《ᠬᠥᠬᠥᠭᠡ》ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ-ᠮᠣᠩᠭᠣᠯ ᠲᠤᠭᠤᠷᠭᠠᠲᠠᠨFM-107“Хөхөө”Монгол ардын үлгэр-монгол туургатан
365《ᠬᠥᠬᠥᠭᠡ》ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ
ᠮᠣᠩᠭᠣᠯ ᠲᠤᠭᠤᠷᠭᠠᠲᠠᠨ ᠤ᠋ ᠷᠠᠳᠢᠣ᠋ ᠰᠢᠨᠵᠢᠯᠡᠭᠡ fm ᠵᠠᠭᠤᠨ ᠳᠣᠯᠣᠭᠠ ᠠᠷᠪᠠᠨ ᠤ᠋ ᠲᠠᠪᠤ ᠶ᠋ᠢᠨ ᠦᠯᠢᠭᠡᠷ ᠦ᠋ᠨ ᠴᠠᠭ᠂
ᠰᠠᠢᠨ ᠪᠠᠢᠵᠠᠭᠠᠨᠠ ᠤᠤ?
ᠡᠷᠬᠢᠮ ᠬᠦᠨᠳᠦᠲᠡᠢ ᠬᠡᠦᠬᠡᠳ ᠪᠠᠭᠠᠴᠤᠳ ᠠ᠋᠂ ᠲᠠ ᠪᠦᠬᠦᠨ ᠳ᠋ᠦ᠍ ᠪᠡᠨ ᠮᠣᠩᠭᠣᠯ ᠲᠤᠭᠤᠷᠭᠠᠲᠠᠨ ᠤ᠋ ᠷᠠᠳᠢᠣ᠋ ᠰᠢᠨᠵᠢᠯᠡᠭᠡ fm ᠵᠠᠭᠤᠨ ᠳᠣᠯᠣᠭᠠ ᠠᠷᠪᠠᠨ ᠤ᠋ ᠲᠠᠪᠤ ᠠ᠋ᠴᠠ ᠬᠦᠷᠭᠡᠳᠡᠭ ᠦᠯᠢᠭᠡᠷ ᠦ᠋ᠨ ᠴᠠᠭ ᠬᠦᠷᠭᠡᠵᠦ ᠪᠠᠢᠨᠠ᠃ ᠢᠩᠭᠢᠭᠡᠳ ᠡᠨᠡ ᠤᠳᠠᠭᠠᠨ ᠤ᠋ ᠨᠡᠪᠲᠡᠷᠡᠭᠦᠯᠭᠡ ᠪᠡᠷ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠠ ᠪᠦᠬᠦᠨ ᠳ᠋ᠦ᠍ ᠪᠡᠨ ᠵᠣᠷᠢᠭᠤᠯᠤᠨ᠂《ᠬᠥᠬᠥᠭᠡ》ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ ᠢ᠋ ᠰᠣᠨᠣᠷᠳᠠᠭᠤᠯᠬᠤ ᠭᠡᠵᠦ ᠪᠠᠢᠨᠠ! ᠲᠠ ᠪᠦᠬᠦᠨ ᠬᠦᠯᠢᠶᠡᠨ ᠠᠪᠤᠨᠠ ᠤᠤ!
ᠬᠥᠬᠥᠭᠡ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ ᠨᠢᠭᠡᠨ ᠶᠠᠳᠠᠭᠤ ᠡᠬᠡ ᠳᠥᠷᠪᠡᠨ ᠬᠦᠦ ᠶ᠋ᠢᠨ ᠬᠠᠮᠲᠤ ᠠᠮᠢᠳᠤᠷᠠᠳᠠᠭ ᠪᠠᠢᠵᠠᠢ᠃ ᠬᠡᠦᠬᠡᠳ ᠦ᠋ᠳ ᠨᠢ ᠦᠦᠷ ᠦ᠋ᠨ ᠭᠡᠭᠡᠨ ᠡᠴᠡ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠣᠯᠲᠠᠯᠠ ᠲᠣᠭᠯᠠᠵᠤ᠂ ᠡᠵᠢ ᠨᠢ ᠲᠡᠳᠡᠨ ᠦ᠌ ᠪᠡᠨ ᠬᠣᠭᠣᠯᠠ ᠴᠠᠢ ᠶ᠋ᠢ ᠪᠡᠯᠡᠳᠬᠡᠨ᠂ ᠭᠡᠷ ᠣᠷᠣᠨ ᠤ᠋ ᠪᠠᠨ ᠠᠵᠢᠯ ᠢ᠋ ᠪᠣᠷᠪᠢ ᠪᠣᠬᠢᠰᠬᠢᠯ ᠦᠭᠡᠢ ᠠᠮᠵᠢᠭᠤᠯᠳᠠᠭ ᠶᠤᠮ ᠭᠡᠨᠡ᠃ ᠤᠷᠠᠩᠬᠠᠢ ᠴᠤᠭᠤᠷᠬᠠᠢ ᠶ᠋ᠢ ᠨᠢ ᠣᠶᠣᠵᠤ᠂ ᠬᠠᠳᠬᠤᠬᠤ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠴᠠᠰᠤᠨ ᠬᠤᠩᠭᠠᠷ ᠲᠤ ᠣᠷᠬᠢᠭᠰᠠᠨ ᠭᠤᠲᠤᠯ ᠬᠤᠪᠴᠠᠰᠤ ᠶ᠋ᠢ ᠨᠢ ᠴᠤᠭᠯᠠᠭᠤᠯᠵᠤ ᠤᠷᠭᠤᠬᠤ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠᠨ ᠬᠦᠷᠲᠡᠯᠡ ᠲᠦᠮᠡᠨ ᠵᠠᠪ ᠦᠭᠡᠢ ᠵᠢᠳᠬᠦᠳᠡᠭ ᠶᠦᠮ ᠰᠠᠨᠵᠢ᠃ ᠶᠡᠬᠡ ᠠᠵᠢᠯ ᠳ᠋ᠤ᠌ ᠪᠠᠨ ᠳᠠᠷᠤᠭᠳᠠᠭᠰᠠᠨ ᠡᠵᠢ ᠨᠢ ᠬᠠᠶᠠ ᠬᠡᠦᠬᠡᠳ ᠦ᠋ᠳ ᠲᠦ᠍ ᠪᠡᠨ ᠲᠤᠰᠠᠯᠠᠬᠤ ᠶ᠋ᠢ ᠭᠤᠶᠤᠬᠤ ᠪᠣᠯᠪᠠᠴᠤ ᠲᠡᠳᠡ᠄ ᠶᠠᠳᠠᠷᠠᠭᠠᠳ ᠪᠠᠢᠨᠠ᠂ ᠵᠠᠯᠬᠠᠭᠤ ᠬᠦᠷᠦᠭᠡᠳ ᠪᠠᠢᠨᠠ ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠴᠤ᠌ ᠬᠡᠯᠡᠳᠡᠭ ᠦᠭᠡᠢ ᠪᠠᠢᠯᠠ᠃ ᠡᠵᠢ ᠨᠢ ᠨᠢᠭᠡ ᠤᠳᠠᠭᠠ ᠮᠠᠰᠢ ᠬᠦᠨᠳᠦ ᠪᠡᠷ ᠡᠪᠡᠳᠴᠦ ᠶᠠᠳᠠᠷᠠᠵᠤ ᠲᠤᠢᠯᠳᠠᠭᠰᠠᠨ ᠬᠥᠭᠡᠷᠦᠬᠦᠢ ᠡᠬᠡ ᠭᠡᠷ ᠡᠴᠡ ᠪᠡᠨ ᠴᠦ᠍ ᠭᠠᠷᠴᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠵᠠᠢ᠃ ᠥᠯᠥᠰᠴᠦ ᠴᠠᠩᠭᠠᠬᠤ ᠶ᠋ᠢᠨ ᠲᠤᠢᠯ ᠪᠣᠯᠤᠭᠰᠠᠨ ᠴᠤ᠌ ᠬᠡᠦᠬᠡᠳ ᠨᠢ ᠶᠡᠷᠦ ᠲᠣᠭᠣᠭᠰᠠᠨ ᠦᠭᠡᠢ ᠭᠡᠨᠡ᠃ ᠲᠡᠭᠡᠭᠡᠳ ᠡᠬᠡ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠳᠠᠭᠤᠳᠠᠭᠠᠳ᠄ ᠬᠣᠩᠭᠣᠷᠬᠠᠨ ᠦᠷᠡᠰ ᠮᠢᠨᠢ ᠠᠶᠠᠭᠠ ᠤᠰᠤ ᠠᠪᠴᠢᠷᠠᠵᠤ᠂ ᠠᠷᠭᠠᠭᠰᠠᠨ ᠬᠣᠭᠣᠯᠠᠢ ᠶ᠋ᠢ ᠮᠢᠨᠢ ᠳᠡᠪᠲᠦᠭᠡᠭᠡᠴᠢ᠂ ᠠᠩᠭᠢᠷ ᠤᠭᠤᠷᠠᠭ ᠢ᠋ᠶ᠋ᠠᠨ ᠬᠥᠬᠥᠭᠦᠯᠦᠭᠰᠡᠨ ᠠᠴᠢ ᠶ᠋ᠢ ᠮᠢᠨᠢ ᠰᠠᠨᠠᠨ ᠲᠤᠰᠠᠯᠠᠭᠠᠴᠢ ᠳᠠ᠃ ᠬᠣᠭᠣᠯᠠᠢ ᠮᠢᠨᠢ ᠬᠠᠲᠠᠵᠤ᠂ ᠬᠥᠯ ᠮᠢᠨᠢ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠮᠡᠨ ᠤᠬᠢᠯᠠᠨ ᠬᠠᠢᠯᠠᠨ ᠭᠤᠶᠤᠵᠠᠢ᠃ ᠡᠬᠡ ᠨᠢ ᠣᠯᠠᠨ ᠭᠤᠶᠤᠭᠰᠠᠨ ᠪᠣᠯᠪᠠᠴᠤ᠂ ᠬᠡᠦᠬᠡᠳ ᠦ᠋ᠳ ᠨᠢ ᠤᠰᠤᠨ ᠳ᠋ᠤ᠌ ᠶᠠᠪᠤᠵᠤ ᠥᠭᠭᠦᠭᠰᠡᠨ ᠦᠭᠡᠢ᠃ ᠬᠠᠮᠤᠭ ᠤ᠋ᠨ ᠲᠣᠮᠣ ᠬᠦᠦ ᠨᠢ᠄ ᠨᠠᠳᠠ ᠳ᠋ᠤ᠌ ᠭᠤᠲᠤᠯ ᠪᠠᠢᠬᠤ ᠦᠭᠡᠢ᠂ ᠬᠠᠷᠢᠨ ᠤᠳᠠᠭᠠᠬᠢ ᠬᠦᠦ ᠨᠢ᠄ ᠪᠢ ᠮᠠᠯᠠᠭᠠᠢ ᠦᠭᠡᠢ᠂ ᠭᠤᠷᠪᠠᠳᠠᠬᠢ ᠬᠦᠦ ᠨᠢ᠄ ᠨᠠᠳᠠ ᠳ᠋ᠤ᠌ ᠳᠡᠪᠡᠯ ᠪᠠᠢᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍᠂ ᠬᠠᠮᠤᠭ ᠤ᠋ᠨ ᠪᠠᠭᠠ ᠬᠦᠦ ᠨᠢ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ᠃ ᠡᠪᠡᠳᠴᠢᠨ ᠳ᠋ᠦ᠍ ᠪᠡᠨ ᠰᠢᠨᠠᠯᠤᠭᠰᠠᠨ ᠡᠬᠡ ᠨᠢ᠄ ᠡᠪᠡᠳᠴᠦ ᠵᠣᠪᠠᠭᠰᠠᠨ ᠡᠬᠡ ᠶ᠋ᠢ ᠪᠡᠨ ᠦᠷᠦ ᠡᠪᠡᠳᠴᠦ ᠲᠠ ᠨᠠᠷ ᠬᠠᠢᠷᠠᠯᠠᠭᠠᠴᠢ ᠳᠠ᠂ ᠭᠤᠲᠤᠯ ᠮᠠᠯᠠᠭᠠᠢ ᠪᠠᠢᠬᠤ ᠦᠭᠡᠢ ᠴᠤ᠌ ᠭᠡᠰᠡᠨ ᠭᠤᠶᠤᠭᠰᠠᠨ ᠢ᠋ ᠮᠢᠨᠢ ᠠᠪᠴᠢᠷᠠᠵᠤ ᠥᠭᠭᠦᠭᠡᠴᠢ᠂ ᠭᠣᠣᠯ ᠣᠢᠷᠠᠬᠠᠨ ᠪᠠᠢᠨᠠ ᠰᠢᠦ ᠳᠡ᠂ ᠬᠡᠦᠬᠡᠳ ᠦ᠋ᠳ ᠮᠢᠨᠢ ᠭᠡᠵᠦ ᠠᠷᠭᠠᠳᠠᠪᠠᠴᠤ᠂ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠬᠡᠨ ᠨᠢ ᠴᠦ᠍ ᠲᠤᠰᠠᠯᠠᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠪᠠᠢᠯᠠ᠂ ᠲᠡᠭᠡᠭᠡᠳ ᠲᠡᠳᠡ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠷᠪᠡᠭᠳᠡᠭᠰᠡᠨ ᠡᠬᠡ ᠶ᠋ᠢ ᠪᠡᠨ ᠥᠯ ᠬᠣᠭᠣᠰᠣᠨ ᠣᠷᠬᠢᠭᠠᠳ ᠴᠠᠰᠤᠨ ᠳᠡᠭᠡᠷᠡ ᠭᠤᠯᠭᠤᠵᠤ ᠲᠣᠭᠯᠠᠬᠤ ᠪᠠᠷ ᠢᠨᠢᠶᠡᠵᠦ ᠱᠤᠤᠭᠢᠨ ᠭᠠᠷᠴᠤ ᠣᠳᠪᠠ᠃ ᠡᠳᠦᠷᠵᠢᠨ ᠲᠣᠭᠯᠠᠭᠰᠠᠭᠠᠷ ᠶᠠᠳᠠᠷᠠᠵᠤ᠂ ᠥᠯᠥᠰᠦᠭᠰᠡᠨ ᠲᠣᠮᠣ ᠬᠦᠦ ᠣᠷᠣᠢ ᠪᠣᠯᠬᠤ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠭᠡᠨᠡᠳᠲᠡ ᠡᠵᠢ ᠶ᠋ᠢ ᠪᠡᠨ ᠰᠠᠨᠠᠨ ᠬᠣᠭᠣᠯᠠ ᠤᠮᠳᠠ ᠨᠡᠬᠡᠬᠦ ᠪᠡᠷ ᠭᠡᠷ ᠲᠦ᠍ ᠪᠡᠨ ᠢᠷᠡᠯᠡ᠂ ᠨᠠᠪᠰᠠᠢᠵᠤ ᠨᠣᠣᠷᠠᠭᠰᠠᠨ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠲᠠᠪᠴᠢ ᠪᠠᠷ ᠱᠠᠭᠠᠢᠨ ᠬᠠᠷᠠᠪᠠᠯ ᠨᠠᠷᠠᠨ ᠠᠳᠠᠯᠢ ᠬᠡᠷᠡᠯᠳᠦᠳᠡᠭ ᠡᠬᠡ ᠶ᠋ᠢᠨ ᠴᠢᠷᠠᠢ ᠵᠣᠪᠠᠯᠠᠩ ᠭᠤᠨᠢᠭ ᠢ᠋ᠶ᠋ᠠᠷ ᠳᠦᠭᠦᠷᠴᠦ᠂ ᠤᠷᠲᠤ ᠰᠠᠢᠬᠠᠨ ᠦᠰᠦ ᠪᠡᠨ ᠰᠤᠯᠠ ᠲᠠᠯᠪᠢᠨ ᠬᠣᠢᠮᠣᠷ ᠤ᠋ᠨ ᠠᠪᠳᠠᠷᠠ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠪᠤᠭᠤ ᠶ᠋ᠢᠨ ᠠᠷᠠᠰᠤᠨ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠴᠢᠬᠡᠭᠰᠡᠨ ᠵᠣᠭᠰᠣᠯᠠ᠃ ᠬᠦᠦ ᠶ᠋ᠢ ᠬᠠᠷᠠᠭᠰᠠᠭᠠᠷ ᠪᠠᠢᠲᠠᠯᠠ ᠡᠵᠢ ᠶ᠋ᠢᠨ ᠬᠢᠨᠢ ᠳᠡᠪᠡᠯ ᠥᠳᠥ ᠪᠡᠷ ᠪᠦᠷᠬᠦᠭᠳᠡᠵᠦ᠂ ᠬᠠᠪᠲᠠᠭᠠᠢ ᠮᠣᠳᠣ ᠪᠠᠷ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠠᠷᠠᠰᠤ ᠶ᠋ᠢ ᠬᠤᠰᠤᠬᠤ ᠳ᠋ᠤ᠌ ᠰᠢᠪᠠᠭᠤᠨ ᠰᠡᠭᠦᠯ ᠲᠡᠢ ᠪᠣᠯᠴᠢᠬᠠᠯᠠ᠃ ᠪᠠᠰᠠ ᠲᠡᠮᠦᠷ ᠬᠣᠰᠢᠭᠤ ᠲᠠᠢ ᠪᠣᠯᠵᠤ᠂ ᠬᠣᠶᠠᠷ ᠭᠠᠷ ᠤ᠋ᠨ ᠬᠢᠨᠢ ᠣᠷᠣᠨ ᠳ᠋ᠤ᠌ ᠳᠠᠯᠠᠪᠴᠢ ᠤᠷᠭᠤᠭᠰᠠᠨ ᠪᠠᠢᠪᠠ᠃ ᠲᠡᠷᠡ ᠳᠠᠷᠤᠢ ᠡᠬᠡ ᠨᠢ ᠰᠢᠪᠠᠭᠤ ᠪᠣᠯᠵᠤ ᠬᠤᠪᠢᠷᠠᠭᠠᠳ ᠭᠡᠷ ᠦ᠋ᠨ ᠲᠣᠭᠣᠨᠣ ᠪᠠᠷ ᠨᠢᠰᠦᠨ ᠭᠠᠷᠤᠯᠠ᠃
ᠳᠡᠭᠦᠦ ᠨᠠᠷ ᠮᠢᠨᠢ ᠠ᠋᠄ ᠮᠠᠨ ᠤ᠋ ᠡᠵᠢ ᠰᠢᠪᠠᠭᠤ ᠪᠣᠯᠤᠭᠠᠳ ᠨᠢᠰᠴᠢᠬᠡᠯᠡ᠂ ᠡᠨᠡᠷᠢᠯ ᠬᠠᠢᠷᠠ ᠶ᠋ᠢ ᠨᠢ ᠠᠩᠵᠠᠭᠠᠷᠠᠭᠠ ᠦᠭᠡᠢ ᠠᠬᠠ ᠳᠡᠭᠦᠦ ᠪᠢᠳᠡᠨ ᠳ᠋ᠦ᠍ ᠭᠣᠮᠣᠳᠠᠭᠰᠠᠨ ᠪᠠᠢᠨᠠ ᠭᠡᠮᠡᠨ ᠲᠣᠮᠣ ᠠᠬᠠ ᠨᠢ ᠬᠠᠰᠬᠢᠷᠤᠯᠠ᠃ ᠬᠡᠦᠬᠡᠳ ᠦ᠋ᠳ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠤᠨᠠᠨ ᠲᠣᠰᠣᠨ ᠭᠦᠶᠦᠯᠳᠦᠵᠦ᠄ ᠡᠵᠢ ᠠ᠋ ᠪᠢᠳᠡ ᠲᠠᠨ ᠳ᠋ᠤ᠌ ᠤᠰᠤ ᠠᠪᠴᠢᠷᠠᠯᠠ ᠠᠷᠭᠠᠭᠰᠠᠨ ᠬᠣᠭᠣᠯᠠᠢ ᠶ᠋ᠢ ᠲᠠᠨᠢ ᠴᠢᠭᠢᠭᠯᠡᠵᠦ ᠠᠶᠤᠯᠲᠤ ᠡᠪᠡᠳᠴᠢᠨ ᠢ᠋ ᠠᠨᠠᠭᠠᠬᠤ ᠬᠦᠢᠲᠡᠨ ᠤᠰᠤ ᠶ᠋ᠢ ᠭᠠᠭᠴᠠᠬᠠᠨ ᠲᠠᠨ ᠳ᠋ᠤ᠌ ᠪᠠᠨ ᠠᠪᠴᠢᠷᠠᠯᠠ ᠭᠡᠮᠡᠨ ᠬᠠᠰᠬᠢᠷᠴᠠᠭᠠᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠡᠬᠡ ᠨᠢ ᠬᠠᠷᠢᠭᠤ ᠳ᠋ᠤ᠌ ᠨᠢ᠄ ᠬᠦ ᠬᠦ ᠣᠷᠣᠢᠲᠠᠵᠠᠢ᠂ ᠮᠢᠨᠦ ᠡᠮᠦᠨᠡ ᠨᠠᠭᠤᠷ ᠤ᠋ᠨ ᠬᠥᠬᠡ ᠤᠰᠤ ᠮᠡᠯᠲᠡᠢᠵᠦ᠂ ᠨᠣᠭᠣᠭᠠᠬᠠᠨ ᠣᠢ ᠨᠢ ᠳᠤᠯᠠᠭᠠᠬᠠᠨ ᠮᠣᠳᠣᠳ ᠨᠠᠢᠭᠤᠨ ᠪᠠᠢᠨᠠ᠂ ᠦᠷᠡ ᠬᠡᠦᠬᠡᠳ ᠲᠡᠢ ᠪᠠᠢᠬᠤ ᠶ᠋ᠢᠨ ᠵᠢᠷᠭᠠᠯ ᠢ᠋ ᠠᠮᠰᠠᠵᠤ ᠦᠵᠡᠭᠡ ᠦᠭᠡᠢ ᠪᠢ ᠳᠠᠬᠢᠵᠤ ᠬᠡᠵᠢᠶᠡ ᠴᠦ᠍ ᠬᠡᠦᠬᠡᠳ ᠥᠰᠬᠡᠬᠦ ᠦᠭᠡᠢ᠃ ᠭᠡᠵᠦ ᠬᠡᠯᠡᠭᠡᠳ ᠭᠦᠨ ᠬᠥᠬᠡ ᠲᠩᠷᠢ ᠳ᠋ᠦ᠍ ᠳᠡᠭᠦᠯᠢᠨ ᠨᠢᠰᠦᠯᠡ᠃ ᠬᠡᠦᠬᠡᠳ ᠦ᠋ᠳ ᠨᠢ ᠰᠠᠪᠠ ᠲᠠᠢ ᠤᠰᠤ ᠪᠠᠨ ᠪᠠᠷᠢᠨ ᠬᠤᠷᠳᠤ ᠪᠠᠷ ᠢ᠋ᠶ᠋ᠠᠨ ᠭᠦᠶᠦᠭᠰᠡᠭᠡᠷ ᠪᠠᠢᠯᠠ᠃ ᠪᠠᠭᠠ ᠬᠦᠦ ᠨᠢ᠄ ᠡᠵᠢ ᠠ᠋ ᠲᠠ ᠭᠡᠷ ᠲᠦ᠍ ᠪᠡᠨ ᠪᠤᠴᠠᠭᠠᠳ ᠢᠷᠡᠭᠡᠴᠢ ᠳᠡ᠂ ᠠᠴᠢᠯᠠᠯ ᠬᠠᠢᠷᠠ ᠶ᠋ᠢᠨ ᠲᠠᠨᠢ ᠬᠠᠷᠢᠭᠤ ᠳ᠋ᠤ᠌ ᠠᠮᠰᠠᠭᠰᠠᠨ ᠵᠣᠪᠠᠯᠠᠩ ᠢ᠋ ᠲᠠᠨᠢ ᠨᠢᠮᠭᠡᠯᠡᠶᠡ᠂ ᠤᠤᠭᠤᠬᠤ ᠤᠰᠤ ᠶ᠋ᠢ ᠲᠠᠨᠢ ᠳᠥᠬᠥᠭᠦᠯᠦᠨ᠂ ᠤᠷᠲᠤ ᠭᠡᠷ ᠢ᠋ᠶ᠋ᠡᠨ ᠴᠡᠪᠡᠷᠯᠡᠶᠡ᠂ ᠡᠵᠢ ᠠ᠋ ᠡᠷᠭᠢᠭᠡᠳ ᠢᠷᠡᠭᠡᠴᠢ ᠳᠡ ᠭᠡᠵᠦ ᠲᠠᠭᠤᠲᠠᠯᠠ᠃ ᠡᠬᠡ ᠨᠢ ᠠᠯᠤᠰ ᠠ᠋ᠴᠠ᠄ ᠬᠦ ᠬᠦ ᠬᠦᠦ ᠮᠢᠨᠢ ᠣᠷᠣᠢᠲᠠᠵᠠᠢ᠂ ᠪᠢ ᠪᠤᠴᠠᠵᠤ ᠣᠴᠢᠵᠤ ᠴᠢᠳᠠᠬᠤ ᠦᠭᠡᠢ ᠰᠢᠦ ᠳᠡ ᠭᠡᠭᠰᠡᠭᠡᠷ ᠪᠠᠷᠠ ᠰᠤᠷᠠᠭ ᠦᠭᠡᠢ ᠪᠣᠯᠤᠯᠠ᠃ ᠬᠡᠦᠬᠡᠳ ᠦ᠋ᠳ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠬᠠᠳᠠ ᠴᠢᠯᠠᠭᠤ᠂ ᠤᠰᠤ ᠨᠠᠮᠤᠭ᠂ ᠳᠣᠪᠣ ᠰᠣᠨᠳᠤᠤᠯᠠ ᠶ᠋ᠢ ᠴᠤ᠌ ᠡᠰᠡ ᠠᠩᠵᠠᠭᠠᠷᠠᠨ ᠤᠨᠠᠨ ᠲᠣᠰᠣᠨ ᠣᠯᠠᠨ ᠬᠣᠨᠣᠭ ᠭᠦᠶᠦᠭᠰᠡᠨ ᠡᠴᠡ ᠪᠣᠯᠵᠤ ᠬᠥᠯ ᠨᠢ ᠵᠤᠯᠭᠠᠷᠠᠵᠠᠢ᠃ ᠢᠩᠭᠢᠭᠡᠳ ᠡᠵᠢ ᠨᠢ ᠬᠥᠬᠥᠭᠡ ᠰᠢᠪᠠᠭᠤ ᠪᠣᠯᠤᠨ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠣᠷᠬᠢᠭᠰᠠᠨ ᠶᠤᠮ ᠰᠠᠨᠵᠢ᠃ ᠡᠨᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠬᠥᠬᠥᠭᠡ ᠰᠢᠪᠠᠭᠤ ᠬᠡᠵᠢᠶᠡ ᠴᠦ᠍ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠨᠢᠳᠦᠨ ᠳ᠋ᠦ᠍ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠪᠥᠭᠡᠳ ᠥᠪᠡᠷᠲᠡᠭᠡᠨ ᠡᠭᠦᠷ ᠵᠠᠰᠠᠵᠤ᠂ ᠥᠨᠳᠡᠭᠡ ᠳᠠᠷᠤᠵᠤ ᠠᠩᠭᠠᠬᠠᠢ ᠪᠠᠨ ᠥᠰᠬᠡᠳᠡᠭ ᠦᠭᠡᠢ ᠪᠤᠰᠤᠳ ᠤ᠋ᠨ ᠡᠭᠦᠷ ᠲᠦ᠍ ᠥᠨᠳᠡᠭᠡ ᠪᠡᠨ ᠦᠯᠡᠳᠡᠭᠡᠳᠡᠭ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ ᠯᠡ᠃
ᠡᠷᠬᠢᠮ ᠬᠡᠦᠬᠡᠳ ᠪᠠᠭᠠᠴᠤᠳ ᠠ᠋᠂ ᠲᠠ ᠪᠦᠬᠦᠨ ᠳ᠋ᠦ᠍ ᠪᠡᠨ ᠮᠣᠩᠭᠣᠯ ᠲᠤᠭᠤᠷᠭᠠᠲᠠᠨ ᠷᠠᠳᠢᠣ᠋ ᠰᠢᠨᠵᠢᠯᠡᠭᠡ fm ᠵᠠᠭᠤᠨ ᠳᠣᠯᠣᠭᠠ ᠠᠷᠪᠠᠨ ᠤ᠋ ᠲᠠᠪᠤ ᠠ᠋ᠴᠠ ᠬᠦᠷᠭᠡᠳᠡᠭ ᠦᠯᠢᠭᠡᠷ ᠦ᠋ᠨ ᠴᠠᠭ ᠮᠠᠨᠢ ᠡᠨᠡ ᠤᠳᠠᠭᠠᠨ ᠤ᠋ ᠳ᠋ᠤᠭᠠᠷ ᠲᠤ ᠪᠠᠨ 《ᠬᠥᠬᠥᠭᠡ》 ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ ᠢ᠋ ᠲᠠ ᠪᠦᠬᠦᠨ ᠳ᠋ᠦ᠍ ᠪᠡᠨ ᠵᠣᠷᠢᠭᠤᠯᠤᠨ ᠬᠦᠷᠭᠡᠯᠡ᠃ ᠳᠠᠷᠠᠭᠠ ᠳᠠᠷᠠᠭᠠ ᠶ᠋ᠢᠨ ᠳ᠋ᠦ᠍ᠭᠡᠷ ᠢ᠋ᠶ᠋ᠡᠷ ᠡᠷᠭᠢᠨ ᠠᠭᠤᠯᠵᠠᠬᠤ ᠳ᠋ᠤ᠌ ᠪᠠᠨ ᠲᠦᠷ ᠪᠠᠶᠠᠷᠲᠠᠢ᠃
ᠮᠣᠩᠭᠣᠯ ᠲᠤᠭᠤᠷᠭᠠᠲᠠᠨ ᠤ᠋ ᠷᠠᠳᠢᠣ᠋ ᠰᠢᠨᠵᠢᠯᠡᠭᠡ fm ᠵᠠᠭᠤᠨ ᠳᠠᠯᠠᠨ ᠲᠠᠪᠤ ᠶ᠋ᠢᠨ ᠦᠯᠢᠭᠡᠷ ᠦ᠋ᠨ ᠴᠠᠭ
ᠦᠰᠦᠭ ᠠᠮᠢᠯᠠᠭᠤᠯᠵᠤ᠂ ᠬᠠᠲᠠᠭᠰᠠᠨ ᠨᠢ ᠄ ᠳ᠋ᠠᠰᠢᠨᠢᠮᠠ
ᠦᠰᠦᠭ ᠬᠢᠨᠠᠭᠰᠠᠨ ᠨᠢ᠄ ᠭᠠᠷᠮᠠ᠂ ᠮᠥᠴᠢᠷ