ᠪᠣᠳᠣᠯ ᠤᠨ ᠭᠣᠭᠴᠣᠭᠠ - ᠴᠣ ᠂ ᠣᠷᠱᠤᠨ Бодлын гогцоо – Чо ᠂ Оршин
237ᠪᠣᠳᠣᠯ ᠤᠨ ᠭᠣᠭᠴᠣᠭᠠ
ᠪᠣᠳᠣᠯ ᠭᠡᠳᠡᠭ ᠬᠡᠴᠡᠭᠦᠦ ᠵᠤᠭᠠᠴᠠᠯ
ᠪᠣᠯᠢᠭᠤᠯᠵᠤ ᠪᠣᠯᠣᠰᠢ ᠦᠭᠡᠢ ᠭᠣᠭᠴᠣᠭᠠ᠂
ᠪᠣᠳᠣᠨᠠ ᠭᠡᠭᠴᠢ ᠲᠠᠭᠠᠲᠠᠢ ᠦᠵᠡᠮᠵᠢ
ᠪᠣᠷᠣ ᠵᠢᠷᠦᠬᠡᠨ ᠳ᠋ᠦ᠍ ᠰᠢᠯᠦᠭ ᠦ᠋ᠨ ᠰᠦᠯᠳᠡ᠃
ᠰᠠᠨᠠᠨᠠ ᠭᠡᠳᠡᠭ ᠬᠡᠴᠡᠭᠦᠦ ᠰᠡᠬᠡᠭᠡᠷᠡᠯ
ᠰᠠᠭᠠᠲᠠᠭᠠᠵᠤ ᠪᠣᠯᠳᠠᠭ ᠦᠭᠡᠢ ᠭᠣᠭᠴᠣᠭᠠ᠂
ᠰᠠᠨᠠᠭᠳᠠᠨᠠ ᠭᠡᠭᠴᠢ ᠠᠶᠠᠲᠠᠢ ᠵᠤᠭᠠ
ᠰᠠᠳᠠᠷᠠᠬᠤ ᠤᠶᠠᠩᠭᠠ ᠰᠢᠨᠡᠬᠡᠨ ᠶᠢᠷᠲᠢᠨᠴᠦ᠃
ᠭᠠᠷ
ᠬᠥᠳᠡᠯᠮᠦᠷᠢ ᠲᠡᠮᠡᠴᠡᠯ ᠳ᠋ᠦ᠍ ᠬᠦᠳᠡᠷᠰᠢᠭᠰᠡᠨ ᠭᠠᠷ
ᠬᠥᠩᠭᠡᠨ ᠭᠡᠷ ᠲᠦ᠍ ᠳᠠᠳᠤᠯᠭᠠᠰᠢᠷᠠᠭᠰᠠᠨ ᠭᠠᠷ
ᠮᠠᠰᠢᠨ ᠵᠢᠯᠣᠭᠣᠳᠤᠭᠰᠠᠨ ᠮᠡᠷᠭᠡᠵᠢᠯ ᠦ᠋ᠨ ᠭᠠᠷ
ᠮᠠᠯ ᠬᠠᠷᠢᠭᠤᠯᠤᠭᠰᠠᠨ ᠤᠷᠭᠠ ᠶ᠋ᠢᠨ ᠭᠠᠷ
ᠠᠯᠢᠨ ᠨᠢ ᠪᠣᠯᠪᠠᠴᠤ ᠪᠦᠷ ᠠᠳᠠᠯᠢᠬᠠᠨ ᠶᠤᠮ
ᠠᠮᠢᠳᠤ ᠬᠥᠮᠦᠨ ᠳ᠋ᠦ᠍ ᠪᠠᠢᠳᠠᠭ ᠯᠠ ᠭᠠᠷ
ᠠᠰᠢᠭᠦᠢ ᠮᠠᠨ ᠤ᠋ ᠬᠡᠷᠡᠭ ᠲᠡᠢ ᠭᠠᠷ᠃
ᠬᠣᠮᠣᠬᠠᠢ ᠪᠣᠳᠣᠯ ᠢ᠋ᠶ᠋ᠠᠷ ᠰᠠᠷᠪᠠᠢᠳᠠᠭ ᠭᠠᠷ
ᠬᠣᠪᠢᠨ ᠤ᠋ ᠲᠥᠯᠥᠭᠡ ᠰᠢᠨᠤᠳᠠᠭ ᠭᠠᠷ
ᠬᠢᠮᠤᠰᠤ ᠬᠤᠷᠤᠭᠤ ᠬᠥᠳᠡᠯᠭᠡᠳᠡᠭ ᠭᠠᠷ
ᠬᠣᠨᠵᠢᠯ ᠥᠰᠢᠯ ᠡᠭᠦᠰᠬᠡᠳᠡᠭ ᠭᠠᠷ
ᠠᠯᠢᠨ ᠴᠤ᠌ ᠪᠦᠷ ᠢᠵᠢᠯᠬᠡᠨ
ᠠᠮᠢᠳᠤᠷᠠᠵᠤ ᠶᠠᠪᠤᠭᠠ ᠭᠠᠷ ᠪᠣᠯᠪᠠᠴᠤ
ᠠᠰ ᠤ᠋ᠨ ᠪᠡᠶᠡ ᠳ᠋ᠦ᠍ ᠢᠯᠡᠭᠦᠦ ᠭᠠᠷ!
ᠭᠠᠯ
ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠣᠷᠣᠰᠢᠳᠠᠭ ᠪᠣᠯ
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠠᠮᠢᠳᠤᠷᠠᠳᠠᠭ ᠪᠣᠯ
ᠡᠬᠡ ᠣᠷᠣᠨ ᠳ᠋ᠠᠭᠠᠨ ᠴᠣᠭ ᠢ᠋ ᠪᠠᠳᠠᠷᠠᠭᠤᠯᠤᠭᠴᠢ
ᠡᠷᠡᠨ ᠦᠶᠡ ᠶ᠋ᠢᠨ ᠭᠠᠯ ᠨᠢ ᠪᠣᠯ
ᠬᠦᠰᠡᠯᠡᠩ ᠢ᠋ᠶ᠋ᠡᠷ ᠡᠷᠴᠢᠮ ᠨᠡᠢᠳᠬᠡᠭᠰᠡᠨ
ᠬᠥᠳᠡᠯᠮᠦᠷᠢ ᠪᠡᠷ ᠠᠮᠢᠰᠬᠤᠯ ᠠᠪᠤᠭᠰᠠᠨ
ᠠᠮᠢᠳᠤᠷᠠᠯ ᠲᠡᠮᠡᠴᠡᠯ ᠦ᠋ᠨ ᠵᠠᠮ ᠳ᠋ᠠᠬᠢ
ᠠᠭᠠᠭᠢᠮᠠ ᠵᠠᠯᠠᠭᠤ ᠨᠠᠰᠤ ᠮᠥᠨ᠃
ᠬᠥᠷᠥᠰᠥ ᠦᠨᠳᠦᠰᠦ ᠪᠠᠢᠳᠠᠭ ᠪᠣᠯ
ᠬᠥᠮᠦᠨ ᠠᠮᠢᠳᠤᠷᠠᠯ ᠪᠠᠢᠭᠠ ᠪᠣᠯ
ᠠᠭᠤᠤ ᠣᠷᠣᠨ ᠤ᠋ ᠲᠤᠯᠭᠠ ᠳ᠋ᠠᠬᠢ
ᠠᠷᠠᠳ ᠲᠦᠮᠡᠨ ᠦ᠌ ᠭᠠᠯ ᠨᠢ ᠪᠣᠯ
ᠰᠤᠷᠤᠯᠭᠠ ᠪᠠᠷ ᠣᠶᠤᠨ ᠢ᠋ᠶ᠋ᠠᠨ ᠰᠢᠮᠡᠳᠬᠡᠭᠰᠡᠨ
ᠰᠤᠳᠤᠯᠬᠤ ᠪᠠᠷ ᠲᠠᠷᠢᠬᠢ ᠪᠠᠨ ᠵᠡᠪᠰᠡᠭᠯᠡᠭᠰᠡᠨ
ᠳᠠᠭᠠᠷᠢᠵᠤ ᠥᠩᠭᠡᠷᠡᠳᠡᠭ ᠨᠠᠰᠤᠨ ᠤ᠋ ᠮᠢᠨᠢ
ᠳᠠᠬᠢᠵᠤ ᠢᠷᠡᠳᠡᠭ ᠦᠭᠡᠢ ᠵᠠᠯᠠᠭᠤ ᠦᠶᠡ ᠠ᠋᠃
ᠢᠷᠡᠯᠲᠡ᠄ ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 05 07