ᠤᠨᠠᠭᠠᠨ ᠬᠠᠯᠲᠠᠷ <ᠨᠢᠭᠡ> - ᠴᠣ ᠂ ᠣᠷᠱᠤᠨ Унаган халтар <1> – Чо ᠂ Оршин
213ᠤᠨᠠᠭᠠᠨ ᠬᠠᠯᠲᠠᠷ <ᠨᠢᠭᠡ>
ᠨᠣᠮᠢᠨ ᠴᠡᠩᠬᠡᠷ ᠣᠭᠲᠠᠷᠭᠤᠢ ᠳ᠋ᠤ᠌
ᠬᠤᠨ ᠡᠭᠦᠯᠡᠰ ᠲᠤᠨᠤᠷᠠᠭᠰᠠᠨ
ᠨᠣᠭᠣᠭᠠᠨ ᠥᠭᠡᠳᠡᠩ ᠲᠠᠯᠠ ᠳ᠋ᠤ᠌
ᠬᠤᠷᠠᠭᠠ ᠢᠰᠢᠭᠡ ᠳᠠᠪᠠᠯᠠᠭᠰᠠᠨ
ᠴᠡᠴᠡᠭ ᠨᠣᠭᠣᠭᠠ ᠳᠡᠯᠭᠡᠷᠡᠬᠦ
ᠴᠡᠩᠭᠡᠯᠲᠦ ᠬᠠᠪᠤᠷ ᠤ᠋ᠨ ᠳᠤᠮᠳᠠ
ᠴᠡᠯᠮᠡᠭᠦᠨ ᠤᠨᠢᠶᠠᠷ ᠲᠠᠲᠠᠭᠰᠠᠨ
ᠰᠡᠷᠢᠭᠦᠨ ᠠᠮᠢᠰᠬᠤᠯᠲᠤ ᠡᠳᠦᠷ
ᠠᠷᠠᠳ ᠤ᠋ᠨ ᠴᠡᠷᠢᠭ ᠲᠦ᠍ ᠬᠦᠷᠭᠡᠬᠦ
ᠠᠭᠲᠠ ᠪᠠᠷᠢᠬᠤ ᠠᠵᠢᠯ
ᠠᠩᠭᠢᠷᠲᠤ ᠰᠢᠯᠢ ᠶ᠋ᠢᠨ ᠵᠣ ᠳ᠋ᠤ᠌
ᠠᠶᠠᠲᠠᠢ ᠰᠠᠢᠬᠠᠨ ᠶᠠᠪᠤᠭᠳᠠᠪᠠ᠃
ᠬᠥᠷ ᠬᠥᠭᠵᠢᠶᠡᠨᠲᠦ ᠬᠦᠳᠡᠯᠮᠦᠷᠢᠯᠡᠯ
ᠬᠦᠴᠢᠷ ᠪᠡᠷᠬᠡ ᠶ᠋ᠢ ᠳᠠᠪᠠᠬᠤ ᠳ᠋ᠤ᠌
ᠬᠥᠮᠦᠰ ᠦ᠋ᠨ ᠨᠢᠭᠡ ᠭᠠᠵᠠᠷ ᠲᠤ
ᠬᠥᠲᠥᠯᠦᠭᠡ ᠮᠣᠷᠢᠲᠠᠨ ᠢᠯᠡᠷᠡᠯᠡ᠃
ᠬᠠᠩᠬᠠᠷ ᠥᠷᠭᠡᠨ ᠴᠡᠭᠡᠵᠢ ᠲᠡᠢ
ᠬᠠᠷᠠ ᠰᠢᠷᠪᠦᠭᠡᠷ ᠰᠠᠬᠠᠯ ᠲᠠᠢ
ᠬᠠᠪᠢ ᠣᠢᠷᠠ ᠳ᠋ᠠᠭᠠᠨ ᠴᠤᠤᠲᠠᠢ
ᠬᠠᠮᠲᠤ ᠣᠯᠠᠨ ᠳ᠋ᠠᠭᠠᠨ ᠵᠢᠳᠬᠦᠯᠲᠡᠢ
ᠵᠢᠷᠠᠨ ᠨᠠᠰᠤ ᠶ᠋ᠢ ᠮᠤᠰᠬᠢᠬᠰᠠᠨ
ᠵᠠᠮᠰᠤ ᠡᠪᠦᠭᠡ ᠪᠣᠯᠬᠤ ᠶ᠋ᠢ
ᠬᠠᠷᠠᠭᠰᠠᠨ ᠪᠦᠬᠦᠨ ᠮᠡᠳᠡᠵᠦ ᠪᠢᠯᠡ
ᠬᠠᠷᠢᠨ ᠳᠣᠲᠣᠷᠠ ᠪᠠᠨ ᠭᠠᠢᠬᠠᠵᠤ ᠪᠢᠯᠡ᠃
《 ᠤᠨᠤᠬᠤ ᠮᠣᠷᠢ ᠰᠣᠯᠢᠶᠠ》 ᠭᠡᠬᠦ ᠳ᠋ᠦ᠍
ᠤᠨᠠᠭᠠᠨ ᠬᠠᠯᠲᠠᠷ ᠢ᠋ᠶ᠋ᠠᠨ ᠥᠭᠳᠡᠭ ᠦᠭᠡᠢ
ᠣᠳᠣ ᠶᠠᠭᠠᠬᠢᠭᠠᠳ ᠠᠪᠴᠢᠷᠠᠪᠠ?
ᠤᠴᠢᠷ ᠶᠠᠭᠤᠨ ᠳ᠋ᠤ᠌ ᠪᠣᠯᠪᠠ?》
ᠰᠢᠪᠡᠷ ᠢᠪᠢᠷ ᠬᠦᠦᠷᠨᠢᠨᠡ
ᠴᠢᠬᠢᠯᠳᠦᠵᠦ ᠲᠦᠯᠬᠢᠯᠴᠡᠨ ᠵᠣᠭᠰᠣᠨᠠ᠃
ᠰᠢᠷᠲᠡᠵᠦ ᠰᠣᠨᠢᠷᠬᠠᠭᠰᠠᠨ ᠬᠠᠷᠠᠴᠠ ᠪᠠᠷ
ᠰᠢᠢᠳᠪᠦᠷᠢ ᠶᠠᠭᠤ ᠶ᠋ᠢ ᠠᠵᠢᠨᠠ᠃
ᠣᠯᠠᠨ ᠢ᠋ᠶ᠋ᠠᠷ ᠦᠢᠮᠡᠯᠳᠦᠨ ᠶᠠᠷᠢᠯᠴᠠᠵᠤ
ᠤᠬᠤᠴᠢᠯᠠᠵᠤ᠂ ᠯᠠᠪᠯᠠᠨ ᠠᠰᠠᠭᠤᠯᠴᠠᠬᠤ ᠶ᠋ᠢ
ᠤᠨᠠᠭᠠᠨ ᠬᠠᠯᠲᠠᠷ ᠤ᠋ᠨ ᠲᠤᠬᠠᠢ
ᠤᠴᠢᠷ ᠪᠣᠯᠵᠤ ᠰᠢᠪᠡᠨᠡᠯᠳᠦᠬᠦ ᠶ᠋ᠢ
ᠵᠠᠮᠰᠤ ᠡᠪᠦᠭᠡ ᠪᠠᠷᠤᠭᠯᠠᠭᠰᠠᠨ ᠴᠤ᠌
ᠵᠠᠪᠰᠠᠷᠯᠠᠵᠤ ᠶᠡᠷᠦ ᠰᠠᠭᠠᠲᠠᠭᠰᠠᠨ ᠦᠭᠡᠢ
ᠵᠠᠬᠠ ᠬᠠᠪᠢᠳᠠᠭᠤ ᠪᠠᠢᠭᠰᠠᠨ
ᠵᠠᠮᠢᠶᠠᠨ ᠳᠠᠷᠤᠭᠠ ᠶ᠋ᠢ ᠡᠷᠢᠵᠦ᠂
《 ᠬᠥᠮᠦᠨ ᠦᠷᠡ ᠪᠡᠨ ᠭᠡᠳᠡᠭ
ᠬᠦᠯᠦᠭ ᠲᠦ᠍ ᠤᠨᠠᠭᠠ ᠪᠠᠨ ᠭᠡᠳᠡᠭ
ᠬᠥᠯᠥᠰᠥ ᠬᠦᠴᠦ ᠪᠡᠷ ᠲᠡᠵᠢᠭᠡᠭᠰᠡᠨ
ᠬᠥᠭᠡᠷᠦᠬᠦᠨ ᠤᠨᠠᠭᠠᠨ ᠬᠠᠯᠲᠠᠷ ᠢ᠋ᠶ᠋ᠠᠨ
ᠠᠪᠤ ᠴᠢᠨᠢ ᠪᠢ ᠠᠪᠴᠢᠷᠠᠯᠠ
ᠠᠭᠲᠠ ᠪᠣᠯᠭᠠᠶᠠ᠂ ᠣᠳᠣ
ᠠᠯᠲᠠᠨ ᠬᠢᠯᠢ ᠪᠡᠨ ᠴᠠᠭᠳᠠᠬᠤ ᠳ᠋ᠤ᠌
ᠠᠷᠭᠤᠮᠠᠭ ᠨᠢ ᠪᠣᠯᠤᠭ!》 ᠭᠡᠯᠡ᠃
ᠵᠠᠮᠢᠶᠠᠨ ᠳᠠᠷᠤᠭᠠ ᠮᠡᠭᠳᠡᠷᠡᠵᠤ
ᠵᠠᠪᠳᠤᠵᠤ ᠲᠡᠭᠦᠨ ᠡᠴᠡ ᠯᠠᠪᠯᠠᠨ
《 ᠠᠭᠲᠠ ᠳ᠋ᠤ᠌ ᠬᠦᠷᠭᠡᠨᠡ ᠭᠡᠵᠦ ᠤᠤ?
ᠠᠪᠤ ᠠ᠋᠂ ᠲᠠ ᠦᠨᠡᠷᠡᠨ᠁》
《 ᠮᠢᠨᠦ ᠰᠡᠳᠬᠢᠯ ᠡᠨᠡ ᠶᠦᠮ
ᠮᠠᠯᠴᠢᠨ ᠬᠥᠮᠦᠨ ᠦ᠌ ᠬᠠᠢᠷᠠ》
ᠰᠢᠢ᠍ᠳᠮᠡᠭ ᠬᠡᠯᠡᠭᠰᠡᠨ ᠵᠠᠮᠰᠤ
ᠰᠢᠷᠪᠢᠵᠦ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨᠡ᠃
ᠡᠨᠡᠬᠡᠨ ᠶᠠᠷᠢᠯᠴᠠᠭᠠᠨ ᠳᠤᠮᠳᠠ
ᠡᠭᠡᠯ ᠪᠢ ᠪᠠᠢᠭᠰᠠᠨ ᠲᠠᠢ
ᠤᠨᠠᠭᠠᠨ ᠬᠠᠯᠲᠠᠷ ᠭᠡᠳᠡᠭ ᠦ᠋ᠨ
ᠤᠴᠢᠷ ᠢ᠋ ᠣᠯᠵᠤ ᠶᠠᠳᠠᠨ
ᠨᠠᠰᠤ ᠭᠦᠢᠴᠡᠭᠰᠡᠨ ᠮᠣᠷᠢ ᠶ᠋ᠢ
ᠨᠡᠷᠡᠯᠡᠵᠦ ᠢᠩᠭᠢᠵᠦ ᠬᠡᠯᠡᠬᠦ ᠨᠢ
ᠣᠨᠢᠰᠣᠭᠠ ᠮᠡᠲᠦ ᠰᠠᠨᠠᠭᠳᠠᠭᠠᠳ
ᠣᠢᠯᠠᠭᠠᠯᠲᠠ ᠮᠥᠴᠢᠳ ᠪᠣᠳᠣᠭᠳᠠᠬᠤ ᠲᠤᠯᠠ
ᠬᠥᠷᠥᠰᠥᠵᠢᠭᠰᠡᠨ ᠴᠢᠷᠠᠢᠲᠤ ᠡᠪᠦᠭᠡᠨ ᠦ᠌
ᠬᠦᠳᠡᠷ ᠭᠠᠷ ᠢ᠋ ᠠᠳᠬᠤᠭᠰᠠᠨ
ᠵᠠᠮᠢᠶᠠᠨ ᠳᠠᠷᠤᠭᠠ ᠶ᠋ᠢ ᠶᠣᠪᠤᠷᠤᠰᠬᠢᠭᠡᠳ
ᠵᠠᠪᠠᠯ ᠲᠠᠢᠯᠤᠯ ᠬᠦᠰᠡᠪᠡᠯ
《 ᠮᠠᠯᠴᠢᠨ ᠠᠷᠠᠳ ᠤ᠋ᠨ ᠰᠡᠳᠬᠢᠯ
ᠡᠭᠦᠨ ᠦ᠌ ᠳᠣᠲᠣᠷᠠ ᠰᠢᠩᠭᠡᠨᠡ
ᠮᠠᠯ ᠢ᠋ᠶ᠋ᠠᠨ ᠠᠷᠠᠴᠢᠯᠠᠬᠤ ᠶ᠋ᠢᠨ ᠲᠤᠰᠠ
ᠲᠡᠭᠦᠨ ᠦ᠌ ᠳᠤᠮᠳᠠ ᠨᠡᠪᠲᠡᠷᠡᠨᠡ》 ᠭᠡᠵᠦ
ᠤᠤᠯ ᠶᠠᠪᠤᠳᠠᠯ ᠤ᠋ᠨ ᠶᠠᠪᠤᠴᠠ ᠶ᠋ᠢ
ᠤᠴᠢᠷᠲᠠᠢ ᠰᠠᠢᠬᠠᠨ ᠬᠡᠯᠡᠭᠰᠡᠨ ᠶᠦᠮ᠃
ᠤᠬᠤᠴᠢᠯᠠᠵᠤ ᠪᠠᠢᠭᠰᠠᠨ ᠪᠢ ᠴᠦ᠍
ᠤᠶᠠᠩᠭᠠ ᠪᠣᠯᠭᠠᠨ ᠬᠡᠯᠬᠢᠭᠰᠡᠨ ᠶᠦᠮ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
20240519