ᠠᠷᠢᠬᠢ - ᠴᠣ ᠂ ᠣᠷᠱᠤᠨ Архи – Чо ᠂ Оршин
299ᠠᠷᠢᠬᠢ
ᠠᠷᠢᠬᠢ ᠨᠡᠷᠡᠲᠦ ᠳᠡᠭᠡᠵᠢ ᠲᠠᠨ ᠤ᠋
ᠠᠮᠲᠠᠯᠢᠭ ᠭᠠᠰᠢᠭᠤᠨ ᠬᠦᠴᠢᠯ ᠴᠢᠨᠠᠷ ᠲᠤ
ᠠᠶᠠᠯᠭᠤ ᠰᠢᠯᠦᠭ ᠴᠤ᠌ ᠴᠠᠯᠭᠢᠯᠠᠭᠠᠳ ᠪᠠᠢᠳᠠᠭ ᠨᠢ
ᠠᠷᠢᠬᠢ ᠨᠡᠷᠡᠲᠦ —
ᠳᠡᠭᠡᠵᠢ ᠲᠠᠨ ᠳ᠋ᠤ᠌
ᠠᠯᠢᠪᠠ ᠬᠦᠰᠡᠯᠡᠩ
ᠪᠠᠢᠨᠠ ᠭᠡᠵᠦ ᠪᠣᠯᠤᠮᠠᠷ᠃
ᠵᠤᠭᠠ ᠲᠠᠭᠠᠷᠠᠵᠤ ᠶᠠᠷᠢᠶᠠ ᠬᠥᠭᠰᠡᠭᠰᠡᠨ
ᠵᠣᠴᠢᠨᠰᠠᠭ ᠨᠠᠢᠷ ᠤ᠋ᠨ ᠰᠡᠳᠬᠢᠯ ᠢ᠋ ᠪᠣᠳᠣᠵᠤ
ᠵᠦᠩᠵᠡ ᠲᠡᠢ ᠠᠷᠢᠬᠢ ᠶ᠋ᠢ ᠰᠢᠮᠡᠨ ᠰᠣᠷᠣᠬᠤ ᠳ᠋ᠤ᠌
ᠵᠦᠭᠡᠷ ᠯᠡ ᠠᠶᠠᠲᠠᠢ ᠰᠠᠨᠠᠭᠳᠠᠭᠠᠳ ᠪᠠᠢᠳᠠᠭ ᠨᠢ
ᠠᠷᠢᠬᠢ ᠨᠡᠷᠡᠲᠦ —
ᠳᠡᠭᠡᠵᠢ ᠲᠠᠨ ᠢ᠋
ᠠᠮᠲᠠᠯᠠᠵᠤ ᠰᠠᠭᠤᠬᠤ ᠳ᠋ᠤ᠌
ᠪᠠᠰᠠ ᠪᠣᠯᠤᠮᠠᠷ᠃
ᠪᠠᠭᠠ ᠯᠠ ᠬᠠᠯᠠᠰᠠᠪᠠᠯ ᠬᠣᠷᠣᠬᠠᠢ ᠬᠥᠳᠡᠯᠦᠭᠡᠳ
ᠪᠠᠯᠭᠤ ᠪᠠᠯᠭᠤ ᠪᠠᠷ ᠬᠥᠨᠲᠥᠷᠴᠦ ᠪᠠᠢᠪᠠᠯ
ᠪᠠᠷᠰ ᠤ᠋ᠨ ᠰᠥᠰᠥ ᠴᠡᠭᠡᠵᠢᠨ ᠳ᠋ᠦ᠍ ᠳᠦᠭᠦᠷᠴᠦ
ᠪᠠᠰᠠ ᠯᠠ ᠵᠢᠭᠲᠡᠢ ᠪᠣᠳᠣᠭᠳᠠᠭᠠᠳ ᠪᠠᠢᠳᠠᠭ
ᠠᠷᠢᠬᠢ ᠨᠡᠷᠡᠲᠦ —
ᠳᠡᠭᠡᠵᠢ ᠲᠠᠨ ᠢ᠋
ᠠᠷᠠᠢ ᠬᠡᠲᠦᠷᠡᠪᠡᠯ
ᠬᠡᠴᠡᠭᠦᠦ ᠪᠣᠯᠤᠮᠠᠷ᠃
ᠤᠰᠤ ᠵᠠᠯᠭᠢᠭᠰᠠᠨ ᠰᠢᠭ᠋ ᠬᠥᠨᠲᠥᠷᠴᠦ ᠲᠣᠩᠭᠣᠢᠯᠭᠠᠨ
ᠤᠯᠠᠭᠠᠨ ᠵᠡᠭᠡᠷᠳᠡ ᠪᠡᠷ ᠤᠬᠠᠭᠠᠨ ᠪᠠᠯᠠᠷᠳᠠᠭᠠᠳ᠂
ᠤᠷᠰᠢᠭ ᠲᠠᠲᠠᠭᠰᠠᠨ ᠪᠣᠯᠠᠢ ᠶᠠᠪᠤᠳᠠᠯ ᠢ᠋ᠶ᠋ᠠᠨ
ᠤᠬᠠᠭᠠᠷᠠᠭᠰᠠᠨ ᠬᠣᠢᠨᠠ ᠡᠭᠳᠡᠭᠦᠴᠡᠭᠡᠳ ᠪᠠᠢᠳᠠᠭ ᠨᠢ
ᠠᠷᠢᠬᠢ ᠨᠡᠷᠡᠲᠦ —
ᠳᠡᠭᠡᠵᠢ ᠲᠠᠨ ᠢ᠋
ᠠᠬᠠᠳᠠᠲᠠᠯᠠ ᠲᠠᠲᠠᠪᠠᠯ
ᠠᠳᠠ ᠪᠣᠯᠤᠮᠠᠷ᠃
ᠪᠣᠳᠠᠰ᠂ ᠬᠥᠮᠦᠨ ᠣᠨᠳᠣᠣ ᠪᠣᠯᠬᠣᠷ
ᠪᠤᠷᠤᠭᠤ ᠵᠥᠪ ᠬᠡᠨ ᠦ᠌ ᠪᠣᠯᠤᠨᠠᠮ᠂
ᠪᠣᠳᠣᠯ ᠡᠷᠡᠭᠦᠯ ᠳ᠋ᠦ᠍ ᠬᠥᠮᠦᠨ ᠰᠡᠷᠭᠦᠯᠡᠩ
ᠪᠣᠳᠣᠩ ᠳ᠋ᠤ᠌ ᠪᠠᠢᠪᠠᠯ ᠠᠷᠢᠬᠢ ᠨᠣᠮᠣᠬᠠᠨ
ᠠᠷᠢᠬᠢ ᠨᠡᠷᠡᠲᠦ —
ᠳᠡᠭᠡᠵᠢ ᠲᠠᠨ ᠢ᠋
ᠠᠢᠬᠤᠪᠲᠤᠷ ᠮᠠᠭᠤᠯᠠᠪᠠᠯ
ᠬᠢᠯᠢᠰ ᠪᠣᠯᠤᠮᠠᠷ᠃
ᠢᠷᠡᠯᠲᠡ᠄ ᠴᠣ · ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 05 08