ᠤᠨᠠᠭᠠᠨ ᠬᠠᠯᠲᠠᠷ < ᠭᠤᠷᠪᠠ> - ᠴᠣ ᠂ ᠣᠷᠱᠤᠨ Унаган халтар <3> – Чо ᠂ Оршин
230 ᠠᠭᠲᠠ ᠪᠠᠷᠢᠬᠤ ᠭᠠᠵᠠᠷ
ᠠᠪᠤ ᠶ᠋ᠢᠨ ᠢᠷᠡᠭᠰᠡᠨ ᠨᠢ ᠡᠢᠮᠦ
ᠠᠷᠢᠭᠤᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠢᠯᠡᠳᠬᠡᠭᠰᠡᠨ
ᠠᠯᠳᠠᠷ ᠲᠤᠤᠯᠢᠰ ᠨᠢ ᠲᠡᠢᠮᠦ
ᠤᠨᠠᠭᠠᠨ ᠬᠠᠯᠲᠠᠷ ᠤ᠋ᠨ ᠦᠯᠢᠭᠡᠷ ᠢ᠋
ᠣᠢᠯᠠᠭᠠᠵᠤ ᠰᠣᠨᠣᠰᠤᠨ ᠪᠢᠰᠢᠷᠡᠭᠡᠳ
ᠡᠮᠦᠨᠡ ᠪᠡᠨ ᠪᠠᠢᠭᠠ ᠡᠪᠦᠭᠡᠨ ᠢ᠋
ᠢᠲᠡᠭᠡᠯ ᠦ᠋ᠨ ᠬᠠᠷᠠᠴᠠ ᠪᠠᠷ ᠬᠠᠷᠠᠭᠠᠳ
ᠮᠠᠯᠴᠢᠨ ᠬᠥᠮᠦᠨ ᠦ᠌ ᠴᠢᠨᠠᠷ ᠢ᠋
ᠮᠡᠳᠡᠵᠦ ᠪᠢ ᠠᠪᠤᠭᠠᠳ
ᠮᠠᠨ ᠤ᠋ ᠦᠶᠡ ᠶ᠋ᠢᠨ ᠬᠢᠨ ᠳ᠋ᠦ᠍ ᠦᠨᠡᠬᠡᠷ
ᠮᠠᠭᠲᠠᠭᠠᠯ ᠳᠠᠭᠤᠷᠢᠶᠠᠯ ᠰᠢᠦ ᠭᠡᠬᠦ ᠳ᠋ᠦ᠍
ᠵᠠᠮᠰᠤ ᠡᠪᠦᠭᠡᠨ ᠡᠯᠭᠦᠵᠦ
ᠵᠠᠯᠭᠠᠵᠤ ᠨᠠᠳᠠ ᠬᠠᠨᠳᠤᠵᠤ
《 ᠡᠨᠡ ᠨᠢ ᠮᠢᠨᠦ ᠡᠭᠦᠷᠭᠡ
ᠡᠷᠬᠢᠮ ᠤᠯᠤᠰ ᠲᠠᠭᠠᠨ ᠪᠡᠯᠡᠭ》 ᠭᠡᠵᠦ
ᠳᠠᠷᠤᠤ ᠨᠣᠮᠣᠬᠠᠨ ᠬᠠᠷᠢᠭᠤᠯᠵᠤ
ᠳᠠᠬᠢᠵᠤ ᠨᠠᠮᠠᠶ᠋ᠢ ᠰᠢᠷᠲᠡᠨᠡ
ᠳᠠᠭᠠᠭᠠᠵᠤ ᠠᠪᠤᠭᠰᠠᠨ ᠳᠠᠷᠤᠭᠠ ᠴᠤ᠌
ᠲᠠᠨᠢᠯ ᠤ᠋ᠨ ᠴᠢᠷᠠᠢ ᠪᠠᠷ ᠮᠦᠰᠢᠶᠡᠨᠡ᠃
ᠶᠠᠷᠢᠯᠴᠠᠭᠠ ᠶᠠᠷᠢᠶᠠᠨ ᠤ᠋ ᠬᠥᠭ
ᠶᠠᠭ ᠰᠠᠢᠬᠠᠨ ᠬᠥᠭᠵᠢᠲᠡᠯᠡ
ᠠᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠪᠠᠢᠯᠳᠤᠭᠴᠢ
ᠠᠯᠬᠤᠵᠤ ᠢᠷᠡᠭᠡᠳ ᠶᠣᠰᠣᠯᠠᠵᠤ
《 ᠲᠠᠯᠠ ᠨᠤᠲᠤᠭ ᠤ᠋ᠨ ᠡᠵᠡᠨ ᠦ᠌
ᠲᠠᠩᠰᠤᠭ ᠰᠡᠳᠬᠢᠯ ᠳ᠋ᠦ᠍ ᠲᠠᠯᠠᠷᠬᠠᠶᠠ!
ᠲᠠᠨ ᠤ᠋ ᠬᠦᠷᠭᠡᠭᠰᠡᠨ ᠠᠭᠲᠠ
ᠳᠠᠷᠬᠠᠨ ᠬᠢᠯᠢ ᠪᠡᠨ ᠴᠠᠭᠳᠠᠨᠠ》 ᠭᠡᠳ
ᠴᠢᠩ ᠦᠨᠡᠨᠴᠢ ᠶᠠᠷᠢᠵᠤ
ᠴᠡᠷᠢᠭ ᠶᠣᠰᠣ ᠭᠦᠢᠴᠡᠳᠬᠡᠬᠦ ᠳ᠋ᠦ᠍
ᠴᠠᠪᠴᠢᠯᠠᠵᠤ ᠪᠠᠢᠭᠰᠠᠨ ᠬᠠᠯᠲᠠᠷ
ᠴᠢᠮᠡᠭᠡ ᠰᠣᠨᠣᠷᠯᠠᠨ ᠵᠣᠭᠰᠣᠨᠠ᠃
ᠰᠢᠨᠡ ᠡᠵᠡᠨ ᠦ᠌ ᠭᠠᠷ ᠲᠤ
ᠰᠢᠯᠵᠢᠭᠦᠯᠵᠦ ᠵᠢᠯᠣᠭᠣ ᠪᠠᠨ ᠥᠭᠬᠦ ᠳ᠋ᠦ᠍
ᠰᠡᠷᠭᠦᠯᠡᠩ ᠵᠠᠩ ᠲᠠᠢ ᠬᠠᠯᠲᠠᠷ
ᠴᠡᠮᠴᠡᠭᠡᠷ ᠠᠯᠬᠤᠭᠠ ᠣᠷᠣᠪᠠ᠃
ᠡᠷᠭᠢᠵᠦ ᠬᠠᠶᠠ ᠢᠨᠴᠠᠭᠠᠯᠠᠭᠠᠳ
ᠦᠦᠷᠰᠡᠵᠦ ᠲᠡᠮᠡᠦᠯᠦᠨ ᠶᠠᠪᠤᠬᠤ ᠨᠢ
ᠮᠠᠯᠴᠢᠨ ᠡᠵᠡᠨ ᠦ᠌ ᠪᠡᠨ ᠠᠷᠠᠴᠢᠯᠠᠯ ᠳ᠋ᠤ᠌
ᠮᠡᠨᠳᠦ ᠬᠦᠷᠭᠡᠵᠦ ᠪᠠᠢᠭᠠ ᠰᠢᠭ᠋᠃
ᠵᠠᠮᠰᠤ ᠡᠪᠦᠭᠡᠨ ᠦ᠌ ᠵᠢᠷᠦᠬᠡᠨ ᠳ᠋ᠦ᠍
ᠵᠢᠭᠠᠬᠠᠨ ᠬᠦᠨᠳᠦ ᠪᠣᠳᠣᠭᠳᠠᠪᠠᠴᠤ
ᠰᠠᠨᠠᠭᠠ ᠨᠢ ᠭᠦᠢᠴᠡᠭᠰᠡᠨ ᠪᠣᠯᠤᠯᠲᠠᠢ
ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠷᠦᠨ ᠲᠣᠬᠢᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024᠂ 5᠂ 22