ᠮᠣᠩᠭᠣᠯ ᠱᠥᠯᠥ᠍ – ᠶᠣᠨᠳᠣᠨ ᠤ ᠪᠢᠯᠢᠭ᠌ - ᠪᠠᠭᠠᠲᠤᠷ Монгол шөл - Ёндоны Билиг - Баатар
245ᠮᠣᠩᠭᠣᠯ ᠱᠥᠯᠥ᠍
— ᠪᠦᠬᠦ ᠣᠷᠣᠨ ᠤ᠋ 《ᠮᠥᠩᠭᠥᠨ ᠵᠡᠭᠦᠦ》ᠨᠡᠷᠡᠮᠵᠢᠲᠦ
ᠢᠷᠠᠭᠤ ᠨᠠᠢᠷᠠᠭ ᠤ᠋ᠨ ᠶᠡᠬᠡ ᠮᠥᠷᠥᠢᠴᠡᠭᠡᠨ ᠳ᠋ᠦ᠍ ᠳᠡᠪᠰᠢᠭᠦᠯᠬᠦ ᠰᠢᠯᠦᠭ
ᠵᠥᠭᠡᠬᠡᠢ ᠬᠦᠮᠡᠯᠢ ᠪᠣᠷᠴᠠ ᠰᠢᠷᠭᠠ ᠲᠠᠢ ᠱᠥᠯᠥ
ᠵᠥᠭᠡᠢ ᠡᠷᠪᠡᠬᠡᠢ ᠰᠢᠪᠠᠷᠳᠠᠮᠠᠷ ᠪᠢᠲᠡᠭᠦᠦ ᠱᠥᠯᠥ
ᠶᠠᠰᠤᠨ ᠤ᠋ ᠭᠠᠨᠲᠢᠭ ᠬᠥᠯᠥᠷᠡᠭᠦᠯᠦᠮᠡᠷ ᠬᠠᠷᠠ ᠱᠥᠯᠥ
ᠶᠠᠪᠠᠭᠠᠨ ᠬᠥᠮᠦᠨ ᠢ᠋ ᠬᠦᠯᠦᠭᠯᠡᠭᠦᠯᠦᠮᠡᠷ ᠲᠠᠷᠠᠭ ᠱᠥᠯᠥ
ᠠᠶᠠ᠂ ᠮᠢᠨᠦ ᠮᠣᠩᠭᠣᠯ ᠤ᠋ᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠰᠣᠶᠣᠯ ᠤ᠋ᠨ ᠥᠪ
ᠠᠢ ᠳᠠ᠂ ᠬᠥᠬᠡ ᠡᠪᠦᠭᠡᠳ ᠦ᠋ᠨ ᠮᠢᠨᠢ ᠢᠷᠮᠡᠭᠦᠨ ᠵᠥᠪ ᠤᠬᠠᠭᠠᠷᠠᠯ ᠶᠤᠮ
ᠬᠠᠪᠤᠷ ᠤ᠋ᠨ ᠤᠷᠢᠨ ᠤ᠋ ᠨᠢᠯᠬᠠ ᠬᠠᠯᠠᠭᠠᠢ ᠲᠠᠢ ᠱᠥᠯᠥ
ᠲᠠᠷᠯᠠᠨ ᠦᠬᠡᠷ ᠦ᠋ᠨ ᠮᠢᠬᠠᠨ ᠲᠥᠮᠥᠰᠥ ᠲᠡᠢ ᠱᠥᠯᠥ
ᠲᠠᠷᠭᠤᠨ ᠬᠣᠨᠢᠨ ᠤ᠋ ᠶᠠᠰᠤ ᠲᠠᠢ ᠱᠥᠯᠥ
ᠬᠠᠷᠢ ᠳ᠋ᠤ᠌ ᠪᠠᠢᠳᠠᠭ ᠦᠭᠡᠢ ᠭᠣᠳᠣᠩ ᠲᠠᠢ ᠱᠥᠯᠥ
ᠠᠶᠠ᠂ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠤᠯᠠᠭᠠᠨ ᠴᠠᠭᠠᠨ ᠢᠳᠡᠭᠡᠨ ᠦ᠌ ᠲᠡᠦᠬᠡ
ᠠᠢ ᠳᠠ᠂ ᠡᠷᠲᠡ ᠢᠵᠠᠭᠤᠷ ᠠ᠋ᠴᠠ ᠪᠠᠨ ᠡᠷᠡᠭᠦᠯ ᠠᠮᠢᠳᠤᠷᠠᠭᠰᠠᠨ ᠤ᠋ ᠲᠠᠷᠬᠠᠯᠠᠭᠠ ᠶᠤᠮ
ᠰᠠᠨᠰᠠᠷ ᠤ᠋ᠨ ᠣᠳᠣᠳ ᠬᠥᠪᠪᠦᠭᠰᠡᠨ ᠰᠦᠨ ᠱᠥᠯᠥ
ᠰᠢᠪᠠᠭᠤᠳ ᠤ᠋ᠨ ᠵᠢᠷᠭᠢᠭᠡᠨᠲᠦ ᠬᠣᠨᠣᠭ ᠪᠤᠳᠠᠭᠠᠨ ᠱᠥᠯᠥ
ᠵᠠᠭᠤᠨ ᠪᠠᠷᠠ ᠠ᠋ᠴᠠ ᠬᠠᠩᠬᠤᠯᠤᠮᠠᠷ ᠬᠠᠪᠢᠷᠭᠠ ᠲᠠᠢ ᠱᠥᠯᠥ
ᠵᠦᠭᠡᠷ ᠯᠠ ᠳᠠᠩᠴᠤ ᠰᠠᠨᠠᠭᠳᠠᠭᠠᠳ ᠪᠠᠢᠳᠠᠭ ᠴᠤᠯᠤ ᠶ᠋ᠢᠨ ᠱᠥᠯᠥ
ᠠᠶᠠ᠂ ᠪᠢᠳᠡᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠶᠢᠷᠲᠢᠨᠴᠦ ᠶᠢᠨ ᠭᠠᠢᠬᠠᠮᠰᠢᠭ ᠢᠶᠠᠨ
ᠠᠢ ᠳᠠ᠂ ᠦᠶᠡ ᠶ᠋ᠢᠨ ᠦᠶᠡ ᠳ᠋ᠡᠭᠡᠨ ᠬᠠᠮᠠᠭᠠᠯᠠᠵᠤ ᠥᠪᠯᠡᠭᠦᠯᠬᠦ ᠶ᠋ᠢᠨ ᠤᠴᠢᠷ ᠡ
ᠠᠯᠢᠨ ᠭᠠᠯᠪᠠ ᠶ᠋ᠢᠨ ᠬᠥᠬᠡ ᠡᠪᠦᠭᠡᠳ ᠾᠦᠩᠨᠦ ᠭᠦᠷᠦᠨ ᠦ᠌ ᠦᠶᠡ ᠡᠴᠡ
ᠠᠷᠢᠶᠠᠪᠠᠯᠤ ᠪᠤᠷᠬᠠᠨ ᠴᠤ᠌ ᠭᠠᠵᠠᠷ ᠳᠡᠯᠡᠬᠡᠢ ᠳ᠋ᠦ᠍ ᠵᠠᠯᠠᠷᠠᠭᠠᠲᠤᠢ ᠪᠠᠢᠬᠤ ᠳ᠋ᠤ᠌
ᠠᠭᠤᠤ ᠮᠡᠷᠭᠡᠨ ᠰᠠᠨᠰᠠᠷᠯᠢᠭ ᠤᠬᠠᠭᠠᠨ ᠤ᠋ ᠪᠠᠨ ᠵᠦᠩ ᠰᠤᠪᠢᠩ ᠢ᠋ᠶ᠋ᠠᠷ ᠯᠠ
ᠠᠮᠠᠨ ᠪᠡᠯᠭᠡ ᠬᠠᠮᠢᠭᠠᠰᠢ ᠪᠠᠨ ᠪᠣᠯ ᠠᠠᠰᠢᠳᠠ ᠶ᠋ᠢᠨ ᠪᠡᠯᠭᠡ ᠲᠠᠢᠰᠢ ᠭᠡᠬᠦ
ᠠᠰᠬᠠᠷᠠᠩᠭᠤᠢ ᠰᠠᠴᠤᠷᠠᠩᠭᠤᠢ ᠭᠦᠨᠵᠡᠭᠡᠢ ᠪᠠᠳᠠᠷᠠᠩᠭᠤᠢ ᠪᠠᠶᠠᠰᠤᠩᠭᠤᠢ ᠂ ᠂ ᠂
ᠠᠰᠠᠷᠠᠩᠭᠤᠢ ᠨᠢᠭᠦᠯᠡᠰᠦᠩᠭᠦᠢ ᠬᠦᠯᠢᠴᠡᠩᠭᠦᠢ ᠡᠨᠡᠷᠢᠩᠭᠦᠢ ᠢᠪᠡᠯᠡᠩᠭᠦᠢ ᠂ ᠂ ᠂
ᠠᠶᠤᠤᠯᠢᠬᠠᠢ ᠶ᠋ᠢᠨ ᠳᠠᠯᠳᠠ ᠨᠢᠭᠤᠴᠠᠭᠠᠢ ᠰᠢᠳᠢᠲᠦ ᠳᠣᠤᠯᠢᠰᠯᠢᠭ ᠪᠢᠯᠢᠭ ᠢ᠋ᠶ᠋ᠡᠷ
ᠠᠯᠲᠠᠨ ᠨᠠᠷᠠᠨ ᠤ᠋ ᠥᠷᠯᠥᠭᠡᠨ ᠲᠤᠷᠠᠭᠠᠨ ᠤ᠋ ᠭᠡᠷᠡᠯᠲᠦ ᠱᠥᠯᠥ ᠶ᠋ᠢ ᠡᠭᠦᠳᠦᠪᠡᠢ
ᠡᠷᠲᠡ ᠶ᠋ᠢᠨ ᠤᠷᠭᠠ ᠳᠡᠪᠡᠮᠡ ᠨᠠᠷᠠᠨ ᠤ᠋ ᠵᠥᠭᠡᠯᠡᠨ ᠲᠤᠶᠠᠭᠠ ᠯᠠ ᠰᠠᠶᠢ
ᠡᠭᠡᠭᠡᠬᠦ ᠰᠢᠷᠠᠬᠤ ᠶ᠋ᠢᠨ ᠬᠠᠮᠤᠭ ᠰᠠᠢᠨ ᠰᠠᠢᠬᠠᠨ ᠨᠢᠭᠡᠨ ᠮᠥᠴᠡ ᠬᠡᠮᠡᠭᠡᠪᠡᠢ
ᠥᠷᠯᠥᠭᠡᠨ ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠱᠥᠯᠥ ᠡᠪᠦᠭᠡᠳ ᠦ᠋ᠨ ᠳᠤᠷᠠᠲᠠᠢ ᠱᠥᠯᠥ
ᠦᠨ᠋ᠶᠠᠳ ᠤ᠋ᠨ ᠳᠠᠯᠠᠩ ᠢ᠋ ᠠᠮᠠᠷᠠᠭᠠᠭᠰᠠᠨ ᠡᠮᠡᠭᠡᠳ ᠦ᠋ᠨ ᠬᠠᠢᠷᠠᠲᠠᠢ ᠱᠥᠯᠥ
ᠠᠨᠠᠨ ᠥᠨᠳᠥᠷ ᠨᠠᠰᠤᠨ ᠤ᠋ ᠴᠡᠭᠡᠯ ᠳ᠋ᠦ᠍ ᠱᠤᠩᠪᠬᠠᠰᠠᠨ ᠪᠤᠭᠤᠷᠤᠯ ᠤᠳ ᠮᠢᠨᠢ
ᠠᠭᠠᠷ ᠤ᠋ᠨ ᠨᠠᠷᠠᠨ ᠤ᠋ ᠷᠢᠳ᠋ᠢᠲᠤ ᠲᠤᠶᠠᠭᠠᠨ ᠱᠥᠯᠥ ᠳ᠋ᠦ᠍ ᠬᠠᠨᠤᠰᠢ ᠦᠭᠡᠢ ᠠ᠋
ᠵᠠᠭᠤ ᠵᠠᠭᠤᠨ ᠤ᠋ ᠲᠤᠷᠰᠢᠲᠠ ᠬᠦᠯᠦᠭ ᠦ᠋ᠨ ᠳᠡᠯ ᠳ᠋ᠦ᠍ ᠭᠠᠯ ᠰᠢᠭ᠋ ᠳᠦᠷᠡᠯᠵᠡᠬᠦᠢ
ᠵᠠᠭᠤᠳᠠᠯ ᠴᠢᠩᠭᠠ ᠬᠡᠢᠮᠤᠷᠢ ᠪᠣᠰᠤᠭᠠ ᠦᠶᠡ ᠦᠶᠡ ᠶ᠋ᠢᠨ ᠢᠵᠠᠭᠤᠷᠲᠠᠳ
ᠡᠷᠡᠭᠦᠯ ᠪᠡᠶᠡ ᠰᠠᠷᠠᠭᠤᠯ ᠣᠶᠤᠨ ᠤ᠋ ᠵᠢᠷᠭᠤᠭᠠᠲᠠᠢ ᠲᠠᠶᠢᠭ ᠲᠤᠯᠬᠤᠢ ᠤᠴᠢᠷ
ᠡᠷᠬᠢᠮᠰᠦᠭ ᠠᠨᠠᠭᠠᠬᠤᠢ ᠶ᠋ᠢᠨ ᠯᠤᠲᠤ ᠭᠠᠢᠬᠠᠮᠰᠢᠭ ᠮᠠᠴᠢᠭ ᠤ᠋ᠨ ᠱᠥᠯᠥ ᠶ᠋ᠢ
ᠴᠡᠩᠭᠡᠭ ᠠᠭᠠᠷ ᠢ᠋ ᠭᠦᠨ ᠠᠮᠢᠰᠬᠤᠯᠠᠨ ᠶᠠᠪᠠᠭᠠᠨ ᠠᠯᠬᠤᠯᠠᠨ ᠵᠠᠯᠭᠢᠯᠠᠳᠠᠭ
ᠴᠡᠩᠭᠡᠯ ᠦ᠋ᠨ ᠲᠤᠢᠯ ᠢ᠋ ᠴᠡᠪᠡᠷ ᠤᠰᠤᠨ ᠱᠥᠯᠥ ᠪᠡᠷ ᠢ᠋ᠶ᠋ᠡᠨ ᠠᠮᠰᠠᠳᠠᠭ ᠠ᠋
ᠮᠡᠯᠮᠡᠢ ᠠᠯᠳᠠᠮᠠ ᠠᠠᠯᠠᠭ ᠬᠡᠭᠡᠷᠡ ᠶ᠋ᠢᠨ ᠳᠡᠩᠳᠡᠭᠦᠦ ᠬᠠᠨᠠᠭᠠᠷ ᠠᠬᠤᠢ ᠰᠢᠭ᠋
ᠮᠠᠩᠨᠠᠢ ᠳᠠᠨᠠᠢᠮᠠ ᠰᠡᠳᠬᠢᠯ ᠦ᠋ᠨ ᠠᠭᠤᠳᠠᠮ ᠲᠡᠰᠪᠦᠷᠢ ᠪᠠᠭᠲᠠᠭᠠᠮᠵᠢ ᠶ᠋ᠢᠨ
ᠮᠠᠰᠢᠳᠠ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠬᠢᠨᠠᠮᠠᠭᠠᠢ ᠲᠠᠭᠠᠭᠠᠮᠠᠭᠠᠢ ᠲᠡᠩᠬᠡᠭᠡᠨ ᠱᠥᠯᠥ
ᠮᠢᠩᠭᠠ ᠮᠢᠩᠭᠠᠨ ᠤ᠋ ᠳᠣᠭᠰᠢᠨ ᠲᠡᠦᠬᠡ ᠶ᠋ᠢᠨ ᠪᠣᠰᠤᠭᠠ ᠶ᠋ᠢ ᠡᠯᠡᠭᠡᠪᠡᠢ ᠵᠧ
ᠮᠥᠩᠬᠡ ᠲᠡᠭᠷᠢᠯᠢᠭ ᠢᠵᠠᠭᠤᠷᠲᠤ ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠳ ᠤ᠋ᠨ ᠢ᠋ᠶ᠋ᠠᠨ
ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠨ ᠢ᠋ᠶ᠋ᠡᠨ ᠣᠩᠭᠣᠳ ᠪᠦᠷᠢ ᠶ᠋ᠢ
ᠪᠥᠬᠡ ᠮᠥᠷᠭᠥᠯ ᠦ᠋ᠨ ᠰᠢᠳᠤᠷᠭᠤ ᠪᠠᠭᠠᠲᠤᠷᠯᠢᠭ ᠰᠢᠳᠢᠲᠦ ᠤᠷᠠᠢ ᠬᠤᠷᠤᠢ ᠪᠠᠷ
ᠪᠥᠬᠡ ᠮᠣᠷᠢ ᠰᠤᠷ ᠢ᠋ᠶ᠋ᠠᠨ ᠰᠣᠷᠢᠩᠬᠠᠨ ᠤᠷᠤᠯᠳᠤᠭᠤᠯᠤᠩᠬᠠᠨ ᠣᠷᠢᠬᠤᠢ ᠶ᠋ᠢᠨ
ᠪᠢᠯᠢᠭᠲᠦ ᠲᠤᠭᠣᠷᠣᠤᠲᠣ ᠥᠪ ᠲᠥᠪ ᠰᠣᠶᠣᠨ ᠭᠡᠭᠡᠷᠡᠭᠦᠯᠦᠭᠦᠢ ᠶ᠋ᠢᠨ ᠱᠥᠯᠥ
ᠪᠢᠳᠡᠨ ᠦ᠌ ᠰᠠᠶᠠ ᠵᠢᠸᠠ ᠮᠣᠩᠭᠣᠯᠴᠤᠳ ᠤ᠋ᠨ ᠬᠤᠪᠢᠯᠭᠠᠨ ᠲᠣᠮ ᠤ᠋ᠨ ᠱᠥᠯᠥ
᠁ ᠲᠣᠭᠠᠯᠠᠭᠠᠳ ᠪᠠᠷᠠᠰᠢ ᠦᠭᠡᠢ ᠂ ᠬᠡᠲᠦᠷᠬᠡᠢ ᠭᠡᠮᠡᠷ ᠭᠠᠢᠬᠠᠮᠰᠢᠭ
᠁ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠮᠤᠨᠳᠠᠭ ᠶᠡᠬᠡ ᠦᠨᠡᠲᠦ ᠡᠷᠳᠡᠨᠢᠰ ᠁!
ᠠᠶᠠ᠂ ᠮᠠᠨ ᠤ᠋ ᠲᠡᠭᠡᠳᠦᠭᠦᠯᠡ ᠶ᠋ᠢᠨ ᠬᠣᠷᠸᠠ ᠳ᠋ᠤ᠌ ᠬᠣᠣᠰ ᠦᠭᠡᠢ ᠤᠬᠠᠭᠠᠨ
ᠠᠶᠠ᠂ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠴᠡᠴᠡᠨ ᠰᠠᠨᠠᠭᠠᠨ ᠤ᠋ ᠡᠪ ᠡᠭᠦᠳᠦᠯᠲᠡ!
ᠶᠠᠭᠤᠲᠠᠢ ᠠᠤᠬᠠ ᠰᠦᠮᠪᠦᠷᠯᠢᠭ ᠥᠨᠳᠥᠷᠯᠢᠭ ᠠᠯᠲᠠᠨ ᠣᠷᠭᠢᠯ ᠤᠳ ᠪᠣᠢ
ᠶᠠᠭᠤᠨ ᠳ᠋ᠤ᠌ ᠡᠳᠦᠭᠡ ᠶ᠋ᠢᠨ ᠮᠠᠨᠤᠰ ᠡᠨᠡ ᠪᠦᠬᠦᠨ ᠢ᠋ᠶ᠋ᠡᠨ ᠮᠠᠷᠲᠠᠪᠠ ᠠ᠋⁈
ᠢᠯᠡᠢ ᠬᠠᠯᠠᠭ ᠠ᠋ ᠥᠪ ᠤᠯᠠᠮᠵᠢᠯᠠᠯ ᠢ᠋ᠶ᠋ᠠᠨ ᠤᠮᠠᠷᠲᠠᠭᠠᠳ ᠪᠣᠯᠬᠤ ᠦᠭᠡᠢ
ᠢᠷᠡᠭᠡᠳᠦᠢ ᠬᠡᠷᠬᠢᠨ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠶ᠋ᠢᠨ ᠵᠠᠩᠭᠢᠯᠠᠭᠠ ᠠᠳᠠ ᠪᠣᠢ
ᠨᠢᠳᠦ ᠢᠷᠮᠡᠬᠦ ᠶ᠋ᠢᠨ ᠠᠠᠭᠱᠠᠨ ᠬᠣᠷᠣᠮᠬᠠᠭ ᠴᠠᠭ ᠡᠷᠢᠨ ᠳᠡᠯᠡᠬᠡᠢ ᠨᠡᠢᠭᠡᠮ
ᠨᠢᠳᠦ ᠪᠦᠯᠳᠤᠷᠢᠮᠠ ᠬᠤᠷᠳᠤᠨ ᠲᠣᠭᠰᠢᠨ ᠬᠤᠪᠢᠷᠠᠨ ᠰᠢᠨᠡᠳᠴᠦ ᠪᠣᠢ ᠳᠠ
ᠥᠨᠥ ᠰᠢᠲᠦᠯᠭᠡ ᠱᠠᠪᠰᠢᠯᠠᠭᠠ ᠢᠲᠡᠭᠡᠯ ᠳᠠᠯᠠᠷᠬᠠᠯ ᠢᠯᠡ ᠪᠠᠬᠠᠷᠬᠠᠯ ᠤ᠋ᠨ
ᠥᠨᠢ ᠡᠭᠦᠷᠢᠳᠡ ᠶ᠋ᠢᠨ ᠥᠪᠡᠯᠡᠭᠦᠢ ᠰᠣᠨᠣᠰᠬᠤᠯᠠᠩ ᠳᠠᠭᠤᠷᠢᠰᠭᠤᠯᠠᠩ ᠤ᠋ᠨ
ᠠᠯᠢᠪᠠ ᠰᠣᠶᠣᠯ ᠲᠡᠦᠬᠡ ᠶ᠋ᠢᠨ ᠢᠶᠠᠨ ᠶᠢᠰᠦᠨ ᠬᠦᠰᠡᠯ ᠦ᠋ᠨ ᠡᠷᠳᠡᠨᠢᠰ ᠢ᠋ᠶ᠋ᠡᠨ
ᠢᠪᠡᠯᠡᠩᠬᠡᠨ ᠰᠠᠲᠠᠭᠠᠭᠠᠬᠤ ᠡᠬᠡ ᠶ᠋ᠢᠨ ᠰᠦᠨ ᠮᠡᠲᠦ ᠮᠣᠩᠭᠣᠯ ᠱᠥᠯᠥ ᠪᠡᠨ
ᠡᠳᠦᠷ ᠦ᠋ᠨ ᠮᠠᠷᠭᠠᠰᠢ ᠮᠥᠩᠬᠡ ᠶ᠋ᠢᠨ ᠷᠠᠰᠢᠶᠠᠨ ᠮᠡᠲᠦ ᠳᠡᠭᠡᠳᠦᠯᠡᠨ ᠠᠮᠰᠠᠨ
ᠡᠳᠦᠭᠡ ᠶ᠋ᠢᠨ ᠬᠠᠮᠤᠭ ᠰᠠᠢᠨ ᠬᠥᠮᠦᠨ ᠲᠦᠷᠤᠯᠬᠢᠲᠡᠨ ᠦ᠌ ᠪᠡᠨ ᠳᠤᠮᠳᠠᠬᠢ
ᠠᠳᠠᠯᠢᠳᠬᠠᠭᠳᠠᠰᠢ ᠦᠭᠡᠢ ᠤᠷᠲᠤ ᠤᠳᠠᠭᠠᠨ ᠵᠢᠷᠭᠠᠯᠠᠩᠲᠠᠳ ᠳᠣᠲᠣᠷᠠᠬᠢ
ᠠᠪᠤᠷᠠᠭᠴᠢ ᠬᠡᠬᠡᠲᠠᠳ ᠰᠠᠨᠰᠠᠷᠯᠢᠭ ᠤᠬᠠᠭᠠᠭᠲᠠᠳ ᠬᠥᠬᠡ ᠣᠳᠣᠳ ᠨᠢ
ᠠᠰᠠᠭᠤᠭᠰᠠᠨ ᠤ᠋ ᠬᠡᠷᠡᠭ ᠦᠭᠡᠢ᠂ ᠵᠥᠪᠬᠡᠨ ᠪᠢᠳᠠᠨᠤᠰ ᠯᠠ ᠶᠤᠮ ᠰᠢᠦ ᠳᠡ
ᠠᠶᠠ᠂ ᠡᠴᠤᠨᠡᠨ ᠬᠡᠴᠦᠨᠡᠨ ᠣᠨ ᠵᠢᠯ ᠦ᠋ᠨ ᠡᠯᠡ ᠲᠤᠷᠰᠢᠳᠠ ᠬᠥᠭᠡᠷᠦᠬᠦᠢ
ᠠᠨᠠᠭᠠᠬᠤᠢ ᠶ᠋ᠢᠨ ᠰᠢᠳᠢ ᠶ᠋ᠢ ᠡᠴᠡᠨ ᠮᠡᠷᠡᠢᠨ ᠲᠦᠭᠡᠭᠡᠭᠰᠡᠨ ᠤᠳᠠᠴᠢᠳ
ᠭᠦᠷᠦᠨ ᠦ᠌ ᠶᠡᠬᠡ ᠬᠦᠰᠡᠬᠦᠢ ᠶ᠋ᠢᠨ ᠤᠳᠤᠮ ᠰᠤᠳᠤᠷ ᠢ᠋ ᠥᠪᠯᠡᠭᠴᠢᠳ ᠮᠢᠨᠢ
ᠭᠦᠨ ᠳᠠᠯᠠᠢ ᠶ᠋ᠢᠨ ᠲᠡᠷᠲᠡᠭᠡᠬᠢ ᠡᠩᠬᠡ ᠮᠡᠨᠳᠦ ᠶ᠋ᠢᠨ ᠭᠡᠷᠡᠯᠲᠦ ᠴᠠᠮᠬᠠᠭᠴᠢᠳ
ᠬᠥᠬᠡᠮᠳᠦᠭ ᠣᠭᠲᠠᠷᠭᠤᠢ ᠶ᠋ᠢᠨ ᠨᠠᠷᠠᠨ ᠰᠠᠷᠠᠨ ᠤ᠋ ᠡᠯᠴᠢᠳ ᠮᠢᠨᠢ
ᠬᠦᠯᠮᠠᠩ ᠣᠷᠴᠢᠯᠠᠩ ᠳ᠋ᠤ᠌ ᠲᠠᠨᠠᠷ ᠤ᠋ᠨ ᠣᠳᠣᠳ ᠰᠠᠴᠤᠷᠠᠭᠰᠠᠭᠠᠷ ᠯᠠ ᠂ ᠂ ᠂
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠲᠠᠨᠠᠷ ᠤ᠋ᠨ ᠣᠷᠬᠣᠳᠠᠢ ᠱᠥᠯᠥ ᠶ᠋ᠢ ᠠᠮᠰᠠᠨ ᠂ ᠂ ᠂
ᠠᠮᠰᠠᠩᠬᠠᠨ ᠂ ᠂ ᠂ ᠠᠮᠰᠠᠭᠰᠠᠭᠠᠷ ᠯᠠ ᠮᠦᠩᠭᠡᠷᠡᠬᠦ ᠪᠣᠯᠤᠨᠠ ᠂ ᠂ ᠂
ᠠᠶᠤᠩᠭᠠᠨ ᠰᠣᠯᠣᠩᠭᠠᠨ ᠠᠮᠢᠳᠤᠷᠠᠯ ᠦᠷᠭᠦᠯᠵᠢᠯᠡᠬᠦ ᠯᠡ ᠪᠣᠯᠤᠨᠠ ᠂ ᠂ ᠂
ᠠᠷᠭᠠ ᠦᠭᠡᠢ ᠦᠨᠡᠨ ᠲᠠᠪᠤᠨ ᠤᠬᠠᠭᠠᠨ ᠤ᠋
ᠠᠨᠠᠭᠠᠬᠤᠢ ᠰᠤᠪᠢᠯᠠᠬᠤᠢ ᠶ᠋ᠢᠨ ᠰᠢᠳᠢᠲᠦ ᠤᠪᠠᠳᠢᠰ
ᠠᠷᠤᠳᠬᠠᠨ ᠪᠣᠯᠪᠠᠰᠤᠨ ᠲᠡᠭᠷᠢᠯᠢᠭ ᠤᠭᠰᠠᠠᠭᠠᠲᠠᠨ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ
ᠠᠷᠢᠭᠤᠨ ᠮᠣᠩᠭᠣᠯ ᠱᠥᠯᠦᠨ ᠳ᠋ᠦ᠍ ᠯᠡ ᠪᠠᠢᠳᠠᠭ ᠢ᠋ ᠮᠡᠳᠡᠬᠦ ᠪᠣᠯᠤᠨᠠ ᠠ᠋
ᠠᠷᠢᠬᠢᠨ ᠤ᠋ ᠳᠡᠭᠡᠵᠢᠰ ᠢ᠋ ᠠᠷᠠᠵᠠ ᠬᠤᠷᠠᠵᠠ ᠰᠢᠭ᠋ ᠯᠡ
ᠠᠮᠰᠠᠬᠤ ᠶ᠋ᠢᠨ ᠲᠡᠳᠦᠢ ᠵᠢᠷᠭᠠᠯᠠᠩ ᠲᠠᠢ ᠬᠦᠷᠲᠡᠬᠦ ᠶ᠋ᠢᠨ ᠠᠵᠠ ᠶ᠋ᠢ
ᠠᠮᠲᠠᠲᠠᠨ ᠤ᠋ ᠣᠬᠢ ᠶ᠋ᠢ ᠰᠤᠦ᠍ ᠵᠠᠯᠢ ᠪᠠᠷ ᠢ᠋ᠶ᠋ᠠᠨ ᠯᠠ
ᠠᠷᠠᠢ ᠭᠡᠮ ᠲᠡᠢ ᠵᠢᠮᠡ ᠲᠡᠢ ᠰᠢᠮᠡᠬᠦ ᠶ᠋ᠢᠨ ᠵᠣᠯ ᠢ᠋
ᠮᠠᠨᠠᠢᠬᠢᠨ ᠤ᠋ ᠬᠣᠲᠠ ᠬᠥᠳᠡᠭᠡ ᠦᠭᠡᠢ ᠲᠤᠢᠯᠪᠤᠷᠢᠲᠠᠢ ᠮᠡᠳᠡᠳᠡᠭ
ᠮᠠᠷᠭᠠᠰᠢ ᠶ᠋ᠢᠨ ᠡᠩᠬᠡᠵᠢᠨ ᠢ᠋ ᠨᠠᠷᠠ ᠨᠢ ᠬᠦᠷᠲᠡᠯᠡ ᠵᠥᠩᠨᠡᠳᠡᠭ
ᠲᠤᠯᠭᠠ ᠵᠥᠪ ᠲᠣᠭᠣᠷᠢᠭᠰᠠᠨ ᠤᠬᠠᠭᠠᠨ ᠨᠢ ᠴᠢᠯᠡᠳᠠᠭ᠌ ᠴᠤ᠌
ᠲᠥᠪ ᠲᠦ᠍ ᠲᠠᠲᠠᠭᠳᠠᠬᠤ ᠰᠣᠷᠢᠨᠵᠢᠨ ᠮᠥᠰᠥ ᠨᠢ ᠦᠯᠡᠳᠡᠳᠡᠭ
ᠳᠠᠷᠢ ᠰᠤᠮᠤ ᠪᠠᠷ ᠠᠮᠢᠳᠤᠷᠠᠳᠠᠭ ᠦᠭᠡᠢ ᠬᠣᠷᠸᠠ ᠳ᠋ᠤ᠌
ᠲᠠᠷᠢᠬᠢ ᠵᠢᠷᠦᠬᠡ ᠪᠡᠷ ᠢ᠋ᠶ᠋ᠡᠨ ᠯᠡ ᠠᠮᠢᠳᠤᠷᠠᠬᠤ ᠵᠢᠩᠬᠢᠨᠢ ᠭᠣᠶᠣ
ᠵᠢᠩᠬᠢᠨᠢ ᠶ᠋ᠢᠨ ᠭᠣᠶᠣ ᠭᠠᠯ ᠭᠣᠯᠣᠮᠲᠠ ᠶ᠋ᠢᠨ ᠠᠮᠢᠳᠤᠷᠠᠯ
ᠵᠢᠷ ᠦ᠋ᠨ ᠡᠷᠡᠭᠦᠯᠵᠢᠬᠦ ᠲᠦᠮᠡᠨ ᠲᠠᠷᠬᠠᠯᠠᠭᠠ ᠠ᠋ᠴᠠ ᠯᠠ ᠡᠬᠢᠯᠡᠨᠡ
ᠶᠠᠰᠤᠨ ᠳ᠋ᠠᠭᠠᠨ ᠴᠠᠭᠠᠨ ᠴᠢᠮᠥᠭᠡ ᠲᠡᠢ
ᠴᠢᠰᠤᠨ ᠳ᠋ᠠᠭᠠᠨ ᠣᠮᠣᠭᠯᠠᠩ ᠲᠦᠪᠡᠷᠭᠡᠨ ᠲᠡᠢ
ᠵᠢᠰᠦᠨ ᠳ᠋ᠡᠭᠡᠨ ᠰᠡᠷᠭᠦᠯᠡᠩ ᠬᠡᠢᠮᠦᠷᠢ ᠲᠡᠢ
ᠥᠭᠡᠵᠢᠨ ᠳ᠋ᠡᠭᠡᠨ ᠬᠥᠬᠡ ᠲᠠᠮᠠᠭᠠ ᠲᠠᠢ
ᠢᠷᠠᠭᠤ ᠨᠠᠢᠷᠠᠭ ᠰᠢᠭ᠋ ᠢ᠋ᠶ᠋ᠡᠨ ᠤᠶᠠᠩᠭᠠᠨ ᠰᠡᠳᠬᠢᠯ ᠲᠡᠢ
ᠤᠷᠤᠰᠬᠠᠯ ᠰᠢᠭ᠋ ᠢ᠋ᠶ᠋ᠡᠨ ᠮᠥᠩᠬᠡ ᠶ᠋ᠢᠨ ᠡᠬᠢ ᠲᠡᠢ
ᠤᠯᠠᠮᠵᠢᠯᠠᠯ ᠤ᠋ᠨ ᠪᠣᠰᠤᠭᠠ ᠮᠥᠷᠡᠨ ᠬᠠᠯᠭᠢᠯᠠᠵᠤ ᠬᠠᠨᠤᠰᠢ ᠦᠭᠡᠢ ᠠ᠋
2024᠂ 1᠂ 8 – 2024᠂ 1᠂ 28᠃ ᠰᠥᠨᠢ
ᠬᠥᠬᠡᠬᠣᠲᠠᠨᠠ ᠪᠦᠲᠦᠭᠡᠪᠡᠢ᠃