ᠬᠠᠷᠠᠩᠭᠤᠢ ᠬᠠᠳᠠ- ᠳ· ᠨᠠᠴᠤᠭᠳᠣᠷᠵᠢХаранхуй хад-Д.Нацагдорж
471ᠬᠠᠷᠠᠩᠭᠤᠢ ᠬᠠᠳᠠ
ᠳ· ᠨᠠᠴᠤᠭᠳᠣᠷᠵᠢ
ᠵᠤᠨ ᠤ᠋ ᠰᠥᠨᠢ ᠪᠣᠭᠣᠨᠢ ᠲᠤᠯᠠ ᠥᠷᠯᠥᠭᠡᠨ ᠦ᠌ ᠨᠠᠢ᠍ᠮᠠᠨ ᠴᠠᠭ ᠲᠤ᠌ ᠨᠠᠷᠠ ᠨᠢᠭᠡᠨᠲᠡ ᠳᠡᠭᠡᠷᠡ ᠭᠠᠷᠴᠠᠢ᠃ ᠤᠨᠲᠠᠭᠰᠠᠨ ᠨᠣᠢᠷ ᠠ᠋ᠴᠠ ᠠᠷᠠᠢᠬᠠᠨ ᠰᠡᠷᠢᠮᠡᠭᠴᠡ᠂ ᠨᠢᠭᠡ ᠶᠠᠩᠵᠤᠤᠷ ᠠᠰᠠᠭᠠᠵᠤ ᠰᠠᠪᠰᠠᠪᠠ᠃ ᠴᠢᠯᠡᠭᠰᠡᠨ ᠪᠡᠶᠡ ᠶ᠋ᠢ ᠲᠠᠢᠪᠤᠷᠠᠭᠤᠯᠤᠨ᠂ ᠲᠦᠷ ᠵᠠᠭᠤᠷᠠ ᠬᠡᠪᠲᠡᠬᠦ ᠶ᠋ᠢᠨ ᠵᠠᠪᠰᠠᠷ᠂ ᠡᠨᠡ ᠡᠳᠦᠷ ᠦ᠋ᠨ ᠡᠯᠳᠡᠪ ᠬᠡᠷᠡᠭ ᠢ᠋ ᠪᠣᠳᠣᠬᠤ ᠪᠥᠭᠡᠳ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ ᠦ᠋ᠨ ᠳᠡᠪᠲᠡᠷ ᠢ᠋ᠶ᠋ᠡᠨ ᠳᠡᠷᠡ ᠳᠣᠣᠷᠠ ᠠ᠋ᠴᠠ ᠪᠠᠨ ᠠᠪᠴᠤ ᠦᠵᠡᠪᠡᠯ ᠾᠢᠮᠢᠺ ᠬᠠᠷᠠᠨᠳᠠ ᠪᠠᠷ ᠪᠢᠴᠢᠭᠰᠡᠨ ᠬᠡᠳᠦᠨ ᠦᠰᠦᠭ ᠪᠠᠷᠤᠭ ᠪᠦᠷᠦᠭ ᠦᠵᠡᠭᠳᠡᠬᠦ ᠳ᠋ᠦ᠍ ᠲᠡᠭᠦᠨ ᠢ᠋ ᠰᠢᠯᠦᠰᠦ ᠪᠡᠷ ᠢ᠋ᠶ᠋ᠡᠨ ᠨᠣᠷᠭᠠᠨ᠂ ᠤᠯᠠᠮ ᠢ᠋ᠶ᠋ᠠᠷ ᠠᠵᠢᠭᠯᠠᠪᠠᠯ᠄《ᠨᠠᠢ᠍ᠮᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠭᠤᠴᠢᠨ ᠤ᠋ ᠪᠢᠮᠪᠠ ᠭᠠᠷᠠᠭ᠂ ᠬᠠᠷᠠᠩᠭᠤᠢ ᠬᠠᠳᠠ᠃ ᠨᠢᠨᠠ》 ᠭᠡᠳᠡᠭ ᠬᠡᠳᠦᠨ ᠦᠭᠡᠰ ᠢ᠋ ᠲᠡᠮᠳᠡᠭᠯᠡᠭᠰᠡᠨ ᠪᠠᠢᠬᠤ ᠨᠢ ᠤᠳᠬᠠ ᠪᠠ ᠤᠴᠢᠷ ᠲᠣᠳᠣᠷᠬᠠᠢ ᠦᠭᠡᠢ᠂ ᠶᠠᠭᠤᠨ ᠤ᠋ ᠲᠤᠬᠠᠢ ᠪᠢᠴᠢᠭᠰᠡᠨ ᠨᠢ ᠣᠭᠲᠣ ᠮᠠᠷᠲᠠᠭᠳᠠᠭᠰᠠᠨ ᠲᠤᠯᠠ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠠᠯᠭᠤᠷᠬᠠᠨ ᠢ᠋ᠶ᠋ᠠᠷ ᠤᠩᠰᠢᠵᠤ᠂ ᠡᠴᠦᠰ ᠦ᠋ᠨ ᠦᠰᠦᠭ ᠳᠡᠭᠡᠷᠡ ᠨᠢ ᠬᠦᠷᠪᠡᠯ ᠨᠢᠨᠠ ᠭᠡᠳᠡᠭ ᠨᠢ ᠮᠢᠨᠦ ᠬᠠᠭᠤᠴᠢᠨ ᠠᠮᠠᠷᠠᠭ ᠥᠬᠢᠨ ᠦ᠌ ᠨᠡᠷᠡ᠂ ᠴᠠᠬᠢᠯᠭᠠᠨ ᠠᠳᠠᠯᠢ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠮᠢᠨᠦ ᠲᠠᠷᠢᠬᠢᠨ ᠤ᠋ ᠳᠣᠲᠣᠷᠠ ᠭᠡᠷᠡᠯᠲᠦᠭᠰᠡᠨ ᠪᠥᠭᠡᠳ᠂ ᠮᠥᠨ ᠥᠬᠢᠨ ᠢ᠋ ᠲᠦᠰᠢᠵᠦ ᠬᠠᠢᠯᠠᠰᠤ ᠮᠣᠳᠣᠨ ᠤ᠋ ᠰᠡᠭᠦᠳᠡᠷ ᠲᠦ᠍ ᠰᠠᠭᠤᠵᠤ ᠪᠠᠢᠭᠰᠠᠨ ᠴᠠᠭ ᠭᠡᠨᠡᠳᠲᠡ ᠰᠠᠨᠠᠭᠳᠠᠨ᠂ ᠰᠣᠷᠮᠤᠤᠰᠤᠨ ᠤ᠋ ᠰᠡᠭᠦᠳᠡᠷ ᠲᠦ᠍ ᠦᠵᠡᠭᠳᠡᠬᠦ ᠳ᠋ᠦ᠍ ᠳᠠᠷᠤᠢ ᠰᠡᠳᠬᠢᠯ ᠬᠥᠳᠡᠯᠵᠦ᠂ ᠤᠯᠠᠮ ᠢ᠋ᠶ᠋ᠠᠷ ᠡᠷᠲᠡ ᠪᠠ ᠣᠳᠣ᠂ᠬᠣᠯᠠ ᠪᠠ ᠣᠢᠷᠠ ᠶ᠋ᠢ ᠤᠯᠠᠷᠢᠭᠤᠯᠤᠨ ᠪᠣᠳᠣᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠡᠢᠨ ᠲᠡᠢᠨ ᠤᠶᠠᠷᠠᠨ ᠮᠡᠯᠮᠡᠷᠡᠵᠦ᠂ ᠵᠡᠭᠦᠳᠦ ᠮᠡᠲᠦ ᠪᠣᠯᠤᠨ ᠵᠡᠷᠭᠡᠯᠡᠭᠰᠡᠭᠡᠷ᠂ ᠭᠱᠠᠨ ᠵᠠᠭᠤᠷᠠ ᠦᠷᠭᠡᠯᠡᠵᠦ᠂ ᠲᠠᠲᠠᠵᠤ ᠪᠠᠢᠭᠠ ᠲᠠᠮᠠᠬᠢᠨ ᠤ᠋ ᠦᠨᠡᠰᠦ ᠬᠡᠩᠬᠦᠳᠡᠭ ᠳᠡᠭᠡᠷᠡ ᠤᠨᠠᠬᠤ ᠳ᠋ᠤ᠌ ᠭᠡᠳᠡᠷᠭᠦ ᠴᠤ᠌ᠴᠢᠨ ᠰᠡᠷᠢᠬᠦ ᠳ᠋ᠦ᠍᠂ ᠤᠭ ᠲᠡᠮᠳᠡᠭᠯᠡᠯ ᠦ᠋ᠨ ᠤᠴᠢᠷ ᠤᠳᠬᠠ ᠶᠠᠭᠤ ᠪᠣᠯᠬᠤ ᠶ᠋ᠢ ᠡᠷᠭᠢᠴᠡᠭᠦᠯᠪᠡ᠃
ᠡᠭᠦᠨ ᠳ᠋ᠦ᠍ ᠶᠠᠭᠤᠨ ᠤ᠋ ᠤᠷᠢᠳ ᠮᠥᠨ ᠬᠦ᠌ ᠪᠢᠴᠢᠭᠰᠡᠨ ᠬᠥᠮᠦᠨ ᠦ᠌ ᠨᠡᠷᠡ ᠳᠡᠭᠡᠷᠡ ᠡᠴᠡ ᠡᠬᠢᠯᠡᠨ ᠪᠣᠳᠣᠪᠠᠯ ᠨᠢᠨᠠ ᠭᠡᠭᠴᠢ ᠨᠢᠭᠡ ᠵᠠᠯᠠᠭᠤ ᠴᠡᠪᠡᠷᠬᠡᠨ ᠥᠬᠢᠨ ᠪᠥᠭᠡᠳ ᠳᠣᠯᠣᠭᠠᠨ ᠵᠢᠯ ᠦ᠋ᠨ ᠤᠷᠢᠳ ᠪᠢ ᠲᠡᠭᠦᠨ ᠲᠡᠢ ᠬᠢᠵᠠᠭᠠᠷ ᠦᠭᠡᠢ ᠢᠨᠠᠭᠯᠠᠨ ᠬᠠᠨᠢᠯᠠᠭᠰᠠᠨ ᠪᠣᠯᠪᠠᠴᠤ᠂ ᠳᠠᠷᠠᠭᠠ ᠪᠠᠷ ᠬᠣᠶᠠᠷ ᠪᠡᠶᠡ ᠠᠭᠤᠯᠠ ᠳᠠᠯᠠᠢ ᠶ᠋ᠢᠨ ᠲᠡᠷᠲᠡᠭᠡ ᠡᠨᠡᠲᠡᠢ ᠳ᠋ᠦ᠍ ᠵᠠᠪᠰᠠᠷᠯᠠᠭᠳᠠᠨ ᠰᠡᠳᠬᠢᠯ ᠵᠢᠷᠦᠬᠡ ᠲᠠᠰᠢᠶᠠᠯᠠᠭᠳᠠᠭᠰᠠᠨ ᠪᠢᠯᠡ᠃ ᠬᠣᠵᠢᠮ ᠬᠠᠢᠷᠠᠲᠠᠢ ᠨᠢᠨᠠ ᠬᠠᠮᠢᠭᠠ ᠣᠳᠤᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ᠂ ᠬᠡᠳᠦᠢ ᠪᠡᠷ ᠡᠷᠢᠨ ᠰᠤᠷᠪᠤᠯᠵᠢᠯᠠᠭᠰᠠᠨ ᠪᠣᠯᠪᠠᠴᠤ ᠡᠰᠡ ᠣᠯᠤᠭᠠᠳ ᠠᠯᠮᠠᠢᠷᠠᠨ ᠭᠠᠢᠬᠠᠭᠰᠠᠭᠠᠷ ᠪᠠᠢᠪᠠ᠃
ᠭᠡᠲᠡᠯᠡ ᠡᠨᠡ ᠥᠷᠯᠥᠭᠡ ᠰᠠᠨᠠᠮᠰᠠᠷ ᠦᠭᠡᠢ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ ᠢ᠋ ᠦᠵᠡᠬᠦ ᠳ᠋ᠦ᠍ ᠦᠯᠦ ᠮᠡᠳᠡᠭᠳᠡᠬᠦ ᠤᠳᠬᠠ ᠪᠦᠬᠦᠢ ᠬᠡᠳᠦᠨ ᠦᠰᠦᠭ ᠦ᠋ᠨ ᠳᠣᠲᠣᠷᠠ ᠲᠡᠭᠦᠨ ᠦ᠌ ᠨᠡᠷᠡ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ᠂ ᠵᠢᠷᠦᠬᠡᠨ ᠦ᠌ ᠳᠣᠲᠣᠷᠠ ᠵᠤᠯᠠ ᠪᠠᠳᠠᠷᠠᠪᠠ᠃ ᠡᠷᠭᠢᠴᠡᠭᠦᠯᠦᠨ ᠰᠠᠨᠠᠪᠠᠯ᠂ ᠡᠳᠡᠭᠡᠷ ᠬᠡᠳᠦᠨ ᠦᠭᠡᠰ ᠨᠢ ᠲᠡᠭᠦᠨ ᠦ᠌ ᠪᠡᠶᠡ ᠨᠠᠳᠠ ᠠ᠋ᠴᠠ ᠰᠠᠯᠬᠤ ᠳ᠋ᠤ᠌ ᠮᠢᠨᠦ ᠳᠡᠪᠲᠡᠷ ᠳᠡᠭᠡᠷᠡ ᠲᠡᠮᠳᠡᠭᠯᠡᠵᠦ ᠥᠭᠭᠦᠭᠰᠡᠨ ᠰᠠᠨᠠᠭᠤᠯᠭᠠ ᠯᠠᠪ ᠮᠥᠨ ᠭᠡᠵᠦ ᠰᠠᠶᠢ ᠮᠡᠳᠡᠪᠡᠴᠦ᠂ ᠶᠠᠭᠤ ᠭᠡᠰᠡᠨ ᠤᠳᠬᠠ ᠨᠢ ᠪᠠᠰᠠᠯᠠ ᠳᠠᠯᠳᠠ ᠶᠤᠮ᠃ ᠥᠨᠥ ᠰᠠᠨᠠᠮᠰᠠᠷ ᠦᠭᠡᠢ ᠠᠪᠴᠤ ᠪᠣᠳᠣᠪᠠᠯ ᠨᠢᠨᠠ ᠪᠣᠯᠪᠠᠯ᠂ ᠡᠩ ᠦ᠋ᠨ ᠬᠥᠮᠦᠨ ᠪᠢᠰᠢ ᠪᠥᠭᠡᠳ ᠡᠷᠳᠡᠮᠲᠡᠨ ᠥᠬᠢᠨ ᠮᠥᠨ ᠲᠤᠯᠠ ᠡᠨᠡ ᠬᠦ᠌ ᠪᠢᠴᠢᠭᠰᠡᠨ ᠨᠢ ᠯᠠᠪ ᠨᠢᠭᠡ ᠤᠴᠢᠷ ᠲᠠᠢ ᠪᠢᠵᠡ᠃ ᠡᠭᠦᠨ ᠦ᠌ ᠤᠴᠢᠷ ᠢ᠋ ᠣᠯᠪᠠᠯ ᠨᠢᠨᠠ ᠮᠢᠨᠢ ᠮᠠᠭᠠᠳ ᠭᠡᠵᠦ ᠰᠡᠳᠬᠢᠮᠡᠭᠴᠡ᠂ ᠨᠢᠭᠡ ᠠᠶᠠᠭᠠ ᠴᠠᠢ ᠠᠪᠴᠢᠷᠠᠭᠤᠯᠤᠨ ᠤᠤᠭᠤᠭᠠᠳ᠂ ᠮᠥᠨ ᠬᠡᠪᠲᠡᠭᠡ ᠬᠡᠪ ᠢ᠋ᠶ᠋ᠡᠷ ᠤᠭ ᠲᠡᠮᠳᠡᠭᠯᠡᠯ ᠦ᠋ᠨ ᠤᠳᠬᠠ ᠶ᠋ᠢ ᠰᠢᠨᠵᠢᠯᠡᠨ ᠪᠣᠯᠪᠠᠰᠤᠷᠠᠭᠤᠯᠵᠤ ᠡᠬᠢᠯᠡᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠮᠠᠨ ᠤ᠋ ᠲᠣᠭᠣᠭᠠᠴᠢ ᠶᠡᠬᠡ ᠯᠡ ᠰᠦᠷᠡᠬᠡᠢ ᠴᠢᠷᠠᠢ ᠭᠠᠷᠭᠠᠵᠤ ᠨᠠᠳᠠ ᠠ᠋ᠴᠠ ᠠᠰᠠᠭᠤᠨᠠ᠃
— ᠠᠢ ᠳ᠋ᠠᠩᠵᠢᠶᠠᠳ ᠶᠠᠭᠠᠬᠢᠭᠰᠠᠨ᠃ ᠪᠡᠶᠡ ᠡᠪᠡᠳᠦᠭᠰᠡᠨ ᠤᠤ ?
— ᠦᠭᠡᠢ᠂ ᠵᠦᠭᠡᠷ᠃
—ᠠᠢ ᠪᠢ ᠠᠶᠤᠵᠤ ᠪᠠᠢᠨᠠ ᠪᠢᠰᠢ ᠤᠤ᠃ ᠴᠢᠷᠠᠢ ᠮᠠᠭᠤ ᠪᠠᠢᠨᠠ᠃
— ᠵᠦᠭᠡᠷ᠂ ᠶᠠᠳᠠᠷᠠᠵᠤ ᠪᠠᠢᠨᠠ᠃
ᠳᠠᠷᠠᠭᠠ ᠪᠠᠷ ᠪᠤᠷᠤᠭᠤ ᠬᠠᠷᠠᠨ ᠬᠡᠪᠲᠡᠵᠦ᠂ ᠬᠥᠨᠵᠢᠯᠡ ᠪᠡᠨ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠨᠥᠮᠥᠷᠦᠭᠡᠳ ᠴᠢᠨᠠᠭᠰᠢ ᠪᠣᠳᠣᠪᠠ᠃ ᠮᠠᠨ ᠤ᠋ ᠲᠣᠭᠣᠭᠠᠴᠢ ᠠᠶᠠ ᠭᠡᠳ ᠭᠠᠷᠴᠤ ᠣᠳᠪᠠ᠃
ᠨᠢᠭᠡ ᠴᠠᠭ ᠣᠷᠴᠢᠮ ᠵᠦᠢᠯ ᠵᠦᠢᠯ ᠢ᠋ᠶ᠋ᠡᠷ ᠵᠡᠷᠭᠡᠴᠡᠭᠦᠯᠦᠭᠰᠡᠨ ᠦ᠌ ᠬᠣᠢᠨᠠ ᠠᠷᠠᠢ ᠭᠡᠵᠦ ᠨᠢᠭᠡ ᠰᠡᠳᠦᠪ ᠣᠯᠤᠭᠰᠠᠨ ᠪᠥᠭᠡᠳ ᠶᠠᠭᠤ ᠭᠡᠪᠡᠯ᠂ ᠨᠠᠢ᠍ᠮᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠭᠤᠴᠢᠨ ᠤ᠋ ᠪᠢᠮᠪᠠ ᠭᠠᠷᠠᠭ ᠭᠡᠰᠡᠨ ᠨᠢ ᠪᠣᠯᠵᠣᠭᠠ ᠲᠠᠯᠪᠢᠭᠰᠠᠨ ᠡᠳᠦᠷ ᠪᠣᠯᠤᠨᠠ᠃ ᠬᠠᠷᠠᠩᠭᠤᠢ ᠬᠠᠳᠠ ᠭᠡᠵᠦ ᠶᠠᠭᠠᠬᠢᠪᠠᠴᠤ ᠨᠢᠭᠡ ᠭᠠᠵᠠᠷ ᠪᠠᠢᠵᠤ ᠲᠣᠬᠢᠷᠠᠬᠤ ᠲᠤᠯᠠ ᠯᠠᠪ ᠲᠡᠢᠮᠦ ᠭᠠᠵᠠᠷ ᠠᠭᠤᠯᠵᠠᠬᠤ ᠶᠤᠮ ᠪᠠᠢᠨᠠ ᠭᠡᠵᠦ ᠰᠡᠳᠬᠢᠭᠰᠡᠨ ᠪᠥᠭᠡᠳ ᠪᠠᠰᠠ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠰᠢᠯᠭᠠᠵᠤ ᠪᠣᠳᠣᠪᠠᠯ᠂ ᠶᠡᠷᠦ ᠡᠭᠦᠨ ᠡᠴᠡ ᠵᠠᠢᠯᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠬᠤᠸᠠᠩᠯᠢ ᠶ᠋ᠢ ᠠᠪᠴᠤ ᠦᠵᠡᠪᠡᠯ᠂ ᠨᠠᠢ᠍ᠮᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠭᠤᠴᠢᠨ ᠪᠢᠮᠪᠠ ᠭᠠᠷᠠᠭ ᠶᠠᠭ ᠡᠨᠡ ᠡᠳᠦᠷ ᠪᠣᠯᠤᠭᠰᠠᠨ ᠲᠤᠯᠠ ᠳᠠᠷᠤᠢ ᠶᠠᠭᠠᠷᠠᠪᠴᠢᠯᠠᠨ ᠪᠣᠰᠤᠮᠠᠭᠴᠠ᠂ ᠮᠣᠷᠢ ᠶ᠋ᠢ ᠪᠠᠷᠢᠵᠤ ᠡᠮᠡᠭᠡᠯᠯᠡ ᠭᠡᠵᠦ ᠲᠣᠭᠣᠭᠠᠴᠢ ᠳ᠋ᠤ᠌ ᠬᠡᠯᠡᠪᠡᠯ᠂ ᠲᠡᠭᠦᠨ ᠦ᠌ ᠪᠡᠶᠡ ᠡᠮᠦᠨᠡ ᠡᠴᠡ ᠶᠡᠬᠡ ᠨᠢᠳᠦ ᠭᠠᠷᠭᠠᠵᠤ《ᠶᠠᠭᠠᠬᠢᠭᠰᠠᠨ᠂ ᠳ᠋ᠠᠩᠵᠢᠶᠠᠳ》 ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠰᠢᠪᠡᠨᠡᠭᠰᠡᠭᠡᠷ ᠭᠠᠷᠴᠤ ᠤᠳᠤᠭᠠᠳ᠄《ᠠᠢ ᠡᠮᠡᠭᠡᠯᠯᠡᠭᠰᠡᠨ ᠰᠢᠦ!》 ᠭᠡᠵᠦ ᠭᠠᠳᠠᠨᠠ ᠬᠠᠰᠬᠢᠷᠴᠤ ᠪᠠᠢᠨᠠ᠃ ᠮᠢᠨᠦ ᠪᠡᠶᠡ ᠳᠠᠷᠤᠢ ᠳ᠋ᠤ᠌ ᠲᠠᠰᠢᠭᠤᠷ ᠢ᠋ ᠠᠪᠤᠨ᠂ ᠱᠠᠯᠠᠮᠠᠭᠠᠢᠯᠠᠨ ᠭᠠᠷᠴᠤ ᠮᠣᠷᠢᠨ ᠳᠡᠭᠡᠷᠡ ᠮᠣᠷᠳᠠᠭᠰᠠᠨ ᠪᠣᠯᠪᠠᠴᠤ ᠠᠯᠢ ᠵᠦᠭ ᠲᠦ᠍ ᠣᠳᠬᠤ ᠪᠠ《ᠬᠠᠷᠠᠩᠭᠤᠢ ᠬᠣᠲᠠ》 ᠭᠡᠭᠴᠢ ᠨᠢ ᠶᠠᠮᠠᠷ ᠶᠢᠷᠲᠢᠨᠴᠦ ᠳ᠋ᠦ᠍ ᠣᠷᠣᠰᠢᠵᠤ ᠪᠠᠢᠬᠤ ᠶ᠋ᠢ ᠣᠭᠲᠣᠬᠠᠨ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠲᠤᠯᠠ ᠳᠡᠮᠡᠢ ᠯᠡ ᠮᠣᠷᠢᠨ ᠤ᠋ ᠪᠠᠨ ᠬᠣᠶᠠᠷ ᠴᠢᠬᠢ ᠶ᠋ᠢ ᠰᠢᠷᠲᠡᠨ ᠭᠠᠢᠬᠠᠵᠤ ᠨᠡᠯᠢᠶᠡᠳ ᠤᠳᠠᠪᠠ᠃ ᠡᠭᠦᠨ ᠳ᠋ᠦ᠍ ᠮᠠᠨ ᠤ᠋ ᠲᠣᠭᠣᠭᠠᠴᠢ ᠬᠠᠵᠠᠭᠤ ᠠ᠋ᠴᠠ᠄《ᠠᠢ ᠶᠠᠪᠤᠬᠤ ᠦᠭᠡᠢ ᠶᠠᠭᠠᠬᠢᠭᠰᠠᠨ᠂ ᠶᠠᠭᠤ ᠮᠠᠷᠲᠠᠭᠰᠠᠨ?》 ᠭᠡᠵᠦ ᠥᠭᠦᠯᠡᠵᠦ ᠪᠠᠢᠨᠠ᠃ ᠭᠡᠲᠡᠯᠡ ᠮᠢᠨᠦ ᠮᠣᠷᠢ ᠤᠳᠠᠭᠠᠨ ᠵᠣᠭᠰᠣᠬᠤ ᠳ᠋ᠤ᠌ ᠬᠥᠯ ᠨᠢ ᠴᠢᠯᠡᠭᠰᠡᠨ ᠪᠠ ᠤᠭᠠ᠋ᠴᠠ ᠣᠮᠣᠭᠯᠠᠩ ᠮᠣᠷᠢ ᠲᠤᠯᠠ ᠡᠰᠢ ᠳᠠᠰᠢ ᠲᠡᠮᠡᠦᠯᠦᠨ ᠲᠣᠭᠲᠠᠵᠤ ᠶᠠᠳᠠᠬᠤ ᠳ᠋ᠤ᠌ ᠵᠢᠯᠣᠭᠣ ᠪᠠᠨ ᠰᠤᠯᠠᠳᠬᠠᠬᠤ ᠳ᠋ᠤ᠌ ᠲᠡᠷᠡ ᠪᠠᠷᠠᠭᠤᠨ ᠡᠮᠦᠨᠡ ᠵᠦᠭ ᠠᠯᠬᠤᠯᠠᠪᠠ᠃ ᠡᠭᠦᠨ ᠳ᠋ᠦ᠍ ᠪᠢ ᠨᠢᠭᠡ ᠵᠡᠷᠭᠡ ᠪᠣᠳᠣᠭᠠᠳ ᠮᠣᠷᠢᠨ ᠤ᠋ ᠬᠠᠮᠢᠭᠠ ᠴᠢᠭᠯᠡᠭᠰᠡᠨ ᠵᠦᠭ ᠲᠦ᠍ ᠰᠢᠭᠤᠳ ᠶᠠᠪᠤᠪᠠ᠃ ᠡᠰᠢ ᠳᠠᠰᠢ ᠪᠥᠷᠲᠥᠢᠭᠰᠡᠨ ᠶᠠᠭᠤᠮᠠ ᠶ᠋ᠢ ᠬᠠᠷᠠᠨ ᠶᠠᠪᠤᠭᠰᠠᠭᠠᠷ᠂ ᠨᠢᠭᠡ ᠮᠡᠳᠡᠪᠡᠯ᠂ ᠬᠡᠳᠦ ᠬᠡᠳᠦᠨ ᠠᠷᠪᠠᠨ ᠭᠠᠵᠠᠷ ᠳᠠᠪ ᠳᠡᠮᠡᠢ ᠶᠠᠪᠤᠴᠢᠬᠰᠠᠨ ᠪᠥᠭᠡᠳ ᠬᠥᠮᠦᠨ ᠠᠮᠢᠲᠠᠨ ᠦᠵᠡᠭᠳᠡᠬᠦ ᠦᠭᠡᠢ ᠴᠦᠯ ᠭᠠᠵᠠᠷ ᠢᠷᠡᠵᠡᠢ᠃ ᠠᠮᠠ ᠠᠩᠭᠠᠬᠤ ᠨᠢ ᠬᠡᠮᠵᠢᠶᠡ ᠦᠭᠡᠢ᠂ ᠰᠡᠳᠬᠢᠯ ᠤᠢᠳᠬᠠᠷᠯᠠᠬᠤ ᠨᠢ ᠬᠢᠵᠠᠭᠠᠷ ᠦᠭᠡᠢ᠃ ᠮᠣᠷᠢ ᠬᠡᠳᠦᠢ ᠪᠡᠷ ᠶᠡᠬᠡᠳᠡ ᠬᠥᠯᠥᠷᠡᠭᠰᠡᠨ ᠪᠣᠯᠪᠠᠴᠤ ᠶᠠᠳᠠᠭᠰᠠᠨ ᠪᠠᠢᠳᠠᠯ ᠣᠭᠲᠣ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠰᠠᠯᠬᠢ ᠶ᠋ᠢ ᠰᠥᠷᠦᠨ ᠬᠡᠩᠬᠦᠳᠡᠭ ᠢ᠋ ᠢᠷᠡᠨ ᠳᠠᠪᠬᠢᠭᠰᠠᠭᠠᠷ᠂ ᠬᠡᠳᠦ ᠬᠡᠳᠦᠨ ᠬᠤᠸᠠ ᠶ᠋ᠢ ᠳᠠᠪᠠᠵᠤ ᠬᠤᠵᠢᠷ ᠪᠠ ᠪᠤᠲᠠᠷᠭᠠᠨᠠ ᠡᠯᠪᠡᠭ ᠲᠡᠢ ᠨᠢᠭᠡ ᠴᠠᠢᠳᠠᠮ ᠭᠠᠵᠠᠷ ᠬᠦᠷᠴᠦ ᠦᠵᠡᠪᠡᠯ᠂ ᠳᠥᠷᠪᠡᠨ ᠵᠦᠭ ᠲᠦ᠍ ᠶᠠᠭᠤ ᠴᠤ᠌ ᠦᠵᠡᠭᠳᠡᠬᠦ ᠦᠭᠡᠢ᠃ ᠬᠠᠷᠢᠨ ᠲᠡᠷᠲᠡᠭᠡᠭᠦᠷ ᠪᠠᠷᠠᠭᠠᠨ ᠡᠭᠦᠯᠡ ᠬᠤᠷᠠᠵᠤ ᠪᠣᠷᠣᠭᠠᠨ ᠣᠷᠣᠬᠤ ᠶᠠᠩᠵᠤ ᠲᠠᠢ ᠪᠠᠢᠪᠠ᠃ ᠰᠠᠨᠠᠮᠰᠠᠷ ᠦᠭᠡᠢ ᠬᠦᠷᠴᠦ ᠢᠷᠡᠭᠰᠡᠨ ᠵᠡᠷᠯᠢᠭ ᠴᠦᠯ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠲᠡᠳᠦᠢ ᠯᠡ ᠲᠠᠭᠠᠯᠠᠮᠵᠢ ᠦᠭᠡᠢ᠂ ᠳᠡᠮᠡᠢ ᠯᠡ ᠭᠠᠢᠬᠠᠨᠠ᠃ ᠨᠠᠮᠤᠷ ᠤ᠋ᠨ ᠰᠠᠯᠬᠢ ᠰᠡᠷᠴᠢᠭᠢᠨᠡᠨ ᠰᠠᠯᠬᠢᠯᠠᠬᠤ ᠳ᠋ᠤ᠌ ᠰᠡᠳᠬᠢᠯ ᠦ᠋ᠨ ᠳᠣᠲᠣᠷᠠ ᠭᠤᠯᠢᠩ ᠭᠠᠯᠢᠩ ᠪᠠᠢᠳᠠᠯ ᠢ᠋ ᠲᠥᠷᠥᠭᠦᠯᠦᠨᠡ᠃ ᠨᠢᠨᠠ ᠶ᠋ᠢ ᠡᠷᠢᠵᠦ ᠣᠯᠤᠨᠠ ᠭᠡᠰᠡᠨ ᠨᠢ ᠬᠠᠷᠢᠨ ᠵᠡᠭᠦᠳᠦᠯᠡᠨ ᠳᠠᠪᠬᠢᠵᠤ᠂ ᠬᠥᠨᠳᠡᠢ ᠲᠠᠯᠠ ᠳ᠋ᠤ᠌ ᠲᠥᠭᠡᠷᠢᠬᠦ ᠨᠢ ᠴᠦ᠍ ᠶᠦᠮ ᠤᠤ? ᠭᠡᠲᠡᠯᠡ ᠤᠨᠤᠭᠰᠠᠨ ᠮᠣᠷᠢᠨ ᠤ᠋ ᠴᠢᠬᠢ ᠨᠢ ᠰᠣᠭᠣᠲᠣᠭᠣᠨᠠᠵᠤ᠂ ᠬᠠᠮᠠᠷ ᠨᠢ ᠬᠤᠤᠬᠢᠨᠠᠬᠤ ᠳ᠋ᠤ᠌ ᠰᠡᠷ ᠬᠢᠲᠡᠯᠡ ᠴᠣᠴᠢᠵᠤ ᠡᠰᠢ ᠲᠡᠰᠢ ᠠᠵᠢᠭᠯᠠᠪᠠᠯ᠂ ᠲᠡᠷᠲᠡᠭᠡ ᠬᠠᠵᠠᠭᠤ ᠳ᠋ᠤ᠌ ᠨᠢᠭᠡ ᠠᠮᠢᠲᠠᠨ ᠶᠠᠪᠤᠨᠠ᠃ ᠶᠠᠭᠤ ᠴᠤ᠌ ᠪᠣᠯᠪᠠ ᠣᠴᠢᠶᠠ ᠭᠡᠵᠦ ᠰᠢᠭᠤᠳ ᠳᠠᠪᠬᠢᠨ ᠣᠢᠷᠠᠲᠤᠪᠠᠯ᠂ ᠦᠨᠡᠭᠡ ᠴᠢᠨᠣᠠ ᠠᠯᠢ ᠨᠢ ᠴᠦ᠍ ᠲᠠᠨᠢᠭᠳᠠᠬᠤ ᠦᠭᠡᠢ ᠨᠢᠭᠡ ᠠᠮᠢᠲᠠᠨ ᠤᠯᠠᠮ ᠴᠢᠨᠠᠭᠰᠢ ᠵᠢᠭᠤᠲᠠᠨᠠ᠃ ᠮᠣᠷᠢ ᠶ᠋ᠢ ᠲᠠᠰᠢᠭᠤᠷᠳᠠᠵᠤ ᠳᠣᠪᠲᠣᠯᠤᠭᠰᠠᠭᠠᠷ ᠭᠦᠢᠴᠡᠵᠦ ᠦᠵᠡᠪᠡᠯ᠂ ᠦᠨᠡᠭᠡ ᠴᠦ᠍ ᠪᠢᠰᠢ᠂ ᠴᠢᠨᠣᠠ ᠴᠤ᠌ ᠪᠢᠰᠢ ᠬᠠᠷᠢᠨ ᠨᠢᠭᠡ ᠨᠣᠬᠠᠢ ᠶᠠᠪᠤᠵᠤ ᠪᠠᠢᠬᠤ ᠪᠥᠭᠡᠳ ᠡᠮᠦᠨᠡ ᠪᠠ ᠬᠣᠢᠭᠤᠷ ᠨᠢᠭᠡᠨᠲᠡ ᠡᠷᠭᠢᠯᠳᠦᠵᠦ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠭᠠᠳ᠂ᠪᠠᠷᠠᠭᠤᠨ ᠵᠦᠭ ᠤᠳᠤᠷᠢᠳᠤᠨ ᠶᠠᠪᠤᠬᠤ ᠶ᠋ᠢ ᠦᠵᠡᠪᠡᠯ᠂ ᠠᠢᠯ ᠤ᠋ᠨ ᠨᠣᠬᠠᠢ ᠴᠤ᠌ ᠪᠣᠯᠤᠯᠲᠠᠢ᠂ ᠠᠩ ᠤ᠋ᠨ ᠴᠤ᠌ ᠨᠣᠬᠠᠢ ᠪᠠᠢᠯᠲᠠᠢ ᠲᠤᠯᠠ ᠴᠠᠩᠭᠠᠭᠰᠠᠨ ᠳ᠋ᠠᠭᠠᠨ ᠯᠠᠪ ᠨᠢᠭᠡ ᠬᠥᠮᠦᠨ ᠲᠡᠢ ᠭᠠᠵᠠᠷ ᠬᠦᠷᠬᠦ ᠪᠢᠵᠡ ᠭᠡᠵᠦ ᠢᠲᠡᠭᠡᠵᠦ ᠬᠣᠢᠨᠠ ᠠ᠋ᠴᠠ ᠨᠢ ᠳᠠᠭᠠᠯᠳᠤᠨ ᠱᠣᠭᠰᠢᠪᠠ᠃ ᠲᠡᠭᠡᠭᠡᠳ ᠴᠠᠢᠳᠠᠮ ᠠ᠋ᠴᠠ ᠬᠣᠯᠠᠳᠤᠨ᠂ ᠨᠢᠭᠡ ᠬᠤᠸᠠ ᠶ᠋ᠢ ᠳᠠᠪᠠᠪᠠᠯ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠶᠡᠬᠡ ᠯᠡ ᠥᠭᠡᠷᠡ ᠪᠣᠯᠤᠭᠠᠳ᠂ ᠡᠪᠡᠰᠦ ᠨᠣᠭᠣᠭᠠ ᠰᠠᠬᠤᠯᠠᠭ ᠤᠷᠭᠤᠭᠰᠠᠨ ᠭᠠᠵᠠᠷ᠂ ᠲᠡᠷᠲᠡᠭᠡ ᠪᠠᠷᠠᠭᠤᠨ ᠬᠣᠢᠲᠤ ᠲᠠᠯᠠ ᠳ᠋ᠤ᠌ ᠥᠨᠳᠥᠷ ᠠᠭᠤᠯᠠᠰ ᠬᠠᠨᠠᠷᠠᠨ ᠪᠠᠢᠬᠤ ᠶ᠋ᠢᠨ ᠨᠠᠭᠠᠭᠤᠷ ᠤᠷᠲᠤ ᠮᠥᠷᠡᠨ ᠤᠷᠤᠰᠤᠭᠰᠠᠨ ᠨᠢ ᠦᠵᠡᠭᠳᠡᠨᠡ᠃ ᠨᠣᠬᠠᠢ ᠶ᠋ᠢᠨ ᠶᠠᠪᠤᠬᠤ ᠨᠢ ᠠᠯᠭᠤᠷ ᠪᠣᠯᠤᠭᠠᠳ ᠤᠳᠠᠯ ᠦᠭᠡᠢ ᠨᠢᠭᠡ ᠲᠣᠯᠣᠭᠠᠢ ᠲᠣᠭᠣᠷᠢᠮᠠᠭᠴᠠ ᠴᠠᠭᠠᠨᠠ ᠨᠢ ᠨᠢᠭᠡ ᠬᠠᠷᠠ ᠣᠪᠣᠬᠠᠢ ᠬᠠᠷᠠᠭᠳᠠᠪᠠ᠃
ᠭᠠᠳᠠᠭᠤᠷ ᠨᠢ ᠨᠢᠭᠡ ᠴᠦ᠍ ᠮᠠᠯ ᠦᠭᠡᠢ᠂ ᠬᠠᠷᠢᠨ ᠳᠠᠷᠠᠰᠤ ᠪᠤᠲᠠ ᠦᠷᠭᠦᠯᠵᠢᠯᠡᠵᠡᠢ᠃ ᠨᠢᠭᠡ ᠬᠠᠷᠠ ᠬᠥᠮᠦᠨ ᠭᠠᠷᠴᠤ ᠢᠷᠡᠭᠡᠳ᠂ ᠨᠣᠬᠠᠢ ᠪᠠᠨ ᠳᠠᠯᠠᠯᠤᠨ ᠳᠠᠭᠤᠳᠠᠵᠤ ᠪᠠᠢᠨᠠ᠃ ᠮᠢᠨᠦ ᠪᠡᠶᠡ ᠬᠠᠭᠠᠰ ᠡᠳᠦᠷ ᠬᠡᠭᠡᠷᠡ ᠶᠠᠪᠤᠭᠰᠠᠨ ᠨᠢ ᠬᠡᠳᠦᠨ ᠰᠠᠷᠠ ᠠᠶᠠᠨ ᠬᠢᠭᠰᠡᠨ ᠮᠡᠲᠦ ᠪᠣᠯᠵᠤ᠂ ᠪᠡᠶᠡ ᠵᠦᠳᠡᠷᠡᠨ ᠰᠠᠨᠠᠭᠠ ᠭᠠᠯᠢᠷᠠᠭᠰᠠᠨ ᠲᠤᠯᠠ ᠠᠢᠯ ᠭᠡᠷ ᠢ᠋ ᠦᠵᠡᠬᠦ ᠳ᠋ᠦ᠍ ᠨᠢᠨᠠ ᠲᠠᠢ ᠤᠴᠠᠷᠠᠭᠰᠠᠨ ᠠᠳᠠᠯᠢ ᠪᠠᠶᠠᠷᠯᠠᠵᠤ᠂ ᠮᠣᠷᠢ ᠪᠠᠨ ᠲᠤᠱᠠᠭᠠᠳ ᠣᠷᠣᠪᠠ᠃ ᠬᠠᠷᠠ ᠬᠥᠮᠦᠨ ᠳᠠᠭᠠᠯᠳᠤᠨ ᠣᠷᠣᠭᠠᠳ᠂ ᠵᠡᠭᠦᠨ ᠬᠣᠢᠨᠠ ᠴᠣᠮᠴᠣᠢᠨ ᠰᠠᠭᠤᠪᠠ᠃ ᠪᠢ ᠪᠠᠷᠠᠭᠤᠨ ᠬᠣᠢᠨᠠ ᠨᠢ ᠨᠢᠭᠡ ᠭᠥᠷᠦᠭᠡᠰᠦᠨ ᠦ᠌ ᠰᠢᠷᠢᠨ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠬᠠᠭᠠᠰ ᠵᠠᠪᠢᠯᠠᠨ ᠰᠠᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠠᠮᠤᠷ ᠮᠡᠨᠳᠦ ᠶ᠋ᠢ ᠮᠡᠳᠡᠯᠴᠡᠪᠡ᠃ ᠮᠥᠨ ᠬᠠᠷᠠ ᠬᠥᠮᠦᠨ ᠭᠤᠴᠢ ᠢᠯᠡᠭᠦᠦ ᠨᠠᠰᠤᠲᠠᠢ᠂ ᠢᠯᠭᠢᠨ ᠳᠡᠪᠡᠯ ᠡᠮᠦᠰᠴᠦ᠂ ᠰᠤᠷ ᠪᠦᠰᠡ ᠪᠦᠰᠡᠯᠡᠵᠡᠢ᠃ ᠦᠭᠡ ᠬᠡᠯᠡᠯᠴᠡᠬᠦ ᠠᠶᠠᠯᠭᠤ ᠨᠢ ᠴᠢᠬᠢᠨ ᠳ᠋ᠦ᠍ ᠶᠡᠬᠡ ᠯᠡ ᠥᠭᠡᠷᠡ ᠰᠣᠨᠣᠰᠳᠠᠨᠠ᠃ ᠵᠡᠭᠦᠨ ᠡᠮᠦᠨᠡ ᠬᠠᠲᠠᠪᠴᠢᠨ ᠳ᠋ᠤ᠌᠂ ᠨᠢᠭᠡ ᠬᠥᠮᠦᠨ ᠦᠰᠦ ᠲᠡᠢ ᠳᠡᠪᠡᠯ ᠢ᠋ᠶ᠋ᠡᠷ ᠬᠤᠴᠢᠭᠠ ᠲᠠᠢ ᠬᠡᠪᠲᠡᠵᠦ ᠪᠠᠢᠨᠠ᠃ ᠲᠤᠩ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠴᠤᠬᠤᠢᠵᠤ ᠪᠠᠢᠨᠠ᠃ ᠬᠠᠷᠠ ᠬᠥᠮᠦᠨ ᠨᠣᠷᠮᠠ ᠳ᠋ᠤ᠌ ᠰᠢᠭᠢᠳᠬᠡᠭᠰᠡᠨ ᠳᠣᠩᠪᠣ ᠲᠠᠢ ᠴᠠᠢ ᠶ᠋ᠢ ᠨᠢᠭᠡ ᠳᠠᠪᠰᠢ ᠲᠠᠷᠪᠠᠭᠠᠨ ᠤ᠋ ᠮᠢᠬᠠ ᠶ᠋ᠢᠨ ᠬᠠᠮᠲᠤ ᠨᠠᠳᠠ ᠳ᠋ᠤ᠌ ᠥᠭᠭᠦᠭᠰᠡᠨ ᠳ᠋ᠦ᠍ ᠴᠠᠢ ᠨᠢ ᠭᠤᠳᠤᠮᠵᠢᠨ ᠤ᠋ ᠱᠠᠯᠪᠠᠭ ᠰᠢᠭ᠋ ᠪᠤᠯᠠᠩᠭᠢᠷ ᠲᠠᠢ᠂ ᠮᠢᠬᠠ ᠨᠢ ᠬᠠᠯᠠᠰᠢ ᠦᠭᠡᠢ ᠨᠡᠬᠢᠭᠦᠨ ᠦᠨᠦᠷ ᠲᠡᠢ ᠪᠣᠯᠪᠠᠴᠤ᠂ ᠤᠮᠳᠠᠭᠠᠰᠴᠤ ᠥᠯᠥᠰᠦᠭᠰᠡᠨ ᠮᠢᠨᠢ ᠶᠡᠬᠡ ᠲᠤᠯᠠ᠂ ᠠᠷᠭᠠ ᠦᠭᠡᠢ ᠤᠤᠭᠤᠵᠤ ᠢᠳᠡᠪᠡ᠃ ᠨᠢᠨᠠ ᠰᠡᠳᠬᠢᠯ ᠳ᠋ᠦ᠍ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠨᠢᠨᠠ ᠶ᠋ᠢᠨ ᠲᠡᠮᠳᠡᠭᠯᠡᠭᠰᠡᠨ《ᠬᠠᠷᠠᠩᠭᠤᠢ ᠬᠠᠳᠠ》 ᠭᠡᠭᠴᠢ ᠭᠠᠵᠠᠷ ᠢ᠋ ᠬᠠᠷᠠ ᠬᠥᠮᠦᠨ ᠡᠴᠡ ᠰᠤᠷᠠᠪᠠᠯ᠄
— ᠪᠢ ᠡᠨᠡ ᠭᠠᠵᠠᠷ ᠥᠰᠬᠦ ᠡᠴᠡ ᠪᠡᠨ ᠠᠪᠤᠭᠠᠳ ᠥᠲᠡᠯᠲᠡᠯᠡ ᠪᠡᠨ ᠰᠠᠭᠤᠭᠰᠠᠨ ᠪᠥᠭᠡᠳ ᠤᠭ ᠠ᠋ᠴᠠ ᠭᠥᠷᠥᠭᠡᠴᠢᠨ ᠬᠥᠮᠦᠨ ᠲᠤᠯᠠ ᠣᠢᠷᠠ ᠬᠠᠪᠢ ᠶ᠋ᠢᠨ ᠭᠠᠵᠠᠷ ᠢ᠋ ᠪᠠᠷᠤᠭ ᠮᠡᠳᠡᠨᠡ (ᠡᠨᠡ ᠵᠠᠪᠰᠠᠷ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ ᠪᠠᠶᠠᠷ ᠲᠥᠷᠥᠵᠦ ᠪᠠᠢᠪᠠ)᠃ ᠭᠡᠪᠡᠴᠦ ᠲᠡᠢᠮᠦ ᠨᠡᠷᠡ ᠲᠡᠢ ᠭᠠᠵᠠᠷ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠭᠡᠬᠦ ᠳ᠋ᠦ᠍ ᠮᠢᠨᠦ ᠤᠷᠮᠠ ᠬᠤᠭᠤᠷᠠᠵᠤ᠂ ᠣᠳᠣ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠠᠯᠮᠠᠢᠷᠠᠨᠠ᠃
ᠠᠯᠲᠠᠨ ᠳᠡᠯᠡᠬᠡᠢ ᠠᠭᠤᠳᠠᠮ ᠶᠡᠬᠡ᠂ ᠬᠠᠷᠠᠩᠭᠤᠢ ᠬᠠᠳᠠ ᠭᠡᠭᠴᠢ ᠭᠠᠵᠠᠷ ᠬᠠᠮᠢᠭᠠ ᠪᠠᠢᠬᠤ ᠶ᠋ᠢ ᠬᠡᠨ ᠶᠠᠭᠠᠬᠢᠵᠤ ᠮᠡᠳᠡᠨᠡ᠃ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠢ᠋ ᠲᠣᠭᠣᠷᠢᠨ᠂ ᠵᠠᠭᠤᠨ ᠵᠢᠯ ᠮᠢᠩᠭᠠᠨ ᠣᠨ ᠡᠷᠢᠪᠡᠴᠦ ᠪᠠᠰᠠ ᠣᠯᠳᠠᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠ᠃ ᠨᠢᠨᠠ ᠶ᠋ᠢᠨ ᠲᠥᠯᠥᠭᠡ ᠰᠡᠳᠬᠢᠯ ᠰᠦᠢᠳᠴᠦ ᠪᠡᠶᠡ ᠶ᠋ᠢ ᠵᠣᠪᠠᠭᠠᠨᠠ᠃ ᠡᠨᠡ ᠮᠡᠲᠦ ᠪᠡᠷ ᠭᠠᠢᠬᠠᠵᠤ᠂ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠵᠤ ᠨᠢᠭᠡ ᠦᠶᠡ ᠰᠠᠭᠤᠪᠠ᠃ ᠭᠡᠲᠡᠯᠡ ᠲᠡᠷᠲᠡᠭᠡ ᠬᠠᠵᠠᠭᠤ ᠳ᠋ᠤ᠌ ᠬᠡᠪᠲᠡᠭᠰᠡᠨ ᠪᠤᠭᠤᠷᠤᠯ ᠡᠮᠡᠭᠡᠨ ᠲᠣᠯᠣᠭᠠᠢ ᠪᠠᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠥᠨᠳᠡᠢᠨ ᠪᠣᠰᠤᠭᠠᠳ ᠪᠠᠷᠠᠭᠤᠨ ᠬᠣᠶ᠋ᠢᠮᠣᠷ ᠳᠠᠭᠢᠬᠰᠠᠨ ᠪᠤᠷᠬᠠᠨ ᠶᠤᠮ ᠤᠤ ᠣᠩᠭᠣᠨ ᠶᠤᠮ ᠤᠤ ᠠᠯᠢᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠨᠢᠭᠡ ᠶᠠᠭᠤᠮᠠᠨ ᠤ᠋ ᠡᠮᠦᠨᠡ ᠮᠥᠷᠭᠥᠬᠦ ᠳ᠋ᠦ᠍ ᠬᠠᠷᠠ ᠬᠥᠮᠦᠨ ᠶᠡᠬᠡ ᠯᠡ ᠭᠠᠢᠬᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠠᠷᠠᠵᠤ᠄《ᠡᠮᠡᠭᠡ ᠠ᠋ ᠡᠮᠡᠭᠡ ᠠ᠋》 ᠭᠡᠵᠦ ᠪᠠᠢᠨᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠪᠢ ᠮᠥᠨ ᠭᠠᠢᠬᠠᠵᠤ᠂ ᠬᠥᠭᠡᠷᠦᠬᠦᠢ ᠡᠨᠡ ᠠᠪᠠᠬᠠᠢ ᠦᠳᠡᠰᠢ ᠶ᠋ᠢᠨ ᠵᠠᠯᠪᠠᠷᠢᠯ ᠢ᠋ᠶ᠋ᠠᠨ ᠬᠢᠵᠦ ᠪᠠᠢᠭᠠ ᠨᠢ ᠡᠨᠡ ᠶᠦᠮ ᠤᠤ ᠭᠡᠵᠦ ᠪᠣᠳᠣᠵᠤ᠂ ᠡᠷᠲᠡᠬᠡᠨ ᠮᠣᠷᠳᠠᠶᠠ ᠭᠡᠵᠦ ᠡᠨᠡ ᠴᠢᠯᠠᠭᠤᠨ ᠤ᠋ ᠭᠠᠷᠤᠭᠰᠠᠨ ᠭᠠᠵᠠᠷ ᠢ᠋ ᠮᠥᠷᠳᠡᠨ ᠶᠠᠪᠤᠪᠠ᠃ ᠲᠡᠭᠦᠨ ᠡᠴᠡ ᠨᠢᠭᠡ ᠬᠡᠳᠦᠨ ᠴᠠᠭ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ ᠲᠡᠷᠲᠡᠭᠡ ᠬᠠᠷᠠᠭᠳᠠᠵᠤ ᠪᠠᠢᠭᠰᠠᠨ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ ᠳ᠋ᠤ᠌ ᠬᠦᠷᠦᠭᠰᠡᠨ ᠪᠥᠭᠡᠳ ᠥᠨᠥᠬᠢ ᠶᠡᠬᠡ ᠮᠥᠷᠡᠨ ᠢ᠋ ᠤᠰᠤᠨ ᠤ᠋ ᠭᠦᠨ ᠳ᠋ᠦ᠍ ᠠᠷᠠᠢᠬᠠᠨ ᠭᠠᠷᠴᠤ ᠮᠥᠨ ᠠᠭᠤᠯᠠ ᠶ᠋ᠢᠨ ᠨᠢᠭᠡ ᠠᠮᠠ ᠶ᠋ᠢ ᠥᠭᠰᠥᠬᠦ ᠳ᠋ᠦ᠍ ᠣᠢ ᠮᠣᠳᠣ ᠦᠷᠭᠦᠯᠵᠢᠯᠡᠭᠰᠡᠨ ᠰᠢᠪᠡᠷ ᠨᠠᠮᠤᠭ ᠦᠯᠡᠮᠵᠢ᠂ ᠨᠢᠭᠡᠬᠡᠨ ᠴᠤ ᠵᠠᠮ ᠮᠥᠷ ᠦᠭᠡᠢ᠂ ᠬᠠᠶᠠ ᠨᠢᠭᠡ ᠬᠠᠷᠠ ᠬᠡᠷᠢᠶᠡ ᠦᠵᠡᠭᠳᠡᠬᠦ ᠡᠴᠡ ᠥᠭᠡᠷᠡ ᠠᠮᠢᠲᠠᠨ ᠦᠯᠦ ᠲᠣᠬᠢᠶᠠᠯᠳᠤᠨᠠ᠃
ᠨᠠᠷᠠ ᠨᠢᠭᠡᠨᠲᠡ ᠰᠢᠩᠭᠡᠵᠦ ᠪᠦᠷᠦᠢ ᠪᠣᠯᠤᠭᠰᠠᠨ ᠲᠤᠯᠠ ᠴᠢᠯᠠᠭᠤᠨ ᠤ᠋ ᠪᠠᠢᠳᠠᠯ ᠢ᠋ ᠰᠢᠨᠵᠢᠯᠡᠵᠦ ᠬᠠᠷᠠᠬᠤ ᠪᠠᠨ ᠴᠤ ᠪᠣᠯᠢᠪᠠ᠃ ᠶᠡᠷᠦ ᠳ᠋ᠡᠭᠡᠨ ᠠᠯᠢᠪᠠ ᠴᠢᠯᠠᠭᠤ᠂ ᠳᠡᠭᠡᠷᠡ ᠡᠴᠡ ᠥᠩᠬᠥᠷᠢᠨ ᠪᠠᠭᠤᠳᠠᠭ ᠵᠢᠮᠡ ᠲᠡᠢ ᠲᠤᠯᠠ ᠳᠡᠮᠡᠢ ᠯᠡ ᠥᠭᠰᠥᠨ ᠶᠠᠪᠤᠪᠠ᠃ ᠭᠦᠨ ᠣᠢ ᠶ᠋ᠢᠨ ᠳᠤᠮᠳᠠ ᠨᠢᠭᠡᠨᠲᠡ ᠯᠠᠪ ᠣᠷᠣᠵᠠᠢ᠃ ᠡᠳᠦᠷ ᠦ᠋ᠨ ᠪᠦᠷᠬᠦᠵᠦ ᠪᠠᠢᠭᠰᠠᠨ ᠪᠣᠷᠣᠭᠠᠨ ᠰᠠᠶᠢ ᠠᠰᠬᠠᠷᠠᠨ ᠣᠷᠣᠪᠠ᠃ ᠰᠡᠷᠢᠭᠦᠨ ᠰᠠᠯᠬᠢᠨ ᠳ᠋ᠤ᠌ ᠮᠣᠳᠣᠨ ᠤ᠋ ᠮᠥᠴᠢᠷ ᠭᠤᠢᠪᠢᠯᠵᠠᠨ ᠱᠤᠤᠭᠢᠵᠤ᠂ ᠠᠶᠤᠩᠭᠠ ᠶ᠋ᠢᠨ ᠳᠠᠭᠤ ᠰᠦᠷ ᠲᠡᠢ ᠬᠦᠷᠴᠢᠭᠢᠨᠡᠨᠡ᠃ ᠠᠯᠬᠤᠬᠤ ᠳᠣᠳᠣᠮ ᠰᠢᠪᠠᠷ ᠨᠠᠮᠤᠭ ᠪᠣᠯᠣᠳ ᠭᠣᠣ ᠵᠢᠯᠠᠭᠠ ᠲᠣᠬᠢᠶᠠᠯᠳᠤᠨᠠ᠃ ᠡᠨᠳᠡ ᠲᠡᠨᠳᠡ ᠴᠢᠨᠣᠠ ᠣᠯᠢᠬᠤ᠂ ᠪᠠᠰᠠ ᠯᠠ ᠳᠡᠰ ᠨᠢᠰ ᠭᠡᠬᠦ ᠴᠢᠮᠡᠭᠡ ᠭᠠᠷᠬᠤ ᠨᠢ ᠠᠶᠤᠮᠰᠢᠭ ᠲᠠᠢ᠂ ᠳᠠᠷᠤᠢ ᠪᠣᠰᠴᠤ ᠵᠢᠷᠦᠬᠡ ᠳᠣᠭᠳᠣᠯᠤᠨ ᠰᠡᠳᠬᠢᠯ ᠶᠠᠭᠠᠷᠠᠨᠠ᠂ ᠪᠡᠶᠡ ᠵᠠᠷᠠᠢᠨᠠ᠃ ᠡᠳᠦᠷ ᠳᠥᠷᠪᠡᠨ ᠵᠦᠭ ᠦ᠋ᠨ ᠠᠯᠢᠨ ᠲᠡᠢᠰᠢ ᠶᠠᠪᠤᠬᠤ ᠶ᠋ᠢ ᠭᠠᠢᠬᠠᠵᠤ ᠪᠠᠢᠭᠰᠠᠨ ᠨᠢ ᠣᠳᠣ ᠳᠥᠷᠪᠡᠨ ᠵᠦᠭ ᠨᠢ ᠬᠠᠮᠢᠭᠠᠰᠢ ᠪᠠᠨ ᠪᠣᠯᠬᠤ ᠶ᠋ᠢ ᠨᠢᠭᠡᠨᠲᠡ ᠠᠯᠳᠠᠵᠠᠢ᠃
ᠵᠣᠷᠢᠭᠰᠠᠨ ᠬᠡᠷᠡᠭ ᠪᠠ ᠰᠢᠨᠵᠢᠯᠡᠬᠦ ᠶᠠᠪᠤᠳᠠᠯ ᠢ᠋ ᠬᠡᠳᠦᠢᠨ ᠮᠠᠷᠲᠠᠵᠤ᠂ ᠭᠠᠭᠴᠠ ᠬᠦ᠌ ᠠᠮᠢ ᠪᠠᠨ ᠬᠠᠮᠠᠭᠠᠯᠠᠵᠤ ᠶᠠᠪᠤᠬᠤ ᠶ᠋ᠢ ᠤᠷᠢᠳᠠᠯ ᠪᠣᠯᠭᠠᠪᠠ᠃
ᠤᠭ ᠠ᠋ᠴᠠ ᠰᠢᠯᠭᠠᠳᠠᠭ ᠤᠬᠠᠭᠠᠨ ᠢ᠋ ᠰᠢᠲᠦᠵᠦ ᠪᠣᠯᠪᠠᠰᠤᠷᠠᠩᠭᠤᠢ ᠪᠠᠷ ᠬᠥᠮᠦᠵᠢᠭᠰᠡᠨ ᠪᠣᠯᠪᠠᠴᠤ ᠪᠤᠭ ᠴᠢᠳᠬᠥᠷ ᠭᠡᠳᠡᠭ ᠳᠡᠮᠡᠢ ᠶᠠᠭᠤᠮᠠ ᠰᠠᠨᠠᠭᠳᠠᠵᠤ᠂ ᠡᠷᠯᠢᠭ ᠲᠠᠮᠤ ᠶ᠋ᠢᠨ ᠣᠷᠣᠨ ᠭᠡᠳᠡᠭ ᠬᠤᠳᠠᠯ ᠶᠠᠭᠤᠮᠠ ᠪᠣᠳᠣᠭᠳᠠᠨᠠ᠃ ᠲᠡᠭᠦᠨ ᠡᠴᠡ ᠪᠣᠷᠣᠭᠠᠨ ᠤᠯᠠᠮ ᠰᠢᠷᠦᠭᠦᠰᠴᠦ ᠳᠠᠭᠤ ᠪᠠ ᠴᠠᠬᠢᠯᠭᠠᠨ ᠦᠷᠭᠦᠯᠵᠢᠯᠡᠨᠡ᠃ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠤᠯᠠᠮ ᠪᠡᠷᠬᠡ ᠲᠡᠢ ᠪᠣᠯᠵᠤ ᠠᠶᠤᠬᠤ ᠴᠣᠴᠢᠬᠤ ᠨᠢ ᠨᠡᠩ ᠣᠯᠠᠰᠢᠷᠠᠪᠠ᠃ ᠤᠷᠤᠭᠰᠢ ᠶᠠᠪᠤᠶᠠ ᠭᠡᠪᠡᠯ ᠡᠮᠦᠨᠡ ᠡᠲᠡᠭᠡᠳ ᠦ᠋ᠨ ᠪᠠᠷᠲᠠᠭᠠ ᠬᠠᠪᠢᠳᠠᠬᠤ ᠠᠷᠭᠠ ᠦᠭᠡᠢ ᠭᠡᠳᠡᠷᠭᠦ ᠪᠤᠴᠠᠶᠠ ᠭᠡᠪᠡᠯ ᠵᠠᠮ ᠠ᠋ᠴᠠ ᠨᠢᠭᠡᠨᠲᠡ ᠲᠥᠭᠡᠷᠢᠵᠡᠢ᠃ ᠳᠥᠷᠪᠡᠨ ᠵᠦᠭ ᠲᠤᠷᠰᠢᠪᠠᠴᠤ᠂ ᠬᠠᠳᠠ ᠠᠰᠬᠠ ᠬᠠᠷᠠᠩᠭᠤᠢᠯᠠᠨ ᠬᠠᠰᠢᠵᠤ᠂ ᠬᠢᠷᠳ᠋ᠬᠢᠯᠭᠡᠬᠦ ᠡᠴᠡ ᠥᠭᠡᠷᠡ ᠦᠭᠡᠢ᠃ ᠬᠡᠳᠦᠢ ᠪᠡᠷ《ᠬᠠᠷᠠᠩᠭᠤᠢ ᠬᠠᠳᠠ》 ᠭᠡᠳᠡᠭ ᠨᠡᠷᠡ ᠨᠢ ᠡᠨᠡ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠲᠠᠢ ᠨᠡᠢᠯᠡᠯᠴᠡᠨ ᠰᠠᠨᠠᠭᠳᠠᠬᠤ ᠪᠣᠯᠪᠠᠴᠤ ᠡᠢᠮᠦ ᠣᠷᠣᠨ ᠳ᠋ᠤ᠌ ᠨᠢᠨᠠ ᠶᠠᠭᠠᠬᠢᠵᠤ ᠣᠷᠣᠰᠢᠬᠤ ᠪᠣᠢ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠳᠠᠷᠤᠢ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ ᠰᠠᠭᠤᠨ᠂ ᠲᠦᠮᠡᠨᠲᠡ ᠴᠣᠴᠢᠵᠤ ᠮᠢᠩᠭᠠᠨᠲᠠ ᠬᠢᠷᠳ᠋ᠬᠢᠨ ᠬᠡᠵᠢᠶᠡ ᠨᠠᠷᠠ ᠮᠠᠨᠳᠤᠬᠤ ᠶ᠋ᠢ ᠬᠦᠯᠢᠶᠡᠨᠡ᠃ ᠭᠡᠲᠡᠯᠡ ᠮᠣᠷᠢ ᠨᠢᠭᠡᠨᠲᠡ ᠦᠷᠭᠦᠨ᠂ ᠬᠠᠷᠠᠩᠭᠤᠢ ᠬᠠᠳᠠ ᠶ᠋ᠢᠨ ᠳᠤᠮᠳᠠ ᠬᠠᠩᠭᠢᠨᠠᠲᠠᠯᠠ ᠢᠨᠴᠠᠭᠠᠬᠤ ᠳᠠᠭᠤ ᠶᠠᠰᠤᠨ ᠳ᠋ᠤ᠌ ᠲᠤᠯᠲᠠᠯᠠ ᠵᠢᠬᠡᠭᠦᠴᠡᠭᠦᠯᠬᠦ ᠳ᠋ᠦ᠍ ᠨᠢᠭᠡ ᠠᠮᠢᠲᠠᠨ ᠪᠥᠷᠲᠥᠯᠵᠡᠨ ᠦᠵᠡᠭᠳᠡᠵᠦ᠂ ᠳᠠᠷᠤᠢ ᠭᠦᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠳᠠᠯᠳᠠ ᠣᠷᠣᠪᠠ᠃ ᠲᠡᠷᠡ ᠠᠮᠢᠲᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠪᠢ ᠵᠢᠭᠠᠬᠠᠨ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠳᠠᠬᠢᠨ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ᠃ ᠲᠡᠷᠡᠴᠢᠯᠡᠨ ᠣᠷᠴᠢᠯᠠᠩ ᠤ᠋ᠨ ᠲᠦᠮᠡᠨ ᠠᠮᠢᠲᠠᠨ ᠤ᠋ ᠳᠤᠮᠳᠠ ᠳᠠᠯᠳᠠ ᠣᠷᠣᠭᠰᠠᠨ ᠬᠠᠢᠷᠠᠲᠤ ᠨᠢᠨᠠ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ ᠵᠤᠷᠠᠰᠬᠢᠵᠤ ᠦᠵᠡᠭᠳᠡᠪᠡᠴᠦ᠂ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢ ᠳᠠᠬᠢᠨ ᠣᠯᠵᠤ ᠠᠭᠤᠯᠵᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯᠪᠠᠤ?
1930 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ᠳ·ᠢᠳᠰᠢᠩᠬᠣᠷᠯᠣ᠂ ᠪᠠᠶᠠᠨᠴᠡᠴᠡᠭ᠂ ᠭᠦᠨᠳᠦᠰᠠᠩᠪᠦ᠂ ᠨᠠᠷᠠᠨᠲᠤᠶᠠᠭᠠ ᠂ ᠪᠠᠶᠠᠨᠰᠡᠷᠡᠩ᠂ ᠡᠷᠳᠡᠨᠢᠭᠣᠤᠠ᠂
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ