《 ᠮᠣᠲ᠋ᠣᠼᠢᠺᠯ 》 ᠲᠠᠢ ᠲᠡᠮᠡᠭᠡᠴᠢᠨ – ᠵ ·ᠢᠳᠠᠮ " Мотоцикл " тай тэмээчин – Ж · Ядам
502《 ᠮᠣᠲ᠋ᠣᠼᠢᠺᠯ 》 ᠲᠠᠢ ᠲᠡᠮᠡᠭᠡᠴᠢᠨ
ᠨᠣᠭᠣᠭᠠᠨ ᠮᠣᠲ᠋ᠣᠼᠢᠺᠯ( ᠮᠣᠲ᠋ᠣᠷ ᠲᠡᠷᠭᠡ) ᠬᠥᠯᠥᠭᠯᠡᠭᠰᠡᠨ
ᠨᠣᠮᠢᠨ ᠲᠠᠯᠠ ᠠ᠋ᠴᠠ ᠲᠡᠮᠡᠭᠡᠴᠢᠨ ᠭᠡᠨᠡ
ᠬᠣᠶᠠᠷ ᠵᠠᠭᠤᠭᠠᠳ ᠲᠡᠮᠡᠭᠡ ᠲᠡᠢ
ᠬᠣᠷᠢᠨ ᠬᠡᠳᠦᠲᠡᠢ ᠵᠠᠯᠠᠭᠤ ᠭᠡᠨᠡ᠃
ᠲᠡᠮᠡᠭᠡᠨ ᠰᠦᠷᠦᠭ ᠦ᠋ᠨ ᠳᠠᠩ ᠬᠠᠭᠠᠰ
ᠲᠡᠷᠰᠬᠦᠳ ᠬᠠᠩᠭᠠᠯ ᠠᠮᠢᠲᠠᠳ ᠭᠡᠨᠡ
ᠣᠨᠣᠯᠭᠠ ᠡᠳ᠋ᠯᠡᠭᠡ ᠰᠤᠷᠤᠭᠠ ᠦᠭᠡᠢ
ᠪᠣᠲᠣᠭᠣᠨ ᠬᠠᠩᠭᠠᠯ ᠴᠤ᠌ ᠣᠯᠠᠨ ᠭᠡᠨᠡ᠃
ᠲᠡᠮᠡᠭᠡ ᠭᠡᠳᠡᠭ ᠶᠡᠷᠦ ᠡᠴᠡ ᠪᠡᠨ
ᠲᠡᠰᠪᠦᠷᠢ ᠶᠡᠬᠡᠲᠡᠢ ᠠᠮᠢᠲᠠᠨ ᠪᠣᠯᠬᠣᠷ
ᠬᠣᠨᠢᠴᠢᠯᠠᠵᠤ ᠬᠠᠷᠢᠭᠤᠯᠤᠭᠠᠳ ᠶᠠᠭᠤ ᠪᠠᠨ ᠬᠢᠨᠡ
ᠬᠣᠯᠠ ᠶ᠋ᠢᠨ ᠪᠡᠯᠴᠢᠭᠡᠷ ᠲᠤ ᠶᠠᠪᠤᠭ ᠭᠡᠵᠦ
ᠣᠲᠣᠷ ᠬᠢᠬᠦ ᠵᠠᠪ ᠠᠯᠠᠭᠠ
ᠣᠯᠵᠠ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠣᠯᠤᠭ ᠭᠡᠵᠦ
ᠤᠤᠭᠤᠵᠤ ᠬᠠᠩᠬᠤ ᠠᠮᠢᠲᠠᠨ ᠪᠢᠰᠢ
ᠤᠰᠤᠯᠠᠬᠤ ᠤᠮᠳᠠᠯᠠᠬᠤ ᠲᠦᠪᠡᠭ ᠭᠡᠵᠦ
ᠲᠠᠰᠢᠶᠠᠨ ᠳᠡᠭᠡᠷᠡ ᠨᠢ ᠭᠤᠯᠢᠷ ᠲᠦᠷᠬᠢᠵᠦ
ᠲᠠᠨᠢᠬᠤ ᠲᠡᠮᠳᠡᠭ ᠲᠤᠤᠬᠠᠢ ᠵᠢᠷᠤᠵᠤ
ᠴᠢᠬᠢ ᠶ᠋ᠢ ᠨᠢ ᠴᠣᠭᠣᠯᠵᠤ《 ᠡᠭᠡᠮᠦᠭ》 ᠵᠡᠭᠦᠵᠦ
ᠴᠢᠮᠡᠭ ᠵᠡᠭᠦᠯᠲᠡ ᠬᠦᠵᠦᠭᠦᠨ ᠳ᠋ᠦ᠍ᠨᠢ ᠰᠡᠲᠡᠷᠯᠡᠵᠦ
ᠲᠠᠪᠤᠨ ᠰᠠᠷᠠ ᠳ᠋ᠤ᠌ ᠨᠣᠣᠰᠣ ᠶ᠋ᠢ ᠨᠢ ᠱᠤᠳᠤᠷᠤᠭᠠᠳ
ᠲᠠᠯᠠ ᠶ᠋ᠢᠨ ᠪᠡᠯᠴᠢᠭᠡᠷ ᠲᠤ ᠲᠠᠭᠤᠵᠤ ᠣᠷᠬᠢᠵᠠᠢ
ᠬᠠᠷᠢᠭᠤᠴᠠᠯᠭᠠ ᠪᠠᠢᠬᠤ ᠦᠭᠡᠢ ᠣᠯᠠᠨ ᠲᠡᠮᠡᠭᠡ
ᠬᠠᠷᠠᠭᠰᠠᠨ ᠵᠦᠭ ᠲᠤ ᠳᠠᠯᠠᠢᠵᠤ ᠥᠭᠴᠡᠢ
ᠵᠢᠷᠤᠮ ᠲᠠᠢ ᠶ᠋ᠢᠨ ᠭᠣᠪᠢ ᠶ᠋ᠢᠨ ᠵᠢᠷᠭᠤᠭᠠᠨ ᠢᠩᠭᠡ
ᠭᠤᠷᠠᠲᠤ ᠶ᠋ᠢᠨ ᠬᠥᠨᠳᠡᠢ ᠳ᠋ᠦ᠍ ᠭᠤᠷᠪᠠ ᠭᠤᠨᠵᠢ
ᠠᠷᠤ ᠰᠡᠭᠦᠵᠢ ᠳ᠋ᠦ᠍ ᠠᠷᠪᠠᠨ ᠠᠳᠠ
ᠳᠠᠬᠤ ᠶ᠋ᠢᠨ ᠨᠢᠷᠤᠭᠤᠨ ᠳ᠋ᠤ᠌ ᠲᠠᠪᠤᠨ ᠲᠠᠢᠯᠤᠭ
ᠥᠴᠢᠨᠡᠨ ᠣᠯᠠᠨ ᠲᠡᠮᠡᠭᠡ ᠲᠡᠭᠡᠵᠦ
ᠥᠷᠭᠡᠨ ᠲᠠᠯᠠ ᠪᠠᠷ ᠲᠠᠷᠬᠠᠭᠰᠠᠨ ᠭᠡᠨᠡ
ᠡᠵᠡᠨ ᠡᠷᠡ ᠰᠠᠨᠠᠭᠠ ᠠᠮᠤᠷ
《 ᠢᠵᠢ》 ᠪᠡᠨ ᠭᠥᠯᠥᠭᠯᠡᠭᠡᠳ ᠬᠡᠰᠦᠭᠰᠡᠨ ᠭᠡᠨᠡ
ᠳᠥᠭᠥᠮ ᠦ᠋ᠨ ᠰᠢᠪᠡᠷ ᠲᠤ ᠨᠢᠭᠡ ᠠᠳᠠ
ᠲᠥᠷᠥᠯ ᠳ᠋ᠡᠭᠡᠨ ᠡᠷᠭᠢᠯ ᠦᠭᠡᠢ ᠲᠠᠯᠢᠢᠵᠠᠢ
ᠬᠡᠳᠦᠨ ᠭᠤᠨᠵᠢ ᠨᠢᠭᠡ ᠲᠠᠢᠯᠤᠭ ᠨᠢ ᠴᠤ᠌
ᠬᠡᠭᠡᠷᠡ ᠶ᠋ᠢᠨ ᠪᠣᠣᠬᠠᠢ ᠵᠣᠭᠣᠭᠯᠠᠵᠠᠢ᠃
ᠪᠠᠭᠠ ᠲᠡᠮᠡᠭᠡᠳ ᠰᠠᠷᠠ ᠰᠠᠷᠨᠢᠵᠤ ᠲᠥᠭᠡᠷᠢᠭᠡᠳ
ᠪᠠᠰᠠ ᠵᠠᠷᠢᠮ ᠨᠢ ᠰᠠᠯᠬᠢᠳᠠᠵᠤ ᠲᠥᠭᠡᠷᠢᠭᠡᠳ
ᠥᠨᠵᠢᠨ ᠬᠣᠨᠣᠨ ᠬᠤᠳᠳᠤᠭ《 ᠮᠠᠨᠠᠵᠤ》
ᠡᠳᠦᠷ ᠰᠥᠨᠢ ᠦᠭᠡᠢ ᠤᠰᠤ ᠰᠠᠬᠢᠵᠤ
ᠡᠵᠡᠨ ᠪᠠᠢᠬᠤ ᠦᠭᠡᠢ ᠣᠯᠠᠨ ᠲᠡᠮᠡᠭᠡ
ᠡᠨᠳᠡ ᠲᠡᠨᠳᠡ ᠬᠡᠴᠡᠭᠦᠳᠡᠵᠦ ᠭᠡᠨᠡ
ᠰᠠᠢᠬᠢ ᠡᠵᠡᠨ ᠲᠡᠷᠡᠬᠡᠨ ᠦᠶᠡ ᠳ᠋ᠦ᠍
ᠰᠠᠭᠠᠯᠢ ᠶ᠋ᠢᠨ ᠹᠧᠷᠮ① ᠢ᠋ᠶ᠋ᠡᠷ ᠰᠠᠷᠬᠤᠳ ᠡᠷᠭᠢᠭᠦᠯᠵᠦ
ᠲᠡᠮᠡᠭᠡ ᠪᠡᠨ ᠪᠦᠷ ᠮᠠᠷᠲᠠᠵᠤ ᠣᠷᠬᠢᠭᠠᠳ
ᠲᠡᠵᠢᠭᠡᠪᠦᠷᠢ ᠮᠠᠯ ᠰᠢᠭ᠋ ᠲᠡᠨᠦᠵᠦ ᠶᠠᠪᠤᠵᠠᠢ
ᠡᠷᠭᠢᠨᠡᠭ ᠳᠣᠣᠷᠠ ᠠ᠋ᠴᠠ ᠬᠤᠪᠢᠩ ᠲᠠᠢ ᠤᠰᠤ ᠶ᠋ᠢ
《 ᠨᠡᠷᠡᠮᠡᠯ》 ᠭᠡᠵᠦ ᠡᠨᠳᠡᠭᠦᠷᠡᠵᠦ ᠵᠠᠯᠭᠢᠭᠠᠳ
ᠡᠬᠡᠨᠡᠷ ᠲᠡᠭᠡᠨ ᠪᠦᠷ ᠲᠠᠰᠤ ᠵᠠᠩᠨᠠᠭᠤᠯᠵᠤ
ᠡᠭᠡᠷᠡᠦᠯ ᠦ᠋ᠨ ᠳᠤᠭᠤᠢ ᠪᠠᠷ ᠲᠣᠭᠰᠢᠭᠤᠯᠵᠤ ᠶᠠᠪᠤᠵᠠᠢ᠃
ᠨᠠᠷᠢᠨ ᠨᠣᠭᠣᠭᠠ ᠭᠠᠩᠳᠠᠵᠤ ᠰᠢᠷᠠᠯᠠᠭᠰᠠᠨ
ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠬᠠᠭᠤᠴᠢ ᠪᠠᠷ
ᠬᠤᠷᠳᠤᠨ ᠤᠨᠤᠭᠠ ᠲᠠᠢ ᠰᠦᠷᠵᠢᠨ ᠡᠷᠡ
ᠬᠤᠮᠢᠶᠠ ᠬᠢᠬᠦ ᠪᠡᠷ ᠮᠣᠷᠳᠠᠵᠤ ᠭᠡᠨᠡ ᠰᠢᠦ
ᠮᠠᠰᠢᠨ ᠲᠠᠭᠠᠷᠠᠪᠠᠯ ᠪᠸᠨ᠋ᠽᠢᠨ ᠰᠤᠷᠠᠭᠰᠠᠭᠠᠷ
ᠮᠠᠯᠴᠢᠨ ᠲᠠᠭᠠᠷᠠᠪᠠᠯ ᠲᠡᠮᠡᠭᠡ ᠰᠤᠷᠠᠭᠰᠠᠭᠠᠷ
ᠡᠷᠢᠯ ᠳ᠋ᠦ᠍ ᠭᠠᠷᠤᠭᠰᠠᠨ ᠲᠡᠮᠡᠭᠡᠴᠢᠨ ᠵᠠᠯᠠᠭᠤ
ᠲᠣᠭᠣᠰᠣᠨ ᠳᠤᠮᠳᠠ ᠲᠣᠷᠣᠢᠵᠤ ᠭᠠᠷᠴᠠᠢ᠃
《 ᠵᠢᠭᠠᠬᠠᠨ ᠰᠢᠷᠭᠠ》 ᠶ᠋ᠢ ᠠᠶᠠᠯᠤᠨ ᠳᠠᠪᠬᠢᠭᠠᠳ
ᠵᠢᠷᠠᠨ ᠵᠢᠯᠠᠭᠠ ᠶ᠋ᠢ ᠨᠡᠩᠵᠢᠨ ᠳᠠᠪᠬᠢᠭᠠᠳ
ᠳᠤᠭᠤᠢ ᠶ᠋ᠢᠨ ᠬᠡ ᠶ᠋ᠢ ᠠᠷᠢᠯᠲᠠᠯᠠ ᠳᠠᠪᠬᠢᠭᠠᠳ
ᠳᠤᠷᠳᠤᠩ ᠪᠦᠰᠡ ᠪᠡᠨ ᠭᠠᠩᠳᠠᠲᠠᠯᠠ ᠳᠠᠪᠬᠢᠭᠠᠳ
ᠬᠡᠭᠡᠷᠡ ᠲᠠᠯᠠ ᠶ᠋ᠢ ᠭᠡᠷᠦᠨ ᠬᠡᠷᠦᠭᠰᠡᠭᠡᠷ
ᠬᠡᠳᠦᠨ ᠲᠡᠮᠡᠭᠡ ᠣᠯᠵᠤ ᠠᠪᠤᠭᠠᠳ
ᠬᠤᠷᠳᠤᠨ ᠬᠦᠯᠦᠭ ᠢ᠋ᠶ᠋ᠡᠷ ᠬᠤᠢᠯᠠᠷᠠᠭᠤᠯᠵᠤ ᠬᠥᠭᠡᠭᠡᠭᠡᠳ
ᠬᠤᠮᠢᠶᠠ ᠬᠢᠵᠦ ᠲᠣᠭᠣᠰᠣᠷᠠᠭᠤᠯᠵᠤ ᠬᠥᠭᠡᠭᠡᠭᠡᠳ
ᠲᠠᠷᠭᠤᠨ ᠠᠳᠠ ᠶ᠋ᠢ ᠪᠠᠬᠠᠷᠲᠤᠭᠤᠯᠵᠤ ᠬᠥᠭᠡᠭᠡᠭᠡᠳ
ᠲᠠᠷᠴᠢᠭ ᠨᠢᠭᠡ ᠶ᠋ᠢ ᠨᠢ ᠲᠠᠮᠢᠷᠳᠠᠭᠤᠯᠵᠤ ᠬᠥᠭᠡᠭᠡᠭᠡᠳ
ᠪᠣᠰᠤᠭᠠ ᠬᠡᠪᠲᠡᠭᠡ ᠬᠣᠯᠪᠣᠨ ᠬᠥᠭᠡᠭᠡᠵᠦ
ᠪᠣᠯᠬᠤ ᠦᠭᠡᠢ ᠨᠢᠭᠡ ᠶ᠋ᠢ ᠨᠢ ᠬᠦᠯᠢᠨ ᠪᠠᠢᠵᠤ
ᠬᠠᠪᠤᠷ ᠢ᠋ᠶ᠋ᠠᠷ ᠲᠠᠯᠪᠢᠭᠰᠠᠨ ᠲᠡᠮᠡᠭᠡ ᠪᠡᠨ
ᠬᠠᠭᠠᠰ ᠳᠤᠲᠠᠭᠤ ᠴᠤᠭᠯᠠᠭᠤᠯᠵᠤ ᠭᠡᠨᠡ᠂
ᠠᠯᠳᠠᠭᠰᠠᠨ ᠲᠡᠮᠡᠭᠡᠨ ᠳ᠋ᠦ᠍ ᠠᠺᠲ ② ᠠᠪᠬᠤ ᠭᠡᠵᠦ
ᠠᠷᠭᠠ ᠤᠬᠠᠭᠠᠨ ᠵᠠᠷᠤᠭᠰᠠᠨ ᠭᠡᠨᠡ᠃
ᠡᠪᠡᠳᠴᠢᠨ ᠡᠮᠵᠡᠭ ᠢ᠋ᠶ᠋ᠡᠷ ᠦᠬᠦᠭᠰᠡᠨ ᠭᠡᠵᠦ
ᠥᠷᠥᠭᠡᠯ ᠪᠤᠰᠤᠳ ᠲᠤ ᠶᠠᠷᠢᠭᠰᠠᠨ ᠭᠡᠨᠡ᠃
ᠪᠣᠣᠬᠠᠢ《 ᠵᠣᠭᠣᠭᠯᠠᠭᠰᠠᠨ》 ᠢ᠋ ᠰᠣᠨᠣᠰᠤᠭᠠᠳ
ᠪᠣᠯᠢᠭᠠᠴᠢ ᠭᠡᠵᠦ ᠠᠭᠤᠷᠯᠠᠭᠰᠠᠨ ᠭᠡᠨᠡ᠃
ᠰᠢᠪᠠᠷ ᠲᠤ ᠤᠨᠠᠭᠰᠠᠨᠠ ᠰᠢᠷᠠ ᠠᠳᠠ ᠶ᠋ᠢ
ᠮᠠᠨ ᠤ᠋ ᠬᠢ ᠪᠢᠰᠢ ᠭᠡᠵᠦ ᠮᠠᠷᠭᠤᠭᠰᠠᠨ ᠭᠡᠨᠡ᠃
ᠳᠤᠲᠠᠭᠤ ᠬᠠᠭᠠᠰ ᠲᠡᠮᠡᠭᠡ ᠲᠡᠢ
ᠳᠤᠷᠠ ᠪᠠᠷ ᠨᠢ ᠲᠠᠯᠪᠢᠳᠠᠭ ᠲᠤᠷᠰᠢᠯᠭᠠ ᠲᠠᠢ
ᠬᠤᠷᠳᠤᠨ《 ᠢᠵᠢ》 ᠤᠨᠤᠭᠠ ᠲᠠᠢ
ᠬᠤᠮᠢᠶᠠ ᠬᠢᠳᠡᠭ ᠠᠷᠭᠠ ᠲᠠᠢ
ᠡᠢᠮᠦ ᠯᠡ ᠬᠡᠴᠡᠭᠦᠬᠡᠨ ᠲᠡᠮᠡᠭᠡᠴᠢᠨ
ᠡᠨᠳᠡ ᠲᠡᠨᠳᠡ ᠪᠠᠢᠳᠠᠭ ᠭᠡᠨᠡ ᠰᠢᠦ᠃
– – – –
① ᠬᠤᠪᠢ ᠶ᠋ᠢᠨ ᠠᠵᠤ ᠠᠬᠤᠢᠯᠠᠯ
② ᠵᠥᠪᠰᠢᠶᠡᠷᠡᠯ ᠦ᠋ᠨ ᠪᠢᠴᠢᠭ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠣᠷᠵᠢᠭᠢᠨ ᠪᠠᠭᠠᠲᠤᠷ᠂ ᠳᠠᠪᠰᠢᠯᠲᠤ
ᠬᠢᠨᠠᠭ᠍ᠴᠢ : ᠣᠳᠣᠨᠬᠤᠸᠠᠷ ᠂ ᠳᠠᠪᠰᠢᠯᠲᠤ
2024᠂ 3᠂ 16 ᠤ ᠡᠳᠦᠷ