ᠠᠩᠬᠠᠨ ᠤ᠋ ᠴᠠᠰᠤ- ᠳ· ᠨᠠᠴᠤᠭᠳᠣᠷᠵᠢАнхны цас-Д.Нацагдорж
288ᠠᠩᠬᠠᠨ ᠤ᠋ ᠴᠠᠰᠤ
ᠳ· ᠨᠠᠴᠤᠭᠳᠣᠷᠵᠢ
ᠡᠪᠦᠯ ᠦ᠋ᠨ ᠡᠬᠢᠨ ᠰᠠᠷᠠ ᠳ᠋ᠤ᠌ ᠬᠦᠢᠲᠡᠨ ᠰᠠᠶᠢ ᠡᠬᠢᠯᠡᠬᠦ ᠳ᠋ᠦ᠍
ᠡᠪᠦᠭᠡᠳ ᠬᠥᠭᠰᠢᠳ ᠭᠠᠯ ᠢ᠋ ᠲᠦᠯᠡᠨ ᠭᠡᠷ ᠢ᠋ ᠳᠤᠯᠠᠭᠠᠴᠠᠭᠤᠯᠤᠨᠠ᠃
ᠡᠮᠦᠨᠡᠲᠦ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠰᠢᠮᠠᠷᠭᠠ ᠪᠤᠲᠠᠷᠠᠨ ᠣᠷᠣᠬᠤ ᠳ᠋ᠤ᠌
ᠡᠷᠡᠭᠲᠡᠢ ᠡᠮᠡᠭᠲᠡᠢ ᠵᠠᠯᠠᠭᠤᠴᠤᠳ ᠤ᠋ᠨ ᠰᠡᠳᠬᠢᠯ ᠬᠥᠳᠡᠯᠵᠦ ᠪᠡᠶᠡ ᠪᠡᠶᠡ ᠪᠡᠨ ᠪᠣᠳᠣᠨᠠ᠃
ᠰᠢᠨᠡᠳᠬᠡᠯ ᠰᠠᠷᠠᠨ ᠤ᠋ ᠭᠡᠷᠡᠯ ᠬᠠᠯᠬᠠᠯᠠᠭᠳᠠᠭᠠᠳ ᠰᠢᠨᠡ ᠴᠠᠰᠤ ᠬᠠᠢᠯᠠᠬᠤ ᠳ᠋ᠤ᠌
ᠬᠥᠮᠦᠨ ᠪᠦᠬᠦᠨ ᠦ᠌ ᠰᠡᠳᠬᠢᠯ ᠳᠣᠲᠣᠷᠠ ᠲᠤᠰ ᠲᠤᠰ ᠨᠢᠭᠡ ᠶᠠᠩᠵᠤ ᠶ᠋ᠢᠨ ᠳᠦᠷᠢ ᠣᠷᠣᠨᠠ᠃
ᠰᠡᠪᠰᠡᠢᠨ ᠬᠠᠶᠠᠯᠠᠬᠤ ᠴᠠᠰᠤᠨ ᠳ᠋ᠤ᠌ ᠭᠤᠲᠤᠯ ᠨᠠᠭ ᠨᠠᠭ ᠳᠤᠤᠭᠠᠷᠬᠤ ᠳ᠋ᠤ᠌
ᠰᠢᠪᠡᠷ ᠠᠪᠢᠷ ᠭᠡᠭᠴᠢ ᠳᠠᠭᠤ ᠪᠦᠷᠬᠦᠭ ᠡᠳᠦᠷ ᠢ᠋ ᠪᠠᠶᠠᠰᠤᠭᠤᠯᠤᠨᠠ᠃
ᠵᠢᠪᠠᠷ ᠬᠦᠢᠲᠡᠨ ᠨᠡᠩ ᠴᠢᠩᠭᠠᠷᠠᠵᠤ ᠴᠠᠰᠤ ᠤᠯᠠᠮ ᠤᠨᠠᠬᠤ ᠳᠣᠳᠣᠮ
ᠵᠠᠯᠠᠭᠤ ᠬᠥᠮᠦᠨ ᠦ᠌ ᠴᠢᠰᠤ ᠣᠷᠬᠢᠨ ᠪᠤᠴᠠᠯᠵᠤ ᠬᠦᠢᠲᠡᠨ ᠰᠠᠯᠬᠢ ᠶ᠋ᠢ ᠮᠥᠷᠥᠭᠡᠳᠦᠨᠡ᠃
ᠵᠢᠷᠭᠤᠭᠠᠨ ᠮᠡᠴᠢᠳ ᠣᠷᠣᠢ ᠳᠡᠭᠡᠷᠡ ᠭᠢᠯᠠᠯᠵᠠᠵᠤ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠬᠠᠵᠠᠭᠤ ᠳ᠋ᠤ᠌ ᠰᠦᠮᠡᠯᠵᠡᠬᠦ ᠳ᠋ᠦ᠍
ᠵᠢᠷᠦᠬᠡᠨ ᠦ᠌ ᠲᠣᠯᠢ ᠡᠪᠦᠷ ᠳᠣᠲᠣᠷᠠ ᠭᠢᠯᠪᠠᠵᠤ ᠵᠡᠷᠭᠡᠯᠡᠳᠡᠭᠡ ᠠᠢᠯ ᠤ᠋ᠨ ᠡᠭᠦᠳᠡᠨ ᠳᠡᠭᠡᠷᠡ ᠲᠤᠰᠤᠨᠠ᠃
1931 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠠᠲᠤ
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ