ᠬᠥᠬᠡ ᠳᠠᠯᠢᠩᠪᠤᠨ ᠲᠡᠷᠯᠢᠭ-ᠳ ᠫᠦᠷᠪᠦᠳᠣᠷᠵᠢХөх даалимбан тэрлэг-Д.Пүрэвдорж
2579ᠬᠥᠬᠡ ᠳᠠᠯᠢᠩᠪᠤᠨ ᠲᠡᠷᠯᠢᠭ
ᠤᠶᠠᠩᠭᠠ ᠶ᠋ᠢᠨ ᠣᠷᠣᠰᠢᠯ
ᠴᠡᠷᠢᠭ ᠡᠷᠡᠰ ᠦ᠋ᠨ ᠤᠯᠠᠭᠠᠨ ᠲᠣᠭᠣᠰᠣ
ᠴᠡᠴᠡᠭ ᠦ᠋ᠨ ᠳᠤᠮᠳᠠᠭᠤᠷ ᠲᠠᠲᠠᠭᠠᠳ ᠶᠠᠪᠤᠭᠰᠠᠨ ᠶᠤᠮ
ᠴᠡᠭᠡᠵᠢᠨ ᠳᠣᠲᠣᠷᠠ ᠬᠠᠭᠠᠴᠠᠯ ᠣᠷᠬᠢᠭᠠᠳ
ᠴᠡᠩᠬᠡᠷ ᠠᠭᠤᠯᠠᠰ ᠢ᠋ ᠳᠠᠪᠠᠭᠠᠳ ᠶᠠᠪᠤᠭᠰᠠᠨ ᠶᠤᠮ
ᠣᠯᠠᠨ ᠡᠷᠡᠴᠦᠦᠯ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠭᠠᠳ
ᠣᠩᠭᠣᠨ ᠲᠠᠯᠠ ᠪᠠᠷ ᠳᠠᠪᠬᠢᠭᠠᠳ ᠶᠠᠪᠤᠭᠰᠠᠨ ᠶᠤᠮ
ᠣᠷᠣᠨ ᠭᠡᠷ ᠲᠡᠭᠡᠨ ᠵᠠᠢ ᠪᠠᠨ ᠣᠷᠬᠢᠭᠠᠳ
ᠣᠳᠣ ᠲᠠᠢ ᠠᠳᠠᠯᠢᠬᠠᠨ ᠬᠠᠷᠪᠤᠭᠠᠳ ᠶᠠᠪᠤᠭᠰᠠᠨ ᠶᠤᠮ
ᠰᠠᠷᠨᠢᠬᠤ ᠲᠣᠭᠣᠰᠣᠨ ᠤ᠋ ᠨᠢᠭᠡᠨ ᠦᠵᠦᠭᠦᠷ ᠲᠦ᠍
ᠰᠠᠷᠠᠭᠤᠯ ᠨᠢᠳᠦ ᠪᠡᠨ ᠪᠢ ᠴᠢᠯᠡᠭᠡᠵᠦ
ᠰᠠᠨᠠᠭᠠ ᠠᠯᠲᠠᠨ ᠰᠦ ᠪᠡᠨ ᠡᠷᠭᠦᠨ
ᠰᠠᠷᠠ ᠰᠢᠭ᠋ ᠮᠡᠯᠲᠡᠷᠡᠨ ᠭᠠᠳᠠᠨᠠ ᠪᠠᠨ ᠦᠯᠡᠳᠡᠭᠰᠡᠨ ᠶᠤᠮ
ᠬᠥᠳᠡᠭᠡ ᠨᠤᠲᠤᠭ ᠤ᠋ᠨ ᠬᠥᠬᠡ ᠠᠯᠤᠰ ᠲᠤ᠌
ᠬᠥᠯ ᠬᠦᠨᠳᠦ ᠰᠢᠨᠡᠬᠡᠨ ᠪᠡᠷᠢ
ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠤᠯᠠᠭᠠᠨ ᠴᠡᠷᠢᠭ ᠦ᠋ᠨ
ᠠᠷᠤ ᠭᠡᠷ ᠪᠣᠯᠵᠤ ᠦᠯᠡᠳᠡᠭᠰᠡᠨ ᠶᠤᠮ
ᠭᠣᠪᠢ ᠶ᠋ᠢᠨ ᠭᠠᠭᠴᠠ ᠬᠠᠢᠯᠠᠰᠤ ᠠᠳᠠᠯᠢ
ᠭᠣᠣᠯᠲᠤ ᠵᠢᠷᠦᠬᠡᠨ ᠳ᠋ᠡᠭᠡᠨ ᠬᠠᠢᠷᠠ ᠪᠠᠨ ᠬᠠᠳᠠᠭᠠᠯᠠᠵᠤ
ᠲᠩᠷᠢ ᠶ᠋ᠢᠨ ᠬᠠᠶᠠᠭᠠᠨ ᠳ᠋ᠤ᠌ ᠴᠠᠭ ᠰᠢᠭ᠋ ᠳᠤᠷᠠᠢᠨ
ᠲᠡᠷᠡ ᠵᠢᠯ ᠪᠢ ᠨᠥᠬᠥᠷ ᠢ᠋ᠶ᠋ᠡᠨ ᠦᠳᠡᠭᠰᠡᠨ ᠶᠤᠮ
ᠬᠥᠮᠦᠨ ᠦ᠌ ᠬᠦᠦ ᠳ᠋ᠦ᠍ ᠬᠠᠢᠷᠠᠲᠠᠢ ᠶ᠋ᠢᠨ ᠡᠷᠬᠡ ᠪᠡᠷ
ᠬᠦᠯᠦᠭ ᠦ᠋ᠨ ᠲᠣᠭᠣᠰᠣ ᠵᠢᠷᠦᠬᠡᠨ ᠳ᠋ᠡᠭᠡᠨ ᠤᠨᠠᠭᠠᠵᠤ
ᠬᠦᠯᠢᠶᠡᠬᠦ ᠬᠣᠨᠣᠭ ᠤ᠋ᠨ ᠡᠬᠢᠨ ᠰᠥᠨᠢ ᠶ᠋ᠢᠨ
ᠬᠦᠢᠲᠡᠨ ᠳᠡᠷᠡ ᠳ᠋ᠦ᠍ ᠬᠠᠴᠠᠷ ᠢ᠋ᠶ᠋ᠠᠨ ᠬᠠᠭᠠᠷᠢᠭᠰᠠᠨ ᠶᠤᠮ
ᠡᠷᠦᠬᠡᠨ ᠦ᠌ ᠬᠣᠰᠢᠭᠤ ᠲᠡᠷᠡ ᠰᠥᠨᠢ
ᠥᠷᠥᠭᠡᠰᠦᠨ ᠳᠠᠯᠢ ᠰᠢᠭ᠋ ᠲᠣᠭᠣᠨᠣᠨ ᠳ᠋ᠤ᠌ ᠬᠡᠲᠦᠷᠴᠦ
ᠬᠣᠢᠮᠣᠷ ᠪᠠᠭᠤᠭᠰᠠᠨ ᠰᠠᠷᠠᠨ ᠤ᠋ ᠲᠤᠶᠠᠭᠠ
ᠬᠣᠶᠠᠷ ᠬᠤᠪᠢᠶᠠᠭᠰᠠᠨ ᠲᠣᠯᠢ ᠰᠢᠭ᠋ ᠪᠠᠢᠭᠰᠠᠨ ᠶᠤᠮ
ᠬᠠᠯᠬᠠ ᠭᠣᠣᠯ ᠤ᠋ᠨ ᠲᠡᠢᠨ ᠦ᠌ ᠲᠦᠭᠰᠢᠭᠦᠷᠢ
ᠬᠠᠮᠤᠭ ᠰᠡᠳᠬᠢᠯ ᠳ᠋ᠦ᠍ ᠳᠠᠷᠤᠯᠲᠠ ᠪᠣᠯᠵᠤ
ᠠᠯᠲᠠᠨ ᠨᠠᠷᠠ ᠶ᠋ᠢ ᠲᠡᠷᠡᠬᠡᠨ ᠵᠠᠭᠤᠷᠠ
ᠠᠯᠠᠭᠠ ᠪᠠᠷ ᠬᠠᠭᠠᠵᠤ ᠪᠣᠯᠬᠤ ᠪᠠᠷ ᠪᠠᠢᠭᠰᠠᠨ ᠶᠤᠮ
ᠠᠮᠢᠳᠤᠷᠠᠯ ᠤ᠋ᠨ ᠪᠣᠱᠣᠭᠠ ᠳᠥᠩᠭᠡᠵᠢ ᠠᠯᠬᠤᠭᠰᠠᠨ
ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤᠨ ᠳ᠋ᠤ᠌ ᠢᠩᠭᠢᠵᠦ
ᠬᠠᠮᠢᠭᠠ ᠬᠣᠯᠠ ᠡᠴᠡ ᠳᠠᠷᠢ ᠶ᠋ᠢᠨ ᠬᠠᠶᠠᠭ
ᠬᠠᠯᠠᠭᠤᠨ ᠵᠢᠷᠦᠬᠡᠨ ᠳ᠋ᠦ᠍ ᠬᠠᠭ ᠬᠠᠶᠠᠭᠰᠠᠨ ᠶᠤᠮ
ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠲᠡᠢᠨ ᠳ᠋ᠦ᠍ ᠦᠳᠡᠭᠰᠡᠨ
ᠡᠬᠡᠨᠡᠷ ᠪᠠᠢᠬᠤ ᠶ᠋ᠢᠨ ᠤᠴᠢᠷ ᠢ᠋ ᠬᠡᠯᠡᠬᠦ ᠤᠤ
ᠡᠩᠭᠡᠷ ᠬᠤᠮᠢᠭᠰᠠᠨ ᠵᠠᠯᠠᠭᠤ ᠴᠠᠭ ᠤ᠋ᠨ
ᠡᠬᠢᠨ ᠦ᠌ ᠰᠥᠨᠢ ᠶ᠋ᠢᠨ ᠤᠷᠲᠤ ᠶ᠋ᠢ ᠬᠡᠯᠡᠬᠦ ᠤᠤ
ᠣᠷᠣᠭᠠ ᠮᠣᠷᠢ ᠰᠢᠭ᠋ ᠬᠤᠯᠵᠢᠭᠰᠠᠨ ᠨᠣᠢᠷᠤᠨ ᠳ᠋ᠤ᠌
ᠣᠷᠴᠢᠯᠠᠩ ᠬᠣᠯᠠ ᠶ᠋ᠢ ᠬᠤᠭᠤᠴᠠᠨ ᠪᠣᠳᠣᠭᠰᠠᠭᠠᠷ
ᠥᠳᠥᠯᠡᠵᠦ ᠭᠦᠢᠴᠡᠭᠡ ᠦᠭᠡᠢ ᠴᠤᠷᠮᠠ ᠤᠬᠠᠭᠠᠨ ᠤ᠋
ᠥᠴᠦᠬᠡᠨ ᠵᠢᠭᠦᠷ ᠴᠤᠴᠠᠵᠤ ᠪᠢᠯᠡ
ᠴᠡᠷᠢᠭ ᠡᠷᠡᠰ ᠦ᠋ᠨ ᠤᠯᠠᠭᠠᠨ ᠲᠣᠭᠣᠰᠣ
ᠴᠡᠴᠡᠭ ᠦ᠋ᠨ ᠳᠤᠮᠳᠠᠭᠤᠷ ᠲᠠᠲᠠᠭᠠᠳ ᠶᠠᠪᠤᠭᠰᠠᠨ ᠶᠤᠮ
ᠴᠡᠭᠡᠵᠢᠨ ᠳᠣᠲᠣᠷᠠ ᠬᠠᠭᠠᠴᠠᠯ ᠣᠷᠬᠢᠭᠠᠳ
ᠴᠡᠩᠬᠡᠷ ᠠᠭᠤᠯᠠᠰ ᠢ᠋ ᠳᠠᠪᠠᠭᠠᠳ ᠶᠠᠪᠤᠭᠰᠠᠨ ᠶᠤᠮ
ᠣᠯᠠᠨ ᠡᠷᠡᠴᠦᠦᠯ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠭᠠᠳ
ᠣᠩᠭᠣᠨ ᠲᠠᠯᠠ ᠪᠠᠷ ᠳᠠᠪᠬᠢᠭᠠᠳ ᠶᠠᠪᠤᠭᠰᠠᠨ ᠶᠤᠮ
ᠣᠷᠣᠨ ᠭᠡᠷ ᠲᠡᠭᠡᠨ ᠵᠠᠢ ᠪᠠᠨ ᠣᠷᠬᠢᠭᠠᠳ
ᠣᠳᠣ ᠲᠠᠢ ᠠᠳᠠᠯᠢᠬᠠᠨ ᠬᠠᠷᠪᠤᠭᠠᠳ ᠶᠠᠪᠤᠭᠰᠠᠨ ᠶᠤᠮ
ᠤᠶᠠᠩᠭᠠ ᠶ᠋ᠢᠨ ᠥᠷᠨᠢᠯ
ᠴᠡᠪᠡᠷᠬᠡᠨ ᠬᠡᠦᠬᠡᠨ ᠨᠦ᠍ᠭᠦᠳ ᠦᠷᠡ ᠪᠡᠨ ᠳᠡᠪᠡᠷᠡᠭᠡᠳ
ᠴᠡᠴᠡᠭ ᠦ᠋ᠨ ᠳᠤᠮᠳᠠᠭᠤᠷ ᠨᠥᠬᠥᠷ ᠢ᠋ᠶ᠋ᠡᠨ ᠦᠳᠡᠭᠰᠡᠨ ᠶᠤᠮ
ᠴᠡᠷᠢᠭ ᠦ᠋ᠨ ᠬᠦᠦ ᠳ᠋ᠦ᠍ ᠬᠠᠢᠷᠠ ᠪᠠᠨ ᠥᠭᠭᠦᠭᠡᠳ
ᠴᠡᠩᠬᠡᠷ ᠠᠭᠤᠯᠠᠰ ᠢ᠋ᠶ᠋ᠠᠨ ᠲᠦᠰᠢᠭᠡᠳ ᠦᠯᠡᠳᠡᠭᠰᠡᠨ ᠶᠤᠮ
ᠣᠯᠠᠨ ᠡᠬᠡᠨᠡᠷ ᠵᠢᠷᠦᠬᠡ ᠪᠡᠨ ᠳᠠᠷᠤᠭᠠᠳ
ᠣᠩᠭᠣᠨ ᠲᠠᠯᠠ ᠪᠠᠷ ᠬᠠᠨᠢ ᠪᠠᠨ ᠦᠳᠡᠭᠰᠡᠨ ᠶᠤᠮ
ᠣᠷᠣᠨ ᠭᠡᠷ ᠢ᠋ᠶ᠋ᠡᠨ ᠥᠭᠡᠳᠡ ᠨᠢ ᠲᠠᠲᠠᠭᠠᠳ
ᠣᠳᠣᠲᠤ ᠲᠡᠭᠷᠢ ᠪᠡᠨ ᠡᠷᠭᠦᠭᠡᠳ ᠦᠯᠡᠳᠡᠭᠰᠡᠨ ᠶᠤᠮ
ᠥᠷᠯᠥᠭᠡ ᠨᠢ ᠬᠠᠷᠢᠨ ᠦᠷ ᠴᠥᠷ ᠢ᠋ᠶ᠋ᠡᠷ
ᠡᠷᠦᠬᠡ ᠪᠡᠨ ᠪᠢ ᠴᠠᠯᠠᠢᠲᠠᠯᠠ ᠲᠠᠲᠠᠭᠠᠳ
ᠥᠭᠡᠳᠡᠯᠡᠵᠦ ᠶᠠᠪᠤᠭᠠ ᠠᠢᠯ ᠪᠠᠢᠭ ᠭᠡᠵᠦ
ᠥᠷᠳᠡᠨ ᠥᠷᠳᠡᠨ ᠭᠠᠯ ᠢ᠋ᠶ᠋ᠠᠨ ᠳᠥᠯᠥᠯᠡ
ᠬᠠᠳᠠᠮ ᠠᠪᠤ ᠬᠢᠷᠠᠭᠠᠨ ᠢ᠋ᠶ᠋ᠠᠷ ᠢᠷᠡᠭᠡᠳ
ᠬᠠᠷᠠ ᠴᠢᠭᠢᠭ ᠲᠦ᠍ ᠡᠮᠡᠭᠡᠯ ᠲᠡᠢ ᠨᠢ ᠤᠶᠠᠭᠰᠠᠨ
ᠤᠨᠠᠭᠠ ᠬᠥᠲᠥᠯᠦᠭᠡ ᠬᠣᠶᠠᠷ ᠮᠣᠷᠢ
ᠤᠶᠠᠭᠠᠨ ᠳᠡᠭᠡᠷᠡ ᠴᠢᠬᠡᠷᠡᠨ ᠪᠠᠢᠯᠠ
ᠮᠢᠨᠦ ᠨᠥᠬᠥᠷ ᠦ᠋ᠨ ᠨᠠᠭᠠᠳᠤᠮ ᠳ᠋ᠤ᠌ ᠤᠨᠤᠳᠠᠭ
ᠮᠡᠴᠢᠳ ᠰᠠᠷᠠ ᠲᠠᠢ ᠬᠣᠩᠭᠣᠷ ᠮᠣᠷᠢ
ᠨᠠᠮᠠᠶ᠋ᠢ ᠬᠠᠷᠠᠭᠠᠳ ᠦᠦᠷᠰᠡᠮᠡ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ
ᠨᠠᠢ᠍ᠮᠠᠨ ᠭᠠᠨᠵᠤᠭᠠ ᠴᠠᠴᠤᠯᠠᠨ ᠰᠢᠯᠭᠡᠪᠡ
ᠡᠨᠡ ᠪᠢᠳᠡ ᠬᠣᠶᠠᠷ ᠯᠠ ᠠᠳᠠᠯᠢᠬᠠᠨ
ᠡᠵᠡᠨ ᠢ᠋ᠶ᠋ᠡᠨ ᠦᠭᠡᠢᠯᠡᠵᠡᠢ ᠭᠡᠵᠦ ᠪᠣᠳᠣᠭᠠᠳ
ᠡᠮᠡᠭᠡᠯ ᠢ᠋ ᠨᠢ ᠠᠪᠴᠤ ᠨᠢᠷᠤᠭᠤ ᠶ᠋ᠢ ᠨᠢ ᠠᠮᠠᠷᠠᠭᠠᠨ
ᠡᠷᠳᠡᠨᠢ ᠶ᠋ᠢᠨ ᠰᠠᠢᠬᠠᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠢᠯᠠᠪᠠ
ᠰᠠᠢᠨ ᠮᠣᠷᠢ ᠡᠵᠡᠨ ᠢ᠋ᠶ᠋ᠡᠨ ᠭᠡᠳᠡᠭ ᠶᠤᠮ
ᠰᠠᠨᠠᠭᠠ ᠳᠠᠭᠠᠭᠠᠳ ᠴᠤ᠌ ᠲᠡᠷᠡ ᠪᠢᠯᠢᠤ
ᠰᠠᠵᠢᠬᠤ ᠶ᠋ᠢᠨ ᠲᠡᠳᠦᠢ ᠨᠡᠬᠡᠨ ᠬᠠᠷᠠᠪᠠᠯ
ᠰᠠᠢᠬᠠᠨ ᠨᠢᠳᠦ ᠨᠢ ᠨᠢᠯᠪᠤᠰᠤ ᠲᠠᠢ ᠪᠠᠢᠯᠠ
ᠲᠡᠰᠬᠡᠯ ᠠᠯᠳᠠᠭᠰᠠᠨ ᠰᠡᠳᠬᠢᠯ ᠭᠡᠳᠡᠭ
ᠲᠡᠭᠡᠲᠡᠯᠡ ᠪᠡᠨ ᠠᠮᠠᠷᠬᠠᠨ ᠠᠭᠤᠯᠵᠠᠬᠤ ᠶᠤᠮ ᠰᠢᠭ᠋
ᠲᠩᠷᠢ ᠥᠩᠭᠡ ᠲᠡᠢ ᠴᠡᠩᠬᠡᠷ ᠳᠠᠯᠢᠩᠪᠤᠤ ᠪᠠᠷ
ᠲᠡᠷᠡ ᠡᠳᠦᠷ ᠲᠡᠭᠡᠨ ᠲᠡᠷᠯᠢᠭ ᠡᠰᠬᠡᠯᠡ
ᠡᠷᠡᠳᠡᠭᠦᠦ ᠥᠷᠭᠡᠨ ᠴᠡᠭᠡᠵᠢ ᠶ᠋ᠢ ᠨᠢ ᠪᠣᠳᠣᠵᠤ
ᠡᠩᠭᠡᠷ ᠶᠠᠭᠤ ᠶ᠋ᠢ ᠨᠢ ᠴᠡᠭᠡᠯᠬᠡᠨ ᠲᠠᠯᠪᠢᠯᠠ
ᠡᠷᠭᠢᠴᠡᠭᠡ ᠮᠣᠷᠢᠨ ᠤ᠋ ᠡᠷᠭᠢᠭᠡ ᠪᠣᠳᠣᠵᠤ
ᠡᠯᠪᠡᠭ ᠰᠠᠢᠬᠠᠨ ᠲᠠᠰᠢᠶᠠ ᠲᠠᠯᠪᠢᠯᠠ
ᠤᠷᠭᠠ ᠶ᠋ᠢᠨ ᠤᠷᠲᠤ ᠶ᠋ᠢ ᠪᠠᠷᠢᠨᠠ ᠭᠡᠮᠡᠨ
ᠠᠭᠤᠵᠢᠮ ᠰᠠᠢᠬᠠᠨ ᠰᠤᠭᠤ ᠲᠠᠯᠪᠢᠯᠠ
ᠠᠭᠤᠯᠠ ᠶ᠋ᠢᠨ ᠵᠢᠪᠠᠷ ᠤᠨᠠᠨᠠ ᠭᠡᠮᠡᠨ
ᠤᠨᠠᠭᠠᠨ ᠲᠤᠭᠤᠷᠠᠢ ᠨᠢᠳᠤᠷᠭᠠ ᠲᠠᠯᠪᠢᠯᠠ
ᠤᠯᠠᠭᠠᠨ ᠪᠤᠲᠠᠷᠠᠭᠰᠠᠨ ᠴᠢᠷᠠᠢ ᠶ᠋ᠢ ᠨᠢ ᠪᠣᠳᠣᠵᠤ
ᠬᠤᠸᠠ ᠲᠣᠷᠭᠠ ᠪᠠᠷ ᠡᠮᠵᠢᠭᠡ ᠪᠢᠯᠡ .. ..
ᠤᠳᠠᠭᠠᠨ ᠡᠮᠦᠰᠬᠦ ᠡᠳ᠋ᠯᠡᠭᠡ ᠶ᠋ᠢ ᠪᠣᠳᠣᠵᠤ
ᠤᠷᠠ ᠪᠠᠨ ᠭᠠᠷᠭᠠᠨ ᠱᠠᠭᠯᠠᠭᠠ ᠪᠢᠯᠡ
ᠤᠨᠲᠠᠬᠤ ᠨᠣᠢᠷ ᠢ᠋ᠶ᠋ᠠᠨ ᠬᠠᠭᠠᠰᠯᠠᠨ ᠪᠠᠢᠵᠤ
ᠤᠴᠢᠭ ᠰᠢᠩᠭᠡᠭᠰᠡᠨ ᠰᠠᠭᠤᠭᠠ ᠪᠢᠯᠡ
ᠤᠨᠠᠭᠠᠨ ᠥᠨᠳᠡᠭᠡ ᠪᠡᠨ ᠬᠠᠯᠠᠭᠠᠨ ᠪᠠᠢᠵᠤ
ᠤᠶᠠᠷᠠᠨ ᠪᠡᠶᠡᠰᠦᠨ ᠰᠠᠭᠤᠭᠠ ᠪᠢᠯᠡ
ᠲᠣᠷᠭᠠᠨ ᠤ᠋ ᠦᠢᠯᠡ ᠪᠢᠰᠢ ᠴᠦ᠍ ᠭᠡᠯᠡ
ᠲᠣᠭᠣᠰᠣ ᠲᠠᠢ ᠭᠠᠵᠠᠷ ᠲᠠᠯᠪᠢᠭᠠ ᠦᠭᠡᠢ ᠪᠢᠯᠡ
ᠲᠣᠢ ᠬᠤᠷᠢᠮ ᠤ᠋ᠨ ᠬᠢ ᠪᠤᠰᠤ ᠴᠤ᠌ ᠭᠡᠯᠡ
ᠲᠣᠰᠣ ᠲᠠᠢ ᠭᠠᠷ ᠢ᠋ᠶ᠋ᠠᠷ ᠪᠠᠷᠢᠭᠠ ᠦᠭᠡᠢ ᠪᠢᠯᠡ
ᠡᠷᠭᠢᠭᠡᠳ ᠢᠷᠡᠬᠦ ᠡᠳᠦᠷ ᠢ᠋ ᠬᠦᠯᠢᠶᠡᠵᠦ
ᠡᠪᠬᠡᠨ ᠡᠪᠬᠡᠨ ᠲᠠᠯᠪᠢᠭᠠ ᠪᠢᠯᠡ
ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠰᠠᠨᠠᠬᠤ ᠴᠠᠭ ᠲᠤ᠌ ᠪᠠᠨ
ᠡᠷᠭᠢᠨ ᠡᠷᠭᠢᠨ ᠦᠵᠡᠭᠡ ᠪᠢᠯᠡ
-ᠴᠡᠪᠡᠷᠬᠡᠨ ᠬᠡᠦᠬᠡᠨ ᠨᠦ᠍ᠭᠦᠳ ᠦᠷᠡ ᠪᠡᠨ ᠲᠡᠪᠡᠷᠢᠭᠡᠳ
ᠴᠡᠴᠡᠭ ᠦ᠋ᠨ ᠳᠤᠮᠳᠠᠭᠤᠷ ᠨᠥᠬᠥᠷ ᠢ᠋ᠶ᠋ᠡᠨ ᠦᠳᠡᠭᠰᠡᠨ ᠶᠤᠮ
ᠴᠡᠷᠢᠭ ᠦ᠋ᠨ ᠬᠦᠦ ᠳ᠋ᠦ᠍ ᠬᠠᠢᠷᠠ ᠪᠠᠨ ᠥᠭᠭᠦᠭᠡᠳ
ᠴᠡᠩᠬᠡᠷ ᠠᠭᠤᠯᠠᠰ ᠢ᠋ᠶ᠋ᠠᠨ ᠲᠦᠰᠢᠭᠡᠳ ᠦᠯᠡᠳᠡᠭᠰᠡᠨ ᠶᠤᠮ
ᠣᠯᠠᠨ ᠡᠬᠡᠨᠡᠷ ᠵᠢᠷᠦᠬᠡ ᠪᠡᠨ ᠳᠠᠷᠤᠭᠠᠳ
ᠣᠩᠭᠣᠨ ᠲᠠᠯᠠ ᠪᠠᠷ ᠬᠠᠨᠢ ᠪᠠᠨ ᠦᠳᠡᠭᠰᠡᠨ ᠶᠤᠮ
ᠣᠷᠣᠨ ᠭᠡᠷ ᠢ᠋ᠶ᠋ᠡᠨ ᠥᠭᠡᠳᠡ ᠨᠢ ᠲᠠᠲᠠᠭᠠᠳ
ᠣᠳᠣᠲᠤ ᠲᠡᠭᠷᠢ ᠪᠡᠨ ᠡᠷᠭᠦᠭᠡᠳ ᠦᠯᠡᠳᠡᠭᠰᠡᠨ ᠶᠤᠮ
ᠤᠶᠠᠩᠭᠠ ᠶ᠋ᠢᠨ ᠪᠤᠴᠠᠯᠲᠠ
ᠭᠠᠯ ᠤ᠋ᠨ ᠱᠤᠭᠤᠮᠠᠨ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠵᠢᠷᠦᠬᠡ
ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠢᠬᠤ ᠶᠣᠰᠣᠨ ᠪᠠᠢᠬᠤ ᠦᠭᠡᠢ
ᠲᠡᠢᠨ ᠦ᠌ ᠲᠠᠯᠠᠪᠤᠷ ᠲᠤ᠌ ᠭᠡᠷᠭᠡᠢ ᠶ᠋ᠢᠨ ᠵᠢᠷᠦᠬᠡ
ᠳᠠᠢᠴᠢᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠴᠡᠭᠡᠵᠢᠨ ᠳ᠋ᠦ᠍ ᠶᠠᠪᠤᠳᠠᠭ ᠶᠤᠮ
ᠡᠷᠡ ᠴᠡᠷᠢᠭ ᠦ᠋ᠨ ᠡᠬᠡᠨᠡᠷ ᠭᠡᠳᠡᠭ
ᠡᠮᠡᠭᠲᠡᠢ ᠶ᠋ᠢᠨ ᠲᠡᠳᠦᠢ ᠨᠡᠷᠡ ᠶ᠋ᠢ ᠬᠡᠯᠡᠳᠡᠭ ᠦᠭᠡᠢ
ᠬᠣᠣᠷᠲᠠᠨ ᠳᠠᠢᠰᠤᠨ ᠤ᠋ ᠰᠤᠮᠤ ᠤᠨᠤᠳᠠᠭ ᠦᠭᠡᠢ
ᠬᠣᠶᠠᠷ ᠠᠮᠢᠨ ᠤ᠋ ᠨᠢᠭᠡ ᠶ᠋ᠢ ᠬᠡᠯᠡᠳᠡᠭ ᠶᠤᠮ
ᠡᠭᠡᠯ ᠴᠡᠷᠢᠭ ᠦ᠋ᠨ ᠠᠷᠤ ᠭᠡᠷ ᠦ᠋ᠨ
ᠡᠬᠡ ᠣᠷᠣᠨ ᠬᠠᠷᠠᠵᠤ ᠪᠠᠢᠳᠠᠭ ᠶᠤᠮ
ᠬᠡᠷᠪᠡ ᠵᠥᠷᠢᠴᠡᠪᠡᠯ ᠤᠷᠪᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠬᠤ
ᠬᠡᠪᠯᠡᠭᠡ ᠦᠭᠡᠢ ᠬᠠᠤᠯᠢ ᠪᠠᠰᠠ ᠪᠠᠢᠳᠠᠭ ᠶᠤᠮ
ᠡᠭᠦᠨ ᠢ᠋ ᠪᠢ ᠬᠦᠨᠳᠦᠯᠡᠨ ᠰᠠᠬᠢᠵᠤ
ᠦᠦᠷ ᠰᠥᠨᠢ ᠪᠡᠷ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠶᠤᠮ
ᠦᠶᠡ ᠶ᠋ᠢᠨ ᠣᠯᠠᠨ ᠬᠡᠦᠬᠡᠨ ᠨᠦ᠍ᠭᠦᠳ ᠴᠥᠮ
ᠦᠨᠡᠨᠴᠢ ᠬᠡᠪ ᠢ᠋ᠶ᠋ᠡᠷ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠶᠤᠮ
ᠬᠠᠪᠤᠷ ᠤ᠋ᠨ ᠨᠠᠭᠤᠷ ᠰᠢᠭ᠋ ᠠᠯᠳᠠᠷᠠᠬᠤ ᠨᠠᠰᠤ ᠪᠠᠨ
ᠬᠠᠢᠯᠭᠠᠨ ᠬᠠᠢᠯᠭᠠᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠶᠤᠮ
ᠬᠠᠩᠭᠠᠢ ᠶ᠋ᠢᠨ ᠰᠤᠭᠤ ᠰᠢᠭ᠋ ᠠᠷᠢᠭᠤᠨ ᠪᠡᠶᠡ ᠪᠡᠨ
ᠬᠠᠳᠠᠭᠠᠯᠠᠨ ᠬᠠᠳᠠᠭᠠᠯᠠᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠶᠤᠮ
ᠨᠠᠮᠤᠷ ᠤ᠋ᠨ ᠬᠣᠩᠭᠣᠷ ᠰᠠᠯᠬᠢᠨ ᠳᠤᠮᠳᠠ
ᠨᠠᠢᠭᠤᠨ ᠨᠠᠢᠭᠤᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠶᠤᠮ
ᠨᠠᠮᠢᠷᠠᠭᠠ ᠬᠤᠷᠠ ᠶ᠋ᠢ ᠰᠠᠨᠠᠨ ᠭᠠᠩᠰᠠᠷᠠᠬᠤ
ᠨᠠᠪᠴᠢ ᠰᠢᠭ ᠭᠠᠩᠳᠠᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠶᠤᠮ
ᠲᠡᠭᠡᠪᠡᠴᠦ ᠪᠢᠳᠡ ᠹᠷᠣᠨᠲ ᠤ᠋ᠨ ᠠᠷᠤ ᠲᠠᠯᠠ ᠠ᠋ᠴᠠ
ᠲᠡᠮᠡᠴᠡᠯ ᠦ᠋ᠨ ᠲᠡᠩᠬᠡᠯ ᠢ᠋ ᠲᠦᠰᠢᠵᠦ ᠥᠭᠭᠦᠭᠰᠡᠨ ᠶᠤᠮ
ᠠᠮᠢᠳᠤᠷᠠᠯ ᠤ᠋ᠨ ᠶᠡᠬᠡ ᠬᠤᠪᠢ ᠵᠠᠶᠠᠭᠠ ᠶ᠋ᠢ
ᠠᠢᠯ ᠪᠦᠬᠦᠨ ᠳ᠋ᠦ᠍ ᠠᠪᠴᠤ ᠶᠠᠪᠤᠭᠰᠠᠨ ᠶᠤᠮ
ᠬᠠᠯᠬᠠ ᠭᠣᠣᠯ ᠤ᠋ᠨ ᠤᠰᠤ ᠲᠡᠭᠡᠬᠦ ᠳ᠋ᠦ᠍
ᠬᠠᠮᠤᠭ ᠣᠯᠠᠨ ᠤ᠋ ᠵᠢᠷᠦᠬᠡᠨ ᠳ᠋ᠦ᠍ ᠤᠷᠤᠰᠴᠤ
ᠬᠠᠷᠢ ᠶ᠋ᠢᠨ ᠳᠠᠢᠰᠤᠨ ᠳ᠋ᠤ᠌ ᠡᠷᠭᠦᠨ ᠳᠠᠯᠠᠢᠵᠤ
ᠬᠠᠳᠠ ᠠᠭᠠᠭᠰᠠᠨ ᠢᠯᠳᠦ ᠪᠣᠯᠤᠭᠰᠠᠨ ᠶᠤᠮ
ᠵᠢᠷᠦᠬᠡᠨ ᠳ᠋ᠦ᠍ ᠤᠷᠤᠰᠤᠭᠰᠠᠨ ᠲᠡᠷᠡ ᠭᠣᠣᠯ ᠤ᠋ᠨ
ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠡᠷᠭᠢ
ᠦᠨᠡᠨ ᠬᠤᠳᠠᠯ ᠤ᠋ᠨ ᠵᠠᠪᠰᠠᠷ ᠲᠠᠲᠠᠭᠰᠠᠨ
ᠦᠷ ᠦ᠋ᠨ ᠲᠤᠶᠠᠭᠠ ᠰᠢᠭ᠋ ᠵᠠᠭᠠᠭ ᠪᠠᠢᠭᠰᠠᠨ ᠶᠤᠮ
ᠴᠡᠭᠡᠵᠢᠨ ᠳᠣᠲᠣᠷᠠ ᠪᠥᠮᠪᠥᠭᠡ ᠨᠢᠵᠢᠭᠢᠨᠡᠵᠦ
ᠴᠡᠷᠢᠭ ᠡᠷᠡᠰ ᠦ᠋ᠨ ᠠᠯᠬᠤᠭᠠ ᠨᠢᠵᠢᠭᠢᠨᠡᠵᠦ
ᠬᠥᠮᠦᠨ ᠦ᠌ ᠲᠦᠰᠢᠭᠦᠷᠢᠲᠦ ᠰᠡᠳᠬᠢᠯ ᠳᠣᠲᠣᠷᠠ
ᠬᠦᠨᠳᠦ ᠲᠠᠩᠺ ᠤ᠋ᠨ ᠮᠥᠷ ᠭᠠᠷᠤᠭᠰᠠᠨ ᠶᠤᠮ
ᠠᠯᠢ ᠨᠢ ᠪᠣᠢ ᠭᠡᠳᠡᠭ ᠲᠦ᠍ ᠡᠷᠡᠭᠡᠯᠵᠡᠭᠡ ᠦᠭᠡᠢ ᠴᠦ᠍
ᠠᠳᠬᠠᠭ ᠰᠡᠳᠬᠢᠯ ᠨᠠᠮᠠᠶ᠋ᠢ ᠡᠭᠡᠳᠡᠷᠡᠭᠡᠵᠦ
ᠠᠮᠢ ᠡᠷᠢᠭᠰᠡᠨ ᠰᠤᠮᠤᠨ ᠳᠤᠮᠳᠠᠬᠢ
ᠠᠮᠠᠷᠠᠭ ᠨᠥᠬᠥᠷ ᠲᠡᠭᠡᠨ ᠵᠣᠪᠠᠵᠤ ᠶᠠᠪᠤᠭᠰᠠᠨ ᠶᠤᠮ
-ᠭᠠᠯ ᠤ᠋ᠨ ᠱᠤᠭᠤᠮᠠᠨ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠵᠢᠷᠦᠬᠡ
ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠢᠬᠤ ᠶᠣᠰᠣᠨ ᠪᠠᠢᠬᠤ ᠦᠭᠡᠢ
ᠲᠡᠢᠨ ᠦ᠌ ᠲᠠᠯᠠᠪᠤᠷ ᠲᠤ᠌ ᠭᠡᠷᠭᠡᠢ ᠶ᠋ᠢᠨ ᠵᠢᠷᠦᠬᠡ
ᠳᠠᠢᠴᠢᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠴᠡᠭᠡᠵᠢᠨ ᠳ᠋ᠦ᠍ ᠶᠠᠪᠤᠳᠠᠭ ᠶᠤᠮ
ᠡᠷᠡ ᠴᠡᠷᠢᠭ ᠦ᠋ᠨ ᠡᠬᠡᠨᠡᠷ ᠭᠡᠳᠡᠭ
ᠡᠮᠡᠭᠲᠡᠢ ᠶ᠋ᠢᠨ ᠲᠡᠳᠦᠢ ᠨᠡᠷᠡ ᠶ᠋ᠢ ᠬᠡᠯᠡᠳᠡᠭ ᠦᠭᠡᠢ
ᠬᠣᠣᠷᠲᠠᠨ ᠳᠠᠢᠰᠤᠨ ᠤ᠋ ᠰᠤᠮᠤ ᠤᠨᠤᠳᠠᠭ ᠦᠭᠡᠢ
ᠬᠣᠶᠠᠷ ᠠᠮᠢᠨ ᠤ᠋ ᠨᠢᠭᠡ ᠶ᠋ᠢ ᠬᠡᠯᠡᠳᠡᠭ ᠶᠤᠮ
ᠤᠶᠠᠩᠭᠠ ᠶ᠋ᠢᠨ ᠲᠠᠢᠯᠤᠯ
ᠴᠡᠷᠢᠭ ᠡᠷᠡᠰ ᠦ᠋ᠨ ᠤᠯᠠᠭᠠᠨ ᠲᠣᠭᠣᠰᠣ
ᠴᠡᠴᠡᠭ ᠦ᠋ᠨ ᠳᠤᠮᠳᠠᠭᠤᠷ ᠲᠠᠲᠠᠭᠠᠳ ᠢᠷᠡᠯᠡ
ᠴᠡᠭᠡᠵᠢᠨ ᠳᠣᠲᠣᠷᠠ ᠤᠴᠠᠷᠠᠯ ᠵᠠᠷᠯᠠᠭᠠᠳ
ᠴᠡᠩᠬᠡᠷ ᠠᠭᠤᠯᠠ ᠶ᠋ᠢ ᠳᠠᠪᠠᠭᠠᠳ ᠢᠷᠡᠯᠡ
ᠣᠯᠠᠨ ᠡᠷᠡᠴᠦᠳ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠭᠠᠳ
ᠣᠩᠭᠣᠨ ᠲᠠᠯᠠ ᠪᠠᠷ ᠳᠠᠪᠬᠢᠭᠠᠳ ᠢᠷᠡᠯᠡ
ᠣᠷᠣᠨ ᠭᠡᠷ ᠲᠡᠭᠡᠨ ᠵᠠᠢ ᠪᠠᠨ ᠡᠵᠡᠯᠡᠭᠡᠳ
ᠣᠳᠣ ᠲᠠᠢ ᠠᠳᠠᠯᠢᠬᠠᠨ ᠬᠠᠷᠪᠤᠭᠠᠳ ᠢᠷᠡᠯᠡ
ᠬᠠᠯᠠᠭᠳᠠᠵᠤ ᠢᠷᠡᠬᠦ ᠴᠡᠷᠢᠭ ᠦ᠋ᠨ ᠰᠤᠷᠠᠭ ᠢ᠋ᠶ᠋ᠠᠷ
ᠬᠠᠳᠠᠮ ᠠᠪᠤ ᠰᠤᠮᠤ ᠶ᠋ᠢᠨ ᠲᠥᠪ ᠤᠷᠤᠭᠤ
ᠤᠨᠤᠭᠠ ᠬᠥᠲᠥᠯᠦᠭᠡ ᠬᠣᠶᠠᠷ ᠮᠣᠷᠢ ᠲᠠᠢ
ᠤᠯᠤᠰ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠳᠠᠪᠬᠢᠭᠠᠳ ᠶᠠᠪᠤᠴᠢᠬᠠᠯᠠ
ᠬᠥᠭᠡᠷᠦᠨ ᠰᠡᠩᠰᠡᠷᠡᠬᠦ ᠰᠡᠳᠬᠢᠯ ᠭᠡᠳᠡᠭ
ᠬᠥᠯ ᠭᠠᠵᠠᠷ ᠬᠦᠷᠬᠦ ᠦᠭᠡᠢ ᠳᠡᠷᠪᠡᠵᠦ
ᠬᠥᠪ ᠴᠢᠭᠢᠭ ᠢ᠋ ᠨᠢ ᠡᠭᠰᠢᠭᠡᠨ ᠲᠠᠯᠪᠢᠬᠤ ᠪᠠᠷ
ᠬᠥᠬᠡ ᠳᠠᠯᠢᠩᠪᠤᠨ ᠲᠡᠷᠯᠢᠭ ᠢ᠋ᠶ᠋ᠡᠨ ᠭᠠᠷᠭᠠᠯᠠ
ᠤᠷᠲᠤ ᠬᠣᠷᠮᠣᠢ ᠳ᠋ᠤᠨᠢ ᠤᠨᠠᠭᠠ ᠳᠠᠭᠠ ᠭᠡᠵᠦ
ᠤᠷᠢᠳᠠ ᠡᠴᠡ ᠳᠤᠭᠲᠤᠷᠴᠤ ᠣᠶᠣᠭᠠᠰᠤ ᠶ᠋ᠢ ᠨᠢ ᠲᠠᠯᠪᠢᠯᠠ
ᠬᠣᠢᠲᠤ ᠬᠣᠷᠮᠣᠢ ᠳ᠋ᠤᠨᠢ ᠬᠣᠨᠢ ᠬᠤᠷᠠᠭᠠ ᠭᠡᠵᠦ
ᠬᠣᠢᠨᠠ ᠡᠴᠡ ᠨᠢ ᠳᠤᠭᠲᠤᠷᠴᠤ ᠬᠠᠪᠠᠭᠠᠰᠤ ᠶ᠋ᠢ ᠨᠢ ᠲᠠᠯᠪᠢᠯᠠ
ᠳᠣᠲᠣᠭᠠᠳᠤ ᠬᠣᠷᠮᠣᠢ ᠳ᠋ᠤᠨᠢ ᠲᠣᠰᠣ ᠥᠭᠡᠬᠦ ᠭᠡᠵᠦ
ᠳᠣᠣᠷᠠ ᠡᠴᠡ ᠨᠢ ᠳᠤᠭᠲᠤᠷᠴᠢ ᠰᠢᠳᠡᠭᠡᠰᠦ ᠶ᠋ᠢ ᠨᠢ ᠠᠪᠤᠯᠠ
ᠡᠵᠡᠭᠦᠢ ᠪᠠᠢᠬᠤ ᠳ᠋ᠤᠨᠢ ᠬᠢᠭᠰᠡᠨ ᠶᠤᠮ ᠭᠡᠵᠦ
ᠡᠴᠦᠰ ᠦ᠋ᠨ ᠤᠴᠢᠭ ᠢ᠋ᠶ᠋ᠠᠨ ᠬᠠᠳᠬᠤᠵᠤ ᠠᠪᠤᠯᠠ
ᠰᠠᠯᠠᠭᠠ ᠭᠡᠵᠢᠭᠡ ᠪᠡᠨ ᠲᠠᠩᠨᠠᠨ ᠰᠦᠯᠵᠢᠵᠦ
ᠰᠠᠷᠠ ᠰᠤᠪᠤᠳ ᠤ᠋ᠨ ᠳᠠᠷᠤᠭᠤᠯᠭᠠ ᠪᠠᠨ ᠵᠡᠭᠦᠯᠡ
ᠴᠠᠢ ᠶ᠋ᠢᠨ ᠳᠡᠪᠡᠯ ᠢ᠋ᠶ᠋ᠡᠨ ᠨᠥᠮᠥᠭᠡᠨ ᠡᠮᠦᠰᠴᠦ
ᠴᠢᠷᠠᠢ ᠵᠢᠰᠦ ᠪᠡᠨ ᠲᠣᠯᠢᠳᠠᠨ ᠵᠠᠰᠠᠯᠠ
ᠦᠳᠡᠰᠢ ᠡᠷᠲᠡᠬᠡᠨ ᠬᠠᠵᠠᠭᠤᠯᠠᠭ ᠭᠡᠵᠦ
ᠦᠨᠢᠶᠡ ᠮᠠᠯ ᠢ᠋ᠶ᠋ᠠᠨ ᠡᠷᠲᠡᠬᠡᠨ ᠰᠠᠭᠠᠭᠠᠯᠠ
ᠬᠣᠩᠭᠣᠷ ᠬᠦᠦ ᠶ᠋ᠢ ᠨᠢ ᠴᠡᠪᠡᠷᠬᠡᠨ ᠬᠤᠪᠴᠠᠰᠤᠯᠠᠵᠤ
ᠬᠣᠶᠠᠷᠬᠠᠨ ᠤᠰᠤ ᠪᠠᠷ ᠲᠣᠭᠣᠭᠠ ᠠᠪᠤᠯᠠ
ᠲᠡᠭᠡᠲᠡᠯᠡ ... ᠨᠠᠷᠠ ᠰᠢᠩᠭᠡᠭᠰᠡᠨ ᠬᠣᠢᠨᠠ
ᠲᠡᠷᠲᠡᠭᠡ ᠡᠴᠡ ᠬᠠᠳᠠᠮ ᠠᠪᠤ ᠭᠠᠭᠴᠠᠭᠠᠷ
ᠡᠮᠡᠭᠡᠯ ᠲᠡᠢ ᠮᠣᠷᠢ ᠬᠥᠲᠥᠯᠦᠭᠰᠡᠨ ᠴᠢᠭ ᠢ᠋ᠶ᠋ᠡᠷ
ᠡᠷᠭᠢᠵᠦ ᠢᠷᠡᠭᠡᠳ ᠤᠶᠠᠭᠠᠨ ᠳᠡᠭᠡᠷᠡ ᠪᠠᠭᠤᠯᠠ
ᠭᠡᠷ ᠤᠷᠤᠭᠤ ᠪᠠᠨ ᠨᠢᠭᠡ ᠶᠠᠪᠤᠬᠤ ᠭᠡᠰᠡᠨ ᠢ᠋ᠶ᠋ᠡᠨ
ᠭᠡᠨᠡᠳᠬᠡᠨ ᠵᠣᠭ ᠲᠣᠰᠴᠤ ᠬᠡᠰᠡᠭ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ
ᠬᠣᠩᠭᠣᠷ ᠮᠣᠷᠢᠨ ᠤ᠋ ᠡᠮᠡᠭᠡᠯ ᠢ᠋ ᠠᠪᠴᠤ
ᠬᠣᠶᠠᠷ ᠪᠦᠭᠦᠷᠭᠡᠨ ᠳ᠋ᠦ᠍ ᠬᠠᠵᠠᠭᠠᠷ ᠢ᠋ ᠰᠣᠢᠯᠠ
ᠦᠶᠡ ᠶ᠋ᠢ ᠡᠵᠡᠯᠡᠭᠰᠡᠨ ᠪᠤᠭᠤᠷᠤᠯ ᠬᠠᠢᠯᠠᠰᠤ
ᠦᠨᠳᠦᠰᠦ ᠲᠠᠰᠤᠷᠠᠨ ᠭᠤᠢᠪᠠᠵᠤ ᠪᠠᠢᠬᠤ ᠰᠢᠭ᠋
ᠰᠦᠷᠲᠡᠢ ᠡᠪᠦᠭᠡᠨ ᠡᠮᠡᠭᠡᠯ ᠲᠡᠪᠡᠷᠢᠭᠰᠡᠭᠡᠷ
ᠰᠡᠭᠦᠳᠡᠷ ᠰᠢᠭ ᠨᠠᠭᠠᠰᠢ ᠠᠢᠰᠤᠢ ᠬᠠᠷᠠᠭᠳᠠᠯᠠ
ᠭᠡᠨᠡᠳᠬᠡᠨ ᠮᠢᠨᠦ ᠳᠣᠲᠣᠷᠠ ᠫᠠᠯᠬᠢᠵᠤ
ᠭᠡᠷ ᠲᠡᠭᠡᠨ ᠣᠷᠣᠵᠤ ᠭᠡᠷᠡᠯ ᠪᠠᠷᠢᠯᠠ
ᠠᠶᠤᠭᠰᠠᠨ ᠲᠠᠤᠯᠠᠢ ᠰᠢᠭ᠋ ᠳᠦᠷᠢᠯᠡᠨ ᠭᠠᠢᠬᠠᠵᠤ
ᠠᠪᠤ ᠶ᠋ᠢᠨ ᠥᠭᠡᠳᠡ ᠡᠴᠡ ᠳᠠᠭᠤ ᠦᠭᠡᠢ ᠰᠢᠷᠳᠡᠯᠡ
ᠠᠪᠤ ᠴᠤ᠌ ᠪᠠᠰᠠ ᠲᠠᠭ ᠳᠠᠭᠤ ᠦᠭᠡᠢ
ᠠᠰᠬᠠ ᠴᠢᠷᠠᠢ ᠨᠢ ᠲᠠᠰᠤ ᠬᠠᠷᠠᠩᠭᠤᠢᠯᠠᠵᠤ
ᠲᠥᠭᠡᠷᠢᠭᠰᠡᠨ ᠭᠠᠷ ᠨᠢ ᠡᠮᠡᠭᠡᠯ ᠢ᠋ᠶ᠋ᠡᠨ ᠠᠯᠳᠠᠬᠤᠶᠠ
ᠲᠡᠮᠦᠷ ᠳᠥᠷᠥᠭᠡ ᠨᠢ ᠶᠣᠣᠯᠠᠨ ᠬᠠᠷᠰᠢᠯᠠ
ᠬᠥᠯ ᠳᠣᠣᠷᠠᠬᠢ ᠭᠠᠵᠠᠷ ᠳᠠᠢᠪᠢᠵᠤ
ᠬᠥᠬᠡ ᠨᠣᠭᠣᠭᠠᠨ ᠤᠯᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠵᠦ
ᠬᠥᠮᠦᠨ ᠦ᠌ ᠣᠷᠴᠢᠯᠠᠩ ᠳ᠋ᠤ᠌ ᠪᠠᠷᠢᠴᠠ ᠠᠯᠳᠠᠬᠤ ᠳ᠋ᠠᠭᠠᠨ
ᠬᠦᠦ ᠪᠠᠨ ᠯᠠ ᠪᠢ ᠲᠡᠪᠡᠷᠢᠨ ᠠᠪᠤᠯᠠ
ᠡᠷᠯᠢᠭ ᠲᠡᠢᠨ ᠦ᠌ ᠬᠦᠢᠲᠡᠨ ᠰᠠᠪᠠᠷ
ᠡᠪᠳᠡᠷᠡᠭᠰᠡᠨ ᠰᠡᠳᠬᠢᠯ ᠲᠡᠮᠲᠡᠷᠡᠬᠦ ᠴᠠᠭ ᠲᠤ᠌
ᠶᠠᠮᠠᠷ ᠶᠡᠬᠡ ᠬᠦᠨᠳᠦ ᠦᠨᠡ ᠪᠡᠷ
ᠢᠯᠠᠯᠲᠠ ᠢᠷᠡᠭᠰᠡᠨ ᠢ᠋ ᠪᠢᠳᠡ ᠮᠡᠳᠡᠯᠡ
ᠬᠠᠭᠠᠴᠠᠯ ᠳ᠋ᠤ᠌ ᠦᠶᠡᠷᠯᠡᠬᠦ ᠬᠠᠯᠠᠭᠤᠨ ᠨᠢᠯᠪᠤᠰᠤ
ᠬᠠᠷᠠᠭᠤᠰᠤᠯ ᠲᠠᠢᠯᠵᠤ ᠬᠦᠷᠳᠡᠭ ᠦᠭᠡᠢ ᠪᠢᠯᠡ
ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠢ᠋ᠶ᠋ᠠᠷ
ᠬᠠᠷᠠ ᠲᠡᠢᠨ ᠳᠠᠭᠤᠰᠳᠠᠭ ᠦᠭᠡᠢ ᠪᠢᠯᠡ
ᠤᠶᠠᠩᠭᠠ ᠶ᠋ᠢᠨ ᠦᠷᠭᠦᠯᠵᠢᠯᠡᠯ
ᠬᠠᠯᠬᠠ ᠭᠣᠣᠯ ᠤ᠋ᠨ ᠲᠡᠢᠨ ᠵᠥᠪᠬᠡᠨ
ᠬᠠᠯᠬᠠ ᠭᠣᠣᠯ ᠤ᠋ᠨ ᠲᠡᠢᠨ ᠪᠠᠢᠭᠰᠠᠨ ᠦᠭᠡᠢ
ᠬᠠᠢᠷᠠᠲᠠᠢ ᠪᠦᠬᠦᠨ ᠢ᠋ᠶ᠋ᠡᠨ ᠳᠠᠢᠰᠤᠨ ᠡᠴᠡ ᠥᠮᠥᠭᠡᠷᠡᠭᠰᠡᠨ
ᠬᠠᠮᠤᠭ ᠠᠷᠠᠳ ᠤ᠋ᠨ ᠲᠡᠢᠨ ᠪᠠᠢᠯᠠ
ᠡᠭᠡᠯ ᠮᠢᠨᠦ ᠠᠮᠢᠳᠤᠷᠠᠯ ᠳᠤᠮᠳᠠᠭᠤᠷ
ᠡᠨᠡ ᠲᠡᠢᠨ ᠦ᠌ ᠠᠶᠤᠯ ᠭᠠᠷᠠᠠᠣ ᠳ᠋ᠠᠭᠠᠨ
ᠡᠷᠡ ᠦᠭᠡᠢ ᠡᠮᠡ ᠂ ᠡᠴᠢᠭᠡ ᠦᠭᠡᠢ ᠬᠦᠦ
ᠡᠵᠡᠨ ᠦᠭᠡᠢ ᠳᠡᠪᠡᠯ ᠣᠷᠬᠢᠭᠠᠳ ᠶᠠᠪᠤᠯᠠ
ᠳᠠᠢᠴᠢᠨ ᠨᠥᠬᠥᠷ ᠮᠢᠨᠢ ᠳᠠᠬᠢᠭᠠᠳ ᠢᠷᠡᠯ ᠦᠭᠡᠢ
ᠲᠡᠢᠨ ᠢ᠋ ᠡᠭᠦᠷᠢᠳᠡ ᠠᠪᠤᠭᠠᠳ ᠶᠠᠪᠤᠬᠤ ᠳ᠋ᠠᠭᠠᠨ
ᠥᠪᠡᠷ ᠢ᠋ᠶ᠋ᠡᠨ ᠬᠡᠳᠦᠢ ᠠᠮᠢ ᠪᠠᠨ ᠠᠯᠳᠠᠭᠰᠠᠨ ᠴᠤ᠌
ᠥᠷᠥᠭᠡᠯ ᠪᠤᠰᠤᠳ ᠲᠤ᠌ ᠠᠮᠢᠳᠤᠷᠠᠯ ᠥᠭᠭᠦᠭᠰᠡᠨ ᠶᠤᠮ
ᠠᠭᠤᠯᠠᠰ ᠤᠰᠤ ᠴᠡᠴᠡᠭ ᠨᠠᠪᠴᠢᠨ ᠳ᠋ᠤ᠌
ᠤᠷᠢᠳ ᠨᠢ ᠰᠠᠢᠬᠠᠨ ᠥᠩᠭᠡ ᠪᠦᠷᠢᠳᠴᠦ
ᠤᠯᠠᠮ ᠢ᠋ᠶ᠋ᠠᠷ ᠮᠠᠨᠳᠤᠨ ᠢᠯᠠᠵᠤ ᠭᠠᠷᠤᠭᠰᠠᠨ
ᠤᠯᠤᠰ ᠣᠷᠣᠨ ᠤᠢᠳᠬᠠᠷ ᠲᠠᠢᠯᠤᠭᠰᠠᠨ ᠶᠤᠮ
ᠶᠠᠪᠤᠭᠰᠠᠨ ᠵᠠᠮ ᠢ᠋ ᠨᠢ ᠵᠠᠯᠭᠠᠵᠤ ᠠᠪᠬᠤ
ᠢᠷᠭᠤᠢ ᠠᠯᠠᠭ ᠦᠷᠡ ᠶ᠋ᠢ ᠨᠢ ᠪᠣᠳᠣᠵᠤ
ᠢᠨᠠᠭ ᠲᠡᠭᠦᠨ ᠦ᠌ ᠪᠡᠨ ᠮᠥᠩᠭᠥᠨ ᠡᠮᠡᠭᠡᠯ ᠢ᠋
ᠢᠷᠭᠠᠢ ᠲᠠᠰᠢᠭᠤᠷ ᠲᠤᠨᠢ ᠱᠣᠩᠳᠠᠵᠤ ᠲᠠᠯᠪᠢᠯᠠ
ᠬᠦᠯᠦᠭ ᠦ᠋ᠨ ᠬᠢᠨᠢ ᠲᠣᠭᠣᠰᠣ ᠶ᠋ᠢ ᠣᠷᠴᠢᠯᠠᠩ ᠳ᠋ᠤ᠌ ᠡᠷᠭᠦᠵᠦ
ᠬᠦᠰᠡᠯ ᠢ᠋ ᠨᠢ ᠭᠦᠢᠴᠡᠭᠡᠭᠡᠬᠦ ᠬᠦᠦ ᠶ᠋ᠢ ᠪᠣᠳᠣᠵᠤ
ᠤᠷᠤᠰᠤᠨ ᠬᠠᠲᠠᠭᠰᠠᠨ ᠬᠥᠯᠥᠰᠥ ᠶ᠋ᠢ ᠬᠤᠰᠤᠵᠤ
ᠤᠨᠠᠭᠠᠨ ᠬᠣᠩᠭᠣᠷ ᠢ᠋ ᠨᠢ ᠠᠳᠤᠭᠤᠨ ᠳ᠋ᠤ᠌ ᠲᠠᠯᠪᠢᠯᠠ
ᠡᠩᠭᠡᠷ ᠳᠡᠪᠡᠯ ᠦ᠋ᠨ ᠡᠩ ᠳ᠋ᠦ᠍ ᠬᠦᠷᠬᠦ
ᠡᠵᠡᠨ ᠲᠩᠷᠢ ᠳ᠋ᠦ᠍ ᠬᠦᠦ ᠲᠡᠢ ᠶ᠋ᠢ ᠪᠣᠳᠣᠵᠤ
ᠬᠥᠬᠡ ᠳᠠᠯᠢᠩᠪᠤᠨ ᠲᠡᠷᠯᠢᠭ ᠢ᠋ ᠨᠢ ᠡᠪᠬᠡᠵᠦ
ᠬᠦᠦ ᠳ᠋ᠦ᠍ᠨᠢ ᠲᠠᠯᠪᠢᠵᠤ ᠠᠪᠳᠠᠷᠠ ᠳ᠋ᠤ᠌ ᠬᠢᠯᠡ
ᠡᠴᠢᠭᠡ ᠪᠡᠨ ᠳᠠᠭᠤᠷᠢᠶᠠᠭᠰᠠᠨ ᠬᠦᠦ ᠲᠡᠢ ᠪᠣᠯᠬᠣᠷ
ᠡᠵᠡᠭᠦᠢ ᠭᠡᠷ ᠮᠢᠨᠢ ᠳᠦᠭᠦᠷᠦᠭᠡᠳ ᠢᠷᠡᠭᠰᠡᠨ ᠶᠤᠮ
ᠡᠭᠦᠯᠡᠨ ᠰᠡᠭᠦᠳᠡᠷ ᠡᠴᠡ ᠴᠦ᠍ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠠᠭᠠᠵᠤ
ᠦᠷᠡ ᠶ᠋ᠢᠨ ᠪᠦᠪᠡᠢ ᠳᠠᠭᠤᠯᠠᠳᠠᠭ ᠪᠣᠯᠤᠭᠰᠠᠨ ᠶᠤᠮ
《ᠠᠳᠤᠭᠤᠴᠢᠨ ᠠᠪᠤ ᠶ᠋ᠢᠨ ᠬᠦᠦ ᠪᠢᠯᠡ
ᠠᠭᠲᠠ ᠶ᠋ᠢᠨ ᠲᠣᠭᠣᠰᠣᠨ ᠳ᠋ᠤ᠌ ᠲᠥᠷᠥᠭᠰᠡᠨ ᠪᠢᠯᠡ
ᠠᠯᠢᠮᠠᠨ ᠡᠴᠡ ᠤᠷᠭᠤᠭᠰᠠᠨ ᠠᠯᠢᠮᠠ ᠪᠢᠯᠡ
ᠠᠮᠢᠨ ᠡᠴᠡ ᠤᠷᠭᠤᠭᠰᠠᠨ ᠠᠮᠢ ᠪᠢᠯᠡ
ᠰᠠᠭᠠᠯᠢᠴᠢᠨ ᠡᠵᠢ ᠶ᠋ᠢᠨ ᠬᠦᠦ ᠪᠢᠯᠡ
ᠰᠠᠭᠠᠯᠢ ᠲᠠᠢ ᠡᠩᠭᠡᠷ ᠡᠴᠡ ᠤᠨᠠᠭᠰᠠᠨ ᠪᠢᠯᠡ
ᠰᠠᠷᠠ ᠦᠭᠡᠢ ᠰᠥᠨᠢ ᠶ᠋ᠢᠨ ᠰᠠᠷᠠᠨ ᠪᠢᠯᠡ
ᠰᠠᠷᠠ ᠲᠠᠢ ᠰᠥᠨᠢ ᠶ᠋ᠢᠨ ᠨᠠᠷᠠᠨ ᠪᠢᠯᠡ
ᠳᠠᠯᠠᠢ ᠪᠠᠶᠠᠨ ᠣᠷᠣᠨ ᠤ᠋ ᠪᠠᠨ ᠲᠥᠯᠥᠭᠡ
ᠳᠠᠢᠴᠢᠨ ᠠᠪᠤ ᠨᠢ ᠲᠡᠢᠨ ᠳ᠋ᠦ᠍ ᠶᠠᠪᠤᠭᠰᠠᠨ ᠶᠤᠮ
ᠳᠠᠢᠰᠤᠨ ᠳᠠᠷᠤᠭᠰᠠᠨ ᠳᠠᠷᠬᠠᠨ ᠴᠣᠯᠠ ᠲᠠᠢ
ᠳᠠᠷᠢ ᠦᠨᠦᠷᠲᠦᠭᠰᠡᠨ ᠠᠪᠤ ᠨᠢ ᠤᠨᠠᠭᠰᠠᠨ ᠶᠤᠮ
ᠬᠦᠦ ᠨᠢ ᠥᠰᠴᠦ ᠲᠣᠮᠣ ᠪᠣᠯᠤᠭᠠᠳ
ᠬᠦᠷᠡᠩ ᠳᠡᠰ ᠦ᠋ᠨ ᠵᠢᠭᠦᠷ ᠤᠷᠭᠤᠨᠠ
ᠬᠦᠯᠦᠭ ᠮᠣᠷᠢ ᠪᠠᠨ ᠲᠩᠷᠢ ᠳ᠋ᠦ᠍ ᠰᠣᠢᠵᠤ
ᠬᠥᠮᠦᠨ ᠦ᠌ ᠬᠦᠰᠡᠯ ᠢ᠋ ᠭᠠᠵᠠᠷ ᠲᠤ᠌ ᠪᠦᠲᠦᠭᠡᠨᠡ
ᠠᠪᠤ ᠶ᠋ᠢᠨ ᠦᠭᠡᠢ ᠳ᠋ᠦ᠍ ᠠᠪᠤ ᠪᠣᠯᠤᠭᠰᠠᠨ
ᠠᠷᠠᠳ ᠣᠯᠠᠨ ᠢ᠋ᠶ᠋ᠠᠨ ᠬᠠᠢᠷᠠᠯᠠᠵᠤ ᠶᠠᠪᠤᠭᠠᠷᠠᠢ
ᠠᠰᠤᠷᠤ ᠶᠡᠬᠡ ᠦᠨᠡ ᠪᠡᠷ ᠣᠯᠤᠭᠰᠠᠨ
ᠠᠵᠠ ᠵᠢᠷᠭᠠᠯ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠵᠤ ᠶᠠᠪᠤᠭᠠᠷᠠᠢ》
ᠡᠷᠡ ᠨᠥᠬᠥᠷ ᠨᠢ ᠢᠷᠡᠭᠰᠡᠨ ᠢᠷᠡᠭᠡ ᠦᠭᠡᠢ
ᠡᠬᠡ ᠪᠦᠬᠦᠨ ᠲᠡᠷᠡ ᠴᠠᠭ ᠲᠤ᠌
ᠥᠨᠥ ᠦᠶᠡ ᠶ᠋ᠢᠨ ᠬᠢᠨ ᠳ᠋ᠦ᠍ ᠡᠨᠡ ᠪᠦᠪᠡᠢ ᠶ᠋ᠢ
ᠡᠪᠦᠷ ᠳᠡᠭᠡᠷᠡ ᠨᠢ ᠳᠠᠭᠤᠯᠠᠵᠤ ᠥᠭᠭᠦᠭᠰᠡᠨ ᠶᠤᠮ ᠃
ᠵᠣᠬᠢᠶᠠᠭᠴᠢ ᠶ᠋ᠢᠨ ᠲᠠᠨᠢᠯᠴᠠᠭᠤᠯᠭᠠ
ᠨᠡᠷᠡᠲᠦ ᠢᠷᠠᠭᠤ ᠨᠠᠢᠷᠠᠭᠴᠢ ᠲᠠᠠᠳ᠋ᠠᠪ ᠤ᠋ᠨ ᠫᠦᠷᠪᠦᠳᠣᠷᠵᠢ
ᠮᠢᠩᠭᠠ ᠶᠢᠰᠦᠨ ᠵᠠᠭᠤ ᠭᠤᠴᠢᠨ ᠭᠤᠷᠪᠠᠨ ᠣᠨ ᠳ᠋ᠤ᠌ ᠥᠪᠦᠷᠬᠠᠩᠭᠠᠢ ᠠᠢᠮᠠᠭ ᠤ᠋ᠨ ᠪᠦᠷᠢᠳᠦ ᠰᠤᠮᠤ ᠶ᠋ᠢᠨ ᠮᠠᠯᠴᠢᠨ ᠤ᠋ ᠭᠡᠷ ᠲᠦ᠍ ᠲᠥᠷᠥᠵᠦ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠥᠳᠡᠯᠮᠦᠷᠢ ᠶ᠋ᠢᠨ ᠪᠠᠭᠠᠲᠤᠷ᠂ ᠠᠷᠠᠳ ᠤ᠋ᠨ ᠤᠷᠠᠨ ᠵᠣᠬᠢᠶᠠᠯᠴᠢ᠂ ᠲᠥᠷᠥ ᠶ᠋ᠢᠨ ᠱᠠᠩᠨᠠᠯᠲᠤ ᠢᠷᠠᠭᠤ ᠨᠠᠢᠷᠠᠭᠴᠢ᠃ ᠲᠡᠷᠡ ᠲᠠᠪᠢᠭᠠᠳ ᠣᠨ ᠡᠴᠡ ᠤᠷᠠᠨ ᠪᠦᠲᠦᠭᠡᠯ ᠦ᠋ᠨ ᠠᠵᠢᠯ ᠢ᠋ᠶ᠋ᠠᠨ ᠡᠬᠢᠯᠡᠵᠦ᠂《ᠬᠠᠪᠤᠷ ᠤ᠋ᠨ ᠳᠠᠭᠤᠤ》᠂ 《ᠰᠢᠯᠦᠭ ᠦ᠋ᠳ》᠂ 《ᠤᠯᠠᠭᠠᠨ ᠴᠣᠭ》᠂ 《ᠲᠠᠯᠠ ᠶ᠋ᠢᠨ ᠲᠤᠶᠠᠭᠠ》᠂ 《ᠵᠢᠭᠦᠷᠲᠦ ᠴᠠᠭᠠᠨ ᠭᠡᠷ》᠂ 《ᠰᠠᠨᠰᠠᠷ ᠲᠤ᠌ ᠬᠠᠢᠯᠤᠭᠰᠠᠨ ᠲᠤᠤᠯᠢ》᠂ 《ᠵᠠᠰᠠᠨ ᠠᠭᠤᠯᠠ ᠶ᠋ᠢᠨ ᠪᠢᠴᠢᠭᠡᠰᠦ》᠂ 《ᠠᠯᠠᠭᠠᠨ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠣᠳᠣ》ᠵᠡᠷᠭᠡ ᠰᠢᠯᠦᠭ ᠨᠠᠢᠷᠠᠭᠯᠠᠯ ᠤ᠋ᠨ ᠨᠣᠮ ᠬᠡᠪᠯᠠᠬᠥᠯᠣᠬ᠍ᠰᠠᠨ ᠶᠤᠮ᠃
ᠤᠩᠰᠢᠭᠴᠢᠳ ᠤ᠋ᠨ ᠲᠠᠯᠠᠷᠬᠠᠯ ᠢ᠋ ᠬᠦᠯᠢᠶᠡᠵᠦ ᠂ᠢᠷᠠᠭᠤ ᠨᠠᠢᠷᠠᠭ ᠤ᠋ᠨ ᠤᠷᠠᠨ ᠰᠠᠩ ᠢ᠋ ᠪᠠᠶᠠᠯᠢᠭᠵᠢᠭᠤᠯᠤᠭᠰᠠᠨ ᠂ 《ᠬᠠᠷᠠ ᠴᠠᠰᠤ》᠂ 《ᠬᠥᠬᠡ ᠳᠠᠯᠢᠩᠪᠤᠨ ᠲᠡᠷᠯᠢᠭ》᠂ 《ᠰᠠᠬᠡᠰ ᠴᠠᠭᠠᠨ ᠪᠣᠭᠳᠠ》 ᠵᠡᠷᠭᠡ ᠨᠠᠢᠷᠠᠭᠯᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳ᠋ ᠂ᠫᠦᠷᠪᠦᠳᠣᠷᠵᠢ ᠪᠦᠭᠦᠳᠡ ᠨᠠᠢᠷᠠᠮᠳ᠋ᠠᠠᠠᠣ ᠮᠣᠩᠭᠣᠯ ᠠᠷᠠᠳ ᠤᠯᠤᠰ ᠤ᠋ᠨ ᠲᠥᠷᠥ ᠶ᠋ᠢᠨ ᠱᠠᠩᠨᠠᠯ ᠢ᠋ ᠬᠦᠷᠲᠡᠭᠰᠡᠨ ᠶᠤᠮ᠃
ᠲᠡᠭᠦᠨ ᠦ᠌ 《ᠠᠯᠲᠠᠨ ᠨᠠᠮᠤᠷ》᠂ 《ᠬᠥᠳᠡᠭᠡ ᠨᠤᠲᠤᠭ ᠰᠠᠢᠬᠠᠨ》᠂ 《ᠬᠠᠪᠤᠷ ᠤ᠋ᠨ ᠰᠥᠨᠢ ᠶ᠋ᠢᠨ ᠪᠣᠳᠣᠯ》ᠵᠡᠷᠭᠡ ᠨᠡᠯᠢᠶᠡᠳ ᠰᠢᠯᠦᠭ ᠦ᠋ᠳ ᠨᠢ ᠣᠯᠠᠨ ᠤ᠋ ᠳᠤᠷᠠᠲᠠᠢ ᠳᠠᠭᠤᠤ ᠪᠣᠯᠤᠨ ᠳᠡᠯᠭᠡᠷᠡᠭᠰᠡᠨ᠃