ᠬᠠᠵᠠᠭᠠᠷ ᠡᠪᠡᠰᠦХазаар өвс
732
ᠬᠠᠵᠠᠭᠠᠷ ᠡᠪᠡᠰᠦ
ᠦᠶᠡᠲᠦ ᠤᠷᠭᠤᠮᠠᠯ ᠦ᠋ᠨ ᠢᠵᠠᠭᠤᠷ
ᠢᠬᠴᠤ ᠪᠤᠲᠠᠯᠠᠨ ᠤᠷᠭᠤᠬᠤ ᠣᠯᠠᠨ ᠨᠠᠰᠤᠲᠤ ᠡᠪᠡᠰᠦᠯᠢᠭ ᠤᠷᠭᠤᠮᠠᠯ᠃ ᠰᠦᠷᠡᠯ ᠨᠢ 12—30cm ᠥᠨᠳᠥᠷ᠂ ᠦᠰᠦ ᠦᠭᠡᠢ᠂ ᠣᠯᠠᠨ ᠦᠶᠡ ᠲᠡᠢ᠂ ᠬᠠᠲᠠᠪᠠᠯ ᠮᠤᠷᠤᠢ ᠰᠠᠷᠤᠢ ᠪᠣᠯᠳᠠᠭ᠃ ᠨᠠᠪᠴᠢᠨ ᠤ ᠳᠤᠭᠲᠤᠢ ᠨᠢ ᠦᠶᠡ ᠶ᠋ᠢᠨ ᠬᠣᠭᠣᠷᠣᠨᠳᠣᠬᠢ ᠵᠠᠢ ᠠ᠋ᠴᠠ ᠤᠷᠲᠤ᠂ ᠦᠰᠦ ᠦᠭᠡᠢ᠂ ᠪᠠᠭ ᠴᠡᠴᠡᠭ ᠦ᠋ᠨ ᠤᠭ ᠬᠦᠷᠲᠡᠯᠡ ᠡᠰᠢ ᠪᠡᠨ ᠳᠠᠪᠬᠤᠷ ᠳᠠᠪᠬᠤᠷ ᠪᠠᠭᠯᠠᠵᠤ ᠪᠤᠢ ; ᠨᠠᠪᠴᠢᠨ ᠤ ᠬᠡᠯᠡ ᠨᠢ ᠨᠢᠭᠡ ᠴᠠᠭᠠᠷᠢᠭ ᠮᠠᠰᠢ ᠪᠣᠭᠣᠨᠢ ᠰᠢᠷᠬᠡᠭ ᠦᠰᠦ ᠶᠤᠮ᠃ ᠨᠠᠪᠴᠢ ᠨᠢ ᠶᠡᠷᠦ ᠳ᠋ᠡᠭᠡᠨ ᠳᠣᠲᠤᠭᠰᠢ ᠬᠤᠮᠢᠷᠠᠨᠠ᠂ ᠰᠢᠷᠦᠭᠦᠨ᠂ 3—6cm ᠤᠷᠲᠤ᠂ ᠤᠭ ᠦ᠋ᠨ ᠬᠡᠰᠡᠭ ᠲᠡᠭᠡᠨ 1—2mm ᠥᠷᠭᠡᠨ᠃ ᠱᠣᠷᠤᠯᠵᠢᠨ ᠬᠡᠯᠪᠡᠷᠢᠲᠦ ᠪᠠᠭ ᠴᠡᠴᠡᠭ ᠨᠢ ᠨᠠᠷᠢᠬᠠᠨ ᠤᠷᠲᠤ᠂ ᠴᠥᠭᠡᠬᠡᠨ ᠵᠢᠵᠢᠭ ᠲᠦᠷᠦᠭᠦᠦ ᠲᠡᠢ᠂ 4—7cm ᠤᠷᠲᠤ᠂ 5—10mm ᠥᠷᠭᠡᠨ ᠂ ᠰᠠᠯᠠᠭᠠ ᠨᠤᠭᠤᠳ ᠨᠢ ᠲᠤᠰ ᠪᠦᠷᠢ 2—5 ᠵᠢᠵᠢᠭ ᠲᠦᠷᠦᠭᠦᠦ ᠲᠡᠢ ; ᠭᠣᠣᠯ ᠲᠡᠩᠭᠡᠯᠢᠭ᠂ ᠰᠠᠯᠠᠭᠠ ᠬᠢᠭᠡᠳ ᠪᠠᠭ ᠴᠡᠴᠡᠭ ᠡᠴᠡ ᠳᠣᠭᠤᠭᠰᠢ ᠬᠡᠰᠡᠭ ᠨᠢ ᠪᠦᠷ ᠰᠢᠷᠦᠭᠦᠨ ᠪᠠᠶ᠋ᠢᠳᠠᠭ ; ᠵᠢᠵᠢᠭ ᠲᠦᠷᠦᠭᠦᠦ ᠨᠢ 5—7mm ᠤᠷᠲᠤ᠂ 2—3 ᠴᠡᠴᠡᠭ ᠲᠡᠢ᠂ ᠨᠣᠭᠤᠪᠲᠤᠷ ᠪᠤᠶᠤ ᠪᠣᠷᠣᠪᠲᠤᠷ ; ᠬᠠᠯᠢᠰᠤ ᠨᠢ ᠶᠡᠷᠦ ᠳ᠋ᠡᠭᠡᠨ ᠨᠢᠭᠡ ᠰᠤᠳᠠᠯ ᠲᠠᠢ᠂ ᠥᠷᠭᠡᠨ ᠲᠣᠷᠭᠠᠨ ᠬᠠᠯᠢᠰᠤᠯᠢᠭ ᠬᠥᠪᠡᠭᠡ ᠲᠡᠢ᠂ ᠦᠰᠦ ᠦᠭᠡᠢ ; ᠭᠠᠳᠠᠷ ᠬᠡᠪᠡᠭ ᠨᠢ ᠬᠠᠪᠲᠠᠭᠠᠢ ᠲᠡᠪᠡᠨᠡ ᠬᠡᠯᠪᠡᠷᠢ ᠲᠡᠢ᠂ 3—5 ᠰᠤᠳᠠᠯ ᠲᠠᠢ᠂ ᠬᠥᠪᠡᠭᠡ ᠣᠷᠴᠢᠮ ᠨᠢ ᠶᠡᠷᠦ ᠳ᠋ᠡᠭᠡᠨ ᠦᠰᠦ ᠲᠡᠢ᠂ ᠦᠵᠦᠭᠦᠷ ᠨᠢ ᠤᠨᠢ ᠲᠠᠢ᠂ ᠣᠬᠣᠷᠬᠠᠨ ᠰᠤᠷ ᠲᠠᠢ᠂ ᠰᠠᠭᠤᠷᠢ ᠲᠠᠪᠠᠭ ᠨᠢ ᠣᠬᠣᠷ ᠦᠰᠦ ᠲᠡᠢ ; ᠳᠣᠲᠣᠷ ᠬᠡᠪᠡᠭ ᠨᠢ ᠨᠠᠷᠢᠬᠠᠨ᠂ ᠭᠠᠳᠠᠷ ᠬᠡᠪᠡᠭ ᠲᠡᠢ ᠪᠡᠨ ᠢᠵᠢᠯ ᠤᠷᠲᠤ ᠪᠤᠶᠤ ᠪᠠᠬᠠᠨ ᠤᠷᠲᠤ᠂ ᠭᠣᠣᠯ ᠰᠤᠳᠠᠯ ᠨᠢ ᠣᠷᠣᠢ ᠠ᠋ᠴᠠ ᠰᠤᠨᠵᠤ ᠭᠠᠷᠤᠭᠠᠳ 1mm ᠣᠷᠴᠢᠮ ᠤᠷᠲᠤ ᠰᠤᠷ ᠪᠣᠯᠳᠠᠭ ; ᠲᠣᠭᠤᠰᠤᠪᠴᠢ ᠨᠢ 2mm ᠣᠷᠴᠢᠮ ᠤᠷᠲᠤ᠃
ᠭᠠᠩ ᠬᠠᠭᠤᠷᠠᠢ ᠬᠡᠭᠡᠷᠡ ᠲᠠᠯᠠ ᠳ᠋ᠤ ᠤᠷᠭᠤᠨᠠ᠃
ᠮᠠᠨ ᠤ ᠤᠯᠤᠰ ᠦ᠋ᠨ ᠥᠪᠥᠷ ᠮᠣᠩᠭᠣᠯ᠂ ᠾᠧᠪᠧᠢ᠂ ᠱᠠᠨ ᠰᠢ ᠬᠢᠭᠡᠳ ᠪᠠᠷᠠᠭᠤᠨ ᠬᠣᠶ᠋ᠢᠲᠤ ᠣᠷᠣᠨ ᠤ ᠡᠯᠡ ᠮᠣᠵᠢ ᠣᠷᠣᠨ ᠳ᠋ᠤ ᠪᠦᠷ ᠤᠷᠭᠤᠳᠠᠭ᠃
ᠦᠬᠡᠷ᠂ ᠬᠣᠨᠢ ᠢᠮᠠᠭᠠ ᠪᠦᠷ ᠢᠳᠡᠬᠦ ᠳᠤᠷᠠᠲᠠᠢ ᠪᠡᠯᠴᠢᠭᠡᠷ ᠡᠪᠡᠰᠦ᠃ ᠬᠠᠳᠤᠯᠠᠩ ᠦ᠋ᠨ ᠤᠨᠠᠯᠲᠠ ᠨᠢ ᠥᠨᠳᠥᠷ ᠪᠤᠰᠤ
ᠬᠢᠲᠠᠳ ᠨᠡᠷᠡ᠄糙隐子草
ᠠᠩᠭ᠌ᠯᠢ ᠨᠡᠷᠡ᠄ Cleistogenes squarrosa (Trin.) Keng
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ᠂ ᠡᠷᠬᠢᠮᠪᠠᠭᠠᠲᠤᠷ
ᠬᠢᠨᠠᠭᠴᠢ᠄ ᠲᠤᠶᠠᠭᠠ