ᠣᠲᠣᠷ ᠤ᠋ᠨ ᠠᠢᠯОторын айл-otoriinail
2570ᠣᠲᠣᠷ ᠤ᠋ᠨ ᠠᠢᠯ
ᠮᠣᠩᠭᠣᠯ ᠪᠠᠬᠠᠷᠬᠠᠯ ᠲᠥᠰᠦᠯ ᠦᠵᠡᠭᠦᠯᠵᠦ ᠪᠠᠢᠨᠠ
ᠠᠷᠤᠬᠠᠩᠭᠠᠢ ᠠᠢᠮᠠᠭ᠂ ᠵᠢᠷᠭᠠᠯᠠᠩᠲᠤ ᠰᠤᠮᠤ
ᠥᠴᠥᠭᠡᠳᠦᠷ ᠣᠷᠣᠢ ᠡᠴᠡ ᠣᠷᠣᠵᠤ ᠡᠬᠢᠯᠡᠭᠰᠡᠨ ᠪᠣᠷᠣᠭᠠ ᠣᠳᠣ ᠬᠢᠷᠢ ᠨᠠᠮᠳᠠᠬᠤ ᠶᠠᠩᠵᠤ ᠦᠭᠡᠢ᠃ ᠨᠠᠢ᠍ᠮᠠᠳᠤᠭᠠᠷ ᠰᠠᠷᠠ ᠭᠠᠷᠤᠭᠰᠠᠨ ᠡᠴᠡ ᠬᠣᠢᠰᠢ ᠡᠨᠳᠡ ᠪᠠᠷᠤᠭ ᠡᠳᠦᠷ ᠪᠦᠷᠢ ᠪᠣᠷᠣᠭᠠ ᠣᠷᠣᠵᠤ ᠪᠠᠢᠭᠠ ᠨᠢ ᠡᠨᠡ᠃ ᠬᠠᠪᠤᠷ ᠵᠤᠨ ᠤ᠋ ᠴᠠᠭ ᠲᠤ᠌ ᠬᠤᠷᠠ ᠲᠤᠨᠤᠳᠠᠰᠤ ᠪᠠᠭᠠ ᠲᠠᠢ ᠭᠠᠩᠳᠠᠭᠤ ᠪᠠᠢᠭᠰᠠᠨ ᠡᠨᠡ ᠬᠠᠪᠢ᠂ ᠣᠳᠣ ᠯᠠ ᠵᠢᠭᠳᠡ ᠨᠣᠭᠣᠭᠠᠷᠠᠵᠤ ᠪᠠᠢᠨᠠ᠃ ᠭᠡᠲᠡᠯᠡ ᠪᠠᠰᠠ ᠨᠠᠮᠤᠷ ᠤ᠋ᠨ ᠠᠭᠤᠷ ᠣᠷᠣᠵᠤ᠂ ᠥᠷᠯᠥᠭᠡ ᠣᠷᠣᠢ ᠳ᠋ᠠᠭᠠᠨ ᠰᠡᠷᠢᠭᠦᠬᠡᠨ ᠪᠠᠢᠬᠤ ᠪᠣᠯᠵᠠᠢ᠃ ᠵᠡᠭᠦᠨ ᠵᠢᠷᠭᠠᠯᠠᠩᠲᠤ ᠶ᠋ᠢᠨ ᠡᠨᠡ ᠬᠠᠪᠢ ᠳᠠᠯᠠᠢ ᠶ᠋ᠢᠨ ᠲᠦᠪᠰᠢᠨ ᠡᠴᠡ ᠳᠡᠭᠡᠭᠰᠢ ᠮᠢᠩᠭᠠ ᠨᠠᠢ᠍ᠮᠠᠨ ᠵᠠᠭᠤᠨ ᠲᠠᠪᠢᠨ ᠮᠧᠲ᠋ᠷ ᠲᠦ᠍ ᠣᠷᠣᠰᠢᠬᠤ ᠥᠨᠳᠥᠷᠯᠢᠭ ᠭᠠᠵᠠᠷ ᠤᠴᠢᠷ ᠡᠴᠡ ᠡᠨᠳᠡ ᠢᠯᠡᠭᠦᠦ ᠰᠡᠷᠢᠭᠦᠨ ᠪᠠᠢᠳᠠᠭ᠃ ᠲᠡᠢᠮᠦ ᠳ᠋ᠡᠭᠡᠨ ᠴᠦ᠍ ᠰᠠᠷᠯᠤᠭ ᠮᠠᠯ ᠰᠠᠢᠨ ᠢᠳᠡᠭᠡᠰᠢᠳᠡᠭ ᠨᠤᠲᠤᠭ ᠶᠤᠮ᠃ ᠪᠠᠲᠤᠪᠢᠯᠢᠭ᠌ ᠤ᠋ᠨ ᠬᠢ ᠯᠡ ᠭᠡᠬᠦ ᠳ᠋ᠦ᠍ ᠴᠥᠭᠡᠨ ᠦᠭᠡᠢ ᠲᠣᠭᠠᠨ ᠤ᠋ ᠰᠠᠷᠯᠤᠭ ᠲᠠᠢ᠃ ᠲᠡᠳᠡᠨ ᠦ᠌ ᠬᠢ ᠥᠷᠯᠥᠭᠡ ᠪᠦᠷᠢ ᠳᠥᠴᠢᠨ ᠨᠠᠢ᠍ᠮᠠᠨ ᠦᠨᠢᠶᠡ ᠰᠠᠭᠠᠨᠠ᠃ ᠲᠣᠮᠣ ᠥᠬᠢᠨ ᠰᠦᠨᠳᠡᠷᠢᠶᠠ ᠨᠢ ᠬᠢᠴᠢᠶᠡᠯ ᠦ᠋ᠨ ᠬᠡᠷᠡᠭᠯᠡᠭᠡ ᠪᠡᠨ ᠪᠠᠵᠠᠭᠠᠬᠤ ᠪᠠᠷ ᠬᠣᠲᠠ ᠤᠷᠤᠭᠤ ᠶᠠᠪᠤᠭᠰᠠᠨ ᠪᠣᠯᠬᠣᠷ ᠣᠢᠷᠠ ᠶ᠋ᠢᠨ ᠬᠡᠳᠦᠨ ᠡᠳᠦᠷ ᠵᠢᠷᠭᠠᠯᠰᠠᠢᠬᠠᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠦᠨᠢᠶᠡ ᠪᠡᠨ ᠰᠠᠭᠠᠵᠤ ᠪᠠᠢᠨᠠ᠃ ᠭᠡᠷ ᠦ᠋ᠨ ᠡᠵᠡᠨ ᠪᠠᠲᠤᠪᠢᠯᠢᠭ᠌ ᠬᠠᠷᠢᠨ ᠦᠨᠢᠶᠡ ᠢᠪᠢᠯᠭᠡᠬᠦ ᠭᠡᠬᠦ ᠵᠡᠷᠭᠡ ᠪᠡᠷ ᠴᠢᠳᠠᠬᠤ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠲᠤᠰᠠ ᠪᠣᠯᠤᠨᠠ ᠠ᠋᠃
ᠲᠡᠳᠡ ᠥᠷᠯᠥᠭᠡ ᠪᠤᠷᠢ ᠶ᠋ᠢ ᠶᠠᠭ ᠡᠨᠡ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ ᠡᠬᠢᠯᠡᠭᠦᠯᠦᠭᠰᠡᠭᠡᠷ ᠠᠷᠪᠠᠨ ᠬᠣᠶᠠᠷ ᠰᠠᠷᠠ ᠲᠠᠢ ᠵᠣᠯᠭᠠᠳᠠᠭ᠃ ᠠᠷᠪᠠᠨ ᠬᠣᠶᠠᠷ ᠰᠠᠷᠠ ᠳ᠋ᠤ᠌ ᠦᠨᠢᠶᠡᠨ ᠦ᠌ ᠰᠦ ᠪᠦᠷᠢᠨ ᠲᠠᠲᠠᠷᠠᠬᠤ ᠦᠭᠡᠢ ᠴᠦ᠍ ᠭᠡᠯᠡ᠂ ᠬᠦᠢᠲᠡᠨ ᠡᠪᠦᠯ ᠢ᠋ᠶ᠋ᠡᠷ ᠦᠨᠢᠶᠡ ᠰᠠᠭᠠᠬᠤ ᠲᠡᠢᠮᠦ ᠴᠦ᠍ ᠠᠮᠠᠷ ᠠᠵᠢᠯ ᠪᠢᠰᠢ ᠠ᠋᠃ ᠲᠡᠭᠡᠭᠡᠳ ᠴᠦ᠍ ᠢᠳᠡᠷ ᠶᠢᠰᠦ ᠶ᠋ᠢᠨ ᠬᠦᠢᠲᠡᠨ ᠡᠴᠡ ᠡᠮᠦᠨᠡ ᠲᠤᠭᠤᠯ ᠢ᠋ᠶ᠋ᠠᠨ ᠲᠡᠩᠬᠡᠷᠡᠭᠦᠯᠬᠦ ᠨᠢ ᠶᠠᠭᠤ ᠶᠠᠭᠤᠨ ᠡᠴᠡ ᠢᠯᠡᠭᠦᠦ ᠴᠢᠬᠤᠯᠠ᠃
ᠥᠷᠯᠥᠭᠡ ᠪᠦᠷᠢ ᠲᠠᠪᠢᠭᠠᠳ ᠦᠨᠢᠶᠡ ᠰᠠᠭᠠᠨᠠ ᠭᠡᠳᠡᠭ ᠬᠡᠨ ᠬᠥᠮᠦᠨ ᠦ᠌ ᠬᠢᠬᠦ ᠠᠵᠢᠯ ᠪᠢᠰᠢ ᠠ᠋᠃ ᠬᠠᠷᠢᠨ ᠨᠢᠳᠤᠨᠤᠨ ᠵᠢᠯ ᠡᠴᠡ ᠲᠣᠮᠣ ᠥᠬᠢᠨ ᠰᠥᠨᠳᠡᠷᠢᠶᠠ ᠨᠢ ᠰᠠᠭᠠᠯᠢ ᠶ᠋ᠢᠨ ᠠᠵᠢᠯ ᠳ᠋ᠤ᠌ ᠲᠤᠰᠠᠯᠠᠵᠤ ᠡᠬᠢᠯᠡᠭᠰᠡᠨ ᠢ᠋ᠶ᠋ᠡᠷ ᠡᠵᠢ ᠨᠢ ᠣᠳᠣ ᠯᠠ ᠨᠢᠷᠤᠭᠤ ᠲᠡᠨᠢᠢᠬᠦᠲᠡᠢᠬᠡᠨ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠰᠠᠭᠠᠯᠢ ᠡᠴᠡ ᠣᠷᠣᠵᠤ ᠢᠷᠡᠮᠡᠭᠴᠡ ᠭᠡᠷ ᠦ᠋ᠨ ᠠᠵᠢᠯ ᠵᠠᠯᠭᠠᠨᠠ᠃ ᠢᠩᠭᠢᠵᠦ ᠯᠡ ᠴᠠᠭ ᠬᠠᠷᠠᠬᠤ ᠴᠤ᠌ ᠰᠡᠭᠡᠭᠡ ᠦᠭᠡᠢ᠃ ᠵᠥᠪᠬᠡᠨ ᠬᠢᠵᠦ ᠪᠠᠢᠭᠠ ᠠᠵᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠮᠵᠢᠶᠠᠯᠠᠨ ᠡᠳᠦᠷ ᠦ᠋ᠨ ᠨᠠᠷᠠ ᠶ᠋ᠢ ᠲᠣᠭᠠᠴᠠᠭᠠᠯᠠᠬᠤ ᠬᠦᠷᠲᠡᠯᠡ ᠪᠡᠨ ᠡᠳᠦᠷ ᠪᠦᠷᠢ ᠡᠨᠡ ᠠᠵᠢᠯ ᠢ᠋ᠶ᠋ᠠᠨ ᠬᠢᠭᠰᠡᠭᠡᠷ ᠳᠠᠳᠴᠠᠢ᠃ ᠥᠬᠢᠨ ᠬᠣᠲᠠ ᠤᠷᠤᠭᠤ ᠶᠠᠪᠤᠵᠤ ᠲᠠᠪᠤ ᠬᠣᠨᠣᠭᠠᠳ ᠥᠴᠥᠭᠡᠳᠦᠷ ᠥᠷᠯᠥᠭᠡ ᠨᠠᠭᠠᠰᠢ ᠪᠠᠨ ᠭᠠᠷᠤᠭᠰᠠᠨ ᠰᠤᠷᠠᠭ ᠲᠠᠢ᠃ ᠭᠡᠰᠡᠨ ᠴᠦ᠍ ᠰᠥᠨᠢᠵᠢᠨ ᠬᠠᠷᠠᠭᠠᠳ ᠢᠷᠡᠭᠰᠡᠨ ᠦᠭᠡᠢ ᠪᠣᠯᠬᠣᠷ ᠠᠪᠤ ᠡᠵᠢ ᠨᠢ ᠠᠢᠮᠠᠭ ᠤ᠋ᠨ ᠲᠥᠪ ᠲᠦ᠍ ᠠᠢᠯ ᠳ᠋ᠤ᠌ ᠬᠣᠨᠣᠭᠰᠠᠨ ᠶᠤᠮ ᠪᠣᠯᠪᠠ ᠤᠤ ᠭᠡᠵᠦ ᠲᠠᠭᠠᠮᠠᠭᠯᠠᠨᠠ᠃ ᠬᠠᠮᠲᠤ ᠶᠠᠪᠤᠭᠠ ᠬᠥᠮᠦᠰ ᠦ᠋ᠨ ᠬᠢᠨᠢ ᠤᠲᠠᠰᠤ ᠪᠠᠷ ᠴᠦ᠍ ᠬᠣᠯᠪᠣᠭᠠ ᠪᠠᠷᠢᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠬᠣᠷ ᠠᠪᠤ ᠨᠢ ᠵᠠᠮ ᠤ᠋ᠨ ᠠᠢᠯ ᠤᠷᠤᠭᠤ ᠤᠲᠠᠰᠤᠳᠠᠵᠤ ᠠᠰᠠᠭᠤᠬᠤ ᠪᠠᠷ ᠰᠢᠢᠳᠴᠡᠢ᠃ ᠪᠠᠢᠨᠠ ᠤᠤ ?
ᠤᠳᠠᠭᠠᠨ ᠣᠷᠣᠭᠰᠠᠨ ᠪᠣᠷᠣᠭᠠᠨ ᠤ᠋ ᠤᠯᠠᠮ ᠡᠴᠡ ᠰᠢᠷᠭᠠᠴᠢᠨ ᠤ᠋ ᠭᠣᠣᠯ ᠦᠶᠡᠷᠯᠡᠵᠦ ᠰᠥᠨᠳᠡᠷᠢᠶᠠ ᠦᠶᠡᠷ ᠲᠦ᠍ ᠪᠣᠭᠣᠭᠳᠠᠨ ᠠᠢᠯ ᠳ᠋ᠤ᠌ ᠬᠣᠨᠣᠭᠰᠠᠨ ᠭᠡᠨᠡ᠃ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠡᠴᠡ ᠲᠠᠪᠤᠨ ᠵᠠᠭᠤ ᠵᠢᠷᠠᠭᠠᠳ ᠺᠢᠯᠣᠮᠧᠲ᠋ᠷ ᠦ᠋ᠨ ᠵᠠᠢ ᠳ᠋ᠤ᠌ ᠣᠷᠣᠰᠢᠬᠤ ᠡᠨᠡ ᠭᠠᠵᠠᠷ ᠤᠷᠤᠭᠤ ᠥᠨᠳᠥᠷ ᠤᠯᠠᠭᠠᠨ ᠰᠤᠮᠤ ᠪᠠᠷ ᠳᠠᠭᠠᠷᠢᠵᠤ ᠢᠷᠡᠬᠦ ᠨᠢ ᠬᠠᠮᠢᠶᠠ ᠦᠭᠡᠢ ᠲᠦᠳᠡ᠃ ᠭᠡᠷ ᠲᠡᠭᠡᠨ ᠢᠷᠡᠬᠦ ᠶ᠋ᠢᠨ ᠲᠤᠯᠠᠳᠠ ᠳᠠᠭᠠᠭᠠᠨᠠ ᠭᠣᠣᠯ᠂ ᠠᠵᠢᠷᠭᠠ ᠶ᠋ᠢᠨ ᠭᠣᠣᠯ᠂ ᠰᠢᠷᠭᠠᠴᠢᠨ ᠤ᠋ ᠭᠣᠣᠯ ᠢ᠋ ᠳᠠᠭᠠᠷᠢᠨ ᠥᠩᠭᠡᠷᠡᠬᠦ ᠶᠣᠰᠣᠲᠠᠢ᠃ ᠡᠨᠡ ᠬᠣᠭᠣᠷᠣᠨᠳᠣ ᠵᠢᠭᠠ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠲᠣᠭᠣᠭᠠ ᠲᠠᠯᠪᠢᠯᠠ᠃ ᠢᠩᠭᠢᠬᠦ ᠵᠠᠭᠤᠷᠠ ᠳ᠋ᠤ᠌ ᠨᠥᠭᠦᠭᠡ ᠵᠤᠤᠬᠠᠨ ᠳᠡᠭᠡᠷᠡ ᠪᠡᠨ ᠥᠷᠯᠥᠭᠡ ᠰᠠᠭᠠᠭᠰᠠᠨ ᠰᠦ ᠪᠡᠨ ᠰᠠᠮᠠᠷᠴᠤ ᠵᠠᠭᠰᠠᠭᠠᠬᠤ ᠭᠡᠬᠦ ᠮᠡᠲᠦ ᠪᠡᠷ ᠳᠠᠪᠬᠤᠷ ᠳᠠᠪᠬᠤᠷ ᠠᠵᠢᠯ ᠢ᠋ᠶ᠋ᠠᠨ ᠠᠮᠵᠢᠭᠤᠯᠤᠨᠠ᠃
ᠳᠥᠴᠢᠨ ᠨᠠᠢ᠍ᠮᠠᠨ ᠦᠨᠢᠶᠡᠨ ᠡᠴᠡ ᠡᠳᠦᠷ ᠲᠦ᠍ ᠵᠢᠷᠠ ᠭᠠᠷᠤᠢ ᠯᠢᠲ᠋ᠷ ᠰᠦ ᠰᠠᠭᠠᠨᠠ᠂ ᠰᠠᠭᠠᠭᠰᠠᠨ ᠰᠦ ᠪᠡᠨ ᠵᠠᠭᠰᠠᠭᠠᠵᠤ ᠥᠷᠥᠮᠡ ᠭᠠᠷᠭᠠᠵᠤ ᠠᠪᠤᠨᠠ᠃ ᠥᠷᠥᠮᠡ ᠶ᠋ᠢ ᠨᠢ ᠠᠪᠤᠭᠰᠠᠨ ᠰᠦ ᠪᠡᠷ ᠢ᠋ᠶ᠋ᠡᠨ ᠲᠠᠷᠠᠭ ᠪᠦᠷᠢᠵᠦ᠂ ᠪᠦᠷᠢᠭᠰᠡᠨ ᠲᠠᠷᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠭᠠᠷᠴᠠ ᠬᠢᠨᠡ᠃ ᠳᠠᠷᠠᠭᠠ ᠨᠢ ᠠᠭᠠᠷᠴᠠ ᠨᠡᠷᠡᠵᠦ ᠨᠡᠷᠡᠮᠡᠯ ᠭᠠᠷᠭᠠᠵᠤ ᠠᠪᠤᠨᠠ ᠭᠡᠳ ᠲᠡᠭᠦᠨ ᠦ᠌ ᠠᠵᠢᠯ ᠬᠢᠭᠡᠳ ᠯᠡ ᠪᠠᠢᠬᠤ ᠳ᠋ᠤ᠌ ᠤᠨᠳᠤᠷᠤᠭᠠᠳ ᠪᠠᠢᠬᠤ ᠰᠢᠭ᠋᠃ ᠡᠨᠡ ᠬᠣᠭᠣᠷᠣᠨᠳᠣ ᠪᠢᠯᠢᠭ ᠰᠥᠨᠳᠡᠷᠢᠶᠠ ᠥᠬᠢᠨ ᠢ᠋ᠶ᠋ᠡᠨ ᠠᠪᠴᠢᠷᠠᠬᠤ ᠪᠠᠷ ᠶᠡᠬᠡ ᠣᠷᠭᠣᠯᠭᠠᠨ ᠤ᠋ ᠠᠮᠠ ᠤᠷᠤᠭᠤ ᠶᠠᠪᠤᠯᠠ᠃
ᠵᠢᠭᠠ ᠬᠣᠷᠢᠨ ᠯᠢᠲ᠋ᠷ ᠦ᠋ᠨ ᠲᠣᠭᠣᠭᠠ ᠪᠠᠷ ᠡᠳᠦᠷ ᠲᠦ᠍ ᠬᠣᠶᠠᠷ ᠤᠳᠠᠭᠠ ᠲᠣᠭᠣᠭᠠ ᠨᠡᠷᠡᠨᠡ᠃ ᠨᠢᠭᠡ ᠲᠣᠭᠣᠭᠠᠨ ᠡᠴᠡ ᠲᠠᠪᠤ ᠡᠴᠡ ᠵᠢᠷᠭᠤᠭᠠᠨ ᠺᠢᠯᠣᠭ᠌ᠷᠠᠮ ᠠᠭᠠᠷᠴᠠ ᠭᠠᠷᠭᠠᠨᠠ ᠭᠡᠵᠦ ᠲᠣᠭᠠᠴᠠᠬᠤ ᠶᠤᠮ ᠪᠣᠯ᠂ ᠵᠢᠭᠠ ᠡᠳᠦᠷ ᠲᠦ᠍ ᠨᠡᠢᠲᠡ ᠳ᠋ᠡᠭᠡᠨ ᠠᠷᠪᠠᠨ ᠺᠢᠯᠣᠭ᠌ᠷᠠᠮ ᠠᠭᠠᠷᠴᠠ ᠭᠠᠷᠭᠠᠨ ᠠᠪᠴᠤ᠂ ᠮᠠᠰᠢᠨᠳᠠᠭᠠᠳ ᠰᠢᠬᠢᠷ ᠲᠡᠢ ᠠᠭᠠᠷᠤᠤᠯ ᠬᠢᠳᠡᠭ ᠪᠠᠢᠨᠠ᠃ ᠵᠢᠭᠠ ᠵᠥᠪᠬᠡᠨ ᠠᠭᠠᠷᠤᠤᠯ ᠡᠴᠡ ᠭᠠᠳᠠᠨᠠ ᠰᠢᠷᠠ ᠰᠦ ᠪᠡᠷ ᠰᠢᠬᠢᠷ᠂ ᠮᠣᠯᠤᠻᠤ᠂ ᠴᠡᠯᠴᠡᠭᠨᠡᠭᠥᠷ ᠭᠡᠬᠦ ᠮᠡᠲᠦ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠠᠮᠲᠠᠲᠠᠨ ᠬᠢᠨᠡ᠃ᠪᠠᠲᠤᠪᠢᠯᠢᠭ᠌ ᠲᠣᠮᠣ ᠮᠠᠰᠢᠨ ᠢ᠋ᠶ᠋ᠠᠷ ᠲᠠᠲᠠᠭᠤᠯᠤᠨ ᠭᠣᠣᠯ ᠤ᠋ᠨ ᠴᠠᠭᠠᠨᠠ ᠡᠴᠡ ᠥᠬᠢᠨ ᠢ᠋ᠶ᠋ᠡᠨ ᠠᠪᠴᠤ ᠢᠷᠡᠵᠡᠢ᠃ ᠣᠳᠣ ᠯᠠ ᠨᠢᠭᠡ ᠰᠠᠨᠠᠭᠠ ᠵᠣᠪᠠᠬᠤ ᠵᠦᠢᠯ ᠦᠭᠡᠢ ᠪᠣᠯᠤᠨᠠ᠃
ᠡᠵᠢ ᠠᠪᠤ ᠨᠢ ᠵᠠᠪ ᠦᠭᠡᠢ ᠤᠴᠢᠷ ᠡᠴᠡ ᠰᠥᠨᠳᠡᠷᠢᠶᠠ ᠬᠣᠲᠠ ᠤᠷᠤᠭᠤ ᠶᠠᠪᠤᠵᠤ᠂ ᠥᠪᠡᠷ ᠦ᠋ᠨ ᠪᠣᠯᠤᠨ ᠳᠡᠭᠦᠦ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠢᠴᠢᠶᠡᠯ ᠦ᠋ᠨ ᠬᠤᠪᠴᠠᠰᠤ ᠬᠡᠷᠡᠭᠯᠡᠯ ᠢ᠋ ᠪᠠᠵᠠᠭᠠᠵᠠᠢ᠃ ᠵᠤᠨ ᠤ᠋ ᠤᠷᠲᠤ ᠠᠮᠠᠷᠠᠯᠲᠠ ᠶ᠋ᠢᠨ ᠳᠠᠷᠠᠭᠠ ᠬᠢᠴᠢᠶᠡᠯ ᠦ᠋ᠨ ᠬᠡᠷᠡᠭᠯᠡᠯ ᠢ᠋ᠶ᠋ᠡᠨ ᠪᠡᠯᠡᠳᠴᠦ᠂ ᠶᠢᠰᠦᠳᠦᠭᠡᠷ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠢ᠋ ᠬᠦᠯᠢᠶᠡᠬᠦ ᠭᠡᠭᠴᠢ ᠬᠡᠦᠬᠡᠳ ᠪᠦᠬᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠪᠠᠶᠠᠷ ᠲᠠᠢ ᠶᠠᠪᠤᠳᠠᠯ᠃ ᠲᠡᠭᠡᠭᠡᠳ ᠴᠦ᠍ ᠻᠤᠸᠢᠳ᠋ ᠠᠷᠪᠠᠨ ᠶᠢᠰᠦ ᠴᠠᠷ ᠲᠠᠬᠤᠯ ᠤ᠋ᠨ ᠤᠯᠠᠮ ᠡᠴᠡ ᠬᠥᠳᠡᠭᠡ ᠶ᠋ᠢᠨ ᠰᠤᠷᠭᠠᠭᠤᠯᠢ ᠤ᠋ᠳ ᠥᠩᠭᠡᠷᠡᠭᠰᠡᠨ ᠵᠢᠯ ᠦ᠋ᠨ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠰᠠᠷᠠ ᠡᠴᠡ ᠬᠣᠢᠰᠢ ᠬᠢᠴᠢᠶᠡᠯᠯᠡᠭᠡ ᠦᠭᠡᠢ ᠤᠴᠢᠷ ᠬᠡᠦᠬᠡᠳ ᠦ᠋ᠳ ᠬᠢᠴᠢᠶᠡᠯ ᠳ᠋ᠡᠭᠡᠨ ᠶᠠᠪᠤᠵᠤ᠂ ᠠᠩᠭᠢ ᠶ᠋ᠢᠨ ᠨᠠᠢᠵᠠ ᠨᠤᠭᠤᠳ ᠲᠠᠢ ᠪᠠᠨ ᠠᠭᠤᠯᠵᠠᠨᠠ ᠭᠡᠬᠦ ᠡᠴᠡ ᠳᠣᠭᠳᠣᠯᠵᠤ ᠪᠠᠢᠭᠠ ᠨᠢ ᠭᠠᠷᠴᠠᠭᠠ ᠦᠭᠡᠢ᠃
ᠡᠭᠡᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠢᠷᠡᠭᠰᠡᠨ ᠰᠤᠷᠠᠭ ᠢ᠋ᠶ᠋ᠠᠷ ᠵᠡᠷᠭᠡᠯᠡᠳᠡᠭᠡ ᠠᠢᠯ ᠤ᠋ᠨ ᠬᠡᠦᠬᠡᠳ ᠦ᠋ᠳ ᠲᠡᠢ ᠲᠣᠭᠯᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠬᠣᠶᠠᠷ ᠳᠡᠭᠦᠦ ᠨᠢ ᠬᠦᠷᠦᠭᠡᠳ ᠢᠷᠡᠵᠡᠢ᠃ ᠪᠠᠲᠤᠪᠢᠯᠢᠭ᠌ ᠤ᠋ᠨ ᠬᠢ ᠡᠴᠡ᠂ ᠰᠦᠨᠳᠡᠷᠢᠶᠠ᠂ ᠪᠢᠨᠳᠦᠷᠢᠶᠠ᠂ ᠪᠦᠷᠢᠨᠮᠠᠨᠳᠤ ᠨᠠᠷ ᠤ᠋ᠨ ᠭᠤᠷᠪᠠᠨ ᠬᠡᠦᠬᠡᠳ ᠲᠡᠢ ᠂ ᠪᠠᠭᠠ ᠬᠦᠦ ᠪᠦᠷᠢᠨᠮᠠᠨᠳᠤ ᠥᠩᠭᠡᠷᠡᠭᠰᠡᠨ ᠵᠢᠯ ᠨᠢᠭᠡᠳᠦᠭᠡᠷ ᠠᠩᠭᠢ ᠳ᠋ᠤ᠌ ᠡᠯᠰᠡᠨ ᠣᠷᠣᠭᠰᠠᠨ ᠴᠤ᠌ ᠴᠠᠷ ᠲᠠᠬᠤᠯ ᠤ᠋ᠨ ᠤᠯᠠᠮ ᠡᠴᠡ ᠬᠢᠴᠢᠶᠡᠯ ᠳ᠋ᠡᠭᠡᠨ ᠶᠡᠷᠦᠳᠡᠭᠡᠨ ᠬᠣᠶᠠᠷ ᠰᠠᠷᠠ ᠯᠠ ᠰᠠᠭᠤᠭᠰᠠᠨ᠃ ᠭᠡᠲᠡᠯᠡ ᠡᠨᠡ ᠵᠢᠯ ᠬᠣᠶᠠᠳᠤᠭᠠᠷ ᠠᠩᠭᠢ ᠳ᠋ᠤ᠌ ᠲᠠᠪᠰᠢᠨ ᠰᠤᠷᠤᠯᠴᠠᠬᠤ ᠤᠴᠢᠷ ᠡᠴᠡ ᠬᠢᠴᠢᠶᠡᠯ ᠦ᠋ᠨ ᠵᠢᠯ ᠡᠬᠢᠯᠡᠮᠡᠭᠴᠡ ᠪᠦᠷᠢᠨᠮᠠᠨᠳᠤ ᠶ᠋ᠢ ᠵᠠᠪ ᠦᠭᠡᠢ ᠡᠳᠦᠷ ᠦ᠋ᠳ ᠬᠦᠯᠢᠶᠡᠵᠦ ᠪᠠᠢᠭᠠ᠃ ᠬᠡᠦᠬᠡᠳ ᠦ᠋ᠳ ᠬᠢᠴᠢᠶᠡᠯ ᠡᠬᠢᠯᠡᠬᠦ ᠳ᠋ᠦ᠍ ᠰᠤᠮᠤ ᠶ᠋ᠢᠨ ᠲᠥᠪ ᠲᠦ᠍ ᠡᠮᠡᠭᠡ᠂ ᠡᠪᠦᠭᠡ ᠲᠡᠢ ᠪᠡᠨ ᠠᠮᠢᠳᠤᠷᠠᠳᠠᠭ ᠶᠤᠮ ᠪᠠᠢᠨᠠ᠃
ᠰᠦᠨᠳᠡᠷᠢᠶᠠ ᠭᠡᠷ ᠲᠡᠭᠡᠨ ᠢᠷᠡᠮᠡᠭᠴᠡ ᠭᠡᠷ ᠦ᠋ᠨ ᠠᠵᠢᠯ ᠳ᠋ᠤ᠌ ᠲᠤᠰᠠᠯᠠᠵᠤ ᠡᠬᠢᠯᠡᠯᠡ᠃
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ ᠬᠡᠦᠬᠡᠳ ᠬᠥᠳᠡᠭᠡᠨ ᠦ᠌ ᠡᠨᠡ ᠶᠡᠬᠡ ᠠᠵᠢᠯ ᠢ᠋ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠢᠨᠡ ᠭᠡᠳᠡᠭ ᠲᠡᠢᠮᠦ ᠴᠦ᠍ ᠠᠮᠠᠷ ᠵᠦᠢᠯ ᠪᠢᠰᠢ ᠠ᠋᠃
ᠪᠠᠭᠠ ᠥᠬᠢᠨ ᠪᠢᠨᠳᠦᠷᠢᠶᠠ ᠴᠤ᠌ ᠪᠠᠰᠠ ᠡᠵᠢ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠠᠵᠢᠯ ᠳ᠋ᠤ᠌ ᠴᠢᠳᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠢᠷᠢ ᠪᠡᠷ ᠲᠤᠰᠠ ᠪᠣᠯᠤᠨᠠ᠃ ᠡᠨᠡ ᠭᠡᠷ ᠲᠦ᠍ ᠶᠡᠷᠦᠨᠢ ᠥᠪᠡᠷ ᠦ᠋ᠨ ᠭᠡᠰᠡᠨ ᠡᠭᠦᠷᠭᠡ ᠦᠭᠡᠢ ᠬᠥᠮᠦᠨ ᠭᠡᠵᠦ ᠨᠢᠭᠡ ᠴᠦ᠍ ᠪᠠᠢᠬᠤ ᠦᠭᠡᠢ᠃ ᠬᠥᠮᠦᠨ ᠪᠦᠬᠦᠨ ᠠᠵᠢᠯ ᠳ᠋ᠤ᠌ ᠣᠷᠣᠯᠴᠠᠵᠤ᠂ ᠬᠠᠮᠲᠤ ᠳ᠋ᠠᠭᠠᠨ ᠪᠦᠭᠦᠳᠡ ᠶ᠋ᠢ ᠬᠢᠨᠡ᠃ ᠤᠲᠠᠰᠤ ᠬᠠᠩᠭᠢᠨᠠᠭᠰᠠᠭᠠᠷ ᠯᠠ᠂ ᠠᠯᠳᠠᠭᠤᠯ ᠮᠠᠯ᠂ ᠠᠭᠠᠷᠤᠤᠯ ᠡᠭᠡᠵᠡᠭᠡᠢ ᠶ᠋ᠢᠨ ᠦᠨᠡ ᠠᠰᠠᠭᠤᠬᠤ ᠭᠡᠰᠡᠨ ᠬᠥᠮᠦᠰ ᠪᠠᠢᠰᠬᠢᠭᠡᠳ ᠯᠡ ᠡᠳᠡᠨ ᠦ᠌ ᠬᠢ ᠤᠷᠤᠭᠤ ᠤᠲᠠᠰᠤ ᠵᠠᠯᠭᠠᠨᠠ᠃ ᠡᠳᠡᠨ ᠦ᠌ ᠬᠢ ᠤᠭ ᠨᠢ ᠴᠠᠭᠠᠨ ᠲᠣᠯᠣᠭᠠᠢ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠵᠤᠰᠠᠳᠠᠭ᠃ ᠬᠠᠷᠢᠨ ᠡᠨᠡ ᠵᠢᠯ ᠡᠴᠡ ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠬᠦᠷᠲᠡᠯᠡ ᠣᠲᠣᠷ ᠲᠤ᠌ ᠶᠠᠪᠤᠬᠤ ᠪᠠᠷ ᠰᠢᠢᠳᠴᠦ᠂ ᠳᠣᠯᠣᠳᠤᠭᠠᠷ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠳᠣᠯᠣᠭᠠᠨ ᠳ᠋ᠤ᠌ ᠵᠡᠭᠦᠨ ᠵᠢᠷᠭᠠᠯᠠᠩᠲᠤ ᠳ᠋ᠤ᠌ ᠢᠷᠡᠵᠦ ᠪᠠᠭᠤᠭᠰᠠᠨ ᠪᠠᠢᠨᠠ᠃
ᠵᠢᠭᠠ ᠶ᠋ᠢᠨ ᠠᠵᠢᠯ ᠪᠠᠰᠠ ᠯᠠ ᠳᠠᠭᠤᠰᠬᠤ ᠪᠣᠯᠤᠭᠠ ᠦᠭᠡᠢ ᠠ᠋᠃ ᠬᠡᠪ ᠳᠠᠷᠤᠭᠠ ᠦᠭᠡᠢ ᠠᠭᠠᠷᠴᠠ ᠪᠠᠷ ᠢ᠋ᠶ᠋ᠠᠨ ᠴᠥᠷᠮᠡ ᠰᠢᠬᠠᠵᠤ ᠪᠠᠢᠨᠠ᠃ ᠰᠢᠬᠢᠷ ᠲᠡᠢ ᠠᠭᠠᠷᠤᠤᠯ ᠢ᠋ ᠨᠠᠮᠤᠷ ᠣᠷᠣᠢ ᠬᠤᠷᠢᠶᠠᠬᠤ ᠶᠤᠮ ᠪᠣᠯ ᠢᠯᠡᠭᠦᠦ ᠲᠣᠬᠢᠷᠠᠮᠵᠢᠲᠠᠢ ᠪᠠᠢᠳᠠᠭ ᠭᠡᠨᠡ ᠠ᠋᠃ ᠤᠴᠢᠷ ᠨᠢ ᠨᠠᠮᠤᠷ ᠤ᠋ᠨ ᠴᠠᠭ ᠲᠤ᠌ ᠰᠠᠷᠯᠤᠭ ᠤ᠋ᠨ ᠰᠦ ᠨᠢ ᠤᠯᠠᠮ ᠥᠳᠬᠡᠨ ᠲᠣᠰᠣᠯᠢᠭ ᠶᠡᠬᠡᠲᠡᠢ ᠪᠣᠯᠬᠤ ᠡᠴᠡ ᠭᠠᠳᠠᠨᠠ ᠰᠡᠷᠢᠭᠦᠨ ᠴᠠᠭ ᠲᠤ᠌ ᠠᠭᠠᠷᠤᠤᠯ ᠬᠠᠲᠠᠭᠠᠬᠤ ᠳ᠋ᠤ᠌ ᠬᠠᠮᠢᠶᠠ ᠦᠭᠡᠢ ᠬᠤᠷᠳᠤᠨ ᠬᠠᠲᠠᠵᠤ ᠡᠪᠡᠷᠳᠡᠭ ᠶᠦᠮ ᠪᠠᠢᠨᠠ᠃ ᠡᠨᠡ ᠬᠦ ᠨᠢᠭᠡ ᠡᠳᠦᠷ ᠦ᠋ᠨ ᠠᠵᠢᠯ ᠢᠩᠭᠢᠭᠡᠳ ᠳᠠᠭᠤᠰᠤᠯᠠ᠃ ᠣᠳᠣ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠢᠳᠡᠵᠦ ᠭᠡᠷ ᠪᠦᠯᠢ ᠪᠡᠷ ᠢ᠋ᠶ᠋ᠡᠨ ᠠᠮᠠᠷᠠᠬᠤ ᠴᠠᠭ ᠪᠣᠯᠤᠯᠠ᠃ ᠵᠢᠭᠠ ᠬᠠᠷᠢᠨ ᠮᠠᠷᠭᠠᠰᠢ ᠦᠷ ᠦ᠋ᠨ ᠭᠤᠷᠪᠠᠨ ᠴᠠᠭ ᠡᠴᠡ ᠳᠠᠬᠢᠭᠠᠳ ᠯᠠ ᠠᠵᠢᠯ ᠳ᠋ᠠᠭᠠᠨ ᠭᠠᠷᠤᠨᠠ᠃
ᠪᠠᠷᠠᠭᠤᠨ ᠬᠣᠢᠨᠠ ᠡᠴᠡ ᠪᠣᠷᠣᠭᠠᠨ ᠤ᠋ ᠡᠭᠦᠯᠡ ᠰᠠᠯᠬᠢᠨ ᠳ᠋ᠤ᠌ ᠲᠠᠭᠤᠭᠳᠠᠭᠰᠠᠭᠠᠷ ᠣᠢᠷᠠᠲᠤᠨᠠ᠃ ᠤᠳᠠᠬᠤ ᠦᠭᠡᠢ ᠪᠠᠰᠠ ᠯᠠ ᠪᠣᠷᠣᠭᠠ ᠠᠰᠬᠠᠵᠤ ᠡᠬᠢᠯᠡᠬᠦ ᠨᠢ ᠳᠧ᠃ ᠭᠡᠬᠦ ᠳ᠋ᠡᠭᠡᠨ ᠣᠬᠢᠯᠠᠩᠬᠢᠨᠠᠭᠰᠠᠨ ᠪᠣᠷᠣᠭᠠ ᠲᠠᠢ ᠡᠳᠦᠷ ᠦ᠋ᠳ ᠤᠳᠠᠬᠤ ᠦᠭᠡᠢ ᠳᠠᠭᠤᠰᠴᠤ᠂ ᠨᠠᠯᠠᠢᠬᠤ ᠡᠳᠦᠷ ᠢᠷᠡᠵᠦ ᠯᠠ ᠲᠠᠭᠠᠷᠠᠭᠠ ᠂᠂᠂᠂
ᠠᠰᠬᠠᠨ ᠮᠣᠩᠭᠣᠯ ᠢ᠋ᠶ᠋ᠠᠷ ᠪᠢᠴᠢᠪᠡ