ᠶᠡᠬᠡ ᠬᠠᠢᠷᠠ ᠶᠢᠨ ᠭᠡᠷᠡᠯ ᠢᠪᠡᠭᠡᠯ – ᠶᠣᠨᠳᠣᠨ ᠤ ᠪᠢᠯᠢᠭ᠌ - ᠪᠠᠭᠠᠲᠤᠷ Их хайрын гэрэл ивээл - Ёндоны Билиг - Баатар
297ᠶᠡᠬᠡ ᠬᠠᠢᠷᠠ ᠶᠢᠨ ᠭᠡᠷᠡᠯ ᠢᠪᠡᠭᠡᠯ
ᠳᠤᠮᠳᠠᠳᠤ᠂ ᠶᠡᠬᠡ ᠰᠤᠷᠭᠠᠭᠤᠯᠢ ᠶ᠋ᠢᠨ
ᠬᠠᠮᠲᠤ ᠰᠤᠷᠤᠭᠴᠢᠳ ᠲᠠᠭᠠᠨ ᠪᠠᠷᠢᠮᠤ
ᠡᠷᠳᠡᠮᠲᠦ ᠮᠡᠷᠭᠡᠨ ᠡᠨᠡᠷᠢᠩᠭᠦᠢ ᠪᠠᠭᠰᠢᠨᠠᠷ ᠮᠢᠨᠢ
ᠡᠯᠢᠭᠡᠨ ᠳᠣᠲᠣᠨᠣ ᠶ᠋ᠢᠨ ᠬᠠᠮᠲᠤ ᠨᠥᠬᠥᠳ ᠮᠢᠨᠢ
ᠨᠢᠭᠡᠨ ᠲᠣᠭᠣᠨᠣᠨ ᠳᠣᠣᠷᠠ ᠬᠤᠷᠠᠯᠳᠤᠭᠰᠠᠨ
ᠨᠢᠭᠡᠨ ᠲᠣᠭᠣᠭᠠᠨ ᠠ᠋ᠴᠠ ᠱᠥᠯᠥ ᠤᠤᠭᠤᠭᠰᠠᠨ
ᠰᠥᠨᠢ ᠶ᠋ᠢᠨ ᠣᠳᠣᠳ ᠢ᠋ ᠬᠠᠮᠲᠤ ᠲᠣᠭᠠᠯᠠᠭᠰᠠᠨ
ᠰᠦᠨ ᠨᠣᠮ ᠠᠮᠲᠠ ᠶ᠋ᠢ ᠴᠣᠭ ᠵᠠᠯᠭᠢᠯᠠᠭᠰᠠᠨ
ᠰᠥᠬᠥᠷᠡᠰᠢ ᠦᠭᠡᠢ ᠨᠠᠨᠳᠢᠨ ᠪᠠᠲᠤ ᠵᠢᠷᠤᠮᠲᠤ
ᠰᠥᠨᠥᠰᠢ ᠦᠭᠡᠢ ᠡᠷᠡᠮᠡᠬᠡᠢ ᠮᠥᠩ ᠵᠣᠷᠢᠭᠲᠤ
ᠮᠢᠨᠦ ᠬᠠᠢᠷᠠᠲᠠᠢ ᠦᠶᠡ ᠦᠶᠡ ᠶ᠋ᠢᠨ
ᠮᠢᠲᠠᠷᠠᠰᠢ ᠦᠭᠡᠢ ᠣᠮᠣᠭᠯᠠᠩ ᠳᠠᠢᠴᠢᠨ
ᠬᠠᠭᠠᠨ ᠬᠠᠲᠤᠨ ᠮᠡᠲᠦ ᠬᠠᠮᠲᠤ ᠰᠤᠷᠤᠭᠴᠢᠳ
ᠬᠠᠯᠲᠤᠷᠢᠰᠢ ᠦᠭᠡᠢ ᠵᠠᠮ ᠨᠢᠭᠡᠲᠡᠳ ᠮᠢᠨᠢ
ᠪᠤᠭᠤᠷᠤᠯᠬᠠᠨ ᠭᠡᠭᠡᠯᠢᠭ ᠪᠤᠶᠠᠨᠲᠤ ᠪᠠᠭᠰᠢᠨᠠᠷ ᠢᠶᠡᠨ
ᠪᠤᠮᠠᠨ ᠭᠠᠯᠪᠠ ᠶ᠋ᠢᠨ ᠲᠤᠷᠰᠢ ᠬᠦᠨᠳᠦᠯᠡᠶᠡ
ᠪᠤᠷᠬᠠᠨ ᠱᠠᠭᠵᠠᠮᠤᠨᠢ ᠰᠢᠭ᠋ ᠯᠡ ᠳᠡᠭᠡᠳᠦᠯᠡᠶᠡ
ᠪᠣᠰᠤᠭᠠ ᠦᠰᠦᠭ ᠲᠡᠢ ᠪᠡᠨ ᠰᠢᠲᠦᠶᠡ
ᠬᠣᠶᠠᠷ ᠮᠥᠷᠦᠨ ᠡᠴᠡ ᠴᠢᠨᠢ ᠳᠡᠭᠡᠭᠰᠢ ᠪᠡᠨ
ᠥᠨᠳᠥᠷ ᠦ᠋ᠨ ᠥᠨᠳᠥᠷ ᠲᠦ᠍ ᠡᠷᠭᠦᠭᠰᠡᠨ ᠰᠢᠦ
ᠬᠣᠶᠠᠷ ᠭᠠᠷ ᠢ᠋ ᠴᠢᠨᠢ ᠰᠠᠨᠰᠠᠷ ᠤ᠋ᠨ ᠵᠤᠯᠠᠢ ᠲᠠᠢ
ᠦᠯᠡᠮᠵᠢ ᠬᠠᠢᠷᠠ ᠪᠠᠷ ᠵᠣᠯᠭᠠᠭᠤᠯᠤᠭᠰᠠᠨ ᠰᠢᠦ
ᠬᠡᠳᠦᠢ ᠥᠨᠳᠥᠷ ᠲᠦ᠍ ᠨᠢᠰᠦᠯᠡ ᠴᠤ᠌ ᠭᠡᠰᠡᠨ
ᠬᠡᠨ ᠦ᠌ ᠠᠴᠢ ᠪᠠᠷ ᠳᠡᠭᠦᠯᠢᠭᠰᠡᠨ ᠢ᠋ᠶ᠋ᠡᠨ ᠪᠣᠳᠣ
ᠨᠢᠭᠡᠨ ᠲᠥᠷᠥᠯ ᠦ᠋ᠨ ᠡᠴᠢᠭᠡ ᠡᠬᠡ ᠡᠴᠡ
ᠠᠷᠪᠠᠨ ᠲᠥᠷᠥᠯ ᠦ᠋ᠨ ᠪᠠᠭᠰᠢ ᠭᠡᠳᠡᠭ ᠪᠢᠯᠢᠤ
ᠠᠮᠢ ᠪᠡᠶᠡ ᠨᠡᠷᠡ ᠶ᠋ᠢ ᠠᠪᠤ ᠡᠵᠢ ᠥᠭᠭᠦᠨ
ᠠᠰᠢᠳᠠ ᠡᠷᠳᠡᠮ ᠨᠣᠮ ᠢ᠋ ᠪᠠᠭᠰᠢ ᠬᠠᠢᠷᠠᠯᠠᠨᠠᠮ
ᠪᠠᠭᠰᠢ ᠶ᠋ᠢᠨ ᠠᠭᠠᠷ ᠠ᠋ᠴᠠ ᠬᠠᠯᠢᠨ ᠳᠠᠪᠠᠪᠠᠴᠤ
ᠪᠠᠷᠳᠠᠮᠨᠠᠯ ᠤ᠋ᠨ ᠰᠣᠯᠣᠩᠭᠠ ᠳ᠋ᠤ᠌ ᠪᠤᠤ ᠱᠤᠩᠪᠠ
ᠥᠩᠭᠡᠲᠦ ᠬᠣᠷᠸᠠ ᠶ᠋ᠢᠨ ᠲᠤᠢᠯᠠᠭᠠᠨ ᠳ᠋ᠤ᠌
ᠦᠨᠡᠭᠡᠨ ᠰᠢᠮᠨᠤᠰ ᠠᠷᠪᠢᠨ ᠪᠣᠢ ᠰᠢᠦ ᠳᠡ
ᠢᠪᠡᠭᠡᠯᠲᠦ ᠢᠲᠡᠭᠡᠯᠲᠦ ᠪᠠᠭᠰᠢ ᠶ᠋ᠢᠨ ᠰᠤᠷᠭᠠᠯ
ᠢᠷᠡᠬᠦ ᠲᠦᠭᠰᠢᠭᠦᠷᠢ ᠶ᠋ᠢ ᠡᠷᠡᠰ ᠵᠠᠢᠯᠠᠭᠤᠯᠳᠠᠭ
ᠢᠷᠡᠭᠡᠳᠦᠢ ᠵᠠᠮ ᠤ᠋ᠨ ᠭᠠᠯᠲᠤ ᠴᠠᠮᠬᠠᠭ ᠪᠣᠯᠪᠠᠰᠤ
ᠶᠠᠷᠢᠶᠠᠨ ᠦᠭᠡᠢ ᠭᠡᠭᠡᠨ ᠪᠠᠭᠰᠢᠨᠠᠷ ᠶᠤᠮ᠃
ᠲᠠ ᠬᠡᠴᠦᠨᠡᠨ ᠠᠯᠤᠰ ᠶᠠᠪᠤᠬᠤ ᠳᠣᠳᠣᠮ ᠢ᠋ᠶ᠋ᠠᠨ
ᠲᠡᠷᠢᠭᠦᠨ ᠳᠡᠭᠡᠷᠡ ᠲᠠᠨᠢ ᠪᠠᠭᠰᠢ ᠶ᠋ᠢᠨ ᠭᠡᠭᠡ
ᠠᠯᠲᠠᠨ ᠨᠠᠷᠠᠨ ᠮᠡᠲᠦ ᠳᠠᠭᠠᠵᠤ ᠪᠠᠢᠳᠠᠭ ᠢ᠋
ᠠᠯᠬᠤᠮ ᠪᠦᠷᠢ ᠳ᠋ᠡᠭᠡᠨ ᠪᠠᠢᠩᠭᠤ ᠰᠠᠨᠠᠭᠠᠷᠠᠢ
ᠪᠠᠭᠰᠢᠨᠠᠷ ᠤ᠋ᠨ ᠭᠡᠷᠡᠯ ᠨᠥᠬᠥᠳ ᠦ᠋ᠨ ᠬᠠᠢᠷᠠ
ᠪᠠᠷᠲᠠᠭᠠᠲᠤ ᠲᠤᠶᠠᠭᠠᠲᠤ ᠣᠷᠭᠢᠯ ᠳ᠋ᠤ᠌ ᠬᠦᠷᠭᠡᠮᠦᠢ
ᠮᠤᠩᠬᠠᠭ ᠮᠡᠬᠦᠰ ᠪᠢ ᠡᠩᠬᠡ ᠮᠥᠩᠬᠡᠳᠡ ᠪᠡᠨ
ᠮᠤᠨᠳᠠᠭ ᠪᠠᠭᠰᠢᠨᠠᠷ ᠡᠷᠬᠢᠮ ᠨᠥᠬᠥᠳ ᠢ᠋ᠶ᠋ᠡᠨ ᠯᠡ
ᠮᠣᠩᠭᠣᠯ ᠤ᠋ᠨ ᠢ᠋ᠶ᠋ᠠᠨ ᠢᠪᠡᠭᠡᠯ ᠬᠠᠢᠷᠠ ᠭᠡᠮᠡᠨ
ᠮᠣᠬᠣᠰᠢ ᠦᠭᠡᠢ ᠢᠳᠡᠭᠡᠨ ᠳᠡᠭᠡᠳᠦᠯᠡᠨᠡᠮ ᠠ᠋
ᠪᠠᠭᠰᠢᠨᠠᠷ ᠨᠥᠬᠥᠳ ᠦ᠋ᠨ ᠬᠠᠢᠷᠠ ᠢᠪᠡᠭᠡᠯ
ᠪᠠᠷᠰ ᠰᠢᠭ᠋ ᠨᠠᠮᠠ ᠶ᠋ᠢ ᠠᠷᠠᠯ ᠤ᠋ᠨ ᠱᠠᠷ ᠰᠢᠭ᠋
ᠲᠡᠭᠷᠢ ᠶ᠋ᠢᠨ ᠲᠤᠯᠭᠠᠭᠤᠷᠢ ᠰᠢᠭ᠋ ᠪᠣᠯᠭᠠᠭᠰᠠᠨ ᠶᠤᠮ
ᠲᠡᠨᠡᠭ ᠪᠢ ᠲᠡᠭᠡᠵᠦ ᠭᠡᠨᠡᠲᠡᠢ ᠤᠬᠠᠭᠠᠷᠠᠭᠰᠠᠨ ᠶᠤᠮ
ᠠᠴᠢ ᠶ᠋ᠢᠨ ᠲᠠᠨᠢ ᠬᠠᠷᠢᠭᠤ ᠶ᠋ᠢ ᠣᠯᠳᠣᠢ ᠪᠢ
ᠠᠷᠪᠠᠨ ᠲᠥᠷᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠷᠢᠭᠤᠯᠤᠮᠤᠢ
ᠠᠬᠢᠭᠠᠳ ᠲᠦᠮᠡᠨᠲᠡ ᠪᠤᠮᠠᠨᠲᠠ ᠲᠥᠷᠥᠭᠡᠳ
ᠢᠯᠭᠤᠭᠰᠠᠨ ᠰᠢᠯᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠠᠭᠲᠠᠮᠤᠢ
᠁ ᠁ ᠁
2024᠂4᠂28᠃ ᠦᠳᠡ ᠬᠣᠢᠨᠠ᠃
ᠬᠥᠬᠡᠬᠣᠲᠠ ᠠ᠋ᠴᠠ ᠣᠷᠳᠣᠰ ᠬᠦᠷᠬᠦ
ᠭᠠᠯᠲᠤ ᠲᠡᠷᠭᠡᠨ ᠳᠡᠭᠡᠷᠡ ᠪᠦᠲᠦᠭᠡᠪᠡᠢ᠃