ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠬᠦᠯᠦᠭ ᠥᠨᠳᠡᠭᠡᠨ ᠴᠠᠭᠠᠨ-ᠴᠢᠮᠡᠭᠡᠯᠳᠥМөнх тэнгэрийн хувилгаан хүлэг өндгөн цагаан-Чимээлт
1069ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠬᠦᠯᠦᠭ ᠥᠨᠳᠡᠭᠡᠨ ᠴᠠᠭᠠᠨ
ᠴᠢᠮᠡᠭᠡᠯᠳᠥ
ᠴᠢᠩᠭᠢᠰ ᠬᠠᠭᠠᠨ᠂ ᠮᠣᠩᠭᠣᠯ ᠮᠣᠷᠢᠨ ᠤ᠋ ᠮᠣᠩᠭᠣᠯᠴᠤᠳ ᠲᠤ᠌ ᠦᠵᠡᠭᠦᠯᠦᠭᠰᠡᠨ ᠠᠯᠳᠠᠷ ᠭᠠᠪᠢᠶᠠ ᠶ᠋ᠢ ᠲᠡᠮᠳᠡᠭᠯᠡᠬᠦ ᠶ᠋ᠢᠨ ᠲᠤᠯᠠᠳᠠ1211 ᠣᠨ ᠤ᠋ ᠵᠤᠨ ᠤ᠋ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠶᠡᠬᠡ ᠤᠯᠠᠭᠠᠨ ᠲᠡᠷᠭᠡᠯ ᠡᠳᠦᠷ᠂ ᠬᠠᠷᠠ ᠵᠢᠷᠦᠬᠡᠨ ᠦ᠌ ᠬᠥᠬᠡᠨᠠᠭᠤᠷ ᠤ᠋ᠨ ᠡᠬᠢᠨ ᠳ᠋ᠦ᠍ ᠲᠦᠮᠡᠨ ᠠᠭᠲᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠪᠠᠨ ᠣᠩᠭᠣᠨ ᠰᠠᠭᠠᠷᠠᠯ ᠮᠣᠷᠢ ᠪᠠᠨ ᠰᠣᠩᠭᠣᠨ ᠣᠩᠭᠣᠯᠠᠵᠤ ᠮᠣᠩᠭᠣᠯ ᠮᠣᠷᠢᠨ ᠤ᠋ ᠭᠠᠪᠢᠶᠠ ᠵᠢᠳᠬᠦᠯ ᠢ᠋ ᠲᠡᠮᠳᠡᠭᠯᠡᠭᠰᠡᠨ ᠪᠢᠯᠡ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠮᠣᠷᠢ ᠨᠢ ᠬᠤᠪᠢᠯᠤᠨ ᠭᠡᠢᠳᠡᠭ ᠶᠣᠰᠣ ᠵᠥᠪᠬᠡᠨ ᠮᠣᠩᠭᠣᠯ ᠳ᠋ᠤ᠌ ᠯᠠ ᠪᠣᠢ ᠪᠣᠯᠤᠭᠰᠠᠨ᠃ ᠡᠨᠡᠬᠦ ᠣᠩᠭᠣᠨ ᠰᠠᠭᠠᠷᠠᠯ ᠮᠣᠷᠢ ᠶ᠋ᠢ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠥᠲᠡᠯᠬᠦ ᠶ᠋ᠢ ᠡᠷᠬᠢᠮᠯᠡᠨ ᠠᠲᠠᠷ ᠲᠠᠯᠪᠢᠵᠤ᠂ ᠯᠠᠪᠠᠢ ᠨᠢ ᠡᠯᠡᠭᠳᠡᠪᠡᠯ ᠮᠡᠨᠡᠮᠵᠢ ᠶ᠋ᠢᠨ ᠠᠭᠲᠠ ᠪᠠᠷ ᠰᠡᠯᠪᠢᠨ ᠲᠤᠩᠭᠠᠵᠤ ᠦᠶᠡ ᠵᠠᠯᠭᠠᠨ ᠣᠩᠭᠣᠯᠠᠨ ᠥᠨᠥᠳᠥᠷ ᠲᠦ᠍ ᠢᠷᠡᠭᠰᠡᠨ᠂ ᠡᠨᠡ ᠣᠩᠭᠣᠨ ᠰᠠᠭᠠᠷᠠᠯ ᠮᠣᠷᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠴᠢᠬᠡᠨ ᠳ᠋ᠦ᠍ᠨᠢ ᠰᠢᠪᠰᠢᠭᠰᠡᠨ ᠦᠭᠡ ᠶ᠋ᠢ ᠠᠴᠢᠶᠠᠯᠠᠨ ᠥᠨᠥᠳᠥᠷ ᠲᠦ᠍ ᠢᠷᠡᠭᠰᠡᠨ ᠪᠢᠯᠡ᠃ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠤ᠋ ᠬᠢᠨ ᠣᠷᠳᠣᠰ ᠲᠣᠭᠠᠯᠠᠯ ᠤ᠋ᠨ ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠨᠢᠭᠡᠨ ᠦ᠌ ᠴᠠᠭᠠᠨ ᠰᠦᠷᠦᠭ ᠦ᠋ᠨ ᠶᠡᠬᠡ ᠲᠠᠬᠢᠯᠭᠠ ᠨᠢ ᠡᠨᠡᠬᠦ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠲᠠᠬᠢᠯᠭᠠ ᠪᠠᠷ ᠡᠬᠢᠯᠡᠭᠦᠯᠳᠡᠭ ᠶᠦᠮ᠃ ᠡᠢᠮᠦ ᠡᠴᠡ ᠥᠨᠳᠡᠭᠡᠨ ᠴᠠᠭᠠᠨ ᠪᠣᠯ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠰᠢᠲᠦᠳᠡᠭ ᠰᠢᠲᠦᠭᠡᠨ ᠮᠥᠷᠲᠡᠭᠡᠨ ᠲᠥᠷᠥ ᠶ᠋ᠢᠨ ᠰᠢᠲᠦᠭᠡᠨ ᠪᠣᠯᠤᠭᠰᠠᠨ ᠪᠢᠯᠡ᠃ ᠴᠢᠩᠭᠢᠰ ᠰᠢᠲᠦᠭᠡᠨ ᠦ᠌ ᠳᠣᠲᠣᠷᠠ ᠪᠠᠢᠭᠠ ᠴᠣᠷ ᠤ᠋ᠨ ᠭᠠᠭᠴᠠ ᠠᠮᠢᠳᠤ ᠰᠢᠲᠦᠭᠡᠨ ᠪᠣᠯᠤᠭᠰᠠᠨ ᠥᠨᠳᠡᠭᠡᠨ ᠴᠠᠭᠠᠨ ᠰᠢᠲᠦᠭᠡᠨ ᠨᠢ ᠲᠡᠦᠬᠡ ᠶ᠋ᠢᠨ ᠮᠡᠳᠡᠭᠡ ᠵᠠᠩᠭᠢ ᠶ᠋ᠢ ᠮᠢᠩᠭᠠᠨ ᠣᠨ ᠠᠴᠢᠶᠠᠯᠠᠨ ᠲᠡᠭᠡᠭᠡᠭᠰᠡᠭᠡᠷ ᠥᠨᠥᠳᠥᠷ ᠲᠦ᠍ ᠢᠷᠡᠭᠰᠡᠨ᠃ ᠲᠡᠷᠡ ᠨᠢ ᠮᠣᠩᠭᠣᠯ ᠲᠦᠮᠡᠨ ᠦ᠌ ᠮᠠᠨᠳᠤᠯ ᠪᠠᠭᠤᠷᠠᠯ ᠤ᠋ᠨ ᠠᠯᠢ ᠴᠤ᠌ ᠦᠶᠡ ᠳ᠋ᠦ᠍ ᠭᠡᠳ ᠮᠣᠩᠭᠣᠯᠴᠤᠳ ᠤ᠋ᠨ ᠢᠲᠡᠭᠡᠯ ᠦ᠋ᠨ ᠭᠠᠯ ᠪᠣᠯᠵᠤ ᠮᠣᠩᠭᠣᠯ ᠲᠦᠮᠡᠨ ᠦ᠌ ᠰᠡᠳᠬᠢᠯ ᠦ᠋ᠨ ᠭᠦᠨ ᠳ᠋ᠦ᠍ ᠪᠠᠳᠮᠠᠯᠠᠭᠰᠠᠭᠠᠷ ᠢᠷᠡᠭᠰᠡᠨ᠃ ᠥᠨᠳᠡᠭᠡᠨ ᠴᠠᠭᠠᠨ ᠰᠢᠲᠦᠭᠡᠨ ᠨᠢ ᠪᠣᠭᠳᠠ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠤᠶᠠᠨ ᠢ᠋ᠶ᠋ᠠᠷ ᠨᠡᠭᠦᠳᠡᠯ ᠰᠣᠶᠣᠯ ᠤ᠋ᠨ ᠢᠷᠭᠡᠨᠰᠢᠯ ᠳ᠋ᠦ᠍ ᠨᠡᠮᠡᠷᠢᠯᠡᠭᠰᠡᠨ ᠨᠢᠭᠡᠨ ᠭᠠᠢᠬᠠᠮᠰᠢᠭᠲᠤ ᠠᠭᠤᠯᠭᠠ ᠪᠣᠯᠬᠣᠷ ᠶᠢᠷᠲᠢᠨᠴᠦ ᠶ᠋ᠢᠨ ᠬᠥᠳᠡᠯᠬᠦ ᠪᠦᠭᠦᠳᠡ ᠶ᠋ᠢᠨ ᠡᠷᠭᠦᠯ ᠬᠦᠨᠳᠦᠳᠬᠡᠯ ᠢ᠋ ᠣᠯᠬᠤ ᠨᠢ ᠲᠡᠭᠷᠢ ᠶ᠋ᠢᠨ ᠵᠦᠢ ᠭᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠭᠠᠵᠠᠷ ᠭᠢᠰᠬᠢᠭᠰᠡᠨ ᠨᠤᠲᠤᠭ ᠳᠠᠶᠠᠭᠠᠷ ᠲᠤ᠌ ᠥᠯᠵᠡᠢ ᠬᠤᠲᠤᠭ ᠣᠷᠣᠰᠢᠵᠤ᠂ ᠥᠪ ᠲᠣᠨᠣᠭ ᠥᠷᠭᠡᠵᠢᠨ᠂ ᠠᠷᠠᠳ ᠲᠦᠮᠡᠨ ᠠᠮᠤᠷ ᠵᠢᠷᠭᠠᠬᠤ ᠨᠢ ᠭᠠᠵᠠᠷ ᠤ᠋ᠨ ᠵᠦᠢ᠂ ᠬᠥᠮᠦᠨ ᠦ᠌ ᠶᠣᠰᠣᠨ ᠪᠢᠯᠡ᠃
ᠥᠨᠳᠡᠭᠡᠨ ᠴᠠᠭᠠᠨ ᠢ᠋ ᠲᠡᠮᠦᠵᠢᠨ ᠬᠥᠲᠥᠯᠵᠦ
ᠮᠣᠩᠭᠣᠯ ᠤ᠋ᠨ ᠵᠠᠭᠤᠨ ᠡᠬᠢᠯᠡᠭᠰᠡᠨ ᠶᠦᠮ᠃
ᠥᠨᠳᠡᠭᠡᠨ ᠴᠠᠭᠠᠨ ᠪᠢᠳᠡᠨ ᠢ᠋ ᠬᠥᠲᠥᠯᠵᠦ
ᠬᠢᠲᠠᠳ ᠤ᠋ᠨ ᠵᠠᠭᠤᠨ ᠬᠦᠷᠦᠭᠰᠡᠨ ᠶᠦᠮ᠃ (ᠠᠩᠭᠢᠲᠤ ᠶ᠋ᠢᠨ ᠰᠢᠯᠦᠭ)
ᠥᠨᠳᠡᠭᠡᠨ ᠴᠠᠭᠠᠨ ᠬᠣᠢᠴᠢᠰ ᠢ᠋ ᠮᠢᠨᠢ ᠬᠥᠲᠥᠯᠵᠦ
ᠢᠷᠡᠭᠡᠳᠦᠢ ᠵᠠᠭᠤᠨ ᠳ᠋ᠤ᠌ ᠬᠦᠷᠭᠡᠬᠦ ᠶᠦᠮ᠃
ᠲᠠᠯᠠ ᠶ᠋ᠢᠨ ᠬᠥᠮᠦᠨ ᠦᠵᠡᠪᠡᠯ
ᠡᠵᠡᠨ ᠴᠦ᠍ ᠦᠭᠡᠢ ᠥᠨᠳᠡᠭᠡᠨ ᠴᠠᠭᠠᠨ᠃
ᠲᠠ ᠪᠢᠳᠡ ᠦᠵᠡᠪᠡᠯ ᠡᠵᠡᠨ ᠰᠢᠦᠬᠡᠨ
ᠥᠨᠳᠡᠭᠡᠨ ᠴᠠᠭᠠᠨ᠃
ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠦᠵᠡᠪᠡᠯ
ᠣᠩᠭᠣᠨ ᠰᠡᠲᠡᠷ ᠲᠡᠢ ᠥᠨᠳᠡᠭᠡᠨ ᠴᠠᠭᠠᠨ᠃
ᠲᠠᠰᠤᠷᠬᠠᠢ ᠮᠡᠷᠭᠡᠳ ᠦᠵᠡᠪᠡᠯ
ᠣᠷᠴᠢᠯᠠᠩ ᠤ᠋ᠨ ᠭᠠᠢᠬᠠᠮᠰᠢᠭ ᠥᠨᠳᠡᠭᠡᠨ ᠴᠠᠭᠠᠨ᠃ (ᠠᠩᠭᠢᠲᠤ ᠶ᠋ᠢᠨ ᠰᠢᠯᠦᠭ)
ᠪᠤᠷᠬᠠᠨ ᠬᠠᠯᠳᠣᠨᠠ ᠨᠤᠲᠤᠭ ᠲᠠᠢ ᠥᠨᠳᠡᠭᠡᠨ ᠴᠠᠭᠠᠨ
ᠪᠣᠭᠳᠠ ᠴᠢᠩᠭᠢᠰ ᠦ᠋ᠨ ᠣᠩᠭᠣᠯᠠᠭᠰᠠᠨ ᠥᠨᠳᠡᠭᠡᠨ ᠴᠠᠭᠠᠨ
ᠪᠤᠷᠬᠠᠨ ᠬᠠᠲᠠᠭᠤ ᠳ᠋ᠤ᠌ ᠤᠨᠠᠭᠠᠯᠠᠭᠰᠠᠨ ᠥᠨᠳᠡᠭᠡᠨ ᠴᠠᠭᠠᠨ
ᠪᠦᠭᠦᠳᠡ ᠮᠣᠩᠭᠣᠯᠴᠤᠳ ᠤ᠋ᠨ ᠰᠢᠲᠦᠭᠡᠨ ᠥᠨᠳᠡᠭᠡᠨ ᠴᠠᠭᠠᠨ᠃
ᠤᠮᠠᠷᠠᠲᠤ ᠶᠤᠸᠠᠨ ᠤᠯᠤᠰ ᠤ᠋ᠨ ᠦᠶᠡ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍᠂ ᠭᠦᠨᠪᠢᠯᠢᠭ ᠵᠢᠨᠦᠩ᠂ ᠣᠷᠳᠣᠰ ᠲᠦᠮᠡᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ᠂ ᠣᠳᠣ ᠶ᠋ᠢᠨ ᠣᠷᠳᠣᠰ ᠤ᠋ᠨ ᠨᠤᠲᠤᠭ ᠪᠡᠯᠴᠢᠭᠡᠷ ᠲᠦ᠍ ᠨᠤᠲᠤᠭᠯᠠᠨ᠂ ᠥᠨᠳᠡᠭᠡᠨ ᠴᠠᠭᠠᠨ ᠢ᠋ ᠲᠠᠬᠢᠬᠤ᠂ ᠰᠢᠲᠦᠬᠦ᠂ ᠬᠠᠯᠠᠨ ᠲᠤᠩᠭᠠᠬᠤ ᠨᠢ ᠪᠦᠷ ᠡᠨᠡ ᠨᠤᠲᠤᠭ ᠲᠤ᠌ ᠰᠢᠯᠵᠢᠭᠰᠡᠨ ᠪᠠᠢᠨᠠ᠃
ᠥᠨᠳᠡᠭᠡᠨ ᠴᠠᠭᠠᠨ ᠮᠣᠷᠢᠨ ᠤ᠋ ᠠᠮᠢᠳᠤ ᠪᠦᠷᠢᠯᠸᠠ ᠶ᠋ᠢᠨ ᠰᠢᠨᠵᠢ ᠪᠠᠢᠳᠠᠯ᠂ ᠪᠡᠯᠭᠡ ᠲᠡᠮᠳᠡᠭ ᠭᠡᠪᠡᠯ ᠄
1. ᠡᠷᠬᠡᠪᠰᠢ ᠤᠨᠠᠭᠠᠨ ᠳᠡᠯ ᠲᠡᠢ ᠪᠡᠨ ᠪᠠᠢᠬᠤ
2.ᠮᠠᠭᠤ ᠪᠡᠯᠭᠡ ᠢᠷᠣᠠ ᠲᠠᠢ ᠡᠷᠭᠢᠭᠦᠯᠭᠡ ᠦᠭᠡᠢ ᠪᠠᠢᠬᠤ
3. ᠬᠣᠶᠠᠷ ᠨᠢᠳᠦ ᠨᠢ ᠳᠡᠰ ᠬᠠᠷᠠ ᠪᠠᠢᠬᠤ
4. ᠳᠥᠷᠪᠡᠨ ᠲᠤᠭᠤᠷᠠᠢ ᠨᠢ ᠵᠢᠭᠠᠬᠠᠨ ᠴᠤ᠌ ᠡᠷᠢᠶᠡᠨ ᠥᠩᠭᠡ ᠦᠭᠡᠢ᠂ ᠳᠡᠰ ᠬᠠᠷᠠ ᠪᠠᠢᠬᠤ
5. ᠬᠣᠶᠠᠷ ᠴᠢᠬᠢ ᠲᠡᠩᠴᠡᠭᠦᠦ ᠪᠠᠢᠬᠤ
6. ᠲᠡᠰᠢᠶᠡ ᠳᠦᠭᠦᠷᠡᠩ ᠪᠠᠢᠬᠤ
7. ᠣᠮᠣᠷᠤᠤ ᠨᠢ ᠥᠷᠭᠡᠨ ᠪᠠᠢᠬᠤ
8. ᠥᠨᠳᠡᠭᠡ ᠰᠢᠭ ᠴᠠᠪ ᠴᠠᠭᠠᠨ ᠵᠢᠰᠦᠮ ᠪᠠᠢᠬᠤ
9. ᠪᠦᠬᠦᠯᠢ ᠪᠡᠶᠡ ᠶ᠋ᠢᠨ ᠦᠰᠦᠨ ᠳ᠋ᠦ᠍ ᠨᠢ ᠥᠭᠡᠷᠡ ᠥᠩᠭᠡ ᠶ᠋ᠢᠨ ᠦᠰᠦ ᠨᠢᠭᠡ ᠰᠢᠷᠬᠡᠭ ᠴᠦ᠍ ᠬᠣᠯᠢᠭᠰᠠᠨ ᠦᠭᠡᠢ ᠪᠠᠢᠬᠤ ᠵᠡᠷᠭᠡ ᠨᠥᠬᠥᠴᠡᠯ ᠢ᠋ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠪᠠᠢᠬᠤ ᠬᠡᠷᠡᠭᠲᠡᠢ᠃
ᠥᠨᠳᠡᠭᠡᠨ ᠴᠠᠭᠠᠨ ᠣᠷᠳᠣᠰ ᠨᠤᠲᠤᠭ ᠲᠤ᠌ ᠰᠠᠭᠠᠲᠠᠭᠰᠠᠨ ᠤ᠋ ᠰᠡᠭᠦᠯᠡᠷ᠂ ᠭᠣᠣᠯᠳᠠᠭᠤ ᠣᠷᠳᠣᠰ ᠤ᠋ᠨ ᠵᠡᠭᠦᠨᠭᠠᠷ ᠬᠤᠰᠢᠭᠤᠨ ᠤ᠋ ᠬᠠᠷᠢᠶᠠ ᠪᠠᠢᠭᠰᠠᠨ ᠲᠦᠮᠡᠳ ᠦ᠋ᠨ ᠲᠠᠯᠠ ᠳ᠋ᠤ᠌ ᠣᠯᠠᠨ ᠤᠳᠠᠭᠠ ᠪᠦᠷᠢᠯᠸᠠ ᠰᠣᠯᠢᠵᠤ᠂ ᠣᠯᠠᠨ ᠵᠠᠭᠤᠨ ᠵᠢᠯ ᠪᠡᠯᠴᠢᠭᠡᠷᠯᠡᠭᠦᠯᠵᠦ ᠢᠷᠡᠵᠡᠢ᠃ ᠵᠢᠯ ᠪᠣᠯᠭᠠᠨ ᠤ᠋ ᠣᠷᠳᠣᠰ ᠲᠣᠭᠠᠯᠠᠯ ᠤ᠋ᠨ ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠨᠢᠭᠡᠨ ᠦ᠌ ᠡᠳᠦᠷ᠂ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠰᠢᠲᠦᠭᠡᠨ ᠢ᠋ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠳᠡᠭᠡᠷᠡ ᠠᠪᠴᠢᠷᠠᠨ ᠵᠢᠭᠡᠯᠡᠭᠦᠯᠳᠡᠭ ᠪᠥᠭᠡᠳ ᠣᠯᠠᠨ ᠮᠥᠷᠭᠥᠯᠴᠢᠳ ᠲᠦ᠍ ᠠᠳᠢᠰ ᠲᠠᠯᠪᠢᠳᠠᠭ᠂ ᠴᠠᠭᠠᠨ ᠰᠦᠷᠦᠭ ᠦ᠋ᠨ ᠳᠠᠢᠯᠭᠠ ᠥᠩᠭᠡᠷᠡᠮᠡᠭᠴᠡ᠂ ᠵᠡᠭᠦᠨᠭᠠᠷ ᠵᠤᠮᠠ ᠪᠠᠷ ᠲᠦᠮᠡᠳ ᠦ᠋ᠨ ᠲᠠᠯᠠ ᠳ᠋ᠤ᠌ ᠬᠦᠷᠭᠡᠵᠦ ᠪᠡᠯᠴᠢᠭᠡᠷᠯᠡᠭᠦᠯᠳᠡᠭ᠃
ᠳᠠᠷᠬᠠᠳ ᠤ᠋ᠨ ᠥᠨᠳᠥᠷ ᠨᠠᠰᠤᠲᠠᠨ ᠲᠠᠬᠢᠯᠭᠠ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠭᠦᠢᠴᠡᠳᠬᠡᠭᠴᠢ ᠭᠠᠷᠤᠳᠢ ᠭᠤᠸᠠᠢ ᠶ᠋ᠢᠨ ᠬᠡᠯᠡᠬᠦ ᠪᠡᠷ ᠄1966 ᠣᠨ ᠤ᠋ ᠣᠷᠳᠣᠰ ᠲᠣᠭᠠᠯᠠᠯ ᠤ᠋ᠨ ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠨᠢᠭᠡᠨ ᠦ᠌ ᠴᠠᠭᠠᠨ ᠰᠦᠷᠦᠭ ᠦ᠋ᠨ ᠶᠡᠬᠡ ᠲᠠᠬᠢᠯᠭᠠ ᠥᠷᠯᠥᠭᠡ ᠡᠬᠢᠯᠡᠬᠦ ᠲᠡᠢ ᠵᠡᠷᠭᠡ ᠬᠥᠮᠦᠰ ᠥᠨᠳᠡᠭᠡᠨ ᠴᠠᠭᠠᠨ ᠰᠢᠲᠦᠭᠡᠨ ᠳ᠋ᠦ᠍ ᠮᠥᠷᠭᠥᠬᠦ ᠦᠶᠡᠰ ᠲᠦ᠍᠂ ᠥᠨᠳᠡᠭᠡᠨ ᠴᠠᠭᠠᠨ ᠣᠨᠴᠠ ᠶ᠋ᠢᠨ ᠳᠣᠭᠰᠢᠨ ᠵᠠᠩ ᠢ᠋ᠶ᠋ᠠᠷ ᠪᠤᠯᠭᠢᠨ ᠨᠢᠭᠡ ᠴᠦ᠍ ᠬᠥᠮᠦᠨ ᠳ᠋ᠦ᠍ ᠠᠳᠢᠰ ᠲᠠᠯᠪᠢᠯ ᠦᠭᠡᠢ ᠡᠴᠦᠰ ᠲᠡᠭᠡᠨ ᠪᠣᠷᠣ ᠥᠨᠳᠥᠷ ᠲᠦ᠍ ᠬᠢ ᠠᠢᠷᠠᠭ ᠢ᠋ ᠪᠦᠲᠦᠨ ᠲᠠᠯᠠ ᠴᠠᠯᠭᠢᠭᠤᠯᠵᠤ ᠲᠠᠯᠪᠢᠭᠠᠳ ᠠᠯᠳᠠᠭᠤᠯᠵᠤ ᠶᠠᠪᠤᠭᠰᠠᠨ ᠭᠡᠨᠡ᠃ ᠳᠠᠷᠠᠭᠠ ᠵᠢᠯ ᠨᠢ ᠰᠣᠶᠣᠯ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠨᠥᠯᠥᠭᠡ ᠪᠡᠷ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠤ᠋ ᠲᠠᠬᠢᠯᠭᠠ ᠲᠠᠯᠬᠢᠭᠳᠠᠭᠰᠠᠨ ᠶᠤᠮ᠃
ᠣᠳᠣ ᠶ᠋ᠢᠨ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠨᠤᠲᠤᠭ ᠭᠠᠯᠠᠭᠤᠲᠤ ᠰᠤᠮᠤᠨ ᠤ᠋ ᠬᠥᠬᠡᠨᠠᠭᠤᠷ ᠭᠠᠴᠠᠭᠠ ᠪᠣᠯ ᠬᠣᠢᠲᠤ ᠵᠡᠭᠦᠨ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠣᠬᠢ ᠭᠢᠯᠭᠠᠨᠠ᠂ ᠰᠢᠪᠠᠭ ᠬᠠᠷᠭᠠᠨᠠ ᠬᠥᠬᠡᠷᠡᠨ᠂ ᠮᠠᠭᠠᠰᠢᠭᠠᠢ᠂ ᠴᠠᠭᠠᠨ ᠲᠣᠯᠣᠭᠠᠢ᠂ ᠲᠡᠮᠦᠷ ᠣᠪᠣᠭᠠᠨ ᠰᠢᠯᠢ ᠵᠠᠯᠭᠠᠯᠳᠤᠵᠤ᠂ ᠡᠮᠦᠨᠡ ᠪᠠᠷᠠᠭᠤᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠰᠣᠯᠢ᠂ ᠬᠤᠯᠤᠰᠤ᠂ ᠪᠤᠷᠭᠠᠰᠤ ᠪᠤᠲᠠ ᠨᠠᠢᠭᠤᠭᠰᠠᠨ ᠰᠣᠯᠢᠲᠦ ᠶ᠋ᠢᠨ ᠣᠷᠣᠢ᠂ ᠬᠠᠷᠭᠠᠨᠠᠲᠦ ᠶ᠋ᠢᠨ ᠪᠠᠯᠠᠷ ᠦᠷᠭᠦᠯᠵᠢᠯᠡᠨ᠂ ᠲᠡᠭᠦᠨ ᠦ᠌ ᠳᠤᠮᠳᠠᠭᠤᠷ ᠣᠮᠪᠤᠢ᠂ ᠬᠥᠬᠡᠨᠠᠭᠤᠷ᠂ ᠴᠢᠨᠳᠠ ᠶ᠋ᠢᠨ ᠴᠠᠢᠳᠠᠮ ᠴᠡᠩᠬᠡᠷᠯᠡᠭᠡᠳ᠂ ᠴᠡᠭᠡᠨ ᠲᠤᠶᠠᠭᠠ ᠲᠠᠲᠠᠭᠰᠠᠨ ᠬᠥᠬᠡ ᠨᠠᠭᠤᠷ᠂ ᠪᠠᠭᠠ ᠨᠠᠭᠤᠷ᠂ ᠪᠠᠷᠰᠤᠩᠭᠤ ᠶ᠋ᠢᠨ ᠨᠠᠭᠤᠷ ᠪᠠ ᠬᠤᠯᠤᠰᠤᠲᠤ ᠪᠤᠯᠠᠭ᠂ ᠪᠠᠶᠠᠨ ᠪᠤᠯᠠᠭ᠂ ᠣᠯᠠᠨ ᠪᠦᠷᠢᠳᠦ ᠶ᠋ᠢᠨ ᠤᠰᠤ ᠨᠢ ᠬᠥᠬᠡᠨᠠᠭᠤᠷ ᠤ᠋ᠨ ᠪᠠᠯᠠᠷ ᠮᠠᠩᠬᠠ᠂ ᠰᠢᠯᠢ ᠴᠠᠢᠳᠠᠮ᠂ ᠬᠥᠳᠡᠭᠡ ᠭᠣᠪᠢ ᠶ᠋ᠢ ᠤᠮᠳᠠᠯᠠᠭᠰᠠᠨ ᠠ᠋ᠴᠠ᠂ ᠠᠳᠤᠭᠤ ᠮᠠᠯ ᠪᠡᠯᠴᠢᠨ ᠦᠷᠡᠵᠢᠬᠦ ᠳ᠋ᠦ᠍ ᠲᠣᠬᠢᠷᠠᠮᠵᠢᠲᠠᠢ ᠰᠠᠢᠬᠠᠨ ᠨᠤᠲᠤᠭ ᠶᠤᠮ᠃ 1975 ᠣᠨ ᠪᠣᠯᠬᠤ ᠳ᠋ᠤ᠌ ᠬᠥᠬᠡᠨᠠᠭᠤᠷ ᠭᠠᠴᠠᠭᠠᠨ ᠤ᠋ ᠠᠳᠤᠭᠤᠨ ᠰᠦᠷᠦᠭ ᠨᠢ ᠮᠢᠩᠭᠠᠨ ᠲᠠᠪᠤᠨ ᠵᠠᠭᠤᠨ ᠲᠣᠯᠣᠭᠠᠢ ᠶ᠋ᠢ ᠳᠠᠪᠠᠵᠤ᠂ ᠣᠢᠷᠠ ᠣᠷᠴᠢᠮ ᠳ᠋ᠠᠭᠠᠨ ᠠᠳᠤᠭᠤᠨ ᠲᠣᠭᠠ ᠲᠣᠯᠣᠭᠠᠢ ᠪᠠᠷ ᠬᠠᠮᠤᠭ ᠣᠯᠠᠨ ᠭᠠᠴᠠᠭᠠ ᠪᠠᠢᠭᠰᠠᠨ ᠪᠢᠯᠡ᠃
ᠥᠨᠥ ᠶ᠋ᠢᠨ ᠥᠨᠳᠡᠭᠡᠨ ᠴᠠᠭᠠᠨ ᠮᠣᠷᠢᠨ ᠤᠨᠠᠭᠠᠨ ᠪᠠᠭᠤᠴᠠ ᠪᠣᠯ ᠶᠡᠬᠡᠴᠦᠳ ᠦ᠋ᠨ ᠶᠠᠷᠢᠶᠠᠨ ᠤ᠋ ᠭᠡᠩᠬᠡᠢ (ᠬᠡᠩᠭᠡᠷᠭᠡ) ᠶ᠋ᠢᠨ ᠬᠣᠲᠠ ᠶᠢᠨ ᠬᠣᠢᠲᠤ ᠡᠭᠦᠳᠡᠨ ᠡᠴᠡ ᠬᠣᠢᠰᠢ ᠨᠢᠭᠡ ᠺᠢᠯᠣᠮᠧᠲ᠋ᠷ ᠵᠠᠢ ᠲᠠᠢ ᠪᠠᠢᠵᠤ ᠨᠤᠲᠤᠭ ᠤ᠋ᠨ ᠪᠠᠢᠷᠢ ᠪᠠᠢᠴᠠ ᠨᠢ ᠡᠮᠦᠨᠡ ᠪᠡᠨ ᠬᠥᠬᠡᠨᠠᠭᠤᠷ᠂ ᠬᠥᠬᠡᠨᠠᠭᠤᠷ ᠤ᠋ᠨ ᠵᠡᠭᠦᠨ ᠬᠣᠢᠲᠠᠢ ᠨᠢ ᠪᠤᠷᠬᠠᠨ ᠬᠠᠲᠠᠭᠤ᠂ ᠬᠥᠬᠡᠨᠠᠭᠤᠷ ᠤ᠋ᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠳᠠᠭᠢᠨᠢ ᠶ᠋ᠢᠨ ᠬᠠᠲᠠᠭᠤ᠂ ᠪᠠᠷᠠᠭᠤᠨ ᠬᠣᠢᠰᠢ ᠪᠠᠨ ᠪᠠᠷᠤᠭ ᠬᠣᠶᠠᠷ ᠺᠢᠯᠣᠮᠧᠲ᠋ᠷ ᠲᠦ᠍ ᠭᠣᠷᠭᠣᠢ ᠶ᠋ᠢᠨ ᠣᠷᠣᠢ ᠪᠠᠢᠳᠠᠭ᠂ ᠬᠥᠬᠡᠨᠠᠭᠤᠷ ᠤ᠋ᠨ ᠪᠠᠷᠠᠭᠤᠨ ᠬᠣᠢᠲᠤ ᠡᠬᠢ ᠤᠷᠤᠭᠤ ᠨᠢ ᠮᠤᠬᠤᠷ ᠭᠣᠣᠯ ᠴᠢᠳᠬᠤᠳᠠᠭ᠃ ᠵᠡᠭᠦᠨ ᠡᠮᠦᠨᠡᠰᠢ ᠪᠠᠷᠤᠭ ᠠᠷᠪᠠᠨ ᠺᠢᠯᠣᠮᠧᠲ᠋ᠷ ᠵᠠᠢ ᠳ᠋ᠤ᠌ ᠲᠡᠮᠦᠷ ᠣᠪᠣᠭᠠ ᠪᠠᠢᠳᠠᠭ᠃ ᠲᠤᠬᠠᠢ ᠭᠠᠵᠠᠷ ᠤ᠋ᠨ ᠳᠣᠮᠣᠭ ᠲᠤ᠌ ᠳᠠᠭᠢᠨᠢ ᠶ᠋ᠢᠨ ᠬᠠᠲᠠᠭᠤ ᠳᠡᠭᠡᠷᠡ ᠵᠤᠨ ᠤ᠋ ᠳᠡᠯᠭᠡᠷ ᠰᠠᠢᠬᠠᠨ ᠤᠯᠠᠷᠢᠯ ᠳ᠋ᠤ᠌ ᠲᠡᠭᠷᠢ ᠶ᠋ᠢᠨ ᠳᠣᠯᠣᠭᠠᠨ ᠪᠤᠷᠬᠠᠨ ᠣᠳᠣᠨ ᠤ᠋ ᠳᠣᠯᠣᠭᠠᠨ ᠬᠤᠪᠢᠯᠭᠠᠨ ᠥᠬᠢᠨ ᠪᠠᠭᠤᠵᠤ᠂ ᠡᠨᠡᠬᠦ ᠮᠤᠬᠤᠷ ᠭᠣᠣᠯ ᠳ᠋ᠤ᠌ ᠪᠡᠶᠡ ᠪᠡᠨ ᠤᠬᠢᠶᠠᠵᠤ ᠨᠠᠭᠠᠳᠳᠠᠭ ᠭᠡᠳᠡᠭ᠃ ᠡᠢᠮᠦ ᠡᠴᠡ ᠡᠷᠲᠡ ᠳ᠋ᠡᠭᠡᠨ ᠮᠤᠬᠤᠷ ᠭᠣᠣᠯ ᠳ᠋ᠤ᠌ ᠯᠣᠰᠣᠳ ᠤ᠋ᠨ ᠲᠠᠬᠢᠯᠭᠠ ᠬᠢᠵᠦ ᠪᠠᠢᠭᠰᠠᠨ ᠭᠡᠨᠡ᠃ ᠣᠢᠷᠠ ᠶ᠋ᠢᠨ ᠬᠡᠳᠦᠨ ᠵᠢᠯ ᠡᠴᠡ ᠳᠠᠬᠢᠨ ᠰᠡᠷᠭᠦᠭᠡᠭᠳᠡᠵᠦ ᠪᠣᠢ᠃ ᠥᠨᠳᠡᠭᠡᠨ ᠴᠠᠭᠠᠨ ᠮᠣᠷᠢᠨ ᠤ᠋ ᠤᠨᠠᠭᠠᠨ ᠪᠠᠭᠤᠴᠠ ᠪᠣᠯ ᠡᠢᠮᠦ ᠰᠢᠨᠵᠢ ᠲᠡᠭᠦᠰ ᠨᠤᠲᠤᠭ ᠪᠢᠯᠡ᠃
1984 ᠣᠨ ᠤ᠋ ᠣᠷᠳᠣᠰ ᠲᠣᠭᠠᠯᠠᠯ ᠤ᠋ᠨ ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ 21 ᠦ᠌ ᠡᠳᠦᠷ ᠪᠣᠯ ᠨᠢᠭᠡᠨ ᠪᠠᠶᠠᠷ ᠪᠡᠯᠭᠡᠰᠢᠶᠡᠯᠲᠡ ᠲᠡᠢ ᠡᠳᠦᠷ ᠭᠡᠳᠡᠭ ᠢ᠋ ᠮᠣᠩᠭᠣᠯᠴᠤᠳ ᠪᠦᠬᠦᠨ ᠮᠡᠳᠡᠳᠡᠭ᠂ ᠡᠨᠡ ᠡᠳᠦᠷ ᠮᠠᠨ ᠤ᠋ ᠭᠡᠷ ᠦ᠋ᠨ ᠨᠠᠰᠤᠲᠠᠢᠴᠤᠳ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠵᠦᠭ ᠬᠠᠨᠳᠤᠨ ᠥᠷᠯᠥᠭᠡ ᠡᠷᠲᠡ ᠰᠠᠴᠤᠯᠤᠭᠠ ᠨᠢᠨᠳᠠᠷ ᠢ᠋ᠶ᠋ᠠᠨ ᠡᠷᠭᠦᠴᠡᠭᠡᠳ ᠴᠠᠢ ᠪᠠᠨ ᠯᠠᠪᠳᠠᠭᠤᠨ ᠤᠤᠭᠤᠵᠤ ᠭᠠᠷᠬᠤᠯᠠᠷ᠂ ᠮᠣᠷᠢᠨ ᠳᠠᠯᠤ ᠳᠡᠭᠡᠷᠡ ᠤᠶᠠᠵᠤ ᠪᠠᠢᠭᠰᠠᠨ ᠤᠨᠠᠭᠠᠯᠠᠬᠤ ᠭᠡᠳ ᠬᠣᠶᠠᠷ ᠡᠳᠦᠷ ᠪᠣᠯᠤᠭᠰᠠᠨ ᠴᠠᠭᠠᠭᠴᠢ ᠭᠣᠣ ᠠ᠋ᠴᠠ ᠨᠢ ᠨᠢᠭᠡ ᠰᠠᠢᠬᠠᠨ ᠴᠠᠭᠠᠨ ᠰᠢᠷᠭᠠ ᠤᠨᠠᠭᠠ ᠤᠨᠠᠭᠠᠯᠠᠵᠤ ᠥᠪᠡᠷ ᠢ᠋ᠶ᠋ᠡᠨ ᠰᠠᠯᠠᠢ ᠪᠠᠨ ᠲᠡᠢᠷᠵᠦ ᠪᠣᠰᠤᠭᠠᠳ ᠵᠣᠭᠰᠣᠴᠢᠬᠠᠭᠰᠠᠨ ᠪᠠᠢᠬᠤ ᠳ᠋ᠤ᠌᠂ ᠮᠢᠨᠦ ᠠᠪᠤ ᠦᠵᠡᠭᠡᠳ ᠡᠨᠡ ᠤᠨᠠᠭᠠ ᠪᠠᠰᠠ ᠡᠳᠦᠷ ᠦ᠋ᠨ ᠰᠠᠢᠨ ᠢ᠋ ᠰᠣᠩᠭᠣᠵᠤ ᠤᠨᠠᠭᠠᠯᠠᠳᠠᠭ ᠶᠤᠮ ᠪᠠᠢᠨᠠ᠃ ᠤᠨᠠᠭᠠᠯᠠᠬᠤ ᠮᠠᠶᠢᠭ ᠭᠠᠷᠤᠭᠠᠳ ᠬᠡᠳᠦ ᠬᠣᠨᠣᠭᠰᠠᠨ᠂ ᠥᠴᠥᠭᠡᠳᠦᠷ ᠬᠠᠷᠢᠭᠤ ᠠᠰᠬᠠᠭᠰᠠᠨ᠂ ᠬᠠᠷᠢᠨ ᠡᠨᠡ ᠥᠷᠯᠥᠭᠡ ᠤᠨᠠᠭᠠᠯᠠᠬᠤ ᠮᠥᠷᠲᠡᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠪᠣᠰᠤᠭᠠᠳ ᠢᠷᠡᠴᠡᠬᠦ ᠨᠢ ᠭᠡᠳ ᠳᠤᠭᠤᠢᠯᠠᠨ ᠬᠠᠷᠠᠵᠤ ᠪᠠᠢᠬᠤ ᠳ᠋ᠤ᠌᠂ ᠡᠮᠦᠨᠡ ᠪᠠᠢᠭᠠ ᠪᠤᠷᠬᠠᠨ ᠬᠠᠲᠠᠭᠤ ᠶ᠋ᠢᠨ ᠲᠡᠨᠳᠡ ᠰᠣᠯᠣᠩᠭᠠ ᠲᠠᠲᠠᠵᠤ ᠪᠠᠢᠭᠰᠠᠨ ᠢ᠋ ᠬᠠᠷᠠᠭᠰᠠᠨ ᠭᠡᠨᠡ᠃
1986 ᠣᠨ ᠪᠣᠯᠵᠤ᠂ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠤ᠋ ᠬᠢᠨ ᠥᠨᠳᠡᠭᠡᠨ ᠴᠠᠭᠠᠨ ᠢ᠋ ᠬᠠᠢᠬᠤ ᠵᠠᠷ ᠲᠠᠷᠬᠠᠭᠠᠨ᠂ ᠪᠣᠭᠳᠠ ᠶ᠋ᠢᠨ ᠶᠠᠮᠤᠲᠠᠨ ᠤ᠋ᠨ ᠠᠬᠠᠯᠠᠭᠴᠢ ᠭᠠᠷᠤᠳᠠᠢ ᠭᠤᠸᠠᠢ᠂ ᠣᠲᠣᠭ ᠬᠣᠰᠢᠭᠤ ᠪᠠᠷ ᠬᠠᠢᠵᠤ ᠶᠠᠪᠤᠵᠤ ᠪᠠᠢᠭᠠᠳ᠂ ᠰᠢᠨᠠᠵᠤᠤ ᠰᠤᠮᠤ ᠪᠠᠷ ᠨᠡᠭᠦᠳᠡᠯᠯᠡᠵᠦ ᠰᠠᠭᠤᠭᠰᠠᠨ ᠸᠠᠩᠴᠢᠨ ᠡᠮᠴᠢ ᠶ᠋ᠢᠨ ᠳ᠋ᠦ᠍ ᠬᠦᠷᠴᠦ᠂ ᠠᠷᠪᠠᠨ ᠬᠡᠳᠦᠨ ᠰᠢᠷᠠᠭᠴᠢ ᠳᠠᠭᠠ᠂ ᠰᠢᠳᠦᠯᠡᠩ ᠪᠠᠢᠬᠤ ᠳ᠋ᠤ᠌᠂ ᠸᠠᠩᠴᠢᠨ ᠡᠮᠴᠢ ᠡᠴᠡ᠂ ᠡᠳᠡᠨ ᠦ᠌ ᠨᠤᠲᠤᠭ ᠲᠤ᠌ ᠠᠳᠤᠭᠤ ᠪᠠᠨ ᠣᠲᠤᠷᠯᠠᠭᠤᠯᠠᠨ ᠮᠠᠯᠵᠢᠵᠤ ᠪᠠᠢᠭᠰᠠᠨ᠂ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠭᠠᠯᠠᠭᠤᠲᠤ ᠰᠤᠮᠤᠨ ᠤ᠋ ᠬᠥᠬᠡᠨᠠᠭᠤᠷ ᠭᠠᠴᠠᠭᠠᠨ ᠤ᠋ ᠬᠥᠬᠡᠨᠠᠭᠤᠷ ᠮᠠᠯᠵᠢᠯ ᠤ᠋ᠨ ᠬᠣᠷᠰᠢᠶᠠᠨ ᠤ᠋ ᠣᠢᠭᠤᠳ ᠣᠪᠣᠭ ᠲᠠᠢ᠂ ᠪᠠᠨᠽᠠᠷᠭᠠᠷᠤᠳᠠᠢ ᠶ᠋ᠢᠨ ᠬᠦᠦ ᠴᠢᠯᠠᠭᠤᠨᠪᠠᠭᠠᠲᠤᠷ ᠤ᠋ᠨ ᠠᠳᠤᠭᠤᠨ ᠰᠦᠷᠦᠭ ᠲᠦ᠍᠂ ᠨᠢᠭᠡᠨ ᠰᠢᠷᠠᠭᠴᠢ ᠳᠠᠭᠠ ᠪᠠᠢᠬᠤ ᠶ᠋ᠢ ᠬᠡᠯᠡᠵᠦ᠂ ᠡᠨᠡᠬᠦ ᠥᠨᠳᠡᠭᠡᠨ ᠴᠠᠭᠠᠨ ᠢ᠋ ᠰᠣᠩᠭᠣᠬᠤ ᠰᠣᠩᠭᠣᠯᠲᠠ ᠳ᠋ᠤ᠌ ᠣᠷᠣᠭᠤᠯᠵᠠᠢ᠃ ᠡᠨᠡ ᠤᠨᠠᠭᠠ ᠨᠢ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠤ᠋ ᠬᠢᠨ ᠡᠷᠢᠭᠡᠳ ᠡᠷᠢᠭᠡᠳ ᠣᠯᠳᠠᠳᠠᠭ ᠦᠭᠡᠢ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠳᠦᠷᠢ ᠲᠥᠯᠥᠪ ᠨᠠᠮᠪᠠ ᠪᠦᠷᠢᠯᠳᠦᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠣᠩᠭᠣᠭᠳᠠᠭᠰᠠᠨ ᠪᠢᠯᠡ᠃ ᠪᠣᠭᠳᠠ ᠶ᠋ᠢᠨ ᠶᠠᠮᠤᠲᠠᠨ ᠤ᠋ᠨ ᠠᠬᠠᠯᠠᠭᠴᠢ ᠭᠠᠷᠤᠳᠠᠢ ᠭᠤᠸᠠᠢ᠂ ᠴᠠᠰᠤ ᠴᠠᠭᠠᠨ ᠬᠠᠳᠠᠭ ᠢ᠋ᠶ᠋ᠠᠨ ᠴᠢᠯᠠᠭᠤᠨᠪᠠᠭᠠᠲᠤᠷ ᠤ᠋ᠨ ᠠᠳᠤᠭᠤᠨ ᠰᠦᠷᠦᠭ ᠦ᠋ᠨ ᠡᠨᠡ ᠰᠠᠢᠬᠠᠨ ᠳᠠᠭᠠ ᠶ᠋ᠢᠨ ᠬᠦᠵᠦᠭᠦᠨ ᠳ᠋ᠦ᠍ ᠵᠡᠭᠦᠯᠭᠡᠨ᠂ ᠵᠠᠩᠭᠢᠶᠠ ᠵᠠᠩᠭᠢᠳᠴᠤ᠂ 《ᠡᠵᠡᠨ ᠰᠦᠯᠳᠡ ᠶ᠋ᠢᠨ ᠰᠠᠩ 》 ᠤᠩᠰᠢᠵᠤ᠂ ᠣᠩᠭᠣᠯᠠᠨ ᠰᠡᠲᠡᠷᠯᠡᠵᠦ ᠲᠠᠯᠪᠢᠵᠠᠢ᠃
ᠶᠠᠮᠤᠲᠠᠳ ᠭᠠᠷᠤᠳᠠᠢ ᠭᠤᠸᠠᠢ᠂ ᠲᠡᠦᠬᠡᠨ ᠡᠴᠡ ᠤᠯᠠᠮᠵᠢᠯᠠᠭᠰᠠᠨ ᠣᠷᠳᠣᠰ ᠵᠢᠨᠦᠩ ᠦ᠋ᠨ ᠲᠣᠭᠲᠠᠭᠠᠭᠰᠠᠨ ᠥᠨᠳᠡᠭᠡᠨ ᠴᠠᠭᠠᠨ ᠢ᠋ ᠬᠠᠯᠠᠨ ᠡᠷᠭᠦᠭᠴᠢ ᠠᠷᠠᠳ ᠲᠤ᠌ ᠬᠦᠷᠲᠡᠭᠡᠳᠡᠭ ᠣᠯᠭᠣᠮᠵᠢ ᠶ᠋ᠢ ᠮᠥᠷᠳᠡᠨ᠃ ᠡᠨᠡ ᠥᠨᠳᠡᠭᠡᠨ ᠴᠠᠭᠠᠨ ᠢ᠋ 300 ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠦᠨᠡᠯᠡᠨ᠂ ᠴᠢᠯᠠᠭᠤᠨᠪᠠᠭᠠᠲᠤᠷ ᠲᠤ᠌ ᠭᠠᠷᠳᠠᠭᠤᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠦᠭᠡᠢ᠂ ᠪᠣᠭᠳᠠ ᠴᠢᠩᠭᠢᠰ ᠦ᠋ᠨ ᠰᠢᠲᠦᠭᠡᠨ ᠳ᠋ᠡᠭᠡᠨ ᠡᠷᠭᠦᠨ ᠳᠡᠪᠰᠢᠭᠦᠯᠵᠡᠢ᠃ ᠢᠩᠭᠢᠭᠡᠳ ᠡᠨᠡ ᠥᠨᠳᠡᠭᠡᠨ ᠴᠠᠭᠠᠨ ᠢ᠋ ᠬᠠᠷᠠᠵᠤ ᠬᠠᠢᠬᠤ ᠡᠭᠦᠷᠭᠡ ᠶ᠋ᠢ ᠰᠢᠨᠠᠵᠤᠤ ᠰᠤᠮᠤᠨ ᠳ᠋ᠤ᠌ ᠰᠠᠭᠤᠭᠠ ᠳᠠᠷᠬᠠᠳ ᠲᠦᠮᠡᠨᠬᠡᠰᠢᠭ᠂ ᠸᠠᠩᠴᠢᠨ ᠨᠠᠷ ᠲᠤ᠌ ᠨᠠᠢᠳᠠᠭᠠᠳ ᠶᠠᠮᠤᠲᠠᠳ ᠭᠠᠷᠤᠳᠠᠢ ᠭᠤᠸᠠᠢ ᠪᠤᠴᠠᠵᠠᠢ᠃
1988 ᠣᠨ ᠬᠦᠷᠦᠭᠡᠳ᠂ ᠣᠷᠳᠣᠰ ᠤ᠋ᠨ ᠣᠨ ᠲᠣᠭᠠᠯᠠᠯ ᠤ᠋ᠨ 5 ᠰᠠᠷᠠ ᠶ᠋ᠢᠨ 25 ᠤ᠋ ᠡᠳᠦᠷ᠂ ᠴᠢᠬᠢ ᠶ᠋ᠢᠨ ᠴᠠᠢᠳᠠᠮ ᠠ᠋ᠴᠠ ᠳᠥᠷᠪᠡᠨ ᠨᠠᠰᠤᠲᠠᠢ ᠥᠨᠳᠡᠭᠡᠨ ᠴᠠᠭᠠᠨ ᠢ᠋᠂ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠤ᠋ ᠳᠠᠷᠬᠠᠳ᠂ ᠭᠣᠮᠪᠤᠳᠣᠷᠵᠢ ᠶ᠋ᠢᠨ ᠪᠠᠶᠠᠨᠴᠡᠩᠭᠡᠯ ᠣᠴᠢᠵᠤ᠂ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠳᠦ ᠬᠣᠨᠣᠨ᠂ ᠠᠢᠯ ᠤ᠋ᠨ ᠬᠥᠮᠦᠰ ᠥᠨᠳᠡᠭᠡᠨ ᠴᠠᠭᠠᠨ ᠠ᠋ᠴᠠ ᠠᠳᠢᠰ ᠬᠦᠷᠲᠡᠨ᠂ ᠠᠯᠲᠠᠨ ᠭᠠᠨᠳᠠᠷᠢ ᠶ᠋ᠢᠨ ᠰᠢᠯᠢ ᠳ᠋ᠦ᠍ ᠵᠠᠯᠠᠵᠤ ᠠᠪᠴᠢᠷᠠᠵᠠᠢ᠃ 1988 ᠣᠨ ᠤ᠋ ᠣᠷᠳᠣᠰ ᠲᠣᠭᠠᠯᠠᠯ ᠤ᠋ᠨ 6 ᠰᠠᠷᠠ ᠶ᠋ᠢᠨ 21 ᠦ᠌ ᠴᠠᠭᠠᠨ ᠰᠦᠷᠦᠭ ᠦ᠋ᠨ ᠳᠠᠢᠯᠭᠠ ᠶ᠋ᠢᠨ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠡᠷᠲᠡ᠂ ᠥᠨᠳᠡᠭᠡᠨ ᠴᠠᠭᠠᠨ ᠢ᠋ ᠠᠷᠢᠭᠤᠳᠬᠠᠬᠤ ᠶᠣᠰᠣᠯᠠᠯ ᠢ᠋ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠤ᠋ ᠲᠣᠮᠣ ᠬᠦᠷᠢᠶᠡᠨ ᠳ᠋ᠦ᠍ ᠪᠠᠢᠭᠠ ᠬᠠᠷᠢᠶᠠ ᠶᠡᠬᠡᠲᠦ ᠬᠠᠷᠠ ᠰᠦᠯᠳᠡ ᠶ᠋ᠢ ᠳᠠᠬᠢᠵᠤ ᠪᠠᠢᠭᠠ ᠰᠢᠲᠦᠭᠡᠨ ᠣᠷᠣᠰᠢᠭᠰᠠᠨ ᠭᠠᠵᠠᠷ ᠤ᠋ᠨ ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠳ᠋ᠤ᠌ ᠬᠢᠪᠡ᠃ ᠥᠷᠯᠥᠭ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠥᠨᠳᠡᠭᠡᠨ ᠴᠠᠭᠠᠨ ᠰᠢᠲᠦᠭᠡᠨ ᠢ᠋ ᠥᠩᠭᠡᠲᠦ ᠰᠠᠢᠬᠠᠨ ᠬᠡᠪᠢᠰ ᠣᠯᠪᠣᠭ ᠳᠡᠪᠢᠰᠦᠭᠰᠡᠨ ᠰᠢᠷᠡᠭᠡᠨ ᠦ᠌ ᠠᠷᠤ ᠳ᠋ᠤ᠌ ᠬᠣᠢᠰᠢ ᠬᠠᠨᠳᠤᠭᠤᠯᠤᠨ ᠵᠣᠭᠰᠣᠭᠠᠭᠠᠳ᠂ ᠲᠡᠭᠦᠨ ᠦ᠌ ᠡᠮᠦᠨᠡᠬᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠣᠨᠢᠨ ᠰᠢᠭᠦᠰᠦ᠂ ᠴᠠᠭᠠᠨ ᠢᠳᠡᠭᠡᠨ ᠦ᠌ ᠵᠦᠢᠯᠡᠰ᠂ ᠴᠢᠪᠠᠭᠠ ᠲᠠᠢ ᠪᠣᠭᠣᠷᠰᠣᠭ ᠵᠡᠷᠭᠡ ᠶ᠋ᠢ ᠲᠠᠪᠠᠭᠯᠠᠨ ᠲᠠᠯᠪᠢᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠠᠯᠲᠠᠨ ᠭᠠᠳᠠᠰᠴᠢ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠴᠤᠯᠪᠤᠭᠤᠷ ᠠ᠋ᠴᠠ ᠠᠳᠬᠤᠭᠠᠳ ᠮᠥᠨ ᠪᠠᠷᠠᠭᠤᠨ ᠬᠣᠢᠰᠢ ᠬᠠᠨᠳᠤᠨ ᠵᠣᠭᠰᠣᠪᠠ᠃ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠤ᠋ ᠶᠠᠮᠤᠨᠲᠠᠳ ᠠᠷᠢᠭᠤᠳᠬᠠᠯ ᠤ᠋ᠨ ᠨᠣᠮ ᠤᠩᠰᠢᠭᠰᠠᠨ ᠳ᠋ᠤ᠌᠂ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠪᠡᠶᠡ ᠴᠢᠩᠭᠠᠷᠠᠨ᠂ ᠪᠠᠢᠨ ᠪᠠᠢᠨ ᠬᠣᠶᠠᠷ ᠴᠢᠬᠢ ᠪᠡᠨ ᠬᠤᠯᠮᠠᠯᠵᠠᠭᠤᠯᠤᠨ ᠰᠡᠷᠲᠡᠯᠵᠡᠭᠦᠯᠵᠦ ᠂ ᠬᠣᠣᠰ ᠨᠢᠳᠦ ᠪᠡᠨ ᠪᠦᠯᠲᠡᠯᠵᠡᠭᠦᠯᠦᠨ ᠭᠥᠯᠢᠭᠡᠨᠡᠭᠦᠯᠦᠭᠰᠡᠭᠡᠷ ᠪᠠᠢᠭᠠᠳ ᠪᠦᠲᠦᠨ ᠪᠡᠶᠡ ᠨᠢ ᠬᠥᠯᠥᠷᠡᠯᠡ᠂ ᠢᠩᠭᠢᠭᠡᠳ ᠡᠨᠡ ᠡᠳᠦᠷ ᠦ᠋ᠨ ᠴᠠᠭᠠᠨ ᠰᠦᠷᠦᠭ ᠦ᠋ᠨ ᠳᠠᠢᠯᠭᠠ ᠳ᠋ᠤ᠌ ᠢᠷᠡᠭᠰᠡᠨ ᠥᠷᠭᠡᠨ ᠣᠯᠠᠨ ᠮᠥᠷᠭᠥᠯᠴᠢᠨ ᠳ᠋ᠦ᠍ ᠡᠳᠦᠷᠵᠢᠨ ᠠᠳᠢᠰ ᠲᠠᠯᠪᠢᠵᠤ ᠥᠭᠴᠡᠢ᠃
ᠳᠡᠭᠡᠷᠡ ᠵᠠᠭᠤᠨ ᠤ᠋ ᠶᠡᠷᠡᠭᠡᠳ ᠣᠨ ᠳ᠋ᠤ᠌᠂ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠤ᠋ ᠴᠠᠭᠠᠨ ᠰᠦᠷᠦᠭ ᠦ᠋ᠨ ᠶᠡᠬᠡ ᠲᠠᠬᠢᠯᠭᠠ ᠪᠠᠷ ᠨᠢᠯᠬᠠ ᠤᠨᠠᠭᠠ ᠲᠠᠢ ᠰᠢᠷᠠᠭᠴᠢ ᠭᠡᠭᠦᠦ ᠣᠯᠳᠠᠬᠤ ᠦᠭᠡᠢ ᠡᠭᠦᠷᠲᠦᠵᠦ ᠪᠠᠢᠵᠠᠢ᠃ ᠳᠠᠷᠬᠠᠳ ᠭᠦᠷᠵᠠᠪ ᠤ᠋ᠨ ᠬᠡᠯᠡᠬᠦ ᠪᠡᠷ ᠄ ᠵᠢᠯ ᠪᠦᠷᠢ ᠶ᠋ᠢᠨ ᠣᠷᠳᠣᠰ ᠲᠣᠭᠠᠯᠠᠯ ᠤ᠋ᠨ ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠨᠢᠭᠡᠨ ᠦ᠌ ᠴᠠᠭᠠᠨ ᠰᠦᠷᠦᠭ ᠦ᠋ᠨ ᠶᠡᠬᠡ ᠲᠠᠬᠢᠯᠭᠠ ᠳ᠋ᠤ᠌ ᠥᠨᠳᠡᠭᠡᠨ ᠴᠠᠭᠠᠨ ᠮᠣᠷᠢ ᠶ᠋ᠢ ᠪᠠᠲᠤ ᠵᠡᠯᠡ ᠶ᠋ᠢᠨ ᠡᠬᠢᠨ ᠳ᠋ᠦ᠍ ᠤᠶᠠᠵᠤ᠂ ᠳᠠᠷᠠᠭᠠᠯᠠᠨ ᠤᠨᠠᠭᠠ ᠲᠠᠢ ᠰᠢᠷᠠᠭᠴᠢ ᠭᠡᠭᠦᠦ ᠶ᠋ᠢ ᠤᠶᠠᠵᠤ᠂ ᠰᠢᠷᠠᠭᠴᠢᠭᠡᠭᠦᠦ ᠶᠢᠨ ᠰᠦ ᠶ᠋ᠢ ᠪᠣᠷᠣ ᠥᠨᠳᠥᠷ ᠲᠦ᠍ ᠬᠢᠵᠦ 《ᠡᠰᠦᠭ ᠦ᠋ᠨ ᠰᠠᠴᠤᠯᠭᠠ 》 ᠰᠠᠴᠤᠳᠠᠭ᠃ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠶᠡᠷᠡ ᠶᠢᠰᠦᠨ ᠴᠠᠭᠠᠭᠴᠢᠨ ᠭᠡᠭᠦᠦ ᠶᠢᠨ ᠰᠦ ᠪᠡᠷ ᠰᠠᠴᠤᠯᠢ ᠡᠷᠭᠦᠳᠡᠭ ᠪᠠᠢᠭᠰᠠᠨ᠂ ᠡᠭᠦᠨ ᠢ᠋ ᠰᠣᠨᠣᠰᠤᠭᠰᠠᠨ ᠥᠨᠳᠡᠭᠡᠨ ᠴᠠᠭᠠᠨ ᠮᠣᠷᠢᠨ ᠤ᠋ ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠠᠳᠤᠭᠤᠴᠢᠨ ᠴᠢᠯᠠᠭᠤᠨᠪᠠᠭᠠᠲᠤᠷ ᠲᠤ᠌ ᠶᠠᠷᠢᠭᠰᠠᠨ ᠳ᠋ᠤ᠌ ᠄ 《ᠵᠠ! ᠮᠢᠨᠦ ᠠᠳᠤᠭᠤᠨ ᠳ᠋ᠤ᠌ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠡᠬᠡ ᠰᠢᠷᠠᠭᠴᠢ ᠭᠡᠭᠦᠦ ᠬᠡᠭᠡᠯ ᠲᠡᠢ ᠪᠣᠢ᠃ ᠪᠢ ᠲᠡᠭᠦᠨ ᠢ᠋ᠶ᠋ᠡᠨ ᠴᠢᠩ ᠰᠦᠰᠦᠭ ᠡᠴᠡ ᠪᠡᠨ ᠪᠣᠭᠳᠠ ᠳ᠋ᠤ᠌ ᠡᠷᠭᠦᠵᠦ ᠢᠷᠡᠬᠦ ᠵᠢᠯ ᠦ᠋ᠨ ᠬᠣᠷᠢᠨ ᠨᠢᠭᠡᠨ ᠦ᠌ ᠴᠠᠭᠠᠨ ᠰᠦᠷᠦᠭ ᠦ᠋ᠨ ᠶᠡᠬᠡ ᠲᠠᠬᠢᠯᠭᠠ ᠳ᠋ᠤ᠌ ᠪᠠᠲᠤ ᠵᠡᠯᠡ ᠡᠴᠡ ᠤᠶᠠᠵᠤ ᠰᠦ ᠶ᠋ᠢ ᠨᠢ ᠪᠣᠷᠣ ᠥᠨᠳᠥᠷ ᠲᠦ᠍ ᠨᠡᠮᠡᠷᠢᠯᠡᠵᠦ ᠮᠥᠩᠬᠡ ᠲᠩᠷᠢ ᠳ᠋ᠦ᠍ ᠰᠠᠴᠤᠯᠢ ᠡᠷᠭᠦᠶᠡ! 》 ᠭᠡᠪᠡ᠃
ᠠᠳᠤᠭᠤᠴᠢᠨ ᠴᠢᠯᠠᠭᠤᠨᠪᠠᠭᠠᠲᠤᠷ ᠥᠨᠳᠡᠭᠡᠨ ᠴᠠᠭᠠᠨ ᠮᠣᠷᠢ ᠪᠠᠨ ᠦᠨᠡ ᠲᠥᠯᠥᠪᠦᠷᠢ ᠦᠭᠡᠢ ᠪᠡᠷ ᠡᠷᠭᠦᠨ ᠪᠠᠷᠢᠭᠰᠠᠨ ᠤ᠋ ᠳᠠᠷᠠᠭᠠ᠂ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠡᠬᠡ — ᠰᠢᠷᠠᠭᠴᠢ ᠭᠡᠭᠦᠦ ᠪᠡᠨ ᠪᠠᠰᠠ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠳ᠋ᠤ᠌ ᠦᠨᠡ ᠲᠥᠯᠥᠪᠦᠷᠢ ᠦᠭᠡᠢ ᠪᠡᠷ ᠡᠷᠭᠦᠵᠡᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠣᠶᠠᠷ ᠰᠢᠷᠭᠠ ᠪᠦᠷ ᠣᠩᠭᠣᠨ ᠤ᠋ ᠬᠣᠷᠢᠭᠤᠯ ᠬᠦᠷᠢᠶᠡᠨ ᠳ᠋ᠦ᠍ ᠶᠠᠪᠤᠵᠤ ᠪᠠᠢᠭᠰᠠᠨ᠂ ᠲᠡᠷᠡ ᠴᠠᠭ ᠲᠤ᠌ ᠡᠳ᠋ ᠮᠥᠩᠭᠥ ᠬᠣᠪᠣᠷ᠂ ᠡᠪᠡᠰᠦ ᠪᠡᠯᠴᠢᠭᠡᠷ ᠳᠤᠲᠠᠭᠳᠠᠵᠤ᠂ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠡᠬᠡ — ᠰᠢᠷᠠᠭᠴᠢ ᠭᠡᠭᠦᠦ ᠶ᠋ᠢ ᠬᠤᠳᠠᠯᠳᠤᠬᠤ ᠪᠠᠷ ᠰᠢᠢᠳᠪᠡ᠃ ᠠᠩᠬᠠ ᠤᠳᠠᠭᠠ᠂ ᠪᠣᠷᠤᠪᠠᠰᠦ ᠭᠡᠳᠡᠭ ᠬᠥᠮᠦᠨ ᠳ᠋ᠦ᠍ ᠬᠤᠳᠠᠯᠳᠤᠯᠠ᠃ ᠨᠢᠭᠡ ᠤᠳᠠᠭᠠ ᠥᠨᠳᠡᠭᠡᠨ ᠴᠠᠭᠠᠨ᠂ ᠡᠨᠡ ᠠᠢᠯ ᠤ᠋ᠨ ᠭᠡᠷ ᠦ᠋ᠨ ᠭᠠᠳᠠᠨᠠ ᠠ᠋ᠴᠠ ᠭᠤᠷᠪᠠᠨ ᠨᠠᠰᠤᠲᠠᠢ ᠬᠡᠦᠬᠡᠳ ᠢ᠋ ᠨᠢ ᠴᠠᠮᠴᠠᠨ ᠠ᠋ᠴᠠ ᠨᠢ ᠵᠠᠭᠤᠭᠠᠳ ᠠᠯᠲᠠᠨ ᠭᠠᠨᠳᠠᠷᠢ ᠶ᠋ᠢᠨ ᠣᠪᠣᠭᠠᠨ ᠳᠡᠷᠭᠡᠳᠡ ᠠᠪᠠᠴᠢᠵᠤ ᠬᠠᠶᠠᠵᠠᠢ᠂ ᠭᠡᠪᠡᠴᠦ ᠡᠨᠡ ᠬᠡᠦᠬᠡᠳ ᠦ᠋ᠨ ᠪᠡᠶᠡ ᠳ᠋ᠦ᠍ ᠨᠢ ᠶᠠᠮᠠᠷᠴᠤ ᠰᠢᠷᠬᠠ ᠰᠣᠷᠪᠢ ᠣᠷᠣᠭᠤᠯᠤᠭᠰᠠᠨ ᠦᠭᠡᠢ᠂ ᠢᠩᠭᠢᠭᠡᠳ ᠡᠨᠡ ᠠᠢᠯ ᠰᠡᠵᠢᠭᠯᠡᠨ᠂ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠡᠬᠡ — ᠰᠢᠷᠠᠭᠴᠢ ᠭᠡᠭᠦᠦ ᠶ᠋ᠢᠨ ᠠᠷᠠᠯᠵᠢᠶᠠ ᠪᠠᠨ ᠪᠤᠴᠠᠭᠠᠪᠠ᠃ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠨᠢ᠂ ᠰᠢᠷᠠᠭᠴᠢ ᠭᠡᠭᠦᠦ ᠶ᠋ᠢ ᠰᠢᠯᠢ ᠶ᠋ᠢᠨ ᠯᠠᠮᠠ ᠭᠡᠳᠡᠭ ᠬᠥᠮᠦᠨ ᠲᠡᠢ ᠨᠢᠭᠡ ᠮᠣᠷᠢ ᠪᠠᠷ ᠰᠣᠯᠢᠪᠠ᠂ ᠭᠡᠪᠡᠴᠦ ᠡᠷᠡᠭᠦᠯ ᠪᠠᠢᠭᠰᠠᠨ ᠲᠡᠷᠡ ᠯᠠᠮᠠ ᠭᠡᠨᠡᠳᠲᠡ ᠨᠠᠷᠢ ᠡᠪᠡᠳᠴᠢᠨ ᠣᠷᠣᠭᠰᠠᠨ ᠲᠤᠯᠠ ᠰᠡᠵᠢᠭ ᠲᠥᠷᠥᠭᠡᠳ ᠠᠷᠠᠯᠵᠢᠶᠠ ᠪᠠᠨ ᠪᠤᠴᠠᠭᠠᠪᠠ᠃ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠨᠢ᠂ ᠰᠠᠶᠢ ᠤᠨᠠᠭᠠᠯᠠᠭᠰᠠᠨ ᠰᠢᠷᠠᠭᠴᠢ ᠭᠡᠭᠦᠦ ᠶ᠋ᠢ ᠤᠨᠠᠭᠠ ᠲᠠᠢ ᠨᠢ᠂ ᠪᠠᠶᠠᠨᠴᠡᠩᠭᠡᠯ ᠭᠡᠳᠡᠭ ᠬᠥᠮᠦᠨ ᠳ᠋ᠦ᠍ ᠬᠤᠳᠠᠯᠳᠤᠬᠤ ᠪᠠᠷ ᠪᠣᠯᠵᠤ᠂ ᠤᠨᠠᠭᠠ ᠲᠠᠢ ᠭᠡᠭᠦᠦ ᠶ᠋ᠢ ᠨᠢ ᠲᠣᠭᠣᠬᠤ ᠳ᠋ᠤ᠌᠂ ᠨᠢᠯᠬᠠ ᠤᠨᠠᠭᠠ ᠨᠢ ᠡᠬᠡ ᠪᠡᠨ ᠳᠠᠭᠠᠬᠤ ᠦᠭᠡᠢ ᠬᠠᠷᠢᠨ ᠠᠬᠠ ᠥᠨᠳᠡᠭᠡᠨ ᠴᠠᠭᠠᠨ ᠢ᠋ᠶ᠋ᠠᠨ ᠳᠠᠭᠠᠭᠠᠳ ᠰᠠᠯᠬᠤ ᠦᠭᠡᠢ ᠲᠤᠯᠠ᠂ ᠪᠠᠶᠠᠨᠴᠡᠩᠭᠡᠯ ᠪᠠᠰᠠ ᠡᠨᠡ ᠠᠷᠠᠯᠵᠢᠶᠠ ᠪᠠᠨ ᠪᠤᠴᠠᠭᠠᠪᠠ᠃ ᠰᠡᠭᠦᠯᠡᠷ ᠨᠢ ᠶᠡᠬᠡ ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠴᠢᠯᠠᠭᠤᠨᠪᠠᠭᠠᠲᠤᠷ ᠲᠠᠢ ᠨᠢ ᠵᠥᠪᠳᠡᠵᠦ᠂ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠡᠬᠡ ᠶ᠋ᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠭᠡᠭᠦᠦ ᠶ᠋ᠢᠨ ᠥᠳᠬᠡ ᠪᠡᠷ ᠲᠠᠬᠢᠬᠤ ᠲᠠᠬᠢᠯᠭᠠ ᠳ᠋ᠤ᠌ ᠡᠷᠭᠦᠭᠡᠳ᠂ 1952 ᠣᠨ ᠡᠴᠠ ᠲᠠᠰᠤᠷᠠᠭᠠᠳ ᠪᠠᠢᠭᠰᠠᠨ ᠳᠥᠴᠢᠨ ᠬᠡᠳᠦᠨ ᠵᠢᠯ ᠦ᠋ᠨ ᠲᠠᠬᠢᠯᠭᠠ ᠶ᠋ᠢ ᠰᠡᠷᠭᠦᠭᠡᠬᠦ ᠳ᠋ᠦ᠍ ᠵᠣᠷᠢᠭᠤᠯᠪᠠ᠃ ᠨᠢᠭᠡ ᠰᠢᠷᠠᠭᠴᠢ ᠭᠡᠭᠦᠦ ᠶ᠋ᠢᠨ ᠥᠳᠬᠡ ᠨᠠᠶᠠᠨ ᠨᠢᠭᠡᠨ ᠬᠣᠨᠢᠨ ᠰᠢᠭᠦᠰᠦ ᠲᠡᠢ ᠲᠡᠩᠴᠡᠳᠡᠭ ᠭᠡᠨᠡ᠃
1999 ᠣᠨ ᠳ᠋ᠤ᠌ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠤ᠋ ᠵᠥᠪᠰᠢᠶᠡᠷᠡᠯ ᠢ᠋ᠶ᠋ᠡᠷ ᠥᠨᠳᠡᠭᠡᠨ ᠴᠠᠭᠠᠨ ᠤᠨᠠᠭᠠᠨ ᠪᠠᠭᠤᠴᠠ ᠳ᠋ᠤ᠌ ᠢᠯᠡᠷᠬᠡᠢᠯᠡᠯ ᠰᠠᠮᠪᠠᠷᠠ (ᠫᠠᠢᠰᠠ) ᠶ᠋ᠢ ᠪᠤᠰᠬᠠᠵᠤ᠂ 2000 ᠣᠨ ᠠ᠋ᠴᠠ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠤᠨᠠᠭᠠᠨ ᠪᠠᠭᠤᠴᠠ ᠶ᠋ᠢᠨ ᠲᠠᠬᠢᠯᠭᠠ ᠶ᠋ᠢ ᠮᠢᠨᠦ ᠠᠪᠤ ᠴᠢᠯᠠᠭᠤᠨᠪᠠᠭᠠᠲᠤᠷ ᠡᠵᠢ ᠡᠷᠳᠡᠨᠢᠴᠡᠴᠡᠭ ᠡᠷᠬᠢᠯᠡᠨ ᠶᠠᠪᠤᠭᠳᠠᠭᠤᠯᠤᠭᠰᠠᠨ ᠶᠤᠮ᠃ ᠡᠨᠡᠬᠦ ᠥᠨᠳᠡᠭᠡᠨ ᠴᠠᠭᠠᠨ ᠤᠨᠠᠭᠠᠨ ᠪᠠᠭᠤᠴᠠ ᠶ᠋ᠢᠨ ᠲᠠᠬᠢᠯᠭᠠ ᠨᠢ ᠬᠣᠰᠢᠭᠤ ᠳᠡᠰ ᠦ᠋ᠨ ᠪᠣᠳᠠᠰ ᠤ᠋ᠨ ᠪᠤᠰᠤ ᠰᠣᠶᠣᠯ ᠤ᠋ᠨ ᠥᠪ ᠦ᠋ᠨ ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠲᠣᠭᠲᠠᠯᠴᠠᠭᠠ ᠳ᠋ᠤ᠌ 2009 ᠣᠨ ᠳ᠋ᠤ᠌ ᠳᠠᠩᠰᠠᠯᠠᠭᠳᠠᠵᠤ ᠣᠷᠣᠭᠰᠠᠨ ᠶᠤᠮ᠃ ᠣᠳᠣ ᠪᠠᠷ ᠬᠣᠲᠠ ᠶ᠋ᠢᠨ ᠳᠡᠰ ᠪᠣᠯᠤᠨ ᠣᠷᠣᠨ ᠤ᠋ ᠳᠡᠰ ᠦ᠋ᠨ ᠪᠣᠯᠭᠠᠬᠤ ᠭᠣᠶᠣᠪᠴᠢᠯᠠᠯ ᠳᠡᠪᠰᠢᠭᠦᠯᠬᠦ ᠪᠡᠷ ᠪᠠᠢᠨᠠ᠃
ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠤᠨᠠᠭᠠᠨ ᠪᠠᠭᠤᠴᠠ ᠪᠣᠯ ᠬᠤᠷᠮᠤᠰᠲᠠ ᠶ᠋ᠢᠨ ᠡᠷᠴᠢᠮ ᠢ᠋ ᠬᠤᠷᠢᠶᠠᠭᠰᠠᠨ ᠨᠤᠲᠤᠭ᠂ ᠬᠤᠪᠢ ᠲᠠᠢ ᠬᠥᠮᠦᠨ ᠳ᠋ᠦ᠍ ᠬᠦᠷᠲᠡᠭᠡᠭᠴᠢ᠂ ᠲᠩᠷᠢᠯᠢᠭ ᠬᠥᠮᠦᠨ ᠢ᠋ ᠢᠪᠡᠭᠡᠭᠴᠢ᠂ ᠤᠳᠤᠮ ᠤ᠋ᠨ ᠬᠦᠯᠦᠭ ᠢ᠋ᠶ᠋ᠡᠨ ᠵᠠᠯᠠᠨ ᠠᠪᠬᠤ ᠭᠠᠵᠠᠷ ᠮᠥᠨ᠃ ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠤᠪᠠᠳᠢᠰ ᠢ᠋ ᠲᠠᠨᠢᠨ ᠤᠬᠠᠭᠠᠷᠠᠭᠰᠠᠨ ᠳᠡᠭᠡᠳᠦᠰ ᠦ᠋ᠨ ᠮᠠᠨᠢ ᠤᠬᠠᠭᠠᠨ ᠤ᠋ ᠨᠢᠭᠤᠴᠠ ᠤᠳᠬᠠ ᠭᠦᠨ ᠬᠢᠭᠡᠳ ᠥᠴᠢᠭ ᠦᠭᠡᠢ ᠠᠭᠤᠤ ᠭᠠᠵᠠᠷ ᠶᠤᠮ ᠠ᠋᠃ ᠮᠣᠩᠭᠣᠯ ᠡᠬᠡ ᠣᠷᠣᠨ ᠤ᠋ ᠮᠢᠨᠢ ᠲᠦᠮᠡᠨ ᠪᠣᠮᠠᠨ ᠡᠵᠡᠨ ᠰᠠᠪᠳᠠᠭ᠂ ᠮᠢᠩᠭᠠᠨ ᠣᠨ ᠤ᠋ ᠴᠠᠭᠠᠨ ᠡᠪᠦᠭᠡᠨ ᠨᠠᠷ᠂ ᠣᠳᠣᠨ ᠮᠡᠴᠢᠳ ᠦ᠋ᠨ ᠤᠴᠠᠷᠠᠯ ᠲᠣᠬᠢᠶᠠᠯ᠂ ᠨᠠᠷᠠᠨ᠂ ᠰᠠᠷᠠᠨ ᠤ᠋ ᠡᠷᠭᠢᠯ ᠣᠷᠣᠰᠢᠯ ᠢ᠋ ᠠᠨᠳᠠᠯ ᠦᠭᠡᠢ ᠲᠠᠨᠢᠭᠴᠢ ᠶ᠋ᠢᠨ ᠵᠢᠷᠤᠯᠭᠠ ᠳ᠋ᠤ᠌ 99 ᠲᠩᠷᠢ ᠶ᠋ᠢᠨ ᠣᠷᠣᠨ ᠢ᠋ᠶ᠋ᠠᠨ ᠭᠡᠷᠦᠨ ᠶᠠᠪᠤᠭᠴᠢ ᠪᠤᠮ ᠵᠦᠢᠯ ᠦ᠋ᠨ ᠰᠠᠢᠨ ᠡᠷᠴᠢᠰ ᠦ᠋ᠨ ᠪᠥᠭᠡᠮᠨᠡᠷᠡᠯ ᠪᠣᠯᠬᠤ ᠥᠨᠳᠡᠭᠡᠨ ᠴᠠᠭᠠᠨ ᠮᠣᠷᠢᠨ ᠤ᠋ ᠰᠣᠩᠭᠣᠭᠰᠠᠨ ᠤᠨᠠᠭᠠᠨ ᠪᠠᠭᠤᠴᠠ ᠳ᠋ᠤ᠌᠂ ᠰᠠᠷᠠ ᠶ᠋ᠢᠨ ᠰᠠᠢᠨ ᠢ᠋ ᠰᠠᠭᠠᠳᠠᠨ ᠬᠦᠯᠢᠶᠡᠵᠦ᠂ ᠡᠳᠦᠷ ᠦ᠋ᠨ ᠰᠠᠢᠨ ᠢ᠋ ᠥᠨᠵᠢᠨ ᠤᠷᠢᠭᠠᠳ᠂ ᠡᠬᠡ ᠪᠣᠯᠤᠭᠰᠠᠨ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠳ᠋ᠡᠭᠡᠨ᠂ ᠡᠭᠡᠯᠢᠲᠦ ᠡᠬᠡ ᠣᠷᠣᠨ ᠳ᠋ᠠᠭᠠᠨ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠦᠨ᠂ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠲᠩᠷᠢ ᠶ᠋ᠢ ᠪᠠᠶᠠᠰᠬᠠᠬᠤ ᠲᠠᠬᠢᠯᠭᠠ ᠶ᠋ᠢᠨ ᠶᠣᠰᠣᠯᠠᠯ ᠢ᠋ ᠵᠢᠯ ᠪᠣᠯᠭᠠᠨ ᠤ᠋ ᠠᠷᠭᠠ ᠶ᠋ᠢᠨ ᠤᠯᠠᠷᠢᠯ ᠤ᠋ᠨ 7 ᠰᠠᠷᠠ ᠶ᠋ᠢᠨ 19 ᠦ᠌ ᠪᠢᠯᠢᠭᠲᠦ ᠡᠳᠦᠷ ᠢ᠋ᠶ᠋ᠡᠨ ᠰᠣᠩᠭᠣᠭᠰᠠᠨ ᠪᠢᠯᠡ᠃ ᠡᠨᠡ ᠨᠤᠲᠤᠭ ᠲᠤ᠌ ᠵᠢᠯ ᠳ᠋ᠡᠭᠡᠨ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠣᠷᠣᠯᠴᠠᠭᠰᠠᠨ ᠲᠠᠬᠢᠯᠭᠠ᠂ ᠵᠤᠯᠠᠭ ᠤ᠋ᠨ ᠨᠠᠢᠷ ᠶᠠᠪᠤᠭᠳᠠᠵᠤ ᠪᠠᠢᠨᠠ᠃ 19 ᠦ᠌ ᠥᠷᠯᠥᠭᠡ ᠶ᠋ᠢᠨ 4~5 ᠴᠠᠭ ᠢ᠋ᠶ᠋ᠠᠷ ᠬᠣᠰᠢᠭᠤ ᠪᠠᠷ ᠪᠤᠶᠤ ᠣᠢᠷᠠᠯᠴᠠᠭᠠ ᠠᠢᠯ ᠤ᠋ᠳ ᠢ᠋ᠶ᠋ᠠᠷ ᠠᠮᠠᠷᠠᠵᠤ ᠬᠣᠨᠣᠭᠯᠠᠭᠰᠠᠨ ᠲᠠᠬᠢᠯᠭᠠᠴᠢᠳ᠂ ᠦᠦᠷ ᠦ᠋ᠨ ᠭᠡᠭᠡ ᠲᠡᠢ ᠤᠷᠤᠯᠳᠤᠨ ᠳᠠᠪᠬᠢᠵᠤ᠂ ᠥᠨᠳᠡᠭᠡᠨ ᠴᠠᠭᠠᠨ ᠤᠨᠠᠭᠠᠨ ᠪᠠᠭᠤᠴᠠ ᠳ᠋ᠤ᠌ ᠡᠷᠲᠡᠯᠡᠨ ᠢᠷᠡᠵᠡᠭᠡᠵᠦ᠂ ᠲᠠᠬᠢᠯᠭᠠ ᠶ᠋ᠢᠨ ᠵᠢᠮᠡ ᠶᠣᠰᠣ ᠪᠠᠨ ᠪᠡᠯᠡᠳᠬᠡᠨ᠂ ᠤᠳᠤᠮ ᠤ᠋ᠨ ᠮᠣᠷᠢ (ᠬᠡᠢᠮᠣᠷᠢ) ᠪᠠᠨ ᠰᠡᠷᠭᠦᠭᠡᠵᠦ ᠠᠪᠬᠤ ᠪᠠᠷ ᠨᠠᠷᠠ ᠮᠠᠨᠳᠤᠬᠤ ᠶ᠋ᠢ ᠠᠮᠢᠰᠬᠤᠭᠠ ᠳᠠᠷᠤᠨ ᠬᠦᠯᠢᠶᠡᠴᠡᠭᠡᠨᠡ᠃ ᠨᠠᠷᠠ ᠮᠠᠨᠳᠤᠬᠤ ᠲᠠᠢ ᠵᠡᠷᠭᠡ ᠮᠥᠷᠭᠥᠯᠴᠢᠳ ᠥᠪᠡᠷ ᠦ᠋ᠨ ᠪᠡᠶᠡ ᠳ᠋ᠡᠭᠡᠨ ᠬᠠᠮᠤᠭ ᠤ᠋ᠨ ᠡᠭᠡᠯᠢᠲᠡᠢ ᠥᠩᠭᠡ ᠶ᠋ᠢᠨ ᠲᠣᠷᠭᠠ ᠪᠤᠶᠤ ᠪᠣᠰ ᠳᠡᠭᠡᠷᠡ ᠪᠡᠨ ᠱᠠᠭᠠ ᠴᠢᠮᠥᠭᠡ᠂ ᠪᠣᠭᠲᠣ ᠴᠢᠮᠥᠭᠡ ᠪᠡᠨ ᠲᠤᠨᠤᠯᠵᠠᠭᠤᠯᠤᠨ ᠲᠠᠯᠪᠢᠵᠤ᠂ ᠬᠠᠩᠭᠢᠷᠴᠠᠭ ᠶᠠᠰᠤ (ᠰᠢᠪᠡᠨᠡᠭᠦᠷ ᠶᠠᠰᠤ) ᠪᠠᠷ ᠢ᠋ᠶ᠋ᠠᠨ ᠳᠣᠬᠢᠭᠤᠷ ᠳᠣᠯᠣᠭᠠᠨ ᠣᠳᠣ ᠶ᠋ᠢᠨ ᠬᠡᠯᠪᠡᠷᠢ ᠶ᠋ᠢ ᠵᠢᠷᠤᠭᠯᠠᠨ᠂ ᠨᠠᠷᠠᠨ ᠵᠦᠭ ᠬᠠᠨᠳᠤᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠰᠣᠩᠭᠣᠨ ᠲᠡᠭᠷᠢ ᠭᠠᠵᠠᠷ ᠵᠠᠯᠭᠠᠯᠳᠤᠨ ᠨᠡᠢᠯᠡᠨ ᠪᠠᠢᠵᠤ᠂ ᠮᠣᠩᠭᠣᠯ ᠤ᠋ᠨ ᠨᠠᠶᠠᠨ ᠨᠠᠢ᠍ᠮᠠᠨ ᠮᠢᠩᠭᠠᠨ ᠤ᠋ ᠨᠣᠶᠠᠳ ᠤ᠋ᠨ ᠨᠡᠷᠡ ᠶ᠋ᠢ ᠬᠤᠷᠤᠢᠯᠠᠨ ᠲᠡᠮᠡᠯᠡᠵᠦ᠂ ᠥᠪᠡᠷ ᠦ᠋ᠨ ᠬᠡᠢ ᠮᠣᠷᠢ ᠪᠠᠨ ᠪᠠᠭᠤᠯᠭᠠᠬᠤ ᠦᠢᠯᠡ ᠶ᠋ᠢ ᠦᠢᠯᠡᠳᠴᠦ᠂ ᠨᠠᠷᠠᠨ ᠵᠦᠭ ᠶᠢᠰᠦ ᠶᠢᠰᠦᠨ ᠰᠠᠴᠤᠯᠤᠭᠠ ᠡᠷᠭᠦᠵᠦ᠂ ᠲᠩᠷᠢ ᠳ᠋ᠦ᠍ ᠡᠷᠭᠦᠯ ᠲᠠᠯᠪᠢᠭᠰᠠᠨ ᠰᠢᠭᠦᠰᠦᠨ ᠡᠴᠡ ᠳᠡᠭᠡᠵᠢ ᠠᠮᠰᠠᠴᠢᠬᠠᠨᠠ᠃
ᠡᠨᠡ ᠲᠠᠬᠢᠯᠭᠠ ᠶ᠋ᠢ ᠬᠢᠭᠰᠡᠨ ᠡᠴᠡ ᠬᠣᠢᠰᠢ ᠨᠤᠲᠤᠭ ᠤᠰᠤᠨ ᠳ᠋ᠤ᠌ ᠪᠣᠷᠣᠭᠠᠨ ᠬᠤᠷᠠ ᠡᠯᠪᠡᠭ ᠪᠣᠯᠵᠠᠢ᠃ ᠵᠢᠱ᠌ᠢᠶᠡᠯᠡᠪᠡᠯ2014 ᠣᠨ ᠤ᠋ ᠲᠠᠬᠢᠯᠭᠠ ᠶ᠋ᠢᠨ ᠳᠠᠷᠠᠭᠠ ᠬᠣᠶᠠᠷ ᠡᠳᠦᠷ ᠲᠦ᠍ ᠪᠣᠷᠣᠭᠠᠨ ᠲᠠᠢ᠃ 2015 ᠣᠨ ᠤ᠋ ᠲᠠᠬᠢᠯᠭᠠ ᠶ᠋ᠢᠨ ᠡᠮᠦᠨᠡ ᠬᠣᠶᠠᠷ ᠡᠳᠦᠷ ᠪᠣᠷᠣᠭᠠᠯᠠᠵᠤ (ᠳᠠᠷᠤᠢ17.18 ᠤ᠋ ᠡᠳᠦᠷ)᠂ 2016 ᠣᠨ ᠤ᠋ ᠲᠠᠬᠢᠯᠭᠠ ᠶ᠋ᠢᠨ ᠡᠳᠦᠷ ᠦ᠋ᠨ ᠦᠳᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠳᠠᠷᠠᠭᠠ ᠡᠳᠦᠷ ᠪᠣᠯᠲᠠᠯᠠ ᠪᠣᠷᠣᠭᠠᠨ ᠲᠠᠢ᠃ 2017 ᠣᠨ ᠤ᠋7 ᠰᠠᠷᠠ ᠶ᠋ᠢᠨ19 ᠦ᠌ ᠡᠳᠦᠷ ᠦ᠋ᠨ ᠲᠠᠬᠢᠯᠭᠠ ᠶ᠋ᠢᠨ ᠳᠠᠷᠠᠭᠠ᠂ ᠥᠷᠯᠥᠭᠡ ᠶ᠋ᠢᠨ ᠶᠢᠰᠦᠨ ᠴᠠᠭ ᠠ᠋ᠴᠠ ᠪᠣᠷᠣᠭᠠᠨ ᠲᠠᠢ᠂ 2018 ᠣᠨ ᠤ᠋ 7 ᠰᠠᠷᠠ ᠶ᠋ᠢᠨ19 ᠦ᠌ ᠥᠷᠯᠥᠭᠡ ᠶ᠋ᠢᠨ ᠲᠠᠬᠢᠯᠭᠠ ᠳᠠᠭᠤᠰᠤᠮᠠᠭᠴᠠ ᠪᠦᠬᠦᠯᠢ ᠡᠳᠦᠷ ᠢ᠋ᠶ᠋ᠡᠷ ᠪᠣᠷᠣᠭᠠᠨ ᠲᠠᠢ᠂ 2019 ᠣᠨ ᠤ᠋7 ᠰᠠᠷᠠ ᠶ᠋ᠢᠨ19 ᠦ᠌ ᠡᠳᠦᠷ ᠦ᠋ᠨ ᠲᠠᠬᠢᠯᠭᠠ ᠪᠠᠷ ᠪᠣᠷᠣᠭᠠᠯᠠᠵᠤ᠂ ᠨᠤᠲᠤᠭ ᠤᠰᠤᠨ ᠤ᠋ ᠮᠥᠷᠭᠥᠯᠴᠢᠳ ᠢ᠋ ᠪᠠᠶᠠᠰᠬᠠᠨ᠂ ᠲᠩᠷᠢ ᠪᠡᠨ ᠳᠠᠬᠢᠭᠰᠠᠨ ᠠ᠋ᠴᠠ ᠭᠠᠩ ᠲᠠᠢᠯᠤᠭᠳᠠᠯᠠ ᠭᠡᠵᠦ ᠨᠤᠲᠤᠭ ᠤ᠋ᠨ ᠮᠠᠯᠴᠢᠳ ᠪᠠᠶᠠᠷᠯᠠᠯᠳᠤᠨ ᠱᠠᠭᠰᠢᠴᠢᠬᠠᠪᠠ᠃
ᠪᠤᠶᠠᠨ ᠤ᠋ ᠠᠷᠢᠭᠤᠨ ᠪᠢᠯᠢᠭ ᠲᠡᠭᠦᠰ᠂ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠰᠣᠩᠭᠣᠨ ᠪᠠᠭᠤᠭᠰᠠᠨ ᠨᠤᠲᠤᠭ ᠪᠣᠯ ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠭᠡᠷᠡᠯ ᠡᠨᠧᠷᠭᠢ ᠶ᠋ᠢᠨ ᠬᠣᠯᠪᠣᠭᠠᠰᠤ ᠪᠣᠯᠤᠭᠰᠠᠨ ᠲᠥᠪ ᠨᠤᠲᠤᠭ ᠶᠤᠮ᠃ ᠡᠨᠡ ᠨᠤᠲᠤᠭ ᠠ᠋ᠴᠠ ᠥᠨᠳᠡᠭᠡᠨ ᠴᠠᠭᠠᠨ ᠤ᠋ ᠭᠡᠷᠡᠯ ᠲᠤᠶᠠᠭᠠᠨ ᠤ᠋ ᠡᠨᠧᠷᠭᠢ ᠤᠯᠠᠷᠢᠨ ᠬᠤᠪᠢᠷᠠᠵᠤ᠂ ᠥᠨᠳᠡᠭᠡᠨ ᠴᠠᠭᠠᠨ ᠢ᠋ ᠦᠨᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠲᠦᠭᠰᠡᠨ ᠬᠥᠮᠦᠨ ᠪᠦᠬᠦᠨ ᠦ᠌ ᠴᠡᠭᠡᠵᠢᠨ ᠳ᠋ᠦ᠍ ᠣᠷᠣᠳᠠᠵᠤ᠂ ᠢᠵᠠᠭᠤᠷ ᠤᠳᠤᠮ ᠤ᠋ᠨ ᠬᠦᠯᠦᠭ ᠮᠣᠷᠢᠳ ᠢ᠋ ᠴᠢᠨᠢ ᠳᠠᠭᠠᠭᠤᠯᠤᠨ ᠠᠪᠴᠢᠷᠠᠵᠤ ᠢᠷᠡᠨᠡ᠃ ᠡᠨᠳᠡ ᠡᠴᠡ ᠮᠣᠩᠭᠣᠯ ᠣᠮᠣᠭᠰᠢᠯ᠂ ᠪᠠᠬᠠᠷᠬᠠᠯ᠂ ᠮᠣᠩᠭᠣᠯ ᠴᠣᠭ ᠵᠣᠯᠪᠣᠭᠠ ᠬᠡᠢᠮᠣᠷᠢ ᠰᠦᠯᠳᠡ᠂ ᠮᠣᠩᠭᠣᠯ ᠤᠬᠠᠭᠠᠨ ᠡᠷᠡ ᠵᠣᠷᠢᠭ᠂ ᠰᠡᠳᠬᠢᠯ ᠣᠶᠤᠨ ᠤ᠋ ᠣᠨᠳᠣᠷᠣᠯ ᠪᠠᠳᠠᠷᠠᠵᠤ ᠪᠠᠢᠨᠠ᠃ ᠣᠷᠣᠨ ᠳᠠᠶᠠᠭᠠᠷ ᠬᠥᠭᠵᠢᠨ ᠳᠡᠭᠵᠢᠷᠡᠬᠦ ᠵᠣᠬᠢᠯᠳᠤᠬᠤ ᠨᠥᠬᠥᠴᠡᠯ ᠢ᠋ ᠪᠦᠷᠢᠯᠳᠦᠭᠦᠯᠵᠦ᠂ ᠬᠠᠷᠰᠢᠯᠳᠤᠬᠤ ᠰᠢᠯᠲᠠᠭᠠᠨ ᠢ᠋ ᠬᠠᠭᠠᠵᠤ᠂ ᠬᠠᠮᠤᠭ ᠣᠯᠠᠨ ᠢ᠋ ᠠᠮᠤᠷᠵᠢᠭᠤᠯᠵᠤ᠂ ᠲᠡᠭᠷᠢ ᠵᠠᠶᠠᠭᠠᠲᠤ ᠮᠣᠩᠭᠣᠯ ᠲᠦᠮᠡᠨ ᠦ᠌ ᠪᠡᠨ ᠨᠠᠰᠤᠨ ᠬᠤᠲᠤᠭ ᠢ᠋ ᠨᠡᠮᠡᠵᠦ᠂ ᠠᠮᠠᠨ ᠬᠡᠰᠢᠭ ᠢ᠋ ᠠᠷᠪᠢᠳᠬᠠᠵᠤ᠂ ᠵᠣᠯᠪᠣᠭᠠ ᠬᠡᠢᠮᠣᠷᠢ ᠶ᠋ᠢ ᠪᠠᠳᠠᠷᠠᠭᠠᠵᠤ ᠂ ᠵᠣᠷᠢᠭ ᠵᠢᠷᠦᠬᠡ ᠶ᠋ᠢ ᠴᠢᠩᠭᠠᠯᠠᠵᠤ᠂ ᠲᠡᠩᠬᠡᠭᠡᠯᠢᠭ ᠶᠡᠬᠡ ᠠᠪᠢᠶᠠᠰ ᠤᠬᠠᠭᠠᠨ ᠡᠷᠴᠢ ᠬᠦᠴᠦ᠂ ᠡᠷᠳᠡᠮ ᠴᠢᠳᠠᠯ ᠢ᠋ ᠢᠪᠡᠭᠡᠨ ᠰᠣᠶᠣᠷᠬᠠᠳᠠᠭ ᠪᠢᠯᠡ᠃
ᠲᠩᠷᠢ ᠡᠴᠡ ᠪᠠᠭᠤᠵᠤ᠂ ᠭᠠᠵᠠᠷ ᠠ᠋ᠴᠠ ᠡᠷᠭᠦᠭᠳᠡᠭᠰᠡᠨ ᠰᠦᠷ ᠪᠠᠷᠠ ᠰᠠᠢᠬᠠᠨ᠂ ᠨᠥᠮᠥᠷᠢ ᠨᠥᠯᠥᠭᠡ ᠶᠡᠬᠡᠲᠦ ᠥᠨᠳᠡᠭᠡᠨ ᠴᠠᠭᠠᠨ ᠤᠨᠠᠭᠠᠨ ᠪᠠᠭᠤᠴᠠ ᠶ᠋ᠢᠨ ᠪᠤᠶᠠᠨ ᠬᠡᠰᠢᠭ᠂ ᠰᠦᠷ ᠬᠦᠴᠦᠨ ᠳ᠋ᠦ᠍ ᠵᠠᠯᠪᠠᠷᠢᠨ ᠳᠠᠭᠠᠳᠬᠠᠵᠤ᠂ ᠡᠨᠳᠡ ᠢᠷᠡᠭᠰᠡᠳ ᠦ᠋ᠨ ᠬᠢᠨ ᠦ᠌ ᠠᠵᠢᠯ ᠦᠢᠯᠡᠰ ᠤᠯᠠᠮ ᠥᠭᠡᠳᠡᠷᠡᠭ᠂ ᠪᠦᠲᠦᠭᠡᠯᠴᠢ᠂ ᠥᠩᠭᠡ ᠵᠢᠪᠬᠤᠭᠠ ᠲᠠᠢ ᠪᠠᠢᠭᠠ ᠨᠢ ᠮᠣᠩᠭᠣᠯ ᠲᠦᠮᠡᠨ ᠦ᠌ ᠨᠢᠭᠡᠨ ᠶᠡᠬᠡ ᠪᠠᠬᠠᠷᠬᠠᠯ ᠶᠤᠮ᠃ ᠬᠥᠮᠦᠨ ᠦ᠌ ᠪᠦᠲᠦᠭᠡᠯᠴᠢ ᠦᠢᠯᠡᠰ ᠳᠡᠮᠵᠢᠭᠳᠡᠵᠦ᠂ ᠠᠮᠢᠳᠤᠷᠠᠵᠤ ᠠᠵᠢᠯᠯᠠᠬᠤ ᠣᠷᠴᠢᠨ ᠰᠠᠢᠵᠢᠷᠠᠨᠠ ᠭᠡᠳᠡᠭ ᠭᠠᠵᠠᠷ ᠭᠠᠵᠠᠷ ᠤ᠋ᠨ ᠢᠷᠭᠡᠳ ᠦ᠋ᠨ ᠬᠦᠰᠡᠯ ᠪᠢᠯᠡ᠃ ᠡᠭᠦᠨ ᠳᠤ ᠡᠵᠡᠨ ᠬᠥᠮᠦᠨ ᠦ᠌ ᠬᠢᠴᠢᠶᠡᠯ ᠵᠢᠳᠬᠦᠯ ᠡᠴᠡ ᠭᠠᠳᠠᠨᠠ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠶ᠋ᠢᠨ ᠢᠪᠡᠭᠡᠯ ᠪᠠᠰᠠ ᠪᠣᠢ᠃ ᠬᠥᠮᠦᠨ ᠪᠠᠢᠭᠠᠯᠢ ᠶ᠋ᠢᠨ ᠠᠮᠢᠨ ᠬᠣᠯᠪᠣᠭᠠ᠂ ᠰᠢᠳᠦᠨ ᠪᠠᠷᠢᠯᠳᠤᠯᠭᠠ ᠠᠮᠢᠳᠤᠷᠠᠯ ᠤ᠋ᠨ ᠡᠬᠢ ᠦᠨᠳᠦᠰᠦ ᠨᠢᠭᠡ ᠭᠡᠳᠡᠭ ᠢ᠋ ᠤᠬᠠᠭᠠᠨᠲᠤ ᠳᠡᠭᠡᠳᠦᠰ ᠮᠢᠨᠢ ᠤᠴᠢᠷᠯᠠᠨ ᠰᠤᠷᠭᠠᠵᠤ ᠢᠷᠡᠭᠰᠡᠨ ᠦ᠌ ᠤᠴᠢᠷ ᠡᠨᠡ ᠪᠤᠶᠤ᠃
ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠬᠦᠴᠦ᠂ ᠠᠭᠤᠯᠠ ᠤᠰᠤᠨ ᠤ᠋ ᠡᠵᠡᠳ ᠮᠣᠩᠭᠣᠯ ᠬᠥᠮᠦᠨ ᠪᠦᠷᠢ ᠶ᠋ᠢ ᠲᠡᠳᠬᠦᠵᠦ᠂ ᠬᠡᠢᠮᠣᠷᠢ ᠯᠤᠩᠳᠠ ᠶ᠋ᠢ ᠨᠢ ᠤᠯᠠᠮ ᠪᠠᠳᠠᠷᠠᠭᠠᠬᠤ ᠪᠣᠯᠲᠤᠭᠠᠢ!
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!