠪᠡᠯᠴᠢᠭᠡᠷ ᠳᠠᠬᠢ ᠬᠣᠨᠢᠳ ᠦᠳᠡᠰᠢ ᠶ᠋ᠢᠨ ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠳ᠋ᠤ᠌ ᠶᠠᠭ ᠯᠠ ᠲᠣᠮᠣ ᠴᠠᠭᠠᠨ ᠴᠡᠴᠡᠭ ᠦ᠋ᠳ ᠰᠢᠭ ᠬᠠᠷᠠᠭᠳᠠᠨᠠ᠃ ᠪᠦᠬᠦ ᠨᠢ ᠤᠨᠠᠭᠰᠠᠨ ᠲᠡᠮᠡᠭᠡᠳ ᠲᠡᠮᠦᠷ ᠵᠠᠮ ᠠ᠋ᠴᠠ ᠵᠠᠢᠳᠠᠭᠤᠬᠠᠨ ᠬᠦᠵᠦᠭᠦᠦ ᠰᠤᠩᠭᠠᠨ ᠢᠳᠡᠰᠢᠯᠡᠨᠡ᠃ ᠡᠨᠡ ᠬᠦ᠌ ᠭᠠᠩ ᠬᠠᠭᠤᠷᠠᠢ ᠮᠥᠷᠲᠡᠭᠡᠨ ᠠᠷᠠᠮᠠᠭ ᠲᠠᠷᠠᠮᠠᠭ ᠡᠪᠡᠰᠦ ᠲᠡᠢ ᠪᠠᠢᠭᠠᠯᠢ ᠶ᠋ᠢᠨ ᠥᠩᠭᠡ ᠦᠵᠡᠮᠵᠢ ᠨᠢ ᠬᠥᠮᠦᠰ ᠲᠦ᠍ ᠶᠡᠬᠡ ᠡᠷᠲᠡ ᠦᠶᠡ ᠶ᠋ᠢᠨ ᠲᠥᠷᠥᠭᠳᠡᠯ ᠢ᠋ ᠣᠯᠭᠣᠨᠠ᠃
ᠨᠠᠷᠠ ᠳᠣᠷᠣᠭᠰᠢᠯᠠᠭᠰᠠᠭᠠᠷ ᠪᠠᠷᠠᠭᠤᠨ ᠬᠣᠢᠰᠢ ᠲᠡᠭᠷᠢ ᠶ᠋ᠢᠨ ᠬᠠᠶᠠᠭᠠᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠮᠠᠨᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠪᠣᠯᠤᠨ ᠲᠡᠮᠦᠷ ᠵᠠᠮ ᠤ᠋ᠨ ᠠᠵᠢᠯᠲᠠᠳ ᠠᠷᠠᠰᠤᠨ ᠳᠡᠪᠡᠯ ᠳ᠋ᠡᠭᠡᠨ ᠴᠢᠩᠭᠠ ᠭᠡᠭᠴᠢ ᠰᠢᠷᠭᠤᠨᠠ᠃ ᠵᠠᠯᠭᠠᠭᠠᠳ ᠰᠥᠨᠢ ᠶ᠋ᠢᠨ ᠬᠥᠰᠢᠭᠡ ᠨᠣᠭᠣᠭᠠᠨ ᠲᠠᠷᠢᠶᠠ᠂ ᠵᠦᠯᠭᠡ ᠵᠢᠴᠢ ᠲᠣᠰᠬᠣᠳ ᠢ᠋ ᠪᠦᠷᠬᠦᠨ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ᠨᠢ ᠠᠭᠤᠯᠠᠰ ᠤ᠋ᠨ ᠣᠷᠭᠢᠯ ᠢ᠋ ᠵᠠᠯᠭᠢᠪᠠ᠃ ᠵᠥᠪᠬᠡᠨ ᠸᠠᠭᠣᠨ ᠤ᠋ ᠥᠷᠥᠭᠡᠨ ᠳᠠᠬᠢ ᠰᠦᠢᠯᠡᠭᠯᠡᠨ ᠠᠮᠢᠰᠬᠤᠯᠯᠠᠬᠤ᠂ ᠲᠠᠮᠠᠬᠢᠯᠠᠬᠤ ᠵᠢᠴᠢ ᠵᠣᠭᠰᠣᠯ ᠦᠭᠡᠢ ᠶᠠᠷᠢᠯᠳᠤᠬᠤ ᠨᠢ ᠡᠨᠡ ᠬᠦ᠌ ᠮᠢᠩᠭᠠ ᠲᠦᠮᠡᠨ ᠵᠢᠯ ᠦ᠋ᠨ ᠲᠤᠷᠰᠢᠬᠢ ᠲᠠᠯᠠ ᠨᠤᠲᠤᠭ ᠤ᠋ᠨ ᠨᠠᠮᠵᠢᠭᠤᠨ ᠢ᠋ ᠡᠪᠳᠡᠨᠡ᠃
ᠭᠠᠯᠲᠤ ᠲᠡᠷᠭᠡ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠬᠡᠴᠡ ᠳ᠋ᠦ᠍ ᠬᠦᠷᠪᠡ᠃ ᠡᠨᠡ ᠬᠦ᠌ ᠲᠡᠮᠦᠷ ᠵᠠᠮ ᠤ᠋ᠨ ᠱᠤᠭᠤᠮ ᠨᠢ ᠴᠢᠨᠠᠭᠰᠢ ᠪᠠᠨ ᠦᠷᠭᠦᠯᠵᠢᠯᠡᠭᠰᠡᠭᠡᠷ᠂ ᠬᠠᠭᠤᠴᠢᠨ ᠳᠢᠭᠯᠢᠮ ᠳ᠋ᠡᠭᠡᠨ ᠲᠡᠰᠴᠦ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠠᠳᠠᠭᠢ ᠶ᠋ᠢᠨ ᠬᠥᠮᠦᠰ ᠢ᠋ ᠠᠯᠪᠠᠲᠠᠨ ᠰᠢᠨᠡ ᠴᠠᠭ ᠦᠶᠡ ᠶ᠋ᠢᠨ ᠶᠠᠭᠠᠷᠠᠤ ᠡᠷᠴᠢᠮᠲᠡᠢ᠂ ᠳᠡᠪᠵᠢᠶᠡᠨ ᠱᠤᠤᠭᠢᠶᠠᠨ ᠲᠠᠢ ᠠᠮᠢᠳᠤᠷᠠᠯ ᠳ᠋ᠤ᠌ ᠣᠷᠣᠭᠤᠯᠬᠤ ᠪᠣᠯᠤᠨᠠ᠃ ᠢᠩᠭᠢᠭᠡᠳ ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠤᠯᠠᠮᠵᠢᠯᠠᠭᠳᠠᠨ ᠢᠷᠡᠭᠰᠡᠨ ᠤᠯᠠᠮᠵᠢᠯᠠᠯ ᠰᠣᠯᠢᠭᠳᠠᠬᠤ ᠪᠣᠯᠤᠨᠠ᠃ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠨᠢ ᠡᠨᠡ ᠬᠦ᠌ ᠲᠡᠮᠡᠴᠡᠯ ᠦ᠋ᠨ ᠥᠩᠭᠡᠷᠡᠯᠲᠡ ᠶ᠋ᠢᠨ ᠤᠯᠠ ᠮᠥᠷ ᠢ᠋ ᠬᠠᠷᠠᠭᠤᠯᠵᠤ ᠪᠠᠢᠨᠠ᠃ ᠲᠣᠮᠣ ᠮᠥᠷᠲᠡᠭᠡᠨ ᠭᠡᠷᠡᠯ ᠭᠡᠭᠡ ᠲᠡᠢ ᠭᠠᠯᠲᠤ ᠲᠡᠷᠭᠡᠨ ᠦ᠌ ᠥᠷᠲᠡᠭᠡ ᠨᠢ ᠰᠢᠨᠡ ᠴᠠᠭ ᠦᠶᠡ ᠶ᠋ᠢᠨ ᠬᠢ ᠭᠡᠬᠦ ᠳ᠋ᠦ᠍ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠪᠠᠰᠠ ᠬᠠᠭᠤᠴᠢᠨ ᠴᠠᠭ ᠤ᠋ᠨ ᠲᠡᠮᠡᠭᠡᠨ ᠵᠢᠩ ᠪᠣᠢ᠃ ᠡᠢᠮᠦ ᠰᠢᠨᠡ ᠬᠠᠭᠤᠴᠢᠨ ᠡᠰᠡᠷᠭᠦᠴᠡᠯᠳᠦᠭᠰᠡᠨ ᠪᠠᠢᠳᠠᠯ ᠨᠢ ᠬᠥᠮᠦᠨ ᠢ᠋ ᠶᠣᠰᠣᠲᠠᠢ ᠪᠤᠳᠤᠯᠢᠶᠠᠨᠲᠠᠢ ᠪᠣᠳᠣᠯ ᠳ᠋ᠤ᠌ ᠬᠥᠲᠥᠯᠦᠨ ᠣᠷᠣᠭᠤᠯᠤᠨᠠ᠃ ᠲᠡᠨᠳᠡᠬᠢ ᠨᠠᠮᠬᠠᠨ ᠪᠠᠢᠰᠢᠩ ᠤ᠋ᠳ ᠲᠤ᠌ ᠲᠥᠷᠥᠭᠰᠡᠨ ᠬᠥᠮᠦᠰ ᠲᠡᠨᠳᠡ ᠪᠡᠨ ᠰᠢᠷᠭᠤᠨ ᠠᠮᠢᠳᠤᠷᠠᠵᠠᠭᠠᠨᠠ᠃ ᠬᠠᠷᠢᠨ ᠡᠨᠳᠡᠬᠢ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠬ᠍ᠴᠢᠳ ᠤ᠋ᠨ ᠥᠨᠳᠥᠷ ᠰᠦᠷᠯᠢᠭ ᠪᠠᠢᠰᠢᠩ ᠨᠢ ᠥᠷᠥᠨᠡᠳᠠᠬᠢᠨ ᠤ᠋ ᠪᠠᠷᠢᠯᠭᠠ ᠶ᠋ᠢᠨ ᠲᠣᠬᠢᠯᠢᠭ ᠲᠠᠭᠠᠯᠠᠮᠵᠢᠲᠠᠢ ᠶ᠋ᠢ ᠬᠠᠷᠠᠭᠤᠯᠤᠨᠠ᠃ ᠰᠢᠨᠡ ᠴᠠᠭ ᠦᠶᠡ ᠨᠢ ᠭᠠᠯᠲᠤ ᠲᠡᠷᠭᠡᠨ ᠦ᠌ ᠥᠷᠲᠡᠭᠡᠨ ᠡᠴᠡ ᠡᠬᠢᠯᠡᠨ ᠬᠣᠲᠠ ᠶ᠋ᠢᠨ ᠨᠠᠷᠢᠨ ᠭᠤᠳᠤᠮᠵᠢ ᠪᠠᠷ ᠳᠠᠮᠵᠢᠨ᠂ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠠ᠋ᠴᠠ᠂ ᠦᠨᠡᠲᠦ ᠪᠠᠷᠠᠭᠠ ᠠᠴᠢᠵᠤ ᠢᠷᠡᠭᠰᠡᠨ ᠲᠡᠮᠡᠭᠡᠳ ᠵᠢᠴᠢ ᠲᠡᠳᠡᠨ ᠦ᠌ ᠡᠵᠡᠳ ᠪᠦᠬᠦᠢ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠬᠣᠲᠠ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠨᠡ᠃