ᠪᠦᠷᠢᠶᠡ ᠮᠠᠩᠬᠠᠨ ᠤ ᠳᠠᠭᠤᠨ – ᠮ ᠂ ᠠᠰᠠᠷ Бүрээ манхны дуун – М ᠂ Асар
438ᠪᠦᠷᠢᠶᠡ ᠮᠠᠩᠬᠠᠨ ᠤ ᠳᠠᠭᠤᠨ
ᠡᠨᠡ ᠮᠠᠩᠬᠠ᠂ ᠨᠠᠮ ᠲᠣᠭᠲᠠᠭᠤᠨ ᠡᠳᠦᠷ ᠪᠣᠯ ᠨᠠᠰᠢ ᠴᠠᠰᠢ ᠢᠷᠡᠵᠦ ᠣᠳᠬᠤ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠬᠥᠯ ᠦ᠋ᠨ ᠴᠢᠮᠡᠭᠡ ᠪᠡᠷ《ᠬᠥᠷ ᠬᠥᠷ》ᠭᠡᠵᠦ ᠠᠢᠵᠠᠮ ᠴᠣᠬᠢᠯᠭᠠ ᠲᠠᠢ ᠳᠤᠤᠭᠠᠷᠳᠠᠭ ᠭᠡᠨᠡ᠃ ᠡᠨᠡ ᠮᠠᠩᠬᠠ᠂ ᠠᠳᠬᠤ ᠬᠤᠮᠠᠭ ᠢ᠋ ᠨᠢ ᠪᠢᠲᠡᠭᠦᠯᠡᠵᠦ ᠠᠪᠤᠭᠠᠳ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠰᠠᠮᠤᠷᠴᠤ ᠦᠵᠡᠪᠡᠯ᠂《 ᠱᠣᠷ ᠱᠠᠷ》 ᠭᠡᠵᠦ ᠡᠪᠡᠭᠦᠦ ᠵᠢᠪᠡᠭᠦᠬᠡᠨ ᠱᠤᠤᠭᠢᠳᠠᠭ ᠭᠡᠨᠡ᠃
ᠡᠨᠡ ᠪᠣᠯ ᠠᠭᠤᠯᠠ ᠬᠠᠳᠠᠨ ᠤ᠋ ᠳᠤᠤᠯᠢᠶᠠᠨ᠂ ᠣᠢ ᠬᠥᠪᠴᠢ ᠶ᠋ᠢᠨ ᠱᠤᠤᠭᠢᠶᠠᠨ᠂ ᠤᠰᠤ ᠮᠥᠷᠡᠨ ᠦ᠌ ᠭᠦᠷᠬᠢᠷᠡᠭᠡᠨ ᠲᠡᠢ ᠠᠳᠠᠯᠢ᠂ ᠶᠡᠬᠡ ᠪᠠᠢᠭᠠᠯᠢ ᠶᠢᠨ ᠶᠧᠯᠸᠢ ᠰᠢᠳᠢ ᠲᠠᠢ ᠲᠦᠮᠡᠨ ᠦᠵᠡᠭᠳᠡᠯ ᠮᠢᠩᠭᠠᠨ ᠭᠠᠢᠬᠠᠮᠰᠢᠭ ᠤᠨ ᠨᠢᠭᠡᠨ ᠵᠦᠢᠯ – ᠡᠯᠡᠰᠦ ᠮᠠᠩᠬᠠᠨ ᠤ ᠥᠪᠡᠷᠮᠢᠴᠡ ᠡᠭᠡᠰᠢᠭ ᠪᠣᠯᠬᠤ ᠨᠢ ᠳᠠᠮᠵᠢᠭ ᠦᠭᠡᠢ ᠶᠤᠮ᠃
ᠭᠡᠲᠡᠯᠡ᠂ ᠨᠤᠲᠤᠭ ᠤᠨ ᠬᠥᠮᠥᠰ ᠦᠨ ᠲᠣᠲᠣᠷᠠ ᠡᠨᠡ ᠳᠤᠬᠠᠢ ᠶᠠᠩᠵᠤ ᠶᠠᠩᠵᠤ ᠶᠢᠨ ᠶᠠᠷᠢᠶᠠ ᠬᠡᠯᠡᠯᠴᠡᠭᠡ᠂ ᠦᠯᠢᠭᠡᠷ ᠳᠣᠮᠣᠭ ᠤᠯᠠᠮᠵᠢᠯᠠᠭᠳᠠᠭᠰᠠᠭᠠᠷ ᠪᠠᠢᠨᠠ᠃ ᠲᠡᠭᠦᠨ ᠦ ᠲᠣᠲᠣᠷᠠ ᠡᠢᠮᠦ ᠨᠢᠭᠡᠨ ᠳᠣᠮᠣᠭ ᠪᠣᠢ᠄
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠂ ᠡᠩᠭᠡᠨᠣᠪᠣᠭᠠ ᠶ᠋ᠢᠨ ᠵᠡᠭᠦᠨ ᠰᠤᠭᠤ ᠳ᠋ᠤ᠌ ᠡᠩᠬᠡᠵᠤᠤ ᠭᠡᠵᠦ ᠨᠢᠭᠡ ᠰᠦᠮᠡ ᠪᠠᠢᠵᠤ ᠭᠡᠨᠡ᠃
ᠡᠨᠡ ᠰᠦᠮᠡ ᠶ᠋ᠢᠨ ᠬᠤᠸᠠᠷᠠᠭᠴᠤᠳ ᠡᠷᠭᠢᠬᠦ ᠳᠥᠷᠪᠡᠨ ᠤᠯᠠᠷᠢᠯ ᠳ᠋ᠤ᠌ ᠪᠤᠷᠬᠠᠨ ᠲᠩᠷᠢ ᠳ᠋ᠡᠭᠡᠨ ᠬᠣᠶᠠᠷ ᠦᠭᠡᠢ ᠰᠦᠰᠦᠭ ᠢ᠋ ᠪᠠᠷᠢᠵᠤ᠂ ᠰᠡᠩᠵᠢᠳ ᠵᠢᠰᠠ ᠬᠢᠵᠦ ᠰᠠᠷᠠ ᠶ᠋ᠢᠨ ᠬᠤᠷᠠᠯ ᠢ᠋ᠶ᠋ᠠᠨ ᠣᠰᠣᠯᠳᠠᠯ ᠦᠭᠡᠢ ᠬᠤᠷᠠᠵᠤ᠂ ᠰᠠᠩᠵᠠᠢᠭᠤᠯᠠ ᠭᠡᠵᠦ ᠴᠠᠭ ᠤ᠋ᠨ ᠨᠣᠮ ᠢ᠋ᠶ᠋ᠠᠨ ᠠᠯᠭᠠᠰᠠᠯ ᠦᠭᠡᠢ ᠤᠩᠰᠢᠭᠰᠠᠭᠠᠷ ᠪᠠᠢᠵᠤ ᠭᠡᠨᠡ᠃
ᠨᠢᠭᠡᠨ ᠡᠳᠦᠷ᠂ ᠡᠩᠬᠡᠵᠤᠤ ᠶ᠋ᠢᠨ ᠯᠠᠮᠠ ᠨᠠᠷ ᠮᠥᠨ ᠯᠡ ᠵᠤᠷᠰᠢᠯ ᠶᠣᠰᠣᠭᠠᠷ ᠴᠣᠭᠴᠢᠨ ᠳᠤᠭᠠᠩ ᠳ᠋ᠠᠭᠠᠨ ᠬᠤᠷᠠᠯ ᠬᠤᠷᠠᠨ᠂ ᠴᠠᠩ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠴᠦ᠂ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠢ᠋ᠶ᠋ᠡᠨ ᠦᠯᠢᠶᠡᠨ᠂ ᠬᠣᠩᠬᠣ ᠳᠠᠮᠠᠷᠤ ᠪᠠᠨ ᠬᠥᠳᠡᠯᠭᠡᠵᠦ᠂ ᠬᠣᠭᠣᠯᠠᠢ ᠲᠠᠭᠠᠷᠠᠭᠤᠯᠤᠨ ᠬᠥᠭ ᠨᠡᠢᠯᠡᠭᠦᠯᠵᠦ ᠰᠠᠷᠠ ᠶ᠋ᠢᠨ ᠬᠤᠷᠠᠯ ᠢ᠋ᠶ᠋ᠠᠨ ᠬᠢᠵᠦ ᠪᠠᠢᠲᠠᠯᠠ᠂ ᠭᠡᠨᠡᠳᠲᠡ ᠡᠳᠦᠷ ᠢ᠋ᠶ᠋ᠡᠷ ᠬᠠᠷᠠᠩᠭᠤᠢ ᠰᠢᠭᠤᠷᠭᠠ ᠤᠤᠬᠢᠨ ᠬᠠᠤᠭᠢᠨ ᠢᠰᠬᠡᠷᠴᠦ᠂ ᠤᠯᠠᠭᠠᠨ ᠭᠠᠯᠵᠠᠭᠤ ᠡᠯᠡᠰᠦ ᠣᠢᠯᠤᠨ ᠲᠦᠯᠬᠢᠯᠡᠨ ᠢᠷᠡᠭᠡᠳ᠂ ᠠᠭᠱᠠᠨᠠ ᠵᠠᠭᠤᠷᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠡᠩᠬᠡᠵᠤᠤ ᠶ᠋ᠢᠨ ᠬᠡᠢᠳ ᠢ᠋ ᠡᠯᠡᠰᠦᠨ ᠳᠠᠯᠠᠢ ᠶ᠋ᠢᠨ ᠢᠷᠣᠭᠠᠷ ᠲᠤ ᠵᠢᠪᠦᠭᠦᠯᠵᠦ᠂ ᠡᠭᠡᠯ ᠣᠯᠠᠨ ᠬᠤᠸᠠᠷᠠᠭᠴᠤᠳ ᠢ᠋ ᠨᠢ ᠡᠷᠯᠢᠭ ᠬᠠᠭᠠᠨ ᠤ᠋ ᠲᠠᠮᠤ ᠳ᠋ᠤ᠌ ᠣᠷᠣᠭᠤᠯᠵᠤ ᠭᠡᠨᠡ᠃
ᠲᠡᠭᠷᠢ ᠠᠪᠤ ᠶᠠᠭᠠᠬᠢᠭᠠᠳ ᠲᠡᠳᠦᠢ ᠬᠢᠯᠢᠩ ᠲᠥᠷᠥᠪᠡ? ᠲᠡᠳᠡᠭᠡᠷ ᠬᠤᠸᠠᠷᠠᠭᠴᠤᠳ ᠶᠠᠭᠠᠬᠢᠭᠠᠳ ᠲᠡᠭᠡᠵᠦ ᠰᠦᠷᠡᠬᠡᠢ ᠪᠤᠷᠤᠭᠤ ᠦᠵᠡᠭᠳᠡᠪᠡ? ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ᠃ ᠬᠡᠢᠰᠬᠡᠪᠡᠯ ᠲᠡᠭᠷᠢ ᠶ᠋ᠢᠨ ᠳᠤᠷᠠ ᠶᠤᠮ ᠴᠢᠨᠢ! ᠬᠡᠨ ᠮᠡᠳᠡᠬᠦ ᠶᠦᠮ᠂ ᠲᠡᠭᠷᠢ ᠯᠡ ᠮᠡᠳᠡᠨᠡ᠃
《ᠲᠡᠭᠷᠢ ᠶ᠋ᠢᠨ ᠰᠠᠯᠬᠢ ᠲᠡᠭᠰᠢ ᠦᠭᠡᠢ᠂ ᠲᠥᠷᠥᠭᠰᠡᠨ ᠪᠡᠶᠡ ᠮᠥᠩᠬᠡ ᠦᠭᠡᠢ》 ᠭᠡᠳᠡᠭ ᠠᠷᠠᠳ ᠤ᠋ᠨ ᠳᠠᠭᠤᠤ ᠶ᠋ᠢᠨ ᠵᠦᠢᠷᠯᠡᠰᠢ ᠦᠭᠡᠢ ᠭᠦᠨ ᠰᠠᠨᠠᠭᠠᠨ ᠤ᠋ ᠬᠥᠯ ᠦᠭᠡᠢ ᠶᠡᠬᠡ ᠬᠥᠪ ᠢ᠋ ᠬᠥᠮᠦᠰ ᠡᠨᠡ ᠬᠦ᠌ ᠳᠣᠮᠣᠭ ᠠ᠋ᠴᠠ ᠨᠡᠩ ᠪᠣᠳᠠᠲᠠᠢ ᠣᠢᠯᠠᠭᠠᠵᠤ᠂ ᠨᠡᠩ ᠪᠢᠰᠢᠷᠡᠨ ᠭᠠᠢᠬᠠᠵᠤ ᠪᠣᠯᠬᠤ ᠪᠢᠰᠢ ᠤᠤ᠃
ᠶᠠᠭᠤ ᠴᠤ᠌ ᠭᠡᠰᠡᠨ ᠲᠡᠭᠦᠨ ᠡᠴᠡ ᠨᠡᠰᠢ ᠯᠠ᠂ ᠡᠩᠭᠡᠨᠣᠪᠣᠭᠠ ᠶ᠋ᠢᠨ ᠵᠡᠭᠦᠨ ᠰᠤᠭᠤ ᠳ᠋ᠠᠬᠢ ᠡᠩᠬᠡᠵᠤᠤ ᠶ᠋ᠢᠨ ᠪᠠᠭᠤᠷᠢ ᠪᠣᠯᠤᠭᠰᠠᠨ ᠲᠡᠷᠡ ᠬᠦ᠌ ᠳᠥᠭᠥᠮ ᠨᠢ ᠲᠠᠩᠳᠠ ᠳᠤᠤᠭᠠᠷᠴᠤ᠂ ᠲᠠᠩᠳᠠ ᠴᠤᠤᠷᠢᠶᠠᠯᠠᠳᠠᠭ ᠪᠣᠯᠤᠭᠠᠳ ᠡᠨᠳᠡᠬᠢ ᠬᠥᠮᠦᠰ《 ᠪᠦᠷᠢᠶᠡ ᠮᠠᠩᠬᠠ》 ᠭᠡᠵᠦ ᠴᠣᠯᠠᠯᠠᠵᠤ ᠭᠡᠨᠡ ᠪᠢᠯᠡ᠃
ᠡᠨᠡ ᠬᠦ᠌ ᠳᠣᠮᠣᠭ ᠢ᠋ ᠰᠣᠨᠣᠰᠤᠭᠠᠳ ᠮᠢᠨᠦ ᠳᠣᠲᠣᠷᠠ ᠡᠢᠮᠦ ᠨᠢᠭᠡ ᠪᠣᠳᠣᠯ ᠣᠷᠣᠯᠠ：
ᠡᠯᠡᠰᠦ ᠮᠠᠩᠬᠠᠨ ᠤ᠋ ᠳᠣᠣᠷᠠ ᠳᠠᠷᠤᠭᠳᠠᠭᠰᠠᠨ ᠨᠢ ᠬᠡᠳᠦᠢᠪᠡᠷ ᠯᠠᠮᠠ ᠬᠤᠸᠠᠷᠠᠭ ᠤ᠋ᠨ ᠬᠢᠯᠢᠰ ᠰᠦᠨᠡᠰᠦ ᠨᠦ᠍ᠭᠦᠳ ᠭᠡᠳᠡᠭ ᠪᠣᠯᠪᠠᠴᠤ᠂ ᠮᠥᠨ ᠠᠳᠠᠯᠢᠬᠠᠨ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠪᠦᠷᠢᠯᠳᠦᠬᠦᠨ᠂ ᠬᠥᠳᠡᠯᠮᠦᠷᠢᠴᠢ ᠠᠷᠠᠳ ᠤ᠋ᠨ ᠬᠡᠦᠬᠡᠳ ᠶᠦᠮ᠃ ᠭᠡᠬᠦ ᠳ᠋ᠡᠭᠡᠨ ᠡᠭᠡᠯ ᠯᠠᠮᠠ᠂ ᠵᠢᠷ ᠦ᠋ᠨ ᠬᠤᠸᠠᠷᠠᠭ ᠨᠢ ᠵᠣᠩᠬᠢᠯᠠᠬᠤ ᠲᠣᠭᠠ ᠲᠠᠢ ᠭᠡᠳᠡᠭ ᠨᠢ ᠴᠦ᠍ ᠳᠠᠮᠵᠢᠭ ᠦᠭᠡᠢ ᠰᠠᠨ᠃ ᠠᠳᠠᠭ ᠲᠠᠭᠠᠨ ᠵᠠᠭᠤᠨ ᠤ᠋ ᠶᠡᠷᠡᠨ ᠲᠠᠪᠤ ᠨᠢ ᠯᠠᠪ ᠮᠥᠨ᠃ ᠲᠡᠢᠮᠦ ᠡᠴᠡ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠠᠮᠢ ᠨᠠᠰᠤ ᠶ᠋ᠢ ᠲᠡᠭᠷᠢ ᠪᠤᠷᠬᠠᠨ ᠴᠤ᠌ ᠭᠡᠰᠡᠨ ᠬᠢᠯᠢᠰ ᠭᠦᠵᠢᠷ ᠢ᠋ᠶ᠋ᠡᠷ ᠬᠥᠨᠥᠭᠡᠵᠦ ᠪᠣᠯᠬᠤ ᠦᠭᠡᠢ ᠠᠵᠢ᠃ ᠬᠡᠷᠪᠡ ᠲᠡᠭᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠡᠯᠢᠭᠡᠨ ᠰᠠᠳᠤᠨ ᠨᠢ ᠠᠶᠤᠭᠠᠳ ᠳᠤᠤᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠴᠤ᠌᠂ ᠡᠬᠡ ᠨᠤᠲᠤᠭ ᠨᠢ ᠦᠭᠡᠢᠯᠡᠭᠡᠳ᠂ ᠡᠪᠦᠯ ᠵᠣᠨ ᠤ ᠬᠤᠪᠢ ᠳᠤ ᠬᠣᠢᠨᠠ ᠠᠴᠠ ᠨᠢ ᠭᠠᠰᠢᠭᠤᠳᠠᠨ ᠳᠠᠭᠤᠳᠠᠵᠤ᠂ ᠭᠠᠩᠰᠠᠷᠠᠨ ᠳᠤᠤᠭᠠᠷᠤᠭᠠᠳ ᠪᠠᠢᠳᠠᠭ ᠶᠤᠮ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠦᠵᠡᠬᠦ ᠳᠦ᠂ ᠡᠨᠡ ᠳᠡᠯᠡᠬᠡᠢ ᠳᠦ ᠬᠥᠮᠥᠨ ᠪᠣᠯᠵᠤ ᠵᠠᠶᠠᠭᠠᠭᠰᠠᠳ ᠲᠤ ᠤᠨᠠᠭᠰᠠᠨ ᠰᠢᠷᠣᠢ ᠤᠤᠭᠤᠭᠰᠠᠨ ᠤᠰᠤ – ᠲᠥᠷᠥᠯᠬᠢ ᠨᠤᠲᠤᠭ ᠭᠡᠵᠦ ᠶᠠᠭᠤᠲᠠᠢ ᠡᠷᠬᠢᠮ ᠳᠡᠭᠡᠳᠦ᠂ ᠶᠠᠭᠤᠲᠠᠢ ᠨᠠᠨᠳᠢᠨ ᠳᠠᠷᠬᠠᠨ ᠠᠵᠢ᠃
ᠬᠥᠮᠥᠰ ᠡ ! ᠨᠤᠲᠤᠭ ᠤᠰᠤ ᠪᠠᠨ ᠬᠠᠢᠷᠠᠯᠠᠵᠤ᠂ ᠨᠤᠲᠤᠭ ᠤᠰᠤ ᠪᠠᠨ ᠬᠠᠮᠠᠭᠠᠯᠠᠵᠤ ᠶᠠᠪᠤᠭᠠᠴᠢ!
1980᠂ 9 ᠳ᠋ᠦᠩᠱᠧᠩ ᠳᠦ
《ᠬᠣᠶᠠᠳᠡᠬᠢ ᠤᠳᠠᠭᠠᠨ ᠤ ᠮᠣᠩᠭᠣᠯ ᠢᠶᠡᠷ ᠢᠶᠡᠨ ᠪᠢᠴᠢᠬᠦ ᠪᠤᠤᠭᠢᠶᠠ ᠠᠵᠢᠯᠯᠠᠭᠠᠨ》ᠳᠤ ᠣᠷᠣᠯᠴᠠᠵᠤ ᠬᠠᠭᠤᠯᠤᠨ ᠪᠢᠴᠢᠭᠰᠡᠨ ᠠᠭᠤᠯᠭᠠ
ᠬᠠᠭᠤᠯᠤᠨ ᠪᠢᠴᠢᠭᠰᠡᠨ ᠨᠢ ᠄ ᠲᠤᠭᠴᠢ ᠰᠠᠷᠠᠨᠠ
2024᠂ 04᠂ 23