ᠬᠠᠰ ᠤᠨ ᠬᠠᠢᠷᠴᠠᠭ ᠬᠤᠷᠢᠶᠠᠩᠭᠤᠢ ᠰᠤᠳᠤᠷ ᠣᠷᠣᠰᠢᠪᠠᠢ – ᠡᠮᠦᠨᠡᠬᠢ ᠦᠭᠡ Хасын хаярцаг хураангуй судар оршбай – Өмнөх үг
498ᠡᠮᠦᠨᠡᠬᠢ ᠦᠭᠡ
ᠮᠣᠩᠭᠣᠯᠴᠤᠳ ᠠᠯᠢ ᠡᠷᠲᠡ ᠦᠶᠡ ᠡᠴᠡ ᠣᠯᠠᠨ ᠵᠦᠢᠯ ᠦ᠋ᠨ ᠵᠢᠷᠤᠬᠠᠢ ᠶ᠋ᠢᠨ ᠶᠣᠰᠣ ᠤᠴᠢᠷ ᠢ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠪᠢᠯᠡ᠃ ᠢᠯᠠᠩᠭᠤᠶᠠ ᠴᠡᠷᠢᠭ ᠲᠡᠢᠨ ᠬᠢᠬᠦ ᠪᠢ ᠠᠩ ᠭᠥᠷᠥᠭᠡᠯᠡᠬᠦ ᠨᠡᠭᠦᠳᠡᠯᠯᠡᠵᠦ ᠪᠠᠭᠤᠳᠠᠯᠯᠠᠬᠤ ᠠᠵᠢᠯ ᠦᠢᠯᠡᠰ ᠡᠷᠬᠢᠯᠡᠬᠦ ᠬᠦᠷᠲᠡᠯᠡ ᠴᠥᠮ ᠵᠦᠭ ᠴᠢᠭᠯᠡᠯ ᠰᠠᠷᠠ ᠡᠳᠦᠷ ᠢ ᠢᠯᠭᠠᠵᠤ ᠦᠵᠡᠯᠭᠡ ᠰᠢᠨᠵᠢᠯᠡᠭᠡ ᠬᠢᠵᠦ ᠪᠠᠢᠵᠠᠢ᠃ ᠡᠳᠡᠭᠡᠷ ᠵᠢᠷᠤᠬᠠᠢ ᠨᠢ ᠬᠥᠮᠦᠨ ᠪᠠᠢᠭᠠᠯᠢ ᠣᠷᠴᠢᠨ ᠤ ᠬᠠᠷᠢᠯᠴᠠᠭᠠ ᠬᠣᠯᠪᠣᠭᠠ᠂ ᠲᠡᠳᠡᠨ ᠤ ᠬᠣᠭᠣᠷᠣᠨᠳᠣᠬᠢ ᠨᠥᠯᠥᠭᠡᠯᠡᠬᠦ ᠬᠦᠴᠦᠨ ᠪᠠ ᠦᠷᠡ ᠳ᠋ᠦᠩ ᠢ ᠰᠢᠰᠲ᠋ᠧᠮᠴᠢᠯᠡᠨ ᠳ᠋ᠦᠩᠨᠡᠭᠰᠡᠨ ᠵᠣᠬᠢᠬᠤ ᠪᠣᠳᠠᠰᠴᠢ ᠭᠦᠨ ᠤᠬᠠᠭᠠᠨ ᠤ ᠦᠨᠳᠦᠰᠦᠯᠡᠯ ᠲᠡᠢ ᠶᠦᠮ᠃ ᠮᠥᠨ ᠴᠦ᠍ ᠮᠣᠩᠭᠣᠯᠴᠤᠳ ᠤ᠋ᠨ ᠡᠷᠲᠡᠨ ᠦ᠌ ᠰᠣᠶᠣᠯ ᠤ᠋ᠨ ᠥᠪ ᠬᠥᠷᠥᠩᠭᠡ ᠶ᠋ᠢᠨ ᠨᠢᠭᠡ ᠬᠡᠰᠡᠭ ᠨᠢ ᠪᠣᠯᠬᠤ ᠰᠠᠨ᠃ ᠭᠡᠪᠡᠴᠦ ᠲᠡᠦᠬᠡᠲᠦ ᠨᠥᠬᠥᠴᠡᠯ ᠡᠴᠡ ᠪᠣᠯᠵᠤ᠂ ᠲᠡᠭᠦᠨ ᠤ ᠳᠣᠲᠣᠷᠠ᠂ ᠰᠡᠳᠬᠢᠯᠴᠢ ᠦᠵᠡᠯ ᠦ᠋ᠨ ᠤᠬᠠᠭᠳᠠᠬᠤᠨ ᠴᠤ᠌ ᠵᠥᠩᠳᠡᠭᠡᠨ ᠬᠠᠷᠠᠭᠳᠠᠵᠤ ᠪᠣᠢ ᠪᠣᠯᠪᠠᠴᠤ ᠲᠡᠷᠡ ᠪᠦᠬᠦᠨ ᠢ᠋ᠶ᠋ᠡᠷ ᠨᠢ ᠦᠭᠡᠢᠰᠬᠡᠵᠦ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠣᠯᠬᠤ ᠦᠭᠡᠢ ᠶᠦᠮ᠃ ᠲᠤᠰ《 ᠬᠤᠷᠢᠶᠠᠩᠭᠤᠢ ᠰᠤᠳᠤᠷ 》 ᠲᠤ᠌ ᠡᠷᠲᠡᠨ ᠤ ᠠᠯᠢ ᠣᠯᠠᠨ ᠮᠣᠩᠭᠣᠯ ᠵᠢᠷᠤᠬᠠᠢ ᠳᠣᠲᠣᠷᠠᠬᠢ ᠰᠢᠮᠡ ᠶ᠋ᠢ ᠨᠢ ᠠᠪᠴᠤ ᠰᠢᠭᠠᠷᠤ ᠶ᠋ᠢ ᠨᠢ ᠬᠠᠶᠠᠵᠤ ᠰᠤᠳᠤᠯᠤᠨ ᠠᠰᠢᠭᠯᠠᠬᠤ ᠡᠭᠦᠳᠡᠨ ᠡᠴᠡ ᠨᠡᠯᠢᠶᠡᠳ ᠵᠦᠢᠯ ᠢ ᠬᠤᠷᠢᠶᠠᠩᠭᠤᠢᠯᠠᠨ ᠡᠮᠬᠢᠳᠬᠡᠵᠦ ᠣᠷᠣᠭᠤᠯᠤᠭᠰᠠᠨ ᠪᠠᠢᠨᠠ᠃ ᠦᠵᠡᠭᠴᠢᠳ ᠣᠯᠠᠨ ᠰᠢᠭᠦᠮᠵᠢᠯᠡᠨ ᠤᠬᠠᠬᠤ ᠶ᠋ᠢ ᠬᠦᠰᠡᠶᠡ᠃
ᠣᠳᠣᠬᠠᠨᠠ ᠵᠠᠶᠠᠭᠠ ᠪᠣᠳᠣᠭᠴᠢ ᠣᠯᠠᠨ ᠡᠷᠳᠡᠮᠲᠡᠳ ᠦ᠋ᠨ ᠳᠣᠲᠣᠷᠠ ᠦᠨᠡᠬᠡᠷ ᠶᠢᠷᠲᠢᠨᠴᠦ ᠶ᠋ᠢᠨ ᠤᠯᠠᠷᠢᠬᠤ ᠬᠤᠪᠢᠷᠠᠬᠤ ᠨᠠᠷᠢᠨ ᠨᠢᠭᠤᠴᠠ ᠶ᠋ᠢ ᠤᠬᠠᠵᠤ᠂ ᠥᠩᠭᠡᠷᠡᠭᠰᠡᠨ ᠪᠠ ᠢᠷᠡᠭᠡᠳᠦᠢ ᠶ᠋ᠢ ᠲᠥᠰᠦᠭᠡᠯᠡᠨ ᠮᠡᠳᠡᠭᠴᠢ ᠬᠡᠳᠦ ᠪᠣᠢ ? ᠬᠠᠷᠢᠨ ᠡᠷᠲᠡᠨ ᠤ ᠬᠥᠮᠦᠰ ᠦ᠋ᠨ ᠦᠯᠡᠳᠡᠭᠡᠰᠡ ᠨᠢᠭᠡ ᠬᠣᠶᠠᠷ ᠪᠢᠴᠢᠭ ᠢ ᠪᠠᠷᠢᠭᠠᠳ ᠳᠤᠷᠠ ᠪᠠᠷ ᠶᠠᠷᠢᠵᠤ ᠲᠠᠪᠠ ᠪᠠᠷ ᠮᠡᠷᠭᠡᠯᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠢᠨᠢᠶᠡᠳᠦᠮᠲᠡᠢ᠂ ᠮᠥᠨ ᠴᠦ᠍ ᠦᠬᠦᠮᠡᠯ ᠵᠠᠷ ᠢᠲᠡᠭᠡᠭᠡᠳ ᠬᠤᠪᠢ ᠵᠠᠶᠠᠭᠠ ᠪᠠᠨ ᠪᠤᠰᠤᠳ ᠲᠤᠷ ᠡᠵᠡᠮᠳᠡᠭᠦᠯᠦᠭᠴᠢ ᠪᠠᠰᠠ ᠬᠥᠭᠡᠷᠦᠬᠦᠢᠯᠡᠯᠲᠡᠢ᠃ ᠲᠡᠭᠦᠨ ᠤ ᠣᠷᠣᠨ ᠳ᠋ᠤ᠌《 ᠬᠤᠷᠢᠶᠠᠩᠭᠤᠢ ᠰᠤᠳᠤᠷ 》 ᠲᠤᠷ ᠵᠢᠰᠦ ᠪᠡᠨ ᠲᠣᠯᠢᠳᠠᠨ᠂ ᠥᠪᠡᠷ ᠦ᠋ᠨ ᠵᠠᠶᠠᠭᠠ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠪᠣᠳᠣᠵᠤ᠂ ᠰᠠᠨᠠᠭᠠᠨ ᠢ ᠵᠠᠰᠠᠵᠤ ᠮᠠᠭᠤ ᠶ᠋ᠢ ᠬᠠᠶᠠᠨ ᠰᠠᠢᠨ ᠢ ᠦᠢᠯᠡᠳᠴᠦ᠂ ᠬᠠᠷᠠᠩᠭᠤᠢ ᠶᠢ ᠲᠡᠪᠴᠢᠨ ᠭᠡᠭᠡᠬᠡᠨ ᠢ ᠰᠢᠲᠦᠬᠦ ᠢᠨᠤ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠲᠥᠷᠥᠭᠰᠡᠨ ᠬᠥᠮᠦᠨ ᠤ ᠨᠢᠭᠡᠨ ᠤᠬᠠᠭᠠᠷᠠᠯ ᠪᠣᠯᠤᠶᠤ᠃
ᠡᠯᠪᠡᠭ ᠪᠤᠶᠠᠨᠲᠤ ᠬᠡᠰᠢᠭ ᠲᠣᠭᠲᠠᠭᠴᠢ
ᠬᠠᠷᠠᠭᠴᠢᠨ ᠲᠠᠬᠢᠶᠠ ᠵᠢᠯ ᠦ᠋ᠨ ᠰᠢᠷᠬᠠᠴᠢᠨ ᠬᠣᠨᠢᠨ ᠰᠠᠷᠠᠢᠨ ᠴᠠᠭᠠᠭᠴᠢᠨ ᠭᠠᠬᠠᠢ ᠥᠯᠵᠡᠢᠴᠢ ᠡᠳᠦᠷ᠃