ᠡᠰᠡᠷᠭᠦᠦ ᠶ᠋ᠢ ᠰᠣᠨᠣᠰᠪᠠ - ᠳ· ᠨᠠᠴᠤᠭᠳᠣᠷᠵᠢЭсэргүүг сонсов-Д.Нацагдорж
245ᠡᠰᠡᠷᠭᠦᠦ ᠶ᠋ᠢ ᠰᠣᠨᠣᠰᠪᠠ
ᠳ· ᠨᠠᠴᠤᠭᠳᠣᠷᠵᠢ
ᠪᠤᠷᠬᠠᠨ ᠪᠣᠳᠢᠰᠠᠳ᠋ᠸᠠ ᠶ᠋ᠢᠨ ᠨᠣᠮᠯᠠᠯ ᠢ᠋ ᠦᠰᠦ ᠪᠡᠨ ᠴᠠᠢᠲᠠᠯᠠ ᠡᠳᠦᠷ ᠪᠦᠷᠢ ᠤᠩᠰᠢᠭᠠᠳ
ᠪᠤᠳᠤᠩᠭᠤᠢ ᠬᠣᠮᠣᠬᠠᠢ ᠰᠡᠳᠬᠢᠯ ᠢ᠋ ᠠᠭᠤᠯᠠ ᠳᠠᠯᠠᠢ ᠮᠡᠲᠦ ᠲᠡᠵᠢᠭᠡᠭᠰᠡᠨ ᠶᠠᠭᠤᠲᠠᠢ ᠬᠠᠲᠠᠭᠤ ᠰᠡᠳᠬᠢᠯ ᠪᠣᠢ?
ᠪᠣᠳᠢᠰᠠᠳ᠋ᠸᠠ ᠶ᠋ᠢᠨ ᠠᠯᠲᠠᠨ ᠬᠥᠷᠥᠭ ᠢ᠋ ᠬᠣᠢᠨᠠ ᠪᠠᠨ ᠰᠢᠲᠦᠵᠦ ᠨᠠᠮᠠᠨᠴᠢᠯᠠᠨ ᠮᠥᠷᠭᠥᠭᠡᠳ
ᠪᠣᠰᠬᠠᠯ ᠤ᠋ᠨ ᠪᠢᠯᠠᠭᠤ ᠰᠢᠳᠠᠮ ᠢ᠋ ᠡᠮᠦᠨᠡ ᠪᠡᠨ ᠪᠠᠷᠢᠵᠤ ᠪᠣᠰᠤᠭᠰᠠᠨ ᠶᠠᠮᠠᠷ ᠬᠣᠣᠷᠲᠤ ᠭᠠᠷ ᠬᠥᠯ ᠪᠣᠢ?
ᠠᠭᠯᠠᠭ ᠣᠷᠣᠨ ᠳ᠋ᠤ᠌ ᠵᠠᠪᠢᠯᠠᠨ ᠰᠠᠭᠤᠭᠴᠢ ᠠᠷᠢᠭᠤᠨ ᠰᠠᠨᠸᠠᠷᠲᠠᠨ ᠭᠡᠰᠡᠨ ᠯᠠᠮᠠ ᠨᠠᠷ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ
ᠠᠮᠢᠲᠠᠨ ᠪᠦᠬᠦᠨ ᠢ᠋ ᠠᠯᠠᠵᠤ ᠬᠢᠳᠤᠬᠤ ᠪᠤᠵᠠᠷ ᠶᠠᠷᠭᠠᠴᠢᠨ ᠪᠠᠰᠠ ᠭᠠᠷᠳᠠᠭ ᠠᠵᠢ᠃
ᠬᠣᠭᠣᠰᠣᠨ ᠴᠢᠨᠠᠷ ᠤ᠋ᠨ ᠨᠣᠮ ᠢ᠋ ᠪᠢᠰᠢᠯᠭᠠᠭᠰᠠᠨ ᠨᠢᠷᠸᠠᠨ ᠤ᠋ ᠰᠤᠷᠲᠠᠯᠳᠠᠨ ᠠ᠋ᠴᠠ
ᠬᠠᠷᠢᠨ ᠬᠥᠮᠦᠨ ᠦ᠌ ᠲᠡᠦᠬᠡᠨ ᠳ᠋ᠦ᠍ ᠦᠵᠡᠭᠳᠡᠭᠡ ᠦᠭᠡᠢ ᠬᠣᠣᠷᠲᠤ ᠶᠠᠪᠤᠳᠠᠯ ᠢ᠋ ᠦᠢᠯᠡᠳᠴᠡᠢ᠃
ᠵᠠᠭᠤᠨ ᠮᠢᠩᠭᠠᠨ ᠵᠢᠯ ᠳ᠋ᠦ᠍ ᠵᠡᠷᠯᠢᠭ ᠠᠭᠤᠯᠠ ᠬᠡᠭᠡᠷᠡ ᠲᠠᠯᠠ ᠶ᠋ᠢᠨ ᠳᠤᠮᠳᠠ
ᠵᠡᠪᠰᠡᠭ ᠪᠠᠷᠢᠵᠤ ᠵᠢᠭᠰᠠᠭᠰᠠᠨ ᠴᠡᠷᠢᠭ ᠦ᠋ᠨ ᠦᠢᠯᠡᠳᠦᠭᠡ ᠦᠭᠡᠢ ᠠᠯᠠᠯᠳᠤᠭᠠᠨ ᠢ᠋
ᠪᠠᠢᠨ ᠪᠠᠢᠭᠰᠠᠭᠠᠷ ᠪᠤᠷᠬᠠᠨ ᠰᠦᠮᠡ ᠪᠣᠳᠢᠰᠠᠳ᠋ᠸᠠ ᠶ᠋ᠢᠨ ᠬᠡᠢᠳ ᠦ᠋ᠨ ᠳᠣᠲᠣᠷᠠ
ᠪᠣᠳᠢ ᠤᠩᠰᠢᠵᠤ ᠵᠠᠪᠢᠯᠠᠨ ᠰᠠᠭᠤᠭᠰᠠᠨ ᠯᠠᠮᠠ ᠨᠠᠷ ᠠ᠋ᠴᠠ ᠬᠡᠪ ᠭᠡᠨᠡᠳᠲᠡ ᠡᠭᠦᠰᠬᠡᠪᠡ᠃
ᠮᠣᠩᠭᠣᠯ ᠤ᠋ᠨ ᠠᠭᠤᠳᠠᠮ ᠰᠠᠢᠬᠠᠨ ᠣᠷᠣᠨ ᠳᠡᠭᠡᠷᠡ ᠮᠢᠩᠭᠠ ᠲᠦᠮᠡᠨ ᠵᠢᠯ ᠥᠩᠭᠡᠷᠡᠬᠦ ᠳ᠋ᠦ᠍
ᠮᠠᠨ ᠤ᠋ ᠲᠡᠦᠬᠡᠨ ᠳ᠋ᠦ᠍ ᠲᠣᠬᠢᠶᠠᠯᠳᠤᠭᠠ ᠦᠭᠡᠢ ᠬᠣᠣᠷᠲᠤ ᠬᠥᠳᠡᠯᠭᠡᠭᠡᠨ ᠢ᠋
ᠰᠠᠨᠠᠮᠰᠠᠷ ᠦᠭᠡᠢ ᠰᠢᠷᠠ ᠬᠠᠷᠠ ᠹᠧᠣᠳᠠᠯ ᠨᠠᠷ ᠠ᠋ᠴᠠ ᠤᠳᠤᠷᠢᠳᠴᠤ
ᠱᠠᠰᠲᠢᠷ ᠲᠡᠦᠬᠡ ᠶ᠋ᠢ ᠬᠥᠮᠦᠨ ᠦ᠌ ᠴᠢᠰᠤ ᠪᠠᠷ ᠪᠤᠵᠠᠷᠯᠠᠪᠠ᠃
ᠭᠠᠳᠠᠭᠠᠳᠤ ᠶ᠋ᠢᠨ ᠣᠯᠠᠨ ᠪᠠᠢᠯᠳᠤᠭᠠᠨ ᠳᠠᠢᠯᠠᠯᠳᠤᠭᠠᠨ ᠳ᠋ᠤ᠌ ᠦᠷᠡᠭᠳᠡᠭᠡ ᠦᠭᠡᠢ
ᠬᠥᠮᠦᠨ ᠦ᠌ ᠣᠯᠠᠨ ᠠᠮᠢ ᠬᠥᠷᠥᠩᠭᠡ ᠶ᠋ᠢᠨ ᠶᠡᠬᠡ ᠰᠦᠢᠳᠬᠡᠯ ᠢ᠋
ᠭᠠᠢᠬᠠᠯ ᠰᠢᠷᠠ ᠬᠠᠷᠠ ᠹᠧᠣᠳᠠᠯ ᠨᠠᠷ ᠠ᠋ᠴᠠ ᠬᠥᠳᠡᠯᠭᠡᠭᠡᠨ ᠭᠠᠷᠭᠠᠵᠤ
ᠬᠠᠢᠷᠠᠨ ᠣᠯᠠᠨ ᠠᠷᠠᠳ ᠢ᠋ ᠬᠣᠣᠷᠯᠠᠨ ᠬᠠᠰᠢᠶᠠ ᠮᠠᠯ ᠢ᠋ ᠲᠦᠢᠮᠡᠷᠳᠡᠵᠡᠢ᠃
ᠰᠦᠰᠦᠭ ᠴᠤᠤ ᠦᠭᠡ ᠪᠡᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠢᠵᠦ
ᠬᠢᠲᠠᠳ ᠤ᠋ᠨ ᠬᠠᠷᠭᠢᠰ ᠭᠧᠨᠧᠷᠠᠯ ᠤ᠋ᠳ ᠢ᠋ᠶ᠋ᠠᠷ ᠨᠥᠬᠥᠷ ᠢ᠋ᠶ᠋ᠡᠨ ᠬᠢᠵᠦ
ᠰᠢᠨᠡ ᠶᠢᠷᠲᠢᠨᠴᠦ ᠶ᠋ᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠮᠠᠨᠳᠤᠵᠤ ᠪᠦᠬᠦᠢ ᠬᠤᠪᠢᠰᠬᠠᠯᠲᠤ ᠤᠯᠤᠰ ᠢ᠋ ᠡᠰᠡᠷᠭᠦᠴᠡᠭᠰᠡᠨ
ᠰᠢᠨᠤᠬᠠᠢ ᠬᠠᠷᠭᠢᠰ ᠰᠢᠷᠠ ᠬᠠᠷᠠ ᠹᠧᠣᠳᠠᠯ ᠤ᠋ᠳ ᠢ᠋ ᠱᠠᠰᠲᠢᠷ ᠲᠡᠦᠬᠡᠨ ᠳ᠋ᠦ᠍ ᠵᠠᠨᠤᠰᠤᠭᠠᠢ᠃
1932 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠤᠳᠤᠯᠲᠤ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ