ᠪᠢᠳᠠ ᠭᠤᠷᠪᠠ – ᠲ ᠂ ᠶᠦᠮᠰᠥ᠋ᠷᠦᠩ Бид гурав – Т ᠂ Юмсүрэн
454ᠪᠢᠳᠠ ᠭᠤᠷᠪᠠ
ᠲ· ᠶᠦᠮᠰᠥ᠋ᠷᠦᠩ
( ᠱᠣᠭ ᠥᠭᠦᠯᠡᠯᠭᠡ)
ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠲᠡᠯᠡ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠨᠠᠳᠠ ᠤᠷᠤᠭᠤ ᠬᠠᠨᠳᠤᠨ᠄
— ᠨᠠᠪᠲᠠᠰᠤ ᠬᠥᠳᠥᠰᠥ ᠬᠣᠶᠠᠷ ᠬᠠᠮᠢᠭᠠ ᠣᠴᠢᠭᠰᠠᠨ ᠪᠢᠯᠡ ᠭᠡᠯᠡ᠃ ᠪᠢ ᠭᠠᠳᠠᠭᠰᠢ ᠪᠠᠨ ᠠᠵᠢᠯ ᠢ᠋ᠶ᠋ᠠᠷ ᠶᠠᠪᠤᠭᠠᠳ ᠢᠷᠡᠭᠰᠡᠨ ᠤᠴᠢᠷ ᠮᠡᠳᠡᠬᠦ ᠦᠭᠡᠢ ᠭᠡᠯᠡ᠃ ᠳᠠᠷᠤᠭᠠ ᠥᠭᠡᠳᠡ ᠡᠴᠡ ᠮᠢᠨᠢ ᠨᠤᠬᠤᠴᠢᠲᠠᠢᠬᠠᠨ ᠬᠠᠷᠠᠭᠠᠳ᠄
— ᠲᠡᠭᠡᠬᠦ ᠪᠡᠷ ᠢ᠋ᠶ᠋ᠡᠨ ᠴᠢ ᠲᠡᠷᠡ ᠬᠣᠶᠠᠷ ᠢ᠋ ᠲᠦᠷᠭᠡᠬᠡᠨ ᠣᠯᠵᠤ ᠢᠷᠡᠨᠡ ᠳᠠ᠂ ᠣᠳᠣ ᠴᠢᠬᠤᠯᠠ ᠬᠤᠷᠠᠯ ᠲᠠᠢ ᠭᠡᠪᠡ᠃ ᠪᠢ ᠬᠠᠳᠬᠤᠭᠤᠯᠤᠭᠰᠠᠨ ᠮᠡᠲᠦ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠣᠭᠯᠣ ᠬᠠᠷᠠᠢᠨ ᠪᠣᠰᠤᠭᠠᠳ ᠭᠠᠳᠠᠭᠰᠢ ᠭᠠᠷᠤᠯᠠ᠃ ᠲᠡᠳᠡᠨ ᠢ᠋ ᠬᠠᠶᠠ ᠢᠩᠭᠢᠵᠦ ᠣᠯᠵᠤ ᠢᠷᠡᠳᠡᠭ ᠪᠣᠯᠬᠣᠷ ᠢ᠋ᠶ᠋ᠠᠨ ᠬᠠᠮᠢᠭᠠ ᠪᠠᠢᠭᠠ ᠪᠣᠯ ᠭᠡᠵᠦ ᠬᠠᠢᠭᠰᠠᠨ ᠦᠭᠡᠢ ᠰᠢᠭᠤᠳᠬᠠᠨ《 ᠰᠣᠯᠣᠩᠭᠠ》 ᠷᠧᠰᠲ᠋ᠣᠷᠠᠨ ᠤᠷᠤᠭᠤ ᠠᠯᠬᠤᠯᠠ᠃ ᠣᠷᠣᠲᠠᠯᠠ ᠮᠠᠨ ᠤ᠋ ᠬᠣᠶᠠᠷ ᠮᠤᠬᠤᠷ ᠤ᠋ᠨ ᠰᠢᠷᠡᠭᠡᠨ ᠳ᠋ᠦ᠍ ᠳᠡᠷᠭᠡᠳᠡ ᠪᠡᠨ ᠬᠡᠳᠦᠨ ᠰᠢᠯ ᠫᠢᠸᠣ᠋ ᠲᠠᠯᠪᠢᠭᠰᠠᠨ ᠪᠠᠢᠪᠠ᠃ ᠪᠢ ᠴᠦ᠍ ᠲᠡᠷᠡ ᠬᠣᠶᠠᠷ ᠤ᠋ᠨ ᠳᠡᠷᠭᠡᠳᠡ ᠬᠦᠷᠴᠦ ᠣᠴᠢᠭᠠᠳ᠄
— ᠶᠠᠪᠤᠶᠠ ᠴᠢᠬᠤᠯᠠ ᠬᠤᠷᠠᠯ ᠲᠠᠢ ᠭᠡᠨᠡ᠂ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠳᠠᠭᠤᠳᠠᠵᠤ ᠪᠠᠢᠨᠠ ᠭᠡᠯᠡ᠃ ᠨᠠᠪᠲᠠᠰᠤ ᠳᠠᠭᠤ ᠦᠭᠡᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠭᠠᠷ ᠢ᠋ᠶ᠋ᠠᠨ ᠵᠥᠷᠢᠭᠦᠯᠦᠨ ᠲᠣᠩᠭᠣᠢᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠨᠠᠳᠠ ᠤᠷᠤᠭᠤ ᠡᠷᠭᠢᠵᠦ ᠬᠠᠷᠠᠭᠠᠳ᠄
— ᠶᠠᠭᠤ ᠭᠡᠯᠡ ᠭᠡᠨᠡ ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠳᠠᠯᠵᠢᠢᠯᠭᠠᠨ ᠰᠠᠭᠤᠪᠠ᠃ ᠪᠢ ᠥᠨᠥ ᠦᠭᠡ ᠪᠡᠨ ᠠᠬᠢᠨ ᠬᠡᠯᠡᠪᠡ᠃ ᠭᠡᠲᠡᠯᠡ ᠬᠥᠳᠥᠰᠥ ᠭᠤᠸᠠᠢ ᠰᠢᠷᠡᠭᠡᠨ ᠦ᠌ ᠨᠥᠭᠦᠭᠡ ᠲᠠᠯᠠ ᠠ᠋ᠴᠠ ᠰᠠᠭᠤᠳᠠᠯ ᠳ᠋ᠠᠭᠠᠨ ᠬᠠᠪᠢᠳᠠᠭᠰᠠᠨ ᠢ᠋ᠶ᠋ᠠᠨ᠄
— ᠵᠠ᠂ ᠲᠡᠭᠡᠭᠡᠳ ᠶᠠᠭᠤᠨ ᠤ᠋ ᠲᠤᠬᠠᠢ ᠬᠤᠷᠠᠯ ᠭᠡᠵᠦ ᠠᠰᠠᠭᠤᠪᠠ᠃ ᠪᠢ᠄
— ᠵᠠ ᠲᠦᠷᠭᠡᠯᠡᠭᠡᠴᠢ᠂ ᠲᠤᠩ ᠴᠢᠬᠤᠯᠠ ᠬᠤᠷᠠᠯ ᠭᠡᠰᠡᠨ ᠰᠢᠦ ᠳᠡ ᠭᠡᠳ ᠬᠣᠶᠠᠭᠤᠯᠠ ᠶ᠋ᠢᠨ ᠬᠢᠨ ᠭᠠᠷ ᠠ᠋ᠴᠠ ᠬᠥᠲᠥᠯᠪᠡ᠃
ᠨᠠᠪᠲᠠᠰᠤ ᠨᠠᠳᠠ ᠤᠷᠤᠭᠤ ᠤᠷᠢᠳᠤ ᠶ᠋ᠢᠨ ᠶᠠᠩᠵᠤ ᠪᠠᠷ ᠳᠤᠬᠤ ᠪᠠᠷ ᠢ᠋ᠶ᠋ᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠪᠣᠰᠴᠤ ᠨᠢᠭᠡ ᠰᠠᠨᠳᠠᠯᠢ ᠠᠪᠴᠢᠷᠠᠨ᠄《 ᠠᠯᠢᠪ ᠳᠡᠭᠦᠦ ᠮᠢᠨᠢ ᠰᠠᠭᠤ》 ᠭᠡᠪᠡ᠃ ᠪᠢ ᠰᠠᠭᠤᠭᠰᠠᠨ ᠦᠭᠡᠢ᠂ ᠲᠡᠭᠡᠲᠡᠯᠡ ᠬᠣᠶᠠᠷ ᠮᠥᠷᠥ ᠤᠷᠤᠭᠤ ᠴᠢᠩᠭᠠ ᠳᠠᠷᠤᠨ ᠰᠠᠭᠤᠯᠭᠠᠭᠠᠳ ᠥᠷᠥᠭᠡᠰᠦᠨ ᠭᠠᠷ ᠠ᠋ᠴᠠ ᠪᠠᠷᠢᠴᠢᠬᠠᠪᠠ ᠃ᠲᠡᠭᠡᠭᠡᠳ᠄
— ᠶᠠᠭᠤ ᠰᠢᠦ ᠭᠦ᠂ ᠴᠢ ᠪᠢᠳᠡ ᠭᠤᠷᠪᠠ ᠨᠢᠭᠡ ᠬᠡᠯᠲᠡᠰ ᠲᠤ ᠭᠤᠷᠪᠠᠨ ᠵᠢᠯ ᠬᠠᠮᠲᠤ ᠠᠵᠢᠯᠯᠠᠯᠠ᠂ ᠪᠡᠶᠡ ᠪᠠᠶᠠᠨ ᠤ᠋ ᠪᠠᠨ ᠵᠠᠩ ᠢ᠋ ᠵᠦᠭᠡᠷ ᠦᠭᠡᠢ ᠰᠠᠢᠨ ᠮᠡᠳᠡᠨᠡ ᠳᠠ᠂ ᠲᠡᠭᠡᠭᠡᠳ ᠴᠢ ᠪᠢᠳᠡ ᠬᠣᠶᠠᠷ ᠲᠤ ᠢᠩᠭᠢᠵᠦ ᠠᠯᠪᠠᠷᠬᠠᠤ ᠬᠡᠷᠡᠭ ᠪᠠᠢᠨᠠ ᠤᠤ? ᠮᠠᠢ ᠡᠭᠦᠨ ᠢ᠋ ᠤᠤᠭᠤ ᠭᠡᠳ ᠠᠶᠠᠭᠠ ᠲᠠᠢ ᠫᠢᠸᠣ᠋ ᠶ᠋ᠢ ᠮᠢᠨᠦ ᠠᠮᠠ ᠤᠷᠤᠭᠤ ᠣᠢᠷᠠᠲᠤᠭᠤᠯᠪᠠ᠃ ᠪᠢ ᠤᠤᠭᠤᠵᠤ ᠴᠢᠳᠠᠳᠠᠭ ᠦᠭᠡᠢ ᠪᠡᠨ ᠬᠡᠯᠡᠯᠡ᠂ ᠬᠥᠲᠥᠰᠦ ᠬᠠ ᠬᠠ ᠬᠥᠬᠥᠷᠡᠨ᠄
— ᠪᠢᠳᠡ ᠨᠠᠷ ᠴᠢᠨᠢ ᠬᠠᠶᠠ ᠶᠠᠭᠤᠮᠠ ᠤᠤᠭᠤᠵᠤ ᠶᠠᠪᠤᠬᠤ ᠬᠡᠷᠡᠭᠲᠡᠢ ᠶᠦᠮ ᠰᠢᠦ ᠬᠦ᠂ ᠠᠩ ᠭᠡᠪᠡ᠃ ᠲᠡᠭᠡᠲᠡᠯᠡ ᠨᠠᠪᠲᠠᠰᠤ ᠪᠠᠬᠢᠮ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠢᠨᠦ ᠰᠢᠯᠢᠨ ᠬᠦᠵᠦᠭᠦᠨ ᠡᠴᠡ ᠴᠢᠩᠭᠠ ᠠᠳᠬᠤᠭᠠᠳ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠶᠠᠭᠠ ᠶ᠋ᠢ ᠠᠮᠠ ᠤᠷᠤᠭᠤ ᠲᠣᠩᠭᠣᠢᠯᠭᠠᠪᠠ᠃ ᠪᠢ ᠬᠠᠷᠴᠠᠭᠠᠢ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠨ ᠪᠣᠯᠵᠣᠮᠣᠷ ᠠᠳᠠᠯᠢ ᠪᠦᠯᠲᠡᠭᠡᠨᠡᠨ ᠬᠠᠬᠠᠵᠤ ᠴᠡᠴᠡᠨ ᠥᠨᠥ ᠠᠢᠷᠠᠭ ᠢ᠋ ᠨᠢ ᠪᠠᠯᠭᠤᠵᠤ ᠡᠬᠢᠯᠡᠪᠡ᠃ ᠬᠡᠳᠦ ᠳᠠᠬᠢᠨ ᠴᠠᠴᠠᠭᠠᠳ ᠠᠷᠠᠢ ᠭᠡᠵᠦ ᠨᠢᠭᠡ ᠤᠤᠭᠤᠵᠤ ᠳᠠᠭᠤᠰᠬᠠᠪᠠ᠃ ᠲᠡᠭᠡᠭᠡᠳ ᠪᠣᠰᠬᠤ ᠭᠡᠲᠡᠯᠡ ᠪᠤᠰᠬᠠᠬᠰᠡᠨ ᠦᠭᠡᠢ᠂ ᠪᠣᠰᠢᠭᠣ ᠶᠠᠪᠤᠶᠠ ᠭᠡᠪᠡ᠃
ᠬᠥᠳᠥᠰᠥ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠵᠠᠰᠠᠭᠰᠠᠨ ᠢ᠋ᠶ᠋ᠠᠨ᠄
— ᠵᠠ᠂ ᠲᠡᠭᠡᠭᠡᠳ ᠡᠭᠦᠨ ᠢ᠋ ᠪᠡᠨ ᠤᠤᠭᠤᠭᠠᠳ ᠯᠠ ᠶᠠᠪᠤᠶᠠ᠂ ᠨᠢᠭᠡᠨᠲᠡ ᠠᠪᠴᠢᠬᠠᠭᠰᠠᠨ ᠶᠤᠮ ᠠᠰᠬᠠᠯ ᠲᠠᠢ ᠪᠢᠰᠢ ᠭᠡᠪᠡ᠃ ᠨᠠᠪᠲᠠᠰᠤ ᠠᠶᠠᠭᠠ ᠲᠠᠢ ᠪᠠᠨ ᠠᠪᠴᠤ ᠳᠠᠬᠢᠨ ᠨᠠᠳᠠ ᠳ᠋ᠤ᠌ ᠥᠭᠪᠡ᠃
— ᠪᠢ ᠤᠤᠭᠤᠳᠠᠭ ᠦᠭᠡᠢ ᠲᠠ ᠬᠣᠶᠠᠷ ᠮᠡᠳᠡᠨᠡ ᠰᠢᠦ ᠳᠡ᠂ ᠣᠳᠣ ᠶᠡᠷᠦ ᠤᠤᠭᠤᠵᠤ ᠴᠢᠳᠠᠬᠤ ᠦᠭᠡᠢ᠂ ᠲᠦᠷᠦᠭᠦᠴᠢ ᠶ᠋ᠢᠨ ᠤᠤᠭᠤᠭᠰᠠᠨ ᠨᠢ ᠪᠤᠴᠠᠵᠤ ᠭᠠᠷᠴᠢᠬᠠᠬᠤ ᠭᠡᠳ ᠪᠠᠢᠨᠠ ᠭᠡᠵᠦ ᠤᠴᠢᠷᠯᠠᠪᠠ᠃ ᠨᠠᠪᠲᠠᠰᠤ᠄
— ᠶᠠᠭᠤ ᠰᠢᠦ ᠳᠡᠭᠦᠦ ᠮᠢᠨᠢ᠂ ᠴᠢ ᠡᠨᠡ ᠪᠠᠢᠭᠤᠯᠤᠯᠭᠠ ᠳ᠋ᠤ᠌ ᠢᠷᠡᠭᠡᠳ ᠭᠤᠷᠪᠠᠬᠠᠨ ᠵᠢᠯ ᠪᠣᠯᠵᠤ ᠪᠠᠢᠭᠠ ᠰᠢᠦ᠂ ᠴᠢ ᠪᠢᠳᠡ ᠭᠤᠷᠪᠠ ᠠᠪᠳᠠᠭ ᠴᠠᠯᠢᠩ ᠠᠳᠠᠯᠢ᠂ ᠠᠯᠪᠠᠨ ᠲᠤᠰᠢᠶᠠᠯ ᠢᠵᠢᠯᠢ ᠴᠤ᠌ ᠭᠡᠰᠡᠨ ᠬᠣᠶᠠᠷ ᠠᠬᠠ ᠴᠢᠨᠢ ᠴᠢᠮᠠ ᠠ᠋ᠴᠠ ᠠᠷᠠᠢ ᠣᠯᠠᠨ ᠣᠢᠮᠣᠰᠤ ᠡᠯᠡᠭᠡᠭᠰᠡᠨ ᠢ᠋ ᠮᠠᠷᠲᠠᠬᠤ ᠦᠭᠡᠢ ᠪᠢᠵᠡ ᠳᠡ ᠭᠡᠳ ᠨᠠᠮᠵᠤᠷᠳᠠᠩᠭᠤᠢ ᠬᠠᠷᠠᠪᠠ᠃ ᠪᠢ ᠳᠡᠮᠡᠢ ᠯᠡ ᠢᠷᠪᠠᠢᠨ᠄
— ᠤᠤᠭᠤᠬᠤ ᠦᠭᠡᠢ ᠤᠤᠭᠤᠬᠤ ᠦᠭᠡᠢ ᠭᠡᠳ ᠲᠣᠯᠣᠭᠠᠢ ᠰᠡᠭᠰᠦᠷᠦᠯᠡ᠃ ᠲᠡᠭᠡᠲᠡᠯᠡ ᠠᠶᠠᠭᠠ ᠲᠠᠢ ᠶ᠋ᠢ ᠰᠢᠭᠤᠳᠬᠠᠨ ᠠᠪᠴᠤ ᠠᠮᠠ ᠤᠷᠤᠭᠤ ᠮᠢᠨᠢ ᠲᠣᠩᠭᠣᠢᠯᠭᠠᠪᠠ᠃ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤ ᠭᠠᠷᠴᠤ ᠬᠠᠬᠠᠵᠤ ᠴᠡᠴᠡᠨ ᠠᠷᠠᠢ ᠭᠡᠵᠦ ᠵᠠᠯᠭᠢᠯᠠᠯᠠ᠃ ᠬᠥᠳᠥᠰᠥ ᠭᠤᠸᠠᠢ᠄
— ᠵᠠ᠂ ᠴᠢ ᠬᠡᠳᠦᠨ ᠬᠣᠷᠣᠮ ᠲᠠᠭ ᠳᠠᠭᠤ ᠦᠭᠡᠢ ᠬᠦᠯᠢᠶᠡᠵᠦ ᠪᠠᠢ᠂ ᠪᠢᠳᠡ ᠬᠣᠶᠠᠷ ᠭᠤᠷᠪᠠᠬᠠᠨ ᠦᠭᠡ ᠰᠣᠯᠢᠭᠠᠳ ᠤᠷᠭᠢᠶᠠ ᠭᠡᠳ ᠢᠨᠢᠶᠡᠪᠡ᠃
ᠪᠢ ᠶᠠᠭᠠᠬᠢᠵᠤ ᠪᠣᠯᠤᠭᠰᠠᠨ ᠦᠭᠡᠢ ᠳᠠᠭᠤ ᠦᠭᠡᠢᠬᠡᠨ ᠰᠠᠭᠤᠵᠤ ᠪᠠᠢᠪᠠ᠃ ᠲᠡᠭᠡᠲᠡᠯᠡ ᠨᠠᠪᠲᠠᠰᠤ᠄
— ᠶᠠᠭᠤ ᠰᠢᠦ ᠬᠦ᠂ ᠲᠡᠭᠡᠬᠦ ᠪᠡᠷ ᠮᠠᠨ ᠤ᠋ ᠬᠣᠲᠠ ᠡᠳᠦᠷ ᠡᠴᠡ ᠡᠳᠦᠷ ᠢᠷᠡᠬᠦ ᠲᠣᠰᠤᠮ ᠤᠯᠠᠮ ᠰᠠᠢᠬᠠᠨ ᠪᠣᠯᠵᠤ ᠪᠠᠢᠨᠠ᠂ ᠬᠠᠢ ᠳᠠ ᠡᠨᠡ ᠰᠢᠨᠡ ᠬᠣᠷᠢᠶᠠᠯᠠᠯ ᠤᠤ ᠭᠡᠳ ᠨᠢᠳᠦ ᠠᠨᠢᠭᠰᠠᠨ ᠢ᠋ᠶ᠋ᠠᠨ᠄
— ᠬᠠᠷᠢᠨ ᠬᠣᠲᠠ ᠳ᠋ᠤ᠌ ᠭᠤᠸᠠᠩᠵᠠ᠂ ᠬᠠᠯᠠᠭᠤᠨ ᠤᠰᠤ ᠶ᠋ᠢ ᠲᠤᠩ ᠣᠯᠠᠰᠢᠷᠠᠭᠤᠯᠵᠤ᠂ ᠬᠣᠷᠢᠨ ᠳᠥᠷᠪᠡᠨ ᠴᠠᠭ ᠤ᠋ᠨ ᠦᠢᠯᠡᠴᠢᠯᠡᠭᠡ ᠲᠡᠢ ᠪᠣᠯᠭᠠᠪᠠᠯ ᠬᠠᠢ ᠮᠥᠨ ᠰᠠᠢᠬᠠᠨ ᠪᠣᠯᠤᠨᠠ ᠳᠠ᠃ ᠭᠤᠸᠠᠩᠵᠠᠨ ᠤ᠋ ᠦᠢᠯᠡᠴᠢᠯᠡᠭᠴᠢ᠂ ᠳᠡᠯᠭᠡᠭᠦᠷ ᠦ᠋ᠨ ᠬᠤᠳᠠᠯᠳᠤᠭᠴᠢ᠂ ᠠᠦ᠋ᠲ᠋ᠣᠪᠦ᠋ᠰ ᠦ᠋ᠨ ᠮᠥᠩᠭᠥ ᠬᠤᠷᠢᠶᠠᠭᠴᠢᠳ ᠤ᠋ᠨ ᠠᠭᠠᠰᠢ ᠦᠢᠯᠡᠴᠢᠯᠡᠭᠡ ᠭᠡᠪᠡᠯ ᠠᠷᠠᠢ ᠯᠠ ᠨᠢᠭᠡ ᠲᠠᠮᠡᠢᠬᠡᠨ ᠪᠠᠢᠬᠤ ᠪᠣᠢ᠂ ᠲᠡᠳᠡ ᠨᠠᠷ ᠤ᠋ᠨ ᠬᠠᠷᠠᠴᠠᠨ ᠤ᠋ ᠰᠢᠷᠦᠭᠦᠨ᠂ ᠠᠭᠠᠰᠢᠨ ᠤ᠋ ᠮᠠᠭᠤᠬᠠᠢ ᠶ᠋ᠢ ᠶᠠᠭᠠᠬᠢᠨᠠ᠂ ᠫᠧᠢ ᠭᠡᠳ ᠨᠢᠳᠦ ᠪᠡᠨ ᠠᠨᠢᠯᠠ᠃ ᠬᠥᠳᠥᠰᠥ ᠭᠤᠸᠠᠢ ᠡᠢᠨ ᠶᠠᠷᠢᠯᠠ᠄
— ᠵᠠ ᠨᠠᠪᠲᠠᠰᠤ ᠮᠢᠨᠢ ᠶᠠᠭᠤᠮᠠ ᠶ᠋ᠢ ᠶᠠᠷᠢᠬᠤ ᠳ᠋ᠤ᠌ ᠤᠴᠢᠷ ᠪᠣᠢ᠂ ᠴᠢ ᠪᠢᠳᠡ ᠬᠣᠶᠠᠷ ᠡᠨᠳᠡ ᠢᠩᠭᠢᠵᠦ ᠳᠡᠮᠡᠢ ᠶᠠᠷᠢᠳᠠᠭ ᠴᠤ᠌ ᠶᠠᠭᠠᠬᠢᠬᠤᠪ᠂ ᠪᠢᠳᠡ ᠥᠨᠥᠳᠥᠷ ᠵᠢᠭᠠᠬᠠᠨ ᠢᠰᠬᠦᠯᠡᠩ ᠶᠠᠭᠤᠮᠠ ᠤᠤᠭᠤᠴᠢᠬᠠᠭᠰᠠᠨ ᠦᠶᠡ ᠳ᠋ᠡᠭᠡᠨ ᠢᠩᠭᠢᠵᠦ ᠶᠠᠷᠢᠬᠤ ᠬᠡᠷᠡᠭ ᠠᠯᠠᠭᠠ᠂ ᠴᠢ ᠮᠠᠷᠭᠠᠰᠢ ᠡᠷᠡᠭᠦᠯ ᠳ᠋ᠡᠭᠡᠨ ᠬᠣᠲᠠ ᠶ᠋ᠢᠨ ᠵᠠᠬᠢᠷᠭᠠᠨ ᠳ᠋ᠤ᠌ ᠣᠴᠢᠭᠠᠳ ᠬᠡᠯᠡ᠃ ᠡᠰᠡᠪᠡᠯ ᠰᠣᠨᠢᠨ ᠳ᠋ᠤ᠌ ᠰᠠᠶ᠋ᠢᠬᠠᠨ ᠪᠠᠷᠢᠮᠲᠠ ᠳᠤᠷᠠᠳᠤᠭᠠᠳ ᠥᠭᠦᠯᠡᠯ ᠪᠢᠴᠢᠵᠦ ᠣᠷᠬᠢ ᠭᠡᠪᠡ᠃ ᠨᠠᠪᠲᠠᠰᠤ ᠲᠠᠭᠠᠵᠠ ᠥᠭᠡᠳᠡ ᠬᠡᠰᠡᠭ ᠬᠠᠷᠠᠭᠰᠠᠨ ᠶ᠋ᠢᠠᠨ᠄
— ᠶᠠᠭᠤ ᠰᠢᠦ ᠬᠦ᠋᠂ ᠲᠡᠭᠡᠬᠦ ᠪᠡᠷ ᠴᠢᠨᠢ ᠠᠷᠠᠢ ᠲᠤᠰᠠᠲᠠᠢ ᠶᠤᠮ ᠤᠤ ᠳ᠋ᠠ᠂ ᠰᠣᠨᠢᠨ ᠳ᠋ᠤ᠌ ᠪᠢᠴᠢᠬᠦ ᠪᠡᠷ ᠴᠢᠨᠢ ᠬᠥᠮᠦᠨ ᠠᠮᠢᠲᠠᠨ ᠤ ᠨᠡᠷᠡ ᠤᠰᠤ ᠳᠤᠷᠠᠳᠬᠤ ᠪᠣᠯᠤᠨᠠ᠂ ᠲᠡᠭᠡᠬᠦ ᠪᠡᠷ ᠠᠮᠢᠲᠠᠨ ᠲᠠᠢ ᠥᠰᠢᠲᠡᠨ ᠪᠣᠯᠤᠨᠠ᠃ ᠲᠡᠭᠡᠭᠡᠳ ᠯᠡ ᠬᠥᠮᠦᠨ ᠦ ᠮᠠᠭᠤ ᠦᠵᠡᠭᠰᠡᠨ ᠬᠥᠮᠦᠨ ᠳ᠋ᠤ᠌ ᠬᠡᠨ ᠰᠠᠶ᠋ᠢᠨ ᠪᠠᠶ᠋ᠢᠬᠤᠪ ᠳ᠋ᠠ ᠡᠩ ᠭᠡᠳ ᠠᠮᠠ ᠪᠠᠨ ᠲᠣᠮᠣ ᠠᠩᠭᠠᠶ᠋ᠢᠭᠠᠳ ᠪᠢᠳᠡ ᠬᠣᠶᠠᠷ ᠤᠷᠤᠭᠤ ᠡᠭᠡᠯᠵᠢᠯᠡᠨ ᠬᠠᠷᠠᠯᠠ᠃ ᠬᠥᠲᠥᠰᠦ᠄ ᠬᠥᠮᠥᠰᠬᠡ ᠠᠲᠤᠷᠢᠭᠤᠯᠤᠨ ᠠᠶᠠᠷᠬᠠᠨ ᠰᠠᠨᠠᠭᠠ ᠠᠯᠳᠠᠯᠠ᠃
— ᠵᠠ᠂ ᠴᠢ ᠦᠨᠡᠬᠡᠷ ᠬᠣᠲᠠ ᠶ᠋ᠢᠨ ᠶ᠋ᠢᠡᠨ ᠰᠠᠶ᠋ᠢᠨ ᠰᠠᠶ᠋ᠢᠬᠠᠨ ᠤ ᠲᠥᠯᠥᠭᠡ ᠰᠠᠨᠠᠭᠠ ᠲᠠᠯᠪᠢᠳᠠᠭ ᠶᠤᠮ ᠪᠣᠯ ᠡᠨᠳᠡ ᠢᠩᠭᠢᠵᠦ ᠶᠠᠷᠢᠵᠤ ᠪᠠᠶ᠋ᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠡᠭᠦᠨ ᠊ᠢ ᠪᠡᠨ ᠠᠵᠢᠯ ᠪᠣᠯᠭᠠᠬᠤ ᠶᠠᠭᠤᠮᠠ ᠬᠢᠭᠡᠴᠢ ᠬᠦ᠋᠂ ᠬᠥᠮᠦᠨ ᠲᠡᠢ ᠡᠪ ᠳᠥᠨᠵᠢᠨ ᠲᠠᠰᠤᠷᠠᠬᠤ ᠦᠭᠡᠢ ᠶ᠋ᠢ ᠬᠠᠷᠠᠭᠠᠳ ᠶᠠᠪᠤᠪᠠᠯ ᠠᠯᠢᠪᠠ ᠶᠠᠭᠤᠮᠠ ᠮᠥᠨ ᠯᠡ ᠬᠡᠴᠡᠭᠦᠦ ᠪᠣᠯᠤᠨᠠ ᠳ᠋ᠠ ᠭᠡᠳ ᠳᠣᠭᠣᠭᠢᠲᠠᠢ ᠨᠢ ᠠᠷᠭᠠ ᠦᠭᠡᠢ ᠢᠨᠢᠶᠡᠪᠡ᠃ ᠨᠠᠪᠲᠠᠰᠤ ᠭᠤᠸᠠᠢ ᠨᠢᠳᠦ ᠪᠡᠨ ᠪᠦᠯᠲᠡᠭᠡᠨᠡᠭᠦᠯᠦᠨ᠄
— ᠶᠠᠭᠤ ᠰᠢᠦ ᠬᠦ᠋᠃ ᠶᠠᠭᠤᠮᠠ ᠪᠦᠷᠢ ᠳ᠋ᠤ᠌ ᠦᠨᠡᠨᠴᠢ ᠪᠡᠷ ᠬᠠᠨᠳᠤᠵᠤ ᠪᠣᠯᠬᠤ ᠦᠭᠡᠢ᠂ ᠥᠪᠡᠷ ᠦ᠋ᠨ ᠲᠣᠯᠣᠭᠠᠢ ᠲᠠᠢ ᠬᠣᠯᠪᠣᠭᠠᠲᠠᠢ ᠶᠠᠭᠤᠮᠠ ᠪᠣᠯ ᠠᠮᠠ ᠪᠠᠨ ᠪᠠᠷᠢᠭᠠᠳ ᠪᠡᠶᠡ ᠪᠡᠨ ᠵᠠᠶ᠋ᠢᠯᠠᠭᠤᠯᠤᠭᠠᠳ ᠪᠠᠶ᠋ᠢᠬᠤ ᠨᠢ ᠳᠡᠭᠡᠷᠡ ᠳ᠋ᠡ᠂ ᠴᠢ ᠪᠣᠳᠣᠭᠠᠳ ᠦᠵᠡᠭᠴᠢ᠂ ᠡᠨᠡ ᠪᠠᠶ᠋ᠢᠭᠤᠯᠭᠠ ᠳ᠋ᠤ᠌ ᠨᠠᠳᠠ ᠲᠠᠢ ᠬᠠᠮᠠᠷ ᠦ᠋ᠨ ᠦᠵᠦᠭᠦᠷ ᠮᠤᠷᠤᠶ᠋ᠢᠬᠰᠠᠨ ᠬᠥᠮᠦᠨ ᠳᠠᠩᠴᠤ ᠪᠠᠶ᠋ᠢᠬᠤ ᠦᠭᠡᠢ ᠳ᠋ᠠ᠃ ᠲᠡᠭᠡᠭᠡᠳ ᠴᠦ᠍ ᠬᠥᠮᠦᠰ ᠨᠠᠳᠠ ᠲᠠᠢ ᠮᠠᠭᠤ ᠦᠭᠡᠢ ᠰᠢᠦ ᠬᠦ᠋᠂ ᠪᠢ ᠲᠠ ᠨᠠᠷ ᠠ᠋ᠴᠠ ᠬᠠᠮᠤᠭ ᠦ᠋ᠨ ᠲᠦᠷᠦᠭᠦᠨ ᠪᠠᠶ᠋ᠢᠷᠢᠨ ᠳ᠋ᠤ᠌ ᠣᠷᠣᠯᠠ᠂ ᠡᠨᠡ ᠴᠢᠨᠢ ᠡᠭᠦᠨ ᠦ ᠯᠡ ᠠᠴᠢ ᠳ᠋ᠠ ᠭᠡᠪᠡ᠃ ᠬᠥᠲᠥᠰᠦ᠄ ᠬᠡᠩ ᠭᠡᠵᠦ ᠳᠠᠭᠤ ᠠᠯᠳᠠᠭᠰᠠᠨ ᠶ᠋ᠢᠠᠨ᠄
— ᠵᠠ᠂ ᠴᠢᠮᠠ ᠰᠢᠭ᠋ ᠢᠩᠭᠢᠵᠦ ᠶᠠᠪᠤᠪᠠᠯ ᠬᠡᠴᠡᠭᠦᠦ ᠬᠡᠷᠡᠭ ᠪᠠᠶ᠋ᠢᠨᠠ ᠳ᠋ᠠ᠂ ᠬᠠ ᠬᠠ ᠬᠠ ᠭᠡᠳ ᠵᠢᠭᠠᠬᠠᠨ ᠬᠥᠬᠥᠷᠡᠪᠡ᠃ ᠨᠠᠪᠲᠠᠰᠤ ᠨᠢᠳᠦ ᠪᠡᠨ ᠠᠨᠢᠨ ᠪᠣᠳᠣᠯᠬᠢᠯᠠᠭᠰᠠᠨ ᠶ᠋ᠢᠠᠨ᠄
— ᠶᠠᠭᠤ ᠰᠢᠦ ᠬᠦ᠋᠂ ᠶᠠᠭ ᠦᠨᠡᠨ ᠰᠢᠦ᠂ ᠡᠨᠡ ᠠᠮᠢᠳᠤᠷᠠᠯ ᠭᠡᠳᠡᠭ ᠴᠢᠨᠢ ᠤᠴᠢᠷᠲᠠᠢ ᠬᠦ᠋ ᠭᠡᠳ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ ᠪᠥᠬᠥᠶ᠋ᠢᠨ ᠳᠣᠭᠣᠰᠢ ᠪᠣᠯᠤᠭᠰᠠᠨ ᠶ᠋ᠢᠠᠨ᠄
— ᠳ᠋ᠠᠰᠢ ᠶ᠋ᠢ ᠬᠠᠷᠠ ᠳ᠋ᠠ ᠬᠦ᠋᠂ ᠠᠵᠤ ᠠᠬᠤᠢ ᠶ᠋ᠢᠨ ᠳᠠᠷᠤᠭᠠ ᠳ᠋ᠣᠪᠴᠢᠨ ᠊ᠢ ᠨᠢᠭᠡ ᠤᠳᠠᠭᠠ ᠰᠢᠭᠦᠮᠵᠢᠯᠡᠴᠢᠬᠡᠭᠰᠡᠨ ᠡᠴᠡ ᠬᠣᠶ᠋ᠢᠰᠢ ᠰᠠᠭᠤᠴᠠᠨ ᠳ᠋ᠤ᠌ ᠶᠡᠷᠦ ᠣᠷᠣᠬᠤ ᠦᠭᠡᠢ ᠪᠠᠶ᠋ᠢᠭᠠ ᠶ᠋ᠢ ᠬᠠᠷᠠᠭᠠ ᠪᠢᠵᠡ᠂ ᠡᠨᠡ ᠴᠢᠨᠢ ᠤᠤᠯ ᠨᠢ ᠮᠠᠨ ᠪ ᠪᠠᠶ᠋ᠢᠭᠤᠯᠬ᠋ᠠ ᠳ᠋ᠤ᠌ ᠤᠲᠠᠭᠰᠠᠨ ᠪᠢᠲᠡᠨ ᠡᠴᠡ ᠲᠦᠷᠦᠭᠦᠨ ᠰᠠᠭᠤᠴᠠᠨ ᠳ᠋ᠤ᠌ ᠣᠷᠣᠬᠤ ᠬᠥᠮᠦᠨ ᠪᠠᠶ᠋ᠢᠬᠰᠠᠨ ᠶᠤᠮ ᠳ᠋ᠠ ᠭᠡᠵᠦ ᠶᠠᠷᠢᠯᠠ᠃ ᠬᠥᠲᠥᠰᠦ᠄
— ᠵᠠ ᠴᠢᠮᠠ ᠰᠢᠭ᠋ ᠢᠩᠭᠢᠵᠦ ᠶᠠᠪᠤᠵᠤ ᠪᠠᠶ᠋ᠢᠷᠢᠨ ᠳ᠋ᠤ᠌ ᠣᠷᠣᠭᠰᠠᠨ ᠳ᠋ᠤ᠌ ᠣᠷᠣᠪᠠᠯ ᠪᠠᠶ᠋ᠢᠷᠢ ᠦᠭᠡᠢ ᠶᠠᠪᠤᠭᠰᠠᠨ ᠨᠢ ᠬᠣᠯᠠ ᠳᠡᠭᠡᠷᠡ ᠬᠦ᠋ ᠭᠡᠳ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠤᠠᠪᠠ᠃ ᠨᠠᠪᠲᠠᠰᠤ ᠠᠮᠠ ᠪᠠᠨ ᠠᠩᠭᠠᠶ᠋ᠢᠨ᠄
— ᠠᠢ ᠬᠥᠲᠥᠰᠦ ᠮᠢᠨᠢ ᠲᠡᠭᠡᠵᠦ ᠶᠠᠭᠠᠬᠢᠬᠰᠠᠨ ᠴᠤ᠌ ᠪᠣᠯᠬᠤ ᠦᠭᠡᠢ᠂ ᠶᠠᠭᠤᠮᠠ ᠶ᠋ᠢ ᠠᠷᠭᠠᠯᠠᠵᠤ ᠬᠥᠮᠦᠰ ᠊ᠢ ᠬᠠᠭᠤᠷᠴᠤ ᠶᠠᠪᠤ ᠭᠡᠳ ᠨᠢᠳᠦ ᠪᠡᠨ ᠠᠨᠢᠨ ᠭᠡᠲᠡᠶ᠋ᠢᠯᠡ᠃ ᠬᠥᠲᠥᠰᠦ ᠭᠤᠸᠠᠢ᠄
— ᠶᠣᠰᠣᠲᠠᠢ ᠶᠠᠭᠤᠮᠠ ᠶᠣᠰᠣ ᠪᠠᠷ ᠶ᠋ᠢᠠᠨ ᠪᠠᠶ᠋ᠢᠪᠠᠯ ᠪᠣᠯᠵᠤ ᠭᠡᠳ ᠣᠬᠤᠰᠬᠢᠨ ᠪᠣᠰᠴᠤ ᠡᠭᠦᠳᠡ ᠤᠷᠤᠭᠤ ᠠᠯᠬᠤᠪᠠ᠃ ᠪᠢᠳᠡ ᠭᠤᠷᠪᠠ ᠭᠠᠲᠠᠬ᠋ᠠ ᠭᠠᠷᠴᠤ ᠢᠷᠡᠪᠡᠯ ᠴᠠᠭ ᠲᠠᠯᠢ᠊ᠢ᠍ᠵᠠᠢ᠃
— ᠬᠤᠷᠠᠯ ᠲᠠᠷᠬᠠᠭᠰᠠᠨ ᠪᠠᠶ᠋ᠢᠬᠠ᠁ ᠲᠠ ᠬᠣᠶᠠᠷ ᠠ᠋ᠴᠠ ᠪᠣᠯᠤᠯᠠ ᠭᠡᠵᠦ ᠪᠢ ᠬᠡᠯᠡᠯᠡ᠃ ᠨᠠᠪᠲᠠᠰᠤ ᠭᠤᠸᠠᠢ᠄
— ᠶᠠᠭᠤ ᠰᠢᠦ ᠬᠦ᠋᠂ ᠬᠣᠵᠢᠮᠲᠠᠭᠰᠠᠨ ᠭᠡᠰᠡᠨ ᠶᠠᠪᠤᠭᠠᠳ ᠣᠴᠢᠶᠠ᠂ ᠲᠡᠭᠡᠪᠡᠯ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠭᠤᠬᠤ ᠵᠢᠮᠡᠯᠡᠯ ᠠᠷᠠᠢ ᠭᠡᠵᠦ ᠯᠡ ᠬᠥᠩᠭᠡᠷᠡᠨᠡ ᠭᠡᠳ ᠲᠡᠷᠢᠭᠦᠯᠡᠨ ᠠᠯᠬᠤᠪᠠ᠃ ᠲᠡᠭᠡᠲᠡᠯᠡ ᠬᠥᠲᠥᠰᠦ ᠭᠤᠸᠠᠢ᠄
— ᠵᠠ ᠬᠤᠷᠠᠯ ᠨᠢᠭᠡᠨᠲᠡ ᠲᠠᠰᠤᠯᠠᠭᠰᠠᠨ ᠠ᠋ᠴᠠ ᠴᠠᠭᠠᠰᠢ ᠣᠴᠢᠭᠠᠳ ᠴᠤ᠌ ᠶᠠᠭᠠᠬᠢᠬᠤᠪ᠂ ᠣᠳᠣ ᠭᠡᠷ ᠭᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠶᠠ᠂ ᠮᠠᠷᠭᠠᠰᠢ ᠯᠡ ᠶᠠᠯᠠ ᠵᠢᠮᠡᠯᠡᠯ ᠬᠦᠯᠢᠶᠡᠬᠦ ᠪᠣᠯᠵᠤ ᠭᠡᠳ ᠡᠷᠭᠢᠵᠦ ᠠᠯᠬᠤᠪᠠ᠃ ᠪᠢ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠤᠴᠢᠷ ᠶ᠋ᠢᠠᠨ ᠣᠯᠬᠤ ᠦᠭᠡᠢ ᠳᠤᠮᠳᠠ ᠨᠢ ᠡᠷᠭᠢᠯᠲᠦᠵᠦ ᠪᠠᠶ᠋ᠢᠲᠠᠯᠠ ᠨᠠᠪᠲᠠᠰᠤ ᠡᠷᠭᠢᠨ ᠬᠠᠷᠠᠭᠠᠳ᠄
— ᠶᠠᠭᠤ ᠰᠢᠦ ᠬᠦ᠋᠂᠂ ᠴᠣᠶ᠋ᠢᠵᠢᠨ ᠴᠢ᠂ ᠪᠢᠳᠡ ᠬᠣᠶᠠᠷ ᠊ᠢ ᠣᠯᠵᠤ ᠢᠷᠡᠬᠦ ᠭᠡᠳ ᠭᠠᠷᠤᠭᠰᠠᠨ ᠬᠥᠮᠦᠨ ᠥᠪᠡᠷ ᠶ᠋ᠢᠡᠨ ᠣᠴᠢᠬᠤ ᠪᠣᠯ ᠬᠡᠯᠡ ᠠᠮᠠᠨ ᠳ᠋ᠤ᠌ ᠣᠷᠣᠵᠤ ᠭᠦᠢᠴᠡᠨᠡ ᠰᠢᠦ ᠭᠡᠵᠦ ᠬᠡᠯᠡᠬᠦ ᠳ᠋ᠤ᠌᠂ ᠪᠢ᠄
— ᠨᠡᠭᠡᠷᠡᠨ ᠴᠦ᠍ ᠲᠡᠭᠡᠬᠦ ᠪᠣᠯᠪᠠ ᠤᠤ ᠭᠡᠵᠦ ᠰᠠᠨᠠᠨ ᠠᠵᠢᠯ ᠤᠷᠤᠭᠤ ᠪᠠᠨ ᠶᠠᠪᠤᠪᠠ᠃ ᠬᠦᠷᠴᠦ ᠣᠴᠢᠪᠠᠯ ᠬᠤᠷᠠᠯ ᠡᠷᠲᠡ ᠲᠠᠷᠬᠠᠵᠠᠢ᠃ ᠲᠡᠭᠡᠲᠡᠯᠡ ᠨᠠᠪᠲᠠᠰᠤ ᠭᠤᠸᠠᠢ ᠠᠯᠠᠬ᠋ᠠ ᠪᠣᠯᠴᠢᠬᠠᠪᠠ᠃ ᠪᠢ ᠨᠠᠯᠢᠶᠠᠨ ᠬᠦᠯᠢᠶᠡᠵᠦ ᠰᠠᠭᠤᠭᠰᠠᠨ ᠠᠪᠠᠴᠤ ᠭᠠᠷᠴᠤ ᠢᠷᠡᠳᠡᠭ ᠦᠭᠡᠢ᠃ ᠪᠢ ᠳᠡᠭᠡᠭᠰᠢ ᠭᠠᠷᠴᠤ ᠥᠪᠡᠷ ᠦ᠋ᠨ ᠶ᠋ᠢᠡᠨ ᠡᠭᠦᠲᠡᠨ ᠳ᠋ᠤ᠌ ᠢᠷᠡᠪᠡᠯ ᠬᠡᠨ ᠨᠢᠭᠡ ᠬᠥᠮᠦᠨ᠄
— ᠳᠠᠷᠤᠬ᠋ᠠ ᠡ᠂ ᠮᠠᠨ ᠪ ᠬᠥᠲᠥᠰᠦ ᠴᠣᠶ᠋ᠢᠵᠢᠨ ᠪᠢᠳᠡ ᠭᠤᠷᠪᠠ ᠬᠠᠮᠲᠤ ᠶᠠᠪᠤᠭᠰᠠᠨ ᠶᠤᠮ ᠡ᠂ ᠲᠡᠭᠡᠭᠡᠳ ᠨᠥᠭᠦᠭᠡ ᠬᠣᠶᠠᠷ ᠮᠠᠨᠢ ᠬᠣᠴᠣᠷᠴᠢᠬᠠᠭᠰᠠᠨ᠂ ᠪᠢ ᠶᠠᠭᠠᠷᠠᠭᠰᠠᠭᠠᠷ ᠶᠠᠪᠤᠭᠠᠳ ᠢᠷᠡᠲᠡᠯᠡ ᠬᠤᠷᠠᠯ ᠲᠠᠷᠬᠠᠴᠢᠬᠠᠵᠠᠢ᠃ ᠠᠭᠤᠴᠢᠯᠠᠭᠠᠷᠠᠢ ᠳ᠋ᠠ ᠳᠠᠷᠤᠬ᠋ᠠ ᠮᠢᠨᠢ᠂ ᠮᠢᠨᠦ ᠪᠤᠷᠤᠭᠤ ᠭᠡᠳ ᠶᠠᠷᠢᠵᠤ ᠪᠤᠢ ᠳᠤᠭᠤᠯᠲᠠᠨᠠ᠃ ᠱᠠᠭᠠᠶ᠋ᠢᠵᠤ ᠬᠠᠷᠠᠪᠠᠯ ᠨᠠᠪᠲᠠᠰᠤ ᠭᠤᠸᠠᠢ ᠪᠠᠶ᠋ᠢᠪᠠ᠃
ᠪᠢ ᠦᠭᠡ ᠳᠤᠤᠭᠠᠷᠴᠤ ᠴᠢᠲᠠᠭᠰᠠᠨ ᠦᠭᠡᠢ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠢᠷᠡᠬᠦ ᠳ᠋ᠤ᠌ ᠬᠥᠲᠥᠰᠦ ᠭᠤᠸᠠᠢ ᠪᠢᠳᠡ ᠬᠣᠶᠠᠷ ᠊ᠢ ᠠᠷᠢᠬᠢ ᠤᠤᠭᠤᠵᠤ ᠰᠠᠨᠠᠬ᠋ᠠ ᠲᠠᠢ ᠬᠤᠷᠠᠯ ᠲᠠᠰᠤᠯᠲᠠᠭᠰᠠᠨ ᠭᠡᠳ ᠳᠣᠩᠭᠣᠤᠠᠴᠤ ᠨᠠᠪᠲᠠᠰᠤ ᠭᠤᠸᠠᠢ ᠰᠠᠨᠠᠭᠤᠯᠬ᠋ᠠ ᠠᠪᠴᠤ ᠪᠢᠯᠡ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠠᠯᠲᠠᠨᠴᠢᠮᠡᠭ᠂ ᠣᠳᠣᠨᠬᠤᠸᠠᠷ
ᠬᠢᠨᠠᠭ᠍ᠴᠢ : ᠲᠤᠭᠴᠢ ᠰᠠᠷᠠᠨᠠ
2024᠂ 3᠂ 13 ᠤ ᠡᠳᠦᠷ