《ᠬᠥᠬᠡ ᠰᠤᠳᠤᠷ》 ᠤᠨ ᠨᠥᠬᠥᠪᠦᠷᠢ ᠲᠡᠪᠲᠡᠷ - ᠢᠨᠵᠠᠨᠨᠠᠰᠢ <ᠲᠠᠪᠢᠳᠤᠭᠠᠷ ᠪᠦᠯᠦᠭ> "Хөх судар" он нөхвөр дэвтэр - Инжинаш <Тавьдугаар бүлэг>
304《ᠬᠥᠬᠡ ᠰᠤᠳᠤᠷ》 ᠤᠨ ᠨᠥᠬᠥᠪᠦᠷᠢ ᠲᠡᠪᠲᠡᠷ - ᠲᠠᠪᠢᠳᠤᠭᠠᠷ ᠪᠦᠯᠦᠭ
ᠶᠡᠬᠡ ᠬᠥᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠲᠡᠷᠢᠭᠦᠨ ᠣᠨ ᠤᠯᠠᠭᠠᠨ ᠪᠠᠷᠰ ᠵᠢᠯ᠂ ᠳᠤᠮᠳᠠᠳᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠥ᠋ᠩ ᠬᠠᠭᠠᠨ ᠤ᠋ ᠳᠠᠢ ᠾᠧ ᠬᠡᠮᠡᠬᠦ ᠶ᠋ᠢᠨ ᠵᠢᠷᠭᠤᠳᠤᠭᠠᠷ ᠣᠨ᠂ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠥ᠋ᠩ ᠬᠠᠭᠠᠨ ᠤ᠋ ᠺᠠᠢ ᠰᠢ ᠬᠡᠮᠡᠬᠦ ᠶ᠋ᠢᠨ ᠬᠣᠶᠠᠳᠤᠭᠠᠷ ᠣᠨ᠃
ᠲᠠᠪᠢᠳᠤᠭᠠᠷ ᠪᠦᠯᠦᠭ
ᠲᠠᠢᠽᠢ ᠵᠣᠴᠢ ᠵᠢᠨᠦᠩ ᠮᠤᠬᠤᠯᠢ ᠯᠤᠭᠠ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠᠨ ᠤ᠋ ᠮᠠᠯᠵᠢᠶᠠ ᠪᠢᠴᠢᠭ ᠠᠮᠠᠯᠠᠨ ᠪᠠᠢᠭᠤᠯᠪᠠ
ᠲᠠᠢᠪᠤᠤ ᠪᠤᠭᠤᠷᠵᠢ ᠪᠤᠯᠤ ᠬᠠᠭᠠᠨ ᠢ᠋ ᠳᠡᠭᠦᠨᠦ ᠭᠠᠯ ᠢ᠋ ᠵᠢᠭᠡᠯᠡᠨ ᠲᠡᠭᠦᠨ ᠢ᠋ ᠭᠠᠯᠳᠠᠵᠤ ᠠᠮᠢᠳᠤ ᠪᠠᠷᠢᠪᠠ
ᠬᠠᠭᠠᠨ ᠬᠥᠮᠦᠨ ᠬᠠᠲᠠᠭᠤᠵᠢᠯ ᠪᠡᠷᠬᠡ ᠶ᠋ᠢ ᠪᠡᠶᠡ ᠳ᠋ᠡᠭᠡᠨ ᠪᠣᠯᠭᠠᠭᠴᠢᠳ ᠮᠠᠰᠢ ᠴᠥᠭᠡᠨ
ᠬᠠᠮᠤᠭ ᠤᠯᠤᠰ ᠤ᠋ᠳ ᠤ᠋ᠨ ᠬᠠᠳ ᠪᠦᠬᠦᠨ ᠴᠢᠩᠭᠢᠰ ᠲᠣᠷ ᠬᠦᠷᠦᠭᠴᠢᠳ ᠦᠨᠡᠬᠡᠷ ᠴᠤᠬᠠᠭ᠃
ᠬᠠᠮᠲᠤᠳᠬᠠᠨ ᠡᠵᠡᠯᠡᠭᠰᠡᠨ ᠳᠥᠴᠢᠨ ᠢᠯᠡᠭᠦᠦ ᠤᠯᠤᠰ ᠭᠦᠷᠦᠨ ᠦ᠌ ᠦᠨᠡᠨ ᠲᠣᠭᠠ ᠶ᠋ᠢ
ᠬᠠᠳᠠᠮᠠᠯ ᠬᠠᠲᠠᠭᠰᠠᠨ《ᠭᠤᠷᠪᠠᠨ ᠦᠰᠦᠭ ᠦ᠋ᠨ ᠨᠣᠮ 》 ᠬᠡᠮᠡᠭᠴᠢ ᠶ᠋ᠢᠨ ᠲᠠᠢᠯᠪᠤᠷᠢ ᠳ᠋ᠤᠷ ᠦᠵᠡᠭᠳᠡᠬᠦᠢ᠃
ᠲᠡᠨᠳᠡᠴᠡ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠶ᠋ᠢᠨ ᠵᠠᠭᠤᠨ ᠰᠠᠢᠳ ᠨᠠᠷ᠂ ᠱᠧᠩ ᠡᠦ ᠬᠤᠸᠠᠩᠳᠢ᠂ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠤᠯᠤᠰ ᠤ᠋ᠨ ᠡᠵᠡᠨ᠂ ᠬᠥᠮᠦᠨ ᠦ᠌ ᠬᠠᠭᠠᠨ ᠪᠣᠯᠤᠭᠴᠢᠳ ᠤ᠋ᠨ ᠤᠷᠢᠳᠠ ᠥᠪᠡᠷᠦᠨ ᠪᠡᠶᠡ ᠶ᠋ᠢᠨ ᠵᠢᠷᠭᠠᠯ ᠴᠡᠩᠭᠡᠯ ᠢ᠋ ᠤᠷᠢᠳᠠᠰᠠ ᠲᠡᠪᠴᠢᠪᠡᠰᠦ ᠰᠠᠶᠢ ᠬᠠᠮᠤᠭ ᠤᠯᠤᠰ ᠢᠷᠭᠡᠨ ᠤ ᠠᠮᠤᠬᠤ ᠵᠢᠷᠭᠠᠬᠤ ᠶ᠋ᠢ ᠬᠥᠭᠵᠢᠭᠦᠯᠬᠦ᠂ ᠬᠠᠭᠠᠨ ᠬᠥᠮᠦᠨ ᠦ᠌ ᠬᠠᠲᠠᠭᠤᠵᠢᠯ ᠡᠷᠬᠡᠴᠢᠯᠡᠯᠳᠦ ᠵᠠᠷᠯᠢᠭ ᠦᠭᠡᠰ ᠢ᠋ ᠰᠣᠨᠣᠰᠴᠤ᠂ ᠪᠡᠶᠡᠰᠦᠨ ᠪᠢᠰᠢᠷᠡᠵᠦ᠂ ᠠᠶᠤᠨ ᠰᠦᠰᠦᠭᠯᠡᠯᠴᠡᠨ ᠮᠥᠷᠭᠥᠬᠦᠶᠡ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠢᠨᠦᠩ ᠲᠠᠢᠪᠤᠤ ᠨᠣᠶᠠᠨ ᠮᠤᠬᠤᠯᠢ ᠲᠡᠷᠢᠭᠦᠯᠡᠨ ᠳᠠᠬᠢᠨ ᠰᠥᠭᠥᠳᠴᠦ ᠳᠠᠪᠬᠤᠷᠯᠠᠨ ᠯᠠᠴᠠᠳᠠᠵᠤ ᠪᠢᠲᠡᠭᠦᠮᠵᠢᠯᠡᠭᠰᠡᠨ ᠰᠢᠷᠠ ᠯᠤᠤᠲᠤ ᠭᠬᠢᠪ ᠦ᠋ᠨ ᠪᠢᠳᠡᠭᠦᠮᠵᠢᠲᠦ ᠨᠤᠭᠤᠯᠪᠤᠷᠢ ᠶ᠋ᠢ ᠳᠡᠭᠡᠭᠰᠢ ᠡᠷᠭᠦᠨ ᠳᠡᠪᠰᠢᠭᠦᠯᠵᠦ᠂ ᠮᠤᠬᠤᠯᠢ ᠮᠠᠯᠠᠭᠠ ᠪᠠᠨ ᠠᠪᠴᠤ ᠬᠦᠰᠡᠷᠡ ᠭᠤᠷᠪᠠᠨᠲᠠ ᠮᠥᠷᠭᠥᠮᠡᠭᠴᠡ᠂ ᠬᠠᠭᠠᠨ ᠥᠷᠭᠥᠭᠡ ᠶ᠋ᠢᠨ ᠬᠠᠰ ᠤ᠋ᠨ ᠴᠢᠩ᠂ ᠠᠯᠲᠠᠨ ᠤ᠋ ᠵᠦᠩ ᠬᠦᠩᠭᠢᠨᠡᠨ ᠴᠢᠩᠭᠢᠨᠠᠨ ᠳᠠᠭᠤᠷᠢᠰᠤᠨ ᠬᠦᠩᠬᠢᠷᠡᠰᠴᠦ᠂ ᠠᠭᠠᠷᠤ ᠽᠠᠨᠳᠠᠨ ᠤ᠋ ᠰᠠᠢᠬᠠᠨ ᠦᠨᠦᠷ ᠰᠠᠩᠬᠤᠯᠤᠨ ᠠᠩᠬᠢᠯᠤᠨ ᠦᠨᠦᠷᠲᠦᠵᠦ᠂ ᠳᠣᠲᠣᠭᠠᠳᠤ ᠬᠢᠶᠡ᠂ ᠰᠢᠳᠠᠷ ᠰᠠᠢᠳ ᠤ᠋ᠳ ᠳᠣᠬᠢᠶᠠ ᠬᠠᠰᠬᠢᠷᠤᠯᠴᠠᠨ᠂ ᠰᠢᠷᠠ ᠯᠤᠤ ᠶ᠋ᠢᠨ ᠮᠠᠩᠨᠤᠭ ᠬᠠᠨᠴᠤᠢ ᠨᠢᠭᠡᠨᠲᠡ ᠭᠦᠪᠢᠮᠡᠭᠴᠡ ᠠᠯᠲᠠᠨ ᠶᠠᠰᠤᠲᠤ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠤᠷᠲᠤᠨᠠ ᠡᠭᠡᠪᠡ᠃ ᠵᠠᠭᠤᠨ ᠲᠦᠰᠢᠮᠡᠳ ᠵᠤᠨ ᠤ᠋ ᠬᠤᠷᠠ ᠰᠡᠬᠦᠭᠰᠡᠨ ᠮᠡᠲᠦ ᠮᠠᠨᠳᠠᠯ ᠠ᠋ᠴᠠ ᠲᠠᠷᠬᠠᠯᠴᠠᠨ ᠪᠠᠭᠤᠵᠤ ᠢᠷᠡᠭᠡᠳ᠂ ᠲᠤᠰ ᠲᠤᠰ ᠤ᠋ᠨ ᠲᠤᠰᠢᠶᠠᠯ ᠲᠤᠰᠢᠶᠠᠯ ᠳ᠋ᠠᠭᠠᠨ ᠡᠭᠡᠪᠡᠢ᠃
ᠲᠡᠳᠦᠢ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠤᠷᠲᠣᠨᠠ ᠪᠠᠭᠤᠵᠤ᠂ ᠲᠡᠮᠳᠡᠭ ᠳᠣᠬᠢᠶᠠᠲᠤ ᠲᠡᠷᠢᠭᠦᠯᠡᠭᠴᠢ ᠳᠠᠢᠪᠠᠩ᠂ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠠᠢᠯᠠᠳᠬᠠᠭᠰᠠᠨ ᠨᠤᠭᠤᠯᠪᠤᠷᠢ ᠶ᠋ᠢ ᠠᠢᠯᠠᠳᠤᠨ ᠦᠵᠡᠪᠡᠰᠦ᠂ ᠲᠡᠭᠦᠨ ᠳ᠋ᠦ᠍ᠷ ᠵᠣᠩᠬᠢᠯᠠᠨ ᠠᠢᠯᠠᠳᠬᠠᠭᠰᠠᠨ ᠦᠭᠡᠰ ᠢᠨᠣ᠄
《ᠦᠯᠡᠳᠡᠪᠦᠷᠢ ᠨᠠᠢ᠍ᠮᠠᠨ ᠢ᠋ ᠪᠣᠭᠳᠠ ᠶ᠋ᠢᠨ ᠭᠡᠭᠡᠨ ᠢ᠋ᠶ᠋ᠡᠷ ᠳᠠᠢᠯᠠᠷᠠ ᠡᠴᠢᠬᠦ ᠢᠨᠣ ᠮᠠᠨᠳᠤᠵᠤ ᠪᠠᠳᠠᠷᠠᠬᠤ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠨᠡᠢᠲᠡ ᠪᠦᠬᠦᠨᠡ ᠦᠵᠡᠭᠦᠯᠬᠦ ᠴᠣᠬᠣᠮ ᠱᠠᠭᠠᠷᠳᠠᠯ ᠲᠤᠬᠠᠢᠲᠤ ᠬᠢᠴᠢᠶᠡᠯᠭᠡ ᠶ᠋ᠢᠨ ᠬᠡᠪ ᠬᠡᠪᠴᠢᠶᠡᠨ ᠮᠥᠨ᠃ ᠲᠡᠢᠨ ᠪᠣᠯᠪᠠᠴᠤ ᠪᠠᠷ ᠢᠰᠢᠭᠡ ᠶ᠋ᠢ ᠥᠪᠴᠢᠬᠦᠶᠡ ᠦᠬᠡᠷ ᠠᠯᠠᠬᠤ ᠬᠢᠲᠤᠭᠠ ᠬᠡᠷᠡᠭ ᠦᠭᠡᠢ ᠬᠡᠮᠡᠭᠴᠢ ᠪᠡᠷ ᠣᠯᠠᠨ ᠰᠠᠢᠳ ᠤ᠋ᠳ ᠤ᠋ᠨ ᠡᠷᠡᠮᠰᠢᠭᠰᠡᠨ ᠣᠮᠣᠭ ᠪᠣᠢ ᠢᠡ᠂ ᠤᠯᠤᠰ ᠢᠷᠭᠡᠨ ᠢ᠋ ᠤᠷᠤᠭᠰᠢ ᠴᠢᠷᠮᠠᠢᠬᠤ ᠵᠣᠷᠢᠭ ᠴᠢᠷᠮᠠᠢᠯᠭᠠ ᠳ᠋ᠤᠷ ᠲᠤᠰᠠ ᠦᠭᠡᠢ ᠶ᠋ᠢ ᠡᠰᠡ ᠬᠢᠨᠠᠵᠤᠬᠤᠢ᠃ ᠵᠣᠩᠬᠢᠯᠠᠨ ᠵᠦᠭᠯᠡᠭᠰᠡᠨ ᠭᠠᠵᠠᠷᠠ ᠪᠣᠭᠳᠠ ᠶ᠋ᠢᠨ ᠭᠡᠭᠡᠨ ᠢ᠋ᠶ᠋ᠡᠷ ᠬᠡᠳᠦᠢ ᠡᠰᠡ ᠬᠦᠷᠪᠡᠴᠦ ᠪᠡᠷ ᠪᠣᠭᠳᠠ ᠶ᠋ᠢᠨ ᠭᠡᠭᠡᠨ ᠲᠡᠷᠡ ᠵᠦᠭ ᠮᠣᠷᠳᠠᠨ ᠮᠣᠷᠢᠯᠠᠬᠤ ᠠᠨᠤ ᠴᠢᠪ ᠴᠢᠬᠡ ᠴᠡᠷᠢᠭ ᠠᠶᠠᠨ ᠤ᠋ ᠴᠢᠬᠤᠯᠠ ᠡᠷᠬᠡ ᠲᠣᠪᠴᠢ᠂ ᠰᠦᠷ ᠰᠤᠷᠲᠠᠯ ᠮᠥᠨ ᠢ᠋ ᠪᠣᠭᠳᠠ ᠶ᠋ᠢᠨ ᠭᠡᠭᠡᠬᠡᠨ ᠢ᠋ᠶ᠋ᠡᠷ ᠠᠪᠠᠴᠢᠭᠰᠠᠨ ᠠᠨᠤ ᠰᠠᠢᠳ ᠪᠢᠳᠡ᠂ ᠡᠵᠡᠨ ᠦ᠌ ᠲᠦᠮᠡᠨ ᠦ᠌ ᠨᠢᠭᠡᠨ ᠳ᠋ᠦ᠍ᠷ ᠴᠦ᠍ ᠭᠦᠢᠴᠡᠨ ᠬᠦᠷᠦᠯᠴᠡᠬᠦ ᠦᠭᠡᠢ ᠢᠨᠣ ᠴᠢᠩ ᠦᠨᠡᠨ᠂ ᠡᠵᠡᠨ ᠦ᠌ ᠶᠡᠬᠡ ᠵᠠᠷᠯᠠᠯ ᠢ᠋ᠶ᠋ᠠᠷ ᠬᠣᠯᠠ ᠡᠳᠦᠷ ᠢ᠋ ᠵᠢᠭᠠᠨ ᠲᠣᠭᠲᠠᠭᠠᠵᠤ᠂ ᠪᠣᠭᠳᠠ ᠶ᠋ᠢᠨ ᠶᠡᠬᠡ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠮᠣᠷᠳᠠᠨ ᠬᠥᠳᠡᠯᠦᠭᠡᠳ᠂ ᠡᠨᠡ ᠵᠡᠪᠰᠡᠷᠡ ᠰᠠᠢᠳ ᠪᠢ ᠪᠤᠭᠤᠷᠵᠢ ᠯᠤᠭᠠ ᠵᠡᠭᠦᠨ ᠵᠠᠮ ᠢ᠋ᠶ᠋ᠠᠷ ᠲᠣᠭᠣᠷᠢᠨ ᠡᠴᠢᠵᠦ᠂ ᠴᠢᠬᠤᠯᠠ ᠭᠠᠵᠠᠷ ᠴᠡᠷᠢᠭ ᠪᠦᠭᠭᠦᠵᠦ᠂ ᠮᠠᠨ ᠳ᠋ᠤᠷ ᠳᠠᠭᠠᠭᠰᠠᠨ ᠨᠠᠢ᠍ᠮᠠᠨ ᠢ᠋ᠶ᠋ᠠᠷ ᠤᠳᠤᠷᠢᠳᠬᠠᠯ ᠪᠣᠯᠭᠠᠨ ᠡᠲᠦᠭᠡᠨ ᠢᠷᠡᠭᠦᠯᠵᠦ᠂ ᠬᠦᠴᠦᠨ ᠢ᠋ ᠰᠠᠯᠭᠠᠭᠠᠳ ᠭᠡᠨᠡᠳᠡᠭᠦᠯᠦᠨ ᠣᠯᠵᠤ ᠪᠠᠷᠢᠪᠠᠰᠤ᠂ ᠪᠣᠭᠳᠠ ᠡᠵᠡᠨ ᠦ᠌ ᠪᠡᠶᠡ ᠶ᠋ᠢᠨ ᠭᠡᠭᠡᠨ ᠢ᠋ᠶ᠋ᠡᠨ ᠦᠯᠦ ᠠᠮᠤᠷ ᠵᠢᠷᠭᠠᠭᠤᠯᠬᠤ ᠵᠣᠷᠢᠭ ᠰᠢᠮᠳᠠᠯ ᠤ᠋ᠨ ᠨᠡᠷᠡ ᠳᠠᠭᠤᠷᠢᠶᠠᠨ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷᠠ ᠠᠯᠳᠠᠷᠰᠢᠨ ᠳᠠᠭᠤᠷᠢᠰᠬᠤ ᠪᠥᠭᠡᠳ ᠴᠡᠷᠢᠭ ᠦ᠋ᠨ ᠴᠢᠬᠤᠯᠠ ᠣᠨᠢᠰᠣ ᠮᠥᠨ ᠬᠦ᠌ ᠭᠢᠯᠪᠠᠢ ᠳᠥᠭᠥᠮ ᠬᠤᠷᠴᠠ ᠲᠦᠷᠭᠡᠨ ᠪᠦᠲᠦᠮᠦᠢ᠃ ᠡᠳᠦᠭᠡ ᠬᠣᠯᠠ ᠳ᠋ᠠᠬᠢ ᠲᠤᠷᠰᠢᠭᠤᠯ ᠠ᠋ᠴᠠ ᠰᠣᠨᠣᠰᠪᠠᠰᠤ᠂ ᠪᠤᠯᠤ ᠸᠠᠩ ᠡᠴᠢᠭᠡ ᠬᠥᠪᠡᠭᠦᠨ ᠬᠣᠶᠠᠭᠤᠯᠠ ᠨᠠᠢ᠍ᠮᠠᠨ ᠤ᠋ ᠡᠮᠦᠨᠡ ᠬᠢᠵᠠᠭᠠᠷ ᠤ᠋ᠨ ᠳᠥᠷᠪᠡᠨ ᠬᠣᠲᠠ ᠶ᠋ᠢᠨ ᠭᠠᠵᠠᠷ ᠢ᠋ᠶ᠋ᠠᠨ ᠬᠠᠰᠤᠵᠤ ᠠᠯᠲᠠᠨ ᠤᠯᠤᠰ ᠲᠤᠷ ᠥᠭᠭᠦᠭᠡᠳ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠡᠵᠡᠨ ᠯᠢ ᠼᠦᠨ ᠢᠦ᠂ ᠨᠢᠭᠡᠨᠲᠡ ᠥᠩᠭᠡ ᠳᠡᠷᠡᠰᠦᠨ ᠳ᠋ᠦ᠍ᠷ ᠲᠠᠴᠢᠶᠠᠵᠤ ᠲᠠᠷᠢᠬᠢ ᠴᠢᠮᠥᠭᠡ ᠬᠣᠭᠣᠰᠣᠷᠠᠭᠰᠠᠨ ᠨᠠᠷᠢᠨ ᠡᠪᠡᠳᠴᠢᠨᠡ ᠨᠡᠷᠪᠡᠭᠳᠡᠵᠦ᠂ ᠤᠯᠤᠰ ᠤ᠋ᠨ ᠡᠷᠬᠡ ᠶ᠋ᠢ ᠢᠨᠣ ᠶ᠋ᠢᠨ᠂ ᠪᠢᠩ ᠬᠣᠶᠠᠷ ᠢᠨᠠᠭ ᠹᠧᠢ ᠡᠵᠡᠷᠬᠡᠵᠦ᠂ ᠪᠤᠯᠤ ᠢᠦᠢ ᠬᠠᠭᠠᠨ ᠤ᠋ ᠡᠴᠢᠭᠡ ᠬᠥᠪᠡᠭᠦᠨ ᠬᠣᠶᠠᠭᠤᠯᠠ ᠳ᠋ᠤᠷ ᠨᠡᠢᠲᠡ ᠳᠥᠷᠪᠡᠨ ᠲᠦᠮᠡᠨ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠴᠡᠷᠢᠭ ᠢ᠋ ᠵᠢᠭᠡᠯᠡᠭᠦᠯᠦᠨ ᠥᠭᠴᠦ᠂ ᠪᠠᠰᠠ ᠬᠠᠭᠤᠴᠢᠨ ᠯᠢᠶᠣᠣ ᠤᠯᠤᠰ ᠤ᠋ᠨ ᠬᠢᠳᠠᠨ ᠤᠯᠤᠰ ᠠ᠋ᠴᠠ ᠭᠠᠵᠠᠷ ᠣᠷᠣᠨ ᠢ᠋ ᠵᠢᠭᠠᠵᠤ ᠪᠠᠲᠤ ᠲᠡᠮᠳᠡᠭ ᠪᠣᠯᠭᠠᠨ᠂ ᠪᠠᠰᠠ ᠨᠠᠢ᠍ᠮᠠᠨ ᠮᠢᠩᠭᠠᠨ ᠴᠡᠷᠢᠭ ᠭᠤᠶᠤᠨ ᠣᠯᠵᠤ᠂ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠵᠡᠭᠦᠨ ᠡᠮᠦᠨᠡ ᠵᠠᠬᠠ ᠪᠠᠷ ᠪᠠᠢᠯᠳᠤᠷᠠ ᠢᠷᠡᠵᠦ ᠰᠡᠵᠢᠭᠯᠡᠭᠦᠯᠦᠨ᠂ ᠪᠠᠷᠠᠭᠤᠨ ᠬᠣᠢᠲᠤ ᠪᠠᠷ ᠪᠠᠢᠯᠳᠤᠨ ᠣᠷᠣᠵᠤ᠂ ᠰᠢᠨᠡ ᠨᠠᠢ᠍ᠮᠠᠨ ᠢ᠋ ᠠᠪᠬᠤ ᠪᠠᠷ ᠲᠣᠭᠲᠠᠮᠤᠢ ᠬᠡᠮᠡᠮᠦ᠃ ᠰᠠᠢᠳ ᠪᠢ ᠡᠨᠡ ᠲᠠᠰᠢᠷᠠᠮ ᠳ᠋ᠤᠷ ᠨᠡᠢᠴᠡᠭᠦᠯᠵᠦ᠂ ᠴᠢᠳᠠᠬᠤᠯᠠ ᠨᠢᠭᠡᠨ ᠤᠷᠬᠠ ᠪᠠᠷ ᠬᠣᠶᠠᠷ ᠤᠨᠠᠭᠠ ᠶ᠋ᠢ ᠤᠷᠠᠭᠳᠠᠰᠤᠭᠠᠢ ᠬᠡᠮᠡᠮᠦᠢ᠃ ᠬᠣᠶᠠᠷ ᠤᠨᠠᠬᠠ ᠶ᠋ᠢ ᠦᠨᠡᠬᠡᠷ ᠬᠠᠮᠲᠤ ᠣᠯᠵᠤ ᠡᠰᠡ ᠴᠢᠳᠠᠪᠠᠰᠤ ᠪᠠᠷ ᠤᠨᠠᠬᠠ ᠳᠠᠭᠠ ᠶ᠋ᠢᠨ ᠲᠠᠯᠠᠪᠤᠷ ᠪᠡᠯᠴᠢᠭᠡᠷ ᠪᠠ ᠡᠭᠦᠷ ᠯᠤᠭᠰᠢ ᠶ᠋ᠢ ᠮᠠᠭᠠᠳ ᠣᠯᠤᠨ ᠴᠢᠳᠠᠮᠤᠢ ᠢᠡ ᠬᠡᠮᠡᠮᠦᠢ᠃ ᠪᠣᠭᠳᠠ ᠶ᠋ᠢᠨ ᠭᠡᠢᠭᠦᠯᠦᠨ ᠲᠣᠯᠢᠳᠠᠬᠤ ᠶ᠋ᠢ ᠮᠥᠷᠭᠥᠵᠦ ᠪᠠᠷᠢᠭᠤᠯᠤᠮᠤᠢ》ᠬᠡᠮᠡᠵᠦᠬᠦᠢ᠃
ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ᠂ ᠡᠨᠡ ᠠᠢᠯᠠᠳᠬᠠᠯ ᠢ᠋ ᠠᠢᠯᠠᠳᠤᠭᠠᠳ᠂ ᠯᠤᠤ ᠶ᠋ᠢᠨ ᠴᠢᠷᠠᠢ ᠳ᠋ᠤᠷ ᠪᠠᠶᠠᠰᠬᠤᠯᠠᠩ ᠤ᠋ᠨ ᠥᠩᠭᠡ ᠢᠯᠡᠷᠡᠵᠦ᠂ ᠨᠤᠭᠤᠯᠪᠤᠷᠢ ᠶ᠋ᠢᠨ ᠰᠡᠭᠦᠯ ᠳ᠋ᠦ᠍ᠷ《ᠪᠠᠭᠠᠲᠤᠷ ᠪᠣᠳᠣᠯᠭᠠ ᠬᠣᠣᠰ ᠪᠦᠷᠢᠳᠦᠭᠰᠡᠨ᠂ ᠵᠢᠨᠦᠩ ᠳᠠᠢᠪᠠᠩ ᠤ᠋ᠨ ᠪᠠᠢᠭᠤᠯᠤᠭᠰᠠᠨ ᠰᠠᠨᠠᠭᠠ ᠴᠢᠪᠬᠢᠲᠡᠯᠡ ᠮᠡᠬᠦᠰ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ᠷ ᠨᠡᠢᠴᠡᠪᠡ᠃ ᠪᠠᠢᠭᠤᠯᠤᠨ ᠰᠠᠨᠠᠭᠰᠠᠨ ᠨᠠᠷᠢᠨ ᠨᠢᠭᠲᠠ ᠶ᠋ᠢᠨ ᠶᠣᠰᠣᠭᠠᠷ ᠶᠠᠪᠤᠵᠤ᠂ ᠪᠠᠢᠯᠳᠤᠬᠤ ᠪᠠ ᠪᠠᠷᠢᠬᠤ ᠶ᠋ᠢ ᠡᠳᠦᠭᠡ ᠡᠴᠡ ᠳᠠᠷᠤᠢ ᠡᠭᠦᠰᠬᠡᠨ ᠦᠢᠯᠡᠳᠴᠦ ᠶᠠᠪᠤᠭᠤᠯᠤᠭᠲᠤᠨ 》ᠭᠡᠮᠡᠨ ᠴᠣᠬᠣᠯᠠᠨ ᠪᠠᠭᠤᠯᠭᠠᠪᠠᠢ᠃ ᠡᠨᠡ ᠦᠨᠡᠬᠡᠷ :
ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨᠠ ᠬᠣᠣᠰᠯᠠᠵᠤ ᠪᠣᠯᠬᠤ ᠳᠠᠩ ᠲᠠᠢᠽᠥ᠋ᠩ ᠪᠣᠢ ᠠᠮᠤᠢ
ᠲᠠᠰᠤᠷᠬᠠᠢ ᠮᠤᠬᠤᠯᠢ ᠳᠠᠢᠪᠠᠩ ᠳ᠋ᠤᠷ ᠳᠠᠭᠠᠴᠢᠭᠤᠯᠤᠨ ᠬᠡᠯᠡᠬᠦ ᠵᠢᠨᠦᠩ ᠦᠨᠡᠬᠡᠷ ᠴᠥᠭᠡᠨ᠃
ᠲᠡᠨᠳᠡᠴᠡ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠵᠢᠨᠦᠩ ᠦ᠋ᠨ ᠠᠷᠰᠯᠠᠨᠲᠤ ᠴᠠᠴᠠᠷ ᠲᠤᠷ ᠪᠠᠭᠤᠮᠠᠭᠴᠠ ᠵᠢᠨᠦᠩ ᠮᠤᠬᠤᠯᠢ ᠲᠠᠪᠤᠨ ᠵᠡᠪᠡ ᠰᠤᠭᠤᠯᠵᠤ᠂ ᠲᠠᠪᠤᠨ ᠶᠡᠬᠡ ᠵᠠᠩᠵᠤᠨ ᠢ᠋ ᠵᠠᠷᠯᠠᠨ ᠢᠷᠡᠭᠦᠯᠪᠡ᠃ ᠡᠨᠡ ᠢᠨᠤ ᠬᠡᠨ ᠬᠡᠨ? ᠬᠡᠮᠡᠪᠡᠰᠦ᠄ ᠲᠡᠷᠢᠭᠦᠨ ᠳ᠋ᠦ᠍ᠷ ᠶᠡᠬᠡ ᠲᠠᠢᠪᠤᠤ ᠬᠦᠯᠦᠭ ᠨᠣᠶᠠᠨ ᠪᠤᠭᠤᠷᠵᠢ᠂ ᠳᠡᠳ᠋ ᠲᠣᠷ ᠶᠡᠬᠡ ᠲᠠᠢᠽᠢ ᠴᠢᠨ ᠸᠠᠩ ᠵᠣᠴᠢ᠂ ᠭᠤᠲᠠᠭᠠᠷ ᠲᠤᠷ ᠬᠦᠯᠦᠭ ᠨᠣᠶᠠᠨ ᠲᠠᠢᠪᠤᠤ ᠲᠦᠰᠢᠮᠡᠯ ᠴᠢᠯᠠᠭᠤᠨ᠂ ᠳᠥᠲᠥᠭᠡᠷ ᠲᠣᠷ ᠬᠦᠯᠦᠭ ᠨᠣᠶᠠᠨ ᠲᠠᠢᠪᠤᠤ ᠲᠦᠰᠢᠮᠡᠯ ᠪᠤᠷᠤᠭᠤᠯ᠂ ᠲᠠᠪᠤᠳᠤᠭᠠᠷ ᠲᠤᠷ ᠪᠦᠬᠦ ᠴᠢᠨ ᠸᠠᠩ ᠪᠡᠯᠭᠦᠳᠡᠢ ᠴᠧᠩᠰᠢᠶᠠᠩ ᠪᠣᠯᠠᠢ᠃ ᠵᠢᠨᠦᠩ ᠮᠤᠬᠤᠯᠢ ᠡᠨᠡ ᠲᠠᠪᠤᠨ ᠶᠡᠬᠡ ᠲᠡᠷᠢᠭᠦᠯᠡᠭᠴᠢ ᠨᠣᠶᠠᠳ ᠤ᠋ᠨ ᠳᠣᠣᠷᠠ ᠬᠥᠮᠦᠨ ᠪᠦᠷᠢ ᠳ᠋ᠦ᠍ᠷ ᠲᠠᠪᠤᠨ ᠪᠠᠭᠠ ᠵᠠᠩᠵᠤᠨ ᠨᠠᠢ᠍ᠮᠠᠨ ᠮᠢᠩᠭᠠᠨ ᠴᠡᠷᠢᠭ ᠲᠡᠢ ᠥᠭᠴᠦ ᠥᠭᠦᠯᠡᠷᠦᠨ᠄
《 ᠲᠠᠢᠽᠢ ᠵᠣᠴᠢ ᠴᠢᠨ ᠸᠠᠩ ᠵᠡᠭᠦᠨ ᠡᠮᠦᠨᠡ ᠵᠠᠬᠠ ᠵᠣᠪᠬᠢᠰ ᠤ᠋ᠨ ᠬᠣᠯᠪᠣᠣ ᠬᠡᠮᠡᠬᠦ ᠮᠠᠩᠬᠠᠨᠠ ᠴᠡᠷᠢᠭ ᠪᠠᠭᠤᠳᠠᠯᠯᠠᠵᠤ ᠶᠡᠬᠡ ᠠᠪᠠ ᠲᠠᠯᠪᠢᠵᠤ᠂ ᠬᠢᠳᠠᠨ ᠤᠯᠤᠰ ᠠ᠋ᠴᠠ ᠰᠡᠵᠢᠭᠯᠡᠭᠦᠯᠬᠦ ᠴᠡᠷᠢᠭ ᠢ᠋ ᠢᠨᠠᠭᠰᠢ ᠥᠩᠭᠡᠷᠡᠭᠦᠯᠦᠭᠡᠳ᠂ ᠲᠡᠭᠦᠨᠦ ᠠᠷᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠢᠨᠠᠭᠰᠢ ᠠᠯᠠᠵᠤ ᠢᠷᠡᠭᠲᠦᠨ᠃ ᠬᠦᠯᠦᠭ ᠨᠣᠶᠠᠨ ᠴᠢᠯᠠᠭᠤᠨ᠂ ᠬᠣᠯᠪᠤᠤ ᠮᠠᠩᠬᠠᠨ ᠤ᠋ ᠪᠠᠷᠠᠭᠤᠨ ᠬᠣᠢᠲᠤ ᠪᠣᠷᠣ ᠳᠠᠷᠠᠰᠤᠲᠠᠢ ᠳ᠋ᠤᠷ ᠴᠡᠷᠢᠭ ᠪᠠᠭᠤᠵᠤ᠂ ᠭᠥᠷᠦᠭᠡᠰᠦᠨ ᠦ᠌ ᠠᠪᠠ ᠠᠪᠠᠯᠠᠨ ᠬᠢᠳᠠᠨ ᠤ᠋ ᠴᠡᠷᠢᠭ ᠵᠣᠴᠢ ᠴᠢᠨ ᠸᠠᠩ ᠤ᠋ᠨ ᠴᠡᠷᠢᠭ ᠡᠴᠡ ᠳᠤᠲᠠᠭᠠᠵᠤ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠳᠣᠪᠲᠣᠯᠬᠤᠯᠠ᠂ ᠬᠥᠨᠳᠡᠯᠡᠨ ᠡᠲᠡᠭᠡᠳ ᠡᠴᠡ ᠴᠣᠬᠢᠵᠤ ᠠᠯᠠᠨ ᠭᠠᠷᠴᠤ ᠬᠢᠳᠠᠨ ᠤ᠋ ᠴᠡᠷᠢᠭ ᠢ᠋ ᠲᠠᠰᠤᠯᠤᠨ ᠪᠠᠢᠯᠳᠤᠵᠤ᠂ ᠵᠣᠴᠢ ᠴᠢᠨ ᠸᠠᠩ ᠤ᠋ᠨ ᠴᠡᠷᠢᠭ ᠯᠦ᠍ᠭᠡ ᠨᠡᠢᠯᠡᠪᠡᠰᠦ᠂ ᠠᠯᠢᠪᠠ ᠠᠴᠢᠶᠠ ᠬᠥᠰᠬᠡ ᠶ᠋ᠢᠨ ᠬᠦᠨᠳᠦ ᠶ᠋ᠢ ᠢᠨᠦ ᠬᠤᠷᠢᠶᠠᠮᠵᠢᠯᠠᠭᠠᠳ ᠳᠠᠷᠤᠢ ᠴᠡᠷᠢᠭ ᠡᠭᠡᠮᠦᠢ ᠬᠡᠮᠡᠪᠡ᠃ ᠪᠤᠷᠤᠭᠤᠯᠠᠭᠰᠠᠨ ᠴᠡᠷᠢᠭ ᠦ᠋ᠨ ᠬᠣᠢᠨᠠ ᠠ᠋ᠴᠠ ᠨᠡᠬᠡᠬᠦ ᠦᠭᠡᠢ᠃ ᠴᠡᠷᠢᠭ ᠪᠠᠭᠤᠳᠠᠯᠯᠠᠨ ᠭᠤᠷᠪᠠᠨ ᠡᠳᠦᠷ ᠲᠦᠳᠡᠭᠡᠯᠵᠡᠨ ᠬᠦᠯᠢᠶᠡᠵᠦ᠂ ᠬᠢᠳᠠᠨ ᠤ᠋ ᠪᠤᠲᠠᠷᠠᠭᠰᠠᠨ ᠴᠡᠷᠢᠭ ᠴᠤᠭᠯᠠᠷᠠᠨ ᠪᠠᠭᠯᠠᠷᠠᠯᠳᠤᠵᠤ᠂ ᠬᠣᠢᠨᠠ ᠠ᠋ᠴᠠ ᠨᠡᠬᠡᠬᠦ ᠦᠭᠡᠢ ᠪᠣᠯᠪᠠ ᠭᠡᠮᠡᠨ ᠰᠠᠨᠠᠬᠤ ᠦᠶᠡ ᠳ᠋ᠦ᠍ᠷ ᠰᠥᠨᠢ ᠳᠦᠯᠢ ᠪᠡᠷ ᠭᠡᠨᠡᠳᠲᠡ ᠶᠠᠪᠠᠭᠠᠨ ᠬᠥᠰᠬᠡ ᠬᠥᠩᠭᠡᠨ ᠮᠣᠷᠢᠨ ᠤ᠋ ᠨᠢᠰᠦᠨ ᠳᠣᠪᠲᠣᠯᠭᠠ ᠪᠠᠷ ᠭᠦᠢᠴᠡᠵᠦ᠂ ᠬᠢᠶᠠᠷᠠᠲᠠᠯᠠ ᠲᠠᠢᠯᠵᠤ᠂ ᠦᠯᠡᠭᠰᠡᠨ ᠢ᠋ ᠡᠯᠰᠡᠨ ᠠᠪᠴᠤ ᠢᠷᠡᠭᠲᠦᠨ᠃ ᠨᠢᠭᠡᠬᠡᠨ ᠬᠥᠮᠦᠨ ᠢ᠋ ᠴᠦ᠍ ᠡᠭᠡᠭᠦᠯᠵᠦ ᠪᠣᠯᠬᠤ ᠦᠭᠡᠢ᠃ ᠡᠭᠦᠡᠴᠡ ᠡᠮᠦᠨᠡ ᠵᠦᠭ ᠦ᠋ᠨ ᠴᠡᠷᠢᠭ᠂ ᠬᠣᠢᠲᠤ ᠵᠦᠭ ᠬᠠᠨᠳᠤᠰᠢ ᠦᠭᠡᠢ ᠪᠣᠯᠭᠠ᠂ ᠡᠨᠡ ᠬᠡᠮᠡᠭᠴᠢ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠦᠨᠳᠦᠰᠦᠨ ᠢ᠋ ᠡᠭᠦᠷᠢ ᠤᠷᠲᠤᠳᠠ ᠪᠠᠲᠤᠳᠬᠠᠬᠤ ᠬᠦᠨᠳᠦ ᠴᠢᠬᠤᠯᠠ ᠶᠡᠬᠡ ᠦᠢᠯᠡ ᠪᠣᠯᠠᠢ᠃ ᠴᠡᠷᠢᠭ ᠬᠡᠳᠦᠬᠡᠨ ᠮᠢᠩᠭᠠᠨ ᠤ᠋ ᠲᠡᠳᠦᠢ ᠪᠣᠯᠪᠠᠴᠤ᠂ ᠬᠡᠷᠡᠭ ᠢᠨᠦ ᠮᠠᠰᠢ ᠴᠢᠬᠤᠯᠠ ᠠ᠋ᠴᠠ ᠴᠢᠬᠤᠯᠠ᠂ ᠡᠭᠦᠨ ᠢ᠋ᠶ᠋ᠡᠷ ᠡᠮᠦᠨᠡ ᠵᠠᠮ ᠤ᠋ᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠤᠮᠠᠷᠠᠰᠢ ᠬᠠᠨᠳᠤᠬᠤ ᠵᠠᠮ ᠢ᠋ ᠨᠢᠭᠡᠮᠦᠰᠦᠨ ᠲᠠᠰᠤᠯᠤᠨ ᠠᠷᠢᠯᠭᠠᠬᠤ ᠠᠨᠤ ᠡᠨᠡ ᠤᠳᠠᠭᠠ ᠳ᠋ᠤᠷ ᠪᠣᠢ ᠠᠮᠤᠢ᠃ ᠲᠠᠢᠽᠢ ᠴᠢᠨ ᠸᠠᠩ ᠢ᠋ᠶ᠋ᠠᠷ ᠠᠷᠪᠠᠨ ᠬᠤᠪᠢ ᠶ᠋ᠢᠨ ᠬᠢᠴᠢᠶᠡᠯᠲᠦ ᠰᠡᠳᠬᠢᠯ ᠢ᠋ᠶ᠋ᠡᠷ ᠴᠢᠷᠮᠠᠢᠨ ᠭᠦᠢᠴᠡᠳᠬᠡᠭᠲᠦᠨ᠃ ᠡᠨᠡ ᠴᠠᠭᠠᠵᠠ ᠬᠠᠤᠯᠢ ᠬᠡᠮᠡᠭᠴᠢ ᠲᠠᠢᠽᠢ ᠲᠠᠨ ᠤ᠋ ᠥᠪᠡᠷᠦᠨ ᠴᠠᠭᠠᠵᠠ ᠬᠠᠤᠯᠢ ᠪᠤᠶᠤ᠃ ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠮᠢᠨᠦ ᠶᠠᠪᠤᠭᠤᠯᠬᠤ ᠬᠡᠪ ᠬᠡᠮᠵᠢᠶᠡ ᠬᠡᠮᠡᠭᠴᠢ ᠴᠥᠮ ᠢ᠋ᠶ᠋ᠡᠷ ᠪᠠᠭᠠ ᠡᠵᠡᠳ ᠲᠠᠨ ᠳ᠋ᠤᠷ ᠲᠣᠭᠲᠠᠭᠠᠵᠤ ᠥᠭᠬᠦ ᠬᠡᠪ ᠬᠡᠮᠵᠢᠶᠡ ᠪᠤᠶᠤ᠃ ᠴᠠᠭᠠᠵᠠ ᠶ᠋ᠢ ᠴᠢᠩᠭᠠ ᠬᠠᠤᠯᠢ ᠶ᠋ᠢ ᠬᠠᠲᠠᠭᠤ ᠪᠣᠯᠭᠠᠬᠤ ᠤᠭ ᠦᠨᠳᠦᠰᠦ᠂ ᠶᠡᠬᠡ ᠡᠷᠬᠡᠲᠡᠨ ᠰᠠᠭᠤᠷᠢᠨ ᠲᠠᠨ ᠢ᠋ ᠵᠠᠰᠠᠭᠯᠠᠬᠤ ᠠ᠋ᠴᠠ ᠰᠠᠶᠢ ᠣᠯᠠᠨ ᠨᠡᠢᠲᠡ ᠪᠡᠷ ᠠᠶᠤᠨ ᠪᠢᠰᠢᠷᠡᠮᠦᠢ᠃ ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠪᠢ ᠡᠳᠦᠭᠡ ᠬᠠᠷᠠᠬᠠᠨ ᠡᠷᠬᠡᠪᠰᠢ ᠳᠥᠷᠪᠡᠨ ᠲᠠᠢᠽᠢ ᠡᠵᠡᠳ ᠨᠠᠷ ᠤ᠋ᠨ ᠨᠢᠭᠡᠨ ᠦ᠌ ᠶᠠᠯᠠ ᠪᠤᠷᠤᠭᠤ ᠶ᠋ᠢ ᠡᠷᠢᠨ ᠪᠠᠷᠢᠵᠤ ᠴᠢᠩᠳᠠᠯᠠᠨ ᠶᠠᠯᠠᠯᠠᠭᠠᠳ᠂ ᠶᠡᠬᠡ ᠮᠣᠩᠭᠣᠯ ᠤ᠋ᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠲᠦᠭ ᠲᠦᠮᠡᠨ ᠂ ᠡᠷᠬᠡᠲᠡᠨ ᠪᠡᠷᠬᠡᠳᠡᠨ ᠢ᠋ ᠴᠠᠭᠠᠵᠠ ᠶ᠋ᠢ ᠰᠠᠬᠢᠭᠤᠯᠤᠨ ᠬᠠᠤᠯᠢ ᠶ᠋ᠢ ᠬᠠᠳᠠᠭᠠᠯᠠᠭᠤᠯᠬᠤ ᠶ᠋ᠢ ᠡᠳᠦᠭᠡ ᠡᠷᠢᠬᠦ ᠴᠠᠭ᠂ ᠲᠠᠢᠽᠢ ᠴᠢᠨ ᠸᠠᠩ ᠡᠷᠬᠡᠪᠰᠢ ᠳᠠᠬᠢᠨ ᠳᠠᠬᠢᠨ ᠨᠠᠷᠢᠪᠴᠢᠯᠠᠨ ᠬᠢᠨᠠᠵᠤ ᠲᠤᠰᠢᠶᠠᠭᠰᠠᠨ ᠬᠡᠷᠡᠭ ᠢ᠋ᠶ᠋ᠡᠨ ᠬᠠᠳᠠᠨ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠵᠤ᠂ ᠭᠠᠪᠢᠶᠠ ᠪᠦᠲᠦᠭᠡᠵᠦ ᠡᠭᠡᠭᠲᠦᠨ᠂ ᠣᠰᠣᠯᠳᠠᠪᠠᠰᠤ ᠬᠤᠸᠠᠩᠳᠢ ᠶ᠋ᠢᠨ ᠴᠠᠭᠠᠵᠠ ᠪᠠᠷ ᠶᠠᠯᠠᠯᠠᠵᠤ ᠣᠯᠠᠨ ᠢ᠋ ᠴᠡᠭᠡᠷᠯᠡᠭᠦᠯᠦᠮᠦᠢ᠃ ᠴᠢᠨ ᠸᠠᠩ ᠪᠢᠲᠡᠭᠡᠢ ᠮᠠᠭᠤ ᠰᠠᠨᠠᠭᠲᠤᠨ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠣᠴᠢ ᠴᠢᠨ ᠸᠠᠩ ᠨᠢᠷᠤᠭᠤ ᠮᠡᠬᠦᠢᠵᠦ ᠥᠴᠢᠷᠦᠨ᠄
《ᠵᠢᠨᠦᠩ ᠦ᠋ᠨ ᠴᠠᠭᠠᠵᠠ ᠶ᠋ᠢ ᠬᠢᠴᠢᠶᠡᠨ ᠳᠠᠭᠠᠵᠤ᠂ ᠬᠣᠯᠪᠤᠤ ᠮᠠᠩᠬᠠᠨᠠ ᠡᠴᠢᠬᠦᠶᠡ ᠮᠠᠰᠢ ᠭᠢᠯᠪᠠᠢ᠃ ᠭᠠᠭᠴᠠ ᠲᠡᠷᠡ ᠵᠠᠮ ᠢ᠋ᠶ᠋ᠠᠷ ᠢᠷᠡᠬᠦ ᠦᠭᠡᠢ ᠡᠴᠡ ᠪᠣᠯᠭᠣᠮᠵᠢᠯᠠᠮᠤᠢ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠴᠢᠷᠠᠢ ᠲᠠᠯᠪᠢᠨ ᠥᠭᠦᠯᠡᠷᠦᠨ᠄
《 ᠬᠢᠳᠠᠨ ᠤ᠋ ᠴᠡᠷᠢᠭ᠂ ᠬᠡᠷᠪᠡ ᠬᠣᠯᠪᠤᠤ ᠮᠠᠩᠬᠠᠨ ᠤ᠋ ᠭᠠᠵᠠᠷ ᠢ᠋ᠶ᠋ᠠᠷ ᠡᠰᠡ ᠢᠷᠠᠪᠠᠰᠤ᠂ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠᠨ ᠤ᠋ ᠪᠢᠴᠢᠭ ᠪᠠᠢᠭᠤᠯᠵᠤ᠂ ᠮᠤᠬᠤᠯᠢ ᠪᠢ ᠡᠨᠡ ᠵᠢᠨᠦᠩ ᠦ᠋ᠨ ᠲᠤᠰᠢᠶᠠᠯ ᠢ᠋ᠶ᠋ᠠᠨ ᠶᠡᠬᠡ ᠲᠠᠢᠽᠢ ᠳ᠋ᠤᠷ ᠨᠠᠢᠷ ᠲᠠᠯᠪᠢᠨ ᠡᠷᠭᠦᠰᠦᠭᠡᠢ᠃ ᠬᠢᠳᠠᠨ ᠤ᠋ ᠴᠡᠷᠢᠭ ᠬᠤᠯᠪᠤᠤ ᠮᠠᠩᠬᠠᠨ ᠢ᠋ᠶ᠋ᠠᠷ ᠢᠷᠡᠵᠦ ᠪᠠᠢᠲᠠᠯᠠ᠂ ᠶᠡᠬᠡ ᠲᠠᠢᠽᠢ ᠳᠠᠢᠯᠠᠵᠤ ᠡᠰᠡ ᠳᠡᠢᠯᠦᠭᠡᠳ ᠪᠦᠷᠢᠨᠡ ᠪᠠᠷᠢᠵᠤ ᠡᠰᠡ ᠠᠴᠢᠷᠠᠪᠡᠰᠤ ᠬᠡᠷᠬᠢᠮᠦᠢ ?》ᠬᠡᠮᠡᠭᠰᠡᠨᠡ᠂ ᠵᠣᠴᠢ ᠴᠢᠨ ᠸᠠᠩ ᠢᠨᠢᠶᠡᠵᠦ ᠮᠡᠬᠦᠢᠵᠦ ᠥᠴᠢᠷᠦᠨ᠄
《ᠮᠥᠨ ᠬᠦ᠌ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠᠨ ᠤ᠋ ᠪᠢᠴᠢᠭ ᠪᠠᠢᠭᠤᠯᠵᠤ ᠲᠠᠢᠽᠢ ᠴᠣᠯᠠ ᠸᠠᠩ ᠤ᠋ᠨ ᠬᠡᠷᠬᠡᠮ ᠢ᠋ ᠪᠦᠷᠢᠨᠡ ᠲᠠᠯᠪᠢᠮᠤᠢ ᠶᠠ᠃ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠥᠭᠦᠯᠡᠷᠦᠨ᠄
《 ᠲᠠᠢᠽᠢ ᠪᠠᠷ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠ ᠪᠠᠷ ᠨᠠᠭᠠᠳᠤᠮ ᠪᠣᠯᠭᠠᠵᠤ ᠦᠯᠦ ᠪᠣᠯᠤᠮᠤᠢ》ᠬᠡᠮᠡᠪᠡᠰᠦ᠂ ᠵᠣᠴᠢ ᠴᠢᠨ ᠸᠠᠩ᠂ ᠳᠤᠷᠠᠲᠠᠶᠠ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠᠨ ᠤ᠋ ᠪᠢᠴᠢᠭ ᠪᠠᠢᠭᠤᠯᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠣᠯᠠᠨ ᠤ᠋ ᠵᠢᠭᠰᠠᠭᠠᠯ ᠠ᠋ᠴᠠ ᠬᠦᠯᠦᠭ ᠲᠠᠢᠪᠤᠤ ᠪᠤᠭᠤᠷᠤᠯ᠂ ᠬᠥᠭᠰᠢᠨ ᠲᠦᠰᠢᠮᠡᠯ ᠰᠢᠬᠦᠷ᠂ ᠬᠠᠭᠤᠴᠢᠨ ᠵᠠᠩᠵᠤᠨ ᠮᠡᠩᠬᠡᠯᠢᠭ ᠭᠤᠷᠪᠠᠭᠤᠯᠠ ᠤᠷᠤᠭᠰᠢ ᠳᠠᠪᠰᠢᠨ ᠵᠣᠴᠢ ᠴᠢᠨ ᠸᠠᠩ ᠢ᠋ ᠬᠣᠷᠢᠭᠯᠠᠨ᠂ ᠵᠢᠨᠦᠩ ᠯᠤᠭᠠ ᠣᠯᠠᠨ ᠦᠭᠡ ᠦᠯᠦ ᠥᠭᠦᠯᠡᠮᠦ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠣᠴᠢ ᠴᠢᠨ ᠸᠠᠩ᠄
《 ᠵᠢᠨᠦᠩ ᠦ᠋ᠨ ᠵᠠᠬᠢᠶᠠ ᠶ᠋ᠢ ᠳᠠᠭᠠᠭᠰᠠᠨ ᠪᠣᠢ ᠶᠠ᠂ ᠣᠯᠠᠨᠲᠠ ᠥᠭᠦᠯᠡᠭᠰᠡᠨ ᠦᠭᠡ ᠪᠤᠰᠤ᠂ ᠳᠤᠷᠠᠲᠠᠶᠠ ᠵᠢᠨᠦᠩ ᠦ᠋ᠨ ᠴᠠᠭᠠᠵᠠ ᠪᠠᠷ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠᠨ ᠤ᠋ ᠪᠢᠴᠢᠭ ᠪᠠᠢᠭᠤᠯᠬᠤᠢ ᠶ᠋ᠢ ᠬᠦᠰᠡᠮᠦᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠢᠨᠦᠩ ᠮᠤᠬᠤᠯᠢ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ᠂ ᠠᠷᠰᠯᠠᠨ ᠤ᠋ ᠰᠢᠷᠡᠭᠡᠨᠡ ᠵᠣᠭᠰᠣᠵᠤ᠂ ᠴᠡᠷᠢᠭ ᠦ᠋ᠨ ᠰᠢᠪᠠᠭᠠ ᠰᠤᠮᠤ ᠶ᠋ᠢ ᠨᠢᠭᠡᠨᠲᠡ ᠴᠣᠬᠢᠵᠤ ᠪᠠᠭᠤᠯᠭᠠᠮᠠᠭᠴᠠ᠂ ᠶᠡᠬᠡ ᠵᠦᠩ ᠬᠡᠩᠭᠡᠷᠭᠡ ᠬᠠᠮᠲᠤᠪᠠᠷ ᠳᠠᠭᠤᠷᠢᠰᠴᠤ᠂ ᠨᠠᠢ᠍ᠮᠠᠨ ᠤᠭᠰᠠᠭᠠ ᠸᠠᠩ᠄ ᠲᠠᠪᠤᠨ ᠲᠡᠷᠢᠭᠦᠯᠡᠭᠰᠡᠨ ᠲᠡᠢᠰᠢ ᠪᠦᠷᠢᠨᠡ ᠴᠤᠭᠯᠠᠵᠤ᠂ ᠴᠠᠭᠠᠵᠠᠨ ᠤ᠋ ᠪᠢᠴᠢᠭ ᠪᠠᠢᠭᠤᠯᠬᠤᠶᠠ᠂ ᠣᠯᠠᠨ ᠶᠡᠬᠡ ᠰᠠᠭᠤᠷᠢᠨᠲᠤ ᠨᠣᠶᠠᠳ᠂ ᠵᠢᠨᠦᠩ ᠦ᠋ᠨ ᠬᠢᠯᠢᠩᠲᠦ ᠪᠠᠢᠳᠠᠯ ᠢ᠋ ᠦᠵᠡᠭᠡᠳ ᠠᠶᠤᠮᠰᠢᠭ ᠦᠭᠡᠢ ᠢᠯᠭᠠᠨ ᠬᠡᠯᠡᠯᠴᠡᠬᠦ ᠦᠭᠡᠢ᠃ ᠣᠯᠠᠨ ᠪᠢᠴᠢᠭ ᠦ᠋ᠨ ᠰᠠᠢᠳ ᠳ᠋ᠠᠳᠠᠳᠤᠩᠭᠠ ᠲᠡᠷᠢᠭᠦᠯᠡᠨ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠᠨ ᠤ᠋ ᠪᠢᠴᠢᠭ ᠢ᠋ ᠪᠠᠢᠭᠤᠯᠵᠤ ᠵᠢᠨᠦᠩ ᠦ᠋ᠨ ᠴᠠᠴᠠᠷ ᠪᠠ ᠶᠡᠬᠡ ᠲᠥᠷᠥ ᠳ᠋ᠦ᠍ᠷ ᠴᠥᠮ ᠤᠯᠠᠭᠠᠨ ᠲᠤᠩᠬᠠᠭ ᠨᠠᠭᠠᠭᠰᠠᠨ ᠳ᠋ᠤᠷ ᠬᠤᠸᠠᠩᠳᠢ ᠬᠤᠸᠠᠩᠬᠡᠦ ᠶ᠋ᠢᠨ ᠰᠣᠨᠣᠷ ᠲᠤᠷ ᠴᠥᠮ ᠬᠦᠷᠴᠦ᠂ ᠬᠠᠭᠠᠨ ᠬᠠᠲᠤᠨ ᠤ᠋ ᠬᠢᠯᠢᠩᠲᠦ ᠵᠠᠷᠯᠢᠭ ᠬᠠᠮᠲᠤ ᠪᠠᠭᠤᠵᠤ ᠢᠷᠡᠭᠰᠡᠨ ᠢᠨᠦ᠄
《ᠵᠣᠴᠢ ᠴᠢᠨ ᠸᠠᠩ ᠤ᠋ᠨ ᠵᠢᠨᠦᠩ ᠯᠦ᠍ᠭᠡ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠᠨ ᠤ᠋ ᠪᠢᠴᠢᠭ ᠪᠠᠢᠭᠤᠯᠤᠭᠰᠠᠨ ᠤ᠋ ᠲᠤᠯᠠᠳᠠ᠂ ᠴᠠᠭᠠᠵᠠᠨ ᠤ᠋ ᠬᠡᠷᠡᠭ ᠲᠡᠭᠦᠰᠦᠨ ᠲᠡᠭᠦᠰᠲᠡᠯᠡ ᠵᠣᠴᠢ ᠴᠢᠨ ᠸᠠᠩ ᠬᠠᠭᠠᠨ ᠬᠠᠲᠤᠨ ᠳ᠋ᠤᠷ ᠪᠠᠷᠠᠭᠠᠯᠠᠵᠤ ᠪᠣᠯᠬᠤ ᠦᠭᠡᠢ᠂ ᠬᠡᠵᠢᠶᠡ ᠴᠠᠭᠠᠵᠠ ᠶ᠋ᠢᠨ ᠬᠡᠷᠡᠭ ᠢᠯᠭᠠᠷᠠᠨ ᠲᠡᠭᠦᠰᠦᠭᠰᠡᠨ ᠬᠣᠢᠨᠠ ᠵᠢᠨᠦᠩ ᠯᠦ᠍ᠭᠡ ᠮᠥᠴᠡᠭᠡᠷᠬᠡᠭᠰᠡᠨ ᠶᠠᠯᠠ ᠶ᠋ᠢ ᠵᠢᠴᠢ ᠢᠯᠭᠠᠨ ᠬᠡᠯᠡᠯᠴᠡᠵᠦ᠂ ᠵᠠᠷᠯᠢᠭ ᠪᠠᠭᠤᠬᠤ ᠶ᠋ᠢ ᠬᠦᠯᠢᠶᠡᠵᠦ᠂ ᠰᠠᠶᠢ ᠳᠣᠲᠣᠭᠠᠳᠤ ᠣᠷᠲᠣᠨᠠ ᠤᠷᠤᠭᠤᠯ 》ᠬᠡᠮᠡᠵᠦᠬᠦᠢ᠃
ᠬᠤᠸᠠᠩᠬᠡᠦ ᠶ᠋ᠢᠨ ᠲᠡᠨᠳᠡ ᠡᠴᠡ ᠡᠬᠡᠨᠡᠷ ᠰᠠᠢᠳ ᠠᠮᠠᠯᠠᠨ ᠭᠠᠷᠭᠠᠵᠤ᠄ 《ᠵᠣᠴᠢ ᠴᠢᠨ ᠸᠠᠩ ᠤ᠋ᠨ ᠳᠣᠲᠣᠭᠠᠳᠤ ᠣᠷᠳᠣᠨ ᠤ᠋ ᠬᠠᠲᠤᠳ ᠹᠧᠢ ᠨᠠᠷ ᠢ᠋ ᠴᠠᠭᠠᠵᠠᠨ ᠤ᠋ ᠬᠡᠷᠡᠭ ᠲᠡᠭᠦᠰᠦᠨ ᠲᠡᠭᠦᠰᠲᠡᠯᠡ ᠵᠠᠬᠢᠷᠤᠨ ᠬᠠᠳᠠᠭᠠᠯᠠᠭᠤᠯ᠃ ᠮᠥᠨ ᠬᠦ᠌ ᠬᠠᠭᠠᠨ ᠬᠠᠳᠤᠨᠠ ᠠᠮᠤᠭᠤᠯᠠᠩ ᠠᠢᠯᠠᠳᠬᠠᠵᠤ ᠪᠣᠯᠬᠤ ᠦᠭᠡᠢ》ᠬᠡᠮᠡᠪᠡ᠃
ᠡᠨᠡ ᠨᠢᠭᠡᠨ ᠵᠠᠷᠯᠢᠭ ᠲᠤᠷ ᠲᠥᠷᠥ ᠶ᠋ᠢᠨ ᠬᠣᠲᠠᠯᠠᠭᠠᠷ ᠶᠡᠬᠡᠯᠡ ᠠᠶᠤᠨ ᠳᠣᠷᠭᠢᠯᠤᠨ ᠬᠡᠯᠡᠯᠴᠡᠵᠦ᠂ ᠡᠭᠦᠨᠴᠡ ᠵᠢᠨᠦᠩ ᠦ᠋ᠨ ᠲᠠᠭᠲᠤ ᠶ᠋ᠢᠨ ᠭᠠᠵᠠᠷᠠ ᠠᠶᠤᠨ ᠴᠡᠴᠡᠷᠡᠬᠦ ᠢᠨᠦ ᠤᠯᠠᠮ ᠴᠢᠩ ᠬᠢᠴᠢᠶᠡᠩᠭᠦᠢ ᠪᠣᠯᠵᠤᠬᠤᠢ᠃ ᠥᠭᠡᠳᠡᠯᠡᠬᠦ ᠲᠥᠷᠥ ᠶ᠋ᠢᠨ ᠥᠪᠡᠷᠮᠢᠴᠡ ᠠᠷᠭᠠ ᠪᠤᠶᠤ᠃
ᠲᠡᠨᠳᠡᠴᠡ ᠵᠣᠴᠢ ᠴᠢᠨ ᠸᠠᠩ᠂ ᠬᠦᠯᠦᠭ ᠲᠠᠢᠪᠤᠤ ᠴᠢᠯᠠᠭᠤᠨ ᠨᠣᠶᠠᠨ ᠲᠠᠨ ᠤ᠋ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠮᠣᠷᠳᠠᠮᠠᠭᠴᠠ᠂ ᠵᠢᠨᠦᠩ ᠦ᠋ᠨ ᠲᠠᠭᠲᠤ ᠳ᠋ᠤᠷ ᠬᠤᠶᠠᠭ ᠤ᠋ᠳ ᠬᠠᠰᠬᠢᠷᠤᠯᠴᠠᠨ᠂ ᠳᠥᠷᠪᠡᠨ ᠨᠡᠷᠡ ᠶ᠋ᠢᠨ ᠵᠡᠪᠡ ᠠᠪᠤᠨ ᠪᠠᠭᠤᠵᠤ᠂ ᠳᠥᠷᠪᠡᠨ ᠶᠡᠬᠡ ᠵᠠᠩᠵᠤᠨ ᠢ᠋ ᠵᠠᠷᠯᠠᠵᠤ ᠲᠠᠭᠲᠤ ᠳ᠋ᠤᠷ ᠠᠪᠠᠷᠢᠭᠤᠯᠵᠤ᠂ ᠪᠤᠰᠤ ᠠᠷᠠᠳ ᠴᠥᠮ ᠪᠠᠭᠤᠪᠠ᠃ ᠡᠨᠡ ᠵᠠᠷᠯᠠᠭᠰᠠᠨ ᠳᠥᠷᠪᠡᠨ ᠵᠠᠩᠵᠤᠨ ᠬᠡᠨ ᠬᠡᠨ ᠬᠡᠮᠡᠪᠡᠰᠦ᠂ ᠤᠯᠤᠰ ᠤ᠋ᠨ ᠨᠠᠭᠠᠴᠤ ᠬᠦᠩ ᠨᠣᠶᠠᠨ ᠠᠵᠢᠨᠠᠢ ᠮᠡᠷᠭᠡᠨ᠂ ᠪᠠᠭᠠ ᠨᠠᠭᠠᠴᠤ ᠨᠣᠶᠠᠨ ᠬᠤᠳᠠᠷᠭᠠ ᠪᠠᠭᠠᠲᠤᠷ᠂ ᠴᠢᠨ ᠸᠠᠩ ᠪᠦᠬᠦ ᠪᠡᠯᠭᠦᠳᠡᠢ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠡᠷᠲᠡ ᠰᠠᠷᠠᠨ᠂ ᠴᠢᠨ ᠸᠠᠩ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠶᠡᠬᠡ ᠬᠥᠪᠡᠭᠦᠨ ᠳᠣᠵᠤ ᠳᠣᠭᠰᠢᠨ᠂ ᠡᠨᠡ ᠳᠥᠷᠪᠡᠭᠦᠯᠡ ᠶ᠋ᠢ ᠵᠢᠨᠦᠩ ᠮᠤᠬᠤᠯᠢ ᠰᠢᠳᠠᠷ ᠳᠡᠷᠭᠡᠳᠡ ᠪᠡᠨ ᠣᠢᠷᠠᠯᠴᠠᠭᠠ ᠳᠠᠭᠤᠳᠠᠨ ᠠᠪᠠᠴᠢᠵᠤ᠂ ᠰᠢᠷᠡᠭᠡ ᠪᠡᠨ ᠲᠣᠭᠣᠷᠢᠭᠤᠯᠤᠨ ᠵᠣᠭᠰᠣᠭᠠᠵᠤ᠂ ᠬᠠᠨᠴᠤᠢ ᠠ᠋ᠴᠠᠭᠠᠨ ᠨᠢᠭᠡᠨ ᠪᠢᠴᠢᠬᠠᠨ ᠣᠷᠢᠶᠠᠳᠠᠰᠤ ᠵᠢᠷᠤᠭ ᠭᠠᠷᠭᠠᠵᠤ᠂ ᠳᠥᠷᠪᠡᠭᠦᠯᠡ ᠶ᠋ᠢᠨ ᠳᠤᠮᠳᠠ ᠦᠵᠡᠭᠦᠯᠦᠭᠡᠳ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ᠄ ᠬᠢᠳᠠᠨ ᠤ᠋ ᠴᠡᠷᠢᠭ ᠢ᠋ ᠨᠢᠭᠡᠬᠡᠨ ᠬᠥᠮᠦᠨ ᠦᠯᠡᠳᠡᠭᠡᠯ ᠦᠭᠡᠢ ᠴᠥᠮ ᠪᠠᠷᠢᠵᠤ ᠠᠴᠢᠷᠠᠬᠤ ᠨᠠᠷᠢᠨ ᠨᠢᠭᠲᠠ ᠠᠷᠭᠠ ᠤᠬᠠᠭᠠᠨ ᠪᠠ ᠪᠠᠷᠠᠭᠤᠨ ᠢ᠋ ᠰᠡᠵᠢᠭᠯᠡᠭᠦᠯᠦᠨ ᠵᠡᠭᠦᠨ ᠢ᠋ᠶ᠋ᠡᠷ ᠪᠠᠢᠯᠳᠤᠬᠤ᠂ ᠬᠣᠢᠲᠤ ᠪᠠᠷ ᠲᠤᠰᠤᠭᠤᠯᠤᠨ ᠠᠯᠠᠭᠤᠯᠵᠤ ᠡᠮᠦᠨᠡ ᠳ᠋ᠦ᠍ᠷ ᠨᠦᠬᠡ ᠤᠬᠤᠬᠤ ᠵᠢᠷᠤᠭ ᠢ᠋ ᠬ᠍ᠤᠯᠪᠣᠤ ᠮᠠᠩᠬᠠᠨ ᠤ᠋ ᠵᠠᠬᠠ ᠠ᠋ᠴᠠ ᠡᠬᠢᠯᠡᠨ᠂ ᠪᠣᠷᠣ ᠪᠤᠷᠭᠠᠰᠤᠲᠠᠢ ᠶ᠋ᠢᠨ ᠬᠥᠪᠡᠭᠡ ᠬᠢᠵᠠᠭᠠᠷ ᠤ᠋ᠨ ᠶᠡᠬᠡ ᠭᠣᠣ᠂ ᠭᠦᠨ ᠭᠠᠩᠬᠠ ᠳ᠋ᠤᠷ ᠬᠦᠷᠲᠡᠯᠡ ᠤᠯᠠᠭᠠᠨ ᠤᠲᠠᠰᠤᠨ ᠤ᠋ ᠵᠤᠷᠪᠤᠰ ᠲᠡᠳᠡᠨ ᠵᠢᠭᠠᠨ ᠰᠤᠷᠭᠠᠭᠠᠳ᠂ ᠴᠡᠷᠢᠭ ᠮᠣᠷᠳᠠᠬᠤ ᠡᠳᠦᠷ ᠴᠠᠭ ᠢ᠋ ᠲᠣᠭᠲᠠᠭᠠᠨ ᠵᠠᠬᠢᠵᠤ᠂ ᠬᠥᠮᠦᠨ ᠪᠦᠷᠢ ᠳ᠋ᠦ᠍ᠷ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ ᠥᠭᠴᠦ᠂ ᠪᠠᠰᠠ ᠳᠠᠬᠢᠨ ᠳᠠᠬᠢᠨ《ᠵᠣᠴᠢ ᠴᠢᠨ ᠸᠠᠩ ᠲᠠᠨ ᠤ᠋ ᠳᠥᠷᠪᠡᠨ ᠵᠠᠩᠵᠤᠨ ᠯᠤᠭᠠ ᠤᠷᠤᠭ ᠠᠨᠤ ᠤᠷᠤᠭ᠂ ᠲᠥᠷᠥᠯ ᠢᠨᠦ ᠲᠥᠷᠥᠯ ᠲᠤᠯᠠ ᠲᠠ ᠳᠥᠷᠪᠡᠭᠦᠯᠡ ᠶ᠋ᠢ ᠰᠣᠩᠭᠣᠵᠤ ᠳᠠᠯᠳᠠᠭᠤᠷ ᠲᠤᠰᠢᠶᠠᠨ ᠬᠠᠪᠰᠤᠷᠤᠭᠤᠯᠤᠭᠰᠠᠨ ᠠᠨᠤ ᠡᠨᠡ ᠪᠤᠶᠤ᠂ ᠬᠡᠷᠬᠢᠪᠡᠴᠦ ᠪᠤᠰᠤ ᠵᠠᠩᠵᠤᠨ ᠨᠠᠷ ᠠ᠋ᠴᠠ ᠢᠯᠡᠭᠦᠦ ᠬᠦᠴᠦᠯᠡᠨ ᠬᠠᠮᠠᠭᠠᠯᠠᠵᠤ ᠴᠢᠷᠮᠠᠢᠨ ᠲᠤᠰᠠᠯᠠᠬᠤ ᠶ᠋ᠢᠨ ᠲᠤᠯᠠ ᠪᠣᠯᠠᠢ᠃ ᠳᠥᠷᠪᠡᠨ ᠨᠣᠶᠠᠳ ᠶᠠᠭᠠᠬᠢᠨ ᠬᠡᠷᠬᠢᠪᠡᠴᠦ ᠡᠨᠡ ᠭᠠᠪᠢᠶᠠ ᠶ᠋ᠢ ᠬᠠᠮᠵᠢᠨ ᠪᠦᠲᠦᠭᠡᠵᠦ ᠡᠭᠡᠭᠲᠦᠨ ! ᠭᠡᠮᠡᠨ ᠲᠠᠭᠲᠤ ᠠ᠋ᠴᠠ ᠨᠢᠳᠦ ᠪᠡᠷ ᠦᠵᠡᠨ ᠪᠠᠭᠤᠯᠭᠠᠵᠤ᠂ ᠰᠠᠶᠢ ᠬᠦᠯᠦᠭ ᠲᠠᠢᠪᠤᠤ ᠨᠣᠶᠠᠨ ᠪᠤᠭᠤᠷᠤᠯ ᠬᠠᠭᠠᠴᠠ ᠪᠡᠶᠡ ᠶ᠋ᠢ ᠵᠠᠯᠠᠵᠤ᠂ ᠬᠠᠭᠠᠰ ᠴᠠᠭ ᠨᠠᠷᠢᠨ ᠨᠢᠭᠲᠠ ᠪᠠᠷ ᠬᠡᠯᠡᠯᠴᠡᠵᠦ᠂ ᠮᠥᠨ ᠬᠦ᠌ ᠨᠢᠳᠦ ᠪᠡᠷ ᠦᠵᠡᠨ ᠮᠣᠷᠳᠠᠭᠤᠯᠤᠭᠠᠳ ᠪᠠᠰᠠ ᠪᠦᠬᠦ ᠴᠢᠨ ᠸᠠᠩ ᠪᠡᠯᠭᠦᠳᠡᠢ ᠶ᠋ᠢ ᠮᠥᠨ ᠬᠦ᠌ ᠭᠠᠭᠴᠠᠭᠠᠷ ᠢ᠋ ᠲᠠᠭᠲᠤ ᠳ᠋ᠤᠷ ᠵᠠᠯᠠᠵᠤ᠂ ᠴᠢᠬᠢᠨ ᠦ᠌ ᠳᠡᠷᠭᠡᠳᠡ ᠡᠢᠮᠦ ᠲᠡᠢᠮᠦ ᠭᠡᠮᠡᠨ ᠰᠢᠪᠡᠨᠡᠵᠦ᠂ ᠨᠢᠭᠡᠨ ᠴᠠᠭᠠᠵᠠᠨ ᠤ᠋ ᠰᠤᠮᠤ ᠥᠭᠴᠦ᠂ ᠪᠠᠰᠠ ᠨᠢᠳᠦᠨ ᠦᠵᠡᠭᠰᠡᠭᠡᠷ ᠮᠣᠷᠳᠠᠭᠤᠯᠪᠠᠢ᠃ ᠳᠠᠷᠠᠭᠠ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠥᠪᠡᠷᠦᠨ ᠪᠡᠶᠡ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠬᠠᠭᠠᠨ ᠳ᠋ᠤᠷ ᠮᠥᠷᠭᠥᠵᠦ᠂ ᠰᠢᠳᠠᠷ ᠳᠡᠷᠭᠡᠳᠡ ᠬᠡᠳᠦᠨ ᠠᠯᠬᠤᠮ ᠮᠥᠯᠬᠥᠨ ᠲᠠᠪᠰᠢᠵᠤ᠂ ᠯᠤᠤ ᠶ᠋ᠢᠨ ᠰᠢᠷᠡᠭᠡᠨ ᠦ᠌ ᠣᠢᠷᠠ ᠰᠥᠭᠥᠳᠴᠦ᠂ ᠯᠤᠤᠲᠤ ᠪᠢᠴᠢᠬᠠᠨ ᠰᠢᠷᠠ ᠭᠬᠢᠪ ᠦ᠋ᠨ ᠨᠢᠭᠡᠨ ᠪᠢᠲᠡᠭᠦᠮᠵᠢ ᠲᠡᠢ ᠨᠤᠭᠤᠯᠪᠤᠷᠢ ᠶ᠋ᠢ ᠡᠷᠭᠦᠨ ᠳᠡᠪᠰᠢᠭᠦᠯᠦᠭᠡᠳ ᠳᠠᠬᠢᠨ ᠮᠥᠷᠭᠥᠵᠦ ᠠᠶᠠᠷᠯᠠᠬᠤᠶᠠ᠂ ᠬᠠᠭᠠᠨ ᠨᠢᠳᠦ ᠪᠡᠷ ᠠᠢᠯᠠᠳᠤᠨ ᠪᠠᠢᠵᠤ ᠮᠣᠷᠳᠠᠭᠤᠯᠤᠭᠠᠳ᠂ ᠳᠠᠷᠠᠭᠠ ᠪᠠᠷ ᠬᠠᠭᠠᠨ ᠤ᠋ ᠪᠡᠶᠡ ᠶ᠋ᠢᠨ ᠭᠡᠭᠡᠨ ᠤ ᠶᠡᠬᠡ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠯᠤᠤ ᠶ᠋ᠢᠨ ᠵᠢᠭᠰᠠᠭᠠᠯ ᠮᠣᠷᠳᠠᠨ ᠭᠠᠷᠴᠤ᠂ ᠵᠢᠪᠬᠤᠯᠠᠩ ᠪᠠᠯᠭᠠᠰᠤᠨ ᠤ᠋ ᠪᠠᠷᠠᠭᠤᠨ ᠪᠡᠶᠡ ᠶ᠋ᠢᠨ ᠶᠢᠰᠦᠨ ᠪᠤᠯᠠᠭ ᠤ᠋ᠨ ᠶᠡᠬᠡ ᠲᠠᠯᠠ ᠳ᠋ᠤᠷ ᠪᠠᠭᠤᠳᠠᠯᠯᠠᠭᠠᠳ ᠲᠡᠢᠨ ᠳ᠋ᠦ᠍ᠷ ᠳᠠᠭᠠᠬᠤ ᠪᠠ ᠤᠯᠤᠰ ᠢ᠋ ᠰᠠᠬᠢᠬᠤ ᠵᠠᠩᠵᠤᠨ ᠲᠦᠰᠢᠮᠡᠯ ᠴᠡᠷᠢᠭ ᠬᠤᠶᠠᠭ ᠢ᠋ ᠬᠣᠶᠠᠷ ᠠᠩᠭᠢᠯᠠᠨ ᠢᠯᠭᠠᠭᠠᠳ᠂ ᠬᠠᠭᠠᠨ ᠢ᠋ ᠬᠠᠮᠠᠭᠠᠯᠠᠬᠤ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠲᠡᠷᠢᠭᠦᠯᠡᠨ᠂ ᠭᠤᠷᠪᠠᠨ ᠳᠡᠰ ᠦ᠋ᠨ ᠲᠠᠢᠹᠦ᠋ ᠲᠦᠰᠢᠮᠡᠳ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠰᠡᠴᠡᠳ ᠪᠠᠭᠠᠲᠤᠳ ᠲᠠᠢ᠂ ᠭᠤᠴᠢᠨ ᠵᠢᠷᠭᠤᠭᠠᠨ ᠵᠠᠩᠵᠤᠨ ᠤ᠋ ᠲᠣᠭᠠ ᠳ᠋ᠤᠷ ᠲᠣᠬᠢᠷᠠᠭᠤᠯᠤᠨ᠂ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠭᠤᠷᠪᠠᠨ ᠬᠦᠷᠢᠶᠡ ᠵᠣᠬᠢᠶᠠᠨ᠂ ᠲᠡᠷᠢᠭᠦᠨ ᠬᠦᠷᠢᠶᠡ ᠳ᠋ᠦ᠍ᠷ ᠴᠠᠭᠠᠲᠠᠢ ᠴᠢᠨ ᠸᠠᠩ᠂ ᠬᠣᠶᠠᠷ ᠮᠥᠷᠥ ᠳ᠋ᠦ᠍ᠷ ᠬᠦᠩ ᠵᠠᠮᠪᠠᠯ᠂ ᠬᠦᠩ ᠲᠤᠰᠬᠤ᠂ ᠭᠤᠷᠪᠠᠳᠤᠭᠠᠷ ᠡᠳᠦᠷᠡ ᠮᠣᠷᠳᠠᠨ ᠬᠥᠳᠡᠯᠪᠡ᠃ ᠳᠤᠮᠳᠠᠳᠤ ᠯᠤᠤ ᠶ᠋ᠢᠨ ᠶᠡᠬᠡ ᠵᠢᠭᠰᠠᠭᠠᠯ ᠤ᠋ᠨ ᠬᠦᠷᠢᠶᠡᠨᠡ ᠬᠤᠸᠠᠩᠳᠢ ᠶ᠋ᠢᠨ ᠪᠡᠶᠡ ᠲᠡᠷᠢᠭᠦᠯᠡᠨ ᠲᠠᠪᠤᠨ ᠪᠠᠷᠰ ᠤ᠋ᠨ ᠶᠡᠬᠡ ᠵᠠᠩᠵᠤᠨ ᠬᠢᠭᠡᠳ ᠭᠤᠷᠪᠠᠨ ᠪᠠᠷᠰ ᠯᠤᠭᠠ ᠨᠡᠢᠲᠡ ᠨᠠᠢ᠍ᠮᠠᠨ ᠪᠠᠷᠰ᠂ ᠨᠢᠭᠡᠨ ᠯᠤᠤ ᠶ᠋ᠢ ᠬᠠᠮᠠᠭᠠᠯᠠᠨ᠂ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠲᠣᠷ ᠠᠯᠲᠠᠨ ᠯᠤᠤ ᠶ᠋ᠢᠨ ᠵᠢᠭᠰᠠᠭᠠᠯ ᠮᠣᠷᠳᠠᠨ ᠬᠥᠳᠡᠯᠪᠡ᠃ ᠰᠡᠭᠦᠯ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠭᠤᠷᠪᠠᠳᠤᠭᠠᠷ ᠲᠠᠢᠽᠢ᠂ ᠥᠭᠡᠳᠡᠢ ᠴᠢᠨ ᠸᠠᠩ ᠲᠡᠷᠢᠭᠦᠯᠡᠨ ᠬᠣᠶᠠᠷ ᠮᠥᠷᠥ ᠳ᠋ᠦ᠍ᠷ ᠴᠡᠴᠡᠬᠢ ᠹᠦᠮᠠ᠂ ᠨᠠᠬᠽᠠᠷ ᠵᠢᠭᠡ ᠪᠡᠷ ᠬᠣᠶᠠᠷ ᠡᠲᠡᠭᠡᠳ ᠢ᠋ ᠳᠠᠷᠤᠭᠤᠯᠤᠨ ᠬᠤᠸᠠᠩᠳᠢ ᠶ᠋ᠢᠨ ᠮᠣᠷᠳᠠᠭᠰᠠᠨ ᠳᠠᠷᠠᠭᠠ ᠡᠳᠦᠷ ᠲᠣᠷ ᠮᠣᠷᠳᠠᠨ ᠬᠥᠳᠡᠯᠪᠡ᠃ ᠲᠠᠪᠤᠨ ᠲᠡᠢᠰᠢ ᠨᠢᠭᠡᠨ ᠴᠧᠩᠰᠢᠶᠠᠩ᠂ ᠬᠠᠰᠠᠷ ᠴᠢᠨ ᠸᠠᠩ᠂ ᠲᠣᠯᠢ ᠴᠢᠨ ᠸᠠᠩ ᠬᠣᠶᠠᠷ ᠵᠢᠶᠦ᠋ᠨ ᠸᠠᠩ ᠭᠤᠷᠪᠠᠨ ᠵᠡᠷᠭᠡ ᠶ᠋ᠢᠨ ᠣᠯᠠᠨ ᠲᠠᠢᠹᠦ᠋ ᠲᠦᠰᠢᠮᠡᠯ ᠵᠠᠩᠵᠤᠨ ᠪᠠᠭᠠᠲᠤᠳ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠲᠥᠷᠥ ᠶ᠋ᠢ ᠰᠠᠬᠢᠪᠠ᠃ ᠭᠠᠳᠠᠭᠠᠳᠤ ᠳᠠᠯᠠᠨ ᠲᠠᠪᠤᠨ ᠠᠢᠮᠠᠭ ᠤ᠋ᠨ ᠡᠵᠡᠳ ᠢᠨᠤ ᠴᠡᠷᠢᠭ ᠲᠦ᠍ᠷ ᠪᠣᠢ ᠪᠣᠯᠪᠠᠴᠤ ᠴᠡᠷᠢᠭ ᠬᠤᠶᠠᠭ ᠤ᠋ᠳ ᠢ᠋ ᠠᠨᠤ ᠣᠭᠲᠣ ᠡᠰᠡ ᠬᠡᠷᠡᠭᠯᠡᠪᠡᠢ᠃ ᠮᠥᠬᠥᠬᠦ ᠰᠢᠬᠠᠭᠰᠠᠨ ᠨᠠᠢ᠍ᠮᠠᠨ ᠠᠢᠮᠠᠭ ᠲᠤᠷ ᠶᠠᠭᠤᠨᠲᠤ ᠡᠢᠮᠦ ᠶᠡᠬᠡ ᠵᠢᠭᠰᠠᠭᠠᠯ ᠬᠥᠰᠬᠡ ᠪᠡᠷ ᠬᠥᠳᠡᠯᠪᠡ ᠬᠡᠮᠡᠪᠡᠰᠦ᠂ ᠰᠢᠨᠡ ᠰᠠᠭᠤᠷᠢᠨ ᠳ᠋ᠤᠷ ᠰᠠᠭᠤᠭᠰᠠᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠵᠢᠭᠰᠠᠭᠠᠯ ᠴᠡᠷᠢᠭ ᠬᠡᠮᠡᠭᠴᠢ ᠡᠢᠮᠦ ᠶᠡᠬᠡ᠂ ᠬᠤᠸᠠᠩᠳᠢ ᠲᠡᠢᠨ ᠪᠦᠬᠦᠨᠡ ᠪᠡᠶᠡ ᠶ᠋ᠢᠨ ᠭᠡᠭᠡᠨ ᠢ᠋ᠶ᠋ᠡᠷ ᠮᠣᠷᠳᠠᠬᠤᠢ ᠶ᠋ᠢᠨ ᠪᠡᠷᠬᠡ ᠶ᠋ᠢ ᠰᠠᠢᠳ ᠢᠷᠭᠡᠳ ᠮᠡᠳᠡᠪᠡᠰᠦ᠂ ᠬᠣᠢᠴᠢ ᠡᠳᠦᠷ ᠲᠡᠭᠷᠢᠯᠢᠭ ᠦ᠋ᠨ ᠪᠡᠶᠡ ᠶ᠋ᠢ ᠬᠦᠨᠳᠦᠳᠭᠡᠯᠭᠡᠬᠦᠢ ᠶ᠋ᠢᠨ ᠠᠷᠭᠠ ᠪᠣᠢ ᠶᠠ᠃ ᠡᠷᠬᠡᠪᠰᠢ ᠨᠠᠢ᠍ᠮᠠᠨ ᠤ᠋ ᠳᠠᠢᠰᠤᠨ ᠢ᠋ ᠬᠦᠨᠳᠦ ᠦᠵᠡᠵᠦ ᠠᠶᠤᠨ ᠰᠦᠷᠳᠡᠭᠰᠡᠨ ᠦ᠌ ᠤᠴᠢᠷ ᠪᠤᠰᠤ ᠶ᠋ᠢ ᠦᠵᠡᠬᠦ ᠮᠡᠷᠭᠡᠳ ᠲᠣᠳᠤᠷᠬᠠᠶᠠ ᠮᠡᠳᠡᠭᠳᠡᠬᠦᠢ᠃
ᠲᠡᠨᠳᠡᠴᠡ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠶᠡᠬᠡ ᠵᠢᠭᠰᠠᠭᠠᠯ ᠤ᠋ᠨ ᠭᠤᠷᠪᠠᠨ ᠬᠦᠷᠢᠶᠡ ᠴᠡᠷᠢᠭ ᠠᠭᠤᠯᠠ ᠲᠠᠪᠰᠢᠨ ᠳᠠᠯᠠᠢ ᠨᠡᠭᠦᠬᠦ ᠮᠡᠲᠦ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠪᠠᠨ ᠡᠷᠬᠡᠪᠰᠢ ᠠᠷᠪᠠᠨ ᠬᠣᠨᠣᠭ ᠪᠣᠯᠬᠤ ᠪᠠᠷ ᠠᠯᠭᠤᠷ ᠠᠭᠠᠵᠢᠮ ᠶᠠᠪᠤᠵᠤ ᠴᠡᠷᠢᠭ ᠬᠤᠶᠠᠭ ᠵᠠᠩᠵᠤᠨ ᠪᠠᠭᠠᠲᠤᠳ ᠮᠠᠰᠢ ᠪᠣᠯᠪᠠᠰᠤᠨ ᠱᠠᠯᠠᠮᠠᠭᠠᠢ ᠪᠣᠯᠤᠯᠴᠠᠨ᠂ ᠤᠷᠢᠳ ᠬᠣᠵᠢᠳ ᠰᠡᠳᠦᠭᠰᠡᠨ ᠡᠳᠦᠷ ᠡᠴᠡ ᠬᠣᠷᠢᠨ ᠬᠣᠨᠣᠭ ᠤ᠋ᠨ ᠡᠴᠦᠰ ᠲᠦ᠍ᠷ ᠬᠠᠭᠤᠴᠢᠨ ᠨᠠᠢ᠍ᠮᠠᠨ ᠤ᠋ ᠵᠠᠬᠠ ᠣᠢᠷᠠᠲᠤᠲᠠᠯᠠ᠂ ᠬᠣᠯᠠᠬᠢ ᠡᠭᠡᠷᠡᠮᠡ ᠮᠠᠩᠬᠠᠨᠡ ᠬᠡᠳᠦᠨ ᠵᠤᠷᠪᠤᠰ ᠲᠣᠭᠣᠰᠣᠨ ᠳᠡᠭᠳᠡᠵᠦ᠂ ᠳᠣᠲᠣᠷᠠ ᠠᠨᠤ ᠤᠯᠠᠭᠠᠨ ᠢᠰᠡᠭᠡᠢ ᠲᠤᠭ ᠳᠡᠷᠪᠡᠯᠵᠡᠨ ᠬᠡᠢᠰᠴᠦ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠲᠡᠮᠳᠡᠭ ᠬᠢᠭᠢᠷᠢ ᠲᠠᠨᠢᠭᠳᠠᠮᠠᠭᠴᠠ᠂ ᠳᠣᠲᠣᠷᠠ ᠠ᠋ᠴᠠ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠪᠤᠯᠤ᠂ ᠬᠦᠯᠦᠭ ᠪᠤᠭᠤᠷᠵᠢ ᠶ᠋ᠢᠨ ᠬᠥᠪᠡᠭᠦᠨ ᠡᠭᠦᠯᠡᠨ ᠴᠡᠷᠪᠢ ᠬᠣᠶᠠᠭᠤᠯᠠ᠂ ᠮᠣᠷᠢᠨ ᠲᠣᠯᠣᠭᠠᠢ ᠵᠡᠷᠭᠡᠴᠡᠭᠦᠯᠦᠨ ᠬᠣᠶᠠᠷ ᠤᠯᠠᠭᠠᠨ ᠲᠤᠭ ᠬᠠᠮᠲᠤᠪᠠᠷ ᠰᠦᠷᠦᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠰᠤᠭᠤᠷᠠᠨ ᠭᠠᠷᠴᠤ ᠢᠷᠡᠲᠡᠯᠡ ᠬᠠᠭᠠᠨ ᠤ᠋ ᠵᠢᠭᠰᠠᠭᠠᠯ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠭᠤᠷᠪᠠᠨ ᠪᠠᠷᠰ ᠤ᠋ᠨ ᠪᠠᠭᠠ ᠵᠠᠩᠵᠤᠨ ᠤᠭᠲᠤᠨ ᠭᠠᠷᠴᠤ ᠤᠳᠤᠷᠢᠳᠤᠨ ᠠᠪᠴᠢᠷᠠᠲᠠᠯᠠ ᠤᠷᠢᠳᠠ ᠬᠦᠯᠦᠭ ᠲᠠᠢᠪᠤᠤ ᠪᠤᠭᠤᠷᠵᠢ ᠨᠠᠢ᠍ᠮᠠᠨ ᠤ᠋ ᠡᠵᠡᠨ ᠪᠤᠯᠤ ᠢᠦᠢ ᠬᠠᠭᠠᠨ ᠢ᠋ ᠠᠮᠢᠳᠤ ᠪᠠᠷ ᠪᠠᠷᠢᠭᠰᠠᠨ ᠪᠠᠶᠠᠷ ᠢ᠋ ᠡᠭᠦᠯᠡᠨ ᠴᠡᠷᠪᠢ ᠠᠢᠯᠠᠳᠬᠠᠨ᠂ ᠶᠡᠬᠡ ᠵᠢᠨᠦᠩ ᠬᠦᠯᠦᠭ ᠲᠠᠢᠪᠤᠤ ᠮᠤᠬᠤᠯᠢ ᠶ᠋ᠢᠨ ᠨᠠᠢ᠍ᠮᠠᠨ ᠤ᠋ ᠪᠤᠯᠤ ᠢᠦᠢ ᠬᠠᠭᠠᠨ ᠤ᠋ ᠦᠷᠦᠮᠴᠢ ᠪᠠᠯᠭᠠᠰᠤᠨ ᠤ᠋ ᠤᠯᠤᠰ ᠲᠥᠷᠥ᠂ ᠬᠣᠲᠠ ᠬᠣᠷᠢᠶᠠ᠂ ᠡᠮᠡ ᠦᠷᠡ᠂ ᠨᠤᠲᠤᠭ ᠤᠰᠤ ᠶ᠋ᠢ ᠪᠦᠷᠢᠨᠡ ᠬᠤᠷᠢᠶᠠᠮᠵᠢᠯᠠᠨ ᠠᠪᠴᠤ᠂ ᠢᠷᠭᠡᠨ ᠢ᠋ ᠲᠣᠭᠲᠠᠭᠠᠭᠠᠳ᠂ ᠪᠣᠨᠳᠠ ᠡᠵᠡᠨ ᠢ᠋ ᠵᠠᠯᠠᠬᠤ ᠪᠠᠶᠠᠷ ᠢ᠋ ᠪᠤᠯᠤ ᠠᠢᠯᠠᠳᠬᠠᠪᠠ᠃
ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ᠂ ᠬᠣᠶᠠᠷ ᠪᠠᠭᠠ ᠵᠠᠩᠵᠤᠨ ᠳ᠋ᠤᠷ ᠱᠠᠩ ᠬᠤᠷᠢᠮ ᠥᠭᠴᠦ᠂ ᠨᠢᠭᠡᠨ ᠵᠡᠷᠭᠡ ᠲᠡᠮᠳᠡᠭᠯᠡᠵᠦ ᠶᠡᠬᠡ ᠵᠢᠭᠰᠠᠭᠠᠯ ᠨᠠᠢ᠍ᠮᠠᠨ ᠤ᠋ ᠦᠷᠦᠮᠴᠢ ᠬᠣᠲᠠ ᠶ᠋ᠢᠨ ᠵᠦᠭ ᠬᠠᠨᠳᠤᠵᠤ ᠶᠡᠬᠡ ᠪᠠᠭᠤᠳᠠᠯ ᠪᠠᠭᠤᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠵᠦᠭ ᠵᠦᠭ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠡᠴᠡ ᠪᠣᠭᠳᠠ ᠡᠵᠡᠨ ᠦ᠌ ᠴᠡᠷᠢᠭ ᠬᠥᠳᠡᠯᠵᠦ᠂ ᠵᠠᠬᠠ ᠬᠡᠴᠡ ᠪᠡᠨ ᠭᠠᠷᠬᠤᠢ ᠶ᠋ᠢᠨ ᠤᠷᠢᠳ᠂ ᠬᠠᠨᠳᠤᠭᠰᠠᠨ ᠵᠦᠭ ᠦ᠋ᠨ ᠲᠡᠢᠨ ᠳᠠᠢᠰᠤᠨ ᠬᠡᠮᠬᠡᠷᠡᠨ ᠪᠤᠰᠠᠨᠢᠵᠤ ᠳᠠᠷᠤᠭᠳᠠᠨ ᠰᠥᠨᠥᠵᠦ᠂ ᠰᠢᠨᠡ ᠰᠠᠭᠤᠷᠢᠨ ᠳ᠋ᠤᠷ ᠰᠠᠭᠤᠭᠰᠠᠨ ᠶᠡᠬᠡ ᠪᠡᠯᠭᠡ ᠢᠷᠦᠭᠡᠯ ᠳ᠋ᠦ᠍ᠷ ᠶᠡᠬᠡᠳᠡ ᠨᠡᠢᠴᠡᠪᠡ ᠭᠡᠮᠡᠨ᠂ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠪᠠᠭᠠ ᠵᠠᠩᠵᠤᠨ ᠨᠠᠷ ᠳᠣᠪᠲᠣᠯᠤᠯᠴᠠᠨ ᠢᠷᠡᠵᠦ ᠪᠠᠶᠠᠷ ᠲᠤᠷ ᠮᠥᠷᠭᠥᠯᠴᠡᠮᠦᠢ᠃ ᠡᠨᠡ ᠤᠳᠠᠭᠠ ᠶ᠋ᠢᠨ ᠳᠠᠢᠰᠤᠨ ᠢ᠋ ᠳᠠᠷᠤᠭᠰᠠᠨ ᠠᠨᠤ᠂ ᠶᠠᠭᠠᠬᠢᠨ ᠡᠢᠮᠦ ᠬᠤᠷᠳᠤᠨ ᠲᠦᠷᠭᠡᠨ ᠢ᠋ᠶ᠋ᠡᠷ ᠪᠦᠷᠢᠨᠡ ᠣᠯᠵᠤ ᠳᠡᠢᠯᠦᠭᠡᠳ᠂ ᠳᠠᠢᠰᠤᠨ ᠤ᠋ ᠬᠠᠭᠠᠨ ᠡᠵᠡᠨ ᠢ᠋ ᠶᠠᠭᠠᠬᠢᠨ ᠬᠠᠪ ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠠᠮᠢᠳᠤ ᠪᠠᠷ ᠣᠯᠵᠤ ᠪᠠᠷᠢᠭᠠᠳ᠂ ᠨᠢᠭᠡ ᠶᠡᠬᠡ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠤᠭ ᠦᠨᠳᠦᠰᠦᠨ ᠢ᠋ ᠲᠦᠪᠰᠢᠳᠬᠡᠨ ᠲᠣᠭᠲᠠᠭᠠᠪᠠ ? ᠬᠡᠮᠡᠪᠡᠰᠦ᠂ ᠣᠳᠣ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠵᠦᠭ ᠵᠦᠭ ᠦ᠋ᠨ ᠵᠠᠩᠵᠤᠨ ᠴᠡᠷᠢᠭ ᠦ᠋ᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠨᠢᠭᠡᠨ ᠨᠢᠭᠡᠨ ᠢ᠋ᠶ᠋ᠡᠷ ᠨᠠᠷᠢᠪᠴᠢᠯᠠᠨ ᠲᠣᠭᠠᠴᠢᠬᠤ ᠪᠠ ᠲᠤᠰ ᠳᠠᠢᠰᠤᠨ ᠨᠠᠢ᠍ᠮᠠᠨ ᠤ᠋ ᠪᠤᠯᠤ ᠢᠦᠢ ᠬᠠᠭᠠᠨ ᠬᠢᠭᠡᠳ ᠬᠥᠪᠡᠭᠦᠨ ᠴᠢᠦᠢ ᠴᠦ ᠯᠢᠦᠢ᠂ ᠨᠥᠬᠥᠷ ᠶᠤᠸᠠᠨᠱᠤᠸᠠᠢ ᠲᠣᠳᠣ ᠲᠠᠨ ᠤ᠋ ᠭᠤᠷᠪᠠᠭᠤᠯᠠ ᠶ᠋ᠢᠨ ᠶᠠᠪᠤᠳᠠᠯ ᠤ᠋ᠨ ᠶᠡᠬᠡ ᠪᠠᠷᠤᠭ ᠲᠥᠯᠥᠪ ᠢ᠋ ᠲᠣᠪᠴᠢᠯᠠᠨ ᠭᠠᠷᠭᠠᠬᠤ ᠬᠡᠷᠡᠭ ᠲᠡᠢ ᠲᠤᠯᠠ᠂ ᠦᠭᠡ ᠶ᠋ᠢ ᠪᠠᠰᠠ ᠬᠣᠢᠰᠢ ᠨᠢᠭᠡᠨ ᠵᠢᠯ ᠤᠬᠤᠷᠢᠭᠤᠯᠵᠤ᠂ ᠲᠡᠳᠡᠨᠡᠷ ᠨᠢᠳᠤᠨᠤᠨ ᠬᠠᠪᠤᠷ᠂ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠵᠢᠷᠯᠤᠭ ᠬᠣᠲᠠ ᠬᠢᠭᠡᠳ ᠯᠢ ᠵᠢᠢ ᠯᠢ ᠬᠣᠷᠣᠭᠠ ᠪᠦᠷᠢᠨᠡ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠳᠡᠢᠯᠦᠭᠳᠡᠨ ᠠᠪᠲᠠᠭᠰᠠᠨ ᠦᠶᠡ ᠳ᠋ᠦ᠍ᠷ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠵᠦᠩ ᠰᠢᠩ ᠹᠦ ᠪᠠᠯᠭᠠᠰᠤᠨ ᠤ᠋ ᠣᠢᠷᠠ ᠰᠢᠷᠭᠤᠨ ᠣᠷᠣᠵᠤ᠂ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠶᠦᠸᠡᠢ ᠸᠠᠩ ᠯᠢ ᠠᠨ ᠴᠢᠤᠸᠠᠨ ᠳ᠋ᠤᠷ ᠨᠡᠯᠢᠶᠡᠳ ᠡᠳ᠋ ᠥᠭᠴᠦ ᠲᠡᠳᠡᠨᠡᠷ ᠢ᠋ ᠤᠯᠤᠰ ᠠ᠋ᠴᠠᠭᠠᠨ ᠭᠠᠷᠭᠠᠵᠤ ᠢᠯᠡᠭᠡᠭᠰᠡᠨᠡ ᠲᠣᠳᠣ᠂ ᠴᠢᠦᠢ ᠴᠦ ᠯᠢᠦᠢ ᠨᠠᠢ᠍ᠮᠠᠨ ᠤ᠋ ᠬᠣᠢᠲᠤ ᠬᠢᠵᠠᠭᠠᠷ ᠤ᠋ᠨ ᠣᠯᠠᠨ ᠶᠠᠳᠠᠭᠤ ᠬᠣᠪᠣᠷ ᠵᠡᠷᠯᠢᠭ ᠠᠢᠮᠠᠭ ᠤ᠋ᠳ ᠢ᠋ ᠡᠯᠰᠡᠨ ᠴᠤᠭᠯᠠᠭᠤᠯᠵᠤ᠂ ᠥᠪᠡᠷ ᠪᠤᠰᠤᠳ ᠲᠠᠢ ᠨᠡᠢᠯᠡᠭᠦᠯᠦᠨ ᠨᠡᠢᠲᠡ ᠨᠠᠢ᠍ᠮᠠᠨ ᠮᠢᠩᠭᠠᠨ ᠢᠯᠡᠭᠦᠦ ᠴᠡᠷᠢᠭ ᠣᠯᠤᠭᠠᠳ᠂ ᠳᠠᠷᠤᠢ ᠨᠢᠭᠡᠨ ᠠᠢᠮᠠᠭ ᠤ᠋ᠨ ᠲᠣᠭᠰᠢᠨ ᠬᠦᠴᠦᠷᠬᠡᠭ ᠳᠡᠭᠡᠷᠡᠮᠴᠢ ᠪᠣᠯᠵᠤ᠂ ᠢᠯᠳᠠᠰᠢ ᠮᠥᠷᠡᠨ ᠦ᠌ ᠠᠮᠠᠨ ᠤ᠋ ᠭᠠᠳᠠᠨᠠ ᠨᠤᠲᠤᠭᠰᠢᠭᠰᠠᠨ ᠬᠠᠭᠤᠴᠢᠨ ᠾᠦᠩᠨᠦ ᠤᠯᠤᠰ᠂ ᠴᠢᠤᠸᠠᠨ ᠵᠦᠩ ᠤᠯᠤᠰ ᠤ᠋ᠨ ᠨᠢᠭᠡᠨ ᠠᠢᠮᠠᠭ ᠤ᠋ᠨ ᠨᠢᠭᠡᠨ ᠰᠠᠯᠠᠭᠠᠨ ᠤ᠋ ᠪᠠᠶᠠᠨ ᠡᠯᠪᠡᠭ ᠬᠤᠳᠠᠯᠳᠤᠭᠠ ᠠᠷᠠᠯᠵᠢᠶᠠ ᠶ᠋ᠢᠨ ᠶᠡᠬᠡ ᠡᠳ᠋ ᠠᠭᠤᠷᠠᠰᠤᠡᠲᠤ ᠸᠠᠢ ᠯᠠᠨ① ᠠᠢᠮᠠᠭ ᠤ᠋ᠨ ᠡᠵᠡᠨ᠂ ᠴᠸᠠ ᠵᠦᠩ ᠢ᠋ ᠳᠣᠪᠲᠣᠯᠤᠨ ᠳᠠᠪᠴᠢᠯᠠᠵᠤ ᠳᠠᠷᠤᠭᠠᠳ᠂ ᠬᠡᠮᠵᠢᠶᠡ ᠦᠭᠡᠢ ᠠᠷᠪᠢᠨ ᠡᠳ᠋ ᠲᠠᠸᠠᠷ ᠬᠥᠮᠦᠨ ᠮᠣᠷᠢ᠂ ᠮᠠᠯ ᠠᠳᠤᠭᠤ᠂ ᠬᠤᠶᠠᠭ ᠵᠡᠪᠰᠡᠭ ᠣᠯᠤᠭᠠᠳ᠂ ᠪᠠᠰᠠ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠳᠣᠪᠲᠣᠯᠤᠨ ᠳᠡᠭᠡᠷᠡᠮᠳᠡᠭᠰᠡᠭᠡᠷ ᠠᠯᠠᠭ ᠳᠡᠷᠡ — ᠡᠭᠦᠨ ᠢ᠋ ᠵᠠᠷᠢᠮ ᠰᠣᠲᠣᠷᠠ ᠠᠯᠠᠭ ᠰᠢᠭᠢᠷᠡ ᠬᠡᠮᠡᠬᠦ ᠪᠠ ᠡᠷᠢᠶᠡᠨ ᠰᠢᠯᠪᠢᠲᠦ ᠬᠡᠮᠡᠬᠦ ᠬᠡᠳᠦᠨ ᠨᠡᠷᠡ ᠪᠣᠢ᠃ ᠡᠷᠢᠶᠡᠨ ᠪᠥᠰ ᠢ᠋ᠶ᠋ᠡᠷ ᠰᠢᠯᠪᠢ ᠪᠡᠨ ᠣᠷᠢᠶᠠᠬᠤ ᠪᠠᠷ ᠨᠡᠷᠡᠯᠡᠵᠦᠬᠦᠢ᠃ ᠠᠯᠠᠭ ᠳᠡᠷᠡ ᠶ᠋ᠢᠨ ᠡᠵᠡᠨ ᠵᠢᠩᠭᠢᠷ ᠦ᠋ᠨ ᠡᠷᠢᠶᠡᠨ ᠰᠢᠯᠪᠢᠲᠦ ᠠᠢᠮᠠᠭ ᠲᠤᠷ ᠣᠷᠣᠵᠤ᠂ ᠬᠦᠨᠳᠦ ᠪᠡᠯᠡᠭ ᠬᠦᠷᠭᠡᠵᠦ᠂ ᠪᠠᠰᠠ ᠨᠢᠵᠡᠭᠡᠳ ᠲᠦᠮᠡᠨ ᠲᠣᠷᠭᠠᠨ ᠴᠡᠷᠢᠭ ᠦ᠋ᠳ ᠢ᠋ ᠵᠢᠭᠡᠯᠡᠨ ᠣᠯᠵᠤ᠂ ᠵᠡᠷᠯᠢᠭ ᠰᠠᠨᠠᠭᠠᠨ ᠨᠡᠩ ᠶᠡᠬᠡ ᠪᠣᠯᠵᠤ᠂ ᠴᠢᠦᠢ ᠴᠦ ᠯᠢᠦᠢ ᠥᠪᠡᠷᠦᠨ ᠪᠡᠶᠡ ᠪᠡᠷ ᠲᠠᠩᠭᠤᠳ ᠤᠯᠤᠰ ᠲᠤᠷ ᠬᠤᠯᠠᠭᠤᠨ ᠣᠷᠣᠵᠤ ᠯᠢ ᠼᠦᠨ ᠢᠦ ᠶᠢᠨ ᠳᠣᠲᠣᠭᠠᠳᠤ ᠲᠠᠢᠭᠠᠨ ᠨᠠᠷ ᠢ᠋ ᠬᠠᠬᠤᠤᠯᠢᠯᠠᠵᠤ ᠰᠡᠮᠡᠬᠡᠷ ᠬᠤᠯᠠᠭᠤᠨ ᠵᠢᠨ᠂ ᠪᠢᠩ ᠬᠣᠶᠠᠷ ᠪᠧᠢ ᠳ᠋ᠦ᠍ᠷ ᠠᠭᠤᠯᠵᠠᠵᠤ᠂ ᠬᠠᠭᠠᠨ ᠤ᠋ ᠬᠠᠰ ᠲᠠᠮᠠᠭᠠ ᠳᠠᠷᠤᠭᠰᠠᠨ ᠬᠠᠭᠤᠷᠮᠠᠭ ᠵᠠᠷᠯᠢᠭ ᠪᠢᠴᠢᠭ ᠢ᠋ ᠣᠯᠵᠤ᠂ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠶᠡᠬᠡ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠠᠯᠪᠠ ᠪᠠᠷᠢᠬᠤ ᠤᠯᠠᠭᠠᠨ ᠮᠠᠯᠠᠭᠠ᠂ ᠴᠠᠭᠠᠨ ᠮᠠᠯᠠᠭᠠ ᠶ᠋ᠢᠨ ᠬᠣᠲᠣᠩ ᠾᠦᠢ ᠾᠦᠢ ᠶ᠋ᠢᠨ ᠳᠥᠷᠪᠡᠨ ᠲᠡᠷᠢᠭᠦᠯᠡᠭᠴᠢ ᠠᡁᠥ᠋ᠩ ᠨᠣᠶᠠᠨ – ᠸᠠᠩ ᠳ᠋ᠦᠢ᠂ ᠰᠠᠩ ᠪᠤᠤ᠂ ᠸᠠ ᠰᠢ᠂ ᠰᠠ ᠰᠠ ᠡᠨᠡ ᠳᠥᠷᠪᠡᠨ ᠳᠠᠷᠤᠭᠠ ᠶ᠋ᠢᠨ ᠳᠥᠷᠪᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠮᠡᠬᠡᠯᠡᠨ ᠵᠠᠷᠯᠠᠵᠤ ᠴᠥᠮ ᠪᠡᠶᠡ ᠪᠡᠶᠡ ᠪᠡᠷ ᠢᠨᠦ ᠴᠡᠷᠢᠭ ᠳᠠᠢᠴᠢᠯᠠᠭᠤᠯᠤᠨ ᠠᠪᠴᠢᠷᠠᠭᠠᠳ ᠣᠮᠣᠭ ᠰᠠᠨᠠᠭᠠᠨ ᠨᠡᠩ ᠶᠡᠬᠡᠳᠴᠦ᠂ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠡᠵᠡᠨ᠂ ᠯᠢ ᠼᠦᠨ ᠢᠦ ᠥᠩᠭᠡ ᠳᠡᠷᠡᠰᠦᠨ ᠦ᠌ ᠡᠪᠡᠳᠴᠢᠨᠡ ᠨᠡᠷᠪᠡᠭᠳᠡᠨ ᠬᠡᠪᠲᠡᠬᠦ ᠡᠨᠡ ᠲᠠᠰᠢᠷᠠᠮᠠ ᠵᠠᠪᠳᠤᠨ ᠭᠠᠳᠠᠭᠠᠳᠤ ᠮᠣᠵᠢ ᠶ᠋ᠢᠨ ᠠᠢᠯᠠᠳᠬᠠᠯ ᠢ᠋ ᠶ᠋ᠢᠨ᠂ ᠪᠢᠩ ᠬᠣᠶᠠᠷ ᠹᠧᠢ ᠶᠠᠭ ᠲᠠᠭ ᠳᠠᠷᠤᠵᠤ᠂ ᠭᠠᠳᠠᠨᠠ ᠲᠥᠷᠥ ᠳ᠋ᠦ᠍ᠷ ᠪᠣᠯᠪᠠᠰᠤ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠬᠠᠭᠤᠴᠢᠨ ᠬᠣᠷᠢᠶᠠ ᠳᠥᠷᠪᠡᠨ ᠭᠣᠣᠯ ᠤ᠋ᠨ ᠭᠠᠵᠠᠷ ᠢ᠋ᠶ᠋ᠠᠷ ᠪᠠᠷᠢᠮᠲᠠ ᠪᠣᠯᠭᠠᠨ ᠵᠢᠭᠡᠯᠡᠭᠦᠯᠪᠡ ᠭᠡᠮᠡᠨ ᠠᠯᠳᠠᠷᠰᠢᠭᠤᠯᠤᠨ᠂ ᠪᠤᠰᠤᠳ ᠤ᠋ᠨ ᠠᠮᠠ ᠶ᠋ᠢ ᠪᠥᠭᠯᠡᠮᠦᠢ᠃ ᠲᠡᠢᠨ ᠬᠦ᠌ ᠪᠤᠯᠤ ᠸᠠᠩ᠂ ᠴᠢᠦᠢ ᠴᠦ ᠯᠢᠦᠢ᠂ ᠲᠣᠳᠣ ᠭᠤᠷᠪᠠᠭᠤᠯᠠ ᠶᠡᠬᠡᠳᠡ ᠣᠮᠣᠭᠰᠢᠨ᠂ ᠪᠤᠯᠤ ᠸᠠᠩ ᠪᠠᠰᠠ ᠠᠯᠲᠠᠨ ᠤᠯᠤᠰ ᠯᠤᠭᠠ ᠲᠡᠩᠴᠡᠬᠦ ᠰᠠᠨᠠᠭᠠᠨ ᠢ᠋ ᠪᠠᠷᠢᠵᠤ᠂ ᠥᠪᠡᠷᠦᠨ ᠪᠡᠶᠡ ᠪᠡᠨ ᠬᠠᠰ ᠢᠦᠢ ᠬᠠᠭᠠᠨ᠂ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠴᠢᠦᠢ ᠴᠦ ᠯᠢᠦᠢ ᠶ᠋ᠢ ᠲᠠᠢᠽᠢ ᠴᠢᠨ ᠸᠠᠩ᠂ ᠲᠣᠳᠣ ᠶ᠋ᠢ ᠶᠡᠬᠡ ᠴᠧᠩᠰᠢᠶᠠᠩ ᠪᠥᠭᠡᠳ ᠶᠡᠬᠡ ᠶᠤᠸᠠᠨᠱᠤᠸᠠᠢ᠂ ᠭᠠᠭᠴᠠ ᠠᠷᠪᠠᠨ ᠬᠣᠮᠣᠬᠠᠢ ᠲᠦᠰᠢᠮᠡᠯ ᠦ᠋ᠨ ᠶᠡᠬᠡ ᠨᠡᠷᠡ ᠴᠣᠯᠠ ᠶ᠋ᠢ ᠢᠯᠡᠷᠬᠡᠢ ᠲᠣᠭᠠᠴᠢᠭᠰᠠᠨ ᠦᠭᠡᠢ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠪᠠᠰᠠ ᠨᠢᠭᠡᠨ ᠳᠡᠭᠡᠭᠦᠷ ᠡᠷᠲᠡᠨ ᠦ᠌ ᠬᠠᠭᠤᠴᠢᠨ ᠳ᠋ᠠᠢ ᠯᠢᠶᠣᠣ ᠤᠯᠤᠰ ᠤ᠋ᠨ ᠨᠢᠭᠡᠨ ᠠᠩᠭᠢ ᠦᠯᠡᠳᠡᠪᠦᠷᠢ ᠰᠠᠯᠠᠭᠠᠨ ᠤ᠋ ᠨᠢᠭᠡᠨ ᠪᠢᠴᠢᠬᠠᠨ ᠵᠣᠪᠬᠢᠰ ᠤ᠋ᠨ ᠦᠯᠡᠳᠡᠪᠦᠷᠢ ᠶ᠋ᠢᠨ ᠶᠧ ᠯᠢᠦᠢ ᠠ ᠯᠦᠨ ᠬᠡᠮᠡᠭᠴᠢ᠂ ᠮᠥᠨ ᠬᠦ᠌ ᠤᠭ ᠬᠠᠭᠤᠴᠢᠨ ᠨᠡᠷᠡ ᠪᠡᠷ ᠬᠢᠳᠠᠨ ᠤᠯᠤᠰ ᠭᠡᠮᠡᠨ᠂ ᠠᠯᠲᠠᠨ ᠤᠯᠤᠰ᠂ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠬᠣᠶᠠᠷ ᠤ᠋ᠨ ᠵᠠᠪᠰᠠᠷ ᠤ᠋ᠨ ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠣᠢᠷᠠ ᠬᠡᠳᠦᠨ ᠵᠠᠭᠤᠨ ᠭᠠᠵᠠᠷ ᠤ᠋ᠨ ᠨᠢᠭᠡᠨ ᠵᠤᠷᠪᠤᠰ ᠢ᠋ ᠡᠵᠡᠯᠡᠨ ᠠᠯᠲᠠᠨ ᠲᠠᠩᠭᠤᠳ ᠬᠣᠶᠠᠷ ᠤᠯᠤᠰ ᠤ᠋ᠨ ᠵᠠᠪᠰᠠᠷ ᠤ᠋ᠨ ᠠᠰᠢᠭ ᠢ᠋ ᠭᠠᠰᠢᠭᠤᠨ ᠬᠤᠪᠠᠬᠠᠢ ᠪᠠᠷ ᠳᠠᠪᠴᠢᠯᠠᠨ ᠠᠮᠢᠳᠤᠷᠠᠮᠤᠢ᠃ ᠭᠡᠲᠡᠨ ᠦ᠌ ᠠ ᠯᠦᠨ ᠦ᠌ ᠡᠭᠡᠴᠢ ᠢᠨᠦ ᠴᠢᠦᠢ ᠴᠦ ᠯᠢᠦᠢ ᠶ᠋ᠢᠨ ᠤᠷᠢᠳᠤ ᠶ᠋ᠢᠨ ᠡᠮᠡ ᠲᠤᠯᠠ ᠡᠨᠡ ᠬᠠᠭᠤᠴᠢᠨ ᠨᠠᠢᠷ ᠢ᠋ᠶ᠋ᠠᠷ ᠴᠡᠷᠢᠭ ᠭᠤᠶᠤᠭᠰᠠᠨ ᠳ᠋ᠤᠷ ᠶᠧ ᠯᠢᠦᠢ ᠠ ᠯᠦᠨ ᠪᠡᠶᠡ ᠪᠡᠷ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠢᠯᠡᠭᠦᠦ ᠴᠡᠷᠢᠭ ᠠᠪᠴᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠡᠭᠦᠨ ᠡᠮᠦᠨᠡ ᠵᠣᠪᠬᠢᠰ ᠲᠤᠷ ᠪᠠᠭᠤᠳᠠᠯᠯᠠᠨ ᠲᠤᠯᠵᠤ᠂ ᠰᠡᠵᠢᠭᠯᠡᠭᠦᠯᠬᠦ ᠪᠡᠷ ᠲᠣᠭᠲᠠᠭᠠᠨ ᠶᠡᠬᠡ ᠴᠧᠩᠰᠢᠶᠠᠩ ᠶᠤᠸᠠᠨᠱᠤᠸᠠᠢ ᠲᠣᠳᠣ ᠶ᠋ᠢ ᠬᠠᠪᠰᠤᠷᠤᠭᠤᠯᠤᠨ ᠥᠭᠴᠦ᠂ ᠡᠨᠡ ᠵᠢᠷᠭᠤᠭᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠮᠣᠩᠭᠣᠯ ᠤᠯᠤᠰ ᠢ᠋ ᠳᠥᠷᠪᠡᠨ ᠵᠦᠭ ᠡᠴᠡ ᠬᠠᠭᠠᠵᠤ ᠨᠢᠭᠡᠨᠡ ᠤᠳᠠᠭᠠ ᠳ᠋ᠤᠷ ᠳᠠᠷᠤᠢ ᠭᠢᠰᠬᠢᠯᠡᠨ ᠳᠡᠯᠡᠳᠬᠦ ᠪᠡᠷ ᠠᠭᠠᠰᠢᠯᠠᠨ᠂ ᠮᠣᠩᠭᠣᠯ ᠤ᠋ᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠬᠤᠸᠠᠩᠳᠢ ᠶ᠋ᠢᠨ ᠰᠠᠭᠤᠷᠢᠨᠠ ᠰᠠᠭᠤᠭᠰᠠᠨ ᠶᠡᠬᠡ ᠴᠢᠭᠤᠯᠭᠠᠨ ᠢ᠋ ᠰᠣᠨᠣᠰᠴᠤ᠂ ᠬᠤᠸᠠᠩᠳᠢ ᠶ᠋ᠢᠨ ᠴᠣᠯᠠ ᠡᠷᠭᠦᠭᠰᠡᠨ ᠶᠠᠯᠠ ᠠᠰᠠᠭᠤᠬᠤ ᠴᠡᠷᠢᠭ ᠭᠡᠮᠡᠨ ᠨᠡᠷᠡᠯᠡᠵᠦ᠂ ᠮᠥᠨ ᠬᠦ᠌ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨᠡ ᠦᠷᠦᠮᠴᠢ ᠮᠣᠵᠢ ᠶ᠋ᠢᠨ ᠦᠷᠢᠯᠲᠦ ᠶ᠋ᠢᠨ ᠶᠡᠬᠡ ᠠᠭᠤᠯᠠᠨᠠ ᠶᠡᠬᠡ ᠬᠠᠭᠠᠨ ᠤ᠋ ᠲᠤᠭ ᠢ᠋ᠶ᠋ᠠᠨ ᠳᠠᠬᠢᠵᠤ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠨ ᠰᠠᠶᠢ ᠵᠦᠭ ᠵᠦᠭ ᠲᠦ᠍ᠷ ᠵᠠᠮ ᠬᠤᠪᠢᠶᠠᠨ ᠬᠥᠳᠡᠯᠦᠭᠰᠡᠨ ᠢᠨᠦ ᠪᠤᠯᠤ ᠢᠦᠢ ᠬᠠᠭᠠᠨ᠂ ᠥᠪᠡᠷ ᠢ᠋ᠶ᠋ᠡᠨ ᠡᠷᠢᠶᠡᠨ ᠰᠢᠯᠪᠢ ᠬᠢᠭᠡᠳ ᠠᠯᠠᠭ ᠰᠢᠭᠢᠷᠡ ᠶ᠋ᠢᠨ ᠵᠡᠷᠭᠡ ᠶ᠋ᠢᠨ ᠵᠡᠷᠯᠢᠭ ᠠᠢᠮᠠᠭ ᠤ᠋ᠳ ᠤ᠋ᠨ ᠬᠣᠯᠢᠮᠠᠴᠠᠭᠠ ᠶ᠋ᠢᠨ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠡᠴᠡ ᠨᠢᠭᠡᠨ ᠲᠦᠮᠡᠨ ᠲᠠᠪᠤᠨ ᠮᠢᠩᠭᠠᠨ ᠢ᠋ ᠠᠪᠴᠤ᠂ ᠦᠷᠢᠯᠲᠦ ᠠᠭᠤᠯᠠᠨ ᠤ᠋ ᠶᠡᠬᠡ ᠪᠠᠭᠤᠳᠠᠯ ᠳ᠋ᠤᠷ ᠦᠯᠡᠳᠡᠭᠡᠨ᠂ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠰᠠᠬᠢᠭᠤᠯᠵᠤ᠂ ᠦᠯᠡᠭᠰᠡᠨ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ ᠦᠷᠦᠮᠴᠢ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠥᠪᠡᠷᠦᠨ ᠨᠠᠢ᠍ᠮᠠᠨ ᠤ᠋ ᠬᠣᠯᠢᠮᠠᠴᠠᠭᠠ ᠳᠣᠯᠣᠭᠠᠨ ᠮᠢᠩᠭᠠᠨ ᠴᠡᠷᠢᠭ ᠲᠡᠢ ᠨᠢᠭᠡᠨ ᠲᠦᠮᠡᠨ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ ᠢ᠋ ᠨᠠᠢ᠍ᠮᠠᠨ ᠪᠦᠯᠦᠭ ᠵᠣᠬᠢᠶᠠᠵᠤ᠂ ᠦᠷᠦᠮᠴᠢ ᠶ᠋ᠢᠨ ᠬᠣᠷᠢᠶᠠ ᠶ᠋ᠢ ᠰᠠᠬᠢᠭᠤᠯᠵᠤ᠂ ᠵᠢᠴᠢ ᠲᠠᠢᠽᠢ ᠴᠢᠦᠢ ᠴᠦ ᠯᠢᠦᠢ ᠰᠠᠶᠢ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠬᠣᠲᠣᠩ ᠠᠢᠮᠠᠭ ᠤ᠋ᠳ ᠤ᠋ᠨ ᠳᠥᠷᠪᠡᠨ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠲᠡᠷᠢᠭᠦᠯᠡᠭᠴᠢ ᠳᠥᠷᠪᠡᠨ ᠠᡁᠥ᠋ᠩ ᠸᠠᠩ ᠳ᠋ᠦᠢ᠂ ᠰᠠᠩ ᠪᠤᠤ᠂ ᠸᠠ ᠰᠢ᠂ ᠰᠠ ᠰᠠ ᠶ᠋ᠢᠨ ᠴᠡᠷᠢᠭ ᠢ᠋ ᠳᠡᠰ ᠳᠡᠰ ᠢ᠋ᠶ᠋ᠡᠷ ᠳᠥᠷᠪᠡᠨ ᠬᠦᠷᠢᠶᠡ ᠵᠣᠬᠢᠶᠠᠨ ᠲᠡᠷᠢᠭᠦᠨ ᠪᠠᠭ ᠲᠤ᠌ ᠸᠠᠩ ᠳ᠋ᠦᠢ ᠶ᠋ᠢᠨ ᠬᠦᠷᠢᠶᠡ᠂ ᠬᠣᠶᠠᠳᠤᠭᠠᠷ ᠪᠠᠭ ᠲᠤᠷ ᠰᠠᠩ ᠪᠤᠤ ᠶ᠋ᠢᠨ ᠬᠦᠷᠢᠶᠡ᠂ ᠭᠤᠲᠠᠭᠠᠷ ᠪᠠᠭ ᠲᠤᠷ ᠸᠠ ᠰᠢ ᠶ᠋ᠢᠨ ᠬᠦᠷᠢᠶᠡ᠂ ᠳᠥᠲᠥᠭᠡᠷ ᠪᠠᠭ ᠲᠤᠷ ᠰᠠ ᠰᠠ ᠶ᠋ᠢᠨ ᠥᠪᠡᠷᠦᠨ ᠪᠡᠶᠡ᠂ ᠳᠥᠷᠪᠡᠳᠦᠭᠡᠷ ᠬᠦᠷᠢᠶᠡᠨ ᠦ᠌ ᠳᠣᠲᠣᠷᠠ ᠳᠠᠪᠬᠤᠷ ᠬᠦᠷᠢᠶᠡ ᠪᠠᠭᠤᠨ ᠶᠠᠪᠤᠮᠤᠢ᠃ ᠵᠢᠴᠢ ᠮᠠᠢᠯᠵᠢ ᠶ᠋ᠢᠨ ᠲᠣᠳᠣ ᠶᠤᠸᠠᠨᠱᠤᠸᠠᠢ ᠪᠡᠶᠡ ᠬᠠᠮᠠᠭᠠᠯᠠᠬᠤ ᠲᠠᠪᠤᠨ ᠵᠠᠭᠤᠨ ᠴᠡᠷᠢᠭ ᠢ᠋ ᠠᠪᠴᠤ᠂ ᠡᠮᠦᠨᠡ ᠡᠴᠡ ᠢᠷᠡᠬᠦ ᠬᠢᠳᠠᠨ ᠤᠯᠤᠰ ᠤ᠋ᠨ ᠡᠵᠡᠨ᠂ ᠶᠧ ᠯᠢᠦᠢ ᠠ ᠯᠦᠨ ᠦ᠌ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ ᠪᠠᠷᠠᠭᠤᠨ ᠵᠠᠮ ᠢ᠋ᠶ᠋ᠠᠷ ᠤᠭᠲᠤᠨ ᠡᠴᠢᠵᠦ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠵᠡᠭᠦᠨ ᠡᠮᠦᠨᠡ ᠵᠠᠬᠠ ᠬᠢᠵᠠᠭᠠᠷ ᠤ᠋ᠨ ᠬᠣᠯᠪᠤᠤ ᠮᠠᠩᠬᠠᠨ ᠤ᠋ ᠵᠠᠮ ᠢ᠋ᠶ᠋ᠠᠷ ᠣᠷᠣᠵᠤ ᠮᠣᠩᠭᠣᠯ ᠤᠯᠤᠰ ᠢ᠋ ᠵᠡᠭᠦᠨ ᠡᠮᠦᠨᠡ ᠪᠠ ᠪᠠᠷᠠᠭᠤᠨ ᠬᠣᠢᠲᠤ ᠬᠣᠶᠠᠷ ᠡᠲᠡᠭᠡᠳ ᠢ᠋ᠶ᠋ᠡᠷ ᠰᠡᠵᠢᠭᠯᠡᠭᠦᠯᠦᠨ ᠪᠠᠢᠯᠳᠤᠨ ᠣᠷᠣᠵᠤ᠂ ᠤᠷᠢᠳᠠᠪᠡᠷ ᠠᠯᠲᠠᠨᠱᠠᠭᠠ ᠬᠦᠩ ᠦ᠋ᠨ ᠰᠢᠨᠡ ᠨᠠᠢ᠍ᠮᠠᠨ ᠢ᠋ ᠪᠠᠢᠯᠳᠤᠨ ᠠᠪᠤᠭᠠᠳ᠂ ᠳᠠᠷᠠᠭᠠ ᠪᠠᠷ ᠲᠠᠪᠤᠨ ᠵᠠᠮ ᠤ᠋ᠨ ᠴᠡᠷᠢᠭ ᠢ᠋ᠶ᠋ᠡᠷ ᠬᠠᠮᠲᠤ ᠬᠥᠳᠡᠯᠵᠦ ᠲᠡᠮᠳᠡᠭ ᠮᠡᠳᠡᠭᠡ ᠨᠡᠪᠲᠡᠷᠡᠯᠴᠡᠮᠡᠭᠴᠡ ᠬᠠᠮᠲᠤᠪᠠᠷ ᠲᠤᠭ ᠳᠠᠯᠠᠯᠤᠨ᠂ ᠮᠣᠩᠭᠣᠯ ᠤᠯᠤᠰ ᠢ᠋ ᠰᠣᠴᠢᠮᠠᠲᠠᠭᠠᠢ ᠪᠠᠷ ᠲᠠᠪᠴᠢᠯᠠᠨ ᠠᠯᠠᠨ ᠣᠷᠣᠰᠤᠭᠠᠢ ᠭᠡᠮᠡᠨ ᠲᠣᠭᠲᠠᠵᠤ᠂ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨᠡ ᠲᠠᠪᠤᠨ ᠠᠩᠭᠢ ᠴᠡᠷᠢᠭ ᠬᠠᠮᠲᠤᠪᠠᠷ ᠬᠥᠳᠡᠯᠵᠦ᠂ ᠮᠣᠩᠭᠣᠯ ᠤ᠋ᠨ ᠵᠦᠭ ᠬᠠᠮᠵᠢᠨ ᠣᠷᠣᠭᠰᠠᠨ ᠦᠶᠡ ᠳ᠋ᠦ᠍ᠷ ᠴᠢᠪᠬᠢᠲᠡᠯᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠵᠢᠨᠦᠩ ᠲᠠᠢᠪᠤᠤ ᠮᠤᠬᠤᠯᠢ ᠳ᠋ᠤᠷ ᠳᠥᠷᠪᠡᠨ ᠵᠦᠭ ᠦ᠋ᠨ ᠬᠣᠯᠠᠳᠠᠬᠢ ᠲᠤᠷᠰᠢᠭᠤᠯ ᠪᠠ ᠵᠠᠬᠠ ᠬᠢᠵᠠᠭᠠᠷ ᠤ᠋ᠨ ᠬᠠᠷᠠᠭᠤᠯ ᠤ᠋ᠨ ᠵᠢᠰᠢᠶᠠᠨ ᠤ᠋ ᠲᠦᠰᠢᠮᠡᠳ ᠬᠡᠳᠦᠢᠨ ᠲᠣᠲᠤᠷᠠᠬᠠᠢᠯᠠᠨ ᠮᠡᠳᠡᠭᠦᠯᠦᠭᠰᠡᠨᠡ᠂ ᠮᠤᠬᠤᠯᠢ ᠥᠪᠡᠷᠦᠨ ᠨᠣᠮᠣᠨ ᠤ᠋ ᠬᠥᠪᠴᠢ ᠶ᠋ᠢᠨ ᠲᠥᠯᠭᠡ ᠪᠡᠷ ᠳᠥᠷᠪᠡᠨ ᠡᠲᠡᠭᠡᠳ ᠦ᠋ᠨ ᠳᠠᠢᠰᠤᠨ ᠤ᠋ ᠢᠷᠡᠬᠦ ᠵᠠᠮ ᠮᠥᠷ ᠢ᠋ ᠲᠥᠯᠭᠡᠳᠡᠨ ᠶᠡᠬᠡ ᠲᠥᠯᠥᠪ ᠢ᠋ ᠤᠬᠠᠭᠠᠳ ᠠᠩᠭᠢ ᠠᠩᠭᠢ ᠵᠦᠭ ᠵᠦᠭ ᠲᠦ᠍ᠷ ᠲᠤᠯᠤᠨ ᠪᠡᠯᠡᠳᠬᠡᠭᠰᠡᠨ ᠢᠨᠦ ᠡᠮᠦᠨᠡᠲᠦ ᠵᠦᠭ ᠦ᠋ᠨ ᠬᠢᠳᠠᠨ ᠤᠯᠤᠰ ᠤ᠋ᠨ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠴᠡᠷᠢᠭ ᠦ᠋ᠨ ᠶᠧ ᠯᠢᠦᠢ ᠠ ᠯᠦᠨ ᠦ᠌ ᠢᠷᠡᠬᠦ᠂ ᠬᠤᠯᠪᠤᠤ ᠮᠠᠩᠬᠠᠨ ᠪᠣᠷᠣ ᠪᠤᠷᠭᠠᠰᠤᠲᠠᠢ ᠭᠦᠨ ᠭᠣᠣ ᠭᠠᠩᠬᠠ ᠵᠡᠷᠭᠡ ᠶ᠋ᠢᠨ ᠭᠠᠵᠠᠷᠠ ᠢᠯᠡᠷᠬᠡᠢ ᠬᠣᠶᠠᠷ ᠵᠠᠮ ᠤ᠋ᠨ ᠨᠢᠭᠡᠨ ᠲᠦᠮᠡᠨ ᠵᠢᠷᠭᠤᠭᠠᠨ ᠮᠢᠩᠭᠠ᠂ ᠳᠠᠯᠳᠠᠭᠤᠷ ᠪᠠᠰᠠ ᠨᠠᠢ᠍ᠮᠠᠨ ᠮᠢᠩᠭᠠ᠂ ᠦᠯᠡᠳᠡᠵᠦ ᠬᠣᠴᠣᠷᠤᠭᠰᠠᠨ ᠢ᠋ ᠠᠷᠢᠭᠤᠳᠬᠠᠨ ᠬᠤᠷᠢᠶᠠᠭᠴᠢ ᠠᠵᠢᠨᠠᠢ ᠮᠡᠷᠭᠡᠨ ᠦ᠌ ᠨᠠᠢ᠍ᠮᠠᠨ ᠮᠢᠩᠭᠠᠨ ᠤ᠋ ᠨᠢᠭᠤᠴᠠ ᠪᠢᠲᠡᠭᠦᠦ ᠴᠡᠷᠢᠭ ᠢ ᠳᠠᠬᠢᠨ ᠳᠠᠬᠢᠨ ᠰᠢᠯᠭᠠᠵᠤ᠂ ᠨᠡᠮᠡᠵᠦ ᠶᠠᠪᠤᠭᠤᠯᠤᠭᠠᠳ᠂ ᠥᠪᠡᠷᠦᠨ ᠪᠡᠶᠡ ᠲᠡᠷᠢᠭᠦᠯᠡᠨ ᠪᠦᠬᠦ ᠴᠢᠨ ᠸᠠᠩ ᠪᠡᠯᠭᠦᠳᠡᠢ᠂ ᠬᠦᠯᠦᠭ ᠨᠣᠶᠠᠨ ᠲᠠᠢᠪᠤᠤ ᠪᠤᠭᠤᠷᠵᠢ᠂ ᠬᠦᠯᠦᠭ ᠨᠣᠶᠠᠨ ᠲᠠᠢᠪᠤᠤ ᠴᠢᠯᠠᠭᠤᠨ ᠤ᠋ ᠳᠡᠭᠦᠦ ᠲᠡᠮᠦᠷ ᠮᠥᠨ ᠬᠦ᠌ ᠴᠡᠷᠢᠭ ᠭᠠᠷᠴᠤ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠵᠦᠭ ᠮᠣᠷᠳᠠᠭᠰᠠᠨ ᠤ᠋ ᠬᠣᠢᠨᠠ᠂ ᠠᠷᠪᠠᠳᠤᠭᠠᠷ ᠡᠳᠦᠷ ᠲᠣᠷ ᠰᠠᠶᠢ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠲᠡᠭᠷᠢ ᠶ᠋ᠢᠨ ᠬᠥᠪᠭᠦᠨ ᠦ᠌ ᠶᠡᠬᠡ ᠯᠤᠤ ᠵᠢᠭᠰᠠᠭᠠᠯ ᠶᠡᠬᠡ ᠪᠠᠭᠤᠳᠠᠯ ᠠ᠋ᠴᠠ ᠮᠣᠷᠳᠠᠨ ᠬᠥᠳᠡᠯᠦᠭᠰᠡᠨ ᠲᠤᠯᠠ ᠣᠳᠣ ᠦᠭᠡ ᠶ᠋ᠢ ᠡᠭᠡᠭᠦᠯᠵᠦ᠂ ᠬᠣᠶᠠᠷ ᠬᠦᠯᠦᠭ ᠨᠣᠶᠠᠨ ᠲᠠᠢᠪᠤᠤ ᠪᠤᠭᠤᠷᠤᠯ ᠪᠤᠭᠤᠷᠵᠢ ᠶ᠋ᠢᠨ ᠴᠡᠷᠢᠭ ᠡᠴᠡ ᠡᠬᠢᠯᠡᠵᠦ ᠨᠢᠭᠡᠨ ᠨᠢᠭᠡᠨ ᠢ᠋ᠶ᠋ᠡᠷ ᠲᠣᠭᠠᠴᠢᠬᠤ ᠠᠨᠤ᠄
ᠲᠡᠷᠢᠭᠦᠨ ᠪᠦᠯᠦᠭ ᠦ᠋ᠨ ᠬᠦᠯᠦᠭ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ ᠤ᠋ᠨ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠬᠣᠢᠲᠤ ᠵᠠᠮ ᠢ᠋ᠶ᠋ᠠᠷ ᠪᠠᠷᠠᠭᠤᠨᠰᠢ ᠬᠥᠳᠡᠭᠡᠰᠢᠨ ᠭᠠᠷᠴᠤ᠂ ᠬᠠᠭᠤᠴᠢᠨ ᠨᠠᠢ᠍ᠮᠠᠨ ᠤ᠋ ᠪᠠᠷᠠᠭᠤᠨ ᠡᠮᠦᠨᠡᠭᠦᠷ ᠢ᠋ᠶ᠋ᠡᠷ ᠳᠣᠪᠲᠣᠯᠤᠨ ᠣᠷᠣᠵᠤ᠂ ᠨᠠᠢ᠍ᠮᠠᠨ ᠤ᠋ ᠪᠤᠯᠤ ᠢᠦᠢ ᠬᠠᠭᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠪᠠᠭᠤᠯᠭᠠᠬᠤ ᠦᠷᠢᠯᠲᠦ ᠠᠭᠤᠯᠠᠨ ᠤ᠋ ᠣᠢᠷᠠ ᠬᠦᠷᠴᠦ᠂ ᠪᠤᠭᠤᠷᠵᠢ ᠥᠪᠡᠷᠦᠨ ᠶᠡᠬᠡ ᠲᠤᠭ ᠢ᠋ ᠪᠤᠭᠤᠷᠤᠯ ᠳ᠋ᠤᠷ ᠲᠤᠰᠢᠶᠠᠨ ᠬᠣᠶᠠᠷ ᠬᠦᠷᠢᠶᠡ ᠶ᠋ᠢ ᠨᠡᠢᠭᠡᠮᠯᠡᠨ ᠵᠠᠬᠢᠷᠤᠭᠤᠯᠵᠤ᠂ ᠥᠪᠡᠷᠦᠨ ᠪᠡᠶᠡ ᠪᠤᠭᠤᠷᠤᠯ ᠤ᠋ᠨ ᠲᠤᠭ ᠢ᠋ ᠠᠪᠴᠤ ᠶᠡᠬᠡ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠵᠠᠯᠠᠭᠤ ᠵᠠᠩᠵᠤᠨ ᠢ᠋ ᠰᠣᠩᠭᠣᠨ ᠠᠪᠴᠤ ᠪᠠᠰᠠ ᠲᠠᠪᠤᠨ ᠵᠠᠭᠤᠨ ᠰᠢᠯᠭᠠᠳᠠᠭ ᠪᠦᠬᠦ ᠨᠠᠷ ᠠ᠋ᠴᠠ ᠰᠣᠩᠭᠣᠨ ᠪᠣᠯᠪᠠᠰᠤᠷᠠᠭᠰᠠᠨ ᠴᠡᠷᠢᠭ ᠢ᠋ ᠠᠪᠴᠤ ᠴᠥᠮ ᠵᠥᠭᠡᠯᠡᠨ ᠠᠷᠠᠰᠤᠨ ᠬᠤᠶᠠᠭ᠂ ᠣᠬᠣᠷ ᠬᠤᠷᠴᠠ ᠴᠡᠷᠢᠭ ᠦ᠋ᠨ ᠵᠡᠪᠰᠡᠭ ᠪᠠᠷᠢᠭᠤᠯᠤᠨ᠂ ᠬᠥᠩᠭᠡᠨ ᠱᠠᠯᠠᠮᠠᠭᠠᠢ ᠰᠢᠯᠪᠠᠯᠵᠠᠮᠠ ᠪᠠᠭᠠᠲᠤᠷ ᠤ᠋ᠨ ᠨᠢᠭᠡᠨ ᠪᠢᠴᠢᠬᠠᠨ ᠪᠠᠭ ᠪᠦᠯᠦᠭ ᠢ᠋ ᠢᠳᠡᠯᠭᠦ ᠰᠢᠪᠠᠭᠤᠨ ᠤ᠋ ᠨᠢᠰᠭᠡ ᠵᠡᠪᠡ ᠶ᠋ᠢᠨ ᠪᠦᠯᠦᠭ ᠭᠡᠮᠡᠨ ᠨᠡᠷᠡᠯᠡᠵᠦ᠂ ᠪᠢᠴᠢᠬᠠᠨ ᠴᠠᠭᠠᠨ ᠬᠢᠭᠢᠷᠢ ᠶ᠋ᠢᠨ ᠳᠣᠬᠢᠶᠠ ᠲᠡᠮᠳᠡᠭ ᠢ᠋ᠶ᠋ᠡᠷ ᠪᠣᠯᠪᠠᠰᠤᠷᠠᠭᠤᠯᠤᠨ ᠳᠠᠳᠤᠭᠠᠳ ᠶᠡᠬᠡ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠᠩᠭᠢᠳᠠ ᠨᠢᠭᠡᠨ ᠪᠢᠴᠢᠬᠠᠨ ᠬᠦᠷᠢᠶᠡ ᠵᠣᠬᠢᠶᠠᠨ ᠠᠪᠴᠤ᠂ ᠪᠡᠯᠡᠨ ᠵᠠᠯᠠᠨ ᠪᠣᠯᠭᠠᠭᠠᠳ᠂ ᠪᠠᠰᠠ ᠨᠢᠭᠡᠨ ᠬᠤᠪᠢ ᠶ᠋ᠢᠨ ᠬᠥᠭᠰᠢᠨ ᠵᠡᠮᠳᠡᠭ᠂ ᠶᠠᠳᠠᠭᠤ ᠪᠠᠭᠤᠷᠠᠢ ᠡᠷᠡᠰ ᠢ᠋ ᠢᠯᠭᠠᠨ ᠰᠣᠩᠭᠣᠵᠤ᠂ ᠳᠤᠷᠠᠩᠬᠢᠷ ᠮᠣᠷᠢ ᠢᠯᠵᠠᠷᠬᠠᠢ ᠮᠠᠢᠬᠠᠨ᠂ ᠨᠠᠪᠲᠠᠷᠬᠠᠢ ᠬᠤᠶᠠᠭ᠂ ᠪᠠᠷᠠᠩᠬᠠᠢ ᠲᠤᠭ ᠬᠢᠭᠢᠷᠢ ᠶ᠋ᠢᠨ ᠬᠣᠶᠠᠷ ᠮᠢᠩᠭᠠᠨ ᠦᠭᠡᠨᠴᠡ ᠪᠠᠭᠤᠷᠠᠢ ᠲᠤᠷᠠᠨᠴᠠᠭ ᠰᠢᠪᠰᠢᠷᠢᠭ ᠴᠡᠷᠢᠭ ᠢ᠋ᠶ᠋ᠡᠷ ᠭᠠᠳᠠᠭᠤᠷ ᠢ᠋ᠶ᠋ᠠᠨ ᠬᠦᠷᠢᠶᠡᠯᠡᠭᠡᠳ᠂ ᠪᠤᠭᠤᠷᠵᠢ ᠵᠡᠷᠭᠡ ᠬᠤᠪᠢᠶᠠᠷᠢ ᠶ᠋ᠢᠨ ᠠᠯᠲᠠᠨ ᠮᠠᠩᠨᠤᠭ ᠤ᠋ᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠶ᠋ᠢᠨ ᠭᠠᠳᠠᠭᠤᠷ ᠢ᠋ᠶ᠋ᠠᠷ ᠪᠦᠷᠬᠦᠨ ᠬᠠᠪᠬᠠᠯᠠᠵᠤ ᠲᠤᠷᠠᠨᠴᠠᠭ ᠴᠡᠷᠢᠭ ᠦ᠋ᠨ ᠡᠵᠡᠨ ᠪᠣᠯᠤᠭᠠᠳ ᠭᠤᠷᠪᠠᠨ ᠠᠩᠭᠢ ᠴᠡᠷᠢᠭ ᠢ᠋ ᠱᠠᠭᠠᠷᠳᠠᠨ ᠰᠢᠪᠠᠳᠠᠵᠤ ᠂ ᠦᠷᠢᠯᠲᠦ ᠠᠭᠤᠯᠠᠨ ᠤ᠋ ᠪᠠᠷᠠᠭᠤᠨ ᠡᠮᠦᠨᠡ ᠴᠠᠪᠴᠢᠮᠠᠯ ᠴᠢᠯᠠᠭᠤᠨ ᠤ᠋ ᠵᠠᠷ ᠢ᠋ᠶ᠋ᠠᠷ ᠣᠷᠣᠵᠤ᠂ ᠪᠤᠯᠤ ᠢᠦᠢ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠡᠴᠡ ᠬᠣᠷᠢᠨ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷ ᠶᠠᠪᠠᠭᠠᠨ ᠬᠦᠷᠢᠶᠡ ᠪᠠᠷᠢᠵᠤ ᠪᠠᠭᠤᠳᠠᠯᠯᠠᠭᠠᠳ᠂ ᠵᠢᠴᠢ ᠳᠤᠷᠠᠨᠴᠠᠭ ᠰᠢᠪᠰᠢᠷᠢᠭ ᠦ᠋ᠨ ᠨᠢᠭᠡᠨ ᠠᠩᠭᠢ ᠶ᠋ᠢᠨ ᠨᠢᠭᠡᠨ ᠪᠠᠭᠤᠳᠠᠯ ᠢ᠋ ᠪᠠᠰᠠ ᠤᠷᠤᠭᠰᠢ ᠠᠷᠪᠠᠨ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷ ᠳᠠᠪᠰᠢᠨ ᠪᠠᠰᠠ ᠵᠣᠪ ᠵᠤᠵᠠᠭᠠᠨ ᠬᠠᠩᠭᠢᠨᠠᠮᠠ ᠬᠠᠭᠤᠷᠠᠢ ᠬᠤᠯᠤᠰᠤ ᠡᠪᠡᠰᠦᠲᠦ ᠭᠣᠣᠯ ᠤ᠋ᠨ ᠡᠬᠢ ᠶ᠋ᠢᠨ ᠴᠠᠪᠴᠢᠮᠠᠯ ᠴᠢᠯᠠᠭᠤᠨ ᠤ᠋ ᠳᠣᠣᠷᠠ ᠪᠠᠭᠤᠭᠠᠳ ᠴᠠᠪᠴᠢᠮᠠᠯ ᠬᠠᠳᠠ ᠶ᠋ᠢᠨ ᠣᠷᠭᠢᠯ ᠳᠡᠭᠡᠷᠡ ᠡᠳᠦᠷ ᠪᠣᠯᠪᠠᠰᠤ ᠤᠲᠤᠭᠠ ᠲᠠᠯᠪᠢᠬᠤ ᠶ᠋ᠢ ᠦᠵᠡᠨ᠂ ᠰᠥᠨᠢ ᠪᠥᠭᠡᠰᠦ ᠭᠠᠯ ᠤ᠋ᠨ ᠭᠡᠷᠡᠯ ᠢ᠋ ᠦᠵᠡᠵᠦ ᠴᠣᠬᠢᠨ ᠣᠷᠣᠬᠤ ᠪᠠᠷ ᠪᠣᠯᠵᠣᠭᠠᠳ ᠬᠦᠯᠦᠭ ᠪᠤᠭᠤᠷᠤᠯ ᠤ᠋ᠨ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠴᠡᠷᠢᠭ ᠢ᠋ ᠰᠥᠨᠢ ᠵᠤᠯᠠ ᠰᠢᠲᠠᠭᠠᠮᠠᠭᠴᠠ᠂ ᠬᠣᠶᠠᠷ ᠬᠦᠷᠢᠶᠡ ᠴᠡᠷᠢᠭ ᠢ᠋ ᠪᠦᠷᠢᠨ ᠢ᠋ᠶ᠋ᠡᠷ ᠠᠪᠴᠤ᠂ ᠴᠠᠪᠴᠢᠮᠠᠯ ᠴᠢᠯᠠᠭᠤᠲᠤ ᠶ᠋ᠢᠨ ᠳᠣᠣᠷᠠ ᠪᠠᠭᠤᠳᠠᠯᠯᠠᠭᠰᠠᠨ ᠦᠭᠡᠨᠴᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠭᠠᠳᠠᠨᠠ ᠢᠷᠡᠵᠦ ᠪᠦᠭᠭᠦ ᠪᠡᠷ ᠲᠣᠭᠲᠠᠭᠠᠳ᠂ ᠬᠦᠯᠦᠭ ᠪᠤᠭᠤᠷᠵᠢ ᠨᠣᠶᠠᠨ ᠡᠳᠦᠷ ᠲᠡᠭᠡᠨ ᠦᠭᠡᠨᠴᠡ ᠪᠠᠭᠤᠷᠠᠢ ᠶ᠋ᠢ ᠦᠵᠡᠭᠦᠯᠦᠨ᠂ ᠳᠤᠷᠠᠩᠬᠢᠷ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠬᠥᠭᠰᠢᠨ ᠵᠡᠮᠳᠡᠭ ᠢ᠋ ᠬᠦᠷᠢᠶᠡᠨ ᠦ᠌ ᠭᠠᠳᠠᠭᠤᠷ ᠡᠷᠭᠢᠭᠦᠯᠦᠨ ᠳᠠᠢᠰᠤᠨ ᠤ᠋ ᠡᠲᠡᠭᠡᠳ ᠲᠣᠷ ᠦᠵᠡᠭᠦᠯᠦᠨ ᠡᠳᠦᠭᠡᠬᠦᠢ ᠳ᠋ᠦ᠍ᠷ ᠪᠤᠯᠤ ᠸᠠᠩ ᠤ᠋ᠨ ᠶᠡᠬᠡ ᠶᠤᠸᠠᠨᠱᠤᠸᠠᠢ᠂ ᠪᠤᠤᠷ ᠠᠷᠰᠯᠠᠨ ᠵᠡᠭᠦᠨ ᠪᠠᠷᠠᠭᠤᠨ ᠡᠲᠡᠭᠡᠳ ᠦ᠋ᠨ ᠬᠣᠶᠠᠷ ᠮᠥᠷᠥ ᠶ᠋ᠢᠨ ᠶᠡᠬᠡ ᠵᠠᠩᠵᠤᠨ ᠬᠥᠥᠯ ᠪᠦᠬᠦ᠂ ᠲᠢᠭ ᠪᠠᠭᠠᠲᠤᠷ ᠬᠣᠶᠠᠷ ᠢ᠋ᠶ᠋ᠠᠨ ᠠᠪᠤᠨ ᠰᠦᠷᠦᠭ ᠡᠴᠡ ᠭᠠᠷᠴᠤ᠂ ᠮᠠᠰᠢ ᠶᠡᠬᠡᠯᠡ ᠣᠮᠣᠷᠬᠠᠭ ᠪᠠᠷᠳᠠᠮ ᠪᠠᠢᠳᠠᠯ ᠭᠠᠷᠴᠤ ᠮᠥᠷᠭᠥᠭᠡᠳ《ᠭᠤᠷᠪᠠᠨ ᠵᠠᠩᠵᠤᠨ ᠭᠤᠷᠪᠠᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠭᠤᠷᠪᠠᠨ ᠬᠦᠷᠢᠶᠡ ᠨᠢᠭᠡᠨ ᠲᠦᠮᠡᠨ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ ᠨᠢᠭᠡᠨ ᠡᠷᠡ ᠬᠠᠭᠠᠰ ᠮᠣᠷᠢ ᠦᠯᠡᠳᠡᠭᠡᠯ ᠦᠭᠡᠢ ᠬᠤᠢᠬᠠᠯᠠᠨ ᠲᠦᠢᠮᠡᠷᠳᠡᠵᠦ ᠦᠨᠡᠰᠦ ᠪᠣᠯᠲᠠᠯᠠ ᠰᠢᠲᠠᠭᠠᠵᠤ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠪᠤᠭᠤᠷᠵᠢ ᠪᠤᠭᠤᠷᠤᠯ ᠬᠣᠶᠠᠷ ᠶᠡᠬᠡ ᠪᠠᠭᠠᠲᠤᠷ ᠬᠦᠯᠦᠭ ᠲᠠᠢᠪᠤᠤ ᠶ᠋ᠢ ᠠᠨᠤ ᠪᠣᠯᠵᠤ ᠬᠠᠭᠰᠢᠷᠠᠲᠠᠯᠠ᠂ ᠪᠣᠭᠳᠠ ᠡᠵᠡᠨ ᠳ᠋ᠡᠭᠡᠨ ᠡᠷᠭᠦᠨ ᠪᠠᠷᠢᠰᠤᠭᠠᠢ!》 ᠭᠡᠮᠡᠨ ᠪᠠᠷᠳᠠᠮᠨᠠᠨ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠪᠤᠯᠤ ᠢᠦᠢ ᠬᠠᠭᠠᠨ《ᠪᠣᠯᠤᠮᠤᠢ᠂ ᠪᠣᠯᠤᠮᠤᠢ 》ᠭᠡᠮᠡᠨ᠂ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ᠄
《ᠪᠤᠰᠤᠳ ᠪᠠᠰᠤᠮᠵᠢᠯᠠᠪᠠᠰᠤ ᠪᠤᠯᠲᠠᠷᠠᠨ ᠠᠯᠳᠠᠳᠠᠭ ᠪᠢᠰᠢᠦ !
ᠪᠤᠭᠤ ᠶ᠋ᠢ ᠪᠣᠭᠣᠮᠢᠯᠠᠪᠠᠰᠤ ᠪᠥᠮᠪᠥᠷᠢᠳᠦᠨ ᠦᠮᠬᠦᠷᠢᠳᠡᠭ ᠪᠢᠰᠢᠦ !
ᠪᠣᠯᠭᠣᠮᠵᠢᠯᠠᠨ ᠬᠢᠴᠢᠶᠡᠬᠦᠢ ᠳ᠋ᠦ᠍ᠷ ᠪᠤᠷᠤᠭᠤ ᠪᠣᠯᠬᠤᠨ ᠢ᠋ᠶ᠋ᠠᠷ ᠦᠭᠡᠢ᠂
ᠪᠣᠳᠣᠯᠭᠠ ᠪᠤᠷᠤᠭᠤᠳᠠᠪᠠᠰᠤ ᠪᠤᠯᠳᠠᠷ ᠬᠠᠯᠲᠠᠷ ᠪᠣᠯᠳᠠᠭ ᠪᠢᠯᠡ ! ᠬᠥᠮᠦᠨ ᠪᠦᠷᠢ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ᠂ ᠪᠦᠭᠦᠳᠡ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠭᠤᠷᠪᠠᠨ ᠬᠦᠷᠢᠶᠡ ᠶ᠋ᠢ ᠳᠠᠷᠤᠪᠠᠰᠤ ᠰᠠᠶᠢ ᠪᠠᠷᠤᠭᠲᠠᠢ ᠪᠣᠯᠤᠮᠤᠢ !》 ᠭᠡᠮᠡᠨ ᠭᠤᠷᠪᠠᠳᠤᠭᠠᠷ ᠰᠥᠨᠢ ᠵᠤᠯᠠ ᠰᠢᠲᠠᠭᠠᠮᠠᠭᠴᠠ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠭᠤᠷᠪᠠᠨ ᠠᠩᠭᠢ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠴᠡᠷᠢᠭ ᠭᠤᠷᠪᠠᠨ ᠵᠠᠮ ᠢ᠋ᠶ᠋ᠠᠷ ᠭᠠᠷᠴᠤ᠂ ᠬᠥᠮᠦᠨ ᠪᠦᠷᠢ ᠮᠣᠷᠢ ᠲᠡᠵᠢᠭᠡᠬᠦ ᠪᠡᠯᠴᠢᠭᠡᠷ ᠦ᠋ᠨ ᠬᠠᠭᠤᠷᠠᠢ ᠡᠪᠡᠰᠦ ᠨᠢᠭᠡᠨ ᠪᠣᠭᠣᠳᠠᠯ ᠢ᠋ ᠮᠣᠷᠢᠨ ᠤ᠋ ᠳᠡᠭᠡᠷᠡ ᠳᠦᠭᠦᠷᠴᠦ ᠠᠪᠤᠭᠠᠳ᠂ ᠭᠤᠷᠪᠠᠨ ᠠᠩᠭᠢ ᠴᠡᠷᠢᠭ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠵᠠᠯᠭᠠᠯᠳᠤᠨ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠦᠬᠡᠨᠴᠡ ᠴᠡᠷᠢᠭ ᠪᠠᠭᠤᠭᠰᠠᠨ ᠬᠠᠭᠤᠷᠠᠢ ᠬᠤᠯᠤᠰᠤ ᠡᠪᠡᠰᠦᠲᠦ ᠴᠠᠪᠴᠢᠮᠠᠯ ᠴᠢᠯᠠᠭᠤᠲᠤ ᠭᠣᠣᠯ ᠤ᠋ᠨ ᠠᠮᠠᠨ ᠳ᠋ᠤᠷ ᠣᠷᠣᠵᠤ᠂ ᠡᠮᠦᠨᠡᠲᠦ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠮᠥᠨ ᠭᠣᠣᠯ ᠤ᠋ᠨ ᠠᠮᠠᠨ ᠳ᠋ᠤᠷ ᠣᠷᠣᠭᠠᠳ᠂ ᠰᠡᠭᠦᠯ ᠦ᠋ᠨ ᠠᠩᠭᠢ ᠴᠡᠷᠢᠭ ᠦ᠋ᠨ ᠭᠤᠷᠪᠠᠨ ᠬᠤᠪᠢ ᠠ᠋ᠴᠠ ᠬᠣᠶᠠᠷ ᠬᠤᠪᠢ ᠠᠨᠤ ᠣᠷᠣᠵᠤ᠂ ᠭᠠᠳᠠᠨᠠ ᠰᠠᠶᠢ ᠨᠢᠭᠡᠬᠡᠨ ᠬᠤᠪᠢ ᠦᠯᠡᠲᠡᠯᠡ᠃ ᠭᠡᠨᠡᠳᠲᠡ ᠭᠣᠣᠯ ᠤ᠋ᠨ ᠠᠮᠠᠨᠠ ᠬᠣᠶᠠᠷ ᠠᠭᠤᠯᠠᠨ ᠤ᠋ ᠬᠣᠰᠢᠭᠤ ᠳ᠋ᠤᠷ ᠬᠣᠶᠠᠷ ᠶᠡᠬᠡ ᠦᠬᠡᠷ ᠫᠤᠤ ᠶ᠋ᠢᠨ ᠳᠠᠭᠤᠨ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠲᠡᠭᠷᠢ ᠳᠡᠯᠪᠡᠷᠡᠲᠡᠯᠡ ᠭᠠᠷᠤᠮᠠᠭᠴᠠ᠂ ᠭᠣᠣᠯ ᠤ᠋ᠨ ᠡᠬᠢᠨ ᠦ᠌ ᠴᠠᠪᠴᠢᠮᠠᠯ ᠬᠠᠳᠠ ᠶ᠋ᠢᠨ ᠣᠷᠭᠢᠯ ᠳᠡᠭᠡᠷᠡ ᠬᠠᠭᠤᠷᠠᠢ ᠬᠤᠯᠤᠰᠤᠨ ᠤ᠋ ᠲᠡᠮᠳᠡᠭ ᠭᠠᠯ ᠣᠭᠲᠠᠷᠭᠤᠢ ᠲᠤᠯᠲᠠᠯᠠ ᠦᠷᠪᠡᠯᠵᠡᠨ ᠬᠥᠭᠵᠢᠮᠡᠭᠴᠡ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠭᠠᠵᠠᠷ ᠭᠠᠵᠠᠷ᠂ ᠭᠣᠣᠯ ᠭᠣᠣᠯ ᠳ᠋ᠤᠷ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠶᠡᠬᠡ ᠦᠬᠡᠷ ᠫᠤᠤ ᠳᠠᠮ ᠳᠠᠮ ᠢ᠋ᠶ᠋ᠠᠷ ᠲᠦᠴᠢᠭᠢᠨᠡᠨ ᠳᠠᠭᠤᠷᠢᠰᠴᠤ᠂ ᠵᠦᠭ ᠪᠦᠷᠢ ᠶ᠋ᠢᠨ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠪᠦᠭᠦᠳᠡᠭᠡᠷ ᠪᠣᠰᠤᠯᠴᠠᠵᠤ᠂ ᠴᠤᠭᠭᠠᠷ ᠬᠠᠰᠬᠢᠷᠤᠯᠳᠤᠨ ᠭᠠᠯ ᠲᠦᠢᠮᠡᠷ ᠲᠠᠯᠪᠢᠨ ᠨᠣᠴᠣᠭᠠᠵᠤ ᠠᠯᠠᠨ ᠭᠠᠷᠤᠭᠰᠠᠨ ᠳ᠋ᠤᠷ ᠴᠠᠪᠴᠢᠮᠠᠯ ᠴᠢᠯᠠᠭᠤᠲᠤ ᠭᠣᠣᠯ ᠤ᠋ᠨ ᠠᠮᠠᠨ ᠡᠮᠦᠨᠡᠰᠢ ᠬᠠᠳᠤᠭᠰᠠᠨ ᠢ᠋ᠶ᠋ᠠᠷ ᠴᠢᠪ ᠴᠢᠬᠡ ᠠᠷᠤ ᠭᠠᠵᠠᠷ ᠤ᠋ᠨ ᠬᠥᠯᠳᠡᠭᠰᠡᠨ ᠢ᠋ ᠭᠡᠰᠬᠡᠬᠦ᠂ ᠬᠠᠪᠤᠷᠤᠨ ᠴᠠᠭ ᠤ᠋ᠨ ᠡᠮᠦᠨᠡᠲᠦ ᠰᠠᠯᠬᠢᠨᠠ ᠲᠣᠬᠢᠶᠠᠯᠳᠤᠨ ᠲᠠᠯᠠ ᠶ᠋ᠢᠨ ᠲᠦᠢᠮᠡᠷ ᠦᠷᠭᠦᠯᠵᠢᠯᠡᠨ ᠰᠢᠲᠠᠵᠤ᠂ ᠭᠠᠯ ᠤ᠋ᠨ ᠴᠤᠷᠮᠠᠳᠠᠰᠤ ᠬᠡᠢᠰᠬᠦ ᠢᠨᠤ ᠰᠢᠮᠠᠭᠤᠯ ᠪᠠᠲᠠᠭᠠᠨᠠ ᠮᠡᠲᠦ ᠵᠠᠯᠭᠠᠯᠳᠤᠨ᠂ ᠴᠠᠰᠤ ᠰᠢᠭᠤᠷᠬᠤ ᠮᠡᠲᠦ ᠬᠡᠢᠰᠴᠦ᠂ ᠭᠠᠯ ᠤ᠋ᠨ ᠨᠥᠯᠡ ᠣᠭᠲᠠᠷᠭᠤᠢ ᠳ᠋ᠤᠷ ᠲᠤᠯᠲᠠᠯᠠ ᠲᠤᠶᠠᠭᠠᠯᠠᠨ ᠬᠥᠭᠵᠢᠵᠦ᠂ ᠳᠣᠲᠣᠭᠰᠢ ᠶᠠᠪᠤᠬᠤ ᠮᠣᠷᠢ ᠰᠤᠮᠤ ᠬᠠᠷᠪᠤᠬᠤ ᠠ᠋ᠴᠠ ᠴᠤ᠌ ᠲᠦᠷᠭᠡᠨ ᠳ᠋ᠦ᠍ᠷ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠳ ᠰᠥᠰᠥ ᠬᠡᠮᠬᠡᠷᠡᠨ᠂ ᠳᠦᠭᠦᠷᠦᠭᠰᠡᠨ ᠡᠪᠡᠰᠦᠨ ᠦ᠌ ᠪᠣᠭᠣᠳᠠᠯ ᠢ᠋ᠶ᠋ᠠᠨ ᠴᠥᠮ ᠴᠣᠬᠢᠯᠴᠠᠭᠠᠳ᠂ ᠰᠠᠯᠬᠢᠨ ᠤᠷᠤᠭᠤᠳᠠᠨ ᠪᠣᠷᠤᠭᠤᠯᠬᠤᠶᠠ᠂ ᠴᠠᠭ ᠭᠱᠠᠨᠠ ᠡᠳᠡᠭᠡᠷ ᠪᠤᠭᠤᠳᠠᠯᠲᠤ ᠬᠠᠭᠤᠷᠠᠢ ᠡᠪᠡᠰᠦ ᠴᠥᠮ ᠵᠠᠯᠭᠠᠯᠳᠤᠨ ᠰᠢᠲᠠᠭᠠᠳ ᠬᠣᠶᠠᠳᠤᠭᠠᠷ ᠠᠩᠭᠢ ᠭᠤᠷᠪᠠᠳᠤᠭᠠᠷ ᠠᠩᠭᠢ ᠶ᠋ᠢᠨ ᠴᠡᠷᠢᠭ ᠮᠣᠷᠢ ᠨᠡᠢᠲᠡ ᠪᠡᠷ ᠥᠪᠡᠷᠦᠨ ᠠᠪᠠᠴᠢᠭᠰᠠᠨ ᠡᠪᠡᠰᠦᠨ ᠦ᠌ ᠭᠠᠯ ᠤ᠋ᠨ ᠳᠤᠮᠳᠠ ᠪᠣᠯᠤᠭᠠᠳ᠂ ᠠᠷᠤ ᠥᠪᠥᠷ ᠴᠥᠮ ᠭᠠᠯ ᠪᠣᠯᠤᠨ ᠬᠥᠭᠵᠢᠵᠦ᠂ ᠭᠣᠣᠯ ᠤ᠋ᠨ ᠠᠮᠠᠨ ᠢ᠋ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠶᠠᠭ ᠲᠠᠭ ᠪᠥᠭᠯᠡᠨ ᠠᠪᠴᠤ᠂ ᠪᠦᠳᠦᠭᠦᠨ ᠮᠣᠳᠣ ᠶ᠋ᠢ ᠬᠡᠷᠦᠭᠡᠲᠡᠨ ᠤᠨᠠᠭᠠᠵᠤ ᠪᠠᠭᠠ ᠮᠣᠳᠣ ᠶ᠋ᠢ ᠴᠠᠪᠴᠢᠨ ᠠᠪᠴᠤ ᠠᠭᠤᠯᠠ ᠮᠡᠲᠦ ᠣᠪᠣᠭᠠᠯᠠᠵᠤ ᠭᠠᠯ ᠨᠣᠴᠣᠭᠠᠭᠠᠳ ᠲᠡᠭᠷᠢ ᠲᠤᠯᠲᠠᠯᠠ ᠬᠥᠭᠵᠢᠭᠡᠵᠦ᠂ ᠬᠣᠶᠠᠷ ᠡᠲᠡᠭᠡᠳ ᠴᠠᠭᠠᠨ ᠲᠤᠭ ᠪᠣᠰᠴᠤ᠂ ᠰᠠᠮᠠᠭᠤᠨ ᠵᠡᠪᠡ ᠶ᠋ᠢᠨ ᠴᠡᠷᠢᠭ ᠢ᠋ᠶ᠋ᠡᠷ ᠲᠣᠰᠴᠤ᠂ ᠭᠠᠯ ᠤ᠋ᠨ ᠬᠣᠢᠨᠠ ᠪᠤᠭᠤᠷᠤᠯ ᠤ᠋ᠨ ᠶᠡᠬᠡ ᠴᠡᠷᠢᠭ ᠰᠡᠭᠦᠯ ᠳᠠᠷᠤᠨ ᠠᠯᠠᠨ ᠣᠷᠣᠭᠰᠠᠨᠠ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠮᠣᠷᠢᠨ ᠭᠠᠯ ᠳ᠋ᠤᠷ ᠬᠠᠯᠠᠨ᠂ ᠲᠦᠢᠮᠡᠷ ᠲᠣᠷ ᠰᠢᠲᠠᠭᠳᠠᠨ ᠥᠪᠡᠷ ᠦ᠋ᠨ ᠭᠠᠯ ᠳ᠋ᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠬᠤᠢᠬᠠᠯᠠᠭᠳᠠᠨ ᠮᠣᠷᠢ ᠢᠨᠴᠠᠭᠠᠨ ᠬᠥᠮᠦᠨ ᠪᠠᠷᠬᠢᠷᠠᠨ᠂ ᠴᠢᠳᠬᠥᠷ ᠤᠬᠢᠯᠠᠨ ᠬᠤᠪᠢᠯᠭᠠᠨ ᠬᠠᠰᠬᠢᠷᠤᠨ᠂ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠦ᠋ᠨ ᠮᠣᠷᠢᠳ ᠦᠷᠭᠦᠨ ᠨᠠᠳᠬᠤᠵᠤ ᠲᠣᠢᠯᠠᠯᠴᠠᠨ ᠳᠣᠪᠲᠣᠯᠤᠯᠴᠠᠬᠤ᠂ ᠠᠶᠤᠮᠰᠢᠭᠲᠠᠢ ᠰᠦᠷᠡᠬᠡᠢ ᠮᠠᠭᠤ ᠳᠠᠭᠤᠨ ᠴᠢᠮᠡᠭᠡᠨᠡ ᠠᠭᠤᠯᠠ ᠳᠡᠯᠪᠡᠷᠡᠨ ᠳᠠᠯᠠᠢ ᠪᠤᠴᠠᠯᠬᠤ ᠮᠡᠲᠦ ᠪᠤᠷᠬᠢᠷᠠᠯᠳᠤᠨ ᠦᠢᠮᠡᠭᠡᠳ᠂ ᠲᠡᠷᠢᠭᠦᠨ ᠠᠩᠭᠢ ᠶ᠋ᠢᠨ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠪᠤᠤᠷ ᠠᠷᠰᠯᠠᠨ ᠤ᠋ ᠪᠤᠷᠤᠢᠵᠤ ᠪᠠᠷᠤᠢᠭᠰᠠᠨ ᠰᠠᠬᠠᠯ ᠦᠰᠦ ᠨᠢᠭᠡᠨᠲᠡ ᠰᠢᠷᠠᠮᠲᠠᠨ ᠰᠢᠳᠡᠵᠦ᠂ ᠲᠦᠢᠮᠡᠷ ᠲᠣᠷ ᠳᠠᠭᠠᠷᠢᠭᠳᠠᠭᠰᠠᠨ ᠬᠥᠭᠰᠢᠨ ᠢᠮᠠᠭᠠ ᠪᠣᠯᠤᠭᠠᠳ᠂ ᠶᠡᠬᠡᠯᠡ ᠣᠷᠬᠢᠷᠠᠨ ᠪᠠᠷᠬᠢᠷᠠᠵᠤ ᠭᠣᠣᠯ ᠥᠭᠡᠳᠡᠯᠡᠨ ᠳᠣᠪᠲᠣᠯᠤᠨ ᠰᠠᠶᠢ ᠭᠣᠣᠯ ᠤ᠋ᠨ ᠡᠬᠢᠨᠡ ᠬᠦᠷᠬᠦ ᠰᠢᠬᠠᠲᠠᠯᠠ᠂ ᠭᠣᠣᠯ ᠤ᠋ᠨ ᠡᠬᠢᠨ ᠦ᠌ ᠠᠩᠭᠠᠷᠬᠠᠢ ᠶ᠋ᠢᠨ ᠠᠮᠠᠨ ᠳ᠋ᠤᠷ ᠬᠡᠳᠦᠢᠨ ᠪᠠᠰᠠ ᠫᠤᠤ ᠳᠠᠭᠤᠷᠢᠰᠤᠨ ᠭᠠᠯ ᠬᠥᠭᠵᠢᠭᠡᠳ᠂ ᠬᠠᠵᠠᠭᠤ ᠡᠲᠡᠭᠡᠳ ᠡᠴᠡ ᠲᠠᠰᠢᠭᠤ ᠪᠠᠷ ᠪᠠᠰᠠ ᠶᠡᠬᠡ ᠲᠦᠢᠮᠡᠷ ᠭᠠᠯ ᠯᠤᠤ ᠲᠣᠭᠯᠠᠬᠤ ᠮᠡᠲᠦ ᠨᠣᠴᠣᠨ ᠬᠥᠭᠵᠢᠵᠦ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠭᠠᠯ ᠳ᠋ᠤᠷ ᠰᠢᠷᠭᠤᠯᠤᠨ ᠡᠭᠡᠵᠦ ᠳᠣᠪᠲᠣᠯᠬᠤᠶᠠ ᠥᠪᠡᠷᠦᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠪᠤᠭᠤᠳᠠᠯᠲᠤ ᠡᠪᠡᠰᠦ ᠴᠥᠮ ᠵᠠᠯᠭᠠᠯᠳᠤᠨ᠂ ᠡᠭᠦᠨᠦ ᠳᠣᠲᠣᠷᠠ ᠰᠢᠳᠡᠵᠦ ᠰᠢᠷᠠᠮᠲᠠᠬᠤ ᠴᠡᠷᠢᠭ ᠮᠣᠷᠢᠨ ᠤ᠋ ᠬᠤᠢᠬᠠᠯᠠᠭᠳᠠᠬᠤ᠂ ᠬᠤᠩᠰᠢᠭᠤᠨ ᠦᠨᠦᠷ ᠭᠣᠣᠯ ᠳ᠋ᠤᠷ ᠳᠦᠭᠦᠷᠴᠦ ᠣᠭᠲᠠᠷᠭᠤᠢ ᠳ᠋ᠤᠷ ᠲᠤᠯᠵᠤᠬᠤᠢ᠃ ᠪᠤᠤᠷ ᠠᠷᠰᠯᠠᠨ ᠪᠠᠰᠠ ᠪᠤᠴᠠᠵᠤ ᠳᠣᠪᠲᠣᠯᠤᠨ᠂ ᠭᠣᠣᠯ ᠤ᠋ᠨ ᠡᠬᠢᠨᠡ ᠬᠦᠷᠪᠡᠰᠦ ᠭᠣᠣᠯ ᠤ᠋ᠨ ᠡᠬᠢᠨ ᠦ᠌ ᠵᠠᠮ ᠢ ᠨᠢᠭᠡᠨᠲᠡ ᠮᠣᠳᠣ ᠴᠢᠯᠠᠭᠤ᠂ ᠲᠦᠯᠡᠭᠡ ᠡᠪᠡᠰᠦ ᠪᠡᠷ ᠶᠠᠭ ᠲᠠᠭ ᠪᠥᠭᠯᠡᠭᠡᠳ᠂ ᠪᠠᠰᠠ ᠶᠡᠬᠡ ᠭᠠᠯ ᠬᠥᠭᠵᠢᠭᠡᠨ ᠨᠣᠴᠣᠭᠠᠵᠤᠬᠤᠢ᠃ ᠪᠤᠤᠷ ᠠᠷᠰᠯᠠᠨ ᠪᠣᠷᠣ ᠬᠣᠭᠣᠯᠠᠢ ᠪᠠᠷ《ᠪᠠᠷᠠᠪᠠ ᠪᠠᠷᠠᠪᠠ》 ᠭᠡᠮᠡᠨ ᠪᠠᠷᠬᠢᠷᠠᠨ ᠰᠠᠶᠢ ᠮᠣᠷᠢᠨ ᠢ᠋ ᠡᠭᠡᠭᠦᠯᠲᠡᠯᠡ ᠠᠭᠤᠯᠠᠨ ᠤ᠋ ᠬᠣᠶᠠᠷ ᠬᠠᠵᠠᠭᠤ ᠳ᠋ᠤᠷ ᠫᠤᠤ ᠶ᠋ᠢᠨ ᠳᠠᠭᠤᠨ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠲᠦᠷᠴᠢᠭᠢᠨᠡᠨ ᠳᠠᠭᠤᠷᠢᠰᠴᠤ᠂ ᠮᠣᠳᠣ ᠳᠣᠭᠰᠢᠨ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠪᠦᠭᠭᠦᠭᠰᠡᠨ ᠰᠠᠮᠠᠭᠤᠨ ᠵᠡᠪᠡ ᠶ᠋ᠢᠨ ᠬᠠᠷᠠᠩᠭᠤᠢ ᠭᠠᠵᠠᠷ ᠠ᠋ᠴᠠ ᠭᠡᠭᠡᠬᠡᠨ ᠭᠠᠵᠠᠷ ᠢ᠋ ᠬᠠᠷᠪᠤᠬᠤ ᠠᠨᠤ ᠮᠥᠨᠳᠥᠷ ᠳᠡᠯᠡᠳᠦᠨ ᠪᠣᠷᠣᠭᠠᠨ ᠣᠷᠣᠬᠤ ᠮᠡᠲᠦ ᠱᠠᠷᠴᠢᠭᠢᠨᠠᠨ ᠱᠣᠷᠴᠢᠭᠢᠨᠠᠨ ᠪᠠᠭᠤᠵᠤ ᠢᠷᠡᠨ᠂ ᠪᠤᠤᠷ ᠠᠷᠰᠯᠠᠨ ᠤ᠋ ᠪᠠᠭᠠᠯᠵᠤᠤᠷ ᠲᠤᠷ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠬᠣᠶᠠᠷ ᠭᠤᠷᠪᠠᠨ ᠬᠤᠷᠴᠠ ᠵᠡᠪᠡ ᠬᠠᠲᠠᠵᠤ ᠪᠤᠤᠷ ᠠᠷᠰᠯᠠᠨ ᠮᠣᠷᠢ ᠪᠡᠶᠡ ᠲᠡᠢ ᠠᠭᠤᠯᠠ ᠶᠡᠭᠦᠷᠡᠨ ᠬᠠᠢᠷᠬᠠᠨ ᠨᠤᠷᠠᠬᠤ ᠮᠡᠲᠦ᠂ ᠭᠠᠩᠭᠠ ᠤᠷᠤᠭᠤ ᠦᠮᠬᠦᠷᠢᠨ ᠤᠨᠠᠵᠤ᠂ ᠣᠢᠷᠠ ᠳᠠᠭᠠᠭᠰᠠᠳ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠮᠣᠷᠢᠨ ᠴᠥᠮ ᠢ᠋ᠶ᠋ᠡᠷ ᠰᠠᠮᠠᠭᠤᠨ ᠵᠡᠪᠡ ᠴᠢᠯᠠᠭᠤᠨᠠ ᠳᠠᠭᠠᠷᠢᠭᠳᠠᠨ᠂ ᠵᠠᠷᠠᠭᠠ ᠮᠡᠲᠦ ᠰᠤᠮᠤ ᠬᠠᠳᠠᠭᠳᠠᠨ ᠦᠬᠦᠵᠦ ᠪᠤᠰᠨᠢᠪᠠᠢ᠃ ᠭᠣᠣᠯ ᠤ᠋ᠨ ᠳᠤᠮᠳᠠ ᠲᠢᠭ ᠪᠠᠭᠠᠲᠤᠷ᠂ ᠲᠢᠷᠡᠩ ᠠᠳᠢᠰ ᠪᠣᠯᠲᠠᠯᠠ ᠰᠢᠲᠠᠭᠳᠠᠵᠤ᠂ ᠬᠥᠦᠯ ᠪᠦᠬᠦ ᠭᠦᠯᠦᠢᠵᠦ ᠬᠠᠪᠤᠳᠲᠠᠯᠠ ᠬᠠᠯᠠᠭᠠᠳ᠂ ᠨᠢᠭᠡᠨ ᠬᠥᠮᠦᠨ ᠴᠦ᠍ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠬᠠᠭᠠᠭᠳᠠᠵᠤ ᠠᠪᠤᠭᠳᠠᠪᠠᠢ᠃ ᠪᠤᠭᠤᠷᠤᠯ ᠶᠡᠬᠡ ᠴᠠᠭᠠᠵᠠ ᠶ᠋ᠢ ᠵᠠᠷᠯᠠᠭᠤᠯᠤᠨ ᠪᠠᠷᠬᠢᠷᠠᠭᠤᠯᠵᠤ᠄《ᠠᠮᠢ ᠪᠠᠨ ᠭᠠᠷᠰᠤᠭᠠᠢ ᠬᠡᠮᠡᠭᠴᠢᠳ ᠬᠤᠶᠠᠭ ᠵᠡᠪᠰᠡᠭ ᠢ᠋ ᠣᠪᠣᠭᠠᠯᠠᠨ ᠲᠠᠯᠪᠢᠭᠠᠳ᠂ ᠴᠠᠪᠴᠢᠮᠠᠯ ᠴᠢᠯᠠᠭᠤᠨ ᠤ᠋ ᠣᠷᠭᠢᠯ ᠳᠡᠭᠡᠷᠡ ᠪᠤᠰᠬᠠᠭᠰᠠᠨ ᠴᠠᠭᠠᠨ ᠲᠤᠭ ᠤ᠋ᠨ ᠳᠣᠣᠷᠠ ᠳᠠᠭᠠᠭᠰᠠᠨ ᠢ ᠠᠮᠢᠨ ᠢ᠋ ᠬᠡᠯᠲᠦᠷᠢᠭᠦᠯᠦᠨ ᠳᠠᠭᠠᠭᠤᠯᠤᠮᠤᠢ 》 ᠭᠡᠮᠡᠨ ᠨᠢᠭᠡᠨᠲᠡ ᠪᠠᠷᠬᠢᠷᠠᠭᠤᠯᠤᠮᠠᠭᠴᠠ᠂ ᠭᠠᠯ ᠬᠢᠭᠡᠳ ᠵᠡᠪᠡ ᠶ᠋ᠢᠨ ᠰᠢᠷᠬᠠ ᠡᠰᠡ ᠣᠯᠤᠭᠰᠠᠨ ᠠᠨᠤ ᠭᠡᠭᠡᠷᠡᠬᠦ ᠦᠶᠡ ᠶ᠋ᠢᠨ ᠴᠠᠭᠠᠨ ᠲᠤᠭ ᠤ᠋ᠨ ᠳᠠᠯᠠᠯᠬᠤ ᠶ᠋ᠢ ᠦᠵᠡᠨ ᠴᠥᠮ ᠣᠷᠣᠭᠰᠢ ᠲᠡᠮᠡᠴᠡᠯᠳᠦᠨ ᠨᠠᠷᠠᠨ ᠮᠠᠨᠳᠤᠲᠠᠯᠠ ᠠᠩᠭᠢ ᠪᠠᠭ ᠢ᠋ᠶ᠋ᠠᠷ ᠡᠴᠢᠵᠦ ᠪᠠᠭᠤᠵᠤ ᠥᠭᠪᠡ᠃ ᠡᠨᠡ ᠴᠠᠪᠴᠢᠮᠠᠯ ᠴᠢᠯᠠᠭᠤᠲᠤ ᠶ᠋ᠢᠨ ᠣᠷᠭᠢᠯ ᠠ᠋ᠴᠠ ᠦᠵᠡᠪᠡᠰᠦ ᠪᠤᠯᠤ ᠢᠦᠢ ᠬᠠᠭᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠲᠤᠰ ᠡᠮᠦᠨᠡ ᠦᠷᠢᠯᠲᠦ ᠣᠷᠭᠢᠯ ᠤ᠋ᠨ ᠳᠡᠭᠡᠷᠡ ᠪᠠᠰᠠ ᠬᠦ᠌ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠠᠮᠢᠨ ᠢ᠋ ᠬᠡᠯᠲᠦᠷᠢᠭᠦᠯᠦᠨ ᠡᠯᠰᠡᠨ ᠳᠠᠭᠠᠭᠤᠯᠬᠤ ᠴᠠᠭᠠᠨ ᠭᠬᠢᠪ ᠦ᠋ᠨ ᠤᠷᠲᠤ ᠬᠢᠭᠢᠷᠢ ᠲᠤᠭ ᠴᠠᠭᠠᠨ ᠵᠤᠷᠪᠤᠰ ᠡᠭᠦᠯᠡ ᠮᠡᠲᠦ ᠰᠠᠯᠬᠢᠨᠠ ᠳᠡᠷᠪᠡᠯᠵᠡᠨ ᠬᠡᠢᠰᠬᠦ ᠲᠤᠯᠠ᠂ ᠪᠤᠭᠤᠷᠵᠢ ᠶ᠋ᠢᠨ ᠰᠥᠨᠢ ᠪᠡᠷ ᠡᠴᠢᠭᠰᠡᠨ ᠢᠳᠡᠯᠭᠦ ᠰᠢᠪᠠᠭᠤᠨ ᠤ᠋ ᠨᠢᠰᠬᠦ ᠵᠡᠪᠡ ᠶ᠋ᠢᠨ ᠪᠦᠯᠦᠭ ᠮᠥᠨ ᠶᠡᠬᠡᠳᠡ ᠳᠡᠢᠯᠦᠭᠰᠡᠨ ᠢ᠋ ᠣᠯᠵᠤ ᠮᠡᠳᠡᠪᠡ᠃ ᠪᠤᠭᠤᠷᠵᠢ ᠶ᠋ᠢᠨ ᠶᠡᠬᠡ ᠴᠡᠷᠢᠭ ᠬᠡᠷᠬᠢᠨ ᠲᠠᠢᠯᠪᠠ? ᠬᠡᠮᠡᠪᠡᠰᠦ᠂ ᠥᠴᠥᠭᠡᠳᠦᠷ ᠰᠥᠨᠢ ᠶ᠋ᠢᠨ ᠵᠦᠭ ᠵᠦᠭ ᠦ᠋ᠨ ᠭᠠᠯ ᠲᠦᠢᠮᠡᠷ ᠬᠥᠭᠵᠢᠨ ᠨᠣᠴᠣᠵᠤ᠂ ᠭᠣᠣᠯ ᠤ᠋ᠨ ᠠᠮᠠᠨ ᠳ᠋ᠤᠷ ᠣᠯᠵᠤ ᠣᠷᠣᠨ ᠡᠰᠡ ᠴᠢᠳᠠᠭᠰᠠᠨ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠭᠣᠣᠯ ᠤ᠋ᠨ ᠳᠣᠲᠣᠷᠠ ᠤᠯᠠᠭᠠᠨ ᠨᠥᠯᠡ ᠲᠡᠭᠷᠢ ᠳ᠋ᠦ᠍ᠷ ᠲᠤᠯᠵᠤ ᠭᠠᠯ ᠤ᠋ᠨ ᠴᠤᠷᠮᠠᠳᠠᠰᠤᠨ ᠤ᠋ ᠰᠢᠭᠤᠷᠭᠠᠨ ᠰᠢᠭᠤᠷᠤᠨ᠂ ᠭᠠᠯ ᠤ᠋ᠨ ᠭᠠᠯᠪᠠ᠂ ᠲᠦᠢᠮᠡᠷ ᠦ᠋ᠨ ᠣᠷᠴᠢᠯᠠᠩ ᠪᠣᠯᠤᠭᠰᠠᠨ ᠢ᠋ ᠦᠵᠡᠭᠡᠳ᠂ ᠰᠥᠰᠥ ᠬᠡᠮᠬᠡᠷᠡᠲᠡᠯᠡ ᠠᠶᠤᠯᠳᠤᠨ ᠬᠠᠰᠬᠢᠷᠤᠯᠴᠠᠨ᠂ ᠠᠮᠢ ᠣᠯᠵᠤ ᠦᠯᠡᠳᠡᠪᠡ ᠭᠡᠮᠡᠨ᠂ ᠨᠢᠭᠤᠷ ᠨᠢᠳᠦ ᠦᠭᠡᠢ ᠡᠭᠡᠵᠦ ᠳᠣᠪᠲᠣᠯᠤᠯᠴᠠᠨ᠂ ᠬᠣᠶᠠᠷ ᠮᠢᠩᠭᠠᠨ ᠰᠢᠬᠠᠮ ᠴᠡᠷᠢᠭ ᠦᠬᠦᠨ ᠳᠠᠭᠠᠷᠢᠵᠤ᠂ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠳᠥᠷᠪᠡᠨ ᠬᠠᠭᠠᠯᠭᠠ ᠶ᠋ᠢ ᠪᠤᠯᠢᠶᠠᠯᠳᠤᠨ ᠴᠢᠬᠢᠯᠴᠡᠨ ᠢᠪᠡᠯᠴᠡᠵᠦ ᠰᠠᠮᠠᠭᠤᠷᠠᠨ ᠲᠦᠯᠬᠢᠯᠴᠡᠨ ᠣᠷᠣᠯᠴᠠᠬᠤᠢ ᠳ᠋ᠤᠷ ᠬᠦᠯᠦᠭ ᠪᠤᠭᠤᠷᠵᠢ ᠨᠣᠶᠠᠨ ᠤ᠋ ᠰᠢᠯᠭᠠᠵᠤ ᠭᠠᠷᠭᠠᠭᠰᠠᠨ ᠲᠠᠪᠤᠨ ᠲᠡᠷᠢᠭᠦᠯᠡᠭᠴᠢ ᠪᠡᠷ ᠪᠡᠶᠡ ᠪᠡᠨ ᠲᠣᠭᠣᠷᠢᠭᠤᠯᠤᠨ᠂ ᠰᠢᠯᠭᠠᠭᠰᠠᠨ ᠠᠷᠪᠠᠨ ᠪᠠᠭᠠ ᠵᠠᠩᠵᠤᠨ ᠨᠠᠷ᠂ ᠬᠥᠮᠦᠨ ᠪᠦᠷᠢ᠂ ᠲᠠᠪᠢᠭᠠᠳ ᠲᠠᠪᠢᠭᠠᠳ᠂ ᠰᠢᠯᠭᠠᠷᠠᠭᠰᠠᠨ ᠱᠠᠯᠠᠮᠠᠭᠠᠢ ᠵᠠᠯᠠᠭᠤᠰ ᠪᠠᠭᠠᠲᠤᠳ ᠢ᠋ ᠠᠩᠭᠢ ᠠᠩᠭᠢ ᠪᠠᠷ ᠪᠠᠭᠴᠠᠯᠠᠨ ᠠᠪᠴᠤ᠂ ᠪᠤᠯᠤ ᠸᠠᠩ ᠤ᠋ᠨ ᠶᠡᠬᠡ ᠬᠦᠷᠢᠶᠡᠨ ᠳ᠋ᠦ᠍ᠷ ᠳᠥᠷᠪᠡᠨ ᠡᠲᠡᠭᠡᠳ ᠪᠦᠭᠭᠦᠵᠦ ᠪᠠᠢᠭᠰᠠᠨ ᠲᠤᠯᠠ᠂ ᠡᠨᠡ ᠴᠡᠷᠢᠭ ᠦ᠋ᠳ ᠦ᠋ᠨ ᠰᠠᠮᠠᠭᠤᠷᠠᠨ ᠴᠢᠬᠢᠯᠴᠡᠨ ᠣᠷᠣᠬᠤᠢ ᠳ᠋ᠤᠷ ᠬᠠᠵᠠᠭᠤ ᠡᠲᠡᠭᠡᠳ ᠡᠴᠡ ᠴᠡᠷᠢᠭ ᠦ᠋ᠨ ᠡᠬᠢᠨ ᠦ᠌ ᠪᠦᠯᠦᠭ ᠦ᠋ᠨ ᠵᠠᠪᠰᠠᠷ ᠵᠡᠪᠰᠠᠷᠠ ᠴᠢᠬᠢᠯᠳᠦᠨ ᠣᠷᠣᠯᠴᠠᠵᠤ᠂ ᠠᠳᠠᠯᠢ ᠪᠠᠷ ᠲᠦᠯᠬᠢᠯᠴᠡᠨ ᠴᠢᠬᠢᠯᠴᠡᠨ ᠣᠷᠣᠯᠴᠠᠭᠠᠳ ᠴᠥᠮ ᠳᠤᠮᠳᠠᠳᠤ ᠬᠠᠭᠠᠨ ᠤ᠋ ᠪᠠᠭᠤᠳᠠᠯ ᠢ᠋ ᠲᠣᠭᠣᠷᠢᠨ ᠠᠪᠲᠠᠯᠠ᠂ ᠪᠤᠭᠤᠷᠵᠢ ᠨᠣᠶᠠᠨ ᠲᠣᠯᠣᠭᠠᠢ ᠪᠠᠨ ᠪᠥᠰ ᠢ᠋ᠶ᠋ᠡᠷ ᠣᠷᠢᠶᠠᠨ᠂ ᠣᠬᠣᠷ ᠭᠠᠩ ᠢᠯᠳᠦ ᠪᠠᠷᠢᠵᠤ᠂ ᠲᠠᠪᠤᠨ ᠰᠢᠯᠭᠠᠳᠠᠭ᠂ ᠠᠷᠪᠠᠨ ᠱᠠᠯᠠᠮᠠᠭᠠᠢ ᠶ᠋ᠢ ᠲᠡᠷᠢᠭᠦᠯᠡᠨ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠪᠡᠷ ᠬᠠᠭᠠᠨ ᠤ᠋ ᠰᠢᠷᠠ ᠮᠠᠩᠨᠤᠭ ᠯᠤᠤ ᠶ᠋ᠢᠨ ᠦᠷᠭᠦᠭᠡᠨᠡ ᠨᠢᠰᠬᠦ ᠮᠡᠲᠦ ᠬᠤᠷᠳᠤᠯᠠᠨ ᠣᠷᠣᠵᠤ ᠢᠷᠡᠬᠦᠶᠡ᠂ ᠪᠤᠯᠤ ᠸᠠᠩ ᠭᠠᠳᠠᠭᠠᠳᠤ ᠦᠢᠮᠡᠭᠡᠨ ᠦ᠌ ᠳᠦᠷᠭᠢᠯᠭᠡᠨ ᠢ᠋ ᠰᠣᠨᠣᠰᠴᠤ᠂ ᠰᠢᠳᠠᠷ ᠠᠷᠠᠳ ᠢ᠋ᠶ᠋ᠠᠷ ᠳᠥᠷᠪᠡᠨ ᠶᠡᠬᠡ ᠭᠠᠯ ᠤ᠋ᠨ ᠪᠠᠮᠪᠠᠷ ᠪᠠᠷᠢᠭᠤᠯᠤᠨ ᠲᠦᠷᠭᠡᠯᠡᠨ ᠠᠯᠬᠤᠵᠤ ᠯᠤᠤ ᠶ᠋ᠢᠨ ᠡᠭᠦᠳᠡᠨᠡ ᠬᠦᠷᠴᠦ ᠢᠷᠡᠲᠡᠯᠡ ᠴᠢᠪ ᠤᠴᠠᠷᠠᠭᠠᠳ ᠂ ᠪᠤᠭᠤᠷᠵᠢ ᠨᠣᠶᠠᠨ ᠨᠢᠭᠡᠨᠲᠡ ᠬᠠᠰᠬᠢᠷᠤᠨ ᠵᠠᠩᠳᠠᠵᠤ᠂ ᠬᠠᠷᠴᠠᠭᠠᠢ ᠰᠢᠪᠠᠭᠤ ᠂ ᠦᠨᠡᠭᠡ ᠲᠠᠤᠯᠠᠢ ᠶ᠋ᠢ ᠰᠢᠭᠦᠷᠭᠦ ᠮᠡᠲᠦ ᠰᠢᠭᠤᠷᠤᠨ ᠣᠷᠣᠵᠤ᠂ ᠪᠤᠯᠤ ᠢᠦᠢ ᠬᠠᠭᠠᠨ ᠤ᠋ ᠪᠠᠭᠠᠯᠵᠤᠷ ᠠ᠋ᠴᠠ ᠠᠳᠬᠤᠨ ᠠᠪᠴᠤ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠪᠥᠭᠰᠡᠨ ᠳᠣᠭᠤᠤᠷ ᠬᠥᠨᠳᠡᠯᠡᠨ ᠡᠷᠭᠦᠨ ᠰᠤᠭᠰᠤᠷᠤᠨ ᠰᠣᠢᠯᠠᠵᠤ ᠳᠡᠭᠡᠭᠰᠢ ᠨᠢᠭᠡᠨᠲᠡ ᠴᠣᠬᠢᠮᠠᠭᠴᠠ᠂ ᠲᠠᠪᠤᠨ ᠪᠠᠭᠠᠲᠤᠷ ᠤ᠋ᠨ ᠲᠡᠷᠢᠭᠦᠨ ᠦ᠌ ᠳᠡᠭᠡᠷᠡ ᠭᠠᠷᠴᠤ ᠠᠷᠪᠠᠨ ᠭᠠᠷ ᠵᠡᠷᠭᠡ ᠪᠡᠷ ᠲᠣᠰᠴᠤ ᠠᠪᠤᠨ ᠨᠢᠭᠡᠨᠲᠡ ᠪᠦᠭᠡᠮᠯᠡᠨ ᠶᠡᠬᠡ ᠭᠬᠢᠪ ᠦ᠋ᠨ ᠲᠤᠭ ᠳᠠᠯᠪᠠᠭᠠᠨ ᠢ᠋ᠶ᠋ᠠᠷ ᠪᠠᠭᠯᠠᠮᠠᠭᠴᠠ᠂ ᠡᠭᠦᠯᠡᠨ ᠴᠡᠷᠪᠢ ᠭᠠᠭᠴᠠᠭᠠᠷ ᠠᠷᠤ ᠳ᠋ᠤᠷ ᠡᠭᠦᠷᠦᠨ ᠮᠣᠷᠢᠨ ᠳ᠋ᠤᠷ ᠮᠣᠷᠳᠠᠭᠠᠳ ᠬᠦᠯᠦᠭ ᠪᠤᠭᠤᠷᠵᠢ ᠡᠮᠦᠨᠡ ᠵᠠᠮ ᠨᠡᠭᠡᠭᠡᠨ᠂ ᠠᠪᠴᠤ ᠣᠷᠣᠭᠰᠠᠨ ᠣᠷᠣᠰ ᠤᠯᠤᠰ ᠤ᠋ᠨ ᠲᠡᠮᠦᠷ ᠴᠠᠬᠢᠭᠤᠷᠲᠤ ᠭᠠᠯ ᠫᠤᠤ ᠬᠡᠳᠦ ᠬᠡᠳᠦᠨᠲᠡ ᠳᠠᠭᠤᠷᠢᠰᠴᠤ ᠂ ᠳᠥᠷᠪᠡᠨ ᠱᠠᠯᠠᠮᠠᠭᠠᠢ ᠵᠠᠯᠠᠭᠤ ᠵᠠᠩᠵᠤᠨ ᠬᠠᠮᠲᠤᠪᠠᠷ ᠢᠯᠳᠦ ᠰᠦᠬᠡ ᠪᠡᠷ ᠴᠠᠪᠴᠢᠯᠬᠢᠯᠠᠨ᠂ ᠵᠡᠭᠦᠨ ᠢ᠋ ᠵᠦᠭᠯᠡᠨ ᠪᠠᠷᠠᠭᠤᠨ ᠢ᠋ ᠡᠷᠢᠨ ᠲᠣᠭᠣᠷᠢᠨ ᠭᠡᠨᠡᠳᠡᠭᠦᠯᠵᠦ ᠠᠪᠤᠨ ᠭᠠᠷᠲᠠᠯᠠ᠂ ᠲᠠᠪᠤᠨ ᠵᠠᠭᠤᠨ ᠴᠡᠷᠢᠭ ᠦ᠋ᠨ ᠠᠷᠪᠠᠨ ᠲᠡᠷᠢᠭᠦᠯᠡᠭᠴᠢ ᠪᠠᠭᠠᠲᠤᠳ ᠪᠤᠯᠤ ᠸᠠᠩ ᠤ᠋ᠨ ᠳᠥᠷᠪᠡᠨ ᠶᠡᠬᠡ ᠭᠠᠯ ᠪᠠᠮᠪᠠᠷ ᠢ᠋ ᠪᠠᠷᠢᠭᠰᠠᠨ ᠠᠷᠠᠳ ᠢ᠋ ᠴᠥᠮ ᠴᠡᠪᠴᠢᠯᠬᠢᠯᠡᠨ ᠤᠨᠠᠭᠠᠵᠤ᠂ ᠭᠠᠯ ᠪᠠᠮᠪᠠᠷ ᠤ᠋ᠳ ᠢ᠋ ᠪᠤᠯᠢᠶᠠᠯᠳᠤᠨ ᠠᠪᠤᠯᠴᠠᠨ ᠥᠪᠡᠷ ᠥᠪᠡᠷᠦᠨ ᠪᠡᠯᠡᠳᠬᠡᠭᠰᠡᠨ ᠲᠣᠰᠣ ᠴᠢᠳᠬᠤᠭᠰᠠᠨ ᠬᠤᠯᠤᠰᠤ ᠡᠪᠡᠰᠦᠨ ᠦ᠌ ᠪᠠᠭᠴᠠ ᠪᠠᠨ ᠨᠣᠴᠣᠭᠠᠯᠴᠠᠨ᠂ ᠬᠠᠭᠠᠨ ᠥᠷᠭᠥᠭᠡ ᠡᠴᠡ ᠡᠬᠢᠯᠡᠨ ᠠᠮᠤ ᠡᠪᠡᠰᠦ ᠪᠠ ᠲᠦᠯᠡᠭᠡ ᠲᠦᠯᠡᠰᠢ ᠳ᠋ᠦ᠍ᠷ ᠭᠠᠯ ᠲᠠᠯᠪᠢᠨ᠂ ᠲᠠᠪᠤᠨ ᠵᠠᠭᠤᠨ ᠭᠠᠯ ᠪᠠᠮᠪᠠᠷ᠂ ᠥᠷᠭᠥᠭᠡ ᠮᠠᠢᠬᠠᠨ᠂ ᠬᠦᠷᠢᠶᠡ ᠬᠠᠭᠠᠯᠭᠠ ᠪᠦᠬᠦᠨᠡ ᠴᠥᠮ ᠭᠠᠯ ᠮᠠᠨᠳᠤᠭᠠᠳ ᠨᠠᠢ᠍ᠮᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠦ᠋ᠳ ᠨᠢᠭᠡᠨᠲᠡ ᠰᠣᠴᠢᠨ ᠪᠠᠯᠳᠠᠵᠤ᠂ ᠳᠣᠲᠣᠷᠠ ᠪᠠᠢᠭᠰᠠᠨ᠂ ᠭᠠᠳᠠᠨᠠ ᠠ᠋ᠴᠠ ᠡᠭᠡᠭᠰᠡᠨ ᠴᠡᠷᠢᠭ ᠦ᠋ᠳ ᠬᠠᠷᠢᠯᠴᠠᠨ ᠬᠤᠳᠬᠤᠨ ᠰᠠᠮᠠᠭᠤᠷᠠᠭᠠᠳ᠂ ᠬᠠᠷᠢᠯᠴᠠᠨ ᠵᠢᠭᠤᠷᠠᠯᠴᠠᠨ᠂ ᠮᠣᠷᠢ ᠮᠥᠷᠭᠥᠯᠳᠦᠨ ᠬᠥᠮᠦᠨ ᠲᠤᠯᠭᠠᠯᠴᠠᠭᠠᠳ᠂ ᠭᠠᠯ ᠬᠥᠭᠵᠢᠵᠦ ᠰᠠᠯᠬᠢᠨ ᠬᠥᠳᠡᠯᠦᠭᠡᠳ ᠰᠠᠯᠬᠢᠨ ᠤ᠋ ᠬᠦᠴᠦᠨ ᠳ᠋ᠦ᠍ᠷ ᠭᠠᠯ ᠬᠥᠭᠵᠢᠨ᠂ ᠭᠠᠯ ᠤ᠋ᠨ ᠨᠥᠯᠡ ᠶ᠋ᠢ ᠰᠠᠯᠬᠢᠨ ᠬᠥᠭᠵᠢᠭᠡᠨ᠂ ᠬᠥᠮᠦᠨ ᠪᠠᠷᠬᠢᠷᠠᠨ ᠮᠣᠷᠢ ᠢᠨᠴᠠᠭᠠᠨ᠂ ᠴᠢᠳᠬᠥᠷ ᠣᠷᠬᠢᠷᠠᠨ ᠠᠳᠡᠰ ᠤᠬᠢᠯᠠᠯᠳᠤᠮᠤᠢ᠃ ᠪᠤᠯᠤ ᠢᠦᠢ ᠬᠠᠭᠠᠨ ᠤ᠋ ᠪᠣᠮᠪᠣᠯᠢᠭᠤᠨ ᠪᠣᠯᠤᠭᠰᠠᠨ ᠪᠣᠭᠳᠠ ᠴᠣᠭᠴᠠ ᠬᠠᠮᠢᠭᠠᠰᠢ ᠪᠣᠯᠤᠭᠰᠠᠨ ᠢ᠋ ᠳᠣᠣᠷᠠᠲᠤ ᠪᠦᠯᠦᠭ ᠲᠣᠷ ᠦᠵᠡᠭᠳᠡᠬᠦᠢ᠃
– – – –
① ᠸᠠᠢ ᠯᠠᠨ ᠬᠡᠮᠡᠭᠴᠢ ᠬᠢᠲᠠᠳ ᠬᠡᠮᠡᠭᠰᠡᠨ ᠬᠠᠭᠤᠴᠢᠨ ᠦᠭᠡ᠂ ᠡᠳᠦᠭᠡ ᠮᠠᠨᠵᠤ ᠪᠠᠷ ᠬᠢᠲᠠᠳ ᠢ᠋ ᠸᠠᠢᠯᠠᠨ ᠬᠡᠮᠡᠮᠦᠢ᠃