ᠡᠷᠡᠭᠦᠯ- ᠳ· ᠨᠠᠴᠤᠭᠳᠣᠷᠵᠢЭрүүл-Д.Нацагдорж
353 ᠳ· ᠨᠠᠴᠤᠭᠳᠣᠷᠵᠢ
ᠶᠢᠷᠲᠢᠨᠴᠦ ᠶ᠋ᠢᠨ ᠵᠣᠬᠢᠶᠠᠯ ᠪᠠᠢᠭᠠᠯᠢ ᠶ᠋ᠢᠨ ᠪᠦᠲᠦᠭᠡᠯᠲᠡ ᠶᠠᠭᠤᠲᠠᠢ ᠰᠠᠢᠬᠠᠨ
ᠶᠢᠰᠦᠨ ᠥᠩᠭᠡ ᠲᠦᠮᠡᠨ ᠵᠦᠢᠯ ᠪᠣᠳᠠᠰ ᠶᠠᠭᠤᠲᠠᠢ ᠰᠣᠨᠢᠷᠬᠠᠮᠠᠷ᠃
ᠪᠣᠳᠠᠰ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠬᠥᠮᠦᠨ ᠦ᠌ ᠪᠡᠶᠡ ᠶᠠᠭᠤᠲᠠᠢ ᠭᠠᠢᠬᠠᠮᠰᠢᠭ
ᠪᠣᠳᠣᠯ ᠮᠡᠷᠭᠡᠨ᠂ ᠤᠬᠠᠭᠠᠨ᠂ ᠬᠥᠮᠦᠨ ᠶᠠᠭᠤᠲᠠᠢ ᠰᠣᠨᠢᠨ
ᠬᠥᠮᠦᠨ ᠦ᠌ ᠳᠣᠲᠣᠷᠠ ᠪᠠᠶᠠᠰᠬᠤᠯᠠᠩ ᠲᠠᠢ ᠪᠣᠯᠪᠠᠯ ᠶᠠᠭᠤᠲᠠᠢ ᠰᠠᠢᠬᠠᠨ
ᠬᠥᠮᠦᠨ ᠦ᠌ ᠳᠣᠲᠣᠷᠠ ᠵᠣᠪᠠᠯᠠᠩ ᠦᠭᠡᠢ ᠪᠣᠯᠪᠠᠯ ᠶᠠᠭᠤᠲᠠᠢ ᠰᠠᠢᠬᠠᠨ᠃
ᠡᠷᠡᠭᠦᠯ ᠪᠡᠶᠡ ᠳ᠋ᠦ᠍ ᠵᠦᠳᠡᠭᠦᠷᠢ ᠭᠠᠴᠢᠭᠳᠠᠯ ᠦᠭᠡᠢ ᠰᠠᠢᠬᠠᠨ᠃
ᠡᠩᠬᠡ ᠲᠠᠢᠪᠤᠩ ᠵᠢᠷᠭᠠᠯ ᠳ᠋ᠤ᠌ ᠰᠠᠭᠠᠳ ᠦᠭᠡᠢ ᠰᠠᠢᠬᠠᠨ᠃
ᠰᠠᠢᠬᠠᠨ ᠭᠡᠭᠴᠢ ᠡᠪᠡᠳᠴᠢᠨ ᠦᠭᠡᠢ ᠶ᠋ᠢ ᠬᠡᠯᠡᠨᠡ᠃
ᠰᠠᠷᠠᠭᠤᠯ ᠭᠡᠭᠴᠢ ᠨᠠᠷᠠ ᠲᠠᠢ ᠶ᠋ᠢ ᠬᠡᠯᠡᠨᠡ᠃
ᠡᠷᠳᠡᠨᠢᠲᠦ ᠬᠥᠮᠦᠨ ᠦ᠌ ᠪᠡᠶᠡ ᠭᠡᠭᠴᠢ ᠦᠨᠡᠬᠡᠷ ᠰᠠᠢᠬᠠᠨ᠃
ᠡᠨᠡ ᠶᠢᠷᠲᠢᠨᠴᠦ ᠳᠡᠭᠡᠷᠡ ᠲᠡᠭᠦᠨ ᠳ᠋ᠦ᠍ ᠬᠣᠣᠰᠯᠠᠬᠤ ᠭᠡᠭᠴᠢ ᠶᠠᠭᠤ ᠪᠠᠢᠨᠠ᠃
ᠡᠷᠡᠭᠦᠯ ᠭᠣᠶᠣᠮᠰᠣᠭ ᠴᠢᠷᠠᠢ᠂ ᠡᠷᠡᠭᠦᠯ ᠴᠢᠭᠢᠷᠠᠭ ᠪᠡᠶᠡ
ᠡᠭᠦᠨ ᠳ᠋ᠦ᠍ ᠳᠤᠷᠠᠯᠠᠬᠤ ᠦᠭᠡᠢ ᠬᠥᠮᠦᠨ ᠬᠠᠮᠢᠭᠠ ᠪᠠᠢᠬᠤ ᠪᠣᠢ᠃
ᠪᠠᠭᠠᠲᠤᠷ ᠴᠢᠭᠢᠷᠠᠭ ᠡᠷᠡᠯᠬᠡᠭ ᠵᠣᠷᠢᠭ ᠭᠡᠭᠴᠢ ᠡᠷᠡᠭᠦᠯ ᠮᠥᠨ᠃
ᠪᠠᠶᠠᠷᠯᠠᠮᠠᠷ ᠰᠠᠢᠬᠠᠨ ᠪᠠᠬᠠᠷᠬᠠᠮᠠᠷ ᠭᠤᠸᠠ ᠭᠡᠭᠴᠢ ᠡᠷᠡᠭᠦᠯ ᠮᠥᠨ᠃
ᠲᠦᠮᠡᠨ ᠰᠠᠶᠠ ᠲᠣᠭᠠᠨ ᠤ᠋ ᠠᠷᠠᠳ ᠤ᠋ᠳ ᠡᠷᠡᠭᠦᠯ ᠪᠣᠯ
ᠲᠡᠭᠦᠨ ᠦ᠌ ᠦᠨᠳᠦᠰᠦ ᠦᠷᠡ ᠬᠡᠦᠬᠡᠳ ᠴᠥᠮ ᠡᠷᠡᠭᠦᠯ᠃
ᠡᠨᠡ ᠲᠥᠷᠥ ᠶ᠋ᠢᠨ ᠡᠷᠳᠡᠮ ᠰᠣᠶᠣᠯ ᠪᠠᠰᠠ ᠡᠷᠡᠭᠦᠯ
ᠡᠷᠡ ᠴᠡᠷᠢᠭ᠂ ᠡᠳ᠋ ᠬᠥᠷᠥᠩᠭᠡ ᠮᠥᠨ ᠴᠦ᠍ ᠡᠷᠡᠭᠦᠯ᠃
ᠡᠷᠲᠡᠨ ᠦ᠌ ᠦᠭᠡᠨ ᠳ᠋ᠦ᠍ ᠪᠣᠢ ᠭᠡᠯᠡ᠄《ᠥᠷᠢ ᠦᠭᠡᠢ ᠪᠣᠯ ᠪᠠᠶᠠᠨ᠂
ᠡᠪᠡᠳᠴᠢᠨ ᠦᠭᠡᠢ ᠪᠣᠯ ᠵᠢᠷᠭᠠᠯ》 ᠭᠡᠵᠦ ᠦᠨᠡᠨ ᠰᠢᠦ᠃
ᠡᠪᠡᠳᠴᠢᠨ ᠭᠡᠭᠴᠢ ᠳᠠᠢᠰᠤᠨ ᠦᠭᠡᠢ ᠪᠣᠯ
ᠡᠪᠦᠭᠡᠳ ᠡᠮᠡᠭᠡᠳ᠂ ᠨᠢᠯᠬᠠᠰ ᠬᠡᠦᠬᠡᠳ ᠬᠠᠭᠠᠴᠠᠬᠤ ᠦᠭᠡᠢ᠃
ᠥᠨᠥᠴᠢᠨ ᠥᠷᠥᠭᠡᠰᠦᠨ ᠦ᠌ ᠵᠣᠪᠠᠯᠠᠩ ᠳ᠋ᠤ᠌ ᠤᠨᠠᠬᠤ ᠦᠭᠡᠢ᠃
ᠥᠪᠡᠷ ᠦ᠋ᠨ ᠪᠡᠶᠡ ᠥᠮᠴᠢ ᠬᠥᠷᠥᠩᠭᠡ ᠶ᠋ᠢ ᠰᠦᠢᠳᠬᠡᠬᠦ ᠦᠭᠡᠢ᠃
1935 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠴᠠᠬᠠᠷ ᠪᠠᠲᠤ
ᠬᠢᠨᠠᠭᠴᠢ᠄ ᠤᠣᠳᠬᠠᠨᠰᠣᠠ