ᠬᠦᠷᠭᠡᠨ ᠬᠦᠦ - ᠳ· ᠨᠠᠴᠤᠭᠳᠣᠷᠵᠢХүргэн хүү-Д.Нацагдорж
246ᠬᠦᠷᠭᠡᠨ ᠬᠦᠦ
ᠳ· ᠨᠠᠴᠤᠭᠳᠣᠷᠵᠢ
1. ᠥᠷᠯᠥᠭᠡᠨ ᠦ᠌ ᠨᠠᠷᠠ ᠰᠠᠶᠢ ᠭᠠᠷᠴᠤ ᠠᠭᠤᠷ ᠴᠡᠴᠡᠭ ᠣᠷᠭᠢᠯᠤᠭᠤᠯᠤᠨᠠ᠂
ᠥᠷᠭᠡᠨ ᠴᠢᠯᠥᠭᠡ ᠪᠡᠷ ᠨᠢᠭᠡ ᠴᠤ ᠬᠥᠮᠦᠨ ᠦᠯᠦ ᠦᠵᠡᠭᠳᠡᠨ ᠨᠣᠬᠠᠢ ᠪᠠᠰᠠ ᠤᠨᠲᠠᠵᠤ ᠪᠠᠢᠨᠠ᠃
ᠥᠨᠥᠬᠢ ᠬᠠᠷᠠ ᠬᠥᠮᠦᠨ ᠳᠠᠮᠨᠠᠭᠤᠷᠴᠢᠨ ᠤ᠋ ᠭᠤᠳᠤᠮᠵᠢᠨ ᠠ᠋ᠴᠠ ᠰᠦᠮᠡᠯᠵᠡᠨ ᠭᠠᠷᠴᠤ ᠢᠷᠡᠭᠡᠳ
ᠦᠯᠪᠡᠯᠵᠡᠨ ᠰᠦᠯᠪᠡᠯᠵᠡᠨ ᠠᠯᠲᠠ ᠳᠡᠯᠢᠮ ᠢ᠋ᠶ᠋ᠡᠷ ᠠᠯᠬᠤᠯᠠᠨᠠ᠃
2. ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠬᠠᠩᠭᠢᠨᠠᠵᠤ ᠪᠠᠢᠲᠠᠯᠠ ᠳᠠᠩ ᠰᠠᠷᠮᠠᠢ ᠳᠡᠪᠡᠯ ᠲᠡᠢ
ᠥᠷᠥᠭᠡᠰᠦᠨ ᠭᠠᠷ ᠢ᠋ᠶ᠋ᠠᠨ ᠡᠪᠦᠷ ᠲᠡᠭᠡᠨ ᠬᠢᠵᠦ ᠪᠠᠰᠠ ᠨᠥᠭᠦᠭᠡ ᠭᠠᠷ ᠲᠠᠭᠠᠨ ᠲᠠᠶᠠᠭ ᠪᠠᠷᠢᠵᠠᠢ᠃
ᠥᠷᠭᠥᠭᠡ ᠭᠡᠷ ᠨᠢ ᠬᠠᠮᠢᠭᠠ ᠪᠣᠢ ᠭᠡᠪᠡᠯ ᠬᠦᠷᠢᠶᠡ ᠨᠡᠢᠲᠡ ᠬᠣᠷᠣᠭᠠ ᠳᠠᠶᠠᠭᠠᠷ᠂
ᠥᠴᠥᠭᠡᠳᠦᠷ ᠰᠥᠨᠢ ᠬᠡᠨ ᠦ᠌ ᠳ᠋ᠦ᠍ ᠨᠣᠢᠷᠰᠤᠪᠠ ᠭᠡᠪᠡᠯ ᠬᠤᠸᠠᠷ ᠬᠡᠦᠬᠡᠨ ᠦ᠌ ᠬᠠᠯᠠᠭᠤᠨ ᠬᠠᠨᠵᠤᠨ ᠳᠡᠭᠡᠷᠡ᠃
3. ᠬᠠᠷᠠᠩᠭᠤᠢ ᠰᠥᠨᠢ ᠶᠠᠪᠤᠬᠤ ᠳᠠᠳᠤᠯ ᠲᠠᠢ᠂ ᠬᠠᠨᠴᠤ ᠳ᠋ᠠᠭᠠᠨ ᠭᠡᠷᠡᠯᠲᠡᠢ ᠺᠠᠷᠮᠠᠨ ᠳ᠋ᠠᠭᠠᠨ ᠬᠢᠲᠤᠭᠠ ᠲᠠᠢ᠃
ᠭᠤᠳᠤᠮᠵᠢᠨ ᠤ᠋ ᠨᠣᠬᠠᠢ ᠲᠠᠭᠠᠷᠢᠯᠳᠤᠪᠴᠤ ᠭᠥᠯᠥᠭᠡ ᠭᠡᠪᠡᠯ ᠲᠡᠭᠦᠨ ᠢ᠋ ᠲᠠᠨᠢᠭᠠᠳ ᠪᠤᠴᠠᠨᠠ᠃
ᠬᠥᠭᠰᠢᠨ ᠬᠥᠮᠦᠨ ᠢ᠋ ᠬᠠᠭᠤᠷᠴᠤ ᠴᠢᠳᠠᠨᠠ᠂ ᠬᠡᠦᠬᠡᠳ ᠬᠥᠮᠦᠨ ᠢ᠋ ᠠᠶᠤᠯᠭᠠᠵᠤ ᠴᠢᠳᠠᠨᠠ᠃
ᠬᠡᠦᠬᠡᠨ ᠬᠥᠮᠦᠨ ᠢ᠋ ᠬᠥᠭᠡᠭᠡᠵᠦ ᠴᠤ ᠴᠢᠳᠠᠨᠠ᠂ ᠡᠬᠡᠨᠡᠷ ᠬᠥᠮᠦᠨ ᠢ᠋ ᠡᠷᠭᠢᠭᠦᠯᠵᠦ ᠴᠤ ᠴᠢᠳᠠᠨᠠ᠃
4. ᠨᠢᠳᠦᠨ ᠳ᠋ᠡᠭᠡᠨ ᠲᠣᠮᠣ ᠲᠥᠭᠥᠷᠢᠭ ᠰᠢᠯ ᠬᠢᠵᠦ᠂ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠪᠠᠯ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨᠠ᠃
ᠨᠢᠭᠤᠷ ᠲᠠᠭᠠᠨ ᠪᠠᠭᠠ ᠪᠠᠭᠠ ᠣ ᠲᠠᠯᠪᠢᠵᠤ ᠬᠡᠦᠬᠡᠨ ᠲᠡᠢ ᠠᠭᠤᠯᠵᠠᠪᠠᠯ ᠪᠠᠰᠠ ᠯᠠ ᠵᠢᠭᠠᠬᠠᠨ ᠳ᠋ᠦᠨᡁᠢ( ᠦᠨᠦᠷᠲᠡᠢ ᠤᠰᠤ) ᠦᠨᠦᠷᠳᠡᠭᠦᠯᠦᠨᠡ᠃
ᠬᠢᠳᠡᠭ ᠠᠵᠢᠯ ᠨᠢ ᠶᠠᠭᠤ ᠪᠣᠢ ᠭᠡᠪᠡᠯ ᠬᠡᠰᠦᠬᠦ ᠲᠡᠨᠦᠬᠦ ᠬᠡᠷᠡᠯᠳᠦᠬᠦ ᠵᠣᠳᠣᠯᠳᠤᠬᠤ ᠬᠠ ᠶᠠ᠂ ᠬᠠ ᠶᠠ᠃
ᠬᠢᠴᠢᠶᠡᠯ ᠡᠷᠳᠡᠮ ᠨᠢ ᠠᠯᠢ ᠪᠣᠢ ᠭᠡᠪᠡᠯ ᠬᠡᠦᠬᠡᠨ ᠮᠡᠦᠬᠡᠨ᠂ ᠬᠥᠵᠥᠷ ᠳᠠᠯᠤᠤ᠂ ᠠᠷᠢᠬᠢ ᠳᠠᠷᠠᠰᠤ᠂ ᠠᠯᠢᠶᠠ ᠵᠤᠭᠠ᠃
5. ᠥᠴᠥᠭᠡᠳᠦᠷ ᠭᠠᠷ ᠲᠠᠷᠢᠭᠤᠯᠤᠭᠰᠠᠨ᠂ ᠥᠩᠭᠡᠷᠡᠭᠰᠡᠨ ᠰᠥᠨᠢ ᠨᠣᠢᠷ ᠪᠠᠰᠠ ᠳᠤᠲᠠᠭᠤ᠂
ᠥᠨᠥ ᠥᠷᠯᠥᠭᠡ ᠵᠢᠪᠠᠷ ᠪᠠᠰᠠ ᠴᠢᠩᠭᠠ᠂ ᠣᠳᠣ ᠬᠠᠮᠢᠭᠠᠰᠢ ᠪᠠᠨ ᠣᠴᠢᠬᠤ ᠪᠢᠯᠡ᠃
ᠥᠨᠥᠬᠢ ᠠᠢᠯ ᠳ᠋ᠤ᠌ ᠣᠷᠣᠶᠠ ᠤᠤ᠂ ᠥᠷᠯᠥᠭᠡᠨ ᠦ᠌ ᠴᠠᠢ ᠶ᠋ᠢ ᠨᠢ ᠫᠤᠤᠳᠠᠶᠠ ᠤᠤ?
ᠥᠨᠳᠥᠷ ᠬᠣᠷᠰᠢᠶᠠᠨ ᠳ᠋ᠤ᠌ ᠣᠷᠣᠶᠠ ᠤᠤ᠂ ᠥᠨᠥᠬᠢ ᠬᠡᠦᠬᠡᠨ ᠢ᠋ ᠬᠦᠯᠢᠶᠡᠶᠡ ᠤᠤ?
6. ᠤᠤᠭᠤᠬᠤ ᠢᠳᠡᠬᠦ ᠶ᠋ᠢ ᠶᠠᠭᠠᠷᠠᠬᠤ ᠳ᠋ᠠᠭᠠᠨ ᠤᠷᠲᠤ ᠬᠥᠯ ᠢ᠋ᠶ᠋ᠡᠨ ᠭᠤᠷᠪᠠᠳᠤᠭᠠᠷ ᠠᠷᠠᠭᠠᠨ ᠳ᠋ᠤ᠌ ᠵᠠᠯᠭᠠᠪᠠ᠃
ᠤᠭᠤᠴᠠ ᠪᠠᠨ ᠡᠭᠦᠷᠴᠦ ᠡᠯᠢᠭᠡ ᠪᠡᠨ ᠲᠡᠪᠡᠷᠢᠭᠡᠳ ᠤᠷᠲᠤ ᠬᠣᠷᠣᠭᠠ ᠤᠷᠤᠭᠤ ᠬᠠᠷᠠᠢᠯᠭᠠᠪᠠ᠃
ᠭᠤᠳᠤᠮᠵᠢᠨ ᠤ᠋ ᠳᠤᠮᠳᠠ ᠨᠢᠭᠡ ᠶᠠᠭᠤᠮᠠᠨ ᠤ᠋ ᠦᠨᠦᠷ ᠥᠨᠳᠥᠷ ᠬᠠᠮᠠᠷ ᠢ᠋ ᠴᠣᠬᠢᠪᠠ᠃
ᠭᠤᠷᠪᠠᠨᠲᠠ ᠰᠢᠨᠵᠢᠵᠦ ᠡᠰᠢ ᠳᠠᠰᠢ ᠬᠡᠳᠦᠨᠲᠡ ᠬᠠᠷᠠᠭᠠᠳ ᠲᠡᠷᠡ ᠵᠦᠭ ᠲᠡᠮᠡᠦᠯᠪᠡ᠃
7. ᠲᠡᠷᠡ ᠠᠢᠯ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠣᠴᠢᠭᠠᠳ ᠳᠡᠪᠡᠯ ᠢ᠋ᠶ᠋ᠡᠨ ᠵᠠᠰᠠᠵᠤ ᠮᠠᠯᠠᠭᠠᠢ ᠪᠠᠨ ᠲᠡᠭᠰᠢᠯᠡᠨᠡ᠃
ᠳᠡᠷᠭᠡᠳᠡᠭᠦᠷ ᠢ᠋ᠶ᠋ᠡᠨ ᠬᠥᠮᠦᠨ ᠭᠠᠷᠬᠤ ᠳ᠋ᠤ᠌ ᠳᠡᠭᠡᠭᠦᠷ ᠬᠠᠷᠠᠵᠤ ᠲᠥᠪ ᠪᠠᠢᠳᠠᠯ ᠢ᠋ ᠭᠠᠷᠭᠠᠨᠠ᠃
ᠨᠢᠳᠦᠨ ᠦ᠌ ᠪᠡᠨ ᠰᠢᠯ ᠢ᠋ ᠠᠷᠴᠢᠵᠤ ᠨᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠲᠣᠭᠣᠰᠣ ᠶ᠋ᠢ ᠴᠡᠪᠡᠷᠯᠡᠨᠡ᠃
ᠨᠢᠰᠦ ᠪᠡᠨ ᠨᠢᠭᠡᠵᠦ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠨ ᠬᠣᠶᠠᠷ ᠭᠤᠷᠪᠠ ᠬᠠᠨᠢᠶᠠᠭᠠᠳ ᠣᠷᠣᠪᠠ᠃
8.ᠣᠯᠠᠨ ᠬᠥᠮᠦᠨ ᠲᠤᠯᠭᠠ ᠲᠣᠭᠣᠷᠢᠨ ᠰᠠᠭᠤᠬᠤ ᠳ᠋ᠤᠨᠢ ᠲᠣᠯᠣᠭᠠᠢ ᠳᠠᠷᠠᠭᠠᠯᠠᠨ ᠮᠠᠨᠳᠤᠯᠠᠪᠠ ᠃
ᠣᠷᠣᠨ ᠳᠡᠭᠡᠷᠡ ᠨᠢ ᠰᠠᠨᠳᠠᠢᠯᠠᠭᠠᠳ ᠣᠯᠠᠨ ᠬᠡᠯᠡ ᠶᠢ ᠬᠣᠯᠢᠵᠤ ᠶᠠᠷᠢᠨᠠ ᠃
ᠴᠠᠢ ᠠᠪᠴᠢᠷᠠᠭᠠᠳ ᠥᠭᠬᠦ ᠳ᠋ᠤᠨᠢ᠄《ᠵᠠ᠂ ᠵᠠ ᠵᠦᠭᠡᠷ ᠵᠦᠭᠡᠷ》ᠭᠡᠨᠡ᠃
ᠴᠠᠰᠢ ᠪᠠᠨ ᠠᠪᠤᠭᠠᠳ ᠶᠠᠪᠤᠬᠤ ᠳ᠋ᠤᠨᠢ᠄《ᠵᠠ᠂ ᠶᠠᠭᠠᠬᠢᠬᠤ ᠪᠣᠢ ᠨᠢᠭᠡ ᠬᠢᠭᠡᠳ ᠠᠯᠢ》ᠭᠡᠨᠡ᠃
9.ᠪᠤᠭᠤᠷᠤᠯ ᠲᠣᠯᠣᠭᠠᠢ ᠲᠠᠢ ᠡᠮᠡᠭᠡᠨ ᠪᠤᠳᠠᠭᠠ ᠲᠠᠢ ᠴᠠᠢ ᠬᠢᠭᠡᠳ
ᠪᠤᠪᠠᠷ ᠪᠤᠪᠠᠷ ᠬᠦᠯᠬᠦᠵᠦ ᠪᠤᠢᠯᠠ ᠵᠠᠪᠠᠵᠢ ᠪᠠᠨ ᠪᠤᠨᠳᠠᠢᠯᠭᠠᠨᠠ᠃
ᠥᠨᠥᠬᠢ ᠬᠥᠮᠦᠨ ᠦ᠌ ᠥᠯᠥᠰᠦᠭᠰᠡᠨ ᠢ᠋ ᠬᠡᠯᠡᠬᠦ ᠤᠤ᠂ ᠥᠨᠥᠬᠢ ᠴᠢᠪᠠᠭᠠᠨᠴᠠ ᠶ᠋ᠢᠨ ᠢᠳᠡᠬᠦ ᠶ᠋ᠢ ᠬᠡᠯᠡᠬᠦ ᠤᠤ
ᠡᠮᠬᠦᠵᠦ ᠬᠦᠯᠬᠦᠵᠦ ᠪᠠᠢᠭᠠ ᠠᠮᠠᠨ ᠳ᠋ᠤᠨᠢ ᠥᠳᠥ ᠬᠣᠷᠣᠬᠠᠢ ᠬᠥᠳᠡᠯᠦᠨᠡ᠃
10. ᠪᠠᠷᠠᠭᠤᠨᠲᠠᠢ ᠰᠠᠭᠤᠭᠰᠠᠨ ᠬᠡᠦᠬᠡᠨ ᠦ᠌ ᠬᠥᠭᠡᠷᠦᠬᠦᠨ ᠢ᠋ ᠬᠡᠯᠡᠬᠦ ᠤᠤ
ᠫᠢᠯᠨᠨ ᠳᠣᠲᠣᠷᠠ ᠪᠠᠢᠭᠠ ᠮᠢᠬᠠᠨ ᠤ᠋ ᠰᠠᠢᠬᠠᠨ ᠢ᠋ ᠬᠡᠯᠡᠬᠦ ᠤᠤ
ᠬᠣᠷᠣᠬᠠᠢ ᠶ᠋ᠢ ᠬᠥᠳᠡᠯᠭᠡᠭᠰᠡᠨ ᠲᠡᠭᠦᠨ ᠦ᠌ ᠨᠢᠳᠦ ᠨᠢ ᠬᠣᠶᠠᠷ ᠪᠡᠶᠡ ᠳᠡᠭᠡᠷᠡ ᠡᠭᠡᠯᠵᠢᠯᠡᠨ ᠲᠤᠰᠬᠤ ᠳ᠋ᠤ᠌
ᠬᠣᠢᠭᠤᠷ ᠤᠷᠳᠤᠭᠤᠷ ᠰᠠᠭᠤᠭᠰᠠᠨ ᠬᠡᠦᠬᠡᠳ ᠦ᠋ᠨ ᠰᠢᠪᠡᠷ ᠠᠪᠠᠷ ᠶᠠᠷᠢᠯᠴᠠᠬᠤ ᠨᠢ ᠬᠡᠴᠡᠭᠦᠦ᠃
11. ᠬᠥᠭᠰᠢᠨ ᠠᠪᠠᠭᠠᠢ ᠶ᠋ᠢ ᠡᠮᠡᠭᠡ ᠠ᠋ ᠭᠡᠵᠦ ᠠᠷᠭᠠᠳᠠᠭᠠᠳ ᠡᠯᠳᠡᠪ ᠶᠠᠭᠤᠮᠠ ᠶᠠᠷᠢᠵᠤ
ᠬᠥᠭᠡᠷᠦᠬᠦᠨ ᠬᠡᠦᠬᠡᠨ ᠢ᠋ ᠳᠡᠭᠦᠦ ᠮᠢᠨᠢ ᠭᠡᠵᠦ ᠡᠨᠡ ᠲᠡᠷᠡ ᠶ᠋ᠢ ᠠᠰᠠᠭᠤᠨᠠ᠃
ᠬᠠᠭᠤᠴᠢᠨ ᠲᠠᠨᠢᠯ ᠭᠡᠵᠦ ᠬᠤᠳᠠᠯ ᠬᠡᠯᠡᠨ᠂ ᠬᠣᠷᠰᠢᠶᠠᠨ ᠤ᠋ ᠲᠦᠰᠢᠮᠡᠯ ᠭᠡᠵᠦ ᠴᠡᠮᠴᠡᠭᠡᠷ ᠰᠠᠭᠤᠨᠠ᠃
ᠬᠠᠭᠤᠳᠠᠰᠤ ᠪᠢᠴᠢᠭ ᠢ᠋ ᠭᠠᠷᠭᠠᠵᠤ ᠬᠡᠢ ᠭᠠᠢᠬᠠᠭᠤᠯᠤᠨ ᠬᠤᠪᠢ ᠴᠠᠯᠢᠩ ᠶᠡᠬᠡ ᠲᠡᠢ ᠭᠡᠵᠦ ᠬᠡᠪ ᠶᠠᠷᠢᠨᠠ
12ᠥᠷᠯᠥᠭᠡᠨ ᠦ᠌ ᠴᠠᠢ ᠶ᠋ᠢᠨ ᠶᠠᠷᠢᠶᠠ ᠦᠳᠡᠰᠢ ᠶ᠋ᠢᠨ ᠬᠣᠭᠣᠯᠠᠨ ᠤ᠋ ᠦᠶᠡ ᠳ᠋ᠦ᠍ ᠬᠡᠷᠪᠡ᠃
ᠥᠨᠥᠬᠢ ᠬᠥᠮᠦᠨ ᠬᠡᠳᠦᠢᠨᠡᠢ ᠬᠣᠢᠮᠣᠷ ᠰᠠᠭᠤᠪᠠ᠂ ᠬᠣᠭᠣᠯᠠ ᠬᠢᠬᠦ ᠪᠣᠯᠪᠠ᠃
ᠬᠡᠰᠡᠭ ᠮᠢᠬᠠ ᠶ᠋ᠢ ᠲᠠᠰᠤ ᠲᠠᠰᠤ ᠴᠠᠪᠴᠢᠨ᠂ ᠪᠦᠳᠦᠭᠦᠨ ᠥᠭᠡᠬᠦ ᠶ᠋ᠢ ᠪᠥᠭᠡᠮ ᠢ᠋ᠶ᠋ᠡᠷ ᠬᠣᠯᠢᠨᠠ᠃
ᠬᠢᠭᠰᠡᠨ ᠬᠣᠭᠣᠯᠠ ᠨᠢ ᠬᠡᠦᠬᠡᠨ ᠳ᠋ᠦ᠍ ᠬᠤᠷᠴᠠᠳᠴᠤ᠂ ᠴᠢᠪᠠᠭᠠᠨᠴᠠ ᠳ᠋ᠤ᠌ ᠱᠣᠷᠪᠣᠭᠳᠠᠪᠠ᠃
13. ᠬᠦᠷᠭᠡᠨ ᠬᠦᠦ ᠨᠢ ᠴᠦ᠍ ᠪᠣᠯᠪᠠ᠂ ᠬᠣᠶᠠᠷ ᠰᠥᠨᠢ ᠴᠦ᠍ ᠬᠣᠨᠣᠪᠠ᠂ ᠭᠡᠷ ᠦ᠋ᠨ ᠡᠵᠡᠨ ᠴᠦ᠍ ᠪᠣᠯᠪᠠ᠃
ᠬᠣᠭᠰᠢᠯ ᠶᠠᠭᠤᠮᠠ ᠶ᠋ᠢ ᠠᠪᠴᠤ ᠢᠷᠡᠬᠦ ᠴᠦ᠍ ᠪᠣᠯᠪᠠ᠂ ᠬᠣᠶᠠᠷ ᠠᠴᠢᠶᠠᠨ ᠤ᠋ ᠴᠢᠴᠧ ᠬᠡᠷᠡᠭ ᠲᠡᠢ ᠭᠡᠨᠡ᠂
ᠬᠣᠢᠲᠤ ᠡᠳᠦᠷ ᠨᠢ ᠬᠣᠶᠠᠷ ᠡᠯᠵᠢᠭᠡᠨ ᠲᠡᠷᠭᠡ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠳᠡᠭᠡᠷᠡ ᠲᠤᠯᠵᠠᠢ᠃
ᠬᠥᠬᠡ ᠳᠠᠮᠪᠢ ᠬᠥᠯᠥᠰᠥ ᠪᠡᠨ ᠭᠣᠭᠣᠵᠢᠭᠤᠯᠤᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠶᠠᠭᠤᠮᠠ ᠠᠪᠴᠢᠷᠠᠨᠠ᠃
ᠠᠪᠴᠤ ᠢᠷᠡᠭᠰᠡᠨ ᠶᠠᠭᠤᠮᠠ ᠨᠢ ᠠᠰᠤᠷᠤ ᠦᠨᠡ ᠲᠡᠢ ᠬᠣᠪᠣᠷ ᠡᠳ᠋ ᠭᠡᠨᠡ᠃
ᠠᠮᠢᠲᠠᠨ ᠬᠥᠮᠦᠨ ᠢ᠋ ᠬᠠᠪᠢᠳᠠᠭᠤᠯᠬᠤ ᠦᠭᠡᠢ ᠨᠠᠭᠠᠭᠤᠷ ᠴᠠᠭᠠᠭᠤᠷ ᠨᠢ ᠲᠣᠭᠣᠷᠢᠨᠠ᠃
ᠭᠠᠢ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ᠂ ᠭᠠᠷ ᠲᠤ ᠪᠠᠷᠢᠭᠰᠠᠨ ᠠᠪᠳᠠᠷᠠ ᠶ᠋ᠢᠨ ᠢᠷᠣᠭᠠᠷ ᠴᠥᠮᠥᠷᠡᠨᠡ᠃
ᠬᠦᠷᠭᠡᠨ ᠬᠦᠦ ᠬᠦᠵᠦᠭᠦᠦ ᠰᠤᠩᠭᠠᠵᠤ ᠭᠦᠶᠦᠨᠡ᠂ ᠬᠥᠮᠦᠨ ᠪᠦᠭᠦᠳᠡ ᠲᠡᠭᠦᠨ ᠢ᠋ ᠬᠠᠷᠠᠭᠤᠯᠳᠠᠨᠠ᠃
ᠬᠥᠭᠰᠢᠨ ᠡᠮᠡᠭᠡᠨ ᠦᠵᠡᠭᠡᠳ ᠬᠥᠯᠥᠰᠥᠨ ᠦ᠌ ᠲᠡᠷᠭᠡ ᠶ᠋ᠢ ᠨᠢ ᠭᠡᠳᠡᠷᠭᠦ ᠳᠠᠭᠤᠳᠠᠪᠠ᠃
ᠬᠠᠯᠲᠠᠷ ᠳᠠᠮᠪᠢ ᠬᠠ ᠬᠠ ᠭᠡᠵᠦ ᠢᠨᠢᠶᠡᠭᠰᠡᠭᠡᠷ ᠬᠠᠮᠤᠭ ᠶᠠᠭᠤᠮᠠ ᠪᠠᠨ ᠳᠠᠬᠢᠨ ᠠᠴᠢᠭᠠᠳ
ᠬᠠᠷᠠ ᠡᠯᠵᠢᠭᠡ ᠶ᠋ᠢ ᠲᠠᠰᠤ ᠭᠤᠶᠠᠳᠠᠨ ᠶᠠᠪᠤᠪᠠ᠂ ᠬᠠᠮᠢᠭᠠ ᠣᠴᠢᠭᠰᠠᠨ ᠢ᠋ ᠨᠢ ᠪᠤᠤ ᠮᠡᠳᠡ᠃
1931 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠤᠳᠤᠯᠲᠤ᠂ ᠡᠷᠳᠡᠨᠢᠭᠣᠤᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ