ᠪᠢ ᠪᠣᠯ ᠰᠢᠷᠣᠢ - ᠴᠣ ᠂ ᠣᠷᠱᠤᠨ Би бол шороо – Чо ᠂ Оршин
306ᠪᠢ ᠪᠣᠯ ᠰᠢᠷᠣᠢ
ᠪᠡᠨᠡ ᠪᠡᠷ ᠦᠨᠡᠯᠡᠵᠦ ᠭᠠᠳᠠᠭᠰᠢ ᠬᠤᠳᠠᠯᠳᠤᠬᠤ ᠦᠭᠡᠢ
ᠬᠣᠣᠷ ᠰᠠᠨᠠᠵᠤ ᠨᠠᠮᠠᠶ᠋ᠢ ᠮᠠᠯᠲᠠᠪᠠᠯ
ᠬᠠᠤᠯᠢ ᠶᠣᠰᠣᠨ ᠤ᠋ ᠡᠷᠬᠡ ᠮᠠᠲᠠᠯ ᠢ᠋ᠶ᠋ᠠᠷ
ᠬᠣᠷᠸᠠ ᠳ᠋ᠤ᠌ ᠪᠢ ᠲᠤᠩᠬᠠᠭ ᠵᠠᠷᠯᠠᠨᠠ᠃
ᠬᠣᠴᠣᠷᠴᠤ ᠦᠯᠡᠳᠡᠬᠦ ᠬᠥᠷᠥᠰᠥ ᠠᠬᠠ ᠳ᠋ᠤ᠌
ᠬᠣᠪᠬᠣᠷᠳᠠᠭ ᠦᠭᠡᠢ ᠨᠡᠷᠡ ᠪᠡᠨ ᠣᠷᠬᠢᠨᠠ᠃
ᠲᠢᠪ ᠳᠡᠯᠡᠬᠡᠢ ᠲᠣᠭᠲᠠᠭᠰᠠᠨ ᠴᠠᠭ ᠠ᠋ᠴᠠ
ᠲᠥᠷᠥᠯᠬᠢ ᠪᠠᠭᠤᠷᠠᠢ ᠣᠷᠣᠮᠯᠠᠭᠰᠠᠨ ᠦᠶᠡ ᠡᠴᠡ
ᠲᠡᠭᠦᠨ ᠦ᠌ ᠬᠥᠷᠥᠰᠥᠨ ᠳ᠋ᠦ᠍ ᠪᠢ ᠠᠮᠢᠯᠠᠵᠤ
ᠲᠦᠭᠰᠢᠬᠦ ᠵᠢᠷᠦᠬᠡᠨ ᠦ᠌ ᠰᠤᠳᠠᠯ ᠯᠤᠭᠰᠢᠭᠰᠠᠨ ᠶᠤᠮ᠂
ᠠᠷᠠᠳ ᠲᠦᠮᠡᠨ ᠰᠢᠷᠣᠢ ᠶ᠋ᠢ ᠨᠢ ᠡᠨᠡᠷᠢᠵᠦ
ᠠᠵᠤ ᠠᠮᠢᠳᠤᠷᠠᠯ ᠰᠢᠷᠣᠢ ᠳᠡᠭᠡᠷᠡ ᠪᠤᠴᠠᠯᠵᠤ
ᠠᠵᠢᠯ ᠦᠢᠯᠡᠰ ᠰᠢᠷᠣᠢ ᠶ᠋ᠢ ᠴᠡᠴᠡᠭᠯᠡᠭᠦᠯᠵᠦ
ᠠᠳᠤᠭᠤ ᠮᠠᠯ ᠰᠢᠷᠣᠢ ᠳᠡᠭᠡᠷᠡ ᠥᠳᠬᠡᠷᠡᠯᠡ᠃
ᠰᠠᠯᠬᠢ ᠬᠠᠤᠭᠢᠭᠰᠠᠨ ᠢᠰᠬᠡᠷᠬᠦ ᠦᠯᠢᠶᠡᠯᠲᠡ ᠳ᠋ᠦ᠍
ᠰᠠᠨᠠᠭᠠ ᠪᠠᠨ ᠠᠯᠳᠠᠵᠤ ᠪᠢ ᠬᠡᠢᠰᠦᠭᠰᠡᠨ ᠦᠭᠡᠢ
ᠱᠠᠭᠢᠬᠤ ᠮᠥᠨᠳᠥᠷ ᠦ᠋ᠨ ᠬᠦᠴᠦᠲᠦ ᠴᠣᠬᠢᠯᠲᠠ ᠳ᠋ᠤ᠌
ᠰᠢᠪᠠᠷ ᠪᠣᠯᠵᠤ ᠪᠢ ᠤᠷᠤᠰᠤᠭᠰᠠᠨ ᠦᠭᠡᠢ
ᠭᠠᠯ ᠨᠠᠷᠠ ᠰᠢᠲᠠᠭᠠᠨ ᠲᠥᠭᠡᠨᠡᠯᠡ ᠭᠡᠳ
ᠭᠠᠩᠨᠠᠭᠳᠠᠵᠤ ᠪᠢ ᠴᠢᠯᠠᠭᠤᠵᠢᠬᠤ ᠪᠠᠷ ᠦᠭᠡᠢ
ᠭᠠᠷ ᠤ᠋ᠨ ᠪᠠᠷᠢᠴᠠ ᠬᠡᠭᠡᠯᠢ ᠠᠪᠤᠭᠠᠳ
ᠭᠠᠵᠠᠷ ᠢ᠋ᠶ᠋ᠠᠨ ᠵᠥᠭᠡᠭᠡᠵᠦ ᠶᠠᠪᠤᠬᠤ ᠪᠠᠷ ᠦᠭᠡᠢ
ᠭᠠᠩ ᠵᠤᠨ ᠳ᠋ᠤ᠌ ᠴᠢᠭᠢᠭᠯᠡᠬᠦ ᠦᠨᠳᠦᠰᠦ ᠲᠡᠢ
ᠭᠠᠮᠰᠢᠭ ᠡᠪᠦᠯ ᠢᠯᠴᠢᠯᠡᠬᠦ ᠳᠥᠯᠥ ᠲᠡᠢ
ᠡᠬᠡ ᠣᠷᠣᠨ ᠤ᠋ ᠨᠤᠲᠤᠭ ᠬᠠᠶᠠᠭ ᠶᠤᠮ
ᠡᠷᠡ ᠮᠢᠨᠦ ᠭᠣᠯᠣᠮᠲᠠ ᠰᠢᠷᠣᠢ ᠶᠤᠮ᠃
ᠵᠢᠷᠠᠭᠠᠳ ᠣᠨ ᠤ᠋ ᠠᠨᠵᠢᠰᠤᠨ ᠤ᠋ ᠰᠡᠵᠢᠭᠦᠷ ᠲᠦ᠍
ᠵᠠᠳᠠ ᠴᠢᠴᠢᠭᠳᠡᠭᠡᠳ ᠰᠢᠷᠬᠠ ᠬᠤᠪᠢᠯᠤᠭᠰᠠᠨ ᠴᠤ᠌
ᠵᠠᠶᠠᠭᠠ ᠲᠠᠪᠢᠯᠠᠩ ᠨᠤᠲᠤᠭ ᠲᠠᠭᠠᠨ ᠪᠣᠯᠬᠣᠷ
ᠵᠠᠩᠭᠠᠨ ᠤ᠋ ᠬᠦᠦ ᠪᠡᠨ ᠬᠥᠷᠥᠰᠥ ᠡᠳᠡᠭᠡᠭᠰᠡᠨ ᠶᠦᠮ᠃
ᠬᠠᠷᠠ᠂ ᠴᠠᠭᠠᠨ ᠤ᠋ ᠵᠤᠳ ᠤ᠋ᠨ ᠲᠠᠷᠴᠢᠯᠠᠯ ᠳ᠋ᠤ᠌
ᠬᠠᠯᠴᠢᠢᠵᠤ ᠡᠯᠡᠰᠦᠵᠢᠭᠡᠳ ᠮᠠᠩᠬᠠᠨ ᠪᠣᠯᠤᠭᠰᠠᠨ ᠴᠤ᠌
ᠬᠠᠪᠤᠷ ᠨᠠᠮᠤᠷ ᠲᠠᠢ ᠴᠠᠭ ᠤ᠋ᠨ ᠵᠢᠮᠡ ᠪᠡᠷ
ᠬᠠᠯᠠᠭᠤᠨ ᠠᠮᠢ ᠮᠢᠨᠢ ᠳᠠᠬᠢᠨ ᠰᠡᠷᠭᠦᠭᠰᠡᠨ ᠶᠦᠮ᠃
ᠭᠢᠰᠬᠢᠵᠦ ᠶᠠᠪᠤᠬᠤ ᠬᠥᠮᠦᠨ ᠪᠦᠬᠦᠨ
ᠭᠡᠳᠡᠷᠭᠦ᠂ ᠰᠥᠭᠡᠷᠭᠦ ᠪᠡᠨ ᠮᠥᠷ ᠢ᠋ᠶ᠋ᠡᠨ ᠬᠠᠷᠠᠪᠠᠯ
ᠠᠯᠬᠤᠭᠰᠠᠨ ᠮᠥᠷ ᠨᠢ ᠨᠠᠮᠲᠠᠷ ᠬᠠᠨᠳᠢᠪᠯᠠᠬᠤ
ᠠᠷᠢᠭᠤᠨ ᠦᠰᠦᠭ ᠨᠢ ᠪᠢ ᠪᠠᠢᠳᠠᠭ ᠰᠠᠨ᠂
ᠦᠰᠦᠭ ᠪᠣᠯᠵᠤ ᠪᠢ ᠦᠷᠦᠭᠳᠡᠬᠦ ᠳ᠋ᠡᠭᠡᠨ
ᠥᠩᠭᠡ ᠨᠢ ᠬᠥᠬᠡ ᠬᠠᠪᠢᠰᠤ ᠲᠠᠢ ᠶᠤᠮ᠃
ᠦᠢᠯᠡᠰ ᠰᠤᠪᠤᠳᠷᠠᠬᠤ ᠨᠤᠲᠤᠭ ᠤ᠋ᠨ ᠡᠯᠢᠭᠡᠨ ᠳ᠋ᠡᠭᠡᠨ
ᠥᠨᠢᠳᠡ ᠶ᠋ᠢᠨ ᠲᠠᠩᠭᠠᠷᠢᠭ ᠰᠢᠷᠣᠢ ᠨᠡᠷᠡᠲᠡᠢ ᠶᠦᠮ᠂
ᠬᠣᠯᠠ ᠭᠠᠵᠠᠷ ᠰᠠᠯᠬᠤ ᠬᠥᠮᠦᠰ ᠴᠦ᠍
ᠬᠣᠪᠣᠷ ᠡᠷᠳᠡᠨᠢ ᠪᠡᠷ ᠨᠠᠩᠭᠢᠯᠠᠵᠤ ᠶᠠᠪᠤᠳᠠᠭ᠂
ᠬᠣᠷᠣᠮ ᠲᠡᠳᠦᠢ ᠴᠦ᠍ ᠡᠮ ᠨᠢ ᠪᠣᠯᠵᠤ
ᠬᠣᠷᠸᠠ ᠳ᠋ᠤ᠌ ᠠᠮᠢᠳᠤᠷᠠᠬᠤ ᠲᠠᠮᠢᠷ ᠨᠢ ᠪᠣᠯᠳᠠᠭ
ᠬᠠᠷᠠᠵᠤ ᠦᠵᠡᠬᠦ ᠳ᠋ᠦ᠍ ᠪᠣᠷᠣᠬᠠᠨ ᠴᠢᠷᠠᠢ ᠲᠠᠢ ᠴᠤ᠌
ᠬᠠᠯᠲᠠᠷ ᠭᠡᠵᠦ ᠵᠢᠭᠰᠢᠬᠦ ᠬᠡᠷᠡᠭ ᠦᠭᠡᠢ
ᠬᠠᠷᠠ ᠰᠠᠨᠠᠭᠠ ᠶ᠋ᠢ ᠰᠦ ᠪᠡᠷ ᠤᠬᠢᠶᠠᠬᠤ
ᠬᠠᠷᠢᠨ ᠪᠢ ᠮᠣᠩᠭᠣᠯ ᠶᠤᠮ᠃
ᠪᠢ ᠪᠣᠯ ᠨᠤᠲᠤᠭ ᠤ᠋ᠨ
ᠰᠢᠷᠣᠢ
ᠪᠡᠨᠡ ᠥᠷᠲᠡᠭ ᠲᠦ᠍
ᠦᠯᠡᠯᠵᠡᠬᠦ ᠪᠡᠷ ᠦᠭᠡᠢ
ᠲᠦᠮᠡᠨ ᠣᠨ ᠤ᠋ ᠡᠷᠭᠢᠬᠦ
ᠬᠦᠷᠳᠦᠨ ᠳ᠋ᠦ᠍
ᠲᠡᠦᠬᠡ ᠪᠠᠭᠰᠢ ᠲᠠᠢ
ᠨᠠᠰᠤ ᠶ᠋ᠢ ᠪᠠᠷᠠᠭᠠᠨᠠᠮ᠃
ᠢᠷᠡᠯᠲᠡ᠄ ᠴᠣ᠂ ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 05 08