ᠬᠠᠪᠤᠷ- ᠳ· ᠨᠠᠴᠤᠭᠳᠣᠷᠵᠢХавар-Д.Нацагдорж
758ᠬᠠᠪᠤᠷ
ᠳ· ᠨᠠᠴᠤᠭᠳᠣᠷᠵᠢ
ᠲᠠᠭᠠᠯᠠᠮᠵᠢᠲᠠᠢ ᠰᠠᠢᠬᠠᠨ ᠬᠠᠪᠤᠷ ᠨᠠᠢᠷ ᠲᠠᠢ ᠰᠠᠢᠬᠠᠨ ᠬᠠᠪᠤᠷ
ᠳᠠᠬᠢᠨ ᠳᠠᠬᠢᠨ ᠢᠷᠡᠵᠦ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠭᠡᠢᠭᠦᠯᠦᠨᠡ᠃
ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠡᠷᠭᠦᠵᠦ ᠳᠥᠷᠪᠡᠨ ᠵᠦᠭ ᠬᠠᠨᠳᠤᠪᠠᠯ
ᠲᠩᠷᠢ ᠶ᠋ᠢᠨ ᠬᠢᠵᠠᠭᠠᠷ ᠴᠠᠪ ᠴᠡᠯᠡᠢᠨ ᠠᠮᠢᠰᠬᠤᠯᠯᠠᠨᠠ᠃
ᠠᠯᠲᠠᠨ ᠨᠠᠷᠠᠨ ᠭᠡᠢᠵᠦ ᠮᠥᠩᠭᠥᠨ ᠴᠠᠰᠤ ᠶ᠋ᠢ ᠬᠠᠢᠯᠤᠭᠤᠯᠤᠭᠠᠳ
ᠠᠮᠢᠲᠠᠨ ᠪᠦᠬᠦᠨ ᠲᠥᠯᠵᠢᠵᠦ ᠴᠡᠴᠡᠭ ᠨᠠᠪᠴᠢ ᠰᠣᠶᠣᠭᠠᠯᠠᠨᠠ᠃
ᠰᠢᠷᠠ ᠳᠡᠯᠡᠬᠡᠢ ᠨᠣᠭᠣᠭᠠᠨ ᠳᠡᠪᠡᠯ ᠢ᠋ ᠡᠮᠦᠰᠦᠨ ᠶᠣᠰᠣᠯᠠᠵᠤ
ᠴᠦᠴᠡᠬᠡᠢ ᠪᠣᠯᠵᠣᠮᠣᠷ ᠵᠢᠷᠭᠢᠯᠳᠦᠨ ᠬᠥᠭᠵᠢᠮ ᠡᠷᠭᠦᠵᠦ ᠤᠭᠲᠤᠨᠠ᠃
ᠪᠤᠷᠭᠠᠰᠤ ᠮᠣᠳᠣᠨ ᠤ᠋ ᠨᠠᠪᠴᠢ ᠵᠤᠯᠵᠠᠭᠠ ᠪᠤᠯᠲᠠᠢᠨ ᠴᠡᠴᠡᠭᠯᠡᠵᠦ
ᠲᠠᠤᠯᠠᠢ ᠴᠢᠨᠳᠠᠭᠠ ᠡᠭᠦᠪᠡᠷ ᠲᠡᠭᠦᠪᠡᠷ ᠬᠠᠷᠠᠢᠨ ᠨᠠᠭᠠᠳᠤᠨᠠ᠃
ᠬᠤᠷᠠᠭᠠ ᠢᠰᠢᠭᠡ ᠡᠨᠳᠡ ᠲᠡᠨᠳᠡ ᠮᠠᠢᠯᠠᠯᠳᠤᠨ ᠳᠠᠪᠬᠢᠯᠳᠤᠵᠤ
ᠬᠣᠨᠢᠴᠢᠨ ᠬᠥᠪᠡᠭᠦᠨ ᠨᠢᠮᠭᠡᠨ ᠳᠡᠪᠡᠯ ᠢ᠋ ᠡᠮᠦᠰᠦᠨ ᠳᠡᠪᠬᠡᠴᠡᠨᠡ᠃
ᠭᠣᠣᠯ ᠤ᠋ᠨ ᠮᠥᠰᠥᠨ ᠬᠣᠢᠲᠤ ᠳᠠᠯᠠᠢ ᠳ᠋ᠤ᠌ ᠨᠡᠭᠦᠨ ᠣᠳᠴᠤ
ᠪᠤᠯᠠᠭ ᠤ᠋ᠨ ᠤᠰᠤ ᠬᠥᠭᠵᠢᠮ ᠰᠢᠭ ᠡᠭᠡᠰᠢᠭᠯᠡᠨ ᠮᠢᠷᠠᠯᠵᠠᠨᠠ᠃
ᠬᠠᠷᠢᠶᠠᠴᠠᠢ ᠰᠢᠪᠠᠭᠤᠳ ᠬᠣᠭᠣᠰᠣᠨ ᠠᠭᠠᠷ ᠲᠤ ᠳᠤᠷᠠ ᠪᠠᠷ ᠰᠦᠯᠵᠢᠵᠦ
ᠬᠡᠦᠬᠡᠳ ᠪᠠᠭᠠᠴᠤᠳ ᠲᠡᠭᠦᠨ ᠦ᠌ ᠵᠢᠷᠭᠢᠬᠦ ᠶ᠋ᠢ ᠳᠠᠭᠠᠯᠳᠤᠨ ᠭᠦᠶᠦᠯᠳᠦᠨᠡ᠃
ᠤᠷᠢᠬᠠᠨ ᠬᠣᠩᠭᠣᠷ ᠰᠠᠯᠬᠢ ᠡᠪᠡᠰᠦ ᠮᠣᠳᠣ ᠶ᠋ᠢ ᠨᠠᠮᠢᠯᠵᠠᠭᠤᠯᠵᠤ
ᠬᠥᠭᠰᠢᠨ ᠵᠠᠯᠠᠭᠤ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠢ᠋ ᠪᠥᠮᠪᠥᠷᠢᠭᠦᠯᠦᠨ ᠤᠶᠠᠷᠠᠭᠤᠯᠤᠨᠠ᠃
ᠦᠳᠡᠰᠢ ᠶ᠋ᠢᠨ ᠵᠢᠪᠠᠷ ᠨᠢᠭᠤᠭᠳᠠᠵᠤ ᠥᠷᠯᠥᠭᠡᠨ ᠦ᠌ ᠬᠢᠷᠠᠭᠤ ᠢᠴᠡᠭᠡᠳ
ᠮᠣᠷᠢ ᠮᠠᠯ ᠳᠤᠷᠠ ᠪᠠᠷ ᠪᠡᠯᠴᠢᠨ ᠵᠦᠯᠭᠡᠨ ᠳᠡᠭᠡᠷᠡ ᠬᠥᠷᠪᠡᠨᠡ᠃
ᠨᠣᠭᠣᠭᠠᠨ ᠤᠨᠢᠶᠠᠷ ᠳᠡᠭᠳᠡᠵᠦ ᠠᠭᠤᠯᠠ ᠶ᠋ᠢᠨ ᠮᠣᠳᠣ ᠬᠥᠬᠡᠷᠡᠭᠡᠳ
ᠪᠤᠭᠤ ᠬᠠᠨᠳᠠᠭᠠᠢ ᠰᠦᠷᠦᠭᠯᠡᠵᠦ ᠢᠷᠠᠭᠤ ᠰᠠᠢᠬᠠᠨ ᠢ᠋ᠶ᠋ᠠᠷ ᠤᠷᠤᠮᠳᠠᠨᠠ᠃
ᠬᠥᠮᠦᠨ ᠠᠷᠠᠳ ᠪᠦᠭᠴᠢᠮ ᠭᠡᠷ ᠮᠤᠬᠤᠷ ᠢ᠋ ᠤᠭᠤᠷᠤᠨ
ᠠᠭᠤᠳᠠᠮ ᠲᠠᠯᠠᠪᠤᠷ ᠠᠷᠢᠭᠤᠨ ᠠᠭᠠᠷ ᠳᠤ ᠳᠠᠪᠬᠢᠯᠳᠤᠨ ᠴᠡᠩᠭᠡᠯᠳᠦᠨᠡ᠃
ᠴᠡᠴᠡᠭ ᠨᠠᠪᠴᠢ ᠲᠥᠯᠵᠢᠭᠡᠳ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠳᠡᠭᠡᠭᠰᠢ ᠡᠷᠭᠦᠭᠡᠳ
ᠴᠣᠮᠣᠷᠯᠢᠭ ᠤ᠋ᠨ ᠳᠣᠲᠣᠷᠠ ᠥᠩᠭᠡ ᠪᠦᠷᠢ ᠪᠡᠷ ᠢᠨᠢᠶᠡᠮᠰᠦᠭᠯᠡᠨᠡ᠃
ᠬᠡᠭᠡᠷᠡ ᠶ᠋ᠢᠨ ᠭᠠᠯᠠᠭᠤ ᠢᠷᠡᠵᠦ ᠭᠠᠩᠭᠠᠷ ᠭᠤᠩᠭᠠᠷ ᠳᠣᠩᠭᠣᠳᠤᠭᠠᠳ
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢ᠋ ᠬᠥᠳᠡᠯᠭᠡᠨ ᠬᠣᠯᠠᠬᠢ ᠶ᠋ᠢ ᠮᠥᠷᠥᠭᠡᠳᠦᠭᠦᠯᠦᠨᠡ᠃
ᠨᠠᠢᠷ ᠲᠠᠢ ᠰᠠᠢᠬᠠᠨ ᠤᠯᠠᠷᠢᠯ ᠣᠭᠲᠠᠷᠭᠤᠢ ᠶ᠋ᠢ ᠲᠤᠯᠵᠤ ᠳᠠᠬᠢᠨ ᠰᠢᠨᠡᠳᠦᠭᠡᠳ
ᠡᠷᠲᠡ ᠡᠳᠦᠭᠡ ᠶ᠋ᠢ ᠪᠣᠳᠣᠭᠳᠠᠭᠤᠯᠤᠨ ᠨᠢᠭᠤᠭᠳᠠᠭᠰᠠᠨ ᠰᠡᠳᠬᠢᠯ ᠢ᠋ ᠰᠡᠷᠭᠦᠭᠡᠨᠡ᠃
ᠬᠦᠰᠡᠯ ᠲᠡᠢ ᠰᠠᠢᠬᠠᠨ ᠬᠠᠪᠤᠷ ᠠ᠋᠂ ᠴᠡᠩᠭᠡᠯ ᠲᠡᠢ ᠰᠠᠢᠬᠠᠨ ᠬᠠᠪᠤᠷ ᠠ᠋
ᠬᠥᠮᠦᠨ ᠪᠦᠬᠦᠨ ᠴᠢᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠣᠳᠠᠰ ᠪᠦᠬᠦᠨ ᠴᠢᠮᠠᠶ᠋ᠢ ᠮᠥᠷᠥᠭᠡᠳᠦᠨᠡ᠃
1931 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠤᠳᠤᠯᠲᠤ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ